Глас 5. В четверг утром. Тропари и стихиры на каждый день

Седа́льны апо́стольски. Гла́с 5:

Я́ко самови́дцы и слуги́ сло́ва, прему́дрыя апо́столы похва́лим, пе́сньми духо́вными и пе́ньми вси́ земни́и: ти́и бо Христа́ приле́жно мо́лят о на́с, пою́щих свяще́нную и́х па́мять, и кла́няющихся моще́м и́х.

Сти́х: Во всю́ зе́млю изы́де веща́ние и́х, и в концы́ вселе́нныя глаго́лы и́х.

Апо́столы согла́сно восхва́лим, я́ко самови́дцы Сло́ва, и Боже́ственныя пропове́дники, и язы́ков духо́вныя улови́тели, я́ко я́ве приведо́ша на́с к позна́нию Христа́, изба́вльше от пре́лести ро́д челове́ческий, и Ца́рствия сподо́биша.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богоро́дичен: Осужде́н е́смь судо́м со́вести, и пре́жде суда́ су́д помышля́я, трепе́щу окая́нный, помина́я зо́л мои́х мно́жество. Но к Тебе́ необори́мей умиле́нием вопию́, и Предста́тельнице, и покро́ву: о́наго студа́ изба́ви мя́, и спаси́ моли́твами Твои́ми.

Седа́льны. Гла́с 5.

Апо́столы согла́сно похва́лим, я́ко пропове́даша все́м правосла́вное Госпо́дне уче́ние, и прогна́вшыя ерети́ческую мглу́, и просвеще́ние духо́вно возсия́вшыя в ми́ре, благода́ти уче́нием: и мо́лятся спасти́ся на́м.

Сти́х: Небеса́ пове́дают сла́ву Бо́жию, творе́ние же руку́ Его́ возвеща́ет тве́рдь.

Апо́столы согла́сно похва́лим, я́ко пропове́даша все́м правосла́вное Госпо́дне уче́ние, и прогна́вшыя ерети́ческую мглу́, и просвеще́ние духо́вно возсия́вшыя в ми́ре, благода́ти уче́нием: и мо́лятся спасти́ся на́м.

Сти́х: Ди́вен Бо́г во святы́х Свои́х, Бо́г Изра́илев.

Святы́х му́ченик исправле́нием небе́сныя си́лы преудиви́шася: ка́ко в те́ле ме́ртвеннем до́бре подви́гшеся, безпло́тнаго врага́ си́лою кре́стною неви́димо победи́ша: и мо́лятся Го́сподеви, поми́ловатися душа́м на́шым.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богоро́дичен: Тя́ приста́нище, и сте́ну, и прибе́жище, и наде́жду, и покро́в, и заступле́ние те́плое обре́тше ве́рнии, к Тебе́ притека́ем, и вопие́м приле́жно, и зове́м ве́рно: поми́луй, Богоро́дице, упова́ющих на Тя́, и от прегреше́ний изба́ви.

Седа́льны. Гла́с 5.

Ученицы́ Cпа́совы, Боже́ственнии апо́столи, и́же сло́во спаси́тельное все́явше в концы́ земли́, и озари́вше во тьме́ и се́ни седя́щыя, мою́ просвети́те ду́шу омраче́нную страсте́й че́рностию, мольба́ми ва́шими, всехва́льнии.

Го́споди, неизрече́нное та́инство Твоего́ воплоще́ния пропове́давше нему́дрии, филосо́фов посрами́ша, ри́торов ры́барие заусти́ша, и бы́ша язы́ков прему́дрии учи́телие, просвети́вше концы́ све́том Боже́ственнаго ра́зума: те́ми пода́ждь на́м ве́лию ми́лость.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богоро́дичен: И́же упова́ние на Тя́, Де́во Пречи́стая, непоткнове́нное иму́щым, покро́в су́щи от разли́чных напа́стей и обстоя́ний, и бе́д лю́тых свободи́ на́с, моля́щи Сы́на Твоего́, со апо́столы его́, и спаси́ все́х воспева́ющих Тя́.

На стихо́вне стихи́ры апо́стольски, гла́с 5:

Ученицы́ Спа́совы, та́йным самови́дцы бы́вше, Неви́димаго и нача́ла Неиму́щаго пропове́дасте, глаго́люще: в нача́ле бе́ Сло́во, не со́здани бы́сте пре́жде а́нгел, ниже́ научи́стеся от челове́к, но от Вы́шния Прему́дрости. Те́мже дерзнове́ние иму́ще, моли́те о душа́х на́ших.

Сти́х: Испо́лнихомся зау́тра ми́лости Твоея́, Го́споди, и возра́довахомся и возвесели́хомся, во вся́ дни́ на́шя возвесели́хомся, за дни́, в ня́же смири́л ны́ еси́, ле́та, в ня́же ви́дехом зла́я: и при́зри на рабы́ Твоя́, и на дела́ Твоя́, и наста́ви сы́ны и́х.

Апо́столы Госпо́дни согла́сно в пе́снех похва́лим, обо́лкшеся бо в кре́стное всеору́жие, и́дольскую ле́сть упраздни́ша, и победоно́снии яви́шася вене́чницы: и́хже моли́твами и все́х святы́х, Бо́же, поми́луй на́с.

Сти́х: И бу́ди све́тлость Го́спода Бо́га на́шего на на́с, и дела́ ру́к на́ших испра́ви на на́с, и де́ло ру́к на́ших испра́ви.

Му́ченичен: В му́ках су́ще святи́и, ра́дующеся, вопия́ху: ку́пля на́м су́ть сия́ ко Влады́це: вме́сто бо быва́ющих ра́н на телесе́х, све́тло одея́ние в воскресе́ние процвете́т на́м: вме́сто безче́стия, венцы́: за у́зы темни́чныя, ра́й: и за е́же со злоде́и осужде́ние со а́нгелы житие́. И́хже моли́твами, Го́споди, спаси́ ду́шы на́шя.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богоро́дичен: Блажи́м Тя́, Богоро́дице Де́во, я́ко из Тебе́ возсия́ Со́лнце пра́ведное Христо́с, име́яй ве́лию ми́лость.

Блаже́нна, гла́с 5:

Разбо́йник на кресте́, Бо́га Тя́ бы́ти ве́ровав, Христе́, испове́да Тя́ чи́сте от се́рдца: помяни́ мя, Го́споди, вопия́, во Ца́рствии Твое́м.

Блаже́ни миротво́рцы, я́ко ти́и сы́нове Бо́жии нареку́тся.

Я́коже о́блацы све́тлии зе́млю проидо́сте Боже́ственнии ученицы́, во́ду живо́тную окропля́юще, и сердца́ иста́явшая прегреше́нии бога́тно напоя́ете.

Блаже́ни и́згнани пра́вды ра́ди, я́ко те́х е́сть Ца́рство Небе́сное.

Я́коже лучы́ та́йныя, со́лнца возсия́вшаго от Де́вы Чи́стыя, просвети́ли есте́ су́щыя во тьме́ неве́дения седя́щыя, Боже́ственнии ученицы́ Христа́ Бо́га на́шего.

Блаже́ни есте́, егда́ поно́сят ва́м, и изжену́т, и реку́т вся́к зо́л глаго́л на вы́ лжу́ще Мене́ ра́ди.

Му́ченичен: Разжже́ния лю́тых муче́ний, прему́дрии претерпе́вше усе́рдною душе́ю, попали́сте и́дольскую ле́сть, и к Боже́ственному утеше́нию преидо́сте святи́и.

Ра́дуйтеся и весели́теся, я́ко мзда́ ва́ша мно́га на Небесе́х.

Да дра́хму во глубине́ прегреше́ния погребе́ную, Христе́, взе́м ко Отцу́ принесе́ши, апо́столы пропове́дники сотвори́л еси́ Боже́ственным ду́хом.

Сла́ва Отцу́ и Сы́ну и Свято́му Ду́ху:

Пребоже́ственная Тро́ице, О́тче пребезнача́льне, собезнача́льне сы́не, и ду́ше святы́й: еди́но Божество́, все́х пропове́дник моли́твами Це́рковь Твою́ сохрани́.

И ны́не и при́сно и во ве́ки веко́в. Ами́нь:

Богоро́дичен: Апо́столов удобре́ние богообра́дованная су́щи, омраче́на мя́ сластьми́ жите́йскими, покая́ния просвети́, заря́ми, я́ко да велича́ю Тя́.