Глас 7. В среду утром. Тропари и стихиры на каждый день

Седа́льны Кре́стны. Гла́с 7:

Це́рковь вопие́т Ти́, Христе́ Бо́же, в пе́вке, и ке́дре, и кипари́се покланя́ющися Тебе́: побе́ды ве́рным да́руй, Богоро́дицы ра́ди, и поми́луй на́с.

Сти́х: Возноси́те Го́спода Бо́га на́шего, и покланя́йтеся подно́жию но́гу Его́, я́ко свя́то е́сть.

И́же мене́ ра́ди претерпе́вый, е́же на Кресте́ пригвожде́ние, приими́ мое́ бо́дренное хвале́ние, Христе́ Бо́же, и спаси́ мя.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Крестобогоро́дичен: Распе́ншагося на́с ра́ди Христа́ Бо́га, и низложи́вшаго сме́рти держа́ву, непреста́нно моли́, Богоро́дице Де́во, да спасе́т ду́ши на́ша.

Седа́льны. Гла́с 7.

Огня́ светле́йшее, и пла́мене де́йственнейшее Дре́во показа́л еси́, Христе́, Креста́ твоего́, попаля́ющее грехи́ челове́ков, и просвеща́ющее сердца́ пою́щих во́льное Твое́ распя́тие: Христе́ Бо́же, сла́ва Тебе́.

Сти́х: Бо́г же Ца́рь на́ш пре́жде ве́ка, соде́ла спасе́ние посреде́ земли́.

Облада́яй Безпло́тными Си́лами, и све́дый души́ моея́ ле́ностное, Кресто́м Твои́м спаси́ мя, Христе́ Бо́же, я́ко Человеколю́бец.

Сти́х: Ди́вен Бо́г во святы́х Свои́х, Бо́г Изра́илев.

Ра́дуйтеся пра́веднии, да веселя́тся небе́сная: на земли́ бо му́ченицы подвиза́вшеся, врага́ попра́ша: да игра́ет Це́рковь победи́тельная, пра́зднующи Подвигополо́жнику еди́ному, и Победотво́рцу Христу́ Бо́гу, подаю́щему ми́рови ве́лию ми́лость.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Крестобогоро́дичен: Егда́ зря́щи Тя́, Го́споди, Де́ва, распина́ема, пла́чущи вопия́ше Ти́: воспева́ю Твое́ неизрече́нное, о Сы́не Мо́й, долготерпе́ние, и е́же к челове́ком кра́йнее и Боже́ственное соше́ствие.

Седа́льны. Гла́с 7.

Распе́ншуся Ти́, Влады́ко Христе́, вра́г свя́зан бы́сть, и сме́рть умертви́ся: ду́ши, я́же во а́де в преиспо́дних содержи́мыя, от у́з разреша́хуся.

И́же на́с ра́ди во́льное прие́мый распя́тие, сокруши́ враги́ неве́дущия Тя́ Бо́га и́стиннаго, и спаси́ на́с.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Крестобогоро́дичен: Кресто́м Сы́на Твоего́ при́сно соблюда́еми, Де́во, прило́г бесо́вских избега́ем: те́мже Тя́ по до́лгу воспева́юще сла́вим, Богоро́дице Всепе́тая.

На стихо́вне стихи́ры Кре́стны, гла́с 7:

Влады́ка сы́й Человеколю́бче Жизнода́вче, искупи́л еси́ Кресто́м Твои́м вселе́нную, Го́споди, сла́ва Тебе́.

Сти́х: Испо́лнихомся зау́тра ми́лости Твоея́, Го́споди, и возра́довахомся и возвесели́хомся, во вся́ дни́ на́шя возвесели́хомся, за дни́, в ня́же смири́л ны́ еси́, ле́та, в ня́же ви́дехом зла́я: и при́зри на рабы́ Твоя́, и на дела́ Твоя́, и наста́ви сы́ны и́х.

На Кресте́ пригвозди́ся Лоза́ И́стинная, и объима́ша язы́цы Ра́й с разбо́йником: сия́ сла́ва церко́вная, сие́ бога́тство Ца́рствия. Пострада́вый на́с ра́ди, Го́споди, сла́ва Тебе́.

Сти́х: И бу́ди све́тлость Го́спода Бо́га на́шего на на́с, и дела́ ру́к на́ших испра́ви на на́с, и де́ло ру́к на́ших испра́ви.

Му́ченичен: Свети́ла яви́шася вселе́нней, всехва́льнии страстоте́рпцы Христо́вы, вопию́ще: Го́споди, сла́ва Тебе́.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Крестобогоро́дичен: На Дре́ве пригвожде́на Тя́ во́лею, я́ко Всенепоро́чная узре́ пла́чущи поя́ше держа́ву Твою́.

Блаже́нна, гла́с 7:

Красе́н бе́ и до́бр в сне́дь, и́же мене́ умертви́вый пло́д: Христо́с е́сть Дре́во Живо́тное, от Него́же яды́й не умира́ю, но вопию́ с разбо́йником: помяни́ мя, Го́споди, во Ца́рствии Твое́м.

Блаже́ни и́згнани пра́вды ра́ди, я́ко те́х е́сть Ца́рство Небе́сное.

Распросте́рл еси́ на Кресте́ дла́ни, просте́ртия руки́ Ада́мовы к дре́ву сне́дному, исправля́я поползне́ние, Ще́дре, ра́ди бла́гости мно́гия: те́мже Тя́ сла́вим, Благоде́телю, Го́споди.

Блаже́ни есте́, егда́ поно́сят ва́м, и изжену́т, и реку́т вся́к зо́л глаго́л на вы́ лжу́ще Мене́ ра́ди.

На Ме́сте Тя́ Ло́бнем собо́р евре́йский, Христе́ Царю́, распя́, сокруша́юща лука́ваго губи́тельную главу́, и источа́юща на́м от ре́бр святы́х Твои́х ре́ки оставле́ния.

Ра́дуйтеся и весели́теся, я́ко мзда́ ва́ша мно́га на Небесе́х.

Му́ченичен: Подо́бящеся Христо́вым страсте́м честны́м и спаси́тельным, му́ченицы прехва́льнии, претерпе́сте му́ки многови́дныя, и к безсме́ртию преидо́сте вку́пе: те́мже блажи́ми есте́.

Сла́ва Отцу́ и Сы́ну и Свято́му Ду́ху:

Соблюди́, о Тро́ице Свята́я! Пою́щия Тя́ рабы́ Твоя́, укрепи́ си́лою Креста́, и к вы́шнему гра́ду ходи́ти напра́ви на́с: иде́же и бы́вше, обря́щем ми́лость.

И ны́не и при́сно и во ве́ки веко́в. Ами́нь:

Богоро́дичен: Распина́ема из Тебе́ ро́ждшагося зря́щи, слезя́ше, утро́бою смуща́ющися, Ма́ти Чи́стая: ка́ко сия́ во́лею стра́ждеши, Сы́не, зову́щи, хотя́ челове́чество от страсте́й изба́вити?