Последование Всеношного бдения в день памяти святых и праведных богоотец Иоакима и Анны. Для домашнего (келейного) совершения

ВСЕНО́ЩНОЕ БДЕ́НИЕ

ВЕЛИ́КАЯ ВЕЧЕ́РНЯ

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас. Ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Трижды.)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, (трижды). Сла́ва, и ны́не:

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Таже, Го́споди, поми́луй, (12), Сла́ва, и ны́не:

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 103:

Поется часть псалма:

Благослови́, душе́ моя́, Го́спода. / Благослове́н еси́, Го́споди. / Го́споди, Бо́же мой, возвели́чился еси́ зело́. / Благослове́н еси́, Го́споди. / Во испове́дание и в велеле́поту обле́клся еси́. / Благослове́н еси́, Го́споди. / Посреде́ гор про́йдут во́ды. / Ди́вна дела́ Твоя́, Го́споди. / Вся прему́дростию сотвори́л еси́. / Сла́ва Ти, Го́споди, сотвори́вшему вся.

Или читается псалом полностью:

Благослови́, душе́ моя́, Го́спода. Го́споди, Бо́же мой, возвели́чился еси́ зело́. Во испове́дание и в велеле́поту обле́клся еси́. Одея́йся све́том, я́ко ри́зою, простира́яй не́бо, я́ко ко́жу. Покрыва́яй вода́ми превы́спренняя Своя́, полага́яй о́блаки на восхожде́ние Свое́, ходя́й на крилу́ ве́треню. Творя́й А́нгелы Своя́ ду́хи и слуги́ Своя́ пла́мень о́гненный. Основа́яй зе́млю на тве́рди ея́, не преклони́тся в век ве́ка. Бе́здна, я́ко ри́за, одея́ние ея́, на гора́х ста́нут во́ды, от запреще́ния Твоего́ побе́гнут, от гла́са гро́ма Твоего́ убоя́тся. Восхо́дят го́ры и нисхо́дят поля́ в ме́сто, е́же основа́л еси́ им. Преде́л положи́л еси́, eго́же не пре́йдут, ниже́ обратя́тся покры́ти зе́млю. Посыла́яй исто́чники в де́брех, посреде́ гор про́йдут во́ды. Напая́ют вся зве́ри се́льныя, ждут она́гри в жа́жду свою́. На ты́х пти́цы небе́сныя привита́ют, от среды́ ка́мения дадя́т глас. Напая́яй го́ры от превы́спренних Свои́х, от плода́ дел Твои́х насы́тится земля́. Прозяба́яй траву́ ското́м, и злак на слу́жбу челове́ком, извести́ хлеб от земли́. И вино́ весели́т се́рдце челове́ка, ума́стити лице́ еле́ем, и хлеб се́рдце челове́ка укрепи́т. Насы́тятся древа́ польска́я, ке́дри Лива́нстии, и́хже еси́ насади́л. Та́мо пти́цы вогнездя́тся, ероди́ево жили́ще предводи́тельствует и́ми. Го́ры высо́кия еле́нем, ка́мень прибе́жище за́яцем. Сотвори́л есть луну́ во времена́, со́лнце позна́ за́пад свой. Положи́л еси́ тму, и бысть нощь, в не́йже про́йдут вси зве́рие дубра́внии. Ски́мни рыка́ющии, восхи́тити и взыска́ти от Бо́га пи́щу себе́. Возсия́ со́лнце и собра́шася и в ло́жах свои́х ля́гут. Изы́дет челове́к на де́ло свое́ и на де́лание свое́ до ве́чера. Я́ко возвели́чишася дела́ Твоя́, Го́споди, вся прему́дростию сотвори́л еси́, испо́лнися земля́ тва́ри Твоея́. Сие́ мо́ре вели́кое и простра́нное, та́мо га́ди, и́мже несть числа́, живо́тная ма́лая с вели́кими, та́мо корабли́ препла́вают, змий сей, eго́же созда́л еси руга́тися eму́. Вся к Тебе́ ча́ют, да́ти пи́щу им во бла́го вре́мя. Да́вшу Тебе́ им соберу́т, отве́рзшу Тебе́ ру́ку вся́ческая испо́лнятся бла́гости, отвра́щшу же Тебе́ лице́, возмяту́тся, отъи́меши дух их, и исче́знут, и в персть свою́ возвратя́тся. По́слеши Ду́ха Твоего́, и сози́ждутся, и обнови́ши лице́ земли́. Бу́ди сла́ва Госпо́дня во ве́ки, возвесели́тся Госпо́дь о де́лех Свои́х, призира́яй на зе́млю, и творя́й ю́ трясти́ся, прикаса́яйся гора́м, и дымя́тся. Воспою́ Го́сподеви в животе́ мое́м, пою́ Бо́гу моему́, до́ндеже есмь, да услади́тся Ему́ бесе́да моя́, аз же возвеселю́ся о Го́споде. Да исче́знут гре́шницы от земли́, и беззако́нницы, я́коже не бы́ти им. Благослови́, душе́ моя́, Го́спода.

Со́лнце позна́ за́пад свой. Положи́л еси́ тму, и бысть нощь. Я́ко возвели́чишася дела́ Твоя́, Го́споди, вся прему́дростию сотвори́л еси́.

Сла́ва, и ны́не: Аллилу́иа, аллилу́иа, аллилу́иа, сла́ва Тебе́ Бо́же. Трижды.

Блаже́н муж:

Блаже́н муж, и́же не и́де на сове́т нечести́вых.

Аллилу́иа, аллилу́иа, аллилу́иа.

Я́ко весть Госпо́дь путь пра́ведных, и путь нечести́вых поги́бнет.

Аллилу́иа, аллилу́иа, аллилу́иа.

Рабо́тайте Го́сподеви со стра́хом и ра́дуйтеся Ему́ с тре́петом.

Аллилу́иа, аллилу́иа, аллилу́иа.

Блаже́ни вси наде́ющиися Нань.

Аллилу́иа, аллилу́иа, аллилу́иа.

Воскресни́, Го́споди, спаси́ мя, Бо́же мой.

Аллилу́иа, аллилу́иа, аллилу́иа.

Госпо́дне есть спасе́ние, и на лю́дех Твои́х благослове́ние Твое́.

Аллилу́иа, аллилу́иа, аллилу́иа.

Сла́ва Отцу́ и Сы́ну и Свято́му Духу.

Аллилу́иа, аллилу́иа, аллилу́иа.

И ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Го́споди, воззва́х, глас 3:

Го́споди, воззва́х к Тебе́, услы́ши мя./ Услы́ши мя, Го́споди./ Го́споди, воззва́х к Тебе́, услы́ши мя:/ вонми́ гла́су моле́ния моего́,/ внегда́ воззва́ти ми к Тебе́.// Услы́ши мя, Го́споди.

Да испра́вится моли́тва моя́,/ я́ко кади́ло пред Тобо́ю,/ воздея́ние руку́ мое́ю/ – же́ртва вече́рняя.// Услы́ши мя, Го́споди.

Стихи́ры пра́здника, глас 3:

Стих: А́ще беззако́ния на́зриши, Го́споди, Го́споди, кто постои́т? Я́ко у Тебе́ очище́ние есть.

Иоаки́м и Анна торжеству́ют, / нача́ток ро́ждше на́шего спасе́ния, / еди́ну Богоро́дицу, / с ни́миже и мы́ пра́зднуем дне́сь, / от ко́рене о́наго Иессе́ева / блажа́ще Де́ву Чи́стую.

Стих: И́мене ра́ди Твоего́ потерпе́х Тя, Го́споди, потерпе́ душа́ моя́ в сло́во Твое́, упова́ душа́ моя́ на Го́спода.

Боговмести́мая Отрокови́ца / и Богоро́дица Чи́стая, / проро́ков сла́ва, / Дави́дова Дщи́ / дне́сь ражда́ется от Иоаки́ма и Анны целому́дренныя, / и Ада́мова кля́тва, я́же на на́с, / потребля́ется рождество́м Ея́.

Стих: От стра́жи у́тренния до но́щи, от стра́жи у́тренния да упова́ет Изра́иль на Го́спода.

Яже пре́жде непло́дная страна́ / зе́млю плодоно́сну ражда́ет / и, от непло́дныя утро́бы пло́д свя́т да́вши, млеко́м пита́ет. / Чу́до стра́шно! Пита́тельница Жи́зни на́шея, / Яже небе́сный Хле́б во чре́ве прие́мши, / млеко́м от сосцу́ пита́ется.

Глас 4: Стих: Я́ко у Го́спода ми́лость, и мно́гое у Него́ избавле́ние, и Той изба́вит Изра́иля от всех беззако́ний eго́.

Прииди́те ны́не, лику́им пе́сненно, / о празднолю́бцы! и ве́рно пра́зднуим, / па́мять почита́юще / Иоаки́ма и Анны, честны́я дво́ицы; / ти́и бо роди́ша на́м Богома́терь / и Де́ву Чи́стую. / Те́мже и преста́вишася от привре́менных к нетле́нным / и присноживы́м жили́щем, / моля́щеся спасти́ся на́м.

Стих: Хвали́те Го́спода вси язы́цы, похвали́те Его́ вси лю́дие.

Прииди́те ны́не, лику́им пе́сненно, / о празднолю́бцы! и ве́рно пра́зднуим, / па́мять почита́юще / Иоаки́ма и Анны, честны́я дво́ицы; / ти́и бо роди́ша на́м Богома́терь / и Де́ву Чи́стую. / Те́мже и преста́вишася от привре́менных к нетле́нным / и присноживы́м жили́щем, / моля́щеся спасти́ся на́м.

Стих: Я́ко утверди́ся ми́лость Его́ на нас, и и́стина Госпо́дня пребыва́ет во век.

Ра́дуется дне́сь Анна, игра́ющи ду́хом, / и весели́тся, ра́дующися, / улучи́вши жела́ние, / его́же жела́ше дре́вле, благоча́дия: / обеща́ния бо пло́д и благослове́ния боже́ственный прозябе́, / Мари́ю Всенепоро́чную, / Бо́га на́шего ро́ждшую / и Со́лнце возсия́вшую / во тме́ спя́щим.

Глас 5: Сла́ва Отцу́ и Сы́ну и Свято́му Ду́ху. И ны́не и при́сно и во ве́ки веко́в. Ами́нь.

О, блаже́нная дво́ица, вы́ все́х роди́телей превзыдо́сте, я́ко тва́ри всея́ Преиму́щую прозябли́ есте́! Истинно блаже́н еси́, Иоаки́ме, таковы́ Отрокови́цы бы́в роди́тель. Блаже́нна ложесна́ твоя́, Анно, я́ко Ма́терь Жи́зни на́шея прозябла́ еси́; блаже́нни сосцы́, и́миже воздои́ла еси́ млеко́м Пита́вшую Пита́ющаго вся́кое дыха́ние, Его́же моли́те, ва́м, всеблаже́ннии, мо́лимся, поми́ловатися душа́м на́шим.

Све́те Тихи́й:

Све́те Ти́хий святы́я сла́вы Безсме́ртнаго Отца́ Небе́снаго, Свята́го, Блаже́ннаго, Иису́се Христе́! Прише́дше на за́пад со́лнца, ви́девше свет вече́рний, пое́м Отца́, Сы́на и Свята́го Ду́ха, Бо́га. Досто́ин еси́ во вся времена́ пет бы́ти гла́сы преподо́бными, Сы́не Бо́жий, живо́т дая́й; те́мже мир Тя сла́вит.

Сподо́би, Го́споди:

Сподо́би, Го́споди, в ве́чер сей без греха́ сохрани́тися нам. Благослове́н еси́, Го́споди, Бо́же оте́ц на́ших, и хва́льно и просла́влено и́мя Твое́ во ве́ки. Ами́нь.

Бу́ди, Го́споди, ми́лость Твоя́ на нас, я́коже упова́хом на Тя. Благослове́н еси́, Го́споди, научи́ мя оправда́нием Твои́м. Благослове́н еси́, Влады́ко, вразуми́ мя оправда́нием Твои́м. Благослове́н еси́, Святы́й, просвети́ мя оправда́нии Твои́ми.

Го́споди, ми́лость Твоя́ во век, дел руку́ Твое́ю не пре́зри. Тебе́ подоба́ет хвала́, Тебе́ подоба́ет пе́ние, Тебе́ сла́ва подоба́ет. Отцу́ и Сы́ну и Свято́му Ду́ху, ны́не и при́сно и во ве́ки веко́в. Ами́нь.

Го́споди, поми́луй. (40 раз)

Стихи́ры на стихо́вне:

Стихиры, гла́с 2:

Анна богому́дренна и́стиною, гнездо́ пти́че ви́девши на дре́ве пре́жде, свое́ безча́дие помяну́вши, вопия́ше: увы́ мне́, Го́споди, Го́споди, а́з, гре́шна, еди́на обнища́х плодотворе́ния от Тебе́. Тогда́ Человеколю́бец Бо́г пло́д е́й Де́ву, Честне́йшую всея́ тва́ри, даде́.

Сти́х: Слы́ши, Дщи́, и ви́ждь, и приклони́ у́хо Твое́.

Анна богому́дренна вои́стинну безча́дное боле́ние непло́дия позна́вше пе́рвее, те́мже, моля́щися, вопия́ше к Бо́гу: печа́льну и непло́дну у́зу разреши́, и рожду́ Свято́е роди́ти Тя́ Иму́щую Сло́во, е́же, Влады́ко Христе́ Жизнода́телю, да́руеши Ей: роди́т бо Тя́, Спа́са все́м челове́ком.

Сти́х: Лицу́ Твоему́ помо́лятся бога́тии лю́дстии.

Истинно Влады́ка и Бо́г же, Твою́ моли́тву услы́шав, я́ко Са́ррину пре́жде, внегда́ услы́ша Ангелов гла́с, ра́дость тебе́ пропове́дающь: Бо́жию Ма́терь роди́ши. И возопи́ла еси́ весе́лием души́: Влады́ка и Госпо́дь, Бо́г мо́й и Творе́ц, и́стиною мне́ оста́ви укоре́ние, ро́ждшей Присноде́ву.

Слава И ны́не, Богоро́дичен, гла́с 8:

Иже из непло́дных ложе́сн же́зл, Святу́ю Богоро́дицу, израсти́вше, из Нея́же Спасе́ние ми́ру возсия́, Христо́с Бо́г, сопру́г свя́т и сожи́тельство свя́то, Иоаки́м и Анна, ти́и, преста́вльшеся к небе́сным селе́нием, с свое́ю Дще́рию, Пречи́стою Де́вою, со Ангелы лику́ют, о ми́ре моли́твы творя́ще. С ни́миже и мы́, соше́дшеся благоче́стно, воспева́юще, глаго́лем: и́же Богоотрокови́цею и Пречи́стою Мари́ею прароди́теле Христо́вы наре́кшеся, моли́теся о душа́х на́ших.

Моли́тва свята́го Симео́на Богоприи́мца:

Ны́не отпуща́еши раба́ Твоего́, Влады́ко,/ по глаго́лу Твоему́, с ми́ром;/ я́ко ви́деста о́чи мои́ спасе́ние Твое́,/ е́же еси́ угото́вал пред лице́м всех люде́й,/ свет во открове́ние язы́ков,// и сла́ву люде́й Твои́х Изра́иля.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Тропа́рь, глас 2:

Пра́ведных Твои́х, Го́споди, па́мять пра́зднующе, те́ми мо́лим Тя́: спаси́ ду́ши на́ша. (Дважды)

Пра́здника, глас 4

Рождество́ Твое́, Богоро́дице Де́во, ра́дость возвести́ все́й вселе́нней: из Тебе́ бо возсия́ Со́лнце Пра́вды — Христо́с Бо́г на́ш, и разруши́в кля́тву, даде́ благослове́ние, и упраздни́в сме́рть, дарова́ на́м живо́т ве́чный. (Единожды)

Бу́ди И́мя Госпо́дне благослове́но от ны́не и до ве́ка. (Три́жды)

Псало́м 33:

Благословлю́ Го́спода на вся́кое вре́мя,/ вы́ну хвала́ Его́ во усте́х мои́х./ О Го́споде похва́лится душа́ моя́,/ да услы́шат кро́тцыи, и возвеселя́тся./ Возвели́чите Го́спода со мно́ю,/ и вознесе́м И́мя Его́ вку́пе./ Взыска́х Го́спода, и услы́ша мя,/ и от все́х скорбе́й мои́х изба́ви мя./ Приступи́те к Нему́, и просвети́теся,/ и ли́ца ва́ша не постыдя́тся./ Сей ни́щий воззва́, и Госпо́дь услы́ша и́,/ и от все́х скорбе́й его́ спасе́ и́./ Ополчи́тся а́нгел Госпо́день о́крест боя́щихся Его́,/ и изба́вит их./ Вкуси́те и ви́дите, я́ко благ Госпо́дь:/ блаже́н муж, и́же упова́ет Нань./ Бо́йтеся Го́спода, вси́ святи́и Его́,/ я́ко несть лише́ния боя́щимся Его́./ Бога́тии обнища́ша и взалка́ша:/ взыска́ющии же Го́спода// не лиша́тся вся́каго бла́га.

У́ТРЕНЯ.

Шестопса́лмие:

Сла́ва в вы́шних Бо́гу, и на земли́ мир, в челове́цех благоволе́ние. (Три́жды)

Го́споди, устне́ мои́ отве́рзеши, и уста́ моя́ возвестя́т хвалу́ Твою́. (Два́жды)

Псалом 3:

Го́споди, что ся умно́жиша стужа́ющии ми́? Мно́зи востаю́т на мя, мно́зи глаго́лют души́ мое́й: несть спасе́ния eму́ в Бо́зе eго́. Ты же, Го́споди, Засту́пник мой еси́, сла́ва моя́ и вознося́й главу́ мою́. Гла́сом мои́м ко Го́споду воззва́х, и услы́ша мя от горы́ святы́я Своея́. Аз усну́х, и спах, воста́х, я́ко Госпо́дь засту́пит мя. Не убою́ся от тем люде́й, о́крест напа́дающих на мя. Воскресни́, Го́споди, спаси́ мя, Бо́же мой, я́ко Ты порази́л еси́ вся вражду́ющыя ми всу́е: зу́бы гре́шников сокруши́л еси́. Госпо́дне есть спасе́ние, и на лю́дех Твои́х благослове́ние Твое́.

Аз усну́х, и спах, воста́х, я́ко Госпо́дь засту́пит мя.

Псалом 37:

Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́. Я́ко стре́лы Твоя́ унзо́ша во мне, и утверди́л еси́ на мне ру́ку Твою́. Несть исцеле́ния в пло́ти мое́й от лица́ гне́ва Твоего́, несть ми́ра в косте́х мои́х от лица́ грех мои́х. Я́ко беззако́ния моя́ превзыдо́ша главу́ мою́, я́ко бре́мя тя́жкое отяготе́ша на мне. Возсмерде́ша и согни́ша ра́ны моя́ от лица́ безу́мия моего́. Пострада́х и сляко́хся до конца́, весь день се́туя хожда́х. Я́ко ля́двия моя́ напо́лнишася поруга́ний, и несть исцеле́ния в пло́ти мое́й. Озло́блен бых и смири́хся до зела́, рыка́х от воздыха́ния се́рдца моего́. Го́споди, пред Тобо́ю все жела́ние мое́ и воздыха́ние мое́ от Тебе́ не утаи́ся. Се́рдце мое́ смяте́ся, оста́ви мя си́ла моя́, и свет о́чию мое́ю, и той несть со мно́ю. Дру́зи мои́ и и́скреннии мои́ пря́мо мне прибли́жишася и ста́ша, и бли́жнии мои́ отдале́че мене́ ста́ша и нужда́хуся и́щущии ду́шу мою́, и и́щущии зла́я мне глаго́лаху су́етная и льсти́вным весь день поуча́хуся. Аз же я́ко глух не слы́шах и я́ко нем не отверза́яй уст свои́х. И бых я́ко челове́к не слы́шай и не имы́й во усте́х свои́х обличе́ния. Я́ко на Тя, Го́споди, упова́х, Ты услы́шиши, Го́споди Бо́же мой. Я́ко рех: да не когда́ пора́дуют ми ся врази́ мои́: и внегда́ подвижа́тися нога́м мои́м, на мя велере́чеваша. Я́ко аз на ра́ны гото́в, и боле́знь моя́ предо мно́ю есть вы́ну. Я́ко беззако́ние мое́ аз возвещу́ и попеку́ся о гресе́ мое́м. Врази́ же мои́ живу́т и укрепи́шася па́че мене́, и умно́жишася ненави́дящии мя без пра́вды. Воздаю́щии ми зла́я возблага́я оболга́ху мя, зане́ гоня́х благосты́ню. Не оста́ви мене́, Го́споди Бо́же мой, не отступи́ от Мене́. Вонми́ в по́мощь мою́, Го́споди спасе́ния моего́.

Не оста́ви мене́, Го́споди Бо́же мой, не отступи́ от Мене́. Вонми́ в по́мощь мою́, Го́споди спасе́ния моего́.

Псалом 62:

Бо́же, Бо́же мой, к Тебе́ у́тренюю, возжада́ Тебе́ душа́ моя́, коль мно́жицею Тебе́ плоть моя́, в земли́ пу́сте и непрохо́дне, и безво́дне. Та́ко во святе́м яви́хся Тебе́, ви́дети си́лу Твою́ и сла́ву Твою́. Я́ко лу́чши ми́лость Твоя́ па́че живо́т, устне́ мои́ похвали́те Тя. Та́ко благословлю́ Тя в животе́ мое́м, о и́мени Твое́м воздежу́ ру́це мои́. Я́ко от ту́ка и ма́сти да испо́лнится душа́ моя́, и устна́ма ра́дости восхва́лят Тя уста́ моя́. А́ще помина́х Тя на посте́ли мое́й, на у́тренних поуча́хся в Тя. Я́ко был еси́ Помо́щник мой, и в кро́ве крилу́ Твое́ю возра́дуюся. Прильпе́ душа́ моя́ по Тебе́, мене́ же прия́т десни́ца Твоя́. Ти́и же всу́е иска́ша ду́шу мою́, вни́дут в преиспо́дняя земли́, предадя́тся в ру́ки ору́жия, ча́сти ли́совом бу́дут. Царь же возвесели́тся о Бо́зе, похва́лится всяк клены́йся Им, я́ко загради́шася уста́ глаго́лющих непра́ведная.

На у́тренних поуча́хся в Тя. Я́ко был еси́ Помо́щник мой, и в кро́ве крилу́ Твое́ю возра́дуюся. Прильпе́ душа́ моя́ по Тебе́, мене́ же прия́т десни́ца Твоя́.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Го́споди поми́луй. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Псалом 87:

Го́споди Бо́же спасе́ния моего́, во дни воззва́х, и в нощи́ пред Тобо́ю. Да вни́дет пред Тя моли́тва моя́: приклони́ у́хо Твое́ к моле́нию моему́, я́ко испо́лнися зол душа́ моя́, и живо́т мой аду прибли́жися. Привмене́н бых с низходя́щими в ров, бых я́ко челове́к без по́мощи, в ме́ртвых свобо́дь, я́ко я́звеннии спя́щии во гро́бе, и́хже не помяну́л еси́ ктому́, и ти́и от руки́ Твоея́ отринове́ни бы́ша. Положи́ша мя в ро́ве преиспо́днем, в те́мных и се́ни сме́ртней. На мне утверди́ся я́рость Твоя́, и вся во́лны Твоя́ наве́л еси́ на мя. Уда́лил еси́ зна́емых мои́х от Мене́, положи́ша мя ме́рзость себе́: пре́дан бых и не исхожда́х. О́чи мои́ изнемого́сте от нищеты́, воззва́х к Тебе́, Го́споди, весь день, возде́х к Тебе́ ру́це мои́. Еда́ ме́ртвыми твори́ши чудеса́? Или́ вра́чеве воскреся́т, и испове́дятся Тебе́? Еда́ пове́сть кто во гро́бе ми́лость Твою́, и и́стину Твою́ в поги́бели? Еда́ позна́на бу́дут во тьме чудеса́ Твоя́, и пра́вда Твоя́ в земли́ забве́нней? И аз к Тебе́, Го́споди, воззва́х и у́тро моли́тва моя́ предвари́т Тя. Вску́ю, Го́споди, отре́еши ду́шу мою́, отвраща́еши лице́ Твое́ от Мене́? Нищ есмь аз, и в труде́х от ю́ности моея́; возне́с же ся, смири́хся, и изнемого́х. На мне преидо́ша гне́ви Твои́, устраше́ния Твоя́ возмути́ша мя, обыдо́ша мя я́ко вода́, весь день одержа́ша мя вку́пе. Уда́лил еси́ от Мене́ дру́га и и́скренняго, и зна́емых мои́х от страсте́й.

Го́споди Бо́же спасе́ния моего́, во дни воззва́х, и в нощи́ пред Тобо́ю. Да вни́дет пред Тя моли́тва моя́: приклони́ у́хо Твое́ к моле́нию моему́.

Псалом 102:

Благослови́, душе́ моя́, Го́спода, и вся вну́тренняя моя́ и́мя свя́тое Его́. Благослови́, душе́ моя́, Го́спода, и не забыва́й всех воздая́ний Его́, очища́ющаго вся беззако́ния твоя́, исцеля́ющаго вся неду́ги твоя́, избавля́ющаго от истле́ния живо́т твой, венча́ющаго тя ми́лостию и щедро́тами, исполня́ющаго во благи́х жела́ние твое́: обнови́тся я́ко о́рля ю́ность твоя́. Творя́й ми́лостыни Госпо́дь, и судьбу́ всем оби́димым. Сказа́ пути́ Своя́ Моисе́ови, сыново́м Изра́илевым хоте́ния Своя́: Щедр и Ми́лостив Госпо́дь, Долготерпели́в и Многоми́лостив. Не до конца́ прогне́вается, ниже́ во век вражду́ет, не по беззако́нием на́шым сотвори́л есть нам, ниже́ по грехо́м на́шым возда́л есть нам. Я́ко по высоте́ небе́сней от земли́, утверди́л есть Госпо́дь ми́лость Свою́ на боя́щихся Его́. Ели́ко отстоя́т восто́цы от за́пад, уда́лил есть от нас беззако́ния на́ша. Я́коже ще́дрит оте́ц сы́ны, уще́дри Госпо́дь боя́щихся Его́. Я́ко Той позна́ созда́ние на́ше, помяну́, я́ко персть есмы́. Челове́к, я́ко трава́ дни́е eго́, я́ко цвет се́льный, та́ко оцвете́т, я́ко дух про́йде в нем, и не бу́дет, и не позна́ет ктому́ ме́ста своего́. Ми́лость же Госпо́дня от ве́ка и до ве́ка на боя́щихся Его́, и пра́вда Его́ на сыне́х сыно́в, храня́щих заве́т Его́, и по́мнящих за́поведи Его́ твори́ти я́. Госпо́дь на Небеси́ угото́ва Престо́л Свой, и Ца́рство Его́ все́ми облада́ет. Благослови́те Го́спода вси А́нгели Его́, си́льнии кре́постию, творя́щии сло́во Его́, услы́шати глас слове́с Его́. Благослови́те Го́спода вся Си́лы Его́, слуги́ Его́, творя́щии во́лю Его́. Благослови́те Го́спода вся дела́ Его́, на вся́ком ме́сте влады́чества Его́, благослови́, душе́ моя́, Го́спода.

На вся́ком ме́сте влады́чества Его́, благослови́, душе́ моя́, Го́спода.

Псалом 142:

Го́споди, услы́ши моли́тву мою́, внуши́ моле́ние мое́ во и́стине Твое́й, услы́ши мя в пра́вде Твое́й и не вни́ди в суд с рабо́м Твои́м, я́ко не оправди́тся пред Тобо́ю всяк живы́й. Я́ко погна́ враг ду́шу мою́, смири́л есть в зе́млю живо́т мой, посади́л мя есть в те́мных, я́ко ме́ртвыя ве́ка. И уны́ во мне дух мой, во мне смяте́ся се́рдце мое́. Помяну́х дни дре́вния, поучи́хся во всех де́лех Твои́х, в творе́ниих руку́ Твое́ю поуча́хся. Возде́х к Тебе́ ру́це мои́, душа́ моя́, я́ко земля́ безво́дная Тебе́. Ско́ро услы́ши мя, Го́споди, исчезе́ дух мой, не отврати́ лица́ Твоего́ от Мене́, и уподо́блюся низходя́щым в ров. Слы́шану сотвори́ мне зау́тра ми́лость Твою́, я́ко на Тя упова́х. Скажи́ мне, Го́споди, путь во́ньже пойду́, я́ко к Тебе́ взях ду́шу мою́. Изми́ мя от враг мои́х, Го́споди, к Тебе́ прибего́х. Научи́ мя твори́ти во́лю Твою́, я́ко Ты еси́ Бог мой. Дух Твой Благи́й наста́вит мя на зе́млю пра́ву. И́мене Твоего́ ра́ди, Го́споди, живи́ши мя, пра́вдою Твое́ю изведе́ши от печа́ли ду́шу мою́. И ми́лостию Твое́ю потреби́ши враги́ моя́ и погуби́ши вся стужа́ющыя души́ мое́й, я́ко аз раб Твой есмь.

Услы́ши мя, Го́споди, в пра́вде Твое́й и не вни́ди в суд с рабо́м Твои́м.

Услы́ши мя, Го́споди, в пра́вде Твое́й и не вни́ди в суд с рабо́м Твои́м.

Дух Твой Благи́й наста́вит мя на зе́млю пра́ву.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Тропа́рь глас 2:

Пра́ведных Твои́х, Го́споди, па́мять пра́зднующе, те́ми мо́лим Тя́: спаси́ ду́ши на́ша. (Дважды)

Сла́ва Отцу́ и Сы́ну и Свято́му Ду́ху.

Тропа́рь глас 1:

Иже в зако́нней благода́ти пра́ведни бы́вше, Младе́нца богода́ннаго породи́ша на́м Иоаки́м и Анна. Те́мже дне́сь све́тло торжеству́ет, ве́село пра́зднующи, Боже́ственная Це́рковь, честну́ю ва́шу па́мять, сла́вящи Бо́га, воздви́гшаго ро́г спасе́ния на́м в дому́ Дави́дове.

И ны́не и при́сно и во ве́ки веко́в. Ами́нь.

Глас 4: Рождество́ Твое́, Богоро́дице Де́во, ра́дость возвести́ все́й вселе́нней: из Тебе́ бо возсия́ Со́лнце Пра́вды — Христо́с Бо́г на́ш, и разруши́в кля́тву, даде́ благослове́ние, и упраздни́в сме́рть, дарова́ на́м живо́т ве́чный.

Здесь читается кафизма, положенная по дню, или сразу седальны:

Го́споди, поми́луй. (Три́жды)

Седален, глас 3:

Де́ва дне́сь и Богоро́дица Мари́я, черто́г неразори́мый небе́снаго Жениха́, ражда́ется от непло́дныя Анны Бо́жиею во́лею, носи́ло Бо́жия Сло́ва угото́вльшися: в сие́ бо предповеле́ся бы́ти Отрокови́ца и Ма́ти су́щия Жи́зни.

Сла́ва Отцу́ и Сы́ну и Свято́му Ду́ху. И ны́не и при́сно и во ве́ки веко́в. Ами́нь.

Глас 3: Де́ва дне́сь и Богоро́дица Мари́я, черто́г неразори́мый небе́снаго Жениха́, ражда́ется от непло́дныя Анны Бо́жиею во́лею, носи́ло Бо́жия Сло́ва угото́вльшися: в сие́ бо предповеле́ся бы́ти Отрокови́ца и Ма́ти су́щия Жи́зни.

Седален, глас 4:

Дави́де, я́же кля́тся тебе́ дре́вле Пома́завый тя́, пло́д от чресла́ твоего́ на престо́ле твое́м испо́лни, да́в Мари́ю. Зри́ши бо Юже от Анны Иу́довы и ра́дуешися, из Нея́же Христо́с воплоти́ся, Спа́с вся́ческих, безме́рною бла́гостию спаса́я ро́д на́ш.

Сла́ва Отцу́ и Сы́ну и Свято́му Ду́ху. И ны́не и при́сно и во ве́ки веко́в. Ами́нь.

Глас 4: Дави́де, я́же кля́тся тебе́ дре́вле Пома́завый тя́, пло́д от чресла́ твоего́ на престо́ле твое́м испо́лни, да́в Мари́ю. Зри́ши бо Юже от Анны Иу́довы и ра́дуешися, из Нея́же Христо́с воплоти́ся, Спа́с вся́ческих, безме́рною бла́гостию спаса́я ро́д на́ш.

Псало́м 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя. Я́ко беззако́ние мое́ аз зна́ю и грех мой предо мно́ю есть вы́ну. Тебе́ Еди́ному согреши́х, и лука́вое пред Тобо́ю сотвори́х, я́ко да оправди́шися во словесе́х Твои́х и победи́ши, внегда́ суди́ти Ти. Се бо в беззако́ниих зача́т есмь, и во гресе́х роди́ мя ма́ти моя́. Се бо и́стину возлюби́л еси́, безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся, омы́еши мя, и па́че сне́га убелю́ся. Слу́ху моему́ да́си ра́дость и весе́лие, возра́дуются ко́сти смире́нныя. Отврати́ лице́ Твое́ от грех мои́х, и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́, и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́, и Ду́хом Влады́чним утверди́ мя. Научу́ беззако́нныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́, возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо, всесожже́ния не благоволи́ши. Же́ртва Бо́гу дух сокруше́н, се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския, тогда́ благоволи́ши же́ртву пра́вды, возноше́ние и всесожега́емая: тогда́ возложа́т на олта́рь Твой тельцы́.

Го́споди, поми́луй. (12 раз)

Кано́н святы́х. Гла́с 2.

Пе́снь 1.

Ирмос: Во глубине́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный гре́х потреби́ло е́сть, препросла́вленный Госпо́дь, сла́вно бо просла́вися.

Припе́в: Святии богоотцы Иоакиме и Анно, моли́те Бо́га о на́с.

Свещу́, мы́сленное Со́лнце возблиста́вшую, пло́тию от Нея́ возсия́вшее, доброде́телей све́тлостьми просиява́юще, роди́ти сподо́бистеся, Анно богому́драя и Иоаки́м присноблаже́нный.

Всеобра́зным зре́нием к Бо́гу и́стинно богоприя́тный Иоаки́м и Анна боже́ственная, неукло́нно моля́щеся, Пречи́стую Богоро́дицу роди́ша, пребо́льшую всея́ тва́ри свя́тостию.

Превысоку́ иму́ще жи́знь, жития́ же све́тлость, все́х вку́пе роди́телей бы́сте земны́х превы́шшии, Нетле́нну Де́ву я́ко роди́вше и богоотцы́ и́стинно Тоя́ ра́ди бы́вше.

Богородичен: Спасе́ния всего́ нача́льницы, блаже́ннейший Иоаки́м и Анна сла́вная, Чи́стую, и Непоро́чную, и Пречи́стую Богоро́дицу роди́ша, богоче́стия Сию́ прие́мше воздая́ние.

Пе́снь 3.

Ирмос: На ка́мени мя́ ве́ры утверди́в, разшири́л еси́ уста́ моя́ на враги́ моя́, возвесели́бося ду́х мо́й, внегда́ пе́ти: не́сть свя́т, я́коже Бо́г на́ш, и не́сть пра́веден, па́че Тебе́, Го́споди.

Непло́дствующая, и дете́й лише́нная, и слеза́ми Соде́теля моля́щая, еди́ну Благослове́нную сподо́билася еси́ роди́ти, богоприя́тная Анно, зову́щи, я́ко не́сть свя́т, ра́зве Тебе́, Го́споди.

Иже сожи́тельницу обогати́в Боже́ственною благода́тию, Иоаки́м боже́ственный и богоглаго́ливый Хода́таицу спасе́ния челове́ком роди́ти сподо́бися. К Не́йже взыва́ем, я́ко не́сть непоро́чны, па́че Тебе́, Влады́чице.

Воспое́м всечестну́ю сопру́гу, от нея́же возсия́ на́м Де́ва, все́х тва́рей превы́шши су́щи, Бо́га бо роди́, к Нему́же возопии́м, я́ко не́сть свя́т, па́че Тебе́, Го́споди.

Богородичен: Непло́днаго поно́са избе́гши, роди́ Анна Богоро́дицу, Евы бо поноше́ние пресла́вно потре́бльшую, к Не́йже взыва́ем, я́ко не́сть непоро́чны, па́че Тебе́, Влады́чице.

Седа́лен, гла́с 5.

Иоаки́м и Анна торжеству́ют, по Бо́зе бо досто́йно благода́ть обрето́ша и роди́ша пло́д, богоприя́тен хра́м, Де́ву и Чи́стую Ма́терь Бо́жию, еди́ну Благослове́нную, моля́щуюся непреста́нно спасти́ся душа́м на́шим.

Пе́снь 4.

Ирмос: Прише́л еси́ от Де́вы, не хода́тай, ни Ангел, но Са́м, Го́споди, вопло́щся, и спа́сл еси́ всего́ мя челове́ка. Те́м зову́ Ти́: сла́ва си́ле Твое́й, Го́споди.

Ра́дуяся, Де́ву от непло́дове прие́млет, Ея́же ра́ди непло́дие мирско́е разреши́ся, Рождество́м де́вствующую, Иоаки́м богому́дрый и богоприя́тный.

Пра́отец Бо́жий Иоаки́м ны́не предлага́ет на́м трапе́зу духо́вную, пребога́тый: я́ко Богома́терь и Пренетле́нную Отрокови́цу роди́л е́сть.

Умерщвле́ния и тли́ челове́ки спа́сшую благода́ть предлага́ет, хотя́щую бы́ти Ма́терь Бо́жию, Сло́во Присносу́щное прие́мшую, несказа́нно воплоща́емое.

От ко́рене Иессе́ева сопру́г возсия́, от него́же прозябе́ же́зл, Цве́т нося́щий, всего́ мя челове́ка облагово́нствующь мѵ́ром Божества́.

Богородичен: Напра́ви мое́, Богоро́дице, житие́, повеле́нии Боже́ственными наставля́ющи вопло́щшагося Сло́ва из Тебе́, и к све́ту наста́ви, Де́во Ма́ти, Мари́е Богоневе́сто.

Пе́снь 5

Ирмос: Просвеще́ние во тме́ лежа́щих, спасе́ние отча́янных, Христе́ Спа́се мо́й, к Тебе́ у́тренюю, Царю́ ми́ра, просвети́ мя сия́нием Твои́м, ино́го бо ра́зве Тебе́ Бо́га не зна́ю.

Целому́дренная дво́ица, чистоты́ заря́ сия́ющая, Юже де́вства боже́ственным сия́нием украси́вшую непло́дное естество́ челове́ческое на́м породи́ Анна и Иоаки́м богоприя́тный.

Де́вственный богоукра́шенный престо́л, Иже все́х превы́шши, дла́нию Боже́ственною, целому́дрия честны́й сопру́г и богому́драя дво́ица породи́, Анна и Иоаки́м всехва́льнии.

Восто́ку свы́ше я́вльшуся в наставле́ние заблу́ждших светоно́сную две́рь боже́ственный Иоаки́м и Анна, богому́дренно пожи́вшии, роди́ти, богови́дцы, я́ве сподо́бишася.

Зако́на Но́ваго богопи́санную скрижа́ль, на не́йже реше́ние грехо́в Ве́тхаго Зако́на Боже́ственное Сло́во прообрази́ пре́жде, я́ко от ка́мене, ны́не усече́ манове́нием Вседержи́тель от непло́дове.

Богородичен: Заре́ю Твое́ю, Богома́ти, уму́ моему́ озари́тися, омраче́нному грехо́м, повели́, Де́во, неве́дения мра́к и прегреше́ний потребля́ющи, ины́я бо па́че Тебе́ храни́тельницы не ве́м.

Пе́снь 6.

Ирмос: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же мя́ возведи́.

Плодови́тое се́мя, е́же дре́вле непло́ды Анна восприе́мши, от Боже́ственнаго осия́ния Отрокови́цу роди́ти сподо́бися, все́ми тварьми́ влады́чествующую.

Ны́не непло́ды ро́ждши, во́лею Бо́жиею, покоре́нием прия́ти Де́ву, ро́ждшую кроме́ плотски́я во́ли, Самому́ восхоте́вшу Бо́гу проявле́нно.

Озари́вся Иса́ия Ду́хом, Иоаки́ма и Анны рождество́, сви́ток но́в, ви́де, в не́мже написа́ся Сло́во воплоща́емо.

Богородичен: Та́инству предтече́т та́инство: пре́жде бо неплодя́щая благода́ть породи́ спасе́ния Хода́таицу, де́вства рожде́нием я́вльшуюся на́м.

Конда́к, гла́с 2.

Ра́дуется ны́не Анна, непло́дства разреши́вшися соу́з, и пита́ет Пречи́стую, созыва́ющи вся́ воспе́ти Дарова́вшаго от чре́ва ея́ челове́ком еди́ну Ма́терь и Неискусому́жную.

Икос:

Яже у́з пре́жде безча́дства моли́твою изба́вльшися, призыва́ет ны́ спра́здновати чудеси́ и да́ры принести́ Рожде́нней, моля́щияся пред Не́ю с любо́вию, Ейже я́ко иногда́ де́вы предтеча́ху ско́ро, лику́юще и вопию́ще: се́ прии́де все́х воззва́ние, се́ Ада́м свободи́ся, я́ко Анна пло́д прозябе́, еди́ну Ма́терь и Неискусому́жную.

Пе́снь 7.

Ирмос: Богопроти́вное веле́ние беззако́ннующаго мучи́теля высо́к пла́мень вознесло́ е́сть: Христо́с же простре́ Богочести́вым отроко́м ро́су духо́вную, Сы́й Благослове́н и Препросла́влен.

От ко́рене прозя́бши, дво́ице свята́я, Дави́да богому́драго, же́зл всесвяще́нный, Де́ву Чи́стую, ми́ру породи́сте, Цве́т свяще́ннейший на́м, Христа́, безсе́менно возсия́вшую.

Свещу́ многосве́тлую Богоро́дицу Анна боже́ственная, я́коже златоза́рен све́щник, нося́щи, ми́р ве́сь просвети́ боже́ственным све́том, де́вства све́тлыми сия́ньми.

Прароди́телие сла́внии воплоти́вшагося за неизрече́нную ми́лость Бо́га Вседержи́теля от Дще́ре богому́дрыя ва́шея, пребога́тии, ны́не мне́, прибе́гшему к ва́м, согреше́ний разреше́ние испроси́те.

Богородичен: Яко су́ще пребо́льшим роди́телей, все́ми Влады́чествующую тва́рьми роди́сте, Мари́ю Пречи́стую, ро́ждшую Бо́га, пло́тию обложе́нна, на́м уподо́бльшася за благоутро́бие мно́гое.

Пе́снь 8.

Ирмос: В пе́щь о́гненную ко отроко́м евре́йским снизше́дшаго и пла́мень в ро́су прело́жшаго Бо́га, по́йте дела́, я́ко Го́спода, и превозноси́те во вся́ ве́ки.

Бога́тством кипя́щии доброде́телей сла́вою Боже́ственною укра́шенную Цари́цу Де́ву Иоаки́м честны́й и Анна целому́дренная роди́ша, Юже вся́ тва́рь пое́т я́ко Богоро́дицу.

Же́зл си́лы на́м ва́ми, дру́ги Бо́жиими, по́слан бы́сть, Всенепоро́чная Неве́ста, Еюже посреде́ враго́в безбо́жных одолева́ем, кова́рствия те́х попира́юще.

Ору́жие на́м от Бо́га благоволе́ния тобо́ю, сопру́же свяще́ннейший, дарова́ся, и́мже ны́не мы́, ве́рнии, кра́сне при́сно венча́емся, Бо́га ро́ждшая Чи́стая Де́во Ма́ти.

Си́ла Бо́жия плодоноше́нием непло́дствующее чре́во отве́рзе, и предгряде́т Две́рь де́вства све́тлостьми, Ея́же ра́ди Сло́во прии́де к земны́м, вопло́щься неизрече́нным сло́вом.

Богородичен: Светоли́тии из Тебе́ Воплоще́ннаго на́с ра́ди просвеще́нная дво́ица изря́дная роди́телей Твои́х да бу́дет, Пренепоро́чная Влады́чице, хода́тайство на́м бла́г небе́сных.

На 9-й песни поем песнь Пресвятыя Богородицы:

Вели́чит душа́ Моя́ Го́спода и возра́довася дух Мой о Бо́зе Спа́се Мое́м.

К коемуждо стиху припеваем: Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Я́ко призре́ на смире́ние рабы́ Своея́, се бо, от ны́не ублажа́т Мя вси ро́ди.

Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Я́ко сотвори́ Мне вели́чие Си́льный, и свя́то и́мя Его́, и ми́лость Его́ в ро́ды родо́в боя́щимся Его́.

Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Сотвори́ держа́ву мы́шцею Свое́ю, расточи́ го́рдыя мы́слию се́рдца их.

Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Низложи́ си́льныя со престо́л, и вознесе́ смире́нныя, а́лчущия испо́лни благ, и богатя́щияся отпусти́ тщи.

Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Восприя́т Изра́иля о́трока Своего́, помяну́ти ми́лости, я́коже глаго́ла ко отце́м на́шим, Авраа́му и се́мени его́ да́же до ве́ка.

Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Песнь 9

Ирмос: Безнача́льна Роди́теля Сы́н, Бо́г и Госпо́дь, вопло́щься от Де́вы, на́м яви́ся, омраче́нная просвети́ти, собра́ти расточе́нная, те́м Всепе́тую Богоро́дицу, велича́ем.

Единому́дреннии и единоду́шнии доброде́телию су́ще, Пречи́стыя Де́вы честни́и роди́телие, соверша́ющим усе́рдно прехва́льную и сла́вную па́мять ва́шу, свяще́ннейшии, спасти́ся моли́теся.

Па́жить разруши́сте сме́ртную, сла́внии, Жи́зни Ма́терь све́тло ро́ждшии, потре́бльшую сея́ прило́г и безсме́ртныя жи́зни исхода́таившую наде́жду ве́ры ра́ди.

Кра́сное я́ко со́лнце Иоаки́м, единя́яся светоно́сней луне́ Анне, породи́ де́вства лучу́, Еюже Заря́ Боже́ственнаго Существа́, Пло́ти по Ипоста́си соедини́вшися, на́м возсия́.

Целому́дренно пожи́вше и благоче́стно, блаже́ннии, ны́не сла́дости несказа́нныя сподо́бистеся, Богоявле́ния получи́вше Иже от ва́с ми́ру Явльшагося, Его́же моли́те спасти́ся душа́м на́шим.

Свети́лен.

Яже Евы кля́тву Потре́бльшая ны́не ражда́ется от ста́рец непло́дных, от Анны и Иоаки́ма, Юже со Ангелы вси́ по до́лгу в пе́снех, ве́рнии, да восхва́лим.

Сла́ва, и ны́не:

Яко от со́лнца со́лнце и от луны́ луна́, от Анны и Иоаки́ма Всенепоро́чная Отрокови́ца роди́ся и просвети́ ми́ра концы́ Свои́м сия́нием, Юже пою́ще, досто́йно ублажи́м, соверша́юще честну́ю и́х па́мять.

Хвали́тны псалмы́, глас 6:

Вся́кое дыха́ние да хва́лит Го́спода./ Хвали́те Го́спода с небе́с,/ хвали́те Его́ в вы́шних.// Тебе́ подоба́ет песнь Бо́гу.

Хвали́те Его́ вси а́нгели Его́,/ хвали́те Его́ вся си́лы Его́.// Тебе́ подоба́ет песнь Бо́гу.

Сти́хиры, глас 6:

Стих: Сотвори́ти в них суд напи́сан/ сла́ва сия́ бу́дет всем преподо́бным Его́.

Ны́не игра́й, проро́че Дави́де, / се́ бо от чре́сл твои́х Де́ва, / Богоотрокови́ца Мари́я, / роди́ся пресла́вно, / Ея́же ра́ди земни́и боже́ственно / обрето́ша воззва́ние паде́ния.

Стих: Хвали́те Его́ на си́лах Его́,/ хвали́те Его́ по мно́жеству вели́чествия Его́.

Ны́не игра́й, проро́че Дави́де, / се́ бо от чре́сл твои́х Де́ва, / Богоотрокови́ца Мари́я, / роди́ся пресла́вно, / Ея́же ра́ди земни́и боже́ственно / обрето́ша воззва́ние паде́ния.

Стих: Хвали́те Его́ в тимпа́не и ли́це,/ хвали́те Его́ во стру́нах и орга́не.

Умерщвле́ния совлачи́тся ти́ны, благода́тию, / Ада́м со Евою, / и оживля́ются всеро́дная, / от непло́дныя бо ро́ждшися / и́стинно, Богоро́дица / мирско́е разреши́ непло́дство.

Стих: Хвали́те Его́ в кимва́лех доброгла́сных, хвали́те Его́ в кимва́лех восклица́ния. / Вся́кое дыха́ние да хва́лит Го́спода.

Всечестно́е Твое́ рождество́ / све́тло торжеству́ем со Ангелы, / Ма́ти Де́во Чи́стая. / Но, о Богороди́тельнице, / не преста́й защища́ти христиа́н, / воспева́ющих Тя́.

Глас 2: Сла́ва Отцу́ и Сы́ну и Свято́му Ду́ху И ны́не и при́сно и во ве́ки веко́в. Ами́нь.

Дне́сь Всенепоро́чная Чи́стая произы́де от непло́дове, дне́сь вся́ческая ра́дуются в Тоя́ рождестве́. Ада́м уз разреша́ется, и Ева кля́твы свободи́ся, небе́сная вся́ веселя́тся, и ми́р челове́ком да́руется. Мы́ же, славосло́вяще, вопие́м: сла́ва в вы́шних Бо́гу, и на земли́ ми́р, в челове́цех благоволе́ние.

Славосло́вие вели́кое:

Сла́ва в вы́шних Бо́гу, и на земли́ мир, в челове́цех благоволе́ние. Хва́лим Тя, благослови́м Тя, кла́няем Ти ся, славосло́вим Тя, благодари́м Тя, вели́кия ра́ди сла́вы Твоея́. Го́споди Царю́ Небе́сный, Бо́же О́тче Вседержи́телю, Го́споди, Сы́не Единоро́дный, Иису́се Христе́, и Святы́й Ду́ше. Го́споди Бо́же, А́гнче Бо́жий, Сы́не Оте́чь, взе́мляй грех ми́ра, поми́луй нас; взе́мляй грехи́ ми́ра, приими́ моли́тву на́шу; седя́й одесну́ю Отца́, поми́луй нас. Я́ко Ты еси́ еди́н Свят, Ты еси́ еди́н Госпо́дь, Иису́с Христо́с, в сла́ву Бо́га Отца́. Ами́нь.

На всяк день благословлю́ Тя, и восхвалю́ И́мя Твое́ во ве́ки, и в век ве́ка.

Сподо́би, Го́споди, в день сей без греха́ сохрани́тися нам. Благослове́н еси́, Го́споди, Бо́же оте́ц на́ших, и хва́льно и просла́влено И́мя Твое́ во ве́ки. Ами́нь.

Бу́ди, Го́споди, ми́лость Твоя́ на нас, я́коже упова́хом на Тя.

Благослове́н еси́, Го́споди, научи́ мя оправда́нием Твои́м. (Три́жды)

Го́споди, прибе́жище был еси́ нам в род и род. Аз рех: Го́споди, поми́луй мя, исцели́ ду́шу мою́, я́ко согреши́х Тебе́. Го́споди, к Тебе́ прибего́х, научи́ мя твори́ти во́лю Твою́, я́ко Ты еси́ Бог мой: я́ко у Тебе́ исто́чник живота́, во све́те Твое́м у́зрим свет. Проба́ви ми́лость Твою́ ве́дущим Тя.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Три́жды)

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Святы́й Безсме́ртный, поми́луй нас.

Святы́й Бо́же, Святы́й Кре́пкий, Святы́й Безсме́ртный, поми́луй нас.

Тропа́рь, глас 1:

Иже в зако́нней благода́ти пра́ведни бы́вше, Младе́нца богода́ннаго породи́ша на́м Иоаки́м и Анна. Те́мже дне́сь све́тло торжеству́ет, ве́село пра́зднующи, Боже́ственная Це́рковь, честну́ю ва́шу па́мять, сла́вящи Бо́га, воздви́гшаго ро́г спасе́ния на́м в дому́ Дави́дове.

Утверди́, Бо́же, святу́ю правосла́вную ве́ру, правосла́вных христиа́н во век ве́ка.

Честне́йшую Херуви́м и Сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу, Тя велича́ем.

Сла́ва, и ны́не. Го́споди, поми́луй. (Три́жды) Благослови́.

Господи Иисусе Христе, Сыне Божий, моли́твами Пречи́стыя Своея́ Ма́тере, святых и праведных богоотец Иоакима и Анны, преподобных и богоносных отец наших и всех святы́х, поми́луй и спаси нас я́ко Благ и Челове́колюбец.

Многоле́тие:

Вели́каго Господи́на и Отца́ на́шего Кири́лла,/ Святе́йшаго Патри́арха Моско́вского и всея́ Руси́,/ и Господи́на на́шего (Высоко-) Преосвяще́ннейшаго (имярек),/ (архи-)епи́скопа (митрополита (титул)),/ богохрани́мую страну́ на́шу Росси́йскую,/  и вся правосла́вныя христи́аны,// Го́споди, сохрани́ их на мно́гая ле́та.