Шрифт

▲

Богослужебные тексты для домашнего употребления

Дни памяти святых

Последование Всеношного бдения в день памяти преподобного Германа Аляскинского. Для домашнего (келейного) совершения

Оглавление

ВСЕНО́ЩНОЕ БДЕ́НИЕ

ВЕЛИ́КАЯ ВЕЧЕ́РНЯ

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас. Ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Трижды.)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, (трижды). Сла́ва, и ны́не:

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Таже, Го́споди, поми́луй, (12), Сла́ва, и ны́не:

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 103:

Поется часть псалма:

Благослови́, душе́ моя́, Го́спода. / Благослове́н еси́, Го́споди. / Го́споди, Бо́же мой, возвели́чился еси́ зело́. / Благослове́н еси́, Го́споди. / Во испове́дание и в велеле́поту обле́клся еси́. / Благослове́н еси́, Го́споди. / Посреде́ гор про́йдут во́ды. / Ди́вна дела́ Твоя́, Го́споди. / Вся прему́дростию сотвори́л еси́. / Сла́ва Ти, Го́споди, сотвори́вшему вся.

Или читается псалом полностью:

Благослови́, душе́ моя́, Го́спода. Го́споди, Бо́же мой, возвели́чился еси́ зело́. Во испове́дание и в велеле́поту обле́клся еси́. Одея́йся све́том, я́ко ри́зою, простира́яй не́бо, я́ко ко́жу. Покрыва́яй вода́ми превы́спренняя Своя́, полага́яй о́блаки на восхожде́ние Свое́, ходя́й на крилу́ ве́треню. Творя́й А́нгелы Своя́ ду́хи и слуги́ Своя́ пла́мень о́гненный. Основа́яй зе́млю на тве́рди ея́, не преклони́тся в век ве́ка. Бе́здна, я́ко ри́за, одея́ние ея́, на гора́х ста́нут во́ды, от запреще́ния Твоего́ побе́гнут, от гла́са гро́ма Твоего́ убоя́тся. Восхо́дят го́ры и нисхо́дят поля́ в ме́сто, е́же основа́л еси́ им. Преде́л положи́л еси́, eго́же не пре́йдут, ниже́ обратя́тся покры́ти зе́млю. Посыла́яй исто́чники в де́брех, посреде́ гор про́йдут во́ды. Напая́ют вся зве́ри се́льныя, ждут она́гри в жа́жду свою́. На ты́х пти́цы небе́сныя привита́ют, от среды́ ка́мения дадя́т глас. Напая́яй го́ры от превы́спренних Свои́х, от плода́ дел Твои́х насы́тится земля́. Прозяба́яй траву́ ското́м, и злак на слу́жбу челове́ком, извести́ хлеб от земли́. И вино́ весели́т се́рдце челове́ка, ума́стити лице́ еле́ем, и хлеб се́рдце челове́ка укрепи́т. Насы́тятся древа́ польска́я, ке́дри Лива́нстии, и́хже еси́ насади́л. Та́мо пти́цы вогнездя́тся, ероди́ево жили́ще предводи́тельствует и́ми. Го́ры высо́кия еле́нем, ка́мень прибе́жище за́яцем. Сотвори́л есть луну́ во времена́, со́лнце позна́ за́пад свой. Положи́л еси́ тму, и бысть нощь, в не́йже про́йдут вси зве́рие дубра́внии. Ски́мни рыка́ющии, восхи́тити и взыска́ти от Бо́га пи́щу себе́. Возсия́ со́лнце и собра́шася и в ло́жах свои́х ля́гут. Изы́дет челове́к на де́ло свое́ и на де́лание свое́ до ве́чера. Я́ко возвели́чишася дела́ Твоя́, Го́споди, вся прему́дростию сотвори́л еси́, испо́лнися земля́ тва́ри Твоея́. Сие́ мо́ре вели́кое и простра́нное, та́мо га́ди, и́мже несть числа́, живо́тная ма́лая с вели́кими, та́мо корабли́ препла́вают, змий сей, eго́же созда́л еси руга́тися eму́. Вся к Тебе́ ча́ют, да́ти пи́щу им во бла́го вре́мя. Да́вшу Тебе́ им соберу́т, отве́рзшу Тебе́ ру́ку вся́ческая испо́лнятся бла́гости, отвра́щшу же Тебе́ лице́, возмяту́тся, отъи́меши дух их, и исче́знут, и в персть свою́ возвратя́тся. По́слеши Ду́ха Твоего́, и сози́ждутся, и обнови́ши лице́ земли́. Бу́ди сла́ва Госпо́дня во ве́ки, возвесели́тся Госпо́дь о де́лех Свои́х, призира́яй на зе́млю, и творя́й ю́ трясти́ся, прикаса́яйся гора́м, и дымя́тся. Воспою́ Го́сподеви в животе́ мое́м, пою́ Бо́гу моему́, до́ндеже есмь, да услади́тся Ему́ бесе́да моя́, аз же возвеселю́ся о Го́споде. Да исче́знут гре́шницы от земли́, и беззако́нницы, я́коже не бы́ти им. Благослови́, душе́ моя́, Го́спода.

Со́лнце позна́ за́пад свой. Положи́л еси́ тму, и бысть нощь. Я́ко возвели́чишася дела́ Твоя́, Го́споди, вся прему́дростию сотвори́л еси́.

Сла́ва, и ны́не: Аллилу́иа, аллилу́иа, аллилу́иа, сла́ва Тебе́ Бо́же. Трижды.

Блаже́н муж:

Блаже́н муж, и́же не и́де на сове́т нечести́вых.

Аллилу́иа, аллилу́иа, аллилу́иа.

Я́ко весть Госпо́дь путь пра́ведных, и путь нечести́вых поги́бнет.

Аллилу́иа, аллилу́иа, аллилу́иа.

Рабо́тайте Го́сподеви со стра́хом и ра́дуйтеся Ему́ с тре́петом.

Аллилу́иа, аллилу́иа, аллилу́иа.

Блаже́ни вси наде́ющиися Нань.

Аллилу́иа, аллилу́иа, аллилу́иа.

Воскресни́, Го́споди, спаси́ мя, Бо́же мой.

Аллилу́иа, аллилу́иа, аллилу́иа.

Госпо́дне есть спасе́ние, и на лю́дех Твои́х благослове́ние Твое́.

Аллилу́иа, аллилу́иа, аллилу́иа.

Сла́ва Отцу́ и Сы́ну и Свято́му Духу.

Аллилу́иа, аллилу́иа, аллилу́иа.

И ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Го́споди, воззва́х, глас 3:

Го́споди, воззва́х к Тебе́, услы́ши мя./ Услы́ши мя, Го́споди./ Го́споди, воззва́х к Тебе́, услы́ши мя:/ вонми́ гла́су моле́ния моего́,/ внегда́ воззва́ти ми к Тебе́.// Услы́ши мя, Го́споди.

Да испра́вится моли́тва моя́,/ я́ко кади́ло пред Тобо́ю,/ воздея́ние руку́ мое́ю/ – же́ртва вече́рняя.// Услы́ши мя, Го́споди.

Стихи́ры пра́здника, глас 3:

Стих: А́ще беззако́ния на́зриши, Го́споди, Го́споди, кто постои́т? Я́ко у Тебе́ очище́ние есть.

Взыгра́йте, во́ды Валаа́ма, / лику́йте о́строви Аля́ски, / по́йте лю́дие но́выя страны́, / да ра́дуется не́бо и земля́: / собесе́дник бо Ангелов прославля́ется, / и в концы́ вселе́нныя пра́вая ве́ра возвеща́ется, / и мы́ велегла́сно Христу́ Бо́гу возопии́м: / моли́твами отца́ на́шего Ге́рмана, / Го́споди, спаси́ ду́ши на́ша.

Стих: И́мене ра́ди Твоего́ потерпе́х Тя, Го́споди, потерпе́ душа́ моя́ в сло́во Твое́, упова́ душа́ моя́ на Го́спода.

Прииди́те вси́ в пе́ниих псало́мских / честна́го воздержа́ния побе́ду возгласи́м: / и́м бо зми́я злонача́льнаго расто́ргнув, / в ли́це Ангелов кро́ткий Ге́рман вкуша́ет торжество́. / Восхва́лим у́бо, бра́тие, / крася́щаго по́стников сосло́вие / и, ликовству́я, све́тло возопии́м: / ра́дуйся, преподо́бне Ге́рмане, / ангелоподо́бная и́ноков похвало́.

Стих: От стра́жи у́тренния до но́щи, от стра́жи у́тренния да упова́ет Изра́иль на Го́спода.

О, Ге́рмане преподо́бне, / суро́выя Аля́ски подви́жниче, / и небе́сных селе́ний жи́телю! / Ки́ими похвала́ми почти́м тя́, / или́ ки́ими имены́ возвели́чим, / и что́ славле́ние на́ше проти́ву сла́вы небе́сныя? / Ра́дуйся на́ш соплеме́нниче, / вкуша́яй небе́сную сла́ву, / испо́лни ра́дости и сердца́ / в смире́нии ти́ припа́дающих.

Глас 6: Стих: Я́ко у Го́спода ми́лость, и мно́гое у Него́ избавле́ние, и Той изба́вит Изра́иля от всех беззако́ний eго́.

Ны́не соше́дшеся, / просла́вим ди́внаго, / су́ща от земноро́дных, / небе́сных же дости́гшаго, / и́же све́т Христо́в / де́лы же и словесы́ / до коне́ц вселе́нныя пронесе́ / непросвеще́нным лю́дем, / мра́зом идолослуже́ния отягоще́нным. / Того́ моли́твами Христо́с / да спасе́т ду́ши на́ша.

Стих: Хвали́те Го́спода вси язы́цы, похвали́те Его́ вси лю́дие.

Ра́дуйся Валаа́ме, / Бо́жие жили́ще, / я́ко воспита́л еси́ / ди́внаго подви́жника Христо́ва, / и́же, я́ко свеща́ на све́щнице, / просия́ на о́стровех Аля́ски, / стране́ неве́домей и но́вей, / и лю́ди неве́рныя / к пра́вой ве́ре приведе́, / с ни́ми же просла́вим Бо́га, / ди́внаго во святы́х Свои́х.

Стих: Я́ко утверди́ся ми́лость Его́ на нас, и и́стина Госпо́дня пребыва́ет во век.

Еди́но име́я жела́ние, / е́же лю́ди неве́рныя / к Бо́гу Еди́ному привести́, / все́м вся́ бы́л еси́: / Свяще́нному Писа́нию / и е́же по нему́ науча́я житию́, / рукоде́ланию же наставля́я, / и засту́пник быва́я пред властьми́, / вся́ко пе́стуя ты́я, я́ко младе́нцы, / да та́ко лю́ди к Бо́гу приведе́ши, / и на́с тя́ пою́щих не оста́ви.

Глас 6: Сла́ва Отцу́ и Сы́ну и Свято́му Ду́ху.

Ка́я не́дра земли́ или́ ка́я ле́та, о Ге́рмане преподо́бне, возмо́гут сокры́ти сла́ву твою́, су́щую на небесе́х? Те́м ны́не сла́вяще припа́даем ти́, мы́ ча́да твоего́ наро́да, хода́тая тя́ име́я пред Го́сподем, Его́ же моли́ пода́ти спасе́ние стра́ждущей стране́ Росси́йстей, стране́ се́й благоде́нствие и душа́м на́шим ве́лию ми́лость.

Глас 6: И ны́не и при́сно и во ве́ки веко́в. Ами́нь.

Кто́ Тебе́ не ублажи́т, Пресвята́я Де́во? Кто́ ли не воспое́т Твоего́ Пречи́стаго Рождества́? Безле́тно бо от Отца́ возсия́вый Сы́н Единоро́дный, То́йже от Тебе́, Чи́стыя, про́йде, неизрече́нно вопло́щся: естество́м Бо́г сы́й и естество́м бы́в Челове́к на́с ра́ди; не во двою́ лицу́ разделя́емый, но во двою́ естеству́ несли́тно познава́емый. Того́ моли́, Чи́стая, Всеблаже́нная, поми́ловатися душа́м на́шим.

Све́те Тихи́й:

Све́те Ти́хий святы́я сла́вы Безсме́ртнаго Отца́ Небе́снаго, Свята́го, Блаже́ннаго, Иису́се Христе́! Прише́дше на за́пад со́лнца, ви́девше свет вече́рний, пое́м Отца́, Сы́на и Свята́го Ду́ха, Бо́га. Досто́ин еси́ во вся времена́ пет бы́ти гла́сы преподо́бными, Сы́не Бо́жий, живо́т дая́й; те́мже мир Тя сла́вит.

1. Прему́дрости Соломо́ни чте́ние

Пра́ведных ду́ши в руце́ Бо́жией, и не прико́снется и́х му́ка. Непщева́ни бы́ша во очесе́х безу́мных умре́ти, и вмени́ся озлобле́ние исхо́д и́х, и е́же от на́с ше́ствие — сокруше́ние, они́ же су́ть в ми́ре. Ибо пред лице́м челове́ческим, а́ще и му́ку прии́мут, упова́ние и́х безсме́ртия испо́лнено. И вма́ле нака́зани бы́вше, вели́кими благоде́тельствовани бу́дут, я́ко Бо́г искуси́ я́ и обре́те и́х досто́йны Себе́. Я́ко зла́то в горни́ле, искуси́ и́х и, я́ко всепло́дие же́ртвенное, прия́т я́. И во вре́мя посеще́ния и́х, возсия́ют, и я́ко и́скры по сте́блию, потеку́т. Су́дят язы́ком и облада́ют людьми́, и воцари́тся Госпо́дь в ни́х во ве́ки. Наде́ющиися На́нь разуме́ют и́стину и ве́рнии в любви́ пребу́дут Ему́, я́ко благода́ть и ми́лость в преподо́бных Его́ и посеще́ние во избра́нных Его́.

2. Прему́дрости Соломо́ни чте́ние

Пра́ведницы во ве́ки живу́т, и в Го́споде мзда́ и́х, и попече́ние и́х у Вы́шняго. Сего́ ра́ди прии́мут ца́рствие благоле́пия и вене́ц добро́ты от руки́ Госпо́дни, зане́ десни́цею покры́ет я́ и мы́шцею защити́т и́х. Прии́мет всеору́жие — рве́ние свое́ и вооружи́т тва́рь в ме́сть враго́м. Облече́тся в броня́ пра́вды и возложи́т шле́м — су́д нелицеме́рен. Прии́мет щи́т непобеди́мый — преподо́бие, поостри́т же напра́сный гне́в — во ору́жие, спобо́рет же с ни́м ми́р на безу́мныя. По́йдут праволу́чныя стре́лы мо́лниины и, я́ко от благокру́гла лу́ка облако́в, на наме́рение полетя́т, и от каменоме́тныя я́рости испо́лнь паду́т гра́ды. Вознегоду́ет на ни́х вода́ морска́я, ре́ки же потопя́т я́ на́гло. Сопроти́в ста́нет и́м ду́х си́лы и, я́ко ви́хор, разве́ет и́х, и опустоши́т всю́ зе́млю беззако́ние, и злоде́йство преврати́т престо́лы си́льных. Слы́шите у́бо, ца́рие, и разуме́йте, навы́кните, судии́ конце́в земли́. Внуши́те держа́щии мно́жества и гордя́щиися о наро́дех язы́ков, я́ко дана́ е́сть от Го́спода держа́ва ва́м и си́ла от Вы́шняго.

3. Прему́дрости Соломо́новы чте́ние

Пра́ведник, а́ще пости́гнет сконча́тися, в поко́и бу́дет. Ста́рость бо честна́ не многоле́тна, ниже́ в числе́ ле́т исчита́ется. Седи́на же е́сть му́дрость челове́ком, и во́зраст ста́рости — житие́ нескве́рное. Благоуго́ден Бо́гови бы́в, возлю́блен бы́сть, и живы́й посреде́ гре́шник, преста́влен бы́сть. Восхище́н бы́сть, да не зло́ба измени́т ра́зума его́ или́ ле́сть прельсти́т ду́шу его́. Раче́ние бо зло́бы помрача́ет до́брая и паре́ние по́хоти, пременя́ет у́м незло́бив. Сконча́вся вма́ле, испо́лни ле́та до́лга, уго́дна бо бе́ Го́сподеви душа́ его́, сего́ ра́ди потща́ся от среды́ лука́вствия. Лю́дие же ви́девше и не разуме́вше, ниже́ поло́жше в помышле́нии таково́е, я́ко благода́ть и ми́лость в преподо́бных Его́ и посеще́ние во избра́нных Его́.

Сподо́би, Го́споди:

Сподо́би, Го́споди, в ве́чер сей без греха́ сохрани́тися нам. Благослове́н еси́, Го́споди, Бо́же оте́ц на́ших, и хва́льно и просла́влено и́мя Твое́ во ве́ки. Ами́нь.

Бу́ди, Го́споди, ми́лость Твоя́ на нас, я́коже упова́хом на Тя. Благослове́н еси́, Го́споди, научи́ мя оправда́нием Твои́м. Благослове́н еси́, Влады́ко, вразуми́ мя оправда́нием Твои́м. Благослове́н еси́, Святы́й, просвети́ мя оправда́нии Твои́ми.

Го́споди, ми́лость Твоя́ во век, дел руку́ Твое́ю не пре́зри. Тебе́ подоба́ет хвала́, Тебе́ подоба́ет пе́ние, Тебе́ сла́ва подоба́ет. Отцу́ и Сы́ну и Свято́му Ду́ху, ны́не и при́сно и во ве́ки веко́в. Ами́нь.

На лити́и стихи́ры, гла́с 8.

Но́ваго Валаа́ма подви́жниче, любе́зна тебе́ бра́тия бы́сть, с не́ю же на Валаа́ме оте́чественнем пожи́л еси́. Стокра́т же вожделе́нннее ти́ бя́ху безпло́тнии дру́зи, и́же восхища́ху к богозре́нию ду́шу твою́, с ни́ми же ны́не соводворя́яся, ра́дуйся, о́тче, о прославля́ющих па́мять твою́, наставля́я неви́димо ны́ к до́брому покая́нию: Ру́сския земли́ прозябе́ние, Ла́дожских во́д воспита́ние, Алеу́тских острово́в и Аля́ски церко́вное благослове́ние, Аме́рики до́брая наде́ждо, Правосла́вия благода́тное свиде́тельство, Ге́рмане, уго́дниче Бо́жий, испроси́ на́м ми́р Бо́жий, превосходя́й вся́к у́м, и ве́лию ми́лость.

Сла́ва, гла́с 8: Прибли́зившуся отше́ствию преподо́бнаго, свеще́м горя́щим и апо́стольским дея́нием у одра́ его́ что́мым, ди́вно просия́ святы́й Ге́рман, — сла́ва Тебе́, Го́споди, ре́к, — и еще́ седми́цу дни́й жития́ от Спа́са та́йно прие́м, пожда́ прорече́ннаго дне́. Тогда́ же па́ки свеще́м горя́щим и дея́нием что́мым, почи́ во благоуха́нии по́двига своего́, многопло́дно и пра́ведно пожи́в, па́ки же ве́чно живы́й, Го́спода сла́вы моля́ при́сно о на́с.

И ны́не, богоро́дичен глас 8: Влады́чице Богоро́дице Де́во, я́коже исцели́ла еси́ Ге́рмана преподо́бнаго, вне́млющи при́сно проше́нием его́, и на́с воспева́ющих Тя́ поми́луй.

Го́споди, поми́луй. (40 раз)

Стихи́ры на стихо́вне:

Стихиры, гла́с 5:

Ра́дуйся, Живоно́сный Кре́сте, / благоче́стия непобеди́мая побе́да, / тобо́ю бо две́рь ра́йская отве́рзеся / и дарова́ся но́вым зе́млям озаре́ние, / и тля́ и́дольская упраздни́ся, / и попра́ся сме́ртная держа́ва, / и земноро́днии возно́сятся к небе́сным. / Ра́дуйтеся, ве́рнии и весели́теся, / я́ко сла́ва Живоно́снаго Креста́, / но́вых му́чеников / и преподо́бнаго Ге́рмана упова́ние, / в стране́ но́вей провозглаша́ется / и все́м ве́рным подае́т / ве́лию и бога́тую ми́лость.

Сти́х: Честна́ пред Го́сподем / сме́рть преподо́бных Его́.

Ра́дуйся, преподо́бный наста́вниче, / новоизбра́ннаго ста́да Христо́ва, / благода́тию сло́ва Бо́жия / сердца́ неве́дущия просвети́вый, / ду́хом кро́тости и смире́ния / благоче́стию научи́вый, / братолю́бием и милосе́рдием / ве́ры и́стину вкорени́вый. / О, ди́вне ста́рче Ге́рмане, / све́та Христо́ва провозве́стниче / и тьмы́ бесо́вския отгони́телю, / просвети́ и на́ша сердца́, / отгна́в тьму́ неве́рия, / да обря́щем у Го́спода ве́лию ми́лость.

Сти́х: Что́ возда́м Го́сподеви о все́х, / я́же воздаде́ ми?

Ра́дуйся, засту́пниче пред си́льными ми́ра сего́ / за новопросвеще́нныя лю́ди, / препро́стыя и смире́нныя! / Ты́ бо кро́вию се́рдца своего́ / хода́тай бы́л еси́ к си́м, / я́ко пе́стун и слуга́ нижа́йший ро́да и́х; / та́же дру́г неду́гующим я́звою неисце́льною, / денноно́щно слы́ша во́пли и сто́ны и́х, / утеша́я, вле́кл еси́ и́х к врачевству́ небе́сному, / о безстра́шный па́стырю ста́да своего́, / а́ще и уклони́лся еси́ са́на иере́йска! / Ра́дуйся, зве́ря ди́вия ми́луяй, / я́коже Серафи́м преподо́бный; / ра́дуйся, пла́менем ве́ры укроти́вый пожа́ра веще́ственный о́гнь.

Слава, гла́с 6:

Преподо́бне о́тче, во всю́ зе́млю изы́де веща́ние исправле́ний твои́х: те́мже на небесе́х обре́л еси́ мзду́ трудо́в твои́х, де́монская разори́л еси́ по́лчища, и Ангельския дости́гл еси́ чи́ны, и́хже житию́ непоро́чно поревнова́л еси́; дерзнове́ние име́я ко Христу́ Бо́гу, ми́р испроси́ душа́м на́шим.

И ны́не, Богоро́дичен:

Творе́ц и Изба́витель мо́й, Пречи́стая, Христо́с Госпо́дь, из Твои́х ложе́сн проше́д, в мя́ оболки́йся, пе́рвыя кля́твы Ада́ма свободи́. Те́мже Ти́, Всечи́стая, я́ко Бо́жии Ма́тери же и Де́ве, вои́стинну вопие́м немо́лчно: ра́дуйся Ангельски, ра́дуйся Влады́чице, предста́тельство, и покро́ве, и спасе́ние ду́ш на́ших.

Моли́тва свята́го Симео́на Богоприи́мца:

Ны́не отпуща́еши раба́ Твоего́, Влады́ко,/ по глаго́лу Твоему́, с ми́ром;/ я́ко ви́деста о́чи мои́ спасе́ние Твое́,/ е́же еси́ угото́вал пред лице́м всех люде́й,/ свет во открове́ние язы́ков,// и сла́ву люде́й Твои́х Изра́иля.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Го́споди, поми́луй. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Тропа́рь, глас 4:

Пусты́ни се́верныя подви́жниче и о все́м ми́ре благода́тный моли́твенниче, правосла́вныя ве́ры обучи́телю и благоче́стия до́брый наста́вниче, Аля́ски украше́ние и всея́ Аме́рики ра́дование, преподо́бне Ге́рмане, моли́ Христа́ Бо́га, да спасе́т ду́ши на́ша. (Дважды)

Песнь Пресвятей Богородице:

Богоро́дице Де́во, ра́дуйся, / Благода́тная Мари́е, Госпо́дь с Тобо́ю; / благослове́на Ты в жена́х / и благослове́н Плод чре́ва Твоего́, / я́ко Спа́са родила́ еси́ душ на́ших. (Единожды)

Бу́ди И́мя Госпо́дне благослове́но от ны́не и до ве́ка. (Три́жды)

Псало́м 33:

Благословлю́ Го́спода на вся́кое вре́мя,/ вы́ну хвала́ Его́ во усте́х мои́х./ О Го́споде похва́лится душа́ моя́,/ да услы́шат кро́тцыи, и возвеселя́тся./ Возвели́чите Го́спода со мно́ю,/ и вознесе́м И́мя Его́ вку́пе./ Взыска́х Го́спода, и услы́ша мя,/ и от все́х скорбе́й мои́х изба́ви мя./ Приступи́те к Нему́, и просвети́теся,/ и ли́ца ва́ша не постыдя́тся./ Сей ни́щий воззва́, и Госпо́дь услы́ша и́,/ и от все́х скорбе́й его́ спасе́ и́./ Ополчи́тся а́нгел Госпо́день о́крест боя́щихся Его́,/ и изба́вит их./ Вкуси́те и ви́дите, я́ко благ Госпо́дь:/ блаже́н муж, и́же упова́ет Нань./ Бо́йтеся Го́спода, вси́ святи́и Его́,/ я́ко несть лише́ния боя́щимся Его́./ Бога́тии обнища́ша и взалка́ша:/ взыска́ющии же Го́спода// не лиша́тся вся́каго бла́га.

У́ТРЕНЯ.

Шестопса́лмие:

Сла́ва в вы́шних Бо́гу, и на земли́ мир, в челове́цех благоволе́ние. (Три́жды)

Го́споди, устне́ мои́ отве́рзеши, и уста́ моя́ возвестя́т хвалу́ Твою́. (Два́жды)

Псалом 3:

Го́споди, что ся умно́жиша стужа́ющии ми́? Мно́зи востаю́т на мя, мно́зи глаго́лют души́ мое́й: несть спасе́ния eму́ в Бо́зе eго́. Ты же, Го́споди, Засту́пник мой еси́, сла́ва моя́ и вознося́й главу́ мою́. Гла́сом мои́м ко Го́споду воззва́х, и услы́ша мя от горы́ святы́я Своея́. Аз усну́х, и спах, воста́х, я́ко Госпо́дь засту́пит мя. Не убою́ся от тем люде́й, о́крест напа́дающих на мя. Воскресни́, Го́споди, спаси́ мя, Бо́же мой, я́ко Ты порази́л еси́ вся вражду́ющыя ми всу́е: зу́бы гре́шников сокруши́л еси́. Госпо́дне есть спасе́ние, и на лю́дех Твои́х благослове́ние Твое́.

Аз усну́х, и спах, воста́х, я́ко Госпо́дь засту́пит мя.

Псалом 37:

Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́. Я́ко стре́лы Твоя́ унзо́ша во мне, и утверди́л еси́ на мне ру́ку Твою́. Несть исцеле́ния в пло́ти мое́й от лица́ гне́ва Твоего́, несть ми́ра в косте́х мои́х от лица́ грех мои́х. Я́ко беззако́ния моя́ превзыдо́ша главу́ мою́, я́ко бре́мя тя́жкое отяготе́ша на мне. Возсмерде́ша и согни́ша ра́ны моя́ от лица́ безу́мия моего́. Пострада́х и сляко́хся до конца́, весь день се́туя хожда́х. Я́ко ля́двия моя́ напо́лнишася поруга́ний, и несть исцеле́ния в пло́ти мое́й. Озло́блен бых и смири́хся до зела́, рыка́х от воздыха́ния се́рдца моего́. Го́споди, пред Тобо́ю все жела́ние мое́ и воздыха́ние мое́ от Тебе́ не утаи́ся. Се́рдце мое́ смяте́ся, оста́ви мя си́ла моя́, и свет о́чию мое́ю, и той несть со мно́ю. Дру́зи мои́ и и́скреннии мои́ пря́мо мне прибли́жишася и ста́ша, и бли́жнии мои́ отдале́че мене́ ста́ша и нужда́хуся и́щущии ду́шу мою́, и и́щущии зла́я мне глаго́лаху су́етная и льсти́вным весь день поуча́хуся. Аз же я́ко глух не слы́шах и я́ко нем не отверза́яй уст свои́х. И бых я́ко челове́к не слы́шай и не имы́й во усте́х свои́х обличе́ния. Я́ко на Тя, Го́споди, упова́х, Ты услы́шиши, Го́споди Бо́же мой. Я́ко рех: да не когда́ пора́дуют ми ся врази́ мои́: и внегда́ подвижа́тися нога́м мои́м, на мя велере́чеваша. Я́ко аз на ра́ны гото́в, и боле́знь моя́ предо мно́ю есть вы́ну. Я́ко беззако́ние мое́ аз возвещу́ и попеку́ся о гресе́ мое́м. Врази́ же мои́ живу́т и укрепи́шася па́че мене́, и умно́жишася ненави́дящии мя без пра́вды. Воздаю́щии ми зла́я возблага́я оболга́ху мя, зане́ гоня́х благосты́ню. Не оста́ви мене́, Го́споди Бо́же мой, не отступи́ от Мене́. Вонми́ в по́мощь мою́, Го́споди спасе́ния моего́.

Не оста́ви мене́, Го́споди Бо́же мой, не отступи́ от Мене́. Вонми́ в по́мощь мою́, Го́споди спасе́ния моего́.

Псалом 62:

Бо́же, Бо́же мой, к Тебе́ у́тренюю, возжада́ Тебе́ душа́ моя́, коль мно́жицею Тебе́ плоть моя́, в земли́ пу́сте и непрохо́дне, и безво́дне. Та́ко во святе́м яви́хся Тебе́, ви́дети си́лу Твою́ и сла́ву Твою́. Я́ко лу́чши ми́лость Твоя́ па́че живо́т, устне́ мои́ похвали́те Тя. Та́ко благословлю́ Тя в животе́ мое́м, о и́мени Твое́м воздежу́ ру́це мои́. Я́ко от ту́ка и ма́сти да испо́лнится душа́ моя́, и устна́ма ра́дости восхва́лят Тя уста́ моя́. А́ще помина́х Тя на посте́ли мое́й, на у́тренних поуча́хся в Тя. Я́ко был еси́ Помо́щник мой, и в кро́ве крилу́ Твое́ю возра́дуюся. Прильпе́ душа́ моя́ по Тебе́, мене́ же прия́т десни́ца Твоя́. Ти́и же всу́е иска́ша ду́шу мою́, вни́дут в преиспо́дняя земли́, предадя́тся в ру́ки ору́жия, ча́сти ли́совом бу́дут. Царь же возвесели́тся о Бо́зе, похва́лится всяк клены́йся Им, я́ко загради́шася уста́ глаго́лющих непра́ведная.

На у́тренних поуча́хся в Тя. Я́ко был еси́ Помо́щник мой, и в кро́ве крилу́ Твое́ю возра́дуюся. Прильпе́ душа́ моя́ по Тебе́, мене́ же прия́т десни́ца Твоя́.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Го́споди поми́луй. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Псалом 87:

Го́споди Бо́же спасе́ния моего́, во дни воззва́х, и в нощи́ пред Тобо́ю. Да вни́дет пред Тя моли́тва моя́: приклони́ у́хо Твое́ к моле́нию моему́, я́ко испо́лнися зол душа́ моя́, и живо́т мой аду прибли́жися. Привмене́н бых с низходя́щими в ров, бых я́ко челове́к без по́мощи, в ме́ртвых свобо́дь, я́ко я́звеннии спя́щии во гро́бе, и́хже не помяну́л еси́ ктому́, и ти́и от руки́ Твоея́ отринове́ни бы́ша. Положи́ша мя в ро́ве преиспо́днем, в те́мных и се́ни сме́ртней. На мне утверди́ся я́рость Твоя́, и вся во́лны Твоя́ наве́л еси́ на мя. Уда́лил еси́ зна́емых мои́х от Мене́, положи́ша мя ме́рзость себе́: пре́дан бых и не исхожда́х. О́чи мои́ изнемого́сте от нищеты́, воззва́х к Тебе́, Го́споди, весь день, возде́х к Тебе́ ру́це мои́. Еда́ ме́ртвыми твори́ши чудеса́? Или́ вра́чеве воскреся́т, и испове́дятся Тебе́? Еда́ пове́сть кто во гро́бе ми́лость Твою́, и и́стину Твою́ в поги́бели? Еда́ позна́на бу́дут во тьме чудеса́ Твоя́, и пра́вда Твоя́ в земли́ забве́нней? И аз к Тебе́, Го́споди, воззва́х и у́тро моли́тва моя́ предвари́т Тя. Вску́ю, Го́споди, отре́еши ду́шу мою́, отвраща́еши лице́ Твое́ от Мене́? Нищ есмь аз, и в труде́х от ю́ности моея́; возне́с же ся, смири́хся, и изнемого́х. На мне преидо́ша гне́ви Твои́, устраше́ния Твоя́ возмути́ша мя, обыдо́ша мя я́ко вода́, весь день одержа́ша мя вку́пе. Уда́лил еси́ от Мене́ дру́га и и́скренняго, и зна́емых мои́х от страсте́й.

Го́споди Бо́же спасе́ния моего́, во дни воззва́х, и в нощи́ пред Тобо́ю. Да вни́дет пред Тя моли́тва моя́: приклони́ у́хо Твое́ к моле́нию моему́.

Псалом 102:

Благослови́, душе́ моя́, Го́спода, и вся вну́тренняя моя́ и́мя свя́тое Его́. Благослови́, душе́ моя́, Го́спода, и не забыва́й всех воздая́ний Его́, очища́ющаго вся беззако́ния твоя́, исцеля́ющаго вся неду́ги твоя́, избавля́ющаго от истле́ния живо́т твой, венча́ющаго тя ми́лостию и щедро́тами, исполня́ющаго во благи́х жела́ние твое́: обнови́тся я́ко о́рля ю́ность твоя́. Творя́й ми́лостыни Госпо́дь, и судьбу́ всем оби́димым. Сказа́ пути́ Своя́ Моисе́ови, сыново́м Изра́илевым хоте́ния Своя́: Щедр и Ми́лостив Госпо́дь, Долготерпели́в и Многоми́лостив. Не до конца́ прогне́вается, ниже́ во век вражду́ет, не по беззако́нием на́шым сотвори́л есть нам, ниже́ по грехо́м на́шым возда́л есть нам. Я́ко по высоте́ небе́сней от земли́, утверди́л есть Госпо́дь ми́лость Свою́ на боя́щихся Его́. Ели́ко отстоя́т восто́цы от за́пад, уда́лил есть от нас беззако́ния на́ша. Я́коже ще́дрит оте́ц сы́ны, уще́дри Госпо́дь боя́щихся Его́. Я́ко Той позна́ созда́ние на́ше, помяну́, я́ко персть есмы́. Челове́к, я́ко трава́ дни́е eго́, я́ко цвет се́льный, та́ко оцвете́т, я́ко дух про́йде в нем, и не бу́дет, и не позна́ет ктому́ ме́ста своего́. Ми́лость же Госпо́дня от ве́ка и до ве́ка на боя́щихся Его́, и пра́вда Его́ на сыне́х сыно́в, храня́щих заве́т Его́, и по́мнящих за́поведи Его́ твори́ти я́. Госпо́дь на Небеси́ угото́ва Престо́л Свой, и Ца́рство Его́ все́ми облада́ет. Благослови́те Го́спода вси А́нгели Его́, си́льнии кре́постию, творя́щии сло́во Его́, услы́шати глас слове́с Его́. Благослови́те Го́спода вся Си́лы Его́, слуги́ Его́, творя́щии во́лю Его́. Благослови́те Го́спода вся дела́ Его́, на вся́ком ме́сте влады́чества Его́, благослови́, душе́ моя́, Го́спода.

На вся́ком ме́сте влады́чества Его́, благослови́, душе́ моя́, Го́спода.

Псалом 142:

Го́споди, услы́ши моли́тву мою́, внуши́ моле́ние мое́ во и́стине Твое́й, услы́ши мя в пра́вде Твое́й и не вни́ди в суд с рабо́м Твои́м, я́ко не оправди́тся пред Тобо́ю всяк живы́й. Я́ко погна́ враг ду́шу мою́, смири́л есть в зе́млю живо́т мой, посади́л мя есть в те́мных, я́ко ме́ртвыя ве́ка. И уны́ во мне дух мой, во мне смяте́ся се́рдце мое́. Помяну́х дни дре́вния, поучи́хся во всех де́лех Твои́х, в творе́ниих руку́ Твое́ю поуча́хся. Возде́х к Тебе́ ру́це мои́, душа́ моя́, я́ко земля́ безво́дная Тебе́. Ско́ро услы́ши мя, Го́споди, исчезе́ дух мой, не отврати́ лица́ Твоего́ от Мене́, и уподо́блюся низходя́щым в ров. Слы́шану сотвори́ мне зау́тра ми́лость Твою́, я́ко на Тя упова́х. Скажи́ мне, Го́споди, путь во́ньже пойду́, я́ко к Тебе́ взях ду́шу мою́. Изми́ мя от враг мои́х, Го́споди, к Тебе́ прибего́х. Научи́ мя твори́ти во́лю Твою́, я́ко Ты еси́ Бог мой. Дух Твой Благи́й наста́вит мя на зе́млю пра́ву. И́мене Твоего́ ра́ди, Го́споди, живи́ши мя, пра́вдою Твое́ю изведе́ши от печа́ли ду́шу мою́. И ми́лостию Твое́ю потреби́ши враги́ моя́ и погуби́ши вся стужа́ющыя души́ мое́й, я́ко аз раб Твой есмь.

Услы́ши мя, Го́споди, в пра́вде Твое́й и не вни́ди в суд с рабо́м Твои́м.

Дух Твой Благи́й наста́вит мя на зе́млю пра́ву.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Тропа́рь глас 4:

Сла́ва Отцу́ и Сы́ну и Свято́му Ду́ху. И ны́не и при́сно и во ве́ки веко́в. Ами́нь.

Глас 4: Еже от ве́ка утае́нное, и Ангелом несве́домое та́инство: Тобо́ю, Богоро́дице, су́щим на земли́ яви́ся, Бо́г в несли́тном соедине́нии воплоща́емь, и кре́ст во́лею на́с ра́ди восприи́м, и́мже воскреси́в первозда́ннаго, спасе́ от сме́рти ду́ши на́ша.

Здесь читается кафизма, положенная по дню, или сразу седальны:

Го́споди, поми́луй. (Три́жды)

Седален, глас 3:

Вне́мля зо́ву Госпо́дню и вся́ кра́сная ми́ра в уме́ты вмени́в, красне́йшия пусты́ни дости́гл еси́, в стране́ ди́вией и да́льней, иде́же полки́ де́монов му́жески отрази́в, Ангелы име́л еси́ собесе́дники и споспе́шники: сего́ ра́ди я́ко ди́вное украше́ние пусты́ни, тя́ восхваля́ем.

Сла́ва Отцу́ и Сы́ну и Свято́му Ду́ху. И ны́не и при́сно и во ве́ки веко́в. Ами́нь.

Глас 3: Яко еди́но христиа́н упова́ние и к Бо́гу предста́тельница, Влады́чице, со преподо́бным Ге́рманом моли́ Сы́на Твоего́ о рабе́х Твои́х.

Седален, глас 1:

Язы́ки неве́дущия науча́я, обраща́я же неве́рующия, ве́ру и́стинную насажда́л еси́, вся́ко тружда́яся и благоче́стием свои́м назида́я, те́мже и на́с, преподо́бне Ге́рмане, и́стинствовати научи́ и благоче́стная твори́ти.

Сла́ва Отцу́ и Сы́ну и Свято́му Ду́ху. И ны́не и при́сно и во ве́ки веко́в. Ами́нь.

Глас 1: Иму́ще Тя́, Пречи́стая Ма́ти, при́сное упова́ние и покро́в, на Тя́ наде́ющеся, вра́жиих наве́т не убои́мся, я́ко спаса́еши ду́ши на́ша от вся́ких лю́тых.

Полиеле́й:

Хвали́те И́мя Госпо́дне, хвали́те, раби́ Го́спода.

Аллилу́иа, аллилу́иа, аллилу́иа.

Благослове́н Госпо́дь от Сио́на, живы́й во Иерусали́ме.

Аллилу́иа, аллилу́иа, аллилу́иа.

Испове́дайтеся Го́сподеви, я́ко Благ, я́ко в век ми́лость Его́.

Аллилу́иа, аллилу́иа, аллилу́иа.

Испове́дайтеся Бо́гу Небе́сному, я́ко в век ми́лость Его́.

Аллилу́иа, аллилу́иа, аллилу́иа.

Велича́ние:

Ублажа́ем тя́, преподо́бне о́тче на́ш Ге́рмане, и чте́м святу́ю па́мять твою́, наста́вниче мона́хов и собесе́дниче Ангелов.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа,// сла́ва Тебе́, Бо́же. (Трижды)

Седа́льны:

Глас 3:

На бре́ннем корабли́, преподо́бне, бу́рную пучи́ну мо́ря пресека́еши, да́же до страны́ да́льния доше́д, иде́же о́стров Ело́вый бя́ше ти́ духо́вный кора́бль, на не́мже сло́вом благовествова́ния и де́лы благоче́стия дости́гл еси́ при́стани небе́сныя, ра́дуяся о Го́споде.

Глас 3: Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Влады́чице на́ша, Богоро́дице, Преве́чное Сло́во пло́тски на́м яви́вшая, к Тебе́ прибега́ем, я́ко к на́шему покро́ву и заступле́нию: покры́й на́с Твои́м моли́твенным омофо́ром от вся́ких наве́тов вра́жиих, да безпрепя́тственно возмо́жем служи́ти Сы́ну Твоему́.

Степе́нна, глас 4:

От ю́ности моея́/ мно́зи бо́рют мя стра́сти,/ но Сам мя заступи́// и спаси́, Спа́се мой.

Ненави́дящии Сио́на,/ посрами́теся от Го́спода,/ я́ко трава́ бо огне́м// бу́дете изсо́хше.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Святы́м Ду́хом/ вся́ка душа́ живи́тся,/ и чистото́ю возвыша́ется,// светле́ется Тро́йческим еди́нством, священнота́йне.

Го́споди, поми́луй. (Три́жды)

От Матфе́я Свята́го Ева́нгелия чте́ние

Сла́ва, Тебе́, Го́споди, сла́ва Тебе́.

Рече́ Госпо́дь Свои́м ученико́м: вся Мне предана́ суть Oтце́м Мои́м, и никто́же зна́ет Сы́на, то́кмо Oте́ц, ни Oтца́ кто зна́ет, то́кмо Сын, и ему́же а́ще во́лит Сын откры́ти. Прииди́те ко Мне вси тружда́ющиися и обремене́ннии, и Аз упоко́ю вы. Возми́те и́го Мое́ на себе́, и научи́теся от Мене́, я́ко кро́ток есмь и смире́н се́рдцем, и обря́щете поко́й душа́м ва́шим. И́го бо Мое́ бла́го, и бре́мя Мое́ легко́ есть.

Сла́ва, Тебе́, Го́споди, сла́ва Тебе́.

Псало́м 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя. Я́ко беззако́ние мое́ аз зна́ю и грех мой предо мно́ю есть вы́ну. Тебе́ Еди́ному согреши́х, и лука́вое пред Тобо́ю сотвори́х, я́ко да оправди́шися во словесе́х Твои́х и победи́ши, внегда́ суди́ти Ти. Се бо в беззако́ниих зача́т есмь, и во гресе́х роди́ мя ма́ти моя́. Се бо и́стину возлюби́л еси́, безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся, омы́еши мя, и па́че сне́га убелю́ся. Слу́ху моему́ да́си ра́дость и весе́лие, возра́дуются ко́сти смире́нныя. Отврати́ лице́ Твое́ от грех мои́х, и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́, и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́, и Ду́хом Влады́чним утверди́ мя. Научу́ беззако́нныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́, возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо, всесожже́ния не благоволи́ши. Же́ртва Бо́гу дух сокруше́н, се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския, тогда́ благоволи́ши же́ртву пра́вды, возноше́ние и всесожега́емая: тогда́ возложа́т на олта́рь Твой тельцы́.

Глас 6:

Сла́ва Отцу́ и Сы́ну и Свято́му Ду́ху./ Моли́твами преподобного Германа, / Ми́лостиве, очи́сти / мно́жества согреше́ний на́ших.

И ны́не и при́сно и во ве́ки веко́в. Ами́нь./ Моли́твами Богоро́дицы, / Ми́лостиве, очи́сти / мно́жества согреше́ний на́ших.

Поми́луй мя, Бо́же,/ по вели́цей ми́лости Твое́й,/ и по мно́жеству щедро́т Твои́х// очи́сти беззако́ние мое́.

Стихи́ра, глас 6

Го́споди, поми́луй. (12 раз)

Кано́н преподо́бнаго Ге́рмана, гла́с 3.

Пе́снь 1.

Ирмо́с: Во́ды дре́вле, ма́нием Боже́ственным, во еди́но со́нмище совокупи́вый, и раздели́вый мо́ре Изра́ильтеским лю́дем, Се́й Бо́г на́ш, препросла́влен е́сть, Тому́ Еди́ному пои́м, я́ко просла́вися.

Припев: Преподобне отче Германе, моли Бога о нас.

Воспе́ти помози́ ми́, Всеми́лостивый Спа́се, уго́дника Твоего́ Ге́рмана, просвеща́я помраче́нныя о́чи души́ моея́, да просла́вится се́й в концы́ вселе́нныя, сла́вный во святы́х Твои́х.

Оте́чества небе́снаго, преподо́бне Ге́рмане, от ю́ности взыска́ти восхоте́в и Бо́гу Еди́ному порабо́тати, небе́сному покро́ву вда́лся еси́, засту́пники вы́ну име́я Се́ргия и Ге́рмана Валаа́мских.

За́поведи Госпо́дни, преподо́бне, имы́й вы́ну в се́рдце свое́м, никогда́ же пу́том ле́ности вда́л еси́ те́ло твое́, при́сно тружда́яся и Боже́ственными озаре́нии просвеща́я ду́шу твою́.

Любо́вь к Бо́гу име́яй превы́ше всего́, Тому́ все́ житие́ свое́ пре́дал еси́, бесе́ду с вы́шними ли́ки наипа́че возлю́бль; оба́че и я́же к бра́тии любве́ не чужда́лся еси́, преподо́бне, ку́пно моля́ся и вопия́ с ни́ми: Иису́се Сладча́йший, спаси́ на́с гре́шных.

Богоро́дичен: Юнаго Ге́рмана, Богоро́дице, от сме́ртнаго неду́га исцели́ла еси́, того́ горя́чему моле́нию вне́мля: те́мже и на́с не пре́зри, к Тебе́ припа́дающих и в моли́тву к Тебе́ того́ призыва́ющих.

Пе́снь 3.

Ирмо́с: Иже от не су́щих вся́ приведы́й, Сло́вом созида́емая, соверша́емая Ду́хом, Вседержи́телю Вы́шний, в любви́ Твое́й утверди́ мене́.

Богому́дрый Наза́рий на Валаа́м из Саро́ва прише́д, к вну́треннему де́ланию любо́вь водвори́, те́мже и ты́, преподо́бне, приобщи́вся сея́ благода́ти, духо́вными озаре́нии угото́вал еси́ ду́шу твою́ на по́двиг благове́стия.

Иже виногра́да Христо́ва ро́ждие плодоно́снии су́ще, Се́ргие и Ге́рмане Валаа́мстии, гроздьми́ доброде́телей но́ваго Ге́рмана напита́вшии, вино́м Боже́ственнаго весе́лия испо́лните и на́ша сердца́.

Моли́твою и дея́нием угото́вал еси́ ду́шу твою́ на вся́кое послуша́ние, те́мже и страны́ да́льния дости́гл еси́, ку́пно с бра́тиею благове́стническою приводя́ жи́тели Аля́ски ко Иису́су Сладча́йшему.

Богоро́дичен: Блага́го Царя́ Блага́я Ма́ти, благодея́ния на рабы́ Твоя́ при́сно излива́ющая, на вся́кое благо́е де́ло наста́ви на́с, от вся́ких де́йств злы́х огражда́ющи.

Седа́лен, гла́с 3. Подо́бен: Красоте́ де́вства.

Приспе́ дне́сь па́мять твоя́, о́тче Ге́рмане прехва́льне, веселя́щи избра́нное твое́ ста́до: просвеща́й на́с чуде́с твои́х светлостьми́, от честны́х твои́х моще́й исходя́щих, погаша́й пла́мень страсте́й на́ших и ороша́й ве́рных ра́зумы, любо́вию при́сно тя́ сла́вящих.

Сла́ва, и ны́не, Богоро́дичен:

Ра́дуйся, Благода́тная Де́во, я́ко избра́нника Твоего́ но́ваго на́м явля́еши, в се́верной пусты́ни прозя́бшаго и небе́сными да́ры новопросвеще́нный кра́й облагоуха́вшаго, те́м Тя́ Влады́чицу ми́ра благода́рными пе́сньми почти́м.

Пе́снь 4.

Ирмо́с: Положи́л еси́ к на́м тве́рдую любо́вь, Го́споди: Единоро́днаго бо Твоего́ Сы́на за ны́ на сме́рть да́л еси́. Те́мже Ти́ зове́м, благодаря́ще: сла́ва си́ле Твое́й, Го́споди.

Образ до́браго па́стыря и чадолюби́ваго отца́ яви́л еси́ на́м, преподо́бне, я́ко убо́гим, немощны́м и боля́щим бы́л еси́ по́мощь и исцеле́ние, сирота́м же кро́в и науче́ние; те́мже и на́с я́ко си́рых не лиши́ своего́ моли́твенного покро́ва.

Ге́рмане преподо́бне, дивля́хуся лю́дие, ка́ко мо́жеши в лесу́ еди́н жи́ти? Не еди́н а́з, ре́кл еси́, но со мно́ю Бо́г, Иже везде́ сы́й, и Ангели Его́ святи́и, те́мже ка́ко возмо́жно уныва́ти, таковы́я собесе́дники име́я? Ны́не же небе́сных сожи́телю, на́с су́щих на земли́ не оста́ви.

Аля́ски храни́телю, но́вых наро́дов слугу́ и пе́стуна себе́ именова́вый, и по сме́рти свое́ попече́ние о си́х простира́еши. Се́ ны́не и мы́ твои́ми словесы́ взыва́ем ти́: бу́ди на́м оте́ц и покрови́тель, отри́ сле́зы беззащи́тных сиро́т, прохлади́ сердца́, жа́ром печа́ли та́ющая, да́ждь разуме́ти, что́ е́сть отра́да Госпо́дня.

Богоро́дичен: Прииди́те воспои́м Пречи́стую Де́ву, Свои́м смире́нием е́же Евы преле́стное испра́вившую, и но́ваго Ада́ма на́м я́вльшую, да но́вое усыновле́ние восприи́мше, насле́дницы бу́дем ве́чныя жи́зни.

Пе́снь 5

Ирмо́с: К Тебе́ у́тренюю, все́х Творцу́, преиму́щему вся́к у́м ми́рови, зане́ све́т повеле́ния Твоя́, в ни́хже наста́ви мя́.

Ада́му первозда́нному уподо́бился еси́, егда́ мно́гими скорбьми́, бде́нии и моли́твами очи́стившу ти́ ду́шу твою́ и в красоту́ пе́рвую обле́кшу, лесни́и зве́ри повинова́хуся тебе́, е́же ра́йское и ца́рское в тебе́ обоня́в.

Чу́вственныя стра́сти бразда́ми воздержа́ния и моли́твою непреста́нною препобежда́я, на высоту́ безстра́стия дости́гл еси́, сего́ ра́ди припа́даем ти́, я́ко к благода́тному врачу́: уврачу́й на́ша стра́сти и подви́гни на дела́ блага́я.

Еди́ному Бо́гу та́йно порабо́тати хотя́, в пеще́ре посели́лся еси́, е́же стра́стное пло́ти тща́ся погребсти́, да душе́ю воскре́снеши, небе́сными озаре́нии осиява́емь, ве́чныя Па́схи предвкуша́я сла́дость.

В ра́й мы́сленный доброде́телей вше́л еси́, иде́же произрасти́л еси́ многоразли́чныя цве́ты доброде́лания, и́миже в ми́ре благоуха́еши, о́тче Ге́рмане, да́же и до ны́не.

Богоро́дичен: Святы́х Ангелов ли́цы пою́т благоле́пие Твое́, а́з же гре́шный, Пренепоро́чная, молю́ Тя́: отжени́ от мене́ неле́пая бесо́вская мечта́ния, в тишине́ соблюда́ющи се́рдце мое́.

Пе́снь 6.

Ирмо́с: Бе́здна после́дняя грехо́в обы́де мя́, и исчеза́ет ду́х мо́й; но простры́й, Влады́ко, высо́кую Твою́ мы́шцу, я́ко Петра́ мя́, Упра́вителю, спаси́.

Ева́нгельскаго ра́ди благовествова́ния да́же до коне́ц вселе́нныя преше́л еси́ и ме́сто но́вое, о́стров Ело́вый, но́вый Валаа́м наре́кл еси́, к оте́чественному Валаа́му любо́вь показу́я, в не́м же но́выя бра́тия, лю́ди новопросвеще́нныя, стяжа́л еси́ сло́вом пропове́дания и де́лы благоче́стия.

Госпо́дь просла́ви собра́тий твои́х, преподо́бне, я́ко вои́стину апо́стольским подвиго́м уподо́бишася дея́ния и́х: в ли́це му́ченичестем пое́т Иувена́лий, в чи́не святи́тельстем, Иоаса́ф и Инноке́нтий и и́ны с ни́ми, и мы́ ку́пно к Бо́гу воспое́м: сла́ва Тебе́, показа́вшему на́м све́т.

Освяще́ние и венча́ние прие́млют труды́ твои́ и твои́х соблагове́стников, преподо́бне, испове́данием и му́ченическими кровьми́ алеу́та Петра́, его́же кре́пкой ве́ре и терпе́нию подиви́лся еси́; те́мже тебе́ после́дующе, воззове́м: святы́й новому́чениче Пе́тре, моли́ Бо́га о на́с.

Истинныя ве́ры оправда́ние яви́л еси́ житие́м твои́м, преподо́бне, те́мже и науче́ние сло́ва твоего́, я́ко сотво́ршаго, де́йством проявля́шеся, жа́ждущая сердца́ влеча́ ко исправле́нию, тебе́ зову́щу: сла́ва судьба́м святы́м Ми́лостиваго Бо́га.

Богоро́дичен: Гряди́те лю́дие, да ви́дим, я́ко во́ды бу́рныя, иму́щия о́стров поглоти́ти, кро́ткому Ге́рману повину́ются: пред ико́ною Бо́жия Ма́тери смиря́ются и в бе́здну океа́на па́ки возвраща́ются; мы́ же волна́ми жите́йскими обурева́еми, со избра́нником Бо́жия Ма́тери возопии́м: Пресвята́я Богоро́дице, спаси́ на́с.

Конда́к, гла́с 8:

Валаа́ма постри́женниче и Бо́жией Ма́тери возлю́бленне, подвиго́м дре́вних пусты́нников но́вый ревни́телю, моли́тву прие́м, я́ко копие́ и щи́т, стра́шен де́моном и тьме́ язы́честей яви́лся еси́, сего́ ра́ди вопие́м ти́: преподо́бне Ге́рмане, моли́ Христа́ Бо́га спасти́ся душа́м на́шим.

Икос:

От ро́да на́шего бы́в и от ю́ности ко Го́споду прибе́г, Ге́рману Валаа́мскому и́менем и по́двигом подо́бный, растя́ше в ме́ру дре́вних отце́в, в терпе́нии плодоприне́сших; и посла́ся кро́ткий се́й ко алеу́тским лю́дем, еще́ не просвеще́нным: же́стоко бе́ его́ жи́тельство между́ язы́ка препро́ста, же́стоко же па́че и от соплеме́нник до́брым увеща́нием противле́ние; оба́че и те́х и си́х ми́луя, пе́стоваше кро́тость Ге́рманова; за вся́ та́я сла́вяще па́мять твою́, Ге́рмане преподо́бне, взыва́ем ти́: моли́ Христа́ Бо́га, спасти́ся душа́м на́шим.

Пе́снь 7.

Ирмо́с: Якоже дре́вле благочести́выя три́ о́троки ороси́л еси́ в пла́мени халде́йстем, све́тлым Божества́ огне́м и на́с озари́, благослове́н еси́, взыва́ющия, Бо́же оте́ц на́ших.

Естества́ чи́н пременя́ется, Ду́ху Боже́ственному де́йствующу: Его́же озаре́нии, преподо́бне, просвети́в душе́вныя о́чи твои́, зре́л еси́ да́льняя, я́ко бли́з су́щая, и бу́дущая, я́ко настоя́щая, судьбы́ Боже́ственныя пове́дая к назида́нию и исправле́нию.

Ревну́я о небе́сных на небеси́ сокро́вища своя́ полага́л еси́, те́мже и́щущии земны́х сокро́вищ ничто́же обрето́ша в ке́ллии твое́й; и на́с ны́не, о́тче безсре́бренниче, научи́ небе́сная сокро́виществовати и се́рдце свое́ к еди́ному безце́нному прилага́ти.

Мно́ги ско́рби пра́веднику, и от все́х и́х избавля́ше тя́ Госпо́дь, небе́сною ра́достию наполня́я се́рдце твое́, ея́же ны́не наслажда́ешися в невече́рнем дни́ Ца́рствия Христо́ва. И о на́с моли́ся, преподо́бне, да на́ша ско́рби Госпо́дь в ра́дость претвори́т.

Богоро́дичен: Ангелов Ра́дование и мона́шескаго чи́на Наста́вницу и всего́ ро́да христиа́нскаго Покрови́тельницу, прииди́те вси́ почти́м и поклони́мся, я́ко Цари́це небесе́ и земли́ и земноро́дных к Бо́гу непреста́нной Предста́тельнице.

Пе́снь 8.

Ирмо́с: Нестерпи́мому огню́ соедини́вшеся, богоче́стия предстоя́ще, ю́ноши, пла́менем же неврежде́ни, Боже́ственную пе́снь поя́ху: благослови́те, вся́ дела́ Госпо́дня Го́спода, и превозноси́те во вся́ ве́ки.

Не́мощь твоя́, ста́рость и слепота́ очи́ма, ничто́же можа́ше возбрани́ти ти́ хода́тайствующу за лю́ди пред вла́сть иму́щими, и́хже моли́л еси́ ми́лость твори́ти па́че же́ртвы, да са́ми у Го́спода обря́щут ю́; ны́не же сы́й на небеси́, та́кожде и на́с не лиши́ своего́ хода́тайства.

Ангельским пе́нием оглаша́шеся лесна́я ке́ллия твоя́, тебе́ еди́ному пою́щу, я́ко лю́дем диви́тися зело́; та́же служа́ше ти́ Ангел, благослове́нием Иорда́новым освяти́в во́ды, я́ко зва́ти ти́: благослови́те вся́ дела́ Госпо́дня Го́спода и превозноси́те во вся́ ве́ки.

В ри́зу спасе́ния и в оде́жду весе́лия обо́лкся, сотка́нную от мно́гих трудо́в и скорбе́й, вше́л еси́ в небе́сный черто́г Царя́ Христа́, иде́же ку́пно с ли́ки апо́столов и преподо́бных пи́ра ра́дости ве́чно наслажда́ешися.

Богоро́дичен: Огня́ нестерпи́маго подо́бием греси́ на́ши сожига́ют души́ блага́я начина́ния, сего́ ра́ди припа́даем Ти́, я́ко к Влады́чице небесе́ и земли́: ороси́ на́ша сердца́, да произрасте́т вся́кое де́ло благо́е.

На 9-й песни поем песнь Пресвятыя Богородицы:

Вели́чит душа́ Моя́ Го́спода и возра́довася дух Мой о Бо́зе Спа́се Мое́м.

К коемуждо стиху припеваем: Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Я́ко призре́ на смире́ние рабы́ Своея́, се бо, от ны́не ублажа́т Мя вси ро́ди.

Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Я́ко сотвори́ Мне вели́чие Си́льный, и свя́то и́мя Его́, и ми́лость Его́ в ро́ды родо́в боя́щимся Его́.

Сотвори́ держа́ву мы́шцею Свое́ю, расточи́ го́рдыя мы́слию се́рдца их.

Низложи́ си́льныя со престо́л, и вознесе́ смире́нныя, а́лчущия испо́лни благ, и богатя́щияся отпусти́ тщи.

Восприя́т Изра́иля о́трока Своего́, помяну́ти ми́лости, я́коже глаго́ла ко отце́м на́шим, Авраа́му и се́мени его́ да́же до ве́ка.

Песнь 9

Ирмо́с: Но́вое чу́до и боголе́пное, деви́ческую бо две́рь затворе́нную я́ве прохо́дит Госпо́дь, на́г во вхо́де, и плотоно́сец яви́ся во исхо́де Бо́г, и пребыва́ет две́рь затворе́на; Сию́ неизрече́нно, я́ко Богома́терь велича́ем.

Сла́ва Тебе́ Бо́же, яви́вшему на́м ди́внаго уго́дника Твоего́, его́же моли́твами сохрани́ на́с от вся́каго наве́та вра́жия и душетле́нных страсте́й, вся́кому же бла́гу наста́ви, да ве́чнаго муче́ния избе́гше, дости́гнем Ца́рствия Твоего́.

Приспе́ ве́чер живота́ твоего́, преподо́бне: кни́га твои́х дея́ний апо́стольских заверши́ся в невече́рнем осия́нии лица́ твоего́, зна́менуя сла́ву твою́ в оби́телех небе́сных; и́хже и на́м помози́ дости́гнути твои́м предста́тельством.

Огненный сто́лп ви́ден бы́сть, зна́менуя отше́ствие преподо́бнаго от земли́ на не́бо, я́ко зело́ диви́тися лю́дем; сего́ ра́ди к нему́ воззове́м: бу́ди на́м при́сно о́гненный сто́лп, светя́й и указу́яй пу́ть в го́рняя.

Истинному ученику́ Твоему́, Го́споди, недосто́йными усты́ вознесо́хом хвалы́, сла́вяще Тя́, ди́внаго во святы́х Твои́х, его́же моли́твенным предста́тельством сохрани́ страну́ сию́ и гра́ды ея́ от бе́д и губи́тельства, подая́ на́м ве́лию ми́лость.

Богоро́дичен: Мари́е, Бо́жие жили́ще и чистоты́ наста́внице, мене́ ста́вша жили́ще грехо́вных скве́рн и нечистоты́ и впа́дша в се́ти нечи́стых духо́в, Твои́м заступле́нием чи́ста покажи́ и па́ки жили́ще Бо́гу сотвори́, да Тя́ благоче́стно велича́ю.

Свети́лен. Подо́бен: Жены́, услы́шите.

Светода́вче Го́споди, моли́твами на́шего свети́льника благоче́стия, преподо́бнаго Ге́рмана, просвети́ невече́рним све́том Твои́м страну́ сию́ и на́с, ве́рою Тебе́ служа́щих и благоче́стно пра́зднующих светоно́сную па́мять его́.

Сла́ва, и ны́не, Богоро́дичен:

Богоневе́сто, свеще́ та́инственная, де́йством Ду́ха Боже́ственнаго, Предве́чный Све́т ми́ру яви́вшая, и на́м, су́щим во тьме́ неразу́мия, возсия́й све́т и́стины и спаси́ все́х благоче́стно Тя́, я́ко Ма́терь Бо́жию, велича́ющих.

Хвали́тны псалмы́, глас 8:

Вся́кое дыха́ние да хва́лит Го́спода./ Хвали́те Го́спода с небе́с,/ хвали́те Его́ в вы́шних.// Тебе́ подоба́ет песнь Бо́гу.

Хвали́те Его́ вси а́нгели Его́,/ хвали́те Его́ вся си́лы Его́.// Тебе́ подоба́ет песнь Бо́гу.

Сти́хиры, глас 8:

Стих: Сотвори́ти в них суд напи́сан/ сла́ва сия́ бу́дет всем преподо́бным Его́.

Кро́ткий и смире́нный Ге́рман, / сла́вы Бо́жия ревни́тель сы́й, / на благове́стие Христо́во посыла́ется: / усты́ у́бо благовествова́ше, / благоче́стием же утвержда́ше, / те́мже сла́вная насле́дова на небеси́, / и от на́с да бу́дет сла́вим на земли́, / его́же моли́твами, Христе́ Бо́же, / спаси́ ду́ши на́ша.

Стих: Хвали́те Его́ на си́лах Его́,/ хвали́те Его́ по мно́жеству вели́чествия Его́.

Слове́с Госпо́дних благове́стниче, / и си́х благоче́стный де́лателю, / я́ко си́лен Ду́ха Свята́го благода́тию, / не́мощи немощны́х носи́л еси́: / я́коже пе́стун о младе́нцех / и я́ко оте́ц о ча́дех пеки́йся, / де́лы же и словесы́ вся́ко наставля́я, / те́мже и на́с посети́, / исцеля́я не́мощи на́ша.

Стих: Хвали́те Его́ в тимпа́не и ли́це,/ хвали́те Его́ во стру́нах и орга́не.

Ты́ ре́кл еси́ преподо́бне: / от сего́ дне́ и от сего́ часа́, / возлю́бим Бо́га превы́ше всего́, / сотвори́м святу́ю во́лю Его́, / да блага́я насле́дуем. / О, Ге́рмане, ди́вный наста́вниче, / Правосла́вия утвержде́ние, / сла́вы Бо́жия пропове́дание, / на́м же гре́шным науче́ние!

Стих: Хвали́те Его́ в кимва́лех доброгла́сных, хвали́те Его́ в кимва́лех восклица́ния. / Вся́кое дыха́ние да хва́лит Го́спода.

О, пресла́внаго чудесе́! / Но́вая страна́ освяща́ется, / и́бо чудотво́рец Ге́рман / на высоту́ возноси́мь, явля́ется дне́сь: / ди́вен Бо́г во святы́х Свои́х, / с на́ми Бо́г, разуме́йте язы́цы! / Правосла́вию от Ге́рмана науча́йтеся, / его́же моли́твами, Христе́ Бо́же, / спаси́ ду́ши на́ша.

Глас 8: Сла́ва Отцу́ и Сы́ну и Свято́му Ду́ху

На ле́ствицу доброде́телей ди́вно возше́л еси́, преподо́бне, прии́м бо моли́тву, се́рдца теплоту́ и сле́зы, очи́стил еси́ у́м от по́мыслов су́етных и се́рдце от многообра́зия чу́вств, и в ра́йское безстра́стие дости́гл еси́, вы́шних та́инств виде́нии озаря́емь, я́же на небеса́ возво́дят и творя́т ве́дети Бо́га.

Глас 8: И ны́не и при́сно и во ве́ки веко́в. Ами́нь.

Влады́чице, приими́ моли́тву ра́б Твои́х, и изба́ви на́с от вся́кия ну́жды и печа́ли.

Славосло́вие вели́кое:

Сла́ва в вы́шних Бо́гу, и на земли́ мир, в челове́цех благоволе́ние. Хва́лим Тя, благослови́м Тя, кла́няем Ти ся, славосло́вим Тя, благодари́м Тя, вели́кия ра́ди сла́вы Твоея́. Го́споди Царю́ Небе́сный, Бо́же О́тче Вседержи́телю, Го́споди, Сы́не Единоро́дный, Иису́се Христе́, и Святы́й Ду́ше. Го́споди Бо́же, А́гнче Бо́жий, Сы́не Оте́чь, взе́мляй грех ми́ра, поми́луй нас; взе́мляй грехи́ ми́ра, приими́ моли́тву на́шу; седя́й одесну́ю Отца́, поми́луй нас. Я́ко Ты еси́ еди́н Свят, Ты еси́ еди́н Госпо́дь, Иису́с Христо́с, в сла́ву Бо́га Отца́. Ами́нь.

На всяк день благословлю́ Тя, и восхвалю́ И́мя Твое́ во ве́ки, и в век ве́ка.

Сподо́би, Го́споди, в день сей без греха́ сохрани́тися нам. Благослове́н еси́, Го́споди, Бо́же оте́ц на́ших, и хва́льно и просла́влено И́мя Твое́ во ве́ки. Ами́нь.

Бу́ди, Го́споди, ми́лость Твоя́ на нас, я́коже упова́хом на Тя.

Благослове́н еси́, Го́споди, научи́ мя оправда́нием Твои́м. (Три́жды)

Го́споди, прибе́жище был еси́ нам в род и род. Аз рех: Го́споди, поми́луй мя, исцели́ ду́шу мою́, я́ко согреши́х Тебе́. Го́споди, к Тебе́ прибего́х, научи́ мя твори́ти во́лю Твою́, я́ко Ты еси́ Бог мой: я́ко у Тебе́ исто́чник живота́, во све́те Твое́м у́зрим свет. Проба́ви ми́лость Твою́ ве́дущим Тя.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Три́жды)

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Святы́й Безсме́ртный, поми́луй нас.

Святы́й Бо́же, Святы́й Кре́пкий, Святы́й Безсме́ртный, поми́луй нас.

Тропа́рь, глас 4:

Утверди́, Бо́же, святу́ю правосла́вную ве́ру, правосла́вных христиа́н во век ве́ка.

Честне́йшую Херуви́м и Сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу, Тя велича́ем.

Сла́ва, и ны́не. Го́споди, поми́луй. (Три́жды) Благослови́.

Господи Иисусе Христе, Сыне Божий, моли́твами Пречи́стыя Своея́ Ма́тере, преподобного Германа Аляскинского, преподобных и богоносных отец наших и всех святы́х, поми́луй и спаси нас я́ко Благ и Челове́колюбец.

Многоле́тие:

Вели́каго Господи́на и Отца́ на́шего Кири́лла,/ Святе́йшаго Патри́арха Моско́вского и всея́ Руси́,/ и Господи́на на́шего (Высоко-) Преосвяще́ннейшаго (имярек),/ (архи-)епи́скопа (митрополита (титул)),/ богохрани́мую страну́ на́шу Росси́йскую,/ и вся правосла́вныя христи́аны,// Го́споди, сохрани́ их на мно́гая ле́та.