Шрифт

▲

Богослужебные тексты для домашнего употребления

Дни памяти святых

Последование Всеношного бдения в день памяти святителя Ермогена, патриарха Московского и всея России. Для домашнего (келейного) совершения

Оглавление

ВСЕНО́ЩНОЕ БДЕ́НИЕ

ВЕЛИ́КАЯ ВЕЧЕ́РНЯ

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас. Ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Трижды.)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, (трижды). Сла́ва, и ны́не:

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Таже, Го́споди, поми́луй, (12), Сла́ва, и ны́не:

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 103:

Поется часть псалма:

Благослови́, душе́ моя́, Го́спода. / Благослове́н еси́, Го́споди. / Го́споди, Бо́же мой, возвели́чился еси́ зело́. / Благослове́н еси́, Го́споди. / Во испове́дание и в велеле́поту обле́клся еси́. / Благослове́н еси́, Го́споди. / Посреде́ гор про́йдут во́ды. / Ди́вна дела́ Твоя́, Го́споди. / Вся прему́дростию сотвори́л еси́. / Сла́ва Ти, Го́споди, сотвори́вшему вся.

Или читается псалом полностью:

Благослови́, душе́ моя́, Го́спода. Го́споди, Бо́же мой, возвели́чился еси́ зело́. Во испове́дание и в велеле́поту обле́клся еси́. Одея́йся све́том, я́ко ри́зою, простира́яй не́бо, я́ко ко́жу. Покрыва́яй вода́ми превы́спренняя Своя́, полага́яй о́блаки на восхожде́ние Свое́, ходя́й на крилу́ ве́треню. Творя́й А́нгелы Своя́ ду́хи и слуги́ Своя́ пла́мень о́гненный. Основа́яй зе́млю на тве́рди ея́, не преклони́тся в век ве́ка. Бе́здна, я́ко ри́за, одея́ние ея́, на гора́х ста́нут во́ды, от запреще́ния Твоего́ побе́гнут, от гла́са гро́ма Твоего́ убоя́тся. Восхо́дят го́ры и нисхо́дят поля́ в ме́сто, е́же основа́л еси́ им. Преде́л положи́л еси́, eго́же не пре́йдут, ниже́ обратя́тся покры́ти зе́млю. Посыла́яй исто́чники в де́брех, посреде́ гор про́йдут во́ды. Напая́ют вся зве́ри се́льныя, ждут она́гри в жа́жду свою́. На ты́х пти́цы небе́сныя привита́ют, от среды́ ка́мения дадя́т глас. Напая́яй го́ры от превы́спренних Свои́х, от плода́ дел Твои́х насы́тится земля́. Прозяба́яй траву́ ското́м, и злак на слу́жбу челове́ком, извести́ хлеб от земли́. И вино́ весели́т се́рдце челове́ка, ума́стити лице́ еле́ем, и хлеб се́рдце челове́ка укрепи́т. Насы́тятся древа́ польска́я, ке́дри Лива́нстии, и́хже еси́ насади́л. Та́мо пти́цы вогнездя́тся, ероди́ево жили́ще предводи́тельствует и́ми. Го́ры высо́кия еле́нем, ка́мень прибе́жище за́яцем. Сотвори́л есть луну́ во времена́, со́лнце позна́ за́пад свой. Положи́л еси́ тму, и бысть нощь, в не́йже про́йдут вси зве́рие дубра́внии. Ски́мни рыка́ющии, восхи́тити и взыска́ти от Бо́га пи́щу себе́. Возсия́ со́лнце и собра́шася и в ло́жах свои́х ля́гут. Изы́дет челове́к на де́ло свое́ и на де́лание свое́ до ве́чера. Я́ко возвели́чишася дела́ Твоя́, Го́споди, вся прему́дростию сотвори́л еси́, испо́лнися земля́ тва́ри Твоея́. Сие́ мо́ре вели́кое и простра́нное, та́мо га́ди, и́мже несть числа́, живо́тная ма́лая с вели́кими, та́мо корабли́ препла́вают, змий сей, eго́же созда́л еси руга́тися eму́. Вся к Тебе́ ча́ют, да́ти пи́щу им во бла́го вре́мя. Да́вшу Тебе́ им соберу́т, отве́рзшу Тебе́ ру́ку вся́ческая испо́лнятся бла́гости, отвра́щшу же Тебе́ лице́, возмяту́тся, отъи́меши дух их, и исче́знут, и в персть свою́ возвратя́тся. По́слеши Ду́ха Твоего́, и сози́ждутся, и обнови́ши лице́ земли́. Бу́ди сла́ва Госпо́дня во ве́ки, возвесели́тся Госпо́дь о де́лех Свои́х, призира́яй на зе́млю, и творя́й ю́ трясти́ся, прикаса́яйся гора́м, и дымя́тся. Воспою́ Го́сподеви в животе́ мое́м, пою́ Бо́гу моему́, до́ндеже есмь, да услади́тся Ему́ бесе́да моя́, аз же возвеселю́ся о Го́споде. Да исче́знут гре́шницы от земли́, и беззако́нницы, я́коже не бы́ти им. Благослови́, душе́ моя́, Го́спода.

Со́лнце позна́ за́пад свой. Положи́л еси́ тму, и бысть нощь. Я́ко возвели́чишася дела́ Твоя́, Го́споди, вся прему́дростию сотвори́л еси́.

Сла́ва, и ны́не: Аллилу́иа, аллилу́иа, аллилу́иа, сла́ва Тебе́ Бо́же. Трижды.

Блаже́н муж:

Блаже́н муж, и́же не и́де на сове́т нечести́вых.

Аллилу́иа, аллилу́иа, аллилу́иа.

Я́ко весть Госпо́дь путь пра́ведных, и путь нечести́вых поги́бнет.

Аллилу́иа, аллилу́иа, аллилу́иа.

Рабо́тайте Го́сподеви со стра́хом и ра́дуйтеся Ему́ с тре́петом.

Аллилу́иа, аллилу́иа, аллилу́иа.

Блаже́ни вси наде́ющиися Нань.

Аллилу́иа, аллилу́иа, аллилу́иа.

Воскресни́, Го́споди, спаси́ мя, Бо́же мой.

Аллилу́иа, аллилу́иа, аллилу́иа.

Госпо́дне есть спасе́ние, и на лю́дех Твои́х благослове́ние Твое́.

Аллилу́иа, аллилу́иа, аллилу́иа.

Сла́ва Отцу́ и Сы́ну и Свято́му Духу.

Аллилу́иа, аллилу́иа, аллилу́иа.

И ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Го́споди, воззва́х, глас 3:

Го́споди, воззва́х к Тебе́, услы́ши мя./ Услы́ши мя, Го́споди./ Го́споди, воззва́х к Тебе́, услы́ши мя:/ вонми́ гла́су моле́ния моего́,/ внегда́ воззва́ти ми к Тебе́.// Услы́ши мя, Го́споди.

Да испра́вится моли́тва моя́,/ я́ко кади́ло пред Тобо́ю,/ воздея́ние руку́ мое́ю/ – же́ртва вече́рняя.// Услы́ши мя, Го́споди.

Стихи́ры пра́здника, глас 3:

Стих: А́ще беззако́ния на́зриши, Го́споди, Го́споди, кто постои́т? Я́ко у Тебе́ очище́ние есть.

Гла́с святы́я Це́ркви Правосла́вныя, гла́с со умиле́нием любви́ взыва́ющий: прииди́те, ча́да моя́, и́ми же боле́зную. Прииди́те к святи́телю вели́кому, прииди́те к священному́ченику преди́вному, прииди́те к моли́твеннику за Ру́сь Правосла́вную неотсту́пному, припади́те и моли́теся из глубины́ души́: священному́чениче Ермоге́не, спаса́й и ны́не ю́же возлюби́л еси́, святу́ю Ру́сь Правосла́вную, озлобле́нием греха́ во глубину́ зо́л погружа́ему, но в покая́нии зову́щу: Го́споди, Го́споди, услы́ши гла́с мо́й.

Стих: И́мене ра́ди Твоего́ потерпе́х Тя, Го́споди, потерпе́ душа́ моя́ в сло́во Твое́, упова́ душа́ моя́ на Го́спода.

Кто́ се́й, коле́на телесе́ и души́ со умиле́нием прекло́ньший? кто́ се́й, на лице́ свое́ па́дший? кто́ се́й, наде́ждею о́чи на не́бо возводя́щий, и со упова́нием нело́жным ру́ки своя́ возде́ющий? кто́ се́й, пла́чущий и рыда́ющий? — Ты́ еси́, священному́чениче Ермоге́не, ты́ еси́, печа́льниче земли́ на́шея, преложи́вый пла́ч ея́ на ра́дость, моля́щуся ти́ и взыва́ющу: вонми́ гла́су моле́ния моего́, Го́споди.

Стих: От стра́жи у́тренния до но́щи, от стра́жи у́тренния да упова́ет Изра́иль на Го́спода.

Го́споди, а́ще не бы́хом, свята́го Твоего́ священному́ченика Ермоге́на име́ли моли́твенника и благосты́ню Твою́, ми́лующую на́с, ка́ко сме́ли, Спа́се, стоя́ти пред лице́м Твои́м во гресе́х на́ших да́же до сего́ дне́? Ка́ко сме́ли бы́хом противуста́ти враго́м на́шим, и огради́ти ве́ру оте́ц на́ших, и утверди́ти ца́рство правосла́вное? Но услы́шал еси́ моли́тву святи́теля вели́каго — Ермоге́на, священному́ченика преди́внаго, и собра́л еси́ под криле́ его́ Ру́сь Правосла́вную, и погна́л еси́ враги́ ея́ пред лице́м ея́. Его́ же моли́твами и ны́не пощади́ на́с и спаси́ на́с, Го́споди.

Стих: Я́ко у Го́спода ми́лость, и мно́гое у Него́ избавле́ние, и Той изба́вит Изра́иля от всех беззако́ний eго́.

Жи́во сло́во Госпо́дне и де́йственно: не убо́йтеся от убива́ющих те́ло, души́ же не могу́щих уби́ти, убо́йтеся же па́че могу́щаго и ду́шу и те́ло погуби́ти в гее́нне. Потерпе́ душа́ твоя́ в сло́во сие́, священному́чениче Ермоге́не: Еди́наго бою́ся, Живу́щаго на небесе́х, — ре́кл еси́ беззако́нным изме́нником, — Что́ ми е́сть заточе́ние? — сла́дость моли́твы уедине́нныя. Что́ ми е́сть мра́з и гла́д? — умира́ние жи́зни грехо́вныя. Что́ ми е́сть сме́рть? — ра́дость свида́ния со Христо́м. Не бою́ся стра́ха сме́ртнаго, вся́ потерплю́ за Возлюби́вшаго мене́, потерплю́ и не отве́ргуся, я́ко спасе́ние Руси́ от Це́ркви Правосла́вныя и от Пома́занника ея́ Держа́внаго. Сие́ разуме́йте и сему́ покаря́йтеся, я́ко с на́ми Бо́г Свое́ю благода́тию.

Стих: Хвали́те Го́спода вси язы́цы, похвали́те Его́ вси лю́дие.

Разуме́йте, язы́цы, и покоря́йтеся, услы́шите до после́дних земли́, а́ще бо па́ки возмо́жете, и па́ки побежде́ни бу́дете, не дре́млют бо о́чи святи́теля Ермоге́на на стра́же Руси́ Правосла́вныя, не умолка́ют уста́ во всеору́жии и́стины, се́рдце же бди́т от стра́жи у́тренния до но́щи, упова́ющу ему́ на Го́спода и моля́щуся: да вознесе́т на Руси́ Це́рковь Правосла́вную и да укрепи́т на ве́ки ца́рство Пома́занника ея́, вся́ могу́щаго о укрепля́ющем Иису́се и ца́рствующаго во открове́ние и́стины язы́ком о и́мени Госпо́днем.

Стих: Я́ко утверди́ся ми́лость Его́ на нас, и и́стина Госпо́дня пребыва́ет во век.

Постиго́ша Ру́сь греси́ ея́, пото́цы беззако́ния смято́ша ю́, приложи́ бо беззако́ние к беззако́нию и погиба́ше за беззако́ние свое́, но обрати́ся ко Го́споду и спасе́ся, — святи́телю Ермоге́ну пропове́дующу, и к покая́нию призыва́ющу: прииди́те, ча́да, послу́шайте мене́, прему́дрости спасе́ния научу́ вы́: от лица́ гре́х ва́ших отврати́теся и ко Го́споду Бо́гу обрати́теся, испове́дайте на ся грехи́ ва́ша и в беззако́ниих ва́ших смири́теся: лю́бит бо Госпо́дь смире́нныя се́рдцем и сокруше́нныя ду́хом прие́млет, я́ко у Го́спода ми́лость и мно́гое у Него́ избавле́ние.

Глас 3: Сла́ва Отцу́ и Сы́ну и Свято́му Ду́ху.

Моли́твами святи́теля Ермоге́на прия́л е́сть Госпо́дь покая́ние рыда́ющих пред Ни́м и утверди́л е́сть ми́лость Свою́ на боя́щихся Его́; и се́, на Руси́ Правосла́вней ра́дуются о Го́споде и веселя́тся о Ду́се Свя́те, ца́рие си́лою Христо́вою хва́лятся и сла́вою святы́я Це́ркве велича́ются, лю́дие го́рняя му́дрствуют, и́щуще небе́снаго Иерусали́ма, и́стина Правосла́вия наро́дом ца́рства благовеству́ется во спасе́ние всея́ земли́. Та́ко и́стина Госпо́дня пребыва́ет в ро́де на́шем и ми́лость Его́ на на́с утвержда́ется.

И ны́не и при́сно и во ве́ки веко́в. Ами́нь.

Ка́ко не диви́мся / Богому́жному Рождеству́ Твоему́, Пречестна́я, / искуше́ния бо му́жескаго не прие́мши, Всенепоро́чная, / родила́ бо еси́ без отца́ Сы́на пло́тию, / пре́жде век от Отца́ рожде́ннаго без ма́тере, / ника́коже претерпе́вшаго измене́ния, или́ смеше́ния, или́ разделе́ния, / но обою́ существу́ сво́йство це́ло сохра́ншаго. / Те́мже, Ма́ти Де́во Влады́чице, / Того́ моли́ спасти́ся душа́м, / правосла́вно Богоро́дицу испове́дающих Тя.

Све́те Тихи́й:

Све́те Ти́хий святы́я сла́вы Безсме́ртнаго Отца́ Небе́снаго, Свята́го, Блаже́ннаго, Иису́се Христе́! Прише́дше на за́пад со́лнца, ви́девше свет вече́рний, пое́м Отца́, Сы́на и Свята́го Ду́ха, Бо́га. Досто́ин еси́ во вся времена́ пет бы́ти гла́сы преподо́бными, Сы́не Бо́жий, живо́т дая́й; те́мже мир Тя сла́вит.

1. При́тчей чте́ние.

Па́мять пра́веднаго с похвала́ми, и благослове́ние Госпо́дне на главе́ его́. Блаже́н челове́к, и́же обре́те прему́дрость, и сме́ртен, и́же уве́де ра́зум. Лу́чше бо сию́ купова́ти, не́жели зла́та и сребра́ сокро́вища. Честне́йшая же е́сть ка́мений многоце́нных, все́ же честно́е недосто́йно ея́ е́сть. Долгота́ бо дне́й и ле́та живота́ в десни́це ея́, в шу́йце же ея́ бога́тство и сла́ва. От у́ст ея́ исхо́дит пра́вда, зако́н же и ми́лость на язы́це но́сит. Послу́шайте у́бо мене́, о ча́да, честна́я бо реку́, и блаже́н челове́к, и́же пути́ моя́ сохрани́т: исхо́ди бо мои́ — исхо́ди живота́, и уготовля́ется хоте́ние от Го́спода. Сего́ ра́ди молю́ ва́с и предлага́ю мо́й гла́с сыново́м челове́ческим. Я́ко а́з, прему́дрость, устро́их сове́т, и ра́зум и смы́сл аз призва́х. Мо́й сове́т и утвержде́ние, мо́й ра́зум, моя́ же кре́пость. Аз мене́ лю́бящия люблю́, и́щущии же мене́ обря́щут благода́ть. Разуме́йте у́бо, незло́бивии, кова́рство, ненака́зании же, прилага́йте сердца́. Послу́шайте мене́ и па́ки, честна́я бо реку́, и отве́рзу от усте́н пра́вая, я́ко и́стине поучи́тся горта́нь мой, ме́рзки же пре́до мно́ю устны́ лжи́выя. С пра́вдою вси́ глаго́лы у́ст мои́х, ничто́же в ни́х стро́потно, ниже́ развраще́нно. Вся́ пра́ва су́ть разумева́ющим и про́ста обрета́ющим ра́зум. Науча́ю бо ва́с и́стине, да бу́дет о Го́споде наде́жда ва́ша, и испо́лнитеся Ду́ха.

2. При́тчей чте́ние

Уста́ пра́веднаго ка́плют прему́дрость, язы́к же непра́веднаго поги́бнет. Устне́ муже́й пра́ведных ка́плют благода́ти, уста́ же нечести́вых развраща́ются. Ме́рила льсти́вая ме́рзость пред Го́сподем, ве́с же пра́ведный прия́тен Ему́. Иде́же а́ще вни́дет досажде́ние, та́мо и безче́стие, уста́ же смире́нных поуча́ются прему́дрости. Соверше́ние пра́вых наста́вит и́х, и поползнове́ние отрица́ющихся упасе́т и́х. Не по́льзуют име́ния в де́нь я́рости, пра́вда же изба́вит от сме́рти. Умер пра́ведный, оста́ви раска́яние, нару́чна же быва́ет и посмея́тельна нечести́вых па́губа. Пра́вда непоро́чнаго исправля́ет пути́, в нече́стие же па́дает непра́вда. Пра́вда муже́й пра́вых изба́вит и́х, безсове́стием же пленя́ются беззако́ннии. Сконча́вшуся му́жу пра́ведну, не поги́бнет наде́жда, похвала́ же нечести́вых поги́бнет. Пра́ведник от ло́ва убе́гнет, в него́же ме́сто предае́тся нечести́вый. Во усте́х нечести́вых се́ть гра́жданом, чу́вство же пра́ведных благопоспе́шное. Во благи́х пра́ведных испра́вится гра́д, и в поги́бели нечести́вых ра́дование. Во благослове́нии пра́вых возвы́сится гра́д, усты́ же нечести́вых раскопа́ется. Руга́ется гра́жданом лише́нный ра́зума, му́ж же му́дрый безмо́лвие во́дит.

3. Прему́дрости Соломо́новы чте́ние

Пра́ведник, а́ще пости́гнет сконча́тися, в поко́и бу́дет. Ста́рость бо честна́ не многоле́тна, ниже́ в числе́ ле́т исчита́ется. Седи́на же е́сть му́дрость челове́ком, и во́зраст ста́рости — житие́ нескве́рное. Благоуго́ден Бо́гови бы́в, возлю́блен бы́сть, и живы́й посреде́ гре́шник, преста́влен бы́сть. Восхище́н бы́сть, да не зло́ба измени́т ра́зума его́, или́ ле́сть прельсти́т ду́шу его́. Раче́ние бо зло́бы помрача́ет до́брая и паре́ние по́хоти, пременя́ет у́м незло́бив. Сконча́вся вма́ле, испо́лни ле́та до́лга, уго́дна бо бе́ Го́сподеви душа́ его́, сего́ ра́ди потща́ся от среды́ лука́вствия. Лю́дие же ви́девше и не разуме́вше, ниже́ поло́жше в помышле́нии таково́е, я́ко благода́ть и ми́лость в преподо́бных Его́ и посеще́ние во избра́нных Его́.

Сподо́би, Го́споди:

Сподо́би, Го́споди, в ве́чер сей без греха́ сохрани́тися нам. Благослове́н еси́, Го́споди, Бо́же оте́ц на́ших, и хва́льно и просла́влено и́мя Твое́ во ве́ки. Ами́нь.

Бу́ди, Го́споди, ми́лость Твоя́ на нас, я́коже упова́хом на Тя. Благослове́н еси́, Го́споди, научи́ мя оправда́нием Твои́м. Благослове́н еси́, Влады́ко, вразуми́ мя оправда́нием Твои́м. Благослове́н еси́, Святы́й, просвети́ мя оправда́нии Твои́ми.

Го́споди, ми́лость Твоя́ во век, дел руку́ Твое́ю не пре́зри. Тебе́ подоба́ет хвала́, Тебе́ подоба́ет пе́ние, Тебе́ сла́ва подоба́ет. Отцу́ и Сы́ну и Свято́му Ду́ху, ны́не и при́сно и во ве́ки веко́в. Ами́нь.

На лити́и стихи́ры, гла́с 1.

Что́ сие́ е́сть пра́зднество? что́ е́сть шу́м освяще́ннаго собо́ра? что́ сие́ е́сть благохва́льное и кра́сное собра́ние? Свяще́нницы ра́дуются, лю́дие в весе́лие облека́ются, и вся́ Правосла́вная Ру́сь торжеству́ет, святи́телю Ермоге́ну предлежа́щу, и все́х от ра́ки моще́й свои́х благословля́ющу, и все́х благода́тно утеша́ющу, и та́йно глаго́лющу: не бо́йся, ма́лое ста́до, не потопи́ти мо́рю жите́йскому корабля́ Иису́сова, не поги́бнет Ру́сь Правосла́вная и Бо́гом люби́мая, я́ко благоизво́лил Госпо́дь да́ти на́м ца́рство, на ка́мне бо ве́ры и пра́вды стои́м.

Прииди́те вси́ ве́рнии, святи́теля Ермоге́на восхва́лим, звезду́, от восто́к со́лнца возсия́вшую и за́пад со́лнца Правосла́вием ве́ры озаря́вшую, и ны́не звезду́ но́ву, на небесе́х сла́вы в со́нме священному́ченик, явле́нную в по́мощь Це́ркви и царю́ проти́ву враго́в на́ших и во утвержде́ние ве́ры отце́в на́ших. Го́споди, моли́твами его́ ми́р Тво́й пода́ждь на́м и ве́лию ми́лость.

Что́ тя́ нарече́м, святи́телю Ермоге́не? Ангела ли? апо́стола ли или му́ченика? Ангела — зане́ я́ко храни́тель Правосла́вныя Руси́ спу́тьствующ и спаси́тельная предлага́ющ бы́л еси́; Апо́стола — я́ко неве́рныя научи́л еси́. Му́ченика же́ — я́ко за правосла́вие ца́рства ду́шу свою́ Христа́ ра́ди положи́л еси́. Его́ же моли́ поми́ловати ду́ши на́ша.

Сла́ва, и ны́не, богоро́дичен, гла́с то́йже:

Притеце́м ны́не к Ма́тери Го́спода Вы́шняго и вку́пе со святи́телем Ермоге́ном воспое́м Засту́пницу Усе́рдную: за все́х мо́лит бо Сы́на Своего́, Христа́ Бо́га на́шего, и все́м твори́т спасти́ся, в держа́вный Ея́ покро́в прибега́ющим.

Го́споди, поми́луй. (40 раз)

Стихи́ры на стихо́вне:

Стихиры, гла́с 6:

Святи́телю Ермоге́не, мо́лим тя́: при́зри на Ру́сь и посети́ ю́ моли́твою: Го́споди, да исче́знут врази́ Руси́ правосла́вныя, я́ко ды́м, и, я́ко во́ск от лица́ огня́, да поги́бнут.

Сти́х: Честна́ пред Го́сподем сме́рть преподо́бных Его́.

Моли́тву мою́ пролию́ ко Го́споду и Тому́ возвещу́ печа́ли моя́: се́, а́з ду́шу мою́ полага́ю за о́вцы моя́. Го́споди, приими́ ю́, я́ко кади́ло моли́твы о Руси́ Правосла́вней; сотвори́ ю́ свя́ту и правове́рну во ве́ки.

Сти́х: Свяще́нницы Твои́ облеку́тся в пра́вду, и преподо́бнии Твои́ возра́дуются.

Облецы́ на́с моли́твами твои́ми, святи́телю о́тче на́ш, и научи́ на́с правосла́вно моли́тися: Го́споди, Го́споди, спаси́ на́с, пре́жде да́же до конца́ не поги́бнем.

Слава И ны́не, Глас 6, Богоро́дичен:

Святи́телю Ермоге́ну предстоя́щу Бо́жией Ма́тери и моля́щуся о Руси́, вси́ приле́жно помо́лимся: Пресвята́я Богоро́дице, помога́й на́м.

Моли́тва свята́го Симео́на Богоприи́мца:

Ны́не отпуща́еши раба́ Твоего́, Влады́ко,/ по глаго́лу Твоему́, с ми́ром;/ я́ко ви́деста о́чи мои́ спасе́ние Твое́,/ е́же еси́ угото́вал пред лице́м всех люде́й,/ свет во открове́ние язы́ков,// и сла́ву люде́й Твои́х Изра́иля.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Го́споди, поми́луй. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Тропа́рь, глас 4:

Приспе́ де́нь све́тлаго торжества́, гра́д Москва́ ра́дуется, и с ни́м Ру́сь Правосла́вная ликоству́ет пе́сньми и пе́ньми духо́вными: дне́сь бо свяще́нное торжество́ в явле́нии честны́х и многоцеле́бных моще́й святи́теля и чудотво́рца Ермоге́на, я́коже со́лнце незаходи́мое возсия́ светоза́рными луча́ми, разгоня́я тму́ искуше́ний же и бе́д от вопию́щих ве́рно: спаса́й на́с, я́ко предста́тель на́ш, вели́кий Ермоге́не. (Дважды)

Песнь Пресвятей Богородице:

Богоро́дице Де́во, ра́дуйся, / Благода́тная Мари́е, Госпо́дь с Тобо́ю; / благослове́на Ты в жена́х / и благослове́н Плод чре́ва Твоего́, / я́ко Спа́са родила́ еси́ душ на́ших. (Единожды)

Бу́ди И́мя Госпо́дне благослове́но от ны́не и до ве́ка. (Три́жды)

Псало́м 33:

Благословлю́ Го́спода на вся́кое вре́мя,/ вы́ну хвала́ Его́ во усте́х мои́х./ О Го́споде похва́лится душа́ моя́,/ да услы́шат кро́тцыи, и возвеселя́тся./ Возвели́чите Го́спода со мно́ю,/ и вознесе́м И́мя Его́ вку́пе./ Взыска́х Го́спода, и услы́ша мя,/ и от все́х скорбе́й мои́х изба́ви мя./ Приступи́те к Нему́, и просвети́теся,/ и ли́ца ва́ша не постыдя́тся./ Сей ни́щий воззва́, и Госпо́дь услы́ша и́,/ и от все́х скорбе́й его́ спасе́ и́./ Ополчи́тся а́нгел Госпо́день о́крест боя́щихся Его́,/ и изба́вит их./ Вкуси́те и ви́дите, я́ко благ Госпо́дь:/ блаже́н муж, и́же упова́ет Нань./ Бо́йтеся Го́спода, вси́ святи́и Его́,/ я́ко несть лише́ния боя́щимся Его́./ Бога́тии обнища́ша и взалка́ша:/ взыска́ющии же Го́спода// не лиша́тся вся́каго бла́га.

У́ТРЕНЯ.

Шестопса́лмие:

Сла́ва в вы́шних Бо́гу, и на земли́ мир, в челове́цех благоволе́ние. (Три́жды)

Го́споди, устне́ мои́ отве́рзеши, и уста́ моя́ возвестя́т хвалу́ Твою́. (Два́жды)

Псалом 3:

Го́споди, что ся умно́жиша стужа́ющии ми́? Мно́зи востаю́т на мя, мно́зи глаго́лют души́ мое́й: несть спасе́ния eму́ в Бо́зе eго́. Ты же, Го́споди, Засту́пник мой еси́, сла́ва моя́ и вознося́й главу́ мою́. Гла́сом мои́м ко Го́споду воззва́х, и услы́ша мя от горы́ святы́я Своея́. Аз усну́х, и спах, воста́х, я́ко Госпо́дь засту́пит мя. Не убою́ся от тем люде́й, о́крест напа́дающих на мя. Воскресни́, Го́споди, спаси́ мя, Бо́же мой, я́ко Ты порази́л еси́ вся вражду́ющыя ми всу́е: зу́бы гре́шников сокруши́л еси́. Госпо́дне есть спасе́ние, и на лю́дех Твои́х благослове́ние Твое́.

Аз усну́х, и спах, воста́х, я́ко Госпо́дь засту́пит мя.

Псалом 37:

Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́. Я́ко стре́лы Твоя́ унзо́ша во мне, и утверди́л еси́ на мне ру́ку Твою́. Несть исцеле́ния в пло́ти мое́й от лица́ гне́ва Твоего́, несть ми́ра в косте́х мои́х от лица́ грех мои́х. Я́ко беззако́ния моя́ превзыдо́ша главу́ мою́, я́ко бре́мя тя́жкое отяготе́ша на мне. Возсмерде́ша и согни́ша ра́ны моя́ от лица́ безу́мия моего́. Пострада́х и сляко́хся до конца́, весь день се́туя хожда́х. Я́ко ля́двия моя́ напо́лнишася поруга́ний, и несть исцеле́ния в пло́ти мое́й. Озло́блен бых и смири́хся до зела́, рыка́х от воздыха́ния се́рдца моего́. Го́споди, пред Тобо́ю все жела́ние мое́ и воздыха́ние мое́ от Тебе́ не утаи́ся. Се́рдце мое́ смяте́ся, оста́ви мя си́ла моя́, и свет о́чию мое́ю, и той несть со мно́ю. Дру́зи мои́ и и́скреннии мои́ пря́мо мне прибли́жишася и ста́ша, и бли́жнии мои́ отдале́че мене́ ста́ша и нужда́хуся и́щущии ду́шу мою́, и и́щущии зла́я мне глаго́лаху су́етная и льсти́вным весь день поуча́хуся. Аз же я́ко глух не слы́шах и я́ко нем не отверза́яй уст свои́х. И бых я́ко челове́к не слы́шай и не имы́й во усте́х свои́х обличе́ния. Я́ко на Тя, Го́споди, упова́х, Ты услы́шиши, Го́споди Бо́же мой. Я́ко рех: да не когда́ пора́дуют ми ся врази́ мои́: и внегда́ подвижа́тися нога́м мои́м, на мя велере́чеваша. Я́ко аз на ра́ны гото́в, и боле́знь моя́ предо мно́ю есть вы́ну. Я́ко беззако́ние мое́ аз возвещу́ и попеку́ся о гресе́ мое́м. Врази́ же мои́ живу́т и укрепи́шася па́че мене́, и умно́жишася ненави́дящии мя без пра́вды. Воздаю́щии ми зла́я возблага́я оболга́ху мя, зане́ гоня́х благосты́ню. Не оста́ви мене́, Го́споди Бо́же мой, не отступи́ от Мене́. Вонми́ в по́мощь мою́, Го́споди спасе́ния моего́.

Не оста́ви мене́, Го́споди Бо́же мой, не отступи́ от Мене́. Вонми́ в по́мощь мою́, Го́споди спасе́ния моего́.

Псалом 62:

Бо́же, Бо́же мой, к Тебе́ у́тренюю, возжада́ Тебе́ душа́ моя́, коль мно́жицею Тебе́ плоть моя́, в земли́ пу́сте и непрохо́дне, и безво́дне. Та́ко во святе́м яви́хся Тебе́, ви́дети си́лу Твою́ и сла́ву Твою́. Я́ко лу́чши ми́лость Твоя́ па́че живо́т, устне́ мои́ похвали́те Тя. Та́ко благословлю́ Тя в животе́ мое́м, о и́мени Твое́м воздежу́ ру́це мои́. Я́ко от ту́ка и ма́сти да испо́лнится душа́ моя́, и устна́ма ра́дости восхва́лят Тя уста́ моя́. А́ще помина́х Тя на посте́ли мое́й, на у́тренних поуча́хся в Тя. Я́ко был еси́ Помо́щник мой, и в кро́ве крилу́ Твое́ю возра́дуюся. Прильпе́ душа́ моя́ по Тебе́, мене́ же прия́т десни́ца Твоя́. Ти́и же всу́е иска́ша ду́шу мою́, вни́дут в преиспо́дняя земли́, предадя́тся в ру́ки ору́жия, ча́сти ли́совом бу́дут. Царь же возвесели́тся о Бо́зе, похва́лится всяк клены́йся Им, я́ко загради́шася уста́ глаго́лющих непра́ведная.

На у́тренних поуча́хся в Тя. Я́ко был еси́ Помо́щник мой, и в кро́ве крилу́ Твое́ю возра́дуюся. Прильпе́ душа́ моя́ по Тебе́, мене́ же прия́т десни́ца Твоя́.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Го́споди поми́луй. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Псалом 87:

Го́споди Бо́же спасе́ния моего́, во дни воззва́х, и в нощи́ пред Тобо́ю. Да вни́дет пред Тя моли́тва моя́: приклони́ у́хо Твое́ к моле́нию моему́, я́ко испо́лнися зол душа́ моя́, и живо́т мой аду прибли́жися. Привмене́н бых с низходя́щими в ров, бых я́ко челове́к без по́мощи, в ме́ртвых свобо́дь, я́ко я́звеннии спя́щии во гро́бе, и́хже не помяну́л еси́ ктому́, и ти́и от руки́ Твоея́ отринове́ни бы́ша. Положи́ша мя в ро́ве преиспо́днем, в те́мных и се́ни сме́ртней. На мне утверди́ся я́рость Твоя́, и вся во́лны Твоя́ наве́л еси́ на мя. Уда́лил еси́ зна́емых мои́х от Мене́, положи́ша мя ме́рзость себе́: пре́дан бых и не исхожда́х. О́чи мои́ изнемого́сте от нищеты́, воззва́х к Тебе́, Го́споди, весь день, возде́х к Тебе́ ру́це мои́. Еда́ ме́ртвыми твори́ши чудеса́? Или́ вра́чеве воскреся́т, и испове́дятся Тебе́? Еда́ пове́сть кто во гро́бе ми́лость Твою́, и и́стину Твою́ в поги́бели? Еда́ позна́на бу́дут во тьме чудеса́ Твоя́, и пра́вда Твоя́ в земли́ забве́нней? И аз к Тебе́, Го́споди, воззва́х и у́тро моли́тва моя́ предвари́т Тя. Вску́ю, Го́споди, отре́еши ду́шу мою́, отвраща́еши лице́ Твое́ от Мене́? Нищ есмь аз, и в труде́х от ю́ности моея́; возне́с же ся, смири́хся, и изнемого́х. На мне преидо́ша гне́ви Твои́, устраше́ния Твоя́ возмути́ша мя, обыдо́ша мя я́ко вода́, весь день одержа́ша мя вку́пе. Уда́лил еси́ от Мене́ дру́га и и́скренняго, и зна́емых мои́х от страсте́й.

Го́споди Бо́же спасе́ния моего́, во дни воззва́х, и в нощи́ пред Тобо́ю. Да вни́дет пред Тя моли́тва моя́: приклони́ у́хо Твое́ к моле́нию моему́.

Псалом 102:

Благослови́, душе́ моя́, Го́спода, и вся вну́тренняя моя́ и́мя свя́тое Его́. Благослови́, душе́ моя́, Го́спода, и не забыва́й всех воздая́ний Его́, очища́ющаго вся беззако́ния твоя́, исцеля́ющаго вся неду́ги твоя́, избавля́ющаго от истле́ния живо́т твой, венча́ющаго тя ми́лостию и щедро́тами, исполня́ющаго во благи́х жела́ние твое́: обнови́тся я́ко о́рля ю́ность твоя́. Творя́й ми́лостыни Госпо́дь, и судьбу́ всем оби́димым. Сказа́ пути́ Своя́ Моисе́ови, сыново́м Изра́илевым хоте́ния Своя́: Щедр и Ми́лостив Госпо́дь, Долготерпели́в и Многоми́лостив. Не до конца́ прогне́вается, ниже́ во век вражду́ет, не по беззако́нием на́шым сотвори́л есть нам, ниже́ по грехо́м на́шым возда́л есть нам. Я́ко по высоте́ небе́сней от земли́, утверди́л есть Госпо́дь ми́лость Свою́ на боя́щихся Его́. Ели́ко отстоя́т восто́цы от за́пад, уда́лил есть от нас беззако́ния на́ша. Я́коже ще́дрит оте́ц сы́ны, уще́дри Госпо́дь боя́щихся Его́. Я́ко Той позна́ созда́ние на́ше, помяну́, я́ко персть есмы́. Челове́к, я́ко трава́ дни́е eго́, я́ко цвет се́льный, та́ко оцвете́т, я́ко дух про́йде в нем, и не бу́дет, и не позна́ет ктому́ ме́ста своего́. Ми́лость же Госпо́дня от ве́ка и до ве́ка на боя́щихся Его́, и пра́вда Его́ на сыне́х сыно́в, храня́щих заве́т Его́, и по́мнящих за́поведи Его́ твори́ти я́. Госпо́дь на Небеси́ угото́ва Престо́л Свой, и Ца́рство Его́ все́ми облада́ет. Благослови́те Го́спода вси А́нгели Его́, си́льнии кре́постию, творя́щии сло́во Его́, услы́шати глас слове́с Его́. Благослови́те Го́спода вся Си́лы Его́, слуги́ Его́, творя́щии во́лю Его́. Благослови́те Го́спода вся дела́ Его́, на вся́ком ме́сте влады́чества Его́, благослови́, душе́ моя́, Го́спода.

На вся́ком ме́сте влады́чества Его́, благослови́, душе́ моя́, Го́спода.

Псалом 142:

Го́споди, услы́ши моли́тву мою́, внуши́ моле́ние мое́ во и́стине Твое́й, услы́ши мя в пра́вде Твое́й и не вни́ди в суд с рабо́м Твои́м, я́ко не оправди́тся пред Тобо́ю всяк живы́й. Я́ко погна́ враг ду́шу мою́, смири́л есть в зе́млю живо́т мой, посади́л мя есть в те́мных, я́ко ме́ртвыя ве́ка. И уны́ во мне дух мой, во мне смяте́ся се́рдце мое́. Помяну́х дни дре́вния, поучи́хся во всех де́лех Твои́х, в творе́ниих руку́ Твое́ю поуча́хся. Возде́х к Тебе́ ру́це мои́, душа́ моя́, я́ко земля́ безво́дная Тебе́. Ско́ро услы́ши мя, Го́споди, исчезе́ дух мой, не отврати́ лица́ Твоего́ от Мене́, и уподо́блюся низходя́щым в ров. Слы́шану сотвори́ мне зау́тра ми́лость Твою́, я́ко на Тя упова́х. Скажи́ мне, Го́споди, путь во́ньже пойду́, я́ко к Тебе́ взях ду́шу мою́. Изми́ мя от враг мои́х, Го́споди, к Тебе́ прибего́х. Научи́ мя твори́ти во́лю Твою́, я́ко Ты еси́ Бог мой. Дух Твой Благи́й наста́вит мя на зе́млю пра́ву. И́мене Твоего́ ра́ди, Го́споди, живи́ши мя, пра́вдою Твое́ю изведе́ши от печа́ли ду́шу мою́. И ми́лостию Твое́ю потреби́ши враги́ моя́ и погуби́ши вся стужа́ющыя души́ мое́й, я́ко аз раб Твой есмь.

Услы́ши мя, Го́споди, в пра́вде Твое́й и не вни́ди в суд с рабо́м Твои́м.

Дух Твой Благи́й наста́вит мя на зе́млю пра́ву.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Тропа́рь глас 4:

Сла́ва Отцу́ и Сы́ну и Свято́му Ду́ху. И ны́не и при́сно и во ве́ки веко́в. Ами́нь.

Глас 4: Е́же от ве́ка утае́ное / и А́нгелом несве́домое та́инство, / Тобо́ю, Богоро́дице, су́щим на земли́ яви́ся Бог, / в несли́тном соедине́нии воплоща́ем / и, Крест во́лею нас ра́ди восприи́м, / и́мже воскреси́в первозда́ннаго, / спасе́ от сме́рти ду́ши на́ша.

Здесь читается кафизма, положенная по дню, или сразу седальны:

Го́споди, поми́луй. (Три́жды)

Седален, глас 4:

Строи́теля земли́ на́шея во дни́ нестрое́ния, ве́рнии, соше́дшеся восхва́лим, я́ко ца́рство согла́сно зако́ну и благода́ти на́м пропове́да, и, самозва́нныя богопроти́вныя вла́сти я́ве обличи́в дерзнове́нне, в темни́це гла́дом заму́чен бы́сть, и ны́не со священному́ченики живу́щи Христу́ мо́лится, спасти́ся на́м.

Сла́ва: Све́тлую твою́ па́мять дне́сь творя́ще, Спа́са и Го́спода моли́ти приле́жно тя́ мо́лим, священному́чениче Ермоге́не, зако́ном да́ти правосла́вное утвержде́ние.

И ны́не, богоро́дичен: Те́плое заступле́ние су́щим в беда́х и помо́щницу на́шу, Еюже ра́бства инозе́мнаго и лати́нства скве́рнаго изба́вихомся, Богоро́дицу, ве́рнии, ублажа́ем.

Седален, глас 4:

Яви́лся еси́ дне́сь Руси́ Правосла́вней, и све́т твоего́ благоволе́ния зна́менася на на́с, в ра́зуме пою́щих тя́: прише́л еси́ и яви́лся еси́ чудотво́рец пресла́вный.

Сла́ва: Притеце́м, ве́рнии, к ра́це моще́й святи́теля Ермоге́на, и пролие́м пред ни́м печа́ль на́шу, и ско́рбь на́шу пред ни́м возвести́м, да обря́щем ве́лие утеше́ние: вся́к бо ве́руяй не отъи́дет то́щь.

И ны́не, богоро́дичен: Дне́сь Влады́чица ми́ра ра́дуется, зря́ святи́теля Ермоге́на, от Христа́ венча́ннаго си́лою мно́гою и при́сно о Руси́ моля́щагося. Его́же моли́твами, Ма́ти Бо́га Вы́шняго, покры́й на́с покро́вом Твоея́ бла́гости.

Полиеле́й:

Хвали́те И́мя Госпо́дне, хвали́те, раби́ Го́спода.

Аллилу́иа, аллилу́иа, аллилу́иа.

Благослове́н Госпо́дь от Сио́на, живы́й во Иерусали́ме.

Аллилу́иа, аллилу́иа, аллилу́иа.

Испове́дайтеся Го́сподеви, я́ко Благ, я́ко в век ми́лость Его́.

Аллилу́иа, аллилу́иа, аллилу́иа.

Испове́дайтеся Бо́гу Небе́сному, я́ко в век ми́лость Его́.

Аллилу́иа, аллилу́иа, аллилу́иа.

Велича́ние:

Велича́ем тя, / святи́телю о́тче Ермогене, / и чтим святу́ю па́мять твою́, / ты бо мо́лиши о нас // Христа́ Бо́га на́шего.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа,// сла́ва Тебе́, Бо́же. (Трижды)

Седа́льны:

Глас 4:

Прему́драго иера́рха восхва́лим, я́ко ко́рмчаго Правосла́вныя Руси́, к го́рнему Иерусали́му путево́дствующа, и на вся́ку пра́вду наставля́юща, и от вся́каго зла́ спаса́юща.

Сла́ва: Прему́драго иера́рха восхва́лим, я́ко Ангела-храни́теля Руси́, спу́тьствующа и спаси́тельная предлага́юща и ца́рство на́ше в правосла́вном самодержа́вии утвержда́юща, и Христа́ в не́м вообража́юща.

И ны́не, богоро́дичен: Ублажи́м Честне́йшую го́рних во́инств: Та́ бо помогла́ е́сть святи́телю Ермоге́ну упоко́итися в ве́чных оби́телех, Та́ бо спасе́т и на́с, гре́шных.

Степе́нна, глас 4:

От ю́ности моея́/ мно́зи бо́рют мя стра́сти,/ но Сам мя заступи́// и спаси́, Спа́се мой.

Ненави́дящии Сио́на,/ посрами́теся от Го́спода,/ я́ко трава́ бо огне́м// бу́дете изсо́хше.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Святы́м Ду́хом/ вся́ка душа́ живи́тся,/ и чистото́ю возвыша́ется,// светле́ется Тро́йческим еди́нством, священнота́йне.

Го́споди, поми́луй. (Три́жды)

От Иоа́нна Свята́го Ева́нгелия чте́ние

Сла́ва, Тебе́, Го́споди, сла́ва Тебе́.

Рече́ Госпо́дь ко прише́дшым к Нему́ иуде́ем: ами́нь, ами́нь глаго́лю вам, не входя́й две́рьми во двор о́вчий, но прела́зя и́нуде, той тать есть и разбо́йник. А входя́й две́рьми па́стырь есть овца́м. Сему́ две́рник отверза́ет, и о́вцы глас его́ слы́шат, и своя́ о́вцы глаша́ет по и́мени, и изго́нит их. И егда́ своя́ о́вцы иждене́т, пред ни́ми хо́дит, и о́вцы по нем и́дут, я́ко ве́дят глас его́. По чужде́м же не и́дут, но бежа́т от него́, я́ко не зна́ют чужда́го гла́са. Сию́ при́тчу рече́ им Иису́с, они́ же не разуме́ша, что бя́ше, я́же глаго́лаше им. Рече́ же па́ки им Иису́с: ами́нь, ами́нь глаго́лю вам, я́ко Аз есмь дверь овца́м. Вси, ели́ко их прии́де пре́жде Мене́, та́тие суть и разбо́йницы, но не послу́шаша их о́вцы. Аз есмь дверь, Мно́ю а́ще кто вни́дет, спасе́тся, и вни́дет и изы́дет, и па́жить обря́щет.

Сла́ва, Тебе́, Го́споди, сла́ва Тебе́.

Псало́м 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя. Я́ко беззако́ние мое́ аз зна́ю и грех мой предо мно́ю есть вы́ну. Тебе́ Еди́ному согреши́х, и лука́вое пред Тобо́ю сотвори́х, я́ко да оправди́шися во словесе́х Твои́х и победи́ши, внегда́ суди́ти Ти. Се бо в беззако́ниих зача́т есмь, и во гресе́х роди́ мя ма́ти моя́. Се бо и́стину возлюби́л еси́, безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся, омы́еши мя, и па́че сне́га убелю́ся. Слу́ху моему́ да́си ра́дость и весе́лие, возра́дуются ко́сти смире́нныя. Отврати́ лице́ Твое́ от грех мои́х, и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́, и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́, и Ду́хом Влады́чним утверди́ мя. Научу́ беззако́нныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́, возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо, всесожже́ния не благоволи́ши. Же́ртва Бо́гу дух сокруше́н, се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския, тогда́ благоволи́ши же́ртву пра́вды, возноше́ние и всесожега́емая: тогда́ возложа́т на олта́рь Твой тельцы́.

Глас 6:

Сла́ва Отцу́ и Сы́ну и Свято́му Ду́ху./ Моли́твами святителя Ермогена, / Ми́лостиве, очи́сти / мно́жества согреше́ний на́ших.

И ны́не и при́сно и во ве́ки веко́в. Ами́нь./ Моли́твами Богоро́дицы, / Ми́лостиве, очи́сти / мно́жества согреше́ний на́ших.

Поми́луй мя, Бо́же,/ по вели́цей ми́лости Твое́й,/ и по мно́жеству щедро́т Твои́х// очи́сти беззако́ние мое́.

Стихи́ра, глас 4

Предста́тель тепле́йший ца́рства правосла́внаго показа́лся еси́, Ермоге́не, и, иносла́вная безбо́жная уче́ния отверга́я со дерзнове́нием, пра́вило показа́лся еси́ все́м Правосла́вия, о все́х моля́ся, после́дующих твои́м Боже́ственным уче́нием и наказа́нием.

Го́споди, поми́луй. (12 раз)

Кано́н святи́теля, гла́с 8.

Пе́снь 1.

Ирмос: Пе́снь возсле́м, лю́дие, чу́дному Бо́гу на́шему, свободи́вшему Изра́иля от рабо́ты, пе́снь побе́дную пою́ще и вопию́ще: пои́м Тебе́, еди́ному Влады́це.

Припев: Святителю отче Ермогене, моли Бога о нас.

Ве́дущии воскликнове́ние, по́йте и велича́йте святи́теля вели́каго и, взира́я на кончи́ну его́, подража́йте ве́ре его́.

Оби́лие благода́ти о́крест твоея́ ра́ки, святи́телю Ермоге́не, ея́же ра́ди прославля́ем тя́, я́ко новоявле́ннаго чудотво́рца, и про́сим исцеле́ний.

Нача́ло прему́дрости — стра́х Госпо́день, научи́вый и тя́, святи́телю, рабо́тати Го́сподеви с тре́петом и ра́доватися пред лице́м Его́. Да́ждь и на́м, по моли́тве твое́й, положи́ти сие́ нача́ло благо́е.

Мно́ги ско́рби пра́ведным, и от все́х и́х изба́вит я́ Госпо́дь. По словеси́ сему́ бы́сть житие́ твое́, святи́телю. И се́, ны́не ра́дуешися на небесе́х и ра́дуеши все́х, чту́щих па́мять твою́.

Испыта́ющий свиде́ния Бо́жия бы́л еси́, святи́телю, в зако́не бо Христо́ве поуча́лся еси́ де́нь и но́щь, и оправда́ния Госпо́дня пра́ва су́ть, в селе́ния бо пра́ведных всели́ тя́ Госпо́дь.

За́поведи Госпо́дни от ю́ности возлюби́л еси́ и преда́ния святы́х оте́ц да́же до сме́рти соблю́л еси́, святи́телю, и ны́не с ни́ми сопрославля́еши Бо́га, Его́же моли́, да спасе́т тобо́ю ду́ши на́ша.

Его́же возлюби́л еси́ и Ему́же ре́вностно порабо́тал еси́, ны́не с ли́ки святы́х воспева́еши и мо́лишися за ны́.

Богородичен: Моли́твеннице нело́жная, Засту́пнице ро́да христиа́нскаго, приими́ мольбы́ от на́с, приле́жно призыва́ющих и моля́щихся Тебе́: покры́й страну́ на́шу Правосла́вную покро́вом Твоея́ бла́гости.

Пе́снь 3.

Ирмос: Ты́ еси́ утвержде́ние притека́ющих к Тебе́, Го́споди, Ты́ еси́ све́т омраче́нных, и пое́т Тя́ ду́х мо́й.

Ле́та дре́вняя помяну́х, и поучи́хся во все́х де́лех твои́х, святи́телю, и обрето́х ве́дение, ка́ко жи́ти в ми́ре се́м, от святы́х оте́ц и от жити́й святы́х вразумля́яся.

Епи́скоп му́дрый лю́дем и ца́рству бы́л еси́, святи́телю, уподо́бился еси́ му́жу, смотря́щу лице́ бытия́ ца́рства Правосла́внаго в ле́тописех дре́вних, я́ко же в зерца́ле, поуча́ющуся прему́дрости Правосла́вия во дне́х дре́вних.

Го́споди, Госпо́дь на́ш, я́ко чу́дно и́мя Твое́ по все́й Руси́. Госпо́дь посмее́тся враго́м на́шим. Госпо́дь засту́пник на́ш. — Сию́ пра́вду живописа́л еси́, святи́телю, ха́ртиею и черни́лом, поуча́я ро́ды родо́в, я́ко летопи́сец Правосла́вныя Руси́.

Лю́дие поучи́теся, лю́дие умили́теся, вразумля́юще себе́ саме́х в пе́ниих и пе́снех духо́вных, и́ми же просла́вил е́сть святи́тель Ермоге́н Засту́пницу ро́да на́шего.

Аще не Госпо́дь сози́ждет до́м, всу́е труди́шася зи́ждущии. Сию́ и́стину внуша́л еси́, святи́телю, стра́жем земли́ на́шея, да не осуетя́тся помышле́нии свои́ми и да не всу́е мяту́тся.

Свяще́нник це́ркве святи́теля Никола́я бы́л еси́, Ермоге́не, и, возгрева́я да́р, живу́щий в тебе́, ве́лию любо́вь Богома́тере стяжа́л еси́, Еюже от сла́вы в сла́ву да́же до небесе́ влеко́м бы́л еси́ и в селе́ниих пра́ведных всели́лся еси́.

Уподо́бился еси́ купцу́, многоце́нен би́сер обре́тшу, егда́ ико́ну Богома́тере от земли́ подъя́л еси́, я́ко сокро́вище благода́ти, ни́щия ду́хом обогаща́ющее.

Богородичен: Сказа́ние чуде́с Твои́х, Богоро́дице, е́же написа́ святи́тель Ермоге́н во сла́ву ико́ны Твоея́ Каза́нския, воздвиза́ет всю́ Ру́сь Правосла́вну при́сно прибега́ти к Тебе́ во все́х обстоя́ниих и приле́жно моли́ти: Пресвята́я Богоро́дице, помога́й на́м.

Седа́лен, гла́с 8.

Возше́д на высоту́ небе́сную, и боже́ственными отту́ду, о́тче, озари́вся сия́нии чуде́с, пресве́тел вои́стину яви́лся еси́ Правосла́вней Руси́ па́стырь, на́м в напа́стех сы́й предста́тель непобеди́м; те́м же пресла́вно враги́ победи́в, лжу́ иносла́вия отгна́л еси́, и ца́рство Правосла́вное спа́сл еси́ от поги́бели, Ермоге́не. Моли́ Христа́ Бо́га, грехо́в оставле́ние дарова́ти и Правосла́вну Ру́сь в любви́ Бо́жией да́же до ве́ка соблюда́ти чту́щим любо́вию святу́ю па́мять твою́.

Сла́ва, и ны́не, Богородичен:

Святи́телю Ермоге́ну подража́юще, почти́м пресве́тлую ико́ну Богома́тере, я́ко исто́чник неисчерпа́емый исцеле́ний, и ублажи́м Ма́терь Бо́га Вы́шняго, я́ко Де́ву и еди́ну в жена́х, без се́мене ро́дшую Бо́га пло́тию.

Пе́снь 4.

Ирмос: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.

Возвести́те во язы́цех дела́ Бо́жия, я́же яви́л на́м е́сть Госпо́дь Вседержи́тель от ико́ны Своея́ Ма́тере, — ре́кл еси́, святи́телю, — да не реку́т язы́цы: где́ е́сть Бо́г и́х, в Него́ же ве́руют? и да заградя́тся уста́ и́х.

Ята бы́сть земле́ю, но не удержа́нна, ико́на Пречи́стыя, да бу́дет во утвержде́ние новопросвеще́нным, блужда́ющим же во тьме́ неве́дения, во открове́ние све́та и́стины, я́ко же му́дрствует о се́м святи́тель Ермоге́н.

Ты́ еси́ изря́дное пе́ние чуде́с Пренепоро́чныя, ты́ еси́ утвержде́ние хро́млющих, ты́ еси́ све́т правосла́вный омраче́нных, и пое́т тя́ ду́х мо́й.

Иго благо́е и бре́мя ле́гкое подъя́л еси́, Ермоге́не, егда́ о́браз Ангельский восприя́л еси́, да прии́деши в во́зраст му́жа соверше́нна.

Тебе́, оде́ющагося моли́твою, я́ко ри́зою, доброде́телей подви́жника, Спа́сова оби́тель ви́дя, зело́ ра́довася: гряде́т бо свяще́нно-архимандри́т обнови́ти оби́тель и утверди́ти благоче́стие.

Ермола́ю тезоимени́тый, усоверши́лся еси́, Ермоге́ну же, жи́тельствуя, уподо́бился еси́, и се́, я́ко свети́льник немерца́ющий, поставля́ешися на све́щнице каза́нския митропо́лии.

Ле́по е́сть возлюби́вшему Сладча́йшаго услажда́ти, прему́дрому безу́мием Христа́ ра́ди умудря́ти, си́льному о Го́споде укрепля́ти, ле́по е́сть святи́тельствовати Ермоге́ну, вся́ могу́щему о Христе́ Иису́се.

Богородичен: Яко Госпожу́, Цари́цу и Влады́чицу, заступа́ющу все́х на́с, в держа́вный Тво́й покро́в прибега́ющих, пое́т Тя́ святы́й Ермоге́н, с ни́м же приими́ и на́ша моле́ния и спаси́ ду́ши на́ша.

Пе́снь 5

Ирмос: Утренююще вопие́м Ти́: Го́споди, спаси́ ны, Ты́ бо еси́ Бо́г на́ш, ра́зве Тебе́, ино́го не ве́мы.

Егда́ бы́л еси́ в Каза́ни, неве́дущия и́стиннаго Бо́га просвеща́л еси́ и рабо́тати Еди́ному Бо́гу науча́л еси́. Сего́ ра́ди со апо́столы ра́дуешися, прие́мля награ́ду благове́стника Христо́ва.

Ре́вностию Бо́жиею по сла́ве ди́вных во святы́х свои́х: Гу́рия, Варсоно́фия и Ге́рмана поревнова́л еси́, Ермоге́не, и, те́х моли́твами вспомоществу́емый, в оби́тели святи́телей пресели́лся еси́, предстоя́ Еди́ному Пастыренача́льнику, Его́ же моли́ спасти́ся все́м на́м.

Ми́луя, нака́зывал еси́ и, наказу́я, ми́ловал еси́, святи́телю, и се́ю му́дростию огражда́л еси́ от волко́в хи́щных новопросвеще́нная ча́да твоя́ и вся́ о́вцы твоя́.

Опло́том во́ли царе́вой, ревну́ющия по правосла́вию ца́рства, немощны́я в ве́ре огражда́л еси́ и к попече́нию о спасе́нии ца́рства во Христе́ Иису́се царя́ Фео́дора призыва́л еси́, указу́я ца́рству спаси́тельное преображе́ние.

Гра́д Москва́ и с ни́м вся́ Ру́сь пла́кася го́рько, самозва́нцу воцари́вшуся и в скве́рное лати́нство обле́кшуся, ты́ же еди́н, я́ко кре́пкий побо́рник, сему́ нече́стию противоста́л еси́ и ве́ру Правосла́вную со дерзнове́нием испове́дал еси́.

Ермоге́на испове́дника, ему́ же мно́го бы́сть преще́ния сме́ртнаго и слове́с жесто́ких от самозва́нца нечести́ваго, пе́сньми ублажа́ем.

На Него́ же ра́дуяся взира́ют чи́ни Ангельстии и вси́ святи́и, Тому́ предстои́ши ны́не, Ермоге́не, и я́ко испове́дник хода́тайствуеши при́сно за Ру́сь Правосла́вну.

Богородичен: Ада́мово воззва́ние, пренепоро́чная Де́во, с Тобо́ю Госпо́дь и Тобо́ю с на́ми Бо́г, разуме́йте сие́, язы́цы, и покаря́йтеся.

Пе́снь 6.

Ирмос: Ри́зу мне́ пода́ждь све́тлу, одея́йся све́том, я́ко ри́зою, многоми́лостиве Христе́ Бо́же на́ш.

Собо́ром освяще́нным и повеле́нием ца́рским возше́л еси́, святи́телю, на престо́л патриа́ршия вла́сти, да спасе́ши Ру́сь, напа́стьми мно́гими обурева́ему.

Ве́ры нелицеме́рныя испове́дание неколе́блемое начерта́л еси́, святи́телю, руко́ю твое́ю и сию́ ве́ру пре́д лице́м всея́ Це́ркве в собо́ре Успе́ния Пречи́стыя испове́дал еси́, да у́зрит вся́ Ру́сь ка́мень и́стинныя ве́ры, на не́м же сози́ждется ца́рство и утверди́тся в Правосла́вии.

Язы́к тво́й — тро́сть кни́жника скоропи́сца, и́мже загради́шася уста́ гре́шнича и уста́ льсти́ваго, и усмири́ся мяте́ж нечести́вых.

Тму́ лжи́, я́же бы́сть о́крест престо́ла ца́рскаго, просвеща́я сло́вом и́стины, святы́я мо́щи царе́вича Дими́трия на ра́мена освяще́нных подъя́л еси́ и, показу́я все́й Руси́ Правосла́вней, во гра́де Москве́ положиэл еси́ я́, да возвеща́ют пра́вду царе́ву и да укрепля́ют держа́ву царе́й правосла́вных.

Аще ца́рь благочести́в, — ре́кл еси́, святи́телю, — и по ве́ре правосла́вней побора́тель, благослови́те о не́м Го́спода и возлюби́те его́, и в стра́се Бо́жии повину́йтеся ему́ и покоря́йтеся.

Яко дре́во при исхо́дищах во́д, бы́л еси́ у престо́ла благода́ти, святи́телю, осеня́я прохла́дою утеше́ния и многопло́дием пра́вды царя́ Правосла́вныя Руси́.

И пропове́дуеши, и облича́еши, и призыва́еши, и мо́лишися, и моли́тися во все́х хра́мах повелева́еши, святи́телю, и все́ сие́ тща́ние о здра́вии и спасе́нии государя́ Бо́гом венча́ннаго, о покоре́нии ему́ все́х враго́в его́ и о умире́нии его́ ца́рства.

Богородичен: Богоро́дице Де́во, упова́ние христиа́ном, покры́й, соблюди́, сохрани́ и спаси́ Ру́сь, прибега́ющу ко Твоему́ заступле́нию.

Конда́к, гла́с 6:

Темни́цею и гла́дом изнуря́емь, да́же до сме́рти ве́рен пребы́л еси́, блаже́нне Ермоге́не, малоду́шие от серде́ц люде́й твои́х изгоня́я и на о́бщий по́двиг вся́ призыва́я. Те́мже и нечести́вых мяте́ж низложи́л еси́ и ски́птры ца́рствия утверди́л еси́, да вси́ зове́м ти́: ра́дуйся, засту́пниче Росси́йския земли́.

Икос:

Прииди́те, правосла́внии лю́дие, пе́сньми ублажи́м пресве́тла свети́льника Це́ркве Росси́йския, непоколеби́ма столпа́ ве́ры Правосла́вныя, те́пла моли́твенника и предста́теля за зе́млю на́шу, кре́пка стоя́теля проти́ву враго́в, стро́гаго обличи́теля на преда́телей и разори́телей Правосла́вныя страны́, до́браго па́стыря, ду́шу свою́ за о́вцы своя́ положи́вша и сего́ ра́ди венце́м сла́вы от Го́спода венча́нна, к нему́же припаде́м, ве́рою и любо́вию зову́ще си́це: ра́дуйся, вели́кий в иера́рсех Росси́йских святи́телю Христо́в о́тче на́ш Ермоге́не.

Пе́снь 7.

Ирмос: Отроцы Богочести́вии в Вавило́не, о́бразу злато́му не поклони́шася, но посреде́ пе́щи о́гненныя, ороша́еми, пе́снь воспева́ху, глаго́люще: превозноси́мый отце́в и на́ш Бо́же, благослове́н еси́.

Огне́м лю́тыя зло́бы опаля́ема, пе́щи о́гненней уподо́билася е́сть Правосла́вная Ру́сь во дни́ сму́ты, си́лою же слове́с твои́х, святи́телю, ороша́ема и до дне́сь пое́т правосла́вно: отце́в и на́ш Бо́же, благослове́н еси́.

Гла́с в собо́ре Успе́ния Пречи́стыя слы́шан бы́сть: пока́йтеся о зло́бе ва́шей, врази́ царю́ правосла́вному и Бо́гови, и́бо Бо́гом венча́н е́сть на ца́рство и Бо́гом ца́рствует во утвержде́ние Христо́вой пра́вды, поя́ Ему́ правосла́вно: отце́в Бо́же, благослове́н еси́.

Оте́ц всея́ Руси́ ца́рь на́ш и храни́тель оте́ческих преда́ний со вла́стию: сего́ ра́ди повину́йтеся ему́ и покаря́йтеся, и по́йте с ни́м и́мени Всевы́шняго: отце́в и на́ш Бо́же, благослове́н еси́.

Моли́теся и пости́теся, и измени́теся в но́ваго челове́ка, оде́яна в доброде́тели Боголю́бия и царелю́бия, да пода́ст все́м на́м Госпо́дь ми́р и любо́вь, ца́рству кре́пкое едине́ние, царю́ побе́ду на враги́ и одоле́ние.

Любо́вию к царю́ согрева́яйся и ре́вностию по ве́ре па́че огня́ разгора́яйся, попаля́л еси́, святи́телю, те́рния грехолюби́выя сму́ты, обновля́я и утвержда́я обветша́вшее ца́рство.

Юнцы́ ту́чнии: самозва́нцы мяте́жнии, цари́ инозе́мнии и изме́нницы нечести́вии одержа́ша Ру́сь, пред лице́м же твоея́ пра́вды, святи́телю, исчезо́ша, я́ко ды́м от огня́, да весели́тся правосла́вный ца́рь о Го́споде, и да торжеству́ет Правосла́вие.

Бо́гови рабо́тницы и тебе́ помо́щницы бы́ша Святи́телие Христо́вы: Филаре́т Росто́вский, Ефре́м Каза́нский, Феокти́ст Тверски́й и Галактио́н Су́здальский, и́миже во всю́ зе́млю изы́де сло́во твое́, Ермоге́не святи́телю, и в концы́ Руси́ веща́ние твое́.

Богородичен: Иже в напа́стех и в ско́рбех, и в боле́знех, обремене́ннии грехи́ мно́гими, прииди́те к Засту́пнице Усе́рдней, Ма́тери Го́спода Вы́шняго, Та́ бо исцели́т вы́, и уте́шит, и упоко́ит.

Пе́снь 8.

Ирмос: Богоглаго́ливии о́троцы в пещи́, со огне́м пла́мень попира́юще, поя́ху: благослови́те, дела́ Госпо́дня, Го́спода.

Ми́лостыни мно́ги твори́л еси́ лю́дем, святи́телю, егда́ бога́тии обнища́ша ми́лостию и сребролю́бия ра́ди не внима́ху, е́же помощи́ неиму́щим, ты́ же ре́кл еси́ ке́ларю Се́ргиевой оби́тели Авраа́мию, и жи́тницы отверзо́шася, и а́лчущии насы́тишася, и благослови́ша Го́спода.

Аще и пе́нится жите́йское мо́ре, а́ще и бесну́ется, воздвиза́емо напа́стей бу́рею, не потопи́ти ему́ корабля́ Иису́сова: на ка́мне бо ве́ры и пра́вды стои́м. — Та́ко ре́кл еси́, святи́телю, и бы́сть та́ко, и се́, торжеству́ют правосла́внии и благословля́ют Го́спода.

Яко до́брый ко́рмчий, приве́л еси́, святи́телю, кора́бль Росси́йския держа́вы к ти́хой при́стани Правосла́вныя Це́ркве, и се́, ца́рство на́ше осоля́ется благода́тию Свята́го Ду́ха и благословля́ет Го́спода.

Ре́кл еси́, святи́телю, боя́щимся Го́спода: не бо́йся, ма́лое ста́до, я́ко благоизво́лил е́сть Оте́ц Небе́сный дарова́ти на́м ца́рство. Та́ко ве́ровал еси́ и та́ко по ве́ре восприя́л еси́. И се́, свята́я Це́рковь ра́дуется о правосла́вии ца́рства и благословля́ет Го́спода.

Уничижи́ша тя́ возстаю́щии на тя́, мета́юще пра́х и песо́к в лице́ твое́, да отрече́шися от Бо́жия пома́занника, ты́ же вся́ претерпе́л еси́ пра́вды ра́ди, благословля́яй Го́спода.

Свята́я и Бо́гом люби́мая Ру́сь не поги́бнет, — ре́кл еси́, святи́телю, изме́нником, и преда́телем, и все́м враго́м на́шим, — всу́е тружда́етеся, а́ще не Госпо́дь созида́ет. Пока́йтеся и благослови́те Го́спода.

Не ве́даем, ка́ко и нарещи́ ва́с, — ре́кл еси́, святи́телю, мяте́жником и изме́нником, — отступи́ли бо есте́ от Бо́га, отпа́ли от собо́рныя и апо́стольския Це́ркве, отступи́ли от Бо́гом и святы́м еле́ем пома́заннаго царя́, забы́ли есте́ обе́ты правосла́вныя ве́ры на́шея: стоя́ти до сме́рти за до́м Пресвяты́я Богоро́дицы и за ца́рство правосла́вное. Пока́йтеся и обрати́теся и благослови́те Го́спода.

Богородичен: Еже о на́с исполня́я смотре́ние Бо́жие и я́же на земли́ соединя́я небе́сным, носи́ла еси́ во чре́ве от Ду́ха Свя́та, Пренепоро́чная, и родила́ еси́ на́м все́х Бо́га, Его́же вся́ дела́ Госпо́дня, пою́т и превозно́сят во вся́ ве́ки.

На 9-й песни поем песнь Пресвятыя Богородицы:

Вели́чит душа́ Моя́ Го́спода и возра́довася дух Мой о Бо́зе Спа́се Мое́м.

К коемуждо стиху припеваем: Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Я́ко призре́ на смире́ние рабы́ Своея́, се бо, от ны́не ублажа́т Мя вси ро́ди.

Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Я́ко сотвори́ Мне вели́чие Си́льный, и свя́то и́мя Его́, и ми́лость Его́ в ро́ды родо́в боя́щимся Его́.

Сотвори́ держа́ву мы́шцею Свое́ю, расточи́ го́рдыя мы́слию се́рдца их.

Низложи́ си́льныя со престо́л, и вознесе́ смире́нныя, а́лчущия испо́лни благ, и богатя́щияся отпусти́ тщи.

Восприя́т Изра́иля о́трока Своего́, помяну́ти ми́лости, я́коже глаго́ла ко отце́м на́шим, Авраа́му и се́мени его́ да́же до ве́ка.

Пе́снь 9.

Ирмос: Вои́стину Богоро́дицу, Тя́ испове́дуем, спасе́ннии Тобо́ю, Де́во Чи́стая, с безпло́тными ли́ки Тя́ велича́юще.

Пречи́стей Влады́чице вве́рил еси́, святи́телю, правосла́вное во́инство, и стоя́ти за ве́ру неподви́жно да́же до сме́рти благослови́л еси́, и боя́тися Еди́наго, на небесе́х Живу́щаго, научи́л еси́, сего́ ра́ди со испове́дники правосла́вныя пра́вды раду́ешися.

Окая́нныя изме́нники анафема́тствовал еси́, правосла́вным же во́ином и все́м ревни́телем правосла́внаго ца́рства ми́лость от Го́спода Бо́га и от своего́ смире́ния благослове́ние препода́л еси́, святи́телю, и́мже бы́сть побе́да и одоле́ние и всея́ Руси́ спасе́ние, тебе́ же вене́ц от Бо́га, я́ко строи́телю святы́я жи́зни.

Гла́с о́гненныя ре́вности о спасе́нии ца́рства не вя́жется, а́ще и заключа́ется во хра́мине пу́сте, я́ко во гро́бе, огласи́тъ-бо всю́ Ру́сь и воздви́жет спаси́тельную бра́нь во сла́ву святы́я Це́ркве и во утвержде́ние ца́рствующаго до́ма Рома́новых, его́ же возлюби́л еси́ и о не́м же мо́лишися Бо́гу.

И первопресто́льник апо́стольския Це́ркве, и испове́дник Правосла́вныя ве́ры, и вторы́й Златоу́ст во обличе́ние грехолюби́вых и мяте́жных, и строи́тель правосла́внаго ца́рства бы́л еси́, святи́телю, и за сие́ произволе́ние темни́цею и гла́дом му́чим бы́л еси́, и, прия́в от Бо́га неувяда́емый вене́ц, с му́ченики весели́шися.

Бо́гу на́шему тобо́ю сла́ва, тебе́ же, священному́чениче Ермоге́не, довле́ет ра́доватися во све́те лица́ Его́ и непреста́нно моли́тися, да не поги́бнет Ру́сь Правосла́вная, но да бу́дет да́же до конца́ све́т во открове́ние язы́ком правосла́вныя пра́вды.

Ни́щь и боля́й е́смь а́з, святи́телю, и во смире́нии свое́м припа́даю к цельбоно́сней ра́це твое́й, исцеле́ния тре́буя.

Его́же возлюби́л еси́, Ему́же ду́шу свою́ пре́дал еси́, и ны́не предстои́ши со дерзнове́нием я́ко му́ченик. Моли́ Бо́га о на́с, святы́й священному́чениче Ермоге́не.

Богородичен: Тя́ испове́дуем, я́ко Ма́терь Го́спода Вы́шняго, и, невозвра́тну наде́жду иму́ще на Тя́, мо́лимся Тебе́ умиле́нною душе́ю и сокруше́нным се́рдцем: все́м поле́зная да́руй, и вся́ спаси́, Богоро́дице Де́во, Ты́ бо еси́ Боже́ственный покро́в рабо́м Твои́м.

Свети́лен.

Во све́те Правосла́вия, его́ же ревни́тель бы́л еси́, святи́телю Ермоге́не, зри́м Све́т и́стины, в не́м же полнота́ дарова́ний Ду́ха, ра́дуемся о Го́споде и велича́ем Озари́вшаго тя́ Све́том присноживо́тным.

Сла́ва, и ны́не, богоро́дичен.

Ма́терь незаходи́маго Све́та, осиява́ющую Ру́сь покро́вом Ма́терняго заступле́ния, пе́сньми велича́ем, я́ко светле́йшую го́рних во́инств.

Хвали́тны псалмы́, глас 7:

Вся́кое дыха́ние да хва́лит Го́спода./ Хвали́те Го́спода с небе́с,/ хвали́те Его́ в вы́шних.// Тебе́ подоба́ет песнь Бо́гу.

Хвали́те Его́ вси а́нгели Его́,/ хвали́те Его́ вся си́лы Его́.// Тебе́ подоба́ет песнь Бо́гу.

Сти́хиры, глас 7:

Стих: Сотвори́ти в них суд напи́сан/ сла́ва сия́ бу́дет всем преподо́бным Его́.

Сотвори́те в пе́снех су́д напи́сан, сла́ва сия́ бу́дет вели́кому Ермоге́ну: то́й бо е́сть Правосла́вия ревни́тель и всея́ Руси́ храни́тель, я́ко оре́л, птенцы́ своя́ покрыва́ющий.

Стих: Хвали́те Его́ на си́лах Его́,/ хвали́те Его́ по мно́жеству вели́чествия Его́.

Хвали́те Бо́га во святе́м Его́: то́й бо возвели́чил е́сть Его́ и во все́х де́лех Его́ оправда́л е́сть Его́ утвержде́нием си́лы Его́.

Стих: Хвали́те Его́ в тимпа́не и ли́це,/ хвали́те Его́ во стру́нах и орга́не.

Хвали́те свята́го в си́ле его́: вся́ бо мо́жет о укрепля́ющем Иису́се. Хвали́те его́ по мно́жеству чуде́с его́: вся́ бо неду́жныя исцеля́ет о и́мени Госпо́днем.

Стих: Хвали́те Его́ в кимва́лех доброгла́сных, хвали́те Его́ в кимва́лех восклица́ния. / Вся́кое дыха́ние да хва́лит Го́спода.

Хвали́те свята́го во псалме́х и пе́снех, хвали́те его́ в пе́ниих духо́вных, велича́йте сла́ву оте́ц на́ших, воспева́йте утвержде́ние царе́й на́ших, ра́дуйтесь о не́м и весели́теся.

Глас 7: Сла́ва Отцу́ и Сы́ну и Свято́му Ду́ху

Прииди́те ублажи́м па́стыря до́браго земли́ на́шея, за ве́ру Руси́ вся́ претерпе́вшаго, и за правосла́вие ца́рства ду́шу свою́ положи́вшаго, и ны́не ми́лостию Бо́жиею чудотво́рца, явле́ннаго во утвержде́ние ве́ры немощству́ющих, и во исцеле́ние все́х неду́гующих, и во упокое́ние озло́бленных грехи́ мно́гими, да вси́ возра́дуемся и да пое́м ему́: ра́дуйся, любы́, на́с согрева́ющая; ра́дуйся, си́ло, на́с исцеля́ющая; ра́дуйся, ра́зуме, все́х просвеща́ющий; ра́дуйся, стра́же, правосла́вие ца́рства охраня́ющий; ра́дуйся, святи́телю Ермоге́не.

И ны́не и при́сно и во ве́ки веко́в. Ами́нь.

Прииди́те, восхва́лим Прехва́льную, Сла́внейшую все́х земноро́дных и Честне́йшую небе́сных во́инств, Ма́терь Го́спода Вы́шняго, Засту́пницу Усе́рдную.

Славосло́вие вели́кое:

Сла́ва в вы́шних Бо́гу, и на земли́ мир, в челове́цех благоволе́ние. Хва́лим Тя, благослови́м Тя, кла́няем Ти ся, славосло́вим Тя, благодари́м Тя, вели́кия ра́ди сла́вы Твоея́. Го́споди Царю́ Небе́сный, Бо́же О́тче Вседержи́телю, Го́споди, Сы́не Единоро́дный, Иису́се Христе́, и Святы́й Ду́ше. Го́споди Бо́же, А́гнче Бо́жий, Сы́не Оте́чь, взе́мляй грех ми́ра, поми́луй нас; взе́мляй грехи́ ми́ра, приими́ моли́тву на́шу; седя́й одесну́ю Отца́, поми́луй нас. Я́ко Ты еси́ еди́н Свят, Ты еси́ еди́н Госпо́дь, Иису́с Христо́с, в сла́ву Бо́га Отца́. Ами́нь.

На всяк день благословлю́ Тя, и восхвалю́ И́мя Твое́ во ве́ки, и в век ве́ка.

Сподо́би, Го́споди, в день сей без греха́ сохрани́тися нам. Благослове́н еси́, Го́споди, Бо́же оте́ц на́ших, и хва́льно и просла́влено И́мя Твое́ во ве́ки. Ами́нь.

Бу́ди, Го́споди, ми́лость Твоя́ на нас, я́коже упова́хом на Тя.

Благослове́н еси́, Го́споди, научи́ мя оправда́нием Твои́м. (Три́жды)

Го́споди, прибе́жище был еси́ нам в род и род. Аз рех: Го́споди, поми́луй мя, исцели́ ду́шу мою́, я́ко согреши́х Тебе́. Го́споди, к Тебе́ прибего́х, научи́ мя твори́ти во́лю Твою́, я́ко Ты еси́ Бог мой: я́ко у Тебе́ исто́чник живота́, во све́те Твое́м у́зрим свет. Проба́ви ми́лость Твою́ ве́дущим Тя.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Три́жды)

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Святы́й Безсме́ртный, поми́луй нас.

Святы́й Бо́же, Святы́й Кре́пкий, Святы́й Безсме́ртный, поми́луй нас.

Тропа́рь, глас 4:

Утверди́, Бо́же, святу́ю правосла́вную ве́ру, правосла́вных христиа́н во век ве́ка.

Честне́йшую Херуви́м и Сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу, Тя велича́ем.

Сла́ва, и ны́не. Го́споди, поми́луй. (Три́жды) Благослови́.

Господи Иисусе Христе, Сыне Божий, моли́твами Пречи́стыя Своея́ Ма́тере, святителя Ермогена, патриарха Московского и всея России, преподобных и богоносных отец наших и всех святы́х, поми́луй и спаси нас я́ко Благ и Челове́колюбец.

Многоле́тие:

Вели́каго Господи́на и Отца́ на́шего Кири́лла,/ Святе́йшаго Патри́арха Моско́вского и всея́ Руси́,/ и Господи́на на́шего (Высоко-) Преосвяще́ннейшаго (имярек),/ (архи-)епи́скопа (митрополита (титул)),/ богохрани́мую страну́ на́шу Росси́йскую,/ и вся правосла́вныя христи́аны,// Го́споди, сохрани́ их на мно́гая ле́та.