Шрифт

Богослужебные тексты для домашнего употребления

Дни памяти святых

Последование Всеношного бдения в день памяти преподобного Амвросия Оптинского. Для домашнего (келейного) совершения

ВСЕНО́ЩНОЕ БДЕ́НИЕ

ВЕЛИ́КАЯ ВЕЧЕ́РНЯ

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас. Ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Трижды.)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, (трижды). Сла́ва, и ны́не:

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Таже, Го́споди, поми́луй, (12), Сла́ва, и ны́не:

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 103:

Поется часть псалма:

Благослови́, душе́ моя́, Го́спода. / Благослове́н еси́, Го́споди. / Го́споди, Бо́же мой, возвели́чился еси́ зело́. / Благослове́н еси́, Го́споди. / Во испове́дание и в велеле́поту обле́клся еси́. / Благослове́н еси́, Го́споди. / Посреде́ гор про́йдут во́ды. / Ди́вна дела́ Твоя́, Го́споди. / Вся прему́дростию сотвори́л еси́. / Сла́ва Ти, Го́споди, сотвори́вшему вся.

Или читается псалом полностью:

Благослови́, душе́ моя́, Го́спода. Го́споди, Бо́же мой, возвели́чился еси́ зело́. Во испове́дание и в велеле́поту обле́клся еси́. Одея́йся све́том, я́ко ри́зою, простира́яй не́бо, я́ко ко́жу. Покрыва́яй вода́ми превы́спренняя Своя́, полага́яй о́блаки на восхожде́ние Свое́, ходя́й на крилу́ ве́треню. Творя́й А́нгелы Своя́ ду́хи и слуги́ Своя́ пла́мень о́гненный. Основа́яй зе́млю на тве́рди ея́, не преклони́тся в век ве́ка. Бе́здна, я́ко ри́за, одея́ние ея́, на гора́х ста́нут во́ды, от запреще́ния Твоего́ побе́гнут, от гла́са гро́ма Твоего́ убоя́тся. Восхо́дят го́ры и нисхо́дят поля́ в ме́сто, е́же основа́л еси́ им. Преде́л положи́л еси́, eго́же не пре́йдут, ниже́ обратя́тся покры́ти зе́млю. Посыла́яй исто́чники в де́брех, посреде́ гор про́йдут во́ды. Напая́ют вся зве́ри се́льныя, ждут она́гри в жа́жду свою́. На ты́х пти́цы небе́сныя привита́ют, от среды́ ка́мения дадя́т глас. Напая́яй го́ры от превы́спренних Свои́х, от плода́ дел Твои́х насы́тится земля́. Прозяба́яй траву́ ското́м, и злак на слу́жбу челове́ком, извести́ хлеб от земли́. И вино́ весели́т се́рдце челове́ка, ума́стити лице́ еле́ем, и хлеб се́рдце челове́ка укрепи́т. Насы́тятся древа́ польска́я, ке́дри Лива́нстии, и́хже еси́ насади́л. Та́мо пти́цы вогнездя́тся, ероди́ево жили́ще предводи́тельствует и́ми. Го́ры высо́кия еле́нем, ка́мень прибе́жище за́яцем. Сотвори́л есть луну́ во времена́, со́лнце позна́ за́пад свой. Положи́л еси́ тму, и бысть нощь, в не́йже про́йдут вси зве́рие дубра́внии. Ски́мни рыка́ющии, восхи́тити и взыска́ти от Бо́га пи́щу себе́. Возсия́ со́лнце и собра́шася и в ло́жах свои́х ля́гут. Изы́дет челове́к на де́ло свое́ и на де́лание свое́ до ве́чера. Я́ко возвели́чишася дела́ Твоя́, Го́споди, вся прему́дростию сотвори́л еси́, испо́лнися земля́ тва́ри Твоея́. Сие́ мо́ре вели́кое и простра́нное, та́мо га́ди, и́мже несть числа́, живо́тная ма́лая с вели́кими, та́мо корабли́ препла́вают, змий сей, eго́же созда́л еси руга́тися eму́. Вся к Тебе́ ча́ют, да́ти пи́щу им во бла́го вре́мя. Да́вшу Тебе́ им соберу́т, отве́рзшу Тебе́ ру́ку вся́ческая испо́лнятся бла́гости, отвра́щшу же Тебе́ лице́, возмяту́тся, отъи́меши дух их, и исче́знут, и в персть свою́ возвратя́тся. По́слеши Ду́ха Твоего́, и сози́ждутся, и обнови́ши лице́ земли́. Бу́ди сла́ва Госпо́дня во ве́ки, возвесели́тся Госпо́дь о де́лех Свои́х, призира́яй на зе́млю, и творя́й ю́ трясти́ся, прикаса́яйся гора́м, и дымя́тся. Воспою́ Го́сподеви в животе́ мое́м, пою́ Бо́гу моему́, до́ндеже есмь, да услади́тся Ему́ бесе́да моя́, аз же возвеселю́ся о Го́споде. Да исче́знут гре́шницы от земли́, и беззако́нницы, я́коже не бы́ти им. Благослови́, душе́ моя́, Го́спода.

Со́лнце позна́ за́пад свой. Положи́л еси́ тму, и бысть нощь. Я́ко возвели́чишася дела́ Твоя́, Го́споди, вся прему́дростию сотвори́л еси́.

Сла́ва, и ны́не: Аллилу́иа, аллилу́иа, аллилу́иа, сла́ва Тебе́ Бо́же. Трижды.

Блаже́н муж:

Блаже́н муж, и́же не и́де на сове́т нечести́вых.

Аллилу́иа, аллилу́иа, аллилу́иа.

Я́ко весть Госпо́дь путь пра́ведных, и путь нечести́вых поги́бнет.

Аллилу́иа, аллилу́иа, аллилу́иа.

Рабо́тайте Го́сподеви со стра́хом и ра́дуйтеся Ему́ с тре́петом.

Аллилу́иа, аллилу́иа, аллилу́иа.

Блаже́ни вси наде́ющиися Нань.

Аллилу́иа, аллилу́иа, аллилу́иа.

Воскресни́, Го́споди, спаси́ мя, Бо́же мой.

Аллилу́иа, аллилу́иа, аллилу́иа.

Госпо́дне есть спасе́ние, и на лю́дех Твои́х благослове́ние Твое́.

Аллилу́иа, аллилу́иа, аллилу́иа.

Сла́ва Отцу́ и Сы́ну и Свято́му Духу.

Аллилу́иа, аллилу́иа, аллилу́иа.

И ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Го́споди, воззва́х, глас 8:

Го́споди, воззва́х к Тебе́, услы́ши мя./ Услы́ши мя, Го́споди./ Го́споди, воззва́х к Тебе́, услы́ши мя:/ вонми́ гла́су моле́ния моего́,/ внегда́ воззва́ти ми к Тебе́.// Услы́ши мя, Го́споди.

Да испра́вится моли́тва моя́,/ я́ко кади́ло пред Тобо́ю,/ воздея́ние руку́ мое́ю/ – же́ртва вече́рняя.// Услы́ши мя, Го́споди.

Стихи́ры пра́здника, глас 8:

Стих: А́ще беззако́ния на́зриши, Го́споди, Го́споди, кто постои́т? Я́ко у Тебе́ очище́ние есть.

Дне́сь све́тло торжеству́ет / Свя́то-Введе́нская пу́стынь, / прославля́ющи своего́ вели́каго моли́твенника, / преподо́бнаго ста́рца Оптинскаго, / Амвро́сия чудотво́рца, / и́же зде́ подвиза́ся ре́вностно / и, возше́д на ле́ствицу духо́вную, / просия́л е́сть, я́ко свети́льник огнезра́чный, / по все́й земли́ Росси́йстей.

Стих: И́мене ра́ди Твоего́ потерпе́х Тя, Го́споди, потерпе́ душа́ моя́ в сло́во Твое́, упова́ душа́ моя́ на Го́спода.

Прииди́те, ве́рнии лю́дие, / воздади́м досто́йное поклоне́ние / ны́не просла́вленному ста́рцу Бо́жию / и согла́сно воспои́м ему́: / преподо́бне о́тче на́ш Амвро́сие, / моли́твенниче на́ш пред престо́лом Царя́ Небе́снаго, / не забу́ди на́с, убо́гих ча́д твои́х, / ча́ющих твоея́ по́мощи, / и изба́ви на́с от вся́кия ну́жды и печа́ли.

Стих: От стра́жи у́тренния до но́щи, от стра́жи у́тренния да упова́ет Изра́иль на Го́спода.

Что́ тя нарече́м, преподо́бне Амвро́сие? / В по́двизех бо возше́л еси́ / на го́ру свя́тости и соверше́нства, / я́ко земны́й Ангел и челове́к небе́сный / ны́не же ра́дуешися и весели́шися в черто́зех Царя́ ца́рствующих, / и та́мо зри́ши сла́ву и добро́ту неизрече́нную, / и с го́рними си́лами непреста́нно / воспева́еши трисвяту́ю пе́снь / Бо́гу, в Тро́ице сла́вимому.

Стих: Я́ко у Го́спода ми́лость, и мно́гое у Него́ избавле́ние, и Той изба́вит Изра́иля от всех беззако́ний eго́.

Глас 2: Преподо́бне о́тче Амвро́сие, / кто́ испове́сть труды́ и боле́зни твоя́, / я́же поне́сл еси́ ра́ди Ца́рствия небе́снаго? / И бы́л еси́ о́браз терпе́ния и смире́ния, / кро́тости и воздержа́ния, / целому́дрия и послуша́ния, / те́миже обогати́л еси́ ду́шу твою́ / и стяжа́л еси́ да́ры Ду́ха Всесвята́го, / Имже вся́ка душа́ живи́тся.

Стих: Хвали́те Го́спода вси язы́цы, похвали́те Его́ вси лю́дие.

Благословля́л еси́ Го́спода / на вся́кое вре́мя, / в ра́дости и печа́ли земна́го жития́, / всегда́ хвала́ Его́ бы́сть во усте́х твои́х, / да услы́шат кро́тцыи и немощству́ющии гла́с тво́й и возвеселя́тся, / взыска́л бо еси́ Го́спода, и услы́ша тя́, / и от все́х скорбе́й твои́х изба́ви тя́. / Присту́пим и мы́, бра́тие, к Бо́гу и просвети́мся, / и ли́ца на́ша не постыдя́тся.

Стих: Я́ко утверди́ся ми́лость Его́ на нас, и и́стина Госпо́дня пребыва́ет во век.

Святы́й уго́дниче Бо́жий, / ве́ры правосла́вныя ревни́телю, / сосу́де благода́ти избра́нный, / ди́вным житие́м твои́м пу́стынь Оптина просла́вися, / и вси́ концы́ земли́ на́шея возра́довашася, / тебе́ бо вси́ стяжа́хом сте́ну и утвержде́ние, / моли́ся при́сно ко Го́споду, / всеми́лостивому Бо́гу на́шему, / да спасе́т ду́ши на́ша.

Глас 1: Сла́ва Отцу́ и Сы́ну и Свято́му Ду́ху.

Прииди́те, мона́хов мно́жество, хвале́бными пе́сньми па́мять почти́м богоно́снаго ста́рца Амвро́сия, Оптины пу́стыни украше́ния, се́ бо, я́ко фи́никс, насажде́нный в дому́ Бо́жием, процве́л и возблагоуха́л е́сть я́ко цве́т неувяда́емый, и ны́не предстои́т пред Царе́м Небе́сным, моля́ся о душа́х на́ших.

Глас 1: И ны́не и при́сно и во ве́ки веко́в. Ами́нь.

Всеми́рную сла́ву, от челове́к прозя́бшую и Влады́ку ро́ждшую, небе́сную две́рь воспои́м, Мари́ю Де́ву, безпло́тных пе́снь и ве́рных удобре́ние: Сия́ бо яви́ся не́бо и хра́м Божества́, Сия́, прегражде́ние вражды́ разруши́вши, ми́р введе́ и Ца́рствие отве́рзе; Сию́ у́бо иму́ще ве́ры утвержде́ние, Побо́рника и́мамы, из Нея́ ро́ждшагося Го́спода. Дерза́йте у́бо, дерза́йте, лю́дие Бо́жии, и́бо То́й победи́т враги́, я́ко Всеси́лен.

Све́те Тихи́й:

Све́те Ти́хий святы́я сла́вы Безсме́ртнаго Отца́ Небе́снаго, Свята́го, Блаже́ннаго, Иису́се Христе́! Прише́дше на за́пад со́лнца, ви́девше свет вече́рний, пое́м Отца́, Сы́на и Свята́го Ду́ха, Бо́га. Досто́ин еси́ во вся времена́ пет бы́ти гла́сы преподо́бными, Сы́не Бо́жий, живо́т дая́й; те́мже мир Тя сла́вит.

1. При́тчей чте́ние

Па́мять пра́веднаго с похвала́ми, и благослове́ние Госпо́дне на главе́ его́. Блаже́н челове́к, и́же обре́те прему́дрость, и сме́ртен, и́же уве́де ра́зум. Лу́чше бо сию́ купова́ти, не́жели зла́та и сребра́ сокро́вища. Честне́йшая же е́сть ка́мений многоце́нных, все́ же честно́е недосто́йно ея́ е́сть. Долгота́ бо дне́й и ле́та живота́ в десни́це ея́, в шу́йце же ея́ бога́тство и сла́ва. От у́ст ея́ исхо́дит пра́вда, зако́н же и ми́лость на язы́це но́сит. Послу́шайте у́бо мене́, о ча́да, честна́я бо реку́, и блаже́н челове́к, и́же пути́ моя́ сохрани́т: исхо́ди бо мои́ — исхо́ди живота́, и уготовля́ется хоте́ние от Го́спода. Сего́ ра́ди молю́ ва́с и предлага́ю мо́й гла́с сыново́м челове́ческим. Я́ко а́з, прему́дрость, устро́их сове́т, и ра́зум и смы́сл аз призва́х. Мо́й сове́т и утвержде́ние, мо́й ра́зум, моя́ же кре́пость. Аз мене́ лю́бящия люблю́, и́щущии же мене́ обря́щут благода́ть. Разуме́йте у́бо, незло́бивии, кова́рство, ненака́зании же, прилага́йте сердца́. Послу́шайте мене́ и па́ки, честна́я бо реку́, и отве́рзу от усте́н пра́вая, я́ко и́стине поучи́тся горта́нь мой, ме́рзки же пре́до мно́ю устне́ лжи́выя. С пра́вдою вси́ глаго́лы у́ст мои́х, ничто́же в ни́х стро́потно, ниже́ развраще́нно. Вся́ пра́ва су́ть разумева́ющим и про́ста обрета́ющим ра́зум. Науча́ю бо ва́с и́стине, да бу́дет о Го́споде наде́жда ва́ша, и испо́лнитеся Ду́ха.

2. Прему́дрости Соломо́новы чте́ние

Уста́ пра́веднаго ка́плют прему́дрость, устне́ же муже́й му́дрых ве́дят благода́ть. Уста́ му́дрых поуча́тся прему́дрости, пра́вда же избавля́ет и́х от сме́рти. Сконча́вшуся му́жу пра́ведну, не поги́бнет наде́жда. Сы́н бо пра́веден ражда́ется в живо́т и во благи́х свои́х пло́д пра́вды объи́мет. Све́т пра́ведным всегда́, и от Го́спода обря́щут благода́ть и сла́ву. Язы́к му́дрых до́брая све́сть, и в се́рдце и́х почи́ет му́дрость. Лю́бит Госпо́дь преподо́бная сердца́, прия́тни же Ему́ вси́ непоро́чнии в пути́. Му́дрость Госпо́дня просвеща́ет лице́ разу́мнаго: постига́ет бо жела́ющия ю́, пре́жде да́же разуме́ти ю́, и удо́бь у́зрится от лю́бящих ю́. Утреневавый к не́й не утруди́тся, и бдя́й ея́ ра́ди вско́ре без печа́ли бу́дет. Яко досто́йных ея́ сама́ обхо́дит, и́щущи, и во стезя́х ея́ явля́ется и́м благоприе́мне. Му́дрости никогда́же одоле́ет зло́ба. Си́х ра́ди и рачи́тель бы́х добро́ты ея́, и возлюби́х ю́, и поиска́х от ю́ности моея́. И взыска́х неве́сту привести́ себе́, я́ко все́х Влады́ка возлюби́ ю́. Таи́бница бо е́сть Бо́жия хи́трости и обрета́тельница де́л Его́. Труды́ ея́ су́ть доброде́тели: целому́дрию же и ра́зуму та́ учи́т, пра́вде и му́жеству, и́хже потре́бнее ничто́же е́сть в житии́ челове́ком. Аще же и мно́гаго иску́сства жела́ет кто́, ве́сть дре́вняя, и бы́ти хотя́щая разсмо́трит. Све́сть изви́тия слове́с и разреше́ния гада́ний, зна́мения и чудеса́ проразуме́ет, и сбытия́ време́н и ле́т, и все́м сове́тник е́сть бла́г. Яко безсме́ртие е́сть в не́й и благосла́вие во обще́нии слове́с ея́. Сего́ ра́ди бесе́довах ко Го́споду, и помоли́хся Ему́, и ре́х от всего́ се́рдца моего́: Бо́же отце́в и Го́споди ми́лости, сотвори́вый вся́ сло́вом Твои́м и му́дростию Твое́ю устро́ивый челове́ка, да владе́ет бы́вшими от Тебе́ тварьми́ и да управля́ет ми́р в преподо́бии и пра́вде. Да́ждь ми́ Твои́х Престо́лов приседя́щую прему́дрость и не отлучи́ мене́ от о́трок Твои́х, я́ко а́з ра́б Тво́й и сы́н рабы́ни Твоея́. Посли́ ю́ с Небе́с от свята́го жили́ща Твоего́ и от Престо́ла сла́вы Твоея́, да, су́щи со мно́ю, научи́т мя́, что́ благоуго́дно е́сть пред Тобо́ю, и наста́вит мя́ в ра́зум, и сохрани́т мя́ в сла́ве свое́й. Помышле́ния бо сме́ртных вся́ боязли́ва и погреши́тельна умышле́ния и́х.

3. Прему́дрости Соломо́новы чте́ние

Пра́ведных ду́ши в руце́ Бо́жией, и не прико́снется и́х му́ка. Непщева́ни бы́ша во очесе́х безу́мных умре́ти, и вмени́ся озлобле́ние исхо́д и́х, и е́же от на́с ше́ствие — сокруше́ние, они́ же су́ть в ми́ре. Ибо пред лице́м челове́ческим, а́ще и му́ку прии́мут, упова́ние и́х безсме́ртия испо́лнено. И вма́ле нака́зани бы́вше, вели́кими благоде́тельствовани бу́дут, я́ко Бо́г искуси́ я́ и обре́те и́х досто́йны Себе́. Я́ко зла́то в горни́ле, искуси́ и́х и, я́ко всепло́дие же́ртвенное, прия́т я́. И во вре́мя посеще́ния и́х, возсия́ют, и я́ко и́скры по сте́блию, потеку́т. Су́дят язы́ком и облада́ют людьми́, и воцари́тся Госпо́дь в ни́х во ве́ки. Наде́ющиися На́нь разуме́ют и́стину и ве́рнии в любви́ пребу́дут Ему́, я́ко благода́ть и ми́лость в преподо́бных Его́ и посеще́ние во избра́нных Его́.

Сподо́би, Го́споди:

Сподо́би, Го́споди, в ве́чер сей без греха́ сохрани́тися нам. Благослове́н еси́, Го́споди, Бо́же оте́ц на́ших, и хва́льно и просла́влено и́мя Твое́ во ве́ки. Ами́нь.

Бу́ди, Го́споди, ми́лость Твоя́ на нас, я́коже упова́хом на Тя. Благослове́н еси́, Го́споди, научи́ мя оправда́нием Твои́м. Благослове́н еси́, Влады́ко, вразуми́ мя оправда́нием Твои́м. Благослове́н еси́, Святы́й, просвети́ мя оправда́нии Твои́ми.

Го́споди, ми́лость Твоя́ во век, дел руку́ Твое́ю не пре́зри. Тебе́ подоба́ет хвала́, Тебе́ подоба́ет пе́ние, Тебе́ сла́ва подоба́ет. Отцу́ и Сы́ну и Свято́му Ду́ху, ны́не и при́сно и во ве́ки веко́в. Ами́нь.

На лити́и стихи́ра свята́го, гла́с 6:

Преподо́бне о́тче на́ш Амвро́сие, всея́ Росси́и наста́вниче богому́дрый, же́зле немощны́х и стра́ждущих, о́бразе ве́ры и благоче́стия, пропове́дниче смире́ния и терпе́ния, моли́твенниче за Оте́чество на́ше правосла́вное, дне́сь ублажа́ем честну́ю твою́ па́мять, с ве́рою и любо́вию притека́юще, взыва́ем ти́ дерзнове́нно: моли́ Христа́ Бо́га спасти́ся душа́м на́шим.

Сла́ва, гла́с 8: Прииди́те, ве́рнии лю́дие, воздади́м досто́йное поклоне́ние ны́не просла́вленному ста́рцу Бо́жию и согла́сно воспои́м ему́: преподо́бне о́тче на́ш Амвро́сие, моли́твенниче на́ш пред престо́лом Царя́ Небе́снаго, не забу́ди на́с, убо́гих ча́д твои́х, ча́ющих твоея́ по́мощи, и изба́ви на́с от вся́кия ну́жды и печа́ли.

И ны́не, богоро́дичен, гла́с то́йже: Безневе́стная Де́во, Яже Бо́га неизрече́нно заче́нши пло́тию, Ма́ти Бо́га Вы́шняго, Твои́х рабо́в мольбы́ приими́, Всенепоро́чная, все́м подаю́щи очище́ние прегреше́ний, ны́не на́ша моле́ния прие́млющи, моли́ спасти́ся все́м на́м.

Го́споди, поми́луй. (40 раз)

Стихи́ры на стихо́вне:

Стихиры, гла́с 5:

Пе́снь воспои́м, лю́дие, / учи́телю душеспаси́тельнаго жи́тельства, / исто́чнику любве́ Христо́вой, / вели́кому ста́рцу Амвро́сию, / мона́хов путеводи́телю, / а́лчущих пита́телю, / бе́дствующим помо́щнику, / все́м христиа́ном прибе́жищу: / приими́, уго́дниче Бо́жий, на́ша моле́ния, / ве́рных ча́д твои́х, / чту́щих святу́ю па́мять твою́.

Сти́х: Честна́ пред Го́сподем / сме́рть преподо́бных Его́.

Пра́зднующе, преподо́бне о́тче, / святу́ю па́мять твою́, / благода́рную пе́снь воспева́ем ти́, / ты́ бо ве́си ну́жды на́с, ча́д твои́х, / обремене́нных скорбьми́ мно́гими, / помога́еши на́м си́лою свы́ше / и огражда́еши, я́ко щи́т, / от вся́ких де́монских нахожде́ний, / низпосыла́я ве́лию ми́лость.

Сти́х: Блаже́н му́ж, боя́йся Го́спода, / в за́поведех Его́ восхо́щет зело́.

Притеце́м, бра́тие, / к исто́чнику све́та и́стины, / богоблаже́нному Амвро́сию, / просвети́мся его́ уче́ньми духо́вными / и с ве́рою возопии́м ку́пно: / приими́ на́ша моли́твы / и изба́ви на́с от вся́ких зо́л и скорбе́й.

Слава, гла́с 8:

Наста́вниче все́х приходя́щих к тебе́, о́тче на́ш Амвро́сие, любве́ насади́телю, ни́щих корми́телю, жа́ждущих напои́телю, гре́шников до́брый исправи́телю, неве́рных вразуми́телю, при́зри на на́с, ча́д твои́х, чту́щих святу́ю па́мять твою́.

И ны́не, Богоро́дичен:

Безневе́стная Де́во, Яже Бо́га неизрече́нно заче́нши пло́тию, Ма́ти Бо́га Вы́шняго, Твои́х рабо́в мольбы́ приими́, Всенепоро́чная, все́м подаю́щи очище́ние прегреше́ний, ны́не на́ша моле́ния прие́млющи, моли́ спасти́ся все́м на́м.

Моли́тва свята́го Симео́на Богоприи́мца:

Ны́не отпуща́еши раба́ Твоего́, Влады́ко,/ по глаго́лу Твоему́, с ми́ром;/ я́ко ви́деста о́чи мои́ спасе́ние Твое́,/ е́же еси́ угото́вал пред лице́м всех люде́й,/ свет во открове́ние язы́ков,// и сла́ву люде́й Твои́х Изра́иля.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Тропа́рь, глас 5:

Яко к целе́бному исто́чнику, притека́ем к тебе́, Амвро́сие, о́тче на́ш, ты́ бо на пу́ть спасе́ния на́с ве́рно наставля́еши, моли́твами от бе́д и напа́стей охраня́еши, в теле́сных и душе́вных ско́рбех утеша́еши, па́че же смире́нию, терпе́нию и любви́ науча́еши; моли́ человеколю́бца Христа́ и Засту́пницу усе́рдную спасти́ся душа́м на́шим. (Дважды)

Песнь Пресвятей Богородице:

Богоро́дице Де́во, ра́дуйся, / Благода́тная Мари́е, Госпо́дь с Тобо́ю; / благослове́на Ты в жена́х / и благослове́н Плод чре́ва Твоего́, / я́ко Спа́са родила́ еси́ душ на́ших. (Единожды)

Бу́ди И́мя Госпо́дне благослове́но от ны́не и до ве́ка. (Три́жды)

Псало́м 33:

Благословлю́ Го́спода на вся́кое вре́мя,/ вы́ну хвала́ Его́ во усте́х мои́х./ О Го́споде похва́лится душа́ моя́,/ да услы́шат кро́тцыи, и возвеселя́тся./ Возвели́чите Го́спода со мно́ю,/ и вознесе́м И́мя Его́ вку́пе./ Взыска́х Го́спода, и услы́ша мя,/ и от все́х скорбе́й мои́х изба́ви мя./ Приступи́те к Нему́, и просвети́теся,/ и ли́ца ва́ша не постыдя́тся./ Сей ни́щий воззва́, и Госпо́дь услы́ша и́,/ и от все́х скорбе́й его́ спасе́ и́./ Ополчи́тся а́нгел Госпо́день о́крест боя́щихся Его́,/ и изба́вит их./ Вкуси́те и ви́дите, я́ко благ Госпо́дь:/ блаже́н муж, и́же упова́ет Нань./ Бо́йтеся Го́спода, вси́ святи́и Его́,/ я́ко несть лише́ния боя́щимся Его́./ Бога́тии обнища́ша и взалка́ша:/ взыска́ющии же Го́спода// не лиша́тся вся́каго бла́га.

У́ТРЕНЯ.

Шестопса́лмие:

Сла́ва в вы́шних Бо́гу, и на земли́ мир, в челове́цех благоволе́ние. (Три́жды)

Го́споди, устне́ мои́ отве́рзеши, и уста́ моя́ возвестя́т хвалу́ Твою́. (Два́жды)

Псалом 3:

Го́споди, что ся умно́жиша стужа́ющии ми́? Мно́зи востаю́т на мя, мно́зи глаго́лют души́ мое́й: несть спасе́ния eму́ в Бо́зе eго́. Ты же, Го́споди, Засту́пник мой еси́, сла́ва моя́ и вознося́й главу́ мою́. Гла́сом мои́м ко Го́споду воззва́х, и услы́ша мя от горы́ святы́я Своея́. Аз усну́х, и спах, воста́х, я́ко Госпо́дь засту́пит мя. Не убою́ся от тем люде́й, о́крест напа́дающих на мя. Воскресни́, Го́споди, спаси́ мя, Бо́же мой, я́ко Ты порази́л еси́ вся вражду́ющыя ми всу́е: зу́бы гре́шников сокруши́л еси́. Госпо́дне есть спасе́ние, и на лю́дех Твои́х благослове́ние Твое́.

Аз усну́х, и спах, воста́х, я́ко Госпо́дь засту́пит мя.

Псалом 37:

Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́. Я́ко стре́лы Твоя́ унзо́ша во мне, и утверди́л еси́ на мне ру́ку Твою́. Несть исцеле́ния в пло́ти мое́й от лица́ гне́ва Твоего́, несть ми́ра в косте́х мои́х от лица́ грех мои́х. Я́ко беззако́ния моя́ превзыдо́ша главу́ мою́, я́ко бре́мя тя́жкое отяготе́ша на мне. Возсмерде́ша и согни́ша ра́ны моя́ от лица́ безу́мия моего́. Пострада́х и сляко́хся до конца́, весь день се́туя хожда́х. Я́ко ля́двия моя́ напо́лнишася поруга́ний, и несть исцеле́ния в пло́ти мое́й. Озло́блен бых и смири́хся до зела́, рыка́х от воздыха́ния се́рдца моего́. Го́споди, пред Тобо́ю все жела́ние мое́ и воздыха́ние мое́ от Тебе́ не утаи́ся. Се́рдце мое́ смяте́ся, оста́ви мя си́ла моя́, и свет о́чию мое́ю, и той несть со мно́ю. Дру́зи мои́ и и́скреннии мои́ пря́мо мне прибли́жишася и ста́ша, и бли́жнии мои́ отдале́че мене́ ста́ша и нужда́хуся и́щущии ду́шу мою́, и и́щущии зла́я мне глаго́лаху су́етная и льсти́вным весь день поуча́хуся. Аз же я́ко глух не слы́шах и я́ко нем не отверза́яй уст свои́х. И бых я́ко челове́к не слы́шай и не имы́й во усте́х свои́х обличе́ния. Я́ко на Тя, Го́споди, упова́х, Ты услы́шиши, Го́споди Бо́же мой. Я́ко рех: да не когда́ пора́дуют ми ся врази́ мои́: и внегда́ подвижа́тися нога́м мои́м, на мя велере́чеваша. Я́ко аз на ра́ны гото́в, и боле́знь моя́ предо мно́ю есть вы́ну. Я́ко беззако́ние мое́ аз возвещу́ и попеку́ся о гресе́ мое́м. Врази́ же мои́ живу́т и укрепи́шася па́че мене́, и умно́жишася ненави́дящии мя без пра́вды. Воздаю́щии ми зла́я возблага́я оболга́ху мя, зане́ гоня́х благосты́ню. Не оста́ви мене́, Го́споди Бо́же мой, не отступи́ от Мене́. Вонми́ в по́мощь мою́, Го́споди спасе́ния моего́.

Не оста́ви мене́, Го́споди Бо́же мой, не отступи́ от Мене́. Вонми́ в по́мощь мою́, Го́споди спасе́ния моего́.

Псалом 62:

Бо́же, Бо́же мой, к Тебе́ у́тренюю, возжада́ Тебе́ душа́ моя́, коль мно́жицею Тебе́ плоть моя́, в земли́ пу́сте и непрохо́дне, и безво́дне. Та́ко во святе́м яви́хся Тебе́, ви́дети си́лу Твою́ и сла́ву Твою́. Я́ко лу́чши ми́лость Твоя́ па́че живо́т, устне́ мои́ похвали́те Тя. Та́ко благословлю́ Тя в животе́ мое́м, о и́мени Твое́м воздежу́ ру́це мои́. Я́ко от ту́ка и ма́сти да испо́лнится душа́ моя́, и устна́ма ра́дости восхва́лят Тя уста́ моя́. А́ще помина́х Тя на посте́ли мое́й, на у́тренних поуча́хся в Тя. Я́ко был еси́ Помо́щник мой, и в кро́ве крилу́ Твое́ю возра́дуюся. Прильпе́ душа́ моя́ по Тебе́, мене́ же прия́т десни́ца Твоя́. Ти́и же всу́е иска́ша ду́шу мою́, вни́дут в преиспо́дняя земли́, предадя́тся в ру́ки ору́жия, ча́сти ли́совом бу́дут. Царь же возвесели́тся о Бо́зе, похва́лится всяк клены́йся Им, я́ко загради́шася уста́ глаго́лющих непра́ведная.

На у́тренних поуча́хся в Тя. Я́ко был еси́ Помо́щник мой, и в кро́ве крилу́ Твое́ю возра́дуюся. Прильпе́ душа́ моя́ по Тебе́, мене́ же прия́т десни́ца Твоя́.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Го́споди поми́луй. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Псалом 87:

Го́споди Бо́же спасе́ния моего́, во дни воззва́х, и в нощи́ пред Тобо́ю. Да вни́дет пред Тя моли́тва моя́: приклони́ у́хо Твое́ к моле́нию моему́, я́ко испо́лнися зол душа́ моя́, и живо́т мой аду прибли́жися. Привмене́н бых с низходя́щими в ров, бых я́ко челове́к без по́мощи, в ме́ртвых свобо́дь, я́ко я́звеннии спя́щии во гро́бе, и́хже не помяну́л еси́ ктому́, и ти́и от руки́ Твоея́ отринове́ни бы́ша. Положи́ша мя в ро́ве преиспо́днем, в те́мных и се́ни сме́ртней. На мне утверди́ся я́рость Твоя́, и вся во́лны Твоя́ наве́л еси́ на мя. Уда́лил еси́ зна́емых мои́х от Мене́, положи́ша мя ме́рзость себе́: пре́дан бых и не исхожда́х. О́чи мои́ изнемого́сте от нищеты́, воззва́х к Тебе́, Го́споди, весь день, возде́х к Тебе́ ру́це мои́. Еда́ ме́ртвыми твори́ши чудеса́? Или́ вра́чеве воскреся́т, и испове́дятся Тебе́? Еда́ пове́сть кто во гро́бе ми́лость Твою́, и и́стину Твою́ в поги́бели? Еда́ позна́на бу́дут во тьме чудеса́ Твоя́, и пра́вда Твоя́ в земли́ забве́нней? И аз к Тебе́, Го́споди, воззва́х и у́тро моли́тва моя́ предвари́т Тя. Вску́ю, Го́споди, отре́еши ду́шу мою́, отвраща́еши лице́ Твое́ от Мене́? Нищ есмь аз, и в труде́х от ю́ности моея́; возне́с же ся, смири́хся, и изнемого́х. На мне преидо́ша гне́ви Твои́, устраше́ния Твоя́ возмути́ша мя, обыдо́ша мя я́ко вода́, весь день одержа́ша мя вку́пе. Уда́лил еси́ от Мене́ дру́га и и́скренняго, и зна́емых мои́х от страсте́й.

Го́споди Бо́же спасе́ния моего́, во дни воззва́х, и в нощи́ пред Тобо́ю. Да вни́дет пред Тя моли́тва моя́: приклони́ у́хо Твое́ к моле́нию моему́.

Псалом 102:

Благослови́, душе́ моя́, Го́спода, и вся вну́тренняя моя́ и́мя свя́тое Его́. Благослови́, душе́ моя́, Го́спода, и не забыва́й всех воздая́ний Его́, очища́ющаго вся беззако́ния твоя́, исцеля́ющаго вся неду́ги твоя́, избавля́ющаго от истле́ния живо́т твой, венча́ющаго тя ми́лостию и щедро́тами, исполня́ющаго во благи́х жела́ние твое́: обнови́тся я́ко о́рля ю́ность твоя́. Творя́й ми́лостыни Госпо́дь, и судьбу́ всем оби́димым. Сказа́ пути́ Своя́ Моисе́ови, сыново́м Изра́илевым хоте́ния Своя́: Щедр и Ми́лостив Госпо́дь, Долготерпели́в и Многоми́лостив. Не до конца́ прогне́вается, ниже́ во век вражду́ет, не по беззако́нием на́шым сотвори́л есть нам, ниже́ по грехо́м на́шым возда́л есть нам. Я́ко по высоте́ небе́сней от земли́, утверди́л есть Госпо́дь ми́лость Свою́ на боя́щихся Его́. Ели́ко отстоя́т восто́цы от за́пад, уда́лил есть от нас беззако́ния на́ша. Я́коже ще́дрит оте́ц сы́ны, уще́дри Госпо́дь боя́щихся Его́. Я́ко Той позна́ созда́ние на́ше, помяну́, я́ко персть есмы́. Челове́к, я́ко трава́ дни́е eго́, я́ко цвет се́льный, та́ко оцвете́т, я́ко дух про́йде в нем, и не бу́дет, и не позна́ет ктому́ ме́ста своего́. Ми́лость же Госпо́дня от ве́ка и до ве́ка на боя́щихся Его́, и пра́вда Его́ на сыне́х сыно́в, храня́щих заве́т Его́, и по́мнящих за́поведи Его́ твори́ти я́. Госпо́дь на Небеси́ угото́ва Престо́л Свой, и Ца́рство Его́ все́ми облада́ет. Благослови́те Го́спода вси А́нгели Его́, си́льнии кре́постию, творя́щии сло́во Его́, услы́шати глас слове́с Его́. Благослови́те Го́спода вся Си́лы Его́, слуги́ Его́, творя́щии во́лю Его́. Благослови́те Го́спода вся дела́ Его́, на вся́ком ме́сте влады́чества Его́, благослови́, душе́ моя́, Го́спода.

На вся́ком ме́сте влады́чества Его́, благослови́, душе́ моя́, Го́спода.

Псалом 142:

Го́споди, услы́ши моли́тву мою́, внуши́ моле́ние мое́ во и́стине Твое́й, услы́ши мя в пра́вде Твое́й и не вни́ди в суд с рабо́м Твои́м, я́ко не оправди́тся пред Тобо́ю всяк живы́й. Я́ко погна́ враг ду́шу мою́, смири́л есть в зе́млю живо́т мой, посади́л мя есть в те́мных, я́ко ме́ртвыя ве́ка. И уны́ во мне дух мой, во мне смяте́ся се́рдце мое́. Помяну́х дни дре́вния, поучи́хся во всех де́лех Твои́х, в творе́ниих руку́ Твое́ю поуча́хся. Возде́х к Тебе́ ру́це мои́, душа́ моя́, я́ко земля́ безво́дная Тебе́. Ско́ро услы́ши мя, Го́споди, исчезе́ дух мой, не отврати́ лица́ Твоего́ от Мене́, и уподо́блюся низходя́щым в ров. Слы́шану сотвори́ мне зау́тра ми́лость Твою́, я́ко на Тя упова́х. Скажи́ мне, Го́споди, путь во́ньже пойду́, я́ко к Тебе́ взях ду́шу мою́. Изми́ мя от враг мои́х, Го́споди, к Тебе́ прибего́х. Научи́ мя твори́ти во́лю Твою́, я́ко Ты еси́ Бог мой. Дух Твой Благи́й наста́вит мя на зе́млю пра́ву. И́мене Твоего́ ра́ди, Го́споди, живи́ши мя, пра́вдою Твое́ю изведе́ши от печа́ли ду́шу мою́. И ми́лостию Твое́ю потреби́ши враги́ моя́ и погуби́ши вся стужа́ющыя души́ мое́й, я́ко аз раб Твой есмь.

Услы́ши мя, Го́споди, в пра́вде Твое́й и не вни́ди в суд с рабо́м Твои́м.

Услы́ши мя, Го́споди, в пра́вде Твое́й и не вни́ди в суд с рабо́м Твои́м.

Дух Твой Благи́й наста́вит мя на зе́млю пра́ву.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Тропа́рь глас 5:

Яко к целе́бному исто́чнику, притека́ем к тебе́, Амвро́сие, о́тче на́ш, ты́ бо на пу́ть спасе́ния на́с ве́рно наставля́еши, моли́твами от бе́д и напа́стей охраня́еши, в теле́сных и душе́вных ско́рбех утеша́еши, па́че же смире́нию, терпе́нию и любви́ науча́еши; моли́ человеколю́бца Христа́ и Засту́пницу усе́рдную спасти́ся душа́м на́шим. (Дважды)

Сла́ва Отцу́ и Сы́ну и Свято́му Ду́ху. И ны́не и при́сно и во ве́ки веко́в. Ами́нь.

Глас 5: Ра́дуйся, две́ре Госпо́дня непроходи́мая; / ра́дуйся, стено́ и покро́ве притека́ющих к Тебе́; / ра́дуйся, необурева́емое приста́нище и Неискусобра́чная, / ро́ждшая пло́тию Творца́ Твоего́ и Бо́га, / моля́щи не оскудева́й о воспева́ющих / и кла́няющихся Рождеству́ Твоему́.

Здесь читается кафизма, положенная по дню, или сразу седальны:

Го́споди, поми́луй. (Три́жды)

Седален, глас 8:

Це́рковь свята́я ны́не пра́зднует твою́ честну́ю па́мять, о́тче на́ш Амвро́сие, почита́ющи по́двиги твоего́ земна́го жития́, ты́ бо яви́лся еси́ вои́стину я́ко река́ благода́ти Ду́ха Свята́го, врачу́я не́мощи теле́сныя и душе́вныя все́х прибега́ющих к тебе́ с ве́рою и наде́ждою. Те́м взыва́ем тебе́ непреста́нно: моли́ся Христу́ Бо́гу о спасе́нии ду́ш на́ших.

Сла́ва Отцу́ и Сы́ну и Свято́му Ду́ху. И ны́не и при́сно и во ве́ки веко́в. Ами́нь.

Глас 8: Упова́ние и прибе́жище христиа́ном, Богоро́дице Присноде́во Мари́е, не пре́зри упова́ющих на Тя́ рабо́в Твои́х, тре́буем бо всегда́ Твоея́ по́мощи и заступле́ния, я́ко Ма́ти еси́ Зижди́теля все́х, Христа́ Бо́га на́шего: те́м и велича́ем Рождество́ Твое́, Пречи́стая, и вопие́м: ра́дуйся, Богора́дованная Влады́чице; ра́дуйся, спасе́ние душа́м на́шим и ве́лия ми́лость.

Седален, глас 1:

Любо́вию Христо́вою привле́кл еси́ вся́ концы́ земли́ на́шея и учи́л еси́ до́брому христиа́нскому жи́тельству, терпе́ние и смире́ние насажда́я в душа́х а́лчущих спасе́ния, наипа́че помога́еши на́м, предстоя́ ны́не у Царя́ ца́рствующих и Влады́ки жи́зни ве́чныя и моля́ Его́, да поми́лует недосто́йных ра́б Свои́х и спасе́т ду́ши на́ша.

Сла́ва Отцу́ и Сы́ну и Свято́му Ду́ху. И ны́не и при́сно и во ве́ки веко́в. Ами́нь.

Глас 1: Тя́, Пресвята́я Богоро́дице, Ангели пою́т непреста́нно, я́ко Соде́теля те́х и Бо́га на́шего несказа́нно во чре́ве Твое́м заче́нши, родила́ еси́ неискусому́жно во спасе́ние на́ше и избавле́ние, Его́же и мо́лиши при́сно, су́щим на земли́ здра́вие дарова́ти и ми́ру всему́ умире́ние. Те́мже и зове́м Ти́: ра́дуйся, все́х родо́в весе́лие; ра́дуйся, Де́во, христиа́н похвало́.

Полиеле́й:

Хвали́те И́мя Госпо́дне, хвали́те, раби́ Го́спода.

Аллилу́иа, аллилу́иа, аллилу́иа.

Благослове́н Госпо́дь от Сио́на, живы́й во Иерусали́ме.

Аллилу́иа, аллилу́иа, аллилу́иа.

Испове́дайтеся Го́сподеви, я́ко Благ, я́ко в век ми́лость Его́.

Аллилу́иа, аллилу́иа, аллилу́иа.

Испове́дайтеся Бо́гу Небе́сному, я́ко в век ми́лость Его́.

Аллилу́иа, аллилу́иа, аллилу́иа.

Велича́ние:

Ублажа́ем тя, / преподо́бне о́тче Амвросие, / и чтим святу́ю па́мять твою́, / наста́вниче мона́хов // и собесе́дниче А́нгелов.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа,// сла́ва Тебе́, Бо́же. (Трижды)

Ублажа́ем тя, / преподо́бне о́тче Амвросие, / и чтим святу́ю па́мять твою́, / наста́вниче мона́хов // и собесе́дниче А́нгелов.

Седа́льны:

Глас 8:

Досто́йно восхва́лим, бра́тие, по́двиги всея́ Росси́и чудотво́рца, преподо́бнаго отца́ на́шего Амвро́сия, возше́дшаго на высоту́ ле́ствицы духо́вныя и просла́вльшаго Бо́га соверше́нством доброде́телей душеспаси́тельных, и па́ки воспои́м, со умиле́нием серде́ц на́ших зову́ще: ра́дуйся, Амвро́сие, о́тче святы́й, до́брый наста́вниче благоче́стия.

Глас 8: Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Де́во пренепоро́чная и неискусобра́чная Мари́е, при́зри и посети́ рабо́в Твои́х, ве́рно пою́щих и хва́лящих Тя́ во хра́ме Твое́м, Препе́тая: ра́дуйся, Богоблагода́тная Богоро́дице Всепе́тая; ра́дуйся, спасе́ние на́ше и утвержде́ние; ра́дуйся, просвети́вшая ро́д на́ш светоно́сным Рождество́м Сы́на Твоего́ и Бо́га на́шего, Имже искорени́ся ле́сть бесо́вская; ра́дуйся, совокупи́вшая до́льняя небе́сным; ра́дуйся, Неве́сто неневе́стная.

Степе́нна, глас 4:

От ю́ности моея́/ мно́зи бо́рют мя стра́сти,/ но Сам мя заступи́// и спаси́, Спа́се мой.

Ненави́дящии Сио́на,/ посрами́теся от Го́спода,/ я́ко трава́ бо огне́м// бу́дете изсо́хше.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Святы́м Ду́хом/ вся́ка душа́ живи́тся,/ и чистото́ю возвыша́ется,// светле́ется Тро́йческим еди́нством, священнота́йне.

Го́споди, поми́луй. (Три́жды)

От Матфе́я Свята́го Ева́нгелия чте́ние

Сла́ва, Тебе́, Го́споди, сла́ва Тебе́.

Рече́ Госпо́дь Свои́м ученико́м: вся Мне предана́ суть Oтце́м Мои́м, и никто́же зна́ет Сы́на, то́кмо Oте́ц, ни Oтца́ кто зна́ет, то́кмо Сын, и ему́же а́ще во́лит Сын откры́ти. Прииди́те ко Мне вси тружда́ющиися и обремене́ннии, и Аз упоко́ю вы. Возми́те и́го Мое́ на себе́, и научи́теся от Мене́, я́ко кро́ток есмь и смире́н се́рдцем, и обря́щете поко́й душа́м ва́шим. И́го бо Мое́ бла́го, и бре́мя Мое́ легко́ есть.

Псало́м 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя. Я́ко беззако́ние мое́ аз зна́ю и грех мой предо мно́ю есть вы́ну. Тебе́ Еди́ному согреши́х, и лука́вое пред Тобо́ю сотвори́х, я́ко да оправди́шися во словесе́х Твои́х и победи́ши, внегда́ суди́ти Ти. Се бо в беззако́ниих зача́т есмь, и во гресе́х роди́ мя ма́ти моя́. Се бо и́стину возлюби́л еси́, безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся, омы́еши мя, и па́че сне́га убелю́ся. Слу́ху моему́ да́си ра́дость и весе́лие, возра́дуются ко́сти смире́нныя. Отврати́ лице́ Твое́ от грех мои́х, и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́, и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́, и Ду́хом Влады́чним утверди́ мя. Научу́ беззако́нныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́, возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо, всесожже́ния не благоволи́ши. Же́ртва Бо́гу дух сокруше́н, се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския, тогда́ благоволи́ши же́ртву пра́вды, возноше́ние и всесожега́емая: тогда́ возложа́т на олта́рь Твой тельцы́.

Глас 6:

Сла́ва Отцу́ и Сы́ну и Свято́му Ду́ху./ Моли́твами преподобного Амвросия, / Ми́лостиве, очи́сти / мно́жества согреше́ний на́ших.

И ны́не и при́сно и во ве́ки веко́в. Ами́нь./ Моли́твами Богоро́дицы, / Ми́лостиве, очи́сти / мно́жества согреше́ний на́ших.

Поми́луй мя, Бо́же,/ по вели́цей ми́лости Твое́й,/ и по мно́жеству щедро́т Твои́х// очи́сти беззако́ние мое́.

Стихи́ра, глас 6

Богоно́сный о́тче на́ш Амвро́сие, в христоподража́тельном житии́ свое́м стяжа́л еси́ плоды́ духо́вныя: любо́вь, ми́р, ра́дость, долготерпе́ние, бла́гость, милосе́рдие, ве́ру, кро́тость, воздержа́ние, пло́ть распя́в со страстьми́ и похотьми́, тяготы́ други́х поне́сл еси́ и та́ко испо́лнил еси́ зако́н Христо́в, достоблаже́нне о́тче, моли́ся о спасе́нии ду́ш на́ших.

Го́споди, поми́луй. (12 раз)

Кано́н свята́го, гла́с 8.

Пе́снь 1.

Ирмос: Колесницегони́теля фарао́ня погрузи́ чудотворя́й иногда́ Моисе́йский же́зл, крестообра́зно порази́в и раздели́в мо́ре, Изра́иля же беглеца́, пешехо́дца спасе́, пе́снь Бо́гови воспева́юща.

Це́рковь ны́не торжеству́ет, све́тло пра́зднующи твою́ святу́ю па́мять, и с ра́достию воспева́ет ти́ хвале́бную пе́снь, сла́вящи Го́спода, ди́внаго во святы́х Свои́х.

Позна́л еси́ сла́дость жи́зни во Христе́ и не обину́яся оста́вил еси́ пре́лесть земны́х бла́г и суету́ ми́ра, всего́ себе́ покори́в Бо́гу.

Кто́ изочте́т по́двиги твоя́, я́же поне́сл еси́ ра́ди Ца́рствия небе́снаго, в пе́нии, бде́нии и поще́нии утвержда́я ду́х сво́й?

Восходи́л еси́ от си́лы в си́лу в доброде́лании за́поведей Христо́вых и стяжа́л еси́ да́р Ду́ха Свята́го, Его́же де́йствием спа́сл еси́ мно́гия ду́ши христиа́нския.

Богородичен: Богоро́дице Присноде́во Мари́е, простри́ ми ми́лостивне десни́цу на по́мощь, умоля́ющи Сы́на Твоего́ и Бо́га, я́ко уя́звен е́смь лю́те и на Тя́ то́чию наде́жду мою́ положи́х, Ты́ мя́ уще́дри.

Пе́снь 3.

Ирмос: Утвержде́й в нача́ле небеса́ ра́зумом и зе́млю на вода́х основа́вый, на ка́мени мя́, Христе́, за́поведей Твои́х утверди́, я́ко не́сть свя́т па́че Тебе́, Еди́не Человеколю́бче.

Послуша́нием соверше́нным отве́рглся еси́ во́ли своея́ и те́м стра́сти существа́ па́дшаго Ада́ма отри́нул еси́, всего́ себе́ преда́в води́тельству богому́дрых ста́рцев и отце́в пу́стыни, и́же и возрасти́ша тя́ в ме́ру во́зраста духо́внаго.

Целому́дрия красоту́ стяжа́ла е́сть твоя́ чи́стая душа́, си́лою покая́ния совле́кшися ве́тхаго челове́ка и в духо́вном преуспея́нии обле́кшися во Христа́.

Бога́тства тле́ннаго ми́ра возненави́дел еси́ и бы́л еси́ я́ко стра́нник и пришле́ц на земли́, взыску́я Гра́да небе́снаго, те́мже Домовлады́ка введе́ тя в черто́г сла́вы Своея́.

Христо́с Бо́г обогати́ тя да́ром чуде́с, и мно́гия боле́зни стра́ждущих исцели́л еси́; не оста́ви на́с, ча́ющих от тебе́ благода́тныя по́мощи.

Богородичен: Наде́жда и упова́ние на́ше, Влады́чице ми́ра, блага́я Помо́щнице, спаси́, и в кре́пости ро́г вознеси́ правосла́вных, и лю́ди на́ша от вся́ких бе́д и от разли́чных обстоя́ний свободи́.

Седа́лен, гла́с 4:

Ли́к мона́хов ны́не славосло́вит тя́, преподо́бне о́тче на́ш Амвро́сие, ублажа́я честну́ю па́мять твою́, и вся́ оби́тель в ра́дости торжеству́ет, почита́ющи твое́ чи́стое в доброде́телех житие́ и мно́жество чудотворе́ний, тобо́ю преизлива́емых. Те́мже мы́ вси́ вку́пе вопие́м: спаса́й на́с моли́твами твои́ми, Амвро́сие, о́тче на́ш.

Сла́ва, и ны́не, Богородичен:

Под Твое́ благоутро́бие притека́юще, мо́лим, Богоро́дице Де́во, не пре́зри пла́ча на́шего и моли́твы, но ускори́ изба́вити от бе́д и скорбе́й лю́ди безотве́тныя: Ты́ бо еди́на еси́ изве́стнейшее христиа́ном упова́ние, и к Тебе́ прибега́юще, вси́ спаса́емся.

Пе́снь 4.

Ирмос: Ты́ моя́ кре́пость, Го́споди, Ты́ моя́ и си́ла, Ты́ мо́й Бо́г, Ты́ мое́ ра́дование, не оста́вль не́дра Отча, и на́шу нищету́ посети́в. Те́м с проро́ком Авваку́мом зову́ Ти: си́ле Твое́й сла́ва, Человеколю́бче.

Избра́нный сосу́д Ду́ха Свята́го бы́л еси́ и то́ки чуде́с изли́л еси́. Приими́ на́ша моли́твы и исцели́ на́с от ра́н грехо́вных и страсте́й.

Позна́вый си́лу моли́твы во спасе́ние души́, научи́ на́с душеполе́зно моли́тися ко Изба́вителю все́х ми́лостивому Иису́су.

Ве́ру и́стинную правосла́вную утверди́ в лю́дех твои́х, чту́щих тя́ я́ко ревни́теля уче́ния Христо́ва.

Что́ воздади́м ти́, преблаже́нне о́тче на́ш, за вся́, я́же возда́л еси́ на́м, ча́дом твои́м, чту́щим твою́ честну́ю па́мять?

Богородичен: Из твоего́ пречи́стаго чре́ва, Богороди́тельнице, Сло́во Бо́жие произы́де несказа́нно, Его́же объе́мши, от зо́л изба́вити умоли́ зову́щих: сла́ва си́ле Твое́й, Го́споди.

Пе́снь 5

Ирмос: Вску́ю мя́ отри́нул еси́ от лица́ Твоего́, Све́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и к све́ту за́поведей Твои́х пути́ моя́ напра́ви, молю́ся.

Све́том уче́ния Христо́ва просвеще́нный, мра́к заблужде́ния грехо́внаго отме́л еси́, наста́ви во све́те повеле́ний Бо́жиих и на́с, омраче́нных страстьми́.

Но́вая свеща́ возсия́л еси́, о́тче, на земли́ Росси́йстей, озаря́я све́том любве́ боже́ственныя вся́ до́льняя. Просвети́, богоно́се, на́с, недосто́йных ча́д твои́х, све́том за́поведей Христо́вых.

Возлюби́л еси́ бли́жняго и подъя́л еси́ его́ бре́мя грехо́в и скорбе́й, да у́зрит све́т и́стины и испра́вит стопы́ своя́ к де́ланию за́поведей Христо́вых.

Унасле́довал еси́ Ца́рство небе́сное, иде́же пра́зднующих гла́с непреста́нный и безконе́чная сла́дость зря́щих лица́ добро́ту Бо́га неизрече́нную.

Богородичен: Нескве́рная Агнице и Богоотрокови́це Мари́е, Твои́ми моли́твами укрепи́вшеся, святи́и победи́ша бесо́вския си́лы. Те́мже и на́м, упова́ющим на Тя́, ско́ро предста́ни в по́мощь, да посра́мятся и паду́т вси́, явля́ющии рабо́м Твои́м зла́я.

Пе́снь 6.

Ирмос: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся, к Тебе́ бо возопи́х, и услы́ши мя́, Бо́же спасе́ния моего́.

Кре́пкое заступле́ние бу́ди все́м, притека́ющим к твое́й по́мощи в неду́зех и печа́лех, о́тче на́ш Амвро́сие, Оптинския оби́тели вели́кий ста́рче.

Изба́ви на́с от кова́рства лука́вых духо́в и изведи́ из глубины́ грехо́вныя, да очи́стит на́с Христо́с Бо́г от беззако́ний на́ших и спасе́т ду́ши на́ша.

Ка́ко рце́м твоя́ благодея́ния лю́дем, стра́ждущим и уничиже́нным? Ка́ко воспои́м ти́ благода́рственную пе́снь? Приими́ ны́не пе́снь хвале́бную недосто́йных ча́д твои́х.

Посети́ на́ша не́мощи по ми́лости твое́й, исцели́ я́звы духо́вныя си́лою да́нною ти́ свы́ше благода́ти, да воста́нем от ме́ртвеннаго сна́ грехо́внаго.

Богородичен: Песносло́вяще, Чи́стая, из утро́бы Твоея́ Вопло́щшагося, Тя́ славосло́вим, я́ко Бо́жию Ма́терь.

Конда́к, гла́с 2:

Заве́т Пастыренача́льника испо́лнив, ста́рчества благода́ть насле́довал еси́, боле́знуя се́рдцем о все́х, с ве́рою притека́ющих к тебе́. Те́мже и мы́, ча́да твоя́, с любо́вию вопие́м ти́: о́тче святы́й Амвро́сие, моли́ Христа́ Бо́га спасти́ся душа́м на́шим.

Икос:

Доброзра́чное житие́ показа́л еси́ и свои́ми доброде́тельми озари́л еси́ всю́ зе́млю Ру́сскую, привле́кл еси́ к себе́ вся́ концы́ Оте́чества на́шего, окормля́я неизче́тную па́ству ве́рных ча́д твои́х, и́хже с любо́вию призре́л еси́, я́ко оте́ц чадолюби́вый и ми́лостивый. Те́мже сте́кшеся в де́нь преставле́ния твоего́, во умиле́нии зове́м: ра́дуйся, подви́жниче благоче́стия, восприе́мый бога́тыя да́ры Ду́ха Всесвята́го; ра́дуйся, высото́ смире́ния и терпе́ния, и́миже науча́еши ве́рная ча́да своя́; ра́дуйся, дре́во плодоно́сное, и́мже напита́л еси́ мно́жество а́лчущих жи́зни ве́чныя; ра́дуйся, цве́те благоуха́нный любве́ боже́ственныя, е́юже утеша́ются скорбя́щии и боле́знующии; ра́дуйся, исто́чниче приснотеки́й чуде́с и благотворе́ний, от ни́хже боля́щии исцелева́ют и ги́бнущии спаса́ются; ра́дуйся, дерзнове́нный хода́таю на́ш пред пра́ведным Судие́ю; ра́дуйся, помо́щниче на́м пресла́вный во все́х обстоя́ниих. Ра́дуйся, богому́дре Амвро́сие, вели́кий ста́рче всеросси́йский.

Пе́снь 7.

Ирмос: Бо́жия снизхожде́ния о́гнь устыде́ся в Вавило́не иногда́, сего́ ра́ди о́троцы в пещи́, ра́дованною ного́ю, я́ко во цве́тнице лику́юще, поя́ху: благослове́н еси́ Бо́же, оте́ц на́ших.

Пресели́лся еси́ в го́рния черто́ги и та́мо зри́ши сла́ву неизрече́нную преве́чнаго Бо́га, зовя́: благослове́н еси́, Бо́же оте́ц на́ших.

В со́нме святы́х уго́дников ны́не прославля́еши прему́драго Творца́ и Го́спода си́л, воспева́я: благослове́н еси́, Бо́же оте́ц на́ших.

С ли́ки Ангелов и арха́нгелов предстои́ши пред лице́м Вседержи́теля и та́мо немо́лчно пое́ши: благослове́н еси́, Бо́же оте́ц на́ших.

Вни́де в ра́дость Го́спода, я́ко до́брый и ве́рный ра́б его́ бы́л еси́ на земли́, и ны́не на небесе́х взыва́еши: благослове́н еси́, Бо́же оте́ц на́ших.

Богородичен: Ви́ждь, Влады́чице, души́ моея́ злосмра́дныя ра́ны, и́хже самохо́тне подъя́х, окая́нный, и не могу́ приложи́ти пла́стыря, но е́ле жи́в сы́й, вопию́: ми́лостива мне́ Врача́ все́х и Бо́га ма́терними Твои́ми моли́твами сотвори́, я́ко да воспою́ Ти: благослове́н, Пречи́стая, Пло́д Твоего́ чре́ва.

Пе́снь 8.

Ирмос: Седмери́цею пе́щь халде́йский мучи́тель богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Це́рковь ны́не ликовству́ет, пра́зднующи блаже́нную па́мять твою́, достохва́льне о́тче, и обре́тение честны́х моще́й твои́х прославля́ет ра́достно, пою́щи: да благослови́т вся́ тва́рь Го́спода и превозно́сит Его́ во ве́ки.

Собра́шася ны́не в оби́тели святе́й мона́хов мно́жество, ублажа́ющих твою́ честну́ю па́мять и пою́щих с ра́достию: да благослови́т вся́ тва́рь Го́спода и превозно́сит Его́ во ве́ки.

Па́стырие и учи́телие стеко́шася в се́й гра́д оби́тельный, иде́же в доброде́телех ты́ процве́л еси́, поя́: да благослови́т вся́ тва́рь Го́спода и превозно́сит Его́ во ве́ки.

Ста́рии и млади́и, си́льнии и немощни́и приидо́ша ны́не в до́м Госпо́день просла́вити преподо́бнаго ста́рца и отца́ на́шего Амвро́сия, вопию́ще: да благослови́т вся́ тва́рь Го́спода и превозно́сит Его́ во ве́ки.

Богородичен: От Тебе́, Пресвята́я Богоро́дице, излия́ся вода́ живо́тная на омове́ние скве́рны всеми́рныя, е́юже благоволи́ и мое́ се́рдце прохлади́ти и окропи́ти росо́ю моли́тв в кро́ве кри́л Твои́х во ве́ки вся́.

На 9-й песни поем песнь Пресвятыя Богородицы:

Вели́чит душа́ Моя́ Го́спода и возра́довася дух Мой о Бо́зе Спа́се Мое́м.

К коемуждо стиху припеваем: Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Я́ко призре́ на смире́ние рабы́ Своея́, се бо, от ны́не ублажа́т Мя вси ро́ди.

Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Я́ко сотвори́ Мне вели́чие Си́льный, и свя́то и́мя Его́, и ми́лость Его́ в ро́ды родо́в боя́щимся Его́.

Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Сотвори́ держа́ву мы́шцею Свое́ю, расточи́ го́рдыя мы́слию се́рдца их.

Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Низложи́ си́льныя со престо́л, и вознесе́ смире́нныя, а́лчущия испо́лни благ, и богатя́щияся отпусти́ тщи.

Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Восприя́т Изра́иля о́трока Своего́, помяну́ти ми́лости, я́коже глаго́ла ко отце́м на́шим, Авраа́му и се́мени его́ да́же до ве́ка.

Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Пе́снь 9.

Ирмос: Ужасе́ся о се́м не́бо, и земли́ удиви́шася концы́, я́ко Бо́г яви́ся челове́ком пло́тски, и чре́во Твое́ бы́сть простра́ннейшее небе́с. Те́м Тя́, Богоро́дицу, Ангелов и челове́к чинонача́лия велича́ют.

Пропове́дует ны́не Правосла́вная Це́рковь по́двиги твоя́, я́ко всеросси́йскаго уго́дника Бо́жия, и чти́т твою́ па́мять, восхваля́ющи твое́ ангелоподо́бное житие́.

При́зри с небесе́, о́тче на́ш Амвро́сие, на ве́рныя лю́ди твоя́ и низпосли́ свы́ше ру́ку по́мощи все́м, покланя́ющимся честно́му о́бразу твоему́.

Услы́ши гла́с моле́ния на́шего, посети́ ми́лостию твое́ю боле́зни и не́мощи ча́д твои́х, с ве́рою к тебе́ прибега́ющих, досточу́дне о́тче на́ш.

Припа́даем во умиле́нии серде́ц на́ших к стопа́м твои́м, вели́кий ста́рче земли́ на́шея, про́сим и мо́лим: не забу́ди посеща́ти чту́щия пречестну́ю па́мять твою́.

Богородичен: Ко́е Тебе́ дарова́ние принесе́м, Богоро́дице? Или́ что́ веща́ти и́мамы, гре́шнии? То́чию уми́льно вопие́м, моля́щеся: спаси́ рабы́ Твоя́, Богоблагода́тная Отрокови́це, я́ко да Тя́ при́сно велича́ем.

Свети́лен:

Мона́шескаго о́браза житие́ избра́в непрело́жно и отри́нув ми́ра сего́ суету́ и сла́ву, всели́лся еси́ в оби́тель Богоро́дицы, преподо́бне о́тче на́ш Амвро́сие, и процве́л еси́, я́ко кри́н се́льный. Мы́ же, чту́ще святу́ю па́мять твою́, зове́м ти́: бу́ди на́м помо́щник и засту́пник в беда́х и ско́рбех обстоя́щих.

Сла́ва, и ны́не, Богородичен:

Ра́дуйся, Тебе́ зове́м, благослове́нная Богоро́дице Де́во, я́ко Тобо́ю присносу́щныя ра́дости прича́стницы бы́хом. Живо́т бо на́ш и спасе́ние недомы́слимо и превы́ше естества́ родила́ еси́, сего́ ра́ди непреста́нно ублажа́ют Тя́ ро́дове родо́в, я́коже пре́жде прорекла́ еси́.

Хвали́тны псалмы́, глас 6:

Вся́кое дыха́ние да хва́лит Го́спода./ Хвали́те Го́спода с небе́с,/ хвали́те Его́ в вы́шних.// Тебе́ подоба́ет песнь Бо́гу.

Хвали́те Его́ вси а́нгели Его́,/ хвали́те Его́ вся си́лы Его́.// Тебе́ подоба́ет песнь Бо́гу.

Сти́хиры, глас 6:

Стих: Сотвори́ти в них суд напи́сан/ сла́ва сия́ бу́дет всем преподо́бным Его́.

Восхва́лим, ве́рнии лю́дие, / достоблаже́нную па́мять преподо́бнаго Амвро́сия, / вели́каго ста́рца Оптинскаго, / всея́ Росси́и чудотво́рца, / то́й бо, сконча́в земно́е стра́нствие, / вни́де в оби́тель Царя́ Небе́снаго / и зри́т та́мо красоту́ неизрече́нную, / вчини́вся с ли́ки безпло́тных, / пое́т с ни́ми пе́снь трисвяту́ю / в Тро́ице сла́вимому Бо́гу.

Стих: Хвали́те Его́ на си́лах Его́,/ хвали́те Его́ по мно́жеству вели́чествия Его́.

Возра́дуемся, бра́тие, / пра́зднующе све́тлую па́мять / богоно́снаго ста́рца Амвро́сия, / учи́теля благоче́стия, / пропове́дника любве́ Христо́вой, / его́же Бо́г сотвори́ сосу́д избра́нный благода́ти Своея́ живоно́сныя, / воспои́м, зову́ще: / моли́, о́тче, всеще́драго Бо́га / спасти́ся душа́м на́шим.

Стих: Хвали́те Его́ в тимпа́не и ли́це,/ хвали́те Его́ во стру́нах и орга́не.

Преблаже́нне о́тче Амвро́сие, / вонми́ гла́су ду́ш на́ших, / ча́ющих твоея́ ми́лости, / се́ бо ско́рби и ну́жды / превзыдо́ша главу́ на́шу, / и не́сть исцеле́ния пло́ти на́шея; / прииди́ и помози́ все́м, / чту́щим твою́ святу́ю па́мять.

Стих: Хвали́те Его́ в кимва́лех доброгла́сных, хвали́те Его́ в кимва́лех восклица́ния. / Вся́кое дыха́ние да хва́лит Го́спода.

Це́рковь Ру́сская ны́не пра́зднует / твою́ прехва́льную па́мять, / богому́дре о́тче Амвро́сие, / прославля́ющи твое́ земно́е житие́, / е́же украси́л еси́ доброде́тельми Христо́выми. / Не премолчи́ за ны́ ко Го́споду / в твои́х те́плых моли́твах, / да спасе́т ду́ши на́ша.

Глас 8: Сла́ва Отцу́ и Сы́ну и Свято́му Ду́ху

Бу́ди помо́щник и засту́пник на́м, обурева́емым в пучи́не жите́йскаго мо́ря, богоблаже́нне о́тче Амвро́сие, до́брый па́стырю и де́лателю жа́твы мно́гия, тебе́ бо вси́ ве́мы я́ко ми́лостиваго чудотво́рца, ско́раго врача́ ду́ш и теле́с на́ших, кре́пкаго моли́твенника пред Бо́гом о спасе́нии ду́ш на́ших.

Глас 8: И ны́не и при́сно и во ве́ки веко́в. Ами́нь.

Влады́чице, приими́ моли́твы ра́б Твои́х и изба́ви на́с от вся́кия ну́жды и печа́ли.

Славосло́вие вели́кое:

Сла́ва в вы́шних Бо́гу, и на земли́ мир, в челове́цех благоволе́ние. Хва́лим Тя, благослови́м Тя, кла́няем Ти ся, славосло́вим Тя, благодари́м Тя, вели́кия ра́ди сла́вы Твоея́. Го́споди Царю́ Небе́сный, Бо́же О́тче Вседержи́телю, Го́споди, Сы́не Единоро́дный, Иису́се Христе́, и Святы́й Ду́ше. Го́споди Бо́же, А́гнче Бо́жий, Сы́не Оте́чь, взе́мляй грех ми́ра, поми́луй нас; взе́мляй грехи́ ми́ра, приими́ моли́тву на́шу; седя́й одесну́ю Отца́, поми́луй нас. Я́ко Ты еси́ еди́н Свят, Ты еси́ еди́н Госпо́дь, Иису́с Христо́с, в сла́ву Бо́га Отца́. Ами́нь.

На всяк день благословлю́ Тя, и восхвалю́ И́мя Твое́ во ве́ки, и в век ве́ка.

Сподо́би, Го́споди, в день сей без греха́ сохрани́тися нам. Благослове́н еси́, Го́споди, Бо́же оте́ц на́ших, и хва́льно и просла́влено И́мя Твое́ во ве́ки. Ами́нь.

Бу́ди, Го́споди, ми́лость Твоя́ на нас, я́коже упова́хом на Тя.

Благослове́н еси́, Го́споди, научи́ мя оправда́нием Твои́м. (Три́жды)

Го́споди, прибе́жище был еси́ нам в род и род. Аз рех: Го́споди, поми́луй мя, исцели́ ду́шу мою́, я́ко согреши́х Тебе́. Го́споди, к Тебе́ прибего́х, научи́ мя твори́ти во́лю Твою́, я́ко Ты еси́ Бог мой: я́ко у Тебе́ исто́чник живота́, во све́те Твое́м у́зрим свет. Проба́ви ми́лость Твою́ ве́дущим Тя.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Три́жды)

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Святы́й Безсме́ртный, поми́луй нас.

Святы́й Бо́же, Святы́й Кре́пкий, Святы́й Безсме́ртный, поми́луй нас.

Тропа́рь, глас 5:

Яко к целе́бному исто́чнику, притека́ем к тебе́, Амвро́сие, о́тче на́ш, ты́ бо на пу́ть спасе́ния на́с ве́рно наставля́еши, моли́твами от бе́д и напа́стей охраня́еши, в теле́сных и душе́вных ско́рбех утеша́еши, па́че же смире́нию, терпе́нию и любви́ науча́еши; моли́ человеколю́бца Христа́ и Засту́пницу усе́рдную спасти́ся душа́м на́шим.

Утверди́, Бо́же, святу́ю правосла́вную ве́ру, правосла́вных христиа́н во век ве́ка.

Честне́йшую Херуви́м и Сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу, Тя велича́ем.

Сла́ва, и ны́не. Го́споди, поми́луй. (Три́жды) Благослови́.

Господи Иисусе Христе, Сыне Божий, моли́твами Пречи́стыя Своея́ Ма́тере, преподобного Амвросия Оптинского, преподобных и богоносных отец наших и всех святы́х, поми́луй и спаси нас я́ко Благ и Челове́колюбец.

Многоле́тие:

Вели́каго Господи́на и Отца́ на́шего Кири́лла,/ Святе́йшаго Патри́арха Моско́вского и всея́ Руси́,/ и Господи́на на́шего (Высоко-) Преосвяще́ннейшаго (имярек),/ (архи-)епи́скопа (митрополита (титул)),/ богохрани́мую страну́ на́шу Росси́йскую,/  и вся правосла́вныя христи́аны,// Го́споди, сохрани́ их на мно́гая ле́та.