Шрифт

▲

Богослужебные тексты для домашнего употребления

Дни памяти святых

Последование Всеношного бдения в день памяти святого праведного Иоанна Русского. Для домашнего (келейного) совершения

Оглавление

ВСЕНО́ЩНОЕ БДЕ́НИЕ

ВЕЛИ́КАЯ ВЕЧЕ́РНЯ

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас. Ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Трижды.)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, (трижды). Сла́ва, и ны́не:

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Таже, Го́споди, поми́луй, (12), Сла́ва, и ны́не:

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 103:

Поется часть псалма:

Благослови́, душе́ моя́, Го́спода. / Благослове́н еси́, Го́споди. / Го́споди, Бо́же мой, возвели́чился еси́ зело́. / Благослове́н еси́, Го́споди. / Во испове́дание и в велеле́поту обле́клся еси́. / Благослове́н еси́, Го́споди. / Посреде́ гор про́йдут во́ды. / Ди́вна дела́ Твоя́, Го́споди. / Вся прему́дростию сотвори́л еси́. / Сла́ва Ти, Го́споди, сотвори́вшему вся.

Или читается псалом полностью:

Благослови́, душе́ моя́, Го́спода. Го́споди, Бо́же мой, возвели́чился еси́ зело́. Во испове́дание и в велеле́поту обле́клся еси́. Одея́йся све́том, я́ко ри́зою, простира́яй не́бо, я́ко ко́жу. Покрыва́яй вода́ми превы́спренняя Своя́, полага́яй о́блаки на восхожде́ние Свое́, ходя́й на крилу́ ве́треню. Творя́й А́нгелы Своя́ ду́хи и слуги́ Своя́ пла́мень о́гненный. Основа́яй зе́млю на тве́рди ея́, не преклони́тся в век ве́ка. Бе́здна, я́ко ри́за, одея́ние ея́, на гора́х ста́нут во́ды, от запреще́ния Твоего́ побе́гнут, от гла́са гро́ма Твоего́ убоя́тся. Восхо́дят го́ры и нисхо́дят поля́ в ме́сто, е́же основа́л еси́ им. Преде́л положи́л еси́, eго́же не пре́йдут, ниже́ обратя́тся покры́ти зе́млю. Посыла́яй исто́чники в де́брех, посреде́ гор про́йдут во́ды. Напая́ют вся зве́ри се́льныя, ждут она́гри в жа́жду свою́. На ты́х пти́цы небе́сныя привита́ют, от среды́ ка́мения дадя́т глас. Напая́яй го́ры от превы́спренних Свои́х, от плода́ дел Твои́х насы́тится земля́. Прозяба́яй траву́ ското́м, и злак на слу́жбу челове́ком, извести́ хлеб от земли́. И вино́ весели́т се́рдце челове́ка, ума́стити лице́ еле́ем, и хлеб се́рдце челове́ка укрепи́т. Насы́тятся древа́ польска́я, ке́дри Лива́нстии, и́хже еси́ насади́л. Та́мо пти́цы вогнездя́тся, ероди́ево жили́ще предводи́тельствует и́ми. Го́ры высо́кия еле́нем, ка́мень прибе́жище за́яцем. Сотвори́л есть луну́ во времена́, со́лнце позна́ за́пад свой. Положи́л еси́ тму, и бысть нощь, в не́йже про́йдут вси зве́рие дубра́внии. Ски́мни рыка́ющии, восхи́тити и взыска́ти от Бо́га пи́щу себе́. Возсия́ со́лнце и собра́шася и в ло́жах свои́х ля́гут. Изы́дет челове́к на де́ло свое́ и на де́лание свое́ до ве́чера. Я́ко возвели́чишася дела́ Твоя́, Го́споди, вся прему́дростию сотвори́л еси́, испо́лнися земля́ тва́ри Твоея́. Сие́ мо́ре вели́кое и простра́нное, та́мо га́ди, и́мже несть числа́, живо́тная ма́лая с вели́кими, та́мо корабли́ препла́вают, змий сей, eго́же созда́л еси руга́тися eму́. Вся к Тебе́ ча́ют, да́ти пи́щу им во бла́го вре́мя. Да́вшу Тебе́ им соберу́т, отве́рзшу Тебе́ ру́ку вся́ческая испо́лнятся бла́гости, отвра́щшу же Тебе́ лице́, возмяту́тся, отъи́меши дух их, и исче́знут, и в персть свою́ возвратя́тся. По́слеши Ду́ха Твоего́, и сози́ждутся, и обнови́ши лице́ земли́. Бу́ди сла́ва Госпо́дня во ве́ки, возвесели́тся Госпо́дь о де́лех Свои́х, призира́яй на зе́млю, и творя́й ю́ трясти́ся, прикаса́яйся гора́м, и дымя́тся. Воспою́ Го́сподеви в животе́ мое́м, пою́ Бо́гу моему́, до́ндеже есмь, да услади́тся Ему́ бесе́да моя́, аз же возвеселю́ся о Го́споде. Да исче́знут гре́шницы от земли́, и беззако́нницы, я́коже не бы́ти им. Благослови́, душе́ моя́, Го́спода.

Со́лнце позна́ за́пад свой. Положи́л еси́ тму, и бысть нощь. Я́ко возвели́чишася дела́ Твоя́, Го́споди, вся прему́дростию сотвори́л еси́.

Сла́ва, и ны́не: Аллилу́иа, аллилу́иа, аллилу́иа, сла́ва Тебе́ Бо́же. Трижды.

Блаже́н муж:

Блаже́н муж, и́же не и́де на сове́т нечести́вых.

Аллилу́иа, аллилу́иа, аллилу́иа.

Я́ко весть Госпо́дь путь пра́ведных, и путь нечести́вых поги́бнет.

Аллилу́иа, аллилу́иа, аллилу́иа.

Рабо́тайте Го́сподеви со стра́хом и ра́дуйтеся Ему́ с тре́петом.

Аллилу́иа, аллилу́иа, аллилу́иа.

Блаже́ни вси наде́ющиися Нань.

Аллилу́иа, аллилу́иа, аллилу́иа.

Воскресни́, Го́споди, спаси́ мя, Бо́же мой.

Аллилу́иа, аллилу́иа, аллилу́иа.

Госпо́дне есть спасе́ние, и на лю́дех Твои́х благослове́ние Твое́.

Аллилу́иа, аллилу́иа, аллилу́иа.

Сла́ва Отцу́ и Сы́ну и Свято́му Духу.

Аллилу́иа, аллилу́иа, аллилу́иа.

И ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Го́споди, воззва́х, глас 4:

Го́споди, воззва́х к Тебе́, услы́ши мя./ Услы́ши мя, Го́споди./ Го́споди, воззва́х к Тебе́, услы́ши мя:/ вонми́ гла́су моле́ния моего́,/ внегда́ воззва́ти ми к Тебе́.// Услы́ши мя, Го́споди.

Да испра́вится моли́тва моя́,/ я́ко кади́ло пред Тобо́ю,/ воздея́ние руку́ мое́ю/ – же́ртва вече́рняя.// Услы́ши мя, Го́споди.

Стихи́ры пра́здника, глас 4:

Стих: А́ще беззако́ния на́зриши, Го́споди, Го́споди, кто постои́т? Я́ко у Тебе́ очище́ние есть.

Возсия́ па́мять твоя́ ны́не, / пра́ведне Иоа́нне, / сердца́ и умы́ ве́рных озаря́ющи, / ублажа́ем у́бо тя́ я́ко терпеливоду́шна, / непоколеби́ма в благове́рии, / доброде́тельми укра́шена, / нетле́нием и чудесы́ просла́вленна, / и мо́лимтися приле́жно: / моли́ся, свя́те, о спасе́нии ду́ш на́ших.

Стих: И́мене ра́ди Твоего́ потерпе́х Тя, Го́споди, потерпе́ душа́ моя́ в сло́во Твое́, упова́ душа́ моя́ на Го́спода.

Стих: От стра́жи у́тренния до но́щи, от стра́жи у́тренния да упова́ет Изра́иль на Го́спода.

Якоже Ангел, на земли́ пожи́л еси́, / воздержа́нием увяди́в твое́ те́ло, / бде́нием и всено́щными стоя́нии, / при́сным памятова́нием сме́рти, / прича́стник же быва́я Боже́ственных Та́ин, / и те́ми в ку́юждо суббо́ту освяща́яся, / благоуго́ден Бо́гови яви́лся еси́, / но моли́ся и на́м благоуго́дным Тому́ бы́ти / и спасти́ся душа́м на́шим.

Стих: Я́ко у Го́спода ми́лость, и мно́гое у Него́ избавле́ние, и Той изба́вит Изра́иля от всех беззако́ний eго́.

Стих: Хвали́те Го́спода вси язы́цы, похвали́те Его́ вси лю́дие.

Яко зла́то, в горни́ле скорбе́й / искуси́лся еси́, доблему́дре, / преогорчева́емь плени́вшими тя́: / те́мже по кончи́не свята́я душа́ твоя́, / сожи́тельница Ангелов, / досто́йно с те́ми весели́тся, / и притека́ющих к моще́м твои́м / ра́дуеши дарова́нием исцеле́ний, / с пра́ведными у́бо созерца́я добро́ту Влады́чню, / моли́ся о спасе́нии ду́ш на́ших.

Стих: Я́ко утверди́ся ми́лость Его́ на нас, и и́стина Госпо́дня пребыва́ет во век.

Сокро́вище вели́ко Проко́пия, / ма́ло кесари́йско ме́сто, / и сия́ оби́тель и́мут, / святы́я мо́щи твоя́, Иоа́нне, / и́мже на поклоне́ние собра́вшеся, / пе́сньми почита́ем преставле́ние твое́, зову́ще ти́: / ра́дуйся, звездо́, от Росси́и возсия́вшая / и Аси́ю по́двиги свои́ми и чудесы́ озари́вшая; / ра́дуйся, ве́рных похвало́ и украше́ние; / ра́дуйся, моли́твенниче о спасе́нии ду́ш на́ших.

Глас 1: Сла́ва Отцу́ и Сы́ну и Свято́му Ду́ху.

Ка́ко не похва́лим, пра́ведне, благоду́шие твое́ в чу́вственном плене́нии, и́мже посрами́л еси́ первовино́вника духо́внаго плене́ния, кро́тость же, незло́бие и смире́ние, и́миже врага́ низложи́л еси́, безмо́лвие и поще́ние, моле́ние всено́щное, в не́мже помо́ст притво́ра церко́внаго струя́ми сле́зными ороша́л еси́ и те́ми о́гнь страсте́й угаси́л еси́, о́гнь любве́ боже́ственныя прии́м в се́рдце свое́м и восхожде́нии благода́тными све́тел бы́в, Иоа́нне, во све́тлостех святы́х ны́не лику́еши, иде́же помина́й помина́ющия тя́.

Глас 1: И ны́не и при́сно и во ве́ки веко́в. Ами́нь.

Всеми́рную сла́ву, от челове́к прозя́бшую и Влады́ку ро́ждшую, небе́сную две́рь воспои́м, Мари́ю Де́ву, безпло́тных пе́снь и ве́рных удобре́ние: Сия́ бо яви́ся не́бо и хра́м Божества́, Сия́, прегражде́ние вражды́ разруши́вши, ми́р введе́ и Ца́рствие отве́рзе; Сию́ у́бо иму́ще ве́ры утвержде́ние, Побо́рника и́мамы, из Нея́ ро́ждшагося Го́спода. Дерза́йте у́бо, дерза́йте, лю́дие Бо́жии, и́бо То́й победи́т враги́, я́ко Всеси́лен.

Све́те Тихи́й:

Све́те Ти́хий святы́я сла́вы Безсме́ртнаго Отца́ Небе́снаго, Свята́го, Блаже́ннаго, Иису́се Христе́! Прише́дше на за́пад со́лнца, ви́девше свет вече́рний, пое́м Отца́, Сы́на и Свята́го Ду́ха, Бо́га. Досто́ин еси́ во вся времена́ пет бы́ти гла́сы преподо́бными, Сы́не Бо́жий, живо́т дая́й; те́мже мир Тя сла́вит.

1. Проро́чества Иса́иина чте́ние.

Та́ко глаго́лет Госпо́дь: утеша́йте, утеша́йте лю́ди Моя́, глаго́лет Бо́г: свяще́нницы, глаго́лите в се́рдцы Иерусали́му, умоли́те его́, я́ко умно́жися смире́ние его́. Разреши́ся бо гре́х его́, я́ко прия́т из руки́ Госпо́дни сугу́ба согреше́ния своя́. Гла́с вопию́щего в пусты́ни: угото́вайте пу́ть Госпо́день, пра́вы твори́те стези́ Бо́гу на́шему. На го́ру высо́ку взы́ди, благовеству́й Сио́ну, возвыша́й кре́постию гла́с сво́й, благовеству́яй Иерусали́му: вознеси́те, не бо́йтеся. Аз Го́сподь Бо́г, Аз услы́шу убо́гих Изра́илев, и не оста́влю те́х. Но отве́рзу от го́р ре́ки и посреде́ по́ля исто́чники, сотворю́ пусты́ню в лу́г и жа́ждущую зе́млю во исто́чники водны́я. Да возвесели́тся не́бо свы́ше, и о́блацы да кропя́т пра́вду, да возсия́ет земля́, и да прозя́бнет ми́лость, и пра́вда да возсия́ет вку́пе. Гла́с весе́лия возвести́те, и услы́шано да бу́дет, возвести́те да́же до коне́ц земли́, глаго́лите, я́ко изба́ви Госпо́дь раба́ Своего́ Иа́кова и, а́ще вжа́ждут в пусты́ни, источи́т и́м во́ду из ка́мене. Возвесели́ся, непло́ды неражда́ющая, расто́ргни и возопи́й, неболе́вшая, я́ко мно́га ча́да пусты́я па́че, не́жели иму́щия му́жа.

2. Прему́дрости Соломо́новы чте́ние

Пра́ведницы во ве́ки живу́т, и в Го́споде мзда́ и́х, и попече́ние и́х у Вы́шняго. Сего́ ра́ди прии́мут ца́рствие благоле́пия и вене́ц добро́ты от руки́ Госпо́дни, зане́ десни́цею покры́ет я́ и мы́шцею защити́т и́х. Прии́мет всеору́жие — рве́ние свое́ и вооружи́т тва́рь в ме́сть враго́м. Облече́тся в броня́ пра́вды и возложи́т шле́м — су́д нелицеме́рен. Прии́мет щи́т непобеди́мый — преподо́бие, поостри́т же напра́сный гне́в — во ору́жие, спобо́рет же с ни́м ми́р на безу́мныя. По́йдут праволу́чныя стре́лы мо́лниины и, я́ко от благокру́гла лу́ка облако́в, на наме́рение полетя́т, и от каменоме́тныя я́рости испо́лнь паду́т гра́ды. Вознегоду́ет на ни́х вода́ морска́я, ре́ки же потопя́т я́ на́гло. Сопроти́в ста́нет и́м ду́х си́лы и, я́ко ви́хор, разве́ет и́х, и опустоши́т всю́ зе́млю беззако́ние, и злоде́йство преврати́т престо́лы си́льных. Слы́шите у́бо, ца́рие, и разуме́йте, навы́кните, судии́ конце́в земли́. Внуши́те держа́щии мно́жества и гордя́щиися о наро́дех язы́ков, я́ко дана́ е́сть от Го́спода держа́ва ва́м и си́ла от Вы́шняго.

3. Прему́дрости Соломо́новы чте́ние

Пра́ведник, а́ще пости́гнет сконча́тися, в поко́и бу́дет. Ста́рость бо честна́ не многоле́тна, ниже́ в числе́ ле́т исчита́ется. Седи́на же е́сть му́дрость челове́ком, и во́зраст ста́рости — житие́ нескве́рное. Благоуго́ден Бо́гови бы́в, возлю́блен бы́сть, и живы́й посреде́ гре́шник, преста́влен бы́сть. Восхище́н бы́сть, да не зло́ба измени́т ра́зума его́ или́ ле́сть прельсти́т ду́шу его́. Раче́ние бо зло́бы помрача́ет до́брая и паре́ние по́хоти, пременя́ет у́м незло́бив. Сконча́вся вма́ле, испо́лни ле́та до́лга, уго́дна бо бе́ Го́сподеви душа́ его́, сего́ ра́ди потща́ся от среды́ лука́вствия. Лю́дие же ви́девше и не разуме́вше, ниже́ поло́жше в помышле́нии таково́е, я́ко благода́ть и ми́лость в преподо́бных Его́ и посеще́ние во избра́нных Его́.

Сподо́би, Го́споди:

Сподо́би, Го́споди, в ве́чер сей без греха́ сохрани́тися нам. Благослове́н еси́, Го́споди, Бо́же оте́ц на́ших, и хва́льно и просла́влено и́мя Твое́ во ве́ки. Ами́нь.

Бу́ди, Го́споди, ми́лость Твоя́ на нас, я́коже упова́хом на Тя. Благослове́н еси́, Го́споди, научи́ мя оправда́нием Твои́м. Благослове́н еси́, Влады́ко, вразуми́ мя оправда́нием Твои́м. Благослове́н еси́, Святы́й, просвети́ мя оправда́нии Твои́ми.

Го́споди, ми́лость Твоя́ во век, дел руку́ Твое́ю не пре́зри. Тебе́ подоба́ет хвала́, Тебе́ подоба́ет пе́ние, Тебе́ сла́ва подоба́ет. Отцу́ и Сы́ну и Свято́му Ду́ху, ны́не и при́сно и во ве́ки веко́в. Ами́нь.

Го́споди, поми́луй. (40 раз)

Стихи́ры на стихо́вне:

Стихиры, гла́с 2:

Богому́дре Иоа́нне, / благода́тию Бо́жиею просвеща́емь / и раче́нием боже́ственным окриля́емь, / страда́льческую но́щь жития́ ра́бскаго / непреткнове́нно среде́ злове́рных преше́л еси́ / и ко дню́ невече́рнему ра́йския свобо́ды дости́гл еси́, / озаря́я отту́ду ве́рных исполне́ние.

Сти́х: Богому́дре Иоа́нне, / благода́тию Бо́жиею просвеща́емь / и раче́нием боже́ственным окриля́емь, / страда́льческую но́щь жития́ ра́бскаго / непреткнове́нно среде́ злове́рных преше́л еси́ / и ко дню́ невече́рнему ра́йския свобо́ды дости́гл еси́, / озаря́я отту́ду ве́рных исполне́ние.

Плене́нный тата́ры / и отведе́нный ко ага́ряном, / вселе́н, всече́стне, бы́л еси́ в ко́нском стоя́лищи, / я́коже Иов на гно́ищи, / утесня́емь и оскорбля́емь, / те́мже пра́ведным судо́м Бо́жиим / по кончи́не утеша́ешися на ло́не Авраа́мли, / иде́же все́х веселя́щихся жили́ще.

Сти́х: Пра́ведник я́ко фи́никс процвете́т, / я́ко ке́др, и́же в Лива́не, умно́жится.

Вне́ до́льняго оте́чества / богоуго́дно пожи́в, блаже́нне, / в го́рнее оте́чество всели́лся еси́, / дарова́ньми украси́вся Ду́ха. / Бу́ди у́бо те́плый хода́тай ко Го́споду / о Росси́и и ея́ лю́дех, / о Горе́ и оби́тели се́й, / страсте́й же и неду́гов / свобожда́й на́с моли́твами твои́ми, / благода́ти тезоимени́те.

Слава, гла́с 6:

Име́яй благи́й по́мысл, и се́рдце бо́дрое, и любо́вь нелицеме́рную, бдя́й же при́сно и Бо́гу приединя́яйся, блаже́нную кончи́ну прие́млет дне́сь Иоа́нн пра́ведный и чи́стою душе́ю свое́ю воспаря́ет горе́, свесели́тися избра́нным Отца́ Небе́снаго, остави́ же во утеше́ние и освяще́ние своя́ святы́я мо́щи, к ни́мже притека́юще, воззове́м к нему́: тя́, богоприя́тне, воспева́ющим согреше́ний испроси́ проще́ние, ми́р и ве́лию ми́лость.

И ны́не, Богоро́дичен:

Творе́ц и Изба́витель мо́й, Пречи́стая, Христо́с Госпо́дь, из Твои́х ложе́сн проше́д, в мя́ оболки́йся, пе́рвыя кля́твы Ада́ма свободи́. Те́мже Ти́, Всечи́стая, я́ко Бо́жии Ма́тери же и Де́ве, вои́стинну вопие́м немо́лчно: ра́дуйся Ангельски, ра́дуйся, Влады́чице, предста́тельство, и покро́ве, и спасе́ние ду́ш на́ших.

Моли́тва свята́го Симео́на Богоприи́мца:

Ны́не отпуща́еши раба́ Твоего́, Влады́ко,/ по глаго́лу Твоему́, с ми́ром;/ я́ко ви́деста о́чи мои́ спасе́ние Твое́,/ е́же еси́ угото́вал пред лице́м всех люде́й,/ свет во открове́ние язы́ков,// и сла́ву люде́й Твои́х Изра́иля.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Го́споди, поми́луй. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Тропа́рь, глас 4:

От земли́ плене́ния твоего́ воззва́вый тя́ к небе́сным селе́нием Госпо́дь соблюда́ет невреди́мо и цельбоно́сно те́ло твое́, пра́ведне Иоа́нне, ты́ бо, в Росси́и я́тый и во Аси́ю прода́нный, посреде́ ага́рянскаго злоче́стия благоче́стно пожи́л еси́ во мно́зе терпе́нии и, се́яв зде́ слеза́ми, жне́ши та́мо неизглаго́ланною ра́достию. Те́мже моли́ Христа́ Бо́га спасти́ся душа́м на́шим. (Дважды)

Песнь Пресвятей Богородице:

Богоро́дице Де́во, ра́дуйся, / Благода́тная Мари́е, Госпо́дь с Тобо́ю; / благослове́на Ты в жена́х / и благослове́н Плод чре́ва Твоего́, / я́ко Спа́са родила́ еси́ душ на́ших. (Единожды)

Бу́ди И́мя Госпо́дне благослове́но от ны́не и до ве́ка. (Три́жды)

Псало́м 33:

Благословлю́ Го́спода на вся́кое вре́мя,/ вы́ну хвала́ Его́ во усте́х мои́х./ О Го́споде похва́лится душа́ моя́,/ да услы́шат кро́тцыи, и возвеселя́тся./ Возвели́чите Го́спода со мно́ю,/ и вознесе́м И́мя Его́ вку́пе./ Взыска́х Го́спода, и услы́ша мя,/ и от все́х скорбе́й мои́х изба́ви мя./ Приступи́те к Нему́, и просвети́теся,/ и ли́ца ва́ша не постыдя́тся./ Сей ни́щий воззва́, и Госпо́дь услы́ша и́,/ и от все́х скорбе́й его́ спасе́ и́./ Ополчи́тся а́нгел Госпо́день о́крест боя́щихся Его́,/ и изба́вит их./ Вкуси́те и ви́дите, я́ко благ Госпо́дь:/ блаже́н муж, и́же упова́ет Нань./ Бо́йтеся Го́спода, вси́ святи́и Его́,/ я́ко несть лише́ния боя́щимся Его́./ Бога́тии обнища́ша и взалка́ша:/ взыска́ющии же Го́спода// не лиша́тся вся́каго бла́га.

У́ТРЕНЯ.

Шестопса́лмие:

Сла́ва в вы́шних Бо́гу, и на земли́ мир, в челове́цех благоволе́ние. (Три́жды)

Го́споди, устне́ мои́ отве́рзеши, и уста́ моя́ возвестя́т хвалу́ Твою́. (Два́жды)

Псалом 3:

Го́споди, что ся умно́жиша стужа́ющии ми́? Мно́зи востаю́т на мя, мно́зи глаго́лют души́ мое́й: несть спасе́ния eму́ в Бо́зе eго́. Ты же, Го́споди, Засту́пник мой еси́, сла́ва моя́ и вознося́й главу́ мою́. Гла́сом мои́м ко Го́споду воззва́х, и услы́ша мя от горы́ святы́я Своея́. Аз усну́х, и спах, воста́х, я́ко Госпо́дь засту́пит мя. Не убою́ся от тем люде́й, о́крест напа́дающих на мя. Воскресни́, Го́споди, спаси́ мя, Бо́же мой, я́ко Ты порази́л еси́ вся вражду́ющыя ми всу́е: зу́бы гре́шников сокруши́л еси́. Госпо́дне есть спасе́ние, и на лю́дех Твои́х благослове́ние Твое́.

Аз усну́х, и спах, воста́х, я́ко Госпо́дь засту́пит мя.

Псалом 37:

Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́. Я́ко стре́лы Твоя́ унзо́ша во мне, и утверди́л еси́ на мне ру́ку Твою́. Несть исцеле́ния в пло́ти мое́й от лица́ гне́ва Твоего́, несть ми́ра в косте́х мои́х от лица́ грех мои́х. Я́ко беззако́ния моя́ превзыдо́ша главу́ мою́, я́ко бре́мя тя́жкое отяготе́ша на мне. Возсмерде́ша и согни́ша ра́ны моя́ от лица́ безу́мия моего́. Пострада́х и сляко́хся до конца́, весь день се́туя хожда́х. Я́ко ля́двия моя́ напо́лнишася поруга́ний, и несть исцеле́ния в пло́ти мое́й. Озло́блен бых и смири́хся до зела́, рыка́х от воздыха́ния се́рдца моего́. Го́споди, пред Тобо́ю все жела́ние мое́ и воздыха́ние мое́ от Тебе́ не утаи́ся. Се́рдце мое́ смяте́ся, оста́ви мя си́ла моя́, и свет о́чию мое́ю, и той несть со мно́ю. Дру́зи мои́ и и́скреннии мои́ пря́мо мне прибли́жишася и ста́ша, и бли́жнии мои́ отдале́че мене́ ста́ша и нужда́хуся и́щущии ду́шу мою́, и и́щущии зла́я мне глаго́лаху су́етная и льсти́вным весь день поуча́хуся. Аз же я́ко глух не слы́шах и я́ко нем не отверза́яй уст свои́х. И бых я́ко челове́к не слы́шай и не имы́й во усте́х свои́х обличе́ния. Я́ко на Тя, Го́споди, упова́х, Ты услы́шиши, Го́споди Бо́же мой. Я́ко рех: да не когда́ пора́дуют ми ся врази́ мои́: и внегда́ подвижа́тися нога́м мои́м, на мя велере́чеваша. Я́ко аз на ра́ны гото́в, и боле́знь моя́ предо мно́ю есть вы́ну. Я́ко беззако́ние мое́ аз возвещу́ и попеку́ся о гресе́ мое́м. Врази́ же мои́ живу́т и укрепи́шася па́че мене́, и умно́жишася ненави́дящии мя без пра́вды. Воздаю́щии ми зла́я возблага́я оболга́ху мя, зане́ гоня́х благосты́ню. Не оста́ви мене́, Го́споди Бо́же мой, не отступи́ от Мене́. Вонми́ в по́мощь мою́, Го́споди спасе́ния моего́.

Не оста́ви мене́, Го́споди Бо́же мой, не отступи́ от Мене́. Вонми́ в по́мощь мою́, Го́споди спасе́ния моего́.

Псалом 62:

Бо́же, Бо́же мой, к Тебе́ у́тренюю, возжада́ Тебе́ душа́ моя́, коль мно́жицею Тебе́ плоть моя́, в земли́ пу́сте и непрохо́дне, и безво́дне. Та́ко во святе́м яви́хся Тебе́, ви́дети си́лу Твою́ и сла́ву Твою́. Я́ко лу́чши ми́лость Твоя́ па́че живо́т, устне́ мои́ похвали́те Тя. Та́ко благословлю́ Тя в животе́ мое́м, о и́мени Твое́м воздежу́ ру́це мои́. Я́ко от ту́ка и ма́сти да испо́лнится душа́ моя́, и устна́ма ра́дости восхва́лят Тя уста́ моя́. А́ще помина́х Тя на посте́ли мое́й, на у́тренних поуча́хся в Тя. Я́ко был еси́ Помо́щник мой, и в кро́ве крилу́ Твое́ю возра́дуюся. Прильпе́ душа́ моя́ по Тебе́, мене́ же прия́т десни́ца Твоя́. Ти́и же всу́е иска́ша ду́шу мою́, вни́дут в преиспо́дняя земли́, предадя́тся в ру́ки ору́жия, ча́сти ли́совом бу́дут. Царь же возвесели́тся о Бо́зе, похва́лится всяк клены́йся Им, я́ко загради́шася уста́ глаго́лющих непра́ведная.

На у́тренних поуча́хся в Тя. Я́ко был еси́ Помо́щник мой, и в кро́ве крилу́ Твое́ю возра́дуюся. Прильпе́ душа́ моя́ по Тебе́, мене́ же прия́т десни́ца Твоя́.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Го́споди поми́луй. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Псалом 87:

Го́споди Бо́же спасе́ния моего́, во дни воззва́х, и в нощи́ пред Тобо́ю. Да вни́дет пред Тя моли́тва моя́: приклони́ у́хо Твое́ к моле́нию моему́, я́ко испо́лнися зол душа́ моя́, и живо́т мой аду прибли́жися. Привмене́н бых с низходя́щими в ров, бых я́ко челове́к без по́мощи, в ме́ртвых свобо́дь, я́ко я́звеннии спя́щии во гро́бе, и́хже не помяну́л еси́ ктому́, и ти́и от руки́ Твоея́ отринове́ни бы́ша. Положи́ша мя в ро́ве преиспо́днем, в те́мных и се́ни сме́ртней. На мне утверди́ся я́рость Твоя́, и вся во́лны Твоя́ наве́л еси́ на мя. Уда́лил еси́ зна́емых мои́х от Мене́, положи́ша мя ме́рзость себе́: пре́дан бых и не исхожда́х. О́чи мои́ изнемого́сте от нищеты́, воззва́х к Тебе́, Го́споди, весь день, возде́х к Тебе́ ру́це мои́. Еда́ ме́ртвыми твори́ши чудеса́? Или́ вра́чеве воскреся́т, и испове́дятся Тебе́? Еда́ пове́сть кто во гро́бе ми́лость Твою́, и и́стину Твою́ в поги́бели? Еда́ позна́на бу́дут во тьме чудеса́ Твоя́, и пра́вда Твоя́ в земли́ забве́нней? И аз к Тебе́, Го́споди, воззва́х и у́тро моли́тва моя́ предвари́т Тя. Вску́ю, Го́споди, отре́еши ду́шу мою́, отвраща́еши лице́ Твое́ от Мене́? Нищ есмь аз, и в труде́х от ю́ности моея́; возне́с же ся, смири́хся, и изнемого́х. На мне преидо́ша гне́ви Твои́, устраше́ния Твоя́ возмути́ша мя, обыдо́ша мя я́ко вода́, весь день одержа́ша мя вку́пе. Уда́лил еси́ от Мене́ дру́га и и́скренняго, и зна́емых мои́х от страсте́й.

Го́споди Бо́же спасе́ния моего́, во дни воззва́х, и в нощи́ пред Тобо́ю. Да вни́дет пред Тя моли́тва моя́: приклони́ у́хо Твое́ к моле́нию моему́.

Псалом 102:

Благослови́, душе́ моя́, Го́спода, и вся вну́тренняя моя́ и́мя свя́тое Его́. Благослови́, душе́ моя́, Го́спода, и не забыва́й всех воздая́ний Его́, очища́ющаго вся беззако́ния твоя́, исцеля́ющаго вся неду́ги твоя́, избавля́ющаго от истле́ния живо́т твой, венча́ющаго тя ми́лостию и щедро́тами, исполня́ющаго во благи́х жела́ние твое́: обнови́тся я́ко о́рля ю́ность твоя́. Творя́й ми́лостыни Госпо́дь, и судьбу́ всем оби́димым. Сказа́ пути́ Своя́ Моисе́ови, сыново́м Изра́илевым хоте́ния Своя́: Щедр и Ми́лостив Госпо́дь, Долготерпели́в и Многоми́лостив. Не до конца́ прогне́вается, ниже́ во век вражду́ет, не по беззако́нием на́шым сотвори́л есть нам, ниже́ по грехо́м на́шым возда́л есть нам. Я́ко по высоте́ небе́сней от земли́, утверди́л есть Госпо́дь ми́лость Свою́ на боя́щихся Его́. Ели́ко отстоя́т восто́цы от за́пад, уда́лил есть от нас беззако́ния на́ша. Я́коже ще́дрит оте́ц сы́ны, уще́дри Госпо́дь боя́щихся Его́. Я́ко Той позна́ созда́ние на́ше, помяну́, я́ко персть есмы́. Челове́к, я́ко трава́ дни́е eго́, я́ко цвет се́льный, та́ко оцвете́т, я́ко дух про́йде в нем, и не бу́дет, и не позна́ет ктому́ ме́ста своего́. Ми́лость же Госпо́дня от ве́ка и до ве́ка на боя́щихся Его́, и пра́вда Его́ на сыне́х сыно́в, храня́щих заве́т Его́, и по́мнящих за́поведи Его́ твори́ти я́. Госпо́дь на Небеси́ угото́ва Престо́л Свой, и Ца́рство Его́ все́ми облада́ет. Благослови́те Го́спода вси А́нгели Его́, си́льнии кре́постию, творя́щии сло́во Его́, услы́шати глас слове́с Его́. Благослови́те Го́спода вся Си́лы Его́, слуги́ Его́, творя́щии во́лю Его́. Благослови́те Го́спода вся дела́ Его́, на вся́ком ме́сте влады́чества Его́, благослови́, душе́ моя́, Го́спода.

На вся́ком ме́сте влады́чества Его́, благослови́, душе́ моя́, Го́спода.

Псалом 142:

Го́споди, услы́ши моли́тву мою́, внуши́ моле́ние мое́ во и́стине Твое́й, услы́ши мя в пра́вде Твое́й и не вни́ди в суд с рабо́м Твои́м, я́ко не оправди́тся пред Тобо́ю всяк живы́й. Я́ко погна́ враг ду́шу мою́, смири́л есть в зе́млю живо́т мой, посади́л мя есть в те́мных, я́ко ме́ртвыя ве́ка. И уны́ во мне дух мой, во мне смяте́ся се́рдце мое́. Помяну́х дни дре́вния, поучи́хся во всех де́лех Твои́х, в творе́ниих руку́ Твое́ю поуча́хся. Возде́х к Тебе́ ру́це мои́, душа́ моя́, я́ко земля́ безво́дная Тебе́. Ско́ро услы́ши мя, Го́споди, исчезе́ дух мой, не отврати́ лица́ Твоего́ от Мене́, и уподо́блюся низходя́щым в ров. Слы́шану сотвори́ мне зау́тра ми́лость Твою́, я́ко на Тя упова́х. Скажи́ мне, Го́споди, путь во́ньже пойду́, я́ко к Тебе́ взях ду́шу мою́. Изми́ мя от враг мои́х, Го́споди, к Тебе́ прибего́х. Научи́ мя твори́ти во́лю Твою́, я́ко Ты еси́ Бог мой. Дух Твой Благи́й наста́вит мя на зе́млю пра́ву. И́мене Твоего́ ра́ди, Го́споди, живи́ши мя, пра́вдою Твое́ю изведе́ши от печа́ли ду́шу мою́. И ми́лостию Твое́ю потреби́ши враги́ моя́ и погуби́ши вся стужа́ющыя души́ мое́й, я́ко аз раб Твой есмь.

Услы́ши мя, Го́споди, в пра́вде Твое́й и не вни́ди в суд с рабо́м Твои́м.

Дух Твой Благи́й наста́вит мя на зе́млю пра́ву.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Тропа́рь глас 4:

Сла́ва Отцу́ и Сы́ну и Свято́му Ду́ху. И ны́не и при́сно и во ве́ки веко́в. Ами́нь.

Глас 4: Е́же от ве́ка утае́ное / и А́нгелом несве́домое та́инство, / Тобо́ю, Богоро́дице, су́щим на земли́ яви́ся Бог, / в несли́тном соедине́нии воплоща́ем / и, Крест во́лею нас ра́ди восприи́м, / и́мже воскреси́в первозда́ннаго, / спасе́ от сме́рти ду́ши на́ша.

Здесь читается кафизма, положенная по дню, или сразу седальны:

Го́споди, поми́луй. (Три́жды)

Седален, глас 3:

Све́тлым житие́м твои́м, Иоа́нне, и неусы́пными моли́твами неулови́мь пребы́л еси́ ловле́нии тмы́ предста́теля и, во гро́бе лежа́, нетле́нен пребыва́еши, подая́ цельбы́ призыва́ющим тя́ и па́мять твою́ любо́вию пра́зднующим.

Сла́ва Отцу́ и Сы́ну и Свято́му Ду́ху. И ны́не и при́сно и во ве́ки веко́в. Ами́нь.

Глас 3: Изве́стная христиа́ном и еди́на по Бо́зе кре́пкая Помо́щнице, си́льная в беда́х Предста́тельнице, покры́й и соблюди́ ны, Влады́чице человеколюби́вая, вся́ сове́ты злоко́знствующих враго́в низлага́ющи.

Седален, глас 4:

Страсте́й о́гнь погаси́л еси́, блаже́нне, тече́нием сле́з и доброде́тельми обогати́лся еси́, я́влься челове́к небесному́др, но да улучу́ и а́з избавле́ние от мглы́ страсте́й хода́тайством твои́м, Иоа́нне, и да явлю́ся спасе́н, с ве́рою прибега́яй к тебе́.

Сла́ва Отцу́ и Сы́ну и Свято́му Ду́ху. И ны́не и при́сно и во ве́ки веко́в. Ами́нь.

Глас 4: К Тебе́, Всецари́це, приношу́ ю́же от боле́зни моли́тву мою́: поми́луй мя́, Всеблага́я, и неколе́блема прило́ги льсти́ваго соде́лай, да не посра́млен бу́ду, в де́нь искуше́ния Тя́ призыва́яй, недосто́йный ра́б Тво́й.

Полиеле́й:

Хвали́те И́мя Госпо́дне, хвали́те, раби́ Го́спода.

Аллилу́иа, аллилу́иа, аллилу́иа.

Благослове́н Госпо́дь от Сио́на, живы́й во Иерусали́ме.

Аллилу́иа, аллилу́иа, аллилу́иа.

Испове́дайтеся Го́сподеви, я́ко Благ, я́ко в век ми́лость Его́.

Аллилу́иа, аллилу́иа, аллилу́иа.

Испове́дайтеся Бо́гу Небе́сному, я́ко в век ми́лость Его́.

Аллилу́иа, аллилу́иа, аллилу́иа.

Велича́ние:

Велича́ем тя, / праведный о́тче Иоанне, / и чтим святу́ю па́мять твою́, / ты бо мо́лиши о нас // Христа́ Бо́га на́шего.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа,// сла́ва Тебе́, Бо́же. (Трижды)

Седа́льны:

Глас 1:

Среди́ мирска́го мяте́жа пра́ведно пожи́вша, я́ко в безмо́лвии пусты́нном, на ра́мена Кре́ст Госпо́день взе́мша и Тому́ после́довавша страда́льческими по́двиги, восхва́лим вси́ пе́сньми Иоа́нна, его́же израсти́ Росси́я, Аси́я же позна́, я́ко преподо́бна.

Глас 1: Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Кто́ от челове́к возмо́жет изрещи́ Твоя́, Де́во, я́же па́че ума́ несказа́нная та́инства? Ты́ бо яви́лася если́ все́х пребо́льши святы́х, и превы́шши Ангелов, и небе́с ши́рши, я́ко из Тебе́ возсия́ Христо́с Бо́г, спаса́яй ду́ши на́ша.

Степе́нна, глас 4:

От ю́ности моея́/ мно́зи бо́рют мя стра́сти,/ но Сам мя заступи́// и спаси́, Спа́се мой.

Ненави́дящии Сио́на,/ посрами́теся от Го́спода,/ я́ко трава́ бо огне́м// бу́дете изсо́хше.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Святы́м Ду́хом/ вся́ка душа́ живи́тся,/ и чистото́ю возвыша́ется,// светле́ется Тро́йческим еди́нством, священнота́йне.

Го́споди, поми́луй. (Три́жды)

От Луки́ Свята́го Ева́нгелия чте́ние

Сла́ва, Тебе́, Го́споди, сла́ва Тебе́.

Рече́ Госпо́дь: всяк, и́же а́ще испове́сть Мя пред челове́ки, и Сын Челове́ческий испове́сть его́ пред А́нгелы Бо́жиими, а отверги́йся Мене́ пред челове́ки отве́ржен бу́дет пред А́нгелы Бо́жиими. И всяк и́же рече́т сло́во на Сы́на Челове́ческаго, оста́вится ему́, а на Свята́го Ду́ха ху́лившему не оста́вится. Егда́ же приведу́т вы на собо́рища и вла́сти и влады́чества, не пецы́теся, ка́ко или́ что отвеща́ете, или́ что рече́те, Святы́й бо Дух научи́т вы в той час, я́же подоба́ет рещи́.

Псало́м 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя. Я́ко беззако́ние мое́ аз зна́ю и грех мой предо мно́ю есть вы́ну. Тебе́ Еди́ному согреши́х, и лука́вое пред Тобо́ю сотвори́х, я́ко да оправди́шися во словесе́х Твои́х и победи́ши, внегда́ суди́ти Ти. Се бо в беззако́ниих зача́т есмь, и во гресе́х роди́ мя ма́ти моя́. Се бо и́стину возлюби́л еси́, безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся, омы́еши мя, и па́че сне́га убелю́ся. Слу́ху моему́ да́си ра́дость и весе́лие, возра́дуются ко́сти смире́нныя. Отврати́ лице́ Твое́ от грех мои́х, и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́, и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́, и Ду́хом Влады́чним утверди́ мя. Научу́ беззако́нныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́, возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо, всесожже́ния не благоволи́ши. Же́ртва Бо́гу дух сокруше́н, се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския, тогда́ благоволи́ши же́ртву пра́вды, возноше́ние и всесожега́емая: тогда́ возложа́т на олта́рь Твой тельцы́.

Глас 6:

Сла́ва Отцу́ и Сы́ну и Свято́му Ду́ху./ Моли́твами праведного Иоанна, / Ми́лостиве, очи́сти / мно́жества согреше́ний на́ших.

И ны́не и при́сно и во ве́ки веко́в. Ами́нь./ Моли́твами Богоро́дицы, / Ми́лостиве, очи́сти / мно́жества согреше́ний на́ших.

Поми́луй мя, Бо́же,/ по вели́цей ми́лости Твое́й,/ и по мно́жеству щедро́т Твои́х// очи́сти беззако́ние мое́.

Стихи́ра, глас 6

Пра́ведне Иоа́нне, ве́рный ра́бе Христа́ Бо́га, Ца́рствия Его́ насле́дниче, Проко́пии красото́ и Росси́и похвале́ние, тве́рдый в благове́рии, злове́рными неодоли́мь сы́й, стране́ на́шей проси́ на враги́ одоле́ние, сыново́м же росси́йским непобеди́мым бы́ти и неосла́бным в благоче́стии и в ми́ре спасти́ся все́м на́м.

Го́споди, поми́луй. (12 раз)

Кано́н свята́го, гла́с 2.

Пе́снь 1.

Ирмос: Гряди́те, лю́дие, пои́м пе́снь Христу́ Бо́гу, разде́льшему мо́ре и наста́вльшему лю́ди, я́же изведе́ из рабо́ты Еги́петския, я́ко просла́вися.

Пресве́тлым озаря́емь све́том Со́лнца пра́вды, просвеще́ние испроси́ мне́, омраче́нному, воспе́ти твое́, богосве́тле, светоза́рное торжество́.

Уды вся умертви́в, му́дре, в чи́стом се́рдце твое́м име́л еси́ Христа́, умертви́вша и сте́рша главу́ зми́я и от я́да того́ изба́вльша челове́ческое естество́.

В зако́не Госпо́дни поуча́яся, бы́л еси́, я́ко дре́во, е́же благи́й пло́д сво́й даде́ во вре́мя свое́, прия́л бо еси́ по кончи́не, достосла́вне, благода́ть врачева́ти призыва́ющия тя́.

Богородичен: Тя́, Всепе́тая Присноде́во, испове́дающии Богоро́дицу, утвержде́ние и предста́тельство и́мамы и, прибега́юще к Тебе́, бу́ри жите́йския и искуше́ний избавля́емся.

Пе́снь 3.

Ирмос: Утверди́ на́с в Тебе́, Го́споди, дре́вом умерщвле́й гре́х, и стра́х Тво́й всади́ в сердца́ на́с, пою́щих Тя́.

Просия́ свято́е житие́ твое́, блаже́нне, во Аси́и и озаря́ет све́том чуде́с, но проси́ и на́м благода́ти, е́же хоте́ти и е́же де́яти, блага́я чту́щим па́мять твою́.

Не да́л еси́ сна́ очи́ма твои́ма, до́ндеже успи́л еси́, достохва́льне, безчи́нная двиза́ния востаю́щия на ду́х пло́ти твои́ми ко Го́споду всено́щными моле́нии.

Непобеди́мою си́лою Креста́ Христо́ва де́монская победи́в устремле́ния, яви́лся еси́ вино́вник спасе́ния мно́гих, помо́щник сы́й притека́ющих к моще́м твои́м.

Богородичен: Яко Черто́г одушевле́н Бо́жий и Кади́льницу мы́сленнаго и светоно́снаго Угля, велича́ем Тя́, Богоро́дице, зову́ще: ра́дуйся, Хода́таице спасе́ния на́шего.

По 3-й пе́сни, седа́лен, гла́с 4:

Бы́л еси́ пле́нник на земли́, богому́дре, вся́ко озлобле́ние претерпева́я, доброде́тели, я́коже фимиа́м благово́нен и же́ртву благоприя́тну, прине́сл еси́ Бо́гу, Его́же моли́ дарова́ти согреше́ний очище́ние чту́щим святу́ю па́мять твою́.

Сла́ва, и ны́не, Богородичен:

Ты прибе́жище на́ше еси́, и си́ла, и утеше́ние, Богоро́дице Пречи́стая: се́ бо Иже все́х Госпо́дь, ро́ждься от Тебе́, Де́ву боже́ственную Тя́ соблюде́ по рождестве́ и небесе́ и земли́ Цари́цу сотвори́, те́м Тя́ вси́ недосто́йными усты́ сла́вим.

Пе́снь 4.

Ирмос: Услы́шах, Го́споди, слу́х Тво́й и убоя́хся, разуме́х дела́ Твоя́, и диви́хся, и возопи́х: сла́ва си́ле Твое́й, Го́споди.

Ду́шу свою́ украси́л еси́, плотско́е умертви́в мудрова́ние, те́мже небе́сных красо́т еси́ зри́тель.

Пра́веден бы́л еси́ и незло́бив, и́стинен же и непоро́чен, ве́рен и богочести́в, прехва́льне.

Боже́ственным смире́нием возвыша́емь, врага́ смири́л еси́, блаже́нне, на небеси́ и на земли́ сла́вен я́влься.

Богородичен: Спаса́й ста́до Твое́, Ма́ти Бо́жия, безвре́дно от вся́каго зла́: Тя́ бо во обстоя́ниих и́мамы избавле́ние.

Пе́снь 5

Ирмос: Просвеще́ние во тме́ лежа́щих, спасе́ние отча́янных, Христе́ Спа́се мо́й, к Тебе́ у́тренюю, Царю́ ми́ра, просвети́ мя сия́нием Твои́м, ино́го бо ра́зве Тебе́ Бо́га не зна́ю.

Неблагоро́ден ра́б по те́лу сотво́рься, благоро́ден нра́в в души́ име́л еси́, прече́стне, все́ твое́ жела́ние на Бо́га Всеви́дца возложи́л еси́.

Богоуго́дно тече́ние свое́ на земли́ соверши́вшу ти, со благоугоди́вшими Бо́гу ны́не лику́еши, моля́ся о почита́ющих преставле́ние твое́, богоизбра́нне.

Чу́до зри́тся на тебе́, сла́вне, ка́ко по преставле́нии соблюда́ется неруши́мо, благово́нно и целе́бно те́ло твое́ судьба́ми Просла́вльшаго тя́.

Богородичен: Испо́лни уста́ на́ша хвале́ния Твоего́, Госпоже́, и покажи́ ны други́й десятостру́нный псалти́рь очище́нием сугу́быя чу́вств пятери́цы.

Пе́снь 6.

Ирмос: Гла́с глаго́л моле́бных от боле́зненныя, Влады́ко, души́ услы́шав, от лю́тых мя́ изба́ви: Еди́н бо еси́ на́шего спасе́ния вино́вен.

Яко кри́н благово́нен, израсти́ тя Росси́я, и, я́ко ши́пок красе́н, бы́л еси́ посреде́ те́рния ага́рянскаго, облагово́нившей тя́ благода́ти Бо́жией.

Яко фи́никс процве́т, благода́ти тезоиме́нне, сла́достию плодо́в, услажда́еши чу́вства ве́рных, я́ко ке́др несокруши́мь, я́влься бу́рею напа́стей и искуше́ний.

Яко многоце́нное сокро́вище, в земли́ кры́ющееся, мо́щи своя́ яви́л еси́ благочести́вым в виде́нии, и те́ми неду́ги врачу́еши, подая́ от Бо́га освяще́ние лобыза́ющим я́.

Богородичен: Яко Ма́ти все́х даро́в Пода́теля яви́лася еси́, са́д многоцве́тен и ра́й сладкоды́шущь, плода́ми Ду́ха ущедря́ющь и благода́тьми облагоуха́ющь пою́щия Тя́.

Конда́к, гла́с 8:

В честне́й па́мяти твое́й, свя́те, весели́тся о тебе́ Росси́я, во благоче́стии тя́ воспита́вшая, и целе́бным моще́м твои́м ра́дуется Аси́я, иде́же у́зкий пу́ть проше́д страда́льческаго пле́на и по́стнических подвиго́в, сосу́д че́стен яви́лся еси́ Бо́жия благода́ти, ея́же проси́ и на́м, чти́телем твои́м, да зове́м ти́: ра́дуйся, Иоа́нне, благода́ти тезоимени́те.

Икос:

Ка́ко по достоя́нию восхва́лим тя́, доблему́дре, по́двиги твои́ми стра́сти умертви́вша, пло́ть порабо́тивша ду́ху и врага́ победи́вша? Кто́, слы́шав вели́кое твое́ терпе́ние и смире́ние, не удиви́тся? Еже ко все́м кро́тость и беззло́бие, к скорбя́щим сострада́ние, к су́щим в беда́х и неду́зех поможе́ние. В невече́рнем у́бо дни́ Ца́рствия Бо́жия, с пра́ведными пра́ведно наслажда́яся, моли́ся о чту́щих па́мять твою́, да зове́м ти́: ра́дуйся, Иоа́нне, благода́ти тезоимени́те.

Пе́снь 7.

Ирмос: Образу злато́му, на по́ле Деи́ре служи́му, трие́ Твои́ о́троцы небрего́ша безбо́жнаго веле́ния, посреде́ же огня́ вве́ржени, ороша́еми, поя́ху: благослове́н еси́, Бо́же оте́ц на́ших.

Де́нь пра́зднственный соверша́ем дне́сь блаже́ннаго успе́ния твоего́, светоза́рне, в не́мже свети́льник нося́, по́лн еле́я благи́х де́л, вше́л еси́ в све́тлый черто́г и Жениху́ ду́ш вопие́ши: благослове́н еси́, Бо́же оте́ц на́ших.

Ду́шу удобри́в, богому́дре, ра́лом моли́твы, воздержа́ние посе́яв и ороси́в е́ слеза́ми, пожа́л еси́ кла́сы чистоты́ и пра́ведности и с пра́ведными взыва́еши укре́пльшему тя́ Христу́: благослове́н еси́, Бо́же оте́ц на́ших.

Святы́х ду́ши, пра́ведных ли́к и безпло́тных умо́в ополче́ние прия́ша тя́, сликовству́юща и́м, досточу́дне, нетле́нным одея́нием сла́вы укра́шенна и с ни́ми пою́ща: благослове́н еси́, Бо́же оте́ц на́ших.

Богородичен: На Тя́, Влады́чице, наде́жду мою́ от души́ возложи́х всю́ и ча́ю от Тебе́ боже́ственнаго утеше́ния, благода́тную по́мощь низпосли́ ми, стезю́ показу́я, к небеси́ возводя́щую, во е́же пе́ти: благослове́н еси́, Бо́же оте́ц на́ших.

Пе́снь 8.

Ирмос: В пе́щь о́гненную ко отроко́м евре́йским снизше́дшаго и пла́мень в ро́су прело́жшаго Бо́га, по́йте дела́ я́ко Го́спода, и превозноси́те во вся́ ве́ки.

Святе́йших и Животворя́щих Та́ин возжеле́вшу тебе́, прехва́льне, приобщи́тися при исхо́де, принесе́ни бы́ша во я́блоце, и́хже прия́в, воспари́л еси́ к небе́сным.

Добро́ту Созда́теля, ю́же зре́л еси́ зде́, я́ко в зерца́ле и гада́нии, ны́не, преше́д к вы́шним, ясне́йше зри́ши, разре́шшимся тебе́ зерца́лом, богоблаже́нне.

Тече́ния сла́дкая исцеле́ний иска́пают по́тове твои́ и ско́рби твоя́ — ра́дование с ве́рою притека́ющим к моще́м твои́м во сла́ву Христа́ Бо́га на́шего.

Богородичен: Святе́йший хра́ме Спа́са на́шего, пресла́вный Его́ престо́ле, превысо́кое не́бо и раю́ слове́сный, отве́рзи на́м, Преблагослове́нная Богороди́тельнице, ра́йския две́ри.

На 9-й песни поем песнь Пресвятыя Богородицы:

Вели́чит душа́ Моя́ Го́спода и возра́довася дух Мой о Бо́зе Спа́се Мое́м.

К коемуждо стиху припеваем: Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Я́ко призре́ на смире́ние рабы́ Своея́, се бо, от ны́не ублажа́т Мя вси ро́ди.

Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Я́ко сотвори́ Мне вели́чие Си́льный, и свя́то и́мя Его́, и ми́лость Его́ в ро́ды родо́в боя́щимся Его́.

Сотвори́ держа́ву мы́шцею Свое́ю, расточи́ го́рдыя мы́слию се́рдца их.

Низложи́ си́льныя со престо́л, и вознесе́ смире́нныя, а́лчущия испо́лни благ, и богатя́щияся отпусти́ тщи.

Восприя́т Изра́иля о́трока Своего́, помяну́ти ми́лости, я́коже глаго́ла ко отце́м на́шим, Авраа́му и се́мени его́ да́же до ве́ка.

Пе́снь 9.

Ирмос: От Бо́га Бо́га Сло́ва, неизрече́нною му́дростию прише́дшаго обнови́ти Ада́ма, я́дию в тле́ние па́дшаго лю́те, от Святы́я Де́вы неизрече́нно воплоти́вшагося на́с ра́ди, ве́рнии, единому́дренно пе́сньми велича́ем.

Бога́тство некра́домое собра́в, е́же ни че́рвь, ни тля́ тли́т, и, я́коже не́кий корабле́ц, отплы́в от земли́, приста́нища всепоко́йнаго и блаже́нства ве́чнаго дости́гл еси́.

Го́рнее Ца́рство, Вы́шний гра́д, Бо́жий ра́й, пра́ведных наслажде́ние и све́т немерца́ющь обрести́ сподо́бился еси́, иде́же на́с помяни́, воспева́ющих тя́, всехва́льне.

С со́нмом пра́ведных и все́х святы́х лику́я, приснопа́мятне, моли́ все́х Созда́теля и Бо́га, да сподо́бит спаса́емых ча́сти па́мять твою́ пра́зднующих.

Богородичен: Приими́, Влады́ко, хода́тайство о на́с Ма́тере Твоея́ и его́же просла́вил еси́, Иоа́нна пра́веднаго, и́хже мольба́ми не лиши́ на́с благи́х Твои́х, угото́ванных лю́бящим Тя́.

Свети́лен:

Ди́вное узре́вше зна́мение, ужасо́шася омраче́ннии ага́ряне: све́т бо блиста́ше, иде́же бе́ погребе́н Иоа́нн, и а́бие возвести́ша сие́ ве́рным, и́же, откопа́вше гро́б, с ра́достию обрето́ша нетле́нное, и благоуха́нное, и цельбоно́сное пра́веднаго те́ло, Христа́ Бо́га о не́м велича́юще.

Сла́ва, и ны́не, Богородичен:

Све́т благода́ти Рождество́м Твои́м возсия́, и просвети́ всю́ подсо́лнечную, и предста́теля тмы́ погуби́, Богороди́тельнице Пречи́стая, Ангелов похвало́ и челове́ков все́х спасе́ние, непреста́нными гла́сы Тя́ велича́ющих.

Хвали́тны псалмы́, глас 8:

Вся́кое дыха́ние да хва́лит Го́спода./ Хвали́те Го́спода с небе́с,/ хвали́те Его́ в вы́шних.// Тебе́ подоба́ет песнь Бо́гу.

Хвали́те Его́ вси а́нгели Его́,/ хвали́те Его́ вся си́лы Его́.// Тебе́ подоба́ет песнь Бо́гу.

Сти́хиры, глас 8:

Стих: Сотвори́ти в них суд напи́сан/ сла́ва сия́ бу́дет всем преподо́бным Его́.

О пресла́внаго чудесе́! / Иоа́нн, благове́рная о́трасль Росси́и / и Це́ркве Христо́вы сы́н и́скренний, / с лю́тыми ага́ряны жи́тельствуя, / в ско́рбех плене́ния и в злострада́нии, / обре́те, Его́же иска́ше, / ду́ш на́ших Свободи́теля, / Стра́сти и Кре́ст прия́вшаго / челове́ческаго ра́ди свобожде́ния.

Стих: Хвали́те Его́ на си́лах Его́,/ хвали́те Его́ по мно́жеству вели́чествия Его́.

О пресла́внаго чудесе́! / Среди́ плотски́х рачи́телей пребыва́я, / ве́сь чи́ст и духо́вен бя́ше Иоа́нн, / име́я ло́же в ко́нском стоя́лищи, / бога́тство — наготу́ и хла́д, / вме́сто же че́сти — поруга́ния и бие́ния, / вся́ претерпе́ до́блий, тверде́йше Христа́ ра́ди, / не уклони́вша лица́ Своего́ от оплева́ний и зауше́ний / челове́ческаго ра́ди спасе́ния.

Стих: Хвали́те Его́ в тимпа́не и ли́це,/ хвали́те Его́ во стру́нах и орга́не.

Прииди́те, ве́рнии, / свяще́нную и честну́ю па́мять пра́веднаго Иоа́нна / благоче́стно ны́не восхва́лим: / се́й бо, пожи́в в плену́, а́ки у́зник в темни́це, / по преставле́нии свое́м сподо́бися на небеси́ / пресве́тлаго осия́ния пра́ведных, / его́же получи́ти мо́лится / воспева́ющим любо́вию све́тлыя того́ по́двиги.

Стих: Хвали́те Его́ в кимва́лех доброгла́сных, хвали́те Его́ в кимва́лех восклица́ния. / Вся́кое дыха́ние да хва́лит Го́спода.

Боже́ственная благода́ть Ду́ха, / живу́щая в тебе́, всече́стне, / ди́вна показа́ тебе́ в нетле́нии твои́х честны́х моще́й, / в чудесе́х от те́х и исцеле́ниих, / и́хже любо́вию лобыза́юще, / сла́вим о тебе́ Христа́ Бо́га, / ди́внаго во святы́х Свои́х, / к Нему́же бу́ди те́плый хода́тай / о воспева́ющих све́тлыя твоя́ по́двиги.

Глас 6: Сла́ва Отцу́ и Сы́ну и Свято́му Ду́ху

Кто́ не восхва́лит тя́, и́стинно достохва́льнаго, Иоа́нне пра́ведне? Кто́ не удиви́тся боголюби́вому твоему́ нра́ву? Егда́ бо лю́тый господи́н тво́й узре́ в дому́ свое́м тебе́ ра́ди изоби́лие во все́м и даде́ тебе́ осла́бу, ты́, снеда́емь огне́м любве́ ко Го́споду, приумно́жил еси́ труды́ по́стническия, те́мже свя́та яви́ тебе́ и просла́ви Пресвята́я Тро́ица, Юже моли́ спасти́ся душа́м на́шим.

Глас 6: И ны́не и при́сно и во ве́ки веко́в. Ами́нь.

Богоро́дице, Ты́ еси́ лоза́ и́стинная, возрасти́вшая на́м пло́д живота́, Тебе́ мо́лимся, моли́ся, Влады́чице, со святы́ми апо́столы, поми́ловати ду́ши на́ша.

Славосло́вие вели́кое:

Сла́ва в вы́шних Бо́гу, и на земли́ мир, в челове́цех благоволе́ние. Хва́лим Тя, благослови́м Тя, кла́няем Ти ся, славосло́вим Тя, благодари́м Тя, вели́кия ра́ди сла́вы Твоея́. Го́споди Царю́ Небе́сный, Бо́же О́тче Вседержи́телю, Го́споди, Сы́не Единоро́дный, Иису́се Христе́, и Святы́й Ду́ше. Го́споди Бо́же, А́гнче Бо́жий, Сы́не Оте́чь, взе́мляй грех ми́ра, поми́луй нас; взе́мляй грехи́ ми́ра, приими́ моли́тву на́шу; седя́й одесну́ю Отца́, поми́луй нас. Я́ко Ты еси́ еди́н Свят, Ты еси́ еди́н Госпо́дь, Иису́с Христо́с, в сла́ву Бо́га Отца́. Ами́нь.

На всяк день благословлю́ Тя, и восхвалю́ И́мя Твое́ во ве́ки, и в век ве́ка.

Сподо́би, Го́споди, в день сей без греха́ сохрани́тися нам. Благослове́н еси́, Го́споди, Бо́же оте́ц на́ших, и хва́льно и просла́влено И́мя Твое́ во ве́ки. Ами́нь.

Бу́ди, Го́споди, ми́лость Твоя́ на нас, я́коже упова́хом на Тя.

Благослове́н еси́, Го́споди, научи́ мя оправда́нием Твои́м. (Три́жды)

Го́споди, прибе́жище был еси́ нам в род и род. Аз рех: Го́споди, поми́луй мя, исцели́ ду́шу мою́, я́ко согреши́х Тебе́. Го́споди, к Тебе́ прибего́х, научи́ мя твори́ти во́лю Твою́, я́ко Ты еси́ Бог мой: я́ко у Тебе́ исто́чник живота́, во све́те Твое́м у́зрим свет. Проба́ви ми́лость Твою́ ве́дущим Тя.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Три́жды)

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Святы́й Безсме́ртный, поми́луй нас.

Святы́й Бо́же, Святы́й Кре́пкий, Святы́й Безсме́ртный, поми́луй нас.

Тропа́рь, глас 4:

Утверди́, Бо́же, святу́ю правосла́вную ве́ру, правосла́вных христиа́н во век ве́ка.

Честне́йшую Херуви́м и Сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу, Тя велича́ем.

Сла́ва, и ны́не. Го́споди, поми́луй. (Три́жды) Благослови́.

Господи Иисусе Христе, Сыне Божий, моли́твами Пречи́стыя Своея́ Ма́тере, святого праведного Иоанна Русского исповедника, преподобных и богоносных отец наших и всех святы́х, поми́луй и спаси нас я́ко Благ и Челове́колюбец.

Многоле́тие:

Вели́каго Господи́на и Отца́ на́шего Кири́лла,/ Святе́йшаго Патри́арха Моско́вского и всея́ Руси́,/ и Господи́на на́шего (Высоко-) Преосвяще́ннейшаго (имярек),/ (архи-)епи́скопа (митрополита (титул)),/ богохрани́мую страну́ на́шу Росси́йскую,/ и вся правосла́вныя христи́аны,// Го́споди, сохрани́ их на мно́гая ле́та.