Последование Всеношного бдения в день памяти блаженнной Матроны Московской. Для домашнего (келейного) совершения

ВСЕНО́ЩНОЕ БДЕ́НИЕ

ВЕЛИ́КАЯ ВЕЧЕ́РНЯ

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас. Ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Трижды.)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, (трижды). Сла́ва, и ны́не:

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Таже, Го́споди, поми́луй, (12), Сла́ва, и ны́не:

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 103:

Поется часть псалма:

Благослови́, душе́ моя́, Го́спода. / Благослове́н еси́, Го́споди. / Го́споди, Бо́же мой, возвели́чился еси́ зело́. / Благослове́н еси́, Го́споди. / Во испове́дание и в велеле́поту обле́клся еси́. / Благослове́н еси́, Го́споди. / Посреде́ гор про́йдут во́ды. / Ди́вна дела́ Твоя́, Го́споди. / Вся прему́дростию сотвори́л еси́. / Сла́ва Ти, Го́споди, сотвори́вшему вся.

Или читается псалом полностью:

Благослови́, душе́ моя́, Го́спода. Го́споди, Бо́же мой, возвели́чился еси́ зело́. Во испове́дание и в велеле́поту обле́клся еси́. Одея́йся све́том, я́ко ри́зою, простира́яй не́бо, я́ко ко́жу. Покрыва́яй вода́ми превы́спренняя Своя́, полага́яй о́блаки на восхожде́ние Свое́, ходя́й на крилу́ ве́треню. Творя́й А́нгелы Своя́ ду́хи и слуги́ Своя́ пла́мень о́гненный. Основа́яй зе́млю на тве́рди ея́, не преклони́тся в век ве́ка. Бе́здна, я́ко ри́за, одея́ние ея́, на гора́х ста́нут во́ды, от запреще́ния Твоего́ побе́гнут, от гла́са гро́ма Твоего́ убоя́тся. Восхо́дят го́ры и нисхо́дят поля́ в ме́сто, е́же основа́л еси́ им. Преде́л положи́л еси́, eго́же не пре́йдут, ниже́ обратя́тся покры́ти зе́млю. Посыла́яй исто́чники в де́брех, посреде́ гор про́йдут во́ды. Напая́ют вся зве́ри се́льныя, ждут она́гри в жа́жду свою́. На ты́х пти́цы небе́сныя привита́ют, от среды́ ка́мения дадя́т глас. Напая́яй го́ры от превы́спренних Свои́х, от плода́ дел Твои́х насы́тится земля́. Прозяба́яй траву́ ското́м, и злак на слу́жбу челове́ком, извести́ хлеб от земли́. И вино́ весели́т се́рдце челове́ка, ума́стити лице́ еле́ем, и хлеб се́рдце челове́ка укрепи́т. Насы́тятся древа́ польска́я, ке́дри Лива́нстии, и́хже еси́ насади́л. Та́мо пти́цы вогнездя́тся, ероди́ево жили́ще предводи́тельствует и́ми. Го́ры высо́кия еле́нем, ка́мень прибе́жище за́яцем. Сотвори́л есть луну́ во времена́, со́лнце позна́ за́пад свой. Положи́л еси́ тму, и бысть нощь, в не́йже про́йдут вси зве́рие дубра́внии. Ски́мни рыка́ющии, восхи́тити и взыска́ти от Бо́га пи́щу себе́. Возсия́ со́лнце и собра́шася и в ло́жах свои́х ля́гут. Изы́дет челове́к на де́ло свое́ и на де́лание свое́ до ве́чера. Я́ко возвели́чишася дела́ Твоя́, Го́споди, вся прему́дростию сотвори́л еси́, испо́лнися земля́ тва́ри Твоея́. Сие́ мо́ре вели́кое и простра́нное, та́мо га́ди, и́мже несть числа́, живо́тная ма́лая с вели́кими, та́мо корабли́ препла́вают, змий сей, eго́же созда́л еси руга́тися eму́. Вся к Тебе́ ча́ют, да́ти пи́щу им во бла́го вре́мя. Да́вшу Тебе́ им соберу́т, отве́рзшу Тебе́ ру́ку вся́ческая испо́лнятся бла́гости, отвра́щшу же Тебе́ лице́, возмяту́тся, отъи́меши дух их, и исче́знут, и в персть свою́ возвратя́тся. По́слеши Ду́ха Твоего́, и сози́ждутся, и обнови́ши лице́ земли́. Бу́ди сла́ва Госпо́дня во ве́ки, возвесели́тся Госпо́дь о де́лех Свои́х, призира́яй на зе́млю, и творя́й ю́ трясти́ся, прикаса́яйся гора́м, и дымя́тся. Воспою́ Го́сподеви в животе́ мое́м, пою́ Бо́гу моему́, до́ндеже есмь, да услади́тся Ему́ бесе́да моя́, аз же возвеселю́ся о Го́споде. Да исче́знут гре́шницы от земли́, и беззако́нницы, я́коже не бы́ти им. Благослови́, душе́ моя́, Го́спода.

Со́лнце позна́ за́пад свой. Положи́л еси́ тму, и бысть нощь. Я́ко возвели́чишася дела́ Твоя́, Го́споди, вся прему́дростию сотвори́л еси́.

Сла́ва, и ны́не: Аллилу́иа, аллилу́иа, аллилу́иа, сла́ва Тебе́ Бо́же. Трижды.

Блаже́н муж:

Блаже́н муж, и́же не и́де на сове́т нечести́вых.

Аллилу́иа, аллилу́иа, аллилу́иа.

Я́ко весть Госпо́дь путь пра́ведных, и путь нечести́вых поги́бнет.

Аллилу́иа, аллилу́иа, аллилу́иа.

Рабо́тайте Го́сподеви со стра́хом и ра́дуйтеся Ему́ с тре́петом.

Аллилу́иа, аллилу́иа, аллилу́иа.

Блаже́ни вси наде́ющиися Нань.

Аллилу́иа, аллилу́иа, аллилу́иа.

Воскресни́, Го́споди, спаси́ мя, Бо́же мой.

Аллилу́иа, аллилу́иа, аллилу́иа.

Госпо́дне есть спасе́ние, и на лю́дех Твои́х благослове́ние Твое́.

Аллилу́иа, аллилу́иа, аллилу́иа.

Сла́ва Отцу́ и Сы́ну и Свято́му Духу.

Аллилу́иа, аллилу́иа, аллилу́иа.

И ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Го́споди, воззва́х, глас 6:

Го́споди, воззва́х к Тебе́, услы́ши мя./ Услы́ши мя, Го́споди./ Го́споди, воззва́х к Тебе́, услы́ши мя:/ вонми́ гла́су моле́ния моего́,/ внегда́ воззва́ти ми к Тебе́.// Услы́ши мя, Го́споди.

Да испра́вится моли́тва моя́,/ я́ко кади́ло пред Тобо́ю,/ воздея́ние руку́ мое́ю/ – же́ртва вече́рняя.// Услы́ши мя, Го́споди.

Стихи́ры пра́здника, глас 6:

Стих: А́ще беззако́ния на́зриши, Го́споди, Го́споди, кто постои́т? Я́ко у Тебе́ очище́ние есть.

Богоблаже́нная ма́ти Матро́но, / ты, дневна́го све́та не позна́вши, / све́том Невече́рним озари́лася еси́, / и со Ангельскими ли́ки водворя́ющися, / прославля́еши Святу́ю Тро́ицу, / Юже моли́ непреста́нно, // просвети́ти ны, душе́вныма очи́ма ослепле́нныя.

Стих: И́мене ра́ди Твоего́ потерпе́х Тя, Го́споди, потерпе́ душа́ моя́ в сло́во Твое́, упова́ душа́ моя́ на Го́спода.

Боголюби́вая ста́рице Матро́но, / ты, от Го́спода дар прозре́ния прие́мши, / сокрове́нная серде́ц челове́ческих ве́дала еси́, / и, бу́дущая, я́ко настоя́щая прорица́ющи, / заблу́ждшия ко Христу́ привела́ еси́, / Его́ же моли́ непреста́нно, // спасти́ и просвети́ти ду́ши на́ша.

Стих: От стра́жи у́тренния до но́щи, от стра́жи у́тренния да упова́ет Изра́иль на Го́спода.

Вся, я́же в ми́ре сем отри́нувши, / и изгна́на бы́вши пра́вды ра́ди, / стра́нница на земли́ яви́лася еси́ / не иму́щи, где главу́ подклони́ти, / Христу́ Спаси́телю на́шему подо́бящися, / блаже́нная ма́ти Матро́но, / Ца́рствия Небе́снаго дости́гла еси́, / иде́же несть боле́знь, печа́ль, ни воздыха́ние, / но со а́нгельскими ли́ки водворе́ние // и жизнь безконе́чная.

Стих: Я́ко у Го́спода ми́лость, и мно́гое у Него́ избавле́ние, и Той изба́вит Изра́иля от всех беззако́ний eго́.

Глас 2: Егда́ годи́на лю́тая земли́ на́шея приспе́ / и жизнь ве́рных вла́сти безбо́жных предаде́ся, / ты, блаже́нная, / по ве́сем и градо́м скита́ющися / пра́вую ве́ру / небоя́зненно и дерзнове́нно / в лю́дех утвержда́ла еси́ / во е́же коему́ждо, Бо́га взыску́ющему, / ненаве́тну от сил вра́жиих бы́ти // и спасе́ние улучи́ти.

Стих: Хвали́те Го́спода вси язы́цы, похвали́те Его́ вси лю́дие.

Внегда́ умре́ти ми, / к ме́сту моего́ упокое́ния притецы́те / и о потре́бнем вам рцы́те, / аз же, я́ко жива́ су́щи, / потщу́ся Го́спода умоля́ти / вся поле́зная вам дарова́ти. / Та́ко с любо́вию / к тебе́ притека́ющим рекла́ еси́, // ста́рице Матро́но блаже́нная.

Стих: Я́ко утверди́ся ми́лость Его́ на нас, и и́стина Госпо́дня пребыва́ет во век.

Егда́ ти приспе́ вре́мя юдо́ль плаче́вную оста́вити / и от земны́х в Небе́сная всели́тися, / те́лу же твоему́ погребе́ну бы́ти, / тогда́ рече́нная тобо́ю сбы́стся. / Вси бо ро́ди правосла́вных / к ме́сту погребе́ния твоего́ притека́ху, / и, потре́бная себе́ прося́ще, / непосты́дно сие́ улуча́ху, // Матро́но, богоблаже́нная ма́ти.

Глас 6: Сла́ва Отцу́ и Сы́ну и Свято́му Ду́ху.

Днесь торжеству́ет оби́тель Покро́ва Пресвяты́я Де́вы Богоро́дицы, / днесь ра́дуется сла́внейший град Москва́ / и вси лю́дие Росси́йстии ликовству́ют, / я́ко дарова́ся нам многоце́нное сокро́вище, / честны́я и многоцеле́бныя мо́щи твоя́, / ста́рице Матро́но, / подаю́т бо всем приходя́щим благода́тную по́мощь: / боле́зней исцеле́ние и зол избавле́ние, / грехо́в проще́ние и душе́вное исправле́ние. / Те́мже благода́рственно возвели́чим Го́спода, / прославля́ющаго святы́я Своя́ // и да́рующаго тобо́ю нам ве́лию ми́лость.

Глас 6: И ны́не и при́сно и во ве́ки веко́в. Ами́нь.

Кто Тебе́ не ублажи́т, Пресвята́я Де́во; / кто ли не воспое́т Твоего́ Пречи́стаго Рождества́; / безле́тно бо от Отца́ возсия́вый Сын Единоро́дный, / То́йже от Тебе́, Чи́стыя, про́йде, / неизрече́нно вопло́щься, / естество́м Бог Сый, / и естество́м быв Челове́к нас ра́ди; / не во двою́ лицу́ разделя́емый, / но во двою́ естеству́ / несли́тно познава́емый. / Того́ моли́, Чи́стая Всеблаже́нная, / поми́ловатися душа́м на́шим.

Све́те Тихи́й:

Све́те Ти́хий святы́я сла́вы Безсме́ртнаго Отца́ Небе́снаго, Свята́го, Блаже́ннаго, Иису́се Христе́! Прише́дше на за́пад со́лнца, ви́девше свет вече́рний, пое́м Отца́, Сы́на и Свята́го Ду́ха, Бо́га. Досто́ин еси́ во вся времена́ пет бы́ти гла́сы преподо́бными, Сы́не Бо́жий, живо́т дая́й; те́мже мир Тя сла́вит.

1. Бытия́ чте́ние.

Прибли́жився Авраа́м, рече́: погуби́ши ли пра́веднаго с нечести́вым и бу́дет пра́ведник я́ко нечести́вый? А́ще бу́дут пятьдеся́т пра́ведницы во гра́де, погуби́ши ли я́? Не пощади́ши ли всего́ ме́ста пяти́десяти ра́ди пра́ведных, а́ще бу́дут в нем? Ника́коже Ты сотвори́ши по глаго́лу сему́, е́же уби́ти пра́ведника с нечести́вым, и бу́дет пра́ведник я́ко нечести́вый: ника́коже. Судя́й всей земли́, не сотвори́ши ли суда́? Рече́ же Госпо́дь: а́ще бу́дут в Содо́мех пятьдеся́т пра́ведницы во гра́де, оста́влю весь град и все ме́сто их ра́ди. И отвеща́в Авраа́м, рече́: ны́не нача́х глаго́лати ко Го́споду моему́, аз же есмь земля́ и пе́пел: а́ще же ума́лятся пятьдеся́т пра́ведницы в четы́редесять пять, погуби́ши ли четы́редесяти пяти́х ра́ди весь град? И рече́: не погублю́, а́ще обря́щу та́мо четы́редесять пять. И приложи́ еще́ глаго́лати к Нему́, и рече́: а́ще же обря́щутся та́мо четы́редесять? И рече́: не погублю́ ра́ди четы́редесяти. И рече́: что, Го́споди, а́ще возглаго́лю? А́ще же обря́щется та́мо три́десять? И рече́: не погублю́ три́десятих ра́ди. И рече́: поне́же и́мам глаго́лати ко Го́споду: а́ще же обря́щутся та́мо два́десять? И рече́: не погублю́, а́ще обря́щутся та́мо два́десять. И рече́: что, Го́споди, а́ще возглаго́лю еще́ еди́ною? А́ще же обря́щутся та́мо де́сять? И рече́: не погублю́ десяти́х ра́ди. Оты́де же Госпо́дь, я́ко преста́ глаго́ля ко Авраа́му, и Авраа́м возврати́ся на ме́сто свое́.

2. Проро́чества Иои́лева чте́ние

Рече́ Госпо́дь: уве́дите, я́ко посреде́ Изра́иля Аз есмь, и Аз Госпо́дь Бог ваш, и несть ино́го ра́зве Мене́; и не посрамя́тся ктому́ лю́дие Мои́ во век. И бу́дет по сих, и излию́ от Ду́ха Моего́ на вся́ку плоть, и прореку́т сы́нове ва́ши и дще́ри ва́ша, и ста́рцы ва́ши со́ния у́зрят, и ю́ноты ва́ши виде́ния уви́дят, и́бо на рабы́ Моя́ и на рабы́ни Моя́ во дни о́ны излию́ от Ду́ха Моего́ и дам чудеса́ на Небеси́ и на земли́, кровь и огнь, и куре́ние ды́ма. Со́лнце обрати́тся во тьму, и луна́ в кровь, пре́жде не́же приити́ дню Госпо́дню вели́кому и просвеще́нному. И бу́дет, всяк, и́же призове́т И́мя Госпо́дне, спасе́тся, я́ко в горе́ Сио́не и во Иерусали́ме бу́дет спаса́емый, я́коже рече́ Госпо́дь, и благовеству́емии, и́хже Госпо́дь призва́.

3. Прему́дрости Соломо́новы чте́ние

Пра́ведных ду́ши в руце́ Бо́жией, и не прико́снется их му́ка. Непщева́ни бы́ша во очесе́х безу́мных умре́ти, и вмени́ся озлобле́ние исхо́д их, и е́же от нас ше́ствие сокруше́ние, они же суть в ми́ре. И́бо пред лице́м челове́ческим а́ще и му́ку прии́мут, упова́ние их безсме́ртия испо́лнено. И вма́ле нака́зани бы́вше, вели́кими благоде́тельствовани бу́дут, я́ко Бог искуси́ я́ и обре́те их досто́йны Себе́. Я́ко зла́то в горни́ле, искуси́ их и, я́ко всепло́дие же́ртвенное, прия́т я́. И во вре́мя посеще́ния их возсия́ют и, я́ко и́скры по сте́блию, потеку́т. Су́дят язы́ком, и облада́ют людьми́, и воцари́тся Госпо́дь в них во ве́ки. Наде́ющиися Нань разуме́ют и́стину, и ве́рнии в любви́ пребу́дут Ему́. Я́ко благода́ть и ми́лость в преподо́бных Его́, и посеще́ние во избра́нных Его́.

Сподо́би, Го́споди:

Сподо́би, Го́споди, в ве́чер сей без греха́ сохрани́тися нам. Благослове́н еси́, Го́споди, Бо́же оте́ц на́ших, и хва́льно и просла́влено и́мя Твое́ во ве́ки. Ами́нь.

Бу́ди, Го́споди, ми́лость Твоя́ на нас, я́коже упова́хом на Тя. Благослове́н еси́, Го́споди, научи́ мя оправда́нием Твои́м. Благослове́н еси́, Влады́ко, вразуми́ мя оправда́нием Твои́м. Благослове́н еси́, Святы́й, просвети́ мя оправда́нии Твои́ми.

Го́споди, ми́лость Твоя́ во век, дел руку́ Твое́ю не пре́зри. Тебе́ подоба́ет хвала́, Тебе́ подоба́ет пе́ние, Тебе́ сла́ва подоба́ет. Отцу́ и Сы́ну и Свято́му Ду́ху, ны́не и при́сно и во ве́ки веко́в. Ами́нь.

На лити́и стихи́ры, гла́с 7:

Вре́мени лю́тому во Оте́честве на́шем преспе́вшу, / яви́шася мно́зи му́ченицы и испове́дницы Христо́вы, / Матро́на же ста́рица блаже́нная, / я́ко му́ченица бескро́вная, / изгна́ния, скита́ния, уничиже́ния, / гла́д ве́лий и же́сток хла́д претерпе́, / и ве́рность Го́сподеви / да́же до часа́ сме́ртнаго сохрани́. / Ны́не, я́ко и пре́жде, нас науча́ет / богоуго́дное и пра́ведное житие́ на земли́ явля́ти // и при́сно со Христо́м бы́ти.

Приходя́щим к тебе́, блаже́нная ста́рице Матро́но, / дерзнове́нно возвеща́ла еси́: / оскуде́ние ве́ры в лю́дех / мно́гия бе́ды несе́т, / сего́ ра́ди покая́ние о гресе́х / пред Го́сподем подоба́ет приноси́ти / и моли́твы усе́рдныя / при́сно Тому́ твори́ти, / да не гне́вом Свои́м / с лица́ земли́ истреби́т ны, / но, да ве́ру пра́вую испове́дующе, / велеле́пно просла́вим на земли́ // жизнь и щедро́ты нам Дарова́вшаго.

Сла́ва, гла́с 7:

Аще не стои́т селе́ние без пра́ведника, / не устои́т земля́ Ру́сская, оскуде́вши благоче́стием. / Си́це наставля́ла еси́, пра́ведная Матро́но, / лю́ди заблу́ждшия, / моля́щися усе́рдно, // да поми́лует Госпо́дь зе́млю Ру́сскую.

И ны́не, богоро́дичен:

О, Пресвята́я Влады́чице Де́во Богоро́дице! / Образ Твой Взыска́ние поги́бших имену́емый / тща́нием Матро́ны пра́ведныя написа́ся / и к по́льзе ве́рных во храм Успе́ния Твоего́ принесе́ся, / да вси, взира́юще нань, / наде́жду тве́рдую и́мут на Тя. / Взыщи́ и на́ша ду́ши, Богома́ти, / во мра́це грехо́внем блужда́ющия, // Твои́м предста́тельством и моли́твами Матро́ны блаже́нныя.

Го́споди, поми́луй. (40 раз)

Стихи́ры на стихо́вне:

Стихиры, гла́с 5:

Ра́дуйся, оби́тель Пречи́стыя Богоро́дицы, / иму́щи в себе́ сокро́вище неистощи́мое / честны́я мо́щи блаже́нныя Матро́ны. / Сия́ бо, све́та дневна́го не позна́вши, / духо́вное же зре́ние от Бо́га прие́мши, / да́ром прозре́ния и исцеле́ния обогати́ся, / науча́ет ны, гре́шныя, / ка́ко подоба́ет спасти́ся / и получи́ти в день су́дный от Го́спода // проще́ние грехо́в и ве́лию ми́лость.

Сти́х: Госпо́дь реши́т окова́нныя, / Госпо́дь умудря́ет слепцы́.

Ра́дуйся, избра́нный сосу́де Свята́го Ду́ха, / Небе́сная жи́тельнице, / немощны́м челове́ком помо́щнице, / и ко спасе́нию путеводи́тельнице, / блаже́нная ста́рице Матро́но. / Ты бо, прозира́ющи гряду́щая, я́ко настоя́щая, / мно́гия лю́ди от грехо́внаго пути́ обрати́ла еси́ / и ко Христу́ привела́ еси́. / Испроси́ от Го́спода и нам, согреша́ющим, // грехо́в оставле́ние и ве́лию ми́лость.

Сти́х: Возведо́х о́чи мои́ в го́ры, / отню́дуже прии́дет по́мощь моя́.

Ра́дуйся, на враги́ непобеди́мая вои́тельнице, / ко́зни их всегда́ разруша́ющая / и на жи́зненнем пути́ нас укрепля́ющая, / кро́ткая обличи́тельнице поро́ков на́ших. / Предстоя́щи ны́не Престо́лу Царя́ Небе́сных во́инств, / испроси́ нам, предо́брая ма́ти, / па́мять твою́ ве́рно почита́ющим, // проще́ние грехо́в и ве́лию ми́лость.

Слава, гла́с 6:

Прииди́те, просла́вим пе́сненными хвала́ми и чи́стым се́рдцем, / блаже́нную ма́терь на́шу Матро́ну, / я́же во дни́ безбо́жия и гоне́ния / непоколеби́мый сто́лп благоче́стия и ве́ры бы́сть, / в немощне́м телеси́ су́щи, / си́лу Бо́жия благода́ти показа́, / и мно́гия лю́ди о́крест ея́ к Бо́гу приведе́, / к покая́нию и моли́тве о земли́ Росси́йстей всех призва́, / и, та́ко сонм святы́х Моско́вских испо́лнивши, / яви́ся при́сная о нас пред Бо́гом печа́льница // и те́плая моли́твенница.

И ны́не, Богоро́дичен:

Богоро́дице, Ты еси́ Лоза́ и́стинная, / возрасти́вшая нам Плод живота́, / Тебе́ мо́лимся, / мо́лися, Влады́чице, / со апо́столы и пра́ведною Матро́ною // поми́ловати ду́ши на́ша.

Моли́тва свята́го Симео́на Богоприи́мца:

Ны́не отпуща́еши раба́ Твоего́, Влады́ко,/ по глаго́лу Твоему́, с ми́ром;/ я́ко ви́деста о́чи мои́ спасе́ние Твое́,/ е́же еси́ угото́вал пред лице́м всех люде́й,/ свет во открове́ние язы́ков,// и сла́ву люде́й Твои́х Изра́иля.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Тропа́рь, глас 2:

Бо́гом умудре́нную блаже́нную ста́рицу Матро́ну, / земли́ Ту́льския процвете́ние / и гра́да Москвы́ пресла́вное украше́ние, / восхва́лим днесь, ве́рнии. / Сия́ бо, све́та дневна́го не позна́вши, / све́том Христо́вым просвети́ся / и да́ром прозре́ния и исцеле́ния обогати́ся. / Пресе́льница же и стра́нница на земли́ бы́вши, / ны́не в черто́зех Небе́сных Престо́лу Бо́жию предстои́т // и мо́лится о душа́х на́ших. (Дважды)

Песнь Пресвятей Богородице:

Богоро́дице Де́во, ра́дуйся, / Благода́тная Мари́е, Госпо́дь с Тобо́ю; / благослове́на Ты в жена́х / и благослове́н Плод чре́ва Твоего́, / я́ко Спа́са родила́ еси́ душ на́ших. (Единожды)

Бу́ди И́мя Госпо́дне благослове́но от ны́не и до ве́ка. (Три́жды)

Псало́м 33:

Благословлю́ Го́спода на вся́кое вре́мя,/ вы́ну хвала́ Его́ во усте́х мои́х./ О Го́споде похва́лится душа́ моя́,/ да услы́шат кро́тцыи, и возвеселя́тся./ Возвели́чите Го́спода со мно́ю,/ и вознесе́м И́мя Его́ вку́пе./ Взыска́х Го́спода, и услы́ша мя,/ и от все́х скорбе́й мои́х изба́ви мя./ Приступи́те к Нему́, и просвети́теся,/ и ли́ца ва́ша не постыдя́тся./ Сей ни́щий воззва́, и Госпо́дь услы́ша и́,/ и от все́х скорбе́й его́ спасе́ и́./ Ополчи́тся а́нгел Госпо́день о́крест боя́щихся Его́,/ и изба́вит их./ Вкуси́те и ви́дите, я́ко благ Госпо́дь:/ блаже́н муж, и́же упова́ет Нань./ Бо́йтеся Го́спода, вси́ святи́и Его́,/ я́ко несть лише́ния боя́щимся Его́./ Бога́тии обнища́ша и взалка́ша:/ взыска́ющии же Го́спода// не лиша́тся вся́каго бла́га.

У́ТРЕНЯ.

Шестопса́лмие:

Сла́ва в вы́шних Бо́гу, и на земли́ мир, в челове́цех благоволе́ние. (Три́жды)

Го́споди, устне́ мои́ отве́рзеши, и уста́ моя́ возвестя́т хвалу́ Твою́. (Два́жды)

Псалом 3:

Го́споди, что ся умно́жиша стужа́ющии ми́? Мно́зи востаю́т на мя, мно́зи глаго́лют души́ мое́й: несть спасе́ния eму́ в Бо́зе eго́. Ты же, Го́споди, Засту́пник мой еси́, сла́ва моя́ и вознося́й главу́ мою́. Гла́сом мои́м ко Го́споду воззва́х, и услы́ша мя от горы́ святы́я Своея́. Аз усну́х, и спах, воста́х, я́ко Госпо́дь засту́пит мя. Не убою́ся от тем люде́й, о́крест напа́дающих на мя. Воскресни́, Го́споди, спаси́ мя, Бо́же мой, я́ко Ты порази́л еси́ вся вражду́ющыя ми всу́е: зу́бы гре́шников сокруши́л еси́. Госпо́дне есть спасе́ние, и на лю́дех Твои́х благослове́ние Твое́.

Аз усну́х, и спах, воста́х, я́ко Госпо́дь засту́пит мя.

Псалом 37:

Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́. Я́ко стре́лы Твоя́ унзо́ша во мне, и утверди́л еси́ на мне ру́ку Твою́. Несть исцеле́ния в пло́ти мое́й от лица́ гне́ва Твоего́, несть ми́ра в косте́х мои́х от лица́ грех мои́х. Я́ко беззако́ния моя́ превзыдо́ша главу́ мою́, я́ко бре́мя тя́жкое отяготе́ша на мне. Возсмерде́ша и согни́ша ра́ны моя́ от лица́ безу́мия моего́. Пострада́х и сляко́хся до конца́, весь день се́туя хожда́х. Я́ко ля́двия моя́ напо́лнишася поруга́ний, и несть исцеле́ния в пло́ти мое́й. Озло́блен бых и смири́хся до зела́, рыка́х от воздыха́ния се́рдца моего́. Го́споди, пред Тобо́ю все жела́ние мое́ и воздыха́ние мое́ от Тебе́ не утаи́ся. Се́рдце мое́ смяте́ся, оста́ви мя си́ла моя́, и свет о́чию мое́ю, и той несть со мно́ю. Дру́зи мои́ и и́скреннии мои́ пря́мо мне прибли́жишася и ста́ша, и бли́жнии мои́ отдале́че мене́ ста́ша и нужда́хуся и́щущии ду́шу мою́, и и́щущии зла́я мне глаго́лаху су́етная и льсти́вным весь день поуча́хуся. Аз же я́ко глух не слы́шах и я́ко нем не отверза́яй уст свои́х. И бых я́ко челове́к не слы́шай и не имы́й во усте́х свои́х обличе́ния. Я́ко на Тя, Го́споди, упова́х, Ты услы́шиши, Го́споди Бо́же мой. Я́ко рех: да не когда́ пора́дуют ми ся врази́ мои́: и внегда́ подвижа́тися нога́м мои́м, на мя велере́чеваша. Я́ко аз на ра́ны гото́в, и боле́знь моя́ предо мно́ю есть вы́ну. Я́ко беззако́ние мое́ аз возвещу́ и попеку́ся о гресе́ мое́м. Врази́ же мои́ живу́т и укрепи́шася па́че мене́, и умно́жишася ненави́дящии мя без пра́вды. Воздаю́щии ми зла́я возблага́я оболга́ху мя, зане́ гоня́х благосты́ню. Не оста́ви мене́, Го́споди Бо́же мой, не отступи́ от Мене́. Вонми́ в по́мощь мою́, Го́споди спасе́ния моего́.

Не оста́ви мене́, Го́споди Бо́же мой, не отступи́ от Мене́. Вонми́ в по́мощь мою́, Го́споди спасе́ния моего́.

Псалом 62:

Бо́же, Бо́же мой, к Тебе́ у́тренюю, возжада́ Тебе́ душа́ моя́, коль мно́жицею Тебе́ плоть моя́, в земли́ пу́сте и непрохо́дне, и безво́дне. Та́ко во святе́м яви́хся Тебе́, ви́дети си́лу Твою́ и сла́ву Твою́. Я́ко лу́чши ми́лость Твоя́ па́че живо́т, устне́ мои́ похвали́те Тя. Та́ко благословлю́ Тя в животе́ мое́м, о и́мени Твое́м воздежу́ ру́це мои́. Я́ко от ту́ка и ма́сти да испо́лнится душа́ моя́, и устна́ма ра́дости восхва́лят Тя уста́ моя́. А́ще помина́х Тя на посте́ли мое́й, на у́тренних поуча́хся в Тя. Я́ко был еси́ Помо́щник мой, и в кро́ве крилу́ Твое́ю возра́дуюся. Прильпе́ душа́ моя́ по Тебе́, мене́ же прия́т десни́ца Твоя́. Ти́и же всу́е иска́ша ду́шу мою́, вни́дут в преиспо́дняя земли́, предадя́тся в ру́ки ору́жия, ча́сти ли́совом бу́дут. Царь же возвесели́тся о Бо́зе, похва́лится всяк клены́йся Им, я́ко загради́шася уста́ глаго́лющих непра́ведная.

На у́тренних поуча́хся в Тя. Я́ко был еси́ Помо́щник мой, и в кро́ве крилу́ Твое́ю возра́дуюся. Прильпе́ душа́ моя́ по Тебе́, мене́ же прия́т десни́ца Твоя́.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Го́споди поми́луй. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Псалом 87:

Го́споди Бо́же спасе́ния моего́, во дни воззва́х, и в нощи́ пред Тобо́ю. Да вни́дет пред Тя моли́тва моя́: приклони́ у́хо Твое́ к моле́нию моему́, я́ко испо́лнися зол душа́ моя́, и живо́т мой аду прибли́жися. Привмене́н бых с низходя́щими в ров, бых я́ко челове́к без по́мощи, в ме́ртвых свобо́дь, я́ко я́звеннии спя́щии во гро́бе, и́хже не помяну́л еси́ ктому́, и ти́и от руки́ Твоея́ отринове́ни бы́ша. Положи́ша мя в ро́ве преиспо́днем, в те́мных и се́ни сме́ртней. На мне утверди́ся я́рость Твоя́, и вся во́лны Твоя́ наве́л еси́ на мя. Уда́лил еси́ зна́емых мои́х от Мене́, положи́ша мя ме́рзость себе́: пре́дан бых и не исхожда́х. О́чи мои́ изнемого́сте от нищеты́, воззва́х к Тебе́, Го́споди, весь день, возде́х к Тебе́ ру́це мои́. Еда́ ме́ртвыми твори́ши чудеса́? Или́ вра́чеве воскреся́т, и испове́дятся Тебе́? Еда́ пове́сть кто во гро́бе ми́лость Твою́, и и́стину Твою́ в поги́бели? Еда́ позна́на бу́дут во тьме чудеса́ Твоя́, и пра́вда Твоя́ в земли́ забве́нней? И аз к Тебе́, Го́споди, воззва́х и у́тро моли́тва моя́ предвари́т Тя. Вску́ю, Го́споди, отре́еши ду́шу мою́, отвраща́еши лице́ Твое́ от Мене́? Нищ есмь аз, и в труде́х от ю́ности моея́; возне́с же ся, смири́хся, и изнемого́х. На мне преидо́ша гне́ви Твои́, устраше́ния Твоя́ возмути́ша мя, обыдо́ша мя я́ко вода́, весь день одержа́ша мя вку́пе. Уда́лил еси́ от Мене́ дру́га и и́скренняго, и зна́емых мои́х от страсте́й.

Го́споди Бо́же спасе́ния моего́, во дни воззва́х, и в нощи́ пред Тобо́ю. Да вни́дет пред Тя моли́тва моя́: приклони́ у́хо Твое́ к моле́нию моему́.

Псалом 102:

Благослови́, душе́ моя́, Го́спода, и вся вну́тренняя моя́ и́мя свя́тое Его́. Благослови́, душе́ моя́, Го́спода, и не забыва́й всех воздая́ний Его́, очища́ющаго вся беззако́ния твоя́, исцеля́ющаго вся неду́ги твоя́, избавля́ющаго от истле́ния живо́т твой, венча́ющаго тя ми́лостию и щедро́тами, исполня́ющаго во благи́х жела́ние твое́: обнови́тся я́ко о́рля ю́ность твоя́. Творя́й ми́лостыни Госпо́дь, и судьбу́ всем оби́димым. Сказа́ пути́ Своя́ Моисе́ови, сыново́м Изра́илевым хоте́ния Своя́: Щедр и Ми́лостив Госпо́дь, Долготерпели́в и Многоми́лостив. Не до конца́ прогне́вается, ниже́ во век вражду́ет, не по беззако́нием на́шым сотвори́л есть нам, ниже́ по грехо́м на́шым возда́л есть нам. Я́ко по высоте́ небе́сней от земли́, утверди́л есть Госпо́дь ми́лость Свою́ на боя́щихся Его́. Ели́ко отстоя́т восто́цы от за́пад, уда́лил есть от нас беззако́ния на́ша. Я́коже ще́дрит оте́ц сы́ны, уще́дри Госпо́дь боя́щихся Его́. Я́ко Той позна́ созда́ние на́ше, помяну́, я́ко персть есмы́. Челове́к, я́ко трава́ дни́е eго́, я́ко цвет се́льный, та́ко оцвете́т, я́ко дух про́йде в нем, и не бу́дет, и не позна́ет ктому́ ме́ста своего́. Ми́лость же Госпо́дня от ве́ка и до ве́ка на боя́щихся Его́, и пра́вда Его́ на сыне́х сыно́в, храня́щих заве́т Его́, и по́мнящих за́поведи Его́ твори́ти я́. Госпо́дь на Небеси́ угото́ва Престо́л Свой, и Ца́рство Его́ все́ми облада́ет. Благослови́те Го́спода вси А́нгели Его́, си́льнии кре́постию, творя́щии сло́во Его́, услы́шати глас слове́с Его́. Благослови́те Го́спода вся Си́лы Его́, слуги́ Его́, творя́щии во́лю Его́. Благослови́те Го́спода вся дела́ Его́, на вся́ком ме́сте влады́чества Его́, благослови́, душе́ моя́, Го́спода.

На вся́ком ме́сте влады́чества Его́, благослови́, душе́ моя́, Го́спода.

Псалом 142:

Го́споди, услы́ши моли́тву мою́, внуши́ моле́ние мое́ во и́стине Твое́й, услы́ши мя в пра́вде Твое́й и не вни́ди в суд с рабо́м Твои́м, я́ко не оправди́тся пред Тобо́ю всяк живы́й. Я́ко погна́ враг ду́шу мою́, смири́л есть в зе́млю живо́т мой, посади́л мя есть в те́мных, я́ко ме́ртвыя ве́ка. И уны́ во мне дух мой, во мне смяте́ся се́рдце мое́. Помяну́х дни дре́вния, поучи́хся во всех де́лех Твои́х, в творе́ниих руку́ Твое́ю поуча́хся. Возде́х к Тебе́ ру́це мои́, душа́ моя́, я́ко земля́ безво́дная Тебе́. Ско́ро услы́ши мя, Го́споди, исчезе́ дух мой, не отврати́ лица́ Твоего́ от Мене́, и уподо́блюся низходя́щым в ров. Слы́шану сотвори́ мне зау́тра ми́лость Твою́, я́ко на Тя упова́х. Скажи́ мне, Го́споди, путь во́ньже пойду́, я́ко к Тебе́ взях ду́шу мою́. Изми́ мя от враг мои́х, Го́споди, к Тебе́ прибего́х. Научи́ мя твори́ти во́лю Твою́, я́ко Ты еси́ Бог мой. Дух Твой Благи́й наста́вит мя на зе́млю пра́ву. И́мене Твоего́ ра́ди, Го́споди, живи́ши мя, пра́вдою Твое́ю изведе́ши от печа́ли ду́шу мою́. И ми́лостию Твое́ю потреби́ши враги́ моя́ и погуби́ши вся стужа́ющыя души́ мое́й, я́ко аз раб Твой есмь.

Услы́ши мя, Го́споди, в пра́вде Твое́й и не вни́ди в суд с рабо́м Твои́м.

Услы́ши мя, Го́споди, в пра́вде Твое́й и не вни́ди в суд с рабо́м Твои́м.

Дух Твой Благи́й наста́вит мя на зе́млю пра́ву.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Тропа́рь глас 2:

Бо́гом умудре́нную блаже́нную ста́рицу Матро́ну, / земли́ Ту́льския процвете́ние / и гра́да Москвы́ пресла́вное украше́ние, / восхва́лим днесь, ве́рнии. / Сия́ бо, све́та дневна́го не позна́вши, / све́том Христо́вым просвети́ся / и да́ром прозре́ния и исцеле́ния обогати́ся. / Пресе́льница же и стра́нница на земли́ бы́вши, / ны́не в черто́зех Небе́сных Престо́лу Бо́жию предстои́т // и мо́лится о душа́х на́ших. (Дважды)

Сла́ва Отцу́ и Сы́ну и Свято́му Ду́ху. И ны́не и при́сно и во ве́ки веко́в. Ами́нь.

Глас 2: Вся, па́че смы́сла, / вся пресла́вная Твоя́, Богоро́дице, та́инства, / чистоте́ запеча́танной и де́вству храни́му, / Ма́ти позна́лася еси́ нело́жна, / Бо́га ро́ждши И́стиннаго; / Того́ моли́ спасти́ся душа́м на́шим.

Здесь читается кафизма, положенная по дню, или сразу седальны:

Го́споди, поми́луй. (Три́жды)

Седален, глас 5:

Му́жески по́двиги воздержа́нием претерпе́вши, низложи́ла еси́ многоко́зненнаго, и в терпе́нии жи́знь пожи́вши благоче́стно преподо́бная, Матроно, ны́не прешла́ еси́ к Бо́гу моля́щися о все́х, свяще́нно свято́е твое́ соверша́ющих пра́зднество.

Сла́ва Отцу́ и Сы́ну и Свято́му Ду́ху. И ны́не и при́сно и во ве́ки веко́в. Ами́нь.

Глас 5: Всенепоро́чная Ма́ти, возсия́й ми́ покая́ния лучу́, и разори́ мра́к безме́рных мои́х зо́л, лука́выя отжени́, Де́во, по́мыслы се́рдца моего́.

Седален, глас 4:

Пло́ть распя́ла еси́ со страстьми́, и все́ любле́ние ко Христу́ име́ла еси́, Матроно, Жениху́ твоему́ нетле́нному. Сего́ ра́ди прия́ла еси́ вене́ц, и а́нгельским лико́м сочи́слилася еси́ преподо́бная, моля́щися Тому́ приле́жно о чту́щих тя́.

Сла́ва Отцу́ и Сы́ну и Свято́му Ду́ху. И ны́не и при́сно и во ве́ки веко́в. Ами́нь.

Глас 4: Тружда́ет мя́ бу́ря грехо́вная, и возмуще́ние безме́стных помышле́ний: умилосе́рдися Всенепоро́чная, и ру́ку ми́ по́мощи, я́ко ми́лостива простри́, да спа́сся велича́ю Тя́.

Полиеле́й:

Хвали́те И́мя Госпо́дне, хвали́те, раби́ Го́спода.

Аллилу́иа, аллилу́иа, аллилу́иа.

Благослове́н Госпо́дь от Сио́на, живы́й во Иерусали́ме.

Аллилу́иа, аллилу́иа, аллилу́иа.

Испове́дайтеся Го́сподеви, я́ко Благ, я́ко в век ми́лость Его́.

Аллилу́иа, аллилу́иа, аллилу́иа.

Испове́дайтеся Бо́гу Небе́сному, я́ко в век ми́лость Его́.

Аллилу́иа, аллилу́иа, аллилу́иа.

Велича́ние:

Велича́ем тя, / свята́я пра́ведная Матро́но, / и чтим святу́ю па́мять твою́, / ты бо мо́лиши о нас // Христа́ Бо́га на́шего.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа,// сла́ва Тебе́, Бо́же. (Трижды)

Велича́ем тя, / свята́я пра́ведная Матро́но, / и чтим святу́ю па́мять твою́, / ты бо мо́лиши о нас // Христа́ Бо́га на́шего.

Седа́льны:

Глас 8:

Предъизбра́нная от Бо́га преподо́бная ма́ти, ко приста́нищу жи́зни наставля́ема, без волне́ния жития́ бу́рю претекла́ еси́, со а́нгелы песносло́вящи Изба́вителя, и моля́щися непреста́нно о на́с, я́ко да благода́ть и ми́лость Христо́с да́рует на́м, сохраня́ющи па́ству, ю́же боле́знию соста́вила еси́.

Глас 8: Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Ра́дуйся, а́нгелом ра́дость ми́ра прие́мшая. Ра́дуйся, ро́ждшая Творца́ Твоего́ и Го́спода. Ра́дуйся, сподо́бльшаяся бы́ти Ма́ти Бо́жия.

Степе́нна, глас 4:

От ю́ности моея́/ мно́зи бо́рют мя стра́сти,/ но Сам мя заступи́// и спаси́, Спа́се мой.

Ненави́дящии Сио́на,/ посрами́теся от Го́спода,/ я́ко трава́ бо огне́м// бу́дете изсо́хше.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Святы́м Ду́хом/ вся́ка душа́ живи́тся,/ и чистото́ю возвыша́ется,// светле́ется Тро́йческим еди́нством, священнота́йне.

Го́споди, поми́луй. (Три́жды)

От Матфеа Свята́го Ева́нгелия чте́ние

Сла́ва, Тебе́, Го́споди, сла́ва Тебе́.

Рече́ Госпо́дь при́тчу сию́: уподо́бися Ца́рствие Небе́сное десяти́м де́вам, я́же прия́ша свети́льники своя́ и изыдо́ша в сре́тение жениху́, пять же бе от них мудры́ и пять юро́дивы. Юро́дивыя же, прие́мше свети́льники своя́, не взя́ша с собо́ю еле́а, му́дрыя же прия́ша еле́й в сосу́дех со свети́льники свои́ми, косня́щу же жениху́, воздрема́шася вся и спа́ху. Полу́нощи же вопль бысть: се жени́х гряде́т, исходи́те в сре́тение его́. Тогда́ воста́вше вся де́вы ты́я и украси́ша свети́льники своя́. Юро́дивыя же му́дрым ре́ша: дади́те нам от еле́а ва́шего, я́ко свети́льницы на́ши угаса́ют. Отвеща́ша же му́дрыя, глаго́люще: еда́ ка́ко не доста́нет нам и вам, иди́те же па́че к продаю́щым и купи́те себе́. Иду́щым же им купи́ти, прии́де жени́х, и гото́выя внидо́ша с ним на бра́ки, и затворе́ны бы́ша две́ри. Последи́ же приидо́ша и про́чыя де́вы, глаго́люще: Го́споди, Го́споди, отве́рзи нам. Он же отвеща́в рече́ им: ами́нь глаго́лю вам, не вем вас. Бди́те у́бо, я́ко не ве́сте дне ни часа́, во́ньже Сын Челове́ческий прии́дет.

Сла́ва, Тебе́, Го́споди, сла́ва Тебе́.

Псало́м 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя. Я́ко беззако́ние мое́ аз зна́ю и грех мой предо мно́ю есть вы́ну. Тебе́ Еди́ному согреши́х, и лука́вое пред Тобо́ю сотвори́х, я́ко да оправди́шися во словесе́х Твои́х и победи́ши, внегда́ суди́ти Ти. Се бо в беззако́ниих зача́т есмь, и во гресе́х роди́ мя ма́ти моя́. Се бо и́стину возлюби́л еси́, безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся, омы́еши мя, и па́че сне́га убелю́ся. Слу́ху моему́ да́си ра́дость и весе́лие, возра́дуются ко́сти смире́нныя. Отврати́ лице́ Твое́ от грех мои́х, и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́, и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́, и Ду́хом Влады́чним утверди́ мя. Научу́ беззако́нныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́, возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо, всесожже́ния не благоволи́ши. Же́ртва Бо́гу дух сокруше́н, се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския, тогда́ благоволи́ши же́ртву пра́вды, возноше́ние и всесожега́емая: тогда́ возложа́т на олта́рь Твой тельцы́.

Глас 6:

Сла́ва Отцу́ и Сы́ну и Свято́му Ду́ху./ Моли́твами блаженныя Матроны, / Ми́лостиве, очи́сти / мно́жества согреше́ний на́ших.

И ны́не и при́сно и во ве́ки веко́в. Ами́нь./ Моли́твами Богоро́дицы, / Ми́лостиве, очи́сти / мно́жества согреше́ний на́ших.

Поми́луй мя, Бо́же,/ по вели́цей ми́лости Твое́й,/ и по мно́жеству щедро́т Твои́х// очи́сти беззако́ние мое́.

Стихи́ра, глас 2

Душе́вная ловле́ния, и стра́сти плотски́я, мече́м воздержа́ния посе́кла еси́, и мы́сленная согреше́ния молча́нием поста́ удави́ла еси́, и струя́ми сле́з твои́х пусты́ню всю́ напои́ла еси́, и прозябла́ еси́ на́м покая́ния плоды́: те́мже твою́ па́мять преподо́бная, пра́зднуем.

Го́споди, поми́луй. (12 раз)

Канон святыя, глас 8.

Песнь 1

Ирмос: Воду прошед яко сушу,/ и египетскаго зла избежав,/ израильтянин вопияше:/ Избавителю и Богу нашему поим.

Боже Всемилостиве, сподоби ны, недостойныя,/ воспети угодницу Твою Матрону,/ нашу изрядную пред Тобою ходатаицу и молитвенницу.

Любовию ко Христу от младенческих пелен уязвилася еси/ и Тому неленостно в житии Твоем служила еси, мати блаженная.

Избранный сосуд Духа Святаго явилася еси,/ благодать бо Божию от святыя купели до конца дней твоих/ присно усердно возгревала еси, мати блаженная.

Богородичен: Архангельски песнь Тебе поем, Чистая:/ радуйся, Обрадованная, Марие, Мати Христа Бога,/ присно молящаяся за род наш.

Песнь 3

Ирмос: Небеснаго круга Верхотворче Господи,/ и Церкве Зиждителю,/ Ты мене утверди в любви Твоей,/ желаний краю, верных утверждение,/ едине Человеколюбче.

Житием богоугодным и праведным освятилася еси, мати блаженная,/ темже и нам, с верою к тебе прибегающим,/ помози благодати Божия исполнитися.

Христа Человеколюбца, Егоже от юности твоея возлюбила еси, мати святая,/ моли утвердитися нам на камени заповедей Его.

Церкве Зиждитель Господь/ светообразное чадо церковное, содела тя, праведная мати,/ и в любви Своей утверди тя, яко Человеколюбец.

Богородичен: Небеси и земли Царице, Богородице Дево,/ и Церкве Покрове всемощный,/ утверди обитель сию непоколебимо во благочестии пребывати.

Седален, глас 4:

По имени твоему, Матроно блаженная, житие твое бысть,/ скитания, бо поношения и скорби ни во что же вменивши,/ госпожа явилася еси не токмо именем, но и духом./ Темже и вся потребная Царствия ради Божия стяжала еси и Богом обогатилася еси.

Слава, и ныне, Богородичен:

Ныне – радуйся – Тебе зовем, Владычице,/ грешником погибающим исправление и нам, величающим Тя, спасение.

Песнь 4

Ирмос: Услышах, Господи,/ смотрения Твоего таинство,/ разумех дела Твоя/ и прославих Твое Божество.

Смотрение Божие на тебе особь явлено бе, мати блаженная,/ яко слепа и немощна телом сущи,/ даром прозрения и чудес обогатилася еси/ и венцем нетленным от Господа украсилася еси.

Мудрования плотская презрела еси, блаженная,/ обаче мудростию, еюже Господь умудряет слепцы,/ изрядно обогатилася еси.

Яко алавастр мира, облагаухающь пределы Российстии,/ вемы тя, Матроно праведная,/ стекаются бо к тебе со всех концев людие земли нашея, заступления просяще.

Богородичен: Блажим Тя, вси роди, Пресвятая Дево,/ погибающих взыскующую, немощных врачующую и сирых заступающую.

Пе́снь 5

Ирмос: Просвети нас повелении Твоими, Господи,/ и мышцею Твоею высокою/  Твой мир подаждь нам,/ Человеколюбче.

Христос, Свет Истинный,/ ум твой, святая мати, просветил есть к разумению повелений Его,/ темже служити Ему в житии твоем усердно потщалася еси.

Светом Христовым озаряема,/ в мире сем безбожнем и грехолюбивем/ явилася еси, яко столп огнен, светяй во тьме, праведная Матроно.

Яко звезда многосветлая, возсияла еси в житии твоем, праведная Матроно,/ указующи истинный путь людем заблудшим./ Сице и ныне в Небесных обителех водворившися,/  моли просветити и спасти души наша.

Богородичен: Свет рождшая Божественный и Превечный, Богоневесто,/ разреши мглу прегрешений наших.

Песнь 6

Ирмос: Молитву пролию ко Господу,/ и Тому возвещу печали моя,/ яко зол душа моя исполнися,/ и живот мой аду приближися,/ и молюся, яко Иона:/ от тли, Боже, возведи мя.

Молитвы присныя к Богу возносящи,/ вся нужды и печали Тому возвещала еси, праведная мати,/ и, яко Иона во чреве китове, в скорби велией вопияла еси:/ Боже, из глубины зол возведи мя.

Помощию Божиею вся нужды смиренне претерпевши, праведная Матроно,/ вражию силу молитвою твоею победила еси./ Темже, ныне неоскудно благодать Христову приемши,/ молися, еже от злодейства диавольскаго нам избавитися.

Многими подвиги твоими, праведная Матроно, стала еси противу козней диавольских,/ брань ведущи с миродержителем тьмы века сего./ Темже о нас ныне молися,/ да приимем вся  оружия Божия/ и возможем противитися в дни лютыя духовом злобы поднебесным.

Богородичен: Ада и смерти Победителя рождшая, Пречистая Дево,/ моли Господа и Сына Твоего врагов злодействия нас избавити.

Кондак, глас 7:

К служению Христову/ от чрева матерня предызбранная,/ праведная Матроно,/ стезею скорбей и печалей шествующи,/ твердую веру и благочестие явивши,/ Богу угодила еси./ Темже, почитающе память твою, молим тя:/ помози и нам в любви Божии пребывати,/ старице блаженная.

Песнь 7

Ирмос: От Иудеи дошедше отроцы / в Вавилоне иногда / верою Троическою пламень пещный попраша, поюще:/ отцев Боже, благословен еси.

Возгореся нечестие в земли нашей,/ яко пламень древле в пещи вавилонстей,/ веру отеческую в людех тщащееся попалити,/ ты же, блаженная, приходящих к тебе научала еси верою воспевати:/ отцев, Боже, благословен еси.

Богопротивнии мучителие от закона Божия отступльшии,/ огнь гонений во стране нашей возжгоша,/ ты же, праведная Матроно, приходящим к тебе силою Христовою росу духовную подавала еси,/ да не попалены до конца будут, о присно воспевают:/ отцев, Боже, благословен еси.

Ангелу Божию,/ в пещи вавилонстей отроком древле пламень огненный угасившему,  уподобилася еси, блаженная,/ российским бо людем во дни нечестия молитвами твоими от злобожнаго языковредия неврежденным быти споспешествовала еси, научающи взывати:/ отцев, Боже, благословен еси.

Богородичен: К покрову Твоему прибегаем, Дево, Купино неопалимая,/ грехи наша, яко терние зловредное, попали молитвами Твоими,/ да чистым сердцем взываем:/ отцев, Боже, благословен еси.

Песнь 8

Ирмос: Царя Небеснаго,/ Егоже поют вои ангельстии,/ хвалите и превозносите во вся веки.

Царя Небеснаго измлада возлюбила еси / и Тому до конца дний своих со тщанием служила еси, блаженная./ Ныне же с лики ангельскими присно поеши:/ Господа пойте и превозносите Его во вся веки.

Заповеди Господни усердне соблюдающи,/ столп благочестия России явилася еси, мати блаженная,/ яко же о тебе предрече кронштадтский праведник./ С ним же превозносиши Христа во веки.

Мнозии людие российстии, плененнии безбожием,/ молитвами твоими, праведная Матроно, на путь спасения возвратишася/ и, в вере правей укрепившеся, Триединому Богу воспеша:/ Господа пойте и превозносите Его во вся веки.

Богородичен: Рождшую Царя Небеснаго,/ явльшагося в мир взыскати нас, погибающих,/ Тя, Богородице, величаем.

На 9-й песни поем песнь Пресвятыя Богородицы:

Вели́чит душа́ Моя́ Го́спода и возра́довася дух Мой о Бо́зе Спа́се Мое́м.

К коемуждо стиху припеваем: Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Я́ко призре́ на смире́ние рабы́ Своея́, се бо, от ны́не ублажа́т Мя вси ро́ди.

Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Я́ко сотвори́ Мне вели́чие Си́льный, и свя́то и́мя Его́, и ми́лость Его́ в ро́ды родо́в боя́щимся Его́.

Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Сотвори́ держа́ву мы́шцею Свое́ю, расточи́ го́рдыя мы́слию се́рдца их.

Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Низложи́ си́льныя со престо́л, и вознесе́ смире́нныя, а́лчущия испо́лни благ, и богатя́щияся отпусти́ тщи.

Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Восприя́т Изра́иля о́трока Своего́, помяну́ти ми́лости, я́коже глаго́ла ко отце́м на́шим, Авраа́му и се́мени его́ да́же до ве́ка.

Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Песнь 9

Ирмос: Воистинну Богородицу / Тя исповедуем,/ спасеннии Тобою, Дево Чистая,/ с безплотными лики Тя величаем.

О, чудо велие, кости сухия источают исцеления/ и тленное естество дух наш к Нетленному Богу возводит./ Сего ради Матрону блаженную величаем.

Град Москву и обитель Покрова Пресвятыя Богородицы,/ идеже почивают честныя мощи твоя, праведная Матроно,/ сохрани от всяких напастей и зол / и утверди в правей вере и благочестии всех, почитающих тя.

Приими наше недостойное моление, Матроно блаженная,/ и, яко же обещалася еси, ходатайствуй пред Господем полезная нам даровати,/ да с тобою сподобимся в селениих райских славити Святую Троицу.

Богородичен: Истинную избранницу Твою, Богомати, вемы, Матрону блаженную:/ сия бо в день почитания иконы Твоея Скоропослушницы родися,/ в храме Успения Твоего крестися,/ образ Твой Взыскание погибших тщанием ея написася,/ таже и телом во обители честнаго Покрова Твоего почивает и молится о душах наших.

Светилен:

Ангели пресветлии вознесоша святую душу твою, блаженная Матроно, к Престолу Царя славы,/ идеже торжествуеши со всеми святыми и молишися о душах наших.

Слава, и ныне, Богородичен:

Свет истинный рождшая, Богородице,/ помраченных нас тьмою греховною просвети / и причастниками вечных благ соделай.

Хвали́тны псалмы́, глас 8:

Вся́кое дыха́ние да хва́лит Го́спода./ Хвали́те Го́спода с небе́с,/ хвали́те Его́ в вы́шних.// Тебе́ подоба́ет песнь Бо́гу.

Хвали́те Его́ вси а́нгели Его́,/ хвали́те Его́ вся си́лы Его́.// Тебе́ подоба́ет песнь Бо́гу.

Сти́хиры, глас 8:

Стих: Сотвори́ти в них суд напи́сан/ сла́ва сия́ бу́дет всем преподо́бным Его́.

Прииди́те, ве́рнии, / ста́рицу блаже́нную Матро́ну вси согла́сно восхва́лим, / я́же в житии́ свое́м / попече́ние изря́дное о лю́дех показа́, / и ны́не прибега́ющим к ней благода́тная дея́ния явля́ет, / та́же, в ли́це святы́х водворя́ющися, / Престо́лу Бо́жию при́сно предстои́т // и мо́лится о спасе́нии душ на́ших.

Стих: Хвали́те Его́ на си́лах Его́,/ хвали́те Его́ по мно́жеству вели́чествия Его́.

Прииди́те, ве́рнии, / ста́рицу блаже́нную Матро́ну вси согла́сно восхва́лим, / я́же в житии́ свое́м / попече́ние изря́дное о лю́дех показа́, / и ны́не прибега́ющим к ней благода́тная дея́ния явля́ет, / та́же, в ли́це святы́х водворя́ющися, / Престо́лу Бо́жию при́сно предстои́т // и мо́лится о спасе́нии душ на́ших.

Стих: Хвали́те Его́ в тимпа́не и ли́це,/ хвали́те Его́ во стру́нах и орга́не.

При́сно в Бо́га богатя́щися, / благода́ти Бо́жия испо́лньшися, / мно́гия лю́ди неду́жныя те́лом / здра́вы сотвори́ла еси́, / та́же проти́ву сил вра́жиих, / досажда́ющих душа́м челове́ческим, / вои́тельница дерзнове́нная / вои́стинну показа́лася еси́, // Матро́но, ста́рице богоблаже́нная.

Стих: Хвали́те Его́ в кимва́лех доброгла́сных, хвали́те Его́ в кимва́лех восклица́ния. / Вся́кое дыха́ние да хва́лит Го́спода.

Лише́ния, гоне́ния / и уничиже́ния от безбо́жных, / беды́ от сро́дник и бли́жних / Христа́ ра́ди претерпе́ла еси́. / Ему́ же, и жи́знь свою́ вве́ривши, / богоблаже́нная ста́рице Матро́но, / о творя́щих тебе́ напа́сти / дерзнове́нно моли́лася еси́, // да в ра́зум и́стины прии́дут и спасу́тся.

Глас 8: Сла́ва Отцу́ и Сы́ну и Свято́му Ду́ху

О, пресла́внаго чудесе́! / О, та́инства неизрече́ннаго! / Слепорожде́нная Матро́на пресла́вная / духо́вныма очи́ма во́лю Бо́жию прозира́ющая / та́йная душ челове́ческих зрит / и по́мощь изря́дную коему́ждо потре́бную подае́т. / Да ки́йждо, от нея́ благодея́ние прие́мший / Триеди́наго Бо́га усе́рдно просла́вит // и досто́йную хвалу́ Ему́ принесе́т.

Глас 8: И ны́не и при́сно и во ве́ки веко́в. Ами́нь.

О, преславна́го чудесе́! / Небесе́ и земли́ Цари́ца, / от святы́х сро́дников на́ших умоля́емая, / до ны́не зе́млю Ру́сскую покрыва́ет, / и ли́ка Своего́ изображе́ниями ми́лостивно обогаща́ет / о, Влады́чице Держа́вная, / не преста́ни и на бу́дущее вре́мя, / во утвержде́нии на Руси́ Правосла́вия // ми́лости и чудеса́ излива́ти до ве́ка. Ами́нь.

Славосло́вие вели́кое:

Сла́ва в вы́шних Бо́гу, и на земли́ мир, в челове́цех благоволе́ние. Хва́лим Тя, благослови́м Тя, кла́няем Ти ся, славосло́вим Тя, благодари́м Тя, вели́кия ра́ди сла́вы Твоея́. Го́споди Царю́ Небе́сный, Бо́же О́тче Вседержи́телю, Го́споди, Сы́не Единоро́дный, Иису́се Христе́, и Святы́й Ду́ше. Го́споди Бо́же, А́гнче Бо́жий, Сы́не Оте́чь, взе́мляй грех ми́ра, поми́луй нас; взе́мляй грехи́ ми́ра, приими́ моли́тву на́шу; седя́й одесну́ю Отца́, поми́луй нас. Я́ко Ты еси́ еди́н Свят, Ты еси́ еди́н Госпо́дь, Иису́с Христо́с, в сла́ву Бо́га Отца́. Ами́нь.

На всяк день благословлю́ Тя, и восхвалю́ И́мя Твое́ во ве́ки, и в век ве́ка.

Сподо́би, Го́споди, в день сей без греха́ сохрани́тися нам. Благослове́н еси́, Го́споди, Бо́же оте́ц на́ших, и хва́льно и просла́влено И́мя Твое́ во ве́ки. Ами́нь.

Бу́ди, Го́споди, ми́лость Твоя́ на нас, я́коже упова́хом на Тя.

Благослове́н еси́, Го́споди, научи́ мя оправда́нием Твои́м. (Три́жды)

Го́споди, прибе́жище был еси́ нам в род и род. Аз рех: Го́споди, поми́луй мя, исцели́ ду́шу мою́, я́ко согреши́х Тебе́. Го́споди, к Тебе́ прибего́х, научи́ мя твори́ти во́лю Твою́, я́ко Ты еси́ Бог мой: я́ко у Тебе́ исто́чник живота́, во све́те Твое́м у́зрим свет. Проба́ви ми́лость Твою́ ве́дущим Тя.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Три́жды)

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Святы́й Безсме́ртный, поми́луй нас.

Святы́й Бо́же, Святы́й Кре́пкий, Святы́й Безсме́ртный, поми́луй нас.

Тропа́рь, глас 2:

Бо́гом умудре́нную блаже́нную ста́рицу Матро́ну, / земли́ Ту́льския процвете́ние / и гра́да Москвы́ пресла́вное украше́ние, / восхва́лим днесь, ве́рнии. / Сия́ бо, све́та дневна́го не позна́вши, / све́том Христо́вым просвети́ся / и да́ром прозре́ния и исцеле́ния обогати́ся. / Пресе́льница же и стра́нница на земли́ бы́вши, / ны́не в черто́зех Небе́сных Престо́лу Бо́жию предстои́т // и мо́лится о душа́х на́ших.

Утверди́, Бо́же, святу́ю правосла́вную ве́ру, правосла́вных христиа́н во век ве́ка.

Честне́йшую Херуви́м и Сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу, Тя велича́ем.

Сла́ва, и ны́не. Го́споди, поми́луй. (Три́жды) Благослови́.

Господи Иисусе Христе, Сыне Божий, моли́твами Пречи́стыя Своея́ Ма́тере, блаженнной Матроны Московской, преподобных и богоносных отец наших и всех святы́х, поми́луй и спаси нас я́ко Благ и Челове́колюбец.

Многоле́тие:

Вели́каго Господи́на и Отца́ на́шего Кири́лла,/ Святе́йшаго Патри́арха Моско́вского и всея́ Руси́,/ и Господи́на на́шего (Высоко-) Преосвяще́ннейшаго (имярек),/ (архи-)епи́скопа (митрополита (титул)),/ богохрани́мую страну́ на́шу Росси́йскую,/  и вся правосла́вныя христи́аны,// Го́споди, сохрани́ их на мно́гая ле́та.