Глас 7. В воскресенье утром. Тропари и стихиры на каждый день

Тропа́рь воскре́сный, гла́с 7:

Разруши́л еси́ Кресто́м Твои́м сме́рть, отве́рзл еси́ разбо́йнику Ра́й: мироно́сицам пла́ч преложи́л еси́, и апо́столом пропове́дати повеле́л еси́: я́ко воскре́сл еси́, Христе́ Бо́же, да́руяй ми́рови ве́лию ми́лость.

Богоро́дичен: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Я́ко на́шего Воскресе́ния сокро́вище, на Тя́ наде́ющияся, Всепе́тая, от ро́ва и глубины́ прегреше́ний возведи́: Ты́ бо пови́нныя греху́ спасла́ еси́, ро́ждши Спасе́ние на́ше: я́же пре́жде Рождества́ Де́ва, и в Рождестве́ Де́ва, и по Рождестве́ па́ки пребыва́еши Де́ва.

Седа́льны воскре́сны, гла́с 7:

Жи́знь во гро́бе возлежа́ше, и печа́ть на ка́мени надлежа́ше, я́ко Царя́ спя́ща во́ини стрежа́ху Христа́: и а́нгели сла́вляху я́ко Бо́га Безсме́ртна, жены́ же взыва́ху: воскре́се Госпо́дь, подая́ ми́рови ве́лию ми́лость.

Сти́х: Воскресни́, Го́споди Бо́же мо́й, да вознесе́тся рука́ Твоя́, не забу́ди убо́гих Твои́х до конца́.

Тридне́вным погребе́нием Твои́м плени́вый сме́рть, и истле́вша челове́ка живоно́сным Воста́нием Твои́м воскреси́вый, Христе́ Бо́же, я́ко Человеколю́бец, сла́ва Тебе́.

Богоро́дичен: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Распе́ншагося на́с ра́ди, и воскре́сшаго Христа́ Бо́га на́шего, и низложи́вшаго сме́рти держа́ву, непреста́нно моли́, Богоро́дице Де́во: да спасе́т ду́ши на́ша.

Седа́льны воскре́сны, гла́с 7:

Запеча́тану гро́бу, Живо́т от гро́ба возсия́л еси́, Христе́ Бо́же: и две́рем заключе́нным, ученико́м предста́л еси́ все́х Воскресе́ние, Ду́х Пра́вый те́ми обновля́я на́м, по вели́цей Твое́й ми́лости.

Сти́х: Испове́мся Тебе́, Го́споди, все́м се́рдцем мои́м, пове́м вся́ чудеса́ Твоя́.

На гро́б теча́ху жены́, со слеза́ми ми́ра нося́ща: и во́ином стрегу́щим Тя́ все́х Царя́, глаго́лаху к себе́: кто́ отвали́т на́м ка́мень? Воскре́се Вели́ка Сове́та А́нгел, попра́вый сме́рть: Всеси́льне Го́споди, сла́ва Тебе́.

Богоро́дичен: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Ра́дуйся, благода́тная Богоро́дице Де́во, приста́нище и предста́тельство ро́да челове́ческаго, из Тебе́ бо воплоти́ся Изба́витель ми́ра: еди́на бо еси́ Ма́ти и Де́ва, при́сно благослове́на и препросла́влена. Моли́ Христа́ Бо́га ми́р дарова́ти все́й вселе́нней.

Ипакои́, гла́с 7:

И́же на́ш зра́к восприе́мый, и претерпе́вый Кре́ст пло́тски, спаси́ мя Воскресе́нием Твои́м, Христе́ Бо́же, я́ко Человеколю́бец.

Степе́нны: антифо́н 1, гла́с 7:

Пле́н Сио́нь от ле́сти обрати́в, и мене́, Спа́се, оживи́, изъима́я рабо́тныя стра́сти.

В ю́г се́яй ско́рби по́стныя со сле́зами, се́й ра́достныя по́жнет рукоя́ти присноживопита́ния.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Святы́м Ду́хом исто́чник Боже́ственных сокро́вищ, от Него́же прему́дрость, ра́зум, стра́х: Тому́ хвала́ и сла́ва, че́сть и держа́ва.

Антифо́н 2:

А́ще не Госпо́дь сози́ждет до́м душе́вный, всу́е тружда́емся: ра́зве бо Того́ ни дея́ние, ни сло́во соверша́ется.

Плода́ чре́вна, святи́и духодви́жно прозяба́ют оте́ческая преда́ния, сыноположе́ния.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Святы́м Ду́хом, вся́ческая е́же бы́ти и́мут: пре́жде бо все́х Бо́г, все́х Госпо́дьство, Све́т Непристу́пен, Живо́т все́х.

Антифо́н 3:

Боя́щиися Го́спода, пути́ живота́ обре́тше, ны́не и при́сно ублажа́ются сла́вою нетле́нною.

О́крест трапе́зы Твоея́, я́ко сте́блие ви́дя исча́дия Твоя́, ра́дуйся и весели́ся, приводя́ сия́ Христо́ви Пастыренача́льнику.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Святы́м Ду́хом глубина́ дарова́ний, бога́тство сла́вы, суде́б глубина́ ве́лия: единосла́вен Отцу́, и Сы́ну, служи́мь бо.

Конда́к, гла́с 7:

Не ктому́ держа́ва сме́ртная возмо́жет держа́ти челове́ки: Христо́с бо сни́де сокруша́я и разоря́я си́лы ея́. Связу́емь быва́ет а́д, проро́цы согла́сно ра́дуются: предста́, глаго́люще, Спа́с су́щим в ве́ре, изыди́те ве́рнии в Воскресе́ние.

И́кос:

Вострепета́ша до́ле преиспо́дняя дне́сь, а́д и сме́рть Еди́наго от Тро́ицы: земля́ поколеба́ся, вра́тницы же а́довы ви́девше Тя́ ужасо́шася: вся́ же тва́рь со проро́ки ра́дующися пое́т Тебе́ побе́дную пе́снь, Изба́вителю Бо́гу на́шему, разруши́вшему ны́не сме́ртную си́лу. Да воскли́кнем и возопии́м ко Ада́му, и к су́щим из Ада́ма: Дре́во сего́ па́ки введе́. Изыди́те ве́рнии в Воскресе́ние.

Стихи́ры воскре́сны, гла́с 7:

Сти́х: Сотвори́ти в ни́х су́д напи́сан: сла́ва сия́ бу́дет все́м преподо́бным Его́.

Воскре́се Христо́с из ме́ртвых, разру́ш сме́ртныя у́зы: благовести́, земле́, ра́дость ве́лию, по́йте, Небеса́, Бо́жию сла́ву.

Сти́х: Хвали́те Бо́га во святы́х Его́, хвали́те Его́ во утверже́нии си́лы Его́.

Воскресе́ние Христо́во ви́девше, поклони́мся свято́му Го́споду Иису́су: Еди́ному Безгре́шному.

Сти́х: Хвали́те Его́ на си́лах Его́, хвали́те Его́ по мно́жеству вели́чествия Его́.

Христо́ву Воскресе́нию кла́няющеся не преста́ем: То́й бо спа́сл е́сть на́с от беззако́ний на́ших, Святы́й Госпо́дь Иису́с, явле́й Воскресе́ние.

Сти́х: Хвали́те Его́ во гла́се тру́бнем: хвали́те Его́ во псалти́ри и гу́слех.

Что́ возда́мы Го́сподеви о все́х, я́же воздаде́ на́м? На́с ра́ди Бо́г в челове́цех, за истле́вшее естество́ Сло́во пло́ть бы́сть, и всели́ся в ны́, к неблагода́рным, Благоде́тель: к пле́нником, Свободи́тель: ко и́же во тьме́ седя́щим, Со́лнце Пра́вды: на Кресте́, безстра́стный: во а́де, Све́т: в сме́рти, Живо́т: Воскресе́ние, па́дших ра́ди. К Нему́же возопии́м: Бо́же на́ш, сла́ва Тебе́.

Сти́х: Хвали́те Его́ в тимпа́не и ли́це, хвали́те Его́ во стру́нах и орга́не.

Глас 7: Врата́ а́дова сокруши́л еси́, Го́споди, и сме́ртную держа́ву упраздни́л еси́ кре́пкою си́лою Твое́ю, и совоздви́гл еси́ ме́ртвыя, и́же от ве́ка во тьме́ спя́щия, Боже́ственным и сла́вным Воскресе́нием Твои́м, я́ко Ца́рь все́х и Бо́г Всеси́лен.

Сти́х: Хвали́те Его́ в кимва́лех доброгла́сных, хвали́те Его́ в кимва́лех восклица́ния: вся́кое дыха́ние да хва́лит Го́спода.

Прииди́те возра́дуемся Го́сподеви, и возвесели́мся о Воскресе́нии Его́, я́ко совоздви́же ме́ртвыя от а́довых нереши́мых у́з: и дарова́ ми́рови я́ко Бо́г жи́знь ве́чную, и ве́лию ми́лость.

Сти́х: Воскресни́, Го́споди Бо́же мо́й, да вознесе́тся рука́ Твоя́, не забу́ди убо́гих Твои́х до конца́.

Блиста́яйся А́нгел, на ка́мени седя́ше живоприе́мнаго гро́ба, и жена́м мироно́сицам благовествова́ше, глаго́ля: воскре́се Госпо́дь, я́коже пре́жде рече́ ва́м, возвести́те ученико́м Его́, я́ко предваря́ет вы́ в Галиле́и: ми́рови же подае́т жи́знь ве́чную, и ве́лию ми́лость.

Сти́х: Испове́мся Тебе́, Го́споди, все́м се́рдцем мои́м, пове́м вся́ чудеса́ Твоя́.

Почто́ небрего́ма сотвори́сте Ка́мене Краеуго́льнаго, о пребеззако́ннии Иуде́и? Се́ То́й е́сть, Его́же положи́ Бо́г в Сио́не: И́же из ка́мене источи́вый в пусты́ни во́ду, и на́м источа́яй от ре́бр Свои́х безсме́ртие. Се́й е́сть Ка́мень, И́же от горы́ деви́ческия отсе́кся без хоте́ния му́жеска: Сы́н Челове́чь гряды́й на о́блацех небе́сных, к Ве́тхому Де́ньми, я́коже рече́ Дании́л, и ве́чно Его́ Ца́рство.

Богоро́дичен: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Преблагослове́нна еси́, Богоро́дице Де́во, Вопло́щшим бо ся из Тебе́ ад плени́ся, Ада́м воззва́ся, кля́тва потреби́ся, Е́ва свободи́ся, сме́рть умертви́ся, и мы́ ожи́хом, те́м воспева́юще вопие́м: благослове́н Христо́с Бо́г благоволи́вый та́ко, сла́ва Тебе́.

Тропа́рь воскре́сен, глас 7:

Дне́сь спасе́ние ми́ру бы́сть, пое́м Воскре́сшему из гро́ба, и Нача́льнику жи́зни на́шея: разруши́в бо сме́ртию сме́рть, побе́ду даде́ на́м, и ве́лию ми́лость.

Изобрази́тельная блаже́нна, гла́с 7:

Красе́н бе́ и до́бр в сне́дь, и́же мене́ умертви́вый пло́д: Христо́с е́сть Дре́во Живо́тное, от Него́же яды́й не умира́ю, но вопию́ с разбо́йником: помяни́ мя, Го́споди, во Ца́рствии Твое́м.

Сти́х: Блаже́ни чи́стии се́рдцем, я́ко ти́и Бо́га у́зрят.

На Кре́ст возне́сся, Ще́дре, Ада́мово рукописа́ние дре́вняго греха́ загла́дил еси́, и спа́сл еси́ от пре́лести ве́сь ро́д челове́ческий. Те́мже воспева́ем Тя́, Благоде́телю Го́споди.

Сти́х: Блаже́ни миротво́рцы, я́ко ти́и сы́нове Бо́жии нареку́тся.

Пригвозди́л еси́ на Кресте́, Ще́дре, грехи́ на́ша, Христе́, и Твое́ю сме́ртию сме́рть умертви́л еси́ воздви́гнувый уме́ршия из ме́ртвых: те́мже покланя́емся Твоему́ свято́му Воскресе́нию.

Сти́х: Блаже́ни изгна́ни пра́вды ра́ди, я́ко те́х е́сть Ца́рство Небе́сное.

Излия́ я́д зми́й в слу́хи Е́вины иногда́: Христо́с же на Дре́ве Кре́стнем источи́л е́сть ми́рови жи́зни сла́дость. Те́мже взыва́ем: помяни́ на́с, Го́споди, во Ца́рствии Твое́м.

Сти́х: Блаже́ни есте́, егда́ поно́сят ва́м, и иждену́т, и реку́т вся́к зо́л глаго́л на вы́ лжу́ще Мене́ ра́ди.

Во гро́бе я́ко сме́ртен положе́н бы́л еси́, Животе́ все́х Христе́: и вереи́ а́довы сломи́л еси́: и воскре́с во сла́ве тридне́вен я́ко си́лен, все́х просвети́л еси́: сла́ва Твоему́ Воста́нию.

Сти́х: Ра́дуйтеся и весели́теся, я́ко мзда́ ва́ша мно́га на Небесе́х.

Госпо́дь воскре́с тридне́вен из ме́ртвых, дарова́ ми́р Сво́й ученико́м, и си́х благослови́в посла́ ре́к: вся́ приведи́те во Ца́рствие Мое́.

Сла́ва Отцу́ и Сы́ну и Свято́му Ду́ху:

Све́т – Оте́ц, Све́т – Сы́н и Сло́во, Све́т – Ду́х Святы́й: но Еди́н Све́т – три́, Еди́н бо Бо́г в трие́х у́бо Ли́цех, еди́нем же Естестве́ и Нача́ле, несеко́м и неслия́н, сы́й Преве́чный.

И ны́не и при́сно и во ве́ки веко́в. Ами́нь:

Родила́ еси́ Сы́на и Сло́во О́тчее, пло́тию на́с ра́ди, я́коже ве́сть, Богоро́дице, Са́м. Те́мже, Де́во Ма́ти, обоже́ни бы́вше Тобо́ю, ра́дуйся, Тебе́ зове́м, христиа́ном упова́ние.