Шрифт

Богослужебные тексты для домашнего употребления

Дни памяти святых

Последование Всеношного бдения в день памяти равноапостольной Ольги, во святом крещении Елены. Для домашнего (келейного) совершения

ВСЕНО́ЩНОЕ БДЕ́НИЕ

ВЕЛИ́КАЯ ВЕЧЕ́РНЯ

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас. Ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Трижды.)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, (трижды). Сла́ва, и ны́не:

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Таже, Го́споди, поми́луй, (12), Сла́ва, и ны́не:

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 103:

Поется часть псалма:

Благослови́, душе́ моя́, Го́спода. / Благослове́н еси́, Го́споди. / Го́споди, Бо́же мой, возвели́чился еси́ зело́. / Благослове́н еси́, Го́споди. / Во испове́дание и в велеле́поту обле́клся еси́. / Благослове́н еси́, Го́споди. / Посреде́ гор про́йдут во́ды. / Ди́вна дела́ Твоя́, Го́споди. / Вся прему́дростию сотвори́л еси́. / Сла́ва Ти, Го́споди, сотвори́вшему вся.

Или читается псалом полностью:

Благослови́, душе́ моя́, Го́спода. Го́споди, Бо́же мой, возвели́чился еси́ зело́. Во испове́дание и в велеле́поту обле́клся еси́. Одея́йся све́том, я́ко ри́зою, простира́яй не́бо, я́ко ко́жу. Покрыва́яй вода́ми превы́спренняя Своя́, полага́яй о́блаки на восхожде́ние Свое́, ходя́й на крилу́ ве́треню. Творя́й А́нгелы Своя́ ду́хи и слуги́ Своя́ пла́мень о́гненный. Основа́яй зе́млю на тве́рди ея́, не преклони́тся в век ве́ка. Бе́здна, я́ко ри́за, одея́ние ея́, на гора́х ста́нут во́ды, от запреще́ния Твоего́ побе́гнут, от гла́са гро́ма Твоего́ убоя́тся. Восхо́дят го́ры и нисхо́дят поля́ в ме́сто, е́же основа́л еси́ им. Преде́л положи́л еси́, eго́же не пре́йдут, ниже́ обратя́тся покры́ти зе́млю. Посыла́яй исто́чники в де́брех, посреде́ гор про́йдут во́ды. Напая́ют вся зве́ри се́льныя, ждут она́гри в жа́жду свою́. На ты́х пти́цы небе́сныя привита́ют, от среды́ ка́мения дадя́т глас. Напая́яй го́ры от превы́спренних Свои́х, от плода́ дел Твои́х насы́тится земля́. Прозяба́яй траву́ ското́м, и злак на слу́жбу челове́ком, извести́ хлеб от земли́. И вино́ весели́т се́рдце челове́ка, ума́стити лице́ еле́ем, и хлеб се́рдце челове́ка укрепи́т. Насы́тятся древа́ польска́я, ке́дри Лива́нстии, и́хже еси́ насади́л. Та́мо пти́цы вогнездя́тся, ероди́ево жили́ще предводи́тельствует и́ми. Го́ры высо́кия еле́нем, ка́мень прибе́жище за́яцем. Сотвори́л есть луну́ во времена́, со́лнце позна́ за́пад свой. Положи́л еси́ тму, и бысть нощь, в не́йже про́йдут вси зве́рие дубра́внии. Ски́мни рыка́ющии, восхи́тити и взыска́ти от Бо́га пи́щу себе́. Возсия́ со́лнце и собра́шася и в ло́жах свои́х ля́гут. Изы́дет челове́к на де́ло свое́ и на де́лание свое́ до ве́чера. Я́ко возвели́чишася дела́ Твоя́, Го́споди, вся прему́дростию сотвори́л еси́, испо́лнися земля́ тва́ри Твоея́. Сие́ мо́ре вели́кое и простра́нное, та́мо га́ди, и́мже несть числа́, живо́тная ма́лая с вели́кими, та́мо корабли́ препла́вают, змий сей, eго́же созда́л еси руга́тися eму́. Вся к Тебе́ ча́ют, да́ти пи́щу им во бла́го вре́мя. Да́вшу Тебе́ им соберу́т, отве́рзшу Тебе́ ру́ку вся́ческая испо́лнятся бла́гости, отвра́щшу же Тебе́ лице́, возмяту́тся, отъи́меши дух их, и исче́знут, и в персть свою́ возвратя́тся. По́слеши Ду́ха Твоего́, и сози́ждутся, и обнови́ши лице́ земли́. Бу́ди сла́ва Госпо́дня во ве́ки, возвесели́тся Госпо́дь о де́лех Свои́х, призира́яй на зе́млю, и творя́й ю́ трясти́ся, прикаса́яйся гора́м, и дымя́тся. Воспою́ Го́сподеви в животе́ мое́м, пою́ Бо́гу моему́, до́ндеже есмь, да услади́тся Ему́ бесе́да моя́, аз же возвеселю́ся о Го́споде. Да исче́знут гре́шницы от земли́, и беззако́нницы, я́коже не бы́ти им. Благослови́, душе́ моя́, Го́спода.

Со́лнце позна́ за́пад свой. Положи́л еси́ тму, и бысть нощь. Я́ко возвели́чишася дела́ Твоя́, Го́споди, вся прему́дростию сотвори́л еси́.

Сла́ва, и ны́не: Аллилу́иа, аллилу́иа, аллилу́иа, сла́ва Тебе́ Бо́же. Трижды.

Блаже́н муж:

Блаже́н муж, и́же не и́де на сове́т нечести́вых.

Аллилу́иа, аллилу́иа, аллилу́иа.

Я́ко весть Госпо́дь путь пра́ведных, и путь нечести́вых поги́бнет.

Аллилу́иа, аллилу́иа, аллилу́иа.

Рабо́тайте Го́сподеви со стра́хом и ра́дуйтеся Ему́ с тре́петом.

Аллилу́иа, аллилу́иа, аллилу́иа.

Блаже́ни вси наде́ющиися Нань.

Аллилу́иа, аллилу́иа, аллилу́иа.

Воскресни́, Го́споди, спаси́ мя, Бо́же мой.

Аллилу́иа, аллилу́иа, аллилу́иа.

Госпо́дне есть спасе́ние, и на лю́дех Твои́х благослове́ние Твое́.

Аллилу́иа, аллилу́иа, аллилу́иа.

Сла́ва Отцу́ и Сы́ну и Свято́му Духу.

Аллилу́иа, аллилу́иа, аллилу́иа.

И ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Го́споди, воззва́х, глас 4:

Го́споди, воззва́х к Тебе́, услы́ши мя./ Услы́ши мя, Го́споди./ Го́споди, воззва́х к Тебе́, услы́ши мя:/ вонми́ гла́су моле́ния моего́,/ внегда́ воззва́ти ми к Тебе́.// Услы́ши мя, Го́споди.

Да испра́вится моли́тва моя́,/ я́ко кади́ло пред Тобо́ю,/ воздея́ние руку́ мое́ю/ – же́ртва вече́рняя.// Услы́ши мя, Го́споди.

Стихи́ры пра́здника, глас 4:

Стих: А́ще беззако́ния на́зриши, Го́споди, Го́споди, кто постои́т? Я́ко у Тебе́ очище́ние есть.

Яко со́лнце, возсия́ на́м / пресла́вная па́мять твоя́, Ольго богому́драя, / ма́ти князе́й Ру́сских, / Христо́ва мизи́ница, / апо́стольским уче́нием воспита́на, / возмогла́ еси́ на куми́ры, / па́че же на диа́вола, / си́лою Свята́го Ду́ха просвеща́ема, / от тмы́ неразу́мия всю́ страну́ / и лю́ди к Бо́гу привела́ еси́, / Его́же моли́ о творя́щих твою́ па́мять.

Стих: И́мене ра́ди Твоего́ потерпе́х Тя, Го́споди, потерпе́ душа́ моя́ в сло́во Твое́, упова́ душа́ моя́ на Го́спода.

Яко со́лнце, возсия́ на́м / пресла́вная па́мять твоя́, Ольго богому́драя, / ма́ти князе́й Ру́сских, / Христо́ва мизи́ница, / апо́стольским уче́нием воспита́на, / возмогла́ еси́ на куми́ры, / па́че же на диа́вола, / си́лою Свята́го Ду́ха просвеща́ема, / от тмы́ неразу́мия всю́ страну́ / и лю́ди к Бо́гу привела́ еси́, / Его́же моли́ о творя́щих твою́ па́мять.

Стих: От стра́жи у́тренния до но́щи, от стра́жи у́тренния да упова́ет Изра́иль на Го́спода.

В ра́зуме духо́вном, / и́мже посрами́ла еси́ врага́, прельсти́вшаго Еву, / и сего́ ору́жие сломи́ла еси́, / богосажде́нный ра́й церко́вный создала́ еси́, / в не́мже дре́во живо́тное — Кре́ст, водрузи́ла еси́, / и трапе́зу Бо́жия бра́шна иму́щи, / исто́чник неисчерпа́емый кро́ве Христо́вы, / его́же пи́вши, нетле́нна пребыва́еши, / за вся́ ны́ моля́щися при́сно.

Стих: Я́ко у Го́спода ми́лость, и мно́гое у Него́ избавле́ние, и Той изба́вит Изра́иля от всех беззако́ний eго́.

В ра́зуме духо́вном, / и́мже посрами́ла еси́ врага́, прельсти́вшаго Еву, / и сего́ ору́жие сломи́ла еси́, / богосажде́нный ра́й церко́вный создала́ еси́, / в не́мже дре́во живо́тное — Кре́ст, водрузи́ла еси́, / и трапе́зу Бо́жия бра́шна иму́щи, / исто́чник неисчерпа́емый кро́ве Христо́вы, / его́же пи́вши, нетле́нна пребыва́еши, / за вся́ ны́ моля́щися при́сно.

Стих: Хвали́те Го́спода вси язы́цы, похвали́те Его́ вси лю́дие.

Духо́вно возвесели́теся, Ру́сскии концы́, / па́мять чту́ще Ольги богому́дрыя: / моли́тся бо вы́ну ко Христу́ / с чудотво́рцами и му́чениками, / помо́щнину иму́щи Святу́ю Богоро́дицу, / изба́витися от бе́д и печа́лей / ве́рою пою́щим ю́ / и кла́няющимся ра́це нетле́ннаго ея́ те́ла.

Стих: Я́ко утверди́ся ми́лость Его́ на нас, и и́стина Госпо́дня пребыва́ет во век.

Прииди́те, христоимени́тии лю́дие ру́сскии, / возвели́чим во хвале́ниих прама́терь на́шу, / ве́лию му́дрость и му́жество показа́вшую, / сла́ву ми́ра презре́вшую / и Христа́ Бо́га и́стиннаго па́че все́х возлюби́вшую, / и та́ко к не́й воззове́м: / О, пресла́вная уго́днице Христо́ва! / моли́ о лю́дех ру́сских, / да ни ко́ими ко́зньми вра́жиими / от пра́выя ве́ры отвратя́тся / и в благоче́стии непоколеби́ми да пребу́дут.

Глас 6: Сла́ва Отцу́ и Сы́ну и Свято́му Ду́ху.

Прииди́те, ро́ди ру́сскии, пе́сньми восхва́лим Ольгу прему́друю, прииди́те, ра́зумом богатя́щиися, ра́зум сво́й в послуша́ние ве́ры приводи́ти от нея́ научи́теся, прииди́те, му́жие, че́сть жене́ пресла́вней возда́йте, прииди́те, жены́, му́жеству ея́ вели́кому подража́йте, прииди́те, владя́щии, и уразуме́йте вся́ земна́я превосходя́щую сла́ву нетле́нную, прииди́те, вси́ вну́цы ея́, и в де́нь ея́ све́тло восторжеству́йте, мо́лится бо те́пле ко Го́споду, е́же просвети́ти ду́ши на́ша.

Глас 6: И ны́не и при́сно и во ве́ки веко́в. Ами́нь.

Кто́ Тебе́ не ублажи́т, Пресвята́я Де́во? Кто́ ли не воспое́т Твоего́ Пречи́стаго Рождества́? Безле́тно бо от Отца́ возсия́вый Сы́н Единоро́дный, То́йже от Тебе́, Чи́стыя, про́йде, неизрече́нно вопло́щся: естество́м Бо́г Сы́й и естество́м бы́в Челове́к на́с ра́ди; не во двою́ лицу́ разделя́емый, но во двою́ естеству́ несли́тно познава́емый. Того́ моли́, Чи́стая Всеблаже́нная, поми́ловатися душа́м на́шим.

Све́те Тихи́й:

Све́те Ти́хий святы́я сла́вы Безсме́ртнаго Отца́ Небе́снаго, Свята́го, Блаже́ннаго, Иису́се Христе́! Прише́дше на за́пад со́лнца, ви́девше свет вече́рний, пое́м Отца́, Сы́на и Свята́го Ду́ха, Бо́га. Досто́ин еси́ во вся времена́ пет бы́ти гла́сы преподо́бными, Сы́не Бо́жий, живо́т дая́й; те́мже мир Тя сла́вит.

1. Суди́й Изра́илевых чте́ние

И приложи́ша сы́нове Изра́илевы сотвори́ти зло́е пред Го́сподем, и Ао́д у́мре. И отдаде́ и́х Госпо́дь в ру́ку Иави́на, царя́ Ханаа́нска, и́же ца́рствова во Асо́ре. И воево́да си́лы его́ Сиса́ра, и то́й живя́ше во Арисо́фе язы́ков. И возопи́ша сы́нове Изра́илевы ко Го́споду, я́ко де́вять со́т колесни́ц желе́зных бя́ше ему́ и то́й озло́би Изра́иля зело́ ле́т два́десять. И Девво́ра, жена́ проро́чица, жена́ Лафидо́фова, сiя́ судя́ше Изра́илю в то́ вре́мя и сiя́ живя́ше под фи́ником Девво́ра между́ Ра́мою и между́ Вефи́лем, в горе́ Ефре́мли, и восхожда́ху сы́нове Изра́илевы к не́й та́мо на су́д. И посла́ Девво́ра, и призва́ Вара́ка сы́на Авинее́мля из Кеде́са Неффали́мова, и рече́ к нему́: не запове́да ли тебе́ Госпо́дь, Бо́г Изра́илев, и по́йдеши в го́ру Фаво́р и по́ймеши с собо́ю де́сять ты́сящ муже́й от сыно́в Неффали́млих и от сыно́в Завуло́них, и приведу́ к тебе́ в водоте́чь Кисо́нь Сиса́ру воево́ду си́лы Иави́ни, и колесни́цы его́, и мно́жество [во́й] его́, и преда́м его́ в ру́ки твоя́. И рече́ к не́й Вара́к: а́ще по́йдеши со мно́ю, пойду́, и а́ще не по́йдеши со мно́ю, не пойду́, я́ко не ве́м дне́, в о́ньже благоустро́ит Госпо́дь Ангела со мно́ю. И рече́ Девво́ра к нему́: иду́щи пойду́ с тобо́ю, оба́че ве́ждь, я́ко не бу́дет тебе́ сла́ва на пути́, в о́ньже ты́ и́деши, поне́же в ру́ку же́нску преда́ст Госпо́дь Сиса́ру. И воста́ Девво́ра и по́йде с Вара́ком до Ка́диса. И воззва́ Вара́к Завуло́на и Неффали́ма до Ка́диса, и поидо́ша всле́д его́ де́сять ты́сящ муже́й, и и́де с ни́м Девво́ра. И Хаве́р Кине́й отлучи́ся от Ке́ны и от сыно́в Иова́ва, у́жика Моисе́ова, и потче́ ку́щу свою́ под ду́бом почива́ющих, и́же е́сть при Кеде́се. И возвести́ша Сиса́ре, я́ко взы́де Вара́к сы́н Авинее́мль на го́ру Фаво́р. И созва́ Сиса́ра вся́ колесни́цы своя́, де́вять со́т колесни́ц желе́зных, и вся́ лю́ди, и́же с ни́м, от Арисо́фа язы́ков в водоте́чь Кисо́нь. И рече́ Девво́ра к Вара́ку: воста́ни, я́ко се́й де́нь, в о́ньже предаде́ Госпо́дь Сиса́ру в ру́ку твою́, зане́ Госпо́дь изы́дет пред тобо́ю. И сни́де Вара́к с горы́ Фаво́р, и де́сять ты́сящ муже́й всле́д его́. И сотре́ Госпо́дь Сиса́ру и вся́ колесни́цы его́ и ве́сь по́лк его́ о́стрiем меча́ пред Вара́ком. И сни́де Сиса́ра с колесни́цы своея́ и побеже́ нога́ми свои́ми. И Вара́к гоня́й всле́д колесни́ц его́ и всле́д полка́, да́же до дубра́вы язы́ков. И паде́ ве́сь по́лк Сиса́рин о́стрiем меча́, не оста́ся ни еди́н. И Сиса́ра убеже́ нога́ми свои́ми в ку́щу Иаи́ли, жены́ Хаве́ра Кине́ева: я́ко ми́р бя́ше между́ Иави́ном царе́м Асо́рским, и между́ до́мом Хаве́ра Кине́ева. И изы́де Иаи́ль во сре́тенiе Сиса́ре и рече́ к нему́: уклони́ся, господи́не мо́й, уклони́ся ко мне́, не бо́йся. И уклони́ся к не́й в ку́щу, и покры́ его́ оде́ждею свое́ю. И рече́ Сиса́ра к не́й: напо́й мя́ ма́ло воды́, я́ко возжажда́х. И отреши́ ме́х мле́чный, и напои́ его́, и покры́ его́. И рече́ к не́й Сиса́ра: ста́ни во две́рех ку́щи, и бу́дет, а́ще кто́ прiи́дет к тебе́, и вопро́сит тя́, и рече́т: е́сть ли зде́ му́ж? и рече́ши: не́сть. И взя́ Иаи́ль, жена́ Хаве́рова, ко́л ку́щный, и взя́ мла́т в ру́ку свою́, и вни́де к нему́ ти́хо, и водрузи́ ко́л во скра́нiи его́, и пронзе́ до земли́, и се́й, утру́ждся, спа́ше и и́здше. И се́ Вара́к, гоня́й Сиса́ру. И изы́де Иаи́ль во сре́тенiе ему́ и рече́ ему́: прiиди́, и покажу́ тебе́ му́жа, его́же ты́ и́щеши. И вни́де к не́й, и се́ Сиса́ра лежа́ше ме́ртв, и ко́л во скра́нiи его́. И покори́ Госпо́дь Бо́г в то́й де́нь Иави́на, царя́ Ханаа́ня пред сы́ны Изра́илевыми, и хожда́ше рука́ сыно́в Изра́илевых, ходя́щи, и ожесточи́ся на Иави́на, царя́ Ханаа́нска, до́ндеже истреби́ша его́. И воспе́ Девво́ра и Вара́к, сы́н Авинее́мов, в то́й де́нь, и рече́: внегда́ нача́ти вождо́м во Изра́или, в произволе́нiи люди́й, благослови́те Го́спода. Услы́шите, ца́рiе, и внуши́те, кня́зи, а́з Го́сподеви воспою́ и пою́ Бо́гу Изра́илеву. Го́споди, во исхо́де Твое́м от Сии́ра, внегда́ воздвиза́тися Тебе́ от села́ Едо́мова, земля́ потрясе́ся, и не́бо возмути́ся, и о́блацы иска́паша во́ду. Го́ры подвиго́шася от лица́ Го́спода Елои́, та́я Сина́ от лица́ Го́спода, Бо́га Изра́илева. Во дни́ Самега́ра, сы́на Ана́фова, во дни́ Иаи́ли, оскуде́ша путiе́, и идо́ша в пути́ кри́вы, и идо́ша в пути́ развраще́нны. Оскуде́ша живу́щiи во Изра́или, оскуде́ша, до́ндеже воста́ Девво́ра, до́ндеже воста́ ма́ти во Изра́или, избра́ша бо́ги но́вы, я́ко хле́б я́чен, тогда́ воева́ша гра́ды князе́й, щи́т не яви́ся, ниже́ копiе́ в четы́редесяти ты́сящах во Изра́или. Се́рдце мое́ на учине́нная во Изра́или, си́льнiи люди́й, благослови́те Го́спода. Ездящiи на осля́тех бе́лых в полу́дне, и седя́щiи на суди́щи, и ходя́щiи на пути́ со́нмов, провеща́йте. Гла́с пле́щущих посреде́ веселя́щихся: та́мо дадя́т пра́вду. Го́споди, пра́вды укрепи́ во Изра́или: тогда́ разыдо́шася во гра́ды своя́ лю́дiе Госпо́дни. Воста́ни, воста́ни, Девво́ра; воста́ни, воста́ни, глаго́ли с пе́снiю; воста́ни, Вара́че, и плени́ пле́н тво́й, сы́не Авинее́мль.

2. Иуди́фи чтение

Оста́ся же Иуди́ф еди́на в шатре́ и Олофе́рн пове́ржен на ло́жи свое́м, бя́ше бо преиспо́лнен вино́м. И рече́ Иуди́ф рабе́ свое́й, да стои́т вне́ ло́жницы ея́ и да смо́трит исхо́да ея́, я́коже по вся́к де́нь, рече́ бо, я́ко изы́ти и́мать на моли́тву свою́ и Ваго́ю глаго́ла по словесе́м си́м. И отыдо́ша вси́ от лица́ ея́, и ни еди́н оста́ся в ло́жнице от ма́ла да́же до вели́ка. И ста́вши Иуди́ф при одре́ его́, рече́ в се́рдцы свое́м: Го́споди Бо́же всея́ си́лы, при́зри в ча́с се́й на дела́ ру́к мои́х ко возвыше́нiю Иерусали́ма, я́ко ны́не́ вре́мя помоществова́ти насле́дiю Твоему́ и соверши́ти начина́нiе мое́ ко сокруше́нiю враго́в, и́же воста́ша на на́с. И приступи́вши к сто́лпнику одра́, и́же бя́ше у главы́ Олофе́рновы, сня́т ме́чь его́ с него́, и, прибли́жившися ко одру́, взя́ в го́рсть власы́ главы́ его́ и рече́: укрепи́ мя, Го́споди Бо́же Изра́илев, в де́нь се́й. И уда́ри в вы́ю его́ два́жды си́лою сво́ею, и отъя́ главу́ его́ от него́, и отвали́ те́ло его́ от посте́ли, и отъя́ заве́су от столпо́в, и по ма́ле изы́де, и предаде́ рабы́ни свое́й главу́ Олофе́рнову. И вложи́ ю́ в меше́ц сне́дей свои́х. И изыдо́сте о́бе ку́пно по обы́чаю своему́ на моли́тву, и прошедше по́лк, обыдо́сте де́брь о́ную, и взыдо́сте на го́ру Ветилу́и, и прiидосте ко врато́м ея́. И рече́ Иуди́ф издале́ча стрегу́щим на врате́х: отве́рзите ны́не, отве́рзите врата́, с на́ми Бо́г, Бо́г на́ш, сотвори́ти еще́ кре́пость во Изра́или и си́лу на враги́, я́коже и дне́сь сотвори́. И бы́сть я́ко услы́шаша му́жiе гра́да того́ гла́с ея́, потща́шася сни́ти ко врато́м гра́да своего́ и созва́ша ста́рцев гра́да. И стеко́шася вси́ от ма́ла да́же до вели́ка, я́ко па́че ча́янiя бе́ им, е́же прiити́ е́й, и отверзо́ша врата́ и воспрiя́ша и́х, и, вже́гше о́гнь во свеще́нiе, окружи́ша и́х. Она́ же рече́ к ни́м гла́сом вели́ким: хвали́те Бо́га, хвали́те, хвали́те Бо́га, Иже не отста́ви ми́лости Своея́ от до́му Изра́илева, но сокруши́ враги́ на́шя руко́ю мое́ю в но́щь сiю́. И, изъе́мши главу́ из мешца́, показа́, и рече́ и́м: се́ глава́ Олофе́рна, вождонача́лника си́лы Ассу́рскiя, и се́ заве́са, за не́юже лежа́ше во пiя́нствах свои́х, и порази́ его́ Госпо́дь руко́ю же́нскою. И жи́в е́сть Госпо́дь, Иже сохрани́ мя в пути́ мое́м, и́мже ходи́х, я́ко прельсти́ его́ лице́ мое́ в па́губу его́, и не сотвори́ греха́ со мно́ю во оскверне́нiе и срамоту́. И ужасо́шася вси́ лю́дiе зело́, и, па́дше, поклони́шася Бо́гу, и ре́ша единоду́шно: благослове́н еси́, Бо́же на́ш, уничто́живый в день се́й враги́ люди́й Твои́х. И рече́ е́й Ози́я: благослове́на ты́ еси́, дщи́, Бо́гом Вы́шним па́че все́х же́н, я́же на земли́, и благослове́н Госпо́дь Бо́г, Иже созда́ небеса́ и зе́млю, Иже упра́ви тя́ на сокруше́нiе главы́ кня́зя враго́в на́ших. Яко не отста́нет наде́жда твоя́ от се́рдца челове́к, помина́ющих кре́пость Бо́жiю, да́же до ве́ка, и да сотвори́т тебе́ сiя́ Бо́г в возноше́нiе ве́чное, е́же посеща́ти тя́ во благи́х, за е́же не пощаде́ла еси́ души́ твоея́ смире́нiя ра́ди ро́да на́шего, но посо́бствовала еси́ паде́нiю на́шему, в правоте́ ходи́вши пред Бо́гом на́шим. И ре́ша вси́ лю́дiе: бу́ди, бу́ди.

3. При́тчей чте́ние

Жену́ до́блю кто́ обря́щет, дража́йши е́сть ка́мения многоце́ннаго такова́я. Дерза́ет на ню́ се́рдце му́жа ея́: такова́я до́брых коры́стей не лиши́тся. Де́лает бо му́жу своему́ блага́я во все́ житие́. Обре́тши во́лну и ле́н, сотвори́ благопотре́бную рука́ма свои́ма.

Сподо́би, Го́споди:

Сподо́би, Го́споди, в ве́чер сей без греха́ сохрани́тися нам. Благослове́н еси́, Го́споди, Бо́же оте́ц на́ших, и хва́льно и просла́влено и́мя Твое́ во ве́ки. Ами́нь.

Бу́ди, Го́споди, ми́лость Твоя́ на нас, я́коже упова́хом на Тя. Благослове́н еси́, Го́споди, научи́ мя оправда́нием Твои́м. Благослове́н еси́, Влады́ко, вразуми́ мя оправда́нием Твои́м. Благослове́н еси́, Святы́й, просвети́ мя оправда́нии Твои́ми.

Го́споди, ми́лость Твоя́ во век, дел руку́ Твое́ю не пре́зри. Тебе́ подоба́ет хвала́, Тебе́ подоба́ет пе́ние, Тебе́ сла́ва подоба́ет. Отцу́ и Сы́ну и Свято́му Ду́ху, ны́не и при́сно и во ве́ки веко́в. Ами́нь.

На лити́и стихи́ры, гла́с 1:

Дне́сь созыва́ется к весе́лию вся́ Ру́сская земля́, наста́ бо па́мять прама́тере на́шея, ко све́ту Христо́вы ве́ры на́с приве́дшия, и пу́ть спасе́ния на́м показа́вшия, и благострое́нию держа́вы на́шея нача́ло положи́вшия.

Сла́ва, гла́с 6: Дне́сь да торжеству́ем, бра́тие, и да пра́зднуем па́мять святы́я Ольги, не пе́сньми то́кмо прама́терь на́шу сла́вяше, но и де́лы христиа́нскими сла́ву Го́сподеви воздаю́ще, отри́нем про́чее язы́ческое нра́ва на́шего и нечести́вое жития́ на́шего отве́ржем, да не до конца́ прогне́вается Человеколю́бец Госпо́дь гре́х ра́ди на́ших.

И ны́не, богоро́дичен: Творе́ц и Изба́витель мо́й, Пречи́стая, Христо́с Госпо́дь, из Твои́х ложе́сн проше́д, в мя́ оболки́йся, пе́рвыя кля́твы Ада́ма свободи́. Те́мже Ти́, Всечи́стая, я́ко Бо́жии Ма́тери же и Де́ве, вои́стинну вопие́м немо́лчно: ра́дуйся Ангельски, ра́дуйся, Влады́чице, предста́тельство, и покро́ве, и спасе́ние ду́ш на́ших.

Го́споди, поми́луй. (40 раз)

Стихи́ры на стихо́вне:

Стихиры, гла́с 8:

О, пресла́внаго чудесе́! / жено́ю па́дший ро́д челове́ческий / Жено́ю возставля́ет пречу́дно Человеколю́бец Госпо́дь / и в после́дняя ле́та жену́ посыла́ет / на обраще́ние ро́да ру́сскаго, / Ольгу пресла́вную, / ея́же креще́нием нача́ло полага́ет / просвеще́нию страны́ Ру́сския / во спасе́ние ду́ш на́ших.

Сти́х: Бли́з Госпо́дь все́м, призыва́ющим Его́, / все́м, призыва́ющим Его́ во и́стине.

Ра́дуйся, гра́де богоспаса́емый Ки́еве, / все́м конце́м земли́ на́шея / све́т Христо́в источи́вый / и пе́рвую уго́дницу в не́й показа́вый, / Ольгу пречестну́ю; / ра́дуйся, Вышегра́де, насле́дие ея́ честно́е; / ра́дуйся, же́н ру́сских сосло́вие, / похвалу́ на́шу да́вшее / во спасе́ние ду́ш на́ших.

Сти́х: Во́лю боя́щихся Его́ сотвори́т, / и моли́тву и́х услы́шит, и спасе́т я́.

Возвесели́ся, непло́дная Ру́сская земле́, / лику́й, нечревоболе́вшая: / ны́не ражда́еши ча́до твое́ — / Еле́ну блаже́нную, / та́ же призове́т ко Го́споду отца́ на́шего Васи́лия / и подража́ти себе́ приведе́т ли́ки уго́дников Его́, / по́двиги свои́ми просла́вити иму́щих / гра́ды и де́бри твоя́, / во спасе́ние ду́ш на́ших.

Слава, гла́с 8:

Ве́лия сла́ва твоя́, и па́мять твоя́ с похвала́ми, Ольго прему́драя, тщету́ и́долов презре́вши и и́стину ева́нгельскую уразуме́вши, в седи́нах у́м тво́й Христу́ в послуша́ние плени́ла еси́ и все́м родо́м ру́сским пу́ть и́стинный живота́ показа́ла еси́, моли́ о на́с Еди́наго Человеколю́бца.

И ны́не, Богоро́дичен:

Безневе́стная Де́во, Яже Бо́га неизрече́нно заче́нши пло́тию, Ма́ти Бо́га Вы́шняго, Твои́х рабо́в мольбы́ приими́, Всенепоро́чная, все́м подаю́щи очище́ние прегреше́ний, ны́не на́ша моле́ния прие́млющи, моли́ спасти́ся все́м на́м.

Моли́тва свята́го Симео́на Богоприи́мца:

Ны́не отпуща́еши раба́ Твоего́, Влады́ко,/ по глаго́лу Твоему́, с ми́ром;/ я́ко ви́деста о́чи мои́ спасе́ние Твое́,/ е́же еси́ угото́вал пред лице́м всех люде́й,/ свет во открове́ние язы́ков,// и сла́ву люде́й Твои́х Изра́иля.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Тропа́рь, глас 1:

Крила́ми богоразу́мия впери́вши тво́й у́м, возлете́ла еси́ превы́ше ви́димыя тва́ри, взыска́вши Бо́га и Творца́ вся́ческих, и, Того́ обре́тши, па́ки рожде́ние креще́нием прия́ла еси́, дре́ва живо́тнаго наслажда́ющися, нетле́нна во ве́ки пребыва́еши, Ольго присносла́вная. (Дважды)

Песнь Пресвятей Богородице:

Богоро́дице Де́во, ра́дуйся, / Благода́тная Мари́е, Госпо́дь с Тобо́ю; / благослове́на Ты в жена́х / и благослове́н Плод чре́ва Твоего́, / я́ко Спа́са родила́ еси́ душ на́ших. (Единожды)

Бу́ди И́мя Госпо́дне благослове́но от ны́не и до ве́ка. (Три́жды)

Псало́м 33:

Благословлю́ Го́спода на вся́кое вре́мя,/ вы́ну хвала́ Его́ во усте́х мои́х./ О Го́споде похва́лится душа́ моя́,/ да услы́шат кро́тцыи, и возвеселя́тся./ Возвели́чите Го́спода со мно́ю,/ и вознесе́м И́мя Его́ вку́пе./ Взыска́х Го́спода, и услы́ша мя,/ и от все́х скорбе́й мои́х изба́ви мя./ Приступи́те к Нему́, и просвети́теся,/ и ли́ца ва́ша не постыдя́тся./ Сей ни́щий воззва́, и Госпо́дь услы́ша и́,/ и от все́х скорбе́й его́ спасе́ и́./ Ополчи́тся а́нгел Госпо́день о́крест боя́щихся Его́,/ и изба́вит их./ Вкуси́те и ви́дите, я́ко благ Госпо́дь:/ блаже́н муж, и́же упова́ет Нань./ Бо́йтеся Го́спода, вси́ святи́и Его́,/ я́ко несть лише́ния боя́щимся Его́./ Бога́тии обнища́ша и взалка́ша:/ взыска́ющии же Го́спода// не лиша́тся вся́каго бла́га.

У́ТРЕНЯ.

Шестопса́лмие:

Сла́ва в вы́шних Бо́гу, и на земли́ мир, в челове́цех благоволе́ние. (Три́жды)

Го́споди, устне́ мои́ отве́рзеши, и уста́ моя́ возвестя́т хвалу́ Твою́. (Два́жды)

Псалом 3:

Го́споди, что ся умно́жиша стужа́ющии ми́? Мно́зи востаю́т на мя, мно́зи глаго́лют души́ мое́й: несть спасе́ния eму́ в Бо́зе eго́. Ты же, Го́споди, Засту́пник мой еси́, сла́ва моя́ и вознося́й главу́ мою́. Гла́сом мои́м ко Го́споду воззва́х, и услы́ша мя от горы́ святы́я Своея́. Аз усну́х, и спах, воста́х, я́ко Госпо́дь засту́пит мя. Не убою́ся от тем люде́й, о́крест напа́дающих на мя. Воскресни́, Го́споди, спаси́ мя, Бо́же мой, я́ко Ты порази́л еси́ вся вражду́ющыя ми всу́е: зу́бы гре́шников сокруши́л еси́. Госпо́дне есть спасе́ние, и на лю́дех Твои́х благослове́ние Твое́.

Аз усну́х, и спах, воста́х, я́ко Госпо́дь засту́пит мя.

Псалом 37:

Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́. Я́ко стре́лы Твоя́ унзо́ша во мне, и утверди́л еси́ на мне ру́ку Твою́. Несть исцеле́ния в пло́ти мое́й от лица́ гне́ва Твоего́, несть ми́ра в косте́х мои́х от лица́ грех мои́х. Я́ко беззако́ния моя́ превзыдо́ша главу́ мою́, я́ко бре́мя тя́жкое отяготе́ша на мне. Возсмерде́ша и согни́ша ра́ны моя́ от лица́ безу́мия моего́. Пострада́х и сляко́хся до конца́, весь день се́туя хожда́х. Я́ко ля́двия моя́ напо́лнишася поруга́ний, и несть исцеле́ния в пло́ти мое́й. Озло́блен бых и смири́хся до зела́, рыка́х от воздыха́ния се́рдца моего́. Го́споди, пред Тобо́ю все жела́ние мое́ и воздыха́ние мое́ от Тебе́ не утаи́ся. Се́рдце мое́ смяте́ся, оста́ви мя си́ла моя́, и свет о́чию мое́ю, и той несть со мно́ю. Дру́зи мои́ и и́скреннии мои́ пря́мо мне прибли́жишася и ста́ша, и бли́жнии мои́ отдале́че мене́ ста́ша и нужда́хуся и́щущии ду́шу мою́, и и́щущии зла́я мне глаго́лаху су́етная и льсти́вным весь день поуча́хуся. Аз же я́ко глух не слы́шах и я́ко нем не отверза́яй уст свои́х. И бых я́ко челове́к не слы́шай и не имы́й во усте́х свои́х обличе́ния. Я́ко на Тя, Го́споди, упова́х, Ты услы́шиши, Го́споди Бо́же мой. Я́ко рех: да не когда́ пора́дуют ми ся врази́ мои́: и внегда́ подвижа́тися нога́м мои́м, на мя велере́чеваша. Я́ко аз на ра́ны гото́в, и боле́знь моя́ предо мно́ю есть вы́ну. Я́ко беззако́ние мое́ аз возвещу́ и попеку́ся о гресе́ мое́м. Врази́ же мои́ живу́т и укрепи́шася па́че мене́, и умно́жишася ненави́дящии мя без пра́вды. Воздаю́щии ми зла́я возблага́я оболга́ху мя, зане́ гоня́х благосты́ню. Не оста́ви мене́, Го́споди Бо́же мой, не отступи́ от Мене́. Вонми́ в по́мощь мою́, Го́споди спасе́ния моего́.

Не оста́ви мене́, Го́споди Бо́же мой, не отступи́ от Мене́. Вонми́ в по́мощь мою́, Го́споди спасе́ния моего́.

Псалом 62:

Бо́же, Бо́же мой, к Тебе́ у́тренюю, возжада́ Тебе́ душа́ моя́, коль мно́жицею Тебе́ плоть моя́, в земли́ пу́сте и непрохо́дне, и безво́дне. Та́ко во святе́м яви́хся Тебе́, ви́дети си́лу Твою́ и сла́ву Твою́. Я́ко лу́чши ми́лость Твоя́ па́че живо́т, устне́ мои́ похвали́те Тя. Та́ко благословлю́ Тя в животе́ мое́м, о и́мени Твое́м воздежу́ ру́це мои́. Я́ко от ту́ка и ма́сти да испо́лнится душа́ моя́, и устна́ма ра́дости восхва́лят Тя уста́ моя́. А́ще помина́х Тя на посте́ли мое́й, на у́тренних поуча́хся в Тя. Я́ко был еси́ Помо́щник мой, и в кро́ве крилу́ Твое́ю возра́дуюся. Прильпе́ душа́ моя́ по Тебе́, мене́ же прия́т десни́ца Твоя́. Ти́и же всу́е иска́ша ду́шу мою́, вни́дут в преиспо́дняя земли́, предадя́тся в ру́ки ору́жия, ча́сти ли́совом бу́дут. Царь же возвесели́тся о Бо́зе, похва́лится всяк клены́йся Им, я́ко загради́шася уста́ глаго́лющих непра́ведная.

На у́тренних поуча́хся в Тя. Я́ко был еси́ Помо́щник мой, и в кро́ве крилу́ Твое́ю возра́дуюся. Прильпе́ душа́ моя́ по Тебе́, мене́ же прия́т десни́ца Твоя́.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Го́споди поми́луй. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Псалом 87:

Го́споди Бо́же спасе́ния моего́, во дни воззва́х, и в нощи́ пред Тобо́ю. Да вни́дет пред Тя моли́тва моя́: приклони́ у́хо Твое́ к моле́нию моему́, я́ко испо́лнися зол душа́ моя́, и живо́т мой аду прибли́жися. Привмене́н бых с низходя́щими в ров, бых я́ко челове́к без по́мощи, в ме́ртвых свобо́дь, я́ко я́звеннии спя́щии во гро́бе, и́хже не помяну́л еси́ ктому́, и ти́и от руки́ Твоея́ отринове́ни бы́ша. Положи́ша мя в ро́ве преиспо́днем, в те́мных и се́ни сме́ртней. На мне утверди́ся я́рость Твоя́, и вся во́лны Твоя́ наве́л еси́ на мя. Уда́лил еси́ зна́емых мои́х от Мене́, положи́ша мя ме́рзость себе́: пре́дан бых и не исхожда́х. О́чи мои́ изнемого́сте от нищеты́, воззва́х к Тебе́, Го́споди, весь день, возде́х к Тебе́ ру́це мои́. Еда́ ме́ртвыми твори́ши чудеса́? Или́ вра́чеве воскреся́т, и испове́дятся Тебе́? Еда́ пове́сть кто во гро́бе ми́лость Твою́, и и́стину Твою́ в поги́бели? Еда́ позна́на бу́дут во тьме чудеса́ Твоя́, и пра́вда Твоя́ в земли́ забве́нней? И аз к Тебе́, Го́споди, воззва́х и у́тро моли́тва моя́ предвари́т Тя. Вску́ю, Го́споди, отре́еши ду́шу мою́, отвраща́еши лице́ Твое́ от Мене́? Нищ есмь аз, и в труде́х от ю́ности моея́; возне́с же ся, смири́хся, и изнемого́х. На мне преидо́ша гне́ви Твои́, устраше́ния Твоя́ возмути́ша мя, обыдо́ша мя я́ко вода́, весь день одержа́ша мя вку́пе. Уда́лил еси́ от Мене́ дру́га и и́скренняго, и зна́емых мои́х от страсте́й.

Го́споди Бо́же спасе́ния моего́, во дни воззва́х, и в нощи́ пред Тобо́ю. Да вни́дет пред Тя моли́тва моя́: приклони́ у́хо Твое́ к моле́нию моему́.

Псалом 102:

Благослови́, душе́ моя́, Го́спода, и вся вну́тренняя моя́ и́мя свя́тое Его́. Благослови́, душе́ моя́, Го́спода, и не забыва́й всех воздая́ний Его́, очища́ющаго вся беззако́ния твоя́, исцеля́ющаго вся неду́ги твоя́, избавля́ющаго от истле́ния живо́т твой, венча́ющаго тя ми́лостию и щедро́тами, исполня́ющаго во благи́х жела́ние твое́: обнови́тся я́ко о́рля ю́ность твоя́. Творя́й ми́лостыни Госпо́дь, и судьбу́ всем оби́димым. Сказа́ пути́ Своя́ Моисе́ови, сыново́м Изра́илевым хоте́ния Своя́: Щедр и Ми́лостив Госпо́дь, Долготерпели́в и Многоми́лостив. Не до конца́ прогне́вается, ниже́ во век вражду́ет, не по беззако́нием на́шым сотвори́л есть нам, ниже́ по грехо́м на́шым возда́л есть нам. Я́ко по высоте́ небе́сней от земли́, утверди́л есть Госпо́дь ми́лость Свою́ на боя́щихся Его́. Ели́ко отстоя́т восто́цы от за́пад, уда́лил есть от нас беззако́ния на́ша. Я́коже ще́дрит оте́ц сы́ны, уще́дри Госпо́дь боя́щихся Его́. Я́ко Той позна́ созда́ние на́ше, помяну́, я́ко персть есмы́. Челове́к, я́ко трава́ дни́е eго́, я́ко цвет се́льный, та́ко оцвете́т, я́ко дух про́йде в нем, и не бу́дет, и не позна́ет ктому́ ме́ста своего́. Ми́лость же Госпо́дня от ве́ка и до ве́ка на боя́щихся Его́, и пра́вда Его́ на сыне́х сыно́в, храня́щих заве́т Его́, и по́мнящих за́поведи Его́ твори́ти я́. Госпо́дь на Небеси́ угото́ва Престо́л Свой, и Ца́рство Его́ все́ми облада́ет. Благослови́те Го́спода вси А́нгели Его́, си́льнии кре́постию, творя́щии сло́во Его́, услы́шати глас слове́с Его́. Благослови́те Го́спода вся Си́лы Его́, слуги́ Его́, творя́щии во́лю Его́. Благослови́те Го́спода вся дела́ Его́, на вся́ком ме́сте влады́чества Его́, благослови́, душе́ моя́, Го́спода.

На вся́ком ме́сте влады́чества Его́, благослови́, душе́ моя́, Го́спода.

Псалом 142:

Го́споди, услы́ши моли́тву мою́, внуши́ моле́ние мое́ во и́стине Твое́й, услы́ши мя в пра́вде Твое́й и не вни́ди в суд с рабо́м Твои́м, я́ко не оправди́тся пред Тобо́ю всяк живы́й. Я́ко погна́ враг ду́шу мою́, смири́л есть в зе́млю живо́т мой, посади́л мя есть в те́мных, я́ко ме́ртвыя ве́ка. И уны́ во мне дух мой, во мне смяте́ся се́рдце мое́. Помяну́х дни дре́вния, поучи́хся во всех де́лех Твои́х, в творе́ниих руку́ Твое́ю поуча́хся. Возде́х к Тебе́ ру́це мои́, душа́ моя́, я́ко земля́ безво́дная Тебе́. Ско́ро услы́ши мя, Го́споди, исчезе́ дух мой, не отврати́ лица́ Твоего́ от Мене́, и уподо́блюся низходя́щым в ров. Слы́шану сотвори́ мне зау́тра ми́лость Твою́, я́ко на Тя упова́х. Скажи́ мне, Го́споди, путь во́ньже пойду́, я́ко к Тебе́ взях ду́шу мою́. Изми́ мя от враг мои́х, Го́споди, к Тебе́ прибего́х. Научи́ мя твори́ти во́лю Твою́, я́ко Ты еси́ Бог мой. Дух Твой Благи́й наста́вит мя на зе́млю пра́ву. И́мене Твоего́ ра́ди, Го́споди, живи́ши мя, пра́вдою Твое́ю изведе́ши от печа́ли ду́шу мою́. И ми́лостию Твое́ю потреби́ши враги́ моя́ и погуби́ши вся стужа́ющыя души́ мое́й, я́ко аз раб Твой есмь.

Услы́ши мя, Го́споди, в пра́вде Твое́й и не вни́ди в суд с рабо́м Твои́м.

Услы́ши мя, Го́споди, в пра́вде Твое́й и не вни́ди в суд с рабо́м Твои́м.

Дух Твой Благи́й наста́вит мя на зе́млю пра́ву.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Тропа́рь глас 1:

Крила́ми богоразу́мия впери́вши тво́й у́м, возлете́ла еси́ превы́ше ви́димыя тва́ри, взыска́вши Бо́га и Творца́ вся́ческих, и, Того́ обре́тши, па́ки рожде́ние креще́нием прия́ла еси́, дре́ва живо́тнаго наслажда́ющися, нетле́нна во ве́ки пребыва́еши, Ольго присносла́вная. (Дважды)

Сла́ва Отцу́ и Сы́ну и Свято́му Ду́ху. И ны́не и при́сно и во ве́ки веко́в. Ами́нь.

Глас 1: Гаврии́лу веща́вшу Тебе́, Де́во, ра́дуйся, / со гла́сом воплоща́шеся всех Влады́ка, / в Тебе́, святе́м киво́те, / я́коже рече́ пра́ведный Дави́д; / яви́лася еси́ ши́ршая Небе́с, / поноси́вши Зижди́теля Твоего́. / Сла́ва Все́льшемуся в Тя, / сла́ва Проше́дшему из Тебе́, / слава Свободи́вшему нас Рождество́м Твои́м.

Здесь читается кафизма, положенная по дню, или сразу седальны:

Го́споди, поми́луй. (Три́жды)

Седален, глас 3:

Вои́стинну в жена́х мудре́йшею показа́лася еси́, Ольго сла́вная, ле́сть язы́ческую отве́ргши, и во Христа́ ве́ровавши, и Влади́мира к тому́ подви́гши; не забу́ди у́бо, я́ко прама́ти, на́с, недосто́йных ча́д твои́х, и утверди́ в правове́рии и благоче́стии богоуго́дными твои́ми моли́твами.

Сла́ва Отцу́ и Сы́ну и Свято́му Ду́ху. И ны́не и при́сно и во ве́ки веко́в. Ами́нь.

Глас 3: Зло́бою ожесте́вшая сердца́ на́ша умягчи́, Де́во Пречи́стая, печа́ли на́ша утоли́, я́ко мно́ги ско́рби у Креста́ Сы́на Твоего́ претерпе́вшая, и проше́ния на́ша услы́ши, я́ко Блага́я Скоропослу́шница.

Седален, глас 4:

От Го́спода стопы́ челове́ку исправля́ются; те́м и тебе́, свята́я Ольго, напра́ви сердца́ Испыту́яй и утро́бы к Ца́рствию небе́сному, его́же да не лиши́т и на́с моли́твами твои́ми.

Сла́ва Отцу́ и Сы́ну и Свято́му Ду́ху. И ны́не и при́сно и во ве́ки веко́в. Ами́нь.

Глас 4: Упова́ние христиа́н непосты́дное и стено́ необори́мая, Влады́чице Богоро́дице, не отри́ни моле́ний к Тебе́ прибега́ющих, но, я́ко Блага́я, заступи́ и поми́луй на́с.

Полиеле́й:

Хвали́те И́мя Госпо́дне, хвали́те, раби́ Го́спода.

Аллилу́иа, аллилу́иа, аллилу́иа.

Благослове́н Госпо́дь от Сио́на, живы́й во Иерусали́ме.

Аллилу́иа, аллилу́иа, аллилу́иа.

Испове́дайтеся Го́сподеви, я́ко Благ, я́ко в век ми́лость Его́.

Аллилу́иа, аллилу́иа, аллилу́иа.

Испове́дайтеся Бо́гу Небе́сному, я́ко в век ми́лость Его́.

Аллилу́иа, аллилу́иа, аллилу́иа.

Велича́ние:

Велича́ем тя́, блаже́нная и равноапо́стольная княги́не Ольго, и чте́м святу́ю па́мять твою́, и́долы попра́вшую и мно́гия лю́ди ру́сския святы́м креще́нием просвети́вшую.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа,// сла́ва Тебе́, Бо́же. (Трижды)

Велича́ем тя́, блаже́нная и равноапо́стольная княги́не Ольго, и чте́м святу́ю па́мять твою́, и́долы попра́вшую и мно́гия лю́ди ру́сския святы́м креще́нием просвети́вшую.

Седа́льны:

Глас 5:

Досто́йно равноапо́стольныя цари́цы и́менем нарече́на еси́, блаже́нная, о́ной бо, Кре́ст Христо́в приле́жно взыска́вшей, подража́ла еси́, Христа́ Бо́га и́стиннаго взыска́вши и Кре́ст Того́ на себе́ возло́жши, Его́же моли́ и́го благо́е Креста́ понести́ и на́м, грехи́ обремене́нным, и упова́ние небе́сное улучи́ти.

Глас 5: Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Отны́не ублажа́т Мя́ вси́ ро́ди, — рекла́ еси́, Пречи́стая Де́во, от пра́ведныя Елисаве́т целова́ние прие́мши; те́м у́бо и мы́ от оте́ц на́ших, я́ко Богоро́дицу и Ма́терь Све́та, Тя́ пе́ти научи́хомся.

Степе́нна, глас 4:

От ю́ности моея́/ мно́зи бо́рют мя стра́сти,/ но Сам мя заступи́// и спаси́, Спа́се мой.

Ненави́дящии Сио́на,/ посрами́теся от Го́спода,/ я́ко трава́ бо огне́м// бу́дете изсо́хше.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Святы́м Ду́хом/ вся́ка душа́ живи́тся,/ и чистото́ю возвыша́ется,// светле́ется Тро́йческим еди́нством, священнота́йне.

Го́споди, поми́луй. (Три́жды)

От Матфе́я Свята́го Ева́нгелия чте́ние

Сла́ва, Тебе́, Го́споди, сла́ва Тебе́.

Во вре́мя о́но, не́коим глаго́лющым ко Иису́сови о це́ркви, я́ко ка́мением до́брым и сосу́ды укра́шена, рече́: сия́ я́же ви́дите, прии́дут дни́е, в ня́же не оста́нет ка́мень на ка́мени, и́же не разори́тся. Вопроси́ша же Его́, глаго́люще: Учи́телю, когда́ у́бо сия́ бу́дут? И что есть зна́мение, егда́ хотя́т сия́ бы́ти? Тогда́ глаго́лаше им: воста́нет бо язы́к на язы́к, и ца́рство на ца́рство. Тру́си же вели́цы по ме́стам и гла́ди и па́губы бу́дут, страхова́ния же и зна́мения ве́лия с небесе́ бу́дут. Егда́ же у́зрите обстои́мь Иерусали́м во́и, тогда́ разуме́йте, я́ко прибли́жися запусте́ние ему́. Тогда́ су́щии во Иуде́и да бе́гают в го́ры, и и́же посреде́ его́, да исхо́дят, и и́же во страна́х, да не вхо́дят вонь. Я́ко дни́е отмще́нию си́и суть, я́ко испо́лнитися всему́ пи́санному. Го́ре же иму́щым во утро́бе и доя́щым в ты́я дни, бу́дет бо беда́ ве́лия на земли́ и гнев на лю́дех сих, и паду́т во о́стрии меча́, и плене́ни бу́дут во вся язы́ки, и Иерусали́м бу́дет попира́емь язы́ки, до́ндеже сконча́ются времена́ язы́к.

Псало́м 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя. Я́ко беззако́ние мое́ аз зна́ю и грех мой предо мно́ю есть вы́ну. Тебе́ Еди́ному согреши́х, и лука́вое пред Тобо́ю сотвори́х, я́ко да оправди́шися во словесе́х Твои́х и победи́ши, внегда́ суди́ти Ти. Се бо в беззако́ниих зача́т есмь, и во гресе́х роди́ мя ма́ти моя́. Се бо и́стину возлюби́л еси́, безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся, омы́еши мя, и па́че сне́га убелю́ся. Слу́ху моему́ да́си ра́дость и весе́лие, возра́дуются ко́сти смире́нныя. Отврати́ лице́ Твое́ от грех мои́х, и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́, и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́, и Ду́хом Влады́чним утверди́ мя. Научу́ беззако́нныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́, возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо, всесожже́ния не благоволи́ши. Же́ртва Бо́гу дух сокруше́н, се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския, тогда́ благоволи́ши же́ртву пра́вды, возноше́ние и всесожега́емая: тогда́ возложа́т на олта́рь Твой тельцы́.

Глас 6:

Сла́ва Отцу́ и Сы́ну и Свято́му Ду́ху./ Моли́твами равноапостольныя Ольги, / Ми́лостиве, очи́сти / мно́жества согреше́ний на́ших.

И ны́не и при́сно и во ве́ки веко́в. Ами́нь./ Моли́твами Богоро́дицы, / Ми́лостиве, очи́сти / мно́жества согреше́ний на́ших.

Поми́луй мя, Бо́же,/ по вели́цей ми́лости Твое́й,/ и по мно́жеству щедро́т Твои́х// очи́сти беззако́ние мое́.

Стихи́ра, глас 6

Провозве́стницу ве́ры и ко спасе́нию путеводи́тельницу богоизбра́нную, Ольгу прему́друю восхва́лим и пе́сньми почти́м святу́ю па́мять ея́, мо́лится бо со все́ми святы́ми земли́ на́шея о спасе́нии ду́ш на́ших.

Го́споди, поми́луй. (12 раз)

Кано́н, гла́с 5.

Пе́снь 1.

Ирмос: Велича́ваго фарао́на в мо́ри потопи́вша со ору́жием и вса́дники, Изра́иля же пресла́вно спа́сша и по су́ху прове́дша, пое́м Христа́, я́ко просла́вися.

Припе́в: Равноапостольная княгине Ольго, моли́ Бо́га о на́с.

Вели́чие на́ше и похвала́ ты́ еси́, Ольго богому́драя: тобо́ю бо от и́дольския ле́сти свободи́хомся. Ны́не моли́ся за ро́ды и ро́ды, и́хже Бо́гу привела́ еси́, пою́щи Христа́, я́ко просла́вися.

Велича́ваго диа́вола из Росси́и прогна́ла еси́, нечести́выя куми́ры отню́д сокруши́вши, вся́ лю́ди от беззако́ния свободи́ла еси́, му́дростию науча́ющи пе́ти Христа́, я́ко просла́вися.

Че́рность грехо́вную ба́нею креще́ния отню́д отмы́ла еси́, Христа́ возлюби́ла еси́, Ему́же предстоя́щи, моли́ся за рабы́ твоя́, ве́рно сла́вящия тя́.

Богородичен: Иса́ия Тя́ же́зл нарица́ет, Пречи́стая, Дави́д же Тя́ — престо́л Госпо́день, Авваку́м — приосене́нную го́ру, купину́ же Тя́ — Моисе́й, мы́ же Тя́ Ма́терь Бо́жию нарица́ем.

Пе́снь 3.

Ирмос: Держа́вною руко́ю и си́льным сло́вом не́бо и зе́млю сотвори́л еси́, ю́же Твое́ю кро́вию искупи́л еси́, Це́рковь Твою́, я́же о Тебе́ утвержда́ется, зову́щи: я́ко не́сть свя́т, ра́зве Тебе́, Го́споди.

Держа́вною руко́ю, и му́дрыми словесы́, и си́льным сло́вом учи́ла еси́ твоего́ сы́на зако́ну Христо́ву и лю́дем возбрани́ла еси́ жре́ти и́долом, Ольго пресла́вная, в па́мять твою́ ны́не соше́дшеся, тебе́ прославля́ем.

Ты́, я́ко пчела́, добру́ ра́зуму дале́че цвету́щия Христо́вы ве́ры взыска́ла еси́ и, я́ко поро́дный ме́д, креще́ние в Ца́рствующем гра́де обре́тши, твоему́ гра́ду и лю́дем дарова́ла еси́, его́же вси́ насыще́ны го́рести греха́ отбега́ют.

Ве́сь похва́льный гла́с и мольбу́ ти, Ольго, прино́сим, тобо́ю бо Бо́га позна́хом, Ему́же ны́не предстои́ши, проси́ ми́ра Импера́тору, и на пога́ныя побе́ды, и душа́м на́шим оставле́ния грехо́в, пою́щим тя́, присноблаже́нная.

Богородичен: Прия́телище яви́лася еси́, Де́во, непристу́пнаго Бо́га, те́м Тя́ пою́т непреста́нно Ангельстии чи́ни, повину́ющеся Влады́це. Ты́ бо родила́ еси́ Сло́во Отчее, Собезнача́льное, без отца́: О, чу́до! Святы́й бо Ду́х осени́ Тя.

Седа́лен, гла́с 1.

Крила́ми богоразу́мия впери́вши тво́й у́м, возлете́ла еси́ превы́ше ви́димыя тва́ри, взыска́ющи Творца́ вся́ческих, и, Того́ обре́тши, па́ки порожде́ние креще́нием прия́ла еси́, и дре́ва живо́тнаго — Креста́ Христо́ва насла́ждшися, нетле́нна во ве́ки пребыва́еши, Ольго преблаже́нная.

Слава, и ныне, богородичен:

Ру́це Твои́ боже́ственнии, и́миже Созда́теля понесла́ еси́, Де́во Пресвята́я, вопло́щшагося благосты́нею, просте́рши, умоли́ Его́ изба́вити на́с от искуше́ний, и страсте́й, и бе́д, хва́лящих Тя́ любо́вию и вопию́щих: сла́ва Все́льшемуся в Тя́, сла́ва Проше́дшему из Тебе́, сла́ва Изба́вльшему на́с рождество́м Твои́м.

КрестоБогородичен:

Зря́щи Тя́, Христе́, Всенепоро́чная Ма́ти, ме́ртва на Кресте́ просте́рта, вопия́ше: Сы́не Мо́й, Собезнача́льне Отцу́ и Ду́ху, что́ неизрече́нное Твое́ сие́ смотре́ние, и́мже спа́сл еси́ пречи́стых ру́к Твои́х, Ще́дре, созда́ние?

Пе́снь 4.

Ирмос: Ду́хом Бо́жиим очи́щся проро́к, дыха́ющим в не́м, Авваку́м боже́ственный, боя́ся, глаго́лаше: внегда́ прибли́жатся ле́та, позна́н бу́деши, Бо́же, на спасе́ние челове́ков.

Ду́х Бо́жий почи́ на тебе́, я́ко на Дево́ре проро́чице дре́вле, Имже просвети́вшися, укрепля́ющи Влади́мира, разу́мнаго Сиса́ру — диа́вола низложи́ла еси́ в се́ти его́ креще́нием, я́ко и Вара́ком в пото́це Ки́ссове пре́жде.

Быстрине́ подо́бящися, Ольго богому́драя, сокруше́нным се́рдцем ста́ла, моля́щися к Бо́гу, изба́вила еси́ ро́д твои́х люде́й от оскорбле́ния куми́рскаго и от плене́ния вра́жия свободи́ла еси́, Христа́ призыва́ющи на по́мощь на́шу.

В наро́читый де́нь свята́го твоего́ преставле́ния ра́достно пра́зднуем, пе́снь моле́бную Христу́ возсыла́юще, нетле́нным венце́м венча́вшему тя́, Ольго богому́драя: проси́ на́м оставле́ния грехо́в, сла́вящим тя́ ве́рно.

Богородичен: Тя́, от ко́рене Иессе́ева процве́тшую, Иса́ия я́коже прорече́, Христа́ — Цве́т прозя́бшую, и Первонача́льнаго пло́тию носи́вшую, и Же́зл Бо́жия Ду́ха, хва́лим Тя́, я́ко Бо́жию Ма́терь и Чи́стую Де́ву.

Пе́снь 5

Ирмос: Сло́во Бо́жие Всеси́льное, ми́р всему́ ми́ру посли́ и све́том и́стинным освеща́я и просвеща́я вся́, из но́щи Тя́ сла́вящия.

Яко голуби́ца целому́дренная, на фи́никс доброде́телей возшла́ еси́, криле́ свя́щенне посре́бренне иму́щи, и́миже возлете́вши, в ра́йстей пи́щи возгнезди́лася еси́, сла́вная Ольго.

О тебе́ поя́ше Соломо́н пре́жде: вне́ виногра́да ца́рская ма́слина процвете́; ты́ бо святы́й гре́зн креще́нием в Росси́и насади́ла еси́, творя́щи пло́д покая́ния, о не́мже Са́м Христо́с весели́тся.

Умилосе́рдися, Влады́ко, на новопросвеще́нныя лю́ди Твоя́, не преда́ждь на́с в ру́ки пога́ных за мно́жество беззако́ний на́ших, но моли́твами наста́вницы на́шея Ольги изба́ви ны́ от вся́кия напа́сти.

Богородичен: Кропи́те вси́, я́коже пи́шется, о́блацы весе́лия, земны́м: Бо́жий бо Де́тищь — Христо́с, очища́яй ми́р от грехо́в, воплоти́ся от Де́вы и да́н бы́сть на́м.

Пе́снь 6.

Ирмос: В Це́рковь небе́сную святу́ю Твою́ да прии́дет моли́тва моя́, вопию́ Ти, я́ко Ио́на, из глубины́ се́рдца морска́го: от гре́х мои́х возведи́ мя, молю́ся Тебе́, Го́споди.

Ре́вность Свята́го Ду́ха в се́рдцы прие́мши, оте́ческое злове́рие возненави́дела еси́, и, Христа́ и́стиннаго Бо́га взыска́вши, ча́до све́та яви́лася еси́, и с пе́рвенцы святы́х на небесе́х лику́еши.

Но́вая учени́ца Христо́ва в Росси́и яви́лася еси́, обходя́щи гра́ды и се́ла, куми́ры сокруша́ющи и лю́ди уча́щи еди́ному Бо́гу покланя́тися, Его́же моли́ за пою́щия тя́.

О, богоблаже́нная Ольго, помоли́ся за твоя́ ча́да к Бо́гу: ми́р неподви́жимый Импера́тору на́шему испроси́ и на́м отпуще́ние грехо́в, при́сно тя́ прославля́ющим.

Богородичен: Позна́вше Тобо́ю неопи́санное Сло́во Бо́жие, Сы́на Единоро́днаго Вседержи́телева, вопие́м Ти́, земни́и: ра́дуйся, благослове́нная Богоро́дице, упова́ние ду́ш на́ших.

Конда́к, гла́с 4.

Воспое́м дне́сь Благоде́теля все́х Бо́га, просла́вльшаго в Росси́и Ольгу богому́друю, да моли́твами ея́ пода́ст душа́м на́шим грехо́в оставле́ние.

Пе́снь 7.

Ирмос: Пла́мень пе́щный порабо́тиша благочести́вии о́троцы, те́м свы́ше ороси́ я́, гото́вы пали́мы по естеству́, но па́че естества́ му́жески поя́ху: благослове́н еси́, Го́споди, на престо́ле Сла́вы Ца́рствия Твоего́.

Подо́бно Иуди́фи сотвори́ла еси́, посреде́ куми́рских тели́щ вше́дши, те́х нача́льника сокруши́ла еси́ и демоноче́тцы посрами́ла еси́, вся́ же лю́ди научи́ла еси́ в чистоте́ вопи́ти Христу́: благослове́н еси́, Го́споди, на престо́ле Сла́вы Ца́рствия Твоего́.

Похва́льными цве́ты, а́ки ца́рский вене́ц, богому́дрей твое́й главе́ в па́мять твою́ прино́сим, ю́же Христо́с нетле́нием венча́, Ольго досточу́дная, моли́ся за твое́ ста́до, изба́витися от вся́каго зла́ вопию́щим: благослове́н еси́, Го́споди, на престо́ле Сла́вы Ца́рствия Твоего́.

Лива́нскую ли го́ру нарече́м тя́? На тя́ бо роса́ небе́сная сни́де. Или́ Фисо́н реку́, добре́йший сапфи́р, ка́мень честны́й, Влади́мира иму́щую, и́мже просвети́ся Росси́йская земля́? Но моли́теся за ны́, взыва́юще: благослове́н еси́, Го́споди, на престо́ле Сла́вы Ца́рствия Твоего́.

Богородичен: Киво́т позлаще́н Тя́ Ду́хом имену́ем, спа́сшую ми́р от пото́па разу́мнаго, Де́во, спаси́ на́с, на Тя́ бо наде́емся и к Тебе́ прибега́ем, отча́янныя в пучи́не от гре́х и напа́стей изба́ви, вопию́щия: благослове́н еси́, Го́споди, на престо́ле Сла́вы Ца́рствия Твоего́.

Пе́снь 8.

Ирмос: Кре́пцы о́троцы трие́ су́ще, си́лою обо́лкшеся Святы́я Тро́ицы, улови́ша и победи́ша халде́и, и ди́вно измени́ся естество́: ка́ко о́гнь в ро́су прелага́шеся? Без туги́ я́ сохрани́, я́ко пелена́ми. О, пролия́вый му́дрость на все́х де́лех Твои́х Бо́же, Тя́ превозно́сим во ве́ки.

Крепка́, я́ко льви́ца, си́лою Свята́го Ду́ха оболче́на, еди́на устреми́ся всю́ду истерза́ти куми́ры, и ди́вно на небеси́ и на земли́: ка́ко жена́ пре́жде Бо́га познава́ет, е́юже испе́рва всему́ ро́ду паде́ние бы́сть? То́ю же ны́не спасе́ни, пое́м: О, пролия́вый му́дрость на все́х де́лех Твои́х Бо́же, Тя́ превозно́сим во ве́ки.

Прему́дрость Бо́жия пре́жде о тебе́ написа́ла е́сть: се́ еси́ до́брая моя́ и прекра́сная, и поро́ка не́сть в тебе́. Бле́ск лица́ твоего́, я́ко мѵ́ра обоня́ние, назна́меноваше твое́, Ольго, креще́ние, е́же посреде́ куми́рския ле́сти на тебе́ обоня́ Христо́с и все́х на́с от смра́да де́монского к покая́нию ми́лостию Свое́ю приве́л е́сть.

Помяни́ мене́, госпоже́ Ольго, убо́гаго твоего́ раба́, окра́деннаго от врага́ и согреши́вшаго па́че челове́к, и помоли́ся Христу́ пода́ти ми́ проще́ние о все́х согреше́ниих, я́же нечу́вственно соде́ях, окая́нный, да покая́нием вопию́: О, пролия́вый му́дрость на все́х де́лех Твои́х Бо́же, Тя́ превозно́сим во ве́ки.

Богородичен: Не пре́зри, Де́во, Твои́х ра́б мольбы́, о Тебе́ бо хва́лимся, Твое́ ма́лое ста́до мы́ есмы́, потщи́ся в заступле́ние на́ше и изми́ ны́ от вра́г на́ших, уще́дри зна́ющия Тя́ Ма́терь Бо́жию и Сы́ну Твоему́ вопию́щия: О, пролия́вый му́дрость на все́х де́лех Твои́х Бо́же, Тя́ превозно́сим во ве́ки.

На 9-й песни поем песнь Пресвятыя Богородицы:

Вели́чит душа́ Моя́ Го́спода и возра́довася дух Мой о Бо́зе Спа́се Мое́м.

К коемуждо стиху припеваем: Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Я́ко призре́ на смире́ние рабы́ Своея́, се бо, от ны́не ублажа́т Мя вси ро́ди.

Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Я́ко сотвори́ Мне вели́чие Си́льный, и свя́то и́мя Его́, и ми́лость Его́ в ро́ды родо́в боя́щимся Его́.

Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Сотвори́ держа́ву мы́шцею Свое́ю, расточи́ го́рдыя мы́слию се́рдца их.

Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Низложи́ си́льныя со престо́л, и вознесе́ смире́нныя, а́лчущия испо́лни благ, и богатя́щияся отпусти́ тщи.

Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Восприя́т Изра́иля о́трока Своего́, помяну́ти ми́лости, я́коже глаго́ла ко отце́м на́шим, Авраа́му и се́мени его́ да́же до ве́ка.

Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Песнь 9

Ирмос: Из Еде́ма изы́де ро́д на́ш пра́бабы ра́ди Евы, при́зван же Тобо́ю, ро́ждшею на́м но́ваго Ада́ма — Христа́, во двою́ естеству́, Де́во Чи́стая. Взыгра́ся Ада́м пра́дед, я́ко избы́в пе́рвыя кля́твы, мы́ же Тобо́ю хва́лящеся, я́ко Тебе́ ра́ди Бо́га позна́хом, и Тебе́ велича́ем.

Весели́ся, Ево прароди́тельнице, и́же бо, тя́ прельсти́в, из Еде́ма изведе́, ны́не же попра́н е́сть твои́м исча́дием. Се́ бо Ольга, живо́тное дре́во — Кре́ст Христо́в, в России́ водрузи́, и́мже все́м ве́рным ра́й отве́рзеся, мы́ же хва́лящеся, я́ко тоя́ ра́ди Бо́га позна́хом, со Влади́миром сию́ велича́ем.

Жену́ по естеству́ нарица́ем тя́, но па́че си́лы же́нския подви́глася еси́. Тмы́ твоего́ зла́та истощи́ла еси́, да Христо́в зако́н и учи́теля приобря́щеши, и́мже просвети́ла еси́ зе́млю Росси́йскую, мы́ же тобо́ю хва́лящеся, я́ко тебе́ ра́ди Бо́га позна́хом, с му́ченики тя́ велича́ем.

Зако́на наста́внице чи́стая и учи́тельнице ве́ры Христо́вы, приими́ похвалу́ от ра́б недосто́йных и моли́тву о на́с сотвори́ к Бо́гу, че́стно творя́щих твою́ па́мять, да от напа́стей, и бе́д, и печа́лей, и лю́тых грехо́в свободи́мся, еще́ же и му́к, жду́щих на́с, изба́ви, мо́лимся ти́, тебе́ непреста́нно велича́ющии.

Богородичен: Се́ Це́рковь, се́ две́рь, се́ Бо́жия гора́ свята́я, се́ же́зл и сосу́д зла́т, се́ исто́чник печа́тан, се́ ра́й святы́й но́ваго Ада́ма, се́ престо́л стра́шный, се́ Ма́ти Бо́жия Пречи́стая, Засту́пница все́х на́с, пою́щих Ю.

Свети́лен:

Избе́гла еси́ ко́зней врага́ иско́ннаго, возгнуша́вшися всея́ его́ и ми́ра сего́ пре́лести, и прешла́ еси́ в небе́сныя черто́ги, иде́же ны́не лику́еши со все́ми преподо́бными.

Сла́ва, и ны́не, Богородичен:

Богоро́дице Де́во, неве́дущии Тя́ не и́мут ви́дети Све́та, ро́ждшагося из Тебе́, Пречи́стая.

Хвали́тны псалмы́, глас 3:

Вся́кое дыха́ние да хва́лит Го́спода./ Хвали́те Го́спода с небе́с,/ хвали́те Его́ в вы́шних.// Тебе́ подоба́ет песнь Бо́гу.

Хвали́те Его́ вси а́нгели Его́,/ хвали́те Его́ вся си́лы Его́.// Тебе́ подоба́ет песнь Бо́гу.

Сти́хиры, глас 3:

Стих: Сотвори́ти в них суд напи́сан/ сла́ва сия́ бу́дет всем преподо́бным Его́.

Восхва́лим, о бра́тие, / Спа́са на́шего и Го́спода / за превели́кая благодея́ния Его́: / То́й бо, Человеколю́бец сы́й, / в се́рдце прама́тере на́шея Ольги / вложи́ о́гнь любве́ Боже́ственныя / и по не́й в земли́ на́шей / яви́ се́яния Своего́ плоды́ пребога́тыя: / в князе́х на́ших — к Ца́рствию го́рнему вожди́ неле́стныя, / во архиере́ех — наста́вники му́дрыя ко спасе́нию / и во вся́ком ли́це преподо́бных — столпы́ ве́ры и благоче́стия, / и́хже моли́твами спаса́ет от сме́рти ду́ши на́ша.

Стих: Хвали́те Его́ на си́лах Его́,/ хвали́те Его́ по мно́жеству вели́чествия Его́.

Восхва́лим, о бра́тие, / Спа́са на́шего и Го́спода / за превели́кая благодея́ния Его́: / То́й бо, Человеколю́бец сы́й, / в се́рдце прама́тере на́шея Ольги / вложи́ о́гнь любве́ Боже́ственныя / и по не́й в земли́ на́шей / яви́ се́яния Своего́ плоды́ пребога́тыя: / в князе́х на́ших — к Ца́рствию го́рнему вожди́ неле́стныя, / во архиере́ех — наста́вники му́дрыя ко спасе́нию / и во вся́ком ли́це преподо́бных — столпы́ ве́ры и благоче́стия, / и́хже моли́твами спаса́ет от сме́рти ду́ши на́ша.

Стих: Хвали́те Его́ в тимпа́не и ли́це,/ хвали́те Его́ во стру́нах и орга́не.

Воспо́йте Го́сподеви пе́снь но́ву, / дубра́вы и до́ли земли́ Ру́сския, / в па́мять наста́вницы на́шея, / и воскли́кните Бо́гу гла́сом ра́дования, / го́ры и хо́лми, и́дольскими же́ртвами дре́вле оскверни́вшиися / и поги́бели оте́ц на́ших служи́вшии, / ны́не же росо́ю благода́ти Творца́ Своего́ окропи́вшиися, / и Кресто́м Сы́на Его́ осене́ннии, / и спокло́ншиися с на́ми Спаса́ющему ду́ши на́ша.

Стих: Хвали́те Его́ в кимва́лех доброгла́сных, хвали́те Его́ в кимва́лех восклица́ния. / Вся́кое дыха́ние да хва́лит Го́спода.

По грехо́м на́шим умно́жишася в на́с безу́мнии, / и́же не то́кмо глаго́лют в сердца́х свои́х — не́сть Бо́г, / но и пропове́дуют на́м уче́ния поги́бельная и развраще́нная, / малоду́шныя от Святы́я Це́ркве отторга́ющая, / оба́че от си́х, моли́твами блаже́нныя Ольги, / да спасе́т Госпо́дь ду́ши на́ша.

Глас 8: Сла́ва Отцу́ и Сы́ну и Свято́му Ду́ху

О, ма́ти на́ша возлю́бленная! Рцы́ на́м, ка́ко благода́тию Вы́шняго вся́ ко́зни вра́жия препобеди́ла еси́, да и мы́, тобо́ю науче́ннии, иску́сни яви́мся спаса́ти ду́ши на́ша.

Глас 8: И ны́не и при́сно и во ве́ки веко́в. Ами́нь.

Богоро́дице, Ма́ти Безневе́стная, Ты́ на́м прибе́жище и си́ла, Ты́ еси́ упова́ние на́ше и стена́ неруши́мая, не отве́ржи на́с от Твоего́ лица́, но моли́ Сы́на Твоего́ и Бо́га на́шего, да спасе́т Тобо́ю ду́ши на́ша.

Славосло́вие вели́кое:

Сла́ва в вы́шних Бо́гу, и на земли́ мир, в челове́цех благоволе́ние. Хва́лим Тя, благослови́м Тя, кла́няем Ти ся, славосло́вим Тя, благодари́м Тя, вели́кия ра́ди сла́вы Твоея́. Го́споди Царю́ Небе́сный, Бо́же О́тче Вседержи́телю, Го́споди, Сы́не Единоро́дный, Иису́се Христе́, и Святы́й Ду́ше. Го́споди Бо́же, А́гнче Бо́жий, Сы́не Оте́чь, взе́мляй грех ми́ра, поми́луй нас; взе́мляй грехи́ ми́ра, приими́ моли́тву на́шу; седя́й одесну́ю Отца́, поми́луй нас. Я́ко Ты еси́ еди́н Свят, Ты еси́ еди́н Госпо́дь, Иису́с Христо́с, в сла́ву Бо́га Отца́. Ами́нь.

На всяк день благословлю́ Тя, и восхвалю́ И́мя Твое́ во ве́ки, и в век ве́ка.

Сподо́би, Го́споди, в день сей без греха́ сохрани́тися нам. Благослове́н еси́, Го́споди, Бо́же оте́ц на́ших, и хва́льно и просла́влено И́мя Твое́ во ве́ки. Ами́нь.

Бу́ди, Го́споди, ми́лость Твоя́ на нас, я́коже упова́хом на Тя.

Благослове́н еси́, Го́споди, научи́ мя оправда́нием Твои́м. (Три́жды)

Го́споди, прибе́жище был еси́ нам в род и род. Аз рех: Го́споди, поми́луй мя, исцели́ ду́шу мою́, я́ко согреши́х Тебе́. Го́споди, к Тебе́ прибего́х, научи́ мя твори́ти во́лю Твою́, я́ко Ты еси́ Бог мой: я́ко у Тебе́ исто́чник живота́, во све́те Твое́м у́зрим свет. Проба́ви ми́лость Твою́ ве́дущим Тя.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Три́жды)

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Святы́й Безсме́ртный, поми́луй нас.

Святы́й Бо́же, Святы́й Кре́пкий, Святы́й Безсме́ртный, поми́луй нас.

Тропа́рь, глас 1:

Крила́ми богоразу́мия впери́вши тво́й у́м, возлете́ла еси́ превы́ше ви́димыя тва́ри, взыска́вши Бо́га и Творца́ вся́ческих, и, Того́ обре́тши, па́ки рожде́ние креще́нием прия́ла еси́, дре́ва живо́тнаго наслажда́ющися, нетле́нна во ве́ки пребыва́еши, Ольго присносла́вная.

Утверди́, Бо́же, святу́ю правосла́вную ве́ру, правосла́вных христиа́н во век ве́ка.

Честне́йшую Херуви́м и Сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу, Тя велича́ем.

Сла́ва, и ны́не. Го́споди, поми́луй. (Три́жды) Благослови́.

Господи Иисусе Христе, Сыне Божий, моли́твами Пречи́стыя Своея́ Ма́тере, равноапостольной княгини Ольги, преподобных и богоносных отец наших и всех святы́х, поми́луй и спаси нас я́ко Благ и Челове́колюбец.

Многоле́тие:

Вели́каго Господи́на и Отца́ на́шего Кири́лла,/ Святе́йшаго Патри́арха Моско́вского и всея́ Руси́,/ и Господи́на на́шего (Высоко-) Преосвяще́ннейшаго (имярек),/ (архи-)епи́скопа (митрополита (титул)),/ богохрани́мую страну́ на́шу Росси́йскую,/  и вся правосла́вныя христи́аны,// Го́споди, сохрани́ их на мно́гая ле́та.