Глас 1. В пятницу утром. Тропари и стихиры на каждый день

Седа́льны Кре́стны. Гла́с 1:

Распе́ншуся Ти́ Христе́, поги́бе мучи́тельство, и попра́на бы́сть си́ла вра́жия: ни а́нгел бо, ни челове́к, но Ты́ Са́м Го́споди спа́сл еси́ на́с, сла́ва Тебе́.

Сти́х: Возноси́те Го́спода Бо́га на́шего, и покланя́йтеся подно́жию но́гу Его́, я́ко свя́то е́сть.

Креста́ Твоего́ Дре́ву покланя́емся Человеколю́бче, я́ко на то́м пригвозди́лся еси́, Животе́ все́х: Ра́й отве́рзл еси́ Спа́се, ве́рою прише́дшему к Тебе́ разбо́йнику, и пи́щи сподо́бил еси́ испове́дующаго Тя́: помяни́ мя Го́споди. Приими́ я́коже о́наго, и на́с вопию́щих Тебе́: согреши́хом вси́, милосе́рдием Твои́м не пре́зри на́с.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Крестобогоро́дичен: Нескве́рная А́гница, А́гнца и Па́стыря пове́шена на Дре́ве ме́ртва зря́щи, пла́чущи веща́ше, ма́терски восклица́ющи: ка́ко претерплю́ Твое́, е́же па́че сло́ва, Сы́не Мо́й сни́тие, и во́льныя стра́сти, Бо́же Преблаги́й?

Седа́льны. Гла́с 1.

Ору́жие Кре́стное во бране́х яви́ся иногда́ благочести́вому царю́ Константи́ну, непобеди́мая побе́да на враги́, ве́ры ра́ди, сего́ трепе́щут сопроти́вныя си́лы, сие́ бы́сть ве́рным спасе́ние, и Па́влу похвала́.

Сти́х: Бо́г же Ца́рь на́ш пре́жде ве́ка, соде́ла спасе́ние посреде́ земли́.

И́же дре́вле Ада́ма от пе́рсти созда́вый, бре́нною руко́ю зауше́н бы́в, Ще́дре, и распя́тие претерпе́л еси́, поруга́ния же и ра́ны. О чудесе́! О мно́гаго долготерпе́ния твоего́! Сла́ва Го́споди живоно́сным Твои́м Страсте́м, и́миже на́с спа́сл еси́.

Сти́х: Ди́вен Бо́г во святы́х Свои́х, Бо́г Изра́илев.

Страда́ния похвало́ю, и вене́чною по́честию, сла́внии страстоте́рпцы, оде́явшеся Тобо́ю, Го́споди, терпе́нием у́бо ра́н беззако́нных победи́ша, и си́лою Боже́ственною от Небе́с побе́ду прия́ша. Те́х моли́твами и на́с свободи́ от неви́димаго врага́ Спа́се, и спаси́ на́с.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Крестобогоро́дичен: Зря́щи Тя́ Христе́, Всенепоро́чная Ма́ти, ме́ртва на Кресте́ просте́рта, вопия́ше: Сы́не Мо́й, Собезнача́льне Отцу́ и Ду́ху, что́ неизрече́нное Твое́ сие́ смотре́ние, и́мже спа́сл еси́ Ще́дре, пречи́стую руку́ Твое́ю созда́ние?

Седа́льны. Гла́с 1.

На Дре́ве Тя́, Сло́ве, Кре́стнем, Со́лнца Сла́вы, Иису́се, за милосе́рдие ми́лости, пове́шена пло́тию во́лею, я́ко ви́де со́лнце, не терпя́щи дерзнове́ния, помрачи́ся. Те́мже омраче́нную мою́ ду́шу просвети́ неприкоснове́нным Све́том Твои́м, и спаси́ мя, молю́ся.

На Кресте́ пригвозди́лся еси́ во́лею, Ще́дре, обожи́л еси́ истле́вшее на́ше существо́, и человекоуби́йцу зми́я умертви́л еси́. Но утверди́ правосла́вие в ми́ре, и низложи́ ерети́чествующих воста́ния, честны́м Кресто́м Твои́м.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Крестобогоро́дичен: И́же Твое́ заступле́ние стяжа́вше Пречи́стая, и Твои́ми моли́твами от бе́д избавля́емся: Кресто́м бо Сы́на Твоего́ всегда́ храни́ми везде́, по до́лгу Тя́ вси́ благоче́стно велича́ем.

На стихо́вне стихи́ры Кре́стны, гла́с 1:

Тебе́ на Дре́ве пригво́ждшагося пло́тию, и живо́т на́м пода́вшаго, я́ко Спа́са и Влады́ку пои́м непреста́нно.

Сти́х: Испо́лнихомся зау́тра ми́лости Твоея́, Го́споди, и возра́довахомся и возвесели́хомся, во вся́ дни́ на́шя возвесели́хомся, за дни́, в ня́же смири́л ны́ еси́, ле́та, в ня́же ви́дехом зла́я: и при́зри на рабы́ Твоя́, и на дела́ Твоя́, и наста́ви сы́ны и́х.

Твои́м Кресто́м, Христе́, еди́но ста́до бы́сть а́нгелов и челове́ков, и во еди́ном собо́ре Не́бо и земля́ весели́тся: Го́споди сла́ва Тебе́.

Сти́х: И бу́ди све́тлость Го́спода Бо́га на́шего на на́с, и дела́ ру́к на́ших испра́ви на на́с, и де́ло ру́к на́ших испра́ви.

Му́ченичен: Страстоте́рпцы Христо́вы прииди́те лю́дие вси́ почти́м пе́ньми и пе́сньми духо́вными, свети́льники ми́ра, и пропове́дники ве́ры, исто́чники приснотеку́щия, из ни́хже истека́ют ве́рным исцеле́ния. Те́х моли́твами, Христе́ Бо́же на́ш, ми́р да́руй ми́ру Твоему́, и душа́м на́шим ве́лию ми́лость.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Крестобогоро́дичен: А́гнца, А́гница и Всенепоро́чная Влады́чица, на Кресте́ я́ко ви́девши зра́ка не иму́ща, ни добро́ты, увы́ мне́, пла́чущи глаго́лаше: где́ добро́та Твоя́ за́йде, Сладча́йший? Где́ благоле́пие? Где́ благода́ть сия́ющая, о́браза Твоего́, Сы́не Мо́й любе́знейший?

Блаже́нна, гла́с 1:

Сне́дию изведе́ из Рая́ вра́г Ада́ма: Кресто́м же введе́ Христо́с во́нь разбо́йника, помяни́ мя, зову́ща, егда́ прии́деши во Ца́рствии Твое́м.

Блаже́ни и́згнани пра́вды ра́ди, я́ко те́х е́сть Ца́рство Небе́сное.

Распе́нся, Безгре́шне, грехи́ все́х взя́л еси́ Христе́, и прободе́н бы́л еси́ в ре́бра, спасе́ния пото́ки источи́л еси́, воды́ же и Кро́ве, назида́я сокруше́нныя тле́ю.

Блаже́ни есте́, егда́ поно́сят ва́м, и изжену́т, и реку́т вся́к зо́л глаго́л на вы́ лжу́ще Мене́ ра́ди.

На Дре́ве пригвожда́емь во́лею Иису́се Бо́же, все́ отъя́л еси́, Ще́дре, Ада́мово стра́стное разуме́ние: я́звами же честны́ми бесо́вское мно́жество уязви́л еси́.

Ра́дуйтеся и весели́теся, я́ко мзда́ ва́ша мно́га на Небесе́х.

Му́ченичен: И́же страсте́м уподо́бльшеся, во́лею пострада́вшему пло́тию, му́ченицы сла́внии, при́сно стра́сти исцеля́ете неисце́льныя, неду́ги же отго́ните от челове́к си́лою духо́вною.

Сла́ва Отцу́ и Сы́ну и Свято́му Ду́ху:

Равноси́льную, Единоче́стную Тро́ицу сла́вим Тя́, Отца́ Безнача́льнаго Бо́га, и Сы́на, и Ду́ха Свята́го, Еди́но Триипоста́сное Богонача́лие, ве́рою велича́ем.

И ны́не и при́сно и во ве́ки веко́в. Ами́нь:

Богоро́дичен: На Кресте́ Тя пригвожде́на, я́ко узре́, Христе́ Бо́же, Я́же Тебе́ Ро́ждшая пло́тию, пла́чущи веща́ше: что́ Ти воздаде́, о Сы́не мо́й, евре́йский собо́р законопресту́пный?