Глас 1. В субботу утром. Тропари и стихиры на каждый день

Седа́льны му́ченичны. Гла́с 1:

Страда́ния похвало́ю, и вене́чною по́честию, сла́внии страстоте́рпцы оде́явшеся Тобо́ю Го́споди, терпе́нием у́бо ра́н беззако́нных победи́ша, и си́лою Боже́ственною от небе́с побе́ду прия́ша: те́х моли́твами и на́с свободи́ от неви́димаго врага́, Спа́се, и спаси́ на́с.

Сти́х: Ди́вен Бо́г во святы́х Свои́х, Бо́г Изра́илев.

Я́ко до́брии во́ини единому́дренно ве́ровавше, преще́ния мучи́телей не убоя́стеся святи́и, приидо́сте усе́рдно ко Христу́ взе́мше честны́й Кре́ст: и сконча́вше тече́ние, с Небесе́ побе́ду прия́сте. Сла́ва Укре́пльшему вы́: сла́ва Венча́вшему вы́: сла́ва Де́йствующему ва́ми все́м исцеле́ния.

Сти́х: Ду́ши и́х во благи́х водворя́тся.

В ме́сте све́тле, в ли́це пра́ведных упоко́й, Спа́се, к Тебе́ преста́вльшихся: на Тя́ бо упова́ние, Человеколю́бче, возложи́ша: приими́ моле́ние о отце́х и ча́дех, и́мже соверша́ем па́мять: и оправди́ те́х, я́ко Многоми́лостив.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богоро́дичен: Гаврии́лу веща́вшу Тебе́, Де́во, ра́дуйся: со гла́сом воплоща́шеся все́х Влады́ка, в Тебе́ святе́м киво́те, я́коже рече́ пра́ведный Дави́д, яви́лася еси́ ши́ршая небе́с, поноси́вши Зижди́теля Твоего́: Сла́ва Все́льшемуся в Тя́: сла́ва Проше́дшему из Тебе́: сла́ва Свободи́вшему на́с Рождество́м Твои́м.

Седа́льны. Гла́с 1.

Ра́нами святы́х, и́же по Тебе́ пострада́ша, умоле́н бу́ди Го́споди: и вся́ на́ша боле́зни и стра́сти исцели́ Человеколю́бче, мо́лимся.

Сти́х: Мно́ги ско́рби пра́ведным, и от все́х и́х изба́вит я́ Госпо́дь.

Му́ченики Христо́вы мо́лим вси́, и любо́вию прии́дем к ни́м с ве́рою: си́и бо о на́шем спасе́нии про́сят, и си́и вси́ источа́ют исцеле́ний благода́ть, си́и полки́ отгоня́ют бесо́вския, я́ко сохра́нницы ве́ры.

Сти́х: Блаже́ни, я́же избра́л и прия́л еси́ Го́споди.

Сме́ртную держа́ву Христе́ упраздни́в, и нетле́ние земны́м источи́л еси́: и и́же в Тя́ ве́рующии не умира́ют, но живу́т вы́ну о Тебе́. Те́мже упоко́й Го́споди, ду́ши ра́б Твои́х, и учини́ и́х со святы́ми Твои́ми: моли́твами Богоро́дицы, да́руя те́м проще́ние и воскресе́ние.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богоро́дичен: Еди́на кре́пкая и те́плая Предста́тельнице ро́да челове́ческаго, Богоро́дице Де́во, непреста́нно моли́ со проро́ки и му́ченики, со святи́тели же и по́стники и преподо́бными, Его́же родила́ еси́ па́че естества́ Бо́га Сло́ва, спасти́ вся́ческая.

На хвали́тех стихи́ры му́ченичны, гла́с 1:

Сти́х: Хвали́те Бо́га во святы́х Его́, хвали́те Его́ во утверже́нии си́лы Его́.

Страстоте́рпцы Христо́вы прииди́те лю́дие вси́ почти́м, пе́ньми и пе́сньми духо́вными, просве́щники ми́ра, и пропове́дники ве́ры: исто́чники приснотеку́щия, от ни́хже истека́ют ве́рным исцеле́ния. Те́х моли́твами Христе́ Бо́же на́ш, ми́р ми́ру Твоему́ да́руй, и душа́м на́шим ве́лию ми́лость.

Сти́х: Хвали́те Его́ на си́лах Его́, хвали́те Его́ по мно́жеству вели́чествия Его́.

Си́и во́ини Царя́ Вели́каго проти́вишася повеле́нием мучи́телевым, до́блественне неради́ша о му́ках, и ле́сть всю́ попра́вше, досто́йне венча́ни бы́ша. Про́сят от Спа́са ми́ра, и душа́м на́шим ве́лия ми́лости.

Сти́х: Хвали́те Его́ во гла́се тру́бнем: хвали́те Его́ во псалти́ри и гу́слех.

Ва́с прехва́льнии му́ченицы, ни ско́рбь, ни теснота́, ни гла́д, ни гоне́ние, ниже́ ра́ны, ни я́рость звере́й, ни ме́ч, ниже́ о́гнь претя́й разлучи́ти от Бо́га возмого́ша: любо́вию же па́че я́же к Нему́, я́ко в чужди́х подви́гшеся телесе́х, естество́ забы́вше, и сме́рть презре́сте. те́мже и досто́йно трудо́в ва́ших мзду́ прия́ли есте́, Небе́сному Ца́рствию насле́дницы бы́вше: Христу́ моли́теся о душа́х на́ших.

Сти́х: Хвали́те Его́ в тимпа́не и ли́це, хвали́те Его́ во стру́нах и орга́не.

Весели́теся му́ченицы о Го́споде, я́ко по́двигом до́брым подвиза́стеся, и проти́вистеся царе́м, и мучи́тели победи́сте: огня́ и меча́ не устраши́стеся, и звере́й ди́виих снеда́ющих телеса́ ва́ша. Христу́ со а́нгелы пе́снь возсыла́юще, с Небесе́ венцы́ прия́сте: испроси́те дарова́ти ми́р ми́ру, и душа́м на́шим ве́лию ми́лость.

Сти́х: Хвали́те Его́ в кимва́лех доброгла́сных, хвали́те Его́ в кимва́лех восклица́ния: вся́кое дыха́ние да хва́лит Го́спода.

Ме́ртвен: Де́лом, Спа́се мо́й, явля́еши, я́ко Ты́ еси́ все́х Воскресе́ние, сло́вом, Сло́ве, Ла́заря от ме́ртвых возста́вил еси́. Егда́ же ме́ртвии от гробо́в воскресо́ша, и врата́ А́дова смято́шася: тогда́ челове́ком сме́рть со́н явля́шеся. Но И́же на спасе́ние Своего́ созда́ния, а не на осужде́ние прише́дый, и́хже избра́л еси́, упоко́й я́ко Человеколю́бец.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богоро́дичен: Ра́дуйся от на́с, Свята́я Богоро́дице Де́во, Чи́стый Сосу́де всея́ вселе́нныя: Свеще́ неугаси́мая, Вмести́лище Невмести́маго, Хра́ме необори́мый. Ра́дуйся, из Нея́же роди́ся А́гнец Бо́жий, взе́мляй грехи́ всего́ ми́ра.

На стихо́вне стихи́ры поко́йны. Гла́с 1.

Тебе́, Спа́се, мо́лимся, Твоего́ сла́дкаго прича́стия преста́вльшихся сподо́би, и всели́ во оби́телех преподо́бных со святы́ми Твои́ми, и в небе́сная жили́ща, благоутро́бием Твои́м презря́ беззако́ния, и подая́ си́м поко́й.

Сти́х: Блаже́ни, я́же избра́л и прия́л еси́ Го́споди.

Па́че ви́димых твоя́, Спа́се, обеща́ния, я́же о́ко не ви́де, и у́хо не слы́ша, и на се́рдце челове́ка никогда́же взы́де: мо́лим Тя́, Влады́ко, сла́дкаго Твоего́ прича́стия получи́ти сподо́би, к Тебе́ преста́вльшияся, и пода́ждь и́м ве́чную жи́знь.

Сти́х: Ду́ши и́х во благи́х водворя́тся.

О Кресте́ Твое́м веселя́щеся. О Кресте́ Твое́м наде́ющеся раби́ Твои́, к Тебе́ преста́вишася Человеколю́бче: и́мже ны́не избавле́ние те́х прегреше́ний, Кре́ст Тво́й да́руй, и Кро́вь пролия́нную за мирски́й живо́т, благосе́рдием Твои́м проща́я согреше́ния, и просвеща́я Све́том лица́ Твоего́.

Сти́х: И па́мять и́х в ро́д и ро́д.

Никто́же безгре́шен, никто́же от челове́к бы́в, то́кмо Ты́ еди́не Безсме́ртне. Те́мже рабы́ Твоя́, я́ко Бо́г Ще́дрый, во све́те со а́нгельскими ликостоя́нии Твои́ми учини́ благоутро́бием Твои́м, презира́я беззако́ния, и подая́ и́м проще́ние.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богоро́дичен: Христа́ умоли́, Твое́ Рожде́ние, Ма́ти Де́во, согреше́ний проще́ние дарова́ти рабо́м Твои́м, Тебе́ Богоро́дицу пропове́давшим вои́стинну, и сло́вом благочести́вым благослови́вшим, и све́тлости святы́х и весе́лия сподо́би во Ца́рствии Твое́м.

Блаже́нна, гла́с 1:

Сне́дию изведе́ из Рая́ вра́г Ада́ма: Кресто́м же введе́ Христо́с во́нь разбо́йника, помяни́ мя Го́споди, вопию́ща, егда́ прии́деши во Ца́рствии Твое́м.

Блаже́ни и́згнани пра́вды ра́ди, я́ко те́х е́сть Ца́рство Небе́сное.

Страда́лец мно́жество безчи́сленное, святи́телей, и прему́дрых же́н, и проро́к пресла́вных, мо́лят Тя́ Иису́се Бо́же: пода́ждь на́м оставле́ние прегреше́ний, и ве́лию ми́лость.

Блаже́ни есте́, егда́ поно́сят ва́м, и изжену́т, и реку́т вся́к зо́л глаго́л на вы́ лжу́ще Мене́ ра́ди.

И́же тече́ние соверши́вше свяще́ннейшии Христо́вы страда́льцы, со святи́тели свяще́нными и проро́ки, сподо́бистеся во Гра́де Небе́снем жи́ти, со а́нгелы веселя́щеся.

Ра́дуйтеся и весели́теся, я́ко мзда́ ва́ша мно́га на Небесе́х.

Во Све́те, Христе́, учини́ Невече́рнем, я́же преста́вил еси́, прегреше́ния и́х презре́в, я́ко Ще́дрый Бо́г: да Твою́ сла́вим, Благода́телю, безчи́сленную ми́лость.

Сла́ва Отцу́ и Сы́ну и Свято́му Ду́ху:

Отцу́ поклони́мся, и Сы́на славосло́вим, и Пресвята́го Ду́ха вси́ ве́рнии воспои́м: помяни́ на́с зову́щих, Единосу́щная Тро́ице, Еди́нице Бо́же.

И ны́не и при́сно и во ве́ки веко́в. Ами́нь:

Богоро́дичен: Я́ко Пала́ту простра́нную, и Престо́л Сла́вы, и О́блак све́тел, песносло́вим Тя́, Чи́стая, и мо́лим: разори́ о́блак мра́чный от ду́ш на́ших, Боже́ственными моли́твами Твои́ми.