Глас 5. В субботу утром. Тропари и стихиры на каждый день

Седа́льны му́ченичны. Гла́с 5:

Сия́ет дне́сь па́мять страстоте́рпец, и́мать бо и от небе́с зарю́: ли́к а́нгельский торжеству́ет, и ро́д челове́ческий спра́зднует. Те́мже мо́лятся Го́сподеви, поми́ловатися душа́м на́шым.

Сти́х: Ди́вен Бо́г во святы́х Свои́х, Бо́г Изра́илев.

Чудеса́ святы́х Твои́х му́ченик сте́ну неразори́му на́м дарова́л еси́, Христе́ Бо́же: те́х моли́твами ве́рныя лю́ди твоя́ утверди́, я́ко Еди́н Бла́г и Человеколю́бец.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богоро́дичен: Ра́дуйся, две́ре Госпо́дня непроходи́мая, ра́дуйся, стено́ и покро́ве притека́ющих к Тебе́, ра́дуйся, необурева́емое приста́нище, и Неискусобра́чная, ро́ждшая пло́тию Творца́ Твоего́ и Бо́га: моля́щи не оскудева́й о воспева́ющих, и кла́няющихся Рождеству́ Твоему́.

Седа́льны. Гла́с 5.

Го́споди, ча́ше Страсте́й Твои́х страстоте́рпцы Твои́ поревнова́вше, оста́виша жите́йскую красоту́, и бы́ша а́нгелом соприча́стницы: те́х мольба́ми пода́ждь душа́м на́шым ми́р Христе́ Бо́же, и ве́лию ми́лость.

Сти́х: Ди́вен Бо́г во святы́х Свои́х, Бо́г Изра́илев.

Святы́х му́ченик исправле́нием небе́сныя си́лы преудиви́шася, ка́ко в те́ле ме́ртвеннем подви́гшеся до́бре, безпло́тнаго врага́ си́лою кре́стною победи́ша неви́димо: и мо́лятся Го́сподеви, поми́ловатися душа́м на́шым.

Сти́х: Блаже́ни, я́же избра́л, и прия́л еси́, Го́споди, и па́мять и́х в ро́д и ро́д.

Поко́й, Спа́се на́ш, с пра́ведными рабы́ Твоя́, и те́х всели́ во дворы́ твоя́, я́коже пи́сано е́сть, презира́я вся́ согреше́ния и́х, я́ко Бла́г, во́льная и нево́льная, и вся́ я́же в ве́дении и не в ве́дении, Человеколю́бче.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богоро́дичен: От Де́вы возсия́вый ми́ру, Христе́ Бо́же, сы́ны све́та То́ю показа́вый, поми́луй на́с.

На хвали́тех стихи́ры му́ченичны, гла́с 5:

Сти́х: Хвали́те Бо́га во святы́х Его́, хвали́те Его́ во утверже́нии си́лы Его́.

Благослове́но во́инство Небе́снаго Царя́: а́ще бо и земноро́дни бе́ша Страстоте́рпцы, но А́нгельский са́н тща́хуся дости́гнути, о телесе́х неради́вше, и страсте́й ра́ди безпло́тных сподо́бишася че́сти. Те́мже моли́твами и́х, Го́споди, спаси́ ду́шы на́шя.

Сти́х: Хвали́те Его́ на си́лах Его́, хвали́те Его́ по мно́жеству вели́чествия Его́.

Страстоно́сцы Твои́, Го́споди, чино́м а́нгельским уподо́бльшеся, я́ко безпло́тнии, му́ки претерпе́ша, и единомы́сленно упова́ние иму́ще, обеща́нных бла́г наслажде́ние. Моли́твами и́х, Христе́ Бо́же, поми́луй на́с.

Сти́х: Хвали́те Его́ во гла́се тру́бнем: хвали́те Его́ во псалти́ри и гу́слех.

Святи́и му́ченицы, на земли́ подви́гшеся, мра́з претерпе́ша, и огню́ преда́шася, вода́ и́х прия́т. Те́х е́сть гла́с: проидо́хом сквозе́ о́гнь и во́ду, и изведе́ ны́ в поко́й. Те́х моли́твами, Бо́же, поми́луй на́с.

Сти́х: Хвали́те Его́ в тимпа́не и ли́це, хвали́те Его́ во стру́нах и орга́не.

В му́ках су́ще святи́и, ра́дующеся вопия́ху: ку́пля на́м су́ть сия́ ко Влады́це. Вме́сто быва́ющих ра́н на телесе́х, све́тлое одея́ние в воскресе́ние процвете́т на́м, за безче́стие венцы́, за у́зы темни́чныя ра́й: и за е́же со злоде́и осужде́ние, е́же со а́нгелы житие́. Моли́твами и́х, Го́споди, спаси́ ду́шы на́шя.

Сти́х: Хвали́те Его́ в кимва́лех доброгла́сных, хвали́те Его́ в кимва́лех восклица́ния: вся́кое дыха́ние да хва́лит Го́спода.

Ты́ созда́вый мя́, Го́споди, и положи́ на мне́ ру́ку Твою́, и запове́дав ми́ ре́кл еси́: в зе́млю па́ки по́йдеши. Наста́ви мя́ на пра́вый пу́ть Тво́й, проща́я мне́ прегреше́ния, осла́би ми́, и спаси́ мя, молю́ся, я́ко Человеколю́бец.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Оле окая́нная душе́! Ки́й отве́т и́маши рещи́ Судии́ во о́н ча́с, егда́ престо́ли поста́вятся на Суде́, и Судия́ прии́дет от Небе́с, соше́д со тьма́ми а́нгельскими? Егда́ ся́дет на Суди́щи, прю́ сотвори́ти с рабы́ непотре́бными, подо́бными мне́, что́ отвеща́ти и́маши? Что́же принести́ тогда́? пои́стинне ничто́же, у́м и те́ло оскверни́вши Твое́. Те́мже припади́ к Де́ве, и зови́ непреста́нно, пода́ти тебе́ бога́тно грехо́в проще́ние.

На стихо́вне стихи́ры поко́йны. Гла́с 5.

Све́том лица́ Твоего́, Христе́, преста́вленыя я́ко ще́др просвети́. Всели́ я́ в ме́сто зла́чно, при вода́х Твоего́ чи́стаго и Боже́ственнаго поко́я, в жела́емых не́дрех Авраа́ма пра́отца, иде́же све́т Тво́й чи́сте сия́ет, и пролива́ются исто́чницы благосты́ни: иде́же лику́ют я́сно веселя́щеся пра́ведных все́х собо́ри о Твое́й бла́гости. С ни́миже учини́ рабы́ Твоя́, подая́ и́м ве́лию ми́лость.

Сти́х: Блаже́ни, я́же избра́л и прия́л еси́ Го́споди.

Пе́ти всесоста́вными гла́сы, славосло́вити же Твою́ держа́ву, благоволи́, Ще́дре, преста́вльшыяся от привре́менных к Тебе́ Влады́це все́х и Бо́гу на́шему, подая́ красото́ю Твое́ю освеща́тися, и сла́дкаго и кра́снаго прича́стия Твоего́, восприя́ти же и наслажда́тися чисте́йше: иде́же о́крест престо́ла Твоего́ лику́ют А́нгели, и святы́х ли́цы ра́достно обстоя́т. С ни́миже Твои́м рабо́м поко́й пода́ждь, и ве́лию ми́лость.

Сти́х: Ду́ши и́х во благи́х водворя́тся.

Иде́же проро́ков ли́к, апо́столов и му́чеников чи́нове, и вси́ и́же от ве́ка оправди́вшиися Твое́ю спаси́тельною стра́стию и кро́вию, е́юже искупи́л еси́ плене́наго челове́ка, та́мо ве́рою усо́пшыя упоко́й, я́ко Человеколю́бец, проща́яй согреше́ния: Еди́н бо безгре́шен на земли́ пожи́л еси́ свя́т вои́стинну, Еди́н во уме́рших свобо́дь. Те́мже Твои́м рабо́м поко́й пода́ждь, и ве́лию ми́лость.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богоро́дичен: Зако́ном грехо́вным на́с порабоще́нных свободи́ла еси́ Влады́чице, в ложесна́х Законода́вца и Царя́ Христа́ заче́нши, Еди́на Де́во Ма́ти, И́мже оправда́емся ту́не, и благода́тию: Его́же ны́не моли́, ду́шы ве́дущих Тя́, Богома́терь, написа́ти в кни́зе живо́тней, я́ко да хода́тайством Твои́м спа́сшеся, Всенепоро́чная, Сы́на Твоего́ любе́зное избавле́ние полу́чим, Тому́ покланя́ющеся, подаю́щему ми́рови ве́лию ми́лость.

Блаже́нна, гла́с 5:

Разбо́йник на кресте́ Бо́га Тя́ бы́ти ве́ровав, Христе́, испове́да Тя́ чи́сте от се́рдца, помяни́ мя, Го́споди, вопия́, во Ца́рствии Твое́м.

Блаже́ни и́згнани пра́вды ра́ди, я́ко те́х е́сть Ца́рство Небе́сное.

Началозло́бнаго врага́, уме́рше му́ченицы, погуби́сте, и взыдо́сте к вы́шним, венча́вшеся Боже́ственными побе́дами, и Царю́ все́х Бо́гу предста́сте.

Блаже́ни есте́, егда́ поно́сят ва́м, и изжену́т, и реку́т вся́к зо́л глаго́л на вы́ лжу́ще Мене́ ра́ди.

Свяще́нства све́том святи́телие просвеща́еми просла́вишася, и преподо́бных мно́жество присносу́щный получи́ша живо́т: те́мже ублажа́еми су́ть.

Ра́дуйтеся и весели́теся, я́ко мзда́ ва́ша мно́га на Небесе́х.

С ли́ки избра́нных на ме́сте, Влады́ко, ослабле́ния, и́хже преста́вил еси́, всели́ Сло́ве, презре́в Христе́, я́же на земли́ те́х согреше́ния.

Сла́ва Отцу́ и Сы́ну и Свято́му Ду́ху:

О Тро́ице честна́я! Святи́телей и му́ченик честны́х по́двиги умоле́на бу́ди: ве́рою уме́рших душа́м спасе́ние да́руй, и ве́лию ми́лость.

И ны́не и при́сно и во ве́ки веко́в. Ами́нь:

Богоро́дичен: Я́же невмести́маго все́ми, богора́дованная вмести́ла еси́, и ро́ждши па́че естества́ и сло́ва, того́ ми́лостива бы́ти все́м, Влады́чице, умоли́.