Глас 7. В четверг утром. Тропари и стихиры на каждый день

Седа́льны апо́стольски. Гла́с 7:

Де́латели селу́ Твоему́ яви́л еси́ апо́столы Твоя́, Сло́ве, посека́ющия и́долы: те́мже Тя́, Влады́ку, во язы́цех пропове́давше, благоче́стно возвели́чиша.

Сти́х: Во всю́ зе́млю изы́де веща́ние и́х, и в концы́ вселе́нныя глаго́лы и́х.

Земны́я на земли́ сла́вы не возлюби́сте, сла́внии, Бо́га Небе́снаго челове́ком пропове́давше, Тому́ все́х приведо́сте.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богоро́дичен: А́ще и Ма́терь Тя́ тва́рь позна́, но Де́ву Тя́ Зижди́тель показа́л е́сть: родила́ бо еси́ пло́тию Христа́ Бо́га, спаса́ющаго ду́ши на́ша.

Седа́льны. Гла́с 7.

Я́ко на́шего спасе́ния окорми́тели прему́дрыя апо́столы Христа́ Бо́га, пе́ньми и пе́сньми по до́лгу почти́м: ти́и бо пре́лести нече́стие отгна́вше, ми́р спасо́ша, я́ко самови́дцы Сло́ва, и слуги́, и дру́зи, и бра́тия бы́вше.

Сти́х: Небеса́ пове́дают сла́ву Бо́жию, творе́ние же руку́ Его́ возвеща́ет тве́рдь.

Проро́цы пропове́даша, апо́столи научи́ша, му́ченицы испове́даша, и мы́ ве́ровахом: я́ко Ты́ еси́ Христо́с Сы́н Бо́жий, Изба́витель ми́ра.

Сти́х: Ди́вен Бо́г во святы́х Свои́х, Бо́г Изра́илев.

Му́ченицы Твои́, Го́споди, врага́ победи́ша, и пре́лесть и́дольскую посрами́ша, вооружи́вшеся Креста́ Твоего́ си́лою: те́мже и со а́нгелы воспева́юще Тя́, вопию́т побе́дную пе́снь, славосло́вяще Тя́, Христе́. Те́х моли́твами пода́ждь душа́м на́шим очище́ние и ве́лию ми́лость.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богоро́дичен: Ра́дуйся, из Нея́же непрело́жно Сло́во пло́ть бы́сть, и всели́ся в ны́: ра́дуйся, Чи́стая, апо́столов и му́чеников ра́дование, и на́с ве́рных спасе́ние: ра́дуйся, Ма́ти Христа́ Бо́га.

Седа́льны. Гла́с 7.

Ученицы́ Госпо́дни всехва́льнии, и́же подсо́лнечную всю́ я́ко свети́ла озари́вше, во тьме́ страсте́й мя́ и прегреше́ний су́ща, просвети́тися ми́, моли́те.

Свети́ла вы́ су́ще ми́ру, Госпо́дни апо́столи, облистава́ете при́сно сло́во ве́рным, отгоня́юще зе́льне пре́лести мглу́. Те́мже и просвеща́ете язы́ки креще́нием, я́ко пропове́дницы Тро́ицы су́ще, при́сно почита́емии.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богоро́дичен: Я́же ми́ру Ра́досте, Де́во, Твоего́ Сы́на непреста́нно со апо́столы моли́, проще́ние дарова́ти на́ших прегреше́ний, и жития́ исправле́ние.

На стихо́вне стихи́ры апо́стольски, гла́с 7:

Апо́столи сла́внии, столпи́ церко́внии, и́стины пропове́дницы, свети́ла су́ще све́тлая, вы́ огне́м духо́вным вся́ку пре́лесть попали́сте, челове́ческий же ро́д просвети́сте. Те́мже мо́лим вы́: моли́те Спа́са и Бо́га на́шего, умири́ти ми́р, и спасти́ ду́ши на́ша.

Сти́х: Испо́лнихомся зау́тра ми́лости Твоея́, Го́споди, и возра́довахомся и возвесели́хомся, во вся́ дни́ на́шя возвесели́хомся, за дни́, в ня́же смири́л ны́ еси́, ле́та, в ня́же ви́дехом зла́я: и при́зри на рабы́ Твоя́, и на дела́ Твоя́, и наста́ви сы́ны и́х.

Апо́столи Христо́вы, де́латели Спа́совы, Кре́ст бо я́ко ра́ло на ра́мех нося́ще, оляде́вшую зе́млю от и́дольския ле́сти очи́стивше, и ве́ры сло́во все́ясте: вои́стинну досто́йно нарица́етеся, святи́и Христо́вы апо́столи.

Сти́х: И бу́ди све́тлость Го́спода Бо́га на́шего на на́с, и дела́ ру́к на́ших испра́ви на на́с, и де́ло ру́к на́ших испра́ви.

Му́ченичен: Еди́но ды́шуще, и на еди́но взира́юще страстоте́рпцы му́ченицы, еди́н пу́ть живота́ обре́тше, е́же за Христа́ сме́рть, ревну́юще дру́г дру́га кончи́не: Оле чудесе́! Я́ко сокро́вища му́ки предвосхища́юще, дру́г ко дру́гу глаго́лаху: я́ко а́ще не ны́не у́мрем, у́мрем же вся́ко, и бытию́ до́лжная послу́жим: сотвори́м ну́жду любоче́стием, о́бщее свое́ да вмени́м, сме́ртию живо́т ку́пим. Моли́твами и́х, Бо́же, поми́луй на́с.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богоро́дичен: Роди́лся еси́ от Де́вы несказа́нно, Христе́, и просвети́л еси́ су́щия во тьме́, вопию́щи: Го́споди, сла́ва Тебе́.

Блаже́нна, гла́с 7:

Красе́н бе́ и до́бр в сне́дь, и́же мене́ умертви́вый пло́д: Христо́с е́сть Дре́во Живо́тное, от Него́же яды́й не умира́ю, но вопию́ с разбо́йником: помяни́ мя́, Го́споди, во Ца́рствии Твое́м.

Блаже́ни и́згнани пра́вды ра́ди, я́ко те́х е́сть Ца́рство Небе́сное.

Из глубины́ злове́рия язы́к стада́ привлеко́сте, прему́дрии, к ве́ре богокра́сней, и к мы́сленней трапе́зе обро́к многоце́нный си́х приведо́сте, сла́внии апо́столи.

Блаже́ни есте́, егда́ поно́сят ва́м, и изжену́т, и реку́т вся́к зо́л глаго́л на вы́ лжу́ще Мене́ ра́ди.

Омраче́ние лю́тыя пре́лести све́том пропове́дания отгна́вше, апо́столи Госпо́дни, сердца́ благочести́вых просвети́ли есте́ я́ве: те́мже ва́с пе́сньми Боже́ственными ублажа́ем.

Ра́дуйтеся и весели́теся, я́ко мзда́ ва́ша мно́га на Небесе́х.

Му́ченичен: Ссеца́еми на удеса́ мече́м, страда́льцы Боже́ственнии, не отсе́чени пребы́сте любве́ Изба́вителя: к Нему́же востеко́сте: ны́не живете́ в ра́дости, вси́ небе́сною сла́вою облистава́еми.

Сла́ва Отцу́ и Сы́ну и Свято́му Ду́ху:

Зло́бнейший и тли́тель ро́да челове́ческаго обдержи́т мя́, моли́твами пропове́дник Твои́х, Всеси́льная Тро́ице, исхити́ мя от горта́ни его́: да велича́ю Твою́ безме́рную ми́лость.

И ны́не и при́сно и во ве́ки веко́в. Ами́нь:

Богоро́дичен: Сопресто́льна Отцу́ Сы́на, Чи́стая Де́во, от чи́стых Твои́х крове́й произвела́ еси́ Нося́щаго пло́ть ме́ртвенную, я́ко да обезсме́ртит существо́ челове́ческое: те́мже по до́лгу Тя́ вси́ ублажа́ем.