Глас 2. В четверг утром. Тропари и стихиры на каждый день

Седа́льны апо́стольски. Гла́с 2:

И́же умудри́вый ловцы́ па́че ри́торов, и посла́вый я́коже пропове́дники по все́й земли́, неизглаго́ланным человеколю́бием Твои́м, Христе́ Бо́же: те́х ра́ди утверди́ це́рковь Твою́, и ве́рным низпосли́ благослове́ние Твое́, еди́не во святы́х почива́яй.

Сти́х: Во всю́ зе́млю изы́де веща́ние и́х, и в концы́ вселе́нныя глаго́лы и́х.

Прему́дрости Бо́жия су́ще ученицы́ и самови́дцы, прему́дрых и ри́торов я́ко нему́друю му́дрость охуди́ша, простото́ю про́поведи язы́ки умудри́вше Боже́ственнии Апо́столи, правосла́вно воспева́ти соде́теля еди́наго и Го́спода.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богоро́дичен: Тебе́ велича́ем, Богоро́дице, вопию́ще: ра́дуйся незаходи́маго све́та о́блаче: того́ бо носи́ла еси́ в не́дрех твои́х, сла́вы Го́спода.

Седа́льны. Гла́с 2.

Улови́вше ловцы́ язы́ки мре́жею ду́ха, и научи́ша концы́ земны́я тебе́ кла́нятися со отце́м, и ду́хом христе́ Бо́же: те́х ра́ди утверди́ це́рковь Твою́, и ве́рным низпосли́ благослове́ние Твое́, и́же еди́не Ми́лостиве и Человеколю́бче.

Сти́х: Испове́дят Небеса́ чудеса́ Твоя́, Го́споди.

Улови́вше ловцы́ язы́ки мре́жею ду́ха, и научи́ша концы́ земны́я тебе́ кла́нятися со отце́м, и ду́хом христе́ Бо́же: те́х ра́ди утверди́ це́рковь Твою́, и ве́рным низпосли́ благослове́ние Твое́, и́же еди́не Ми́лостиве и Человеколю́бче.

Сти́х: Ди́вен Бо́г во святы́х Свои́х, Бо́г Изра́илев.

Страстоно́сцы Госпо́дни, блаже́нна земля́ напи́вшаяся кро́ве ва́шея, и свя́ти хра́ми прие́мшии телеса́ ва́ша: на суди́щи бо врага́ обличи́сте, и Христа́ со дерзнове́нием пропове́дасте. Того́ я́ко бла́га моли́те спасти́ся, мо́лимся, душа́м на́шым.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богоро́дичен: Боже́ственнаго естества́ о́бщницы бы́хом, Тобо́ю, Богоро́дице Присноде́во: Бо́га бо на́м воплоще́нна родила́ еси́. Те́мже Тя́ по до́лгу вси́ благоче́стно велича́ем.

Седа́льны. Гла́с 2.

И́же свети́ла све́тлая, святы́я Твоя́ ученики́ сло́ве в ми́р посла́в, и просвети́л еси́ подсо́лнечную, тьмы́ неразу́мия избавля́я все́х челове́к. Те́х моли́твами при́сно умоле́н быва́я, ю́же во тьме́ ду́шу мою́ просвети́, Человеколю́бче, и спаси́ мя.

Луча́ми чуде́с, Нико́лае, просвеща́еши подсо́лнечную всю́, и разреша́еши мра́к скорбе́й, и бе́д отгоня́еши наше́ствие, предста́тель сы́й тепле́йший.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богоро́дичен: Неискусобра́чная пречи́стая, Свята́я Богоро́дице безневе́стная, сы́на Твоего́, его́же па́че естества́ пло́тию родила́ еси́, со Апо́столы при́сно моли́ согреше́ний проще́ние, и жития́ исправле́ние, и страсте́й премене́ние дарова́ти все́м пою́щым Тя́.

На стихо́вне стихи́ры апо́стольски, гла́с 2:

Возвели́чил еси́, Спа́се, во вселе́нней верхо́вных апо́стол имена́, навыко́ша небе́сным, неизрече́нна да́ша земны́м исцеле́ния, и се́ни и́х еди́ны неду́ги уврачева́ху: и́бо от ры́барей чудотворя́ще, и и́же о иуде́й богосло́вяще благода́ти уче́ния, и́хже ра́ди благоутро́бне, да́ждь на́м ве́лию ми́лость.

Сти́х: Испо́лнихомся зау́тра ми́лости Твоея́, Го́споди, и возра́довахомся и возвесели́хомся, во вся́ дни́ на́шя возвесели́хомся, за дни́, в ня́же смири́л ны́ еси́, ле́та, в ня́же ви́дехом зла́я: и при́зри на рабы́ Твоя́, и на дела́ Твоя́, и наста́ви сы́ны и́х.

И́же от непра́ведных дея́ний всегда́ бори́ми, и к Тебе́ прибега́юще вои́стинну су́щему Бо́гу, гла́с Твои́х учени́к прино́сим Ти́, глаго́люще: спаси́ ны, Наста́вниче, погиба́ем. Покажи́ и ны́не враго́м на́шым, мо́лимся, я́ко покрыва́еши лю́ди, и спаса́еши от бе́д, моли́твами апо́стол презира́я грехи́, за мно́гую благосты́ню, Го́споди, сла́ва Тебе́.

Сти́х: И бу́ди све́тлость Го́спода Бо́га на́шего на на́с, и дела́ ру́к на́ших испра́ви на на́с, и де́ло ру́к на́ших испра́ви.

Му́ченичен: Святы́х твои́х мно́жество, мо́лит Тя́, Христе́: поми́луй и спаси́ на́с я́ко Человеколю́бец.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богоро́дичен: Все́ упова́ние мое́ на Тя́ возлага́ю, Ма́ти Бо́жия, сохрани́ мя под кро́вом Твои́м.

Блаже́нна, гла́с 2:

Гла́с Ти́ прино́сим разбо́йничь, и мо́лимся: помяни́ на́с, Спа́се, во Ца́рствии Твое́м.

Блаже́ни и́згнани пра́вды ра́ди, я́ко те́х е́сть Ца́рство Небе́сное.

Мирски́я концы́ проше́дше Апо́столи, от тьмы́ пре́лести и злоче́стия челове́ки изба́вили есте́ прему́дрии.

Блаже́ни есте́, егда́ поно́сят ва́м, и изжену́т, и реку́т вся́к зо́л глаго́л на вы́ лжу́ще Мене́ ра́ди.

Мре́жею благода́ти из глубины́ су́етства, все́х челове́к, ученицы́ Спа́совы му́дре возвели́ есте́.

Ра́дуйтеся и весели́теся, я́ко мзда́ ва́ша мно́га на Небесе́х.

Му́ченичен: И́же тече́ние сконча́вшыя, и ве́ру соблю́дшыя, страстоте́рпцы Госпо́дни, согла́сно ве́рнии воспои́м.

Сла́ва Отцу́ и Сы́ну и Свято́му Ду́ху:

Равноде́тельна роди́телю сы́на, со ду́хом пропове́давше, воспои́м Тро́ицу несозда́нную.

И ны́не и при́сно и во ве́ки веко́в. Ами́нь:

Богоро́дичен: Апо́столов похвала́, страда́льцев удобре́ние, Ты́ еси́ Пречи́стая Де́во, и ми́ра спасе́ние.