Шрифт

Богослужебные тексты для домашнего употребления

Дни памяти святых

Последование Всеношного бдения в день памяти святителя Спиридона, епископа Тримифунтского. Для домашнего (келейного) совершения

ВСЕНО́ЩНОЕ БДЕ́НИЕ

ВЕЛИ́КАЯ ВЕЧЕ́РНЯ

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас. Ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Трижды.)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, (трижды). Сла́ва, и ны́не:

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Таже, Го́споди, поми́луй, (12), Сла́ва, и ны́не:

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 103:

Поется часть псалма:

Благослови́, душе́ моя́, Го́спода. / Благослове́н еси́, Го́споди. / Го́споди, Бо́же мой, возвели́чился еси́ зело́. / Благослове́н еси́, Го́споди. / Во испове́дание и в велеле́поту обле́клся еси́. / Благослове́н еси́, Го́споди. / Посреде́ гор про́йдут во́ды. / Ди́вна дела́ Твоя́, Го́споди. / Вся прему́дростию сотвори́л еси́. / Сла́ва Ти, Го́споди, сотвори́вшему вся.

Или читается псалом полностью:

Благослови́, душе́ моя́, Го́спода. Го́споди, Бо́же мой, возвели́чился еси́ зело́. Во испове́дание и в велеле́поту обле́клся еси́. Одея́йся све́том, я́ко ри́зою, простира́яй не́бо, я́ко ко́жу. Покрыва́яй вода́ми превы́спренняя Своя́, полага́яй о́блаки на восхожде́ние Свое́, ходя́й на крилу́ ве́треню. Творя́й А́нгелы Своя́ ду́хи и слуги́ Своя́ пла́мень о́гненный. Основа́яй зе́млю на тве́рди ея́, не преклони́тся в век ве́ка. Бе́здна, я́ко ри́за, одея́ние ея́, на гора́х ста́нут во́ды, от запреще́ния Твоего́ побе́гнут, от гла́са гро́ма Твоего́ убоя́тся. Восхо́дят го́ры и нисхо́дят поля́ в ме́сто, е́же основа́л еси́ им. Преде́л положи́л еси́, eго́же не пре́йдут, ниже́ обратя́тся покры́ти зе́млю. Посыла́яй исто́чники в де́брех, посреде́ гор про́йдут во́ды. Напая́ют вся зве́ри се́льныя, ждут она́гри в жа́жду свою́. На ты́х пти́цы небе́сныя привита́ют, от среды́ ка́мения дадя́т глас. Напая́яй го́ры от превы́спренних Свои́х, от плода́ дел Твои́х насы́тится земля́. Прозяба́яй траву́ ското́м, и злак на слу́жбу челове́ком, извести́ хлеб от земли́. И вино́ весели́т се́рдце челове́ка, ума́стити лице́ еле́ем, и хлеб се́рдце челове́ка укрепи́т. Насы́тятся древа́ польска́я, ке́дри Лива́нстии, и́хже еси́ насади́л. Та́мо пти́цы вогнездя́тся, ероди́ево жили́ще предводи́тельствует и́ми. Го́ры высо́кия еле́нем, ка́мень прибе́жище за́яцем. Сотвори́л есть луну́ во времена́, со́лнце позна́ за́пад свой. Положи́л еси́ тму, и бысть нощь, в не́йже про́йдут вси зве́рие дубра́внии. Ски́мни рыка́ющии, восхи́тити и взыска́ти от Бо́га пи́щу себе́. Возсия́ со́лнце и собра́шася и в ло́жах свои́х ля́гут. Изы́дет челове́к на де́ло свое́ и на де́лание свое́ до ве́чера. Я́ко возвели́чишася дела́ Твоя́, Го́споди, вся прему́дростию сотвори́л еси́, испо́лнися земля́ тва́ри Твоея́. Сие́ мо́ре вели́кое и простра́нное, та́мо га́ди, и́мже несть числа́, живо́тная ма́лая с вели́кими, та́мо корабли́ препла́вают, змий сей, eго́же созда́л еси руга́тися eму́. Вся к Тебе́ ча́ют, да́ти пи́щу им во бла́го вре́мя. Да́вшу Тебе́ им соберу́т, отве́рзшу Тебе́ ру́ку вся́ческая испо́лнятся бла́гости, отвра́щшу же Тебе́ лице́, возмяту́тся, отъи́меши дух их, и исче́знут, и в персть свою́ возвратя́тся. По́слеши Ду́ха Твоего́, и сози́ждутся, и обнови́ши лице́ земли́. Бу́ди сла́ва Госпо́дня во ве́ки, возвесели́тся Госпо́дь о де́лех Свои́х, призира́яй на зе́млю, и творя́й ю́ трясти́ся, прикаса́яйся гора́м, и дымя́тся. Воспою́ Го́сподеви в животе́ мое́м, пою́ Бо́гу моему́, до́ндеже есмь, да услади́тся Ему́ бесе́да моя́, аз же возвеселю́ся о Го́споде. Да исче́знут гре́шницы от земли́, и беззако́нницы, я́коже не бы́ти им. Благослови́, душе́ моя́, Го́спода.

Со́лнце позна́ за́пад свой. Положи́л еси́ тму, и бысть нощь. Я́ко возвели́чишася дела́ Твоя́, Го́споди, вся прему́дростию сотвори́л еси́.

Сла́ва, и ны́не: Аллилу́иа, аллилу́иа, аллилу́иа, сла́ва Тебе́ Бо́же. Трижды.

Блаже́н муж:

Блаже́н муж, и́же не и́де на сове́т нечести́вых.

Аллилу́иа, аллилу́иа, аллилу́иа.

Я́ко весть Госпо́дь путь пра́ведных, и путь нечести́вых поги́бнет.

Аллилу́иа, аллилу́иа, аллилу́иа.

Рабо́тайте Го́сподеви со стра́хом и ра́дуйтеся Ему́ с тре́петом.

Аллилу́иа, аллилу́иа, аллилу́иа.

Блаже́ни вси наде́ющиися Нань.

Аллилу́иа, аллилу́иа, аллилу́иа.

Воскресни́, Го́споди, спаси́ мя, Бо́же мой.

Аллилу́иа, аллилу́иа, аллилу́иа.

Госпо́дне есть спасе́ние, и на лю́дех Твои́х благослове́ние Твое́.

Аллилу́иа, аллилу́иа, аллилу́иа.

Сла́ва Отцу́ и Сы́ну и Свято́му Духу.

Аллилу́иа, аллилу́иа, аллилу́иа.

И ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Го́споди, воззва́х, глас 1:

Го́споди, воззва́х к Тебе́, услы́ши мя./ Услы́ши мя, Го́споди./ Го́споди, воззва́х к Тебе́, услы́ши мя:/ вонми́ гла́су моле́ния моего́,/ внегда́ воззва́ти ми к Тебе́.// Услы́ши мя, Го́споди.

Да испра́вится моли́тва моя́,/ я́ко кади́ло пред Тобо́ю,/ воздея́ние руку́ мое́ю/ – же́ртва вече́рняя.// Услы́ши мя, Го́споди.

Стихи́ры пра́здника, глас 1:

Стих: А́ще беззако́ния на́зриши, Го́споди, Го́споди, кто постои́т? Я́ко у Тебе́ очище́ние есть.

Небе́сных чино́в ра́дование / и на земли́ архиере́ев похвалу́, / свяще́нников сла́ву, Спиридо́на му́драго, / мона́шествующих пра́вило и защи́тника, / Це́ркве утвержде́ние и учи́теля, / вся́ злосла́вныя посрамля́юща, / потреби́теля Ариева и того́ посо́бников, / его́же ра́ди си́х шата́ние Христо́с низложи́, / име́яй ве́лию ми́лость.

Стих: И́мене ра́ди Твоего́ потерпе́х Тя, Го́споди, потерпе́ душа́ моя́ в сло́во Твое́, упова́ душа́ моя́ на Го́спода.

Небе́сных чино́в ра́дование / о па́мяти твое́й, святи́телю Христо́в, Спиридо́не богому́дре, / дне́сь мно́жество люде́й к ра́це моще́й твои́х притека́ет / и прие́млет неду́гов разли́чных исцеле́ние. / Но, о преблаже́ннейший о́тче, / до́м и пребыва́ние Пресвяте́й Тро́ице бы́л еси́, / Юже моли́ дарова́ти / душа́м на́шим ве́лию ми́лость.

Стих: От стра́жи у́тренния до но́щи, от стра́жи у́тренния да упова́ет Изра́иль на Го́спода.

Небе́сным чино́м поревнова́л еси́, / и на земли́, богоно́се, / освяще́н сосу́д яви́лся еси́ / и жили́ще Свята́го Ду́ха. / Ве́лий засту́пник еси́ и те́плый / в беда́х обрета́ющимся, сла́вне, / свя́те Спиридо́не, священнопропове́дниче Христо́в, / су́щим на земли́ и по мо́рю пла́вающим, / су́щим дале́че и бли́з обрета́ющимся, / ми́лостивый засту́пник / и моле́бник о душа́х на́ших.

Стих: Я́ко у Го́спода ми́лость, и мно́гое у Него́ избавле́ние, и Той изба́вит Изра́иля от всех беззако́ний eго́.

О, ди́вное чу́до! / Свети́льника пресве́тлаго / дне́сь Ангелы воспева́ют, / спра́зднуем же и мы́, бра́тие, / духо́вне торжеству́юще и уми́льно взыва́юще: / о́тче Спиридо́не преди́вне, святи́телю Христо́в, / ме́ртвую, я́коже жи́ву, вопроси́л еси́ любве́ ра́ди Бо́жия; / ороше́ния на главу́ твою́ во вре́мя жа́твы небеса́ иска́паша, / бу́дущее прозна́меновавше; / престо́лу Христо́ву предстоя́, / моли́ спасти́ся на́м.

Стих: Хвали́те Го́спода вси язы́цы, похвали́те Его́ вси лю́дие.

О, ди́вное чу́до! / Дне́сь гра́д Керки́ра ра́дуется / и Трие́ст весели́тся, / и кра́сная пе́ния составля́ют, / ви́дяще свети́льника своего́, / и преди́внаго засту́пника своего́ и святи́теля, / рука́ми архиере́йскими носи́ма, / и уми́льно взыва́ют: / те́плый предста́телю, / изба́ви на́с от находя́щих бе́д и сопоста́т на́ших. / Мы́ же дне́сь собра́вшися, уми́льно глаго́лем: / ра́дуйся, Тро́ицы честны́й до́ме, / благово́нный сосу́де, церко́вное утвержде́ние, / Ария победи́телю и того́ единомы́сленников, / о́тче Спиридо́не, правосла́вных похвало́, / моли́ спасти́ся душа́м на́шим.

Стих: Я́ко утверди́ся ми́лость Его́ на нас, и и́стина Госпо́дня пребыва́ет во век.

О, ди́вное чу́до! / Вели́кий архиере́й и преди́вный предста́тель, / Спиридо́н му́дрый, / на Пе́рвом Собо́ре Нике́йском / честне́йший Симво́л утверди́в с богоно́сными отцы́, / и Ариевы пле́велы до конца́ исто́рг. / Те́мже, чу́дне, велегла́сно па́мять твою́ почита́ем, / и мо́щи нетле́нныя твоя́ чти́м, / и́миже источа́еши врачева́ний Боже́ственныя струи́ / и ве́лию ми́лость.

Глас 1: Сла́ва Отцу́ и Сы́ну и Свято́му Ду́ху.

О, ди́вное чу́до! / Вели́кий архиере́й и преди́вный предста́тель, / Спиридо́н му́дрый, / на Пе́рвом Собо́ре Нике́йском / честне́йший Симво́л утверди́в с богоно́сными отцы́, / и Ариевы пле́велы до конца́ исто́рг. / Те́мже, чу́дне, велегла́сно па́мять твою́ почита́ем, / и мо́щи нетле́нныя твоя́ чти́м, / и́миже источа́еши врачева́ний Боже́ственныя струи́ / и ве́лию ми́лость.

Глас 1: И ны́не и при́сно и во ве́ки веко́в. Ами́нь.

Богонача́льным манове́нием, отвсю́ду челове́ческая собра́ния, от свои́х обита́лищь носи́мая, Дости́гше пречестны́й моще́й твои́х ковче́г, досто́йно лобза́ют, Богоно́сное и достохва́льное те́ло воспева́юще, стра́хом одержи́ми, восхваля́ют, и я́сно восклица́ют тебе́ пе́сней богогла́сие: се́, досточу́дный Спиридо́н дне́сь прелага́ется, Сего́ бо ра́ди всеро́дное спасе́ние быва́ет, ему́же не довле́ют вси́ язы́цы досто́йное возда́ти пе́ние, Сего́ бо чудеса́ превосхо́дят вся́к у́м. И у́бо прему́дрый священнонача́льниче, всегда́ с Ма́терию Иису́совою и по преставле́нии моли́ся непреста́нно, сохрани́ти и спасти́ от вся́каго прираже́ния проти́внаго достоя́ние твое́, твое́ бо а́ще предста́тельство стяжа́хом, Во ве́ки благогла́сно ублажа́юще.

Све́те Тихи́й:

Све́те Ти́хий святы́я сла́вы Безсме́ртнаго Отца́ Небе́снаго, Свята́го, Блаже́ннаго, Иису́се Христе́! Прише́дше на за́пад со́лнца, ви́девше свет вече́рний, пое́м Отца́, Сы́на и Свята́го Ду́ха, Бо́га. Досто́ин еси́ во вся времена́ пет бы́ти гла́сы преподо́бными, Сы́не Бо́жий, живо́т дая́й; те́мже мир Тя сла́вит.

1. При́тчей чте́ние

Па́мять пра́веднаго с похвала́ми, и благослове́ние Госпо́дне на главе́ его́. Блаже́н челове́к, и́же обре́те прему́дрость, и сме́ртен, и́же уве́де ра́зум. Лу́чше бо сию́ купова́ти, не́жели зла́та и сребра́ сокро́вища. Честне́йшая же е́сть ка́мений многоце́нных, все́ же честно́е недосто́йно ея́ е́сть. Долгота́ бо дне́й и ле́та живота́ в десни́це ея́, в шу́йце же ея́ бога́тство и сла́ва. От у́ст ея́ исхо́дит пра́вда, зако́н же и ми́лость на язы́це но́сит. Послу́шайте у́бо мене́, о ча́да, честна́я бо реку́, и блаже́н челове́к, и́же пути́ моя́ сохрани́т: исхо́ди бо мои́ — исхо́ди живота́, и уготовля́ется хоте́ние от Го́спода. Сего́ ра́ди молю́ ва́с и предлага́ю мо́й гла́с сыново́м челове́ческим. Я́ко а́з, прему́дрость, устро́их сове́т, и ра́зум и смы́сл аз призва́х. Мо́й сове́т и утвержде́ние, мо́й ра́зум, моя́ же кре́пость. Аз мене́ лю́бящия люблю́, и́щущии же мене́ обря́щут благода́ть. Разуме́йте у́бо, незло́бивии, кова́рство, ненака́зании же, прилага́йте сердца́. Послу́шайте мене́ и па́ки, честна́я бо реку́, и отве́рзу от усте́н пра́вая, я́ко и́стине поучи́тся горта́нь мой, ме́рзки же пре́до мно́ю устны́ лжи́выя. С пра́вдою вси́ глаго́лы у́ст мои́х, ничто́же в ни́х стро́потно, ниже́ развраще́нно. Вся́ пра́ва су́ть разумева́ющим и про́ста обрета́ющим ра́зум. Науча́ю бо ва́с и́стине, да бу́дет о Го́споде наде́жда ва́ша, и испо́лнитеся Ду́ха.

2. При́тчей чте́ние

Уста́ пра́веднаго ка́плют прему́дрость, язы́к же непра́веднаго поги́бнет. Устне́ муже́й пра́ведных ка́плют благода́ти, уста́ же нечести́вых развраща́ются. Ме́рила льсти́вая ме́рзость пред Го́сподем, ве́с же пра́ведный прия́тен Ему́. Иде́же а́ще вни́дет досажде́ние, та́мо и безче́стие, уста́ же смире́нных поуча́ются прему́дрости. Соверше́ние пра́вых наста́вит и́х, и поползнове́ние отрица́ющихся упасе́т и́х. Не по́льзуют име́ния в де́нь я́рости, пра́вда же изба́вит от сме́рти. Умер пра́ведный, оста́ви раска́яние, нару́чна же быва́ет и посмея́тельна нечести́вых па́губа. Пра́вда непоро́чнаго исправля́ет пути́, в нече́стие же па́дает непра́вда. Пра́вда муже́й пра́вых изба́вит и́х, безсове́стием же пленя́ются беззако́ннии. Сконча́вшуся му́жу пра́ведну, не поги́бнет наде́жда, похвала́ же нечести́вых поги́бнет. Пра́ведник от ло́ва убе́гнет, в него́же ме́сто предае́тся нечести́вый. Во усте́х нечести́вых се́ть гра́жданом, чу́вство же пра́ведных благопоспе́шное. Во благи́х пра́ведных испра́вится гра́д, и в поги́бели нечести́вых ра́дование. Во благослове́нии пра́вых возвы́сится гра́д, усты́ же нечести́вых раскопа́ется. Руга́ется гра́жданом лише́нный ра́зума, му́ж же му́дрый безмо́лвие во́дит.

3. Прему́дрости Соломо́новы чте́ние

Пра́ведник, а́ще пости́гнет сконча́тися, в поко́и бу́дет. Ста́рость бо честна́ не многоле́тна, ниже́ в числе́ ле́т исчита́ется. Седи́на же е́сть му́дрость челове́ком, и во́зраст ста́рости — житие́ нескве́рное. Благоуго́ден Бо́гови бы́в, возлю́блен бы́сть, и живы́й посреде́ гре́шник, преста́влен бы́сть. Восхище́н бы́сть, да не зло́ба измени́т ра́зума его́ или́ ле́сть прельсти́т ду́шу его́. Раче́ние бо зло́бы помрача́ет до́брая и паре́ние по́хоти, пременя́ет у́м незло́бив. Сконча́вся вма́ле, испо́лни ле́та до́лга, уго́дна бо бе́ Го́сподеви душа́ его́, сего́ ра́ди потща́ся от среды́ лука́вствия. Лю́дие же ви́девше и не разуме́вше, ниже́ поло́жше в помышле́нии таково́е, я́ко благода́ть и ми́лость в преподо́бных Его́ и посеще́ние во избра́нных Его́.

Сподо́би, Го́споди:

Сподо́би, Го́споди, в ве́чер сей без греха́ сохрани́тися нам. Благослове́н еси́, Го́споди, Бо́же оте́ц на́ших, и хва́льно и просла́влено и́мя Твое́ во ве́ки. Ами́нь.

Бу́ди, Го́споди, ми́лость Твоя́ на нас, я́коже упова́хом на Тя. Благослове́н еси́, Го́споди, научи́ мя оправда́нием Твои́м. Благослове́н еси́, Влады́ко, вразуми́ мя оправда́нием Твои́м. Благослове́н еси́, Святы́й, просвети́ мя оправда́нии Твои́ми.

Го́споди, ми́лость Твоя́ во век, дел руку́ Твое́ю не пре́зри. Тебе́ подоба́ет хвала́, Тебе́ подоба́ет пе́ние, Тебе́ сла́ва подоба́ет. Отцу́ и Сы́ну и Свято́му Ду́ху, ны́не и при́сно и во ве́ки веко́в. Ами́нь.

На лити́и стихи́ры, гла́с 4.

Духо́вне учрежда́ющеся дне́сь, бра́тие, оста́вивше жите́йская су́етная попече́ния, весели́теся, челове́цы: се́ бо предста́тель на́ш, вели́кий Спиридо́н му́дрый, предлага́ет по́двиги и труды́ своя́, я́же за Христо́ву Це́рковь, со еретики́ пря́ся, претерпе́, и си́лою Свята́го Ду́ха си́х победи́. Це́ркве вели́кое заступле́ние и вселе́нныя свети́льниче, моли́ся Христу́ Бо́гу спасти́ся душа́м на́шим.

Дре́вле тебе́ гла́с, я́ко жи́ва, уме́ршая, вопро́шшу ти́, о́тче, даде́. О, чудесе́ изря́днаго! О, благода́ти! Юже получи́л еси́, житие́м украша́емь Ангельским, досточу́дне. Беззло́бив, пра́в, любо́вен и ми́лостив страннолю́бец, иера́рх свяще́ннейший Архиере́я Вели́каго, Христа́ Бо́га на́шего, Спиридо́не, му́дрый бы́л еси́. Те́мже светоно́сный тво́й пра́здник любо́вию соверша́ем: моли́ спасти́ся душа́м на́шим.

Вельми́ тя́ просла́ви в чудесе́х Госпо́дь, и жи́ва до конца́, иера́рше Спиридо́не: кто́ бо ве́рою и любо́вию а́ще и́мя твое́ свято́е призове́т, и не а́бие услы́шан быва́ет и те́пла тя́ предста́теля обрета́ет? Иже в неду́зех — врача́, и в беда́х — изба́вителя, гре́шных — засту́пника, ни́щих — сокро́вище, спу́тник[а] — путеше́ствующих, в мо́ри су́щих — прави́теля и уте́шителя. Те́мже вопие́м ти́: изба́ви ны́ от бе́д и спаси́ ста́до твое́ моли́твами твои́ми.

Преподо́бне о́тче, иера́рше прехва́льне, апо́стольскаго уче́ния бы́в испо́лнен и Боже́ственнаго Ду́ха жили́ще доброде́тельнаго ра́ди жития́ показа́лся еси́, во́лка от Це́ркве уче́ньми отгна́л еси́ и правосла́вных ве́ру уясни́л еси́, сто́лп яви́лся еси́ благоче́стия и побо́рник. Те́мже, и чудоде́йствуя в конце́х, змию́ в зла́то преложи́л еси́ и ме́ртвую к вопроше́нию воздви́гл еси́. Но о, отце́в досточу́дне и учи́телей собесе́дниче, Спа́су моли́ся спасти́ ду́ши на́ша.

Сла́ва, гла́с 6: Преподо́бне о́тче, из младе́нства приле́жно обучи́лся еси́, и во Христа́ обле́клся еси́, те́мже тя́ стра́жа ове́ц Свои́х поставля́ет, ловца́ волко́в и всему́драго пле́велов любоде́йчищных исторга́теля, се́ятеля же пра́вых догма́тов всечу́днаго, гони́теля ерети́чествующих зело́ крепча́йшаго, Ария безу́мнаго и безбо́жнаго ле́сть прогна́вша, уста́ филосо́фов загради́теля, на Собо́ре благосказа́нием слове́с твои́х вся́ у́мствовавшия упраздни́л еси́, и Святы́я Тро́ицы держа́ву во все́м ми́ре я́сно возвести́л еси́: в ру́це держа́ пли́нфу, и исти́снув о́ную, изы́де о́гнь и вода́, и бре́ние в ру́це оста́ся; си́це и в Святе́й Тро́ице Три́ Лица́, а Еди́н Бо́г словеси́ подтверди́л еси́. Те́мже, святе́йший о́тче, приступа́юще дне́сь с весе́лием, свяще́нное и свято́е те́ло твое́ со стра́хом лобза́ем, и, ра́дующеся, велича́ем просла́вльшаго тя́ Го́спода, Ему́же моли́ся о душа́х на́ших.

И ны́не, богоро́дичен глас 6: Верте́пе, благоукраси́ся, Агница бо гряде́т, чревонося́щи Христа́, я́сли же, подъими́те сло́вом разреши́вшаго от безслове́снаго дея́ния на́с, земноро́дных. Па́стырие, свиря́юще, свиде́тельствуйте чудеси́ стра́шному, и волсви́ от Перси́ды, зла́то, и лива́н, и сми́рну Царю́ принеси́те, я́ко яви́ся Госпо́дь из Де́вы Ма́тере. Ему́же и, прини́кше, ра́бски Ма́ти поклони́ся и привеща́ше к Держи́мому на объя́тиих Ея́: ка́ко все́ялся еси́ Мне́? Или́ ка́ко прозя́бл еси́ во Мне́, Изба́вителю мо́й и Бо́же?

Го́споди, поми́луй. (40 раз)

Стихи́ры на стихо́вне:

Стихиры, гла́с 5:

Ра́дуйся, архиере́ев пра́вило, / Це́ркве непоколеби́мое утвержде́ние, / сла́во правосла́вных, / чуде́с исто́чниче, / любве́ струя́ неистощи́мая, / свети́льниче многосве́тлый, / Ду́ха орга́не, / у́ме боже́ственныи, / кро́ткий и незло́бивый, / и́же простото́ю и́стинною украша́емь, / челове́че небе́сный, земны́й Ангеле, / виногра́да де́лателю, / Христо́в дру́же и́скренний, / Того́ моли́ пода́ти тебе́ чту́щим ве́лию ми́лость.

Сти́х: Честна́ пред Го́сподем / сме́рть преподо́бных Его́.

Кро́ток и насле́дник земли́ ты́ кро́тких / вои́стинну показа́лся еси́, Спиридо́не, / отце́в сла́во, / и́же жи́лами му́дрых и просты́х твои́х слове́с Боже́ственною благода́тию / врага́ вселука́ваго и пребезу́мнаго Ария удави́л еси́ / и, веле́ние Боже́ственное все́м уясни́в, / ве́рным показа́л еси́, / и спаси́тельное возвы́сив ду́хом, / вся́ же правосла́вныя просвети́в ясне́йше / Еди́но сла́вити Сло́во, / я́ко вои́стинну Единосу́щное Отцу́ Пребезнача́льному, / подаю́щее ми́ру ве́лию ми́лость.

Сти́х: Свяще́нницы Твои́ облеку́тся в пра́вду, / и преподо́бнии Твои́ возра́дуются.

Стра́сти умертви́в плотски́я, / ме́ртвыя благода́тию Бо́жиею возста́вил еси́, / и змию́ в зла́то претвори́л еси́, / и реки́ стремле́ние моли́твою твое́ю, о́тче, обузда́л еси́; / но́щию же царю́ я́влься бе́дствующему, / сего́ исцели́л еси́ к се́рдцу приближе́нием, / Го́споду тя́ пресла́вно прославля́ющу. / Те́мже велегла́сно твою́ па́мять почита́ем / и моще́й целе́бную и освяще́нную ра́ку чти́м, / из нея́же истека́ет врачева́ний Боже́ственныя струи́ / и ве́лия ми́лость.

Слава, гла́с 7:

Святи́телей боже́ственный сосу́д, о́тче преподо́бне, Спиридо́не му́дре, ты́ доброде́тельми показа́лся еси́: сего́ ра́ди Це́ркве предста́тель бы́в, ересенача́льники изгна́л еси́ и Ариево хуле́ние собо́рне на зе́млю низложи́л еси́. Те́мже, чудоде́йствуя де́лом и сло́вом, Спа́са моли́ спасти́ся душа́м на́шим.

И ны́не, Богоро́дичен:

Се́ вре́мя прибли́жися спасе́ния на́шего, гото́вися, верте́пе, Де́ва приближа́ется роди́ти; Вифлее́ме, земле́ Иу́дова, красу́йся и весели́ся, я́ко из тебе́ возсия́ Госпо́дь на́ш. Услы́шите, го́ры, и хо́лми, и окре́стныя страны́ Иуде́йския, я́ко гряде́т Христо́с, да спасе́т, его́же созда́, челове́ка, я́ко Человеколю́бец.

Моли́тва свята́го Симео́на Богоприи́мца:

Ны́не отпуща́еши раба́ Твоего́, Влады́ко,/ по глаго́лу Твоему́, с ми́ром;/ я́ко ви́деста о́чи мои́ спасе́ние Твое́,/ е́же еси́ угото́вал пред лице́м всех люде́й,/ свет во открове́ние язы́ков,// и сла́ву люде́й Твои́х Изра́иля.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Тропа́рь, глас 1:

Собо́ра Пе́рваго показа́лся еси́ побо́рник и чудотво́рец, богоно́се Спиридо́не, о́тче на́ш. Те́мже ме́ртву ты́ во гро́бе возгласи́в, и змию́ в зла́то претвори́л еси́, и внегда́ пе́ти тебе́ святы́я моли́твы, Ангелы, сослужа́щия тебе́, име́л еси́, свяще́ннейший. Сла́ва Да́вшему тебе́ кре́пость, сла́ва Венча́вшему тя́, сла́ва Де́йствующему тобо́ю все́м исцеле́ния. (Дважды)

Песнь Пресвятей Богородице:

Богоро́дице Де́во, ра́дуйся, / Благода́тная Мари́е, Госпо́дь с Тобо́ю; / благослове́на Ты в жена́х / и благослове́н Плод чре́ва Твоего́, / я́ко Спа́са родила́ еси́ душ на́ших. (Единожды)

Бу́ди И́мя Госпо́дне благослове́но от ны́не и до ве́ка. (Три́жды)

Псало́м 33:

Благословлю́ Го́спода на вся́кое вре́мя,/ вы́ну хвала́ Его́ во усте́х мои́х./ О Го́споде похва́лится душа́ моя́,/ да услы́шат кро́тцыи, и возвеселя́тся./ Возвели́чите Го́спода со мно́ю,/ и вознесе́м И́мя Его́ вку́пе./ Взыска́х Го́спода, и услы́ша мя,/ и от все́х скорбе́й мои́х изба́ви мя./ Приступи́те к Нему́, и просвети́теся,/ и ли́ца ва́ша не постыдя́тся./ Сей ни́щий воззва́, и Госпо́дь услы́ша и́,/ и от все́х скорбе́й его́ спасе́ и́./ Ополчи́тся а́нгел Госпо́день о́крест боя́щихся Его́,/ и изба́вит их./ Вкуси́те и ви́дите, я́ко благ Госпо́дь:/ блаже́н муж, и́же упова́ет Нань./ Бо́йтеся Го́спода, вси́ святи́и Его́,/ я́ко несть лише́ния боя́щимся Его́./ Бога́тии обнища́ша и взалка́ша:/ взыска́ющии же Го́спода// не лиша́тся вся́каго бла́га.

У́ТРЕНЯ.

Шестопса́лмие:

Сла́ва в вы́шних Бо́гу, и на земли́ мир, в челове́цех благоволе́ние. (Три́жды)

Го́споди, устне́ мои́ отве́рзеши, и уста́ моя́ возвестя́т хвалу́ Твою́. (Два́жды)

Псалом 3:

Го́споди, что ся умно́жиша стужа́ющии ми́? Мно́зи востаю́т на мя, мно́зи глаго́лют души́ мое́й: несть спасе́ния eму́ в Бо́зе eго́. Ты же, Го́споди, Засту́пник мой еси́, сла́ва моя́ и вознося́й главу́ мою́. Гла́сом мои́м ко Го́споду воззва́х, и услы́ша мя от горы́ святы́я Своея́. Аз усну́х, и спах, воста́х, я́ко Госпо́дь засту́пит мя. Не убою́ся от тем люде́й, о́крест напа́дающих на мя. Воскресни́, Го́споди, спаси́ мя, Бо́же мой, я́ко Ты порази́л еси́ вся вражду́ющыя ми всу́е: зу́бы гре́шников сокруши́л еси́. Госпо́дне есть спасе́ние, и на лю́дех Твои́х благослове́ние Твое́.

Аз усну́х, и спах, воста́х, я́ко Госпо́дь засту́пит мя.

Псалом 37:

Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́. Я́ко стре́лы Твоя́ унзо́ша во мне, и утверди́л еси́ на мне ру́ку Твою́. Несть исцеле́ния в пло́ти мое́й от лица́ гне́ва Твоего́, несть ми́ра в косте́х мои́х от лица́ грех мои́х. Я́ко беззако́ния моя́ превзыдо́ша главу́ мою́, я́ко бре́мя тя́жкое отяготе́ша на мне. Возсмерде́ша и согни́ша ра́ны моя́ от лица́ безу́мия моего́. Пострада́х и сляко́хся до конца́, весь день се́туя хожда́х. Я́ко ля́двия моя́ напо́лнишася поруга́ний, и несть исцеле́ния в пло́ти мое́й. Озло́блен бых и смири́хся до зела́, рыка́х от воздыха́ния се́рдца моего́. Го́споди, пред Тобо́ю все жела́ние мое́ и воздыха́ние мое́ от Тебе́ не утаи́ся. Се́рдце мое́ смяте́ся, оста́ви мя си́ла моя́, и свет о́чию мое́ю, и той несть со мно́ю. Дру́зи мои́ и и́скреннии мои́ пря́мо мне прибли́жишася и ста́ша, и бли́жнии мои́ отдале́че мене́ ста́ша и нужда́хуся и́щущии ду́шу мою́, и и́щущии зла́я мне глаго́лаху су́етная и льсти́вным весь день поуча́хуся. Аз же я́ко глух не слы́шах и я́ко нем не отверза́яй уст свои́х. И бых я́ко челове́к не слы́шай и не имы́й во усте́х свои́х обличе́ния. Я́ко на Тя, Го́споди, упова́х, Ты услы́шиши, Го́споди Бо́же мой. Я́ко рех: да не когда́ пора́дуют ми ся врази́ мои́: и внегда́ подвижа́тися нога́м мои́м, на мя велере́чеваша. Я́ко аз на ра́ны гото́в, и боле́знь моя́ предо мно́ю есть вы́ну. Я́ко беззако́ние мое́ аз возвещу́ и попеку́ся о гресе́ мое́м. Врази́ же мои́ живу́т и укрепи́шася па́че мене́, и умно́жишася ненави́дящии мя без пра́вды. Воздаю́щии ми зла́я возблага́я оболга́ху мя, зане́ гоня́х благосты́ню. Не оста́ви мене́, Го́споди Бо́же мой, не отступи́ от Мене́. Вонми́ в по́мощь мою́, Го́споди спасе́ния моего́.

Не оста́ви мене́, Го́споди Бо́же мой, не отступи́ от Мене́. Вонми́ в по́мощь мою́, Го́споди спасе́ния моего́.

Псалом 62:

Бо́же, Бо́же мой, к Тебе́ у́тренюю, возжада́ Тебе́ душа́ моя́, коль мно́жицею Тебе́ плоть моя́, в земли́ пу́сте и непрохо́дне, и безво́дне. Та́ко во святе́м яви́хся Тебе́, ви́дети си́лу Твою́ и сла́ву Твою́. Я́ко лу́чши ми́лость Твоя́ па́че живо́т, устне́ мои́ похвали́те Тя. Та́ко благословлю́ Тя в животе́ мое́м, о и́мени Твое́м воздежу́ ру́це мои́. Я́ко от ту́ка и ма́сти да испо́лнится душа́ моя́, и устна́ма ра́дости восхва́лят Тя уста́ моя́. А́ще помина́х Тя на посте́ли мое́й, на у́тренних поуча́хся в Тя. Я́ко был еси́ Помо́щник мой, и в кро́ве крилу́ Твое́ю возра́дуюся. Прильпе́ душа́ моя́ по Тебе́, мене́ же прия́т десни́ца Твоя́. Ти́и же всу́е иска́ша ду́шу мою́, вни́дут в преиспо́дняя земли́, предадя́тся в ру́ки ору́жия, ча́сти ли́совом бу́дут. Царь же возвесели́тся о Бо́зе, похва́лится всяк клены́йся Им, я́ко загради́шася уста́ глаго́лющих непра́ведная.

На у́тренних поуча́хся в Тя. Я́ко был еси́ Помо́щник мой, и в кро́ве крилу́ Твое́ю возра́дуюся. Прильпе́ душа́ моя́ по Тебе́, мене́ же прия́т десни́ца Твоя́.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Го́споди поми́луй. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Псалом 87:

Го́споди Бо́же спасе́ния моего́, во дни воззва́х, и в нощи́ пред Тобо́ю. Да вни́дет пред Тя моли́тва моя́: приклони́ у́хо Твое́ к моле́нию моему́, я́ко испо́лнися зол душа́ моя́, и живо́т мой аду прибли́жися. Привмене́н бых с низходя́щими в ров, бых я́ко челове́к без по́мощи, в ме́ртвых свобо́дь, я́ко я́звеннии спя́щии во гро́бе, и́хже не помяну́л еси́ ктому́, и ти́и от руки́ Твоея́ отринове́ни бы́ша. Положи́ша мя в ро́ве преиспо́днем, в те́мных и се́ни сме́ртней. На мне утверди́ся я́рость Твоя́, и вся во́лны Твоя́ наве́л еси́ на мя. Уда́лил еси́ зна́емых мои́х от Мене́, положи́ша мя ме́рзость себе́: пре́дан бых и не исхожда́х. О́чи мои́ изнемого́сте от нищеты́, воззва́х к Тебе́, Го́споди, весь день, возде́х к Тебе́ ру́це мои́. Еда́ ме́ртвыми твори́ши чудеса́? Или́ вра́чеве воскреся́т, и испове́дятся Тебе́? Еда́ пове́сть кто во гро́бе ми́лость Твою́, и и́стину Твою́ в поги́бели? Еда́ позна́на бу́дут во тьме чудеса́ Твоя́, и пра́вда Твоя́ в земли́ забве́нней? И аз к Тебе́, Го́споди, воззва́х и у́тро моли́тва моя́ предвари́т Тя. Вску́ю, Го́споди, отре́еши ду́шу мою́, отвраща́еши лице́ Твое́ от Мене́? Нищ есмь аз, и в труде́х от ю́ности моея́; возне́с же ся, смири́хся, и изнемого́х. На мне преидо́ша гне́ви Твои́, устраше́ния Твоя́ возмути́ша мя, обыдо́ша мя я́ко вода́, весь день одержа́ша мя вку́пе. Уда́лил еси́ от Мене́ дру́га и и́скренняго, и зна́емых мои́х от страсте́й.

Го́споди Бо́же спасе́ния моего́, во дни воззва́х, и в нощи́ пред Тобо́ю. Да вни́дет пред Тя моли́тва моя́: приклони́ у́хо Твое́ к моле́нию моему́.

Псалом 102:

Благослови́, душе́ моя́, Го́спода, и вся вну́тренняя моя́ и́мя свя́тое Его́. Благослови́, душе́ моя́, Го́спода, и не забыва́й всех воздая́ний Его́, очища́ющаго вся беззако́ния твоя́, исцеля́ющаго вся неду́ги твоя́, избавля́ющаго от истле́ния живо́т твой, венча́ющаго тя ми́лостию и щедро́тами, исполня́ющаго во благи́х жела́ние твое́: обнови́тся я́ко о́рля ю́ность твоя́. Творя́й ми́лостыни Госпо́дь, и судьбу́ всем оби́димым. Сказа́ пути́ Своя́ Моисе́ови, сыново́м Изра́илевым хоте́ния Своя́: Щедр и Ми́лостив Госпо́дь, Долготерпели́в и Многоми́лостив. Не до конца́ прогне́вается, ниже́ во век вражду́ет, не по беззако́нием на́шым сотвори́л есть нам, ниже́ по грехо́м на́шым возда́л есть нам. Я́ко по высоте́ небе́сней от земли́, утверди́л есть Госпо́дь ми́лость Свою́ на боя́щихся Его́. Ели́ко отстоя́т восто́цы от за́пад, уда́лил есть от нас беззако́ния на́ша. Я́коже ще́дрит оте́ц сы́ны, уще́дри Госпо́дь боя́щихся Его́. Я́ко Той позна́ созда́ние на́ше, помяну́, я́ко персть есмы́. Челове́к, я́ко трава́ дни́е eго́, я́ко цвет се́льный, та́ко оцвете́т, я́ко дух про́йде в нем, и не бу́дет, и не позна́ет ктому́ ме́ста своего́. Ми́лость же Госпо́дня от ве́ка и до ве́ка на боя́щихся Его́, и пра́вда Его́ на сыне́х сыно́в, храня́щих заве́т Его́, и по́мнящих за́поведи Его́ твори́ти я́. Госпо́дь на Небеси́ угото́ва Престо́л Свой, и Ца́рство Его́ все́ми облада́ет. Благослови́те Го́спода вси А́нгели Его́, си́льнии кре́постию, творя́щии сло́во Его́, услы́шати глас слове́с Его́. Благослови́те Го́спода вся Си́лы Его́, слуги́ Его́, творя́щии во́лю Его́. Благослови́те Го́спода вся дела́ Его́, на вся́ком ме́сте влады́чества Его́, благослови́, душе́ моя́, Го́спода.

На вся́ком ме́сте влады́чества Его́, благослови́, душе́ моя́, Го́спода.

Псалом 142:

Го́споди, услы́ши моли́тву мою́, внуши́ моле́ние мое́ во и́стине Твое́й, услы́ши мя в пра́вде Твое́й и не вни́ди в суд с рабо́м Твои́м, я́ко не оправди́тся пред Тобо́ю всяк живы́й. Я́ко погна́ враг ду́шу мою́, смири́л есть в зе́млю живо́т мой, посади́л мя есть в те́мных, я́ко ме́ртвыя ве́ка. И уны́ во мне дух мой, во мне смяте́ся се́рдце мое́. Помяну́х дни дре́вния, поучи́хся во всех де́лех Твои́х, в творе́ниих руку́ Твое́ю поуча́хся. Возде́х к Тебе́ ру́це мои́, душа́ моя́, я́ко земля́ безво́дная Тебе́. Ско́ро услы́ши мя, Го́споди, исчезе́ дух мой, не отврати́ лица́ Твоего́ от Мене́, и уподо́блюся низходя́щым в ров. Слы́шану сотвори́ мне зау́тра ми́лость Твою́, я́ко на Тя упова́х. Скажи́ мне, Го́споди, путь во́ньже пойду́, я́ко к Тебе́ взях ду́шу мою́. Изми́ мя от враг мои́х, Го́споди, к Тебе́ прибего́х. Научи́ мя твори́ти во́лю Твою́, я́ко Ты еси́ Бог мой. Дух Твой Благи́й наста́вит мя на зе́млю пра́ву. И́мене Твоего́ ра́ди, Го́споди, живи́ши мя, пра́вдою Твое́ю изведе́ши от печа́ли ду́шу мою́. И ми́лостию Твое́ю потреби́ши враги́ моя́ и погуби́ши вся стужа́ющыя души́ мое́й, я́ко аз раб Твой есмь.

Услы́ши мя, Го́споди, в пра́вде Твое́й и не вни́ди в суд с рабо́м Твои́м.

Услы́ши мя, Го́споди, в пра́вде Твое́й и не вни́ди в суд с рабо́м Твои́м.

Дух Твой Благи́й наста́вит мя на зе́млю пра́ву.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Тропа́рь глас 1:

Собо́ра Пе́рваго показа́лся еси́ побо́рник и чудотво́рец, богоно́се Спиридо́не, о́тче на́ш. Те́мже ме́ртву ты́ во гро́бе возгласи́в, и змию́ в зла́то претвори́л еси́, и внегда́ пе́ти тебе́ святы́я моли́твы, Ангелы, сослужа́щия тебе́, име́л еси́, свяще́ннейший. Сла́ва Да́вшему тебе́ кре́пость, сла́ва Венча́вшему тя́, сла́ва Де́йствующему тобо́ю все́м исцеле́ния. (Дважды)

Сла́ва Отцу́ и Сы́ну и Свято́му Ду́ху. И ны́не и при́сно и во ве́ки веко́в. Ами́нь.

Глас 1: Гаврии́лу веща́вшу Тебе́, Де́во, ра́дуйся, со гла́сом воплоща́шеся все́х Влады́ка в Тебе́, святе́м киво́те, я́коже рече́ пра́ведный Дави́д, яви́лася еси́ ши́ршая небе́с, поноси́вши Зижди́теля Твоего́: сла́ва Все́льшемуся в Тя́; сла́ва Проше́дшему из Тебе́; сла́ва Свободи́вшему на́с Рождество́м Твои́м.

Здесь читается кафизма, положенная по дню, или сразу седальны:

Го́споди, поми́луй. (Три́жды)

Седален, глас 1:

Гряди́те, вси́ ве́рнии, вои́стину, уви́дим чу́до преди́вно: тле́нна бо нетле́нна пребыва́ют и чудотворе́нием украша́ема. Те́мже мы́, о́тче Спиридо́не, взыва́ем и я́сно восклица́ем пе́снь тебе́ благогла́сную, те́плый на́ш засту́пниче.

Сла́ва Отцу́ и Сы́ну и Свято́му Ду́ху. И ны́не и при́сно и во ве́ки веко́в. Ами́нь.

Глас 1: Мари́е, честно́е Влады́ки прия́телище, воскреси́ ны па́дшия в про́пасть лю́таго отча́яния, и прегреше́ний и скорбе́й, Ты́ бо еси́ гре́шным спасе́ние и по́мощь, и кре́пкое предста́тельство, и спаса́еши ду́ши на́ша.

Седален, глас 8:

Священнонача́льством и́стинным житие́ уясни́л еси́, Госпо́дне благоче́стно сло́во все́ял еси́ челове́ком, святи́телю, Ду́ха заре́ю излива́я уче́ний ту́чи земли́, прему́дре, насади́в обы́чаи бла́ги и ми́ра всего́ концы́ просвети́л еси́, те́мже, во хра́ме твое́м дне́сь лику́юще, архиере́ев пра́вило, моли́ Христа́ Бо́га прегреше́ний оставле́ние дарова́ти, пра́зднующим любо́вию святу́ю па́мять твою́.

Сла́ва Отцу́ и Сы́ну и Свято́му Ду́ху. И ны́не и при́сно и во ве́ки веко́в. Ами́нь.

Глас 8: Прему́дрость и Сло́во в чре́ве Твое́м неопа́льно заче́нши, Ма́ти Бо́жия, ми́ру родила́ еси́ ми́р Содержа́щаго и во объя́тиях име́ла еси́ вся́ Содержа́щаго, Пищеда́теля все́х и Творца́ тва́ри. Те́мже молю́ Тя, Всесвята́я Де́во, и ве́рою сла́влю Тя́, изба́витися мне́ от прегреше́ний, и в де́нь суда́, егда́ предста́ну пред лице́м Созда́теля моего́, Влады́чице Чи́стая, Твою́ по́мощь тогда́ пода́ждь ми́: мо́жеши, ели́ка хо́щеши, Всепе́тая.

Полиеле́й:

Хвали́те И́мя Госпо́дне, хвали́те, раби́ Го́спода.

Аллилу́иа, аллилу́иа, аллилу́иа.

Благослове́н Госпо́дь от Сио́на, живы́й во Иерусали́ме.

Аллилу́иа, аллилу́иа, аллилу́иа.

Испове́дайтеся Го́сподеви, я́ко Благ, я́ко в век ми́лость Его́.

Аллилу́иа, аллилу́иа, аллилу́иа.

Испове́дайтеся Бо́гу Небе́сному, я́ко в век ми́лость Его́.

Аллилу́иа, аллилу́иа, аллилу́иа.

Велича́ние:

Велича́ем тя́, святи́телю о́тче Спиридоне, и чти́м святу́ю па́мять твою́, ты́ бо мо́лиши за на́с Христа́ Бо́га на́шего.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа,// сла́ва Тебе́, Бо́же. (Трижды)

Велича́ем тя́, святи́телю о́тче Спиридоне, и чти́м святу́ю па́мять твою́, ты́ бо мо́лиши за на́с Христа́ Бо́га на́шего.

Седа́льны:

Глас 3:

Зми́ю претвори́л еси́ в зла́то, свя́те, в словесе́х же пре́ния, твои́ми препро́стыми словесы́, прего́рдаго и лука́ваго победи́л еси́ Ария, богому́дре, царя́ же содержи́ма огне́м исцели́л еси́, де́моны прогоня́я; те́мже тя́ уми́льно воспева́ем, иера́рхов боже́ственное утвержде́ние.

Глас 3: Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Яко де́ву и еди́ну в жена́х Тя́ без се́мене ро́ждшую Бо́га пло́тию, вси́ ублажа́ем ро́ди челове́честии: Огнь бо всели́ся в Тя́ Божества́, и я́ко младе́нца дои́ши Зижди́теля и Го́спода. Те́м Ангельский и челове́ческий ро́д, досто́йно сла́вим пресвято́е Рождество́ Твое́, и согла́сно вопие́м Ти́: моли́ Христа́ Бо́га, прегреше́ний оставле́ние дарова́ти, покланя́ющимся ве́рою пресвято́му Рождеству́ Твоему́.

Степе́нна, глас 4:

От ю́ности моея́/ мно́зи бо́рют мя стра́сти,/ но Сам мя заступи́// и спаси́, Спа́се мой.

Ненави́дящии Сио́на,/ посрами́теся от Го́спода,/ я́ко трава́ бо огне́м// бу́дете изсо́хше.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Святы́м Ду́хом/ вся́ка душа́ живи́тся,/ и чистото́ю возвыша́ется,// светле́ется Тро́йческим еди́нством, священнота́йне.

Го́споди, поми́луй. (Три́жды)

От Иоа́нна Свята́го Ева́нгелия чте́ние

Сла́ва, Тебе́, Го́споди, сла́ва Тебе́.

Рече́ Госпо́дь ко прише́дшым к Нему́ иуде́ем: ами́нь, ами́нь глаго́лю вам, не входя́й две́рьми во двор о́вчий, но прела́зя и́нуде, той тать есть и разбо́йник. А входя́й две́рьми па́стырь есть овца́м. Сему́ две́рник отверза́ет, и о́вцы глас его́ слы́шат, и своя́ о́вцы глаша́ет по и́мени, и изго́нит их. И егда́ своя́ о́вцы иждене́т, пред ни́ми хо́дит, и о́вцы по нем и́дут, я́ко ве́дят глас его́. По чужде́м же не и́дут, но бежа́т от него́, я́ко не зна́ют чужда́го гла́са. Сию́ при́тчу рече́ им Иису́с, они́ же не разуме́ша, что бя́ше, я́же глаго́лаше им. Рече́ же па́ки им Иису́с: ами́нь, ами́нь глаго́лю вам, я́ко Аз есмь дверь овца́м. Вси, ели́ко их прии́де пре́жде Мене́, та́тие суть и разбо́йницы, но не послу́шаша их о́вцы. Аз есмь дверь, Мно́ю а́ще кто вни́дет, спасе́тся, и вни́дет и изы́дет, и па́жить обря́щет.

Сла́ва, Тебе́, Го́споди, сла́ва Тебе́.

Псало́м 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя. Я́ко беззако́ние мое́ аз зна́ю и грех мой предо мно́ю есть вы́ну. Тебе́ Еди́ному согреши́х, и лука́вое пред Тобо́ю сотвори́х, я́ко да оправди́шися во словесе́х Твои́х и победи́ши, внегда́ суди́ти Ти. Се бо в беззако́ниих зача́т есмь, и во гресе́х роди́ мя ма́ти моя́. Се бо и́стину возлюби́л еси́, безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся, омы́еши мя, и па́че сне́га убелю́ся. Слу́ху моему́ да́си ра́дость и весе́лие, возра́дуются ко́сти смире́нныя. Отврати́ лице́ Твое́ от грех мои́х, и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́, и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́, и Ду́хом Влады́чним утверди́ мя. Научу́ беззако́нныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́, возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо, всесожже́ния не благоволи́ши. Же́ртва Бо́гу дух сокруше́н, се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския, тогда́ благоволи́ши же́ртву пра́вды, возноше́ние и всесожега́емая: тогда́ возложа́т на олта́рь Твой тельцы́.

Глас 6:

Сла́ва Отцу́ и Сы́ну и Свято́му Ду́ху./ Моли́твами святителя Спиридона, / Ми́лостиве, очи́сти / мно́жества согреше́ний на́ших.

И ны́не и при́сно и во ве́ки веко́в. Ами́нь./ Моли́твами Богоро́дицы, / Ми́лостиве, очи́сти / мно́жества согреше́ний на́ших.

Поми́луй мя, Бо́же,/ по вели́цей ми́лости Твое́й,/ и по мно́жеству щедро́т Твои́х// очи́сти беззако́ние мое́.

Стихи́ра, глас 6

Преподо́бне, треблаже́нне, святе́йший о́тче, па́стырю до́брый, по́лнь благода́ти бы́в Боже́ственныя, возгреме́л еси́ уче́ния и вселе́нныя концы́ озари́в чудесы́, Ария победи́л еси́, те́мже мо́лимся, Спа́су моли́ся, спасти́ ду́ши на́ша.

Го́споди, поми́луй. (12 раз)

Кано́н преподобнаго. Гла́с 2.

Пе́снь 1.

Ирмо́с: Во глубине́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный гре́х потреби́ло е́сть, препросла́вленный Госпо́дь, сла́вно бо просла́вися.

Припев: Святителю и чудотворче Спиридоне, моли Бога о нас.

Кро́тких зе́млю дости́г, о́тче, я́ко кро́ток, и ми́лостив, и чи́ст бы́в, настоя́щую се́рдца моего́ укроти́ бу́рю, я́ко да, в тишине́ боже́ственней бы́в, песносло́влю тя́.

Де́лании боже́ственными ду́шу, о́тче, очи́стив, богови́ден, Спиридо́не, бы́л еси́ и Боже́ственнаго Ду́ха пресве́тлым обогати́лся еси́ осия́нием; те́м озаря́еши чи́сто блажа́щия тя́.

От па́ствы, я́коже Дави́д, тя́ восприе́м, Соде́тель слове́сныя тя́ поста́ви па́ствы па́стыря всеизя́щнейша, простото́ю и кро́тостию сия́юща и беззло́бием, преподо́бне па́стырю, украша́ема.

Богоро́дичен: Пресвята́я Де́во Чи́стая, просвети́ и освяти́ помышле́ния и ду́шу мою́, молю́ся, о́блаки разоря́ющи неве́жества моего́ и тму́ отъе́млющи грехо́вную, я́ко да по до́лгу ублажа́ю Тя́.

Пе́снь 3.

Ирмо́с: На ка́мени мя́ ве́ры утверди́в, разшири́л еси́ уста́ моя́ на враги́ моя́, возвесели́бося ду́х мо́й, внегда́ пе́ти: не́сть свя́т, я́коже Бо́г на́ш, и не́сть пра́веден, па́че Тебе́, Го́споди.

Ум тво́й безстра́стием просвети́в и боже́ственным смире́нием украси́вся, дарова́ния Ду́ха прия́л еси́ отгони́ти ду́хи и реши́ти неду́ги ве́рно чту́щих тя́, свяще́ннейше.

Зми́я началозло́бнаго уби́в, нра́в сребролю́бный попра́в, ми́луя тре́бующаго, святи́телю, зми́я преложи́л еси́ в злату́ю у́тварь свяще́нными твои́ми моли́твами, о́тче преподо́бне.

Возше́л еси́ на го́ру безстра́стия, вше́л еси́ во хра́м боговиде́ния, в скрижа́ли же се́рдца твоего́ прия́л еси́ зако́н спаси́тельный, я́ко свяще́ннейший и уго́дник при́сный Влады́ки Твоего́.

Богоро́дичен: Уврачи́ стру́пы души́ моея́, у́м мо́й, омраче́нный нераде́нием, Богоневе́сто, озари́, да пою́: не́сть непоро́чны, па́че Тебе́, Непоро́чная, и не́сть чи́сты, па́че Тебе́, Влады́чице.

Седа́лен, гла́с 8. Подо́бен: Прему́дрости.

От па́ствы ове́ц предста́тельствовати Христо́ве Це́ркви вручи́вся, па́стырь богопроизведе́н ты́, Спиридо́не, возсия́л еси́, злосла́вия во́лки отгна́л еси́ словесы́ твои́ми, на благоче́стия па́жити сию́ воспита́в. Те́мже посреде́ богоно́сных отце́в ве́ру утверди́л еси́ му́дростию Ду́ха, иера́рше блаже́нне, моли́ Христа́ Бо́га, прегреше́ний оставле́ние дарова́ти пра́зднующим любо́вию святу́ю па́мять твою́.

Сла́ва, и ны́не, богоро́дичен.

Яко Всенепоро́чная Неве́сто Творцу́, я́ко Неискусому́жная Ма́ти Изба́вителя, прия́телище я́ко су́щи Уте́шителя, Всепе́тая, беззако́ния мя́ су́ща скве́рное оби́телище и де́монов игра́лище в ра́зуме бы́вша, потщи́ся от те́х злоде́йства мя́ изба́вити и све́тлое жили́ще доброде́телей соверши́, светоно́сная, нетле́нная. Отжени́ о́блак страсте́й и Вы́шняго прича́стия сподо́би и све́та невече́рняго, моли́твами Твои́ми.

КрестоБогоро́дичен:

Агнца, и Па́стыря, и Изба́вителя Агница зря́щи на Кресте́, восклица́ше, пла́чущи, и, го́рько рыда́ющи, вопия́ше: ми́р у́бо ра́дуется, прие́мляй Тобо́ю избавле́ние, утро́ба же Моя́ гори́т, зря́щи Твое́ распя́тие, е́же терпи́ши за милосе́рдие ми́лости. Долготерпели́ве Го́споди, ми́лости бе́здно и исто́чниче неисчерпа́емый, умилосе́рдися и да́руй согреше́ний оставле́ние ве́рою пою́щим Боже́ственныя стра́сти Твоя́.

Пе́снь 4.

Ирмо́с: Прише́л еси́ от Де́вы не хода́тай, ни Ангел, но Са́м Го́споди вопло́щся, и спа́сл еси́ всего́ мя челове́ка; те́м зову́ ти́: сла́ва си́ле Твое́й, Го́споди.

Угльми Честна́го разже́гся Ду́ха, страсте́й удобопопаля́емую ве́щь, всеблаже́нне, поже́гл еси́, ми́р же огнесия́ньми доброде́телей твои́х, Спиридо́не, просвети́л еси́.

Умертви́в твоя́ плотска́я движе́ния, богодохнове́нне, ме́ртвыя возста́вил еси́ животво́рным твои́м приглаго́ланием. Те́мже молю́ тя: умерщвле́нную ду́шу мою́, о́тче, оживи́.

Повину́ющися, ме́ртвая тебе́ гла́с, о́тче, даде́ и ре́чная стремле́ния твои́ми удержа́шася повеле́нии: яви́лся еси́ бо, блаже́нне, чудоде́латель, Боже́ственную благода́ть прие́мь.

Богоро́дичен: Проро́цы Твоего́ та́инства глубину́ провозвести́ша недомы́сленную: еди́на бо родила́ еси́, Чи́стая, Недоразумева́емаго, воплоще́нна за милосе́рдие неисповеди́мое.

Пе́снь 5

Ирмо́с: Просвеще́ние во тме́ лежа́щих, спасе́ние отча́янных, Христе́ Спа́се мо́й, к Тебе́ у́тренюю, Царю́ ми́ра, просвети́ мя сия́нием Твои́м, ино́го бо ра́зве Тебе́ Бо́га не зна́ю.

Река́ су́щих в тебе́ дарова́ний вся́кое напоя́ет, преподо́бне, се́рдце, все́м да́рует бога́тно здра́вие, вся́ Бо́га к сла́ве возставля́ет, тебе́ просла́вльшаго и чудоде́йствы вся́кими почествова́вшаго.

Тя́ ца́рь земны́й, блаже́нне, Царя́ Небе́снаго я́ве позна́ и́скренняго раба́ и дарова́ний Боже́ственных испо́лненнаго, внегда́ приити́ тебе́ к нему́ вели́каго врача́ к Бо́гу возвеща́я.

Авраа́мову страннолю́бному нра́ву ты́ уподо́бився, все́м до́ма твоего́ вхо́ды отве́рзл еси́, и все́м вся́к бы́л еси́, и промышля́я су́щими во обстоя́нии, Спиридо́не блаже́нне.

Богоро́дичен: Но́ва на́м породила́ еси́ Младе́нца, пре́жде веко́в, Отрокови́це, рожде́нна от Отца́ Безнача́льна. Его́же умоли́, я́ко Сы́на и Бо́га Твоего́, уще́дрити Богоро́дицу Тя́, Пречи́стая, душе́ю чи́стою возвеща́ющия.

Пе́снь 6.

Ирмо́с: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же мя́ возведи́.

Зла́то, я́ко ка́л, тебе́ вмени́ся, па́че зла́та безстра́стием сия́ющу и обогати́вшуся, преподо́бне, дарова́нии всезлаты́ми Ду́ха.

Чи́сто служа́ Влады́це Твоему́, мно́жество име́л еси́, преподо́бне, послу́шающее Тебе́ Ангельских си́л, неви́димыми гла́сы, свяще́ннейше.

Пресла́вное, всему́дре, житие́ твое́ ми́ру тя́ пресла́вна, о́тче, соде́ла. Те́мже боже́ственную па́мять твою́, ра́дующеся, соверша́ем, пою́щии Тя́.

Богоро́дичен: Небе́с ши́рши чре́во Твое́ бы́сть, Неискусому́жная, Бо́га вмести́вшее, нигде́же вмести́маго, Всесвята́я Де́во Богоневе́сто.

Конда́к, гла́с 2. Подо́бен: Вы́шних ища́.

Любо́вию Христо́вою уязви́вся свяще́ннейший, у́м впери́в заре́ю Ду́ха, де́тельным виде́нием твои́м дея́ние обре́л еси́, богоприя́тне, же́ртвенник Боже́ственный бы́в, прося́ все́м Боже́ственнаго сия́ния.

Икос:

Из чре́ва освяще́ннаго иера́рха Госпо́дня, восхва́лим ны́не Спиридо́на, благода́ти скрижа́ли прие́мшаго Боже́ственныя сла́вы, и в чудесе́х пресла́внаго все́й тва́ри, и я́ко те́пла и самови́дца Боже́ственнаго осия́ния, я́ко ни́щих предста́теля и согреша́ющих душево́дца: то́й бо Боже́ственна престо́лу Христо́ву же́ртва бы́сть, прося́ все́м Боже́ственнаго сия́ния.

Пе́снь 7.

Ирмо́с: Богопроти́вное веле́ние беззако́ннующаго мучи́теля высо́к пла́мень вознесло́ е́сть: Христо́с же простре́ Богочести́вым отроко́м ро́су духо́вную, Сы́й Благослове́н и Препросла́влен.

Моисе́ево незло́бие, Дави́дову кро́тость, Иова Авси́тидскаго непоро́чное стяжа́в, Ду́ха бы́л еси́ жили́ще, поя́, свяще́ннейше: Сы́й благослове́н и препросла́влен.

Ороше́ния на главу́ твою́ во вре́мя жа́твы небеса́ иска́паша, бу́дущее прозна́меноваша: Бо́г бо, я́коже рече́, боже́ственную па́мять твою́, преподо́бне, просла́ви, ве́рныя освяща́я хода́тайством твои́м.

В собо́ре отце́в тя́ Бо́г прославля́ет, на суде́ словеса́ твоя́ сохра́ньша, блаже́нне, я́же ве́рою прине́сл еси́, безслове́снейшаго Ария обуя́ющая я́ве и упраздня́ющая сего́ противле́ние.

Богоро́дичен: Гро́зд возрасти́ла еси́ неизрече́нным сло́вом, я́ко лоза́, Де́во, Еди́наго невозде́ланнаго, вино́ источа́юща, вся́ веселя́щее, вся́ освяща́юща земны́я и вся́ко пия́нство лю́тых отъе́млюща.

Пе́снь 8.

Ирмо́с: Пе́щь иногда́ о́гненная в Вавило́не де́йства разделя́ше, Бо́жиим веле́нием халде́и опаля́ющая, ве́рныя же ороша́ющая, пою́щия: благослови́те вся́ дела́ Госпо́дня Го́спода.

Пе́щь страсте́й боже́ственными одожде́ньми Боже́ственнаго Ду́ха погаси́л еси́ и ро́су источи́л еси́ неду́гов, о́тче, зно́й отъе́млющую ве́рно к тебе́ приходя́щих всегда́, блаже́нне Спиридо́не пребога́те.

Беззло́бив, пра́в, кро́ток же, и ми́лостив, и незлопа́мятлив бы́л еси́, любо́вен, страннолю́бец, иера́рх свяще́ннейший, му́дростию укра́шен, преподо́бне, Правосла́вия. Те́мже тя́ ве́рою почита́ем.

Дре́вле тебе́ гла́с, я́ко жива́, уме́ршая вопро́шшу ти́, о́тче, даде́. О, чудесе́ изря́дна! О, пресла́внаго та́инства! О, благода́ти, ю́же получи́л еси́, житие́м украша́емь Ангельским, досточу́дне!

Богоро́дичен: Стра́сти моего́ се́рдца исцели́ ми́лостию Твое́ю, Всепе́тая, у́м мо́й умири́, и ду́шу мою́ просвети́, и ходи́ти мя́ возблагопу́тстви на стези́ спаси́тельныя, я́ко да при́сно пою́ Тя, Всепе́тая.

На 9-й песни поем песнь Пресвятыя Богородицы:

Вели́чит душа́ Моя́ Го́спода и возра́довася дух Мой о Бо́зе Спа́се Мое́м.

К коемуждо стиху припеваем: Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Я́ко призре́ на смире́ние рабы́ Своея́, се бо, от ны́не ублажа́т Мя вси ро́ди.

Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Я́ко сотвори́ Мне вели́чие Си́льный, и свя́то и́мя Его́, и ми́лость Его́ в ро́ды родо́в боя́щимся Его́.

Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Сотвори́ держа́ву мы́шцею Свое́ю, расточи́ го́рдыя мы́слию се́рдца их.

Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Низложи́ си́льныя со престо́л, и вознесе́ смире́нныя, а́лчущия испо́лни благ, и богатя́щияся отпусти́ тщи.

Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Восприя́т Изра́иля о́трока Своего́, помяну́ти ми́лости, я́коже глаго́ла ко отце́м на́шим, Авраа́му и се́мени его́ да́же до ве́ка.

Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Песнь 9

Ирмо́с: Безнача́льна Роди́теля Сы́н, Бо́г и Госпо́дь, вопло́щься от Де́вы, на́м яви́ся, омраче́нная просвети́ти, собра́ти расточе́нная, те́м Всепе́тую Богоро́дицу, велича́ем.

Безнача́льна Роди́теля Сы́на я́сно пропове́дал еси́, Единосу́щна Отцу́ и Соприсносу́щна, посреде́ богоно́сных отце́в возвели́чився, и беззако́ннующих загради́л еси́ уста́, святи́телю всеблаже́нне.

Многосве́тлое со́лнце, отце́в украше́ние, иере́ев сла́ва, Ангелов совсе́льниче, твою́ светоно́сную па́мять ра́достно ны́не соверша́ющия, све́та сподо́би невече́рняго моли́твами твои́ми.

Боже́ственная селе́ния, гра́д небе́сный, пра́зднующих кра́сный ли́к освяще́нную ду́шу твою́ и доброде́тельми укра́шенную, всеблаже́нне, прия́т во гла́се ра́дования.

Богоро́дичен: Ве́лие та́инство па́че ума́ Рождества́ Твоего́ удивля́ет Ангелы, Богора́дованная, наслажда́ет преподо́бных собо́р, свяще́нныя же весели́т отцы́, боже́ственно пою́щия тя́, наде́жду ду́ш на́ших.

Свети́лен.

Спиридо́на преди́внаго и иера́рха пресла́внаго ны́не вси́ да восхва́лим, я́ко похвалы́ досто́йнаго: источа́ет бо чудеса́ и исцеля́ет вся́, ве́рою приходя́щия к нему́. В Сино́де бо безу́мнаго Ария посрами́л е́сть.

Сла́ва, и ны́не, Богоро́дичен:

Проро́цы пропове́даша, апо́столи научи́ша, му́ченицы испове́даша, и мы́ ве́ровахом Богоро́дицу Тя́ вои́стину су́щую, те́м и велича́ем Рождество́ Твое́ неизрече́нное.

Хвали́тны псалмы́, глас 1:

Вся́кое дыха́ние да хва́лит Го́спода./ Хвали́те Го́спода с небе́с,/ хвали́те Его́ в вы́шних.// Тебе́ подоба́ет песнь Бо́гу.

Хвали́те Его́ вси а́нгели Его́,/ хвали́те Его́ вся си́лы Его́.// Тебе́ подоба́ет песнь Бо́гу.

Сти́хиры, глас 1:

Стих: Сотвори́ти в них суд напи́сан/ сла́ва сия́ бу́дет всем преподо́бным Его́.

Церко́вныя цве́ты облета́я, / я́коже птене́ц Вы́шняго / и гнездо́ Ангельское, / Спиридо́не богоно́се, / зове́ши при́сно к Бо́гу / о все́х на́с.

Стих: Хвали́те Его́ на си́лах Его́,/ хвали́те Его́ по мно́жеству вели́чествия Его́.

Церко́вныя цве́ты облета́я, / я́коже птене́ц Вы́шняго / и гнездо́ Ангельское, / Спиридо́не богоно́се, / зове́ши при́сно к Бо́гу / о все́х на́с.

Стих: Хвали́те Его́ в тимпа́не и ли́це,/ хвали́те Его́ во стру́нах и орга́не.

Свяще́нныя оде́жды красоту́ / де́ятельными соде́лал еси́ / доброде́тельми светле́йшую, / о́тче богому́дре, / те́мже на́м священноде́йствуеши ди́вная, / сла́вных чуде́с священноде́лателю, / лю́тых избавля́я ны́.

Стих: Хвали́те Его́ в кимва́лех доброгла́сных, хвали́те Его́ в кимва́лех восклица́ния. / Вся́кое дыха́ние да хва́лит Го́спода.

Неви́димых добро́ты проходя́, / стра́шную о́ную / разуме́л еси́ сла́ву святы́х, свя́те, / те́мже на́м небе́сная словеса́ / присноживо́тных о́ных виде́ний явля́еши, / свяще́ннейший.

Глас 5: Сла́ва Отцу́ и Сы́ну и Свято́му Ду́ху

Востру́бим трубо́ю пе́сней, взыгра́ем пра́зднственная и ликовству́ем, ра́дующеся, в моле́бное торжество́ богоно́снаго отца́. Цари́ и кня́зи да стеку́тся, и ско́раго врача́ уми́льно да восхва́лят со стра́хом. Да воспою́т па́стыри и учи́тели до́браго па́стыря подобноревни́тельна. Соше́дшеся, восхва́лим, и́же в неду́зех — врача́, в беда́х — изба́вителя, гре́шным — засту́пника, ни́щим — сокро́вище, и и́же в ско́рбех — уте́шителя, спу́тника — путеше́ствующим, на мо́ри су́щии — прави́теля и вся́ везде́ те́пле предваря́юща. Вели́каго святи́теля восхваля́юще, си́це рце́м: пресвяты́й Спиридо́не, предвари́, и изба́ви ны́ от настоя́щия беды́, и спаси́ ста́до твое́ моли́твами твои́ми.

Глас 5: И ны́не и при́сно и во ве́ки веко́в. Ами́нь.

Востру́бим трубо́ю пе́сней, прекло́ншися бо свы́ше, Всецари́ца Ма́ти Де́ва благослове́ньми венчава́ет воспева́ющия Ю. Цари́ и кня́зи да воспле́щут в пе́снех Царя́ Ро́ждшую, сме́ртию одержи́мыя пе́рвее разреши́ти человеколю́бно Благоизво́лившаго. Па́стырие и учи́телие, До́браго Па́стыря Пречи́стую Ма́терь, соше́дшеся, да восхва́лим, я́ко све́щник златоза́рный, светоно́сный о́блак, небе́с Простра́ннейшую, одушевле́нный киво́т, огнезра́чный Влады́чень престо́л, манноприе́мную злату́ю ста́мну, заключе́нную Сло́ва две́рь, все́х христиа́н прибе́жище, пе́сньми благоглаго́ливыми похваля́юще, рце́м: пала́то Сло́ва, сподо́би на́с смире́нных небе́снаго Ца́рствия, ничто́же бо невозмо́жно хода́тайству Твоему́.

Славосло́вие вели́кое:

Сла́ва в вы́шних Бо́гу, и на земли́ мир, в челове́цех благоволе́ние. Хва́лим Тя, благослови́м Тя, кла́няем Ти ся, славосло́вим Тя, благодари́м Тя, вели́кия ра́ди сла́вы Твоея́. Го́споди Царю́ Небе́сный, Бо́же О́тче Вседержи́телю, Го́споди, Сы́не Единоро́дный, Иису́се Христе́, и Святы́й Ду́ше. Го́споди Бо́же, А́гнче Бо́жий, Сы́не Оте́чь, взе́мляй грех ми́ра, поми́луй нас; взе́мляй грехи́ ми́ра, приими́ моли́тву на́шу; седя́й одесну́ю Отца́, поми́луй нас. Я́ко Ты еси́ еди́н Свят, Ты еси́ еди́н Госпо́дь, Иису́с Христо́с, в сла́ву Бо́га Отца́. Ами́нь.

На всяк день благословлю́ Тя, и восхвалю́ И́мя Твое́ во ве́ки, и в век ве́ка.

Сподо́би, Го́споди, в день сей без греха́ сохрани́тися нам. Благослове́н еси́, Го́споди, Бо́же оте́ц на́ших, и хва́льно и просла́влено И́мя Твое́ во ве́ки. Ами́нь.

Бу́ди, Го́споди, ми́лость Твоя́ на нас, я́коже упова́хом на Тя.

Благослове́н еси́, Го́споди, научи́ мя оправда́нием Твои́м. (Три́жды)

Го́споди, прибе́жище был еси́ нам в род и род. Аз рех: Го́споди, поми́луй мя, исцели́ ду́шу мою́, я́ко согреши́х Тебе́. Го́споди, к Тебе́ прибего́х, научи́ мя твори́ти во́лю Твою́, я́ко Ты еси́ Бог мой: я́ко у Тебе́ исто́чник живота́, во све́те Твое́м у́зрим свет. Проба́ви ми́лость Твою́ ве́дущим Тя.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Три́жды)

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Святы́й Безсме́ртный, поми́луй нас.

Святы́й Бо́же, Святы́й Кре́пкий, Святы́й Безсме́ртный, поми́луй нас.

Тропа́рь, глас 1:

Собо́ра Пе́рваго показа́лся еси́ побо́рник и чудотво́рец, богоно́се Спиридо́не, о́тче на́ш. Те́мже ме́ртву ты́ во гро́бе возгласи́в, и змию́ в зла́то претвори́л еси́, и внегда́ пе́ти тебе́ святы́я моли́твы, Ангелы, сослужа́щия тебе́, име́л еси́, свяще́ннейший. Сла́ва Да́вшему тебе́ кре́пость, сла́ва Венча́вшему тя́, сла́ва Де́йствующему тобо́ю все́м исцеле́ния.

Утверди́, Бо́же, святу́ю правосла́вную ве́ру, правосла́вных христиа́н во век ве́ка.

Честне́йшую Херуви́м и Сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу, Тя велича́ем.

Сла́ва, и ны́не. Го́споди, поми́луй. (Три́жды) Благослови́.

Господи Иисусе Христе, Сыне Божий, моли́твами Пречи́стыя Своея́ Ма́тере, святителя Спиридона, епископа Тримифунтского, преподобных и богоносных отец наших и всех святы́х, поми́луй и спаси нас я́ко Благ и Челове́колюбец.

Многоле́тие:

Вели́каго Господи́на и Отца́ на́шего Кири́лла,/ Святе́йшаго Патри́арха Моско́вского и всея́ Руси́,/ и Господи́на на́шего (Высоко-) Преосвяще́ннейшаго (имярек),/ (архи-)епи́скопа (митрополита (титул)),/ богохрани́мую страну́ на́шу Росси́йскую,/  и вся правосла́вныя христи́аны,// Го́споди, сохрани́ их на мно́гая ле́та.