Шрифт

▲

Богослужебные тексты для домашнего употребления

Дни памяти святых

Последование Всеношного бдения в день памяти святых Царственных страстотерпцев. Для домашнего (келейного) совершения

Оглавление

ВСЕНО́ЩНОЕ БДЕ́НИЕ

ВЕЛИ́КАЯ ВЕЧЕ́РНЯ

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас. Ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Трижды.)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, (трижды). Сла́ва, и ны́не:

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Таже, Го́споди, поми́луй, (12), Сла́ва, и ны́не:

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 103:

Поется часть псалма:

Благослови́, душе́ моя́, Го́спода. / Благослове́н еси́, Го́споди. / Го́споди, Бо́же мой, возвели́чился еси́ зело́. / Благослове́н еси́, Го́споди. / Во испове́дание и в велеле́поту обле́клся еси́. / Благослове́н еси́, Го́споди. / Посреде́ гор про́йдут во́ды. / Ди́вна дела́ Твоя́, Го́споди. / Вся прему́дростию сотвори́л еси́. / Сла́ва Ти, Го́споди, сотвори́вшему вся.

Или читается псалом полностью:

Благослови́, душе́ моя́, Го́спода. Го́споди, Бо́же мой, возвели́чился еси́ зело́. Во испове́дание и в велеле́поту обле́клся еси́. Одея́йся све́том, я́ко ри́зою, простира́яй не́бо, я́ко ко́жу. Покрыва́яй вода́ми превы́спренняя Своя́, полага́яй о́блаки на восхожде́ние Свое́, ходя́й на крилу́ ве́треню. Творя́й А́нгелы Своя́ ду́хи и слуги́ Своя́ пла́мень о́гненный. Основа́яй зе́млю на тве́рди ея́, не преклони́тся в век ве́ка. Бе́здна, я́ко ри́за, одея́ние ея́, на гора́х ста́нут во́ды, от запреще́ния Твоего́ побе́гнут, от гла́са гро́ма Твоего́ убоя́тся. Восхо́дят го́ры и нисхо́дят поля́ в ме́сто, е́же основа́л еси́ им. Преде́л положи́л еси́, eго́же не пре́йдут, ниже́ обратя́тся покры́ти зе́млю. Посыла́яй исто́чники в де́брех, посреде́ гор про́йдут во́ды. Напая́ют вся зве́ри се́льныя, ждут она́гри в жа́жду свою́. На ты́х пти́цы небе́сныя привита́ют, от среды́ ка́мения дадя́т глас. Напая́яй го́ры от превы́спренних Свои́х, от плода́ дел Твои́х насы́тится земля́. Прозяба́яй траву́ ското́м, и злак на слу́жбу челове́ком, извести́ хлеб от земли́. И вино́ весели́т се́рдце челове́ка, ума́стити лице́ еле́ем, и хлеб се́рдце челове́ка укрепи́т. Насы́тятся древа́ польска́я, ке́дри Лива́нстии, и́хже еси́ насади́л. Та́мо пти́цы вогнездя́тся, ероди́ево жили́ще предводи́тельствует и́ми. Го́ры высо́кия еле́нем, ка́мень прибе́жище за́яцем. Сотвори́л есть луну́ во времена́, со́лнце позна́ за́пад свой. Положи́л еси́ тму, и бысть нощь, в не́йже про́йдут вси зве́рие дубра́внии. Ски́мни рыка́ющии, восхи́тити и взыска́ти от Бо́га пи́щу себе́. Возсия́ со́лнце и собра́шася и в ло́жах свои́х ля́гут. Изы́дет челове́к на де́ло свое́ и на де́лание свое́ до ве́чера. Я́ко возвели́чишася дела́ Твоя́, Го́споди, вся прему́дростию сотвори́л еси́, испо́лнися земля́ тва́ри Твоея́. Сие́ мо́ре вели́кое и простра́нное, та́мо га́ди, и́мже несть числа́, живо́тная ма́лая с вели́кими, та́мо корабли́ препла́вают, змий сей, eго́же созда́л еси руга́тися eму́. Вся к Тебе́ ча́ют, да́ти пи́щу им во бла́го вре́мя. Да́вшу Тебе́ им соберу́т, отве́рзшу Тебе́ ру́ку вся́ческая испо́лнятся бла́гости, отвра́щшу же Тебе́ лице́, возмяту́тся, отъи́меши дух их, и исче́знут, и в персть свою́ возвратя́тся. По́слеши Ду́ха Твоего́, и сози́ждутся, и обнови́ши лице́ земли́. Бу́ди сла́ва Госпо́дня во ве́ки, возвесели́тся Госпо́дь о де́лех Свои́х, призира́яй на зе́млю, и творя́й ю́ трясти́ся, прикаса́яйся гора́м, и дымя́тся. Воспою́ Го́сподеви в животе́ мое́м, пою́ Бо́гу моему́, до́ндеже есмь, да услади́тся Ему́ бесе́да моя́, аз же возвеселю́ся о Го́споде. Да исче́знут гре́шницы от земли́, и беззако́нницы, я́коже не бы́ти им. Благослови́, душе́ моя́, Го́спода.

Со́лнце позна́ за́пад свой. Положи́л еси́ тму, и бысть нощь. Я́ко возвели́чишася дела́ Твоя́, Го́споди, вся прему́дростию сотвори́л еси́.

Сла́ва, и ны́не: Аллилу́иа, аллилу́иа, аллилу́иа, сла́ва Тебе́ Бо́же. Трижды.

Блаже́н муж:

Блаже́н муж, и́же не и́де на сове́т нечести́вых.

Аллилу́иа, аллилу́иа, аллилу́иа.

Я́ко весть Госпо́дь путь пра́ведных, и путь нечести́вых поги́бнет.

Аллилу́иа, аллилу́иа, аллилу́иа.

Рабо́тайте Го́сподеви со стра́хом и ра́дуйтеся Ему́ с тре́петом.

Аллилу́иа, аллилу́иа, аллилу́иа.

Блаже́ни вси наде́ющиися Нань.

Аллилу́иа, аллилу́иа, аллилу́иа.

Воскресни́, Го́споди, спаси́ мя, Бо́же мой.

Аллилу́иа, аллилу́иа, аллилу́иа.

Госпо́дне есть спасе́ние, и на лю́дех Твои́х благослове́ние Твое́.

Аллилу́иа, аллилу́иа, аллилу́иа.

Сла́ва Отцу́ и Сы́ну и Свято́му Духу.

Аллилу́иа, аллилу́иа, аллилу́иа.

И ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Го́споди, воззва́х, глас 6:

Го́споди, воззва́х к Тебе́, услы́ши мя./ Услы́ши мя, Го́споди./ Го́споди, воззва́х к Тебе́, услы́ши мя:/ вонми́ гла́су моле́ния моего́,/ внегда́ воззва́ти ми к Тебе́.// Услы́ши мя, Го́споди.

Да испра́вится моли́тва моя́,/ я́ко кади́ло пред Тобо́ю,/ воздея́ние руку́ мое́ю/ – же́ртва вече́рняя.// Услы́ши мя, Го́споди.

Стихи́ры пра́здника, глас 6:

Стих: А́ще беззако́ния на́зриши, Го́споди, Го́споди, кто постои́т? Я́ко у Тебе́ очище́ние есть.

Яже издре́вле Свята́я Ру́сь / егда́ нача́т отступа́ти от Созда́теля и Бо́га своего́, / долготерпели́вый Госпо́дь посла́ мно́гия пра́ведныя му́жи и проро́ки, / от ни́хже после́дний бы́сть святы́й пра́ведный па́стырь Кроншта́дтский Иоа́нн, / призыва́я гре́шныя к покая́нию, / и возвеща́я гне́в Госпо́день на нераска́явшихся, / но не послу́ша си́х наро́д. / Тогда́ предаде́ Бо́г пре́жде благочести́вую зе́млю Ру́сскую ве́лиим гоне́нием на ве́ру, / я́ко да гре́шныя вразуми́т, / ве́рныя же возвели́чит и просла́вит / чрез терпе́ние, страда́ния и сме́рть за Христа́, / явля́я со́нм святы́х новому́чеников, / от ни́хже вели́кий бы́сть страстоте́рпец ца́рь му́ченик Никола́й / с цари́цею и ча́ды и слуги́, / я́же ны́не мо́лятся о душа́х на́ших.

Стих: И́мене ра́ди Твоего́ потерпе́х Тя, Го́споди, потерпе́ душа́ моя́ в сло́во Твое́, упова́ душа́ моя́ на Го́спода.

Глас 2: Егда́ ты́, царю́ му́чениче, / от богобо́рцев заключе́н бы́в, / ве́лию ра́дость с цари́цею и ча́ды име́л еси́, / егда́ служи́тель Бо́жий посеща́ше тя́, / слу́жбу Бо́жию соверша́я. / Такова́ благочести́ваго царя́ и Пома́занника Бо́жия / мно́жайшии от наро́да отврати́шася, / я́ко забы́ша сло́во Бо́жие, / призыва́ющее почита́ти царя́, / и прии́де на вся́ ны́ гне́в Бо́жий. / Сего́ ра́ди в покая́нии зове́м: / Го́споди, пода́ждь стра́ждущей стране́ Росси́йстей, / предста́тельством вели́каго страстоте́рпца царя́ му́ченика / от богобо́рных избавле́ние / и возставле́ние престо́ла правосла́вных царе́й.

Стих: От стра́жи у́тренния до но́щи, от стра́жи у́тренния да упова́ет Изра́иль на Го́спода.

Воспева́ем тя́, царю́ му́чениче, / и многострада́льный страстоте́рпче, / поне́же все́х в се́рдце свое́м вмеща́л еси́, / я́коже Па́вел апо́стол, / а́лчущаго насыща́я, / скорбя́щаго утеша́я, и стра́ждущему соскорбя́, / о заблужда́ющих печа́луя, / осужде́ннаго злоде́я ми́луя, / клевету́ и непра́вду кро́тко снося́, / о ве́ре и благоче́стии ревну́я, / сла́ву и бога́тство ми́ра сего́ нивочто́же вменя́я, / па́че же отягоща́яся и́ми, / попече́ние о ми́ре всего́ ми́ра име́я, / любо́вию ко все́м пламене́я. / Приими́ и на́с в се́рдце твое́, / о многострада́льный царю́ и вели́кий страстоте́рпче, / и моли́ ми́лостиваго Бо́га, да поми́лует на́с, / и пода́ст на́м кре́пость подража́тели твои́ бы́ти.

Стих: Я́ко у Го́спода ми́лость, и мно́гое у Него́ избавле́ние, и Той изба́вит Изра́иля от всех беззако́ний eго́.

Глас 6: Боговенча́нная му́ченице, свята́я цари́це Алекса́ндро, / кто́ изрече́т твое́ вои́стину ева́нгельское житие́? / Прешла́ еси́ от инове́рия к ве́ре правосла́вней, / ю́же восприя́ла еси́ все́м се́рдцем твои́м, / возлюби́вши моли́тву, хра́м и свята́я та́инства, / еще́ же поуче́ния святы́х оте́ц, / возрасти́вши ча́да твоя́ во благоче́стии, / и уготовля́ющи и́х к муче́нию за Христа́, / терпя́щи кро́тко клевету́ забы́вших Бо́га, / и не разумева́ющих и́стиннаго благоче́стия твоего́, / сего́ ра́ди мо́лим тя́, / моли́ Христа́ Бо́га, Его́же возлюби́ла еси́, / да спасе́т ду́ши на́ша.

Стих: Хвали́те Го́спода вси язы́цы, похвали́те Его́ вси лю́дие.

Ве́лия ве́ра твоя́, / свята́я му́ченице цари́це Алекса́ндро, / в го́рцем заточе́нии от богобо́рцев бы́вши, / и ча́ющи му́ченическия сме́рти, / глаго́лала еси́ си́це: / да угото́вим себе́ к сре́тению небе́снаго Жениха́, / Бо́г исполня́ет и озаря́ет ду́шу мою́ неизглаго́ланною ра́достию и тишино́ю, / душа́ моя́ лику́ет, / разуме́ющи, я́ко Жени́х приближа́ется, / душа́ моя́ трепе́щет, я́ко Бо́г бли́з е́сть, / да про́сим у Го́спода себе́ и всему́ ми́ру грехо́в проще́ния, / помо́лимся о забыва́ющих моли́тися и о все́х лю́дех. / Исхода́тайствуй, свята́я му́ченице, и на́м грехо́в проще́ние, / и ве́лию ми́лость.

Стих: Я́ко утверди́ся ми́лость Его́ на нас, и и́стина Госпо́дня пребыва́ет во век.

Святы́й му́ченик царе́вичь Алекси́й, / возлюби́ си́лу кре́стную. / Сия́ ве́ра кре́стная помо́же ему́ / без ропта́ния понести́ страда́льческий кре́ст неизце́льнаго неду́га / чрез всю́ его́ маловре́менную жи́знь, / и с терпе́нием и упова́нием прия́ти му́ченическую кончи́ну за Христа́. / И ны́не на небесе́х моли́ся о на́с, / ве́рою и любо́вию соверша́ющих па́мять твою́, / да пода́ст и на́м Госпо́дь, / ве́ру и терпе́ние и любо́вь.

Глас 8: Сла́ва Отцу́ и Сы́ну и Свято́му Ду́ху.

Богоизбра́нная преподобному́ченице княги́не Елисаве́то, / егда́ бу́ря безбо́жия на зе́млю Ру́сскую на́йде, / сия́ глаго́лала еси́: / я́коже в бу́ри есте́ственней быва́ют: / не́цыи бегу́т, ини́и поража́ются, / ине́м же о́чи душе́внии открыва́ются, / да ви́дят вели́чие Бо́жие, / та́ко и в ви́хре жите́йстем приключа́ются, / душа́ бо твоя́ в потрясе́ниих узре́ десни́цу Бо́жию: / лю́тое убие́ние твоего́ му́жа / приведе́ тя́ к служе́нию Бо́гу и бли́жним: / немощны́м, оста́вленным и уве́чным служи́ла еси́ со смире́нием и любо́вию, / еще́ же восприя́ла еси́ и́ноческое житие́, / и бежа́ти от богобо́рцев не восхоте́ла еси́, / без стра́ха прии́мши му́ченическую сме́рть за Христа́. / Мы́ же почита́юще благоуха́нныя мо́щи твоя́, / усе́рдно про́сим: / моли́ о чту́щих твоя́ по́двиги и страда́ния.

Глас 8: И ны́не и при́сно и во ве́ки веко́в. Ами́нь.

Ца́рь Небе́сный за человеколю́бие на земли́ яви́ся, / и с челове́ки поживе́, / от Де́вы бо чи́стыя пло́ть прие́мый, / и из Нея́ проше́дый с восприя́тием, / Еди́н е́сть Сы́н, сугу́б естество́м, / но не Ипоста́сию. / Те́мже соверше́нна Того́ Бо́га, / и соверше́нна Челове́ка вои́стинну пропове́дающе, / испове́дуем Христа́ Бо́га на́шего: / Его́же моли́, Ма́ти безневе́стная, / поми́ловатися душа́м на́шим.

Све́те Тихи́й:

Све́те Ти́хий святы́я сла́вы Безсме́ртнаго Отца́ Небе́снаго, Свята́го, Блаже́ннаго, Иису́се Христе́! Прише́дше на за́пад со́лнца, ви́девше свет вече́рний, пое́м Отца́, Сы́на и Свята́го Ду́ха, Бо́га. Досто́ин еси́ во вся времена́ пет бы́ти гла́сы преподо́бными, Сы́не Бо́жий, живо́т дая́й; те́мже мир Тя сла́вит.

1. Прему́дрости Соломо́новы чте́ние

Пра́ведных ду́ши в руце́ Бо́жией, и не прико́снется и́х му́ка. Непщева́ни бы́ша во очесе́х безу́мных умре́ти, и вмени́ся озлобле́ние исхо́д и́х, и е́же от на́с ше́ствие сокруше́ние; они́ же су́ть в ми́ре. Ибо пред лице́м челове́ческим а́ще и му́ку прии́мут, упова́ние и́х безсме́ртия испо́лнено. И вма́ле нака́зани бы́вше, вели́кими благоде́тельствовани бу́дут, я́ко Бо́г искуси́ я́ и обре́те и́х досто́йны Себе́. Яко зла́то в горни́ле, искуси́ и́х и, я́ко всепло́дие же́ртвенное, прия́т я́. И во вре́мя посеще́ния и́х возсия́ют и, я́ко и́скры по сте́блию, потеку́т: су́дят язы́ком и облада́ют людьми́, и воцари́тся Госпо́дь в ни́х во ве́ки. Наде́ющиися На́нь разуме́ют и́стину и ве́рнии в любви́ пребу́дут Ему́, я́ко благода́ть и ми́лость в преподо́бных Его́ и посеще́ние во избра́нных Его́.

2. Царств третиих чтение

Ста́ Соломо́н пред лице́м олтаря́ Госпо́дня, пред все́м собо́ром Изра́илевым, и воздви́же ру́це свои́ на не́бо, и рече́: Го́споди Бо́же Изра́илев, не́сть я́коже Ты́ Бо́г на небеси́ горе́, и на земли́ ни́зу. Аще не́бо, и не́бо небесе́ не довле́ют Ти́, кольми́ па́че хра́м се́й, его́же созда́х Имени Твоему́? и да при́зриши на моли́тву мою́, Го́споди Бо́же Изра́илев, послу́шати моли́твы, е́юже мо́лится ра́б Тво́й пред Тобо́ю к Тебе́ дне́сь: Да бу́дут о́чи Твои́ отве́рсты на хра́м се́й де́нь и но́щь, на ме́сто сие́, о не́мже ре́кл еси́: бу́дет Имя Мое́ та́мо, на услы́шание моли́твы, е́юже мо́лится ра́б Тво́й на ме́сте се́м де́нь и но́щь. И услы́шиши моли́тву раба́ Твоего́ и люде́й Твои́х Изра́иля, о ни́хже помо́лятся на ме́сте се́м, и Ты́ услы́шиши на ме́сте обита́лища Твоего́ на небеси́, и сотвори́ши и поми́луеши.

3. Проро́чества Иса́иина чте́ние

Да возра́дуется душа́ моя́ о Го́споде, облече́ бо мя́ в ри́зу спасе́ния, и оде́ждею весе́лия оде́я мя́, я́ко жениху́ возложи́ мне́ вене́ц, и я́ко неве́сту украси́ мя красото́ю. И я́ко земля́ растя́щая цве́т сво́й, и я́ко вертогра́д се́мена своя́ прозяба́ет: та́ко возрасти́т Госпо́дь пра́вду, и весе́лие пред все́ми язы́ки. Сио́на ра́ди не умолчу́, и Иерусали́ма ра́ди не попущу́, до́ндеже изы́дет я́ко све́т пра́вда моя́, и спасе́ние мое́ я́ко свети́ло разжже́тся. И у́зрят язы́цы пра́вду Твою́, и ца́рие сла́ву Твою́, и прозову́т Тя́ и́менем но́вым, и́мже Госпо́дь имену́ет е́. И бу́деши вене́ц добро́ты в руце́ Госпо́дни, и диади́ма ца́рствия в руце́ Бо́га Твоего́. И прозове́шися ктому́ оста́влен, и земля́ твоя́ ктому́ не нарече́тся пуста́: тебе́ бо прозове́тся во́ля моя́, и земля́ твоя́ вселе́нная, я́ко благоволи́ Госпо́дь в тебе́, и земля́ твоя́ вку́пе насели́тся. И я́коже живя́й ю́ноша с де́вою, та́ко поживу́т сы́нове твои́ с тобо́ю. И бу́дет, я́коже ра́дуется жени́х о неве́сте, та́ко возра́дуется Госпо́дь о тебе́.

Сподо́би, Го́споди:

Сподо́би, Го́споди, в ве́чер сей без греха́ сохрани́тися нам. Благослове́н еси́, Го́споди, Бо́же оте́ц на́ших, и хва́льно и просла́влено и́мя Твое́ во ве́ки. Ами́нь.

Бу́ди, Го́споди, ми́лость Твоя́ на нас, я́коже упова́хом на Тя. Благослове́н еси́, Го́споди, научи́ мя оправда́нием Твои́м. Благослове́н еси́, Влады́ко, вразуми́ мя оправда́нием Твои́м. Благослове́н еси́, Святы́й, просвети́ мя оправда́нии Твои́ми.

Го́споди, ми́лость Твоя́ во век, дел руку́ Твое́ю не пре́зри. Тебе́ подоба́ет хвала́, Тебе́ подоба́ет пе́ние, Тебе́ сла́ва подоба́ет. Отцу́ и Сы́ну и Свято́му Ду́ху, ны́не и при́сно и во ве́ки веко́в. Ами́нь.

На лити́и стихи́ра, гла́с 3:

Сла́ва и́стинная страда́ние е́сть, / та́ко бо рече́ Госпо́дь: / ны́не просла́вися Сы́н Челове́ческий, / сла́вою Свое́ю на кресте́ страда́ние имену́я. / Сея́ кре́стныя сла́вы сподо́бишася ца́рственнии му́ченицы, / и́же подража́ша страсте́м Спа́совым, / сего́ ра́ди возлюби́ и́х Христо́с, / и возвели́чи на небесе́х, / да мо́лятся о душа́х на́ших.

Сла́ва, гла́с 8: Сла́ва и́стинная страда́ние е́сть, / та́ко бо рече́ Госпо́дь: / ны́не просла́вися Сы́н Челове́ческий, / сла́вою Свое́ю на кресте́ страда́ние имену́я. / Сея́ кре́стныя сла́вы сподо́бишася ца́рственнии му́ченицы, / и́же подража́ша страсте́м Спа́совым, / сего́ ра́ди возлюби́ и́х Христо́с, / и возвели́чи на небесе́х, / да мо́лятся о душа́х на́ших.

И ны́не, богоро́дичен, гла́с то́йже: Безневе́стная Де́во, / Яже Бо́га неизрече́нно заче́нши пло́тию, / Ма́ти Бо́га Вы́шняго, / Твои́х рабо́в мольбы́ приими́, Всенепоро́чная, / все́м подаю́щи очище́ние прегреше́ний, / ны́не на́ша моле́ния прие́млющи, / моли́ спасти́ся все́м на́м.

Го́споди, поми́луй. (40 раз)

Стихи́ры на стихо́вне:

Стихиры, гла́с 8:

Не о сла́ве ца́рства земна́го попече́ние име́л еси́, / сла́вный му́чениче царю́ Нико́лае, / егда́ венча́ние на ца́рство и мѵ́ром пома́зание восприя́л еси́, / но помышля́л еси́ о сла́ве Бо́жией и о Ца́рстве небе́сном, / в моли́тве пред наро́дом глаго́ля: / Влады́ко мо́й и Го́споди, / наста́ви мя́ и вразуми́ в вели́ком служе́нии се́м, / да бу́дет со мно́ю Твоя́ боже́ственная прему́дрость, / посли́ ю́ с небе́с святы́х Твои́х, / да разуме́ю, что́ е́сть уго́дно пред очи́ма Твои́ма, / и что́ е́сть пра́во по за́поведем Твои́м, / бу́ди се́рдце мое́ Тобо́ю упра́влено, / е́же вся́ устро́ити ко сла́ве Твое́й, / и к по́льзе душе́вней вруче́нных мне́ люде́й. / Сия́ моли́тва уго́дна бы́сть пред Бо́гом, / и ны́не, я́ко му́ченик, не преста́й моли́ти Бо́га о по́льзе душе́вней твои́х люде́й, / я́ко да ми́лостив бу́дет к ни́м, / подая́ на́м оставле́ние грехо́в, / ми́р и ве́лию ми́лость.

Сти́х: Вознесо́х избра́ннаго от люде́й Мои́х.

Яко а́гнец незло́бивый, / веде́н бы́сть ца́рь му́ченик Никола́й на убие́ние, / с цари́цею, и ча́ды, и ве́рными слуги́, / и име́я ду́шу чи́сту, / вверя́я себе́ и при́сных Бо́гу, никогда́ же поропта́в, / прия́т же кро́тко сме́рть за Христа́. / И ны́не предстоя́ со Ангелы и вели́ким со́нмом новому́ченик на небесе́х, / мо́лит о спасе́нии страны́ Росси́йския от лю́тых безбо́жник, / да обратя́тся к Бо́гу вси́ отступи́вшия от Него́, / да утверди́тся стра́х Бо́жий в сердца́х, / и да возсия́ет па́ки ве́ра Христо́ва.

Сти́х: Еле́ем святы́м Мои́м пома́зах его́.

Сия́ испове́даху святи́и ца́рственнии му́ченицы / пред непови́нною сме́ртию за Христа́, / повторя́юще святооте́ческое завеща́ние: / му́ченицы дре́внии, и́же ве́роваху в Го́спода Иису́са Христа́, / на сме́рть идя́ху я́ко на пра́здник, / окрыли́вше у́м и се́рдце ве́рою, / осужде́ни же на сме́рть ду́х ми́рен име́яху, / и́же и́х не оставля́ше никогда́же, / ми́рно бо на сме́рть идя́ху, / вни́ти во ину́ю жи́знь духо́вную упова́юще, / я́же отверза́ется за гро́бом. / Де́лом сия́ словеса́ испыта́вше, / ны́не святи́и ца́рственнии му́ченицы ра́дуются со Христо́м на небесе́х, / со дерзнове́нием моля́щеся о душа́х на́ших.

Слава, гла́с 6:

Кто́ изрече́т труды́ твоя́ и страда́ния? / Страстоте́рпче вели́кий и му́чениче царю́ Нико́лае, / тя́жкое бре́мя вла́сти восприя́л еси́, / не сла́вы ра́ди, / но я́ко христиа́нский ца́рь и слуга́ Христо́в, / пеки́йся о по́льзе наро́да, / мно́жество скорбе́й претерпе́в. / Вся́ сия́ попусти́ Госпо́дь за грехи́ наро́да, / и да яви́т благоче́стие твое́, / показу́я ми́ру терпе́ние твое́, / я́ко многострада́льнаго Иова, / да получи́ши сла́вный му́ченический вене́ц на небесе́х, / Авелеву венцу́ подо́бный, / иде́же ны́не лику́я со Ангелы, / предста́тельствуеши за ны́ пред Бо́гом, / моля́ся о спасе́нии ду́ш на́ших.

И ны́не, Богоро́дичен:

Творе́ц и Изба́витель мо́й, Пречи́стая, / Христо́с Госпо́дь из Твои́х ложе́сн проше́д, / в мя́ оболки́йся, / пе́рвыя кля́твы Ада́ма свободи́. / Те́мже Ти́, Всечи́стая, / я́ко Бо́жии Ма́тери же и Де́ве вои́стинну, / вопие́м немо́лчно: / ра́дуйся Ангельски, ра́дуйся Влады́чице, / предста́тельство и покро́ве, / и спасе́ние ду́ш на́ших.

Моли́тва свята́го Симео́на Богоприи́мца:

Ны́не отпуща́еши раба́ Твоего́, Влады́ко,/ по глаго́лу Твоему́, с ми́ром;/ я́ко ви́деста о́чи мои́ спасе́ние Твое́,/ е́же еси́ угото́вал пред лице́м всех люде́й,/ свет во открове́ние язы́ков,// и сла́ву люде́й Твои́х Изра́иля.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Го́споди, поми́луй. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Тропа́рь, глас 5:

Ца́рства земна́го лише́ние, / у́зы и страда́ния многоразли́чныя, / кро́тко претерпе́л еси́, / свиде́тельствовав о Христе́ да́же до сме́рти от богобо́рцев, / страстоте́рпче вели́кий Боговенча́нный царю́ Нико́лае, / сего́ ра́ди му́ченическим венце́м на небесе́х / венча́ тя́, с цари́цею, и ча́ды, и слуги́ твои́ми Христо́с Бо́г, / Его́же моли́ / поми́ловати страну́ Росси́йскую, / и спасти́ ду́ши на́ша. (Дважды)

Песнь Пресвятей Богородице:

Богоро́дице Де́во, ра́дуйся, / Благода́тная Мари́е, Госпо́дь с Тобо́ю; / благослове́на Ты в жена́х / и благослове́н Плод чре́ва Твоего́, / я́ко Спа́са родила́ еси́ душ на́ших. (Единожды)

Бу́ди И́мя Госпо́дне благослове́но от ны́не и до ве́ка. (Три́жды)

Псало́м 33:

Благословлю́ Го́спода на вся́кое вре́мя,/ вы́ну хвала́ Его́ во усте́х мои́х./ О Го́споде похва́лится душа́ моя́,/ да услы́шат кро́тцыи, и возвеселя́тся./ Возвели́чите Го́спода со мно́ю,/ и вознесе́м И́мя Его́ вку́пе./ Взыска́х Го́спода, и услы́ша мя,/ и от все́х скорбе́й мои́х изба́ви мя./ Приступи́те к Нему́, и просвети́теся,/ и ли́ца ва́ша не постыдя́тся./ Сей ни́щий воззва́, и Госпо́дь услы́ша и́,/ и от все́х скорбе́й его́ спасе́ и́./ Ополчи́тся а́нгел Госпо́день о́крест боя́щихся Его́,/ и изба́вит их./ Вкуси́те и ви́дите, я́ко благ Госпо́дь:/ блаже́н муж, и́же упова́ет Нань./ Бо́йтеся Го́спода, вси́ святи́и Его́,/ я́ко несть лише́ния боя́щимся Его́./ Бога́тии обнища́ша и взалка́ша:/ взыска́ющии же Го́спода// не лиша́тся вся́каго бла́га.

У́ТРЕНЯ.

Шестопса́лмие:

Сла́ва в вы́шних Бо́гу, и на земли́ мир, в челове́цех благоволе́ние. (Три́жды)

Го́споди, устне́ мои́ отве́рзеши, и уста́ моя́ возвестя́т хвалу́ Твою́. (Два́жды)

Псалом 3:

Го́споди, что ся умно́жиша стужа́ющии ми́? Мно́зи востаю́т на мя, мно́зи глаго́лют души́ мое́й: несть спасе́ния eму́ в Бо́зе eго́. Ты же, Го́споди, Засту́пник мой еси́, сла́ва моя́ и вознося́й главу́ мою́. Гла́сом мои́м ко Го́споду воззва́х, и услы́ша мя от горы́ святы́я Своея́. Аз усну́х, и спах, воста́х, я́ко Госпо́дь засту́пит мя. Не убою́ся от тем люде́й, о́крест напа́дающих на мя. Воскресни́, Го́споди, спаси́ мя, Бо́же мой, я́ко Ты порази́л еси́ вся вражду́ющыя ми всу́е: зу́бы гре́шников сокруши́л еси́. Госпо́дне есть спасе́ние, и на лю́дех Твои́х благослове́ние Твое́.

Аз усну́х, и спах, воста́х, я́ко Госпо́дь засту́пит мя.

Псалом 37:

Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́. Я́ко стре́лы Твоя́ унзо́ша во мне, и утверди́л еси́ на мне ру́ку Твою́. Несть исцеле́ния в пло́ти мое́й от лица́ гне́ва Твоего́, несть ми́ра в косте́х мои́х от лица́ грех мои́х. Я́ко беззако́ния моя́ превзыдо́ша главу́ мою́, я́ко бре́мя тя́жкое отяготе́ша на мне. Возсмерде́ша и согни́ша ра́ны моя́ от лица́ безу́мия моего́. Пострада́х и сляко́хся до конца́, весь день се́туя хожда́х. Я́ко ля́двия моя́ напо́лнишася поруга́ний, и несть исцеле́ния в пло́ти мое́й. Озло́блен бых и смири́хся до зела́, рыка́х от воздыха́ния се́рдца моего́. Го́споди, пред Тобо́ю все жела́ние мое́ и воздыха́ние мое́ от Тебе́ не утаи́ся. Се́рдце мое́ смяте́ся, оста́ви мя си́ла моя́, и свет о́чию мое́ю, и той несть со мно́ю. Дру́зи мои́ и и́скреннии мои́ пря́мо мне прибли́жишася и ста́ша, и бли́жнии мои́ отдале́че мене́ ста́ша и нужда́хуся и́щущии ду́шу мою́, и и́щущии зла́я мне глаго́лаху су́етная и льсти́вным весь день поуча́хуся. Аз же я́ко глух не слы́шах и я́ко нем не отверза́яй уст свои́х. И бых я́ко челове́к не слы́шай и не имы́й во усте́х свои́х обличе́ния. Я́ко на Тя, Го́споди, упова́х, Ты услы́шиши, Го́споди Бо́же мой. Я́ко рех: да не когда́ пора́дуют ми ся врази́ мои́: и внегда́ подвижа́тися нога́м мои́м, на мя велере́чеваша. Я́ко аз на ра́ны гото́в, и боле́знь моя́ предо мно́ю есть вы́ну. Я́ко беззако́ние мое́ аз возвещу́ и попеку́ся о гресе́ мое́м. Врази́ же мои́ живу́т и укрепи́шася па́че мене́, и умно́жишася ненави́дящии мя без пра́вды. Воздаю́щии ми зла́я возблага́я оболга́ху мя, зане́ гоня́х благосты́ню. Не оста́ви мене́, Го́споди Бо́же мой, не отступи́ от Мене́. Вонми́ в по́мощь мою́, Го́споди спасе́ния моего́.

Не оста́ви мене́, Го́споди Бо́же мой, не отступи́ от Мене́. Вонми́ в по́мощь мою́, Го́споди спасе́ния моего́.

Псалом 62:

Бо́же, Бо́же мой, к Тебе́ у́тренюю, возжада́ Тебе́ душа́ моя́, коль мно́жицею Тебе́ плоть моя́, в земли́ пу́сте и непрохо́дне, и безво́дне. Та́ко во святе́м яви́хся Тебе́, ви́дети си́лу Твою́ и сла́ву Твою́. Я́ко лу́чши ми́лость Твоя́ па́че живо́т, устне́ мои́ похвали́те Тя. Та́ко благословлю́ Тя в животе́ мое́м, о и́мени Твое́м воздежу́ ру́це мои́. Я́ко от ту́ка и ма́сти да испо́лнится душа́ моя́, и устна́ма ра́дости восхва́лят Тя уста́ моя́. А́ще помина́х Тя на посте́ли мое́й, на у́тренних поуча́хся в Тя. Я́ко был еси́ Помо́щник мой, и в кро́ве крилу́ Твое́ю возра́дуюся. Прильпе́ душа́ моя́ по Тебе́, мене́ же прия́т десни́ца Твоя́. Ти́и же всу́е иска́ша ду́шу мою́, вни́дут в преиспо́дняя земли́, предадя́тся в ру́ки ору́жия, ча́сти ли́совом бу́дут. Царь же возвесели́тся о Бо́зе, похва́лится всяк клены́йся Им, я́ко загради́шася уста́ глаго́лющих непра́ведная.

На у́тренних поуча́хся в Тя. Я́ко был еси́ Помо́щник мой, и в кро́ве крилу́ Твое́ю возра́дуюся. Прильпе́ душа́ моя́ по Тебе́, мене́ же прия́т десни́ца Твоя́.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Го́споди поми́луй. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Псалом 87:

Го́споди Бо́же спасе́ния моего́, во дни воззва́х, и в нощи́ пред Тобо́ю. Да вни́дет пред Тя моли́тва моя́: приклони́ у́хо Твое́ к моле́нию моему́, я́ко испо́лнися зол душа́ моя́, и живо́т мой аду прибли́жися. Привмене́н бых с низходя́щими в ров, бых я́ко челове́к без по́мощи, в ме́ртвых свобо́дь, я́ко я́звеннии спя́щии во гро́бе, и́хже не помяну́л еси́ ктому́, и ти́и от руки́ Твоея́ отринове́ни бы́ша. Положи́ша мя в ро́ве преиспо́днем, в те́мных и се́ни сме́ртней. На мне утверди́ся я́рость Твоя́, и вся во́лны Твоя́ наве́л еси́ на мя. Уда́лил еси́ зна́емых мои́х от Мене́, положи́ша мя ме́рзость себе́: пре́дан бых и не исхожда́х. О́чи мои́ изнемого́сте от нищеты́, воззва́х к Тебе́, Го́споди, весь день, возде́х к Тебе́ ру́це мои́. Еда́ ме́ртвыми твори́ши чудеса́? Или́ вра́чеве воскреся́т, и испове́дятся Тебе́? Еда́ пове́сть кто во гро́бе ми́лость Твою́, и и́стину Твою́ в поги́бели? Еда́ позна́на бу́дут во тьме чудеса́ Твоя́, и пра́вда Твоя́ в земли́ забве́нней? И аз к Тебе́, Го́споди, воззва́х и у́тро моли́тва моя́ предвари́т Тя. Вску́ю, Го́споди, отре́еши ду́шу мою́, отвраща́еши лице́ Твое́ от Мене́? Нищ есмь аз, и в труде́х от ю́ности моея́; возне́с же ся, смири́хся, и изнемого́х. На мне преидо́ша гне́ви Твои́, устраше́ния Твоя́ возмути́ша мя, обыдо́ша мя я́ко вода́, весь день одержа́ша мя вку́пе. Уда́лил еси́ от Мене́ дру́га и и́скренняго, и зна́емых мои́х от страсте́й.

Го́споди Бо́же спасе́ния моего́, во дни воззва́х, и в нощи́ пред Тобо́ю. Да вни́дет пред Тя моли́тва моя́: приклони́ у́хо Твое́ к моле́нию моему́.

Псалом 102:

Благослови́, душе́ моя́, Го́спода, и вся вну́тренняя моя́ и́мя свя́тое Его́. Благослови́, душе́ моя́, Го́спода, и не забыва́й всех воздая́ний Его́, очища́ющаго вся беззако́ния твоя́, исцеля́ющаго вся неду́ги твоя́, избавля́ющаго от истле́ния живо́т твой, венча́ющаго тя ми́лостию и щедро́тами, исполня́ющаго во благи́х жела́ние твое́: обнови́тся я́ко о́рля ю́ность твоя́. Творя́й ми́лостыни Госпо́дь, и судьбу́ всем оби́димым. Сказа́ пути́ Своя́ Моисе́ови, сыново́м Изра́илевым хоте́ния Своя́: Щедр и Ми́лостив Госпо́дь, Долготерпели́в и Многоми́лостив. Не до конца́ прогне́вается, ниже́ во век вражду́ет, не по беззако́нием на́шым сотвори́л есть нам, ниже́ по грехо́м на́шым возда́л есть нам. Я́ко по высоте́ небе́сней от земли́, утверди́л есть Госпо́дь ми́лость Свою́ на боя́щихся Его́. Ели́ко отстоя́т восто́цы от за́пад, уда́лил есть от нас беззако́ния на́ша. Я́коже ще́дрит оте́ц сы́ны, уще́дри Госпо́дь боя́щихся Его́. Я́ко Той позна́ созда́ние на́ше, помяну́, я́ко персть есмы́. Челове́к, я́ко трава́ дни́е eго́, я́ко цвет се́льный, та́ко оцвете́т, я́ко дух про́йде в нем, и не бу́дет, и не позна́ет ктому́ ме́ста своего́. Ми́лость же Госпо́дня от ве́ка и до ве́ка на боя́щихся Его́, и пра́вда Его́ на сыне́х сыно́в, храня́щих заве́т Его́, и по́мнящих за́поведи Его́ твори́ти я́. Госпо́дь на Небеси́ угото́ва Престо́л Свой, и Ца́рство Его́ все́ми облада́ет. Благослови́те Го́спода вси А́нгели Его́, си́льнии кре́постию, творя́щии сло́во Его́, услы́шати глас слове́с Его́. Благослови́те Го́спода вся Си́лы Его́, слуги́ Его́, творя́щии во́лю Его́. Благослови́те Го́спода вся дела́ Его́, на вся́ком ме́сте влады́чества Его́, благослови́, душе́ моя́, Го́спода.

На вся́ком ме́сте влады́чества Его́, благослови́, душе́ моя́, Го́спода.

Псалом 142:

Го́споди, услы́ши моли́тву мою́, внуши́ моле́ние мое́ во и́стине Твое́й, услы́ши мя в пра́вде Твое́й и не вни́ди в суд с рабо́м Твои́м, я́ко не оправди́тся пред Тобо́ю всяк живы́й. Я́ко погна́ враг ду́шу мою́, смири́л есть в зе́млю живо́т мой, посади́л мя есть в те́мных, я́ко ме́ртвыя ве́ка. И уны́ во мне дух мой, во мне смяте́ся се́рдце мое́. Помяну́х дни дре́вния, поучи́хся во всех де́лех Твои́х, в творе́ниих руку́ Твое́ю поуча́хся. Возде́х к Тебе́ ру́це мои́, душа́ моя́, я́ко земля́ безво́дная Тебе́. Ско́ро услы́ши мя, Го́споди, исчезе́ дух мой, не отврати́ лица́ Твоего́ от Мене́, и уподо́блюся низходя́щым в ров. Слы́шану сотвори́ мне зау́тра ми́лость Твою́, я́ко на Тя упова́х. Скажи́ мне, Го́споди, путь во́ньже пойду́, я́ко к Тебе́ взях ду́шу мою́. Изми́ мя от враг мои́х, Го́споди, к Тебе́ прибего́х. Научи́ мя твори́ти во́лю Твою́, я́ко Ты еси́ Бог мой. Дух Твой Благи́й наста́вит мя на зе́млю пра́ву. И́мене Твоего́ ра́ди, Го́споди, живи́ши мя, пра́вдою Твое́ю изведе́ши от печа́ли ду́шу мою́. И ми́лостию Твое́ю потреби́ши враги́ моя́ и погуби́ши вся стужа́ющыя души́ мое́й, я́ко аз раб Твой есмь.

Услы́ши мя, Го́споди, в пра́вде Твое́й и не вни́ди в суд с рабо́м Твои́м.

Дух Твой Благи́й наста́вит мя на зе́млю пра́ву.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Тропа́рь глас 5:

Тропа́рь глас 4:

Сла́ва Отцу́ и Сы́ну и Свято́му Ду́ху.

И ны́не и при́сно и во ве́ки веко́в. Ами́нь.

Глас 4: Еже от ве́ка утае́нное, / и Ангелом несве́домое та́инство: / Тобо́ю, Богоро́дице, су́щим на земли́ яви́ся, / Бо́г в несли́тном соедине́нии воплоща́емь, / и кре́ст во́лею на́с ра́ди восприи́м, / и́мже воскреси́в первозда́ннаго, / спасе́ от сме́рти ду́ши на́ша.

Здесь читается кафизма, положенная по дню, или сразу седальны:

Го́споди, поми́луй. (Три́жды)

Седален, глас 7:

Три́жды отве́ргся Пе́тр, / но принесе́ сле́зы покая́ния, / и а́бие поми́лован бы́сть / и возведе́н в чи́н первоверхо́внаго апо́стола. / Ца́рь же и вели́кий страстоте́рпец Никола́й а́ще и отрече́ся от престо́ла, / ви́дя о́крест себе́ изме́ну и боя́знь и обма́н, / и разуме́я, я́ко вси́ бли́жнии военача́льницы и наро́д отреко́шася от него́, / о́н же не отрече́ся от Христа́, / ни от любве́ к наро́ду своему́, / и не восхоте́ бежа́ти от богобо́рцев, / но кро́тко вся́ претерпе́в, / прия́т непови́нно му́ченическую сме́рть за Христа́, / я́коже сро́дницы его́ благове́рнии кня́зи Бори́с и Гле́б. / Сего́ ра́ди мо́лим тя́, страстоте́рпче царю́, / моли́ся Христу́ Бо́гу, / прегреше́ний оставле́ние дарова́ти / пра́зднующим любо́вию святу́ю па́мять твою́.

Сла́ва Отцу́ и Сы́ну и Свято́му Ду́ху. И ны́не и при́сно и во ве́ки веко́в. Ами́нь.

Глас 7: Моли́тву прие́мши от на́с, / в кро́в Тво́й, Пречи́стая Де́во, прибега́ющих, / не преста́й моля́щи Человеколю́бца / спасти́ся рабо́м Твои́м.

Седален, глас 7:

С любо́вию ве́лиею к неблагода́рным лю́дем, / прине́сл еси́ себе́, вели́кий страстоте́рпче царю́, в же́ртву за наро́д тво́й, / я́коже ре́кл еси́: / а́ще потре́бна е́сть же́ртва за наро́д, а́з же́ртва сия́ бу́ду. / Бо́льши сея́ любве́ никто́же и́мать, / а́ще кто́ ду́шу свою́ положи́т за дру́ги своя́. / Ны́не же предстоя́ Христу́, Ему́же послужи́л еси́, / моли́ о на́с, чту́щих любо́вию па́мять твою́.

Сла́ва Отцу́ и Сы́ну и Свято́му Ду́ху. И ны́не и при́сно и во ве́ки веко́в. Ами́нь.

Глас 7: Ужа́сно чу́до зача́тия и несказа́нен о́браз рождества́ / в Тебе́ позна́ся, Присноде́во Чи́стая, / ужаса́ет мо́й у́м и удивля́ет помышле́ние. / Сла́ва Твоя́, Богоро́дице, все́м бы́сть ра́дость, / во спасе́ние ду́ш на́ших.

Полиеле́й:

Хвали́те И́мя Госпо́дне, хвали́те, раби́ Го́спода.

Аллилу́иа, аллилу́иа, аллилу́иа.

Благослове́н Госпо́дь от Сио́на, живы́й во Иерусали́ме.

Аллилу́иа, аллилу́иа, аллилу́иа.

Испове́дайтеся Го́сподеви, я́ко Благ, я́ко в век ми́лость Его́.

Аллилу́иа, аллилу́иа, аллилу́иа.

Испове́дайтеся Бо́гу Небе́сному, я́ко в век ми́лость Его́.

Аллилу́иа, аллилу́иа, аллилу́иа.

Велича́ние:

Велича́ем ва́с, / страстоте́рпцы святи́и ца́рственнии му́ченицы, / и чте́м честна́я страда́ния ва́ша, / я́же за Христа́ / претерпе́ли есте́.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа,// сла́ва Тебе́, Бо́же. (Трижды)

Седа́льны:

Глас 7:

Егда́ ты́, царю́ му́чениче Нико́лае, ца́рский престо́л восприя́л еси́, / не проси́л еси́ у Бо́га бога́тства име́ний, ни сла́вы, / ниже́ ду́ш проти́вящихся тебе́, / ниже́ дни́й мно́гих, / но от се́рдца проси́л еси́, я́коже прему́дрый Соломо́н, глаго́ля: / да́ждь ми́, Го́споди Бо́же, прему́дрость и ра́зум. / Сего́ ра́ди услы́ша тя́ Госпо́дь, / и даде́ тебе́ по проше́нию твоему́, / явля́я тя́ ревни́теля о благоче́стии, / му́драго и смире́ннаго царя́, / и венча́ тя́ за благоче́стие сла́вным венце́м небе́сным, / да мо́лишися о правосла́вных лю́дех, / предстоя́ со Ангелы святы́ми на небесе́х / у престо́ла Бо́жия.

Глас 7: Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Пречи́стая Де́во, поми́луй на́с, / прибега́ющих ве́рою к Тебе́ милосе́рдней, / и прося́щих те́плаго Твоего́ заступле́ния. / Яко ма́ти Бо́га вы́шняго, / моли́ Сы́на Твоего́, Христа́ Бо́га на́шего, / спасти́ся рабо́м Твои́м.

Степе́нна, глас 4:

От ю́ности моея́/ мно́зи бо́рют мя стра́сти,/ но Сам мя заступи́// и спаси́, Спа́се мой.

Ненави́дящии Сио́на,/ посрами́теся от Го́спода,/ я́ко трава́ бо огне́м// бу́дете изсо́хше.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Святы́м Ду́хом/ вся́ка душа́ живи́тся,/ и чистото́ю возвыша́ется,// светле́ется Тро́йческим еди́нством, священнота́йне.

Го́споди, поми́луй. (Три́жды)

От Матфе́я Свята́го Ева́нгелия чте́ние

Сла́ва, Тебе́, Го́споди, сла́ва Тебе́.

Рече́ Госпо́дь Свои́м ученико́м: се Аз посыла́ю вас я́ко о́вцы посреде́ волко́в, бу́дите у́бо му́дри я́ко змия́, и це́ли я́ко го́лубие. Внемли́те же от челове́к, предадя́т бо вы на со́нмы, и на собо́рищах их бию́т вас. И пред влады́ки же и цари́ веде́ни бу́дете Мене́ ра́ди, во свиде́тельство им и язы́ком. Егда́ же предаю́т вы, не пецы́теся, ка́ко или́ что возглаго́лете: даст бо ся вам в той час, что возглаго́лете. Не вы бо бу́дете глаго́лющии, но Дух Отца́ ва́шего глаго́ляй в вас. Преда́ст же брат бра́та на смерть и оте́ц ча́до, и воста́нут ча́да на роди́тели и убию́т их. И бу́дете ненави́дими все́ми и́мени Моего́ ра́ди. Претерпе́вый же до конца́, той спасе́н бу́дет.

Псало́м 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя. Я́ко беззако́ние мое́ аз зна́ю и грех мой предо мно́ю есть вы́ну. Тебе́ Еди́ному согреши́х, и лука́вое пред Тобо́ю сотвори́х, я́ко да оправди́шися во словесе́х Твои́х и победи́ши, внегда́ суди́ти Ти. Се бо в беззако́ниих зача́т есмь, и во гресе́х роди́ мя ма́ти моя́. Се бо и́стину возлюби́л еси́, безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся, омы́еши мя, и па́че сне́га убелю́ся. Слу́ху моему́ да́си ра́дость и весе́лие, возра́дуются ко́сти смире́нныя. Отврати́ лице́ Твое́ от грех мои́х, и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́, и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́, и Ду́хом Влады́чним утверди́ мя. Научу́ беззако́нныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́, возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо, всесожже́ния не благоволи́ши. Же́ртва Бо́гу дух сокруше́н, се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския, тогда́ благоволи́ши же́ртву пра́вды, возноше́ние и всесожега́емая: тогда́ возложа́т на олта́рь Твой тельцы́.

Глас 6:

Сла́ва Отцу́ и Сы́ну и Свято́му Ду́ху./ Моли́твами Царственных страстотерпцев, / Ми́лостиве, очи́сти / мно́жества согреше́ний на́ших.

И ны́не и при́сно и во ве́ки веко́в. Ами́нь./ Моли́твами Богоро́дицы, / Ми́лостиве, очи́сти / мно́жества согреше́ний на́ших.

Поми́луй мя, Бо́же,/ по вели́цей ми́лости Твое́й,/ и по мно́жеству щедро́т Твои́х// очи́сти беззако́ние мое́.

Стихи́ра, глас 6

Ве́лию ве́ру и ди́вное терпе́ние, / и любо́вь ко враго́м стяжа́л еси́, / святы́й му́чениче царю́ Нико́лае, / во испыта́ниих на Бо́га наде́яся, / во страда́ниих долготерпя́, / враго́в и убива́ющих тя́ проща́я, / и прося́ не мсти́ти за себе́, / поне́же ре́кл еси́, я́ко зло́ не победи́т зла́, но то́кмо любо́вь, / и кончи́ну му́ченическую за Христа́ кро́тко прие́мля. / Те́мже возвели́чи тя́ Христо́с на небесе́х, / Его́же моли́ о ве́рою и любо́вию чту́щих тя́.

Го́споди, поми́луй. (12 раз)

Кано́н свято́му. Гла́с 2.

Пе́снь 1.

Ирмос: Гряди́те лю́дие, / пои́м пе́снь Христу́ Бо́гу, / разде́льшему мо́ре и наста́вльшему лю́ди, / я́же изведе́ из рабо́ты еги́петския, / я́ко просла́вися.

Припе́в: Святи́и ца́рственнии му́ченицы, моли́те Бо́га о на́с.

Поруга́ние зря́ и разоре́ние земли́ своея́ от безбо́жных вра́г, пла́кася из глубины́ се́рдца благочести́вый ца́рь, я́коже проро́к Иереми́я и трие́ о́троцы, моля́ся за лю́ди согреши́вшия и го́рько стеня́ше: ми́лостиве Го́споди, не оста́ви на́с.

О, ка́ко земля́ Ру́сская, пре́жде сла́вная в ми́ре и благоде́нствующая, плене́на бы́сть от богобо́рцев? вси́ дружа́щиися с не́ю отверго́шася ея́, бы́ша е́й врази́. Отри́нул е́сть Госпо́дь царя́ и кня́зя и свяще́нника. Ви́ждь, Го́споди, при́зри и поми́луй.

Щедро́ты Госпо́дни бе́здна мно́га, не во ве́к отри́нет Госпо́дь, но поми́лует смири́вшихся и ка́ющихся по мно́жеству ми́лости Своея́ и изба́вит лю́ди Своя́, я́коже дре́вле Изра́иля от ра́бства еги́петскаго.

Богородичен: С ве́рою и любо́вию притека́ющих к Тебе́ и со стра́хом пою́щих Тя́, моли́твенный гла́с услы́ши, Влады́чице.

Пе́снь 3.

Ирмос: На ка́мени мя́ ве́ры утверди́в, / разширил еси уста моя на враги моя, / возвесели бо ся дух мой, внегда пети: / несть свят, якоже Бог наш, / и несть праведен, паче Тебе, Господи.

Ангел Храни́тель попуще́нием Бо́жиим отъя́т бы́сть от земли́ Росси́йския, врази́ ея́ ста́ша во главе́, ненави́дящии ю́ благоде́нствуют за мно́жество нече́стия пре́жде благочести́выя земли́, кня́зи ея́ пребыва́ют в наро́дех чужди́х. Не отри́ни, Го́споди, стра́ждущих люде́й Твои́х до конца́, но обрати́ и утверди́ и́х на ка́мени за́поведей Твои́х.

Доко́ле, Го́споди, пу́ть нечести́вых спе́ется, доко́ле пла́кати и́мать земля́ от зло́бы живу́щих на не́й? Архиере́и, свяще́нницы, кня́зи и ве́рнии лю́дие низложе́ни и убие́ни бы́ша. Доко́ле, Го́споди, Влады́ко святы́й и и́стинный, не су́диши враго́м Твои́м за кро́вь и́х? Поми́луй и изба́ви все́х на́с от враго́в Твои́х и спаси́ ду́ши на́ша.

Избавле́ния не иму́щи, ско́рби и стена́ния испо́лнися земля́ пре́жде христоимени́тая, во страда́нии свое́м глаго́ля: согреши́хом и беззако́нновахом отступи́вше от Тебе́, Го́споди, и за́поведей Твои́х не послу́шахом, ниже́ соблюдо́хом. Обрати́ на́с, Бо́же, к покая́нию и утверди́ на недви́жимем ка́мени за́поведей Твои́х.

Богородичен: Упова́ние и наде́жда на́ша Ты́ еси́, Пресвята́я Влады́чице, спаси́ стра́ждущее оте́чество на́ше, и лю́ди Твоя́ моля́щияся и и́мя Твое́ призыва́ющия.

Конда́к святе́й му́ченице княги́ни Елисаве́те, гла́с 4:

От сла́вы ца́рственныя, / взе́мши кре́ст Христо́в, / прешла́ еси́ к сла́ве небе́сней, моля́щися за враги́, / и обрела́ еси́ ра́дость ве́чную, / свята́я му́ченице княги́не Елисаве́то, / с Варва́рою му́ченицею, / те́мже моли́те о душа́х на́ших.

Седа́лен, гла́с 7:

Страстоте́рпице свята́я княги́не Елисаве́то, / егда́ тя́ жи́ву во Алапа́евскую ша́хту вверго́ша, / ку́пно со святы́ми му́ченики ца́рския кро́ве, / и́же бя́ху кня́зие Се́ргий, Иоа́нн, Константи́н, Игорь и Влади́мир, / та́кожде му́ченица Варва́ра, / и святы́й му́ченик Фео́дор, / изнемога́ющим же надо́лзе все́м от ра́н, / облегча́ла еси́ е́ле жи́ва су́щи страда́ния умира́ющих, / воспева́ющи свяще́нная песнопе́ния, я́же слы́шаху мимоходя́щии. / Сего́ ра́ди мо́лим тя́, моли́ся Христу́ Бо́гу / прегреше́ний оставле́ние дарова́ти / пра́зднующим любо́вию святу́ю па́мять твою́.

Сла́ва, и ны́не, богоро́дичен, гла́с то́йже:

Егда́ предста́ну пред лице́м Созда́теля моего́ / в де́нь пра́веднаго суда́ Его́, / тогда́, Влады́чице, предста́ни ми́, / и ве́чныя му́ки изба́ви мя́, / да не сни́ду во а́д, но да спасу́ся / Твои́м, Пресвята́я Богоро́дице, заступле́нием.

Пе́снь 4.

Ирмос: Прише́л еси́ от Де́вы, не хода́тай, ни Ангел, / но Са́м, Го́споди, вопло́щся, / и спа́сл еси́ всего́ мя, челове́ка. / Те́м зову́ Ти́: сла́ва си́ле Твое́й, Го́споди.

Беззако́ния люде́й Твои́х вели́ки бы́ша пред очи́ма Твои́ма, Го́споди, сего́ ра́ди безбо́жнии врази́ святи́лища Твоя́ оскверни́ша и разори́ша, я́коже проро́к Иса́ия рече́: пра́здников ва́ших ненави́дит душа́ Моя́, не стерплю́ грехо́в ва́ших, егда́ простре́те ру́ки ва́ша ко Мне́, отвращу́ о́чи Мои́ от ва́с. Приближа́ются бо Мне́ лю́дие си́и усты́ свои́ми, се́рдце же и́х дале́че отстои́т от Мене́. Разуме́юще сие́, ны́не ка́емся и обраща́емся к Тебе́, да преста́нет гне́в Тво́й, да побори́ши борю́щии ны́ и да рече́м: сла́ва си́ле Твое́й, Го́споди.

О, ка́ко бре́мя беззако́ний наро́да Твоего́, Го́споди, умно́жися, Ты́ отъя́л еси́ си́лу на́шу, пре́дал еси́ на́с в ру́ки беззако́нников и соде́лашася вси́ раби́. То́кмо Ты́, еди́не Го́споди, мо́жеши, а́ще хо́щеши свободи́ти ны́, егда́ позна́ем грехи́ своя́ и обрати́мся к Тебе́ Созда́телю на́шему и просла́вим Тя́.

Жи́знь во ве́ки блаже́нная то́кмо в Бо́зе е́сть, но у́зок пу́ть вводя́й в живо́т. Сия́ забы́ наро́д Тво́й, Го́споди, и не послу́ша словесе́ Твоего́, Христе́ Царю́, но широ́ким путе́м греха́ по́йде. Прии́де же на ны́ наси́лие и па́губа, изгна́ние и сме́рть, да уразуме́ем еди́ный и́стинный пу́ть Тво́й, Спаси́телю на́ш, и обрати́мся и просла́вим Тя́.

Богородичен: Ты́ еси́, Пречи́стая Богоро́дице, прибе́жище на́ше и утвержде́ние. Моли́ Сы́на Твоего́ и Бо́га на́шего пода́ти на́м спасе́ние и грехо́в оставле́ние.

Пе́снь 5

Ирмос: Све́та Пода́телю / и веко́в Тво́рче, Го́споди, / во све́те Твои́х повеле́ний наста́ви на́с: / ра́зве бо Тебе́, ино́го Бо́га не зна́ем.

Егда отринул есть Господь царя и князя и священника, храмы же и жертвенники и святилища Своя не пощаде, тогда возскорбех, сердце мое смятеся во мне, воздыхаю и несть утеша́ющаго. При́зри, Го́споди, и пощади́, просвети́ ны повеле́нии Твои́ми, да обрати́мся к Тебе́ и послу́жим Ти́.

Лю́дие Твои́, Го́споди, бежа́ти вожделе́ша от наси́лия враго́в и не возмого́ша, ини́и же в наро́дех чужди́х скита́ются. Сие́ бы́сть, я́ко ло́жнии вожди́ веща́ша суету́ и безу́мие и не глаго́лаху о гресе́х, да отвратя́т гне́в Бо́жий, плене́ние и изгна́ние. Ны́не отверзо́ша на ны́ уста́ своя́ вси́ врази́ на́ши, поскрежета́ша зубы́ свои́ми и ре́ша: поглоти́м и́х. Возста́ни, воззови́ в нощи́, излива́й моли́тву ко Го́споду, простира́я к Нему́ ру́це и глаго́ля: ви́ждь, Го́споди, поги́бель на́шу, просвети́, при́зри и поми́луй.

Юноши и де́вы, ста́рцы и младе́нцы непови́ннии убие́ни бы́ша, погна́ вра́г ду́шу мою́, смири́л е́сть в зе́млю живо́т мо́й, посади́л мя́ е́сть в те́мных, я́ко ме́ртвыя от ве́ка, и уны́ во мне́ ду́х мо́й, во мне́ смяте́ся се́рдце мое́, поги́бе си́ла моя́ и наде́жда моя́ на Го́спода. Помяни́, Го́споди, нищету́ мою́ и го́ресть. Сия́ глаго́лах в се́рдце мое́м, сего́ ра́ди потерплю́ страда́ние от Бо́га, я́ко да призри́т Госпо́дь на сми́рение мое́.

Богородичен: Бо́га, Его́же родила́ еси́, Пречи́стая Мари́е, моли́ рабо́м Твои́м пода́ти прегреше́ний оставле́ние.

Пе́снь 6.

Ирмос: Во глубине́ грехо́вней содержи́мь е́смь, Спа́се, / и в пучи́не жите́йстей обурева́емь, / но, я́коже Ио́ну от зве́ря, / и мене́ от страсте́й возведи́ и спаси́ мя.

Даде́ Госпо́дь утеше́ние, я́ко ми́лость Госпо́дня не оста́ви на́с, и не сконча́шася щедро́ты Его́, обновля́ются бо на вся́к де́нь. Сего́ ра́ди бу́дем наде́ющеся на Бо́га, Госпо́дь ча́сть на́ша е́сть, пребу́дем упова́юще на Него́, могу́щаго изба́вити на́с от все́х бе́д, я́коже Ио́ну от зве́ря морска́го.

Ищущим Бо́га бла́го е́сть, бла́г бо Госпо́дь наде́ющимся на Него́, бла́го душе́ в терпе́нии ожида́ющей спасе́ния Бо́жия, даю́щей лице́ свое́ бию́щему и прие́млющей поноше́ние, я́ко не на ве́ки отри́нет Госпо́дь, но изба́вит от поги́бели ду́ши смири́вшихся и упова́ющих на Него́.

Согреши́вшим лю́дем посла́ Госпо́дь го́ре, но поми́лует по вели́цей бла́гости и любви́ в попече́нии Свое́м, порази́ бо и огорчи́ сы́ны челове́ческия не от изволе́ния се́рдца Своего́, но егда́ попра́ша за́поведи Его́, я́ко от Вы́шняго исхо́дит наказа́ние и благоде́нствие. Да не возро́пщет о наказа́нии вся́к живу́щий, да се́тует же о гресе́х свои́х и воспла́чет, до́ндеже приклони́тся и уви́дит Госпо́дь с небесе́.

Богородичен: Ны́не к Тебе́ прибега́ю, Пречи́стая, спаси́ мя моли́твами Твои́ми и соблюди́: ели́ка бо хо́щеши, мо́жеши, я́ко Ма́ти Всемогу́щаго.

Конда́к, гла́с 6:

Наде́жда царя́ му́ченика с цари́цею и ча́ды и слуги́ укрепи́, / и к Твое́й любви́ окрыли́, / бу́дущий и́м поко́й предвозвести́вши, / те́х моли́твами, Го́споди, поми́луй на́с.

Икос:

Зря́ ве́ру Христо́ву благочести́вым царе́м во стране́ Росси́йстей укрепля́ему, и не терпя́ сего́, врази́ Бо́жии погуби́ти христолюби́ваго царя́ му́ченика Никола́я умы́слиша, и преда́ша его́ непови́нней сме́рти со благочести́вою цари́цею и ча́ды и слуги́ и со все́м ца́рственным ро́дом, но прельсти́шася, я́ко пу́ть нечести́вых поги́бнет, пра́ведницы же во ве́ки жи́ви бу́дут, и вме́сто па́губы и вре́да, сотвори́ша и́х сла́вныя му́ченики и засту́пники пред Бо́гом. Кро́вию и́х и новому́ченик все́х страна́ Росси́йская, богобо́рцы угнета́емая, спасе́на бу́дет, поне́же кро́вь сия́ се́мя но́вой жи́зни во Христе́ е́сть, те́х моли́твами, Го́споди, поми́луй на́с.

Пе́снь 7.

Ирмос: Образу злато́му на по́ле Деи́ре служи́му, / трие́ Твои́ о́троцы небрего́ша безбо́жнаго веле́ния, / посреде́ же огня́ вве́ржени, ороша́еми, поя́ху: / благослове́н еси, Бо́же оте́ц на́ших.

Обрати́ ны, Го́споди, к Тебе́, и обрати́мся, обнови́ дни́ на́ша служе́нием Тебе́, я́коже пре́жде, я́ко благослове́н еси́, и хва́льно и просла́влено и́мя Твое́ во ве́ки. Яко пра́веден еси́ во все́м, е́же сотвори́л еси́ на́м, и вся́ дела́ Твоя́ и́стинна, и пра́ви путие́ Твои́, и вси́ суди́ Твои́ и́стинни. Сего́ ра́ди душе́ю сокруше́нною и ду́хом смире́нным глаго́лем: благослове́н еси́ Бо́же, препе́тый и превозноси́мый во ве́ки.

Го́споди Бо́же, благослове́н еси́, я́ко и́стинным судо́м наве́л еси́ сия́ вся́ страда́ния на ны́, гре́х ра́ди на́ших. Яко согреши́хом и беззако́нновахом и не соблюдо́хом и не сохрани́хом, я́коже запове́дал еси́ на́м, да бла́го на́м бу́дет и да просла́вим и́мя сла́вы Твоея́ свято́е, препе́тое и превозноси́мое во ве́ки.

Реши́телю все́х долго́в грехо́вных, Го́споди, благода́ть пода́ждь проще́ния прегреши́вшей стране́ Росси́йстей, ю́же наказа́л еси́ ра́нами го́рькими. Оба́че не во гне́ве Твое́м, но по мно́жеству щедро́т Твои́х и неизрече́нней ми́лости Твое́й очи́сти зе́млю правосла́вную от безбо́жных враго́в, возста́ви, Ще́дрый, ца́ря Пома́занника Твоего́ и услы́ши ны́, ми́р це́ркви и спасе́ние лю́дем Твои́м да́руй, мо́лит Тя́ ца́рь страстоте́рпец и ве́сь безчи́сленный со́нм но́вых му́ченик, Еди́наго благослове́ннаго Бо́га оте́ц на́ших.

Богородичен: Богоро́дице Де́во, ро́ждшая Сло́во па́че сло́ва, Зижди́теля Твоего́, Того́ моли́ с царе́м великому́чеником, цари́цею и ча́ды и слуги́ и про́чими ца́рственными му́ченики и все́ми новому́ченики Росси́йскими, поми́ловати ду́ши на́ша.

Пе́снь 8.

Ирмос: В пе́щь о́гненную ко отроко́м евре́йским снизше́дшаго, / и пла́мень в ро́су прело́жшаго Бо́га, / по́йте, дела́, я́ко Го́спода, / и превозноси́те во вся́ ве́ки.

Шу́яго стоя́ния изба́ви на́с, Го́споди, вся́ к по́льзе на́шей стро́яй, посла́вый о́гненное очище́ние стране́ на́шей, да непреста́нно взыва́ем: благослови́те вся́ дела́ Госпо́дня Го́спода.

Имамы сокро́вище ве́лие ве́ру святу́ю, ю́же Христо́с на́м недосто́йным даде́, да сохрани́м ю́ во благоде́нствии и во страда́ниих, я́коже со́нм вели́кий но́вых страстоте́рпец да́же до сме́рти ве́ру сохрани́, и да глаго́лем с ни́ми: Го́спода по́йте дела́ и превозноси́те во ве́ки.

Возжела́в всеблаги́й Бо́г яви́ти кре́пость ве́ры и си́лу терпе́ния ца́рственных му́ченик, даде́ и́м испи́ти ча́шу го́рьких страда́ний и прия́ти му́ченическую сме́рть, они́ же не поропта́ша, но я́ко а́гнцы незло́бивии не отверзо́ша у́ст свои́х, с терпе́нием же и ра́достию вся́ претерпе́ша, взыва́юще: Го́спода по́йте и превозноси́те во ве́ки.

Богородичен: Спасе́ния хода́таица на́м яви́лася еси́, Богоро́дице, ро́ждшая Спа́са и Влады́ку все́х, те́мже мо́лим Тя́: избавле́ние от безбо́жник исхода́тайствуй лю́те стра́ждущей стране́ Росси́йстей, и спасе́ния сподо́би все́х песносло́вящих Тя́ ве́рно во вся́ ве́ки.

На 9-й песни поем песнь Пресвятыя Богородицы:

Вели́чит душа́ Моя́ Го́спода и возра́довася дух Мой о Бо́зе Спа́се Мое́м.

К коемуждо стиху припеваем: Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Я́ко призре́ на смире́ние рабы́ Своея́, се бо, от ны́не ублажа́т Мя вси ро́ди.

Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Я́ко сотвори́ Мне вели́чие Си́льный, и свя́то и́мя Его́, и ми́лость Его́ в ро́ды родо́в боя́щимся Его́.

Сотвори́ держа́ву мы́шцею Свое́ю, расточи́ го́рдыя мы́слию се́рдца их.

Низложи́ си́льныя со престо́л, и вознесе́ смире́нныя, а́лчущия испо́лни благ, и богатя́щияся отпусти́ тщи.

Восприя́т Изра́иля о́трока Своего́, помяну́ти ми́лости, я́коже глаго́ла ко отце́м на́шим, Авраа́му и се́мени его́ да́же до ве́ка.

Пе́снь 9.

Ирмос: От Бо́га Бо́га Сло́ва, / неизрече́нною му́дростию прише́дшаго обнови́ти Ада́ма, / я́дию в тле́ние па́дшаго лю́те, / от Святы́я Де́вы неизрече́нно воплоти́вшагося на́с ра́ди, / ве́рнии, единому́дренно пе́сньми велича́ем.

Широ́кий пу́ть греха́, вводя́й в поги́бель, и мно́зи су́ть входя́щии и́м, рече́ Госпо́дь. Не послу́шаша сего́ ева́нгельскаго гла́са лю́дие Росси́йстии, и гне́в Бо́жий пости́же и́х, от него́же изба́ви на́с, Христе́, мо́лит Тя́ святы́й великому́ченик ца́рь Никола́й и и́же с ни́м убие́ннии, и я́ко Человеколю́бец поми́луй и спаси́ ду́ши на́ша.

Иису́се Христе́ Бо́же на́ш, обрати́ ны́ по мно́жеству ми́лости Твоея́ и спасе́мся, при́зри с небесе́ ми́лостию и любо́вию, и ви́ждь, я́ко пре́дал еси́ на́с в ру́ки беззако́нных и есмы́ смире́ни по все́й земли́ гре́х ра́ди на́ших. И ны́не возсле́дуем все́м се́рдцем, и бои́мся Тебе́, и и́щем лица́ Твоего́. Не посрами́ на́с, моли́твами святы́х ца́рственных страстоте́рпцев, но спаси́ ду́ши на́ша.

Яви́, Го́споди, си́лу Твою́, мо́лит Тя́ ца́рь страстоте́рпец, изми́ на́с от безбо́жных вра́г на́ших по чудесе́м Твои́м, и сотвори́ с на́ми по кро́тости Твое́й и по мно́жеству ми́лости Твоея́, и да посра́мятся вси́ явля́ющии рабо́м Твои́м зла́я, и кре́пость и́х да сокруши́тся и да разуме́ют, я́ко Ты́ еси́ Госпо́дь Бо́г еди́н по все́й вселе́нней, сла́вен и спаса́яй ду́ши на́ша.

Богородичен: Ты́ еси́ кре́пость на́ша, Ты́ еси́ похвала́ и ра́дование, храни́тельница на́ша, заступле́ние, прибе́жище, предста́тельница непобеди́мая и покро́в страны́ Росси́йския. Пречи́стая Богоро́дице, с царе́м му́чеником и вели́ким со́нмом новому́ченик моли́ спасти́ рабы́ Твоя́.

Свети́лен:

Страда́вшии Тебе́ ра́ди ца́рственнии му́ченицы, Христе́, / мно́гия му́ки претерпе́ша, / и сла́вныя венцы́ прия́ша на небесе́х, / да мо́лятся о душа́х на́ших.

Сла́ва, и ны́не, Богородичен:

По Бо́зе упова́ние иму́ще на Тя́, / Пречи́стая Богоро́дице, / мо́лим Ти́ ся: ро́ждшагося из Тебе́ умоли́ / дарова́ти ми́р вселе́нней и ве́лию ми́лость.

Хвали́тны псалмы́, глас 3:

Вся́кое дыха́ние да хва́лит Го́спода./ Хвали́те Го́спода с небе́с,/ хвали́те Его́ в вы́шних.// Тебе́ подоба́ет песнь Бо́гу.

Хвали́те Его́ вси а́нгели Его́,/ хвали́те Его́ вся си́лы Его́.// Тебе́ подоба́ет песнь Бо́гу.

Сти́хиры, глас 3:

Стих: Сотвори́ти в них суд напи́сан/ сла́ва сия́ бу́дет всем преподо́бным Его́.

Агнцы чи́стыя приведо́стеся ко Влады́це, / страстоте́рпцы ца́рственнии му́ченицы, / Того́ моли́те спасти́ ду́ши на́ша.

Стих: Хвали́те Его́ на си́лах Его́,/ хвали́те Его́ по мно́жеству вели́чествия Его́.

Стих: Хвали́те Его́ в тимпа́не и ли́це,/ хвали́те Его́ во стру́нах и орга́не.

Ра́ны ва́ша и я́звы, / сла́внии ца́рственнии му́ченицы, / я́звы грехо́вныя исцеля́ют все́х ве́рных, / святи́и страда́льцы Госпо́дни, / мно́гому терпе́нию науча́юще.

Стих: Хвали́те Его́ в кимва́лех доброгла́сных, хвали́те Его́ в кимва́лех восклица́ния. / Вся́кое дыха́ние да хва́лит Го́спода.

Лю́тыми ра́нами и страда́ньми му́чими, / святи́и ца́рственнии страстоте́рпцы, / не отверго́стеся и́стинныя Жи́зни — Го́спода на́шего, / ни богобо́рцев устраши́стеся, / те́мже моли́твами ва́шими / все́х на́с утверди́те.

Глас 6: Сла́ва Отцу́ и Сы́ну и Свято́му Ду́ху

Моли́твами, Христе́, святы́х му́ченик Твои́х, / убие́нных за ве́ру в Тя́, / вели́ких князе́й: Михаи́ла, Па́вла, Дими́трия и Гео́ргия, / и ве́рных ца́рских слу́г: Илии́, Васи́лия и Евге́ния, / Анастаси́и, Екатери́ны и Анны, / Алекси́я, Иоа́нна, Кли́мента, Иоа́нна и Никола́я, / поми́луй и спаси́ ду́ши на́ша, / я́ко Бла́г и Человеколю́бец.

Глас 6: И ны́не и при́сно и во ве́ки веко́в. Ами́нь.

Богоро́дице, Ты́ еси́ лоза́ и́стинная, / возрасти́вшая на́м пло́д живота́, / Тебе́ мо́лимся, моли́ся Влады́чице со святы́ми ца́рственными страстоте́рпцы и все́ми новому́ченики, / поми́ловати ду́ши на́ша.

Славосло́вие вели́кое:

Сла́ва в вы́шних Бо́гу, и на земли́ мир, в челове́цех благоволе́ние. Хва́лим Тя, благослови́м Тя, кла́няем Ти ся, славосло́вим Тя, благодари́м Тя, вели́кия ра́ди сла́вы Твоея́. Го́споди Царю́ Небе́сный, Бо́же О́тче Вседержи́телю, Го́споди, Сы́не Единоро́дный, Иису́се Христе́, и Святы́й Ду́ше. Го́споди Бо́же, А́гнче Бо́жий, Сы́не Оте́чь, взе́мляй грех ми́ра, поми́луй нас; взе́мляй грехи́ ми́ра, приими́ моли́тву на́шу; седя́й одесну́ю Отца́, поми́луй нас. Я́ко Ты еси́ еди́н Свят, Ты еси́ еди́н Госпо́дь, Иису́с Христо́с, в сла́ву Бо́га Отца́. Ами́нь.

На всяк день благословлю́ Тя, и восхвалю́ И́мя Твое́ во ве́ки, и в век ве́ка.

Сподо́би, Го́споди, в день сей без греха́ сохрани́тися нам. Благослове́н еси́, Го́споди, Бо́же оте́ц на́ших, и хва́льно и просла́влено И́мя Твое́ во ве́ки. Ами́нь.

Бу́ди, Го́споди, ми́лость Твоя́ на нас, я́коже упова́хом на Тя.

Благослове́н еси́, Го́споди, научи́ мя оправда́нием Твои́м. (Три́жды)

Го́споди, прибе́жище был еси́ нам в род и род. Аз рех: Го́споди, поми́луй мя, исцели́ ду́шу мою́, я́ко согреши́х Тебе́. Го́споди, к Тебе́ прибего́х, научи́ мя твори́ти во́лю Твою́, я́ко Ты еси́ Бог мой: я́ко у Тебе́ исто́чник живота́, во све́те Твое́м у́зрим свет. Проба́ви ми́лость Твою́ ве́дущим Тя.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Три́жды)

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Святы́й Безсме́ртный, поми́луй нас.

Святы́й Бо́же, Святы́й Кре́пкий, Святы́й Безсме́ртный, поми́луй нас.

Тропа́рь, глас 5:

Утверди́, Бо́же, святу́ю правосла́вную ве́ру, правосла́вных христиа́н во век ве́ка.

Честне́йшую Херуви́м и Сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу, Тя велича́ем.

Сла́ва, и ны́не. Го́споди, поми́луй. (Три́жды) Благослови́.

Господи Иисусе Христе, Сыне Божий, моли́твами Пречи́стыя Своея́ Ма́тере, святых Царственных страстотерпцев: благове́рного царя му́ченика Никола́я, цари́цы му́ченицы Алекса́ндры, царе́вича Алекси́я, царе́вен Ольги, Татиа́ны, Мари́и и Анастаси́и, преподобному́чениц княги́ни Елисаве́ты и и́нокини Варва́ры, святы́х благове́рных му́чеников ца́рскаго ро́да и ве́рных слуг с ни́ми убие́нных, преподобных и богоносных отец наших и всех святы́х, поми́луй и спаси нас я́ко Благ и Челове́колюбец.

Многоле́тие:

Вели́каго Господи́на и Отца́ на́шего Кири́лла,/ Святе́йшаго Патри́арха Моско́вского и всея́ Руси́,/ и Господи́на на́шего (Высоко-) Преосвяще́ннейшаго (имярек),/ (архи-)епи́скопа (митрополита (титул)),/ богохрани́мую страну́ на́шу Росси́йскую,/ и вся правосла́вныя христи́аны,// Го́споди, сохрани́ их на мно́гая ле́та.