Шрифт

▲

Богослужебные тексты для домашнего употребления

Дни памяти святых

Последование Всеношного бдения в день памяти третьего обретения главы Пророка, Предтечи и Крестителя Господня Иоанна. Для домашнего (келейного) совершения

Оглавление

ВСЕНО́ЩНОЕ БДЕ́НИЕ

ВЕЛИ́КАЯ ВЕЧЕ́РНЯ

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас. Ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Трижды.)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, (трижды). Сла́ва, и ны́не:

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Таже, Го́споди, поми́луй, (12), Сла́ва, и ны́не:

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 103:

Поется часть псалма:

Благослови́, душе́ моя́, Го́спода. / Благослове́н еси́, Го́споди. / Го́споди, Бо́же мой, возвели́чился еси́ зело́. / Благослове́н еси́, Го́споди. / Во испове́дание и в велеле́поту обле́клся еси́. / Благослове́н еси́, Го́споди. / Посреде́ гор про́йдут во́ды. / Ди́вна дела́ Твоя́, Го́споди. / Вся прему́дростию сотвори́л еси́. / Сла́ва Ти, Го́споди, сотвори́вшему вся.

Или читается псалом полностью:

Благослови́, душе́ моя́, Го́спода. Го́споди, Бо́же мой, возвели́чился еси́ зело́. Во испове́дание и в велеле́поту обле́клся еси́. Одея́йся све́том, я́ко ри́зою, простира́яй не́бо, я́ко ко́жу. Покрыва́яй вода́ми превы́спренняя Своя́, полага́яй о́блаки на восхожде́ние Свое́, ходя́й на крилу́ ве́треню. Творя́й А́нгелы Своя́ ду́хи и слуги́ Своя́ пла́мень о́гненный. Основа́яй зе́млю на тве́рди ея́, не преклони́тся в век ве́ка. Бе́здна, я́ко ри́за, одея́ние ея́, на гора́х ста́нут во́ды, от запреще́ния Твоего́ побе́гнут, от гла́са гро́ма Твоего́ убоя́тся. Восхо́дят го́ры и нисхо́дят поля́ в ме́сто, е́же основа́л еси́ им. Преде́л положи́л еси́, eго́же не пре́йдут, ниже́ обратя́тся покры́ти зе́млю. Посыла́яй исто́чники в де́брех, посреде́ гор про́йдут во́ды. Напая́ют вся зве́ри се́льныя, ждут она́гри в жа́жду свою́. На ты́х пти́цы небе́сныя привита́ют, от среды́ ка́мения дадя́т глас. Напая́яй го́ры от превы́спренних Свои́х, от плода́ дел Твои́х насы́тится земля́. Прозяба́яй траву́ ското́м, и злак на слу́жбу челове́ком, извести́ хлеб от земли́. И вино́ весели́т се́рдце челове́ка, ума́стити лице́ еле́ем, и хлеб се́рдце челове́ка укрепи́т. Насы́тятся древа́ польска́я, ке́дри Лива́нстии, и́хже еси́ насади́л. Та́мо пти́цы вогнездя́тся, ероди́ево жили́ще предводи́тельствует и́ми. Го́ры высо́кия еле́нем, ка́мень прибе́жище за́яцем. Сотвори́л есть луну́ во времена́, со́лнце позна́ за́пад свой. Положи́л еси́ тму, и бысть нощь, в не́йже про́йдут вси зве́рие дубра́внии. Ски́мни рыка́ющии, восхи́тити и взыска́ти от Бо́га пи́щу себе́. Возсия́ со́лнце и собра́шася и в ло́жах свои́х ля́гут. Изы́дет челове́к на де́ло свое́ и на де́лание свое́ до ве́чера. Я́ко возвели́чишася дела́ Твоя́, Го́споди, вся прему́дростию сотвори́л еси́, испо́лнися земля́ тва́ри Твоея́. Сие́ мо́ре вели́кое и простра́нное, та́мо га́ди, и́мже несть числа́, живо́тная ма́лая с вели́кими, та́мо корабли́ препла́вают, змий сей, eго́же созда́л еси руга́тися eму́. Вся к Тебе́ ча́ют, да́ти пи́щу им во бла́го вре́мя. Да́вшу Тебе́ им соберу́т, отве́рзшу Тебе́ ру́ку вся́ческая испо́лнятся бла́гости, отвра́щшу же Тебе́ лице́, возмяту́тся, отъи́меши дух их, и исче́знут, и в персть свою́ возвратя́тся. По́слеши Ду́ха Твоего́, и сози́ждутся, и обнови́ши лице́ земли́. Бу́ди сла́ва Госпо́дня во ве́ки, возвесели́тся Госпо́дь о де́лех Свои́х, призира́яй на зе́млю, и творя́й ю́ трясти́ся, прикаса́яйся гора́м, и дымя́тся. Воспою́ Го́сподеви в животе́ мое́м, пою́ Бо́гу моему́, до́ндеже есмь, да услади́тся Ему́ бесе́да моя́, аз же возвеселю́ся о Го́споде. Да исче́знут гре́шницы от земли́, и беззако́нницы, я́коже не бы́ти им. Благослови́, душе́ моя́, Го́спода.

Со́лнце позна́ за́пад свой. Положи́л еси́ тму, и бысть нощь. Я́ко возвели́чишася дела́ Твоя́, Го́споди, вся прему́дростию сотвори́л еси́.

Сла́ва, и ны́не: Аллилу́иа, аллилу́иа, аллилу́иа, сла́ва Тебе́ Бо́же. Трижды.

Блаже́н муж:

Блаже́н муж, и́же не и́де на сове́т нечести́вых.

Аллилу́иа, аллилу́иа, аллилу́иа.

Я́ко весть Госпо́дь путь пра́ведных, и путь нечести́вых поги́бнет.

Аллилу́иа, аллилу́иа, аллилу́иа.

Рабо́тайте Го́сподеви со стра́хом и ра́дуйтеся Ему́ с тре́петом.

Аллилу́иа, аллилу́иа, аллилу́иа.

Блаже́ни вси наде́ющиися Нань.

Аллилу́иа, аллилу́иа, аллилу́иа.

Воскресни́, Го́споди, спаси́ мя, Бо́же мой.

Аллилу́иа, аллилу́иа, аллилу́иа.

Госпо́дне есть спасе́ние, и на лю́дех Твои́х благослове́ние Твое́.

Аллилу́иа, аллилу́иа, аллилу́иа.

Сла́ва Отцу́ и Сы́ну и Свято́му Духу.

Аллилу́иа, аллилу́иа, аллилу́иа.

И ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Го́споди, воззва́х, глас 8:

Го́споди, воззва́х к Тебе́, услы́ши мя./ Услы́ши мя, Го́споди./ Го́споди, воззва́х к Тебе́, услы́ши мя:/ вонми́ гла́су моле́ния моего́,/ внегда́ воззва́ти ми к Тебе́.// Услы́ши мя, Го́споди.

Да испра́вится моли́тва моя́,/ я́ко кади́ло пред Тобо́ю,/ воздея́ние руку́ мое́ю/ – же́ртва вече́рняя.// Услы́ши мя, Го́споди.

Стихи́ры пра́здника, глас 8:

Стих: А́ще беззако́ния на́зриши, Го́споди, Го́споди, кто постои́т? Я́ко у Тебе́ очище́ние есть.

Блаже́нне Иоа́нне Предте́че, / па́че со́лнечных лу́чь, / возсия́вши облиста́ / от земли́ глава́ твоя́ / и ве́рныя просвети́, / ю́же я́ко боже́ственное сокро́вище, иму́ще, / бога́тную благода́ть почерпа́ем, / освяща́юще ду́ши, и телеса́, и помышле́ния, / и, торжеству́юще, тя́ ублажа́ем.

Стих: И́мене ра́ди Твоего́ потерпе́х Тя, Го́споди, потерпе́ душа́ моя́ в сло́во Твое́, упова́ душа́ моя́ на Го́спода.

Стих: От стра́жи у́тренния до но́щи, от стра́жи у́тренния да упова́ет Изра́иль на Го́спода.

Благода́ть неоску́дну источа́ющи, / свяще́нная глава́ твоя́, / блаже́нне Предте́че, / свяще́ннику богому́дру, / не ве́дящу показу́ется, / и́же потща́ся ве́рою и благода́тию, / явле́нно твори́т сея́ прише́ствие, / освяща́яся с людьми́ богому́дрыми и царе́м, / ве́ру правосла́вну те́пле утвержда́юще.

Стих: Я́ко у Го́спода ми́лость, и мно́гое у Него́ избавле́ние, и Той изба́вит Изра́иля от всех беззако́ний eго́.

Стих: Хвали́те Го́спода вси язы́цы, похвали́те Его́ вси лю́дие.

Тре́тие пра́зднуем явле́ние / твоея́ честны́я главы́, / ю́же Тро́ица венча́ла е́сть, / усе́чена бы́вши, сла́вне, / ре́вности ра́ди боже́ственныя; / и обре́тением сея́ ра́дуются Ангельстии чи́ни, / му́ченик сосло́вие, боже́ственнии апо́столи и проро́цы вси́. / С ни́миже на́с всегда́ помина́й, / Госпо́день Предте́че.

Стих: Я́ко утверди́ся ми́лость Его́ на нас, и и́стина Госпо́дня пребыва́ет во век.

Глас 6: Сла́ва Отцу́ и Сы́ну и Свято́му Ду́ху.

Сокро́вище боже́ственных даро́в, богохрани́мая глава́ твоя́, Предте́че, от земны́х не́др возсия́, ю́же мы́ ве́рно прие́млюще и покланя́ющеся, сла́вне, обогаща́емся от тебе́, Христо́в Крести́телю, чудесы́ пресла́вными и согреше́ний проще́нием.

Глас 6: И ны́не и при́сно и во ве́ки веко́в. Ами́нь.

Кто Тебе́ не ублажи́т, Пресвята́я Де́во; / кто ли не воспое́т Твоего́ Пречи́стаго Рождества́; / безле́тно бо от Отца́ возсия́вый Сын Единоро́дный, / То́йже от Тебе́, Чи́стыя, про́йде, / неизрече́нно вопло́щься, / естество́м Бог Сый, / и естество́м быв Челове́к нас ра́ди; / не во двою́ лицу́ разделя́емый, / но во двою́ естеству́ / несли́тно познава́емый. / Того́ моли́, Чи́стая Всеблаже́нная, / поми́ловатися душа́м на́шим.

Све́те Тихи́й:

Све́те Ти́хий святы́я сла́вы Безсме́ртнаго Отца́ Небе́снаго, Свята́го, Блаже́ннаго, Иису́се Христе́! Прише́дше на за́пад со́лнца, ви́девше свет вече́рний, пое́м Отца́, Сы́на и Свята́го Ду́ха, Бо́га. Досто́ин еси́ во вся времена́ пет бы́ти гла́сы преподо́бными, Сы́не Бо́жий, живо́т дая́й; те́мже мир Тя сла́вит.

1. Проро́чества Иса́иина чте́ние.

Та́ко глаго́лет Госпо́дь: утеша́йте, утеша́йте лю́ди Моя́, глаго́лет Бо́г: свяще́нницы, глаго́лите в се́рдцы Иерусали́му, умоли́те его́, я́ко умно́жися смире́ние его́. Разреши́ся бо гре́х его́, я́ко прия́т из руки́ Госпо́дни сугу́ба согреше́ния своя́. Гла́с вопию́щего в пусты́ни: угото́вайте пу́ть Госпо́день, пра́вы твори́те стези́ Бо́гу на́шему. На го́ру высо́ку взы́ди, благовеству́й Сио́ну, возвыша́й кре́постию гла́с сво́й, благовеству́яй Иерусали́му: вознеси́те, не бо́йтеся. Аз Го́сподь Бо́г, Аз услы́шу убо́гих Изра́илев, и не оста́влю те́х. Но отве́рзу от го́р ре́ки и посреде́ по́ля исто́чники, сотворю́ пусты́ню в лу́г и жа́ждущую зе́млю во исто́чники водны́я. Да возвесели́тся не́бо свы́ше, и о́блацы да кропя́т пра́вду, да возсия́ет земля́, и да прозя́бнет ми́лость, и пра́вда да возсия́ет вку́пе. Гла́с весе́лия возвести́те, и услы́шано да бу́дет, возвести́те да́же до коне́ц земли́, глаго́лите, я́ко изба́ви Госпо́дь раба́ Своего́ Иа́кова и, а́ще вжа́ждут в пусты́ни, источи́т и́м во́ду из ка́мене. Возвесели́ся, непло́ды неражда́ющая, расто́ргни и возопи́й, неболе́вшая, я́ко мно́га ча́да пусты́я па́че, не́жели иму́щия му́жа.

2. Проро́чества Малахи́ина чте́ние

Та́ко глаго́лет Госпо́дь Вседержи́тель: се́ Аз посыла́ю Ангела Моего́ пред лице́м Твои́м, и́же угото́вит пу́ть Тво́й пред Тобо́ю. И прии́дет во хра́м Сво́й Госпо́дь, Его́же вы́ и́щете, и кто́ стерпи́т де́нь вхо́да Его́? Зане́же тому́ приити́, я́ко о́гнь в горни́ле и я́коже бы́лие перу́щих, и очи́стит, пояда́я и очища́я, я́ко сребро́ и зла́то. И прии́дет к ва́м судо́м, и бу́дет свиде́тель ско́р на лука́выя, и на прелюбоде́йцы, и на клену́щияся и́менем Мои́м во лжу́, и на лиша́ющия мзды́ нае́мника, и на наси́льствующия вдови́цы и пха́ющия си́рыя, и на уклоня́ющия су́д прише́льца, и на небоя́щияся Его́, глаго́лет Госпо́дь Вседержи́тель. Зане́ Аз Госпо́дь Бо́г ва́ш, и не изменю́ Себе́; и вы́, сы́нове Иа́ковли, уклони́стеся от зако́на и не сохрани́сте. Сего́ ра́ди обрати́теся ко Мне́, и обращу́ся к ва́м, глаго́лет Госпо́дь Вседержи́тель, и ублажа́т ва́с вси́ язы́цы, и разуме́йте, я́ко Аз Госпо́дь, смотря́яй посреди́ пра́веднаго и посреди́ беззако́нника в де́нь о́н, в о́ньже сотворю́ снабде́ние лю́бящим Мя́. Позна́йте у́бо и помяни́те зако́н Моисе́ов, раба́ Моего́, я́коже запове́да ва́м в Хори́ве, ко всему́ Изра́илю повеле́ние и оправда́ние. И се́ Аз послю́ ва́м Илию́ Фесви́тянина, пре́жде да́же не приити́ дню́ Госпо́дню вели́кому, просвеще́нному, и́же напра́вит се́рдце отца́ к сы́ну и се́рдце челове́ка ко и́скреннему своему́, да не, прише́д, поражу́ зе́млю вско́ре, глаго́лет Госпо́дь Вседержи́тель, Бо́г Святы́й Изра́илев.

3. Прему́дрости Соломо́ни чте́ние

Пра́ведник, а́ще пости́гнет сконча́тися, в поко́и бу́дет. Осу́дит же пра́ведник умира́яй живу́щия нечести́выя. Узрят бо кончи́ну пра́веднаго и не разуме́ют, что́ совеща́ша о не́м, я́ко пове́ржет Госпо́дь нечести́выя безгла́сны ни́ц и поколе́блет и́х от основа́ний, и до после́дняго исче́знут в боле́зни, и па́мять и́х поги́бнет. Прии́дут бо в помышле́ние согреше́ний свои́х ужа́сни, и обличи́т и́х сопроти́в беззако́ния и́х. Тогда́ ста́нет в дерзнове́нии мно́зе пра́ведник пред лице́м оскорби́вших его́ и отмета́ющих труды́ его́. Ви́девше же его́, смяту́тся стра́хом мно́гим и ужа́снутся о пресла́вном спасе́нии его́. Реку́т бо к себе́, ка́ющеся, и в тесноте́ ду́ха воздо́хнут, и реку́т: се́й бе́, его́же име́хом не́когда в посме́х и в при́тчу поноше́ния, безу́мнии, житие́ его́ вмени́хом неи́стово и кончи́ну его́ безче́стну. Ка́ко вмени́ся в сыне́х Бо́жиих и во святы́х жре́бий его́ е́сть? Убо заблуди́хом от пути́ и́стиннаго, и пра́вды све́т не облиста́ на́м, и со́лнце не возсия́ на́м. Беззако́нных испо́лнихомся сте́зь и поги́бели и ходи́хом стези́ непрохо́дны, пути́ же Госпо́дня не разуме́хом.

Сподо́би, Го́споди:

Сподо́би, Го́споди, в ве́чер сей без греха́ сохрани́тися нам. Благослове́н еси́, Го́споди, Бо́же оте́ц на́ших, и хва́льно и просла́влено и́мя Твое́ во ве́ки. Ами́нь.

Бу́ди, Го́споди, ми́лость Твоя́ на нас, я́коже упова́хом на Тя. Благослове́н еси́, Го́споди, научи́ мя оправда́нием Твои́м. Благослове́н еси́, Влады́ко, вразуми́ мя оправда́нием Твои́м. Благослове́н еси́, Святы́й, просвети́ мя оправда́нии Твои́ми.

Го́споди, ми́лость Твоя́ во век, дел руку́ Твое́ю не пре́зри. Тебе́ подоба́ет хвала́, Тебе́ подоба́ет пе́ние, Тебе́ сла́ва подоба́ет. Отцу́ и Сы́ну и Свято́му Ду́ху, ны́не и при́сно и во ве́ки веко́в. Ами́нь.

Го́споди, поми́луй. (40 раз)

Стихи́ры на стихо́вне:

Стихиры, гла́с 1:

Прииди́те, торжество́ боже́ственное све́тло соверши́м: / Све́та бо свети́льник, / гла́с же Сло́ва, дру́г Женихо́в, / вели́кий свети́льник и́стины яви́ся / Крести́тель Госпо́день, / показа́в на́м святу́ю главу́ свою́.

Сти́х: Та́мо возращу́ ро́г Дави́дови, / угото́вах свети́льник пома́занному Моему́.

О блу́днем беззако́нии Иродова дея́ния / и прелюбоде́йственныя скве́рны / беззако́ннующа обличи́л еси́, я́ко пропове́дник чистоты́, / во главу́ усе́чен бы́л еси́, Предте́че, / ю́же благода́тию боже́ственных чудодея́ний, / ве́рным ны́не откры́л еси́.

Сти́х: Помяни́, Го́споди, Дави́да / и всю́ кро́тость его́.

Якоже богото́чный благода́тей исто́чник, / от земны́х не́др, / источа́ющь чудеса́, главу́ Предте́чеву, / я́ко сокро́вище дарова́ний, / прие́мше от Бо́га явле́нну, / ра́достно восхва́лим, празднолю́бцы.

Слава, гла́с 2:

Якоже боже́ственных умышле́ний, всечестна́я ра́ка неизрече́ннаго существа́, я́сно прови́девшая та́инство, глава́ твоя́, я́ко от ложе́сн ма́терних, от сокро́вищ земны́х дне́сь возсия́, Иоа́нне всехва́льне, и облагово́ни всю́ подсо́лнечную, освяще́ния пролива́ющая миро, и мы́сленно пропове́дающая пу́ть покая́ния, и Спа́су все́х моля́щаяся о душа́х на́ших.

И ны́не, Богоро́дичен:

О чудесе́ но́ваго всех дре́вних чуде́с! / Кто бо позна́ Ма́терь, без му́жа ро́ждшую / и на руку́ нося́щую всю тварь Содержа́щаго; / Бо́жие есть изволе́ние Ро́ждшееся. / Его́же я́ко Младе́нца Пречи́стая, / Твои́ма рука́ма носи́вшая, / и ма́тернее дерзнове́ние к Нему́ иму́щая, / не преста́й моля́щи о чту́щих Тя, / уще́дрити и спасти́ ду́ши на́ша.

Моли́тва свята́го Симео́на Богоприи́мца:

Ны́не отпуща́еши раба́ Твоего́, Влады́ко,/ по глаго́лу Твоему́, с ми́ром;/ я́ко ви́деста о́чи мои́ спасе́ние Твое́,/ е́же еси́ угото́вал пред лице́м всех люде́й,/ свет во открове́ние язы́ков,// и сла́ву люде́й Твои́х Изра́иля.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Го́споди, поми́луй. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Тропа́рь, глас 4:

Яко боже́ственное сокро́вище, сокрове́нное в земли́, Христо́с откры́ главу́ твою́ на́м, проро́че и Предте́че. Вси́ у́бо, соше́дшеся в сея́ обре́тение, пе́сньми богоглаго́ливыми Спа́са воспои́м, спаса́юща на́с от тле́ния моли́твами твои́ми. (Дважды)

Песнь Пресвятей Богородице:

Богоро́дице Де́во, ра́дуйся, / Благода́тная Мари́е, Госпо́дь с Тобо́ю; / благослове́на Ты в жена́х / и благослове́н Плод чре́ва Твоего́, / я́ко Спа́са родила́ еси́ душ на́ших. (Единожды)

Бу́ди И́мя Госпо́дне благослове́но от ны́не и до ве́ка. (Три́жды)

Псало́м 33:

Благословлю́ Го́спода на вся́кое вре́мя,/ вы́ну хвала́ Его́ во усте́х мои́х./ О Го́споде похва́лится душа́ моя́,/ да услы́шат кро́тцыи, и возвеселя́тся./ Возвели́чите Го́спода со мно́ю,/ и вознесе́м И́мя Его́ вку́пе./ Взыска́х Го́спода, и услы́ша мя,/ и от все́х скорбе́й мои́х изба́ви мя./ Приступи́те к Нему́, и просвети́теся,/ и ли́ца ва́ша не постыдя́тся./ Сей ни́щий воззва́, и Госпо́дь услы́ша и́,/ и от все́х скорбе́й его́ спасе́ и́./ Ополчи́тся а́нгел Госпо́день о́крест боя́щихся Его́,/ и изба́вит их./ Вкуси́те и ви́дите, я́ко благ Госпо́дь:/ блаже́н муж, и́же упова́ет Нань./ Бо́йтеся Го́спода, вси́ святи́и Его́,/ я́ко несть лише́ния боя́щимся Его́./ Бога́тии обнища́ша и взалка́ша:/ взыска́ющии же Го́спода// не лиша́тся вся́каго бла́га.

У́ТРЕНЯ.

Шестопса́лмие:

Сла́ва в вы́шних Бо́гу, и на земли́ мир, в челове́цех благоволе́ние. (Три́жды)

Го́споди, устне́ мои́ отве́рзеши, и уста́ моя́ возвестя́т хвалу́ Твою́. (Два́жды)

Псалом 3:

Го́споди, что ся умно́жиша стужа́ющии ми́? Мно́зи востаю́т на мя, мно́зи глаго́лют души́ мое́й: несть спасе́ния eму́ в Бо́зе eго́. Ты же, Го́споди, Засту́пник мой еси́, сла́ва моя́ и вознося́й главу́ мою́. Гла́сом мои́м ко Го́споду воззва́х, и услы́ша мя от горы́ святы́я Своея́. Аз усну́х, и спах, воста́х, я́ко Госпо́дь засту́пит мя. Не убою́ся от тем люде́й, о́крест напа́дающих на мя. Воскресни́, Го́споди, спаси́ мя, Бо́же мой, я́ко Ты порази́л еси́ вся вражду́ющыя ми всу́е: зу́бы гре́шников сокруши́л еси́. Госпо́дне есть спасе́ние, и на лю́дех Твои́х благослове́ние Твое́.

Аз усну́х, и спах, воста́х, я́ко Госпо́дь засту́пит мя.

Псалом 37:

Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́. Я́ко стре́лы Твоя́ унзо́ша во мне, и утверди́л еси́ на мне ру́ку Твою́. Несть исцеле́ния в пло́ти мое́й от лица́ гне́ва Твоего́, несть ми́ра в косте́х мои́х от лица́ грех мои́х. Я́ко беззако́ния моя́ превзыдо́ша главу́ мою́, я́ко бре́мя тя́жкое отяготе́ша на мне. Возсмерде́ша и согни́ша ра́ны моя́ от лица́ безу́мия моего́. Пострада́х и сляко́хся до конца́, весь день се́туя хожда́х. Я́ко ля́двия моя́ напо́лнишася поруга́ний, и несть исцеле́ния в пло́ти мое́й. Озло́блен бых и смири́хся до зела́, рыка́х от воздыха́ния се́рдца моего́. Го́споди, пред Тобо́ю все жела́ние мое́ и воздыха́ние мое́ от Тебе́ не утаи́ся. Се́рдце мое́ смяте́ся, оста́ви мя си́ла моя́, и свет о́чию мое́ю, и той несть со мно́ю. Дру́зи мои́ и и́скреннии мои́ пря́мо мне прибли́жишася и ста́ша, и бли́жнии мои́ отдале́че мене́ ста́ша и нужда́хуся и́щущии ду́шу мою́, и и́щущии зла́я мне глаго́лаху су́етная и льсти́вным весь день поуча́хуся. Аз же я́ко глух не слы́шах и я́ко нем не отверза́яй уст свои́х. И бых я́ко челове́к не слы́шай и не имы́й во усте́х свои́х обличе́ния. Я́ко на Тя, Го́споди, упова́х, Ты услы́шиши, Го́споди Бо́же мой. Я́ко рех: да не когда́ пора́дуют ми ся врази́ мои́: и внегда́ подвижа́тися нога́м мои́м, на мя велере́чеваша. Я́ко аз на ра́ны гото́в, и боле́знь моя́ предо мно́ю есть вы́ну. Я́ко беззако́ние мое́ аз возвещу́ и попеку́ся о гресе́ мое́м. Врази́ же мои́ живу́т и укрепи́шася па́че мене́, и умно́жишася ненави́дящии мя без пра́вды. Воздаю́щии ми зла́я возблага́я оболга́ху мя, зане́ гоня́х благосты́ню. Не оста́ви мене́, Го́споди Бо́же мой, не отступи́ от Мене́. Вонми́ в по́мощь мою́, Го́споди спасе́ния моего́.

Не оста́ви мене́, Го́споди Бо́же мой, не отступи́ от Мене́. Вонми́ в по́мощь мою́, Го́споди спасе́ния моего́.

Псалом 62:

Бо́же, Бо́же мой, к Тебе́ у́тренюю, возжада́ Тебе́ душа́ моя́, коль мно́жицею Тебе́ плоть моя́, в земли́ пу́сте и непрохо́дне, и безво́дне. Та́ко во святе́м яви́хся Тебе́, ви́дети си́лу Твою́ и сла́ву Твою́. Я́ко лу́чши ми́лость Твоя́ па́че живо́т, устне́ мои́ похвали́те Тя. Та́ко благословлю́ Тя в животе́ мое́м, о и́мени Твое́м воздежу́ ру́це мои́. Я́ко от ту́ка и ма́сти да испо́лнится душа́ моя́, и устна́ма ра́дости восхва́лят Тя уста́ моя́. А́ще помина́х Тя на посте́ли мое́й, на у́тренних поуча́хся в Тя. Я́ко был еси́ Помо́щник мой, и в кро́ве крилу́ Твое́ю возра́дуюся. Прильпе́ душа́ моя́ по Тебе́, мене́ же прия́т десни́ца Твоя́. Ти́и же всу́е иска́ша ду́шу мою́, вни́дут в преиспо́дняя земли́, предадя́тся в ру́ки ору́жия, ча́сти ли́совом бу́дут. Царь же возвесели́тся о Бо́зе, похва́лится всяк клены́йся Им, я́ко загради́шася уста́ глаго́лющих непра́ведная.

На у́тренних поуча́хся в Тя. Я́ко был еси́ Помо́щник мой, и в кро́ве крилу́ Твое́ю возра́дуюся. Прильпе́ душа́ моя́ по Тебе́, мене́ же прия́т десни́ца Твоя́.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Го́споди поми́луй. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Псалом 87:

Го́споди Бо́же спасе́ния моего́, во дни воззва́х, и в нощи́ пред Тобо́ю. Да вни́дет пред Тя моли́тва моя́: приклони́ у́хо Твое́ к моле́нию моему́, я́ко испо́лнися зол душа́ моя́, и живо́т мой аду прибли́жися. Привмене́н бых с низходя́щими в ров, бых я́ко челове́к без по́мощи, в ме́ртвых свобо́дь, я́ко я́звеннии спя́щии во гро́бе, и́хже не помяну́л еси́ ктому́, и ти́и от руки́ Твоея́ отринове́ни бы́ша. Положи́ша мя в ро́ве преиспо́днем, в те́мных и се́ни сме́ртней. На мне утверди́ся я́рость Твоя́, и вся во́лны Твоя́ наве́л еси́ на мя. Уда́лил еси́ зна́емых мои́х от Мене́, положи́ша мя ме́рзость себе́: пре́дан бых и не исхожда́х. О́чи мои́ изнемого́сте от нищеты́, воззва́х к Тебе́, Го́споди, весь день, возде́х к Тебе́ ру́це мои́. Еда́ ме́ртвыми твори́ши чудеса́? Или́ вра́чеве воскреся́т, и испове́дятся Тебе́? Еда́ пове́сть кто во гро́бе ми́лость Твою́, и и́стину Твою́ в поги́бели? Еда́ позна́на бу́дут во тьме чудеса́ Твоя́, и пра́вда Твоя́ в земли́ забве́нней? И аз к Тебе́, Го́споди, воззва́х и у́тро моли́тва моя́ предвари́т Тя. Вску́ю, Го́споди, отре́еши ду́шу мою́, отвраща́еши лице́ Твое́ от Мене́? Нищ есмь аз, и в труде́х от ю́ности моея́; возне́с же ся, смири́хся, и изнемого́х. На мне преидо́ша гне́ви Твои́, устраше́ния Твоя́ возмути́ша мя, обыдо́ша мя я́ко вода́, весь день одержа́ша мя вку́пе. Уда́лил еси́ от Мене́ дру́га и и́скренняго, и зна́емых мои́х от страсте́й.

Го́споди Бо́же спасе́ния моего́, во дни воззва́х, и в нощи́ пред Тобо́ю. Да вни́дет пред Тя моли́тва моя́: приклони́ у́хо Твое́ к моле́нию моему́.

Псалом 102:

Благослови́, душе́ моя́, Го́спода, и вся вну́тренняя моя́ и́мя свя́тое Его́. Благослови́, душе́ моя́, Го́спода, и не забыва́й всех воздая́ний Его́, очища́ющаго вся беззако́ния твоя́, исцеля́ющаго вся неду́ги твоя́, избавля́ющаго от истле́ния живо́т твой, венча́ющаго тя ми́лостию и щедро́тами, исполня́ющаго во благи́х жела́ние твое́: обнови́тся я́ко о́рля ю́ность твоя́. Творя́й ми́лостыни Госпо́дь, и судьбу́ всем оби́димым. Сказа́ пути́ Своя́ Моисе́ови, сыново́м Изра́илевым хоте́ния Своя́: Щедр и Ми́лостив Госпо́дь, Долготерпели́в и Многоми́лостив. Не до конца́ прогне́вается, ниже́ во век вражду́ет, не по беззако́нием на́шым сотвори́л есть нам, ниже́ по грехо́м на́шым возда́л есть нам. Я́ко по высоте́ небе́сней от земли́, утверди́л есть Госпо́дь ми́лость Свою́ на боя́щихся Его́. Ели́ко отстоя́т восто́цы от за́пад, уда́лил есть от нас беззако́ния на́ша. Я́коже ще́дрит оте́ц сы́ны, уще́дри Госпо́дь боя́щихся Его́. Я́ко Той позна́ созда́ние на́ше, помяну́, я́ко персть есмы́. Челове́к, я́ко трава́ дни́е eго́, я́ко цвет се́льный, та́ко оцвете́т, я́ко дух про́йде в нем, и не бу́дет, и не позна́ет ктому́ ме́ста своего́. Ми́лость же Госпо́дня от ве́ка и до ве́ка на боя́щихся Его́, и пра́вда Его́ на сыне́х сыно́в, храня́щих заве́т Его́, и по́мнящих за́поведи Его́ твори́ти я́. Госпо́дь на Небеси́ угото́ва Престо́л Свой, и Ца́рство Его́ все́ми облада́ет. Благослови́те Го́спода вси А́нгели Его́, си́льнии кре́постию, творя́щии сло́во Его́, услы́шати глас слове́с Его́. Благослови́те Го́спода вся Си́лы Его́, слуги́ Его́, творя́щии во́лю Его́. Благослови́те Го́спода вся дела́ Его́, на вся́ком ме́сте влады́чества Его́, благослови́, душе́ моя́, Го́спода.

На вся́ком ме́сте влады́чества Его́, благослови́, душе́ моя́, Го́спода.

Псалом 142:

Го́споди, услы́ши моли́тву мою́, внуши́ моле́ние мое́ во и́стине Твое́й, услы́ши мя в пра́вде Твое́й и не вни́ди в суд с рабо́м Твои́м, я́ко не оправди́тся пред Тобо́ю всяк живы́й. Я́ко погна́ враг ду́шу мою́, смири́л есть в зе́млю живо́т мой, посади́л мя есть в те́мных, я́ко ме́ртвыя ве́ка. И уны́ во мне дух мой, во мне смяте́ся се́рдце мое́. Помяну́х дни дре́вния, поучи́хся во всех де́лех Твои́х, в творе́ниих руку́ Твое́ю поуча́хся. Возде́х к Тебе́ ру́це мои́, душа́ моя́, я́ко земля́ безво́дная Тебе́. Ско́ро услы́ши мя, Го́споди, исчезе́ дух мой, не отврати́ лица́ Твоего́ от Мене́, и уподо́блюся низходя́щым в ров. Слы́шану сотвори́ мне зау́тра ми́лость Твою́, я́ко на Тя упова́х. Скажи́ мне, Го́споди, путь во́ньже пойду́, я́ко к Тебе́ взях ду́шу мою́. Изми́ мя от враг мои́х, Го́споди, к Тебе́ прибего́х. Научи́ мя твори́ти во́лю Твою́, я́ко Ты еси́ Бог мой. Дух Твой Благи́й наста́вит мя на зе́млю пра́ву. И́мене Твоего́ ра́ди, Го́споди, живи́ши мя, пра́вдою Твое́ю изведе́ши от печа́ли ду́шу мою́. И ми́лостию Твое́ю потреби́ши враги́ моя́ и погуби́ши вся стужа́ющыя души́ мое́й, я́ко аз раб Твой есмь.

Услы́ши мя, Го́споди, в пра́вде Твое́й и не вни́ди в суд с рабо́м Твои́м.

Дух Твой Благи́й наста́вит мя на зе́млю пра́ву.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Тропа́рь глас 4:

Сла́ва Отцу́ и Сы́ну и Свято́му Ду́ху. И ны́не и при́сно и во ве́ки веко́в. Ами́нь.

Глас 4: Е́же от ве́ка утае́ное / и А́нгелом несве́домое та́инство, / Тобо́ю, Богоро́дице, су́щим на земли́ яви́ся Бог, / в несли́тном соедине́нии воплоща́ем / и, Крест во́лею нас ра́ди восприи́м, / и́мже воскреси́в первозда́ннаго, / спасе́ от сме́рти ду́ши на́ша.

Здесь читается кафизма, положенная по дню, или сразу седальны:

Го́споди, поми́луй. (Три́жды)

Седален, глас 4:

От земли́ возсия́вши, Предте́чева глава́, лучи́ испуща́ет нетле́ния ве́рным исцеле́ний: свы́ше собира́ет мно́жество Ангел, до́ле созыва́ет челове́ческий ро́д, единогла́сную возсыла́ти сла́ву Христу́ Бо́гу.

Сла́ва Отцу́ и Сы́ну и Свято́му Ду́ху. И ны́не и при́сно и во ве́ки веко́в. Ами́нь.

Глас 4: Де́во Всенепоро́чная, Яже Пресу́щественнаго Бо́га ро́ждшая, со Предте́чею Того́ непреста́нно моли́, оставле́ние прегреше́ний, и исправле́ние жития́ да́ти на́м пре́жде конца́, ве́рою и любо́вию пою́щим Тя́ по до́лгу, еди́на Всепе́тая.

Седален, глас 4:

Изда́вшися, я́ко зла́то от руды́, свяще́нная твоя́ глава́ пресла́вно от незаходи́мых не́др земны́х, обогати́ ве́рных вся́ мы́сли разуме́нием боже́ственным ны́не, пока́йтеся, вопию́щи обы́чно; е́йже покланя́ющеся, Предте́че, Христа́ велегла́сно ве́рою сла́вим.

Сла́ва Отцу́ и Сы́ну и Свято́му Ду́ху. И ны́не и при́сно и во ве́ки веко́в. Ами́нь.

Глас 4: Иже на престо́ле Херуви́мстем седя́й и в не́дрех Отчих водворя́яся, я́ко на престо́ле святе́м седи́т Свое́м, Влады́чице, в не́дрех Твои́х. Вопло́щся бо Бо́г вои́стинну, воцари́ся над все́ми язы́ки, и разу́мно ны́не пои́м Ему́, Его́же умоли́ спасти́ся рабо́м Твои́м.

Полиеле́й:

Хвали́те И́мя Госпо́дне, хвали́те, раби́ Го́спода.

Аллилу́иа, аллилу́иа, аллилу́иа.

Благослове́н Госпо́дь от Сио́на, живы́й во Иерусали́ме.

Аллилу́иа, аллилу́иа, аллилу́иа.

Испове́дайтеся Го́сподеви, я́ко Благ, я́ко в век ми́лость Его́.

Аллилу́иа, аллилу́иа, аллилу́иа.

Испове́дайтеся Бо́гу Небе́сному, я́ко в век ми́лость Его́.

Аллилу́иа, аллилу́иа, аллилу́иа.

Велича́ние:

Велича́ем тя,/ Крести́телю Спа́сов Иоа́нне,/ и почита́ем вси/ честны́я твоея́ главы́// обре́тение.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа,// сла́ва Тебе́, Бо́же. (Трижды)

Велича́ем тя,/ Крести́телю Спа́сов Иоа́нне,/ и почита́ем вси/ честны́я твоея́ главы́// обре́тение.

Седа́льны:

Глас 4:

Ирод, Предте́че, беззако́нновав, честну́ю главу́ твою́ мече́м отсече́ бе́дне, окая́нный, ю́же от любве́, ве́рнии, целу́ем.

Глас 8: Крести́телева глава́ кры́яшеся, я́ко би́сер, в земли́ вла́жней, и, я́ко све́щник богосве́тел, укра́шена, озаря́ет, чудотворя́щи ми́ру всему́: я́ко у́тро, возсия́ всеблаголе́пно со́лнцу Предте́ча, и невече́рним све́том возвеща́я па́ки на́м, се́, — взыва́я, — Агнец Бо́жий.

Глас 8: Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Яже непреме́ннаго Бо́га поро́ждшая, пременя́емое при́сно се́рдце мое́ грехо́м и ле́ностию, прило́гми льсти́ваго, утверди́, Блага́я, моли́твами Ма́терними Твои́ми, я́ко да и а́з благода́рно сла́влю Тя́, Богороди́тельнице Мари́е, поми́луй ста́до Твое́, е́же стяжа́ла еси́, Всенепоро́чная.

Степе́нна, глас 4:

От ю́ности моея́/ мно́зи бо́рют мя стра́сти,/ но Сам мя заступи́// и спаси́, Спа́се мой.

Ненави́дящии Сио́на,/ посрами́теся от Го́спода,/ я́ко трава́ бо огне́м// бу́дете изсо́хше.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Святы́м Ду́хом/ вся́ка душа́ живи́тся,/ и чистото́ю возвыша́ется,// светле́ется Тро́йческим еди́нством, священнота́йне.

Го́споди, поми́луй. (Три́жды)

От Луки́ Свята́го Ева́нгелия чте́ние

Сла́ва, Тебе́, Го́споди, сла́ва Тебе́.

Во вре́мя о́но, изы́де сло́во о Иису́се по всей Иуде́и, и по всей стране́. И возвести́ша Иоа́нну ученицы́ его́ о всех сих. И призва́в два не́кая от учени́к свои́х Иоа́нн, посла́ ко Иису́су, глаго́ля: Ты ли еси́ Гряды́й, или́ ино́го ча́ем? Прише́дша же к Нему́ му́жа, ре́ста: Иоа́нн Крести́тель посла́ нас к Тебе́, глаго́ля: Ты ли еси́ Гряды́й, или́ ино́го ча́ем, в Той же час исцели́ мно́ги от неду́г и ран и дух злых и мно́гим слепы́м дарова́ прозре́ние. И отвеща́в Иису́с рече́ и́ма: ше́дша возвести́та Иоа́нну, я́же ви́деста и слы́шаста, я́ко слепи́и прозира́ют, хро́мии хо́дят, прокаже́ннии очища́ются, глуси́и слы́шат, ме́ртвии востаю́т, ни́щии благовеству́ют. И блаже́н есть, и́же а́ще не соблазни́тся о Мне. Отше́дшема же ученико́ма Иоа́нновома, нача́т глаго́лати к наро́дом о Иоа́нне: чесо́ изыдо́сте в пусты́ню ви́дети, трость ли ве́тром коле́блемь? Но чесо́ изыдо́сте ви́дети? Челове́ка ли в мя́кки ри́зы оде́яна? Се, и́же во оде́жди сла́вней и пи́щи су́щии, во ца́рствии суть. Но чесо́ изыдо́сте ви́дети? Проро́ка ли? Ей, глаго́лю вам, и ли́шше проро́ка. Сей бо есть, о не́мже пи́сано есть: се Аз послю́ А́нгела Моего́ пред лице́м Твои́м, и́же устро́ит путь Твой пред Тобо́ю. Глаго́лю бо вам: бо́лий в рожде́нных жена́ми проро́к Иоа́нна Крести́теля никто́же есть, мний же во Ца́рствии Бо́жии бо́лий его́ есть. И вси лю́дие слы́шавше и мытари́е оправди́ша Бо́га, кре́щшеся креще́нием Иоа́нновым. Фарисе́е же и зако́нницы сове́т Бо́жий отверго́ша в себе́, не кре́щшеся от него́.

Сла́ва, Тебе́, Го́споди, сла́ва Тебе́.

Псало́м 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя. Я́ко беззако́ние мое́ аз зна́ю и грех мой предо мно́ю есть вы́ну. Тебе́ Еди́ному согреши́х, и лука́вое пред Тобо́ю сотвори́х, я́ко да оправди́шися во словесе́х Твои́х и победи́ши, внегда́ суди́ти Ти. Се бо в беззако́ниих зача́т есмь, и во гресе́х роди́ мя ма́ти моя́. Се бо и́стину возлюби́л еси́, безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся, омы́еши мя, и па́че сне́га убелю́ся. Слу́ху моему́ да́си ра́дость и весе́лие, возра́дуются ко́сти смире́нныя. Отврати́ лице́ Твое́ от грех мои́х, и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́, и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́, и Ду́хом Влады́чним утверди́ мя. Научу́ беззако́нныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́, возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо, всесожже́ния не благоволи́ши. Же́ртва Бо́гу дух сокруше́н, се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския, тогда́ благоволи́ши же́ртву пра́вды, возноше́ние и всесожега́емая: тогда́ возложа́т на олта́рь Твой тельцы́.

Глас 6:

Сла́ва Отцу́ и Сы́ну и Свято́му Ду́ху./ Моли́твами Крестителя Иоанна, / Ми́лостиве, очи́сти / мно́жества согреше́ний на́ших.

И ны́не и при́сно и во ве́ки веко́в. Ами́нь./ Моли́твами Богоро́дицы, / Ми́лостиве, очи́сти / мно́жества согреше́ний на́ших.

Поми́луй мя, Бо́же,/ по вели́цей ми́лости Твое́й,/ и по мно́жеству щедро́т Твои́х// очи́сти беззако́ние мое́.

Стихи́ра, глас 6

Яже пе́рвее на блю́де, Иродову беззако́нную нечистоту́ обличи́вшая, покая́ние же все́м пропове́давшая ве́рным, честна́я глава́ Крести́теля Христо́ва, от сокро́вищ земны́х я́вльшаяся, предлежи́т ве́рно притека́ющим к не́й, и прикаса́ющимся со стра́хом, и покланя́ющимся любо́вию душе́вною, да́рующая разреше́ние прегреше́ний, проше́нием подае́т потре́бная и ве́лию ми́лость.

Го́споди, поми́луй. (12 раз)

Кано́н Предте́чи, гла́с 8.

Пе́снь 1.

Ирмос: Колесницегони́теля фарао́ня погрузи́ чудотворя́й иногда́ Моисе́йский же́зл, крестообра́зно порази́в и раздели́в мо́ре, Изра́иля же беглеца́, пешехо́дца спасе́, пе́снь Бо́гови воспева́юща.

Гла́с Сло́ва бы́в, разреши́ безгла́сие мое́, я́коже отцу́ дре́вле, ра́достным гла́сом восхвали́ти тя́ в настоя́щее обре́тение главы́ твоея́, блаже́нне Предте́че, небе́сный челове́че.

На главу́ ру́ку положи́вый, Предте́че, Це́ркви Бо́жии, твою́ честну́ю главу́, позна́вшую Тро́ицы явле́ние, проявля́еши сие́ тре́тие, прея́вственно освяща́ющую правосла́вных собра́ния.

Не терпя́ на мно́зе сокрыва́тися, Госпо́день Предте́че, устроя́еши па́ки яви́тися дне́сь, не в ста́мне затворе́н, сре́брене же сосу́де в свяще́нном ме́сте положе́н, священноде́йственнику извеще́н.

Ца́рствующий я́ве гра́д ны́не прие́млет свяще́нный да́р, и́же пре́жде лише́н бы́в главы́ твоея́, Предте́че, тоя́ вхо́дом крася́ся, ны́не ра́дуется и достодо́лжно ублажа́ет тя́.

Богородичен: От чре́ва непло́дныя прозя́бл еси́, гото́вя Творцу́ сло́вом пути́, всехва́льне, от Де́вы возсия́вшему Пресвяты́я несказа́нно, Юже Богоро́дицу ве́дуще, вси́ ро́ди, ублажа́ем.

Пе́снь 3.

Ирмос: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ в любви́ Твое́й, жела́ний кра́ю, ве́рных утвержде́ние, Еди́не Человеколю́бче.

Блу́дным пляса́нием, свяще́нная глава́ твоя́, скве́рней жене́ вдана́ бы́вши, рука́ма ноша́шеся, ны́не же целому́дренно священноде́йственника дла́ньми, свяще́нно во святу́ю це́рковь вно́сится.

Благоче́стно срета́ет тя́ ве́рных совокупле́ние, с священноде́йственником же ца́рь, сла́вне Предте́че, пою́ще ра́достию, и предваря́ет тя́ любо́вию, освяща́емь прише́ствием твои́м.

От незаходи́мых свяще́нных, я́ко светоза́рное со́лнце, свяще́ннейшая глава́ твоя́ возсия́вши, всю́ просвети́ вселе́нную, проро́че Христо́в и Предте́че, боже́ственными светлостьми́.

Богородичен: От непло́дных чре́сл светоявле́нна возсия́л еси́ звезда́ Со́лнца сла́вы, предходя́й Возсия́вшаго от Деви́ческа о́блака, Крести́телю, и разре́шшаго но́щь многобо́жную.

Та́же седа́лен, гла́с 4.

Изда́вшися, я́ко зла́то от руды́, свяще́нная твоя́ глава́ пресла́вно, от незаходи́мых не́др земны́х, обогати́, Христо́в Крести́телю, все́х притека́ющих в тоя́ обре́тение, пе́сньми велича́ющих Спа́са и Зижди́теля, подаю́щаго на́м тебе́ ра́ди ве́лию ми́лость.

Сла́ва, и ны́не, Богородичен:

Грехолюби́в сы́й, молю́ Тя́, безгре́шнаго Бо́га ро́ждшую, взе́млющаго грехи́ ми́ра, Пречи́стая, многогре́шную ду́шу мою́ уще́дрити, и грехи́ моя́ мно́гия очи́стити: гре́шных бо Ты́ еси́ очище́ние, и спасе́ние ве́рных, и заступле́ние.

Пе́снь 4.

Ирмос: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.

Проро́ков я́ко превы́шший, Прорече́ннаго ви́дети сподо́бился еси́, Илиино́ю предъиды́й си́лою пред Ни́м, блаже́нне Предте́че.

Пресла́вную главу́ твою́, миры исцеле́ний источа́ющу, тре́тие уже́ яви́л еси́, смра́дныя стра́сти отгоня́ющую.

Не в ста́мне, я́коже пе́рвее, в сосу́де же сре́брене погребе́на явля́ется глава́ твоя́ в свяще́ннем ме́сте, досточу́дне.

Соше́дшеся, почерпи́те вси́ исцеле́ния неистощи́мая от исто́чника издава́ема, честны́я главы́ Предте́чи Христо́ва.

Богородичен: Смири́вшагося спаси́ мя, высокому́дренно пожи́вшаго, ро́ждшая Возне́сшаго смири́вшееся естество́, Пречи́стая.

Пе́снь 5

Ирмос: Вску́ю мя́ отри́нул еси́ от лица́ Твоего́, Све́те незаходи́мый, и покры́ла мя́ е́сть чужда́я тма́, окая́ннаго? Но обрати́ мя, и к све́ту за́поведей Твои́х, пути́ моя́ напра́ви, молю́ся.

Яко хода́тай ве́тхаго и но́ваго бы́в свяще́ннейший, хода́тайствы боже́ственными на́ше обветша́ние обнови́, обновле́ние соверша́ющих но́вым явле́нием главы́ твоея́, блаже́нне Предте́че.

От Кома́н прине́сшу благода́ть исцеле́ний главу́ твою́ к Ца́рскому гра́ду, Предте́че, созыва́еши гра́ды дне́сь к тоя́ прише́ствию: собира́ются ве́рных мно́жества, просвеще́ния нетле́ннаго исполня́еми.

Ца́рь вхо́ду главы́ твоея́ мно́жае, не́же багряни́це, ра́дуется, свяще́нник же, боже́ственный Богоно́сца тезоимени́тый, Предте́че, дла́ньми сию́ обдержа́, соблагословля́ет, благословя́ ве́рных соверше́нства.

Богородичен: Влады́ку ро́ждши, яви́лася еси́ превы́шшая го́рних си́л и земны́х естество́ богосоде́лала еси́, Отрокови́це Всенепоро́чная. Те́мже Богоро́дицу всеи́стинную, душе́ю и язы́ком, ве́рнии, Тя́, Де́во, сла́вим.

Пе́снь 6.

Ирмос: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся, к Тебе́ бо возопи́х, и услы́ши мя́, Бо́же спасе́ния моего́.

Истина от земли́, глава́ возсия́вшая Крести́теля Твоего́, Христе́, лжу́ отгна́, ересе́й разори́ го́рькую зи́му и ми́р просвети́ла е́сть.

Почерпи́те просвеще́ние, и благода́ть Бо́жию, и ми́лость: и главы́, и ду́ши освяти́те, главе́ прикосну́вшеся Предте́чи благода́ти, Боже́ственному верху́ прикосну́вшагося в вода́х.

Главы́ враго́в под но́зе на́ша сокруши́ти, моли́ся, Предте́че, любо́вию честну́ю твою́ главу́ чту́щему, Ирода обличи́вшую.

Богородичен: Су́шим во а́де Све́т пропове́дал еси́, приходя́щаго от крове́й Деви́ческих, пло́тию обложе́на бы́вша Челове́ка, на благодея́ние челове́ков, блаже́нне Предте́че.

Конда́к, гла́с 6.

Светоявле́нный и боже́ственный в ми́ре сто́лп, Со́лнца свети́льник, Предте́ча, главу́ светоно́сную и боже́ственную свою́ показа́вый в конце́х, освяща́ет то́й ве́рно покланя́ющихся и взыва́ющих: Христо́в прему́дрый Крести́телю, спаси́ все́х на́с.

Икос:

От земли́, я́коже исто́чник ра́йский, глава́ боголюби́вая Предте́чева струи́ испуща́ет благода́ти, и чуде́с то́ки подава́ет все́м тре́бующим. Присту́пим у́бо вси́, почерпе́м усе́рдно исцеле́ний боже́ственныя сея́ пото́ки: напоя́ет бо ду́ши дарова́нии непреста́нными, и потопля́ет теле́сныя боле́зни, и вся́к неду́г благовре́менне отъе́млет. Сию́ у́бо воспое́м любо́вию, и целу́ем ве́рою, че́стно облобыза́юще, и пе́сньми, я́ко венцы́, сию́, ве́рнии, венча́ем. Предочи́стим на́ша скве́рны мы́сленныя, и боже́ственными доброде́тельми украси́м ду́ши и вопие́м тве́рдо: Христо́в прему́дрый Крести́телю, спаси́ все́х на́с.

Пе́снь 7.

Ирмос: От Иуде́и доше́дше, о́троцы в Вавило́не иногда́, ве́рою Тро́ическою пла́мень пе́щный попра́ша, пою́ще: отце́в Бо́же, благослове́н еси́.

Со́лнца сла́вы пресве́тлый све́щник бы́л еси́, Предте́че, тму́ отгоня́я ле́сти и просвеща́я ве́рою зову́щих: оте́ц на́ших Бо́же, благослове́н еси́.

Пра́здник моле́бен честна́я Це́рковь се́й, Предте́че, све́тло соверша́ет, главу́ твою́ чту́щи и обы́чно зову́щи: оте́ц на́ших Бо́же, благослове́н еси́.

Провозвести́л еси́ Сло́ва стра́шное прише́ствие боже́ственными игра́нии, возвеща́еши твоея́ главы́ обре́тение, проро́че, нело́жными усты́ тя́ жела́ющему те́пле священноде́йственному па́стырю.

Богородичен: Де́вство и рождество́ па́че естества́ и сло́ва в Тебе́ стече́ся, Бо́га бо воплоще́нна родила́ еси́ несказа́нно, Богоро́дице, Ему́же пое́м: оте́ц на́ших Бо́же, благослове́н еси́.

Пе́снь 8.

Ирмос: Седмери́цею пе́щь халде́йский мучи́тель богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Крести́тель и Предте́ча, земны́й Ангел, беззако́ния изве́стный укори́зник, Тро́ицы явле́ние пре́жде ви́дяй, тре́тие явля́ет главу́ свою́, все́м любо́вию пою́щим: свяще́нницы, благослови́те, лю́дие, превозноси́те Христа́ во ве́ки.

Срета́ет усе́рдно тебе́ ца́рь кротча́йший вку́пе со христолюби́выми людьми́, прехва́льне, па́стырей же пе́рвейший, простира́ет ру́це к тебе́, и, свои́ прилага́я пе́рси, игра́ет с весе́лием, и вопие́т благода́рно: лю́дие, превозноси́те Христа́ во ве́ки.

Па́че зла́та глава́ твоя́ просия́вши, Предте́че, сокро́виществованна в сре́бренных сосу́дех, я́ко бога́тство многоце́нно, Ца́рскому гра́ду даде́ся. Тоя́ дарова́нии богате́я боже́ственными, усе́рдно пое́т: свяще́нницы, благослови́те, лю́дие, превозноси́те Христа́ во ве́ки.

Богородичен: Во чре́ве носи́мому, вся́ческая нося́щему, блаже́нне Иоа́нне, поклони́лся еси́, ра́дуяся, во чре́ве кры́емь непло́днем, прехва́льне. Его́же, ро́ждшася от Святы́я Де́вы, Агнца Бо́жия пропове́дая, благоче́стно возопи́л еси́: лю́дие, превозноси́те во вся́ ве́ки.

На 9-й песни поем песнь Пресвятыя Богородицы:

Вели́чит душа́ Моя́ Го́спода и возра́довася дух Мой о Бо́зе Спа́се Мое́м.

К коемуждо стиху припеваем: Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Я́ко призре́ на смире́ние рабы́ Своея́, се бо, от ны́не ублажа́т Мя вси ро́ди.

Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Я́ко сотвори́ Мне вели́чие Си́льный, и свя́то и́мя Его́, и ми́лость Его́ в ро́ды родо́в боя́щимся Его́.

Сотвори́ держа́ву мы́шцею Свое́ю, расточи́ го́рдыя мы́слию се́рдца их.

Низложи́ си́льныя со престо́л, и вознесе́ смире́нныя, а́лчущия испо́лни благ, и богатя́щияся отпусти́ тщи.

Восприя́т Изра́иля о́трока Своего́, помяну́ти ми́лости, я́коже глаго́ла ко отце́м на́шим, Авраа́му и се́мени его́ да́же до ве́ка.

Пе́снь 9.

Ирмос: Устраши́ся вся́к слу́х неизрече́нна Бо́жия снизхожде́ния, я́ко Вы́шний во́лею сни́де да́же и до пло́ти от Деви́ческаго чре́ва бы́в Челове́к. Те́мже Пречи́стую Богоро́дицу, ве́рнии, велича́ем.

Непло́дныя преподо́бен пло́д, в рожде́нных жена́ми превы́шший, Царя́ Христа́ во́ин, вели́кий Предте́ча, пропове́давый Агнца, ми́ра прегреше́ния взе́млющаго, да восхва́лится свяще́нными пе́сньми.

Ча́шу испо́лнив бога́тно, созыва́еши с высо́ким пропове́данием Це́рковь Христо́ву обре́тением главы́, Предте́че: прииди́те, насы́титеся, — вопия́, — кра́сных, и́хже угото́вах, и возвели́чите Су́щаго, челове́ком подае́маго.

Ца́рь тя́, Ангеле Бо́жий, ангелоимени́тый в свое́ ца́рство, ра́дуяся, прие́млет, сослужа́щаго с си́м добре́йша пастыренача́льника благоче́стно и зва́нием, и благода́тию украша́ема я́ве богоно́снаго свяще́нника и богому́дреннаго.

Облиста́л еси́ боже́ственное просвеще́ние главы́ твоея́ вхо́дом, сла́вне, и уясни́л еси́ ве́рных сердца́, вопию́щих ти́: Со́лнца незаходи́мый свети́льниче, всесвяты́й Предте́че, страсте́й мглы́ на́с, и ве́сь гра́д, и лю́ди изба́ви.

Богородичен: Пощади́ мя, Спа́се, рожде́йся и сохра́нь Ро́ждшую Тя́ нетле́нну по рождестве́, егда́ ся́деши суди́ти дело́м мои́м, беззако́ния пре́зри и грехи́ моя́, я́ко безгре́шен и ми́лостив Бо́г и Человеколю́бец.

Свети́лен.

Не терпя́ше на мно́зе кры́ти земля́ главу́ твою́, я́коже гла́с вопию́щаго; ты́ обре́тение ея́, о́бразом не́коим возвести́л еси́, Предте́че Иоа́нне, в о́ньже тя́ почита́ем.

Сла́ва И ны́не.

Во обре́тении, Предте́че, честны́я твоея́ главы́, ца́рь христолюби́вый мно́жае ра́довашеся, я́коже о свое́й ца́рской порфи́ре. Его́же возме́здия побе́дами свы́ше укрепля́емь, и на́с соблюди́, покры́й твои́ми моли́твами, Крести́телю прехва́льне Иоа́нне, све́тло пра́зднующих и любо́вию тя́ чту́щих.

Хвали́тны псалмы́, глас 5:

Вся́кое дыха́ние да хва́лит Го́спода./ Хвали́те Го́спода с небе́с,/ хвали́те Его́ в вы́шних.// Тебе́ подоба́ет песнь Бо́гу.

Хвали́те Его́ вси а́нгели Его́,/ хвали́те Его́ вся си́лы Его́.// Тебе́ подоба́ет песнь Бо́гу.

Сти́хиры, глас 5:

Стих: Сотвори́ти в них суд напи́сан/ сла́ва сия́ бу́дет всем преподо́бным Его́.

Ра́дуйся, свяще́нная главо́, и светоно́сная, и Ангелом гове́йная, я́же мече́м усе́чена дре́вле, и о́стрыми обличе́ньми нечистоты́ сту́д посе́кшая, исто́чник чуде́с, ве́рныя напая́юща, и я́же Спа́сово спаси́тельное прише́ствие возвести́вшая, и наи́тие Ду́ха дре́вле уви́девшая, к Сему́ все́льшаяся, ве́тхой же и но́вой хода́тайствовавшая благода́ти: Христа́ умоли́, душа́м на́шим дарова́ти ве́лию ми́лость.

Стих: Хвали́те Его́ на си́лах Его́,/ хвали́те Его́ по мно́жеству вели́чествия Его́.

Стих: Хвали́те Его́ в тимпа́не и ли́це,/ хвали́те Его́ во стру́нах и орга́не.

В сосу́де скуде́льне сокрове́нная иногда́ Предте́чева глава́ яви́ся, от земны́х не́др изда́вшаяся я́вственне, и чуде́с струи́ источа́ющая: и́бо в вода́х главу́ омы́, превы́спренняя ны́не покрыва́ющаго вода́ми, и одождя́ющаго челове́ком боже́ственное оставле́ние. Сию́ у́бо ублажи́м, вои́стинну пресла́вну, и в сея́ обре́тении ра́достно пра́зднуем, Христа́ моля́ще дарова́ти душа́м на́шим ве́лию ми́лость.

Стих: Хвали́те Его́ в кимва́лех доброгла́сных, хвали́те Его́ в кимва́лех восклица́ния. / Вся́кое дыха́ние да хва́лит Го́спода.

Глава́, я́же А́гнца Бо́жия воспропове́давшая, пло́тию я́вльшагося, и все́м покая́ния спаси́тельныя пути́ Боже́ственными за́поведьми извести́вшая, я́же пре́жде Иродово законопреступле́ние обличи́вшая, и сего́ ра́ди отсе́чена от телесе́, и на вре́мя подъе́мшая сокрове́ние, я́коже светоявле́нное на́м возсия́ со́лнце, пока́йтеся, — вопию́щая, — и ко Христу́ ны́не приложи́теся во умиле́нии душе́внем, подаю́щему ми́рови ве́лию ми́лость.

Глас 6: Сла́ва Отцу́ и Сы́ну и Свято́му Ду́ху

Всечестну́ю главу́ Крести́теля Твоего́, Го́споди, я́вльшуюся дне́сь от земли́, со гла́сом хвале́ния прие́мшии ве́рно, в мольбу́, Человеколю́бче, гре́шнии раби́ Твои́, приводя́ще, мо́лимся, тоя́ ра́ди улучи́ти в де́нь суда́ от Тебе́ очище́ние и ве́лию ми́лость.

Глас 6: И ны́не и при́сно и во ве́ки веко́в. Ами́нь.

Бо́га, из Тебе́ воплоти́вшагося, / разуме́хом, Богоро́дице Де́во: / Того́ моли́ о спасе́нии душ на́ших.

Славосло́вие вели́кое:

Сла́ва в вы́шних Бо́гу, и на земли́ мир, в челове́цех благоволе́ние. Хва́лим Тя, благослови́м Тя, кла́няем Ти ся, славосло́вим Тя, благодари́м Тя, вели́кия ра́ди сла́вы Твоея́. Го́споди Царю́ Небе́сный, Бо́же О́тче Вседержи́телю, Го́споди, Сы́не Единоро́дный, Иису́се Христе́, и Святы́й Ду́ше. Го́споди Бо́же, А́гнче Бо́жий, Сы́не Оте́чь, взе́мляй грех ми́ра, поми́луй нас; взе́мляй грехи́ ми́ра, приими́ моли́тву на́шу; седя́й одесну́ю Отца́, поми́луй нас. Я́ко Ты еси́ еди́н Свят, Ты еси́ еди́н Госпо́дь, Иису́с Христо́с, в сла́ву Бо́га Отца́. Ами́нь.

На всяк день благословлю́ Тя, и восхвалю́ И́мя Твое́ во ве́ки, и в век ве́ка.

Сподо́би, Го́споди, в день сей без греха́ сохрани́тися нам. Благослове́н еси́, Го́споди, Бо́же оте́ц на́ших, и хва́льно и просла́влено И́мя Твое́ во ве́ки. Ами́нь.

Бу́ди, Го́споди, ми́лость Твоя́ на нас, я́коже упова́хом на Тя.

Благослове́н еси́, Го́споди, научи́ мя оправда́нием Твои́м. (Три́жды)

Го́споди, прибе́жище был еси́ нам в род и род. Аз рех: Го́споди, поми́луй мя, исцели́ ду́шу мою́, я́ко согреши́х Тебе́. Го́споди, к Тебе́ прибего́х, научи́ мя твори́ти во́лю Твою́, я́ко Ты еси́ Бог мой: я́ко у Тебе́ исто́чник живота́, во све́те Твое́м у́зрим свет. Проба́ви ми́лость Твою́ ве́дущим Тя.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Три́жды)

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Святы́й Безсме́ртный, поми́луй нас.

Святы́й Бо́же, Святы́й Кре́пкий, Святы́й Безсме́ртный, поми́луй нас.

Тропа́рь, глас 4:

Утверди́, Бо́же, святу́ю правосла́вную ве́ру, правосла́вных христиа́н во век ве́ка.

Честне́йшую Херуви́м и Сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу, Тя велича́ем.

Сла́ва, и ны́не. Го́споди, поми́луй. (Три́жды) Благослови́.

Господи Иисусе Христе, Сыне Божий, моли́твами Пречи́стыя Своея́ Ма́тере, Пророка, Предтечи и Крестителя Господня Иоанна, преподобных и богоносных отец наших и всех святы́х, поми́луй и спаси нас я́ко Благ и Челове́колюбец.

Многоле́тие:

Вели́каго Господи́на и Отца́ на́шего Кири́лла,/ Святе́йшаго Патри́арха Моско́вского и всея́ Руси́,/ и Господи́на на́шего (Высоко-) Преосвяще́ннейшаго (имярек),/ (архи-)епи́скопа (митрополита (титул)),/ богохрани́мую страну́ на́шу Росси́йскую,/ и вся правосла́вныя христи́аны,// Го́споди, сохрани́ их на мно́гая ле́та.