Глас 3. В субботу утром. Тропари и стихиры на каждый день

Седа́льны му́ченичны. Гла́с 3:

Благоду́шное терпе́ния ва́шего победи́ ко́зни злонача́льнаго врага́ страстоте́рпцы всехва́льнии: сего́ ра́ди ве́чнаго сподо́бистеся блаже́нства. Но моли́теся Го́сподеви, христолюби́вых люде́й спасти́ ста́до, му́ченицы су́ще и́стиннии.

Сти́х: Ди́вен Бо́г во святы́х Свои́х, Бо́г Изра́илев.

Сия́ете ве́рою Пресве́тлая свети́ла святи́и, неду́гующих вра́чеве, страстоте́рпцы прехва́льнии, мучи́телей у́бо ра́н не убоя́стеся, и́дольское злоче́стие низложи́сте, побе́ду иму́ще непобеди́мую, кре́ст и́стинный.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богоро́дичен: Тя́ хода́тайствовавшую спасе́ние ро́да на́шего, воспева́ем, Богоро́дице Де́во: пло́тию бо от Тебе́ восприя́тою Сы́н Тво́й и Бо́г на́ш, кресто́м восприи́м стра́сть, изба́ви на́с от тли́, я́ко Человеколю́бец.

Седа́льны. Гла́с 3.

Вооружи́вшеся всеору́жеством Христо́вым, и обо́лкшеся во ору́жие ве́ры, полки́ вра́жия страда́льчески низложи́сте, усе́рдно бо упова́нием жи́зни, претерпе́сте вся́ мучи́телей преще́ния же и ра́ны. Те́мже и венцы́ прия́сте, му́ченицы Христо́вы терпеливоду́шнии.

Сти́х: Ди́вен Бо́г во святы́х свои́х, Бо́г Изра́илев.

Страстоте́рпцы святи́и, моли́те ми́лостиваго Бо́га, да прегреше́ний оставле́ние пода́ст душа́м на́шым.

Сти́х: Блаже́ни, я́же избра́л и прия́л еси́ Го́споди.

Егда́ сло́вом Твои́м предста́нем безме́здному Твоему́ суди́щу Го́споди, не посрами́ в Тя́ ве́ровавших, Спа́се на́ш: вси́ бо согреши́хом, но Тебе́ не отступи́хом. Те́мже мо́лим Тя́, в селе́ниих пра́ведных Твои́х, Христе́, и́хже прия́л еси́, упоко́й: еди́н бо еси́ безгре́шен.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богоро́дичен: Проро́цы пропове́даша, апо́столи научи́ша, му́ченицы испове́даша, и мы́ ве́ровахом, Богоро́дицу Тя́ вои́стинну су́щую: те́мже и велича́ем Рождество́ Твое́, Пречи́стая.

На хвали́тех стихи́ры му́ченичны, гла́с 3:

Сти́х: Хвали́те Бо́га во святы́х Его́, хвали́те Его́ во утверже́нии си́лы Его́.

Святы́х му́ченик па́мять, прииди́те, лю́дие, вси́ почти́м, я́ко позо́р бы́ша а́нгелом и челове́ком и побе́ды венцы́ от Христа́ прия́ша, и мо́лятся о душа́х на́ших.

Сти́х: Хвали́те Его́ на си́лах Его́, хвали́те Его́ по мно́жеству вели́чествия Его́.

Царе́й и мучи́телей стра́х отри́нуша Христо́вы во́ини, и благодерзнове́нно и му́жески Того́ испове́даша, вся́ческих Го́спода Бо́га и Царя́ на́шего, и мо́лятся о душа́х на́ших.

Сти́х: Хвали́те Его́ во гла́се тру́бнем: хвали́те Его́ во псалти́ри и гу́слех.

Си́лы святы́х А́нгел удиви́шася му́ченическим страда́нием, я́ко пло́тию сме́ртною обложе́ни, о му́ках неради́ша, подо́бницы бы́вше страсте́м Спа́са Христа́, и мо́лятся о душа́х на́ших.

Сти́х: Хвали́те Его́ в тимпа́не и ли́це, хвали́те Его́ во стру́нах и орга́не.

Я́ко свети́ла в ми́ре сия́ете, и по сме́рти святи́и му́ченицы, по́двигом до́брым подви́гшеся: и иму́ще дерзнове́ние, Христа́ умоли́те, поми́ловатися душа́м на́шым.

Сти́х: Хвали́те Его́ в кимва́лех доброгла́сных, хвали́те Его́ в кимва́лех восклица́ния: вся́кое дыха́ние да хва́лит Го́спода.

Ме́ртвен: Челове́цы, что́ всу́е мяте́мся? Пу́ть кра́ток е́сть, теце́м: ды́м е́сть житие́, па́ра, пе́рсть и пе́пел: вма́ле явля́ется, и вско́ре погиба́ет. Те́мже Христу́ Безсме́ртному Царю́ возопии́м: преста́вленныя от на́с упоко́й, иде́же все́х е́сть веселя́щихся жили́ще у тебе́.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богоро́дичен: Без се́мене зачала́ еси́ от Ду́ха Свята́го, и славосло́вяще воспева́ем Тя́: ра́дуйся, Пресвята́я Де́во.

На стихо́вне стихи́ры поко́йны. Гла́с 3.

Сла́влю Кре́ст Тво́й честны́й, и́мже живо́т дарова́ся, и пи́щи наслажде́ние, ве́рою и любо́вию Тя́ пою́щым, Еди́не Многоми́лостиве. Те́мже вопие́м Ти́, Христе́ Бо́же: преста́вльшыяся от на́с упоко́й, иде́же все́х е́сть веселя́щихся жили́ще у Тебе́.

Сти́х: Блаже́ни, я́же избра́л и прия́л еси́ Го́споди.

Еди́не Ми́лостиве и Благоутро́бне, име́яй непостижи́мую бла́гости пучи́ну, све́дый естество́ челове́ческое, е́же соде́лал еси́: Тя́ мо́лим, Христе́ Бо́же, преста́вленныя от на́с упоко́й, иде́же е́сть все́х веселя́щихся жили́ще у тебе́.

Сти́х: Ду́ши и́х во благи́х водворя́тся.

Усну́в во гро́бе я́ко Челове́к, си́лою же непобеди́мою я́ко Бо́г воскреси́л еси́, я́же во гробе́х спя́щыя, немо́лчныя пе́сни Тебе́ принося́щыя. Те́мже мо́лим Тя́, Христе́ Бо́же: преста́вленныя от на́с упоко́й, иде́же е́сть все́х веселя́щихся жили́ще у тебе́.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богоро́дичен: Свещу́ разу́мную Тя́, нося́щую све́т Божества́, совоку́пльшася дебельству́ челове́ческаго существа́, Богоро́дице, вси́ ве́мы: Твоего́ моли́ Сы́на и Бо́га, преста́вленныя от на́с упоко́ити, иде́же е́сть все́х веселя́щихся ра́дование.

Блаже́нна, гла́с 3:

Отве́ргша, Христе́, за́поведь Твою́ пра́отца Ада́ма, из рая́ изгна́л еси́: разбо́йника же, Ще́дре, испове́давша Тя́ на кресте́, во́нь всели́л еси́, зову́ща: помяни́ мя, Спа́се, во Ца́рствии Твое́м.

Блаже́ни и́згнани пра́вды ра́ди, я́ко те́х е́сть Ца́рство Небе́сное.

О́гненным ра́нам примеша́ющеся страстоте́рпцы Христо́вы, ро́су небе́сную обрето́сте, прохлажда́ющую же и укрепля́ющую ва́с терпе́ти плотски́я го́рькия боле́зни: те́мже облегчева́ете вся́ку боле́знь при́сно от ду́ш на́ших.

Блаже́ни есте́, егда́ поно́сят ва́м, и изжену́т, и реку́т вся́к зо́л глаго́л на вы́ лжу́ще Мене́ ра́ди.

Святи́телие свяще́ннии, проро́цы сла́внии, преподо́бных мно́жество, и же́н Боже́ственных собо́р, пострада́вших ве́рою, и низложи́вших пре́лесть вра́жию, небе́сную сла́ву получи́ша: и́хже моли́твами, Спа́се, уще́дри рабы́ Твоя́.

Ра́дуйтеся и весели́теся, я́ко мзда́ ва́ша мно́га на Небесе́х.

Иде́же сия́ет Тво́й све́т, во хра́мех избра́нных твои́х, Бо́же, иде́же пи́ща присносу́щная, я́же от на́с ве́рою преста́вленныя учини́ Иису́се, презря́ и́х, Спа́се, согреше́ния: да Тя́, Влады́ко, приле́жно сла́вим.

Сла́ва Отцу́ и Сы́ну и Свято́му Ду́ху:

Отцу́, и Сы́ну, и Ду́ху Боже́ственному, покланя́емся ве́рнии Тро́ице несозда́нней, в трие́х ли́цех, и во еди́ном Божестве́, при́сно от безпло́тных си́л, в трие́х свяще́ниих славосло́вимей ве́рно.

И ны́не и при́сно и во ве́ки веко́в. Ами́нь:

Богоро́дичен: Просвеще́ние и очище́ние, из Тебе́ яви́ся все́х изба́витель, Богора́дованная Влады́чице, его́же приле́жно моли́ в бу́дущий су́д стра́шный, осужде́ния вся́каго на́с изба́вити, Пречи́стая, ве́рно всегда́ пою́щих Тя́.