Глас 5. В пятницу утром. Тропари и стихиры на каждый день

Седа́льны Кре́стны. Гла́с 5:

Ме́сто Ло́бное ра́й бы́сть: то́чию бо водрузи́ся дре́во кре́стное, а́бие израсти́ гро́зд живо́тный, Тебе́, Спа́се, в на́ше весе́лие, сла́ва Тебе́.

Сти́х: Возноси́те Го́спода Бо́га на́шего, и покланя́йтеся подно́жию но́гу Его́, я́ко свя́то е́сть.

Распе́ншагося Спа́са и Изба́вителя на́шего во́лею я́ко ве́сть, и я́коже благоизво́ли, воспои́м ве́рнии, и просла́вим: я́ко пригвозди́ на Кресте́ грехи́ челове́ков, избавля́я от ле́сти ро́д челове́ческий, и Ца́рствия сподо́бил е́сть.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Крестобогоро́дичен: На кресте́ Тя, Христе́, зря́щи Ма́ти Твоя́, во́лею посреде́ разбо́йнику ви́сяща, растерза́ющися ма́терски утро́бою, глаго́лаше: безгре́шный Сы́не, ка́ко без пра́вды на Кресте́ я́ко злоде́й пригвозди́лся еси́, ро́д челове́ческий оживи́ти хотя́ я́ко преблаги́й?

Седа́льны. Гла́с 5.

Распя́тие претерпе́в Твое́ю во́лею, и от тли́ челове́ки свободи́л еси́, Спа́се! воспева́ем ве́рнии, и покланя́емся Ти́, я́ко просвети́л еси́ на́с си́лою кре́стною, и вси́ прославля́ем Тя́, Человеколю́бче ще́дрый, я́ко Жизнода́вца и Го́спода.

Сти́х: Бо́г же Ца́рь на́ш пре́жде ве́ка, соде́ла спасе́ние посреде́ земли́.

Во́лею, Ще́дре, Кре́ст претерпе́л еси́, и дре́внюю кля́тву я́же ра́ди сне́ди, я́ко всеси́льный Бо́г Ты́ потреби́л еси́. Те́мже Боже́ственныя и честны́я стра́сти Твоя́, Влады́ко Христе́, пое́м и покланя́емся славосло́вяще непреста́нно, е́же па́че сло́ва смотре́ние Твое́.

Сти́х: Ди́вен Бо́г во святы́х Свои́х, Бо́г Изра́илев.

Сия́ет дне́сь па́мять страстоте́рпец и́мать бо и от небе́с зарю́: ли́к а́нгельский торжеству́ет, и челове́ческий ро́д спра́зднует. Те́мже мо́лятся Го́сподеви, поми́ловатися душа́м на́шым.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Крестобогоро́дичен: Кресто́м Сы́на Твоего́, Богоблагода́тная, и́дольская пре́лесть вся́ упраздни́ся, и де́монская кре́пость попра́ся. Сего́ ра́ди ве́рнии по до́лгу Тя́ при́сно пое́м, и благослови́м, и Богоро́дицу вои́стинну испове́дающе Тя́ велича́ем.

Седа́льны. Гла́с 5.

На Кресте́ Тя пригвожде́на, и усну́вша, а́нгельстии чи́нове ви́девше, ужасо́шася, Иису́се все́х Царю́: и побежде́ни быва́ху а́бие бесо́вствии полцы́, и сокруши́шася вереи́ а́довы: и сме́ртное мучи́тельство низложи́ся, и су́щии во гробе́х ме́ртвии воскресо́ша.

От Дре́ва го́ресть Ада́м объя́т, к тле́нию попо́лзся за́вистию змии́ною: Тебе́ же пригвожде́ну бы́вшу, Иису́се, живота́ наслади́ся, и Дре́ва ра́ди кре́стнаго па́ки вселя́емь быва́ет на Небесе́х. И упраздни́ся зми́й, и тля́ поже́рта бы́сть: и вси́ сла́ву Ти́ прино́сим.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Крестобогоро́дичен: Вознесе́на на Дре́во я́ко ви́де, ро́ждшая Тя́, Спа́се, боле́зней кроме́, рыда́ше с пла́чем, и взыва́ше: увы́ мне́, Сладча́йший Сы́не, уязвля́юся душе́ю, на Кресте́ зря́щи Тя́ пригвожде́на посреде́ двою́ злоде́ю, судо́м злоде́йственным.

На стихо́вне стихи́ры Кре́стны, гла́с 5:

То́чию водрузи́ся Дре́во, Христе́, Креста́ Твоего́, пре́лесть прогна́на бы́сть, и благода́ть процвете́: уже́ бо ктому́ не́сть осужде́ния мучи́тельство, но побе́да яви́ся на́м спасе́ния: Кре́ст бо на́м е́сть похвала́, Кре́ст на́м утвержде́ние, Кре́ст на́м ра́дование.

Сти́х: Испо́лнихомся зау́тра ми́лости Твоея́, Го́споди, и возра́довахомся и возвесели́хомся, во вся́ дни́ на́шя возвесели́хомся, за дни́, в ня́же смири́л ны́ еси́, ле́та, в ня́же ви́дехом зла́я: и при́зри на рабы́ Твоя́, и на дела́ Твоя́, и наста́ви сы́ны и́х.

Веде́н бы́л еси́ на́с ра́ди на же́ртву, Христе́, я́ко овча́, и я́ко А́гнец незло́бив Емману́ил на заколе́ние во́льное, со беззако́нники вмене́н бы́л еси́. Прииди́те, воспо́йте оте́чествия язы́к, и поклони́теся на Кресте́ пове́шенному, животу́ безконе́чному.

Сти́х: И бу́ди све́тлость Го́спода Бо́га на́шего на на́с, и дела́ ру́к на́ших испра́ви на на́с, и де́ло ру́к на́ших испра́ви.

Му́ченичен: Благослове́но во́инство Небе́снаго Царя́: а́ще бо и земноро́дни бе́ша страстоте́рпцы, но а́нгельское достоя́ние потща́шася дости́гнути, о телесе́х небре́гше, и страсте́й ра́ди безпло́тных сподо́бишася че́сти, моли́твами и́х, Го́споди, спаси́ ду́шы на́шя.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Крестобогоро́дичен: Ста́вши у Креста́, Иису́се, Тебе́ ро́ждшая пла́чущися рыда́ше, вопию́щи: не терплю́ сия́, пригвожде́на зря́щи Тя́ на Дре́ве, Его́же породи́х Аз, и избего́х боле́зни я́ко Безму́жна, и ка́ко ны́не боле́знию содержи́ма е́смь, и уязвля́юся се́рдцем? Ны́не бо испо́лнися глаго́л, и́же рече́ Симео́н: се́рдце Твое́ непоро́чная, ору́жие про́йдет. Но ны́не, о Сы́не мо́й, воскресни́, и спаси́ пою́щыя Тя́!

Блаже́нна, гла́с 5:

Разбо́йник на кресте́ Бо́га Тя́ бы́ти ве́ровав, Христе́, испове́да Тя́, Чи́сте, от се́рдца: помяни́ мя, Го́споди, вопия́, во Ца́рствии Твое́м.

Блаже́ни и́згнани пра́вды ра́ди, я́ко те́х е́сть Ца́рство Небе́сное.

Умертви́вся на Кресте́, сне́ди ра́ди уме́ршаго Ада́ма: его́же оживи́л еси́ Жизнода́вче ще́дрый, и жи́теля па́ки бла́же рая́ показа́л еси́.

Блаже́ни есте́, егда́ поно́сят ва́м, и изжену́т, и реку́т вся́к зо́л глаго́л на вы́ лжу́ще Мене́ ра́ди.

Пригвозди́лся еси́ на Кресте́ Христе́, лоза́ и́стинная, и источи́л еси́ питие́ спасе́ния, напая́я все́х ве́рных сердца́ благода́тию.

Ра́дуйтеся и весели́теся, я́ко мзда́ ва́ша мно́га на Небесе́х.

Му́ченичен: Бие́ми му́дрии, и на удеса́ разсека́еми вообрази́сте заколе́ние Влады́чнее: сего́ ра́ди му́ченицы Христо́вы при́сно ублажа́еми есте́.

Сла́ва Отцу́ и Сы́ну и Свято́му Ду́ху:

Покланя́емся Ти́ ве́рно, в трие́х ли́цах еди́ному Бо́гу, неразде́льну, и пребоже́ственному естеству́, вопию́ще Ти́: сла́ва Тебе́, Тро́ице, еди́нице Бо́же на́ш.

И ны́не и при́сно и во ве́ки веко́в. Ами́нь:

Богоро́дичен: Пла́чем бия́ше Себе́, Влады́чице, ви́дящи на Дре́ве Кре́стнем Живота́ на́шего, во́лею уме́рша: те́мже вси́ Боже́ственными гла́сы Тя́ при́сно ублажа́ем.