Шрифт

▲

Богослужебные тексты для домашнего употребления

Дни памяти святых

Последование Всеношного бдения в день памяти святителя Дионисия Суздальского. Для домашнего (келейного) совершения

Оглавление

ВСЕНО́ЩНОЕ БДЕ́НИЕ

ВЕЛИ́КАЯ ВЕЧЕ́РНЯ

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас. Ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Трижды.)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, (трижды). Сла́ва, и ны́не:

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Таже, Го́споди, поми́луй, (12), Сла́ва, и ны́не:

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 103:

Поется часть псалма:

Благослови́, душе́ моя́, Го́спода. / Благослове́н еси́, Го́споди. / Го́споди, Бо́же мой, возвели́чился еси́ зело́. / Благослове́н еси́, Го́споди. / Во испове́дание и в велеле́поту обле́клся еси́. / Благослове́н еси́, Го́споди. / Посреде́ гор про́йдут во́ды. / Ди́вна дела́ Твоя́, Го́споди. / Вся прему́дростию сотвори́л еси́. / Сла́ва Ти, Го́споди, сотвори́вшему вся.

Или читается псалом полностью:

Благослови́, душе́ моя́, Го́спода. Го́споди, Бо́же мой, возвели́чился еси́ зело́. Во испове́дание и в велеле́поту обле́клся еси́. Одея́йся све́том, я́ко ри́зою, простира́яй не́бо, я́ко ко́жу. Покрыва́яй вода́ми превы́спренняя Своя́, полага́яй о́блаки на восхожде́ние Свое́, ходя́й на крилу́ ве́треню. Творя́й А́нгелы Своя́ ду́хи и слуги́ Своя́ пла́мень о́гненный. Основа́яй зе́млю на тве́рди ея́, не преклони́тся в век ве́ка. Бе́здна, я́ко ри́за, одея́ние ея́, на гора́х ста́нут во́ды, от запреще́ния Твоего́ побе́гнут, от гла́са гро́ма Твоего́ убоя́тся. Восхо́дят го́ры и нисхо́дят поля́ в ме́сто, е́же основа́л еси́ им. Преде́л положи́л еси́, eго́же не пре́йдут, ниже́ обратя́тся покры́ти зе́млю. Посыла́яй исто́чники в де́брех, посреде́ гор про́йдут во́ды. Напая́ют вся зве́ри се́льныя, ждут она́гри в жа́жду свою́. На ты́х пти́цы небе́сныя привита́ют, от среды́ ка́мения дадя́т глас. Напая́яй го́ры от превы́спренних Свои́х, от плода́ дел Твои́х насы́тится земля́. Прозяба́яй траву́ ското́м, и злак на слу́жбу челове́ком, извести́ хлеб от земли́. И вино́ весели́т се́рдце челове́ка, ума́стити лице́ еле́ем, и хлеб се́рдце челове́ка укрепи́т. Насы́тятся древа́ польска́я, ке́дри Лива́нстии, и́хже еси́ насади́л. Та́мо пти́цы вогнездя́тся, ероди́ево жили́ще предводи́тельствует и́ми. Го́ры высо́кия еле́нем, ка́мень прибе́жище за́яцем. Сотвори́л есть луну́ во времена́, со́лнце позна́ за́пад свой. Положи́л еси́ тму, и бысть нощь, в не́йже про́йдут вси зве́рие дубра́внии. Ски́мни рыка́ющии, восхи́тити и взыска́ти от Бо́га пи́щу себе́. Возсия́ со́лнце и собра́шася и в ло́жах свои́х ля́гут. Изы́дет челове́к на де́ло свое́ и на де́лание свое́ до ве́чера. Я́ко возвели́чишася дела́ Твоя́, Го́споди, вся прему́дростию сотвори́л еси́, испо́лнися земля́ тва́ри Твоея́. Сие́ мо́ре вели́кое и простра́нное, та́мо га́ди, и́мже несть числа́, живо́тная ма́лая с вели́кими, та́мо корабли́ препла́вают, змий сей, eго́же созда́л еси руга́тися eму́. Вся к Тебе́ ча́ют, да́ти пи́щу им во бла́го вре́мя. Да́вшу Тебе́ им соберу́т, отве́рзшу Тебе́ ру́ку вся́ческая испо́лнятся бла́гости, отвра́щшу же Тебе́ лице́, возмяту́тся, отъи́меши дух их, и исче́знут, и в персть свою́ возвратя́тся. По́слеши Ду́ха Твоего́, и сози́ждутся, и обнови́ши лице́ земли́. Бу́ди сла́ва Госпо́дня во ве́ки, возвесели́тся Госпо́дь о де́лех Свои́х, призира́яй на зе́млю, и творя́й ю́ трясти́ся, прикаса́яйся гора́м, и дымя́тся. Воспою́ Го́сподеви в животе́ мое́м, пою́ Бо́гу моему́, до́ндеже есмь, да услади́тся Ему́ бесе́да моя́, аз же возвеселю́ся о Го́споде. Да исче́знут гре́шницы от земли́, и беззако́нницы, я́коже не бы́ти им. Благослови́, душе́ моя́, Го́спода.

Со́лнце позна́ за́пад свой. Положи́л еси́ тму, и бысть нощь. Я́ко возвели́чишася дела́ Твоя́, Го́споди, вся прему́дростию сотвори́л еси́.

Сла́ва, и ны́не: Аллилу́иа, аллилу́иа, аллилу́иа, сла́ва Тебе́ Бо́же. Трижды.

Блаже́н муж:

Блаже́н муж, и́же не и́де на сове́т нечести́вых.

Аллилу́иа, аллилу́иа, аллилу́иа.

Я́ко весть Госпо́дь путь пра́ведных, и путь нечести́вых поги́бнет.

Аллилу́иа, аллилу́иа, аллилу́иа.

Рабо́тайте Го́сподеви со стра́хом и ра́дуйтеся Ему́ с тре́петом.

Аллилу́иа, аллилу́иа, аллилу́иа.

Блаже́ни вси наде́ющиися Нань.

Аллилу́иа, аллилу́иа, аллилу́иа.

Воскресни́, Го́споди, спаси́ мя, Бо́же мой.

Аллилу́иа, аллилу́иа, аллилу́иа.

Госпо́дне есть спасе́ние, и на лю́дех Твои́х благослове́ние Твое́.

Аллилу́иа, аллилу́иа, аллилу́иа.

Сла́ва Отцу́ и Сы́ну и Свято́му Духу.

Аллилу́иа, аллилу́иа, аллилу́иа.

И ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Го́споди, воззва́х, глас 5:

Го́споди, воззва́х к Тебе́, услы́ши мя./ Услы́ши мя, Го́споди./ Го́споди, воззва́х к Тебе́, услы́ши мя:/ вонми́ гла́су моле́ния моего́,/ внегда́ воззва́ти ми к Тебе́.// Услы́ши мя, Го́споди.

Да испра́вится моли́тва моя́,/ я́ко кади́ло пред Тобо́ю,/ воздея́ние руку́ мое́ю/ – же́ртва вече́рняя.// Услы́ши мя, Го́споди.

Стихи́ры пра́здника, глас 5:

Стих: А́ще беззако́ния на́зриши, Го́споди, Го́споди, кто постои́т? Я́ко у Тебе́ очище́ние есть.

Ра́дуйся, Ки́ево-Пече́рское воспита́ние, / собесе́дниче и спо́стниче преподо́бному Се́ргию. / Ра́дуйся, Нижегоро́дския земли́ подви́жниче, / преподо́бных Евфи́мия и Мака́рия наста́вниче. / Ра́дуйся, Вознесе́нския оби́тели нача́льниче / и Су́здальския земли́ архипа́стырю. / Ра́дуйся, о все́й земли́ Росси́йстей те́плый моли́твенниче / и пред Бо́гом наде́жный засту́пниче, / ра́дуйся, святи́телю о́тче Диони́сие.

Стих: И́мене ра́ди Твоего́ потерпе́х Тя, Го́споди, потерпе́ душа́ моя́ в сло́во Твое́, упова́ душа́ моя́ на Го́спода.

Стих: От стра́жи у́тренния до но́щи, от стра́жи у́тренния да упова́ет Изра́иль на Го́спода.

Радуйся, вели́кия Ла́вры о́трасле духо́вная, / смире́нием, терпе́нием и посто́м все́х удиви́вый. / Ра́дуйся, на брега́х Во́лги оби́тель чу́дную основа́вый / и хра́м Вознесе́ния Госпо́дня устро́ивый, / ра́дуйся, мно́жество и́ноков собра́вый / и нача́льником от Христа́ над ни́ми поста́вленный, / ра́дуйся, двана́десять и́ноков на про́поведь Ева́нгелия посла́вый / и во страны́ и гра́ды ве́рхния напра́вивый. / Ра́дуйся, святи́телю о́тче Диони́сие.

Стих: Я́ко у Го́спода ми́лость, и мно́гое у Него́ избавле́ние, и Той изба́вит Изра́иля от всех беззако́ний eго́.

Ра́дуйся, святи́телю о́тче Диони́сие, / Су́здальския страны́ храни́телю, / ра́дуйся, моля́щимся кре́пкое упова́ние / и христиа́ном му́дрый учи́телю. / Ра́дуйся, Правосла́вия ревни́телю / и благоче́стия храни́телю, / ра́дуйся, е́реси стриго́льников обличи́телю / и неуста́нный в труде́х святи́телю. / Ра́дуйся все́м на́м засту́пниче необори́мый / и пред Бо́гом те́плый предста́телю.

Стих: Хвали́те Го́спода вси язы́цы, похвали́те Его́ вси лю́дие.

Ра́дуйся, Це́ркве Правосла́вныя све́тлое украше́ние / и Христо́вых за́поведей изве́стный храни́телю. / Ра́дуйся, земна́го оте́чества на́шего све́тлое ра́дование / и заблу́ждших к све́ту богопозна́ния путеводи́телю. / Ра́дуйся, мона́хов преди́вный наста́вниче / и мирски́х челове́к те́плый засту́пниче. / Ра́дуйся, Су́здальскаго уде́ла украше́ние / и Нижегоро́дскаго кра́я удобре́ние. / Ра́дуйся, я́ко Росси́йския земли́ светоза́рное свети́ло яви́лся еси́ / и хра́м Ду́ха Всесвята́го обре́лся еси́, / ра́дуйся, преди́вный иера́рше Диони́сие.

Стих: Я́ко утверди́ся ми́лость Его́ на нас, и и́стина Госпо́дня пребыва́ет во век.

Ра́дуйся, во епи́скопа Ни́жняго Нова́града поста́вленный, / осия́нием доброде́телей христиа́нских всеукра́шенный. / Ра́дуйся, от е́реси стриго́льников защи́тниче му́жественный / Це́ркве и всея́ земли́ Росси́йския яви́выйся. / Ра́дуйся, и́же Боже́ственною ре́вностию распала́емый, / разори́л еси́ тму́ ерети́ческого нече́стия. / Ра́дуйся, му́дростию слове́с твои́х кня́зя му́жески обличи́вый, / правосла́вныя зако́ны утвержда́я. / Ра́дуйся, в Константи́не гра́де все́х свои́ми доброде́тельми удиви́вый / и за ре́вность ве́лию о Го́споде / митрополи́том Ру́сския земли́ поста́вленный, / святи́телю о́тче на́ш Диони́сие, / ты́ же моли́ся о спасе́нии ду́ш на́ших.

Глас 6: Сла́ва Отцу́ и Сы́ну и Свято́му Ду́ху.

Вели́кия Ки́ево-Пече́рския Ла́вры о́трасль духо́вная бы́л еси́, на ре́ку Во́лгу с ико́ною Бо́жия Ма́тере прише́л еси́ и на ея́ брега́х, близь Ни́жняго Нова́града, чу́дную оби́тель устро́ил еси́; посто́м, моли́твою, слеза́ми ве́сь кра́й се́й освяти́вый и мно́жество и́ноков в не́й собра́вый. Духо́вно возрасти́вый и во Ангельский о́браз посвяти́вый Евфи́мия преподо́бнаго и Мака́рия досточу́днаго, с ни́ми же моли́ся, святи́телю о́тче Диони́сие, дарова́ти на́м ве́лию ми́лость.

Глас 6: И ны́не и при́сно и во ве́ки веко́в. Ами́нь.

Кто́ Тебе́ не ублажи́т, Пресвята́я Де́во? Кто́ ли не воспое́т Твоего́ Пречи́стаго Рождества́? Безле́тно бо от Отца́ возсия́вый Сы́н Единоро́дный, То́йже от Тебе́, Чи́стыя, про́йде, неизрече́нно вопло́щся: естество́м Бо́г Сы́й и естество́м бы́в Челове́к на́с ра́ди; не во двою́ лицу́ разделя́емый, но во двою́ естеству́ несли́тно познава́емый. Того́ моли́, Чи́стая Всеблаже́нная, поми́ловатися душа́м на́шим.

Све́те Тихи́й:

Све́те Ти́хий святы́я сла́вы Безсме́ртнаго Отца́ Небе́снаго, Свята́го, Блаже́ннаго, Иису́се Христе́! Прише́дше на за́пад со́лнца, ви́девше свет вече́рний, пое́м Отца́, Сы́на и Свята́го Ду́ха, Бо́га. Досто́ин еси́ во вся времена́ пет бы́ти гла́сы преподо́бными, Сы́не Бо́жий, живо́т дая́й; те́мже мир Тя сла́вит.

1. При́тчей чте́ние

Па́мять пра́веднаго с похвала́ми, и благослове́ние Госпо́дне на главе́ его́. Блаже́н челове́к, и́же обре́те прему́дрость, и сме́ртен, и́же уве́де ра́зум. Лу́чше бо сию́ купова́ти, не́жели зла́та и сребра́ сокро́вища. Честне́йшая же е́сть ка́мений многоце́нных, все́ же честно́е недосто́йно ея́ е́сть. Долгота́ бо дне́й и ле́та живота́ в десни́це ея́, в шу́йце же ея́ бога́тство и сла́ва. От у́ст ея́ исхо́дит пра́вда, зако́н же и ми́лость на язы́це но́сит. Послу́шайте у́бо мене́, о ча́да, честна́я бо реку́, и блаже́н челове́к, и́же пути́ моя́ сохрани́т: исхо́ди бо мои́ — исхо́ди живота́, и уготовля́ется хоте́ние от Го́спода. Сего́ ра́ди молю́ ва́с и предлага́ю мо́й гла́с сыново́м челове́ческим. Я́ко а́з, прему́дрость, устро́их сове́т, и ра́зум и смы́сл аз призва́х. Мо́й сове́т и утвержде́ние, мо́й ра́зум, моя́ же кре́пость. Аз мене́ лю́бящия люблю́, и́щущии же мене́ обря́щут благода́ть. Разуме́йте у́бо, незло́бивии, кова́рство, ненака́зании же, прилага́йте сердца́. Послу́шайте мене́ и па́ки, честна́я бо реку́, и отве́рзу от усте́н пра́вая, я́ко и́стине поучи́тся горта́нь мой, ме́рзки же пре́до мно́ю устны́ лжи́выя. С пра́вдою вси́ глаго́лы у́ст мои́х, ничто́же в ни́х стро́потно, ниже́ развраще́нно. Вся́ пра́ва су́ть разумева́ющим и про́ста обрета́ющим ра́зум. Науча́ю бо ва́с и́стине, да бу́дет о Го́споде наде́жда ва́ша, и испо́лнитеся Ду́ха.

2. Прему́дрости Соломо́новы чте́ние

Уста́ пра́веднаго ка́плют прему́дрость, устне́ же муже́й му́дрых ве́дят благода́ть. Уста́ му́дрых поуча́тся прему́дрости, пра́вда же избавля́ет и́х от сме́рти. Сконча́вшуся му́жу пра́ведну, не поги́бнет наде́жда. Сы́н бо пра́веден ражда́ется в живо́т и во благи́х свои́х пло́д пра́вды объи́мет. Све́т пра́ведным всегда́, и от Го́спода обря́щут благода́ть и сла́ву. Язы́к му́дрых до́брая све́сть, и в се́рдце и́х почи́ет му́дрость. Лю́бит Госпо́дь преподо́бная сердца́, прия́тни же Ему́ вси́ непоро́чнии в пути́. Му́дрость Госпо́дня просвеща́ет лице́ разу́мнаго: постига́ет бо жела́ющия ю́, пре́жде да́же разуме́ти ю́, и удо́бь у́зрится от лю́бящих ю́. Утреневавый к не́й не утруди́тся, и бдя́й ея́ ра́ди вско́ре без печа́ли бу́дет. Яко досто́йных ея́ сама́ обхо́дит, и́щущи, и во стезя́х ея́ явля́ется и́м благоприе́мне. Му́дрости никогда́же одоле́ет зло́ба. Си́х ра́ди и рачи́тель бы́х добро́ты ея́, и возлюби́х ю́, и поиска́х от ю́ности моея́. И взыска́х неве́сту привести́ себе́, я́ко все́х Влады́ка возлюби́ ю́. Таи́бница бо е́сть Бо́жия хи́трости и обрета́тельница де́л Его́. Труды́ ея́ су́ть доброде́тели: целому́дрию же и ра́зуму та́ учи́т, пра́вде и му́жеству, и́хже потре́бнее ничто́же е́сть в житии́ челове́ком. Аще же и мно́гаго иску́сства жела́ет кто́, ве́сть дре́вняя, и бы́ти хотя́щая разсмо́трит. Све́сть изви́тия слове́с и разреше́ния гада́ний, зна́мения и чудеса́ проразуме́ет, и сбытия́ време́н и ле́т, и все́м сове́тник е́сть бла́г. Яко безсме́ртие е́сть в не́й и благосла́вие во обще́нии слове́с ея́. Сего́ ра́ди бесе́довах ко Го́споду, и помоли́хся Ему́, и ре́х от всего́ се́рдца моего́: Бо́же отце́в и Го́споди ми́лости, сотвори́вый вся́ сло́вом Твои́м и му́дростию Твое́ю устро́ивый челове́ка, да владе́ет бы́вшими от Тебе́ тварьми́ и да управля́ет ми́р в преподо́бии и пра́вде. Да́ждь ми́ Твои́х Престо́лов приседя́щую прему́дрость и не отлучи́ мене́ от о́трок Твои́х, я́ко а́з ра́б Тво́й и сы́н рабы́ни Твоея́. Посли́ ю́ с Небе́с от свята́го жили́ща Твоего́ и от Престо́ла сла́вы Твоея́, да, су́щи со мно́ю, научи́т мя́, что́ благоуго́дно е́сть пред Тобо́ю, и наста́вит мя́ в ра́зум, и сохрани́т мя́ в сла́ве свое́й. Помышле́ния бо сме́ртных вся́ боязли́ва и погреши́тельна умышле́ния и́х.

3. Прему́дрости Соломо́новы чте́ние

Пра́ведник, а́ще пости́гнет сконча́тися, в поко́и бу́дет. Ста́рость бо честна́ не многоле́тна, ниже́ в числе́ ле́т исчита́ется. Седи́на же е́сть му́дрость челове́ком, и во́зраст ста́рости — житие́ нескве́рное. Благоуго́ден Бо́гови бы́в, возлю́блен бы́сть, и живы́й посреде́ гре́шник, преста́влен бы́сть. Восхище́н бы́сть, да не зло́ба измени́т ра́зума его́ или́ ле́сть прельсти́т ду́шу его́. Раче́ние бо зло́бы помрача́ет до́брая и паре́ние по́хоти, пременя́ет у́м незло́бив. Сконча́вся вма́ле, испо́лни ле́та до́лга, уго́дна бо бе́ Го́сподеви душа́ его́, сего́ ра́ди потща́ся от среды́ лука́вствия. Лю́дие же ви́девше и не разуме́вше, ниже́ поло́жше в помышле́нии таково́е, я́ко благода́ть и ми́лость в преподо́бных Его́ и посеще́ние во избра́нных Его́.

Сподо́би, Го́споди:

Сподо́би, Го́споди, в ве́чер сей без греха́ сохрани́тися нам. Благослове́н еси́, Го́споди, Бо́же оте́ц на́ших, и хва́льно и просла́влено и́мя Твое́ во ве́ки. Ами́нь.

Бу́ди, Го́споди, ми́лость Твоя́ на нас, я́коже упова́хом на Тя. Благослове́н еси́, Го́споди, научи́ мя оправда́нием Твои́м. Благослове́н еси́, Влады́ко, вразуми́ мя оправда́нием Твои́м. Благослове́н еси́, Святы́й, просвети́ мя оправда́нии Твои́ми.

Го́споди, ми́лость Твоя́ во век, дел руку́ Твое́ю не пре́зри. Тебе́ подоба́ет хвала́, Тебе́ подоба́ет пе́ние, Тебе́ сла́ва подоба́ет. Отцу́ и Сы́ну и Свято́му Ду́ху, ны́не и при́сно и во ве́ки веко́в. Ами́нь.

Го́споди, поми́луй. (40 раз)

Стихи́ры на стихо́вне:

Стихиры, гла́с 1:

Преди́вный иера́рше Диони́сие, / житие́м со Христо́м соедини́лся еси́, / чре́сла любо́вию препоя́сал еси́, / смире́нных пу́ть позна́л еси́, / свети́льник ве́ры украси́л еси́ / еле́ом милосе́рдия и ми́лости. / Те́м с му́дрыми вше́л еси́ в небе́сный Черто́г, / иде́же предстоя́й Влады́це Христу́, / моли́ся, да услы́шим во́пль, / призыва́ющий в полу́нощи, / и вси́ изы́дем гото́ви в сре́тение Ему́.

Сти́х: Свяще́нницы Твои́ облеку́тся в пра́вду, / и преподо́бнии Твои́ возра́дуются.

Вма́ле бы́л еси́ ве́рен, преблаже́нне Диони́сие, / над мно́гими тя́ поста́ви Госпо́дь, / те́мже и просла́вился еси́ / доброде́тельнаго жития́ о́бразом, / Того́ законоположе́нием после́дуя, / я́ко и́стинный де́латель виногра́да Христо́ва яви́лся еси́ / и возше́л еси́ в ра́дость Го́спода твоего́, / Ему́же ны́не предстоя́, / мо́лишися о душа́х на́ших.

Сти́х: Блаже́н му́ж, боя́йся Го́спода, / в за́поведех Его́ восхо́щет зело́.

Ревни́телю благоче́стия, / изря́дный де́лателю виногра́да Христо́ва, / Свяще́нных Писа́ний соверше́нный позна́телю, / преда́нием приле́жный исполни́телю, / и́хже прия́л еси́ от Христа́ Бо́га / и святы́х Его́ апо́столов. / Те́мже яви́лся еси́ свети́льник Це́ркве, святи́телю Диони́сие, / не преста́й моля́ся о все́х, / к твое́й по́мощи прибега́ющих.

Слава, гла́с 6:

Мирски́й мяте́ж оста́вил еси́ и взе́м кре́ст, после́довал еси́ Христу́, преподо́бных Анто́ния и Феодо́сия учени́к доброде́тельный яви́лся еси́, Бо́га возлюби́вый все́м се́рдцем, те́сным путе́м ше́ствовал еси́, любо́вию Христо́вою утвержда́яся, и ны́не на свое́ ста́до с небесе́ взира́я, моли́ся Го́сподеви поми́ловатися душа́м на́шим.

И ны́не, Богоро́дичен глас 6:

Творе́ц и Изба́витель мо́й, Пречи́стая, Христо́с Госпо́дь, из Твои́х ложе́сн проше́д, в мя́ оболки́йся, пе́рвыя кля́твы Ада́ма свободи́. Те́мже Ти́, Всечи́стая, я́ко Бо́жии Ма́тери же и Де́ве, вои́стинну вопие́м немо́лчно: ра́дуйся Ангельски, ра́дуйся, Влады́чице, предста́тельство, и покро́ве, и спасе́ние ду́ш на́ших.

Моли́тва свята́го Симео́на Богоприи́мца:

Ны́не отпуща́еши раба́ Твоего́, Влады́ко,/ по глаго́лу Твоему́, с ми́ром;/ я́ко ви́деста о́чи мои́ спасе́ние Твое́,/ е́же еси́ угото́вал пред лице́м всех люде́й,/ свет во открове́ние язы́ков,// и сла́ву люде́й Твои́х Изра́иля.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Го́споди, поми́луй. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Тропа́рь, глас 8:

Правосла́вия ревни́телю, благоче́стия наста́вниче, и́щущим спасе́ния до́брый ко́рмчие, мона́шествующих богодухнове́нное украше́ние, богоно́снаго Евфи́мия собесе́дниче, святи́телю Диони́сие, уче́ньми и доброде́тельми оте́чество твое́ просвети́л еси́, не забу́ди на́с, чту́щих тя́, но в ми́ре упра́ви живо́т на́ш. (Дважды)

Песнь Пресвятей Богородице:

Богоро́дице Де́во, ра́дуйся, / Благода́тная Мари́е, Госпо́дь с Тобо́ю; / благослове́на Ты в жена́х / и благослове́н Плод чре́ва Твоего́, / я́ко Спа́са родила́ еси́ душ на́ших. (Единожды)

Бу́ди И́мя Госпо́дне благослове́но от ны́не и до ве́ка. (Три́жды)

Псало́м 33:

Благословлю́ Го́спода на вся́кое вре́мя,/ вы́ну хвала́ Его́ во усте́х мои́х./ О Го́споде похва́лится душа́ моя́,/ да услы́шат кро́тцыи, и возвеселя́тся./ Возвели́чите Го́спода со мно́ю,/ и вознесе́м И́мя Его́ вку́пе./ Взыска́х Го́спода, и услы́ша мя,/ и от все́х скорбе́й мои́х изба́ви мя./ Приступи́те к Нему́, и просвети́теся,/ и ли́ца ва́ша не постыдя́тся./ Сей ни́щий воззва́, и Госпо́дь услы́ша и́,/ и от все́х скорбе́й его́ спасе́ и́./ Ополчи́тся а́нгел Госпо́день о́крест боя́щихся Его́,/ и изба́вит их./ Вкуси́те и ви́дите, я́ко благ Госпо́дь:/ блаже́н муж, и́же упова́ет Нань./ Бо́йтеся Го́спода, вси́ святи́и Его́,/ я́ко несть лише́ния боя́щимся Его́./ Бога́тии обнища́ша и взалка́ша:/ взыска́ющии же Го́спода// не лиша́тся вся́каго бла́га.

У́ТРЕНЯ.

Шестопса́лмие:

Сла́ва в вы́шних Бо́гу, и на земли́ мир, в челове́цех благоволе́ние. (Три́жды)

Го́споди, устне́ мои́ отве́рзеши, и уста́ моя́ возвестя́т хвалу́ Твою́. (Два́жды)

Псалом 3:

Го́споди, что ся умно́жиша стужа́ющии ми́? Мно́зи востаю́т на мя, мно́зи глаго́лют души́ мое́й: несть спасе́ния eму́ в Бо́зе eго́. Ты же, Го́споди, Засту́пник мой еси́, сла́ва моя́ и вознося́й главу́ мою́. Гла́сом мои́м ко Го́споду воззва́х, и услы́ша мя от горы́ святы́я Своея́. Аз усну́х, и спах, воста́х, я́ко Госпо́дь засту́пит мя. Не убою́ся от тем люде́й, о́крест напа́дающих на мя. Воскресни́, Го́споди, спаси́ мя, Бо́же мой, я́ко Ты порази́л еси́ вся вражду́ющыя ми всу́е: зу́бы гре́шников сокруши́л еси́. Госпо́дне есть спасе́ние, и на лю́дех Твои́х благослове́ние Твое́.

Аз усну́х, и спах, воста́х, я́ко Госпо́дь засту́пит мя.

Псалом 37:

Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́. Я́ко стре́лы Твоя́ унзо́ша во мне, и утверди́л еси́ на мне ру́ку Твою́. Несть исцеле́ния в пло́ти мое́й от лица́ гне́ва Твоего́, несть ми́ра в косте́х мои́х от лица́ грех мои́х. Я́ко беззако́ния моя́ превзыдо́ша главу́ мою́, я́ко бре́мя тя́жкое отяготе́ша на мне. Возсмерде́ша и согни́ша ра́ны моя́ от лица́ безу́мия моего́. Пострада́х и сляко́хся до конца́, весь день се́туя хожда́х. Я́ко ля́двия моя́ напо́лнишася поруга́ний, и несть исцеле́ния в пло́ти мое́й. Озло́блен бых и смири́хся до зела́, рыка́х от воздыха́ния се́рдца моего́. Го́споди, пред Тобо́ю все жела́ние мое́ и воздыха́ние мое́ от Тебе́ не утаи́ся. Се́рдце мое́ смяте́ся, оста́ви мя си́ла моя́, и свет о́чию мое́ю, и той несть со мно́ю. Дру́зи мои́ и и́скреннии мои́ пря́мо мне прибли́жишася и ста́ша, и бли́жнии мои́ отдале́че мене́ ста́ша и нужда́хуся и́щущии ду́шу мою́, и и́щущии зла́я мне глаго́лаху су́етная и льсти́вным весь день поуча́хуся. Аз же я́ко глух не слы́шах и я́ко нем не отверза́яй уст свои́х. И бых я́ко челове́к не слы́шай и не имы́й во усте́х свои́х обличе́ния. Я́ко на Тя, Го́споди, упова́х, Ты услы́шиши, Го́споди Бо́же мой. Я́ко рех: да не когда́ пора́дуют ми ся врази́ мои́: и внегда́ подвижа́тися нога́м мои́м, на мя велере́чеваша. Я́ко аз на ра́ны гото́в, и боле́знь моя́ предо мно́ю есть вы́ну. Я́ко беззако́ние мое́ аз возвещу́ и попеку́ся о гресе́ мое́м. Врази́ же мои́ живу́т и укрепи́шася па́че мене́, и умно́жишася ненави́дящии мя без пра́вды. Воздаю́щии ми зла́я возблага́я оболга́ху мя, зане́ гоня́х благосты́ню. Не оста́ви мене́, Го́споди Бо́же мой, не отступи́ от Мене́. Вонми́ в по́мощь мою́, Го́споди спасе́ния моего́.

Не оста́ви мене́, Го́споди Бо́же мой, не отступи́ от Мене́. Вонми́ в по́мощь мою́, Го́споди спасе́ния моего́.

Псалом 62:

Бо́же, Бо́же мой, к Тебе́ у́тренюю, возжада́ Тебе́ душа́ моя́, коль мно́жицею Тебе́ плоть моя́, в земли́ пу́сте и непрохо́дне, и безво́дне. Та́ко во святе́м яви́хся Тебе́, ви́дети си́лу Твою́ и сла́ву Твою́. Я́ко лу́чши ми́лость Твоя́ па́че живо́т, устне́ мои́ похвали́те Тя. Та́ко благословлю́ Тя в животе́ мое́м, о и́мени Твое́м воздежу́ ру́це мои́. Я́ко от ту́ка и ма́сти да испо́лнится душа́ моя́, и устна́ма ра́дости восхва́лят Тя уста́ моя́. А́ще помина́х Тя на посте́ли мое́й, на у́тренних поуча́хся в Тя. Я́ко был еси́ Помо́щник мой, и в кро́ве крилу́ Твое́ю возра́дуюся. Прильпе́ душа́ моя́ по Тебе́, мене́ же прия́т десни́ца Твоя́. Ти́и же всу́е иска́ша ду́шу мою́, вни́дут в преиспо́дняя земли́, предадя́тся в ру́ки ору́жия, ча́сти ли́совом бу́дут. Царь же возвесели́тся о Бо́зе, похва́лится всяк клены́йся Им, я́ко загради́шася уста́ глаго́лющих непра́ведная.

На у́тренних поуча́хся в Тя. Я́ко был еси́ Помо́щник мой, и в кро́ве крилу́ Твое́ю возра́дуюся. Прильпе́ душа́ моя́ по Тебе́, мене́ же прия́т десни́ца Твоя́.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Го́споди поми́луй. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Псалом 87:

Го́споди Бо́же спасе́ния моего́, во дни воззва́х, и в нощи́ пред Тобо́ю. Да вни́дет пред Тя моли́тва моя́: приклони́ у́хо Твое́ к моле́нию моему́, я́ко испо́лнися зол душа́ моя́, и живо́т мой аду прибли́жися. Привмене́н бых с низходя́щими в ров, бых я́ко челове́к без по́мощи, в ме́ртвых свобо́дь, я́ко я́звеннии спя́щии во гро́бе, и́хже не помяну́л еси́ ктому́, и ти́и от руки́ Твоея́ отринове́ни бы́ша. Положи́ша мя в ро́ве преиспо́днем, в те́мных и се́ни сме́ртней. На мне утверди́ся я́рость Твоя́, и вся во́лны Твоя́ наве́л еси́ на мя. Уда́лил еси́ зна́емых мои́х от Мене́, положи́ша мя ме́рзость себе́: пре́дан бых и не исхожда́х. О́чи мои́ изнемого́сте от нищеты́, воззва́х к Тебе́, Го́споди, весь день, возде́х к Тебе́ ру́це мои́. Еда́ ме́ртвыми твори́ши чудеса́? Или́ вра́чеве воскреся́т, и испове́дятся Тебе́? Еда́ пове́сть кто во гро́бе ми́лость Твою́, и и́стину Твою́ в поги́бели? Еда́ позна́на бу́дут во тьме чудеса́ Твоя́, и пра́вда Твоя́ в земли́ забве́нней? И аз к Тебе́, Го́споди, воззва́х и у́тро моли́тва моя́ предвари́т Тя. Вску́ю, Го́споди, отре́еши ду́шу мою́, отвраща́еши лице́ Твое́ от Мене́? Нищ есмь аз, и в труде́х от ю́ности моея́; возне́с же ся, смири́хся, и изнемого́х. На мне преидо́ша гне́ви Твои́, устраше́ния Твоя́ возмути́ша мя, обыдо́ша мя я́ко вода́, весь день одержа́ша мя вку́пе. Уда́лил еси́ от Мене́ дру́га и и́скренняго, и зна́емых мои́х от страсте́й.

Го́споди Бо́же спасе́ния моего́, во дни воззва́х, и в нощи́ пред Тобо́ю. Да вни́дет пред Тя моли́тва моя́: приклони́ у́хо Твое́ к моле́нию моему́.

Псалом 102:

Благослови́, душе́ моя́, Го́спода, и вся вну́тренняя моя́ и́мя свя́тое Его́. Благослови́, душе́ моя́, Го́спода, и не забыва́й всех воздая́ний Его́, очища́ющаго вся беззако́ния твоя́, исцеля́ющаго вся неду́ги твоя́, избавля́ющаго от истле́ния живо́т твой, венча́ющаго тя ми́лостию и щедро́тами, исполня́ющаго во благи́х жела́ние твое́: обнови́тся я́ко о́рля ю́ность твоя́. Творя́й ми́лостыни Госпо́дь, и судьбу́ всем оби́димым. Сказа́ пути́ Своя́ Моисе́ови, сыново́м Изра́илевым хоте́ния Своя́: Щедр и Ми́лостив Госпо́дь, Долготерпели́в и Многоми́лостив. Не до конца́ прогне́вается, ниже́ во век вражду́ет, не по беззако́нием на́шым сотвори́л есть нам, ниже́ по грехо́м на́шым возда́л есть нам. Я́ко по высоте́ небе́сней от земли́, утверди́л есть Госпо́дь ми́лость Свою́ на боя́щихся Его́. Ели́ко отстоя́т восто́цы от за́пад, уда́лил есть от нас беззако́ния на́ша. Я́коже ще́дрит оте́ц сы́ны, уще́дри Госпо́дь боя́щихся Его́. Я́ко Той позна́ созда́ние на́ше, помяну́, я́ко персть есмы́. Челове́к, я́ко трава́ дни́е eго́, я́ко цвет се́льный, та́ко оцвете́т, я́ко дух про́йде в нем, и не бу́дет, и не позна́ет ктому́ ме́ста своего́. Ми́лость же Госпо́дня от ве́ка и до ве́ка на боя́щихся Его́, и пра́вда Его́ на сыне́х сыно́в, храня́щих заве́т Его́, и по́мнящих за́поведи Его́ твори́ти я́. Госпо́дь на Небеси́ угото́ва Престо́л Свой, и Ца́рство Его́ все́ми облада́ет. Благослови́те Го́спода вси А́нгели Его́, си́льнии кре́постию, творя́щии сло́во Его́, услы́шати глас слове́с Его́. Благослови́те Го́спода вся Си́лы Его́, слуги́ Его́, творя́щии во́лю Его́. Благослови́те Го́спода вся дела́ Его́, на вся́ком ме́сте влады́чества Его́, благослови́, душе́ моя́, Го́спода.

На вся́ком ме́сте влады́чества Его́, благослови́, душе́ моя́, Го́спода.

Псалом 142:

Го́споди, услы́ши моли́тву мою́, внуши́ моле́ние мое́ во и́стине Твое́й, услы́ши мя в пра́вде Твое́й и не вни́ди в суд с рабо́м Твои́м, я́ко не оправди́тся пред Тобо́ю всяк живы́й. Я́ко погна́ враг ду́шу мою́, смири́л есть в зе́млю живо́т мой, посади́л мя есть в те́мных, я́ко ме́ртвыя ве́ка. И уны́ во мне дух мой, во мне смяте́ся се́рдце мое́. Помяну́х дни дре́вния, поучи́хся во всех де́лех Твои́х, в творе́ниих руку́ Твое́ю поуча́хся. Возде́х к Тебе́ ру́це мои́, душа́ моя́, я́ко земля́ безво́дная Тебе́. Ско́ро услы́ши мя, Го́споди, исчезе́ дух мой, не отврати́ лица́ Твоего́ от Мене́, и уподо́блюся низходя́щым в ров. Слы́шану сотвори́ мне зау́тра ми́лость Твою́, я́ко на Тя упова́х. Скажи́ мне, Го́споди, путь во́ньже пойду́, я́ко к Тебе́ взях ду́шу мою́. Изми́ мя от враг мои́х, Го́споди, к Тебе́ прибего́х. Научи́ мя твори́ти во́лю Твою́, я́ко Ты еси́ Бог мой. Дух Твой Благи́й наста́вит мя на зе́млю пра́ву. И́мене Твоего́ ра́ди, Го́споди, живи́ши мя, пра́вдою Твое́ю изведе́ши от печа́ли ду́шу мою́. И ми́лостию Твое́ю потреби́ши враги́ моя́ и погуби́ши вся стужа́ющыя души́ мое́й, я́ко аз раб Твой есмь.

Услы́ши мя, Го́споди, в пра́вде Твое́й и не вни́ди в суд с рабо́м Твои́м.

Дух Твой Благи́й наста́вит мя на зе́млю пра́ву.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Тропа́рь глас 8:

Сла́ва Отцу́ и Сы́ну и Свято́му Ду́ху. И ны́не и при́сно и во ве́ки веко́в. Ами́нь.

Глас 8: И́же нас ра́ди рожде́йся от Де́вы / и, распя́тие претерпе́в, Благи́й, / испрове́ргий сме́ртию смерть / и Воскресе́ние явле́й я́ко Бог, / не пре́зри, я́же созда́л еси́ руко́ю Твое́ю; / яви́ человеколю́бие Твое́, Ми́лостиве. / Приими́ ро́ждшую Тя, Богоро́дицу, моля́щуюся за ны, / и спаси́, Спа́се наш, лю́ди отча́янныя.

Здесь читается кафизма, положенная по дню, или сразу седальны:

Го́споди, поми́луй. (Три́жды)

Седален, глас 8:

Равноа́нгельно во оби́тели Пече́рстей пожи́л еси́, преподо́бных оте́ц житию́ после́довав, и оби́тель я́ко гра́д, на гора́х пово́лжских основа́л еси́, в не́йже мно́жество и́ноков собра́в, о́браз и́м для́ подража́ния яви́лся еси́. Ны́не же предстоя́ престо́лу Влады́ки все́х, преподо́бне Диони́сие, испроси́ ми́р ми́рови, стране́ Росси́йстей утвержде́ние и спасе́ние душа́м на́шим.

Сла́ва Отцу́ и Сы́ну и Свято́му Ду́ху. И ны́не и при́сно и во ве́ки веко́в. Ами́нь.

Глас 8: Де́во Всенепоро́чная, Пресу́щественнаго Бо́га ро́ждшая челове́ком, со преподо́бным Того́ непреста́нно моли́ о на́с, согреше́ний оставле́ние и жития́ исправле́ние на́м пре́жде конца́ дарова́ти, ве́рою пою́щим Тя́ по до́лгу, еди́на Всепе́тая.

Седален, глас 4:

На земли́, я́ко Ангел, с пло́тию пожи́л еси́, святи́телю Христо́в Диони́сие, доброде́тельным житие́м украси́вся, моли́твою с Бо́гом соедини́вся, бде́нием от напа́стей врага́ сохрани́вся, труды́ милосе́рдия ве́сь освяти́вся и над страстьми́ воцари́вся, те́мже прише́дше ко Влады́це Христу́, моли́ ве́рно чту́щим тя́ грехо́в оставле́ние дарова́ти и ве́лию ми́лость пода́ти.

Сла́ва Отцу́ и Сы́ну и Свято́му Ду́ху. И ны́не и при́сно и во ве́ки веко́в. Ами́нь.

Глас 4: Боже́ственная была́ еси́ се́нь Сло́ва, еди́на Пречи́стая Де́во, чистото́ю Ангелы превосходя́щая, мене́, па́че все́х пе́рстию бы́вшаго, оскверне́на плотски́ми прегреше́ньми, очи́сти Твои́ми моли́твами, боже́ственными вода́ми омыва́ющи и подаю́щи, Чи́стая, ве́лию ми́лость.

Полиеле́й:

Хвали́те И́мя Госпо́дне, хвали́те, раби́ Го́спода.

Аллилу́иа, аллилу́иа, аллилу́иа.

Благослове́н Госпо́дь от Сио́на, живы́й во Иерусали́ме.

Аллилу́иа, аллилу́иа, аллилу́иа.

Испове́дайтеся Го́сподеви, я́ко Благ, я́ко в век ми́лость Его́.

Аллилу́иа, аллилу́иа, аллилу́иа.

Испове́дайтеся Бо́гу Небе́сному, я́ко в век ми́лость Его́.

Аллилу́иа, аллилу́иа, аллилу́иа.

Велича́ние:

Велича́ем тя, / святи́телю о́тче Дионисие, / и чтим святу́ю па́мять твою́, / ты бо мо́лиши о нас // Христа́ Бо́га на́шего.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа,// сла́ва Тебе́, Бо́же. (Трижды)

Седа́льны:

Глас 1:

Яко звезда́ дне́сь пресве́тла, святи́телю о́тче Диони́сие, от Ки́ева вели́каго возсия́л еси́ и Це́рковь Бо́жию свои́ми доброде́тельми украси́л еси́, сердца́ просвеща́ющи все́х к твоему́ заступле́нию притека́ющих; ду́ши ве́рою и любо́вию тя́ песносло́вящих николи́же во свои́х моли́твах не оставля́еши; страсте́й и ко́зней диа́вольских свобожда́еши все́х честву́ющих святу́ю па́мять твою́.

Глас 1: Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Яко все́м скорбя́щим и́стинное утеше́ние и заблу́ждшим от и́стиннаго пути́ пра́вое наставле́ние, предста́ни ско́ро на́м, Пречи́стая Богороди́тельнице, и лю́те оби́димых от напа́стей изба́ви. Вся́ бо мо́жеши, ели́ко хо́щеши, иму́щи дерзнове́ние к Сы́ну Своему́ и Бо́гу. Его́же умоли́ Ма́терними Свои́ми моли́твами, согреше́нием проще́ние дарова́ти благочестному́дренно почита́ющим Рождество́ Твое́.

Степе́нна, глас 4:

От ю́ности моея́/ мно́зи бо́рют мя стра́сти,/ но Сам мя заступи́// и спаси́, Спа́се мой.

Ненави́дящии Сио́на,/ посрами́теся от Го́спода,/ я́ко трава́ бо огне́м// бу́дете изсо́хше.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Святы́м Ду́хом/ вся́ка душа́ живи́тся,/ и чистото́ю возвыша́ется,// светле́ется Тро́йческим еди́нством, священнота́йне.

Го́споди, поми́луй. (Три́жды)

От Иоа́нна Свята́го Ева́нгелия чте́ние

Сла́ва, Тебе́, Го́споди, сла́ва Тебе́.

Рече́ Госпо́дь ко прише́дшым к Нему́ иуде́ем: ами́нь, ами́нь глаго́лю вам, не входя́й две́рьми во двор о́вчий, но прела́зя и́нуде, той тать есть и разбо́йник. А входя́й две́рьми па́стырь есть овца́м. Сему́ две́рник отверза́ет, и о́вцы глас его́ слы́шат, и своя́ о́вцы глаша́ет по и́мени, и изго́нит их. И егда́ своя́ о́вцы иждене́т, пред ни́ми хо́дит, и о́вцы по нем и́дут, я́ко ве́дят глас его́. По чужде́м же не и́дут, но бежа́т от него́, я́ко не зна́ют чужда́го гла́са. Сию́ при́тчу рече́ им Иису́с, они́ же не разуме́ша, что бя́ше, я́же глаго́лаше им. Рече́ же па́ки им Иису́с: ами́нь, ами́нь глаго́лю вам, я́ко Аз есмь дверь овца́м. Вси, ели́ко их прии́де пре́жде Мене́, та́тие суть и разбо́йницы, но не послу́шаша их о́вцы. Аз есмь дверь, Мно́ю а́ще кто вни́дет, спасе́тся, и вни́дет и изы́дет, и па́жить обря́щет.

Псало́м 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя. Я́ко беззако́ние мое́ аз зна́ю и грех мой предо мно́ю есть вы́ну. Тебе́ Еди́ному согреши́х, и лука́вое пред Тобо́ю сотвори́х, я́ко да оправди́шися во словесе́х Твои́х и победи́ши, внегда́ суди́ти Ти. Се бо в беззако́ниих зача́т есмь, и во гресе́х роди́ мя ма́ти моя́. Се бо и́стину возлюби́л еси́, безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся, омы́еши мя, и па́че сне́га убелю́ся. Слу́ху моему́ да́си ра́дость и весе́лие, возра́дуются ко́сти смире́нныя. Отврати́ лице́ Твое́ от грех мои́х, и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́, и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́, и Ду́хом Влады́чним утверди́ мя. Научу́ беззако́нныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́, возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо, всесожже́ния не благоволи́ши. Же́ртва Бо́гу дух сокруше́н, се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския, тогда́ благоволи́ши же́ртву пра́вды, возноше́ние и всесожега́емая: тогда́ возложа́т на олта́рь Твой тельцы́.

Глас 6:

Сла́ва Отцу́ и Сы́ну и Свято́му Ду́ху./ Моли́твами святителя Дионисия, / Ми́лостиве, очи́сти / мно́жества согреше́ний на́ших.

И ны́не и при́сно и во ве́ки веко́в. Ами́нь./ Моли́твами Богоро́дицы, / Ми́лостиве, очи́сти / мно́жества согреше́ний на́ших.

Поми́луй мя, Бо́же,/ по вели́цей ми́лости Твое́й,/ и по мно́жеству щедро́т Твои́х// очи́сти беззако́ние мое́.

Стихи́ра, глас 6

Прииди́те, мно́жество люде́й благочести́вых, дне́сь богому́драго святи́теля Диони́сия пе́сньми и пе́нии восхва́лим и честну́ю его́ ико́ну любе́зно облобыза́им, глаго́люще: ра́дуйся, пресла́вный святи́телю Диони́сие, о́тче на́ш, гра́ду Су́здалю и Нижегоро́дстей земли́ храни́телю; ра́дуйся, я́ко благоче́стия сто́лп и побо́рник и́стины в земли́ Росси́йстей яви́лся еси́; ра́дуйся, я́ко Святе́й Тро́ице предстои́ши со Ангелы, Юже моли́ непреста́нно дарова́ти душа́м на́шим ве́лию ми́лость.

Го́споди, поми́луй. (12 раз)

Кано́н святи́телю, гла́с 8.

Пе́снь 1.

Ирмос: Во́ду проше́д, я́ко су́шу, и еги́петскаго зла́ избежа́в, изра́ильтянин вопия́ше: Изба́вителю и Бо́гу на́шему пои́м.

Припе́в: Святителю отче Дионисие, моли́ Бо́га о на́с.

Отве́рзи ми́ устне́ благода́тию Твое́ю, Христе́, мра́к души́ моея́ отгна́в, и озари́ у́м мо́й, молю́ся, я́ко да возмогу́ чи́стым се́рдцем пе́ти Твоего́ уго́дника, преподо́бнаго Диони́сия.

Прииди́те, ве́рнии ча́да, дне́сь, церко́внаго свети́льника и столпа́ непоколеби́ма, Правосла́вия учи́теля и благоче́стия ревни́теля, и́стины пропове́дника и нече́стия искорени́теля, блаже́нного Диони́сия пе́сньми доброхва́льными воспои́м.

Ки́ево-Пече́рския Ла́вры о́трасль духоно́сная бы́л еси́, смире́нием, терпе́нием и посто́м ве́лию ми́лость у Бо́га стяжа́л еси́; та́ко испроси́ и на́м у Влады́ки Христа́ терпе́ние, смире́ние и душа́м на́шим наде́жду о спасе́нии.

Бога́тыя и светоно́сныя благода́ти испо́лнен, в оби́тели Пече́рстей и́ночествовал еси́ и та́мо, я́ко безпло́тен, к доброде́телем приведе́ сво́й у́м, о́тче чу́дне Диони́сие.

Богородичен: Яко и́стинный Све́т от ложе́сн Свои́х яви́вшая ми́ру, на́с, во тме́ страсте́й ходя́щих, просвети́ и наста́ви на пу́ть, Пу́ть поро́ждшая ро́ду христиа́нскому, Мари́е Богоневе́сто.

Пе́снь 3.

Ирмос: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ в любви́ Твое́й, жела́ний кра́ю, ве́рных утвержде́ние, еди́не Человеколю́бче.

Оте́чество духо́вное твое́ оста́вил еси́, и Ни́жняго Нова́града вско́ре доше́д, в не́м чу́дную оби́тель созда́л и собра́л еси́ мно́жество и́ноков, ца́рский пу́ть спасе́ния и́м показу́я, та́ко и на́с не забу́ди, и упра́ви к небе́сным оби́телем, чту́щих святу́ю па́мять твою́.

Но́вую Пече́рскую оби́тель на высо́ких брега́х Во́лги устро́ил еси́, из нея́же всю́ Нижегоро́дскую зе́млю по́двиги поста́, моли́твы и оби́льныя ми́лостыни украси́л еси́, Диони́сие, о́тче свяще́ннейший, моли́ся Христу́ Бо́гу о спасе́нии ду́ш на́ших.

Нача́льником от Христа́ в оби́тели Пече́рстей поста́влен бы́л еси́, собесе́дник и спо́стник преподо́бному Се́ргию яви́лся еси́. С ни́мже у Христа́ Бо́га испроси́ на́м здра́вие и спасе́ние, и душа́м на́шим ве́лию ми́лость.

Времена́ и ле́та достопа́мятных дея́ний списа́ти, труды́ и по́двиги проста́го лю́да писа́нию преда́ти ты́, о́тче Диони́сие, и́нока Лавре́нтия благослови́л еси́, и те́м на ра́ть духо́вную наро́д собра́ти, страну́ и ве́ру на́шу от безбо́жных и чужеве́рных нахожде́ний сохрани́ти.

Богородичен: Со́лнце Пра́вды, и́стинный Бо́г на́ш, пло́ть прия́л от Тебе́, ми́ру возсия́л е́сть, Мари́е Де́во, и тля́ многобо́жия поги́бе до конца́. Све́том Сы́на Твоего́, Де́во Мари́е, уны́нием мя́ омраче́нного просвети́ и наста́ви на пу́ть спасе́ния.

Седа́лен, гла́с 8:

Из Ла́вры вели́кия прише́д, ико́ною Пресвяты́я Богоро́дицы ве́сь кра́й Нижегоро́дский освяти́л еси́. Оби́тель Вознесе́нскую на гора́х Во́лги устро́ивый и в не́й по́двиги просия́вый, отту́дуже на Су́здальскую ка́федру поста́влен бы́л еси́. Святи́телю прему́дре Диони́сие, моли́ Христа́ Бо́га, грехо́в оставле́ние дарова́ти почита́ющим любо́вию всечестну́ю па́мять твою́.

Сла́ва, и ны́не, богоро́дичен, гла́с 3:

Не от Ангел, ни от челове́к, но от Сы́на Твоего́, Влады́чице, Творца́ Ангелов и челове́ков, кро́ткаго и смире́ннаго се́рдцем Иису́са, смире́нию удо́бь навы́кнути могу́ и не прилежу́: увы́ мне́! го́рд сы́й, презорли́в и непокори́в при́сно от нераде́ния моего́ явлю́ся. Тя́ у́бо, о Де́во Пренепоро́чная, молю́ сокруше́нно с те́плыми слеза́ми, е́же ду́х кро́тости и смире́ния се́рдцу моему́ дарова́ти, да вку́сит поко́й сладча́йший душа́ моя́.

Пе́снь 4.

Ирмос: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.

Ико́ну Богома́тере Одиги́трии во освяще́ние, покро́в и огражде́ние земли́ Росси́йстей из Царьгра́да прине́сл еси́. И та́ исто́чник исцеле́ний и чудотворе́ний все́м с ве́рою к не́й притека́ющим показу́ет и от вся́ких напа́стей щи́т держа́вен явля́ет. Ты́ же, святи́телю, непреста́нно моли́ся, да покры́ет Де́ва Пречи́стая Свои́м омофо́ром вся́, к Не́й притека́ющия.

Во епи́скопа Ни́жняго Нова́града поста́вленный и сия́нием доброде́телей христиа́нских всеукра́шенный, му́жественный защи́тник Це́ркве и земли́ Росси́йския от е́реси стриго́льников яви́лся еси́, святи́телю о́тче на́ш Диони́сие, моли́ся Христу́ Бо́гу спасти́ся душа́м на́шим.

Та́ко просвети́ся житие́ твое́ пред челове́ки, я́ко ви́девше доброде́тели твоя́, о́тче, избра́ша тя́ на престо́л архиере́йский гра́да Су́здаля, ему́же ди́вный архипа́стырь бы́л еси́, Пастыренача́льнику приводя́ своя́ о́вцы, Иису́су Человеколю́бцу.

Помы́слив зла́я, ага́рянин злочести́вый, стрелу́ лука́вую пусти́, тебе́, святи́телю, сгуби́ти восхоте́в и ве́ру святу́ю попра́ти, но ты́, Бо́гом сохраня́емый и Ма́териею Его́ Пречи́стою, це́л и невреди́мь пребы́л еси́.

Богородичен: Пою́щих Ти́, — ра́дуйся, — изба́вльшая ва́рварскаго служе́ния, изми́ ны́ рабо́ты чужда́го и, сокруши́в в мы́слех идолостра́стие, насади́ благоразу́мие стра́ха Бо́жия. Ты́ бо еси́ всему́ бла́гу Вина́, Нача́ток и Исполне́ние.

Пе́снь 5

Ирмос: Просвети́ на́с повеле́нии Твои́ми, Го́споди, и мы́шцею Твое́ю высо́кою Тво́й ми́р пода́ждь на́м, Человеколю́бче.

Хра́м Ду́ха Всесвята́го яви́лся еси́, преди́вный иера́рше, о́тче на́ш Диони́сие, Ни́жний Новгра́д непреста́нными моли́твами и священноде́йствием твои́м облагоуха́л еси́. Те́мже и ны́не хода́тайством твои́м, свя́те, душе́вныя и теле́сныя боле́зни на́ша исцели́ и всепроще́ние грехо́в на́м у Бо́га испроси́.

Благоче́стия сто́лп непоколеби́мый яви́лся еси́, све́том доброде́телей твои́х осия́вый Су́здальский уде́л. Ны́не же в селе́ниих пра́ведных водворя́яся, моли́ся о на́с ко Го́споду, да спасе́т ду́ши на́ша.

Яко вели́ко облиста́л еси́ со́лнце, от сла́внаго Су́здаля заре́ю слове́с твои́х и чуде́с сия́ние испуща́яй во всю́ зе́млю Росси́йскую, святи́телю Бо́жий, и вся́ освяща́яй, благоче́стно тя́ ублажа́ющия.

Па́стырь вои́стинну до́брый слове́сному ста́ду твоему́, святи́телю Диони́сие, бы́л еси́, ду́шу свою́ за о́вцы своя́ положи́ти гото́вый. Те́мже и яви́лся еси́ оби́димым засту́пник непреобори́мый, пра́вды же ревни́тель неустраши́мый, си́льных ми́ра сего́ с любо́вию облича́яй и пасо́мых свои́х оте́чески вразумля́яй, заблу́дшия же на пу́ть пра́вый, прему́дре, наставля́яй.

Богородичен: Вси́ ро́ди блажа́т Тя́, Мари́е Цари́це, и мы́ пе́сньми блажа́ще, изображе́нному на ико́не ли́ку Твоему́ покланя́емся, пра́здник све́тел в па́мяти святи́теля Твоего́ пра́зднующе.

Пе́снь 6.

Ирмос: Моли́тву пролию́ ко Го́споду и Тому́ возвещу́ печа́ли моя́, я́ко зо́л душа́ моя́ испо́лнися и живо́т мо́й а́ду прибли́жися, и молю́ся, я́ко Ио́на: от тли́, Бо́же, возведи́ мя.

Восхва́лим вси́ вели́каго святи́теля Диони́сия, почти́м засту́пника и утвержде́ние земли́ Росси́йския и кра́я Су́здальскаго храни́теля, е́реси стриго́льников ре́вностнаго искорени́теля, худа́го наме́рения кня́жескаго непрекло́ннаго обличи́теля, и та́ко возопии́м: не́сть свя́т, я́коже Бо́г на́ш, и не́сть пра́веден па́че Тебе́, Го́споди.

Во гра́д первопресто́льный на собо́р призва́н бы́л еси́, еди́н от все́х епи́скопов кня́жескому повеле́нию противоста́, че́сть митропо́лии Моско́вския оберега́яй, проти́ву ста́вленника кня́зя возстая́й, злосча́стному Митя́ю на ка́федру первосвяти́тельскую взы́ти возбраня́яй, ны́не же моли́ся о на́с ко Го́споду, поми́ловатися душа́м на́шим.

Ты́ непра́во ходя́щим противоста́л еси́, преподо́бне, ника́коже соизволя́яй без благослове́ния Вселе́нскаго Константи́на гра́да патриа́рха произвести́ на престо́л митрополи́та и нече́стно да́ти во́лка в па́стыря овца́м, благоче́стно Христа́ сла́вящим.

Сугу́бым рве́нием о благоче́стии распала́емь, спе́шно прише́л еси́ в Царьгра́д, пред патриа́рхом Ни́лом наме́рение архимандри́та Михаи́ла облича́яй и Ру́сь от е́реси стриго́льников оберега́яй. Те́мже мы́ твое́ раче́ние о Правосла́вии воспева́ем, сла́вяще Го́спода во ве́ки.

Богородичен: Свире́пеющия во мне́ стра́сти укроти́ и яре́м смире́ния возложи́ на мя́, Богоро́дице, да под и́гом его́ порабо́таю про́чее вре́мя и обря́щу ми́лость в де́нь Су́дный.

Конда́к, гла́с 8:

Звезду́ Росси́йскую, от Ки́ева возсия́вшую, чрез Ни́жний Новгра́д в Су́здаль дости́гшую и всю́ страну́ сию́ уче́нием озари́вшую, ублажи́м богому́драго Диони́сия, то́й бо мо́лится Го́споду спасти́ся душа́м на́шим.

Икос:

Оби́тель Ду́ха Свята́го ты́, святи́телю о́тче Диони́сие, показа́ся, в труде́х, слеза́х, моли́тве и посте́ ра́ди Бо́га подвиза́ся, Ему́ Еди́ному служа́. Тя́ за ре́вность ко благоче́стию Госпо́дь на ка́федру избра́, поста́ви Су́здальския земли́ архипа́стырем, мы́ же ти́ велегла́сно та́ко возопии́м: ра́дуйся, Ки́ево-Пече́рское воспита́ние, собесе́дниче и спо́стниче преподо́бному Се́ргию; ра́дуйся на брега́х Во́лги оби́тель чу́дную основа́вый и в не́й хра́м Вознесе́ния Госпо́дня устро́ивый; ра́дуйся, мно́жество и́ноков в оби́тели се́й собра́вый, над ни́ми нача́льником от Христа́ поста́вленный; ра́дуйся, мона́шескаго жития́ све́тлый о́бразе, преподо́бных Евфи́мия и Мака́рия наста́вниче; ра́дуйся, от е́реси стриго́льников Це́ркве и всея́ земли́ Росси́йския кре́пкий защи́тниче; ра́дуйся, в Константи́не гра́де вся́ свои́ми доброде́тельми удиви́вый и за ре́вность ве́лию о Го́споде, митрополи́том Ру́сския земли́ поста́вленный. Ра́дуйся, святи́телю о́тче на́ш Диони́сие, земли́ Росси́йския пресве́тлое украше́ние.

Пе́снь 7.

Ирмос: От Иуде́и доше́дше, о́троцы, в Вавило́не иногда́, ве́рою Тро́ическою пла́мень пе́щный попра́ша, пою́ще: отце́в Бо́же, благослове́н еси́.

Кре́постию Госпо́днею измла́да укрепля́емый, в огра́де преподо́бных оте́ц пребыва́л еси́, в посте́, слеза́х, моли́тве сво́й и́ноческий пу́ть провожда́л еси́; на бре́г реки́ Во́лги с ико́ною Бо́жия Ма́тере, благода́тию Ду́ха Свята́го направля́емый, оби́тель чу́дную основа́л еси́. Не забу́ди на́с, ве́рою и любо́вию чту́щих тя́, преподо́бне.

Сла́ва святи́телем и ве́рным лю́дем засту́пник вои́стинну бы́л еси́, стране́ на́шей ны́не на враги́ испроси́ побе́ды и одоле́ние и во благоче́стии утверди́ ны́ непоколеби́мы, о́тче досточу́дне Диони́сие.

Чи́стое житие́ свое́ сконча́л еси́, Чи́стыя Де́вы Богоро́дицы вои́стинну служи́тель бы́л еси́ и святи́тель Бо́гови и́стинен, ревни́тель Правосла́вия и свяще́нныя ве́ры, и стена́ лю́дем избра́нным, богоблаже́нне Диони́сие.

В пещи́ искуше́ний и в пла́мени страсте́й егда́ тя неопали́вшагося ви́де вселе́нский Конста́нтина гра́да патриа́рх, ублажи́ му́жество твое́ и ре́вность о Правосла́вии и почти́ тя́ са́ном архиепи́скопским. Та́ко и мы́, чту́ще па́мять твою́, превозно́сим Го́спода во ве́ки.

Богородичен: Ско́рая в беда́х Помо́щнице, гото́вое обурева́емым Приста́нище, сохрани́ мя, Ма́ти Бо́жия, от потопле́ния жите́йскаго и не да́ждь ми́ разби́тися о ка́мень па́губы душе́вныя.

Пе́снь 8.

Ирмос: Царя́ Небе́снаго, Его́же пою́т во́и Ангельстии, хвали́те и превозноси́те во вся́ ве́ки.

Пра́зднует Це́рковь твое́ преставле́ние и благознамени́тый де́нь твоего́ успе́ния: житие́ бо на земли́ благоче́стно пожи́в, пресла́вне, пло́д стори́чествующий Влады́це твоему́ прине́сл еси́ и от Него́ сподо́бился еси́ сла́вы неизрече́нныя, непреста́нно вопия́: благослове́н Бо́г оте́ц на́ших.

Кре́пкаго подви́жника о́гнь страсте́й не опали́, но Боже́ственная благода́ть ороси́ и све́тла житие́м показа́, зову́ща: благослове́н Бо́г оте́ц на́ших.

Не на песце́ суеты́ мирски́я, но на ка́мени ве́ры основа́ние полож́ив, блаже́нне, в че́сть Вознесе́ния Госпо́дня оби́тель созда́л еси́ и духо́вная твоя́ ча́да зва́ти научи́л еси́: благослове́н Бо́г оте́ц на́ших.

Послуша́нием и милосе́рдием, посто́м же и моли́твою Бо́гу благоугоди́л еси́: сего́ ра́ди просла́ви тя́ пред Ангелы и челове́ки: благослове́н Бо́г оте́ц на́ших.

Богородичен: Мно́гое весе́лие творю́ злы́ми де́лы бесо́м и ра́дость, храни́телю же моему́ печа́ль отвсю́ду. О, Чи́стая Мари́е, Ма́ти Христа́ Бо́га! наста́ви мя́ на покая́ние, да бу́дет о́нем пла́чь, Ангелу же моему́ ра́дость, и мне́ с ни́м во ве́ки.

На 9-й песни поем песнь Пресвятыя Богородицы:

Вели́чит душа́ Моя́ Го́спода и возра́довася дух Мой о Бо́зе Спа́се Мое́м.

К коемуждо стиху припеваем: Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Я́ко призре́ на смире́ние рабы́ Своея́, се бо, от ны́не ублажа́т Мя вси ро́ди.

Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Я́ко сотвори́ Мне вели́чие Си́льный, и свя́то и́мя Его́, и ми́лость Его́ в ро́ды родо́в боя́щимся Его́.

Сотвори́ держа́ву мы́шцею Свое́ю, расточи́ го́рдыя мы́слию се́рдца их.

Низложи́ си́льныя со престо́л, и вознесе́ смире́нныя, а́лчущия испо́лни благ, и богатя́щияся отпусти́ тщи.

Восприя́т Изра́иля о́трока Своего́, помяну́ти ми́лости, я́коже глаго́ла ко отце́м на́шим, Авраа́му и се́мени его́ да́же до ве́ка.

Песнь 9

Ирмос: Вои́стинну Богоро́дицу, Тя́ испове́дуем, спасе́ннии Тобо́ю, Де́во Чи́стая, с безпло́тными ли́ки Тя́ велича́юще.

Благосла́вного гра́да Су́здаля архипа́стырь благогове́йнейший яви́лся еси́, в Царьгра́де патриа́рхом Ни́лом на митропо́лию Росси́йскую поста́влен бы́л еси́. Не преста́й моля́ся о па́стве твое́й, па́мять твою́, достохва́льне, соверша́ющей.

В Константи́не гра́де на митропо́лию Росси́йскую поста́влен бы́в, вели́каго гра́да Ки́ева вско́ре дости́гл еси́, от кня́зя та́мо заточе́ние смире́нно прия́в, в темни́це святу́ю ду́шу свою́ че́стно Го́сподеви преда́л еси и в пеще́ре вели́каго Анто́ния погребе́н бы́л еси́. Ны́не же моли́ся с преподо́бными о на́с ко Го́споду, спасти́ся душа́м на́шим.

Святи́телю Бо́жий, уго́дниче Христо́в, Диони́сие, ми́лости неистощи́мое сокро́вище, река́ милосе́рдия вои́стинну, при́зри на не́мощи моя́ и исцели́ ду́шу, страстьми́ зле́ обурева́емую, уврачу́й и те́ло мое́, немощьми́ обложе́нное, да просла́влю в тебе́ благода́ть и милосе́рдие Христа́ Бо́га на́шего.

Приими́ хвалу́ от ра́б твои́х недосто́йных, святи́телю о́тче Диони́сие, не пре́зри приноси́мое тебе́ благохвале́ние и моли́тву о на́с ко Всеблаго́му Бо́гу сотвори́, любо́вию со благогове́нием почита́ющих святу́ю па́мять твою́.

Богородичен: Вся́ тва́рь песносло́вит Тя́, Де́во, я́ко проше́дшую вся́ небе́сная врата́ и ста́вшую огнезра́чнаго одесну́ю престо́ла. Одесну́ю ста́ти и на́с сподо́би Сы́на Твоего́, я́ко пе́сньми Ро́ждшагося из Тебе́ и Тя́ велича́ем.

Свети́лен, гла́с 1:

Уче́ньми твои́ми и де́лы Це́рковь Христо́ву украси́л еси́, святи́телю о́тче Диони́сие, отону́дуже в ми́ре просия́ твое́ доброде́тельное житие́: в моли́твах, и поще́ниих, и бде́ниих о́браз ученико́м бы́л еси́. Те́мже вопие́м: сла́ва Да́вшему ти́ кре́пость, сла́ва Венча́вшему тя́, сла́ва Да́рующему Тобо́ю все́м исцеле́ние.

Сла́ва, и ны́не, Богородичен:

Царя́ веко́в, Цари́це су́щая и Ма́ти, умоли́ над страстьми́ царе́й показа́ти певцы́ Твоя́: се́ бо приво́дим Ти́ в моли́тву чу́днаго Диони́сия, уго́дника Твоего́, в его́же па́мяти покланя́ющеся Тебе́ велича́ем.

Хвали́тны псалмы́, глас 8:

Вся́кое дыха́ние да хва́лит Го́спода./ Хвали́те Го́спода с небе́с,/ хвали́те Его́ в вы́шних.// Тебе́ подоба́ет песнь Бо́гу.

Хвали́те Его́ вси а́нгели Его́,/ хвали́те Его́ вся си́лы Его́.// Тебе́ подоба́ет песнь Бо́гу.

Сти́хиры, глас 8:

Стих: Сотвори́ти в них суд напи́сан/ сла́ва сия́ бу́дет всем преподо́бным Его́.

Что́ тя нарече́м, богоблаже́нне Диони́сие? / Боже́ственных преда́ний учи́теля, / служи́теля та́ин и де́лателя виногра́да Христо́ва, / свещу́, Це́рковь озаря́ющую, / зарю́, мра́к страсте́й разгоня́ющую, / Росси́йския земли́ звезду́ пресве́тлую, / Су́здальскаго кра́я светоза́рное свети́ло. / Мно́га ти́ имена́ и бо́льша дарова́ния, / те́мже моли́ спасти́ся душа́м на́шим.

Стих: Хвали́те Его́ на си́лах Его́,/ хвали́те Его́ по мно́жеству вели́чествия Его́.

Стих: Хвали́те Его́ в тимпа́не и ли́це,/ хвали́те Его́ во стру́нах и орга́не.

Восхва́лим тя́, преблаже́нне Диони́сие, / Тро́ицы чи́стое жили́ще, / Христу́ подража́телю неуста́нный, / проли́тие дарова́ний духо́вных, / безстра́стия кра́сный сосу́де / и чуде́с исто́чниче неизсяка́емый, / де́монов прогони́телю неустраши́мый / и страсте́й цели́телю преизря́дный, / мона́шествующих сто́лпе непоколеби́мый, / в труде́х святи́телю неусы́пный / и к Бо́гу моли́твенниче непосты́дный. / Ны́не, предстоя́ престо́лу Влады́ки все́х, / испроси́ стране́ на́шей утвержде́ние / и спасе́ние душа́м на́шим.

Стих: Хвали́те Его́ в кимва́лех доброгла́сных, хвали́те Его́ в кимва́лех восклица́ния. / Вся́кое дыха́ние да хва́лит Го́спода.

Труды́, поще́нием и бде́нием / умерщвля́яй те́ло твое́ / , непреста́нными моли́твами / к Бо́гу всегда́ вопия́л еси́, / Свято́му Ду́ху прекра́сная оби́тель яви́лся еси́, / Иже ви́дя твое́ благо́е произволе́ние, / архипа́стырем кра́я Нижегоро́дского / и земли́ Су́здальския поста́ви тя́. / Ты́ же Це́рковь добро́тами украси́л еси́, / лю́ди твоя́ просвети́л еси́. / Сего́ ра́ди тя́ почита́ем, / святи́телю богому́дре Диони́сие, / моли́ о творя́щих святу́ю па́мять твою́.

Глас 2: Сла́ва Отцу́ и Сы́ну и Свято́му Ду́ху

Ки́ими псалмы́ и пе́нии ублажи́м богому́драго Диони́сия? Ева́нгельскаго уче́ния рачи́теля и страсте́м Христо́вым подража́теля, святи́телем украше́ние, и́ноком утвержде́ние, печа́льным утеше́ние, отча́янным засту́пника, похвалу́ и ра́дование земли́ на́шея. Моли́ за ны́ Христа́ Бо́га, преблаже́нне Диони́сие, да не посече́т ны́, я́ко безпло́дную смоко́вницу, но да всели́т ны́, иде́же присеща́ет све́т лица́ Его́.

Глас 2: И ны́не и при́сно и во ве́ки веко́в. Ами́нь.

Спаси́ от бе́д рабы́ твоя́, Богоро́дице Де́во, я́ко вси́ по Бо́зе к Тебе́ прибега́ем, я́ко к неруши́мей стене́ и предста́тельству.

Славосло́вие вели́кое:

Сла́ва в вы́шних Бо́гу, и на земли́ мир, в челове́цех благоволе́ние. Хва́лим Тя, благослови́м Тя, кла́няем Ти ся, славосло́вим Тя, благодари́м Тя, вели́кия ра́ди сла́вы Твоея́. Го́споди Царю́ Небе́сный, Бо́же О́тче Вседержи́телю, Го́споди, Сы́не Единоро́дный, Иису́се Христе́, и Святы́й Ду́ше. Го́споди Бо́же, А́гнче Бо́жий, Сы́не Оте́чь, взе́мляй грех ми́ра, поми́луй нас; взе́мляй грехи́ ми́ра, приими́ моли́тву на́шу; седя́й одесну́ю Отца́, поми́луй нас. Я́ко Ты еси́ еди́н Свят, Ты еси́ еди́н Госпо́дь, Иису́с Христо́с, в сла́ву Бо́га Отца́. Ами́нь.

На всяк день благословлю́ Тя, и восхвалю́ И́мя Твое́ во ве́ки, и в век ве́ка.

Сподо́би, Го́споди, в день сей без греха́ сохрани́тися нам. Благослове́н еси́, Го́споди, Бо́же оте́ц на́ших, и хва́льно и просла́влено И́мя Твое́ во ве́ки. Ами́нь.

Бу́ди, Го́споди, ми́лость Твоя́ на нас, я́коже упова́хом на Тя.

Благослове́н еси́, Го́споди, научи́ мя оправда́нием Твои́м. (Три́жды)

Го́споди, прибе́жище был еси́ нам в род и род. Аз рех: Го́споди, поми́луй мя, исцели́ ду́шу мою́, я́ко согреши́х Тебе́. Го́споди, к Тебе́ прибего́х, научи́ мя твори́ти во́лю Твою́, я́ко Ты еси́ Бог мой: я́ко у Тебе́ исто́чник живота́, во све́те Твое́м у́зрим свет. Проба́ви ми́лость Твою́ ве́дущим Тя.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Три́жды)

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Святы́й Безсме́ртный, поми́луй нас.

Святы́й Бо́же, Святы́й Кре́пкий, Святы́й Безсме́ртный, поми́луй нас.

Тропа́рь, глас 8:

Утверди́, Бо́же, святу́ю правосла́вную ве́ру, правосла́вных христиа́н во век ве́ка.

Честне́йшую Херуви́м и Сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу, Тя велича́ем.

Сла́ва, и ны́не. Го́споди, поми́луй. (Три́жды) Благослови́.

Господи Иисусе Христе, Сыне Божий, моли́твами Пречи́стыя Своея́ Ма́тере, святителя Дионисия Суздальского, преподобных и богоносных отец наших и всех святы́х, поми́луй и спаси нас я́ко Благ и Челове́колюбец.

Многоле́тие:

Вели́каго Господи́на и Отца́ на́шего Кири́лла,/ Святе́йшаго Патри́арха Моско́вского и всея́ Руси́,/ и Господи́на на́шего (Высоко-) Преосвяще́ннейшаго (имярек),/ (архи-)епи́скопа (митрополита (титул)),/ богохрани́мую страну́ на́шу Росси́йскую,/ и вся правосла́вныя христи́аны,// Го́споди, сохрани́ их на мно́гая ле́та.