Молитва о мире на Украине

Молитва первая

Всевы́шний Бо́же, Влады́ко и Соде́телю всея́ тва́ри, наполня́яй вся вели́чеством Твои́м и содержа́яй си́лою Твое́ю.

К Тебе́ Великодарови́тому Го́споду на́шему припа́даем, се́рдцем сокруше́нным и усе́рдною моли́твою о стране́ Украи́нстей, ра́спрями и нестрое́ниями раздира́емей.

Премилосе́рдый и Всеси́льный, не до конца́ гне́вайся, Го́споди! Бу́ди ми́лостив нам, мо́лит Тя Твоя́ Це́рковь, представля́ющи Тебе́ нача́льника и соверши́теля спасе́ния на́шего Иису́са Христа́. Укрепи́ си́лою Твое́ю ве́рныя лю́ди в стране́ Украи́нстей, заблужда́ющим же просвети́ разу́мныя о́чи све́том Твои́м боже́ственным, да уразуме́ют Твою́ и́стину, умягчи́ их ожесточе́ние, утоли́ вражды́ и нестрое́ния на страну́ и ми́рныя лю́ди ея́ воздвиза́емая, да все позна́ют Тебе́, Го́спода и Спаси́теля на́шего. Не отврати́ лица́ Твоего́ от нас, Го́споди, возда́ждь нам ра́дость спасе́ния Твоего́. Помяни́ ми́лости, я́же показа́л еси́ отце́м на́шим, преложи́ гнев Твой на милосе́рдие и даждь по́мощь Твою́ наро́ду украи́нскому, в ско́рби су́щему.

Мо́лит Тя Це́рковь Ру́сская, представля́ющи Тебе́ хода́тайство всех святы́х в ней просия́вших, изря́днее же Пресвяты́я Богоро́дицы и Присноде́вы Мари́и, от лет дре́вних покрыва́ющия и заступа́ющия страны́ на́ша. Возгре́й сердца́ на́ша теплото́ю благода́ти Твоея́, утверди́ во́лю на́шу в во́ли Твое́й, да я́коже дре́вле, та́ко и ны́не просла́вится всесвято́е и́мя Твое́, Отца́ и Сы́на и Свята́го Ду́ха, во ве́ки веко́в. Ами́нь.

Молитва о прекращении междоусобныя брани

Го́споди Иису́се Христе́ Бо́же наш, при́зри ми́лостивным Твои́м о́ком на скорбь и многоболе́зненный вопль чад Твои́х, в земле́ украи́нстей су́щих.

Изба́ви лю́ди Твоя́ от междоусо́бныя бра́ни, утоли́ кровопроли́тия, отврати́ належа́щия беды́. Лише́нныя кро́ва введи́ в до́мы, а́лчущия напита́й, пла́чущия уте́ши, разделе́нныя совокупи́.

Не оста́ви ста́до Свое́, от сро́дник свои́х во озлобле́нии су́щих, ума́литися, но ско́рое примире́ние я́ко щедр да́руй. Ожесточе́нных сердца́ умягчи́ и к Твоему́ позна́нию обрати́. Мир Це́ркви Твое́й и ве́рным ча́дам ея́ пода́ждь, да еди́нем се́рдцем и еди́ными усты́ просла́вим Тя, Го́спода и Спаси́теля на́шего, во ве́ки веко́в. Ами́нь.