Шрифт

▲

Богослужебные тексты для домашнего употребления

Дни памяти святых

Последование Всеношного бдения в день памяти великомученика и Победоносца Георгия. Для домашнего (келейного) совершения

Оглавление

ВСЕНО́ЩНОЕ БДЕ́НИЕ

ВЕЛИ́КАЯ ВЕЧЕ́РНЯ

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас. Ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Трижды.)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, (трижды). Сла́ва, и ны́не:

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Таже, Го́споди, поми́луй, (12), Сла́ва, и ны́не:

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 103:

Поется часть псалма:

Благослови́, душе́ моя́, Го́спода. / Благослове́н еси́, Го́споди. / Го́споди, Бо́же мой, возвели́чился еси́ зело́. / Благослове́н еси́, Го́споди. / Во испове́дание и в велеле́поту обле́клся еси́. / Благослове́н еси́, Го́споди. / Посреде́ гор про́йдут во́ды. / Ди́вна дела́ Твоя́, Го́споди. / Вся прему́дростию сотвори́л еси́. / Сла́ва Ти, Го́споди, сотвори́вшему вся.

Или читается псалом полностью:

Благослови́, душе́ моя́, Го́спода. Го́споди, Бо́же мой, возвели́чился еси́ зело́. Во испове́дание и в велеле́поту обле́клся еси́. Одея́йся све́том, я́ко ри́зою, простира́яй не́бо, я́ко ко́жу. Покрыва́яй вода́ми превы́спренняя Своя́, полага́яй о́блаки на восхожде́ние Свое́, ходя́й на крилу́ ве́треню. Творя́й А́нгелы Своя́ ду́хи и слуги́ Своя́ пла́мень о́гненный. Основа́яй зе́млю на тве́рди ея́, не преклони́тся в век ве́ка. Бе́здна, я́ко ри́за, одея́ние ея́, на гора́х ста́нут во́ды, от запреще́ния Твоего́ побе́гнут, от гла́са гро́ма Твоего́ убоя́тся. Восхо́дят го́ры и нисхо́дят поля́ в ме́сто, е́же основа́л еси́ им. Преде́л положи́л еси́, eго́же не пре́йдут, ниже́ обратя́тся покры́ти зе́млю. Посыла́яй исто́чники в де́брех, посреде́ гор про́йдут во́ды. Напая́ют вся зве́ри се́льныя, ждут она́гри в жа́жду свою́. На ты́х пти́цы небе́сныя привита́ют, от среды́ ка́мения дадя́т глас. Напая́яй го́ры от превы́спренних Свои́х, от плода́ дел Твои́х насы́тится земля́. Прозяба́яй траву́ ското́м, и злак на слу́жбу челове́ком, извести́ хлеб от земли́. И вино́ весели́т се́рдце челове́ка, ума́стити лице́ еле́ем, и хлеб се́рдце челове́ка укрепи́т. Насы́тятся древа́ польска́я, ке́дри Лива́нстии, и́хже еси́ насади́л. Та́мо пти́цы вогнездя́тся, ероди́ево жили́ще предводи́тельствует и́ми. Го́ры высо́кия еле́нем, ка́мень прибе́жище за́яцем. Сотвори́л есть луну́ во времена́, со́лнце позна́ за́пад свой. Положи́л еси́ тму, и бысть нощь, в не́йже про́йдут вси зве́рие дубра́внии. Ски́мни рыка́ющии, восхи́тити и взыска́ти от Бо́га пи́щу себе́. Возсия́ со́лнце и собра́шася и в ло́жах свои́х ля́гут. Изы́дет челове́к на де́ло свое́ и на де́лание свое́ до ве́чера. Я́ко возвели́чишася дела́ Твоя́, Го́споди, вся прему́дростию сотвори́л еси́, испо́лнися земля́ тва́ри Твоея́. Сие́ мо́ре вели́кое и простра́нное, та́мо га́ди, и́мже несть числа́, живо́тная ма́лая с вели́кими, та́мо корабли́ препла́вают, змий сей, eго́же созда́л еси руга́тися eму́. Вся к Тебе́ ча́ют, да́ти пи́щу им во бла́го вре́мя. Да́вшу Тебе́ им соберу́т, отве́рзшу Тебе́ ру́ку вся́ческая испо́лнятся бла́гости, отвра́щшу же Тебе́ лице́, возмяту́тся, отъи́меши дух их, и исче́знут, и в персть свою́ возвратя́тся. По́слеши Ду́ха Твоего́, и сози́ждутся, и обнови́ши лице́ земли́. Бу́ди сла́ва Госпо́дня во ве́ки, возвесели́тся Госпо́дь о де́лех Свои́х, призира́яй на зе́млю, и творя́й ю́ трясти́ся, прикаса́яйся гора́м, и дымя́тся. Воспою́ Го́сподеви в животе́ мое́м, пою́ Бо́гу моему́, до́ндеже есмь, да услади́тся Ему́ бесе́да моя́, аз же возвеселю́ся о Го́споде. Да исче́знут гре́шницы от земли́, и беззако́нницы, я́коже не бы́ти им. Благослови́, душе́ моя́, Го́спода.

Со́лнце позна́ за́пад свой. Положи́л еси́ тму, и бысть нощь. Я́ко возвели́чишася дела́ Твоя́, Го́споди, вся прему́дростию сотвори́л еси́.

Сла́ва, и ны́не: Аллилу́иа, аллилу́иа, аллилу́иа, сла́ва Тебе́ Бо́же. Трижды.

Блаже́н муж:

Блаже́н муж, и́же не и́де на сове́т нечести́вых.

Аллилу́иа, аллилу́иа, аллилу́иа.

Я́ко весть Госпо́дь путь пра́ведных, и путь нечести́вых поги́бнет.

Аллилу́иа, аллилу́иа, аллилу́иа.

Рабо́тайте Го́сподеви со стра́хом и ра́дуйтеся Ему́ с тре́петом.

Аллилу́иа, аллилу́иа, аллилу́иа.

Блаже́ни вси наде́ющиися Нань.

Аллилу́иа, аллилу́иа, аллилу́иа.

Воскресни́, Го́споди, спаси́ мя, Бо́же мой.

Аллилу́иа, аллилу́иа, аллилу́иа.

Госпо́дне есть спасе́ние, и на лю́дех Твои́х благослове́ние Твое́.

Аллилу́иа, аллилу́иа, аллилу́иа.

Сла́ва Отцу́ и Сы́ну и Свято́му Духу.

Аллилу́иа, аллилу́иа, аллилу́иа.

И ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Го́споди, воззва́х, глас 4:

Го́споди, воззва́х к Тебе́, услы́ши мя./ Услы́ши мя, Го́споди./ Го́споди, воззва́х к Тебе́, услы́ши мя:/ вонми́ гла́су моле́ния моего́,/ внегда́ воззва́ти ми к Тебе́.// Услы́ши мя, Го́споди.

Да испра́вится моли́тва моя́,/ я́ко кади́ло пред Тобо́ю,/ воздея́ние руку́ мое́ю/ – же́ртва вече́рняя.// Услы́ши мя, Го́споди.

Стихи́ры пра́здника, глас 4:

Стих: А́ще беззако́ния на́зриши, Го́споди, Го́споди, кто постои́т? Я́ко у Тебе́ очище́ние есть.

Яко до́бля в му́ченицех, / страстоте́рпче Гео́ргие, / соше́дшеся дне́сь, восхва́лим тя́, / я́ко тече́ние соверши́в, / ве́ру соблю́л еси́ / и прия́т от Бо́га побе́ды твоея́ вене́ц. / Его́же моли́ от тли́ и бе́д изба́витися / ве́рою соверша́ющим / всечестну́ю па́мять твою́.

Стих: И́мене ра́ди Твоего́ потерпе́х Тя, Го́споди, потерпе́ душа́ моя́ в сло́во Твое́, упова́ душа́ моя́ на Го́спода.

Стих: От стра́жи у́тренния до но́щи, от стра́жи у́тренния да упова́ет Изра́иль на Го́спода.

Тве́рдым мудрова́нием упова́в, / самохо́тне дерзну́л еси́, / я́коже ле́в, сла́вне, к страда́нию, / презира́я у́бо те́ло, / я́ко растле́тися хотя́щее, / о нетле́нней же души́ му́дре прилежа́л еси́ / и му́к многообра́зными ви́ды разже́глся еси́, / я́ко зла́то очище́но / седмери́цею, Гео́ргие.

Стих: Я́ко у Го́спода ми́лость, и мно́гое у Него́ избавле́ние, и Той изба́вит Изра́иля от всех беззако́ний eго́.

За Спа́са пострада́л еси́ / и, сме́ртию сме́рти во́льне, сла́вне, подо́бяся, / ца́рствуеши с Ни́м све́тло, / порфи́рою от кро́ве оде́ян све́тлою, / и ски́птром страда́ний твои́х укра́шен, / и венце́м побе́ды ле́потствуя / в непроходи́мыя ве́ки, / великому́чениче Гео́ргие.

Стих: Хвали́те Го́спода вси язы́цы, похвали́те Его́ вси лю́дие.

Ве́ры броня́ми, / и щито́м благода́ти, / и Креста́ копие́м вооружи́вся, / сопроти́вным непобеди́мь бы́л еси́, Гео́ргие, / и, я́ко боже́ственный храбо́рник, / де́монская ополче́ния победи́в, / со Ангелы лику́еши, / ве́рныя же заступа́еши, и освяща́еши, / и спаса́еши, призыва́емый.

Стих: Я́ко утверди́ся ми́лость Его́ на нас, и и́стина Госпо́дня пребыва́ет во век.

Яко звезду́ многосве́тлую, / я́коже со́лнце, сия́ющее / на тве́рди небе́сней, тя́ ве́мы, / и я́ко би́сер многоце́нный, / я́ко ка́мень блиста́ющий, / я́ко сы́на тя́ дне́, / я́ко до́блественнаго в му́ченицех, / я́ко побо́рника ве́рных в беда́х прославля́ем, / соверша́юще твою́ па́мять, победоно́сче Гео́ргие.

Глас 6: Сла́ва Отцу́ и Сы́ну и Свято́му Ду́ху.

Досто́йно и́мени пожи́л еси́, во́ине Гео́ргие: Кре́ст бо Христо́в на ра́мо взе́м, от диа́вольския ле́сти олядене́вшую зе́млю до́бре де́лал еси́ и, терно́вное служе́ние искорени́в и́дольское, правосла́вныя ве́ры ло́зу насади́л еси́. Те́мже то́чиши исцеле́ния во все́й вселе́нней ве́рным, и Тро́ицы де́латель пра́веден показа́лся еси́. Моли́, мо́лимся, о умире́нии ми́ра и спасе́нии ду́ш на́ших.

Глас 6: И ны́не и при́сно и во ве́ки веко́в. Ами́нь.

Кто Тебе́ не ублажи́т, Пресвята́я Де́во; / кто ли не воспое́т Твоего́ Пречи́стаго Рождества́; / безле́тно бо от Отца́ возсия́вый Сын Единоро́дный, / То́йже от Тебе́, Чи́стыя, про́йде, / неизрече́нно вопло́щься, / естество́м Бог Сый, / и естество́м быв Челове́к нас ра́ди; / не во двою́ лицу́ разделя́емый, / но во двою́ естеству́ / несли́тно познава́емый. / Того́ моли́, Чи́стая Всеблаже́нная, / поми́ловатися душа́м на́шим.

Све́те Тихи́й:

Све́те Ти́хий святы́я сла́вы Безсме́ртнаго Отца́ Небе́снаго, Свята́го, Блаже́ннаго, Иису́се Христе́! Прише́дше на за́пад со́лнца, ви́девше свет вече́рний, пое́м Отца́, Сы́на и Свята́го Ду́ха, Бо́га. Досто́ин еси́ во вся времена́ пет бы́ти гла́сы преподо́бными, Сы́не Бо́жий, живо́т дая́й; те́мже мир Тя сла́вит.

1. Проро́чества Иса́иина чте́ние.

Та́ко глаго́лет Госпо́дь: вси́ язы́цы собра́шася вку́пе, и соберу́тся кня́зи от ни́х, кто́ возвести́т сия́ в ни́х? Или́ я́же от нача́ла, кто́ слы́шана сотвори́т ва́м? Да приведу́т свиде́тели своя́ и оправдя́тся, и да услы́шат, и да реку́т и́стину. Бу́дите Ми́ свиде́тели, и Аз Свиде́тель, глаго́лет Госпо́дь Бо́г, и отрок, его́же избра́х, да позна́ете и ве́руете Ми́, и разуме́ете, я́ко Аз е́смь; пре́жде Мене́ не бы́сть и́н бо́г, и по Мне́ не бу́дет. Аз е́смь Бо́г, и не́сть ра́зве Мене́ спаса́яй. Аз возвести́х и спасо́х, уничижи́х, и не бе́ в ва́с чу́ждий. Вы́ Мне́ свиде́тели, и Аз Госпо́дь Бо́г. И еще́ от нача́ла Аз е́смь, и не́сть от ру́к Мои́х избавля́яй; сотворю́, и кто́ отврати́т то? Си́це глаго́лет Госпо́дь Бо́г, избавля́яй ва́с Святы́й Изра́илев.

2. Прему́дрости Соломо́новы чте́ние

Пра́ведных ду́ши в руце́ Бо́жией, и не прико́снется и́х му́ка. Непщева́ни бы́ша во очесе́х безу́мных умре́ти, и вмени́ся озлобле́ние исхо́д и́х, и е́же от на́с ше́ствие — сокруше́ние, они́ же су́ть в ми́ре. Ибо пред лице́м челове́ческим, а́ще и му́ку прии́мут, упова́ние и́х безсме́ртия испо́лнено. И вма́ле нака́зани бы́вше, вели́кими благоде́тельствовани бу́дут, я́ко Бо́г искуси́ я́ и обре́те и́х досто́йны Себе́. Я́ко зла́то в горни́ле, искуси́ и́х и, я́ко всепло́дие же́ртвенное, прия́т я́. И во вре́мя посеще́ния и́х, возсия́ют, и я́ко и́скры по сте́блию, потеку́т. Су́дят язы́ком и облада́ют людьми́, и воцари́тся Госпо́дь в ни́х во ве́ки. Наде́ющиися На́нь разуме́ют и́стину и ве́рнии в любви́ пребу́дут Ему́, я́ко благода́ть и ми́лость в преподо́бных Его́ и посеще́ние во избра́нных Его́.

3. Прему́дрости Соломо́новы чте́ние

Пра́ведник, а́ще пости́гнет сконча́тися, в поко́и бу́дет. Ста́рость бо честна́ не многоле́тна, ниже́ в числе́ ле́т исчита́ется. Седи́на же е́сть му́дрость челове́ком, и во́зраст ста́рости — житие́ нескве́рное. Благоуго́ден Бо́гови бы́в, возлю́блен бы́сть, и живы́й посреде́ гре́шник, преста́влен бы́сть. Восхище́н бы́сть, да не зло́ба измени́т ра́зума его́ или́ ле́сть прельсти́т ду́шу его́. Раче́ние бо зло́бы помрача́ет до́брая и паре́ние по́хоти, пременя́ет у́м незло́бив. Сконча́вся вма́ле, испо́лни ле́та до́лга, уго́дна бо бе́ Го́сподеви душа́ его́, сего́ ра́ди потща́ся от среды́ лука́вствия. Лю́дие же ви́девше и не разуме́вше, ниже́ поло́жше в помышле́нии таково́е, я́ко благода́ть и ми́лость в преподо́бных Его́ и посеще́ние во избра́нных Его́.

Сподо́би, Го́споди:

Сподо́би, Го́споди, в ве́чер сей без греха́ сохрани́тися нам. Благослове́н еси́, Го́споди, Бо́же оте́ц на́ших, и хва́льно и просла́влено и́мя Твое́ во ве́ки. Ами́нь.

Бу́ди, Го́споди, ми́лость Твоя́ на нас, я́коже упова́хом на Тя. Благослове́н еси́, Го́споди, научи́ мя оправда́нием Твои́м. Благослове́н еси́, Влады́ко, вразуми́ мя оправда́нием Твои́м. Благослове́н еси́, Святы́й, просвети́ мя оправда́нии Твои́ми.

Го́споди, ми́лость Твоя́ во век, дел руку́ Твое́ю не пре́зри. Тебе́ подоба́ет хвала́, Тебе́ подоба́ет пе́ние, Тебе́ сла́ва подоба́ет. Отцу́ и Сы́ну и Свято́му Ду́ху, ны́не и при́сно и во ве́ки веко́в. Ами́нь.

На лити́и стихи́ры, гла́с 1:

Све́тлый храбо́рник Гео́ргий в сла́внем страда́нии свое́м го́рния си́лы весели́т, и с ни́ми ра́дуяся ны́не, и на земли́ ве́рныя торжествова́ти воздви́же и спра́здновати на́м, того́ ра́ди со́бранным, я́ко Христо́в ра́б прии́де. Те́мже у́бо его́ досто́йно почти́м, непреста́нно моля́щася все́х Бо́гу дарова́ти на́м ве́лию ми́лость.

До́блественными страда́нии возде́лав лу́чшая, труды́ плодо́в твои́х Христу́ прине́сл еси́, преблаже́нне му́чениче Гео́ргие, ве́рою жела́ние утверди́в, наде́ждею стра́х отри́нув, любо́вь стяжа́л еси́ небе́сную, прехва́льне. Дерзнове́ние име́я у́бо, благоприя́тными мольба́ми проси́ душа́м на́шим ми́ра, очище́ния же грехо́в и ве́лия ми́лости.

Глас 4: Прииди́те, ве́рных собо́ри, прииди́те, пра́здник соста́вим, и́бо пресве́тлая па́мять дне́сь яви́ся страстоте́рпца Гео́ргия, на́ша просвеща́ет неви́димо сердца́, доброде́тельми блиста́ющи. Те́мже, единому́дренно воспева́юще, рце́м: ра́дуйся, во́ине вели́каго Царя́ Христа́; ра́дуйся, пресве́тлая похвало́ ве́ры; ра́дуйся, всесве́тле и пребога́те. О на́с, преблаже́нне, все́х Влады́ку Христа́ Бо́га моли́ сохране́ным бы́ти от искуше́ний лука́ваго и спасти́ ду́ши на́ша.

Сла́ва, гла́с 5:

Возсия́ весна́, прииди́те, наслади́мся, просия́ Воскресе́ние Христо́во, прииди́те, возвесели́мся, страстоте́рпца па́мять, ве́рныя просвеща́ющи, показа́ся. Те́мже, празднолю́бцы, прииди́те, та́йно ту́ торжеству́ем: се́й бо, я́ко до́бр во́ин, му́жествовав на мучи́телей, и си́х посрами́, подо́бник бы́в стра́сти Спа́са Христа́, не поми́лова сосу́да своего́ бре́ннаго, но на́га обостри́, му́ками того́ изменя́я. Тому́ возопие́м: страстоно́сче, моли́ спасти́ся душа́м на́шим.

И ны́не, богоро́дичен:

Утоли́ боле́зни / многовоздыха́ющия души́ моея́, / утоли́вшая вся́ку сле́зу от лица́ земли́: / Ты бо челове́ков боле́зни отго́ниши / и гре́шных ско́рби разруша́еши. / Тебе́ бо вси стяжа́хом наде́жду и утвержде́ние, / Пресвята́я Ма́ти Де́во.

Го́споди, поми́луй. (40 раз)

Стихи́ры на стихо́вне:

Стихиры, гла́с 4:

Восхваля́ют лю́дие псалмы́, / вку́пе и пе́сньми / твою́ сла́вную па́мять, Гео́ргие, / я́ко благоле́пна бо возсия́ и светоно́сна, / укра́шена сла́вою и благода́тию. / Те́мже игра́ют ны́не Ангельстии чи́ни, / хва́лят же му́ченицы со апо́столы / твои́х по́двиг, му́чениче, страда́ния / и воспева́ют просла́вльшаго тя́ / Спа́са, Христа́ Бо́га на́шего. / Его́же моли́ спасти́ и просвети́ти ду́ши на́ша.

Сти́х: Пра́ведник, я́ко фи́никс, процвете́т, / я́ко ке́др, и́же в Лива́не, умно́жится.

Облече́н во Христо́во всеору́жие, / обре́лся еси́, Гео́ргие, не и́щущим тебе́, / ты́ бо, за Христа́ огне́м распала́емь / и руга́яся бого́в су́етных / безбо́жному свере́пству, / тогда́: во́инствую Царю́ моему́ Христу́, — / беззако́нным взыва́л еси́, — / ни зве́рие, ни коле́са же, ни и́на му́ка / мене́ разлучи́ти возмо́гут когда́ / любве́ Христа́ моего́. / Его́же моли́ / спасти́ и просвети́ти ду́ши на́ша.

Сти́х: Насажде́ни в дому́ Госпо́дни, / во дво́рех Бо́га на́шего процвету́т.

Небре́г о сосу́дех многообра́зных, / и о разли́чных му́ках, / и о ору́жиях стра́шных, / венцено́сче Гео́ргие, / благоче́стия му́ченически тече́ние сконча́л еси́. / Те́мже пресве́тлую па́мять твою́ / цве́ты пе́сненными венча́ем / и честны́я твоя́ облобыза́ем ве́рою мо́щи. / Но, я́ко престо́лу предстоя́ Влады́ки, / Христа́ Бо́га на́шего, / моли́ти не преста́й / спасти́ и просвети́ти ду́ши на́ша.

Слава, гла́с 4:

Разу́мнаго адама́нта терпе́ние, бра́тие, духо́вно восхва́лим, Гео́ргия, сла́внаго му́ченика, его́же, за Христа́ разжига́ема, кова́ху беды́, и изостри́ша му́ки, и разли́чная муче́ния изнури́ша те́ло, естество́м тле́нно, побежда́ше бо жела́ние естество́, сме́ртию понужда́я рачи́теля прейти́ к жела́емому Христу́ Бо́гу и Спа́су ду́ш на́ших.

И ны́не, Богоро́дичен:

Иму́ще Тя, Богоро́дице, упова́ние и предста́тельство, / вра́жиих наве́т не убои́мся, / я́ко спаса́еши ду́ши на́ша.

Моли́тва свята́го Симео́на Богоприи́мца:

Ны́не отпуща́еши раба́ Твоего́, Влады́ко,/ по глаго́лу Твоему́, с ми́ром;/ я́ко ви́деста о́чи мои́ спасе́ние Твое́,/ е́же еси́ угото́вал пред лице́м всех люде́й,/ свет во открове́ние язы́ков,// и сла́ву люде́й Твои́х Изра́иля.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Го́споди, поми́луй. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Тропа́рь, глас 4:

Яко пле́нных свободи́тель и ни́щих защи́титель, немощству́ющих вра́чь, царе́й побо́рниче, победоно́сче, великому́чениче Гео́ргие, моли́ Христа́ Бо́га спасти́ся душа́м на́шим. (Дважды)

Песнь Пресвятей Богородице:

Богоро́дице Де́во, ра́дуйся, / Благода́тная Мари́е, Госпо́дь с Тобо́ю; / благослове́на Ты в жена́х / и благослове́н Плод чре́ва Твоего́, / я́ко Спа́са родила́ еси́ душ на́ших. (Единожды)

Бу́ди И́мя Госпо́дне благослове́но от ны́не и до ве́ка. (Три́жды)

Псало́м 33:

Благословлю́ Го́спода на вся́кое вре́мя,/ вы́ну хвала́ Его́ во усте́х мои́х./ О Го́споде похва́лится душа́ моя́,/ да услы́шат кро́тцыи, и возвеселя́тся./ Возвели́чите Го́спода со мно́ю,/ и вознесе́м И́мя Его́ вку́пе./ Взыска́х Го́спода, и услы́ша мя,/ и от все́х скорбе́й мои́х изба́ви мя./ Приступи́те к Нему́, и просвети́теся,/ и ли́ца ва́ша не постыдя́тся./ Сей ни́щий воззва́, и Госпо́дь услы́ша и́,/ и от все́х скорбе́й его́ спасе́ и́./ Ополчи́тся а́нгел Госпо́день о́крест боя́щихся Его́,/ и изба́вит их./ Вкуси́те и ви́дите, я́ко благ Госпо́дь:/ блаже́н муж, и́же упова́ет Нань./ Бо́йтеся Го́спода, вси́ святи́и Его́,/ я́ко несть лише́ния боя́щимся Его́./ Бога́тии обнища́ша и взалка́ша:/ взыска́ющии же Го́спода// не лиша́тся вся́каго бла́га.

У́ТРЕНЯ.

Шестопса́лмие:

Сла́ва в вы́шних Бо́гу, и на земли́ мир, в челове́цех благоволе́ние. (Три́жды)

Го́споди, устне́ мои́ отве́рзеши, и уста́ моя́ возвестя́т хвалу́ Твою́. (Два́жды)

Псалом 3:

Го́споди, что ся умно́жиша стужа́ющии ми́? Мно́зи востаю́т на мя, мно́зи глаго́лют души́ мое́й: несть спасе́ния eму́ в Бо́зе eго́. Ты же, Го́споди, Засту́пник мой еси́, сла́ва моя́ и вознося́й главу́ мою́. Гла́сом мои́м ко Го́споду воззва́х, и услы́ша мя от горы́ святы́я Своея́. Аз усну́х, и спах, воста́х, я́ко Госпо́дь засту́пит мя. Не убою́ся от тем люде́й, о́крест напа́дающих на мя. Воскресни́, Го́споди, спаси́ мя, Бо́же мой, я́ко Ты порази́л еси́ вся вражду́ющыя ми всу́е: зу́бы гре́шников сокруши́л еси́. Госпо́дне есть спасе́ние, и на лю́дех Твои́х благослове́ние Твое́.

Аз усну́х, и спах, воста́х, я́ко Госпо́дь засту́пит мя.

Псалом 37:

Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́. Я́ко стре́лы Твоя́ унзо́ша во мне, и утверди́л еси́ на мне ру́ку Твою́. Несть исцеле́ния в пло́ти мое́й от лица́ гне́ва Твоего́, несть ми́ра в косте́х мои́х от лица́ грех мои́х. Я́ко беззако́ния моя́ превзыдо́ша главу́ мою́, я́ко бре́мя тя́жкое отяготе́ша на мне. Возсмерде́ша и согни́ша ра́ны моя́ от лица́ безу́мия моего́. Пострада́х и сляко́хся до конца́, весь день се́туя хожда́х. Я́ко ля́двия моя́ напо́лнишася поруга́ний, и несть исцеле́ния в пло́ти мое́й. Озло́блен бых и смири́хся до зела́, рыка́х от воздыха́ния се́рдца моего́. Го́споди, пред Тобо́ю все жела́ние мое́ и воздыха́ние мое́ от Тебе́ не утаи́ся. Се́рдце мое́ смяте́ся, оста́ви мя си́ла моя́, и свет о́чию мое́ю, и той несть со мно́ю. Дру́зи мои́ и и́скреннии мои́ пря́мо мне прибли́жишася и ста́ша, и бли́жнии мои́ отдале́че мене́ ста́ша и нужда́хуся и́щущии ду́шу мою́, и и́щущии зла́я мне глаго́лаху су́етная и льсти́вным весь день поуча́хуся. Аз же я́ко глух не слы́шах и я́ко нем не отверза́яй уст свои́х. И бых я́ко челове́к не слы́шай и не имы́й во усте́х свои́х обличе́ния. Я́ко на Тя, Го́споди, упова́х, Ты услы́шиши, Го́споди Бо́же мой. Я́ко рех: да не когда́ пора́дуют ми ся врази́ мои́: и внегда́ подвижа́тися нога́м мои́м, на мя велере́чеваша. Я́ко аз на ра́ны гото́в, и боле́знь моя́ предо мно́ю есть вы́ну. Я́ко беззако́ние мое́ аз возвещу́ и попеку́ся о гресе́ мое́м. Врази́ же мои́ живу́т и укрепи́шася па́че мене́, и умно́жишася ненави́дящии мя без пра́вды. Воздаю́щии ми зла́я возблага́я оболга́ху мя, зане́ гоня́х благосты́ню. Не оста́ви мене́, Го́споди Бо́же мой, не отступи́ от Мене́. Вонми́ в по́мощь мою́, Го́споди спасе́ния моего́.

Не оста́ви мене́, Го́споди Бо́же мой, не отступи́ от Мене́. Вонми́ в по́мощь мою́, Го́споди спасе́ния моего́.

Псалом 62:

Бо́же, Бо́же мой, к Тебе́ у́тренюю, возжада́ Тебе́ душа́ моя́, коль мно́жицею Тебе́ плоть моя́, в земли́ пу́сте и непрохо́дне, и безво́дне. Та́ко во святе́м яви́хся Тебе́, ви́дети си́лу Твою́ и сла́ву Твою́. Я́ко лу́чши ми́лость Твоя́ па́че живо́т, устне́ мои́ похвали́те Тя. Та́ко благословлю́ Тя в животе́ мое́м, о и́мени Твое́м воздежу́ ру́це мои́. Я́ко от ту́ка и ма́сти да испо́лнится душа́ моя́, и устна́ма ра́дости восхва́лят Тя уста́ моя́. А́ще помина́х Тя на посте́ли мое́й, на у́тренних поуча́хся в Тя. Я́ко был еси́ Помо́щник мой, и в кро́ве крилу́ Твое́ю возра́дуюся. Прильпе́ душа́ моя́ по Тебе́, мене́ же прия́т десни́ца Твоя́. Ти́и же всу́е иска́ша ду́шу мою́, вни́дут в преиспо́дняя земли́, предадя́тся в ру́ки ору́жия, ча́сти ли́совом бу́дут. Царь же возвесели́тся о Бо́зе, похва́лится всяк клены́йся Им, я́ко загради́шася уста́ глаго́лющих непра́ведная.

На у́тренних поуча́хся в Тя. Я́ко был еси́ Помо́щник мой, и в кро́ве крилу́ Твое́ю возра́дуюся. Прильпе́ душа́ моя́ по Тебе́, мене́ же прия́т десни́ца Твоя́.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Го́споди поми́луй. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Псалом 87:

Го́споди Бо́же спасе́ния моего́, во дни воззва́х, и в нощи́ пред Тобо́ю. Да вни́дет пред Тя моли́тва моя́: приклони́ у́хо Твое́ к моле́нию моему́, я́ко испо́лнися зол душа́ моя́, и живо́т мой аду прибли́жися. Привмене́н бых с низходя́щими в ров, бых я́ко челове́к без по́мощи, в ме́ртвых свобо́дь, я́ко я́звеннии спя́щии во гро́бе, и́хже не помяну́л еси́ ктому́, и ти́и от руки́ Твоея́ отринове́ни бы́ша. Положи́ша мя в ро́ве преиспо́днем, в те́мных и се́ни сме́ртней. На мне утверди́ся я́рость Твоя́, и вся во́лны Твоя́ наве́л еси́ на мя. Уда́лил еси́ зна́емых мои́х от Мене́, положи́ша мя ме́рзость себе́: пре́дан бых и не исхожда́х. О́чи мои́ изнемого́сте от нищеты́, воззва́х к Тебе́, Го́споди, весь день, возде́х к Тебе́ ру́це мои́. Еда́ ме́ртвыми твори́ши чудеса́? Или́ вра́чеве воскреся́т, и испове́дятся Тебе́? Еда́ пове́сть кто во гро́бе ми́лость Твою́, и и́стину Твою́ в поги́бели? Еда́ позна́на бу́дут во тьме чудеса́ Твоя́, и пра́вда Твоя́ в земли́ забве́нней? И аз к Тебе́, Го́споди, воззва́х и у́тро моли́тва моя́ предвари́т Тя. Вску́ю, Го́споди, отре́еши ду́шу мою́, отвраща́еши лице́ Твое́ от Мене́? Нищ есмь аз, и в труде́х от ю́ности моея́; возне́с же ся, смири́хся, и изнемого́х. На мне преидо́ша гне́ви Твои́, устраше́ния Твоя́ возмути́ша мя, обыдо́ша мя я́ко вода́, весь день одержа́ша мя вку́пе. Уда́лил еси́ от Мене́ дру́га и и́скренняго, и зна́емых мои́х от страсте́й.

Го́споди Бо́же спасе́ния моего́, во дни воззва́х, и в нощи́ пред Тобо́ю. Да вни́дет пред Тя моли́тва моя́: приклони́ у́хо Твое́ к моле́нию моему́.

Псалом 102:

Благослови́, душе́ моя́, Го́спода, и вся вну́тренняя моя́ и́мя свя́тое Его́. Благослови́, душе́ моя́, Го́спода, и не забыва́й всех воздая́ний Его́, очища́ющаго вся беззако́ния твоя́, исцеля́ющаго вся неду́ги твоя́, избавля́ющаго от истле́ния живо́т твой, венча́ющаго тя ми́лостию и щедро́тами, исполня́ющаго во благи́х жела́ние твое́: обнови́тся я́ко о́рля ю́ность твоя́. Творя́й ми́лостыни Госпо́дь, и судьбу́ всем оби́димым. Сказа́ пути́ Своя́ Моисе́ови, сыново́м Изра́илевым хоте́ния Своя́: Щедр и Ми́лостив Госпо́дь, Долготерпели́в и Многоми́лостив. Не до конца́ прогне́вается, ниже́ во век вражду́ет, не по беззако́нием на́шым сотвори́л есть нам, ниже́ по грехо́м на́шым возда́л есть нам. Я́ко по высоте́ небе́сней от земли́, утверди́л есть Госпо́дь ми́лость Свою́ на боя́щихся Его́. Ели́ко отстоя́т восто́цы от за́пад, уда́лил есть от нас беззако́ния на́ша. Я́коже ще́дрит оте́ц сы́ны, уще́дри Госпо́дь боя́щихся Его́. Я́ко Той позна́ созда́ние на́ше, помяну́, я́ко персть есмы́. Челове́к, я́ко трава́ дни́е eго́, я́ко цвет се́льный, та́ко оцвете́т, я́ко дух про́йде в нем, и не бу́дет, и не позна́ет ктому́ ме́ста своего́. Ми́лость же Госпо́дня от ве́ка и до ве́ка на боя́щихся Его́, и пра́вда Его́ на сыне́х сыно́в, храня́щих заве́т Его́, и по́мнящих за́поведи Его́ твори́ти я́. Госпо́дь на Небеси́ угото́ва Престо́л Свой, и Ца́рство Его́ все́ми облада́ет. Благослови́те Го́спода вси А́нгели Его́, си́льнии кре́постию, творя́щии сло́во Его́, услы́шати глас слове́с Его́. Благослови́те Го́спода вся Си́лы Его́, слуги́ Его́, творя́щии во́лю Его́. Благослови́те Го́спода вся дела́ Его́, на вся́ком ме́сте влады́чества Его́, благослови́, душе́ моя́, Го́спода.

На вся́ком ме́сте влады́чества Его́, благослови́, душе́ моя́, Го́спода.

Псалом 142:

Го́споди, услы́ши моли́тву мою́, внуши́ моле́ние мое́ во и́стине Твое́й, услы́ши мя в пра́вде Твое́й и не вни́ди в суд с рабо́м Твои́м, я́ко не оправди́тся пред Тобо́ю всяк живы́й. Я́ко погна́ враг ду́шу мою́, смири́л есть в зе́млю живо́т мой, посади́л мя есть в те́мных, я́ко ме́ртвыя ве́ка. И уны́ во мне дух мой, во мне смяте́ся се́рдце мое́. Помяну́х дни дре́вния, поучи́хся во всех де́лех Твои́х, в творе́ниих руку́ Твое́ю поуча́хся. Возде́х к Тебе́ ру́це мои́, душа́ моя́, я́ко земля́ безво́дная Тебе́. Ско́ро услы́ши мя, Го́споди, исчезе́ дух мой, не отврати́ лица́ Твоего́ от Мене́, и уподо́блюся низходя́щым в ров. Слы́шану сотвори́ мне зау́тра ми́лость Твою́, я́ко на Тя упова́х. Скажи́ мне, Го́споди, путь во́ньже пойду́, я́ко к Тебе́ взях ду́шу мою́. Изми́ мя от враг мои́х, Го́споди, к Тебе́ прибего́х. Научи́ мя твори́ти во́лю Твою́, я́ко Ты еси́ Бог мой. Дух Твой Благи́й наста́вит мя на зе́млю пра́ву. И́мене Твоего́ ра́ди, Го́споди, живи́ши мя, пра́вдою Твое́ю изведе́ши от печа́ли ду́шу мою́. И ми́лостию Твое́ю потреби́ши враги́ моя́ и погуби́ши вся стужа́ющыя души́ мое́й, я́ко аз раб Твой есмь.

Услы́ши мя, Го́споди, в пра́вде Твое́й и не вни́ди в суд с рабо́м Твои́м.

Дух Твой Благи́й наста́вит мя на зе́млю пра́ву.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Тропа́рь глас 4:

Сла́ва Отцу́ и Сы́ну и Свято́му Ду́ху. И ны́не и при́сно и во ве́ки веко́в. Ами́нь.

Глас 4: Е́же от ве́ка утае́ное / и А́нгелом несве́домое та́инство, / Тобо́ю, Богоро́дице, су́щим на земли́ яви́ся Бог, / в несли́тном соедине́нии воплоща́ем / и, Крест во́лею нас ра́ди восприи́м, / и́мже воскреси́в первозда́ннаго, / спасе́ от сме́рти ду́ши на́ша.

Здесь читается кафизма, положенная по дню, или сразу седальны:

Го́споди, поми́луй. (Три́жды)

Седален, глас 1:

Се́ возсия́ благода́ти весна́, облиста́ Христо́во Воскресе́ние все́м, и с ни́м совозсиява́ет ны́не Гео́ргия му́ченика всепра́зднственный и светоно́сный де́нь, прииди́те вси́, свещи́ нося́ще боже́ственне, све́тло пра́зднуем.

Сла́ва Отцу́ и Сы́ну и Свято́му Ду́ху. И ны́не и при́сно и во ве́ки веко́в. Ами́нь.

Глас 1:Ма́терь Тя́ Бо́жию мо́лим вси́, Де́ву вои́стинну и по рождестве́ я́вльшуся, любо́вию прибега́ющии к Твое́й бла́гости: Тебе́ бо и́мамы, гре́шнии, Предста́тельницу, Тебе́ стяжа́хом в напа́стех спасе́ние, еди́ну Всенепоро́чную.

Седален, глас 1:

Во́инство, е́же на земли́, возненави́дев, му́чениче, на небесе́х возжела́л еси́ сла́вы, и боле́зни претерпе́л еси́, и ну́жную сме́рть. Те́мже дне́сь всесвяту́ю твою́ па́мять пра́зднуем, Христу́ принося́ще хвалу́, преблаже́нне Гео́ргие.

Сла́ва Отцу́ и Сы́ну и Свято́му Ду́ху. И ны́не и при́сно и во ве́ки веко́в. Ами́нь.

Глас 4: Возде́лав приле́жно се́мя Боже́ственных за́поведей, расточи́л еси́ ни́щим все́ бога́тство благоче́стно, вме́сто си́х стяжа́в, пресла́вне, Христо́ву сла́ву. Те́мже наде́явся, к подвиго́м и́деши и боле́знем до́лгим, му́чениче Гео́ргие, и о́бщник бы́в стра́сти Безстра́стнаго и Воскресе́ния, Ца́рствия Того́ причаща́яся, о на́с ны́не моли́ся.

Полиеле́й:

Хвали́те И́мя Госпо́дне, хвали́те, раби́ Го́спода.

Аллилу́иа, аллилу́иа, аллилу́иа.

Благослове́н Госпо́дь от Сио́на, живы́й во Иерусали́ме.

Аллилу́иа, аллилу́иа, аллилу́иа.

Испове́дайтеся Го́сподеви, я́ко Благ, я́ко в век ми́лость Его́.

Аллилу́иа, аллилу́иа, аллилу́иа.

Испове́дайтеся Бо́гу Небе́сному, я́ко в век ми́лость Его́.

Аллилу́иа, аллилу́иа, аллилу́иа.

Велича́ние:

Велича́ем тя, / великомучениче и победоносче Георгие, / и чтим честна́я страда́ния твоя́, / я́же за Христа́ // претерпе́л еси́.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа,// сла́ва Тебе́, Бо́же. (Трижды)

Седа́льны:

Глас 3:

Любо́вию горя́щею Влады́чнею разжиза́емь, мужему́дренне пре́лести сокро́вища низложи́л еси́ и, на суди́щи Христа́ испове́дав, победоно́сче всеблаже́нне Гео́ргие, му́чениче пресла́вне, Христа́ Бо́га моли́ дарова́ти на́м ве́лию ми́лость.

Глас 4: Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Сло́во Отчее, Христа́ Бо́га на́шего, от Тебе́ воплоти́вшагося, позна́хом, Богоро́дице Де́во, еди́на Чи́стая, еди́на Благослове́нная, те́м непреста́нно Тя́ воспева́юще, велича́ем.

Степе́нна, глас 4:

От ю́ности моея́/ мно́зи бо́рют мя стра́сти,/ но Сам мя заступи́// и спаси́, Спа́се мой.

Ненави́дящии Сио́на,/ посрами́теся от Го́спода,/ я́ко трава́ бо огне́м// бу́дете изсо́хше.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Святы́м Ду́хом/ вся́ка душа́ живи́тся,/ и чистото́ю возвыша́ется,// светле́ется Тро́йческим еди́нством, священнота́йне.

Го́споди, поми́луй. (Три́жды)

От Луки́ Свята́го Ева́нгелия чте́ние

Сла́ва, Тебе́, Го́споди, сла́ва Тебе́.

Рече́ Госпо́дь: ничто́же покрове́но есть, е́же не откры́ется, и та́йно, е́же не разуме́ется. Зане́, ели́ка во тме ре́сте, во све́те услы́шится, и е́же ко у́ху глаго́ласте во хра́мех, пропове́стся на кро́вех. Глаго́лю же вам друго́м Свои́м: не убо́йтеся от убива́ющих те́ло и пото́м не могу́щих ли́шше что сотвори́ти. Сказу́ю же вам, кого́ убо́йтеся, убо́йтеся иму́щаго власть по убие́нии воврещи́ в дебрь о́гненную, ей, глаго́лю вам, того́ убо́йтеся. Не пять ли птиц цени́тся пе́нязема двема́? И ни еди́на от них несть забве́на пред Бо́гом. Но и вла́си главы́ ва́шея вси изочте́ни суть. Не убо́йтеся у́бо, мно́зех птиц у́нши есте́ вы. Глаго́лю же вам: всяк, и́же а́ще испове́сть Мя пред челове́ки, и Сын Челове́ческий испове́сть его́ пред А́нгелы Бо́жиими, а отверги́йся Мене́ пред челове́ки отве́ржен бу́дет пред А́нгелы Бо́жиими. И всяк и́же рече́т сло́во на Сы́на Челове́ческаго, оста́вится ему́, а на Свята́го Ду́ха ху́лившему не оста́вится. Егда́ же приведу́т вы на собо́рища и вла́сти и влады́чества, не пецы́теся, ка́ко или́ что отвеща́ете, или́ что рече́те, Святы́й бо Дух научи́т вы в той час, я́же подоба́ет рещи́.

Сла́ва, Тебе́, Го́споди, сла́ва Тебе́.

Псало́м 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя. Я́ко беззако́ние мое́ аз зна́ю и грех мой предо мно́ю есть вы́ну. Тебе́ Еди́ному согреши́х, и лука́вое пред Тобо́ю сотвори́х, я́ко да оправди́шися во словесе́х Твои́х и победи́ши, внегда́ суди́ти Ти. Се бо в беззако́ниих зача́т есмь, и во гресе́х роди́ мя ма́ти моя́. Се бо и́стину возлюби́л еси́, безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся, омы́еши мя, и па́че сне́га убелю́ся. Слу́ху моему́ да́си ра́дость и весе́лие, возра́дуются ко́сти смире́нныя. Отврати́ лице́ Твое́ от грех мои́х, и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́, и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́, и Ду́хом Влады́чним утверди́ мя. Научу́ беззако́нныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́, возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо, всесожже́ния не благоволи́ши. Же́ртва Бо́гу дух сокруше́н, се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския, тогда́ благоволи́ши же́ртву пра́вды, возноше́ние и всесожега́емая: тогда́ возложа́т на олта́рь Твой тельцы́.

Глас 6:

Сла́ва Отцу́ и Сы́ну и Свято́му Ду́ху./ Моли́твами великомученика Георгия, / Ми́лостиве, очи́сти / мно́жества согреше́ний на́ших.

И ны́не и при́сно и во ве́ки веко́в. Ами́нь./ Моли́твами Богоро́дицы, / Ми́лостиве, очи́сти / мно́жества согреше́ний на́ших.

Поми́луй мя, Бо́же,/ по вели́цей ми́лости Твое́й,/ и по мно́жеству щедро́т Твои́х// очи́сти беззако́ние мое́.

Стихи́ра, глас 6

Дне́сь вселе́нная вся́ страстоте́рпца просвеща́ется заря́ми, и Христо́ва Це́рковь, цве́ты украша́ема, Гео́ргие, вопие́т ти́: уго́дниче Христо́в и засту́пниче те́плый, не преста́й моля́ся о рабе́х твои́х.

Го́споди, поми́луй. (12 раз)

Каноны два.

Кано́н, творе́ние ки́р Феофа́на. Гла́с 2.

Пе́снь 1.

Ирмос: Во глубине́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный гре́х потреби́ло е́сть, препросла́вленный Госпо́дь, сла́вно бо просла́вися.

Припев: Великомучениче и победоносче Георгие, моли Бога о нас!

Те́плою ве́рою и любо́вию призыва́ющия тя́, му́чениче Христо́в, венцено́сче Гео́ргие, предстоя́ всесве́тел честно́му престо́лу все́ми Владу́щаго, твои́ми моли́твами и предста́тельствы сохрани́.

Благоро́дно возде́лание Христу́ бы́л еси́, Гео́ргие, му́ченическими возде́лан дея́нии, и, я́ко бога́тство пресла́вно, в небе́сных тя́ сокро́вищах положи́ Подвигополо́жник, я́ко преизя́щне хра́брствовавшаго.

Тве́рдо и терпели́вно устреми́лся еси́, самозва́н, к подвиго́м, преблаже́нне Гео́ргие, и, низложи́в свире́пое мучи́телей ополче́ние, моли́твенник о все́х, призыва́ющих тя́, бы́л еси́.

Блаже́нную, сла́вне, жи́знь ны́не восприе́мь, во Христе́ сокрове́нную, Гео́ргие, о не́йже подвиза́лся еси́ до кро́ве, ве́рою пою́щим тя́ моли́ спасти́ся от вся́каго, страстоте́рпче, обстоя́ния.

Богородичен: Не́бо была́ еси́ слове́сное, Сло́во небе́сное в Твое́й утро́бе, Богома́ти, вме́щшая, Имже вся́ бы́ша: не́бо же, и земля́, и я́же вы́шше си́х. Те́мже со дерзнове́нием моли́ спасти́ пою́щия Тя́.

Пе́снь 1.

Ирмос: Ли́цы изра́ильтестии, невла́жными стопа́ми по́нт Чермны́й и вла́жную глубину́ прогна́вше, вса́дники триста́ты враги́ ви́дяще в не́й погруже́ны, с весе́лием поя́ху: пои́м Бо́гу на́шему, я́ко просла́вися.

Страда́ний свяще́нных сконча́л еси́ тече́ние, и, к небеси́ иды́й, нетле́нен венцено́сец показа́лся еси́, благоцвету́щ, Гео́ргие, я́влься пу́тник, и со Ангелы лику́еши: пои́м Бо́гу на́шему, я́ко просла́вися. [Дважды.]

По́том благи́х еще́ боля́, преми́рным яви́лся еси́ лико́м, иска́пая, безпло́тных чи́ны плотски́ми, Гео́ргие, удиви́л еси́ боже́ственными страда́нии. С си́ми лику́я, зове́ши: пои́м Бо́гу на́шему, я́ко просла́вися.

Богородичен: Же́зл Ааро́нов прозя́бший, и́же от Иессе́я прообража́ше изра́стший ко́рень, Тя́, Пречи́стую, цве́т ми́ру возсия́вшую, Бо́га воплоще́нна, Его́же о на́с моля́щи не преста́й, Присноде́во, прибега́ющих к Тебе́.

Пе́снь 3.

Ирмос: Процвела́ е́сть пусты́ня, я́ко кри́н, Го́споди, язы́ческая неплодя́щая це́рковь, прише́ствием Твои́м, в не́йже утверди́ся мое́ се́рдце.

Венце́м страда́ния сия́я, сла́вне, благоче́стно призыва́ющия тя́ моли́ Изба́вителя и Бо́га от вся́кия ну́жды, блаже́нне, изба́вити.

Бога́тыми просвеща́емь сия́нии, прему́дре, мра́чную отжени́ печа́ль и мглу́ страсте́й от на́с, ве́рою восхваля́ющих тя́.

Наде́ждею утвержда́емь и любо́вию, ве́рою же огра́ждься, Гео́ргие, и си́лою укре́плься Христо́вою, и́дольскую пре́лесть низве́ргл еси́.

Богородичен: Просве́щшаго концы́, Пречи́стая, родила́ еси́ с пло́тию Безпло́тнаго и пре́жде все́х Отцу́ Собезнача́льна, те́мже Тя́, Богоро́дицу, ве́рнии, чти́м.

Пе́снь 3.

Ирмос: Яко непло́ды, роди́ от язы́к Це́рковь, и мно́гое в ча́дех изнемо́же со́нмище, чу́дному Бо́гу на́шему возопии́м: Свя́т еси́, Го́споди.

Ти́хо разда́л еси́ ни́щим бога́тство и, умасти́вся еле́ем любве́, те́лом и душе́ю страда́льчески, Гео́ргие, мучи́теля вку́пе победи́л еси́. [Дважды.]

Утверди́вся благода́тию и огне́м распала́емь ре́вности, не вопроша́ющим яви́лся еси́, обре́лся еси́ не и́щущим, по Христе́, Гео́ргие, гне́ваяся на ле́сть и́дольскую.

Богородичен: Яко но́сиши на руку́, Мари́е, и от сосцу́ пита́еши пита́ющаго вся́кое дыха́ние, Его́же, Богоро́дице, чту́ще, пропове́даем. Моли́ся Ему́, Чи́стая, о все́х на́с.

Седа́лен, гла́с 8.

Благоче́стия о́бразы му́жески хра́брствуя, нече́стия пре́лесть низложи́в, му́чениче, попра́л еси́ врага́ шата́ния и, боже́ственным жела́нием при́сно разгара́емь, мучи́телей угаси́л еси́ безбо́жное свере́пство. Те́мже досто́йно возме́здие му́к прия́л еси́ вене́ц и подае́ши исцеле́ния ве́рою притека́ющим. Страстоте́рпче Гео́ргие, моли́ Христа́ Бо́га согреше́ний оставле́ние дарова́ти пра́зднующим любо́вию святу́ю па́мять твою́.

Сла́ва И ны́не:

Земно́е бога́тство на земли́ раздава́яй все́м, му́чениче му́дре, бога́тство небе́сное насле́довал еси́ труды́ твои́ми, Кресто́м бо честны́м, я́ко в броню́, обо́лкся и те́м посрами́л еси́ мучи́телей шата́ние. Те́мже моли́твами прося́щим тя́ подае́ши боже́ственная дарова́ния, исцеле́ний благодея́ния. Страстоно́сче Гео́ргие, моли́ся Христу́ Бо́гу, прегреше́ний оставле́ние дарова́ти пра́зднующим любо́вию святу́ю па́мять твою́.

Пе́снь 4.

Ирмос: Прише́л еси́ от Де́вы, не хода́тай, ни Ангел, но Са́м, Го́споди, вопло́щся, и спа́сл еси́ всего́ мя челове́ка. Те́м зову́ Ти́: сла́ва си́ле Твое́й, Го́споди.

Пое́м твоя́ по́двиги, преблаже́нне Гео́ргие, и́миже разсы́пал еси́ и́дольския слу́жбы, всю́ же упраздни́л еси́ де́монскую пре́лесть, пресла́вне.

Ути́ши напа́стей и бе́д смуще́ние и вся́кое наве́тие зло́е де́монов отжени́ от пою́щих тя́, Христо́ва во́ина, досточу́дне.

Возсия́л еси́, я́ко звезда́ светоно́сная, Гео́ргие, душе́вною до́блестию и тве́рдостию ве́ры пре́лесть мра́чную отгоня́ и спаса́я пою́щия тя́.

Богородичен: Спасе́ние су́щественное, Де́во, родила́ еси́, бога́тством бла́гости и есте́ственною благосты́нею спаса́ющее челове́ка и истле́вший о́браз назида́ющее.

Пе́снь 4.

Ирмос: Услы́шах Твое́, Христе́, вои́стинну пресла́вное, я́ко безсме́ртен сы́й Бо́г, уподо́бися сме́ртным челове́ком и пребы́сть, е́же бе́, и того́ ра́ди Твою́ сла́влю си́лу.

Ужас пред суди́ща мучи́телей изве́ствоваше неразсу́дна сказа́ния слове́с твоея́ му́дрости, Гео́ргие, Христо́с же неве́дущим Бо́г познава́шеся.

Сло́вом ве́ры Христо́вы, Гео́ргие прему́дре, мудреце́м сплете́ния разреши́л еси́ ба́сней скве́рных, страсте́й же бо́ги де́латели поруга́л еси́, Тро́ице побо́рниче.

Услы́шавше, слу́хом слове́с твои́х мучи́телие посрами́шася, ты́ бо, бого́м и́х руга́яся, сме́х пока́зовал еси́, Христа́ Бо́га пропове́дуя, пло́тию ра́спята, и упраздни́вша пре́лесть душегу́бную.

Богородичен: Тебе́, Присноде́вую и вои́стинну еди́ну Богоро́дицу, сла́вим, Юже прообразова́ше богови́дцу Моисе́ю неопа́льно, Пречи́стая, купина́, огню́ примеси́вшаяся.

Пе́снь 5

Ирмос: Просвеще́ние во тме́ лежа́щих, спасе́ние отча́янных, Христе́ Спа́се мо́й, к Тебе́ у́тренюю, Царю́ ми́ра, просвети́ мя сия́нием Твои́м, ино́го бо ра́зве Тебе́ Бо́га не зна́ю.

Му́ченическое дерзнове́ние я́ко име́я ко Влады́це, проси́ усе́рдно спасе́ния тя́ пою́щим, душе́вных неду́г изменя́я твои́ми мольба́ми, му́чениче страстоно́сче, преблаже́нне Гео́ргие.

Со Ангельскими лику́я, я́ко му́ченик, ликостоя́нии и безсме́ртныя и блаже́нныя, венцено́сче, насыща́яся сла́вы, покро́ву твоему́ прибега́ющия вся́каго треволне́ния и бу́ри исхити́.

Изба́ви на́с от вся́кия ну́жды, я́ко Ми́лостив, грехо́вное и бе́дное отгоня́ многоразли́чное смуще́ние, Гео́ргия Твоего́ уго́дника моли́твы, Христе́, прие́мля.

Богородичен: До́лг прама́тере Евы, Богома́ти, отдала́ еси́, пло́тию бо обложи́ла еси́ из Тебе́ рожде́нна Спа́са ми́ра. Те́мже Тя́ вси́ блажи́м, обра́дованная Де́во Всенепоро́чная.

Пе́снь 5

Ирмос: Просвеще́ние Твое́, Го́споди, низпосли́ на́м и от мглы́ прегреше́ний разреши́ ны, Бла́же, Тво́й ми́р да́руяй.

Страда́льчески, Гео́ргие, сплета́яся, вина́м разли́чныя пре́лести му́жески проти́вяся, ми́ра же на́г, держа́ву отъя́л еси́ лю́таго мироде́ржца. [Дважды.]

Огради́вся, Гео́ргие, ору́жием Креста́, наде́ждею ве́ры, любо́вию держа́вною притупи́л еси́ остроту́ и все́ ору́жие лю́таго борца́.

Богородичен: Мучи́телей ра́зум де́вственное посрами́ чре́во: Младе́нец бо я́зву а́спидную душегу́бную испыта́ руко́ю и, отсту́пника го́рдаго низложи́в, ве́рным под но́зе покори́.

Пе́снь 6.

Ирмос: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же, мя́ возведи́.

Па́че естества́, и сло́ва, и по́мысла до́блести твоея́ хра́брствования, непреста́нно пева́ема, преблаже́нне му́чениче Гео́ргие.

Во́инству небе́сному собесе́дник, блаже́нне, бы́в и Боже́ственное явле́ние ели́ко дости́жно зря́, тя́ ве́рою чту́щия спаса́й.

Все́ми о́бразы Бо́гу возложе́н и блиста́ния чуде́с прие́мля, дарова́ния тре́бующим раздава́еши, преблаже́нне Гео́ргие.

Богородичен: Ны́не к Тебе́ прибега́ю, Пречи́стая, спаси́ мя моли́твами Твои́ми и соблюди́: ели́ко бо хо́щеши, мо́жеши, я́ко Ма́ти Всемогу́щаго.

Пе́снь 6.

Ирмос: Возопи́, прообразу́я погребе́ние тридне́вное, проро́к Ио́на, в ки́те моля́ся: от тли́ изба́ви мя́, Иису́се, Царю́ си́л.

Возопи́л еси́ со дерзнове́нием к Зижди́телю, Гео́ргие: не преда́ждь беззако́нным раба́ Твоего́, но кре́пость ми́ пода́ждь разори́ти и́х шата́ние.

Небре́г о мучи́тельных сосу́дех, Гео́ргие, на по́двиги во́лею му́жески прите́кл еси́ и по́честными побе́дами от Христа́ Бо́га венча́лся еси́.

По искуше́нии доброде́тели твоея́, к чудеси́, Гео́ргие, прело́жше преще́ние, льсти́внии мучи́тели, Его́же пропове́дал еси́, Животода́вца Христа́, удиви́шася.

Богородичен: Дре́вле у́бо прельсти́ мя зми́й и умори́ мя прама́терию мое́ю Евою; ны́не же, Чи́стая, Тобо́ю Созда́вый мя́ из истле́ния воззва́.

Конда́к, гла́с 4.

Возде́лан от Бо́га, показа́лся еси́ благоче́стия де́латель честне́йший, доброде́телей рукоя́ти собра́в себе́: се́яв бо в слеза́х, весе́лием жне́ши, страда́льчествовав же кро́вию, Христа́ прия́л еси́ и моли́твами, свя́те, твои́ми все́м подае́ши прегреше́ний проще́ние.

Икос:

За мирски́й живо́т ду́шу свою́ положи́вшаго, Христа́ Царя́ жела́я, во́ин тщи́тся умре́ти за Него́, ре́вность же ве́лию боже́ственную в се́рдцы име́я, себе́ самаго́ приведе́. Того́ у́бо и мы́ вси́, боже́ственного Гео́ргия, я́ко те́пла предста́теля воспои́м ве́рою, я́ко сла́внаго су́ща Христо́ва раба́, подо́бящася я́ве своему́ Влады́це и вся́кому моля́щуся приходя́ща: спеши́т бо при́сно и мо́лит Спа́са все́м пода́ти согреше́ний проще́ние.

Пе́снь 7.

Ирмос: Богопроти́вное веле́ние беззако́ннующаго мучи́теля высо́к пла́мень вознесло́ е́сть: Христо́с же простре́ Богочести́вым отроко́м ро́су духо́вную, Сы́й Благослове́н и Препросла́влен.

Твоему́ подо́бяся, му́чениче, Влады́це, во́лею поте́кл еси́ к подвиго́м, сла́вне, и, побе́ду взе́м, Це́ркве Христо́вы храни́тель бы́л еси́: Сию́ при́сно сохраня́й предста́тельством твои́м.

Яко му́ченик непобеди́мь я́ко страда́лец, я́ко неодоле́нный ве́ры побо́рник, ны́не сто́лп непоколеби́мь восхваля́ющим тя́, прему́дре Гео́ргие, бу́ди, огражда́я моли́твами твои́ми.

Му́дре земледе́лав боже́ственное се́мя, и сие́ умно́жил еси́, крове́й твои́х тече́ньми напои́в, блаже́нне, и боле́зней тща́нием, и разли́чными ра́нами, и́миже свере́пство мучи́телей угаси́л еси́.

Богородичен: Де́ва пребыла́ еси́ и по рождестве́, Бо́га бо родила́ еси́, пита́ющаго вся́ческая, за неизрече́нную ми́лость и милосе́рдие мно́гое Челове́ка бы́вшаго, Чи́стая, Его́же ны́не моли́ спасти́ся все́м на́м.

Пе́снь 7.

Ирмос: Авраа́мстии иногда́ в Вавило́не о́троцы пе́щный пла́мень попра́ша, пе́сньми взыва́юще: оте́ц на́ших Бо́же, благослове́н еси́.

Одержа́щую ви́дя и́дольскую ле́сть, благоче́стия распала́емь ре́вностию, Гео́ргие, к подвиго́м тебе́ отда́л еси́, преблаже́нне, вопия́: оте́ц на́ших Бо́же, благослове́н еси́.

Пропове́дуя яви́лся еси́ гони́мую ве́ру, мглу́ же пре́лести облича́я, Гео́ргие, глаго́лал еси́: оте́ц на́ших Бо́же, благослове́н еси́.

Из ко́рене посе́кл еси́ пре́лесть и возде́лал еси́ ве́ру, благоче́стием бо́льшую, Гео́ргие, ра́довался еси́, глаго́ля: оте́ц на́ших Бо́же, благослове́н еси́.

Богородичен: Превы́шши тва́рей все́х еси́, я́ко Творца́ ро́ждши и Го́спода. Те́мже Ти́ вопию́, Богоро́дице: Благослове́нная, Госпо́дь си́л с Тобо́ю.

Пе́снь 8.

Ирмос: Пе́щь иногда́ о́гненная в Вавило́не де́йства разделя́ше, Бо́жиим веле́нием халде́и опаля́ющая, ве́рныя же ороша́ющая, пою́щия: благослови́те вся́ дела́ Госпо́дня Го́спода.

Пото́к лю́тых страсте́й же и бе́д, и мяте́жнаго обстоя́ния, и боле́зней паде́ния, и де́монов ко́зни, и злочести́вых стремле́ния укроти́ твои́ми моли́твами, венцено́сче Гео́ргие.

Ве́сь све́том, блаже́нне, Тро́ическим чи́сто облиста́емь, я́ко му́ченик непобеди́мь, я́ко благоче́стия побо́рник, я́ко победи́тель боговенча́нен, спаси́, небе́сный жи́телю, тя́ чту́щия моли́твами твои́ми.

Венце́м разу́мным разли́чно укра́шен, и Ца́рствия диади́мою, и ски́птром удобре́н, и багряни́цею обложе́н, твое́ю обагре́н кро́вию, блаже́нне, сца́рствуеши Царю́ си́л.

Богородичен: От Отца́, безле́тно Рожде́ннаго и пре́жде ве́к возсия́вша, вся́ческая сотво́ршаго, ви́димая же и неви́димая, Де́во Ма́ти, родила́ еси́. Те́мже Тя́, Богоро́дицу, вси́ язы́цы, сла́вим.

Пе́снь 8.

Ирмос: Ра́дующеся по осужде́нии мучи́тельском о́троцы, я́ко да не бого́м скве́рным послу́жат все́м, но живо́му Бо́гу, на о́гнь дерзну́ша, от Ангела же ороша́еми, пе́снь поя́ху: дела́ Госпо́дня, Го́спода по́йте и превозноси́те во вся́ ве́ки.

Ду́хом укрепля́емь, о ору́жных боле́знех небре́гл еси́, я́ко не глухи́м и́долом хвалу́ посыла́еши, но Христу́ Бо́гу, к Нему́же любе́зну стяжа́в, Гео́ргие, ве́ру, глаго́лал еси́: дела́ Госпо́дня, Го́спода по́йте и превозноси́те во вся́ ве́ки.

Яко не су́щу вре́менную непщу́я красоту́, разли́чная озлобле́ния подъя́л еси́, Гео́ргие, ра́дуяся наде́ждею боже́ственныя жи́зни, о стра́шнем же раздробле́нии небре́г, тве́рдостию души́ глаго́лал еси́: дела́ Госпо́дня, Го́спода по́йте и превозноси́те во вся́ ве́ки.

Разсека́емо ме́дными сосу́ды твое́ те́ло, о́стрыми ножи́ по еди́ному у́ду раздробля́емо ви́дя, вжиля́емь душе́ю: бу́дущей сла́ве недосто́йны ны́нешния му́ки, — глаго́лал еси́, — дела́ Госпо́дня, Го́спода по́йте и превозноси́те во вся́ ве́ки.

Богородичен: От ребра́ Ада́мова Созда́вый Тя́ от Твоего́ де́вства воплоти́ся, Иже все́х Госпо́дь, Его́же пою́ще, вопие́м: вся́ дела́, благослови́те, по́йте Го́спода и превозноси́те во вся́ ве́ки.

На 9-й песни поем песнь Пресвятыя Богородицы:

Вели́чит душа́ Моя́ Го́спода и возра́довася дух Мой о Бо́зе Спа́се Мое́м.

К коемуждо стиху припеваем: Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Я́ко призре́ на смире́ние рабы́ Своея́, се бо, от ны́не ублажа́т Мя вси ро́ди.

Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Я́ко сотвори́ Мне вели́чие Си́льный, и свя́то и́мя Его́, и ми́лость Его́ в ро́ды родо́в боя́щимся Его́.

Сотвори́ держа́ву мы́шцею Свое́ю, расточи́ го́рдыя мы́слию се́рдца их.

Низложи́ си́льныя со престо́л, и вознесе́ смире́нныя, а́лчущия испо́лни благ, и богатя́щияся отпусти́ тщи.

Восприя́т Изра́иля о́трока Своего́, помяну́ти ми́лости, я́коже глаго́ла ко отце́м на́шим, Авраа́му и се́мени его́ да́же до ве́ка.

Пе́снь 9.

Ирмос: Безнача́льна Роди́теля Сы́н, Бо́г и Госпо́дь, вопло́щся от Де́вы, на́м яви́ся, омраче́нная просвети́ти, собра́ти расточе́нная. Те́м Всепе́тую Богоро́дицу велича́ем.

Непреста́нно Го́спода моли́ о на́с, пою́щих тя́, блаже́нне, я́ко Христо́ва му́ченика, я́ко победи́вша мучи́теля, я́ко лука́вых духо́в отгони́теля, я́ко храни́теля неусы́пна, я́ко засту́пника непосты́дна.

Страда́ний воздая́ния бога́тно тебе́ дарова́ все́х Влады́ка, Ему́же предстоя́ со дерзнове́нием, преблаже́нне, му́ченическим и с весе́лием, призыва́ющия тя́, объе́мь, сохрани́.

Земля́ тя́ сокры́, и не́бо прия́т, и отве́рзеся тебе́ две́рь ра́йская я́ве, в не́мже ра́достно, страстоте́рпче, лику́я и игра́я, ве́рно пою́щия тя́ твои́ми моли́твами соблюди́.

Богородичен: Тя́ свиде́ния се́нь прообрази́, Пречи́стая, в не́йже скрижа́ли, и ста́мна, и златы́й киво́т: я́коже бо о́ная, та́ко и Ты́ Безнача́льное Сло́во во утро́бе вмести́ла еси́, Богоро́дице, воплоща́емо.

Пе́снь 9.

Ирмос: От земноро́дных ро́ждшися и Творца́ ро́ждшая, на́ша похвало́, Богоро́дице Чи́стая, Тя́, я́ко влады́чествующую тва́рьми, велича́ем.

Свяще́ннии воспева́ют, ца́рие восхваля́ют, и лю́дие твои́х страда́ний хвалу́ возвеща́ют, му́чениче Гео́ргие. Те́мже тя́ вси́ ублажа́ем. [Дважды.]

Воспе́ша вся́ небе́сныя си́лы по́двиги твоя́, ты́ бо, поже́рся, Бо́гу благоугоди́л еси́, му́чениче Гео́ргие. Те́мже тя́ вси́ ублажа́ем.

Богородичен: От земноро́дных возра́стши и Зижди́теля ро́ждши, ра́дуйся, на́ша похвало́, Богоро́дице Чи́стая, Тя́, я́ко облада́ющую тва́рьми, велича́ем.

Свети́лен.

Весна́ на́м возсия́, све́тлое Влады́чнее и Боже́ственное Воскресе́ние, к небе́сней па́сце от земли́ на́с пресыла́я, с не́юже просиява́ет всесла́внаго му́ченика Гео́ргия па́мять светоза́рная, ю́же све́тло соверши́м, да Боже́ственныя сподо́бимся благода́ти от Христа́ Спа́са.

Сла́ва И ны́не.

Яко со́лнце светоно́сное, чуде́сными заря́ми просвеща́еши всю́ тва́рь, Гео́ргие страстоте́рпче. Те́мже, твою́ соверша́юще па́мять, пое́м Воскре́сшаго из гро́ба.

Хвали́тны псалмы́, глас 2:

Вся́кое дыха́ние да хва́лит Го́спода./ Хвали́те Го́спода с небе́с,/ хвали́те Его́ в вы́шних.// Тебе́ подоба́ет песнь Бо́гу.

Хвали́те Его́ вси а́нгели Его́,/ хвали́те Его́ вся си́лы Его́.// Тебе́ подоба́ет песнь Бо́гу.

Сти́хиры, глас 2:

Стих: Сотвори́ти в них суд напи́сан/ сла́ва сия́ бу́дет всем преподо́бным Его́.

Прииди́те, всепра́зднственное, све́тлое, / сла́вное Воскресе́ние, вси́ торжествова́вшии, / па́ки пра́зднуем све́тло торжество́ Гео́ргия му́ченика / и венча́ем сего́ ве́сненными цве́ты, / су́ща непобеди́ма; / я́ко да того́ мольба́ми прии́мем / скорбе́й ку́пно и прегреше́ний избавле́ние.

Стих: Хвали́те Его́ на си́лах Его́,/ хвали́те Его́ по мно́жеству вели́чествия Его́.

Всего́ прине́сл еси́ себе́, / тебе́ Да́вшему, всеблаже́нне, жи́знь всеце́лую, / я́ко всепло́дие жи́во и одушевле́нно / и же́ртву благоприя́тну и пречи́сту. / Те́мже бы́л еси́ моли́твенник тепле́йший, / бу́ри изыма́я вся́, / ве́рою пою́щия тя́, му́чениче, / и призыва́ющия тя́, Гео́ргие.

Стих: Хвали́те Его́ в тимпа́не и ли́це,/ хвали́те Его́ во стру́нах и орга́не.

Се́мя возде́лав приле́жно, / все́янное Сло́ва в чи́стей твое́й души́, / сие́ умно́жил еси́ боле́зньми страда́ния / и, прему́дре положе́н в небе́сных жи́тницах, / нетле́нное обре́л еси́ наслажде́ние. / Его́же ны́не насыща́яся, блаже́нне, / твои́ми к Бо́гу моли́твами, / ве́рою пою́щия тя́ спаса́й.

Стих: Хвали́те Его́ в кимва́лех доброгла́сных, хвали́те Его́ в кимва́лех восклица́ния. / Вся́кое дыха́ние да хва́лит Го́спода.

Му́чениче страстоно́сче Христо́в, / су́щия в напа́стех ну́ждных спаси́, / мольба́ми твои́ми от вся́каго обстоя́ния избавля́я / и отгоня́ душегу́бную лю́тую печа́ль, / благода́ти же и ми́лости на́м проси́, / я́ко да моли́твами твои́ми спа́сшеся, / ра́дующеся, почита́ем вси́ / честны́я по́двиги твоя́, Гео́ргие.

Глас 2: Сла́ва Отцу́ и Сы́ну и Свято́му Ду́ху

Да помава́ют пра́ведная, рече́ Соломо́н, челове́ком ве́жди: поми́луется бо от Христа́ Бо́га ви́дяй пра́вая, предглаго́лаше. Удо́бь же сия́ внуши́в, о многотерпели́ве Гео́ргие, Влады́чним уче́нием после́довал еси́ и, беззако́нным отда́в себе́, претерпе́л еси́, пре́лести тре́бы оплева́л еси́, я́ко ме́рзски: те́ло бо твое́ да́в за любо́вь Созда́теля, все́ на у́ды ссещи́. И велиа́р па́че ве́сь, постыде́вся, уязвля́шеся, венцено́сца тя́ зря́ соверше́нна. Те́мже во дво́рех живы́й Го́спода твоего́ с вы́шними си́лами, моли́, страстоте́рпче Христо́в, спасти́ся душа́м на́шим.

Глас 2: И ны́не и при́сно и во ве́ки веко́в. Ами́нь.

Спаси́ от бед рабы́ Твоя́, Богоро́дице Де́во, / я́ко вси по Бо́зе к Тебе́ прибега́ем, / я́ко к неруши́мей стене́ и предста́тельству.

Славосло́вие вели́кое:

Сла́ва в вы́шних Бо́гу, и на земли́ мир, в челове́цех благоволе́ние. Хва́лим Тя, благослови́м Тя, кла́няем Ти ся, славосло́вим Тя, благодари́м Тя, вели́кия ра́ди сла́вы Твоея́. Го́споди Царю́ Небе́сный, Бо́же О́тче Вседержи́телю, Го́споди, Сы́не Единоро́дный, Иису́се Христе́, и Святы́й Ду́ше. Го́споди Бо́же, А́гнче Бо́жий, Сы́не Оте́чь, взе́мляй грех ми́ра, поми́луй нас; взе́мляй грехи́ ми́ра, приими́ моли́тву на́шу; седя́й одесну́ю Отца́, поми́луй нас. Я́ко Ты еси́ еди́н Свят, Ты еси́ еди́н Госпо́дь, Иису́с Христо́с, в сла́ву Бо́га Отца́. Ами́нь.

На всяк день благословлю́ Тя, и восхвалю́ И́мя Твое́ во ве́ки, и в век ве́ка.

Сподо́би, Го́споди, в день сей без греха́ сохрани́тися нам. Благослове́н еси́, Го́споди, Бо́же оте́ц на́ших, и хва́льно и просла́влено И́мя Твое́ во ве́ки. Ами́нь.

Бу́ди, Го́споди, ми́лость Твоя́ на нас, я́коже упова́хом на Тя.

Благослове́н еси́, Го́споди, научи́ мя оправда́нием Твои́м. (Три́жды)

Го́споди, прибе́жище был еси́ нам в род и род. Аз рех: Го́споди, поми́луй мя, исцели́ ду́шу мою́, я́ко согреши́х Тебе́. Го́споди, к Тебе́ прибего́х, научи́ мя твори́ти во́лю Твою́, я́ко Ты еси́ Бог мой: я́ко у Тебе́ исто́чник живота́, во све́те Твое́м у́зрим свет. Проба́ви ми́лость Твою́ ве́дущим Тя.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Три́жды)

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Святы́й Безсме́ртный, поми́луй нас.

Святы́й Бо́же, Святы́й Кре́пкий, Святы́й Безсме́ртный, поми́луй нас.

Тропа́рь, глас 4:

Утверди́, Бо́же, святу́ю правосла́вную ве́ру, правосла́вных христиа́н во век ве́ка.

Честне́йшую Херуви́м и Сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу, Тя велича́ем.

Сла́ва, и ны́не. Го́споди, поми́луй. (Три́жды) Благослови́.

Господи Иисусе Христе, Сыне Божий, моли́твами Пречи́стыя Своея́ Ма́тере, великомученика и Победоносца Георгия, преподобных и богоносных отец наших и всех святы́х, поми́луй и спаси нас я́ко Благ и Челове́колюбец.

Многоле́тие:

Вели́каго Господи́на и Отца́ на́шего Кири́лла,/ Святе́йшаго Патри́арха Моско́вского и всея́ Руси́,/ и Господи́на на́шего (Высоко-) Преосвяще́ннейшаго (имярек),/ (архи-)епи́скопа (митрополита (титул)),/ богохрани́мую страну́ на́шу Росси́йскую,/ и вся правосла́вныя христи́аны,// Го́споди, сохрани́ их на мно́гая ле́та.