Шрифт

▲

Богослужебные тексты для домашнего употребления

Дни памяти святых

Последование Всеношного бдения в день памяти святителя Митрофана, первого епископа Воронежского. Для домашнего (келейного) совершения

Оглавление

ВСЕНО́ЩНОЕ БДЕ́НИЕ

ВЕЛИ́КАЯ ВЕЧЕ́РНЯ

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас. Ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Трижды.)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, (трижды). Сла́ва, и ны́не:

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Таже, Го́споди, поми́луй, (12), Сла́ва, и ны́не:

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 103:

Поется часть псалма:

Благослови́, душе́ моя́, Го́спода. / Благослове́н еси́, Го́споди. / Го́споди, Бо́же мой, возвели́чился еси́ зело́. / Благослове́н еси́, Го́споди. / Во испове́дание и в велеле́поту обле́клся еси́. / Благослове́н еси́, Го́споди. / Посреде́ гор про́йдут во́ды. / Ди́вна дела́ Твоя́, Го́споди. / Вся прему́дростию сотвори́л еси́. / Сла́ва Ти, Го́споди, сотвори́вшему вся.

Или читается псалом полностью:

Благослови́, душе́ моя́, Го́спода. Го́споди, Бо́же мой, возвели́чился еси́ зело́. Во испове́дание и в велеле́поту обле́клся еси́. Одея́йся све́том, я́ко ри́зою, простира́яй не́бо, я́ко ко́жу. Покрыва́яй вода́ми превы́спренняя Своя́, полага́яй о́блаки на восхожде́ние Свое́, ходя́й на крилу́ ве́треню. Творя́й А́нгелы Своя́ ду́хи и слуги́ Своя́ пла́мень о́гненный. Основа́яй зе́млю на тве́рди ея́, не преклони́тся в век ве́ка. Бе́здна, я́ко ри́за, одея́ние ея́, на гора́х ста́нут во́ды, от запреще́ния Твоего́ побе́гнут, от гла́са гро́ма Твоего́ убоя́тся. Восхо́дят го́ры и нисхо́дят поля́ в ме́сто, е́же основа́л еси́ им. Преде́л положи́л еси́, eго́же не пре́йдут, ниже́ обратя́тся покры́ти зе́млю. Посыла́яй исто́чники в де́брех, посреде́ гор про́йдут во́ды. Напая́ют вся зве́ри се́льныя, ждут она́гри в жа́жду свою́. На ты́х пти́цы небе́сныя привита́ют, от среды́ ка́мения дадя́т глас. Напая́яй го́ры от превы́спренних Свои́х, от плода́ дел Твои́х насы́тится земля́. Прозяба́яй траву́ ското́м, и злак на слу́жбу челове́ком, извести́ хлеб от земли́. И вино́ весели́т се́рдце челове́ка, ума́стити лице́ еле́ем, и хлеб се́рдце челове́ка укрепи́т. Насы́тятся древа́ польска́я, ке́дри Лива́нстии, и́хже еси́ насади́л. Та́мо пти́цы вогнездя́тся, ероди́ево жили́ще предводи́тельствует и́ми. Го́ры высо́кия еле́нем, ка́мень прибе́жище за́яцем. Сотвори́л есть луну́ во времена́, со́лнце позна́ за́пад свой. Положи́л еси́ тму, и бысть нощь, в не́йже про́йдут вси зве́рие дубра́внии. Ски́мни рыка́ющии, восхи́тити и взыска́ти от Бо́га пи́щу себе́. Возсия́ со́лнце и собра́шася и в ло́жах свои́х ля́гут. Изы́дет челове́к на де́ло свое́ и на де́лание свое́ до ве́чера. Я́ко возвели́чишася дела́ Твоя́, Го́споди, вся прему́дростию сотвори́л еси́, испо́лнися земля́ тва́ри Твоея́. Сие́ мо́ре вели́кое и простра́нное, та́мо га́ди, и́мже несть числа́, живо́тная ма́лая с вели́кими, та́мо корабли́ препла́вают, змий сей, eго́же созда́л еси руга́тися eму́. Вся к Тебе́ ча́ют, да́ти пи́щу им во бла́го вре́мя. Да́вшу Тебе́ им соберу́т, отве́рзшу Тебе́ ру́ку вся́ческая испо́лнятся бла́гости, отвра́щшу же Тебе́ лице́, возмяту́тся, отъи́меши дух их, и исче́знут, и в персть свою́ возвратя́тся. По́слеши Ду́ха Твоего́, и сози́ждутся, и обнови́ши лице́ земли́. Бу́ди сла́ва Госпо́дня во ве́ки, возвесели́тся Госпо́дь о де́лех Свои́х, призира́яй на зе́млю, и творя́й ю́ трясти́ся, прикаса́яйся гора́м, и дымя́тся. Воспою́ Го́сподеви в животе́ мое́м, пою́ Бо́гу моему́, до́ндеже есмь, да услади́тся Ему́ бесе́да моя́, аз же возвеселю́ся о Го́споде. Да исче́знут гре́шницы от земли́, и беззако́нницы, я́коже не бы́ти им. Благослови́, душе́ моя́, Го́спода.

Со́лнце позна́ за́пад свой. Положи́л еси́ тму, и бысть нощь. Я́ко возвели́чишася дела́ Твоя́, Го́споди, вся прему́дростию сотвори́л еси́.

Сла́ва, и ны́не: Аллилу́иа, аллилу́иа, аллилу́иа, сла́ва Тебе́ Бо́же. Трижды.

Блаже́н муж:

Блаже́н муж, и́же не и́де на сове́т нечести́вых.

Аллилу́иа, аллилу́иа, аллилу́иа.

Я́ко весть Госпо́дь путь пра́ведных, и путь нечести́вых поги́бнет.

Аллилу́иа, аллилу́иа, аллилу́иа.

Рабо́тайте Го́сподеви со стра́хом и ра́дуйтеся Ему́ с тре́петом.

Аллилу́иа, аллилу́иа, аллилу́иа.

Блаже́ни вси наде́ющиися Нань.

Аллилу́иа, аллилу́иа, аллилу́иа.

Воскресни́, Го́споди, спаси́ мя, Бо́же мой.

Аллилу́иа, аллилу́иа, аллилу́иа.

Госпо́дне есть спасе́ние, и на лю́дех Твои́х благослове́ние Твое́.

Аллилу́иа, аллилу́иа, аллилу́иа.

Сла́ва Отцу́ и Сы́ну и Свято́му Духу.

Аллилу́иа, аллилу́иа, аллилу́иа.

И ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Го́споди, воззва́х, глас 8:

Го́споди, воззва́х к Тебе́, услы́ши мя./ Услы́ши мя, Го́споди./ Го́споди, воззва́х к Тебе́, услы́ши мя:/ вонми́ гла́су моле́ния моего́,/ внегда́ воззва́ти ми к Тебе́.// Услы́ши мя, Го́споди.

Да испра́вится моли́тва моя́,/ я́ко кади́ло пред Тобо́ю,/ воздея́ние руку́ мое́ю/ – же́ртва вече́рняя.// Услы́ши мя, Го́споди.

Стихи́ры пра́здника, глас 8:

Стих: А́ще беззако́ния на́зриши, Го́споди, Го́споди, кто постои́т? Я́ко у Тебе́ очище́ние есть.

Отче богому́дре Митрофа́не, ты́ от ю́ности возлюби́л еси́ взыска́ние го́рняго ми́ра прему́дрости, и егда́ поще́нием и моли́твою от Бо́га стяжа́л еси́ ю́, не в земли́ сокры́л еси́ тала́нт сво́й, но уча́ и творя́ па́стырски непреста́нно, во сто́ кра́т о́ный умно́жил еси́, и бы́л еси́ иера́рх свети́льник Це́ркви. Те́м в воздая́ние блаже́нным труда́м твои́м, вше́д ны́не в ра́дость Го́спода своего́ Царя́ и Влады́ки, моли́ о душа́х на́ших.

Стих: И́мене ра́ди Твоего́ потерпе́х Тя, Го́споди, потерпе́ душа́ моя́ в сло́во Твое́, упова́ душа́ моя́ на Го́спода.

Стих: От стра́жи у́тренния до но́щи, от стра́жи у́тренния да упова́ет Изра́иль на Го́спода.

Отче преподо́бне Митрофа́не, ты́ плени́в у́м и се́рдце свое́ в послуша́ние Бо́гу, не о себе́, но о сла́ве Бо́жией раде́л еси́: тружда́яся бо в де́лании мы́сленнаго виногра́да Христо́ва, вся́ку ро́згу, не творя́щую плода́, жи́во и де́йственно сло́ва Бо́жия мече́м отребля́л еси́, ве́ру же и чи́стыя нра́вы ангелонра́вным по Бо́зе житие́м свои́м, я́ко опло́том, соблюда́л еси́. И ны́не, венце́м нетле́ния от руки́ Госпо́дни украси́вся, моли́ о душа́х на́ших.

Глас 2 Стих: Я́ко у Го́спода ми́лость, и мно́гое у Него́ избавле́ние, и Той изба́вит Изра́иля от всех беззако́ний eго́.

Стих: Хвали́те Го́спода вси язы́цы, похвали́те Его́ вси лю́дие.

Отче богоно́се Митрофа́не, ты́ разу́мно пра́вил еси́ вве́ренное тебе́ сло́во и́стины: стоя́ бо на неусы́пной стра́жи до́му Госпо́дня, и бдя́ о душа́х недре́мленно, па́ству свою́ угоди́ти Бо́гу сло́вом и де́лом наставля́л еси́. Те́м, я́ко до́брый па́стырь, Пастыренача́льнику, Сы́ну Бо́жию, о приставле́нии Его́ сло́во бла́го возда́л еси́, моли́ о душа́х на́ших.

Стих: Я́ко утверди́ся ми́лость Его́ на нас, и и́стина Госпо́дня пребыва́ет во век.

Глас 6: Сла́ва Отцу́ и Сы́ну и Свято́му Ду́ху.

Святи́телей удобре́ние и отце́в сла́ву, священноле́пно воспои́м дне́сь, и Царя́ царе́й Христа́ Бо́га на́шего восхва́лим: Се́й бо, я́ко Освяти́тель святы́х, и Творе́ц чудотво́рцев, чуде́с благоле́пием того́ та́ко просла́ви, я́ко ца́рь и кня́зи, архиере́и и свяще́нницы, и вси́ благове́рнии лю́дие, от честны́х моще́й его́, я́ко от многоцеле́бнаго исто́чника, благода́ть и исцеле́ние прие́млюще, уми́льно глаго́лют: ра́дуйся, Бо́жиих дарова́ний сокро́вище, Митрофа́не, святи́телю блаже́нне.

Глас 6: И ны́не и при́сно и во ве́ки веко́в. Ами́нь.

Кто́ Тебе́ не ублажи́т, Пресвята́я Де́во? Кто́ ли не воспое́т Твоего́ Пречи́стаго Рождества́? Безле́тно бо от Отца́ возсия́вый Сы́н Единоро́дный, То́йже от Тебе́, Чи́стыя, про́йде, неизрече́нно вопло́щся: естество́м Бо́г Сы́й и естество́м бы́в Челове́к на́с ра́ди; не во двою́ лицу́ разделя́емый, но во двою́ естеству́ несли́тно познава́емый. Того́ моли́, Чи́стая Всеблаже́нная, поми́ловатися душа́м на́шим.

Све́те Тихи́й:

Све́те Ти́хий святы́я сла́вы Безсме́ртнаго Отца́ Небе́снаго, Свята́го, Блаже́ннаго, Иису́се Христе́! Прише́дше на за́пад со́лнца, ви́девше свет вече́рний, пое́м Отца́, Сы́на и Свята́го Ду́ха, Бо́га. Досто́ин еси́ во вся времена́ пет бы́ти гла́сы преподо́бными, Сы́не Бо́жий, живо́т дая́й; те́мже мир Тя сла́вит.

1. При́тчей чте́ние

Па́мять пра́веднаго с похвала́ми, и благослове́ние Госпо́дне на главе́ его́. Блаже́н челове́к, и́же обре́те прему́дрость, и сме́ртен, и́же уве́де ра́зум. Лу́чше бо сию́ купова́ти, не́жели зла́та и сребра́ сокро́вища. Честне́йшая же е́сть ка́мений многоце́нных, все́ же честно́е недосто́йно ея́ е́сть. Долгота́ бо дне́й и ле́та живота́ в десни́це ея́, в шу́йце же ея́ бога́тство и сла́ва. От у́ст ея́ исхо́дит пра́вда, зако́н же и ми́лость на язы́це но́сит. Послу́шайте у́бо мене́, о ча́да, честна́я бо реку́, и блаже́н челове́к, и́же пути́ моя́ сохрани́т: исхо́ди бо мои́ — исхо́ди живота́, и уготовля́ется хоте́ние от Го́спода. Сего́ ра́ди молю́ ва́с и предлага́ю мо́й гла́с сыново́м челове́ческим. Я́ко а́з, прему́дрость, устро́их сове́т, и ра́зум и смы́сл аз призва́х. Мо́й сове́т и утвержде́ние, мо́й ра́зум, моя́ же кре́пость. Аз мене́ лю́бящия люблю́, и́щущии же мене́ обря́щут благода́ть. Разуме́йте у́бо, незло́бивии, кова́рство, ненака́зании же, прилага́йте сердца́. Послу́шайте мене́ и па́ки, честна́я бо реку́, и отве́рзу от усте́н пра́вая, я́ко и́стине поучи́тся горта́нь мой, ме́рзки же пре́до мно́ю устны́ лжи́выя. С пра́вдою вси́ глаго́лы у́ст мои́х, ничто́же в ни́х стро́потно, ниже́ развраще́нно. Вся́ пра́ва су́ть разумева́ющим и про́ста обрета́ющим ра́зум. Науча́ю бо ва́с и́стине, да бу́дет о Го́споде наде́жда ва́ша, и испо́лнитеся Ду́ха.

2. Прему́дрости Соломо́ни чте́ние

Уста́ пра́веднаго ка́плют прему́дрость, устне́ же муже́й му́дрых ве́дят благода́ть. Уста́ му́дрых поуча́тся прему́дрости, пра́вда же избавля́ет и́х от сме́рти. Сконча́вшуся му́жу пра́ведну, не поги́бнет наде́жда. Сы́н бо пра́веден ражда́ется в живо́т и во благи́х свои́х пло́д пра́вды объи́мет. Све́т пра́ведным всегда́, и от Го́спода обря́щут благода́ть и сла́ву. Язы́к му́дрых до́брая све́сть, и в се́рдце и́х почи́ет му́дрость. Лю́бит Госпо́дь преподо́бная сердца́, прия́тни же Ему́ вси́ непоро́чнии в пути́. Му́дрость Госпо́дня просвеща́ет лице́ разу́мнаго: постига́ет бо жела́ющия ю́, пре́жде да́же разуме́ти ю́, и удо́бь у́зрится от лю́бящих ю́. Утреневавый к не́й не утруди́тся, и бдя́й ея́ ра́ди вско́ре без печа́ли бу́дет. Яко досто́йных ея́ сама́ обхо́дит, и́щущи, и во стезя́х ея́ явля́ется и́м благоприе́мне. Му́дрости никогда́же одоле́ет зло́ба. Си́х ра́ди и рачи́тель бы́х добро́ты ея́, и возлюби́х ю́, и поиска́х от ю́ности моея́. И взыска́х неве́сту привести́ себе́, я́ко все́х Влады́ка возлюби́ ю́. Таи́бница бо е́сть Бо́жия хи́трости и обрета́тельница де́л Его́. Труды́ ея́ су́ть доброде́тели: целому́дрию же и ра́зуму та́ учи́т, пра́вде и му́жеству, и́хже потре́бнее ничто́же е́сть в житии́ челове́ком. Аще же и мно́гаго иску́сства жела́ет кто́, ве́сть дре́вняя, и бы́ти хотя́щая разсмо́трит. Све́сть изви́тия слове́с и разреше́ния гада́ний, зна́мения и чудеса́ проразуме́ет, и сбытия́ време́н и ле́т, и все́м сове́тник е́сть бла́г. Яко безсме́ртие е́сть в не́й и благосла́вие во обще́нии слове́с ея́. Сего́ ра́ди бесе́довах ко Го́споду, и помоли́хся Ему́, и ре́х от всего́ се́рдца моего́: Бо́же отце́в и Го́споди ми́лости, сотвори́вый вся́ сло́вом Твои́м и му́дростию Твое́ю устро́ивый челове́ка, да владе́ет бы́вшими от Тебе́ тварьми́ и да управля́ет ми́р в преподо́бии и пра́вде. Да́ждь ми́ Твои́х Престо́лов приседя́щую прему́дрость и не отлучи́ мене́ от о́трок Твои́х, я́ко а́з ра́б Тво́й и сы́н рабы́ни Твоея́. Посли́ ю́ с Небе́с от свята́го жили́ща Твоего́ и от Престо́ла сла́вы Твоея́, да, су́щи со мно́ю, научи́т мя́, что́ благоуго́дно е́сть пред Тобо́ю, и наста́вит мя́ в ра́зум, и сохрани́т мя́ в сла́ве свое́й. Помышле́ния бо сме́ртных вся́ боязли́ва и погреши́тельна умышле́ния и́х.

3. Прему́дрости Соломо́ни чте́ние

Похваля́ему пра́веднику, возвеселя́тся лю́дие: безсме́ртие бо е́сть па́мять его́, я́ко от Го́спода познава́ется и от челове́к, и уго́дна Го́сподеви душа́ его́. Возлюби́те у́бо, о му́жие, му́дрость и поживете́: восхощи́те ея́ и нака́зани бу́дете. Нача́ло бо ея́ любы́ и соблюде́ние зако́на. Почти́те прему́дрость, да во ве́ки ца́рствуете. Возвещу́ ва́м и не скры́ю от ва́с та́ин Бо́жиих, я́ко То́й му́дрости наста́вник е́сть, и му́дрых испра́витель, и вся́кому смы́слу и де́лу хитре́ц. И все́м смы́слом научи́т му́дрость, е́сть бо в не́й Ду́х разу́мен и свя́т, и сия́ние све́та присносу́щнаго, и о́браз бла́гости Бо́жия. Та́я дру́ги Бо́жия и проро́ки устроя́ет, благоле́пнейши же е́сть со́лнца и па́че вся́каго сотворе́ния зве́зд, све́ту сосужда́ема, обрета́ется пе́рвейши. Та́я угожда́ющих е́й от боле́зни изба́ви и наста́ви на стези́ пра́выя. Даде́ и́м ра́зум име́ти свя́т, и сохрани́ я́ от ловя́щих, и по́двиг кре́пок подаде́ и́м. Да разуме́ют вси́, я́ко си́льнейши всего́ е́сть благоче́стие, и никогда́же премо́жет зло́ба му́дрости, ниже́ пре́йдет злы́я облича́ющи су́д. Реко́ша же в себе́, помы́сливше непра́ведно: наси́льствуем пра́ведному, и не пощади́м преподо́бства его́, ни усрами́мся седи́н ста́рости многоле́тны. Бу́дет бо на́м кре́пость — зако́н и улови́м пра́веднаго, я́ко неуго́ден на́м е́сть, и проти́вится дело́м на́шим, и поно́сит на́м отпаде́ние зако́на, и облича́ет на́м согреше́ния наказа́ния на́шего. Возвеща́ет на́м ра́зум име́ти Бо́жий, и о́трока Госпо́дня себе́ имену́ет. Бы́сть на́м на обличе́ние помышле́ний на́ших и тя́жек на́м е́сть и ви́димь, я́ко неподо́бно ины́м житие́ его́, и измене́ны стези́ его́. В поруга́ние вмени́хомся ему́, и удаля́ется от путе́й на́ших, я́ко от нечисто́т, и блажи́т после́дняя пра́ведных. Уви́дим у́бо, а́ще словеса́ его́ и́стинна су́ть, иску́сим, я́же сбыва́ются ему́. Руга́нием и му́кою истя́жем его́, да разуме́ем кро́тость его́ и иску́сим беззло́бство его́, сме́ртию безобра́зною осу́дим его́, бу́дет бо посеще́ние от слове́с его́. Сия́ помы́слиша и прельсти́шася, ослепи́ бо я́ зло́ба и́х, и не разуме́ша та́ин Бо́жиих и не разсуди́ша, я́ко Ты́ еси́ Бо́г еди́н, живота́ име́яй и сме́рти вла́сть, и спаса́яй во вре́мя ско́рби, и избавля́яй от вся́каго зла́. Ще́др и Ми́лостив, и дая́й преподо́бным Свои́м благода́ть, и Свое́ю мы́шцею го́рдым противля́яйся.

Сподо́би, Го́споди:

Сподо́би, Го́споди, в ве́чер сей без греха́ сохрани́тися нам. Благослове́н еси́, Го́споди, Бо́же оте́ц на́ших, и хва́льно и просла́влено и́мя Твое́ во ве́ки. Ами́нь.

Бу́ди, Го́споди, ми́лость Твоя́ на нас, я́коже упова́хом на Тя. Благослове́н еси́, Го́споди, научи́ мя оправда́нием Твои́м. Благослове́н еси́, Влады́ко, вразуми́ мя оправда́нием Твои́м. Благослове́н еси́, Святы́й, просвети́ мя оправда́нии Твои́ми.

Го́споди, ми́лость Твоя́ во век, дел руку́ Твое́ю не пре́зри. Тебе́ подоба́ет хвала́, Тебе́ подоба́ет пе́ние, Тебе́ сла́ва подоба́ет. Отцу́ и Сы́ну и Свято́му Ду́ху, ны́не и при́сно и во ве́ки веко́в. Ами́нь.

На лити́и стихи́ры, гла́с 5:

Тако́в на́м подоба́ше архиере́й, преподо́бен, пра́веден, ми́лостив, и во все́х оправда́ниях Госпо́дних непоро́чен. Прииди́те, пе́сньми и псалмы́ духо́вными све́тло ликовству́ем дне́сь, тому́ си́це зову́ще: ра́дуйся, оте́ческих обы́чаев ревни́телю, сто́лпе и утвержде́ние ве́ры; ра́дуйся, Воро́нежская похвало́, Митрофа́не богоно́се свяще́ннейший.

Не пло́ть и кро́вь яви́ тя, святи́телю богоизбра́нне, но Оте́ц Небе́сный, Ему́же ты́, боже́ственною твое́ю кро́тостию угоди́в, я́ко а́гнец незло́бив, чи́ны незло́бивых в ли́ке Ангельском насле́дил еси́ и ны́не, в го́рних предстоя́, моли́ дарова́ти на́м мно́жество щедро́т и ве́лию ми́лость.

По до́лгу блажи́м тя́, я́ко свети́льника ве́ры и Ангела во пло́ти, поне́же житие́ твое́, Митрофа́не, че́стно и успе́ние со святы́ми. Просия́л бо еси́ благи́ми де́лы, я́ко па́стырь богому́дрый, чудесы́ же твои́ми просвети́лся еси́, я́ко ве́рный слуга́ и дру́г Бо́жий. Те́мже, припа́дающе, мо́лим тя́: моли́ся за ны́, чудотво́рче святы́й, ко Го́споду, да пода́ст душа́м на́шим ве́лию и бога́тую ми́лость.

Сла́ва, гла́с 8: Дне́сь красу́ется сла́вный гра́д Воро́неж, боже́ственным сокро́вищем моще́й твои́х, и оби́тель твоя́, ликовству́ющи, ра́дуется, и правосла́внии твои́м просвеще́нием, блаже́нне Митрофа́не, хва́лятся; ты́ же моли́ лю́дем тишину́, и земли́ плодоро́дие, и ве́лию ми́лость.

И ны́не, богоро́дичен: Безневе́стная Де́во, Яже Бо́га неизрече́нно заче́нши пло́тию, Ма́ти Бо́га Вы́шняго, Твои́х рабо́в мольбы́ приими́, Всенепоро́чная, все́м подаю́щи очище́ние прегреше́ний, ны́не на́ша моле́ния прие́млющи, моли́ спасти́ся все́м на́м.

Го́споди, поми́луй. (40 раз)

Стихи́ры на стихо́вне:

Стихиры, гла́с 2:

Ки́ими благогове́йными усты́ воспои́м Митрофа́на, святи́теля смире́нна, смире́нному Пастыренача́льнику подража́теля, подвиго́м вели́ких отце́в Це́ркви соуча́стника, и высо́ким нра́вом и́х насле́дника, му́жа жела́ний чи́ста, слугу́ Госпо́дня ве́рна, ревни́теля уста́вов Це́ркви непоколеби́ма? Его́же венча́ет Христо́с Бо́г на́ш, име́яй мно́жество щедро́т и ве́лию ми́лость.

Сти́х: Уста́ моя́ возглаго́лют прему́дрость, и поуче́ние се́рдца моего́ ра́зум.

Ки́ими свяще́нными пе́сньми ублажи́м Митрофа́на, иера́рха богому́дра, ева́нгельскаго Правосла́вия наста́вника, воздержа́ния учи́теля, Ангелов собесе́дника, ни́щих и сиро́т пита́теля, оби́димым засту́пника и немощству́ющих врача́ преизря́дна? Его́же венча́ет Христо́с Бо́г на́ш, име́яй мно́жество щедро́т и ве́лию ми́лость.

Сти́х: Услы́шите сия́, вси́ язы́цы, внуши́те, вси́, живу́щии по вселе́нней.

Ки́ими похва́льными венцы́ почти́м Митрофа́на, па́стыря блаже́нна, Це́ркви свети́льника, гра́да Воро́нежа сла́ву, Росси́йстей Держа́ве утвержде́ние, и́ночествующих о́браз, свяще́нства вене́ц, иера́рхов святоле́пное украше́ние? Его́же венча́ет Христо́с Бо́г на́ш, име́яй мно́жество щедро́т и ве́лию ми́лость.

Слава, гла́с 5:

Сра́дуйтеся на́м, Росси́йстии собо́ры дне́сь, в све́тлой па́мяти богоно́снаго отца́ на́шего и па́стыря, и́же до́брым житие́м свои́м ве́рно угоди́в Бо́гу, и во гро́бе сла́вою иера́ршеских доброде́телей свои́х сия́ет, я́ко свети́ло, подая́ от нетле́ннаго сокро́вища моще́й свои́х, благоуха́ние Свята́го Ду́ха. Те́мже у́бо, соше́дшеся, о́бщий ли́к тому́ соста́вим, пе́сньми боже́ственными зову́ще: помина́й на́с, о́тче, и за ны́ Христу́ моли́ся, я́ко вели́кий на́ш хода́таю, Митрофа́не.

И ны́не, Богоро́дичен:

Храм и дверь еси́, / пала́та и престо́л Царе́в, / Де́во Всечестна́я, / Е́юже Изба́витель мой, Христо́с Госпо́дь, / во тьме спя́щим яви́ся, / Со́лнце сый пра́вды, просвети́ти хотя́, / я́же созда́ по о́бразу Своему́ руко́ю Свое́ю. / Те́мже, Всепе́тая, / я́ко ма́терне дерзнове́ние к Нему́ стяжа́вшая, / непреста́нно моли́ спасти́ся душа́м на́шим.

Моли́тва свята́го Симео́на Богоприи́мца:

Ны́не отпуща́еши раба́ Твоего́, Влады́ко,/ по глаго́лу Твоему́, с ми́ром;/ я́ко ви́деста о́чи мои́ спасе́ние Твое́,/ е́же еси́ угото́вал пред лице́м всех люде́й,/ свет во открове́ние язы́ков,// и сла́ву люде́й Твои́х Изра́иля.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Го́споди, поми́луй. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Тропа́рь, глас 4:

Пра́вило ве́ры и о́браз кро́тости, сло́вом и житие́м, па́стве твое́й, о́тче смиренному́дре Митрофа́не, бы́л еси́. Те́мже и во све́тлостех святы́х со́лнца светле́йше возсия́л еси́, венце́м нетле́ния и сла́вы украша́емь, моли́ Христа́ Бо́га гра́ду твоему́ в ми́ре спасти́ся. (Дважды)

Песнь Пресвятей Богородице:

Богоро́дице Де́во, ра́дуйся, / Благода́тная Мари́е, Госпо́дь с Тобо́ю; / благослове́на Ты в жена́х / и благослове́н Плод чре́ва Твоего́, / я́ко Спа́са родила́ еси́ душ на́ших. (Единожды)

Бу́ди И́мя Госпо́дне благослове́но от ны́не и до ве́ка. (Три́жды)

Псало́м 33:

Благословлю́ Го́спода на вся́кое вре́мя,/ вы́ну хвала́ Его́ во усте́х мои́х./ О Го́споде похва́лится душа́ моя́,/ да услы́шат кро́тцыи, и возвеселя́тся./ Возвели́чите Го́спода со мно́ю,/ и вознесе́м И́мя Его́ вку́пе./ Взыска́х Го́спода, и услы́ша мя,/ и от все́х скорбе́й мои́х изба́ви мя./ Приступи́те к Нему́, и просвети́теся,/ и ли́ца ва́ша не постыдя́тся./ Сей ни́щий воззва́, и Госпо́дь услы́ша и́,/ и от все́х скорбе́й его́ спасе́ и́./ Ополчи́тся а́нгел Госпо́день о́крест боя́щихся Его́,/ и изба́вит их./ Вкуси́те и ви́дите, я́ко благ Госпо́дь:/ блаже́н муж, и́же упова́ет Нань./ Бо́йтеся Го́спода, вси́ святи́и Его́,/ я́ко несть лише́ния боя́щимся Его́./ Бога́тии обнища́ша и взалка́ша:/ взыска́ющии же Го́спода// не лиша́тся вся́каго бла́га.

У́ТРЕНЯ.

Шестопса́лмие:

Сла́ва в вы́шних Бо́гу, и на земли́ мир, в челове́цех благоволе́ние. (Три́жды)

Го́споди, устне́ мои́ отве́рзеши, и уста́ моя́ возвестя́т хвалу́ Твою́. (Два́жды)

Псалом 3:

Го́споди, что ся умно́жиша стужа́ющии ми́? Мно́зи востаю́т на мя, мно́зи глаго́лют души́ мое́й: несть спасе́ния eму́ в Бо́зе eго́. Ты же, Го́споди, Засту́пник мой еси́, сла́ва моя́ и вознося́й главу́ мою́. Гла́сом мои́м ко Го́споду воззва́х, и услы́ша мя от горы́ святы́я Своея́. Аз усну́х, и спах, воста́х, я́ко Госпо́дь засту́пит мя. Не убою́ся от тем люде́й, о́крест напа́дающих на мя. Воскресни́, Го́споди, спаси́ мя, Бо́же мой, я́ко Ты порази́л еси́ вся вражду́ющыя ми всу́е: зу́бы гре́шников сокруши́л еси́. Госпо́дне есть спасе́ние, и на лю́дех Твои́х благослове́ние Твое́.

Аз усну́х, и спах, воста́х, я́ко Госпо́дь засту́пит мя.

Псалом 37:

Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́. Я́ко стре́лы Твоя́ унзо́ша во мне, и утверди́л еси́ на мне ру́ку Твою́. Несть исцеле́ния в пло́ти мое́й от лица́ гне́ва Твоего́, несть ми́ра в косте́х мои́х от лица́ грех мои́х. Я́ко беззако́ния моя́ превзыдо́ша главу́ мою́, я́ко бре́мя тя́жкое отяготе́ша на мне. Возсмерде́ша и согни́ша ра́ны моя́ от лица́ безу́мия моего́. Пострада́х и сляко́хся до конца́, весь день се́туя хожда́х. Я́ко ля́двия моя́ напо́лнишася поруга́ний, и несть исцеле́ния в пло́ти мое́й. Озло́блен бых и смири́хся до зела́, рыка́х от воздыха́ния се́рдца моего́. Го́споди, пред Тобо́ю все жела́ние мое́ и воздыха́ние мое́ от Тебе́ не утаи́ся. Се́рдце мое́ смяте́ся, оста́ви мя си́ла моя́, и свет о́чию мое́ю, и той несть со мно́ю. Дру́зи мои́ и и́скреннии мои́ пря́мо мне прибли́жишася и ста́ша, и бли́жнии мои́ отдале́че мене́ ста́ша и нужда́хуся и́щущии ду́шу мою́, и и́щущии зла́я мне глаго́лаху су́етная и льсти́вным весь день поуча́хуся. Аз же я́ко глух не слы́шах и я́ко нем не отверза́яй уст свои́х. И бых я́ко челове́к не слы́шай и не имы́й во усте́х свои́х обличе́ния. Я́ко на Тя, Го́споди, упова́х, Ты услы́шиши, Го́споди Бо́же мой. Я́ко рех: да не когда́ пора́дуют ми ся врази́ мои́: и внегда́ подвижа́тися нога́м мои́м, на мя велере́чеваша. Я́ко аз на ра́ны гото́в, и боле́знь моя́ предо мно́ю есть вы́ну. Я́ко беззако́ние мое́ аз возвещу́ и попеку́ся о гресе́ мое́м. Врази́ же мои́ живу́т и укрепи́шася па́че мене́, и умно́жишася ненави́дящии мя без пра́вды. Воздаю́щии ми зла́я возблага́я оболга́ху мя, зане́ гоня́х благосты́ню. Не оста́ви мене́, Го́споди Бо́же мой, не отступи́ от Мене́. Вонми́ в по́мощь мою́, Го́споди спасе́ния моего́.

Не оста́ви мене́, Го́споди Бо́же мой, не отступи́ от Мене́. Вонми́ в по́мощь мою́, Го́споди спасе́ния моего́.

Псалом 62:

Бо́же, Бо́же мой, к Тебе́ у́тренюю, возжада́ Тебе́ душа́ моя́, коль мно́жицею Тебе́ плоть моя́, в земли́ пу́сте и непрохо́дне, и безво́дне. Та́ко во святе́м яви́хся Тебе́, ви́дети си́лу Твою́ и сла́ву Твою́. Я́ко лу́чши ми́лость Твоя́ па́че живо́т, устне́ мои́ похвали́те Тя. Та́ко благословлю́ Тя в животе́ мое́м, о и́мени Твое́м воздежу́ ру́це мои́. Я́ко от ту́ка и ма́сти да испо́лнится душа́ моя́, и устна́ма ра́дости восхва́лят Тя уста́ моя́. А́ще помина́х Тя на посте́ли мое́й, на у́тренних поуча́хся в Тя. Я́ко был еси́ Помо́щник мой, и в кро́ве крилу́ Твое́ю возра́дуюся. Прильпе́ душа́ моя́ по Тебе́, мене́ же прия́т десни́ца Твоя́. Ти́и же всу́е иска́ша ду́шу мою́, вни́дут в преиспо́дняя земли́, предадя́тся в ру́ки ору́жия, ча́сти ли́совом бу́дут. Царь же возвесели́тся о Бо́зе, похва́лится всяк клены́йся Им, я́ко загради́шася уста́ глаго́лющих непра́ведная.

На у́тренних поуча́хся в Тя. Я́ко был еси́ Помо́щник мой, и в кро́ве крилу́ Твое́ю возра́дуюся. Прильпе́ душа́ моя́ по Тебе́, мене́ же прия́т десни́ца Твоя́.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Го́споди поми́луй. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Псалом 87:

Го́споди Бо́же спасе́ния моего́, во дни воззва́х, и в нощи́ пред Тобо́ю. Да вни́дет пред Тя моли́тва моя́: приклони́ у́хо Твое́ к моле́нию моему́, я́ко испо́лнися зол душа́ моя́, и живо́т мой аду прибли́жися. Привмене́н бых с низходя́щими в ров, бых я́ко челове́к без по́мощи, в ме́ртвых свобо́дь, я́ко я́звеннии спя́щии во гро́бе, и́хже не помяну́л еси́ ктому́, и ти́и от руки́ Твоея́ отринове́ни бы́ша. Положи́ша мя в ро́ве преиспо́днем, в те́мных и се́ни сме́ртней. На мне утверди́ся я́рость Твоя́, и вся во́лны Твоя́ наве́л еси́ на мя. Уда́лил еси́ зна́емых мои́х от Мене́, положи́ша мя ме́рзость себе́: пре́дан бых и не исхожда́х. О́чи мои́ изнемого́сте от нищеты́, воззва́х к Тебе́, Го́споди, весь день, возде́х к Тебе́ ру́це мои́. Еда́ ме́ртвыми твори́ши чудеса́? Или́ вра́чеве воскреся́т, и испове́дятся Тебе́? Еда́ пове́сть кто во гро́бе ми́лость Твою́, и и́стину Твою́ в поги́бели? Еда́ позна́на бу́дут во тьме чудеса́ Твоя́, и пра́вда Твоя́ в земли́ забве́нней? И аз к Тебе́, Го́споди, воззва́х и у́тро моли́тва моя́ предвари́т Тя. Вску́ю, Го́споди, отре́еши ду́шу мою́, отвраща́еши лице́ Твое́ от Мене́? Нищ есмь аз, и в труде́х от ю́ности моея́; возне́с же ся, смири́хся, и изнемого́х. На мне преидо́ша гне́ви Твои́, устраше́ния Твоя́ возмути́ша мя, обыдо́ша мя я́ко вода́, весь день одержа́ша мя вку́пе. Уда́лил еси́ от Мене́ дру́га и и́скренняго, и зна́емых мои́х от страсте́й.

Го́споди Бо́же спасе́ния моего́, во дни воззва́х, и в нощи́ пред Тобо́ю. Да вни́дет пред Тя моли́тва моя́: приклони́ у́хо Твое́ к моле́нию моему́.

Псалом 102:

Благослови́, душе́ моя́, Го́спода, и вся вну́тренняя моя́ и́мя свя́тое Его́. Благослови́, душе́ моя́, Го́спода, и не забыва́й всех воздая́ний Его́, очища́ющаго вся беззако́ния твоя́, исцеля́ющаго вся неду́ги твоя́, избавля́ющаго от истле́ния живо́т твой, венча́ющаго тя ми́лостию и щедро́тами, исполня́ющаго во благи́х жела́ние твое́: обнови́тся я́ко о́рля ю́ность твоя́. Творя́й ми́лостыни Госпо́дь, и судьбу́ всем оби́димым. Сказа́ пути́ Своя́ Моисе́ови, сыново́м Изра́илевым хоте́ния Своя́: Щедр и Ми́лостив Госпо́дь, Долготерпели́в и Многоми́лостив. Не до конца́ прогне́вается, ниже́ во век вражду́ет, не по беззако́нием на́шым сотвори́л есть нам, ниже́ по грехо́м на́шым возда́л есть нам. Я́ко по высоте́ небе́сней от земли́, утверди́л есть Госпо́дь ми́лость Свою́ на боя́щихся Его́. Ели́ко отстоя́т восто́цы от за́пад, уда́лил есть от нас беззако́ния на́ша. Я́коже ще́дрит оте́ц сы́ны, уще́дри Госпо́дь боя́щихся Его́. Я́ко Той позна́ созда́ние на́ше, помяну́, я́ко персть есмы́. Челове́к, я́ко трава́ дни́е eго́, я́ко цвет се́льный, та́ко оцвете́т, я́ко дух про́йде в нем, и не бу́дет, и не позна́ет ктому́ ме́ста своего́. Ми́лость же Госпо́дня от ве́ка и до ве́ка на боя́щихся Его́, и пра́вда Его́ на сыне́х сыно́в, храня́щих заве́т Его́, и по́мнящих за́поведи Его́ твори́ти я́. Госпо́дь на Небеси́ угото́ва Престо́л Свой, и Ца́рство Его́ все́ми облада́ет. Благослови́те Го́спода вси А́нгели Его́, си́льнии кре́постию, творя́щии сло́во Его́, услы́шати глас слове́с Его́. Благослови́те Го́спода вся Си́лы Его́, слуги́ Его́, творя́щии во́лю Его́. Благослови́те Го́спода вся дела́ Его́, на вся́ком ме́сте влады́чества Его́, благослови́, душе́ моя́, Го́спода.

На вся́ком ме́сте влады́чества Его́, благослови́, душе́ моя́, Го́спода.

Псалом 142:

Го́споди, услы́ши моли́тву мою́, внуши́ моле́ние мое́ во и́стине Твое́й, услы́ши мя в пра́вде Твое́й и не вни́ди в суд с рабо́м Твои́м, я́ко не оправди́тся пред Тобо́ю всяк живы́й. Я́ко погна́ враг ду́шу мою́, смири́л есть в зе́млю живо́т мой, посади́л мя есть в те́мных, я́ко ме́ртвыя ве́ка. И уны́ во мне дух мой, во мне смяте́ся се́рдце мое́. Помяну́х дни дре́вния, поучи́хся во всех де́лех Твои́х, в творе́ниих руку́ Твое́ю поуча́хся. Возде́х к Тебе́ ру́це мои́, душа́ моя́, я́ко земля́ безво́дная Тебе́. Ско́ро услы́ши мя, Го́споди, исчезе́ дух мой, не отврати́ лица́ Твоего́ от Мене́, и уподо́блюся низходя́щым в ров. Слы́шану сотвори́ мне зау́тра ми́лость Твою́, я́ко на Тя упова́х. Скажи́ мне, Го́споди, путь во́ньже пойду́, я́ко к Тебе́ взях ду́шу мою́. Изми́ мя от враг мои́х, Го́споди, к Тебе́ прибего́х. Научи́ мя твори́ти во́лю Твою́, я́ко Ты еси́ Бог мой. Дух Твой Благи́й наста́вит мя на зе́млю пра́ву. И́мене Твоего́ ра́ди, Го́споди, живи́ши мя, пра́вдою Твое́ю изведе́ши от печа́ли ду́шу мою́. И ми́лостию Твое́ю потреби́ши враги́ моя́ и погуби́ши вся стужа́ющыя души́ мое́й, я́ко аз раб Твой есмь.

Услы́ши мя, Го́споди, в пра́вде Твое́й и не вни́ди в суд с рабо́м Твои́м.

Дух Твой Благи́й наста́вит мя на зе́млю пра́ву.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Тропа́рь глас 4:

Сла́ва Отцу́ и Сы́ну и Свято́му Ду́ху. И ны́не и при́сно и во ве́ки веко́в. Ами́нь.

Глас 4: Е́же от ве́ка утае́ное / и А́нгелом несве́домое та́инство, / Тобо́ю, Богоро́дице, су́щим на земли́ яви́ся Бог, / в несли́тном соедине́нии воплоща́ем / и, Крест во́лею нас ра́ди восприи́м, / и́мже воскреси́в первозда́ннаго, / спасе́ от сме́рти ду́ши на́ша.

Здесь читается кафизма, положенная по дню, или сразу седальны:

Го́споди, поми́луй. (Три́жды)

Седален, глас 8:

Украси́в ду́шу твою́ доброде́тельми, и вре́меннаго жития́ по́прище в стра́се Бо́жии преше́д, обре́л еси́ благода́ть пред Бо́гом; Ему́же с ли́ки Ангел предстоя́, моли́, свя́те Митрофа́не, дарова́ти на́м живо́т ве́чный и ве́лию ми́лость.

Сла́ва Отцу́ и Сы́ну и Свято́му Ду́ху. И ны́не и при́сно и во ве́ки веко́в. Ами́нь.

Глас 8: Влады́чице, приими́ моли́тву ра́б Твои́х и изба́ви на́с от вся́кия ну́жды и печа́ли.

Седален, глас 2:

Упра́вив па́ству твою́ до́бре, сло́во бла́го Пастыренача́льнику Бо́гу возда́л еси́, и от руку́ Его́ пра́ведное воздая́ние прия́в, моли́, о́тче на́ш Митрофа́не, да блаже́ннаго в Ца́рстве святы́х пребыва́ния, и на́с хода́тайством твои́м, по бога́той ми́лости Свое́й сподо́бит.

Сла́ва Отцу́ и Сы́ну и Свято́му Ду́ху. И ны́не и при́сно и во ве́ки веко́в. Ами́нь.

Глас 2: Общую все́х наде́жду, Де́ву Пречи́стую, в мольбу́ приво́дим Ти́, Бла́же: заступи́ на́с от бе́д, пода́ждь блага́я ве́чная и вре́менная, моле́нием Честне́йшия херуви́мов, и все́х си́л небе́сных.

Полиеле́й:

Хвали́те И́мя Госпо́дне, хвали́те, раби́ Го́спода.

Аллилу́иа, аллилу́иа, аллилу́иа.

Благослове́н Госпо́дь от Сио́на, живы́й во Иерусали́ме.

Аллилу́иа, аллилу́иа, аллилу́иа.

Испове́дайтеся Го́сподеви, я́ко Благ, я́ко в век ми́лость Его́.

Аллилу́иа, аллилу́иа, аллилу́иа.

Испове́дайтеся Бо́гу Небе́сному, я́ко в век ми́лость Его́.

Аллилу́иа, аллилу́иа, аллилу́иа.

Велича́ние:

Велича́ем тя, / святи́телю о́тче Митрофане, / и чтим святу́ю па́мять твою́, / ты бо мо́лиши о нас // Христа́ Бо́га на́шего.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа,// сла́ва Тебе́, Бо́же. (Трижды)

Седа́льны:

Глас 8:

О все́х сла́вных, Це́ркви Святе́й благода́тию Бо́жиею от тебе́ быва́емых, благода́рственная Бо́гу воздаю́ще, и Того́ боголе́пное снизхожде́ние сла́вяще, мо́лим тя́, святи́телю Христо́в Митрофа́не, помози́ на́м обрести́ все́м благода́ть и ми́лость в Де́нь су́дный.

Глас 8: Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Ты́ Еди́на еси́ ко́рень де́вства и неувяда́емый цве́т чистоты́, Ты́ сте́рла еси́ главу́ зми́еву, Ты́ на́с изба́ви от прегреше́ний на́ших и душе́вных скве́рн, Богоро́дице, и ко приста́нищу и́стиннаго покая́ния напра́ви.

Степе́нна, глас 4:

От ю́ности моея́/ мно́зи бо́рют мя стра́сти,/ но Сам мя заступи́// и спаси́, Спа́се мой.

Ненави́дящии Сио́на,/ посрами́теся от Го́спода,/ я́ко трава́ бо огне́м// бу́дете изсо́хше.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Святы́м Ду́хом/ вся́ка душа́ живи́тся,/ и чистото́ю возвыша́ется,// светле́ется Тро́йческим еди́нством, священнота́йне.

Го́споди, поми́луй. (Три́жды)

От Иоа́нна Свята́го Ева́нгелия чте́ние

Сла́ва, Тебе́, Го́споди, сла́ва Тебе́.

Рече́ Госпо́дь ко прише́дшым к Нему́ иуде́ем: Аз есмь дверь, Мно́ю а́ще кто вни́дет, спасе́тся, и вни́дет, и изы́дет, и па́жить обря́щет. Тать не прихо́дит, ра́зве да укра́дет, и убие́т, и погуби́т, Аз приидо́х, да живо́т и́мут и ли́шше и́мут. Аз есмь па́стырь до́брый, па́стырь до́брый ду́шу свою́ полага́ет за о́вцы. А нае́мник, и́же несть па́стырь, ему́же не суть о́вцы своя́, ви́дит во́лка гряду́ща и оставля́ет о́вцы, и бе́гает, и волк расхи́тит их, и распу́дит о́вцы. А нае́мник бежи́т, я́ко нае́мник есть и неради́т о овца́х. Аз есмь па́стырь до́брый, и зна́ю Моя́, и зна́ют Мя Моя́. Я́коже зна́ет Мя Оте́ц, и Аз зна́ю Отца́, и ду́шу Мою́ полага́ю за о́вцы. И и́ны о́вцы и́мам, я́же не суть от двора́ сего́, и ты́я Ми подоба́ет привести́, и глас Мой услы́шат, и бу́дет еди́но ста́до, и еди́н Па́стырь.

Псало́м 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя. Я́ко беззако́ние мое́ аз зна́ю и грех мой предо мно́ю есть вы́ну. Тебе́ Еди́ному согреши́х, и лука́вое пред Тобо́ю сотвори́х, я́ко да оправди́шися во словесе́х Твои́х и победи́ши, внегда́ суди́ти Ти. Се бо в беззако́ниих зача́т есмь, и во гресе́х роди́ мя ма́ти моя́. Се бо и́стину возлюби́л еси́, безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся, омы́еши мя, и па́че сне́га убелю́ся. Слу́ху моему́ да́си ра́дость и весе́лие, возра́дуются ко́сти смире́нныя. Отврати́ лице́ Твое́ от грех мои́х, и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́, и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́, и Ду́хом Влады́чним утверди́ мя. Научу́ беззако́нныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́, возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо, всесожже́ния не благоволи́ши. Же́ртва Бо́гу дух сокруше́н, се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския, тогда́ благоволи́ши же́ртву пра́вды, возноше́ние и всесожега́емая: тогда́ возложа́т на олта́рь Твой тельцы́.

Глас 6:

Сла́ва Отцу́ и Сы́ну и Свято́му Ду́ху./ Моли́твами святителя Митрофана, / Ми́лостиве, очи́сти / мно́жества согреше́ний на́ших.

И ны́не и при́сно и во ве́ки веко́в. Ами́нь./ Моли́твами Богоро́дицы, / Ми́лостиве, очи́сти / мно́жества согреше́ний на́ших.

Поми́луй мя, Бо́же,/ по вели́цей ми́лости Твое́й,/ и по мно́жеству щедро́т Твои́х// очи́сти беззако́ние мое́.

Стихи́ра, глас 6

Преподо́бне о́тче, всеблаже́нне Митрофа́не, па́стырю до́брый, уго́дниче Христо́в усе́рдный, ско́рый на́ш хода́таю и те́плый к Бо́гу моли́твенниче, бу́ди на́м в беда́х на́ших защи́тник и в печа́лех уте́шитель, па́мять твою́ любо́вию почита́ющим.

Го́споди, поми́луй. (12 раз)

Кано́н свята́го, гла́с 8.

Пе́снь 1.

Ирмо́с: Во́ду проше́д, я́ко су́шу, и еги́петскаго зла́ избежа́в, изра́ильтянин вопия́ше: Изба́вителю и Бо́гу на́шему пои́м.

Припев: Святителю отче Митрофане, моли Бога о нас

От мно́гих зо́л мно́гаго уны́ния испо́лнены, к тебе́ прибега́ем, святи́телю Христо́в Митрофа́не, и от тебе́ ско́рыя по́мощи и заступле́ния ны́не тре́буем.

Страсте́й на́с бра́ни смуща́ют, па́стырю преподо́бне, ты́ же умири́ на́с твои́м благоприя́тным к Бо́гу хода́тайством.

От бе́д и скорбе́й на́с, чудотво́рче святы́й, изба́вив, му́жественное в доброде́телех преспе́яние все́м да́руй, да вси́ о тебе́, свяще́ннейший Митрофа́не, ра́дуемся.

Богоро́дичен: Моли́тву на́шу приими́, Пречи́стая, и моли́твою Твое́ю всемо́щною изба́витися на́м от вра́г ви́димых и неви́димых, от грехо́в же и вся́кия му́ки, моли́, Его́же родила́ еси́, Человеколю́бца Бо́га.

Пе́снь 3.

Ирмо́с: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ в любви́ Твое́й, жела́ний кра́ю, ве́рных утвержде́ние, еди́не Человеколю́бче.

Покрови́теля жи́зни на́шея и моли́твенника к Бо́гу почита́ем тя́, присносла́вный о́тче на́ш Митрофа́не: на стезю́ на́с покая́ния напра́ви, архиере́ев красото́ и ве́рных утвержде́ние.

Мо́лим, душе́вное на́ше смуще́ние, и тму́ бесо́вских наважде́ний в на́с разори́ти: тебе́ бо, свя́те, даде́ся благода́ть Свята́го Ду́ха, злы́я ду́хи прогоня́ти.

Неду́гующе те́лом, неду́гуем и душе́ю, богоблаже́нне, ты́ же не оста́ви на́с во гресе́х на́ших поги́бнути, но в ни́х же и са́м я́ко челове́к искуша́емь бы́л еси́, и на́м, искуша́емым, ны́не помози́.

Богоро́дичен: Вся́ Ангелов во́инства, Предте́че Госпо́день, апо́столов двоенадеся́тице, святи́и вси́ с Богоро́дицею, сотвори́те моли́тву, во е́же спасти́ся на́м.

Седа́лен, гла́с 2:

Во святи́тельстве благоче́стно пожи́л еси́, святи́телю богоявле́нне, лю́ди к богоразу́мию сло́вом и де́лом наста́вил еси́, и Бо́гу до конца́ угоди́л еси́. Сего́ ра́ди от Него́ нетле́нием и чудесы́, о́тче Митрофа́не, почти́лся еси́, я́ко прича́стник Бо́жия благода́ти.

Сла́ва, и ны́не, Богоро́дичен:

Му́чеников, проро́ков, апо́столов, иера́рхов, преподо́бных и святы́х все́х от ве́ка пра́ведных похвала́ Ты́ еси́, Пречи́стая, те́мже Тя́ мо́лим: моли́ся с ни́ми ко Го́споду, да спасе́т ду́ши на́ша.

Пе́снь 4.

Ирмо́с: Услы́шах, Го́споди, смотре́ния Твоего́ та́инство, разуме́х дела́ Твоя́, и просла́вих Твое́ Божcтво́.

Пла́мень погаси́ в на́с плотски́х обурева́ний и нечи́стых на́ших помышле́ний, да пла́мени гее́нскаго огня́ твои́ми моли́твами, Митрофа́не, изба́вимся.

Ду́шу и помышле́ние к тебе́ простира́ем, святи́телю богоизбра́нне: согре́й на́шу ве́ру и любо́вь, я́же к Бо́гу, да зако́ну Его́ усе́рдно после́дующе, пре́йдем по́прище на́шего спасе́ния непреткнове́нно.

Сто́лп кре́пости стяжа́вше тя́ от Бо́га, от ви́димых и неви́димых враго́в огражда́емся тобо́ю безбе́дно; те́мже тя́ вси́ по до́лгу, Митрофа́не, ублажа́ем.

Богоро́дичен: Черто́же незаходи́маго Све́та, Де́во, не́смы досто́йны черто́га небе́снаго, грехо́вныя ра́ди вины́; Ты́ же, Богороди́тельнице, ра́ди обнаже́ннаго на Кресте́ сла́дкаго Твоего́ Сы́на, и Блага́го на́шего Го́спода, покры́й сты́д лица́ на́шего и спаси́ на́с.

Пе́снь 5.

Ирмо́с: Просвети́ на́с повеле́нии Твои́ми, Го́споди, и мы́шцею Твое́ю высо́кою Тво́й ми́р пода́ждь на́м, Человеколю́бче.

Мо́лим ти ся и вопие́м всеусе́рдно: испо́лни, боговдохнове́нне, весе́лия живо́т на́ш, покрыва́я на́с кре́пким покро́вом защище́ния твоего́ от гла́да, я́звы и междоусо́бныя бра́ни, я́ко мо́жеши, о́тче, а́ще хо́щеши.

Мра́к на́ших заблужде́ний и жите́йския го́рдости све́тлостию святы́х моли́тв твои́х, Митрофа́не, прожени́, да по́мощию твое́ю грехо́в оставле́ние прии́мше, ми́лость у Христа́ Бо́га обря́щем.

На одре́ не́мощи и уны́ния низлежа́щу ми́, пода́ждь ру́ку по́мощи, па́стырю боговозлю́бленне, и не оста́ви мя́ лише́нна бы́ти твоего́ спаси́тельнаго благода́тию Свята́го Ду́ха посеще́ния.

Богоро́дичен: Чисте́йшая еси́ па́че Ангельских чино́в, от Нея́же Исто́чник святы́ни воплоти́ся на́с ра́ди, да освяти́т естество́ челове́ческое, моли́твами Твои́ми, Богоро́дице, изба́ви на́с от тиме́ния нечи́стых на́ших дея́ний и неподо́бных глаго́ланий.

Пе́снь 6.

Ирмо́с: Моли́тву пролию́ ко Го́споду и Тому́ возвещу́ печа́ли моя́, я́ко зо́л душа́ моя́ испо́лнися и живо́т мо́й а́ду прибли́жися, и молю́ся, я́ко Ио́на: от тли́, Бо́же, возведи́ мя.

Гра́ду твоему́ засту́пник бу́ди и оби́тели твоея́ храни́тель, гра́ды же и страны́ чту́щих любо́вию па́мять твою́, необори́мым моли́тв твои́х предста́тельством огради́, да вси́ тобо́ю, богому́дре Митрофа́не, хва́лимся.

Яко защи́тника тя́ от Бо́га ве́дуще, вла́сть на ду́сех нечи́стых ве́лию иму́ща, мо́лим, от зла́го де́йствия злы́х духо́в на́ши ду́ши сохрани́ти безнаве́тны.

По до́лгу блажа́т тя́ ве́рнии, — ра́дуйся, Митрофа́не, — зову́ще: ты́ бо вои́стинну Росси́йстей Це́ркви ра́дование и похвала́, на вся́ враги́ одоле́ние, досточу́дне.

Богоро́дичен: Го́ру Тя́ мы́сленную и Ле́ствицу Иа́ковлю проро́цы нарица́ют, Еюже Бо́г к челове́ком сни́де, поги́бшую дра́хму взыска́ти хотя́, ю́же обре́т, па́ки к небеси́ возво́дит. Те́мже Тя́ вси́, я́ко Ма́терь Бо́жию, правосла́вно велича́ем.

Конда́к, гла́с 8:

Воздержа́нием те́ло ду́ху порабо́тив, ду́шу же равноа́нгельну сотвори́в, святи́тельскою оде́ялся еси́ оде́ждою, я́ко вене́ц свяще́нства; и ны́не, все́х Влады́це предстоя́, моли́, всеблаже́нне Митрофа́не, умири́ти и спасти́ ду́ши на́ша.

Икос:

В пусты́ни высото́ю смиренному́дрия, я́ко ра́йский цве́т, красу́яся, и на Воро́нежския Це́ркви престо́ле украси́лся еси́ высо́кими удобре́ниями, прему́дре, и́бо бы́л еси́ иера́рх, о́браз ве́рным сло́вом и житие́м. Те́мже и Бо́г, я́ко уго́дника Своего́ вознесе́ тя, нетле́нием и чудесы́ в Це́ркви Свое́й прославля́я, да вси́ ве́рою зове́м ти́: ра́дуйся, Воро́нежская похвало́, Митрофа́не приснопа́мятне.

Пе́снь 7.

Ирмо́с: От Иуде́и доше́дше, о́троцы, в Вавило́не иногда́, ве́рою Тро́ическою пла́мень пе́щный попра́ша, пою́ще: отце́в Бо́же, благослове́н еси́.

На́с обнови́ти хотя́ и на́шему спасе́нию, Спа́се, благопоспеши́ти, Ты́ но́ваго Це́ркви Свое́й воздви́гл еси́ свети́льника, Митрофа́на, к Тебе́ зову́ща: отце́в Бо́же, благослове́н еси́.

Человеколю́бца Спа́са о на́с, святи́телю Христо́в, умоли́, разреши́тися на́м от прегреше́ний на́ших и душе́вных скве́рн, да и мы́ Тому́, я́ко Всеси́льному Изба́вителю, зове́м: отце́в Бо́же, благослове́н еси́.

В сла́ву Бо́жию оде́янный святи́тель и чудотво́рец на́м от Бо́га показа́лся еси́, Митрофа́не всехва́льне, да све́тлостьми чуде́с твои́х па́че со́лнечных лу́чь озаря́емы, зове́м ди́вная тобо́ю Соверша́ющему: отце́в Бо́же, благослове́н еси́.

Богоро́дичен: Вели́кая дарова́ния Тобо́ю от Го́спода прия́хом, Де́во Пречи́стая, сего́ ра́ди благода́рственное пе́ние прино́сим Ти́ и зове́м: Благослове́нна Ты́ в жена́х еси́, Всенепоро́чная Влады́чице.

Пе́снь 8.

Ирмо́с: Царя́ Небе́снаго, Его́же пою́т во́и Ангельстии, хвали́те и превозноси́те во вся́ ве́ки.

К честны́м моща́м твои́м, я́ко к необори́мому покро́ву, прибега́юще, немо́лчнаго твоего́ хода́тайства, богоно́се преподо́бне, про́сим: ты́ же не пре́зри и́же от тебе́ тре́бующих по́мощи, но услы́ши и заступи́ все́х, пою́щих тя́ и превознося́щих Христа́ во ве́ки.

Теле́сныя сла́бости и душе́вныя неду́ги си́лою моли́тв твои́х благода́тно пременя́я, премени́, о́тче Митрофа́не, вся́кое неможе́ние пою́щим тя́ и превознося́щим Христа́ во ве́ки.

Пла́чущим ты́ сле́зы отира́еши, па́стырю преблаже́нне, и бе́дствующим подае́ши ру́ку спасе́ния от Бо́га, те́мже и на́с у престо́ла Влады́чня помяни́, ве́рою пою́щих тя́ и превознося́щих Христа́ во ве́ки.

Богоро́дичен: Велича́ем Твое́ тве́рдое заступле́ние, испове́дуем Ма́терния Твоея́ моли́твы си́лу, благодари́м возвели́чившаго Тя́ Го́спода, ро́ждшагося от Тебе́, Богома́ти, Его́же моли́ спасти́ся душа́м на́шим.

На 9-й песни поем песнь Пресвятыя Богородицы:

Вели́чит душа́ Моя́ Го́спода и возра́довася дух Мой о Бо́зе Спа́се Мое́м.

К коемуждо стиху припеваем: Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Я́ко призре́ на смире́ние рабы́ Своея́, се бо, от ны́не ублажа́т Мя вси ро́ди.

Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Я́ко сотвори́ Мне вели́чие Си́льный, и свя́то и́мя Его́, и ми́лость Его́ в ро́ды родо́в боя́щимся Его́.

Сотвори́ держа́ву мы́шцею Свое́ю, расточи́ го́рдыя мы́слию се́рдца их.

Низложи́ си́льныя со престо́л, и вознесе́ смире́нныя, а́лчущия испо́лни благ, и богатя́щияся отпусти́ тщи.

Восприя́т Изра́иля о́трока Своего́, помяну́ти ми́лости, я́коже глаго́ла ко отце́м на́шим, Авраа́му и се́мени его́ да́же до ве́ка.

Пе́снь 9.

Ирмо́с: Вои́стинну Богоро́дицу, Тя́ испове́дуем, спасе́ннии Тобо́ю, Де́во Чи́стая, с безпло́тными ли́ки Тя́ велича́юще.

Ты́, и́же в Дому́ Твое́м уго́дников Твои́х насажда́еши, я́ко ма́слины и я́ко ке́дры, Спа́се, Митрофа́на уго́дника Твоего́ моле́нием, насади́ в на́с доброде́тельное житие́, да во вре́мя свое́ принесе́м Ти́ плоды́ покая́ния.

Со Ангелы, служи́телю Святе́й Тро́ице, Митрофа́не прему́дре, ра́дуйся, и на́м, ве́рою блажа́щим тя́, пода́ждь моли́твами твои́ми, о Ду́се Свя́те ра́доватися.

Аще и не́мощны есмы́ и премно́го согреша́ем, недосто́йнии, но не отступа́ем наде́жды мо́щнаго покро́ва твоего́, достосла́вне: ты́ же, Христу́ Бо́гу моля́ся, помози́ на́м обрести́ все́м с ли́ки пра́ведных стоя́ние в Де́нь су́дный.

На ме́сте озлобле́ния не́мощи смири́вшемуся, удиви́ моли́тв твои́х си́лу, чудотво́рче святы́й, Митрофа́не, и по да́нней тебе́ целе́б благода́ти, нездра́вие мое́ во здра́вие премени́.

Богоро́дичен: Упова́ние и ра́досте на́ша, Мари́е Богоневе́стная, покры́й на́с честны́м Твои́м омофо́ром, да хва́лим непреста́нно и́мя Твое́, и пое́м с безпло́тными ли́ки, Тя́ велича́юще.

Свети́лен:

Светоза́рна свети́льника ве́ры, Боже́ственно и пресла́вно от Светонача́льныя Тро́ицы возсия́вша, и на́с со́лнца светле́йше чудесы́ свои́ми просвети́вша, Митрофа́на, па́стыря блаже́нна, пе́сньми восхва́лим.

Слава и ныне, Богоро́дичен: Богоро́дице Де́во, ра́дуйся, от Ангела ра́дость прии́мшая; ра́дуйся, Влады́чице, и спаси́ на Тя́ упова́ющих.

Хвали́тны псалмы́, глас 8:

Вся́кое дыха́ние да хва́лит Го́спода./ Хвали́те Го́спода с небе́с,/ хвали́те Его́ в вы́шних.// Тебе́ подоба́ет песнь Бо́гу.

Хвали́те Его́ вси а́нгели Его́,/ хвали́те Его́ вся си́лы Его́.// Тебе́ подоба́ет песнь Бо́гу.

Сти́хиры, глас 8:

Стих: Сотвори́ти в них суд напи́сан/ сла́ва сия́ бу́дет всем преподо́бным Его́.

Те́сен пу́ть в житии́ твое́м, преподо́бне Митрофа́не, преше́л еси́, по́двигом до́брым в пусты́ни подвиза́яся, и тече́ние благо́е во святи́тельстве соверша́я, Бо́гу же все́ю душе́ю рабо́тая, и до конца́ угожда́я ве́рно, я́ко сосу́д богоизбра́нный. Те́м простра́нное обре́л еси́ воздая́ние у пра́веднаго Мздовоздая́теля и Царя́ святы́х, Го́спода; Ему́же, свя́те, моли́ся, ми́р Росси́йстей Це́ркви дарова́ти, и душа́м на́шим ве́лию ми́лость.

Стих: Хвали́те Его́ на си́лах Его́,/ хвали́те Его́ по мно́жеству вели́чествия Его́.

Стих: Хвали́те Его́ в тимпа́не и ли́це,/ хвали́те Его́ во стру́нах и орга́не.

Житие́ чи́стое, терпе́ние, кро́тость, и любо́вь нелицеме́рну, воздержа́ние соверше́нное, умиле́ние боже́ственное, ве́ру же и наде́жду и́стинну и милосе́рдие стяжа́в, равноа́нгельно, Митрофа́не, на земли́ пожи́л еси́, и на небеси́ с ли́ки Ангел предстои́ши, с ни́миже, свя́те, моли́ся, ми́р Росси́йстей Це́ркви дарова́ти, и душа́м на́шим ве́лию ми́лость.

Стих: Хвали́те Его́ в кимва́лех доброгла́сных, хвали́те Его́ в кимва́лех восклица́ния. / Вся́кое дыха́ние да хва́лит Го́спода.

Боже́ственною благода́тию Свята́го Ду́ха просвети́вся, и по сме́рти благода́тное ми́лости мѵ́ро от честны́х твои́х и многоцеле́бных моще́й источа́еши. Те́м по до́лгу о тебе́, Митрофа́не, ра́дуемся, и па́мять твою́ священноле́пно соверша́юще, священноле́пными пе́сньми зове́м ти́: сла́ва Да́вшему ти́ кре́пость, сла́ва Венча́вшему тя́, сла́ва Де́йствующему тобо́ю все́м исцеле́ния.

Глас 6: Сла́ва Отцу́ и Сы́ну и Свято́му Ду́ху

Благи́й и ве́рный ра́бе, усе́рдный де́лателю виногра́да Христо́ва, ты́, я́ко до́брый па́стырь, ва́р и тяготу́ дневну́ю поне́сл еси́, уча́ слове́сныя о́вцы, се́рдцем ве́ровати в пра́вду, усты́ же испове́дати во спасе́ние, те́мже и Бо́г я́ко избра́ннаго Своего́ вознесе́ тя, и па́мять твою́, досточу́дне Митрофа́не, просла́ви. Ты́ же непреста́нно моля́ся, испроси́ лю́дем в доброде́телех преспе́яние, и ве́лию ми́лость.

Глас 6: И ны́не и при́сно и во ве́ки веко́в. Ами́нь.

Богоро́дице, Ты́ еси́ лоза́ и́стинная, возрасти́вшая на́м пло́д живота́, Тебе́ мо́лимся, моли́ся Влады́чице со святы́ми ца́рственными страстоте́рпцы и все́ми новому́ченики, поми́ловати ду́ши на́ша.

Славосло́вие вели́кое:

Сла́ва в вы́шних Бо́гу, и на земли́ мир, в челове́цех благоволе́ние. Хва́лим Тя, благослови́м Тя, кла́няем Ти ся, славосло́вим Тя, благодари́м Тя, вели́кия ра́ди сла́вы Твоея́. Го́споди Царю́ Небе́сный, Бо́же О́тче Вседержи́телю, Го́споди, Сы́не Единоро́дный, Иису́се Христе́, и Святы́й Ду́ше. Го́споди Бо́же, А́гнче Бо́жий, Сы́не Оте́чь, взе́мляй грех ми́ра, поми́луй нас; взе́мляй грехи́ ми́ра, приими́ моли́тву на́шу; седя́й одесну́ю Отца́, поми́луй нас. Я́ко Ты еси́ еди́н Свят, Ты еси́ еди́н Госпо́дь, Иису́с Христо́с, в сла́ву Бо́га Отца́. Ами́нь.

На всяк день благословлю́ Тя, и восхвалю́ И́мя Твое́ во ве́ки, и в век ве́ка.

Сподо́би, Го́споди, в день сей без греха́ сохрани́тися нам. Благослове́н еси́, Го́споди, Бо́же оте́ц на́ших, и хва́льно и просла́влено И́мя Твое́ во ве́ки. Ами́нь.

Бу́ди, Го́споди, ми́лость Твоя́ на нас, я́коже упова́хом на Тя.

Благослове́н еси́, Го́споди, научи́ мя оправда́нием Твои́м. (Три́жды)

Го́споди, прибе́жище был еси́ нам в род и род. Аз рех: Го́споди, поми́луй мя, исцели́ ду́шу мою́, я́ко согреши́х Тебе́. Го́споди, к Тебе́ прибего́х, научи́ мя твори́ти во́лю Твою́, я́ко Ты еси́ Бог мой: я́ко у Тебе́ исто́чник живота́, во све́те Твое́м у́зрим свет. Проба́ви ми́лость Твою́ ве́дущим Тя.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Три́жды)

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Святы́й Безсме́ртный, поми́луй нас.

Святы́й Бо́же, Святы́й Кре́пкий, Святы́й Безсме́ртный, поми́луй нас.

Тропа́рь, глас 4:

Утверди́, Бо́же, святу́ю правосла́вную ве́ру, правосла́вных христиа́н во век ве́ка.

Честне́йшую Херуви́м и Сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу, Тя велича́ем.

Сла́ва, и ны́не. Го́споди, поми́луй. (Три́жды) Благослови́.

Господи Иисусе Христе, Сыне Божий, моли́твами Пречи́стыя Своея́ Ма́тере, святителя Митрофана, первого епископа Воронежского, преподобных и богоносных отец наших и всех святы́х, поми́луй и спаси нас я́ко Благ и Челове́колюбец.

Многоле́тие:

Вели́каго Господи́на и Отца́ на́шего Кири́лла,/ Святе́йшаго Патри́арха Моско́вского и всея́ Руси́,/ и Господи́на на́шего (Высоко-) Преосвяще́ннейшаго (имярек),/ (архи-)епи́скопа (митрополита (титул)),/ богохрани́мую страну́ на́шу Росси́йскую,/ и вся правосла́вныя христи́аны,// Го́споди, сохрани́ их на мно́гая ле́та.