Шрифт

▲

Богослужебные тексты для домашнего употребления

Дни памяти святых

Последование Всеношного бдения в день памяти святителя Амвросия, епископа Медиоланского. Для домашнего (келейного) совершения

Оглавление

ВСЕНО́ЩНОЕ БДЕ́НИЕ

ВЕЛИ́КАЯ ВЕЧЕ́РНЯ

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас. Ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Трижды.)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, (трижды). Сла́ва, и ны́не:

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Таже, Го́споди, поми́луй, (12), Сла́ва, и ны́не:

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 103:

Поется часть псалма:

Благослови́, душе́ моя́, Го́спода. / Благослове́н еси́, Го́споди. / Го́споди, Бо́же мой, возвели́чился еси́ зело́. / Благослове́н еси́, Го́споди. / Во испове́дание и в велеле́поту обле́клся еси́. / Благослове́н еси́, Го́споди. / Посреде́ гор про́йдут во́ды. / Ди́вна дела́ Твоя́, Го́споди. / Вся прему́дростию сотвори́л еси́. / Сла́ва Ти, Го́споди, сотвори́вшему вся.

Или читается псалом полностью:

Благослови́, душе́ моя́, Го́спода. Го́споди, Бо́же мой, возвели́чился еси́ зело́. Во испове́дание и в велеле́поту обле́клся еси́. Одея́йся све́том, я́ко ри́зою, простира́яй не́бо, я́ко ко́жу. Покрыва́яй вода́ми превы́спренняя Своя́, полага́яй о́блаки на восхожде́ние Свое́, ходя́й на крилу́ ве́треню. Творя́й А́нгелы Своя́ ду́хи и слуги́ Своя́ пла́мень о́гненный. Основа́яй зе́млю на тве́рди ея́, не преклони́тся в век ве́ка. Бе́здна, я́ко ри́за, одея́ние ея́, на гора́х ста́нут во́ды, от запреще́ния Твоего́ побе́гнут, от гла́са гро́ма Твоего́ убоя́тся. Восхо́дят го́ры и нисхо́дят поля́ в ме́сто, е́же основа́л еси́ им. Преде́л положи́л еси́, eго́же не пре́йдут, ниже́ обратя́тся покры́ти зе́млю. Посыла́яй исто́чники в де́брех, посреде́ гор про́йдут во́ды. Напая́ют вся зве́ри се́льныя, ждут она́гри в жа́жду свою́. На ты́х пти́цы небе́сныя привита́ют, от среды́ ка́мения дадя́т глас. Напая́яй го́ры от превы́спренних Свои́х, от плода́ дел Твои́х насы́тится земля́. Прозяба́яй траву́ ското́м, и злак на слу́жбу челове́ком, извести́ хлеб от земли́. И вино́ весели́т се́рдце челове́ка, ума́стити лице́ еле́ем, и хлеб се́рдце челове́ка укрепи́т. Насы́тятся древа́ польска́я, ке́дри Лива́нстии, и́хже еси́ насади́л. Та́мо пти́цы вогнездя́тся, ероди́ево жили́ще предводи́тельствует и́ми. Го́ры высо́кия еле́нем, ка́мень прибе́жище за́яцем. Сотвори́л есть луну́ во времена́, со́лнце позна́ за́пад свой. Положи́л еси́ тму, и бысть нощь, в не́йже про́йдут вси зве́рие дубра́внии. Ски́мни рыка́ющии, восхи́тити и взыска́ти от Бо́га пи́щу себе́. Возсия́ со́лнце и собра́шася и в ло́жах свои́х ля́гут. Изы́дет челове́к на де́ло свое́ и на де́лание свое́ до ве́чера. Я́ко возвели́чишася дела́ Твоя́, Го́споди, вся прему́дростию сотвори́л еси́, испо́лнися земля́ тва́ри Твоея́. Сие́ мо́ре вели́кое и простра́нное, та́мо га́ди, и́мже несть числа́, живо́тная ма́лая с вели́кими, та́мо корабли́ препла́вают, змий сей, eго́же созда́л еси руга́тися eму́. Вся к Тебе́ ча́ют, да́ти пи́щу им во бла́го вре́мя. Да́вшу Тебе́ им соберу́т, отве́рзшу Тебе́ ру́ку вся́ческая испо́лнятся бла́гости, отвра́щшу же Тебе́ лице́, возмяту́тся, отъи́меши дух их, и исче́знут, и в персть свою́ возвратя́тся. По́слеши Ду́ха Твоего́, и сози́ждутся, и обнови́ши лице́ земли́. Бу́ди сла́ва Госпо́дня во ве́ки, возвесели́тся Госпо́дь о де́лех Свои́х, призира́яй на зе́млю, и творя́й ю́ трясти́ся, прикаса́яйся гора́м, и дымя́тся. Воспою́ Го́сподеви в животе́ мое́м, пою́ Бо́гу моему́, до́ндеже есмь, да услади́тся Ему́ бесе́да моя́, аз же возвеселю́ся о Го́споде. Да исче́знут гре́шницы от земли́, и беззако́нницы, я́коже не бы́ти им. Благослови́, душе́ моя́, Го́спода.

Со́лнце позна́ за́пад свой. Положи́л еси́ тму, и бысть нощь. Я́ко возвели́чишася дела́ Твоя́, Го́споди, вся прему́дростию сотвори́л еси́.

Сла́ва, и ны́не: Аллилу́иа, аллилу́иа, аллилу́иа, сла́ва Тебе́ Бо́же. Трижды.

Блаже́н муж:

Блаже́н муж, и́же не и́де на сове́т нечести́вых.

Аллилу́иа, аллилу́иа, аллилу́иа.

Я́ко весть Госпо́дь путь пра́ведных, и путь нечести́вых поги́бнет.

Аллилу́иа, аллилу́иа, аллилу́иа.

Рабо́тайте Го́сподеви со стра́хом и ра́дуйтеся Ему́ с тре́петом.

Аллилу́иа, аллилу́иа, аллилу́иа.

Блаже́ни вси наде́ющиися Нань.

Аллилу́иа, аллилу́иа, аллилу́иа.

Воскресни́, Го́споди, спаси́ мя, Бо́же мой.

Аллилу́иа, аллилу́иа, аллилу́иа.

Госпо́дне есть спасе́ние, и на лю́дех Твои́х благослове́ние Твое́.

Аллилу́иа, аллилу́иа, аллилу́иа.

Сла́ва Отцу́ и Сы́ну и Свято́му Духу.

Аллилу́иа, аллилу́иа, аллилу́иа.

И ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Го́споди, воззва́х, глас 2:

Го́споди, воззва́х к Тебе́, услы́ши мя./ Услы́ши мя, Го́споди./ Го́споди, воззва́х к Тебе́, услы́ши мя:/ вонми́ гла́су моле́ния моего́,/ внегда́ воззва́ти ми к Тебе́.// Услы́ши мя, Го́споди.

Да испра́вится моли́тва моя́,/ я́ко кади́ло пред Тобо́ю,/ воздея́ние руку́ мое́ю/ – же́ртва вече́рняя.// Услы́ши мя, Го́споди.

Стихи́ры пра́здника, глас 2:

Стих: А́ще беззако́ния на́зриши, Го́споди, Го́споди, кто постои́т? Я́ко у Тебе́ очище́ние есть.

Прииди́те, лю́ди Бо́жии, / ста́нем до́бре, ста́нем со стра́хом / в дому́ Бо́га на́шего, / хва́ляще святи́теля Амвро́сия, / медиола́нов сладкоглаго́ливаго наста́вника, / иера́рхов украше́ние, / Правосла́вия побо́рника: / се́ бо с го́рних высо́т / призира́ет на пе́ние на́ше, / и фимиа́м моли́тв свои́х о на́с / возно́сит ко Го́споду.

Стих: И́мене ра́ди Твоего́ потерпе́х Тя, Го́споди, потерпе́ душа́ моя́ в сло́во Твое́, упова́ душа́ моя́ на Го́спода.

Медиола́на не оставля́я, / Ри́м посеща́я, / и к на́м прихо́диши ду́хом, / святи́телю Амвро́сие, / ве́рно чту́чим па́мять твою́, / и от души́ зову́щим: / не забу́ди на́с, о́тче, / любо́вию хва́лящих тя́.

Стих: От стра́жи у́тренния до но́щи, от стра́жи у́тренния да упова́ет Изра́иль на Го́спода.

Пра́ведно прия́л еси́, святи́телю Христо́в, / и́мя сла́дости тезоимени́тое: / яви́ бо сие́ Бо́г ро́ем пче́л, / я́же, иногда́ спя́щу ти́, / влета́ху во уста́ твоя́, / ме́д на язы́це полага́юще, / и полета́ху, не врежда́юще тя́. / Что́ показу́ет сие́ та́инство, / си́м Госпо́дь прозна́менова, / я́ко со́тове медо́внии бу́дут словеса́ твоя́, / сла́дость же и́х — ду́ш исцеле́ние.

Глас 6: Стих: Я́ко у Го́спода ми́лость, и мно́гое у Него́ избавле́ние, и Той изба́вит Изра́иля от всех беззако́ний eго́.

Отче святы́й Амвро́сие, / ты́ не да́л еси́ очи́ма твои́ма сна́, / ниже́ ве́ждома твои́ма дрема́ния, / име́я па́мять сме́рти незабы́тную, / тече́ние сле́з неоску́дное, / воздыха́ния ко оте́честву го́рнему при́сныя, / бде́ние и труды́ неуста́нныя. / Сего́ ра́ди пе́сньми велича́ем / ди́вное житие́ твое́.

Стих: Хвали́те Го́спода вси язы́цы, похвали́те Его́ вси лю́дие.

Вели́ка ве́мы тя́ в ну́ждах помо́щника, / святи́телю ми́лостиве, / ни́щих пита́теля, / си́рых отца́-покрови́теля, / оби́димым засту́пника, / все́м скорбя́щим уте́шителя. / Те́мже и блажи́м хвале́бно / ве́лие твое́ милосе́рдие.

Стих: Я́ко утверди́ся ми́лость Его́ на нас, и и́стина Госпо́дня пребыва́ет во век.

Ка́ко не воспе́ти, о́тче, / и ре́вности твоея́ по Бо́зе? / Ду́хом бо Илии́ поревнова́в, / ты́ возбрани́л еси́ Феодо́сию вни́ти в це́рковь, / во е́же приобщи́тися святы́я Евхари́стии, / со дерзнове́нием реки́й ему́: / не подоба́ет ти́, о царю́, соде́явшу уби́йство, / с ве́рными приобщи́тися.

Глас 5: Сла́ва Отцу́ и Сы́ну и Свято́му Ду́ху.

Что́ тя нарече́м, о святы́й Амвро́сие? Па́стыря слове́сных ове́ц, я́ко бде́л еси́ о душа́х и́х; наста́вника ве́рным вели́каго, я́ко учи́л еси́ и́х сло́вом и житие́м твои́м; де́лателя вертогра́да Христо́ва, я́ко отреби́л еси́ его́ от пле́вел Ариевых; Нафа́на втора́го, я́ко обличи́в гре́х Феодо́сия, учи́л еси́ того́ покая́нию. К сему́ же и на́с возста́ви, во гресе́х пребыва́ющих.

Глас 7: И ны́не и при́сно и во ве́ки веко́в. Ами́нь.

Пре́жде ве́к Сы́й в не́дрех Отчих, в после́док дни́й чре́ва деви́ческаго не возгнуша́выйся, Иису́се, гряди́ роди́тися пло́тию в Вифлее́ме: се́ бо тва́рь па́дшая стене́т под и́гом рабо́ты вра́жия, ча́я Тебе́, Уте́хи Изра́илевы. Се́ уже́ гото́ва вся́ ко сре́тению Твоему́: от земли́ — верте́п, с небесе́ — звезда́, от Ангел с па́стырьми — славосло́вие, от волхво́в — зла́то, лива́н и сми́рна, от на́с же — пе́снь Дави́дска и гла́с отроко́в: О, Го́споди, спаси́ же! О, Го́споди, поспеши́ же! Благослове́н Гряды́й во и́мя Госпо́дне! Оса́нна Ца́рь Изра́илев!

Све́те Тихи́й:

Све́те Ти́хий святы́я сла́вы Безсме́ртнаго Отца́ Небе́снаго, Свята́го, Блаже́ннаго, Иису́се Христе́! Прише́дше на за́пад со́лнца, ви́девше свет вече́рний, пое́м Отца́, Сы́на и Свята́го Ду́ха, Бо́га. Досто́ин еси́ во вся времена́ пет бы́ти гла́сы преподо́бными, Сы́не Бо́жий, живо́т дая́й; те́мже мир Тя сла́вит.

1. При́тчей чте́ние

Слу́шаяй обличе́ний живота́, посреде́ прему́дрых водвори́тся. Иже отмета́ет наказа́ние, ненави́дит себе́; соблюда́яй же обличе́ния, лю́бит свою́ ду́шу. Страх Госпо́день — наказа́ние и прему́дрость, и нача́ло сла́вы отвеща́ет е́й, предъи́дет же смире́нным сла́ва. Вся́ дела́ смире́ннаго явле́нна пред Бо́гом, нечи́ст пред Бо́гом вся́к высокосе́рдый. Нача́ло пути́ бла́га, е́же твори́ти пра́ведная, прия́тна же пред Бо́гом па́че, не́жели жре́ти же́ртвы. Ища́й Го́спода обря́щет ра́зум со пра́вдою, пра́ве же и́щущии Его́ обря́щут ми́р. Ме́рзость царе́ви, творя́й зла́я, со пра́вдою бо уготовля́ется престо́л нача́льства. Прия́тны царю́ устне́ пра́ведны, словеса́ же пра́вая лю́бит Госпо́дь. Ярость царе́ва — ве́стник сме́рти, му́ж же прему́др утоли́т его́. Угнежде́ния прему́дрости избра́ннее зла́та, вселе́ния же ра́зума дража́йши сребра́. Путие́ жи́зни укланя́ются от злы́х, долгота́ же жития́ — путие́ пра́ведни. Прие́мляй наказа́ние, во благи́х бу́дет, храня́й же обличе́ния, умудри́тся. Иже храни́т своя́ пути́, соблюда́ет свою́ ду́шу. Разу́мный в ве́щех, обрета́тель благи́х; наде́яйся же на Го́спода блаже́н. Прему́дрыя и разу́мныя злы́ми нари́чут, сла́дции же в словеси́ мно́жае услы́шани бу́дут. Исто́чник живо́тен — ра́зум стяжа́вшим, наказа́ние же безу́мных — зло́. Се́рдце прему́драго уразуме́ет, я́же от свои́х ему́ у́ст, во устна́х же но́сит ра́зум. Со́тове медо́внии — словеса́ до́брая, сла́дость же и́х — исцеле́ние души́.

2. Ца́рств вторы́х чте́ние

Посла́ Госпо́дь Нафа́на проро́ка к Дави́ду. И вни́де к нему́ и рече́ ему́: сия́ глаго́лет Госпо́дь, Бо́г Изра́илев: Аз е́смь пома́завый тя́ в царя́ над Изра́илем, и Аз е́смь изба́вивый тя́ от руки́ Сау́ловы; и да́х ти́ до́м господи́на твоего́ и да́х ти́ до́м Изра́илев и Иу́дин; и а́ще ма́ло ти́ е́сть, приложу́ тебе́ к си́м. И что́, я́ко презре́л еси́ сло́во Госпо́дне, е́же сотвори́ти лука́вое пред очи́ма Его́? Ури́ю Хетте́анина уби́л еси́ мече́м и жену́ его́ поя́л еси́ себе́ в жену́, и того́ уби́л еси́ мече́м сыно́в Аммо́них. И ны́не не отсту́пит ме́чь от до́му твоего́ до ве́ка, зане́ уничижи́л Мя́ еси́. И рече́ Дави́д к Нафа́ну: согреши́х ко Го́споду. И рече́ Нафа́н к Дави́ду: и Госпо́дь отъя́ согреше́ние твое́, не у́мреши. И оты́де Нафа́н в до́м сво́й. И сокруши́ Госпо́дь де́тище, е́же роди́ жена́ Ури́ина Дави́ду, и разболе́ся. И взыска́ Дави́д Бо́га о де́тищи, и пости́ся Дави́д посто́м, и вни́де и водвори́ся, и лежа́ше на земли́. И внидо́ша к нему́ старе́йшины до́му его́ воздви́гнути его́ от земли́, и не восхоте́, и не яде́ с ни́ми хле́ба.

3. Прему́дрости Соломо́новы чте́ние

Пра́ведник, а́ще пости́гнет сконча́тися, в поко́и бу́дет. Ста́рость бо честна́ не многоле́тна, ниже́ в числе́ ле́т исчита́ется. Седи́на же е́сть му́дрость челове́ком, и во́зраст ста́рости — житие́ нескве́рное. Благоуго́ден Бо́гови бы́в, возлю́блен бы́сть, и живы́й посреде́ гре́шник, преста́влен бы́сть. Восхище́н бы́сть, да не зло́ба измени́т ра́зума его́ или́ ле́сть прельсти́т ду́шу его́. Раче́ние бо зло́бы помрача́ет до́брая и паре́ние по́хоти, пременя́ет у́м незло́бив. Сконча́вся вма́ле, испо́лни ле́та до́лга, уго́дна бо бе́ Го́сподеви душа́ его́, сего́ ра́ди потща́ся от среды́ лука́вствия. Лю́дие же ви́девше и не разуме́вше, ниже́ поло́жше в помышле́нии таково́е, я́ко благода́ть и ми́лость в преподо́бных Его́ и посеще́ние во избра́нных Его́.

Сподо́би, Го́споди:

Сподо́би, Го́споди, в ве́чер сей без греха́ сохрани́тися нам. Благослове́н еси́, Го́споди, Бо́же оте́ц на́ших, и хва́льно и просла́влено и́мя Твое́ во ве́ки. Ами́нь.

Бу́ди, Го́споди, ми́лость Твоя́ на нас, я́коже упова́хом на Тя. Благослове́н еси́, Го́споди, научи́ мя оправда́нием Твои́м. Благослове́н еси́, Влады́ко, вразуми́ мя оправда́нием Твои́м. Благослове́н еси́, Святы́й, просвети́ мя оправда́нии Твои́ми.

Го́споди, ми́лость Твоя́ во век, дел руку́ Твое́ю не пре́зри. Тебе́ подоба́ет хвала́, Тебе́ подоба́ет пе́ние, Тебе́ сла́ва подоба́ет. Отцу́ и Сы́ну и Свято́му Ду́ху, ны́не и при́сно и во ве́ки веко́в. Ами́нь.

На лити́и стихи́ры, гла́с 5.

Прииди́те, о ча́да Це́ркве Христо́вой, очище́нными умы́ и чу́вствы, наслади́мся утеше́ния духо́внаго: дне́сь бо Влады́ка Христо́с учреди́ на́м пи́р духо́вный — па́мять святи́теля Амвро́сия, веселя́щую ду́ши на́ша.

Пра́зднующе па́мять святи́теля Амвро́сия и восхваля́юще житие́ его́, о возлю́бленнии бра́тие, поревну́ем ве́ре и доброде́телем его́: сие́ бо е́сть прия́тно пред Спаси́телем на́шим Бо́гом, и уго́дно Спаси́телю па́че все́х хвале́ний на́ших.

Ки́ими доброде́тельми не украси́л еси́ ду́шу твою́, святи́телю? Ревну́я, поревнова́л еси́ все́м святы́м: Ма́тери Бо́жией во смире́нии, Ангелам в песнопе́нии, святи́телям в прему́дрости, му́чеником в терпе́нии, преподо́бным в моли́тве и поще́нии. Те́мже вся́ име́я до́брая, ели́ка прелюбе́зна Го́сподеви, наста́ви и на́с твори́ти во́лю Его́.

Сла́ва, гла́с 7: Ве́дая, прему́дре, я́ко я́рость царе́ва ве́стник сме́рти е́сть, и я́ко гне́в быва́ет вино́вен вся́кия злы́я ве́щи под небесе́м, утоля́л еси́ я́рость Феодо́сия царя́, и учи́л еси́ того́ не износи́ти ско́ро су́д на пови́нныя. Наста́ви и на́с, о́тче, не износи́ти сло́ва осужде́ния на бли́жняя своя́, подави́ я́рость серде́ц на́ших, и утоли́ гне́в Бо́жий, дви́жимый на на́с, гре́х ра́ди на́ших.

И ны́не, богоро́дичен глас 3: Вифлее́ме, гото́вися на сре́тение Де́вы Мари́и Богома́тере: се́ бо гряде́т к тебе́, Младе́нца нося́щи Христа́, собезнача́льнаго Отцу́ и Ду́ху при́сно. Его́же в верте́пе роди́т, и по рождестве́ Де́ва па́ки яви́тся.

Го́споди, поми́луй. (40 раз)

Стихи́ры на стихо́вне:

Стихиры, гла́с 2:

Бога́тство скороги́бнущее, / сребро́ и зла́то, / сла́ву и по́чести су́етныя, / о́тче Амвро́сие, / вмени́в, я́ко цве́т травны́й, / у́тре цвету́щий и на ве́чер отпа́дающий, / и Христа́ еди́наго возжеле́в, / я́ко сокро́вища дража́йшаго все́х сокро́вищ, / путе́м приско́рбным ше́ствовал еси́, / и соверше́нством духо́вным, / а́ки би́сером светле́йшим, / ду́шу твою́ на земли́ украси́л еси́. / Те́мже ны́не укра́шен еси́, / венце́м нетле́ния на небеси́ / от десни́цы Христа́ Бо́га.

Сти́х: Честна́ пред Го́сподем / сме́рть преподо́бных Его́.

Честна́ и прече́стна вои́стинну сме́рть твоя́, / о́тче, сла́дости тезоимени́те, / и досто́ит ю́ нарещи́ па́че со́н, не́же сме́рть: / услади́ бо го́ресть ея́ сла́дость церко́вная — Сладча́йший Иису́с, / прише́дый ко одру́ твоему́, ра́дуяся / и све́тлое Свое́ лице́ явля́яй. / Помози́ же и мне́, о́тче, / в стра́шный ча́с сме́ртный, / да не я́та бу́дет душа́ моя́ / зубы́ лю́тых де́монов.

Сти́х: Свяще́нницы Твои́ облеку́тся в пра́вду, / и преподо́бнии Твои́ возра́дуются.

Отче святы́й Амвро́сие, / благода́ть святи́тельства от Го́спода прие́м, / не в земли́ тала́нт сво́й сокры́л еси́, / но, единоревни́телен в труда́х апо́столом бы́в, / во сто́ кра́т о́ный умно́жил еси́, / и сего́ ра́ди вше́л еси́ в небе́сный черто́г Царя́ сла́вы, / иде́же святи́и вси́ сия́ют, я́коже свети́ла, / причаща́яся сла́дости р́айския.

Слава, гла́с 1:

Сла́ва Тебе́, Вседе́телю, поста́вивый на све́щнице Медиола́нстем свети́льника вели́каго, Амвро́сия, и́же просия́ доброде́тельми мно́гими, пропове́данием немо́лчным, ре́вностию о сла́ве Христо́вой пла́менною, ве́рою тве́рдою, любо́вию нелицеме́рною, упова́нием кре́пким, моли́твою непреста́нною. Его́же мольба́ми, о Святы́й Го́споди, и на́с укрепи́ твори́ти во́лю Твою́.

И ны́не, Богоро́дичен:

Па́стырие вифлее́мстии, не дади́те очи́ма ва́шима сна́, ниже́ ве́ждома ва́шима дрема́ния. Волсви́ перси́дстии, взе́мше да́ры — зла́то, и лива́н и сми́рну, тецы́те к Вифлее́му, жре́бию Иу́дову. Певцы́ небе́снии, потщи́теся угото́вити ги́мн: сла́ва в вы́шних Бо́гу, и на земли́ ми́р, во челове́цех благоволе́ние! Се́ бо Ца́рь сла́вы — Иису́с Пребоже́ственный, прикло́нь небеса́ и во утро́бу Де́выя все́лься, гряде́т в Не́й, я́ко на престо́ле Божества́ и во о́блаце ле́гце, разруши́ти дела́ диа́воля, и свободи́ти тва́рь Свою́ от рабо́ты истле́ния.

Моли́тва свята́го Симео́на Богоприи́мца:

Ны́не отпуща́еши раба́ Твоего́, Влады́ко,/ по глаго́лу Твоему́, с ми́ром;/ я́ко ви́деста о́чи мои́ спасе́ние Твое́,/ е́же еси́ угото́вал пред лице́м всех люде́й,/ свет во открове́ние язы́ков,// и сла́ву люде́й Твои́х Изра́иля.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Го́споди, поми́луй. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Тропа́рь, глас 4:

Боже́ственнаго вдохнове́ния орга́не, доброде́телей апо́стольских прича́стниче, Ри́ма кра́сное процвете́ние, Амвро́сие, иера́рше блаже́нне, царя́ обличи́л еси́ и вселе́нную в благоче́стии утверди́л еси́. Те́мже моли́ся Христу́, дарова́ти на́м ве́лию ми́лость. (Дважды)

Песнь Пресвятей Богородице:

Богоро́дице Де́во, ра́дуйся, / Благода́тная Мари́е, Госпо́дь с Тобо́ю; / благослове́на Ты в жена́х / и благослове́н Плод чре́ва Твоего́, / я́ко Спа́са родила́ еси́ душ на́ших. (Единожды)

Бу́ди И́мя Госпо́дне благослове́но от ны́не и до ве́ка. (Три́жды)

Псало́м 33:

Благословлю́ Го́спода на вся́кое вре́мя,/ вы́ну хвала́ Его́ во усте́х мои́х./ О Го́споде похва́лится душа́ моя́,/ да услы́шат кро́тцыи, и возвеселя́тся./ Возвели́чите Го́спода со мно́ю,/ и вознесе́м И́мя Его́ вку́пе./ Взыска́х Го́спода, и услы́ша мя,/ и от все́х скорбе́й мои́х изба́ви мя./ Приступи́те к Нему́, и просвети́теся,/ и ли́ца ва́ша не постыдя́тся./ Сей ни́щий воззва́, и Госпо́дь услы́ша и́,/ и от все́х скорбе́й его́ спасе́ и́./ Ополчи́тся а́нгел Госпо́день о́крест боя́щихся Его́,/ и изба́вит их./ Вкуси́те и ви́дите, я́ко благ Госпо́дь:/ блаже́н муж, и́же упова́ет Нань./ Бо́йтеся Го́спода, вси́ святи́и Его́,/ я́ко несть лише́ния боя́щимся Его́./ Бога́тии обнища́ша и взалка́ша:/ взыска́ющии же Го́спода// не лиша́тся вся́каго бла́га.

У́ТРЕНЯ.

Шестопса́лмие:

Сла́ва в вы́шних Бо́гу, и на земли́ мир, в челове́цех благоволе́ние. (Три́жды)

Го́споди, устне́ мои́ отве́рзеши, и уста́ моя́ возвестя́т хвалу́ Твою́. (Два́жды)

Псалом 3:

Го́споди, что ся умно́жиша стужа́ющии ми́? Мно́зи востаю́т на мя, мно́зи глаго́лют души́ мое́й: несть спасе́ния eму́ в Бо́зе eго́. Ты же, Го́споди, Засту́пник мой еси́, сла́ва моя́ и вознося́й главу́ мою́. Гла́сом мои́м ко Го́споду воззва́х, и услы́ша мя от горы́ святы́я Своея́. Аз усну́х, и спах, воста́х, я́ко Госпо́дь засту́пит мя. Не убою́ся от тем люде́й, о́крест напа́дающих на мя. Воскресни́, Го́споди, спаси́ мя, Бо́же мой, я́ко Ты порази́л еси́ вся вражду́ющыя ми всу́е: зу́бы гре́шников сокруши́л еси́. Госпо́дне есть спасе́ние, и на лю́дех Твои́х благослове́ние Твое́.

Аз усну́х, и спах, воста́х, я́ко Госпо́дь засту́пит мя.

Псалом 37:

Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́. Я́ко стре́лы Твоя́ унзо́ша во мне, и утверди́л еси́ на мне ру́ку Твою́. Несть исцеле́ния в пло́ти мое́й от лица́ гне́ва Твоего́, несть ми́ра в косте́х мои́х от лица́ грех мои́х. Я́ко беззако́ния моя́ превзыдо́ша главу́ мою́, я́ко бре́мя тя́жкое отяготе́ша на мне. Возсмерде́ша и согни́ша ра́ны моя́ от лица́ безу́мия моего́. Пострада́х и сляко́хся до конца́, весь день се́туя хожда́х. Я́ко ля́двия моя́ напо́лнишася поруга́ний, и несть исцеле́ния в пло́ти мое́й. Озло́блен бых и смири́хся до зела́, рыка́х от воздыха́ния се́рдца моего́. Го́споди, пред Тобо́ю все жела́ние мое́ и воздыха́ние мое́ от Тебе́ не утаи́ся. Се́рдце мое́ смяте́ся, оста́ви мя си́ла моя́, и свет о́чию мое́ю, и той несть со мно́ю. Дру́зи мои́ и и́скреннии мои́ пря́мо мне прибли́жишася и ста́ша, и бли́жнии мои́ отдале́че мене́ ста́ша и нужда́хуся и́щущии ду́шу мою́, и и́щущии зла́я мне глаго́лаху су́етная и льсти́вным весь день поуча́хуся. Аз же я́ко глух не слы́шах и я́ко нем не отверза́яй уст свои́х. И бых я́ко челове́к не слы́шай и не имы́й во усте́х свои́х обличе́ния. Я́ко на Тя, Го́споди, упова́х, Ты услы́шиши, Го́споди Бо́же мой. Я́ко рех: да не когда́ пора́дуют ми ся врази́ мои́: и внегда́ подвижа́тися нога́м мои́м, на мя велере́чеваша. Я́ко аз на ра́ны гото́в, и боле́знь моя́ предо мно́ю есть вы́ну. Я́ко беззако́ние мое́ аз возвещу́ и попеку́ся о гресе́ мое́м. Врази́ же мои́ живу́т и укрепи́шася па́че мене́, и умно́жишася ненави́дящии мя без пра́вды. Воздаю́щии ми зла́я возблага́я оболга́ху мя, зане́ гоня́х благосты́ню. Не оста́ви мене́, Го́споди Бо́же мой, не отступи́ от Мене́. Вонми́ в по́мощь мою́, Го́споди спасе́ния моего́.

Не оста́ви мене́, Го́споди Бо́же мой, не отступи́ от Мене́. Вонми́ в по́мощь мою́, Го́споди спасе́ния моего́.

Псалом 62:

Бо́же, Бо́же мой, к Тебе́ у́тренюю, возжада́ Тебе́ душа́ моя́, коль мно́жицею Тебе́ плоть моя́, в земли́ пу́сте и непрохо́дне, и безво́дне. Та́ко во святе́м яви́хся Тебе́, ви́дети си́лу Твою́ и сла́ву Твою́. Я́ко лу́чши ми́лость Твоя́ па́че живо́т, устне́ мои́ похвали́те Тя. Та́ко благословлю́ Тя в животе́ мое́м, о и́мени Твое́м воздежу́ ру́це мои́. Я́ко от ту́ка и ма́сти да испо́лнится душа́ моя́, и устна́ма ра́дости восхва́лят Тя уста́ моя́. А́ще помина́х Тя на посте́ли мое́й, на у́тренних поуча́хся в Тя. Я́ко был еси́ Помо́щник мой, и в кро́ве крилу́ Твое́ю возра́дуюся. Прильпе́ душа́ моя́ по Тебе́, мене́ же прия́т десни́ца Твоя́. Ти́и же всу́е иска́ша ду́шу мою́, вни́дут в преиспо́дняя земли́, предадя́тся в ру́ки ору́жия, ча́сти ли́совом бу́дут. Царь же возвесели́тся о Бо́зе, похва́лится всяк клены́йся Им, я́ко загради́шася уста́ глаго́лющих непра́ведная.

На у́тренних поуча́хся в Тя. Я́ко был еси́ Помо́щник мой, и в кро́ве крилу́ Твое́ю возра́дуюся. Прильпе́ душа́ моя́ по Тебе́, мене́ же прия́т десни́ца Твоя́.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Го́споди поми́луй. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Псалом 87:

Го́споди Бо́же спасе́ния моего́, во дни воззва́х, и в нощи́ пред Тобо́ю. Да вни́дет пред Тя моли́тва моя́: приклони́ у́хо Твое́ к моле́нию моему́, я́ко испо́лнися зол душа́ моя́, и живо́т мой аду прибли́жися. Привмене́н бых с низходя́щими в ров, бых я́ко челове́к без по́мощи, в ме́ртвых свобо́дь, я́ко я́звеннии спя́щии во гро́бе, и́хже не помяну́л еси́ ктому́, и ти́и от руки́ Твоея́ отринове́ни бы́ша. Положи́ша мя в ро́ве преиспо́днем, в те́мных и се́ни сме́ртней. На мне утверди́ся я́рость Твоя́, и вся во́лны Твоя́ наве́л еси́ на мя. Уда́лил еси́ зна́емых мои́х от Мене́, положи́ша мя ме́рзость себе́: пре́дан бых и не исхожда́х. О́чи мои́ изнемого́сте от нищеты́, воззва́х к Тебе́, Го́споди, весь день, возде́х к Тебе́ ру́це мои́. Еда́ ме́ртвыми твори́ши чудеса́? Или́ вра́чеве воскреся́т, и испове́дятся Тебе́? Еда́ пове́сть кто во гро́бе ми́лость Твою́, и и́стину Твою́ в поги́бели? Еда́ позна́на бу́дут во тьме чудеса́ Твоя́, и пра́вда Твоя́ в земли́ забве́нней? И аз к Тебе́, Го́споди, воззва́х и у́тро моли́тва моя́ предвари́т Тя. Вску́ю, Го́споди, отре́еши ду́шу мою́, отвраща́еши лице́ Твое́ от Мене́? Нищ есмь аз, и в труде́х от ю́ности моея́; возне́с же ся, смири́хся, и изнемого́х. На мне преидо́ша гне́ви Твои́, устраше́ния Твоя́ возмути́ша мя, обыдо́ша мя я́ко вода́, весь день одержа́ша мя вку́пе. Уда́лил еси́ от Мене́ дру́га и и́скренняго, и зна́емых мои́х от страсте́й.

Го́споди Бо́же спасе́ния моего́, во дни воззва́х, и в нощи́ пред Тобо́ю. Да вни́дет пред Тя моли́тва моя́: приклони́ у́хо Твое́ к моле́нию моему́.

Псалом 102:

Благослови́, душе́ моя́, Го́спода, и вся вну́тренняя моя́ и́мя свя́тое Его́. Благослови́, душе́ моя́, Го́спода, и не забыва́й всех воздая́ний Его́, очища́ющаго вся беззако́ния твоя́, исцеля́ющаго вся неду́ги твоя́, избавля́ющаго от истле́ния живо́т твой, венча́ющаго тя ми́лостию и щедро́тами, исполня́ющаго во благи́х жела́ние твое́: обнови́тся я́ко о́рля ю́ность твоя́. Творя́й ми́лостыни Госпо́дь, и судьбу́ всем оби́димым. Сказа́ пути́ Своя́ Моисе́ови, сыново́м Изра́илевым хоте́ния Своя́: Щедр и Ми́лостив Госпо́дь, Долготерпели́в и Многоми́лостив. Не до конца́ прогне́вается, ниже́ во век вражду́ет, не по беззако́нием на́шым сотвори́л есть нам, ниже́ по грехо́м на́шым возда́л есть нам. Я́ко по высоте́ небе́сней от земли́, утверди́л есть Госпо́дь ми́лость Свою́ на боя́щихся Его́. Ели́ко отстоя́т восто́цы от за́пад, уда́лил есть от нас беззако́ния на́ша. Я́коже ще́дрит оте́ц сы́ны, уще́дри Госпо́дь боя́щихся Его́. Я́ко Той позна́ созда́ние на́ше, помяну́, я́ко персть есмы́. Челове́к, я́ко трава́ дни́е eго́, я́ко цвет се́льный, та́ко оцвете́т, я́ко дух про́йде в нем, и не бу́дет, и не позна́ет ктому́ ме́ста своего́. Ми́лость же Госпо́дня от ве́ка и до ве́ка на боя́щихся Его́, и пра́вда Его́ на сыне́х сыно́в, храня́щих заве́т Его́, и по́мнящих за́поведи Его́ твори́ти я́. Госпо́дь на Небеси́ угото́ва Престо́л Свой, и Ца́рство Его́ все́ми облада́ет. Благослови́те Го́спода вси А́нгели Его́, си́льнии кре́постию, творя́щии сло́во Его́, услы́шати глас слове́с Его́. Благослови́те Го́спода вся Си́лы Его́, слуги́ Его́, творя́щии во́лю Его́. Благослови́те Го́спода вся дела́ Его́, на вся́ком ме́сте влады́чества Его́, благослови́, душе́ моя́, Го́спода.

На вся́ком ме́сте влады́чества Его́, благослови́, душе́ моя́, Го́спода.

Псалом 142:

Го́споди, услы́ши моли́тву мою́, внуши́ моле́ние мое́ во и́стине Твое́й, услы́ши мя в пра́вде Твое́й и не вни́ди в суд с рабо́м Твои́м, я́ко не оправди́тся пред Тобо́ю всяк живы́й. Я́ко погна́ враг ду́шу мою́, смири́л есть в зе́млю живо́т мой, посади́л мя есть в те́мных, я́ко ме́ртвыя ве́ка. И уны́ во мне дух мой, во мне смяте́ся се́рдце мое́. Помяну́х дни дре́вния, поучи́хся во всех де́лех Твои́х, в творе́ниих руку́ Твое́ю поуча́хся. Возде́х к Тебе́ ру́це мои́, душа́ моя́, я́ко земля́ безво́дная Тебе́. Ско́ро услы́ши мя, Го́споди, исчезе́ дух мой, не отврати́ лица́ Твоего́ от Мене́, и уподо́блюся низходя́щым в ров. Слы́шану сотвори́ мне зау́тра ми́лость Твою́, я́ко на Тя упова́х. Скажи́ мне, Го́споди, путь во́ньже пойду́, я́ко к Тебе́ взях ду́шу мою́. Изми́ мя от враг мои́х, Го́споди, к Тебе́ прибего́х. Научи́ мя твори́ти во́лю Твою́, я́ко Ты еси́ Бог мой. Дух Твой Благи́й наста́вит мя на зе́млю пра́ву. И́мене Твоего́ ра́ди, Го́споди, живи́ши мя, пра́вдою Твое́ю изведе́ши от печа́ли ду́шу мою́. И ми́лостию Твое́ю потреби́ши враги́ моя́ и погуби́ши вся стужа́ющыя души́ мое́й, я́ко аз раб Твой есмь.

Услы́ши мя, Го́споди, в пра́вде Твое́й и не вни́ди в суд с рабо́м Твои́м.

Дух Твой Благи́й наста́вит мя на зе́млю пра́ву.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Тропа́рь глас 4:

Сла́ва Отцу́ и Сы́ну и Свято́му Ду́ху.

Тропа́рь глас 4:

Пра́вило ве́ры и о́браз кро́тости, воздержа́ния учи́теля яви́ тя ста́ду твоему́ я́же веще́й и́стина. Сего́ ра́ди стяжа́л еси́ смире́нием высо́кая, нището́ю бога́тая, о́тче священнонача́льниче Амвро́сие, моли́ Христа́ Бо́га, спасти́ся душа́м на́шим.

И ны́не и при́сно и во ве́ки веко́в. Ами́нь.

Глас 4: Еже от ве́ка утае́нное, и Ангелом несве́домое та́инство: Тобо́ю, Богоро́дице, су́щим на земли́ яви́ся, Бо́г в несли́тном соедине́нии воплоща́емь, и кре́ст во́лею на́с ра́ди восприи́м, и́мже воскреси́в первозда́ннаго, спасе́ от сме́рти ду́ши на́ша.

Здесь читается кафизма, положенная по дню, или сразу седальны:

Го́споди, поми́луй. (Три́жды)

Седален, глас 2:

Образ медиола́ном бы́л еси́, уго́дниче Бо́жий Амвро́сие, сло́вом, житие́м, любо́вию, ду́хом, ве́рою, чистото́ю, озаря́я Це́рковь Христо́ву све́том твои́х доброде́телей, и вся́ к Бо́гу направля́я прему́дрыми твои́ми словесы́.

Сла́ва Отцу́ и Сы́ну и Свято́му Ду́ху. И ны́не и при́сно и во ве́ки веко́в. Ами́нь.

Глас 8: Сио́не, торжеству́й, Иерусали́ме, весели́ся, гра́де Христа́ Бо́га, подыми́ Зижди́теля, в верте́пе и я́слех вмеща́емаго, отве́рзите ми́ врата́ и, вше́д в ня́, узрю́ я́ко Младе́нца, пелена́ми, повива́емаго, дла́нию же содержа́щаго тва́рь, Его́же пою́т Ангели непреста́нным гла́сом, Жизнода́вца Го́спода, спаса́ющаго ро́д на́ш.

Седален, глас 4:

Сио́не, торжеству́й, Иерусали́ме, весели́ся, гра́де Христа́ Бо́га, подыми́ Зижди́теля, в верте́пе и я́слех вмеща́емаго, отве́рзите ми́ врата́ и, вше́д в ня́, узрю́ я́ко Младе́нца, пелена́ми, повива́емаго, дла́нию же содержа́щаго тва́рь, Его́же пою́т Ангели непреста́нным гла́сом, Жизнода́вца Го́спода, спаса́ющаго ро́д на́ш.

Сла́ва Отцу́ и Сы́ну и Свято́му Ду́ху. И ны́не и при́сно и во ве́ки веко́в. Ами́нь.

Глас 8: Предпра́зднуим, лю́дие, Христо́во Рождество́, и, возне́сше у́м к Вифлее́му, вознесе́мся мы́слию, и усмо́трим Де́ву душе́вныма очи́ма, иду́щую роди́ти в верте́пе все́х Го́спода и Бо́га на́шего. Его́же Ио́сиф ви́дев чуде́с вели́чество, мня́ше челове́ка зре́ти, я́ко младе́нца, пелена́ми повива́ема, поразумева́ше же от веще́й Бо́га бы́ти и́стиннаго, подаю́щаго душа́м на́шим ве́лию ми́лость.

Полиеле́й:

Хвали́те И́мя Госпо́дне, хвали́те, раби́ Го́спода.

Аллилу́иа, аллилу́иа, аллилу́иа.

Благослове́н Госпо́дь от Сио́на, живы́й во Иерусали́ме.

Аллилу́иа, аллилу́иа, аллилу́иа.

Испове́дайтеся Го́сподеви, я́ко Благ, я́ко в век ми́лость Его́.

Аллилу́иа, аллилу́иа, аллилу́иа.

Испове́дайтеся Бо́гу Небе́сному, я́ко в век ми́лость Его́.

Аллилу́иа, аллилу́иа, аллилу́иа.

Велича́ние:

Велича́ем тя́, святи́телю о́тче Амвро́сие, и чте́м святу́ю па́мять твою́, ты́ бо мо́лиши за на́с Христа́ Бо́га на́шего.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа,// сла́ва Тебе́, Бо́же. (Трижды)

Седа́льны:

Глас 4:

Не За́пад то́чию хва́лит исправле́ния твоя́, чудотво́рче вели́кий, но и мы́, ча́да Правосла́вныя Восто́чныя Це́ркве, велича́ем тя́, и чте́м святу́ю па́мять твою́, ты́ бо дне́сь сопрису́тствуя на́м ду́хом твои́м, и вне́мля пе́нию и моле́нию на́шему, вы́ну мо́лиши за на́с на небеси́ Христа́ Бо́га на́шего.

Глас 3: Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Всю́ Тя́ Бо́г освяти́, Де́ву до́брую и непоро́чную в жена́х, проро́ки прообрази́в че́стно, иере́и благослови́в, во Свята́я святы́х всели́, Ангелом воспита́в, с небесе́ пи́щу хле́б пода́в, Са́м же Преблаги́й, Единоро́дное Бо́г Сло́во, всели́ся в Тя́ и пло́тию про́йде из Тебе́. Те́мже Ти́ покланя́емся и чти́м я́ко вои́стинну и́стинную су́щую Богоро́дицу.

Степе́нна, глас 4:

От ю́ности моея́/ мно́зи бо́рют мя стра́сти,/ но Сам мя заступи́// и спаси́, Спа́се мой.

Ненави́дящии Сио́на,/ посрами́теся от Го́спода,/ я́ко трава́ бо огне́м// бу́дете изсо́хше.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Святы́м Ду́хом/ вся́ка душа́ живи́тся,/ и чистото́ю возвыша́ется,// светле́ется Тро́йческим еди́нством, священнота́йне.

Го́споди, поми́луй. (Три́жды)

От Иоа́нна Свята́го Ева́нгелия чте́ние

Сла́ва, Тебе́, Го́споди, сла́ва Тебе́.

Рече́ Госпо́дь ко прише́дшым к Нему́ иуде́ем: Аз есмь дверь, Мно́ю а́ще кто вни́дет, спасе́тся, и вни́дет, и изы́дет, и па́жить обря́щет. Тать не прихо́дит, ра́зве да укра́дет, и убие́т, и погуби́т, Аз приидо́х, да живо́т и́мут и ли́шше и́мут. Аз есмь па́стырь до́брый, па́стырь до́брый ду́шу свою́ полага́ет за о́вцы. А нае́мник, и́же несть па́стырь, ему́же не суть о́вцы своя́, ви́дит во́лка гряду́ща и оставля́ет о́вцы, и бе́гает, и волк расхи́тит их, и распу́дит о́вцы. А нае́мник бежи́т, я́ко нае́мник есть и неради́т о овца́х. Аз есмь па́стырь до́брый, и зна́ю Моя́, и зна́ют Мя Моя́. Я́коже зна́ет Мя Оте́ц, и Аз зна́ю Отца́, и ду́шу Мою́ полага́ю за о́вцы. И и́ны о́вцы и́мам, я́же не суть от двора́ сего́, и ты́я Ми подоба́ет привести́, и глас Мой услы́шат, и бу́дет еди́но ста́до, и еди́н Па́стырь.

Сла́ва, Тебе́, Го́споди, сла́ва Тебе́.

Псало́м 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя. Я́ко беззако́ние мое́ аз зна́ю и грех мой предо мно́ю есть вы́ну. Тебе́ Еди́ному согреши́х, и лука́вое пред Тобо́ю сотвори́х, я́ко да оправди́шися во словесе́х Твои́х и победи́ши, внегда́ суди́ти Ти. Се бо в беззако́ниих зача́т есмь, и во гресе́х роди́ мя ма́ти моя́. Се бо и́стину возлюби́л еси́, безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся, омы́еши мя, и па́че сне́га убелю́ся. Слу́ху моему́ да́си ра́дость и весе́лие, возра́дуются ко́сти смире́нныя. Отврати́ лице́ Твое́ от грех мои́х, и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́, и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́, и Ду́хом Влады́чним утверди́ мя. Научу́ беззако́нныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́, возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо, всесожже́ния не благоволи́ши. Же́ртва Бо́гу дух сокруше́н, се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския, тогда́ благоволи́ши же́ртву пра́вды, возноше́ние и всесожега́емая: тогда́ возложа́т на олта́рь Твой тельцы́.

Глас 6:

Сла́ва Отцу́ и Сы́ну и Свято́му Ду́ху./ Моли́твами святителя Амвросия, / Ми́лостиве, очи́сти / мно́жества согреше́ний на́ших.

И ны́не и при́сно и во ве́ки веко́в. Ами́нь./ Моли́твами Богоро́дицы, / Ми́лостиве, очи́сти / мно́жества согреше́ний на́ших.

Поми́луй мя, Бо́же,/ по вели́цей ми́лости Твое́й,/ и по мно́жеству щедро́т Твои́х// очи́сти беззако́ние мое́.

Стихи́ра, глас 6

Не прела́зя и́нуде, но две́рьми во дво́р о́вчий воше́л еси́, святи́телю Амвро́сие: Са́м бо Госпо́дь призва́ тя́ на святи́тельство гла́сом младе́нца немощству́ющаго, в Це́ркви воззва́вшаго: Амвро́сий епи́скоп! Те́мже вси́, вне́мше гла́су отроча́те, еди́наго тя́ изволя́ху епи́скопа име́ти. Ты́ же, смиренному́дре, а́ще и бе́гал еси́ святи́тельскаго са́на, оба́че повину́яся во́ли наро́да и царя́, па́че же зва́нию небе́сному, прия́л еси́ епи́скопство, и до́бре упа́сл еси́ Бо́гом да́нных тебе́ ове́ц.

Го́споди, поми́луй. (12 раз)

Кано́н. Глас 4.

Пе́снь 1.

Ирмо́с: Мо́ря чермну́ю пучи́ну невла́жными стопа́ми дре́вний пешеше́ствовав Изра́иль, крестообра́зными Моисе́овыма рука́ма Амали́кову си́лу в пусты́ни победи́л е́сть.

Припев: Святителю отче Амвросие, моли Бога о нас.

Боже́ственными светоли́тии, преподо́бне, облиста́емь, све́тлое, и светоно́сное, и свято́е твое́ успе́ние благоче́стно чту́щия твои́ми моли́твами просвети́.

Сло́во Бо́жие прему́дрости тебе́ сло́во дарова́, укра́шенное зна́нием и́стинным, иера́рше Амвро́сие, ерети́чествующих безслове́сное отража́я зломы́слие.

Ума твоего́ зри́тельное, пребога́те, предочи́стив от страстны́я мглы́, прия́тно чи́стых блиста́ний Всесвята́го Ду́ха соде́лал еси́, всеблаже́нне.

Всему́дрыми и свяще́нными твои́ми догма́ты ариему́дрственную отгна́в па́губу, я́ко па́стырь, на зла́це упа́сл еси́ Правосла́вия, всему́дре, слове́сныя твоя́ ве́рою о́вцы.

Богоро́дичен: Безсе́менно Отчею во́лею от Боже́ственнаго Ду́ха Бо́жия зачала́ еси́ Сы́на и пло́тию родила́ еси́, из Отца́ безма́терня и на́с ра́ди из Тебе́ безо́тча.

Кано́н святи́теля. Гла́с 8.

Пе́снь 1.

Ирмо́с: Во́ду проше́д, я́ко су́шу, и еги́петскаго зла́ избежа́в, изра́ильтянин вопия́ше: Изба́вителю и Бо́гу на́шему пои́м.

Припев: Святителю отче Амвросие, моли Бога о нас.

Аще и вы́ну со Христо́м ца́рствуеши, предстоя́ Боже́ственней Тро́ице на небеси́, уго́дниче Бо́жий Амвро́сие, оба́че и до́лу су́щия с ве́рою же прося́щия по́мощи твоея́, огражда́еши мощны́м покро́вом защище́ния твоего́ от бе́д и зо́л.

Медиола́ном че́стию взыска́нный, и недосто́йна таковы́я, вмени́вый себе́, преподо́бне, наста́ви и мене́ то́жде смиренному́дрствовати о себе́, да прие́млю поноше́ние и уничиже́ние, я́ко сла́ву и возвыше́ние; укори́зны и досажде́ния, я́ко че́сть и благохвале́ние.

Во́лю Бо́жию, зову́щую тя́ на святи́тельство, уразуме́в, любому́дре, повину́лся еси́ о́ней, я́ко ра́б послушли́вый своему́ Влады́це, си́це и мене́ научи́ разуме́ти, что́ е́сть во́ля Бо́жия блага́я, уго́дная и соверше́нная, и при́сно сле́довати тоя́ хоте́нию.

Богоро́дичен: Ро́ждшая Зижди́теля моего́, Влады́чице, бу́ди ми́ обурева́ему от искуше́ний бесо́вских благонаде́жное окормле́ние, приста́нище и спасе́ние.

Пе́снь 3.

Ирмо́с: Не му́дростию, и си́лою, и бога́тством хва́лимся, но Тобо́ю, Отчею ипоста́сною Му́дростию, Христе́: не́сть бо свя́т, па́че Тебе́, Человеколю́бие.

Велича́йшу благода́ть от Бо́га прие́м и си́лу, твои́м чу́вственным прикоснове́нием разли́чныя стра́сти, о́тче Амвро́сие, исцеля́л еси́ приходя́щих к тебе́.

Науче́н, я́ко иера́рх боже́ственный, преподо́бне, вся́кое разуме́ние Писа́ния неве́дущим, о́тче Амвро́сие, неудобопости́жная я́ве уясни́л еси́.

Тебе́, му́дростию духо́вною сия́ющу, несмы́сленно прибли́житися де́рзостно скверне́йшую устре́мльшуюся скоре́йше умертви́л еси́ боже́ственным приглаго́ланием.

Богоро́дичен: Ро́д челове́ческий обнови́ла еси́ еди́на, ро́ждши естества́ на́шего Соде́теля же и Го́спода, те́мже Тя́ сла́вим, Богора́дованная.

Пе́снь 3.

Ирмо́с: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ в любви́ Твое́й, жела́ний кра́ю, ве́рных утвержде́ние, еди́не Человеколю́бче.

Отче святы́й Амвро́сие, и́же Це́рковь Медиола́нскую от крамолы́ наро́дныя неврежде́нну соблюды́й и тишину́ в не́й уста́вивый, соблюда́й и ны́не мольба́ми твои́ми Це́рковь Христо́ву от мяте́жей, ересе́й и раско́лов, и испроси́ ми́р душа́м на́шим.

Спасти́ся хотя́ от избра́ния во епи́скопа, бе́гал еси́ сю́ду и сю́ду, благоче́стне, но нико́е же ме́сто можа́ше укры́ти тя́, его́же благоволи́ Бо́г, я́ко гра́д верху́ горы́, и я́ко свещу́ на све́щнице, на степе́ни святи́тельском поста́вити, да све́тиши все́м, и́же в Це́ркви Хри́стовей су́ть све́тлостию уче́ния жития́ твоего́.

Иису́са, Его́же возлюби́л еси́, Иису́са, Ему́же усе́рдно послужи́л еси́, богому́дре, бы́в Це́ркви Медиола́нстей Ангел ми́ра, утеше́ния и просвеще́ния, моли́ утверди́ти на́с в любви́ святе́й, и спасти́ ду́ши на́ша.

Богоро́дичен: Юже Иа́ков в ле́ствице ви́де, Юже Моисе́й в купине́ усмотре́, к Се́й, во смире́нии се́рдца припаде́м, зову́ще: Ма́ти Изба́вителя, при́зри на на́с, погиба́ющих во гресе́х, со иера́рхом Амвро́сием моля́щи Того́ спасти́ ду́ши на́ша.

Седа́лен, гла́с 8. Подо́бен: Прему́дрости.

Проро́ка Илию́ ревнообразу́я и Иоа́нна та́кожде Крести́теля, му́жески обличи́л еси́ царя́ беззако́нновавша, иера́рше; престо́л боже́ственне украси́л еси́ и чуде́с мно́жеством мі́р обогати́л еси́. Те́мже, и Боже́ственными Писа́нии науче́н, ве́рныя утверди́л еси́ и неве́рныя обрати́л еси́, иера́рше Амвро́сие, моли́ Христа́ Бо́га прегреше́ний оставле́ние дарова́ти пра́зднующим любо́вию святу́ю па́мять твою́.

Сла́ва, и ны́не, Богоро́дичен:

Помышле́ньми поползо́хся лука́выми, во глубину́ впадо́х грехо́вную и, стеня́, взыва́ю Ти́ от се́рдца, Пречи́стая: на мне́ удиви́ бога́тую ми́лость, и Твоего́ милосе́рдия неизме́рную пучи́ну, и щедро́т Твои́х неизче́тное бога́тство, и да́ждь ми́ покая́ние и прегреше́ний проще́ние, да любо́вию взыва́ю Тебе́: моли́ Христа́ Бо́га прегреше́ний оставле́ние дарова́ти ми́: Тя́ бо наде́жду име́ю, ра́б Тво́й.

КрестоБогоро́дичен:

Агнца, и Па́стыря, и Изба́вителя Агница зря́щи на Кресте́, восклица́ше, пла́чущими, го́рько рыда́ющи, вопия́ше: мі́р у́бо ра́дуется, прие́мляй Тобо́ю избавле́ние, утро́ба же Моя́ гори́т, зря́щи Твое́ распя́тие, е́же терпи́ши за милосе́рдие ми́лости. Долготерпели́ве Го́споди, ми́лости бе́здно и исто́чниче неисчерпа́емый, умилосе́рдися и да́руй согреше́ний оставле́ние ве́рою пою́щим Боже́ственныя стра́сти Твоя́.

Пе́снь 4.

Ирмо́с: Любве́ ра́ди, Ще́дре, Твоего́ о́браза на Кресте́ Твое́м ста́л еси́, и раста́яшася язы́цы: Ты́ бо еси́, Человеколю́бче, кре́пость моя́ и хвале́ние.

Иера́рх показа́лся еси́, пома́зався мѵ́ром свяще́нства, соверша́я свяще́нники, все́м спаси́тельное да́руя очище́ние.

Соблю́л еси́ па́ству твою́ от вся́каго вре́да проти́вных, блаже́нне, и Ариеву ле́сть всю́ омрачи́л еси́ сия́нием слове́с твои́х.

Ду́ха си́лою огражде́н, лука́выя отгоня́еши зло́бы, всеблаже́нне, ду́хи, не терпя́щия твоего́ запреще́ния.

Богоро́дичен: Вся́ во́лею соде́тельствовавый, соде́тельствуется хотя́ от чи́стых Твои́х крове́й, спаса́я ве́дущия Тя́, Чи́стую Богома́терь.

Пе́снь 4.

Ирмо́с: Ты́ моя́ кре́пость, Го́споди, Ты́ моя́ и си́ла, Ты́ мо́й Бо́г, Ты́ мое́ ра́дование, не оста́вль не́дра Отча, и на́шу нищету́ посети́в. Те́м с проро́ком Авваку́мом зову́ Ти: си́ле Твое́й сла́ва, Человеколю́бче.

Суде́й непра́вды изоблича́вый иногда́ в бесе́де свое́й к Валентиниа́ну царю́, святи́телю, умоли́ Всеблага́го Царя́ сла́вы, да не обличи́т моя́ сокрове́нная, ниже́ посрами́т мене́ пред Ангелы, егда́ прии́дет сотвори́ти пра́ведный су́д, но да́рует ми́ пре́жде конца́ покая́ние.

Ве́руяй улучи́ти спасе́ние во мно́зе сове́те, о́тче, я́коже са́м внима́л еси́ му́дрым сове́том дру́га души́ твоея́ — Симплитиа́на, та́ко и мене́ наста́ви твори́ти вся́ с сове́том богому́дрых пе́стунов и отце́в, да не отпаду́т исправле́ния моя́, я́коже ли́ствие злоде́йством вра́жиим.

Якоже в до́льнем житии́ свое́м, а́ки зве́зды, на тве́рди За́падныя Це́ркве сия́л еси́ доброде́тельми твои́ми, святи́телю, та́ко и ны́не богода́нным ти́ сове́том возсия́й к ча́дом тоя́, воспряну́в от мра́ка заблужде́ний, обратя́тся к Правосла́вию, и благоуго́дни бу́дут Восто́ку восто́ком — Го́споду Иису́су.

Богоро́дичен: Ты́ еси́ наде́жда моя́, Богоро́дице, Ты́ све́т души́ мое́й, Ты́ поко́й и ра́дость се́рдцу моему́, Ты́ спору́чница о мне́ к Сы́ну Твоему́, те́мже спаси́ мя́, Влады́чице моя́, мно́го Ти́ согреши́вшаго.

Пе́снь 5

Ирмо́с: Ты́, Го́споди, мо́й Све́т, в мі́р прише́л еси́, Све́т Святы́й, обраща́яй из мра́чна неве́дения ве́рою воспева́ющия Тя́.

Ум, сия́ющ све́том невеще́ственным, стяжа́в, облиста́л еси́ врачева́ний и чуде́с зари́, Амвро́сие блаже́нне.

Воздви́гл еси́ тебе́ сама́го свяще́нное жили́ще Ду́ха, разори́л еси́ хра́мы и́дольския, Амвро́сие богодохнове́нне.

Велича́йших доброде́телей светозаре́нием сия́юща, постыде́шася ца́рие тебе́ и преде́ла язы́ка твоего́ не поколеба́ша.

Богоро́дичен: Хоте́нием все́ му́дре соде́ловая, хотя́ обнови́ти челове́ки, Де́во, в Твою́ утро́бу всели́ся.

Пе́снь 5

Ирмо́с: Вску́ю мя́ отри́нул еси́ от лица́ Твоего́, Све́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и к све́ту за́поведей Твои́х пути́ моя́ напра́ви, молю́ся.

Иже в Ри́ме разсла́бленную здра́ву сотвори́вый, о́тче святы́й, ско́рое пода́ждь исцеле́ние и моему́ неду́гующему телеси́ и укрепле́ние сла́бой мое́й во́ли к де́ланию добра́.

Твои́м, свя́те, хода́тайством Гратиа́ну дарова́ся побе́да над го́тфы, Валентиниа́ну ми́р от Макси́ма царя́, и согреши́вшим во́ином проще́ние от Феодо́сия. Исхода́тайствуй подо́бне и мне́ от Царя́ си́л проще́ние мои́х грехо́в, ми́р помысло́в и побе́ду на враги́ — ми́р, пло́ть и диа́вола, — и́же при́сно бо́рются со мно́ю.

Евфи́мий, хотя́й отвезти́ тя́ в заточе́ние, са́м отвезе́н бы́сть в не́, по веле́нию царе́ву; кувикула́рии Гратиа́новы, и жена́, я́же от Сири́и, оби́дящии тя́, внеза́пу изверго́ша ду́ши своя́; ариа́нин, ху́ляй тя́, а́бие пре́дан бы́сть бе́су. Моли́ся у́бо, святи́телю, да не пости́гнет и мене́, я́коже о́нех, недре́млющий су́д пра́вды Бо́жия, за беззако́ния моя́.

Богоро́дичен: Люде́й твои́х печа́ль на ра́дость преложи́, о Влады́чице, ми́р умири́, оби́тель сию́ от междоусо́бий и наве́тов вра́жиих сохрани́, и все́м на́м бу́ди покро́в и заступле́ние в де́нь зо́л.

Пе́снь 6.

Ирмо́с: Пожру́ Ти со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею кро́вию.

Ри́м твоя́ честна́я благохва́лит исправле́ния: я́ко бо звезда́ светови́дна, всю́ду лучи́ чуде́с твои́х, иера́рше, испусти́л еси́, ве́рно удивля́емь.

Утреневав ко Христу́, та́мо су́щими светлостьми́ озари́лся еси́ бога́тно, и све́та напо́лнился еси́ Боже́ственнейшаго, и просвеща́еши ве́рно чту́щия тя́ всегда́.

Те́ло и ду́шу твою́ Бо́гу освяти́в, и прия́тно соде́лал еси́ дарова́ний, о́тче, твое́ се́рдце, непреста́нно вне́млющее сла́дкому жела́нию.

Богоро́дичен: Исцели́ души́ моея́, Де́во, я́звы, осене́нием Твои́м боже́ственным и у́м мо́й просвети́, омраче́нный ле́ностию и зло́бою врага́ борца́.

Пе́снь 6.

Ирмо́с: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся, к Тебе́ бо возопи́х, и услы́ши мя́, Бо́же спасе́ния моего́.

Иису́су: Юже в Медиола́не Це́рковь це́лу от ариа́н сохрани́вый, Го́споди, уго́дником Твои́м Амвро́сием, гото́вым любе́знее кончи́ну му́ченическую прия́ти, не́же огра́ду о́вчую преда́ти волко́м, сохрани́ и ны́не мольба́ми его́ Це́рковь святу́ю неприкоснове́нну от все́х наве́т вра́жиих.

Подража́тель кро́ткаго Иису́са яви́лся еси́, незло́биве, егда́ моли́твою исцели́л еси́ усо́хшую ру́ку злоде́я, дерзну́вшую занести́ но́ж на усече́ние главы́ твоея́, и на́м препо́дал еси́ о́браз любве́ ко враго́м на́шим, благотворе́ния ненави́дящим на́с и моле́ния за творя́щих на́м напа́сть.

Рече́ не́кий во́лхв: вои́стину Амвро́сий стра́шен бесо́м, я́ко не то́чию к нему́, но ниже́ к две́рем до́му его́ приступи́ти мо́гут! — Толи́ко стра́шен бы́вый де́моном, святи́телю, огради́ ны́ предста́тельством твои́м от губи́тельных стре́л и́х.

Богоро́дичен: Испроси́ на́м у Сы́на Твоего́, о Ма́ти Бо́жия, избавле́ния от вся́кия ско́рби, гне́ва и ну́жды, здра́вие душе́вное и теле́сное, и проще́ние согреше́нием на́шим, во́льным же и нево́льным.

Конда́к, гла́с 3. Подо́бен: Боже́ственныя ве́ры.

Боже́ственными догма́ты облиста́я, помрачи́л еси́ Ариеву пре́лесть, священнотаи́нниче и па́стырю Амвро́сие; чудоде́йствуя же си́лою Ду́ха, стра́сти разли́чныя я́ве исцели́л еси́, о́тче преподо́бне, Христа́ Бо́га моли́, спасти́ся душа́м на́шим.

Пе́снь 7.

Ирмо́с: В пещи́ авраа́мстии о́троцы перси́дстей, любо́вию благоче́стия па́че, не́жели пла́менем, опаля́еми, взыва́ху: благослове́н еси́ в хра́ме сла́вы Твоея́, Го́споди.

Боже́ственное веща́ние твои́х догма́тов, о́тче всему́дре, я́коже мо́лния, про́йде всю́ зе́млю и чуде́с показа́ньми, я́ко све́т, облиста́, я́же во мра́це сердца́ просвеща́ющее.

Законоположе́нием Спа́са ты́ после́дуя, о́тче, да́нный тебе́ тала́нт, я́ко ра́б блажа́йший, тща́тельно умногосугу́бил еси́, Влады́чния сподобля́емь ра́дости.

Изостри́в богосло́вный тво́й у́м, струи́ свяще́нных догма́тов, я́ко реку́, испусти́л еси́, напоя́я ве́рных исполне́ние, священнотаи́нниче о́тче Амвро́сие.

Богоро́дичен: Се́, Де́во, во утро́бе Твое́й зачала́ еси́ Сло́во, Отцу́ собезнача́льно, и пло́тию породила́ еси́ да́рующее все́м воззва́ние, су́щим из Ада́ма па́дшим, Всенепоро́чная.

Пе́снь 7.

Ирмо́с: Бо́жия снизхожде́ния о́гонь устыде́ся в Вавило́не иногда́, сего́ ра́ди о́троцы в пещи́, ра́дованною ного́ю, я́ко во цве́тнице, лику́юще поя́ху: благослове́н еси́, Бо́же оте́ц на́ших.

Наставля́емый иногда́ от Ангела, глаго́люща ко у́ху, и мно́ги злове́рныя к со́нму правове́рных привлеки́й, уго́дниче Бо́жий, испроси́ у Го́спода того́жде Ангела, да ополче́нием его́ соблюда́еми, дости́гнем в соедине́ние ве́ры и в ра́зум и́стины.

Отче святы́й Амвро́сие, уго́дниче Христо́в вели́кий, покрови́телю на́ш ми́лостивый! Не отри́ни убо́гаго моле́ния на́шего к тебе́, но испроси́ у Го́спода ми́р и спасе́ние душа́м на́шим, да зове́м ти́: ра́дуйся, о́тче, избавле́ние на́ше.

Ше́ствоваху иногда́ издале́ча слове́снейшии му́жи, ви́дети то́чию тебе́ хотя́ще, и, бесе́довавше с тобо́ю на мно́зе, чуди́шася глубине́ богове́дения твоего́. Осия́й о́нем и на́с, о́тче, да возлю́бльше и́стину, не вла́емся ве́тром вся́каго уче́ния.

Богоро́дичен: Егда́ от окая́ннаго телесе́ сего́ изы́ти и́мать убо́гая душа́ моя́, тогда́ приклоня́ема милосе́рдием Твои́м, предста́ни ми́, о Влады́чице, и простри́ ру́це Твои́, я́ко голуби́не криле́, под се́нию те́х сохрани́ мя́ от стра́шнаго взо́ра лю́тых де́монов, возду́шную бе́здну помози́ ми́ проити́ и го́рних селе́ний дости́гнути.

Пе́снь 8.

Ирмо́с: Ру́це распросте́р, Дании́л, льво́в зия́ния в ро́ве затче́; о́гненную же си́лу угаси́ша, доброде́телию препоя́савшеся, благоче́стия рачи́тели, о́троцы, взыва́юще: благослови́те, вся́ дела́ Госпо́дня, Го́спода.

Умертви́в у́ды и ме́ртво плотско́е мудрова́ние соде́лав, ду́шу оживи́л еси́, преподо́бне, и исто́чник чуде́с источи́л еси́ умерщвле́нным от страсте́й, жи́знь подаю́щи вопию́щим: благослови́те, вся́ дела́ Госпо́дня, Го́спода.

Уве́дел еси́ преставле́ние, му́дре, е́же от телесе́, Боже́ственным Ду́хом, проро́чески бо сие́ су́щим с тобо́ю сказа́л еси́ и ра́достно на небеса́, вопия́, восте́кл еси́: благослови́те, вся́ дела́ Госпо́дня, Го́спода.

Те́ло, и се́рдце, и у́м предочи́стив от страсте́й смеше́ния, огнено́сну лучу́ свы́ше прия́л еси́ Ду́ха, я́коже боже́ственнии ученицы́, вопия́, Амвро́сие: благослови́те, вся́ дела́ Госпо́дня, Го́спода.

Богоро́дичен: Яви́лася еси́ превы́шши небе́с, Бо́га небе́снаго поро́ждши, земна́я, Пречи́стая, небе́сным совоку́пльшаго и позна́ние Свое́ все́м подаю́щаго, вопию́щим: благослови́те, вся́ дела́ Госпо́дня, Го́спода.

Пе́снь 8.

Ирмо́с: Седмери́цею пе́щь халде́йский мучи́тель богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Нечи́стаго ду́ха от Пансо́фия изгна́вый, последи́ же сего́ воскреси́вый, святи́телю и чудотво́рче, воскреси́ и мою́, грехми́ умерщвле́нную и во гро́бе нечу́вствия лежа́щую ду́шу, и бу́ди ми́ помо́щник на зла́го моего́ сопроти́вника.

Иусти́на зло́бяшеся на тя́, я́коже Иезаве́ль на Илию́, Ироди́я на Предте́чу, и па́кости мно́ги ти́ де́яше, но вся́ сия́ терпе́вый и враго́м свои́м благотвори́вый, незло́биве, наста́ви и мене́ не воздава́ти зло́м за зло́ оби́дящим мя́, супроти́вное же, благословля́ти.

Егда́ гре́шнии испове́даху ти́ греси́ своя́, толи́ко тогда́ пла́кал еси́, о́тче, я́ко и жестосе́рдии от ни́х умиля́хуся. О, дабы́ и мое́ се́рдце сокруши́лось благода́тию моли́тв твои́х! Да слеза́ми покая́ния измы́л бы́х у́бо на вся́ку но́щь ло́же мое́ — нечи́стую со́весть мою́, и омочи́л бы́х и́ми посте́ль мою́ — скве́рную пло́ть мою́.

Богоро́дичен: Ма́ти Бо́жия Всеми́лостивая, не отступи́ от мене́, за е́же в ле́ности иждива́ю дни́е мои́, но бу́ди ми́ Одиги́трия в се́й юдо́ли многоско́рбнаго стра́нствования моего́, пла́чь мо́й приими́, и в го́рняя мя́ доведи́, да хвалю́, благословля́ю и покланя́юся та́мо Го́сподеви, поя́ и превознося́ Его́ во вся́ ве́ки.

На 9-й песни поем песнь Пресвятыя Богородицы:

Вели́чит душа́ Моя́ Го́спода и возра́довася дух Мой о Бо́зе Спа́се Мое́м.

К коемуждо стиху припеваем: Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Я́ко призре́ на смире́ние рабы́ Своея́, се бо, от ны́не ублажа́т Мя вси ро́ди.

Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Я́ко сотвори́ Мне вели́чие Си́льный, и свя́то и́мя Его́, и ми́лость Его́ в ро́ды родо́в боя́щимся Его́.

Сотвори́ держа́ву мы́шцею Свое́ю, расточи́ го́рдыя мы́слию се́рдца их.

Низложи́ си́льныя со престо́л, и вознесе́ смире́нныя, а́лчущия испо́лни благ, и богатя́щияся отпусти́ тщи.

Восприя́т Изра́иля о́трока Своего́, помяну́ти ми́лости, я́коже глаго́ла ко отце́м на́шим, Авраа́му и се́мени его́ да́же до ве́ка.

Песнь 9

Ирмо́с: Ка́мень нерукосе́чный от несеко́мыя горы́, Тебе́, Де́во, краеуго́льный отсече́ся — Христо́с, совокупи́вый разстоя́щаяся естества́. Те́м, веселя́щеся, Тя́, Богоро́дице, велича́ем.

Ви́дел еси́, во изступле́нии бы́в, ве́чныя святы́м, о́тче, лежа́щия по́чести; к ни́мже преше́л еси́, восприе́м твои́х трудо́в, сла́вне, воздая́ния, веселя́ся.

Яко гро́зд зре́л, богому́дре, в точи́лех го́рних досто́йно сокро́вищствовался еси́, источа́я безсме́ртия вино́, Амвро́сие, и врачева́ний дарова́ния благоче́стно к тебе́ притека́ющим.

Тя́, златоза́рный о́тче, Боже́ственнаго Ду́ха свети́льник, све́т благочести́вых уче́ний и врачева́ний лучу́ испуща́ющ и ве́рныя просвеща́ющ, велегла́сно ублажа́ем.

Днесве́тлую тя́ звезду́ Це́рковь стяжа́вши, тмы́ избега́ет вся́кия, всеблаже́нне, льсти́ и, све́тлостьми свяще́нных твои́х догма́тов озаря́ема, блажи́т тя́.

Богоро́дичен: Гла́с Тебе́ вопие́м, Де́во, ра́достне арха́нгелов: ра́дуйся, прокля́тства разреше́ние лю́тых все́х; ра́дуйся, избавле́ние, земны́я обожи́вшая па́че ума́ Рождество́м Твои́м.

Песнь 9

Ирмо́с: Ужасе́ся о се́м не́бо, и земли́ удиви́шася концы́, я́ко Бо́г яви́ся челове́ком пло́тски, и чре́во Твое́ бы́сть простра́ннейшее небе́с. Те́м Тя́, Богоро́дицу, Ангелов и челове́к чинонача́лия велича́ют.

Аще и подобостра́стную мне́ приро́ду име́л еси́, святи́телю, оба́че воздержа́нием и моли́твою от страсте́й предочи́стився, еще́ в жи́зни вре́менней ви́димаго соше́ствия на тя́ Свята́го Ду́ха сподо́бился еси́, и чудотво́рец бы́л еси́, исцеля́я неду́жныя. Сотвори́ же и мене́ прича́стника сего́ Ду́ха Уте́шителя, и утоли́ боле́зни моя́ душе́вныя и теле́сныя.

Лише́ния и ско́рби, по́двиги и труды́ земна́го стра́нствования твоего́ кто́ изочте́т, святи́телю? Вся́ бо жи́знь твоя́ на земли́ — тру́д и боле́знь о спасе́нии бли́жних, и са́м ты́ бы́л еси́, я́ко же́ртва всесожже́ния Го́сподеви. Те́мже издале́ча прови́дев, и, я́ко го́стью вожделе́нную, сре́тив кончи́ну свою́, восте́кл еси́ в го́рняя со тща́нием к Царю́ царе́й.

Отче святы́й Амвро́сие, и́же зде́ лице́м к лицу́ Го́спода узре́вый, и та́мо на небеси́ при́сно с Ни́м лику́яй, не забу́ди ны́ гре́шныя в мольба́х твои́х у престо́ла Его́, да на за́паде дне́й на́ших сподо́бит на́с христиа́нския кончи́ны безболе́знены, непосты́дны, ми́рны и до́браго отве́та на стра́шнем суди́щи Свое́м.

Богоро́дичен: Еди́но от о́чию Твое́ю, Ма́ти Бо́жия, еди́н Ма́терний хода́тайственный взо́р Тво́й к Сы́ну Твоему́ мно́го мо́жет ко умилостивле́нию Его́ о гре́шницех. Те́мже мо́лим Тя́: бу́ди о на́с при́сная к Нему́ хода́таица.

Свети́лен, гла́с 6:

Во пло́ти безпло́тных житие́ проходя́, о́тче Амвро́сие, и украси́в ду́шу твою́ пе́рлома доброде́телей, соде́лался еси́ жили́ще Ангельския чистоты́. Сего́ ра́ди Влады́ка Христо́с, восхи́тив ду́шу твою́ от мра́чныя юдо́ли сея́ к невече́рнему све́ту Ца́рствия Своего́, облече́ ю́ в ри́зу спасе́ния ве́чнаго, я́ко жениху́ возложи́ е́й вене́ц и, я́ко неве́сту Свою́, украси́ ю́ красото́ю Боже́ственнаго сия́ния.

Сла́ва:

Зде́ еще́ просия́вый лице́м, я́ко со́лнце, и убели́выйся, я́ко сне́г, по да́ру Уте́шителя Ду́ха, и та́мо в черто́гах ра́йских осиява́емый при́сно зре́нием Боже́ственныя Тро́ицы, святы́й Амвро́сие, моли́ светода́вца Го́спода просвети́ти одея́ние души́ моея́, да и а́з с му́дрыми де́вы — чи́стыми и святы́ми душа́ми, вни́ду не́когда в небе́сный черто́г Боже́ственныя сла́вы Его́.

И ны́не:

Богоро́дице Пречи́стая, Яже без се́мене ро́ждши все́х Влады́ку. Того́, со святи́телем Амвро́сием, моли́ изба́вити мя́ возду́шных мыта́рств и гее́нскаго муче́ния, да всегда́ прославля́ю Отца́ и Сы́на и Свята́го Ду́ха, и Твое́ ми́лостивное на мне́ предста́тельство, во ве́ки веко́в, ами́нь.

Хвали́тны псалмы́, глас 6:

Вся́кое дыха́ние да хва́лит Го́спода./ Хвали́те Го́спода с небе́с,/ хвали́те Его́ в вы́шних.// Тебе́ подоба́ет песнь Бо́гу.

Хвали́те Его́ вси а́нгели Его́,/ хвали́те Его́ вся си́лы Его́.// Тебе́ подоба́ет песнь Бо́гу.

Сти́хиры, глас 6:

Стих: Сотвори́ти в них суд напи́сан/ сла́ва сия́ бу́дет всем преподо́бным Его́.

Тебе́, Бо́га, хва́лим, / Тебе́, Го́спода, испове́дуем, — / воспе́л еси́, богому́дре Амвро́сие, / и научи́л еси́ на́с сла́вити в Тро́ице Еди́наго Бо́га. / Тому́ моли́ся / без греха́ сохрани́тися на́м / и спасти́ся душа́м на́шим.

Стих: Хвали́те Его́ на си́лах Его́,/ хвали́те Его́ по мно́жеству вели́чествия Его́.

Стих: Хвали́те Его́ в тимпа́не и ли́це,/ хвали́те Его́ во стру́нах и орга́не.

Иде́же пресла́вный апо́стольский ли́к, / иде́же проро́ческое хвале́бное число́, / иде́же пресве́тлое му́ченическое во́инство, / та́мо и ты́, со иера́рхи и учи́тели церко́вными / сца́рствуеши в ве́чней сла́ве, свя́те Амвро́сие. / Моли́ся Го́сподеви, без греха́ сохрани́тися на́м / и спасти́ся душа́м на́шим.

Стих: Хвали́те Его́ в кимва́лех доброгла́сных, хвали́те Его́ в кимва́лех восклица́ния. / Вся́кое дыха́ние да хва́лит Го́спода.

Престо́лу Влады́чню ны́не предстоя́, / блаже́нне Амвро́сие, / немо́лчну хвалу́ воспева́еши Триеди́ному Бо́гу, / Ему́же вси́ Ангели, / небеса́ и вся́ си́лы, / Ему́же херуви́мы и серафи́мы непреста́нными гла́сы взыва́ют: / Свя́т, Свя́т, Свя́т Госпо́дь Бо́г Савао́ф! / Тому́ моли́ся без греха́ сохрани́тися на́м / и спасти́ ду́ши на́ша.

Глас 6: Сла́ва Отцу́ и Сы́ну и Свято́му Ду́ху

Аще по́лны су́ть небеса́ вели́чества сла́вы Твоея́, Триипоста́сне Вседе́телю, оба́че и мы́, земля́ и пе́пел, Тебе́, Бо́га, хва́лим, Тебе́, Го́спода, испове́дуем и мо́лим: не пре́зри на́с, уничиже́нных зело́, но, моли́твами уго́дника Твоего́ Амвро́сия, сподо́би без греха́ сохрани́тися на́м и спаси́ ду́ши на́ша.

Глас 6: И ны́не и при́сно и во ве́ки веко́в. Ами́нь.

Иже ко избавле́нию прие́мый челове́ка, и деви́ческаго чре́ва не возгнуша́выйся, Царю́ сла́вы, Христе́ Бо́же на́ш, не пре́зри на́с до конца́, не отри́ни па́дшее созда́ние Твое́, его́же ра́ди пречи́стую Кро́вь Твою́ на Кресте́ излия́л еси́, но, моли́твами Пречи́стыя Ма́тере Твоея́, изба́ви ны́ от страсте́й безче́стия и спаси́ ду́ши на́ша, я́ко Человеколю́бец.

Славосло́вие вели́кое:

Сла́ва в вы́шних Бо́гу, и на земли́ мир, в челове́цех благоволе́ние. Хва́лим Тя, благослови́м Тя, кла́няем Ти ся, славосло́вим Тя, благодари́м Тя, вели́кия ра́ди сла́вы Твоея́. Го́споди Царю́ Небе́сный, Бо́же О́тче Вседержи́телю, Го́споди, Сы́не Единоро́дный, Иису́се Христе́, и Святы́й Ду́ше. Го́споди Бо́же, А́гнче Бо́жий, Сы́не Оте́чь, взе́мляй грех ми́ра, поми́луй нас; взе́мляй грехи́ ми́ра, приими́ моли́тву на́шу; седя́й одесну́ю Отца́, поми́луй нас. Я́ко Ты еси́ еди́н Свят, Ты еси́ еди́н Госпо́дь, Иису́с Христо́с, в сла́ву Бо́га Отца́. Ами́нь.

На всяк день благословлю́ Тя, и восхвалю́ И́мя Твое́ во ве́ки, и в век ве́ка.

Сподо́би, Го́споди, в день сей без греха́ сохрани́тися нам. Благослове́н еси́, Го́споди, Бо́же оте́ц на́ших, и хва́льно и просла́влено И́мя Твое́ во ве́ки. Ами́нь.

Бу́ди, Го́споди, ми́лость Твоя́ на нас, я́коже упова́хом на Тя.

Благослове́н еси́, Го́споди, научи́ мя оправда́нием Твои́м. (Три́жды)

Го́споди, прибе́жище был еси́ нам в род и род. Аз рех: Го́споди, поми́луй мя, исцели́ ду́шу мою́, я́ко согреши́х Тебе́. Го́споди, к Тебе́ прибего́х, научи́ мя твори́ти во́лю Твою́, я́ко Ты еси́ Бог мой: я́ко у Тебе́ исто́чник живота́, во све́те Твое́м у́зрим свет. Проба́ви ми́лость Твою́ ве́дущим Тя.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Три́жды)

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Святы́й Безсме́ртный, поми́луй нас.

Святы́й Бо́же, Святы́й Кре́пкий, Святы́й Безсме́ртный, поми́луй нас.

Тропа́рь, глас 4:

Утверди́, Бо́же, святу́ю правосла́вную ве́ру, правосла́вных христиа́н во век ве́ка.

Честне́йшую Херуви́м и Сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу, Тя велича́ем.

Сла́ва, и ны́не. Го́споди, поми́луй. (Три́жды) Благослови́.

Господи Иисусе Христе, Сыне Божий, моли́твами Пречи́стыя Своея́ Ма́тере, святителя Амвросия, епископа Медиоланского, преподобных и богоносных отец наших и всех святы́х, поми́луй и спаси нас я́ко Благ и Челове́колюбец.

Многоле́тие:

Вели́каго Господи́на и Отца́ на́шего Кири́лла,/ Святе́йшаго Патри́арха Моско́вского и всея́ Руси́,/ и Господи́на на́шего (Высоко-) Преосвяще́ннейшаго (имярек),/ (архи-)епи́скопа (митрополита (титул)),/ богохрани́мую страну́ на́шу Росси́йскую,/ и вся правосла́вныя христи́аны,// Го́споди, сохрани́ их на мно́гая ле́та.