Глас 8. В субботу утром. Тропари и стихиры на каждый день

Седа́льны му́ченичны. Гла́с 8:

Свети́ла у́мная яви́стеся, святи́и му́ченицы, мглу́ бо пре́лести упраздни́сте ве́рою, и душе́вныя свещи́ ва́ша просвети́сте, и с Женихо́м со сла́вою внидо́сте в Небе́сный черто́г. И ны́не мо́лим вы́, моли́теся спасти́ся душа́м на́шим.

Сти́х: Ди́вен Бо́г во святы́х Свои́х, Бо́г Изра́илев.

Воздержа́нием страсте́й огнепа́льныя испепели́вше зра́ки и движе́ния, Христо́вы му́ченицы, прия́ша благода́ть, неду́ги отгоня́ти немощству́ющих, и живу́ще и по конце́ чудоде́йствовати. Вои́стинну чу́до пресла́вное, я́ко ко́сти на́ги источа́ют исцеле́ния: сла́ва Еди́ному Бо́гу на́шему.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богоро́дичен: И́же на́с ра́ди рожде́йся от Де́вы, и распя́тие претерпе́в, Благи́й, испрове́ргий сме́ртию сме́рть, и Воскресе́ние явле́й я́ко Бо́г, не пре́зри я́же созда́л еси́ руко́ю Твое́ю: яви́ человеколю́бие Твое́, Ми́лостиве, приими́ ро́ждшую Тя́ Богоро́дицу моля́щуюся за ны́, и спаси́, Спа́се на́ш, лю́ди отча́янныя.

Седа́льны. Гла́с 8.

Проро́цы, му́ченицы Христо́вы, и святи́телие, и́же по́двиг до́брый благочестному́дренно зако́нно сконча́вше, и прии́мше венцы́ неувяда́емыя от Бо́га, непреста́нно моли́те о на́с Его́ бла́гость: я́ко да да́рует на́м прегреше́ний проще́ние, я́ко Бо́г Благоуве́тлив.

Сти́х: Блаже́ни, я́же избра́л и прия́л еси́, Го́споди.

Преста́вльшияся благоче́стно от вре́менных, в селе́ниих избра́нных с пра́ведными сопричти́, Влады́ко, те́х упокоева́я на ме́сте пра́зднующих, и в сла́дости неконча́емей ра́йстей, я́ко Бла́г, во́льная прегреше́ния и нево́льная и́х, за кра́йнюю бла́гость прости́вый, Человеколю́бче.

Сти́х: Ду́ши и́х во благи́х водворя́тся.

Глубино́ю му́дрости человеколю́бно вся́ стро́яй, и поле́зное все́м подава́яй, Еди́не Соде́телю, упоко́й, Го́споди, ду́ши ра́б Твои́х: на Тя́ бо упова́ние возложи́ша, Творца́ и Зижди́теля и Бо́га на́шего.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богоро́дичен: Тебе́ и сте́ну, и приста́нище и́мамы, и моли́твенницу благоприя́тну к Бо́гу, Его́же родила́ еси́, Богоро́дице Безневе́стная, ве́рных спасе́ние.

На хвали́тех стихи́ры му́ченичны, гла́с 8:

Сти́х: Хвали́те Его́ на си́лах Его́, хвали́те Его́ по мно́жеству вели́чествия Его́.

Вельми́ подвиза́стеся, святи́и, му́ки беззако́нных претерпе́сте до́блественне, и Христа́ испове́давше пред цари́; и па́ки преста́вльшеся от жития́, си́лы де́йствуете в ми́ре; и немощны́я исцеля́ете от страсте́й и́х, святи́и, моля́ще спасти́ся душа́м на́шим.

Сти́х: Хвали́те Его́ во гла́се тру́бнем: хвали́те Его́ во псалти́ри и гу́слех.

Му́ченицы Христо́вы непобеди́мии, победи́вше пре́лесть си́лою Кре́стною, наслажда́етеся благода́ти ве́чныя жи́зни; мучи́телей преще́ния не убоя́стеся, му́ками ураня́еми весели́стеся; и ны́не кро́ви ва́ша бы́ша исцеле́ния душа́м на́шим, моли́те спасти́ся душа́м на́шим.

Сти́х: Хвали́те Его́ в тимпа́не и ли́це, хвали́те Его́ во стру́нах и орга́не.

Во броня́ ве́ры обо́лкшеся до́бре, и о́бразом Кре́стным вооружи́вше себе́, во́ини благомо́щнии яви́стеся: мучи́телем му́жески проти́вистеся, и диа́волю пре́лесть низложи́сте, побе́дницы бы́вше, венце́в сподо́бистеся, моля́щеся при́сно о на́с, во е́же спасти́ся на́м.

Сти́х: Хвали́те Его́ в кимва́лех доброгла́сных, хвали́те Его́ в кимва́лех восклица́ния: вся́кое дыха́ние да хва́лит Го́спода.

Безме́рна е́сть блу́дно живу́щим му́ка, скре́жет зубо́в, и пла́ч неуте́шимый, гее́нна о́гненная, и тма́ кроме́шная, и че́рвь неусыпа́емый, сле́зы недействи́тельны, и су́д неми́лостивый. Сего́ ра́ди пре́жде конца́ возопии́м, глаго́люще: Влады́ко Христе́, я́же избра́л еси́, со избра́нными Твои́ми упоко́й.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

А́з, Де́во Свята́я Богоро́дице, к покро́ву Твоему́ прибега́ю, ве́м, я́ко обря́щу Тобо́ю спасе́ние: мо́жеши бо, Чи́стая, помощи́ мне́.

На стихо́вне стихи́ры поко́йны. Гла́с 8.

Ца́рское ми́ подписа́в свобожде́ние, ша́ры червле́ными, пе́рсты Твоя́ окровави́в Влады́ко, и обагри́в Твое́ю Кро́вию. Те́мже Тя́ ве́рою мо́лим: с перворо́дными Твои́ми причти́, и пра́ведных Твои́х ра́дости сподо́би улучи́ти, преше́дшия к Тебе́ Благоутро́бному.

Сти́х: Блаже́ни, я́же избра́л и прия́л еси́ Го́споди.

Свяще́нствовав я́ко Челове́к, закла́н бы́в я́ко А́гнец, приноше́ние приноси́лся еси́ Отцу́, челове́ка от тли́ изыма́я: преста́вльшияся у́бо я́ко Человеколю́бец, в живу́щих стране́ учини́, иде́же пото́цы сла́дости пролива́ются, иде́же исто́чницы присносу́щества истека́ют.

Сти́х: Ду́ши и́х во благи́х водворя́тся.

Глубино́ю му́дрости неизрече́нныя Твоея́ пределополага́еши живо́т, и прови́диши бу́дущая, и к жи́зни друго́й преселя́еши рабы́ Твоя́, я́же прия́л еси́ у́бо, учини́ на вода́х упокое́ния, во све́тлости святы́х, Го́споди, иде́же гла́с ра́дования и хвале́ния.

Сти́х: И па́мять и́х в ро́д и ро́д.

Сло́во сы́й Неви́димый, Единора́сленный Отцу́ и Ду́ху Созра́чный, мене́ ра́ди челове́ка пло́тию яви́лся еси́: я́ко Ми́лостив у́бо и Человеколю́бец, я́же от жития́ преше́дшия, благоле́пия Твоего́ и красоты́ добро́тами, те́х просвети́, Живонача́льнейший.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богоро́дичен: Я́ко заче́нши Безнача́льное Сло́во Бо́га Отца́, ма́терним Твои́м дерзнове́нием приле́жно моли́, Богороди́тельнице, учини́ти рабы́ Твоя́, иде́же ликова́ние пра́ведных непреста́нное веселя́щихся и хва́лящих Тя́, иде́же све́тлость ве́чнующая, и сла́дкий гла́с пра́зднующаго.

Блаже́нна, гла́с 8:

Помяни́ на́с, Христе́ Спа́се ми́ра, я́коже разбо́йника помяну́л еси́ на Дре́ве: и сподо́би все́х, Еди́не Ще́дре, Небе́снаго Ца́рствия Твоего́.

Блаже́ни и́згнани пра́вды ра́ди, я́ко те́х е́сть Ца́рство Небе́сное.

Все́м боле́знем кре́пко приобща́ющеся, я́звами ва́шими святы́ми, страстоте́рпцы, уязви́сте вся́ тмы́ бесо́в, Боже́ственною благода́тию.

Блаже́ни есте́, егда́ поно́сят ва́м, и изжену́т, и реку́т вся́к зо́л глаго́л на вы́ лжу́ще Мене́ ра́ди.

Преподо́бнии Христо́вы, и Боже́ственнии святи́телие, собо́р проро́ческий, и все́х святы́х пра́ведных, Небе́сное получи́ша насле́дие: и́хже по достоя́нию да ублажи́м.

Ра́дуйтеся и весели́теся, я́ко мзда́ ва́ша мно́га на Небесе́х.

Все́х ве́рно от жития́ преста́вленных учини́, Бо́же, в страна́х пра́ведных: и Рая́ покажи́ насле́дники, боголе́пно песносло́вящих Тя́.

Сла́ва Отцу́ и Сы́ну и Свято́му Ду́ху:

Пе́ние Ти́, Тро́ице, приношу́ коне́чное: и́хже от земли́ преста́вила еси́ в ве́ре, святы́х сподо́би селе́ния, и мене́ блу́днаго поми́луй.

И ны́не и при́сно и во ве́ки веко́в. Ами́нь:

Богоро́дичен: Все́х до́брых Исполне́ние ро́ждши, испо́лни на́ша, Де́во, моле́ния. Согреше́ний на́м оставле́ния прося́щи, и просвеще́ния и ве́лия ми́лости.