Глас 3. В четверг утром. Тропари и стихиры на каждый день

Седа́льны апо́стольски. Гла́с 3:

Прииди́те вси́, апо́столы, восхва́лим я́ко ко́рмчыя: и́дольскую бо пре́лесть упраздни́ша, и к све́ту жи́зни возведо́ша, и в Тро́ицу ве́ровати научи́ша. Те́мже дне́сь па́мять и́х честну́ю соверша́юще, ве́рнии, сла́вим Христа́ Бо́га на́шего.

Сти́х: Во всю́ зе́млю изы́де веща́ние и́х, и в концы́ вселе́нныя глаго́лы и́х.

Апо́стол Твои́х па́мять уясни́л еси́, Го́споди, я́ко Всеси́лен, я́ко укрепи́л еси́ и́х, страсте́м Твои́м подо́битися, и победи́ша му́жески вра́жию си́лу. Те́мже и прия́ша исцеле́ний благода́ти: те́х моли́твами, Человеколю́бче, ми́р пода́ждь лю́дем Твои́м.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богоро́дичен: Непостижи́маго и неопи́саннаго, единосу́щнаго безнача́льному Oтцу́, во чре́во Твое́ та́йно вмести́ла еси́, Богоро́дице. Еди́но и несме́сно от Тро́ицы Божество́ разуме́хом, Рождество́ Твое́ в ми́ре сла́вяще. Те́мже и благода́рно вопие́м Ти́: ра́дуйся, Обра́дованная.

Седа́льны. Гла́с 3.

Всю́ напои́ша зе́млю струя́ми апо́столи, Бо́жия сло́ва, и возрасте́ кла́с ве́ры, и концы́ вселе́нныя напо́лни: пле́велы бо вся́ посеко́ша. те́мже все́х Христу́ Бо́гу приведо́ша, креща́юще те́х в Тро́ицу несозда́нную.

Сти́х: Испове́дят Небеса́ чудеса́ Твоя́, Го́споди.

Всю́ напои́ша зе́млю струя́ми апо́столи, Бо́жия сло́ва, и возрасте́ кла́с ве́ры, и концы́ вселе́нныя напо́лни: пле́велы бо вся́ посеко́ша. те́мже все́х Христу́ Бо́гу приведо́ша, креща́юще те́х в Тро́ицу несозда́нную.

Сти́х: Ди́вен Бо́г во святы́х Свои́х, Бо́г Изра́илев.

Страстоте́рпцы святи́и, моли́те ми́лостиваго Бо́га, да прегреше́ний оставле́ние пода́ст душа́м на́шым.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богоро́дичен: Проро́цы пропове́даша, апо́столи научи́ша, му́ченицы испове́даша, и мы́ ве́ровахом Богоро́дицу Тя́ вои́стинну су́щую: те́мже и велича́ем Рождество́ Твое́, Пречи́стая.

Седа́льны. Гла́с 3.

Апо́столы Твоя́, Христе́, в концы́ земны́я посла́л еси́, я́ко милосе́рд, я́ко изъощре́ныя си́льне стре́лы, закала́ющя вся́кое нече́стие и злосу́етствие, и насажда́ющя спаси́тельная уче́ния: те́х мольба́ми, Ще́дре, ми́р пода́ждь душа́м на́шым.

Тебе́ пропове́дника и́стины, и пресве́тлаго свети́льника ми́ру, хва́ляще воспева́ем, Нико́лае, и вопие́м ве́рою моля́щеся: я́коже непови́нныя от сме́рти исхи́тил еси́: та́ко свя́те, и на́с от бе́д и скорбе́й и вся́каго изба́ви лю́таго озлобле́ния.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богоро́дичен: Умертви́вшуюся ду́шу мою́ согреше́ньми мно́гими, всенепоро́чная Влады́чице: оживи́, я́ко дерзнове́ние ма́тернее к Сы́ну Твоему́ иму́щи: Ты́ бо еди́на родила́ еси́ па́че ума́ и смы́сла Сло́во собезнача́льное Отцу́ и Ду́ху, живо́т и нетле́ние ми́ру да́рующа при́сно, и ве́лию ми́лость.

На стихо́вне стихи́ры апо́стольски, гла́с 3:

Во всю́ зе́млю изы́де веща́ние ва́ше, святи́и апо́столи: и́дольскую пре́лесть разруши́сте, Богоразу́мие пропове́давше. Се́ до́брый по́двиг ва́ш е́сть, блаже́ннии, те́мже пое́м и славосло́вим ва́шя па́мяти.

Сти́х: Испо́лнихомся зау́тра ми́лости Твоея́, Го́споди, и возра́довахомся и возвесели́хомся, во вся́ дни́ на́шя возвесели́хомся, за дни́, в ня́же смири́л ны́ еси́, ле́та, в ня́же ви́дехом зла́я: и при́зри на рабы́ Твоя́, и на дела́ Твоя́, и наста́ви сы́ны и́х.

Христо́вы за́поведи непоро́чно сохра́ньше, святи́и апо́столи, ту́не прия́сте, ту́не подава́ете, исцеля́юще стра́сти ду́ш и теле́с на́ших. Те́мже иму́ще дерзнове́ние, Того́ моли́те, поми́ловатися душа́м на́шым.

Сти́х: И бу́ди све́тлость Го́спода Бо́га на́шего на на́с, и дела́ ру́к на́ших испра́ви на на́с, и де́ло ру́к на́ших испра́ви.

Му́ченичен: Я́ко свети́ла в ми́ре сия́ете, и по сме́рти святи́и му́ченицы, по́двигом до́брым подви́гшеся, иму́ще дерзнове́ние, Христа́ моли́те, поми́ловатися душа́м на́шым.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богоро́дичен: Без се́мене зачала́ еси́ от Ду́ха Свята́го, и славосло́вяще воспева́ем Тя́: ра́дуйся, Пресвята́я Де́во.

Блаже́нна, гла́с 3:

Отве́ргша, Христе́, за́поведь Твою́, пра́отца Ада́ма из рая́ изгна́л еси́: разбо́йника же ще́дре, испове́даша Тя́ на кресте́, во́нь всели́л еси́, зову́ща: помяни́ мя, Спа́се, во Ца́рствии Твое́м.

Блаже́ни и́згнани пра́вды ра́ди, я́ко те́х е́сть Ца́рство Небе́сное.

И́же тро́стию кре́стною из глубины́ неве́дения лю́ди изве́дше апо́столи, и е́ллинскую пре́лесть отгна́сте от земли́, неле́стнии спаси́телие бы́сте ве́рным вои́стинну. Те́мже блажи́ми есте́.

Блаже́ни есте́, егда́ поно́сят ва́м, и изжену́т, и реку́т вся́к зо́л глаго́л на вы́ лжу́ще Мене́ ра́ди.

Я́ко лучы́ та́йныя, и свети́ла пра́веднаго со́лнца бы́вше, сла́внии апо́столи, злоче́стия тьму́ отгна́ли есте́, и к све́ту богоразу́мия наста́висте вся́ лю́ди: те́мже вы́ почита́ем.

Ра́дуйтеся и весели́теся, я́ко мзда́ ва́ша мно́га на Небесе́х.

Му́ченичен: Му́к разжже́ния претерпе́сте, свы́ше страда́льцы благода́ти ро́су прия́ли есте́: и челове́ческия стра́сти, я́ко Христо́вы уго́дницы, при́сно благоче́стно му́дрии исцеля́ете. те́мже ве́рно ва́с святи́и почита́ем.

Сла́ва Отцу́ и Сы́ну и Свято́му Ду́ху:

Тро́ицы свяще́ннии пропове́дницы, Пе́тре, и Па́вле, Ма́рко, и Луко́, Матфе́е, Си́моне, Иа́кове, Андре́е, Иоа́нне, Фомо́, Варфоломе́е и Фили́ппе му́дре, приле́жно всегда́ сию́ моли́те, изба́витися на́м от вся́каго обстоя́ния.

И ны́не и при́сно и во ве́ки веко́в. Ами́нь:

Богоро́дичен: Апо́столов добро́то, и святы́х страстоте́рпец ра́дование, богоблагода́тнейшая влады́чице, о на́с моли́ все́х Спа́са и Бо́га: я́ко да прегреше́ний прии́мем оставле́ние, и Боже́ственныя жи́зни вси́ прича́стницы бу́дем.