Шрифт

▲

Богослужебные тексты для домашнего употребления

Дни памяти святых

Последование Всеношного бдения в день памяти преподобных старцев Оптинских. Для домашнего (келейного) совершения

Оглавление

ВСЕНО́ЩНОЕ БДЕ́НИЕ

ВЕЛИ́КАЯ ВЕЧЕ́РНЯ

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас. Ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Трижды.)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, (трижды). Сла́ва, и ны́не:

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Таже, Го́споди, поми́луй, (12), Сла́ва, и ны́не:

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 103:

Поется часть псалма:

Благослови́, душе́ моя́, Го́спода. / Благослове́н еси́, Го́споди. / Го́споди, Бо́же мой, возвели́чился еси́ зело́. / Благослове́н еси́, Го́споди. / Во испове́дание и в велеле́поту обле́клся еси́. / Благослове́н еси́, Го́споди. / Посреде́ гор про́йдут во́ды. / Ди́вна дела́ Твоя́, Го́споди. / Вся прему́дростию сотвори́л еси́. / Сла́ва Ти, Го́споди, сотвори́вшему вся.

Или читается псалом полностью:

Благослови́, душе́ моя́, Го́спода. Го́споди, Бо́же мой, возвели́чился еси́ зело́. Во испове́дание и в велеле́поту обле́клся еси́. Одея́йся све́том, я́ко ри́зою, простира́яй не́бо, я́ко ко́жу. Покрыва́яй вода́ми превы́спренняя Своя́, полага́яй о́блаки на восхожде́ние Свое́, ходя́й на крилу́ ве́треню. Творя́й А́нгелы Своя́ ду́хи и слуги́ Своя́ пла́мень о́гненный. Основа́яй зе́млю на тве́рди ея́, не преклони́тся в век ве́ка. Бе́здна, я́ко ри́за, одея́ние ея́, на гора́х ста́нут во́ды, от запреще́ния Твоего́ побе́гнут, от гла́са гро́ма Твоего́ убоя́тся. Восхо́дят го́ры и нисхо́дят поля́ в ме́сто, е́же основа́л еси́ им. Преде́л положи́л еси́, eго́же не пре́йдут, ниже́ обратя́тся покры́ти зе́млю. Посыла́яй исто́чники в де́брех, посреде́ гор про́йдут во́ды. Напая́ют вся зве́ри се́льныя, ждут она́гри в жа́жду свою́. На ты́х пти́цы небе́сныя привита́ют, от среды́ ка́мения дадя́т глас. Напая́яй го́ры от превы́спренних Свои́х, от плода́ дел Твои́х насы́тится земля́. Прозяба́яй траву́ ското́м, и злак на слу́жбу челове́ком, извести́ хлеб от земли́. И вино́ весели́т се́рдце челове́ка, ума́стити лице́ еле́ем, и хлеб се́рдце челове́ка укрепи́т. Насы́тятся древа́ польска́я, ке́дри Лива́нстии, и́хже еси́ насади́л. Та́мо пти́цы вогнездя́тся, ероди́ево жили́ще предводи́тельствует и́ми. Го́ры высо́кия еле́нем, ка́мень прибе́жище за́яцем. Сотвори́л есть луну́ во времена́, со́лнце позна́ за́пад свой. Положи́л еси́ тму, и бысть нощь, в не́йже про́йдут вси зве́рие дубра́внии. Ски́мни рыка́ющии, восхи́тити и взыска́ти от Бо́га пи́щу себе́. Возсия́ со́лнце и собра́шася и в ло́жах свои́х ля́гут. Изы́дет челове́к на де́ло свое́ и на де́лание свое́ до ве́чера. Я́ко возвели́чишася дела́ Твоя́, Го́споди, вся прему́дростию сотвори́л еси́, испо́лнися земля́ тва́ри Твоея́. Сие́ мо́ре вели́кое и простра́нное, та́мо га́ди, и́мже несть числа́, живо́тная ма́лая с вели́кими, та́мо корабли́ препла́вают, змий сей, eго́же созда́л еси руга́тися eму́. Вся к Тебе́ ча́ют, да́ти пи́щу им во бла́го вре́мя. Да́вшу Тебе́ им соберу́т, отве́рзшу Тебе́ ру́ку вся́ческая испо́лнятся бла́гости, отвра́щшу же Тебе́ лице́, возмяту́тся, отъи́меши дух их, и исче́знут, и в персть свою́ возвратя́тся. По́слеши Ду́ха Твоего́, и сози́ждутся, и обнови́ши лице́ земли́. Бу́ди сла́ва Госпо́дня во ве́ки, возвесели́тся Госпо́дь о де́лех Свои́х, призира́яй на зе́млю, и творя́й ю́ трясти́ся, прикаса́яйся гора́м, и дымя́тся. Воспою́ Го́сподеви в животе́ мое́м, пою́ Бо́гу моему́, до́ндеже есмь, да услади́тся Ему́ бесе́да моя́, аз же возвеселю́ся о Го́споде. Да исче́знут гре́шницы от земли́, и беззако́нницы, я́коже не бы́ти им. Благослови́, душе́ моя́, Го́спода.

Со́лнце позна́ за́пад свой. Положи́л еси́ тму, и бысть нощь. Я́ко возвели́чишася дела́ Твоя́, Го́споди, вся прему́дростию сотвори́л еси́.

Сла́ва, и ны́не: Аллилу́иа, аллилу́иа, аллилу́иа, сла́ва Тебе́ Бо́же. Трижды.

Блаже́н муж:

Блаже́н муж, и́же не и́де на сове́т нечести́вых.

Аллилу́иа, аллилу́иа, аллилу́иа.

Я́ко весть Госпо́дь путь пра́ведных, и путь нечести́вых поги́бнет.

Аллилу́иа, аллилу́иа, аллилу́иа.

Рабо́тайте Го́сподеви со стра́хом и ра́дуйтеся Ему́ с тре́петом.

Аллилу́иа, аллилу́иа, аллилу́иа.

Блаже́ни вси наде́ющиися Нань.

Аллилу́иа, аллилу́иа, аллилу́иа.

Воскресни́, Го́споди, спаси́ мя, Бо́же мой.

Аллилу́иа, аллилу́иа, аллилу́иа.

Госпо́дне есть спасе́ние, и на лю́дех Твои́х благослове́ние Твое́.

Аллилу́иа, аллилу́иа, аллилу́иа.

Сла́ва Отцу́ и Сы́ну и Свято́му Духу.

Аллилу́иа, аллилу́иа, аллилу́иа.

И ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Го́споди, воззва́х, глас 4:

Го́споди, воззва́х к Тебе́, услы́ши мя./ Услы́ши мя, Го́споди./ Го́споди, воззва́х к Тебе́, услы́ши мя:/ вонми́ гла́су моле́ния моего́,/ внегда́ воззва́ти ми к Тебе́.// Услы́ши мя, Го́споди.

Да испра́вится моли́тва моя́,/ я́ко кади́ло пред Тобо́ю,/ воздея́ние руку́ мое́ю/ – же́ртва вече́рняя.// Услы́ши мя, Го́споди.

Стихи́ры, глас 4:

Стих: А́ще беззако́ния на́зриши, Го́споди, Го́споди, кто постои́т? Я́ко у Тебе́ очище́ние есть.

Преподо́бнии ста́рцы Оптинстии, / вы и́го Христо́во взе́мше, / посто́м и моли́твами / и ча́стыми бде́нии потруди́вшеся, / просия́сте наде́ждею и ве́рою, / наипа́че же любо́вию, / я́же е́сть глава́ доброде́телем, / е́юже согрева́сте / приходя́щия к ва́м.

Стих: И́мене ра́ди Твоего́ потерпе́х Тя, Го́споди, потерпе́ душа́ моя́ в сло́во Твое́, упова́ душа́ моя́ на Го́спода.

Послуша́ния усе́рднии подви́жницы, / во́ли своя́ покори́вшии / окормле́нию оте́ц свои́х, / духо́вне ва́с породи́вших, / восприя́сте по́мощь на сопроти́вника / глубоча́йшее смире́ние, / и́мже разруши́сте ко́зни вра́жия, / ничто́же бо мо́жет вра́г / на смире́нныя.

Стих: От стра́жи у́тренния до но́щи, от стра́жи у́тренния да упова́ет Изра́иль на Го́спода.

Правосла́вных люде́й окорми́телие, / вы́ апо́стольски взыва́сте: / ничто́же ны́ разлучи́ть от любве́ Бо́жия. / Вы́ ху́ждшее покори́сте лу́чшему / и пло́ть порабо́тисте ду́ху, / те́м яви́стеся свети́льницы Це́ркве, / не под спу́дом, но на све́щнице поста́влени, / да просла́вят Отца́ Небе́снаго / ви́дящии дела́ ва́ша.

Глас 8: Стих: Я́ко у Го́спода ми́лость, и мно́гое у Него́ избавле́ние, и Той изба́вит Изра́иля от всех беззако́ний eго́.

О, пресла́внаго чудесе́! / посреде́ жите́йския молвы́ / отцы́ богому́дрии / несмуще́но се́рдце сохрани́ша, / пребыва́юще с челове́ки теле́сне, / мы́сленне же Бо́гу предстоя́ще, / покрыва́еми кро́вом крилу́ Его́, / нося́щии ду́х ми́рен, / и́мже мно́ги ко Христу́ привлеко́ша.

Стих: Хвали́те Го́спода вси язы́цы, похвали́те Его́ вси лю́дие.

О, моли́твенницы пребога́тии, / Ду́ха Свята́го орга́ни, / глаго́юще моли́тву непреста́нную / в се́рдце сокруше́нном и смире́нном, / просия́сте Ангельским безстра́стием, / и сего́ ра́ди показа́стеся / вра́чеве душа́м и телесе́м, / пощади́те и спаси́те на́с, / мно́гими страстьми́ обурева́емыя.

Стих: Я́ко утверди́ся ми́лость Его́ на нас, и и́стина Госпо́дня пребыва́ет во век.

О, ста́рцы преподо́бнии, / Ду́ха Свята́го сосу́ди, / дарова́нии благода́тными / назда́вшии Це́рковь Христо́ву, / вы́ поревнова́сте духо́вным, / проро́чества да́р стяжа́вше, / глаго́люще челове́ком поле́зная / в назида́ние и утеше́ние, / проро́ком дре́вним уподо́бльшеся.

Глас 6: Сла́ва Отцу́ и Сы́ну и Свято́му Ду́ху.

Узы разре́шше страсте́й, / прилепи́стеся любви́ благи́х, / во Христа́ облеко́стеся, / воздержа́нием и смире́нием насле́дницы бы́вше вы́шняго живота́, / те́мже от трудо́в обре́тше упокое́ние, / досто́йно ра́дуетеся с го́рними си́лами, / преподо́бнии отцы́ Оптинстии, / прегреше́ний оставле́ние испроси́те / пра́зднующим любо́вию святу́ю па́мять ва́шу.

Глас 6: И ны́не и при́сно и во ве́ки веко́в. Ами́нь.

Кто Тебе́ не ублажи́т, Пресвята́я Де́во; / кто ли не воспое́т Твоего́ Пречи́стаго Рождества́; / безле́тно бо от Отца́ возсия́вый Сын Единоро́дный, / То́йже от Тебе́, Чи́стыя, про́йде, / неизрече́нно вопло́щься, / естество́м Бог Сый, / и естество́м быв Челове́к нас ра́ди; / не во двою́ лицу́ разделя́емый, / но во двою́ естеству́ / несли́тно познава́емый. / Того́ моли́, Чи́стая Всеблаже́нная, / поми́ловатися душа́м на́шим.

Све́те Тихи́й:

Све́те Ти́хий святы́я сла́вы Безсме́ртнаго Отца́ Небе́снаго, Свята́го, Блаже́ннаго, Иису́се Христе́! Прише́дше на за́пад со́лнца, ви́девше свет вече́рний, пое́м Отца́, Сы́на и Свята́го Ду́ха, Бо́га. Досто́ин еси́ во вся времена́ пет бы́ти гла́сы преподо́бными, Сы́не Бо́жий, живо́т дая́й; те́мже мир Тя сла́вит.

1. Прему́дрости Соломо́новы чте́ние

Пра́ведник, а́ще пости́гнет сконча́тися, в поко́и бу́дет. Осу́дит же пра́ведник умира́яй живу́щия нечести́выя. У́зрят бо кончи́ну пра́веднаго и не разуме́ют, что́ совеща́ша о не́м, я́ко пове́ржет Госпо́дь нечести́выя безгла́сны ни́ц и поколе́блет и́х от основа́ний, и до после́дняго исче́знут в боле́зни, и па́мять и́х поги́бнет. Прии́дут бо в помышле́ние согреше́ний свои́х ужа́сни, и обличи́т и́х сопроти́в беззако́ния и́х. Тогда́ ста́нет в дерзнове́нии мно́зе пра́ведник пред лице́м оскорби́вших его́ и отмета́ющих труды́ его́. Ви́девше же его́, смяту́тся стра́хом мно́гим и ужа́снутся о пресла́вном спасе́нии его́. Реку́т бо в себе́, ка́ющеся, и в тесноте́ ду́ха воздо́хнут и реку́т: се́й бе́, его́же име́хом не́когда в посме́х и в при́тчу поноше́ния, безу́мнии, житие́ его́ вмени́хом неи́стово и кончи́ну его́ безче́стну. Ка́ко вмени́ся в сыне́х Бо́жиих, и во святы́х жре́бий его́ е́сть? У́бо заблуди́хом от пути́ и́стиннаго, и пра́вды све́т не облиста́ на́м, и со́лнце не возсия́ на́м. Беззако́нных испо́лнихомся сте́зь и поги́бели, и ходи́хом стези́ непрохо́дны, пути́ же Госпо́дня не разуме́хом.

2. При́тчей чте́ние

Па́мять пра́веднаго с похвала́ми, и благослове́ние Госпо́дне на главе́ его́. Блаже́н челове́к, и́же обре́те прему́дрость, и сме́ртен, и́же уве́де ра́зум. Лу́чше бо сию́ купова́ти, не́жели зла́та и сребра́ сокро́вища. Честне́йшая же е́сть ка́мений многоце́нных, все́ же честно́е недосто́йно ея́ е́сть. Долгота́ бо дне́й и ле́та живота́ в десни́це ея́, в шу́йце же ея́ бога́тство и сла́ва. От у́ст ея́ исхо́дит пра́вда, зако́н же и ми́лость на язы́це но́сит. Послу́шайте у́бо мене́, о ча́да, честна́я бо реку́, и блаже́н челове́к, и́же пути́ моя́ сохрани́т: исхо́ди бо мои́ — исхо́ди живота́, и уготовля́ется хоте́ние от Го́спода. Сего́ ра́ди молю́ ва́с и предлага́ю мо́й гла́с сыново́м челове́ческим. Я́ко а́з, прему́дрость, устро́их сове́т, и ра́зум и смы́сл аз призва́х. Мо́й сове́т и утвержде́ние, мо́й ра́зум, моя́ же кре́пость. Аз мене́ лю́бящия люблю́, и́щущии же мене́ обря́щут благода́ть. Разуме́йте у́бо, незло́бивии, кова́рство, ненака́зании же, прилага́йте сердца́. Послу́шайте мене́ и па́ки, честна́я бо реку́, и отве́рзу от усте́н пра́вая, я́ко и́стине поучи́тся горта́нь мой, ме́рзки же пре́до мно́ю устны́ лжи́выя. С пра́вдою вси́ глаго́лы у́ст мои́х, ничто́же в ни́х стро́потно, ниже́ развраще́нно. Вся́ пра́ва су́ть разумева́ющим и про́ста обрета́ющим ра́зум. Науча́ю бо ва́с и́стине, да бу́дет о Го́споде наде́жда ва́ша, и испо́лнитеся Ду́ха.

3. Прему́дрости Соломо́новы чте́ние

Уста́ пра́веднаго ка́плют прему́дрость, устне́ же муже́й му́дрых ве́дят благода́ть. Уста́ му́дрых поуча́тся прему́дрости, пра́вда же избавля́ет и́х от сме́рти. Сконча́вшуся му́жу пра́ведну, не поги́бнет наде́жда. Сы́н бо пра́веден ражда́ется в живо́т и во благи́х свои́х пло́д пра́вды объи́мет. Све́т пра́ведным всегда́, и от Го́спода обря́щут благода́ть и сла́ву. Язы́к му́дрых до́брая све́сть, и в се́рдце и́х почи́ет му́дрость. Лю́бит Госпо́дь преподо́бная сердца́, прия́тни же Ему́ вси́ непоро́чнии в пути́. Му́дрость Госпо́дня просвеща́ет лице́ разу́мнаго: постига́ет бо жела́ющия ю́, пре́жде да́же разуме́ти ю́, и удо́бь у́зрится от лю́бящих ю́. Утреневавый к не́й не утруди́тся, и бдя́й ея́ ра́ди вско́ре без печа́ли бу́дет. Яко досто́йных ея́ сама́ обхо́дит, и́щущи, и во стезя́х ея́ явля́ется и́м благоприе́мне. Му́дрости никогда́же одоле́ет зло́ба. Си́х ра́ди и рачи́тель бы́х добро́ты ея́, и возлюби́х ю́, и поиска́х от ю́ности моея́. И взыска́х неве́сту привести́ себе́, я́ко все́х Влады́ка возлюби́ ю́. Таи́бница бо е́сть Бо́жия хи́трости и обрета́тельница де́л Его́. Труды́ ея́ су́ть доброде́тели: целому́дрию же и ра́зуму та́ учи́т, пра́вде и му́жеству, и́хже потре́бнее ничто́же е́сть в житии́ челове́ком. Аще же и мно́гаго иску́сства жела́ет кто́, ве́сть дре́вняя, и бы́ти хотя́щая разсмо́трит. Све́сть изви́тия слове́с и разреше́ния гада́ний, зна́мения и чудеса́ проразуме́ет, и сбытия́ време́н и ле́т, и все́м сове́тник е́сть бла́г. Яко безсме́ртие е́сть в не́й и благосла́вие во обще́нии слове́с ея́. Сего́ ра́ди бесе́довах ко Го́споду, и помоли́хся Ему́, и ре́х от всего́ се́рдца моего́: Бо́же отце́в и Го́споди ми́лости, сотвори́вый вся́ сло́вом Твои́м и му́дростию Твое́ю устро́ивый челове́ка, да владе́ет бы́вшими от Тебе́ тварьми́ и да управля́ет ми́р в преподо́бии и пра́вде. Да́ждь ми́ Твои́х Престо́лов приседя́щую прему́дрость и не отлучи́ мене́ от о́трок Твои́х, я́ко а́з ра́б Тво́й и сы́н рабы́ни Твоея́. Посли́ ю́ с Небе́с от свята́го жили́ща Твоего́ и от Престо́ла сла́вы Твоея́, да, су́щи со мно́ю, научи́т мя́, что́ благоуго́дно е́сть пред Тобо́ю, и наста́вит мя́ в ра́зум, и сохрани́т мя́ в сла́ве свое́й. Помышле́ния бо сме́ртных вся́ боязли́ва и погреши́тельна умышле́ния и́х.

Сподо́би, Го́споди:

Сподо́би, Го́споди, в ве́чер сей без греха́ сохрани́тися нам. Благослове́н еси́, Го́споди, Бо́же оте́ц на́ших, и хва́льно и просла́влено и́мя Твое́ во ве́ки. Ами́нь.

Бу́ди, Го́споди, ми́лость Твоя́ на нас, я́коже упова́хом на Тя. Благослове́н еси́, Го́споди, научи́ мя оправда́нием Твои́м. Благослове́н еси́, Влады́ко, вразуми́ мя оправда́нием Твои́м. Благослове́н еси́, Святы́й, просвети́ мя оправда́нии Твои́ми.

Го́споди, ми́лость Твоя́ во век, дел руку́ Твое́ю не пре́зри. Тебе́ подоба́ет хвала́, Тебе́ подоба́ет пе́ние, Тебе́ сла́ва подоба́ет. Отцу́ и Сы́ну и Свято́му Ду́ху, ны́не и при́сно и во ве́ки веко́в. Ами́нь.

На лити́и стихи́ры, гла́с 2:

Яви́ на́м ди́вный во святы́х свои́х Бо́г, / но́выя подви́жники благоче́стия, / преподо́бныя ста́рцы Оптинския, / и́же в Бо́зе пребыва́юще, / узре́ша Христо́ву добро́ту, / осия́еми та́йно боже́ственными светлостьми́.

Гла́с 4: Не да́сте сна́ очесе́м ва́шим, блаже́ннии, / ни ве́ждом дрема́ния, / до́ндеже достиго́сте в любо́вь Бо́жию, / я́же излия́ся изоби́льно на вы́, / те́мже восприя́сте боже́ственная дарова́ния, / душетле́нныя стра́сти исцеля́ете, / и неду́ги ве́рою врачу́ете, / и отго́ните скве́рныя ду́хи, / отцы́ преподо́бнии, моли́те о душа́х на́ших.

Сла́ва, гла́с 5: Прииди́те, благоче́стия ревни́тели, / отцы́ на́ша духо́вныя похва́лим: / Леони́да, Моисе́я и Анто́ния, / Исаа́кия, Мака́рия и Анато́лия, / с ни́миже Иларио́на и Варсано́фия, / со Ио́сифом вели́каго Амвро́сия, / ина́го Анато́лия и Некта́рия, / и му́ченик Ни́кона и Исаа́кия. / Ста́рцев вели́ких пе́сньми почти́м, / к ни́мже взыва́юще возопии́м: / преподо́бнии отцы́ богому́дрии, / не преста́йте о на́с моля́щеся, / вы́ бо есте́ засту́пницы на́ши.

И ны́не, богоро́дичен: Храм и дверь еси́, / пала́та и престо́л Царе́в, / Де́во Всечестна́я, / Е́юже Изба́витель мой, Христо́с Госпо́дь, / во тьме спя́щим яви́ся, / Со́лнце сый пра́вды, просвети́ти хотя́, / я́же созда́ по о́бразу Своему́ руко́ю Свое́ю. / Те́мже, Всепе́тая, / я́ко ма́терне дерзнове́ние к Нему́ стяжа́вшая, / непреста́нно моли́ спасти́ся душа́м на́шим.

Го́споди, поми́луй. (40 раз)

Стихи́ры на стихо́вне:

Стихиры, гла́с 4:

Возложи́лся еси́ Вседержи́телю, / о́тче преподо́бне Льве́, / егда́ душа́ твоя́ / распали́ся боже́ственным жела́нием, / и у́м тво́й к го́рним окрили́, / тогда́ ми́р оста́вил еси́, / и вся́ я́же в ми́ре, / и после́довал еси́ Христу́ / невозвра́тным по́мыслом, / ничто́же предпоче́т па́че любве́ Его́, / Его́же моли́, / спасти́ и просвети́ти ду́ши на́ша.

Сти́х: Честна́ пред Го́сподем / сме́рть преподо́бных Его́.

От ю́ности, преподо́бне Мака́рие, / Бо́га возлюби́в, / Тому́ вседу́шно после́довал еси́, / ничто́же предпоче́т су́щих в ми́ре, / но вся́ уме́ты вмени́в, / потща́лся еси́ благоугоди́ти Бо́гу, / за́поведьми Его́ утвержда́яся, / те́мже жела́ния коне́чнаго дости́г, / Христу́ предстои́ши, / Его́же моли́ / спасти́ и просвети́ти ду́ши на́ша.

Сти́х: Что возда́м Го́сподеви о все́х, / я́же воздаде́ ми?

Преподо́бне о́тче Амвро́сие, / любо́вь соверше́нную / к Бо́гу и бли́жним стяжа́л еси́ / я́же е́сть сою́з соверше́нства, / и сы́й и́ноком украше́ние, / и живу́щим в ми́ре утеше́ние, / собра́л еси́ и́нокинь чреды́, / все́м бы́в вся́ по апо́столу, / приве́л еси́ ча́да своя́ ко Влады́це, / Его́же моли́ / спасти́ и просвети́ти ду́ши на́ша.

Слава, гла́с 8:

Све́том Тро́ическим осия́вшеся, отцы́ преподо́бнии, / тьмы́ избежа́сте сласте́й, / и свети́льницы яви́стеся, просвеща́юще ве́рных сердца́, / те́м же светоно́сную ва́шу па́мять соверша́юще, согла́сно взыва́ем: / богоно́снии и пребога́тии, моли́те Христа́ Бо́га, / согреше́ний оставле́ние дарова́ти чту́щим святу́ю па́мять ва́шу.

И ны́не, Богоро́дичен глас 8:

Безневе́стная Де́во, / я́же Бо́га неизрече́нно заче́нши пло́тию, / Ма́ти Бо́га Вы́шняго, / Твои́х рабо́в мольбы́ приими́, Всенепоро́чная, / всем подаю́щи очище́ние прегреше́ний, / ны́не на́ша моле́ния прие́млющи, / моли́ спасти́ся всем нам.

Моли́тва свята́го Симео́на Богоприи́мца:

Ны́не отпуща́еши раба́ Твоего́, Влады́ко,/ по глаго́лу Твоему́, с ми́ром;/ я́ко ви́деста о́чи мои́ спасе́ние Твое́,/ е́же еси́ угото́вал пред лице́м всех люде́й,/ свет во открове́ние язы́ков,// и сла́ву люде́й Твои́х Изра́иля.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Го́споди, поми́луй. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Тропа́рь, глас 1:

В моли́твах непреста́нных пребыва́юще, / благи́я же и злы́я любо́вию объе́млюще, преподо́бнии ста́рцы Оптинстии, / Бо́гу и бли́жним послужи́сте, / бде́нием, слеза́ми и поще́нием дарова́ние многоразли́чных чуде́с прия́сте. / Сла́ва Да́вшему на́м таковы́я хода́таи, / сла́ва Просла́вльшему ва́с, / сла́ва Бо́гу ди́вному во святы́х Свои́х. (Дважды)

Песнь Пресвятей Богородице:

Богоро́дице Де́во, ра́дуйся, / Благода́тная Мари́е, Госпо́дь с Тобо́ю; / благослове́на Ты в жена́х / и благослове́н Плод чре́ва Твоего́, / я́ко Спа́са родила́ еси́ душ на́ших. (Единожды)

Бу́ди И́мя Госпо́дне благослове́но от ны́не и до ве́ка. (Три́жды)

Псало́м 33:

Благословлю́ Го́спода на вся́кое вре́мя,/ вы́ну хвала́ Его́ во усте́х мои́х./ О Го́споде похва́лится душа́ моя́,/ да услы́шат кро́тцыи, и возвеселя́тся./ Возвели́чите Го́спода со мно́ю,/ и вознесе́м И́мя Его́ вку́пе./ Взыска́х Го́спода, и услы́ша мя,/ и от все́х скорбе́й мои́х изба́ви мя./ Приступи́те к Нему́, и просвети́теся,/ и ли́ца ва́ша не постыдя́тся./ Сей ни́щий воззва́, и Госпо́дь услы́ша и́,/ и от все́х скорбе́й его́ спасе́ и́./ Ополчи́тся а́нгел Госпо́день о́крест боя́щихся Его́,/ и изба́вит их./ Вкуси́те и ви́дите, я́ко благ Госпо́дь:/ блаже́н муж, и́же упова́ет Нань./ Бо́йтеся Го́спода, вси́ святи́и Его́,/ я́ко несть лише́ния боя́щимся Его́./ Бога́тии обнища́ша и взалка́ша:/ взыска́ющии же Го́спода// не лиша́тся вся́каго бла́га.

У́ТРЕНЯ.

Шестопса́лмие:

Сла́ва в вы́шних Бо́гу, и на земли́ мир, в челове́цех благоволе́ние. (Три́жды)

Го́споди, устне́ мои́ отве́рзеши, и уста́ моя́ возвестя́т хвалу́ Твою́. (Два́жды)

Псалом 3:

Го́споди, что ся умно́жиша стужа́ющии ми́? Мно́зи востаю́т на мя, мно́зи глаго́лют души́ мое́й: несть спасе́ния eму́ в Бо́зе eго́. Ты же, Го́споди, Засту́пник мой еси́, сла́ва моя́ и вознося́й главу́ мою́. Гла́сом мои́м ко Го́споду воззва́х, и услы́ша мя от горы́ святы́я Своея́. Аз усну́х, и спах, воста́х, я́ко Госпо́дь засту́пит мя. Не убою́ся от тем люде́й, о́крест напа́дающих на мя. Воскресни́, Го́споди, спаси́ мя, Бо́же мой, я́ко Ты порази́л еси́ вся вражду́ющыя ми всу́е: зу́бы гре́шников сокруши́л еси́. Госпо́дне есть спасе́ние, и на лю́дех Твои́х благослове́ние Твое́.

Аз усну́х, и спах, воста́х, я́ко Госпо́дь засту́пит мя.

Псалом 37:

Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́. Я́ко стре́лы Твоя́ унзо́ша во мне, и утверди́л еси́ на мне ру́ку Твою́. Несть исцеле́ния в пло́ти мое́й от лица́ гне́ва Твоего́, несть ми́ра в косте́х мои́х от лица́ грех мои́х. Я́ко беззако́ния моя́ превзыдо́ша главу́ мою́, я́ко бре́мя тя́жкое отяготе́ша на мне. Возсмерде́ша и согни́ша ра́ны моя́ от лица́ безу́мия моего́. Пострада́х и сляко́хся до конца́, весь день се́туя хожда́х. Я́ко ля́двия моя́ напо́лнишася поруга́ний, и несть исцеле́ния в пло́ти мое́й. Озло́блен бых и смири́хся до зела́, рыка́х от воздыха́ния се́рдца моего́. Го́споди, пред Тобо́ю все жела́ние мое́ и воздыха́ние мое́ от Тебе́ не утаи́ся. Се́рдце мое́ смяте́ся, оста́ви мя си́ла моя́, и свет о́чию мое́ю, и той несть со мно́ю. Дру́зи мои́ и и́скреннии мои́ пря́мо мне прибли́жишася и ста́ша, и бли́жнии мои́ отдале́че мене́ ста́ша и нужда́хуся и́щущии ду́шу мою́, и и́щущии зла́я мне глаго́лаху су́етная и льсти́вным весь день поуча́хуся. Аз же я́ко глух не слы́шах и я́ко нем не отверза́яй уст свои́х. И бых я́ко челове́к не слы́шай и не имы́й во усте́х свои́х обличе́ния. Я́ко на Тя, Го́споди, упова́х, Ты услы́шиши, Го́споди Бо́же мой. Я́ко рех: да не когда́ пора́дуют ми ся врази́ мои́: и внегда́ подвижа́тися нога́м мои́м, на мя велере́чеваша. Я́ко аз на ра́ны гото́в, и боле́знь моя́ предо мно́ю есть вы́ну. Я́ко беззако́ние мое́ аз возвещу́ и попеку́ся о гресе́ мое́м. Врази́ же мои́ живу́т и укрепи́шася па́че мене́, и умно́жишася ненави́дящии мя без пра́вды. Воздаю́щии ми зла́я возблага́я оболга́ху мя, зане́ гоня́х благосты́ню. Не оста́ви мене́, Го́споди Бо́же мой, не отступи́ от Мене́. Вонми́ в по́мощь мою́, Го́споди спасе́ния моего́.

Не оста́ви мене́, Го́споди Бо́же мой, не отступи́ от Мене́. Вонми́ в по́мощь мою́, Го́споди спасе́ния моего́.

Псалом 62:

Бо́же, Бо́же мой, к Тебе́ у́тренюю, возжада́ Тебе́ душа́ моя́, коль мно́жицею Тебе́ плоть моя́, в земли́ пу́сте и непрохо́дне, и безво́дне. Та́ко во святе́м яви́хся Тебе́, ви́дети си́лу Твою́ и сла́ву Твою́. Я́ко лу́чши ми́лость Твоя́ па́че живо́т, устне́ мои́ похвали́те Тя. Та́ко благословлю́ Тя в животе́ мое́м, о и́мени Твое́м воздежу́ ру́це мои́. Я́ко от ту́ка и ма́сти да испо́лнится душа́ моя́, и устна́ма ра́дости восхва́лят Тя уста́ моя́. А́ще помина́х Тя на посте́ли мое́й, на у́тренних поуча́хся в Тя. Я́ко был еси́ Помо́щник мой, и в кро́ве крилу́ Твое́ю возра́дуюся. Прильпе́ душа́ моя́ по Тебе́, мене́ же прия́т десни́ца Твоя́. Ти́и же всу́е иска́ша ду́шу мою́, вни́дут в преиспо́дняя земли́, предадя́тся в ру́ки ору́жия, ча́сти ли́совом бу́дут. Царь же возвесели́тся о Бо́зе, похва́лится всяк клены́йся Им, я́ко загради́шася уста́ глаго́лющих непра́ведная.

На у́тренних поуча́хся в Тя. Я́ко был еси́ Помо́щник мой, и в кро́ве крилу́ Твое́ю возра́дуюся. Прильпе́ душа́ моя́ по Тебе́, мене́ же прия́т десни́ца Твоя́.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Го́споди поми́луй. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Псалом 87:

Го́споди Бо́же спасе́ния моего́, во дни воззва́х, и в нощи́ пред Тобо́ю. Да вни́дет пред Тя моли́тва моя́: приклони́ у́хо Твое́ к моле́нию моему́, я́ко испо́лнися зол душа́ моя́, и живо́т мой аду прибли́жися. Привмене́н бых с низходя́щими в ров, бых я́ко челове́к без по́мощи, в ме́ртвых свобо́дь, я́ко я́звеннии спя́щии во гро́бе, и́хже не помяну́л еси́ ктому́, и ти́и от руки́ Твоея́ отринове́ни бы́ша. Положи́ша мя в ро́ве преиспо́днем, в те́мных и се́ни сме́ртней. На мне утверди́ся я́рость Твоя́, и вся во́лны Твоя́ наве́л еси́ на мя. Уда́лил еси́ зна́емых мои́х от Мене́, положи́ша мя ме́рзость себе́: пре́дан бых и не исхожда́х. О́чи мои́ изнемого́сте от нищеты́, воззва́х к Тебе́, Го́споди, весь день, возде́х к Тебе́ ру́це мои́. Еда́ ме́ртвыми твори́ши чудеса́? Или́ вра́чеве воскреся́т, и испове́дятся Тебе́? Еда́ пове́сть кто во гро́бе ми́лость Твою́, и и́стину Твою́ в поги́бели? Еда́ позна́на бу́дут во тьме чудеса́ Твоя́, и пра́вда Твоя́ в земли́ забве́нней? И аз к Тебе́, Го́споди, воззва́х и у́тро моли́тва моя́ предвари́т Тя. Вску́ю, Го́споди, отре́еши ду́шу мою́, отвраща́еши лице́ Твое́ от Мене́? Нищ есмь аз, и в труде́х от ю́ности моея́; возне́с же ся, смири́хся, и изнемого́х. На мне преидо́ша гне́ви Твои́, устраше́ния Твоя́ возмути́ша мя, обыдо́ша мя я́ко вода́, весь день одержа́ша мя вку́пе. Уда́лил еси́ от Мене́ дру́га и и́скренняго, и зна́емых мои́х от страсте́й.

Го́споди Бо́же спасе́ния моего́, во дни воззва́х, и в нощи́ пред Тобо́ю. Да вни́дет пред Тя моли́тва моя́: приклони́ у́хо Твое́ к моле́нию моему́.

Псалом 102:

Благослови́, душе́ моя́, Го́спода, и вся вну́тренняя моя́ и́мя свя́тое Его́. Благослови́, душе́ моя́, Го́спода, и не забыва́й всех воздая́ний Его́, очища́ющаго вся беззако́ния твоя́, исцеля́ющаго вся неду́ги твоя́, избавля́ющаго от истле́ния живо́т твой, венча́ющаго тя ми́лостию и щедро́тами, исполня́ющаго во благи́х жела́ние твое́: обнови́тся я́ко о́рля ю́ность твоя́. Творя́й ми́лостыни Госпо́дь, и судьбу́ всем оби́димым. Сказа́ пути́ Своя́ Моисе́ови, сыново́м Изра́илевым хоте́ния Своя́: Щедр и Ми́лостив Госпо́дь, Долготерпели́в и Многоми́лостив. Не до конца́ прогне́вается, ниже́ во век вражду́ет, не по беззако́нием на́шым сотвори́л есть нам, ниже́ по грехо́м на́шым возда́л есть нам. Я́ко по высоте́ небе́сней от земли́, утверди́л есть Госпо́дь ми́лость Свою́ на боя́щихся Его́. Ели́ко отстоя́т восто́цы от за́пад, уда́лил есть от нас беззако́ния на́ша. Я́коже ще́дрит оте́ц сы́ны, уще́дри Госпо́дь боя́щихся Его́. Я́ко Той позна́ созда́ние на́ше, помяну́, я́ко персть есмы́. Челове́к, я́ко трава́ дни́е eго́, я́ко цвет се́льный, та́ко оцвете́т, я́ко дух про́йде в нем, и не бу́дет, и не позна́ет ктому́ ме́ста своего́. Ми́лость же Госпо́дня от ве́ка и до ве́ка на боя́щихся Его́, и пра́вда Его́ на сыне́х сыно́в, храня́щих заве́т Его́, и по́мнящих за́поведи Его́ твори́ти я́. Госпо́дь на Небеси́ угото́ва Престо́л Свой, и Ца́рство Его́ все́ми облада́ет. Благослови́те Го́спода вси А́нгели Его́, си́льнии кре́постию, творя́щии сло́во Его́, услы́шати глас слове́с Его́. Благослови́те Го́спода вся Си́лы Его́, слуги́ Его́, творя́щии во́лю Его́. Благослови́те Го́спода вся дела́ Его́, на вся́ком ме́сте влады́чества Его́, благослови́, душе́ моя́, Го́спода.

На вся́ком ме́сте влады́чества Его́, благослови́, душе́ моя́, Го́спода.

Псалом 142:

Го́споди, услы́ши моли́тву мою́, внуши́ моле́ние мое́ во и́стине Твое́й, услы́ши мя в пра́вде Твое́й и не вни́ди в суд с рабо́м Твои́м, я́ко не оправди́тся пред Тобо́ю всяк живы́й. Я́ко погна́ враг ду́шу мою́, смири́л есть в зе́млю живо́т мой, посади́л мя есть в те́мных, я́ко ме́ртвыя ве́ка. И уны́ во мне дух мой, во мне смяте́ся се́рдце мое́. Помяну́х дни дре́вния, поучи́хся во всех де́лех Твои́х, в творе́ниих руку́ Твое́ю поуча́хся. Возде́х к Тебе́ ру́це мои́, душа́ моя́, я́ко земля́ безво́дная Тебе́. Ско́ро услы́ши мя, Го́споди, исчезе́ дух мой, не отврати́ лица́ Твоего́ от Мене́, и уподо́блюся низходя́щым в ров. Слы́шану сотвори́ мне зау́тра ми́лость Твою́, я́ко на Тя упова́х. Скажи́ мне, Го́споди, путь во́ньже пойду́, я́ко к Тебе́ взях ду́шу мою́. Изми́ мя от враг мои́х, Го́споди, к Тебе́ прибего́х. Научи́ мя твори́ти во́лю Твою́, я́ко Ты еси́ Бог мой. Дух Твой Благи́й наста́вит мя на зе́млю пра́ву. И́мене Твоего́ ра́ди, Го́споди, живи́ши мя, пра́вдою Твое́ю изведе́ши от печа́ли ду́шу мою́. И ми́лостию Твое́ю потреби́ши враги́ моя́ и погуби́ши вся стужа́ющыя души́ мое́й, я́ко аз раб Твой есмь.

Услы́ши мя, Го́споди, в пра́вде Твое́й и не вни́ди в суд с рабо́м Твои́м.

Дух Твой Благи́й наста́вит мя на зе́млю пра́ву.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Тропа́рь глас 1:

Сла́ва Отцу́ и Сы́ну и Свято́му Ду́ху. И ны́не и при́сно и во ве́ки веко́в. Ами́нь.

Глас 1: Гаврии́лу веща́вшу Тебе́, Де́во, ра́дуйся, / со гла́сом воплоща́шеся всех Влады́ка, / в Тебе́, святе́м киво́те, / я́коже рече́ пра́ведный Дави́д; / яви́лася еси́ ши́ршая Небе́с, / поноси́вши Зижди́теля Твоего́. / Сла́ва Все́льшемуся в Тя, / сла́ва Проше́дшему из Тебе́, / слава Свободи́вшему нас Рождество́м Твои́м.

Здесь читается кафизма, положенная по дню, или сразу седальны:

Го́споди, поми́луй. (Три́жды)

Седален, глас 8:

Стра́сти безслове́сныя душе́вными си́лами поко́рше преподо́бнии, слове́сному ва́шему ста́ду благодея́ния подава́ете, от Христа́ Бо́га дарова́нием исцеле́ний обога́щшеся. Те́м же свяще́нное ва́ше и светоно́сное торжество́ соверша́юще, про́сим очище́ния душа́м на́шим.

Сла́ва Отцу́ и Сы́ну и Свято́му Ду́ху. И ны́не и при́сно и во ве́ки веко́в. Ами́нь.

Глас 8: Богора́дованная, Чи́стая, Благослове́нная, за милосе́рдие щедро́т из Тебе́ Ро́ждшагося, с преподо́бными отцы́ и ста́рцы, и со все́ми святы́ми, о на́с моли́ непреста́нно, да́ти на́м пре́жде конца́ проще́ние грехо́в, и жития́ исправле́ние, я́ко да обря́щем ми́лость.

Седален, глас 8:

Вели́ких даро́в сподо́бльшеся, преподо́бнии, во смире́нном житии́ на земли́ пожи́сте, ту́не неду́гующих стра́сти врачу́юще, яви́стеся Ангелом собесе́дницы, всеблаже́ннии отцы́ Оптинстии, и на́ша стра́сти моли́твами ва́шими уврачу́йте.

Сла́ва Отцу́ и Сы́ну и Свято́му Ду́ху. И ны́не и при́сно и во ве́ки веко́в. Ами́нь.

Глас 8: Непостижи́маго Сло́ва Сы́на Бо́жия, несказа́нно па́че ума́ из Тебе́ Ро́ждшагося, Богоро́дице, моли́ с преподо́бными, умире́ние чи́сто вселе́нней пода́ти, и прегреше́ний дарова́ти на́м пре́жде конца́ проще́ние, и Ца́рствия Небе́снаго, кра́йния ра́ди бла́гости, сподо́бити рабы́ Твоя́.

Полиеле́й:

Хвали́те И́мя Госпо́дне, хвали́те, раби́ Го́спода.

Аллилу́иа, аллилу́иа, аллилу́иа.

Благослове́н Госпо́дь от Сио́на, живы́й во Иерусали́ме.

Аллилу́иа, аллилу́иа, аллилу́иа.

Испове́дайтеся Го́сподеви, я́ко Благ, я́ко в век ми́лость Его́.

Аллилу́иа, аллилу́иа, аллилу́иа.

Испове́дайтеся Бо́гу Небе́сному, я́ко в век ми́лость Его́.

Аллилу́иа, аллилу́иа, аллилу́иа.

Велича́ние:

Ублажа́ем ва́с, преподо́бнии отцы́ Оптинстии, и чте́м святу́ю па́мять ва́шу, наста́вницы мона́хов и собесе́дницы Ангелов.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа,// сла́ва Тебе́, Бо́же. (Трижды)

Седа́льны:

Глас 1:

Неизрече́нна святы́х благода́ть, ю́же от Христа́ прия́ша, те́мже ве́рою призыва́еми, неисце́льныя боле́зни исцеля́ют, и мо́щи и́х боже́ственною си́лою де́йствуют чудеса́; моли́твами и́х, Го́споди, и на́с душе́вных и теле́сных страсте́й свободи́, я́ко Человеколю́бец.

Глас 1: Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Ма́терь Тя́ Бо́жию све́мы вси́, Де́ву вои́стину и по рождестве́ я́вльшуюся, и́же любо́вию прибега́ющии к Твое́й бла́гости, Тебе́ бо и́мамы гре́шнии предста́тельство, Тебе́ стяжа́хом в напа́стех спасе́ние, Еди́ну Всенепоро́чную.

Степе́нна, глас 4:

От ю́ности моея́/ мно́зи бо́рют мя стра́сти,/ но Сам мя заступи́// и спаси́, Спа́се мой.

Ненави́дящии Сио́на,/ посрами́теся от Го́спода,/ я́ко трава́ бо огне́м// бу́дете изсо́хше.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Святы́м Ду́хом/ вся́ка душа́ живи́тся,/ и чистото́ю возвыша́ется,// светле́ется Тро́йческим еди́нством, священнота́йне.

Го́споди, поми́луй. (Три́жды)

От Матфе́я Свята́го Ева́нгелия чте́ние

Сла́ва, Тебе́, Го́споди, сла́ва Тебе́.

Рече́ Госпо́дь Свои́м ученико́м: вся Мне предана́ суть Oтце́м Мои́м, и никто́же зна́ет Сы́на, то́кмо Oте́ц, ни Oтца́ кто зна́ет, то́кмо Сын, и ему́же а́ще во́лит Сын откры́ти. Прииди́те ко Мне вси тружда́ющиися и обремене́ннии, и Аз упоко́ю вы. Возми́те и́го Мое́ на себе́, и научи́теся от Мене́, я́ко кро́ток есмь и смире́н се́рдцем, и обря́щете поко́й душа́м ва́шим. И́го бо Мое́ бла́го, и бре́мя Мое́ легко́ есть.

Сла́ва, Тебе́, Го́споди, сла́ва Тебе́.

Псало́м 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя. Я́ко беззако́ние мое́ аз зна́ю и грех мой предо мно́ю есть вы́ну. Тебе́ Еди́ному согреши́х, и лука́вое пред Тобо́ю сотвори́х, я́ко да оправди́шися во словесе́х Твои́х и победи́ши, внегда́ суди́ти Ти. Се бо в беззако́ниих зача́т есмь, и во гресе́х роди́ мя ма́ти моя́. Се бо и́стину возлюби́л еси́, безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся, омы́еши мя, и па́че сне́га убелю́ся. Слу́ху моему́ да́си ра́дость и весе́лие, возра́дуются ко́сти смире́нныя. Отврати́ лице́ Твое́ от грех мои́х, и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́, и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́, и Ду́хом Влады́чним утверди́ мя. Научу́ беззако́нныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́, возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо, всесожже́ния не благоволи́ши. Же́ртва Бо́гу дух сокруше́н, се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския, тогда́ благоволи́ши же́ртву пра́вды, возноше́ние и всесожега́емая: тогда́ возложа́т на олта́рь Твой тельцы́.

Глас 6:

Сла́ва Отцу́ и Сы́ну и Свято́му Ду́ху./ Моли́твами старцев Оптинских, / Ми́лостиве, очи́сти / мно́жества согреше́ний на́ших.

И ны́не и при́сно и во ве́ки веко́в. Ами́нь./ Моли́твами Богоро́дицы, / Ми́лостиве, очи́сти / мно́жества согреше́ний на́ших.

Поми́луй мя, Бо́же,/ по вели́цей ми́лости Твое́й,/ и по мно́жеству щедро́т Твои́х// очи́сти беззако́ние мое́.

Стихи́ра, глас 6

Все́ отри́нувше стра́стное мучи́тельство, и вся́ко умышле́ние лука́ваго зми́я попра́вше о Христе́, преподо́бнии отцы́ Оптинстии, светообра́зни яви́стеся, я́ко свети́ла озаря́юще всю́ подсо́лнечную, тьму́ отгоня́юще, и неду́ги благода́тию врачу́юще, и все́м помо́щницы явля́ющеся, ве́рою творя́щим святу́ю па́мять ва́шу.

Го́споди, поми́луй. (12 раз)

Кано́н преподо́бным, гла́с 8.

Пе́снь 1.

Ирмос: Во́ду проше́д я́ко су́шу, и Еги́петскаго зла избежа́в, Израильтянин вопия́ше: Изба́вителю и Бо́гу на́шему пои́м.

Припе́в: Преподобнии старцы Оптинские, моли́те Бо́га о на́с.

Мона́шествующим вы́ пра́вило есте́, в неду́зех су́щим и скорбя́щим исцели́тели, и па́стырие заблужда́ющих ове́ц, ва́м научи́те пе́снь досто́йно принести́.

Наста́вники на́ша восхваля́юще зове́м: вы́ есте́ се́мя свя́то, преподо́бнии отцы́, земли́ Росси́йския хвале́ние, и ча́дом ва́шим утвержде́ние.

Стадонача́льниче мона́шеских дворо́в, чреды́ наста́вив и́ноков к небе́сней па́жити, ра́дуйся о́тче на́ш, Паи́сие честны́й, наста́вивый земли́ Росси́йския концы́.

Слеза́ми мно́гими и ско́рбным житие́м Фео́дор, и́нок сви́рский, зла́я претерпе́, оба́че тве́рд и кре́пок сы́й умо́м, в боле́знех сы́на Льва́ духо́вно породи́.

Богородичен: О, Ма́ти Де́во Богоро́дице, Христа́ моли́, вопло́щшагося из Тебе́, да сохрани́т Росси́йскую страну́, и ду́ши на́ша, я́ко ми́лостив, спасе́т.

Пе́снь 3.

Ирмос: Небе́снаго кру́га верхотво́рче, Го́споди, и Це́ркве Зижди́телю, Ты́ мене́ утверди́ в любви́ Твое́й, жела́ний кра́ю, ве́рных утвержде́ние, еди́не Человеколю́бче.

Основа́ние тве́рдо по́двигом положи́л еси́, ка́мень краеуго́льный, Христа́, и бы́сть первонача́льник со́нму ста́рцев, о Льве́, и прия́т благода́ть отгоня́ти неду́ги от лю́те стра́ждущих.

Вопия́л еси́ си́це, о Льве́, ко оби́дящим: пою́ Бо́гу моему́ до́ндеже е́смь, кто́ мене́ разлучи́т от любве́ Его́? в не́йже пребы́сть до кончи́ны, соверша́я во́лю Его́ со дерзнове́нием.

Преподо́бный Мака́рий блаже́н бы́сть вои́стину, насы́ти бо а́лчущих ду́ши, ту́не пита́я все́х сло́вом испо́лненным благода́ти, потребля́я душе́вный гла́д, умиря́я ду́ши страстьми́ обурева́емыя.

Богородичен: От Тебе́, Богома́ти, истече́ Пото́к сла́дкий, вся́ напая́я лю́ди, скве́рны ду́ш измыва́я, о Богоро́дице Де́во, те́м же спаса́й от бе́д все́х и́же о́браз Тво́й честны́й почита́ющих.

Седа́лен, гла́с 4:

Яви́стеся Ду́ха Свята́го орга́ни, отцы́ преподо́бнии, и проро́чества да́ра сподо́бистеся, и́бо в ва́ших душа́х возсия́ Све́т непристу́пный.

Сла́ва, и ны́не, Богородичен:

Яко все́х еси́ творе́ний вы́шшая, воспева́ти Тя́ досто́йно недоуме́юще, Богоро́дице, мо́лим Тя́: ту́не поми́луй на́с.

Пе́снь 4.

Ирмос: Услы́шах, Го́споди, смотре́ния Твоего́ та́инство, разуме́х дела́ Твоя́, и просла́вих Твое́ Божество́.

О, мудре́йший Мака́рие, ты́ восторга́л еси́ кла́сы духо́вныя от писа́ний святы́х оте́ц, и насы́тил еси́ ду́ши а́лчущих.

Ты́ наста́вник бы́в и́ноком во Предте́чи оби́тели, о Анто́ние, воздержа́тельным житие́м, помоли́ся о тя́ восхваля́ющих.

Моисе́е, Анто́ние, и по пло́ти и по ду́ху су́ще бра́тие, богому́дрии па́стыри, вы́ наста́висте о́вцы на па́жити.

Богородичен: Богоро́дице Чи́стая, цве́те боже́ственный и прозя́бший ко́реню, Ты́ о на́с непреста́нно моли́, Богоро́дицу Тя́ воспева́ющих.

Пе́снь 5

Ирмос: Просвети́ нас повеле́нии Твои́ми, Го́споди, и мыш́цею Твое́ю высо́кою, Твой мир пода́ждь нам, Человеколю́бче.

Прия́т Елисе́й от Илии́ благода́ть сугу́бую, на тебе́ же, о́тче Амвро́сие, благода́ть почи́ оте́ц Льва́ и Мака́рия.

О, Амвро́сие, ты́ любо́вь в себе́ стяжа́л еси́, соверше́ние доброде́телей, все́м бо вся́ бы́л еси́, и убо́гим прибе́жище.

О, Амвро́сие, ты́ боже́ственною пи́щею напита́л еси́ а́лчущия сердца́, о́вцы своя́ упа́с на слове́сней па́жити.

Богородичен: Ма́ти Бо́жия, и засту́пнице усе́рдная, просвети́ на́с моля́щихся Тебе́, при́сно моля́щи о на́с, недосто́йных рабе́х Твои́х.

Пе́снь 6.

Ирмос: Моли́тву пролию́ ко Го́споду, и Тому́ возвещу́ печа́ли моя́, я́ко зол душа́ моя испо́лнися, и живо́т мой а́ду прибли́жися, и молю́ся, я́ко Ио́на: от тли, Бо́же, возведи́ мя.

Сы́н и́стинный яви́лся еси́ Ио́сифе, стяжа́в роди́тельницу безстра́стия, нелицеме́рное послуша́ние, и я́ко кро́ток, чи́ст же и ми́лостив, смире́нно глаго́лал еси́: непотре́бен е́смь без отца́ моего́.

Ио́сиф целому́дренный ве́рно по стопа́м отца́ своего́ хожда́ше: да́же до сме́рти са́м себе́ смиря́ше, си́це Влады́це Христу́ подража́я, сего́ ра́ди мо́лим его́: научи́ и на́с гре́шных смире́нию.

Отца́ своего́ любо́вь стяжа́в, Анато́лие, с ни́м упа́сл еси́ слове́сное ста́до, и ны́не, о́тче, на́с не забу́ди, о́вцы своя́ помяни́ и наста́ви и́х, взыщи́ заблужда́ющих ча́д, наставля́я все́х на́с ко спасе́нию.

Богородичен: Засту́пницу Тя́ ве́м в животе́ мое́м, и храни́тельницу тве́рду Деви́це, и напа́стей реша́щу молвы́, и прило́ги бесо́в отгоня́ющу, и си́це молю́ся всегда́: от страсте́й мои́х мя́ да изба́виши.

Конда́к, гла́с 8.

Иже от ми́ра су́етнаго уклони́вшеся, / и честны́м житие́м сокро́вище обре́тше, / попече́ния о гре́шных, су́щих в ми́ре, не оста́висте, / но я́ко су́ще заблужда́ющим наста́вницы, / и на́с от суеты́ мирски́я изба́вите, я́ко да зове́м: / ра́дуйтеся, ста́рцы богому́дрии.

Икос:

Ангелом поревнова́вше, устрани́стеся ми́ра, вожделе́вше в пусты́ню всели́тися, но и на́с, су́щих в ми́ре еще́, не забу́дите, мо́лимся мы́, гре́шнии, да пре́лести изба́вльшеся, к ва́м возглаго́лем си́це: ра́дуйтеся, вра́чеве душе́вных боле́зней; ра́дуйтеся, цели́тели неду́гов теле́сных; ра́дуйтеся, прему́дрых ра́зумом превосходя́щии; ра́дуйтеся, нему́дрых к ра́зуму наставля́ющии; ра́дуйтеся, непреста́нныя моли́твы де́лателие; ра́дуйтеся, о гре́шницех к Бо́гу хода́таи; ра́дуйтеся, ста́рцы богому́дрии.

Пе́снь 7.

Ирмос: От Иуде́и доше́дше, о́троцы в Вавило́не иногда́ ве́рою Тро́ическою пла́мень пе́щный попра́ша пою́ще: отцев Бо́же, благослове́н еси́.

Отче Иларио́не, уклони́вся от ми́ра, и вся́ я́же в не́м оста́вль и уме́ты вмени́в, ста́рцем прилепи́ся, Леони́ду с Мака́рием, вла́сть от Христа́ прия́т бе́сы прогоня́ти.

Утеша́ше Исаа́кий сострада́тельный и́нок, и́же к нему́ приходя́щих, и си́лою моли́твы от злы́х и́х огражда́ше, заступа́я и́х вся́чески, я́ко оте́ц или́ ма́ти сы́й ча́дом свои́м.

Не́сть проро́ка без че́сти, но в дому́ свое́м то́кмо, все́х бо изгна́ша проро́к, и ты́ изгна́н бы́в, о́тче, сподо́бися блаже́нства, Варсоно́фие пра́ведне, изгна́ние претерпе́вый пра́вды ра́ди.

Богородичен: Под Твою́ ми́лость прибега́ющих ве́рно и покланя́ющихся Твоему́ Сы́ну Богороди́тельнице, помоли́ся Ему́ о на́с, я́ко да изба́вимся от бе́д и искуше́ний.

Пе́снь 8.

Ирмос: Царя́ Небе́снаго, Его́же пою́т во́и Ангельстии, хвали́те и превозноси́те во вся ве́ки.

Сла́ве ве́чней прича́стник бы́сть Некта́рий, уклони́вся жите́йския сла́вы, вся́к бо смиря́яй себе́ вознесе́тся.

Да ублажа́тся отцы́ Анато́лий, Некта́рий, с ни́ми же Исаа́кий и Ни́кон, — зако́нно пострада́вше, лику́ют во вся́ ве́ки.

Бы́вше изгна́ни отцы́ от отсту́пник, не смути́шася, но возопи́ша: на́ше житие́ на Небесе́х е́сть.

Богородичен: По́мощи, я́же от Тебе́ тре́бующия, не пре́зри Де́во, пою́щия и превознося́щия Тя́ во ве́ки.

На 9-й песни поем песнь Пресвятыя Богородицы:

Вели́чит душа́ Моя́ Го́спода и возра́довася дух Мой о Бо́зе Спа́се Мое́м.

К коемуждо стиху припеваем: Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Я́ко призре́ на смире́ние рабы́ Своея́, се бо, от ны́не ублажа́т Мя вси ро́ди.

Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Я́ко сотвори́ Мне вели́чие Си́льный, и свя́то и́мя Его́, и ми́лость Его́ в ро́ды родо́в боя́щимся Его́.

Сотвори́ держа́ву мы́шцею Свое́ю, расточи́ го́рдыя мы́слию се́рдца их.

Низложи́ си́льныя со престо́л, и вознесе́ смире́нныя, а́лчущия испо́лни благ, и богатя́щияся отпусти́ тщи.

Восприя́т Изра́иля о́трока Своего́, помяну́ти ми́лости, я́коже глаго́ла ко отце́м на́шим, Авраа́му и се́мени его́ да́же до ве́ка.

Песнь 9

Ирмос: Вои́стинну Богоро́дицу Тя испове́дуем, спасе́ннии Тобо́ю, Де́во Чи́стая, с безпло́тными ли́ки Тя велича́юще.

Вои́стину стяжа́сте вся́ку доброде́тель, дарова́ние же вся́ко дарова́ся ва́м, но спаси́те ста́до ва́ше, моля́щеся за ны́.

О все́м благодари́те, за́поведь прия́хом, да похва́лим Бо́га, я́ко дарова́л е́сть на́м ва́с, наста́вники святы́я во Ца́рствие Его́.

Предста́телие на́ши, о стране́ Росси́йстей помоли́теся приле́жно, и спаси́те все́х, и́же па́мять ва́шу ве́рно соверша́ющих.

Богородичен: Влады́чице Свята́я, помога́й на́м гре́шным, и злы́х враго́в изба́ви Оте́чество на́ше, Тебе́ мо́лим, сохрани́ на́с под кро́вом Твои́м.

Свети́лен.

Ста́рцы почти́м богому́дрыя, свети́льники све́тлыя, подви́жники благоче́стия, доброде́телей учи́тели, о на́с моли́твенники ве́ры.

Сла́ва, и ны́не, Богородичен:

Сла́дость Ангелов, скорбя́щих Ра́дость, христиа́н Предста́тельнице, Де́во Ма́ти Госпо́дня, заступи́ на́с, и изба́ви ве́чных му́к.

Хвали́тны псалмы́, глас 6:

Вся́кое дыха́ние да хва́лит Го́спода./ Хвали́те Го́спода с небе́с,/ хвали́те Его́ в вы́шних.// Тебе́ подоба́ет песнь Бо́гу.

Хвали́те Его́ вси а́нгели Его́,/ хвали́те Его́ вся си́лы Его́.// Тебе́ подоба́ет песнь Бо́гу.

Сти́хиры, глас 6:

Стих: Сотвори́ти в них суд напи́сан/ сла́ва сия́ бу́дет всем преподо́бным Его́.

Все́ отло́жше / о земны́х попече́ние, / и страсте́й мучи́тельство / дале́че от себе́ отри́нувше, / преподо́бнии отцы́ богому́дрии, / в пусты́ню всели́стеся, / и се́рдце очи́стивше, / просвети́стеся благода́тию, / и я́ко свети́ла возсия́вше, / просвеща́ете всю́ подсо́лнечную, / тьму́ отгоня́ще от чту́щих / святу́ю па́мять ва́шу.

Стих: Хвали́те Его́ на си́лах Его́,/ хвали́те Его́ по мно́жеству вели́чествия Его́.

Стих: Хвали́те Его́ в тимпа́не и ли́це,/ хвали́те Его́ во стру́нах и орга́не.

Духо́вная свети́ла, / на тве́рди церко́вней возсия́вшая / в после́дняя времена́, / наставля́ют к ти́хому приста́нищу / обурева́емых в пучи́не / и жите́йскими сластьми́ погружа́емых, / грехо́вную мглу́ отгоня́ют, / и бу́рю страсте́й утиша́ют, / и от зла́го пути́ возбраня́ют, / приводя́щаго в па́губу, / и со дерзнове́нием мо́лятся / о спасе́нии ду́ш на́ших.

Стих: Хвали́те Его́ в кимва́лех доброгла́сных, хвали́те Его́ в кимва́лех восклица́ния. / Вся́кое дыха́ние да хва́лит Го́спода.

Глас 8: Сла́ва Отцу́ и Сы́ну и Свято́му Ду́ху

Воздви́гше кре́ст на ра́мена своя́, / и пло́ть распе́нше со страстьми́ и похотьми́, / сотро́сте зми́еву главу́, / и на́с яви́те победи́тели греха́, / и покая́ния досто́йныя плоды́ приноси́ти научи́те.

Глас 8: И ны́не и при́сно и во ве́ки веко́в. Ами́нь.

Влады́чице, приими́ моли́твы ра́б Твои́х, и изба́ви на́с от вся́кия ну́жды и печа́ли.

Славосло́вие вели́кое:

Сла́ва в вы́шних Бо́гу, и на земли́ мир, в челове́цех благоволе́ние. Хва́лим Тя, благослови́м Тя, кла́няем Ти ся, славосло́вим Тя, благодари́м Тя, вели́кия ра́ди сла́вы Твоея́. Го́споди Царю́ Небе́сный, Бо́же О́тче Вседержи́телю, Го́споди, Сы́не Единоро́дный, Иису́се Христе́, и Святы́й Ду́ше. Го́споди Бо́же, А́гнче Бо́жий, Сы́не Оте́чь, взе́мляй грех ми́ра, поми́луй нас; взе́мляй грехи́ ми́ра, приими́ моли́тву на́шу; седя́й одесну́ю Отца́, поми́луй нас. Я́ко Ты еси́ еди́н Свят, Ты еси́ еди́н Госпо́дь, Иису́с Христо́с, в сла́ву Бо́га Отца́. Ами́нь.

На всяк день благословлю́ Тя, и восхвалю́ И́мя Твое́ во ве́ки, и в век ве́ка.

Сподо́би, Го́споди, в день сей без греха́ сохрани́тися нам. Благослове́н еси́, Го́споди, Бо́же оте́ц на́ших, и хва́льно и просла́влено И́мя Твое́ во ве́ки. Ами́нь.

Бу́ди, Го́споди, ми́лость Твоя́ на нас, я́коже упова́хом на Тя.

Благослове́н еси́, Го́споди, научи́ мя оправда́нием Твои́м. (Три́жды)

Го́споди, прибе́жище был еси́ нам в род и род. Аз рех: Го́споди, поми́луй мя, исцели́ ду́шу мою́, я́ко согреши́х Тебе́. Го́споди, к Тебе́ прибего́х, научи́ мя твори́ти во́лю Твою́, я́ко Ты еси́ Бог мой: я́ко у Тебе́ исто́чник живота́, во све́те Твое́м у́зрим свет. Проба́ви ми́лость Твою́ ве́дущим Тя.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Три́жды)

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Святы́й Безсме́ртный, поми́луй нас.

Святы́й Бо́же, Святы́й Кре́пкий, Святы́й Безсме́ртный, поми́луй нас.

Тропа́рь, глас 1:

Утверди́, Бо́же, святу́ю правосла́вную ве́ру, правосла́вных христиа́н во век ве́ка.

Честне́йшую Херуви́м и Сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу, Тя велича́ем.

Сла́ва, и ны́не. Го́споди, поми́луй. (Три́жды) Благослови́.

Господи Иисусе Христе, Сыне Божий, моли́твами Пречи́стыя Своея́ Ма́тере, преподобных старцев Оптинских, преподобных и богоносных отец наших и всех святы́х, поми́луй и спаси нас я́ко Благ и Челове́колюбец.

Многоле́тие:

Вели́каго Господи́на и Отца́ на́шего Кири́лла,/ Святе́йшаго Патри́арха Моско́вского и всея́ Руси́,/ и Господи́на на́шего (Высоко-) Преосвяще́ннейшаго (имярек),/ (архи-)епи́скопа (митрополита (титул)),/ богохрани́мую страну́ на́шу Росси́йскую,/ и вся правосла́вныя христи́аны,// Го́споди, сохрани́ их на мно́гая ле́та.