Последование Утрени в Пятницу Светлой седмицы. Для домашнего (келейного) совершения

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас. Ами́нь.

Христо́с воскре́се из ме́ртвых, / сме́ртию смерть попра́в / и су́щим во гробе́х живо́т дарова́в.

Первый стих: Да воскре́снет Бог, и расточа́тся врази́ Его́, / и да бежа́т от Лица́ Его́ ненави́дящии Его́.

И на кийждо стих мы поем тропарь: Христо́с воскре́се из ме́ртвых, / сме́ртию смерть попра́в / и су́щим во гробе́х живо́т дарова́в. Весь по единожды.

Вторый стих: Я́ко исчеза́ет дым, да исче́знут, / я́ко та́ет воск от лица́ огня́. Христо́с воскре́се: единожды.

Третий стих: Та́ко да поги́бнут гре́шницы от Лица́ Бо́жия, / а пра́ведницы да возвеселя́тся. Христо́с воскре́се: единожды.

Четвертый стих: Сей день, его́же сотвори́ Госпо́дь, / возра́дуемся и возвесели́мся в онь. Христо́с воскре́се: единожды.

Слава: Христо́с воскре́се: единожды.

И ныне: Христо́с воскре́се: единожды.

Канон Пасхи и Богородицы, глас 1.

Песнь 1.

Ирмос: Воскресе́ния день, / просветимся, людие. / Пасха, Госпо́дня Па́сха, / от сме́рти бо к жизни, / и от земли́ к небеси, / Христос Бог нас преведе, / победную поющия.

Припев: Христо́с воскре́се из ме́ртвых.

Очи́стим чу́вствия, и у́зрим / непристу́пным све́том / Воскресе́ния, Христа́ блиста́ющася, / и ра́дуйтеся, реку́ща, / я́сно да услы́шим, / побе́дную пою́ще.

Припев: Христо́с воскре́се из ме́ртвых.

Небеса́ у́бо досто́йно да веселя́тся, / земля́ же да ра́дуется, / да пра́зднует же мир, / ви́димый же весь и неви́димый: / Христо́с бо воста́, / весе́лие ве́чное.

Слава: Умерщвле́ния преде́л сломи́ла еси́, / ве́чную жизнь ро́ждшая Христа́, из гро́ба возсия́вшаго днесь, / Де́во Всенепоро́чная, и мир просвети́вшаго.

И ныне: Воскре́сшаго ви́девши Сы́на Твоего́ и Бо́га, / ра́дуйся со апо́столы Богоблагода́тная Чи́стая, / и е́же ра́дуйся пе́рвее, я́ко всех ра́дости вина́, / восприя́ла еси́, Богома́ти Всенепоро́чная.

Припев: Пресвятая Богородице, спаси нас

Ны́не источи́ ми Де́во Богоро́дице исто́чниче, благода́ть даю́щи Сло́ва, я́ко да воспою́ тя исто́чник, вре́ющий живо́т и благода́ть ве́рным: ты́ бо ипоста́сное сло́во источи́ла еси́.

Припев: Пресвятая Богородице, спаси нас

Врачевство́ па́че естества́, хра́м Тво́й Честна́я, явля́ется все́м Отрокови́це: от сме́рти бо я́вныя притека́ющыя ве́рныя я́ве возставля́ет, и все́м незави́стную то́чит сла́дость.

Припев: Пресвятая Богородице, спаси нас

Излива́еши с небесе́ неистощи́мо благода́ти вои́стинну еди́на: слепе́юща бо твори́ши взира́ти к све́ту, бла́том но́вым, возгласи́вши свы́ше па́че смы́сла Лео́нови.

Припев: Пресвятая Богородице, спаси нас

О́бщее любоче́стие челове́чества Честна́я, ра́дуйся Мари́е, ра́дуйся: все́х бо Творе́ц на Тя́, я́коже ка́пля сни́де я́вственно, исто́чник тя́ безсме́ртен показа́в Богоневе́стная.

Песнь 3.

Ирмос: Приидите, пиво пием новое, / не от камене неплодна чудодеемое, / но нетления источник / из гроба одождивша Христа́, / в Немже утверждаемся.

Припев: Христо́с воскре́се из ме́ртвых.

Ны́не вся испо́лнишася све́та, / не́бо же и земля́, и преиспо́дняя: / да пра́зднует у́бо вся тварь / воста́ние Христо́во, / в не́мже утвержда́ется.

Припев: Христо́с воскре́се из ме́ртвых.

Вчера́ спогребо́хся Тебе́ Христе́, / совостаю́ днесь / воскре́сшу Тебе́, / сраспина́хся Тебе́ вчера́, / Сам мя спросла́ви Спа́се во Ца́рствии Твое́м.

Слава: На нетле́нную жизнь / прихожду́ днесь бла́гостию ро́ждшагося из Тебе́, Чи́стая, / и всем конце́м свет облиста́вшаго.

И ныне: Бо́га, Его́же родила́ еси́ пло́тию, из ме́ртвых, / я́коже рече́, воста́вша ви́девши, Чи́стая, лику́й, / и Сего́ я́ко Бо́га Пречи́стая возвелича́й.

Припев: Пресвятая Богородице, спаси нас

Све́тлый тя́ святы́й хра́м Влады́ки все́х Отрокови́це ве́м, и нетле́ния исто́чник, во́ду излива́ющ Христа́, от него́же напая́емся.

Припев: Пресвятая Богородице, спаси нас

От Твоея́ благода́ти Влады́чице исто́чниче, Самоде́ржцу дае́ши исхо́дов происхожде́ние содержи́мо лю́те, ка́мене подстоя́ние стра́шное, водо́ю разреши́вшееся.

Припев: Пресвятая Богородице, спаси нас

Тече́т благода́ть незави́стная от Тебе́, Богоро́дице Де́во, оби́льно точа́щая, хроми́и ска́чут о Тебе́, прокаже́нных очища́ется мно́жество, и де́мони угнета́ются.

Припев: Пресвятая Богородице, спаси нас

Все́м дае́ши исцеле́ние ве́рным, царе́м, простце́м, ни́щым, князе́м, убо́гим, бога́тым о́бще, во́ду излива́яй исто́чниче разли́чное исцеле́ние.

Таже кондак, глас 8:

А́ще и во гроб снизше́л еси́, Безсме́ртне, / но а́дову разруши́л еси́ си́лу, / и воскре́сл еси́, я́ко победитель, Христе́ Бо́же, / жена́м мироно́сицам веща́вый: ра́дуйтеся, / и Твои́м апо́столом мир да́руяй, / па́дшим подая́й воскресе́ние.

Икос: Е́же пре́жде со́лнца Со́лнце заше́дшее иногда́ во гроб, / предвари́ша ко у́тру, и́щущия я́ко дне мvроно́сицы де́вы, / и друга́ ко друзе́й вопия́ху: / о други́ни! Прииди́те, воня́ми пома́жем те́ло живоно́сное и погребе́ное, / плоть воскреси́вшаго па́дшаго Ада́ма, лежа́щую во гро́бе. / И́дем, потщи́мся я́коже волсви́, и поклони́мся, / и принесе́м мvра я́ко да́ры, не в пелена́х, но в плащани́це обви́тому, / и пла́чим, и возопии́м: о Влады́ко, воста́ни, / па́дшим подая́й воскресе́ние.

Седален, глас 8:

Приснотеку́щий исто́чник, и живо́тный, источа́яй струя́ боже́ственный то́к, согла́сно восхва́лим благода́ти прося́ще: на ки́йждо бо де́нь источа́ет исцеле́ния, я́ко ре́к тече́ния показу́яй мале́йшая. Те́мже по до́лгу приступа́юще с любо́вию, ве́рно почерпе́м от исто́чника неисчерпа́емое здра́вие, вои́стинну безсме́ртное, ороша́ющее ве́рно благочести́вых сердца́: устна́ми возопии́м, Ты́ еси́ ве́рных утеше́ние.

Песнь 4.

Ирмос: На Боже́ственней стражи / богоглаголивый Аввакум / да ста́нет с на́ми и пока́жет / светоно́сна А́нгела / ясно глаголюща: / днесь спасение миру, / яко воскресе Христос, / яко всесилен.

Припев: Христо́с воскре́се из ме́ртвых.

Му́жеский у́бо пол, / я́ко разве́рзый де́вственную утро́бу, / яви́ся Христо́с, / я́ко челове́к же, / А́гнец нарече́ся, / непоро́чен же, / я́ко невку́сен скве́рны, / на́ша Па́сха, / и я́ко Бог и́стинен / соверше́н рече́ся.

Припев: Христо́с воскре́се из ме́ртвых.

Я́ко единоле́тный а́гнец, / благослове́нный нам вене́ц Христо́с, / во́лею за всех закла́н бысть, / Па́сха чисти́тельная, / и па́ки из гро́ба кра́сное / пра́вды нам возсия́ Со́лнце.

Припев: Христо́с воскре́се из ме́ртвых.

Богооте́ц у́бо Дави́д / пред се́нным ковче́гом скака́ше игра́я, / лю́дие же Бо́жии святи́и, / образо́в сбытие́ зря́ще, / весели́мся Боже́ственне, / я́ко воскре́се Христо́с, / я́ко Всеси́лен.

Слава: Созда́вый Ада́ма, Твоего́ пра́отца, Чи́стая, / зи́ждется от Тебе́, и сме́ртное жили́ще разори́ Свое́ю сме́ртию днесь, / и озари́ вся / боже́ственными блиста́ньми Воскресе́ния.

И ныне: Его́же родила́ еси́ Христа́, / прекра́сно из ме́ртвых возсия́вша, Чи́стая зря́щи, / до́брая и непоро́чная в жена́х и кра́сная, / днесь во спасе́ние всех, со апо́столы ра́дующися, / Того́ прославля́й.

Припев: Пресвятая Богородице, спаси нас

Па́че песка́ вои́стинну, и ка́плий дожде́вных, бы́ша Богоро́дице мно́жества, исто́чника де́л Твои́х, непреста́нно теку́щая на всю́ зе́млю бога́тно, и вся́каго боля́ща лю́те ско́ро исцеля́ющая.

Припев: Пресвятая Богородице, спаси нас

На стесне́нный жены́ от карки́на сосе́ц, вода́ возлива́ется Де́во, исто́чника Твоего́ Влады́чице, и а́бие преста́ша стра́сти смертоно́сныя струе́ю, и карки́н про́сто изы́ти позна́.

Припев: Пресвятая Богородице, спаси нас

Недомы́слимое в Тебе́, и па́че естества́ соде́янное е́сть я́вственно Богоро́дице: вода́ бо быва́ет исто́чника Твоего́ исцеле́ние, неду́гом смертоно́сным проти́вное, его́же естество́ я́ве никогда́же ве́дяше.

Припев: Пресвятая Богородице, спаси нас

При́сно умерщвля́ет мя́ вра́г сла́стными прило́ги, Влады́чице исто́чниче Богоро́дице, не пре́зри, предвари́ ско́рая по́моще: сего́ же се́тей мя́ изба́ви, да воспою́ Тя при́сно многопе́тую.

Песнь 5.

Ирмос: У́тренюем утреннюю глубоку, / и вместо мира песнь принесем Владыце, / и Христа́ узрим / правды Солнце, / всем жизнь возсияюща.

Припев: Христо́с воскре́се из ме́ртвых.

Безме́рное Твое́ благоутро́бие, / а́довыми у́зами содержи́мии зря́ще, / к све́ту идя́ху Христе́, / весе́лыми нога́ми, / Па́сху хва́ляще ве́чную.

Припев: Христо́с воскре́се из ме́ртвых.

Присту́пим свещено́снии, / исходя́щу Христу́ из гро́ба, я́ко жениху́, / и спра́зднуем любопра́зднственными чи́нми / Па́сху Бо́жию спаси́тельную.

Слава: Просвеща́ется боже́ственными луча́ми и живоно́сными / воскресе́ния Сы́на Твоего́, Богома́ти Пречи́стая, / и ра́дости исполня́ется / благочести́вых собра́ние.

И ныне: Не разве́рзл еси́ врата́ де́вства в воплоще́нии, / гро́ба не разруши́л еси́ печа́тей, Царю́ созда́ния, / отону́дуже воскре́сшаго Тя зря́щи / Ма́ти, ра́довашеся.

Припев: Пресвятая Богородице, спаси нас

Глаго́ланная Де́во Отрокови́це, исто́чника Твоего́ вои́стинну чудеса́, ужаса́ют челове́ков помышле́ние: па́че бо естества́ су́ть, вся́ ве́рныя освяща́ющая.

Припев: Пресвятая Богородице, спаси нас

Повествова́ руно́, ма́нна и Силоа́м, и ка́мень точа́щь, Соломо́нов притво́р, благода́ть Твою́, Иорда́нския во́ды, и исто́чник самаряны́ни.

Припев: Пресвятая Богородице, спаси нас

Ка́пли Твоя́ Отрокови́це Де́во, я́же исто́чника, и ме́ртваго оживи́ша, па́че сло́ва соде́янное и смы́сла: вся́ бо Твоя́ Всечи́стая, сло́во побежда́ют челове́ческое.

Припев: Пресвятая Богородице, спаси нас

Стра́сти моя́ Отрокови́це исцели́, кровотече́ния исто́чник изсуша́ющи, и лю́тое пла́мене возжже́ние, и здра́вия преложе́ние, исхо́дов сою́з, и чревотече́ние.

Песнь 6.

Ирмос: Снизше́л еси́ в преиспо́дняя земли́, / и сокруши́л еси́ вереи́ ве́чныя, / содержа́щия свя́занныя, Христе́, / и тридне́вен, я́ко от ки́та Ио́на, / воскре́сл еси́ от гро́ба.

Припев: Христо́с воскре́се из ме́ртвых.

Сохрани́в це́ла зна́мения Христе́, / воскре́сл еси́ от гро́ба, / ключи́ Де́вы не вреди́вый в рождестве́ Твое́м, / и отве́рзл еси́ нам ра́йския две́ри.

Припев: Христо́с воскре́се из ме́ртвых.

Спа́се мой, / живо́е же и неже́ртвенное заколе́ние, / я́ко Бог Сам Себе́ / во́лею приве́л Отцу́, / совоскреси́л еси́ всеро́днаго Ада́ма, / воскре́с от гро́ба.

Слава: Возведе́ся дре́вле держи́мое сме́ртию и тле́нием, / воплоти́вшимся от Твоего́ пречи́стаго чре́ва, / к нетле́нней и присносу́щней жи́зни, / Богоро́дице Де́во.

И ныне: Сни́де в преиспо́дняя земли́, / в ложесна́ Твоя́, Чи́стая, сше́дый, / и всели́выйся и воплоти́выйся па́че ума́, / и воздви́же с Собо́ю Ада́ма, / воскре́с от гро́ба.

Припев: Пресвятая Богородице, спаси нас

Словеса́ сло́ва, я́ко вои́стинну исто́чника, воспева́ем Тя́ Чи́стая: прему́дрости бо глубину́ я́ко па́че сло́ва ражда́еши, пове́сивша на возду́се тече́ния, и зе́млю на воде́.

Припев: Пресвятая Богородице, спаси нас

Подшла́ еси́ ле́ствиц несе́ние, оте́млющее сокруше́ние и́же та́мо живопи́сцов, о всесвяты́й исто́чниче! спаса́яй лю́ди от тру́са до́му па́дшыя.

Припев: Пресвятая Богородице, спаси нас

Утро́бы неродя́щыя непло́дством пре́жде, разреша́еши я́ве, исто́чника Твоего́ струя́ми: и́бо я́ко роди́вшая Влады́ку все́х. и рожде́ния подае́ши.

Припев: Пресвятая Богородице, спаси нас

Ни сло́во, ни у́м, ниже́ язы́к Твое́ возмо́гут Чи́стая Рождество́ похвали́ти, но немощству́ют в Тебе́, и облича́ется филосо́фов че́стность, и ри́торов красота́.

Конда́к, гла́с 8:

От неистощи́мыя Ты́, исто́чниче богоблагода́тный, подае́ши ми́, точа́щи во́ды Твоея́ благода́ти, приснотеку́щий па́че сло́ва: я́ко бо Сло́во ро́ждшая па́че смы́сла, молю́ Ти ся, ороси́ мя благода́тию, да зову́ Ти: ра́дуйся, водо́ спаси́тельная.

И́кос: Нескве́рная Богоро́дице, ро́ждшая Сло́во О́тчее, пре́жде ве́к нетле́нно ро́ждшееся, разшири́ моя́ уста́, Чи́стая, спривнося́щи мя́ к Твоему́ похвале́нию, я́ко да восхвалю́ Тя, зовы́й исто́чнику Твоему́ сия́: ра́дуйся, исто́чниче ра́дости непреста́емыя: ра́дуйся, то́че добро́ты неизрече́нныя. ра́дуйся, неду́гов разли́чных разреше́ние: ра́дуйся страсте́й вся́ких потопле́ние. Ра́дуйся струе́ светови́днейшая, здра́вы творя́щая ве́рныя: ра́дуйся водо́ благода́тнейшая неду́гующым многоразли́чно. Ра́дуйся ча́ше ма́нны живото́чныя: ра́дуйся ба́не и не́ктарю богоизлия́нный. Ра́дуйся водо́, прему́дрости неве́дение оте́млющая: ра́дуйся растворе́ние се́рдца, пи́щу боже́ственную излива́ющее. Ра́дуйся приста́нище неможе́ния источа́ющая: ра́дуйся пла́мень неду́гования угаша́ющая. Ра́дуйся водо́ спаси́тельная.

Песнь 7.

Ирмос: О́троки от пещи избавивый, / быв Человек, / страждет яко смертен, / и страстию смертное, / в нетления облачит благолепие, / Един благословен / отцев Бог, и препрославлен.

Припев: Христо́с воскре́се из ме́ртвых.

Жены́ с ми́ры богому́дрыя в след Тебе́ теча́ху, / Его́же, я́ко ме́ртва, со слеза́ми иска́ху, / поклони́шася ра́дующияся Живо́му Бо́гу, / и Па́сху та́йную / Твои́м, Христе́, ученико́м благовести́ша.

Припев: Христо́с воскре́се из ме́ртвых.

Сме́рти пра́зднуем умерщвле́ние, / а́дово разруше́ние, / ино́го жития́ ве́чнаго нача́ло, / и игра́юще пое́м Вино́внаго, / Еди́наго благослове́ннаго / отце́в Бо́га, и препросла́вленнаго.

Припев: Христо́с воскре́се из ме́ртвых.

Я́ко вои́стинну свяще́нная, / и всепра́зднственная сия́ спаси́тельная нощь, / и светоза́рная, / светоно́снаго дне, / воста́ния су́щи провозве́стница, / в не́йже безле́тный Свет из гро́ба пло́тски всем возсия́.

Слава: Умертви́в Сын Твой смерть, Всенепоро́чная, / днесь всем сме́ртным пребыва́ющий живо́т во ве́ки веко́в дарова́, / Еди́н благослове́нный, / отце́в Бог и Препросла́вленный.

И ныне: Всем ца́рствуяй созда́нием, / быв челове́к, / всели́ся в Твою́, Богоблагода́тная, утро́бу, / и распя́тие претерпе́в и смерть, / воскре́се боголе́пно, / совозста́вив нас, я́ко всеси́лен.

Припев: Пресвятая Богородице, спаси нас

Почерпи́те неду́гующии исцеле́ния: Всечи́стая бо то́чит от боже́ственнаго исто́чника сла́дость и́стинную, пото́к сла́дости вои́стинну вре́ющий, те́мже и ве́рою то́ки незави́стныя поче́рпем вси́.

Припев: Пресвятая Богородице, спаси нас

Удивля́ют слы́шащыя Влады́чице, стра́нная Твоя́ чудеса́, вся́ ве́рныя: немы́я бо и глухи́я, я́ко благоглаго́ливыя показу́ет вода́ Твоя́, стра́ждущыя же лю́те врачу́ет, и исцеле́ние да́рует.

Припев: Пресвятая Богородице, спаси нас

Возво́диши от пе́щи скорбе́й, ороша́ющи вода́ми от стра́ннаго исто́чника, приступа́ющыя к Тебе́ Чи́стая: карки́нския бо ра́ны свобожда́ется челове́к, прокаже́нна же исцеля́еши, и распале́ние угаси́ла еси́.

Припев: Пресвятая Богородице, спаси нас

Ю́ноши и отрокови́цы Влады́чицу, и вси́ челове́цы ве́рою от души́ восхва́лим све́тло: сокруше́ния бо гное́виц, и вре́ды лука́вых, и ото́ки, и разсла́бленнаго исцели́.

Песнь 8.

Ирмос: Сей нарече́нный и святы́й день, / Еди́н суббо́т Царь и Госпо́дь, / пра́здников пра́здник / и торжество́ есть торже́ств, / во́ньже благослови́м Христа́ во ве́ки.

Припев: Христо́с воскре́се из ме́ртвых.

Прииди́те, но́ваго виногра́да рожде́ния, / Боже́ственнаго весе́лия, / в наро́читом дни Воскресе́ния, / Ца́рствия Христо́ва приобщи́мся, / пою́ще Его́ / я́ко Бо́га во ве́ки.

Припев: Христо́с воскре́се из ме́ртвых.

Возведи́ о́крест о́чи твои́, Сио́не, и виждь: / се бо приидо́ша к тебе́, / я́ко богосве́тлая свети́ла, / от за́пада, и се́вера, и мо́ря, / и восто́ка ча́да твоя́, / в тебе́ благословя́щая Христа́ во ве́ки.

Припев: Пресвята́я Тро́ице, Бо́же наш, сла́ва Тебе́.

Троичен: О́тче Вседержи́телю, и Сло́ве, и Ду́ше, / треми́ соединя́емое во Ипоста́сех Естество́, / Пресу́щественне и Пребоже́ственне, / в Тя крести́хомся, / и Тя благослови́м во вся ве́ки.

Благослови́м Отца́ и Сы́на и Свята́го Ду́ха, Го́спода.

Прии́де Тобо́ю в мир Госпо́дь, / Де́во Богоро́дице, / и чре́во а́дово расто́рг, / сме́ртным нам воскресе́ние дарова́, / те́мже благослови́м Его́ во ве́ки.

И ны́не и при́сно и во ве́ки веко́в, ами́нь.

Всю низложи́в сме́рти держа́ву / Сын Твой, Де́во, Свои́м воскресе́нием, / я́ко Бог кре́пкий совознесе́ нас и обожи́, / те́мже воспева́ем Его́ во ве́ки.

Припев: Пресвятая Богородице, спаси нас

Боже́ственную исто́чник и честну́ю во́ду излива́ет Тво́й Де́во: водны́х бо тече́ние вспяща́ет зело́, призыва́нием боже́ственным благода́ти. те́мже тя́ почита́ем, исто́чниче, во ве́ки.

Припев: Пресвятая Богородице, спаси нас

Вси́ честну́ю живото́чную во́ду воспои́м му́дренне: злодыха́ния бо то́к по страна́м уставля́ет, и свобо́дное твори́т происхожде́ние. Оле Твои́х чуде́с, Чи́стая Богороди́тельнице!

Припев: Пресвятая Богородице, спаси нас

Ка́я, Всепе́тая, восхва́лят уста́ Рождества́ Твоего́ стра́нное? Но и у́м ки́й бы чуде́с исто́чник изсле́довал, и сло́во изглаго́лало? не́сть естеству́ кре́пость, Твои́м чуди́тися.

Припев: Пресвятая Богородице, спаси нас

Вся́ о Тебе́ сме́рти держа́ва разори́ся внеза́пу, о Цари́це и Госпоже́: и́бо Царя́ Безсме́ртнаго, живо́т Ты́ источи́ла еси́, во́ду, ма́нну, Христа́ во ве́ки.

Песнь 9.

Вели́чит душа́ моя́ / Воскре́сшаго тридне́вно от гро́ба, / Христа́ Жизнодавца.

Ирмос: Свети́ся, свети́ся, / но́вый Иерусали́ме, / сла́ва бо Госпо́дня / на тебе́ возсия́. / Лику́й ны́не / и весели́ся, Сио́не. / Ты же, Чи́стая, красу́йся, Богоро́дице, / о воста́нии Рождества́ Твоего́.

Христо́с но́вая Па́сха, / Же́ртва жива́я, / А́гнец Бо́жий, / взе́мляй грехи́ ми́ра.

О, Боже́ственнаго, о любе́знаго, / о сладча́йшаго Твоего́ гла́са! / С на́ми бо нело́жно / обеща́лся еси́ бы́ти, / до сконча́ния ве́ка Христе́: / Его́же, ве́рнии, / утвержде́ние наде́жди иму́ще, ра́дуемся.

А́нгел вопия́ше Благода́тней: / Чи́стая Де́во, ра́дуйся! / И па́ки реку́: ра́дуйся! / Твой Сын воскре́се / тридне́вен от гро́ба, / и ме́ртвыя воздви́гнувый: / лю́дие, весели́теся. И тропарь: О, Боже́ственнаго, о любе́знаго:

О, Па́сха ве́лия и свяще́ннейшая, Христе́! / О му́дросте, и Сло́ве Бо́жий, и си́ло! / Подава́й нам и́стее Тебе́ причаща́тися, / в невече́рнем дни Ца́рствия Твоего́.

Вели́чит душа́ моя́ / Триипоста́снаго и Неразде́льнаго Божества́ держа́ву.

Согла́сно Де́во, Тебе́ блажи́м ве́рнии: / ра́дуйся, Две́ре Госпо́дня, / ра́дуйся, Гра́де одушевле́нный, / ра́дуйся, Ея́же ра́ди нам ны́не возсия́ свет, / из Тебе́ Рожде́ннаго из ме́ртвых Воскресе́ния.

Ра́дуйся, Де́во, ра́дуйся, / ра́дуйся, Благослове́нная, / ра́дуйся, Препросла́вленная! / Твой бо Сын воскре́се тридне́вен от гро́ба.

Весели́ся и ра́дуйся боже́ственная Две́ре Све́та, / заше́дый бо Иису́с во гроб возсия́, / просия́в со́лнца светле́е, / и ве́рныя вся озари́в, / Богора́дованная Влады́чице.

Припев: Пресвятая Богородице, спаси нас

Во́ды вся́ превосхо́дит, Отрокови́це Чи́стая, исто́чника Твоего́ вода́, я́ве да́рующая свобожде́ние неду́гов лю́тых, и душа́м вся́кое здра́вие, я́ко па́че естества́ излива́емая.

Припев: Пресвятая Богородице, спаси нас

Реши́тель неду́гов но́вый се́ Силоа́м, исто́чника Твоего́ Де́во, зри́м вси́: о́чи бо прие́млет огня́, вси́ же здра́вие при́сно к животу́ прие́млем.

Припев: Пресвятая Богородице, спаси нас

Здра́вия и́щущии притецы́те ко исто́чнику: Отрокови́ца бо Де́ва жи́тельствует при воде́. Лику́й и весели́ся ве́рных мно́жество си́це, я́коже подоба́ет: и́же бо прии́дет к хра́му, воздая́ние проше́ний прие́млет.

Припев: Пресвятая Богородице, спаси нас

Возвы́сися исто́чника Твоего́ вода́ вы́ше небе́с, и земли́ бе́здны то́ки претече́: сия́ е́сть пи́ща души́, питие́ ве́рных, ме́д из ка́мене, и ма́нны раздая́ние.

Припев: Пресвятая Богородице, спаси нас

Весели́ши Де́во царя́ преесте́ственне, источа́ющи благода́ть от исто́чника присносу́щную, сему́ подава́ющи на враги́ кре́пость, побе́ды при́сно, здра́вие и ми́р, и проше́ний исполне́ние.

Припев: Вели́чит душа́ моя́ / Воскре́сшаго тридне́вно от гро́ба, / Христа́ Жизнодавца.

Ирмос: Свети́ся, свети́ся, / но́вый Иерусали́ме, / сла́ва бо Госпо́дня / на тебе́ возсия́. / Лику́й ны́не / и весели́ся, Сио́не. / Ты же, Чи́стая, красу́йся, Богоро́дице, / о воста́нии Рождества́ Твоего́.

Ексапостиларий. Самогласен:

Пло́тию усну́в, / я́ко мертв, / Царю́ и Го́споди, / тридне́вен воскре́сл еси́, / Ада́ма воздви́г от тли, / и упраздни́в смерть, / Па́сха нетле́ния, / ми́ра спасе́ние. [Дважды.]

Исто́чник еси́ вои́стинну воды́ живы́я, Влады́чице: измыва́еши у́бо неду́ги ду́ш и теле́с лю́тыя, прикоснове́нием Твои́м еди́ным то́кмо, во́ду спасе́ния Христа́ излива́ющи.

Хвали́тны псалмы́, глас 6:

Вся́кое дыха́ние да хва́лит Го́спода./ Хвали́те Го́спода с небе́с,/ хвали́те Его́ в вы́шних.// Тебе́ подоба́ет песнь Бо́гу.

Хвали́те Его́ вси а́нгели Его́,/ хвали́те Его́ вся си́лы Его́.// Тебе́ подоба́ет песнь Бо́гу.

На хвалитех стихиры воскресны, глас 6.

Стих: Сотвори́ти в них суд напи́сан: / сла́ва сия́ бу́дет всем преподо́бным Его́.

Кре́ст Тво́й Го́споди, жи́знь и воскре́сние лю́дем Твои́м е́сть, и наде́ющеся на́нь, Тебе́ воскре́сшаго Бо́га на́шего пое́м: поми́луй на́с.

Стих: Хвали́те Бо́га во святы́х Его́, / хвали́те Его́ в утверже́нии си́лы Его́.

Погребе́ние Твое́ Влады́ко, ра́й отве́рзе ро́ду челове́ческому: и от истле́ния изба́вльшеся, Тебе́ воскре́сшаго Бо́га на́шего пое́м: поми́луй на́с.

Стих: Хвали́те Его́ на си́лах Его, / хвали́те Его́ по мно́жеству вели́чествия Его́.

Со Отце́м и Ду́хом Христа́ воспои́м, воскре́сшаго из ме́ртвых, и к Нему́ вопии́м: Ты́ живо́т еси́ на́ш, и воскре́сние, поми́луй на́с.

Стих: Хвали́те Его́ во гла́се тру́бнем: / хвали́те Его́ во псалти́ри и гу́слех.

Тридне́вен воскре́сл еси́ Христе́ от гро́ба я́коже пи́сано е́сть, совоздви́гнувый пра́отца на́шего. Те́мже Тя́ и сла́вит ро́д челове́ческий, и воспева́ет Твое́ Воскре́сние.

Глас 2: Вода́ исто́чника, спаси́тельная е́сть все́м немощству́ющым: присту́пим ве́рою, благода́ть почерпе́м.

Кла́дязь живото́чный исто́чника безсме́ртнаго, приступа́ющым любо́вию, исцеле́ний подае́т излия́ние неисчерпа́емое.

Укрепля́ет ду́шы вода́ Де́выя: и́же в скве́рнах страсте́й, притеце́м ко Отрокови́це, и сия́ измы́ем.

Ру́чка свяще́нная, и ма́нна незави́стная из пречи́стыя утро́бы, излива́ет Влады́ку: потре́бу вся́ческую поче́рпем.

Таже стихиры Пасхи. Глас 5.

Стих: Да воскре́снет Бог, / и расточа́тся врази́ Его́.

Па́сха / свяще́нная нам днесь показа́ся; / Па́сха но́ва свята́я; / Па́сха та́инственная; / Па́сха всечестна́я. / Па́сха Христо́с Изба́витель; / Па́сха непоро́чная; / Па́сха вели́кая; / Па́сха ве́рных. / Па́сха две́ри ра́йския нам отверза́ющая. / Па́сха всех освяща́ющая ве́рных.

Стих: Я́ко исчеза́ет дым, / да исче́знут.

Прииди́те / от виде́ния жены́ благове́стницы, / и Сио́ну рцы́те: / приими́ / от нас ра́дости благове́щения, Воскресе́ния Христо́ва: / красу́йся, лику́й / и ра́дуйся, Иерусали́ме, / Царя́ Христа́ узре́в из гро́ба, / я́ко жениха́ происходя́ща.

Стих: Та́ко да поги́бнут гре́шницы от Лица́ Бо́жия, / а пра́ведницы да возвеселя́тся.

Мироно́сицы жены́, / у́тру глубоку́, / предста́вша гро́бу Живода́вца, / обрето́ша А́нгела / на ка́мени седя́ща, / и той провеща́в им, / си́це глаго́лаше: / что и́щете Жива́го с ме́ртвыми; / что пла́чете Нетле́ннаго во тли? / Ше́дше, пропове́дите ученико́м Его́.

Стих: Сей день, его́же сотвори Госпо́дь, / возра́дуемся и возвесели́мся в онь.

Па́сха кра́сная, / Па́сха, Госпо́дня Па́сха! / Па́сха всечестна́я / нам возсия́. Па́сха, / ра́достию друг дру́га обы́мем. / О Па́сха! / Избавле́ние ско́рби, / и́бо из гро́ба днесь, / я́ко от черто́га / возсия́в Христо́с, / жены́ ра́дости испо́лни, глаго́ля: / пропове́дите апо́столом.

Слава, и ныне, глас 5: Воскресе́ния день, / и просвети́мся торжество́м, / и друг дру́га обы́мем. / Рцем бра́тие, / и ненави́дящим нас, / прости́м вся Воскресе́нием, / и та́ко возопии́м: / Христо́с воскре́се из ме́ртвых, / сме́ртию смерть попра́в, / и су́щим во гробе́х живо́т дарова́в.

Таже настоящий тропарь,
во глас 5, трижды:

Христо́с воскре́се из ме́ртвых, / сме́ртию смерть попра́в / и су́щим во гробе́х живо́т дарова́в.

И абие отпуст: Христо́с воскресы́й из ме́ртвых, сме́ртию смерть попра́вый и су́щим во гробе́х живо́т дарова́вый: и́стинный Бог наш, моли́твами Пречи́стыя Своея́ Ма́тере и всех святы́х, поми́лует и спасе́т нас, я́ко Благ и Человеколю́бец.

Таже поем конечное: Христо́с воскре́се: трижды, весь тропарь.

И нам дарова́ живо́т ве́чный, покланя́емся Его́ тридне́вному Воскресе́нию.