Последование Всенощного бдения в Неделю 2 по Пятидесятнице, всех святых в земле Русской просиявших. Для домашнего (келейного) совершения

Стихи́ры на стихо́вне:

На стиховне стихиры воскресны, глас 1.

Стра́стию Твое́ю, Христе́, / от страсте́й свободи́хомся, / и воскресе́нием Твои́м из истле́ния изба́вихомся, / Го́споди, сла́ва Тебе́.

Стих: Госпо́дь воцари́ся, / в ле́поту облече́ся.

Да ра́дуется тварь, небеса́ да веселя́тся, / рука́ми да воспле́щут язы́цы с весе́лием: / Христо́с бо Спас наш, на Кресте́ пригвозди́ грехи́ на́ша: / и смерть умертви́в, живо́т нам дарова́, / па́дшаго Ада́ма всеро́днаго Воскреси́вый, / я́ко Человеколю́бец.

Стих: И́бо утверди́ вселе́нную, / я́же не подви́жется.

Царь сый небесе́ и земли́ непостижи́ме, / во́лею распя́лся еси́ за человеколю́бие. / Его́же ад срет до́ле, огорчи́ся, / и пра́ведных ду́ши прие́мша, возра́довашася: / Ада́м же, ви́дев Тя, Зижди́теля в преиспо́дних, воскре́се. / О чудесе́! Ка́ко сме́рти вкуси́ всех жизнь? / Но я́коже восхоте́ мир просвети́ти зову́щий и глаго́лющий: / Воскресы́й из ме́ртвых, Го́споди, сла́ва Тебе́.

Стих: До́му Твоему́ подоба́ет святы́ня, / Го́споди, в долготу́ дний.

Жены́ мироно́сицы, мира нося́ща, / со тща́нием и рыда́нием гро́ба Твоего́ достиго́ша, / и не обре́тша Пречи́стаго Те́ла Твоего́, / от А́нгела же уве́девша но́вое и пресла́вное чу́до, / Апо́столом глаго́лаху: / воскре́се Госпо́дь, / подая́ мирови ве́лию ми́лость.

Глас 2: Сла́ва Отцу́ и Сы́ну и Свято́му Ду́ху.

Земле́ Ру́сская,/ гра́де святы́й,/ украша́й твой дом,/ в не́мже Боже́ственный// ве́лий сонм святы́х просла́ви.

Це́рковь Ру́сская,/ красу́йся и лику́й,/ се бо ча́да Твоя́/ Престо́лу Влады́чню// во сла́ве предстоя́т, ра́дующеся.

Собо́ре святы́х ру́сских,/ по́лче Боже́ственный,/ моли́теся ко Го́споду/ о земно́м оте́честве ва́шем// и о почита́ющих вас любо́вию.

Но́вый до́ме Евфра́фов,/ уде́ле избра́нный,/ Русь Свята́я,/ храни́ ве́ру Правосла́вную,// в не́йже тебе́ утвержде́ние.

И ны́не и при́сно и во ве́ки веко́в. Ами́нь.

О чудесе́ но́ваго всех дре́вних чуде́с!/ Кто бо позна́ ма́терь без му́жа ро́ждшую,/ и на руку́ нося́щую, всю тварь Содержа́щаго?/ Бо́жие есть изволе́ние Ро́ждшееся./ Его́же, я́ко Младе́нца, Пречи́стая,/ Твои́ма рука́ма

Моли́тва свята́го Симео́на Богоприи́мца:

Ны́не отпуща́еши раба́ Твоего́, Влады́ко,/ по глаго́лу Твоему́, с ми́ром;/ я́ко ви́деста о́чи мои́ спасе́ние Твое́,/ е́же еси́ угото́вал пред лице́м всех люде́й,/ свет во открове́ние язы́ков,// и сла́ву люде́й Твои́х Изра́иля.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Тропа́рь, глас 4:

Богоро́дице Де́во, ра́дуйся,/ Благода́тная Мари́е, Госпо́дь с Тобо́ю:/ благослове́на Ты в жена́х/ и благослове́н Плод чре́ва Твоего́,// яко Спа́са родила́ еси душ на́ших. (Дважды)

Тропа́рь, глас 8:

Я́коже плод кра́сный Твоего́ спаси́тельнаго се́яния,/ земля́ Ру́сская прино́сит Ти, Го́споди, вся святы́я, в той просия́вшия./ Тех моли́твами в ми́ре глубо́це// Це́рковь и страну́ на́шу Богоро́дицею соблюди́, Многоми́лостиве.

Бу́ди И́мя Госпо́дне благослове́но от ны́не и до ве́ка. (Три́жды)

Псало́м 33:

Благословлю́ Го́спода на вся́кое вре́мя,/ вы́ну хвала́ Его́ во усте́х мои́х./ О Го́споде похва́лится душа́ моя́,/ да услы́шат кро́тцыи, и возвеселя́тся./ Возвели́чите Го́спода со мно́ю,/ и вознесе́м И́мя Его́ вку́пе./ Взыска́х Го́спода, и услы́ша мя,/ и от все́х скорбе́й мои́х изба́ви мя./ Приступи́те к Нему́, и просвети́теся,/ и ли́ца ва́ша не постыдя́тся./ Сей ни́щий воззва́, и Госпо́дь услы́ша и́,/ и от все́х скорбе́й его́ спасе́ и́./ Ополчи́тся а́нгел Госпо́день о́крест боя́щихся Его́,/ и изба́вит их./ Вкуси́те и ви́дите, я́ко благ Госпо́дь:/ блаже́н муж, и́же упова́ет Нань./ Бо́йтеся Го́спода, вси́ святи́и Его́,/ я́ко несть лише́ния боя́щимся Его́./ Бога́тии обнища́ша и взалка́ша:/ взыска́ющии же Го́спода// не лиша́тся вся́каго бла́га.

У́ТРЕНЯ.

Шестопса́лмие:

Сла́ва в вы́шних Бо́гу, и на земли́ мир, в челове́цех благоволе́ние. (Три́жды)

Го́споди, устне́ мои́ отве́рзеши, и уста́ моя́ возвестя́т хвалу́ Твою́. (Два́жды)

Псалом 3:

Го́споди, что ся умно́жиша стужа́ющии ми́? Мно́зи востаю́т на мя, мно́зи глаго́лют души́ мое́й: несть спасе́ния eму́ в Бо́зе eго́. Ты же, Го́споди, Засту́пник мой еси́, сла́ва моя́ и вознося́й главу́ мою́. Гла́сом мои́м ко Го́споду воззва́х, и услы́ша мя от горы́ святы́я Своея́. Аз усну́х, и спах, воста́х, я́ко Госпо́дь засту́пит мя. Не убою́ся от тем люде́й, о́крест напа́дающих на мя. Воскресни́, Го́споди, спаси́ мя, Бо́же мой, я́ко Ты порази́л еси́ вся вражду́ющыя ми всу́е: зу́бы гре́шников сокруши́л еси́. Госпо́дне есть спасе́ние, и на лю́дех Твои́х благослове́ние Твое́.

Аз усну́х, и спах, воста́х, я́ко Госпо́дь засту́пит мя.

Псалом 37:

Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́. Я́ко стре́лы Твоя́ унзо́ша во мне, и утверди́л еси́ на мне ру́ку Твою́. Несть исцеле́ния в пло́ти мое́й от лица́ гне́ва Твоего́, несть ми́ра в косте́х мои́х от лица́ грех мои́х. Я́ко беззако́ния моя́ превзыдо́ша главу́ мою́, я́ко бре́мя тя́жкое отяготе́ша на мне. Возсмерде́ша и согни́ша ра́ны моя́ от лица́ безу́мия моего́. Пострада́х и сляко́хся до конца́, весь день се́туя хожда́х. Я́ко ля́двия моя́ напо́лнишася поруга́ний, и несть исцеле́ния в пло́ти мое́й. Озло́блен бых и смири́хся до зела́, рыка́х от воздыха́ния се́рдца моего́. Го́споди, пред Тобо́ю все жела́ние мое́ и воздыха́ние мое́ от Тебе́ не утаи́ся. Се́рдце мое́ смяте́ся, оста́ви мя си́ла моя́, и свет о́чию мое́ю, и той несть со мно́ю. Дру́зи мои́ и и́скреннии мои́ пря́мо мне прибли́жишася и ста́ша, и бли́жнии мои́ отдале́че мене́ ста́ша и нужда́хуся и́щущии ду́шу мою́, и и́щущии зла́я мне глаго́лаху су́етная и льсти́вным весь день поуча́хуся. Аз же я́ко глух не слы́шах и я́ко нем не отверза́яй уст свои́х. И бых я́ко челове́к не слы́шай и не имы́й во усте́х свои́х обличе́ния. Я́ко на Тя, Го́споди, упова́х, Ты услы́шиши, Го́споди Бо́же мой. Я́ко рех: да не когда́ пора́дуют ми ся врази́ мои́: и внегда́ подвижа́тися нога́м мои́м, на мя велере́чеваша. Я́ко аз на ра́ны гото́в, и боле́знь моя́ предо мно́ю есть вы́ну. Я́ко беззако́ние мое́ аз возвещу́ и попеку́ся о гресе́ мое́м. Врази́ же мои́ живу́т и укрепи́шася па́че мене́, и умно́жишася ненави́дящии мя без пра́вды. Воздаю́щии ми зла́я возблага́я оболга́ху мя, зане́ гоня́х благосты́ню. Не оста́ви мене́, Го́споди Бо́же мой, не отступи́ от Мене́. Вонми́ в по́мощь мою́, Го́споди спасе́ния моего́.

Не оста́ви мене́, Го́споди Бо́же мой, не отступи́ от Мене́. Вонми́ в по́мощь мою́, Го́споди спасе́ния моего́.

Псалом 62:

Бо́же, Бо́же мой, к Тебе́ у́тренюю, возжада́ Тебе́ душа́ моя́, коль мно́жицею Тебе́ плоть моя́, в земли́ пу́сте и непрохо́дне, и безво́дне. Та́ко во святе́м яви́хся Тебе́, ви́дети си́лу Твою́ и сла́ву Твою́. Я́ко лу́чши ми́лость Твоя́ па́че живо́т, устне́ мои́ похвали́те Тя. Та́ко благословлю́ Тя в животе́ мое́м, о и́мени Твое́м воздежу́ ру́це мои́. Я́ко от ту́ка и ма́сти да испо́лнится душа́ моя́, и устна́ма ра́дости восхва́лят Тя уста́ моя́. А́ще помина́х Тя на посте́ли мое́й, на у́тренних поуча́хся в Тя. Я́ко был еси́ Помо́щник мой, и в кро́ве крилу́ Твое́ю возра́дуюся. Прильпе́ душа́ моя́ по Тебе́, мене́ же прия́т десни́ца Твоя́. Ти́и же всу́е иска́ша ду́шу мою́, вни́дут в преиспо́дняя земли́, предадя́тся в ру́ки ору́жия, ча́сти ли́совом бу́дут. Царь же возвесели́тся о Бо́зе, похва́лится всяк клены́йся Им, я́ко загради́шася уста́ глаго́лющих непра́ведная.

На у́тренних поуча́хся в Тя. Я́ко был еси́ Помо́щник мой, и в кро́ве крилу́ Твое́ю возра́дуюся. Прильпе́ душа́ моя́ по Тебе́, мене́ же прия́т десни́ца Твоя́.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Го́споди поми́луй. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Псалом 87:

Го́споди Бо́же спасе́ния моего́, во дни воззва́х, и в нощи́ пред Тобо́ю. Да вни́дет пред Тя моли́тва моя́: приклони́ у́хо Твое́ к моле́нию моему́, я́ко испо́лнися зол душа́ моя́, и живо́т мой аду прибли́жися. Привмене́н бых с низходя́щими в ров, бых я́ко челове́к без по́мощи, в ме́ртвых свобо́дь, я́ко я́звеннии спя́щии во гро́бе, и́хже не помяну́л еси́ ктому́, и ти́и от руки́ Твоея́ отринове́ни бы́ша. Положи́ша мя в ро́ве преиспо́днем, в те́мных и се́ни сме́ртней. На мне утверди́ся я́рость Твоя́, и вся во́лны Твоя́ наве́л еси́ на мя. Уда́лил еси́ зна́емых мои́х от Мене́, положи́ша мя ме́рзость себе́: пре́дан бых и не исхожда́х. О́чи мои́ изнемого́сте от нищеты́, воззва́х к Тебе́, Го́споди, весь день, возде́х к Тебе́ ру́це мои́. Еда́ ме́ртвыми твори́ши чудеса́? Или́ вра́чеве воскреся́т, и испове́дятся Тебе́? Еда́ пове́сть кто во гро́бе ми́лость Твою́, и и́стину Твою́ в поги́бели? Еда́ позна́на бу́дут во тьме чудеса́ Твоя́, и пра́вда Твоя́ в земли́ забве́нней? И аз к Тебе́, Го́споди, воззва́х и у́тро моли́тва моя́ предвари́т Тя. Вску́ю, Го́споди, отре́еши ду́шу мою́, отвраща́еши лице́ Твое́ от Мене́? Нищ есмь аз, и в труде́х от ю́ности моея́; возне́с же ся, смири́хся, и изнемого́х. На мне преидо́ша гне́ви Твои́, устраше́ния Твоя́ возмути́ша мя, обыдо́ша мя я́ко вода́, весь день одержа́ша мя вку́пе. Уда́лил еси́ от Мене́ дру́га и и́скренняго, и зна́емых мои́х от страсте́й.

Го́споди Бо́же спасе́ния моего́, во дни воззва́х, и в нощи́ пред Тобо́ю. Да вни́дет пред Тя моли́тва моя́: приклони́ у́хо Твое́ к моле́нию моему́.

Псалом 102:

Благослови́, душе́ моя́, Го́спода, и вся вну́тренняя моя́ и́мя свя́тое Его́. Благослови́, душе́ моя́, Го́спода, и не забыва́й всех воздая́ний Его́, очища́ющаго вся беззако́ния твоя́, исцеля́ющаго вся неду́ги твоя́, избавля́ющаго от истле́ния живо́т твой, венча́ющаго тя ми́лостию и щедро́тами, исполня́ющаго во благи́х жела́ние твое́: обнови́тся я́ко о́рля ю́ность твоя́. Творя́й ми́лостыни Госпо́дь, и судьбу́ всем оби́димым. Сказа́ пути́ Своя́ Моисе́ови, сыново́м Изра́илевым хоте́ния Своя́: Щедр и Ми́лостив Госпо́дь, Долготерпели́в и Многоми́лостив. Не до конца́ прогне́вается, ниже́ во век вражду́ет, не по беззако́нием на́шым сотвори́л есть нам, ниже́ по грехо́м на́шым возда́л есть нам. Я́ко по высоте́ небе́сней от земли́, утверди́л есть Госпо́дь ми́лость Свою́ на боя́щихся Его́. Ели́ко отстоя́т восто́цы от за́пад, уда́лил есть от нас беззако́ния на́ша. Я́коже ще́дрит оте́ц сы́ны, уще́дри Госпо́дь боя́щихся Его́. Я́ко Той позна́ созда́ние на́ше, помяну́, я́ко персть есмы́. Челове́к, я́ко трава́ дни́е eго́, я́ко цвет се́льный, та́ко оцвете́т, я́ко дух про́йде в нем, и не бу́дет, и не позна́ет ктому́ ме́ста своего́. Ми́лость же Госпо́дня от ве́ка и до ве́ка на боя́щихся Его́, и пра́вда Его́ на сыне́х сыно́в, храня́щих заве́т Его́, и по́мнящих за́поведи Его́ твори́ти я́. Госпо́дь на Небеси́ угото́ва Престо́л Свой, и Ца́рство Его́ все́ми облада́ет. Благослови́те Го́спода вси А́нгели Его́, си́льнии кре́постию, творя́щии сло́во Его́, услы́шати глас слове́с Его́. Благослови́те Го́спода вся Си́лы Его́, слуги́ Его́, творя́щии во́лю Его́. Благослови́те Го́спода вся дела́ Его́, на вся́ком ме́сте влады́чества Его́, благослови́, душе́ моя́, Го́спода.

На вся́ком ме́сте влады́чества Его́, благослови́, душе́ моя́, Го́спода.

Псалом 142:

Го́споди, услы́ши моли́тву мою́, внуши́ моле́ние мое́ во и́стине Твое́й, услы́ши мя в пра́вде Твое́й и не вни́ди в суд с рабо́м Твои́м, я́ко не оправди́тся пред Тобо́ю всяк живы́й. Я́ко погна́ враг ду́шу мою́, смири́л есть в зе́млю живо́т мой, посади́л мя есть в те́мных, я́ко ме́ртвыя ве́ка. И уны́ во мне дух мой, во мне смяте́ся се́рдце мое́. Помяну́х дни дре́вния, поучи́хся во всех де́лех Твои́х, в творе́ниих руку́ Твое́ю поуча́хся. Возде́х к Тебе́ ру́це мои́, душа́ моя́, я́ко земля́ безво́дная Тебе́. Ско́ро услы́ши мя, Го́споди, исчезе́ дух мой, не отврати́ лица́ Твоего́ от Мене́, и уподо́блюся низходя́щым в ров. Слы́шану сотвори́ мне зау́тра ми́лость Твою́, я́ко на Тя упова́х. Скажи́ мне, Го́споди, путь во́ньже пойду́, я́ко к Тебе́ взях ду́шу мою́. Изми́ мя от враг мои́х, Го́споди, к Тебе́ прибего́х. Научи́ мя твори́ти во́лю Твою́, я́ко Ты еси́ Бог мой. Дух Твой Благи́й наста́вит мя на зе́млю пра́ву. И́мене Твоего́ ра́ди, Го́споди, живи́ши мя, пра́вдою Твое́ю изведе́ши от печа́ли ду́шу мою́. И ми́лостию Твое́ю потреби́ши враги́ моя́ и погуби́ши вся стужа́ющыя души́ мое́й, я́ко аз раб Твой есмь.

Услы́ши мя, Го́споди, в пра́вде Твое́й и не вни́ди в суд с рабо́м Твои́м.

Услы́ши мя, Го́споди, в пра́вде Твое́й и не вни́ди в суд с рабо́м Твои́м.

Дух Твой Благи́й наста́вит мя на зе́млю пра́ву.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Тропарь глас 1:

Ка́мени запеча́тану от иуде́й/ и во́ином стрегу́щим Пречи́стое Те́ло Твое́,/ воскре́сл еси́ тридне́вный, Спа́се,/ да́руяй ми́рови жизнь./ Сего́ ра́ди Си́лы Небе́сныя вопия́ху Ти, Жизнода́вче:/ сла́ва Воскресе́нию Твоему́, Христе́,/ сла́ва Ца́рствию Твоему́,// сла́ва смотре́нию Твоему́, еди́не Человеколю́бче. (Дважды)

Сла́ва Отцу́ и Сы́ну и Свято́му Ду́ху.

Тропарь глас 8:

Я́коже плод кра́сный Твоего́ спаси́тельнаго се́яния,/ земля́ Ру́сская прино́сит Ти, Го́споди, вся святы́я, в той просия́вшия./ Тех моли́твами в ми́ре глубо́це// Це́рковь и страну́ на́шу Богоро́дицею соблюди́, Многоми́лостиве.

И ны́не и при́сно и во ве́ки веко́в. Ами́нь.

И́же нас ра́ди рожде́йся от Де́вы/ и распя́тие претерпе́в, Благи́й,/ испрове́ргий сме́ртию смерть,/ и воскресе́ние явле́й, я́ко Бог,/ не пре́зри, я́же созда́л еси́ руко́ю Твое́ю;/ яви́ человеколю́бие Твое́, Ми́лостиве,/ приими́ ро́ждшую Тя Богоро́дицу, моля́щуюся за ны,// и спаси́, Спа́се наш, лю́ди отча́янныя.

Го́споди, поми́луй. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

КАФИСМА ВТОРАЯ

1В коне́ц, о та́йных Сы́на, псалом Давиду, 9

2Испове́мся Тебе́, Го́споди, всем се́рдцем мои́м, пове́м вся чудеса́ Твоя́. 3Возвеселю́ся и возра́дуюся о Тебе́, пою́ и́мени Твоему́, Вы́шний. 4 Внегда́ возврати́тися врагу́ моему́ вспять, изнемо́гут и поги́бнут от лица́ Твоего́. 5Яко сотвори́л eси́ суд мой и прю мою́, сел eси́ на Престо́ле, судя́й пра́вду. 6Запрети́л eси́ язы́ком, и поги́бе нечести́вый, и́мя eго́ потреби́л eси́ в век и в век ве́ка. 7Врагу́ оскуде́ша oру́жия в коне́ц, и гра́ды разруши́л eси́, поги́бе па́мять eго́ с шу́мом. 8И Госпо́дь во век пребыва́ет, угото́ва на суд Престо́л Свой, 9и Той суди́ти и́мать вселе́нней в пра́вду, суди́ти и́мать лю́дем в правоте́. 10И бысть Госпо́дь прибе́жище убо́гому, помо́щник во благовре́мениих, в ско́рбех. 11И да упова́ют на Тя зна́ющии и́мя Твое́, я́ко не оста́вил eси́ взыска́ющих Тя, Го́споди. 12По́йте Го́сподеви, живу́щему в Сио́не, возвести́те во язы́цех начина́ния Его, 13яко взыска́яй кро́ви их помяну́, не забы́ зва́ния убо́гих. 14Поми́луй мя, Го́споди, виждь смире́ние мое́ от враг мои́х, вознося́й мя от врат сме́ртных, 15 Яко да возвещу́ вся хвалы́ Твоя́ во врате́х дще́ре Сио́ни, возра́дуемся о спасе́нии Твое́м. 16Углебо́ша язы́цы в па́губе, ю́же сотвори́ша, в се́ти сей, ю́же скры́ша, увязе́ нога́ их. 17Зна́емь eсть Госпо́дь судьбы́ творя́й, в де́лех руку́ своéю увязе́ гре́шник. 18 Да возвратя́тся гре́шницы во ад, вси язы́цы забыва́ющии Бо́га. 19Яко не до конца́ забве́н бу́дет ни́щий, терпе́ние убо́гих не поги́бнет до конца́. 20Воскресни́, Го́споди, да не крепи́тся челове́к, да су́дятся язы́цы пред Тобо́ю. 21 Поста́ви, Го́споди, законоположи́теля над ни́ми, да разуме́ют язы́цы, я́ко челове́цы суть. 22Вску́ю, Го́споди, отстоя́ дале́че, презира́еши во благовре́мениих, в ско́рбех? 23Внегда́ горди́тися нечести́вому, возгара́ется ни́щий, увяза́ют в сове́тех, я́же помышля́ют. 24 Яко хвали́мь eсть гре́шный в по́хотех души́ своея́, и оби́дяй благослови́мь eсть. 25Раздражи́ Го́спода гре́шный, по мно́жеству гне́ва своего́ не взы́щет, несть Бо́га пред ним. 26Оскверня́ются путие́ eго́ на вся́ко вре́мя, отъе́млются судьбы́ Твоя́ от лица́ eго́, все́ми враги́ свои́ми облада́ет. 27Рече́ бо в се́рдце свое́м, не подви́жуся от ро́да в род без зла, 28его́же кля́твы уста́ eго́ по́лна суть, и го́рести и льсти, под язы́ком eго труд и боле́знь. 29Приседи́т в лови́телстве с бога́тыми в та́йных, éже уби́ти непови́ннаго, óчи eго́ на ни́щаго призира́ете. 30Лови́т в та́йне я́ко лев во огра́де свое́й, лови́т éже восхи́тити ни́щаго, восхи́тити ни́щаго, внегда́ привлещи́ и́ в се́ти свое́й. 31Смири́т eго́, прекло́нится и паде́т, внегда́ eму облада́ти убо́гими. 32Рече́ бо в се́рдце свое́м: забы́ Бог, отврати́ лице́ Свое́, да не ви́дит до конца́. 33Воскресни́, Го́споди Бо́же мой, да вознесе́тся рука́ Твоя́, не забу́ди убо́гих Твои́х до конца́. 34Чесо́ ра́ди прогне́ва нечести́вый Бо́га? Рече́ бо в се́рдце свое́м, не взы́щет. 35 Видиши, я́ко Ты боле́знь и я́рость сматря́еши, да пре́дан бу́дет в ру́це Твои́, Тебе́ оста́влен eсть ни́щий, си́ру Ты бу́ди помо́щник. 36 Сокруши́ мы́шцу гре́шному и лука́вому, взы́щется грех eго и не обря́щется. 37Госпо́дь Царь во век и в век ве́ка, поги́бнете, язы́цы, от земли́ Его́. 38Жела́ние убо́гих услы́шал eси́, Го́споди, угото́ванию се́рдца их внят у́хо Твое́. 39 Суди́ си́ру и смире́ну, да не приложи́т ктому́ велича́тися челове́к на земли́.

В коне́ц, псалом Давиду, 10

1На Го́спода упова́х, ка́ко рече́те души́ мое́й: превита́й по гора́м, я́ко пти́ца? 2Яко се, гре́шницы наляко́ша лук, угото́ваша стре́лы в ту́ле, состреля́ти во мра́це пра́выя се́рдцем. 3Зане́ я́же Ты соверши́л eси́, oни́ разруши́ша, пра́ведник же что сотвори́? Госпо́дь во хра́ме святе́м Свое́м. 4Госпо́дь, на Небеси́ Престо́л Еѓо, óчи Еѓо на ни́щаго призира́ете, ве́жди Еѓо испыта́ете сы́ны челове́чeския. 5Госпо́дь испыта́ет пра́веднаго и нечести́ваго, любя́й же непра́вду ненави́дит свою́ ду́шу. 6Одожди́т на гре́шники се́ти, oгнь и жу́пел, и дух бу́рен часть ча́ши их. 7Яко пра́веден Госпо́дь, и пра́вды возлюби́, правоты́ ви́де лице́ Его́.

Сла́­ва Отцу́ и Сы́­ну и Свя­то́­му Ду́ху, и ны́­не и при́с­но и во ве́­ки ве­ко́в. Ами́нь.

Алли­лу́иа, алли­лу́иа, алли­лу́иа, сла́­ва Те­бе́, Бо́­же. (три́жды)

Го́с­по­ди, по­ми́­луй (три́жды)

Сла́­ва Отцу́ и Сы́­ну и Свято́­му Ду́ху.

И ны́­не и при́с­но и во ве́­ки ве­ко́в. Ами́нь.

1В коне́ц, о осмей, псалом Давиду, 11

2Спаси́ мя, Го́споди, я́ко оскуде́ преподо́бный, я́ко ума́лишася и́стины от сыно́в челове́ческих. 3Су́eтная глаго́ла ки́йждо ко и́скреннему своему́, устне́ льсти́выя в се́рдце, и в се́рдце глаго́лаша зла́я. 4Потреби́т Госпо́дь вся устны́ льсти́выя, язы́к велере́чивый, 5ре́кшыя: язы́к наш возвели́чим, устны́ на́ша при нас суть, кто нам Госпо́дь eсть? 6Стра́сти ра́ди ни́щих и воздыха́ния убо́гих ныне воскресну́, глаго́лет Госпо́дь, положу́ся во спасе́ние, не обиню́ся о нем. 7Словеса́ Госпо́дня словеса́ чи́ста, сребро́ разжже́но, искуше́но земли́, очище́но седмери́цею. 8Ты, Го́споди, сохрани́ши ны и соблюде́ши ны от ро́да сего́ и во век. 9Окрест нечести́вии хо́дят, по высоте́ Твое́й умно́жил eси́ сы́ны челове́чeския.

1В коне́ц, псалом Давиду, 12

2Доко́ле, Го́споди, забу́деши мя до конца́? Доко́ле отвраща́еши лице́ Твое́ от менé? 3Доко́ле положу́ сове́ты в души́ мое́й, боле́зни в се́рдце мое́м день и нощь? Доко́ле вознесе́тся враг мой на мя? 4 При́зри, услы́ши мя, Го́споди Бо́же мой, просвети́ óчи мои́, 5да не когда́ усну́ в смерть, да не когда́ рече́т враг мой, укрепи́хся на него́. 6 Стужа́ющии ми возра́дуются, а́ще подви́жуся. 7Аз же на ми́лость твою́ упова́х, возра́дуется се́рдце мое́ о спасе́нии Твое́м, воспою́ Го́сподеви благоде́явшему мне и пою́ и́мени Го́спода Вы́шняго.

В коне́ц, псалом Давиду, 13

1Рече́ безу́мен в се́рдце свое́м, несть Бог. Растле́ша и омерзи́шася в начина́ниих, несть творя́й благосты́ню. 2Госпо́дь с Небесе́ прини́че на сы́ны челове́чeския, ви́дети, а́ще eсть разумева́яй или́ взыска́яй Бо́га. 3Вси уклони́шася, вку́пе неключи́ми бы́ша: несть творя́й благосты́ню, несть до eди́наго. 4Ни ли́ уразуме́ют вси де́лающии беззако́ние, снеда́ющии лю́ди моя́ в снедь хле́ба? Го́спода не призва́ша. 5Та́мо убоя́шася стра́ха, иде́же не бе страх, я́ко Госпо́дь в ро́де пра́ведных. 6Сове́т ни́щаго посрами́сте, Госпо́дь же упова́ние eго́ eсть. 7Кто даст от Сио́на спасе́ние Изра́илево? 8Внегда́ возврати́т Госпо́дь плене́ние люде́й Свои́х, возра́дуется Иа́ков, и возвесели́тся Изра́иль.

Сла́­ва Отцу́ и Сы́­ну и Свя­то́­му Ду́ху, и ны́­не и при́с­но и во ве́­ки ве­ко́в. Ами́нь.

Алли­лу́иа, алли­лу́иа, алли­лу́иа, сла́­ва Те­бе́, Бо́­же. (три́жды)

Го́с­по­ди, по­ми́­луй (три́жды)

Сла́­ва Отцу́ и Сы́­ну и Свя­то́­му Ду́ху.

И ны́­не и при́с­но и во ве́­ки ве­ко́в. Ами́нь.

В коне́ц, псалом Давиду, 14

1Го́споди, кто обита́ет в жили́щи Твое́м? Или́ кто всели́тся во святу́ю го́ру Твою́? 2Ходя́й непоро́чен и де́лаяй пра́вду, глаго́ляй и́стину в се́рдце свое́м. 3И́же не ульсти́ язы́ком свои́м и не сотвори́ и́скреннему своему́ зла, и поноше́ния не прия́т на бли́жния своя́. 4Уничиже́н eсть пред ним лука́внуяй, боя́щыя же ся Го́спода сла́вит, клены́йся и́скреннему свое́му и не отмета́яся. 5Сребра́ своего́ не даде́ в ли́хву и мзды на непови́нных не прия́т. Творя́й сия́ не подви́жится во век.

Столпописание Давиду, 15

1Сохрани́ мя, Го́споди, я́ко на Тя упова́х. 2Рех Го́сподеви: Госпо́дь мой eси Ты, я́ко благи́х мои́х не тре́буеши. 3Святы́м, и́же суть на земли́ Его, удиви́ Госпо́дь вся хоте́ния Своя́ в них. 4Умно́жишася не́мощи их, по сих ускори́ша: не соберу́ собо́ры их от крове́й, ни помяну́ же име́н их устна́ма мои́ма. 5Госпо́дь часть достоя́ния моего́ и ча́ши моея́, Ты eси́ устроя́яй достоя́ние мое́ мне. 6У́жя нападо́ша ми в держа́вных мои́х, и́бо достоя́ние мое́ держа́вно eсть мне. 7Благословлю́ Го́спода, вразуми́вшаго мя, eще́ же и до но́щи нака́заша мя утро́бы моя́. 8Предзре́х Го́спода предо́ мно́ю вы́ну, я́ко одесну́ю менé eсть, да не подви́жуся. 9Сего́ ра́ди возвесели́ся се́рдце мое́, и возра́довася язы́к мой, eще́ же и плоть моя́ всели́тся на упова́нии. 10Яко не оста́виши ду́шу мою́ во а́де, ниже́ да́си преподо́бному Твоему́ ви́дети истле́ния. 11Сказа́л ми eси́ пути́ живота́, испо́лниши мя весе́лия с лице́м Твои́м, красота́ в десни́це Твое́й в коне́ц.

Моли́тва Давиду, 16

1Услы́ши, Го́споди, пра́вду мою́, вонми́ моле́нию моему́, внуши́ моли́тву мою́ не во устна́х льсти́вых. 2От лица́ Твоего́ судьба́ моя́ изы́дет, óчи мои́ да ви́дита правоты́. 3 Искуси́л eси́ се́рдце мое́, посети́л eси́ но́щию, искуси́л мя eси́, и не обре́теся во мне непра́вда. 4Я́ко да не возглаго́лют уста́ моя́ дел челове́ческих, за словеса́ усте́н Твои́х аз сохрани́х пути́ же́стоки. 5Соверши́ стопы́ моя́ во стезя́х Твои́х, да не подви́жутся стопы́ моя́. 6Аз воззва́х, я́ко услы́шал мя eси́, Бо́же, приклони́ у́хо Твое́ мне и услы́ши глаго́лы моя́. 7Удиви́ ми́лости Твоя́, спаса́яй упова́ющыя на Тя от проти́вящихся десни́це Твое́й. 8 Сохрани́ мя, Го́споди, я́ко зе́ницу óка, в кро́ве крилу́ Твоéю покры́еши мя. 9От лица́ нечести́вых остра́стших мя, врази́ мои́ ду́шу мою́ одержа́ша. 10Тук свой затвори́ша, уста́ их глаго́лаша горды́ню. 11Изгоня́щии мя ны́не обыдо́ша мя, óчи свои́ возложи́ша уклони́ти на зе́млю. 12Объя́ша мя я́ко лев гото́в на лов и я́ко ски́мен обита́яй в та́йных. 13Воскресни́, Го́споди, предвари́ я́ и запни́ им, изба́ви ду́шу мою́ от нечести́ваго, oру́жие Твое́ от враг руки́ Твоея́, 14Го́споди, от ма́лых от земли́, раздели́ я́ в животе́ их, и сокрове́нных Твои́х испо́лнися чре́во их, насы́тишася сыно́в, и оста́виша оста́нки младе́нцeм свои́м. 15Аз же пра́вдою явлю́ся лицу́ Твоему́, насы́щуся, внегда́ яви́ти ми ся сла́ве Твое́й.

Сла́­ва Отцу́ и Сы́­ну и Свя­то́­му Ду́ху, и ны́­не и при́с­но и во ве́­ки ве­ко́в. Ами́нь.

Алли­лу́иа, алли­лу́иа, алли­лу́иа, сла́­ва Те­бе́, Бо́­же. (три́жды)

По стихословии седальны воскресны, глас 1:

Гроб Твой, Спа́се, во́ини стрегу́щии, / ме́ртвии от облиста́ния я́вльшагося а́нгела бы́ша, / пропове́дающа жена́м воскресе́ние. / Тебе́ сла́вим тли потреби́теля, / Тебе́ припа́даем, Воскре́сшему из гро́ба, / и Еди́ному Бо́гу на́шему.

Стих: Воскресни́ Го́споди Бо́же мой, да вознесе́тся рука́ Твоя́, / не забу́ди убо́гих Твои́х до конца́.

Ко Кресту́ пригво́ждься во́лею, Ще́дре, / во гро́бе положе́н быв я́ко мертв, Животода́вче, / держа́ву стерл еси́, Си́льне, сме́ртию Твое́ю: / Тебе́ бо вострепета́ша вра́тницы а́довы, / Ты совоздви́гл еси́ от ве́ка уме́ршыя, / я́ко Еди́н Человеколю́бец.

Слава, и ныне, Богородичен: Ма́терь Тя Бо́жию све́мы вси Де́ву вои́стинну, и по Рождестве́ я́вльшуюся, / и́же любо́вию прибега́ющии к Твое́й бла́гости: / Тебе́ бо и́мамы гре́шнии предста́тельство, / Тебе́ стяжа́хом в напа́стех Спасе́ние, / Еди́ну Всенепоро́чную.

Жены́ ко гро́бу приидо́ша ура́нша, / и а́нгельское явле́ние ви́девша, трепета́ху: / гроб облиста́ жизнь, чу́до удивля́ше я́: / сего́ ра́ди ше́дша, ученико́м пропове́даху воста́ние: / ад плени́ Христо́с, я́ко Еди́н кре́пок и си́лен, / и истле́вшыя вся совоздви́же, / осужде́ния страх разруши́в Кресто́м.

Стих: Испове́мся Тебе́ Го́споди всем се́рдцем мои́м, / пове́м вся чудеса́ Твоя́.

На Кресте́ пригвозди́лся еси́, Животе́ всех, / и в ме́ртвых вмени́лся еси́, Безсме́ртный Го́споди, / воскре́сл еси́ тридне́вен, Спа́се, / совоздви́г Ада́ма от тле́ния. / Сего́ ра́ди си́лы небе́сныя вопия́ху Тебе́, Жизнода́вче Христе́: / сла́ва Воскресе́нию Твоему́, / сла́ва снизхожде́нию Твоему́, / Еди́не Человеколю́бче.

Слава, и ныне, Богородичен: Мари́е, честно́е Влады́ки Прия́телище, / воскреси́ ны па́дшыя в про́пасть лю́таго отча́яния, и прегреше́ний и скорбе́й, / Ты бо еси́ гре́шным Спасе́ние и по́мощь, и кре́пкое Предста́тельство, / и спаса́еши рабы́ Твоя́.

Полиеле́й:

Хвали́те И́мя Госпо́дне, хвали́те, раби́ Го́спода.

Аллилу́иа, аллилу́иа, аллилу́иа.

Благослове́н Госпо́дь от Сио́на, живы́й во Иерусали́ме.

Аллилу́иа, аллилу́иа, аллилу́иа.

Испове́дайтеся Го́сподеви, я́ко Благ, я́ко в век ми́лость Его́.

Аллилу́иа, аллилу́иа, аллилу́иа.

Испове́дайтеся Бо́гу Небе́сному, я́ко в век ми́лость Его́.

Аллилу́иа, аллилу́иа, аллилу́иа.

Велича́ние:

Ублажа́ем вас,/ чудотво́рцы на́ши сла́внии,/ зе́млю Ру́сскую доброде́тельми ва́шими озари́вшии/ и о́браз спасе́ния нам// светоявле́нно показа́вшии.

Псало́м избра́нный

Бла́го есть испове́датися Го́сподеви и пе́ти И́мени Твоему́, Вы́шний, возвеща́ти зау́тра ми́лость Твою́ и и́стину Твою́ на вся́ку но́щь./ Ве́лий Госпо́дь и хва́лен зело́, во гра́де Бо́га на́шего, в горе́ святе́й Его́./ Род и род восхва́лят дела́ Твоя́ и си́лу Твою́ возвестя́т./ Великоле́пие сла́вы святы́ни Твоея́ возглаго́лют и чудеса́ Твоя́ пове́дят./ Па́мять мно́жества бла́гости Твоея́ отры́гнут и пра́вдою Твое́ю возра́дуются./ Госпо́дь кре́пость лю́дем Свои́м даст, Госпо́дь благослови́т лю́ди Своя́ ми́ром./ Я́ко благоволи́т Госпо́дь в лю́дех Свои́х и вознесе́т кро́ткия во спасе́ние./ Возвеселя́тся вси упова́ющии на Тя, во век возра́дуются, и всели́шися в них, и похва́лятся о Тебе́ лю́бящии И́мя Твое́./ Сей род и́щущих Го́спода, и́щущих лице́ Бо́га Иа́ковля./ Мне же зело́ че́стни бы́ша дру́зи Твои́, Бо́же, зело́ утверди́шася влады́чествия их./ Изочту́ их, и па́че песка́ умно́жатся./ Уве́дите, я́ко Госпо́дь, Той есть Бог наш, Той сотвори́ нас, а не мы, мы же лю́дие Его́ и о́вцы па́жити Его́./ Ми́лости Твоя́, Го́споди, во век воспою́, в род и род возвещу́ и́стину Твою́ усты́ мои́ми./ Ми́лость же Госпо́дня от ве́ка и до ве́ка на боя́щихся Его́./ Боя́щиися Го́спода упова́ша на Го́спода, Помо́щник и Защи́титель им есть./ Ра́дуйтеся Бо́гу, Помо́щнику на́шему, воскли́кните Бо́гу Иа́ковлю./ Возра́дуемся о спасе́нии Твое́м и во И́мя Го́спода Бо́га на́шего возвели́чимся./ Госпо́дь утвержде́ние люде́й Свои́х и Защи́титель спасе́ний Христа́ Своего́ есть./ О Бо́зе сотвори́м си́лу, и Той уничижи́т стужа́ющия нам./ Го́споди, си́лою Твое́ю возвесели́тся царь, и о спасе́нии Твое́м возра́дуется зело́./ О Бо́зе похва́лимся весь день, и о И́мени Твое́м испове́мыся во век./ Земля́ даде́ плод свой, благослови́ ны, Бо́же, Бо́же наш, благослови́ ны, Бо́же, и да убоя́тся Его́ вси концы́ земли́./ Спаси́ ны, Го́споди Бо́же наш, и собери́ ны от язы́к испове́датися И́мени Твоему́ свято́му и хвали́тися во хвале́ Твое́й.// Благослове́н Госпо́дь, Бог Изра́илев, от ве́ка и до ве́ка, и реку́т вси лю́дие: бу́ди, бу́ди.

Ублажа́ем вас,/ чудотво́рцы на́ши сла́внии,/ зе́млю Ру́сскую доброде́тельми ва́шими озари́вшии/ и о́браз спасе́ния нам// светоявле́нно показа́вшии.

Тропари воскресны, поемыя по Непорочнах, в неделях всего лета, глас 5:

На едином коемждо тропаре глаголем:

Благослове́н еси́, Го́споди, / научи́ мя оправда́нием Твои́м.

А́нгельский собо́р удиви́ся, / зря́ Тебе́ в ме́ртвых вмени́вшася, / сме́ртную же, Спа́се, кре́пость разори́вша, / и с Собо́ю Ада́ма воздви́гша, / и от а́да вся свобо́ждша.

Благослове́н еси́, Го́споди, / научи́ мя оправда́нием Твои́м.

Почто́ мира с ми́лостивными слеза́ми, / о учени́цы, растворя́ете? / Блиста́яйся во гро́бе А́нгел мироно́сицам веща́ше: / ви́дите вы гроб и уразуме́йте, / Спас бо воскре́се от гро́ба.

Благослове́н еси́, Го́споди, / научи́ мя оправда́нием Твои́м.

Зело́ ра́но мироно́сицы теча́ху / ко гро́бу Твоему́ рыда́ющия, / но предста́ к ним А́нгел и рече́: / рыда́ния вре́мя преста́, не пла́чите, / воскресе́ние же апо́столом рцы́те.

Благослове́н еси́, Го́споди, / научи́ мя оправда́нием Твои́м.

Мироно́сицы жены́ с миры прише́дшия / ко гро́бу Твоему́, Спа́се, рыда́ху, / А́нгел же к ним рече́, глаго́ля: / что с ме́ртвыми жива́го помышля́ете? / Я́ко Бог бо, воскре́се от гро́ба.

Сла́ва: Поклони́мся Отцу́ / и Его́ Сы́нови, и Свято́му Ду́ху, / Святе́й Тро́ице во еди́ном существе́, / с Серафи́мы зову́ще: / Свят, Свят, Свят еси́, Го́споди.

И ны́не: Жизнода́вца ро́ждши, / греха́, Де́во, Ада́ма изба́вила еси́, / ра́дость же Е́ве / в печа́ли ме́сто подала́ еси́, / па́дшия же от жи́зни / к сей напра́ви / из Тебе́ воплоти́выйся Бог и Челове́к.

Аллилу́иа, Аллилу́иа, Аллилу́иа, сла́ва Тебе́, Бо́же. Трижды.

По непорочнах ипакои, глас 1:

Разбо́йничо покая́ние рай окра́де, / плачь же мироно́сиц ра́дость возвести́, / я́ко воскре́сл еси́, Христе́ Бо́же, / подая́й ми́рови ве́лию ми́лость.

Седа́льны ру́сских святы́х:

Глас 3: Мужа́йся, Христо́ва Це́рковь,/ и держа́вствуй над всу́е борю́щими!/ Христо́ви бо дру́зи о тебе́ пеку́тся,/ и предстоя́ще, и обстоя́ще,/ и́хже о́бщий пра́здник ны́не// соверша́еши све́тло.

Глас 1: А́ще и глаго́лют сы́нове ве́ка сего́:/ прииди́те, отста́вим вся пра́здники Бо́жия от земли́,/ но Ца́рство Госпо́дне и еще́ держа́вствовати и́мать,/ де́рзость враго́в отража́ющее./ Те́мже настоя́щее торжество́ све́тло пра́зднующе,/ Еди́ному Царю́ и Бо́гу на́шему возопии́м:/ сла́ва Тебе́, Русь Правосла́вием освяти́вшему;/ сла́ва Тебе́, святы́я мно́гия в ней просла́вльшему;// сла́ва Тебе́, и доны́не ве́рным кре́пость да́рующему.

Глас 5: Красу́йся, свети́ся, Русь Правосла́вная, луча́ми Креста́,/ его́же и́маши всем ве́рным храни́теля,/ ты же мно́жество все де́монское,// тьмы испо́лньшееся, отве́ргни.

Сла́ва Отцу́ и Сы́ну и Свято́му Ду́ху.

Глас 3: Све́тло соверша́юще настоя́щее торжество́,/ восхва́лим и Андре́я Первозва́ннаго,/ я́ко Ру́сския земли́ апо́стола,/ пе́рваго ева́нгельским благове́стием сию́ огласи́вшаго,/ той бо, я́коже дре́вле пра́отцем на́шим,/ та́ко и нам ны́не взыва́ет:// прииди́те, обрето́хом Жела́емаго.

И ны́не и при́сно и во ве́ки веко́в. Ами́нь.

Глас 4: Я́ко необори́мую сте́ну и исто́чник чуде́с/ стяжа́вше Тя, раби́ Твои́, Богоро́дице Пречи́стая,/ сопроти́вных ополче́ния низлага́ем./ Те́мже мо́лим Тя:/ мир земли́ Ру́сстей да́руй// и душа́м на́шим ве́лию ми́лость.

Степенна, глас 1. Антифон 1.

Внегда́ скорбе́ти ми, услы́ши моя́ боле́зни, / Го́споди, Тебе́ зову́.

Пусты́нным непреста́нное Боже́ственное жела́ние быва́ет, / мира су́щим су́етнаго кроме́.

Слава И ныне: Свято́му Ду́ху честь и сла́ва, / я́коже Отцу́ подоба́ет, ку́пно же и Сы́ну, / сего́ ра́ди да пое́м Тро́ице Единодержа́вие.

Прокимен, глас 1:

Ны́не воскресну́, глаго́лет Госпо́дь, / положу́ся во спасе́ние, не обиню́ся о нем.

Ны́не воскресну́, глаго́лет Госпо́дь, / положу́ся во спасе́ние, не обиню́ся о нем.

Стих: Словеса́ Госпо́дня, словеса́ чи́ста.

Ны́не воскресну́, глаго́лет Госпо́дь, / положу́ся во спасе́ние, не обиню́ся о нем.

Ны́не воскресну́, глаго́лет Госпо́дь,

положу́ся во спасе́ние, не обиню́ся о нем.

Таже другий прокимен:

Вся́кое дыха́ние / да хва́лит Го́спода.

Вся́кое дыха́ние / да хва́лит Го́спода.

Стих: Хвали́те Бо́га во святы́х Его́, хвали́те Его́ в утверже́нии си́лы Его́.

Вся́кое дыха́ние / да хва́лит Го́спода.

Вся́кое дыха́ние

да хва́лит Го́спода.

Го́споди, поми́луй. (Три́жды)

От Ма́рка Свята́го Ева́нгелия чте́ние

Сла́ва, Тебе́, Го́споди, сла́ва Тебе́.

Во вре́мя о́но, мину́вши суббо́те, Мари́а Магдали́на и Мари́а Иа́ковля и Саломи́а купи́ша арома́ты, да прише́дша пома́жут Иису́са. И зело́ зау́тра во еди́ну от суббо́т приидо́ша на гроб, возсия́вшу со́лнцу, и глаго́лаху к себе́: кто отвали́т нам ка́мень от две́рий гро́ба? И воззре́вша ви́деша, я́ко отвале́н бе ка́мень: бе бо ве́лий зело́. И вше́дша во гроб, ви́деша ю́ношу седя́ща в десны́х, оде́яна во оде́жду белу́: и ужасо́шася. Он же глаго́ла им: не ужаса́йтеся: Иису́са и́щете Назаряни́на распя́таго: воста́, несть зде: се, ме́сто, иде́же положи́ша Его́: но иди́те, рцы́те ученико́м Его́ и Петро́ви, я́ко варя́ет вы в Галиле́и: та́мо Его́ ви́дите, я́коже рече́ вам. И изше́дша бежа́ша от гро́ба: имя́ше же их тре́пет и у́жас: и ни кому́же ничто́же ре́ша: боя́хубося.

Сла́ва, Тебе́, Го́споди, сла́ва Тебе́.

По Евангелии

Воскресе́ние Христо́во ви́девше, / поклони́мся Свято́му Го́споду Иису́су, / еди́ному безгре́шному. / Кресту́ Твоему́ покланя́емся, Христе́, / и свято́е Воскресе́ние Твое́ пое́м и сла́вим: / Ты бо еси́ Бог наш, / ра́зве Тебе́ ино́го не зна́ем, / и́мя Твое́ имену́ем. / Прииди́те вси ве́рнии, / поклони́мся Свято́му Христо́ву Воскресе́нию: / се бо прии́де кресто́м ра́дость всему́ ми́ру. / Всегда́ благословя́ще Го́спода, / пое́м Воскресе́ние Его́: / распя́тие бо претерпе́в, / сме́ртию смерть разруши́.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниих зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́нныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Слава: Моли́твами апо́столов, / Ми́лостиве, очи́сти / мно́жества согреше́ний на́ших.

И ныне: Моли́твами Богоро́дицы, / Ми́лостиве, очи́сти / мно́жества согреше́ний на́ших.

Таже, глас 6: Поми́луй мя, Бо́же, / по вели́цей ми́лости Твое́й / и по мно́жеству щедро́т Твои́х / очи́сти беззако́ние мое́.

Посем стихира: Воскре́с Иису́с от гро́ба, / я́коже прорече́, / даде́ нам живо́т ве́чный / и ве́лию ми́лость.

Го́споди, поми́луй. (12 раз)

Кано́н, глас 1:

Песнь 1:

Ирмо́с: Твоя́ победи́тельная десни́ца/ Боголе́пно в кре́пости просла́вися:/ та бо, Безсме́ртне,/ я́ко всемогу́щая, проти́вныя сотре́,// Изра́ильтяном путь глубины́ новосоде́лавшая.

Припев: Сла́ва, Го́споди, свято́му Воскресе́нию Твоему́.

И́же рука́ма пречи́стыма от пе́рсти/ богоде́тельне испе́рва созда́в мя,/ ру́це распросте́рл еси́ на кресте́,/ от земли́ взыва́я тле́нное мое́ те́ло,// е́же от Де́вы прия́л еси́.

Припев: Сла́ва, Го́споди, свято́му Воскресе́нию Твоему́.

Умерщвле́ние подъя́л еси́ мене́ ра́ди,/ и ду́шу сме́рти пре́дал еси́,/ И́же вдохнове́нием боже́ственным ду́шу ми вложи́вый,/ и отреши́в ве́чных уз, и совоскреси́в// нетле́нием просла́вил еси́.

Припев: Пресвята́я Богоро́дице, спаси́ нас.

Богородичен: Ра́дуйся, благода́ти исто́чниче,/ ра́дуйся ле́ствице, и две́ре небе́сная,/ ра́дуйся све́щнице, и ру́чко злата́я, и горо́ несеко́мая,// Я́же Жизнода́вца Христа́ ми́рови ро́ждшая.

Припев: Пресвята́я Богоро́дице, спаси́ нас.

Ку́ю Ти досто́йную песнь на́ше принесе́т неможе́ние?/ то́чию обра́довательную,/ е́йже нас Гаврии́л та́йно научи́л есть:// ра́дуйся, Богоро́дице Де́во, Ма́ти Неневе́стная.

Припев: Пресвята́я Богоро́дице, спаси́ нас.

Присноде́ве и Ма́тери Царя́ вы́шних сил,/ от чисте́йша се́рдца, ве́рнии, духо́вне возопии́м:// ра́дуйся, Богоро́дице Де́во, Ма́ти Неневе́стная.

Припев: Вси святи́и земли́ Ру́сския, моли́те Бо́га о нас.

Вси в пе́снех духо́вных воспои́м согла́сно/ во благоче́стии просия́вшия Боже́ственныя отцы́ на́ша,/ я́же изнесе́ Ру́сския земли́ вся́ко ме́сто и страна́// и я́же Це́рковь Ру́сская воспита́.

Припев: Вси святи́и земли́ Ру́сския, моли́те Бо́га о нас.

Ра́дуйтеся, святи́телие седмочи́сленнии:/ Васи́лие, Ефре́ме, Евге́ние, Елпи́дие, Агафодо́ре, Ефе́рие и Капито́не,/ в Херсо́не епи́скопствовавшии// и зе́млю на́шу кровьми́ свои́ми освяти́вшии.

Припев: Вси святи́и земли́ Ру́сския, моли́те Бо́га о нас.

Прииди́те, мучениколю́бцы ве́рнии,/ пе́сньми почти́м первому́ченики ру́сския, Фео́дора и ю́наго Иоа́нна,// и́долом не послужи́вшия и кро́ви своя́ за Христа́ да́вшия.

Припев: Вси святи́и земли́ Ру́сския, моли́те Бо́га о нас.

Вели́чие на́ше и похвала́ ты еси́, О́льго Богому́драя,/ тобо́ю бо свободи́хомся от бесо́вскаго прельще́ния,// не преста́й и ны́не моли́ти за лю́ди, я́же Бо́гу привела́ еси́.

Припев: Вси святи́и земли́ Ру́сския, моли́те Бо́га о нас.

Ра́дуйся и весели́ся, ра́бе Христо́в,/ кня́же вели́кий и му́дрый Влади́мире, просвети́телю наш,/ тобо́ю бо изба́вихомся от душепа́губнаго идолослуже́ния,// те́мже, ра́дуйся, вопие́м тебе́.

Припев: Вси святи́и земли́ Ру́сския, моли́те Бо́га о нас.

Сия́ет, я́ко звезда́ на небеси́, Бо́жий иера́рх Михаи́л,/ зе́млю Ру́сскую просвети́вый све́том позна́ния Боже́ственныя ве́ры// и Влады́це приведы́й лю́ди но́вы, ба́нею креще́ния обновле́нны.

Сла́ва Отцу́ и Сы́ну и Свято́му Ду́ху.

О блаже́ннии страстоте́рпцы Христо́вы,/ кня́зие Бори́се, Гле́бе, и И́горе, и Михаи́ле с боля́рином Фео́дором!/ Не забу́дите оте́чества ва́шего, глад и озлобле́ние отгони́те,// от грехопаде́ний междоусо́бий изба́вите ны.

И ны́не и при́сно и во ве́ки веко́в, ами́нь.

Богородичен: С чи́нми а́нгел, Влады́чице,/ со проро́ки, и апо́столы, и со все́ми святы́ми/ за ны, гре́шныя, Бо́гу помоли́ся,// Твоего́ Покро́ва пра́здник Церкви Русской просла́вльшия.

Песнь 3:

Ирмо́с: Еди́не ве́дый челове́ческаго существа́ не́мощь/ и ми́лостивно в не вообра́жся,/ препоя́ши мя с высоты́ си́лою,/ е́же вопи́ти Тебе́, Святы́й,/ одушевле́нный хра́ме// неизрече́нныя сла́вы Твоея́, Человеколю́бче.

Припев: Сла́ва, Го́споди, свято́му Воскресе́нию Твоему́.

Бог Сый мне, Бла́же, па́дшаго уще́дрил еси́,/ и сни́ти ко мне благоволи́в, возне́сл мя еси́ распя́тием,/ е́же вопи́ти Тебе́, Святы́й:// Хра́ме одушевле́нный неизрече́нныя Твоея́ сла́вы, Человеколю́бче.

Припев: Сла́ва, Го́споди, свято́му Воскресе́нию Твоему́.

Живо́т ипоста́сный Христе́ сый,/ в истле́вша мя, я́ко Милосе́рдый Бог, обо́лкся,/ в персть сме́ртную соше́д, Влады́ко,/ сме́ртную держа́ву разруши́л еси́,/ и мертв тридне́вен воскре́с,// в нетле́ние мя обле́кл еси́.

Припев: Пресвята́я Богоро́дице, спаси́ нас.

Богородичен: Бо́га заче́нши во чре́ве, Де́во, Ду́хом Пресвяты́м,/ пребыла́ еси́ неопали́ма,/ поне́же Тя купина́ законополо́жнику Моисе́ю,/ пали́мую нежего́мо, я́ве предвозвести́,// огнь нестерпи́мый прие́мшую.

Припев: Пресвята́я Богоро́дице, спаси́ нас.

О́блак Тя ле́гкий нело́жно, Де́во, имену́ем,/ проро́ческим возсле́дующе рече́нием:/ прии́де бо на Тебе́ Госпо́дь/ низложи́ти еги́петския пре́лести рукотворе́ния,// и просвети́ти сим служа́щия.

Припев: Пресвята́я Богоро́дице, спаси́ нас.

Тя запеча́танный вои́стинну лик проро́ческий исто́чник,/ и заключе́нную дверь именова́, де́вства Твоего́, Всепе́тая,/ я́вственне зна́мения нам пи́шуще:// е́же сохрани́ла еси́ и по рождестве́.

Припев: Вси святи́и земли́ Ру́сския, моли́те Бо́га о нас.

Пропове́дует пресла́вно и па́че трубы́ вопие́т/ вели́кая Ла́вра Пече́рская,/ тобо́ю нача́ло прии́мшая, о́тче преподо́бне, Анто́ние сла́вне,// всех мона́хов Церкви Русския первонача́льниче.

Припев: Вси святи́и земли́ Ру́сския, моли́те Бо́га о нас.

Воспои́м све́тло мона́шескаго о́бщаго жития́/ в Ру́сстей земли́ устрои́теля, блаже́ннаго Феодо́сия,/ с ним и Не́стора, достопа́мятных дея́ний списа́теля,// и Али́пия, живописа́ния на Руси нача́льника.

Припев: Вси святи́и земли́ Ру́сския, моли́те Бо́га о нас.

Рай мы́сленный еси́, Пече́рская свята́я горо́,/ умно́жившая духо́вная древеса́, блаже́нныя отцы́,/ и́хже исчести́ по еди́ному не могу́ще,// о всех вку́пе хвалу́ принесе́м Еди́ному Влады́це.

Припев: Вси святи́и земли́ Ру́сския, моли́те Бо́га о нас.

Анто́ние, Иоа́нне и Евста́фие, тве́рдии испове́дницы правосла́вныя ве́ры,/ издре́вле в земле Русско-Лито́встей насажде́ннии,/ моли́твами ва́шими от зловре́дных инове́рных мудрова́ний// соо́тчичей ва́ших и всех нас огражда́йте.

Припев: Вси святи́и земли́ Ру́сския, моли́те Бо́га о нас.

Хода́таи бу́дите за оте́чество ва́ше земно́е,/ Афана́сие преподобному́чениче, и ты, о́троче Гаврии́ле,/ научи́те у́бо и нас Правосла́вие дерзнове́нно испове́дати// и стра́ха вра́жия не боя́тися.

Припев: Вси святи́и земли́ Ру́сския, моли́те Бо́га о нас.

Да почти́тся И́ов преподо́бный, Ла́вры Поча́евския украше́ние,/ вку́пе со все́ми уго́дники и чудотво́рцы Волы́нскими,// де́лы свои́ми и чудесы́ облиста́вшии пресла́вно земли́ на́шея концы́.

Сла́ва Отцу́ и Сы́ну и Свято́му Ду́ху.

Пе́сньми свяще́нными восхва́лим Афана́сия, Царегра́дскаго святи́теля,/ свое́ благослове́ние земли́ нашей прине́сшаго// и честны́я своя́ мо́щи нам оста́вльшаго.

И ны́не и при́сно и во ве́ки веко́в, ами́нь.

Богородичен: Се вре́мя заступле́ния Пресвяты́я Богоро́дицы прии́де,/ умно́жившимся собла́зном,/ се вре́мя на́ших к Ней воздыха́ний, о бра́тие,/ рцем у́бо от всего́ се́рдца на́шего:// Влады́чице, Влады́чице, помози́ лю́дем Твои́м.

Конда́к ру́сских святы́х, глас 3, подо́бен: «Де́ва днесь…»:

Днесь лик святы́х, в земли́ на́шей Бо́гу угоди́вших, предстои́т в Це́ркви/ и неви́димо за ны мо́лится Бо́гу./ А́нгели с ним славосло́вят,/ и вси святи́и Це́ркве Христо́вы ему́ спра́зднуют,/ о нас бо мо́лят вси ку́пно// Преве́чнаго Бо́га.

И́кос:

Еде́мскаго рая́ древеса́ добропло́дная и кра́сная яви́шася святи́и,/ цве́ты благово́нныя уче́ний и плоды́ дел творя́щии,/ от ни́хже ду́ши на́ша пита́ются и глад наш духо́вный утоля́ется,/ прииди́те у́бо, притеце́м под сень их и ублажи́м их,/ я́ко страны́ на́шея отра́ду и украше́ние и я́ко жития́ о́браз нам и начерта́ние,// ти́и бо венцы́ прия́ша нетле́нныя от Преве́чнаго Бо́га.

Седа́лен ру́сских святы́х, глaс 7:

Нощне́й тьме огустева́ющей, умножа́ется зве́здный блеск,/ и к тому́ о́чи заблу́ждших ра́достно возво́дятся./ Та́ко и умно́жившейся на земли́ грехо́вней тьме,/ возведе́м горе́ о́чи на́ши, бра́тие,/ и, сия́ние духо́вных звезд, зе́млю на́шу озаря́ющих, узре́вше,/ к Небе́сному оте́честву потщи́мся,// его́же да не лиши́т Госпо́дь нас, гре́шных, моли́твами святы́х Свои́х.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в, ами́нь.

Седа́лен ри́зы Госпо́дней, глaс 4:

Притеце́м, ве́рнии, к Боже́ственней и цельбоно́сней ри́зе Спаси́теля на́шего Бо́га,/ благоизво́лившаго сию́ пло́тию носи́ти и на Кресте́ Святу́ю Свою́ Кровь излия́ти,/ е́юже искупи́ нас от рабо́ты вра́жия./ Те́мже благода́рственно вопие́м Ему́:/ спаси́ Первосвяти́теля на́шего и архиере́и,/ Оте́чество на́ше и вся лю́ди честно́ю Твое́ю ри́зою защити́// и спаси́ ду́ши на́ша, я́ко Человеколю́бец.

Песнь 4:

Ирмо́с: Го́ру Тя благода́тию Бо́жиею приосене́нную,/ прозорли́выма Авваку́м/ усмотри́в очи́ма,/ из Тебе́ изы́ти Изра́илеву провозглаша́ше Свято́му,/ во Спасе́ние на́ше// и обновле́ние.

Припев: Сла́ва, Го́споди, свято́му Воскресе́нию Твоему́.

Кто сей Спас и́же из Едо́ма и́сходя, вене́ц нося́ терно́вен,/ очервле́нну ри́зу имы́й, на дре́ве ви́ся;/ Изра́илев есть Сей Святы́й,// во Спасе́ние на́ше и обновле́ние.

Припев: Сла́ва, Го́споди, свято́му Воскресе́нию Твоему́.

Ви́дите лю́дие непокори́вии, и устыди́теся:/ Его́же бо я́ко злоде́я вы вознести́ на крест у Пила́та испроси́сте умовре́дне,// сме́рти разруши́в си́лу, боголе́пно воскре́с из гро́ба.

Припев: Пресвята́я Богоро́дице, спаси́ нас.

Богородичен: Дре́во Тя, Де́во, жи́зни ве́мы:/ не бо сне́ди плод смертоно́сный челове́ком из Тебе́ прозябе́,/ но живота́ присносу́щнаго наслажде́ние,// во Спасе́ние нас пою́щих Тя.

Припев: Пресвята́я Богоро́дице, спаси́ нас.

Слы́ши чуде́с не́бо, и внуша́й земле́,/ я́ко Дщи пе́рстнаго у́бо па́дшаго Ада́ма, Бо́гу нарече́на бысть,/ и Своему́ Соде́телю Роди́тельница,// на Спасе́ние на́ше и обновле́ние.

Припев: Пресвята́я Богоро́дице, спаси́ нас.

Пое́м вели́кое и стра́шное Твое́ та́инство,/ преми́рных бо утаи́вся чинонача́лий,/ на Тя И́же сый сни́де я́ко дождь на руно́, Всепе́тая,// на Спасе́ние нас пою́щих Тя.

Припев: Вси святи́и земли́ Ру́сския, моли́те Бо́га о нас.

Первонача́льника и устрои́теля гра́да Москвы́,/ блаже́нне кня́же Дании́ле, показа́ тя Госпо́дь,/ к Нему́ же непреста́нно моля́ся, град твой охраня́й,/ зе́млю на́шу от бед спаса́й,// правосла́вныя же ру́сския лю́ди посеща́ти ми́лостивно не преста́й.

Припев: Вси святи́и земли́ Ру́сския, моли́те Бо́га о нас.

Мо́лим вас, святи́телие Христо́вы/ Пе́тре, Алекси́е, Ио́но, Фили́ппе и Инноке́нтие,/ Фо́тие, Киприа́не и Феогно́сте и вси про́чии Моско́встии чудотво́рцы:/ душе́вное смуще́ние и печа́ли на́шея бу́рю разори́те// и тишину́ нам пода́йте ва́шими к Бо́гу моли́твами.

Припев: Вси святи́и земли́ Ру́сския, моли́те Бо́га о нас.

И первопресто́льник Русския Це́ркве, и испове́дник Правосла́вныя ве́ры,/ и обличи́тель грехолюби́вых и мяте́жных,/ и строи́тель Ру́сския земли́ был еси́, святи́телю Ермоге́не,/ и за сие́ темни́цею и гла́дом му́чимь был еси́ и прие́мь от Бо́га неувяда́емый вене́ц,// со святи́тели и му́ченики весели́шися.

Припев: Вси святи́и земли́ Ру́сския, моли́те Бо́га о нас.

Ра́дуется сла́вный град Москва́, и весе́лия исполня́ется вся Русь Свята́я,/ на твоя́ моли́твы наде́ющеся, Се́ргие Богоблаже́нне,/ оби́тель же твоя́ красу́ется,// храня́щи честны́я твоя́ мо́щи, я́ко сокро́вище свяще́нное.

Припев: Вси святи́и земли́ Ру́сския, моли́те Бо́га о нас.

Пе́сньми свяще́нными восхва́лим преподо́бнаго Ни́кона, послуша́ния рачи́теля,/ с ни́мже воспои́м Михе́я, Са́вву и Диони́сия, Стефа́на, Андрони́ка и Са́вву и вся преподо́бныя ученики́ и собесе́дники вели́каго Се́ргия,// и́хже моли́твами Це́рковь Ру́сская утвержда́ется.

Припев: Вси святи́и земли́ Ру́сския, моли́те Бо́га о нас.

О прему́дрии и блаже́ннии Васи́лие, Макси́ме и Иоа́нне Моско́встии/ и вси Христа́ ра́ди юро́дивии на Руси просиявшии, чу́днии житие́м и ра́зумом,/ мо́лим вас приле́жно:/ моли́те Христа́ Бо́га на́шего за земно́е оте́чество ва́ше// и всем ве́рным спасе́ние испроси́те.

Сла́ва Отцу́ и Сы́ну и Свято́му Ду́ху.

Но́вый сто́лпник в де́бри Калу́жстей яви́лся еси́, преподо́бне Ти́хоне,/ и ку́пно с преподо́бным Пафну́тием, и́ночества стро́гим ревни́телем, и блаже́нным Лавре́нтием/ ко гра́ду Го́рнему в стране́ твое́й путь ве́рный проложи́л еси́,// на не́мже упаси́ и нас моли́твами твои́ми.

И ны́не и при́сно и во ве́ки веко́в, ами́нь.

Богородичен: Подо́бием ико́ны И́верския не то́чию Афо́н просвеща́ется,/ но и град Москва́ украша́ется и ини́и гра́ди и ве́си освяща́ются,/ от тоя́ чуде́сную по́мощь прие́млюще и исто́чник утеше́ния в ней обрета́юще,// и нам, Блага́я Врата́рнице, две́ри ра́йския отве́рзи.

Песнь 5:

Ирмо́с: Просвети́вый сия́нием прише́ствия Твоего́, Христе́,/ и освети́вый Кресто́м Твои́м/ ми́ра концы́,/ сердца́ просвети́/ све́том Твоего́ Богоразу́мия,// правосла́вно пою́щих Тя.

Припев: Сла́ва, Го́споди, свято́му Воскресе́нию Твоему́.

Па́стыря овца́м вели́каго и Го́спода,/ иуде́и дре́вом кре́стным умертви́ша:/ но Той я́ко о́вцы, ме́ртвыя, во а́де погребе́нныя,// держа́вы сме́ртныя изба́ви.

Припев: Сла́ва, Го́споди, свято́му Воскресе́нию Твоему́.

Кресто́м Твои́м мир благовести́в,/ и пропове́дав пле́нным, Спа́се мой, оставле́ние,/ держа́ву иму́щаго посрами́л еси́, Христе́:// на́га, обнища́вша показа́вый Боже́ственным воста́нием Твои́м.

Припев: Пресвята́я Богоро́дице, спаси́ нас.

Богородичен: Проше́ния ве́рно прося́щих, Всепе́тая, не пре́зри:/ но приими́, и сия́ доноша́й Сы́ну Твоему́, Пречи́стая,/ Бо́гу Еди́ному Благоде́телю,// Тебе́ бо Предста́тельницу стяжа́хом.

Припев: Пресвята́я Богоро́дице, спаси́ нас.

Веселя́тся небе́сныя си́лы зря́ще Тя:/ ра́дуются с ни́ми челове́ков собра́ния:/ Рождество́м бо Твои́м совокупи́шася, Де́во Богоро́дице,// е́же досто́йно сла́вим.

Припев: Пресвята́я Богоро́дице, спаси́ нас.

Да дви́жатся вси язы́цы челове́честии и мы́сли,/ к похвале́ челове́ческаго вои́стинну удобре́ния,/ Де́ва предстои́т я́ве сла́вящи,// ве́рою Тоя́ пою́щих чудеса́.

Припев: Вси святи́и земли́ Ру́сския, моли́те Бо́га о нас.

Вели́каго Нова́гра́да первопа́стырие,/ Ники́то, Ни́фонте, Иоа́нне, Феокти́сте,/ Моисе́е, Евфи́мие, Ио́но и Серапио́не, и про́чии чу́днии святи́телие,/ в дому́ Прему́дрости Бо́жия, я́ко фи́никсы, процвели́ есте́,// словесы́ благопло́дными и непоро́чным житие́м.

Припев: Вси святи́и земли́ Ру́сския, моли́те Бо́га о нас.

Све́тло да похва́лятся кня́зие Новгоро́дстии,/ Влади́мир, Святы́я Софи́и пречу́дныя устрои́тель,/ с ма́терию свое́ю А́нною, и Мстисла́в, и Фео́дор,/ с ни́ми же и вси от ро́да князе́й Русских житие́м богоуго́дным просия́вшии,// Боже́ственными да воспою́тся пе́сньми.

Припев: Вси святи́и земли́ Ру́сския, моли́те Бо́га о нас.

Ди́внаго Варлаа́ма, вели́ка Нова́гра́да сла́ву и украше́ние, моли́твенника нашего,/ и Анто́ния сла́внаго, от ве́тхаго Ри́ма на ка́мени по волна́м морски́м преплы́вшаго,/ Са́вву же, и Ефре́ма, и Михаи́ла// кто досто́йно просла́вит от земны́х?

Припев: Вси святи́и земли́ Ру́сския, моли́те Бо́га о нас.

Еде́мскаго рая́, прииди́те, ви́дим цве́ты присножи́зненныя и богопрозябе́нныя,/ по́двиги оте́ц, в преде́лех Новгоро́дских просия́вших,// и́хже есть еди́н Де́латель Госпо́дь.

Припев: Вси святи́и земли́ Ру́сския, моли́те Бо́га о нас.

Все́волод кро́ткий и Довмо́нт, Пско́ву стена́ необори́мая,/ и Нико́ла блаже́нный и Корни́лий преподо́бный,/ святы́м креще́нием чудь Ливо́нскую просвети́вый,// пе́сньми да воспою́тся.

Припев: Вси святи́и земли́ Ру́сския, моли́те Бо́га о нас.

Ве́ру правосла́вную пред лати́ны пропове́давшии,/ к ве́чным востеко́ша оби́телем Иси́дор пресви́тер/ и с ним собо́р му́ченический во Ю́рьеве, гра́де Ливо́нстем,// Царю́ царе́й ны́не предстоя́ще, мо́лятся о нас, почита́ющих па́мять их.

Сла́ва Отцу́ и Сы́ну и Свято́му Ду́ху.

Авраа́мия Богоно́снаго, Смоле́нска украше́ние,/ и Евфроси́нию, ра́дование По́лотское и де́вам сия́ние,/ Христе́ мой, Тебе́ приво́дим моли́твенники,// и́хже ра́ди спаси́ нас.

И ны́не и при́сно и во ве́ки веко́в, ами́нь.

Богородичен: Засту́пница те́плая иногда́ вели́кому Нову́гра́ду была́ еси́/ и ненаде́ющихся наде́жда и люде́й бе́дствующих Помо́щница,/ и ны́не о́ком милосе́рдным при́зри на нас/ и, ско́рби на́ша ви́девши и воздыха́ние услы́шавши,// зна́мение ми́лости яви́ нам, Пречи́стая.

Песнь 6:

Ирмо́с: Обы́де нас после́дняя бе́здна,/ несть избавля́яй,/ вмени́хомся,/ я́ко о́вцы заколе́ния,/ спаси́ лю́ди Твоя́, Бо́же наш,// Ты бо кре́пость немощству́ющих и исправле́ние.

Припев: Сла́ва, Го́споди, свято́му Воскресе́нию Твоему́.

Согреше́нием первозда́ннаго, Го́споди, лю́те уязви́хомся,/ ра́ною же исцели́хомся Твое́ю,/ е́юже за ны уязви́лся еси́, Христе́:// Ты бо кре́пость немощству́ющих и исправле́ние.

Припев: Сла́ва, Го́споди, свято́му Воскресе́нию Твоему́.

Возве́л ны еси́ из а́да, Го́споди,/ ки́та уби́в всея́дца, Всеси́льне,/ Твое́ю держа́вою низложи́в того́ си́лу:// Ты бо Живо́т, и Свет еси́, и Воскресе́ние.

Припев: Пресвята́я Богоро́дице, спаси́ нас.

Богородичен: Веселя́тся о Тебе́, Де́во Пречи́стая,/ ро́да на́шего пра́отцы, Еде́м восприе́мше Тобо́ю,/ его́же преступле́нием погуби́ша:// Ты бо, Чи́стая, и пре́жде Рождества́, и по Рождестве́ еси́.

Припев: Пресвята́я Богоро́дице, спаси́ нас.

Предстоя́т раболе́пне Рождеству́ Твоему́ чи́ни небе́снии,/ дивя́щеся досто́йно Твоему́ безсе́менному Рождеству́, Присноде́во:// Ты бо, Чи́стая, и пре́жде Рождества́, и по Рождестве́ еси́.

Припев: Пресвята́я Богоро́дице, спаси́ нас.

Воплоти́ся пре́жде сый Безпло́тен, Сло́во из Тебе́, Пречи́стая,/ вся́ческая во́лею творя́й,// безтеле́сных во́инства приведы́й от небытия́, я́ко Всеси́лен.

Припев: Вси святи́и земли́ Ру́сския, моли́те Бо́га о нас.

Ева́нгельски Христа́ возлюби́вше,/ преподо́бнии Зоси́мо, Савва́тие, Ге́рмане, Ирина́рше, Елеаза́ре и про́чии Солове́цтии чудотво́рцы,/ ми́ра отврати́стеся, в непроходи́мыя и пусты́я о́стровы Солове́цкия заше́дше,/ вся́кия доброде́тели о́бразу навыко́сте,/ му́дрей пчеле́ подо́бящеся,// и селе́ние, досто́йное прия́ти Ду́ха Свята́го, бы́сте, прему́дрии.

Припев: Вси святи́и земли́ Ру́сския, моли́те Бо́га о нас.

Вели́каго в чудесе́х преподо́бнаго Три́фона воспои́м, Лопа́рскаго просвети́теля,/ в после́дних конце́х се́верныя страны́ от го́рькаго ра́бства бесо́вскаго лю́ди изба́вльшаго/ и святы́м креще́нием возроди́вшаго.

Припев: Вси святи́и земли́ Ру́сския, моли́те Бо́га о нас.

Ра́дуйся, пусты́не, пре́жде безпло́дная и необита́емая,/ по́слежде же, я́ко крин, процве́тшая и и́нок мно́жество возрасти́вшая!/ Взыгра́йте, го́ры Валаа́ма и вся древа́ дубра́вная,/ хва́ляще с на́ми Се́ргия и Ге́рмана, вку́пе же и Арсе́ния со Алекса́ндром Сви́рским,// отцы́ всехва́льныя.

Припев: Вси святи́и земли́ Ру́сския, моли́те Бо́га о нас.

Жития́ сего́ непостоя́нную пучи́ну немяте́жно преше́л еси́, преподо́бне Кири́лле,/ ко́рмчую Ма́терь Бо́жию име́я,/ и ты, Ио́сифе, Во́лоцкая похвало́, и Ни́ле нестяжа́телю,/ на воде́ поко́йне и на зла́це воздержа́ния учени́к ва́ших стада́ му́дре упасли́ есте́,// и ны́не с ни́ми моли́теся о чту́щих па́мять ва́шу.

Припев: Вси святи́и земли́ Ру́сския, моли́те Бо́га о нас.

Я́ко зве́зды вели́кия, просия́ша в мона́шеских собо́рех/ Анто́ний Си́йский и Три́фон Вя́тский,/ Дими́трий на Прилу́це и Амфило́хий и Диони́сий, похвала́ Глуши́цкая,/ Григо́рий Пе́льшемский, Па́вел, и Се́ргий, и Корни́лий Волого́дстии,// я́ко луча́ми, сия́юще доброде́тельми жития́ своего́, преподо́бнии.

Припев: Вси святи́и земли́ Ру́сския, моли́те Бо́га о нас.

Богови́дно пожи́вше, пусты́ни, я́ко гра́ды, сотвори́ли есте́,/ Мака́рие, Варна́во и Ти́хоне, Авраа́мие и Генна́дие./ Те́мже вку́пе с про́чими отцы́, в преде́лех Костромски́х и Яросла́вских просия́вшими,/ ублажа́ем вас и мо́лим:/ моли́те Го́спода, да не лиши́т и нас его́же ны́не наслажда́етеся боговиде́ния// в ве́чнем гра́де Небе́снаго Царя́.

Сла́ва Отцу́ и Сы́ну и Свято́му Ду́ху.

Лику́й, Фиваи́до Ру́сская,/ красу́йтеся, пусты́ни и де́бри Олоне́цкия, Белоезе́рския и Волого́дския,/ возрасти́вшия свято́е и сла́вное оте́ц мно́жество,/ чу́дным житие́м всех наставля́ющее ми́ру не прилепля́тися,// крест свой на ра́мена взя́ти и во след Христу́ ше́ствовати.

И ны́не и при́сно и во ве́ки веко́в, ами́нь.

Богородичен: Твое́ю всечестно́ю ико́ною Ти́хвинскою,/ ю́же вели́кая земля наша я́ко не́кий дар Боже́ственный свы́ше благогове́йно прия́т,/ при́сно страну́ на́шу, о Госпоже́ Цари́це Богоро́дице, покрыва́й и заступа́й,// спаса́ющи сию́ от всех наве́т вра́жиих.

Конда́к воскре́сный, глас 1, подо́бен: «Егда́ приидеши…»:

Воскре́сл еси́, я́ко Бог, из гро́ба во сла́ве,/ и мир совоскреси́л еси́;/ и естество́ челове́ческое я́ко Бо́га воспева́ет Тя, и смерть исчезе́;/ Ада́м же лику́ет, Влады́ко;/ Е́ва ны́не от уз избавля́ема ра́дуется, зову́щи:// Ты еси́, И́же всем подая́, Христе́, воскресе́ние.

И́кос:

Воскре́сшаго тридне́вно воспои́м я́ко Бо́га Всеси́льна,/ и врата́ а́дова сте́ршаго,/ и я́же от ве́ка из гро́ба воздви́гшаго,/ мироно́сицам я́вльшагося, я́коже благоизво́лил есть,/ пре́жде сим е́же ра́дуйтеся, реки́й:/ и апо́столом ра́дость возвеща́я, я́ко Еди́н Жизнода́вец./ Те́мже ве́рою жены́ ученико́м зна́мения побе́ды благовеству́ют,/ и ад стене́т, и смерть рыда́ет:/ мир же весели́тся, и вси с ним ра́дуются.// Ты бо по́дал еси́, Христе́, всем Воскресе́ние.

Песнь 7:

Ирмо́с: Тебе́ у́мную, Богоро́дице, пещь/ разсмотря́ем, ве́рнии,/ я́коже бо о́троки спасе́ три Превозноси́мый,/ мир обнови́,/ во чре́ве Твое́м всеце́л,// хва́льный отце́в Бог и препросла́влен.

Припев: Сла́ва, Го́споди, свято́му Воскресе́нию Твоему́.

Убоя́ся земля́, сокры́ся со́лнце, и поме́рче свет,/ раздра́ся церко́вная боже́ственная заве́са,/ ка́мение же разсе́деся:/ на кресте́ бо ви́сит Пра́ведный,// Хва́льный отце́в Бог, и препросла́влен.

Припев: Сла́ва, Го́споди, свято́му Воскресе́нию Твоему́.

Ты быв а́ки безпомо́щен,/ и уя́звен в ме́ртвых во́лею нас ра́ди/ превозноси́мый, вся свободи́л еси́,/ и держа́вною руко́ю совоскреси́л еси́,// хва́льный отце́в Бог, и препросла́влен.

Припев: Пресвята́я Богоро́дице, спаси́ нас.

Богородичен: Ра́дуйся, исто́чниче присноживы́я воды́./ Ра́дуйся, раю́ пи́щный./ Ра́дуйся, стено́ ве́рных./ Ра́дуйся, Неискусобра́чная./ Ра́дуйся, всеми́рная Ра́досте,/ Е́юже нам возсия́// Хва́льный отце́в Бог, и препросла́влен.

Припев: Пресвята́я Богоро́дице, спаси́ нас.

Тя, Богоро́дице, ле́ствицу Иа́ков проро́чески разумева́ет:/ Тобо́ю бо Превозноси́мый на земли́ яви́ся,/ и с челове́ки поживе́, я́ко благоволи́,// Хва́льный отце́в Бог и Препросла́влен.

Припев: Пресвята́я Богоро́дице, спаси́ нас.

Ра́дуйся, Чи́стая, из Тебе́ про́йде Па́стырь,/ И́же во Ада́мову ко́жу обо́лкся вои́стинну Превозноси́мый,/ во всего́ мя челове́ка, за благоутро́бие непости́жное:// Хва́льный отце́в Бог и Препросла́влен.

Припев: Вси святи́и земли́ Ру́сския, моли́те Бо́га о нас.

Лео́нтий, Иса́ия и Игна́тий, Иа́ков и Фео́дор,/ честни́и Ду́ха сосу́ди и Росто́ву украше́ние,/ Авраа́мий, и́долом покланя́вшияся ко Христу́ приведы́й,/ и Петр царе́вич, и Ирина́рх, самопроизво́льный страда́лец,/ Кассиа́н и Паи́сий, князь Рома́н и царе́вич Дими́трий,// и вси Росто́встии и У́гличстии чудотво́рцы Боже́ственными да воспою́тся пе́сньми.

Припев: Вси святи́и земли́ Ру́сския, моли́те Бо́га о нас.

Да велича́ется Не́вский победи́тель, благове́рный князь Алекса́ндр,/ да пое́тся Гео́ргий, во́ин хра́брый и страда́лец,/ да похва́лится Андре́й, пе́рвый Ру́сския земли́ собира́тель,/ вку́пе со Гле́бом, ю́ным сы́ном свои́м,/ да воспое́тся же и Авраа́мий му́ченик,/ гра́да Влади́мира сла́ва, Святы́я Руси́ засту́пницы// и Це́ркве Правосла́вныя украше́ние.

Припев: Вси святи́и земли́ Ру́сския, моли́те Бо́га о нас.

Фео́дору и Иоа́нну сла́ва, Су́ждальским свети́льником,/ Си́мону и Диони́сию!/ С ни́ми да пою́тся и Евфи́мий, в по́двизех превысо́кий,/ и Евфроси́ния преподо́бная, пресве́тлая Су́ждальская звезда́,// вку́пе же и Косма́, на Я́хроме реце́ подвиза́выйся.

Припев: Вси святи́и земли́ Ру́сския, моли́те Бо́га о нас.

Песнь сто́лпнику Ники́те, покая́ния о́браз яви́вшему,/ хвала́ и Дании́лу, ни́щих и безро́дных согрева́телю,/ сла́ва и Андре́ю, княже́ние оста́вившему и в ни́щетнем о́бразе житие́ сконча́вшему,// Переясла́вским чудотво́рцем.

Припев: Вси святи́и земли́ Ру́сския, моли́те Бо́га о нас.

Константи́не кня́же, апо́столе и просвети́телю Му́ромския земли́,/ с Михаи́лом и Фео́дором, ча́ды твои́ми,/ и Пе́тре и Февро́ние, и пра́ведная Иулиани́е ми́лостивая, Му́рома засту́пницы,/ вку́пе же и Васи́лие святи́телю и кня́же Рома́не, Ряза́ни сла́во,// о нас Христа́ моли́те.

Припев: Вси святи́и земли́ Ру́сския, моли́те Бо́га о нас.

Тверска́я похвало́, Арсе́ние святи́телю,/ Михаи́ле, кня́же и му́чениче,/ и А́нно, гра́да Ка́шина сокро́вище,/ Ни́ле и Мака́рие преподо́бнии,/ Ефре́ме, гра́да Торжка́ просвети́телю,/ со Арка́дием и Иулиани́ею, цве́том целому́дрия,// о нас Христа́ моли́те.

Сла́ва Отцу́ и Сы́ну и Свято́му Ду́ху.

Ору́жием ва́ших моли́тв, благове́рнии кня́зие Фео́доре и Дави́де с Константи́ном/ и Васи́лие и Константи́не, Яросла́вля сла́во,/ охраня́йте и ны́не оте́чество ва́ше// и люде́й правосла́вных от вся́ких бед и напа́стей.

И ны́не и при́сно и во ве́ки веко́в, ами́нь.

Богородичен: Я́ко благода́тное сокро́вище дарова́ла еси́ Святе́й Руси́ ико́ну Твою́ Влади́мирскую,/ е́юже отце́м на́шим многоча́стне и многообра́зне благоде́яла еси́./ Не оскуде́й и ны́не, о Ма́ти Бо́жия,// утоля́ющи лю́тое на нас воста́ние, и зе́млю Ру́сскую спаси́.

Песнь 8:

Ирмо́с: В пещи́ о́троцы Изра́илевы,/ я́коже в горни́ле,/ добро́тою благоче́стия чисте́е зла́та блеща́хуся, глаго́люще:/ благослови́те, вся дела́ Госпо́дня, Го́спода,// по́йте и превозноси́те во вся ве́ки.

Припев: Сла́ва, Го́споди, свято́му Воскресе́нию Твоему́.

И́же во́лею вся творя́й, и претворя́яй,/ обраща́яй сень сме́ртную в ве́чную жизнь,/ стра́стию Твое́ю, Сло́ве Бо́жий,/ Тебе́ непреста́нно вся дела́ Госпо́дня,// Го́спода пои́м, и превозно́сим во вся ве́ки.

Припев: Сла́ва, Го́споди, свято́му Воскресе́нию Твоему́.

Ты разори́л еси́ сокруше́ние, Христе́, и окая́нство,/ во врате́х и тверды́нях а́довых,/ воскре́с из гро́ба тридне́вен./ Тебе́ непреста́нно вся дела́, я́ко Го́спода, пою́т,// и превозно́сят во вся ве́ки.

Припев: Пресвята́я Богоро́дице, спаси́ нас.

Богородичен: Я́же без се́мене и преесте́ственне от облиста́ния Боже́ственнаго/ Ро́ждшую би́сера многоце́ннаго Христа́, воспои́м глаго́люще:/ благослови́те вся дела́ Госпо́дня, Го́спода,// по́йте и превозноси́те Его́ во вся ве́ки.

Припев: Пресвята́я Богоро́дице, спаси́ нас.

Черто́г светови́дный, из него́же всех Влады́ка,/ я́ко Жени́х произы́де Христо́с,/ воспои́м вси вопию́ще:/ вся дела́ Госпо́дня, Го́спода по́йте,// и превозноси́те во вся ве́ки.

Припев: Пресвята́я Богоро́дице, спаси́ нас.

Ра́дуйся, Престо́ле сла́вный Бо́жий,/ ра́дуйся, ве́рных стено́,/ Е́юже су́щим во тьме возсия́ свет Христо́с,/ Тебе́ блажа́щим, и вопию́щим:/ вся дела́ Госпо́дня, Го́спода по́йте,// и превозноси́те во вся ве́ки.

Припев: Вси святи́и земли́ Ру́сския, моли́те Бо́га о нас.

Красу́йся, гра́де Каза́нь, име́я моли́твенники своя́,/ преподо́бных святи́телей Гу́рия, Варсоно́фия и Ге́рмана, отгна́вших от тебе́ тьму неве́рия,/ и Иоа́нна му́ченика, и Стефа́на, и Петра́,// оте́ческое нече́стие оста́вивших и му́ченически в Небе́сное оте́чество преше́дших.

Припев: Вси святи́и земли́ Ру́сския, моли́те Бо́га о нас.

Свяще́ннаго Писа́ния от ю́ности научи́вся, богоно́се Стефа́не,/ ра́лом слове́с твои́х олядене́вшая зыря́нских люде́й сердца́ возде́лал еси́/ и Боже́ственное се́мя в них все́ял еси́./ Ны́не же вку́пе со святы́ми продолжа́тели де́ла твоего́/ Гера́симом, Питири́мом и Ио́ною// па́ству ва́шу и всю Ру́сскую зе́млю моли́твами ва́шими огражда́йте.

Припев: Вси святи́и земли́ Ру́сския, моли́те Бо́га о нас.

Весели́ся, Сиби́рская страно́,/ в тебе́ бо Госпо́дь яви́ уго́дники Своя́:/ пра́веднаго Симео́на Верхоту́рскаго, и Ирку́тския святи́тели Инноке́нтия и Софро́ния, и Иоа́нна Тобо́льскаго,// но́выя ди́вныя свети́льники и чудотво́рцы.

Припев: Вси святи́и земли́ Ру́сския, моли́те Бо́га о нас.

Ра́дуйся, Иве́рие и вся земле́ Грузи́нская, торжеству́й, Арме́ние,/ воспева́ющи равноапо́стольную Ни́ну и Тама́ру, Григо́рия Просвети́теля/ и ины́х мно́гих, в страна́х Кавка́зских ве́ру правосла́вную испове́давших// и ны́не о земне́м оте́честве Христу́ моля́щихся.

Припев: Вси святи́и земли́ Ру́сския, моли́те Бо́га о нас.

Иера́рше Богому́дре Дими́трие,/ жити́й святы́х списа́телю и подража́телю о́ным ре́вностный,// сла́вы о́ных моли́твами твои́ми соде́лай нас о́бщники.

Припев: Вси святи́и земли́ Ру́сския, моли́те Бо́га о нас.

Святи́телю о́тче Митрофа́не, пе́рвый Воро́нежу па́стырю,/ му́жество ве́лие яви́вый, преще́ния царе́ва и сме́рти не убоя́выйся// и в простоте́ ду́шу свою́ спасы́й, моли́ Бо́га о нас.

Благослови́м Отца́, и Сы́на, и Свята́го Ду́ха, Го́спода.

Я́ко пчела́, мед сла́дкий от цвето́в скороувяда́ющих собра́л еси́, о́тче Ти́хоне,/ от тле́ннаго ми́ра духо́вное сокро́вище,// и́мже всех нас услажда́еши.

И ны́не и при́сно и во ве́ки веко́в, ами́нь.

Богородичен: Засту́пницу усе́рдную восхва́лим и честно́му Ея́ поклони́мся о́бразу,/ и́мже в новопросвеще́нней стране́ правове́рие утверди́/ и в годи́ну лю́тую ма́терь ру́сских градо́в спасе́./ Сей и гра́да свята́го Петра́ вели́кое сокро́вище,// и всея́ земли́ на́шея пресла́вное бога́тство.

На 9-й песни поем песнь Пресвятыя Богородицы:

Вели́чит душа́ Моя́ Го́спода и возра́довася дух Мой о Бо́зе Спа́се Мое́м.

К коемуждо стиху припеваем: Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Я́ко призре́ на смире́ние рабы́ Своея́, се бо, от ны́не ублажа́т Мя вси ро́ди.

Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Я́ко сотвори́ Мне вели́чие Си́льный, и свя́то и́мя Его́, и ми́лость Его́ в ро́ды родо́в боя́щимся Его́.

Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Сотвори́ держа́ву мы́шцею Свое́ю, расточи́ го́рдыя мы́слию се́рдца их.

Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Низложи́ си́льныя со престо́л, и вознесе́ смире́нныя, а́лчущия испо́лни благ, и богатя́щияся отпусти́ тщи.

Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Восприя́т Изра́иля о́трока Своего́, помяну́ти ми́лости, я́коже глаго́ла ко отце́м на́шим, Авраа́му и се́мени его́ да́же до ве́ка.

Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Песнь 9:

Ирмо́с: О́браз чи́стаго рождества́ Твоего́,/ огнепали́мая купина́/ показа́ неопа́льная;/ и ны́не на нас/ напа́стей свире́пеющую угаси́ти, мо́лимся, пещь,/ да Тя, Богоро́дице,// непреста́нно велича́ем.

Припев: Сла́ва, Го́споди, свято́му Воскресе́нию Твоему́.

О ка́ко, лю́дие беззако́ннии и непокори́вии,/ лука́вая совеща́вше,/ го́рдаго и нечести́ваго оправди́ша:/ Пра́веднаго же на дре́ве осуди́ша Го́спода сла́вы,// Его́же досто́йно велича́ем!

Припев: Сла́ва, Го́споди, свято́му Воскресе́нию Твоему́.

Спа́се А́гнче Непоро́чне,/ И́же ми́ра грехи́ взе́мый,/ Тебе́ сла́вим воскре́сшаго тридне́вно,/ со Отце́м и Боже́ственным Твои́м Ду́хом,/ и Го́спода сла́вы:// Его́же богосло́вяще, велича́ем.

Припев: Пресвята́я Богоро́дице, спаси́ нас.

Богородичен: Спаси́ лю́ди Твоя́, Го́споди,/ и́хже стяжа́л еси́ честно́ю Твое́ю кро́вию,/ це́рквам Твои́м подая́ мир, Человеколю́бче,// Богоро́дицы моли́твами.

Припев: Пресвята́я Богоро́дице, спаси́ нас.

Из ко́рене Дави́дова прозябла́ еси́ проро́ческаго, Де́во, и богооте́ческаго:/ но и Дави́да я́ко вои́стинну Ты просла́вила еси́,/ я́ко ро́ждши проро́чествованнаго Го́спода сла́вы:// Его́же досто́йно велича́ем.

Припев: Пресвята́я Богоро́дице, спаси́ нас.

Всяк похва́льный, Пречи́стая, зако́н/ побежда́ется вели́чеством сла́вы Твоея́./ Но о, Влады́чице, от раб Твои́х недосто́йных,/ от любве́ Тебе́ приноси́мое приими́, Богоро́дице,// со усе́рдием пе́ние похва́льное.

Припев: Вси святи́и земли́ Ру́сския, моли́те Бо́га о нас.

О благи́й просвети́телю и ти́хий а́нгеле Це́ркве Тамбо́вския, святи́телю Питири́ме,/ весели́ся о па́стве твое́й и всея́ Руси́,// в ней бо но́вая и ве́чная ра́дость процвете́, преподо́бный Серафи́м, ди́вный тру́дник спасе́ния на́шего.

Припев: Вси святи́и земли́ Ру́сския, моли́те Бо́га о нас.

О святи́телие Богому́дрии Феодо́сие и Иоаса́фе, ди́вным нетле́нием от Го́спода просла́вленнии!/ Ва́ми возвели́чени есмы́ и мы, ча́да су́ще Це́ркве Правосла́вныя,/ в не́йже и доны́не Госпо́дь чу́дная явля́ет// и рабо́в Свои́х прославля́ет.

Припев: Вси святи́и земли́ Ру́сския, моли́те Бо́га о нас.

О но́вый чудотво́рче, Ио́сифе, святи́телю и му́чениче!/ Град А́страхань и вся Пово́лжская страна́ тобо́ю хва́лится/ и почита́ет тя, за пра́вду от неве́рных мяте́жников лю́те пострада́вша.

Припев: Вси святи́и земли́ Ру́сския, моли́те Бо́га о нас.

О, па́че сло́ва и превы́ше похва́л святы́х страстоте́рпцев по́двига!/ Зло́бу у́бо лю́тых отсту́пников и на́глое иуде́йское неи́стовство претерпе́ша,/ ве́ру Христо́ву проти́ву уче́ний ми́ра сего́, я́ко щит, держа́ще// и нам о́браз терпе́ния и злострада́ний досто́йно явля́юще.

Припев: Вси святи́и земли́ Ру́сския, моли́те Бо́га о нас.

О, тве́рдости и му́жества по́лка му́ченик Христо́вых,/ от хи́нов лю́тых за Христа́ убие́нных!/ Ти́и бо Це́рковь Правосла́вную украси́ша/ и в стране́ свое́й кро́ви своя́, я́ко се́мя ве́ры, да́ша,// и ку́пно со все́ми святы́ми досто́йно да почту́тся.

Припев: Вси святи́и земли́ Ру́сския, моли́те Бо́га о нас.

О вели́цыи сро́дницы на́ши, имено́ваннии и безыме́ннии, явле́ннии и неявле́ннии,/ Небе́снаго Сио́на дости́гшии и сла́ву мно́гу от Бо́га прии́мшии,/ утеше́ние нам, в ско́рби су́щим, испроси́те,/ ве́ру на́шу па́дшую возста́вите и лю́ди расточе́нныя собери́те,// от нас, я́ко дар, песнь благодаре́ния прие́млюще.

Сла́ва Отцу́, и Сы́ну, и Свято́му Ду́ху.

Троичен: О Тро́ице Честна́я,/ приими́, я́же земля наша прино́сит Ти,/ я́ко нача́тки и я́ко фимиа́м избра́нный,/ вся угоди́вшия и пре́жде, и по́слежде в ней,/ зна́емыя и незна́емыя,// и моли́твами их от вся́каго вре́да сию́ сохраня́й.

И ны́не и при́сно и во ве́ки веко́в, ами́нь.

Богородичен: О Де́во Благода́тная,/ гра́ды и ве́си на́ша честна́го ли́ка Твоего́ изображе́нии,/ я́ко благоволе́ния зна́мении, обогати́вшая,/ благодаре́ние на́ше приими́ и от бед лю́тых оте́чество на́ше изба́ви,// вси бо Тя, я́ко Покро́в всемо́щный страны́ на́шея, велича́ем.

Ексапостиларий:

Ка́мень узре́вша отвале́н, мироно́сицы ра́довахуся,/ ви́деша бо ю́ношу седя́ща во гро́бе,/ и той тем рече́: се Христо́с воста́л есть,/ рцы́те с Петро́м ученико́м:/ на го́ру приспе́йте Галиле́йскую, та́мо вам яви́тся,// я́коже предрече́ друго́м.

Сла́ва Отцу́ и Сы́ну и Свято́му Ду́ху.

В пе́снех восхва́лим свети́ла незаходи́мая земли́ нашея,/ таи́нники Боже́ственнаго Сло́ва,/ Христа́ сла́вяще, сих просвети́вшаго и возлюби́вшаго// и помо́щники нам да́вшаго в ско́рби.

И ны́не и при́сно и во ве́ки веко́в. Ами́нь.

А́нгел у́бо принесе́ Де́ве, е́же ра́дуйся,/ пре́жде Твоего́ зача́тия, Христе́,/ А́нгел же ка́мень отвали́ гро́ба Твоего́,/ вме́сто печа́ли ов у́бо ра́дости неизрече́нныя зна́мения,/ ов же в сме́рти ме́сто пода́теля Тя жи́зни пропове́дуя и велича́я,// и глаго́ля воскресе́ние жена́м, и таи́нником.

Хвали́тны псалмы́, глас 1:

Вся́кое дыха́ние да хва́лит Го́спода./ Хвали́те Го́спода с небе́с,/ хвали́те Его́ в вы́шних.// Тебе́ подоба́ет песнь Бо́гу.

Хвали́те Его́ вси а́нгели Его́,/ хвали́те Его́ вся си́лы Его́.// Тебе́ подоба́ет песнь Бо́гу.

На хвалитех стихиры воскресны, глас 1.

Стих: Сотвори́ти в них суд напи́сан: / сла́ва сия́ бу́дет всем преподо́бным Его́.

Пое́м Твою́, Христе́, спаси́тельную страсть, / и сла́вим Твое́ Воскресе́ние.

Стих: Хвали́те Бо́га во святы́х Его́, / хвали́те Его́ в утверже́нии си́лы Его́.

Крест претерпе́вый, и смерть упраздни́вый, / и воскресы́й из ме́ртвых, / умири́ на́шу жизнь, Го́споди, / я́ко еди́н Всеси́лен.

Стих: Хвали́те Его́ на си́лах Его, / хвали́те Его́ по мно́жеству вели́чествия Его́.

А́да плени́вый, и челове́ка воскреси́вый, / Воскресе́нием Твои́м, Христе́, / сподо́би нас чи́стым се́рдцем / Тебе́ пе́ти и сла́вити.

Стих: Хвали́те Его́ во гла́се тру́бнем: / хвали́те Его́ во псалти́ри и гу́слех.

Боголе́пное Твое́ снисхожде́ние сла́вяще, / пое́м Тя, Христе́. / Роди́лся еси́ от Де́вы, / и не разлуче́н был еси́ от Отца́, / пострада́л еси́, я́ко челове́к, / и во́лею претерпе́л еси́ Крест, / воскре́сл еси́ от гро́ба, я́ко от черто́га произше́д, / да спасе́ши мир, / Го́споди сла́ва Тебе́.

Ины стихиры, Анатолиевы, глас тойже.

Стих: Хвали́те Его́ в тимпа́не и ли́це, / хвали́те Его́ во стру́нах и орга́не.

Глас 5: Ра́дуйся, Це́рковь Русская ве́рная,/ ра́дуйся, кня́же благове́рный Влади́мире пресла́вный,/ ра́дуйся, О́льго избра́нная!/ Вы бо есте́ ко Влады́це всех/ пе́рвейшии на́ши хода́таи,/ и нача́льницы правосла́вия,/ и наста́вницы ко и́стинней ве́ре./ Ра́дуйся, вся́ко ме́сто, и страна́, и град,/ гра́жданы воспита́вшии Небе́снаго Ца́рствия,/ си́и свята́я свети́ла душа́м на́шим яви́шася,/ си́и чуде́с заре́ю, и де́лы, и зна́мении просия́ша мы́сленно во вся концы́/ и ны́не Христу́ мо́лятся// пода́ти душа́м на́шим ве́лию ми́лость.

Стих: Хвали́те Его́ в кимва́лех доброгла́сных, хвали́те Его́ в кимва́лех восклица́ния: / вся́кое дыха́ние да хва́лит Го́спода.

Ра́дуйтеся, земли́ Ру́сския украше́ние,/ Це́ркве на́шея непоколеби́мое утвержде́ние,/ сла́во правосла́вных,/ чуде́с исто́чницы,/ любве́ струи́ неистощи́мыя,/ свети́льницы многосве́тлии,/ Ду́ха Свята́го орга́ни,/ кро́тцыи и незло́бивии,/ доброде́тельми укра́шеннии,/ челове́цы небе́снии,/ земни́и а́нгели,/ Христа́ дру́зи и́скреннии!/ Того́ приле́жно моли́те// пода́ти вас чту́щим ве́лию ми́лость.

Стих: Бог нам прибе́жище и си́ла,/ Помо́щник в ско́рбех, обре́тших ны зело́.

Прииди́те, Небе́снии предста́телие на́ши, к нам,/ ва́шего тре́бующим ми́лостивнаго посеще́ния,/ и изба́вите озло́бленныя мучи́тельскими преще́нии/ лю́таго неи́стовства неве́рных,/ от ни́хже, я́ко пле́нницы и на́зи, гони́мы есмы́,/ от ме́ста на ме́сто ча́сто преходя́ще/ и заблужда́юще в верте́пех и гора́х./ Уще́дрите у́бо, прехва́льнии,/ и да́руйте нам осла́бу,/ утоли́те бу́рю/ и угаси́те е́же на ны негодова́ние,/ Бо́га моля́ще,// подаю́щаго ва́ми земли́ на́шей ве́лию ми́лость.

Стих: Госпо́дь сил с на́ми,/ Засту́пник наш, Бог Иа́ковль.

Глас 4: Глас ева́нгельский услы́шавше/ и апо́стольскою ре́вностию распали́вшеся,/ в науче́ние неве́рных язы́ков устреми́стеся,/ богоблаже́ннии равноапо́стольнии/ Ку́кше, Лео́нтие, Стефа́не и Гу́рие,/ Ге́рмане Аля́скинский, и святи́телю о́тче Нико́лае Япо́нский,/ и досточу́дный Инноке́нтие,/ вели́кия Сиби́рския страны́ апо́столе/ и просвеще́ния за мо́рем су́щих но́вых стран во Аме́рице первонача́льниче./ Те́мже со все́ми про́чими,/ во благове́стии Христо́ве потруди́вшимися,// досто́йно ублажа́етеся.

Глас 2: Слава: С ми́ры прише́дшим я́же с Мари́ею жена́м,/ и недоумева́ющимся,/ ка́ко бу́дет им улучи́ти жела́ние,/ яви́ся ка́мень взят,/ и Боже́ственный ю́ноша утоля́я мяте́ж душ их,/ воста́ бо, глаго́лет, Иису́с Госпо́дь./ Те́мже пропове́дите пропове́дником Его́,/ ученико́м в Галиле́ю тещи́,/ и ви́дети Его́ воскре́сша из ме́ртвых,// я́ко Жизнода́вца и Го́спода.

И ны́не, настоящий Богородичен:

Преблагослове́на еси́, Богоро́дице Де́во, / Вопло́щшим бо ся из Тебе́ ад плени́ся, / Ада́м воззва́ся, / кля́тва потреби́ся, / Е́ва свободи́ся, / смерть умертви́ся, и мы ожи́хом. / Тем воспева́юще вопие́м: / благослове́н Христо́с Бог, / благоволи́вый та́ко, сла́ва Тебе́.

Славосло́вие вели́кое:

Сла́ва в вы́шних Бо́гу, и на земли́ мир, в челове́цех благоволе́ние. Хва́лим Тя, благослови́м Тя, кла́няем Ти ся, славосло́вим Тя, благодари́м Тя, вели́кия ра́ди сла́вы Твоея́. Го́споди Царю́ Небе́сный, Бо́же О́тче Вседержи́телю, Го́споди, Сы́не Единоро́дный, Иису́се Христе́, и Святы́й Ду́ше. Го́споди Бо́же, А́гнче Бо́жий, Сы́не Оте́чь, взе́мляй грех ми́ра, поми́луй нас; взе́мляй грехи́ ми́ра, приими́ моли́тву на́шу; седя́й одесну́ю Отца́, поми́луй нас. Я́ко Ты еси́ еди́н Свят, Ты еси́ еди́н Госпо́дь, Иису́с Христо́с, в сла́ву Бо́га Отца́. Ами́нь.

На всяк день благословлю́ Тя, и восхвалю́ И́мя Твое́ во ве́ки, и в век ве́ка.

Сподо́би, Го́споди, в день сей без греха́ сохрани́тися нам. Благослове́н еси́, Го́споди, Бо́же оте́ц на́ших, и хва́льно и просла́влено И́мя Твое́ во ве́ки. Ами́нь.

Бу́ди, Го́споди, ми́лость Твоя́ на нас, я́коже упова́хом на Тя.

Благослове́н еси́, Го́споди, научи́ мя оправда́нием Твои́м. (Три́жды)

Го́споди, прибе́жище был еси́ нам в род и род. Аз рех: Го́споди, поми́луй мя, исцели́ ду́шу мою́, я́ко согреши́х Тебе́. Го́споди, к Тебе́ прибего́х, научи́ мя твори́ти во́лю Твою́, я́ко Ты еси́ Бог мой: я́ко у Тебе́ исто́чник живота́, во све́те Твое́м у́зрим свет. Проба́ви ми́лость Твою́ ве́дущим Тя.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Три́жды)

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Святы́й Безсме́ртный, поми́луй нас.

Святы́й Бо́же, Святы́й Кре́пкий, Святы́й Безсме́ртный, поми́луй нас.

Таже, тропарь воскресен:

Днесь спасе́ние миру бысть, / пое́м Воскре́сшему из гро́ба, / и Нача́льнику жи́зни на́шея: / разруши́в бо сме́ртию смерть, / побе́ду даде́ нам и ве́лию ми́лость.

Утверди́, Бо́же, святу́ю правосла́вную ве́ру, правосла́вных христиа́н во век ве́ка.

Честне́йшую Херуви́м и Сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу, Тя велича́ем.

Сла́ва, и ны́не. Го́споди, поми́луй. (Три́жды) Благослови́.

Воскресый из мертвых, Господи Иисусе Христе, Сыне Божий, моли́твами Пречи́стыя Своея́ Ма́тере, преподобных и богоносных отец наших и всех святы́х, поми́луй и спасм нас я́ко Благ и Челове́колюбец.

Многоле́тие:

Вели́каго Господи́на и Отца́ на́шего Кири́лла,/ Святе́йшаго Патри́арха Моско́вского и всея́ Руси́,/ и Господи́на на́шего (Высоко-) Преосвяще́ннейшаго (имярек),/ (архи-)епи́скопа (митрополита (титул)),/ богохрани́мую страну́ на́шу Росси́йскую,/  и вся правосла́вныя христи́аны,// Го́споди, сохрани́ их на мно́гая ле́та.