Глас 3. Во вторник вечером. Тропари и стихиры на каждый день

Стихи́ры Кре́стны. Гла́с 3

Сти́х: А́ще беззако́ния на́зриши, Го́споди, Го́споди, кто́ постои́т? Я́ко у тебе́ очище́ние е́сть.

Тва́рь измени́ся, Сло́ве, распя́тием Твои́м, со́лнце лучи́ спря́та стра́хом, и хра́ма заве́са раздра́ся, и вся́к ве́рный спасе́ся. Те́мже сла́вим Твое́ безме́рное бога́тство.

Сти́х: И́мене ра́ди Твоего́ потерпе́х Тя́, Го́споди, потерпе́ душа́ моя́ в Сло́во Твое́, упова́ душа́ моя́ на Го́спода.

И́же пло́ть на́шу за милосе́рдие восприи́м, Бо́г же и Влады́ка, на дре́ве пригвозди́ся, и вознесе́ ны низве́рженыя, возне́сся, те́лом, я́коже благоволи́, за благоутро́бие ми́лости.

Сти́х: От стра́жи у́тренния до но́щи, от стра́жи у́тренния, да упова́ет Изра́иль на Го́спода.

Ка́плями богото́чныя кро́ве и воды́ возсозда́ся ми́р, пролия́нныя от ре́бр Твои́х, водо́ю у́бо омы́еши я́ко ще́др, все́х грехи́, Го́споди, кро́вию же проще́ние пи́шеши.

И́ны стихи́ры Богоро́дице:

Сти́х: Я́ко у Го́спода ми́лость, и мно́гое у Него́ избавле́ние: и То́й изба́вит Изра́иля от все́х беззако́ний его́.

На одре́ слежя́ небреже́ния моего́, живота́ моего́ вре́мя ле́ностно сконча́х, и бою́ся исхо́да моего́ часа́: но Твое́ю моли́твою воздви́гнувши к покая́нию, спаси́ мя отрокови́це.

Сти́х: Хвали́те Го́спода вси́ язы́цы, похвали́те Его́ вси́ лю́дие.

Боле́зни се́рдца моего́ Чи́стая исцели́, и уста́ви ума́ моего́ пре́лесть, и сподо́би чи́стым Тя́ воспева́ти се́рдцем, и испроси́ти благода́ть, и обрести́ ми́лость в де́нь су́дный.

Сти́х: Я́ко утверди́ся ми́лость Его́ на на́с, и и́стина Госпо́дня пребыва́ет во ве́к.

Отложи́ смире́нная душе́ моя́, неудобоноси́мая бремена́ зло́бы, и приступи́ слезя́щи и вопию́щи: и́го, Чи́стая Де́во, сподо́би мя́ ле́гкое носи́ти Сы́на и Бо́га Твоего́.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Крестобогоро́дичен: Ору́жие се́рдце Твое́ про́йде, Пречи́стая, егда́ Сы́на Твоего́ на Кресте́ ви́дела еси́, и вопия́ла еси́: не безча́дну Мя́ покажи́ Сы́не Мо́й и Бо́же Мо́й, соблюды́й Мя́ по рождестве́ Де́ву.

На стихо́вне стихи́ры Кре́стны. Гла́с 3:

Кресту́ Твоему́ покланя́юся, Христе́, честно́му, храни́телю ми́ра, спасе́нию на́с гре́шных, вели́кому очище́нию, похвале́ всея́ вселе́нныя.

Сти́х: К Тебе́ возведо́х о́чи мои́, живу́щему на небеси́. Се́ я́ко о́чи ра́б в руку́ госпо́дий свои́х, я́ко о́чи рабы́ни в руку́ госпожи́ своея́: та́ко о́чи на́ши ко Го́споду Бо́гу на́шему, до́ндеже уще́дрит ны́.

Дре́во преслуша́ния ми́ру сме́рть прозябе́: дре́во же Креста́ живо́т и нетле́ние. Те́мже Ти́ покланя́емся распе́ншемуся Го́споду: да зна́менается на на́с све́т лица́ Твоего́.

Сти́х: Поми́луй на́с, Го́споди, поми́луй на́с, я́ко по мно́гу испо́лнихомся уничиже́ния: наипа́че напо́лнися душа́ на́ша поноше́ния гобзу́ющих и уничиже́ния го́рдых.

Проро́цы, и апо́столи Христо́вы, и му́ченицы, научи́ша пе́ти Тро́ицу Единосу́щную, и просвети́ша язы́ки заблу́ждшыя, и о́бщники А́нгелом сотвори́ша сы́ны челове́ческия.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Крестобогоро́дичен: На кресте́ Тя воздви́жена, Христе́ Мо́й, я́ко ви́де А́гница ро́ждшая Тя́ и Непоро́чная, и Ма́ти Твоя́, рыда́ше с пла́чем и вопия́ше: не покажи́ Мя безча́дну, Ю́же сохрани́л еси́ чи́сту и по рождестве́.