Шрифт

▲

Богослужебные тексты для домашнего употребления

Дни памяти святых

Последование Всеношного бдения в день памяти святителя Арсения Тверского. Для домашнего (келейного) совершения

Оглавление

ВСЕНО́ЩНОЕ БДЕ́НИЕ

ВЕЛИ́КАЯ ВЕЧЕ́РНЯ

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас. Ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Трижды.)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, (трижды). Сла́ва, и ны́не:

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Таже, Го́споди, поми́луй, (12), Сла́ва, и ны́не:

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 103:

Поется часть псалма:

Благослови́, душе́ моя́, Го́спода. / Благослове́н еси́, Го́споди. / Го́споди, Бо́же мой, возвели́чился еси́ зело́. / Благослове́н еси́, Го́споди. / Во испове́дание и в велеле́поту обле́клся еси́. / Благослове́н еси́, Го́споди. / Посреде́ гор про́йдут во́ды. / Ди́вна дела́ Твоя́, Го́споди. / Вся прему́дростию сотвори́л еси́. / Сла́ва Ти, Го́споди, сотвори́вшему вся.

Или читается псалом полностью:

Благослови́, душе́ моя́, Го́спода. Го́споди, Бо́же мой, возвели́чился еси́ зело́. Во испове́дание и в велеле́поту обле́клся еси́. Одея́йся све́том, я́ко ри́зою, простира́яй не́бо, я́ко ко́жу. Покрыва́яй вода́ми превы́спренняя Своя́, полага́яй о́блаки на восхожде́ние Свое́, ходя́й на крилу́ ве́треню. Творя́й А́нгелы Своя́ ду́хи и слуги́ Своя́ пла́мень о́гненный. Основа́яй зе́млю на тве́рди ея́, не преклони́тся в век ве́ка. Бе́здна, я́ко ри́за, одея́ние ея́, на гора́х ста́нут во́ды, от запреще́ния Твоего́ побе́гнут, от гла́са гро́ма Твоего́ убоя́тся. Восхо́дят го́ры и нисхо́дят поля́ в ме́сто, е́же основа́л еси́ им. Преде́л положи́л еси́, eго́же не пре́йдут, ниже́ обратя́тся покры́ти зе́млю. Посыла́яй исто́чники в де́брех, посреде́ гор про́йдут во́ды. Напая́ют вся зве́ри се́льныя, ждут она́гри в жа́жду свою́. На ты́х пти́цы небе́сныя привита́ют, от среды́ ка́мения дадя́т глас. Напая́яй го́ры от превы́спренних Свои́х, от плода́ дел Твои́х насы́тится земля́. Прозяба́яй траву́ ското́м, и злак на слу́жбу челове́ком, извести́ хлеб от земли́. И вино́ весели́т се́рдце челове́ка, ума́стити лице́ еле́ем, и хлеб се́рдце челове́ка укрепи́т. Насы́тятся древа́ польска́я, ке́дри Лива́нстии, и́хже еси́ насади́л. Та́мо пти́цы вогнездя́тся, ероди́ево жили́ще предводи́тельствует и́ми. Го́ры высо́кия еле́нем, ка́мень прибе́жище за́яцем. Сотвори́л есть луну́ во времена́, со́лнце позна́ за́пад свой. Положи́л еси́ тму, и бысть нощь, в не́йже про́йдут вси зве́рие дубра́внии. Ски́мни рыка́ющии, восхи́тити и взыска́ти от Бо́га пи́щу себе́. Возсия́ со́лнце и собра́шася и в ло́жах свои́х ля́гут. Изы́дет челове́к на де́ло свое́ и на де́лание свое́ до ве́чера. Я́ко возвели́чишася дела́ Твоя́, Го́споди, вся прему́дростию сотвори́л еси́, испо́лнися земля́ тва́ри Твоея́. Сие́ мо́ре вели́кое и простра́нное, та́мо га́ди, и́мже несть числа́, живо́тная ма́лая с вели́кими, та́мо корабли́ препла́вают, змий сей, eго́же созда́л еси руга́тися eму́. Вся к Тебе́ ча́ют, да́ти пи́щу им во бла́го вре́мя. Да́вшу Тебе́ им соберу́т, отве́рзшу Тебе́ ру́ку вся́ческая испо́лнятся бла́гости, отвра́щшу же Тебе́ лице́, возмяту́тся, отъи́меши дух их, и исче́знут, и в персть свою́ возвратя́тся. По́слеши Ду́ха Твоего́, и сози́ждутся, и обнови́ши лице́ земли́. Бу́ди сла́ва Госпо́дня во ве́ки, возвесели́тся Госпо́дь о де́лех Свои́х, призира́яй на зе́млю, и творя́й ю́ трясти́ся, прикаса́яйся гора́м, и дымя́тся. Воспою́ Го́сподеви в животе́ мое́м, пою́ Бо́гу моему́, до́ндеже есмь, да услади́тся Ему́ бесе́да моя́, аз же возвеселю́ся о Го́споде. Да исче́знут гре́шницы от земли́, и беззако́нницы, я́коже не бы́ти им. Благослови́, душе́ моя́, Го́спода.

Со́лнце позна́ за́пад свой. Положи́л еси́ тму, и бысть нощь. Я́ко возвели́чишася дела́ Твоя́, Го́споди, вся прему́дростию сотвори́л еси́.

Сла́ва, и ны́не: Аллилу́иа, аллилу́иа, аллилу́иа, сла́ва Тебе́ Бо́же. Трижды.

Блаже́н муж:

Блаже́н муж, и́же не и́де на сове́т нечести́вых.

Аллилу́иа, аллилу́иа, аллилу́иа.

Я́ко весть Госпо́дь путь пра́ведных, и путь нечести́вых поги́бнет.

Аллилу́иа, аллилу́иа, аллилу́иа.

Рабо́тайте Го́сподеви со стра́хом и ра́дуйтеся Ему́ с тре́петом.

Аллилу́иа, аллилу́иа, аллилу́иа.

Блаже́ни вси наде́ющиися Нань.

Аллилу́иа, аллилу́иа, аллилу́иа.

Воскресни́, Го́споди, спаси́ мя, Бо́же мой.

Аллилу́иа, аллилу́иа, аллилу́иа.

Госпо́дне есть спасе́ние, и на лю́дех Твои́х благослове́ние Твое́.

Аллилу́иа, аллилу́иа, аллилу́иа.

Сла́ва Отцу́ и Сы́ну и Свято́му Духу.

Аллилу́иа, аллилу́иа, аллилу́иа.

И ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Го́споди, воззва́х, глас 6:

Го́споди, воззва́х к Тебе́, услы́ши мя./ Услы́ши мя, Го́споди./ Го́споди, воззва́х к Тебе́, услы́ши мя:/ вонми́ гла́су моле́ния моего́,/ внегда́ воззва́ти ми к Тебе́.// Услы́ши мя, Го́споди.

Да испра́вится моли́тва моя́,/ я́ко кади́ло пред Тобо́ю,/ воздея́ние руку́ мое́ю/ – же́ртва вече́рняя.// Услы́ши мя, Го́споди.

Стихи́ры пра́здника, глас 6:

Стих: А́ще беззако́ния на́зриши, Го́споди, Го́споди, кто постои́т? Я́ко у Тебе́ очище́ние есть.

Ве́сь освяще́н, / богоно́сец показа́лся еси́, / ма́стию боже́ственною свято́ю / Святы́м Ду́хом пома́зан, / и све́тло всегда́ лику́я, святи́телю, / во свята́я святы́х входя́, / и лю́ди твоя́, я́ко священнотаи́нник, / небе́сным та́йнам научи́л еси́, / я́ко вои́стинну учи́тель избра́нен, / о́тче Арсе́ние богоно́се, / со дерзнове́нием моля́ся / о душа́х на́ших.

Стих: И́мене ра́ди Твоего́ потерпе́х Тя, Го́споди, потерпе́ душа́ моя́ в сло́во Твое́, упова́ душа́ моя́ на Го́спода.

Стих: От стра́жи у́тренния до но́щи, от стра́жи у́тренния да упова́ет Изра́иль на Го́спода.

Ве́сь от ю́ности облиста́л еси́ / жития́ доброде́телей луче́ю, / всеблаже́нне святи́телю, / и лю́ди твоя́ просвети́л еси́, / и хра́м Пречи́стыя воздви́гл еси́ пречу́ден. / И ны́не всели́лся еси́, иде́же Све́т невече́рний, / иде́же ликостоя́ния Ангел, / с ни́миже предстоя́, преподо́бне, / помина́й на́с, святи́телю Арсе́ние, / твою́ па́мять соверша́ющих, / со дерзнове́нием моля́ся / о душа́х на́ших.

Стих: Я́ко у Го́спода ми́лость, и мно́гое у Него́ избавле́ние, и Той изба́вит Изра́иля от всех беззако́ний eго́.

Стих: Хвали́те Го́спода вси язы́цы, похвали́те Его́ вси лю́дие.

Святи́тель богоприя́тен / и па́стырь и́стинен, / сто́лп непревра́тен, / основа́ние ве́ры недви́жимо, / благоче́стия степе́нь непоколеби́мый, / забра́ло Це́ркве неруши́мое, / святи́телей добро́та / и чуде́с исто́чник, / Арсе́ние, бы́л еси́. / Те́м тя́ ублажа́ем благочести́вно / пе́ньми и пе́сньми духо́вными / и всесвяще́нную соверша́ем па́мять твою́.

Стих: Я́ко утверди́ся ми́лость Его́ на нас, и и́стина Госпо́дня пребыва́ет во век.

Со́лнца светле́йши / просия́ на́м па́мять твоя́, / святи́телю Арсе́ние, / вседо́блий о́тче свяще́нне, / сего́ ра́ди тя́ ублажа́ем, богому́дре, / и моле́бно воспева́ем, / я́ко пока́зался еси́ земли́ на́шей чудотво́рец, / и моле́бник, и предста́тель тепле́йший. / Те́м моли́ся Христу́ Бо́гу / изба́витися ста́ду твоему́ от наве́та вра́жия, / е́же стяжа́л еси́, му́дре, / моли́твами твои́ми.

Глас 6: Сла́ва Отцу́ и Сы́ну и Свято́му Ду́ху.

Прииди́те, вси́ Росси́йския митропо́лии, вся́ко оте́чество, гра́дове и страны́, ца́рие и архиере́е, кня́зи и вси́ лю́дие, и вся́к язы́к, стеце́мся к честне́й па́мяти святи́теля пресла́вно на́шея земли́, дне́сь в пе́снех и пе́ниих восхва́лим вели́каго па́стыря и учи́теля, Арсе́ния богому́драго. Се́й бо измла́да жела́ние боже́ственно прии́м в се́рдцы свое́м и возлюби́в Христа́ и Пречи́стую Его́ Ма́терь, Ейже и оби́тель сотвори́, и хра́м че́стен созда́, и вельми́ украси́, и мно́жества мона́хов собра́. Те́мже твое́ пра́зднуем успе́ние, вси́ ве́рнии, о́крест стоя́ще твоея́ ра́ки, моле́бно к тебе́ ру́це простира́ем, святи́телю Арсе́ние: моли́ся Христу́ Бо́гу о ча́дех твои́х и о все́х, любо́вию пра́зднующих честну́ю па́мять твою́.

Глас 6: И ны́не и при́сно и во ве́ки веко́в. Ами́нь.

Кто́ Тебе́ не ублажи́т, Пресвята́я Де́во? Кто́ ли не воспое́т Твоего́ Пречи́стаго Рождества́? Безле́тно бо от Отца́ возсия́вый Сы́н Единоро́дный, То́йже от Тебе́, Чи́стыя, про́йде, неизрече́нно вопло́щся: естество́м Бо́г Сы́й и естество́м бы́в Челове́к на́с ра́ди; не во двою́ лицу́ разделя́емый, но во двою́ естеству́ несли́тно познава́емый. Того́ моли́, Чи́стая Всеблаже́нная, поми́ловатися душа́м на́шим.

Све́те Тихи́й:

Све́те Ти́хий святы́я сла́вы Безсме́ртнаго Отца́ Небе́снаго, Свята́го, Блаже́ннаго, Иису́се Христе́! Прише́дше на за́пад со́лнца, ви́девше свет вече́рний, пое́м Отца́, Сы́на и Свята́го Ду́ха, Бо́га. Досто́ин еси́ во вся времена́ пет бы́ти гла́сы преподо́бными, Сы́не Бо́жий, живо́т дая́й; те́мже мир Тя сла́вит.

1. При́тчей чте́ние.

Па́мять пра́веднаго с похвала́ми, и благослове́ние Госпо́дне на главе́ его́. Блаже́н челове́к, и́же обре́те прему́дрость, и сме́ртен, и́же уве́де ра́зум. Лу́чше бо сию́ купова́ти, не́жели зла́та и сребра́ сокро́вища. Честне́йшая же е́сть ка́мений многоце́нных, все́ же честно́е недосто́йно ея́ е́сть. Долгота́ бо дне́й и ле́та живота́ в десни́це ея́, в шу́йце же ея́ бога́тство и сла́ва. От у́ст ея́ исхо́дит пра́вда, зако́н же и ми́лость на язы́це но́сит. Послу́шайте у́бо мене́, о ча́да, честна́я бо реку́, и блаже́н челове́к, и́же пути́ моя́ сохрани́т: исхо́ди бо мои́ — исхо́ди живота́, и уготовля́ется хоте́ние от Го́спода. Сего́ ра́ди молю́ ва́с и предлага́ю мо́й гла́с сыново́м челове́ческим. Я́ко а́з, прему́дрость, устро́их сове́т, и ра́зум и смы́сл аз призва́х. Мо́й сове́т и утвержде́ние, мо́й ра́зум, моя́ же кре́пость. Аз мене́ лю́бящия люблю́, и́щущии же мене́ обря́щут благода́ть. Разуме́йте у́бо, незло́бивии, кова́рство, ненака́зании же, прилага́йте сердца́. Послу́шайте мене́ и па́ки, честна́я бо реку́, и отве́рзу от усте́н пра́вая, я́ко и́стине поучи́тся горта́нь мой, ме́рзки же пре́до мно́ю устны́ лжи́выя. С пра́вдою вси́ глаго́лы у́ст мои́х, ничто́же в ни́х стро́потно, ниже́ развраще́нно. Вся́ пра́ва су́ть разумева́ющим и про́ста обрета́ющим ра́зум. Науча́ю бо ва́с и́стине, да бу́дет о Го́споде наде́жда ва́ша, и испо́лнитеся Ду́ха.

2. При́тчей чте́ние.

Уста́ пра́веднаго ка́плют прему́дрость, язы́к же непра́веднаго поги́бнет. Устне́ муже́й пра́ведных ка́плют благода́ти, уста́ же нечести́вых развраща́ются. Ме́рила льсти́вая ме́рзость пред Го́сподем, ве́с же пра́ведный прия́тен Ему́. Иде́же а́ще вни́дет досажде́ние, та́мо и безче́стие, уста́ же смире́нных поуча́ются прему́дрости. Соверше́ние пра́вых наста́вит и́х, и поползнове́ние отрица́ющихся упасе́т и́х. Не по́льзуют име́ния в де́нь я́рости, пра́вда же изба́вит от сме́рти. Умер пра́ведный, оста́ви раска́яние, нару́чна же быва́ет и посмея́тельна нечести́вых па́губа. Пра́вда непоро́чнаго исправля́ет пути́, в нече́стие же па́дает непра́вда. Пра́вда муже́й пра́вых изба́вит и́х, безсове́стием же пленя́ются беззако́ннии. Сконча́вшуся му́жу пра́ведну, не поги́бнет наде́жда, похвала́ же нечести́вых поги́бнет. Пра́ведник от ло́ва убе́гнет, в него́же ме́сто предае́тся нечести́вый. Во усте́х нечести́вых се́ть гра́жданом, чу́вство же пра́ведных благопоспе́шное. Во благи́х пра́ведных испра́вится гра́д, и в поги́бели нечести́вых ра́дование. Во благослове́нии пра́вых возвы́сится гра́д, усты́ же нечести́вых раскопа́ется. Руга́ется гра́жданом лише́нный ра́зума, му́ж же му́дрый безмо́лвие во́дит.

3. Прему́дрости Соломо́ни чте́ние.

Пра́ведник, а́ще пости́гнет сконча́тися, в поко́и бу́дет. Ста́рость бо честна́ не многоле́тна, ниже́ в числе́ ле́т исчита́ется. Седи́на же е́сть му́дрость челове́ком, и во́зраст ста́рости — житие́ нескве́рное. Благоуго́ден Бо́гови бы́в, возлю́блен бы́сть, и живы́й посреде́ гре́шник, преста́влен бы́сть. Восхище́н бы́сть, да не зло́ба измени́т ра́зума его́ или́ ле́сть прельсти́т ду́шу его́. Раче́ние бо зло́бы помрача́ет до́брая и паре́ние по́хоти, пременя́ет у́м незло́бив. Сконча́вся вма́ле, испо́лни ле́та до́лга, уго́дна бо бе́ Го́сподеви душа́ его́, сего́ ра́ди потща́ся от среды́ лука́вствия. Лю́дие же ви́девше и не разуме́вше, ниже́ поло́жше в помышле́нии таково́е, я́ко благода́ть и ми́лость в преподо́бных Его́ и посеще́ние во избра́нных Его́.

Сподо́би, Го́споди:

Сподо́би, Го́споди, в ве́чер сей без греха́ сохрани́тися нам. Благослове́н еси́, Го́споди, Бо́же оте́ц на́ших, и хва́льно и просла́влено и́мя Твое́ во ве́ки. Ами́нь.

Бу́ди, Го́споди, ми́лость Твоя́ на нас, я́коже упова́хом на Тя. Благослове́н еси́, Го́споди, научи́ мя оправда́нием Твои́м. Благослове́н еси́, Влады́ко, вразуми́ мя оправда́нием Твои́м. Благослове́н еси́, Святы́й, просвети́ мя оправда́нии Твои́ми.

Го́споди, ми́лость Твоя́ во век, дел руку́ Твое́ю не пре́зри. Тебе́ подоба́ет хвала́, Тебе́ подоба́ет пе́ние, Тебе́ сла́ва подоба́ет. Отцу́ и Сы́ну и Свято́му Ду́ху, ны́не и при́сно и во ве́ки веко́в. Ами́нь.

На лити́и стихи́ры, гла́с 2:

Ум преподо́бен, я́ко при́сно к Бо́гу внима́ющ, свобо́ден же и самоизво́лен, я́ко страстьми́ непорабоще́н, ду́шу чи́сту име́я, се́рдце ми́лостивно и слеза́ми умиле́нно, те́ло же моли́твами к Бо́гу служе́бно, притяжа́л еси́, Арсе́ние святи́телю, сло́во му́дростно и смире́нно. Ве́сь от ю́ности благонра́вием Христу́ усво́ися, от Него́же святи́тельства досто́инство прия́л еси́, и лю́ди твоя́ упа́сл еси́, и Правосла́вием обогати́л еси́. Ны́не я́ко предстоя́ Христу́ Бо́гу, от вся́ких на́с бе́д изба́ви и спаси́ ду́ши на́ша.

Гла́с 4:

Ева́нгельских исто́чник словесы́ твои́ми, святи́телю, люде́й твои́х сердца́ напои́л еси́, и се́мя благоче́стия в ни́х моли́твами твои́ми возрасти́л еси́, и си́х прине́сл еси́ Христу́ пло́д изря́ден. И ны́не я́ко предстоя́ у Него́ с ли́ки апо́стол и святи́тель, помина́й на́с к Нему́ моли́твами твои́ми и сохрани́ на́с от вся́каго озлобле́ния, соверша́ющих ве́рою па́мять твою́.

Апо́стольскаго престо́ла сподо́бился еси́, святи́тельство прии́м, святи́телю Арсе́ние, ты́ бо украси́л еси́ це́рковь Ма́тере Госпо́дни и уго́дников Ея́, Анто́ния и Феодо́сия. В ню́же мы́ ны́не, ча́да твоя́, притека́юще и ли́ки составля́юще, тебе́ восхваля́ем, я́ко отца́ чадолюби́ва, и моле́бне к тебе́ ру́це простира́ем: моли́ся о на́с Христу́ Бо́гу и Пречи́стей Его́ Ма́тери, о и́же ве́рою и любо́вию тебе́ почита́ющих.

Сла́ва, гла́с 8:

Вся́к язы́к да почуди́тся ны́не о пресла́вных вели́чиих Бо́га на́шего, и вся́ка уста́ да подви́жутся на похвале́ние и да воспою́т Христа́ Бо́га, я́ко в после́дняя времена́ и ро́ды такова́ на́м произведе́ свети́льника вели́каго, святи́теля присноблаже́ннаго Арсе́ния. Те́мже вопие́м ему́: ра́дуйся, упасы́й Це́рковь Христо́ву и лю́ди твоя́, сего́ ра́ди ны́не на небесе́х в весе́лии водворя́ешися; ра́дуйся и ты́, богохрани́мый гра́де Тфе́рь, я́ко такова́ име́я в себе́ пожи́вша святи́теля; весели́теся и вы́, лю́дие сего́ гра́да, я́ко такова́ святи́теля и учи́теля сподо́бистеся прия́ти; ра́дуйся и весели́ся, Бо́жия Ма́тере це́рковь, я́ко люби́мый тобо́ю в тебе́ почи́л е́сть богому́дрый Арсе́ний. Но, о богоблаже́нный о́тче! не преста́й моля́ся о и́же ве́рою чту́щих всечестно́е твое́ преставле́ние.

И ны́не, богоро́дичен:

Влады́чице, приими́ моли́тву ра́б Твои́х и изба́ви на́с от вся́кия ну́жды и печа́ли.

Го́споди, поми́луй. (40 раз)

Стихи́ры на стихо́вне:

Стихи́ры: Глас 8:

Отче святи́телю Арсе́ние, / окрили́в у́м к Бо́гу ве́рою, / мирска́го смеше́ния / возгнуша́лся еси́ неуста́внаго, / и, кре́ст тво́й взе́м, / Всеви́дцу после́довал еси́, / и люби́тель мона́хов бы́л еси́ изря́ден. / Сего́ ра́ди святи́тельскаго престо́ла прия́ти сподо́бился еси́, / те́м не преста́й моля́ся о душа́х на́ших.

Сти́х: Честна́ пред Го́сподем / сме́рть преподо́бных Его́.

Отче святи́телю Арсе́ние, / ты́ от утро́бы к Бо́гу / прибли́жил еси́ тво́й у́м / и весьма́ прилежа́л еси́ Царю́ Вседержи́телю, / плоды́ досто́йны принося́ Ему́ / от твои́х по́двиг, святи́телю, / соукраша́емь доброде́тельными венцы́. / Те́м благи́х обре́л еси́ / восприя́тие, досточу́дне.

Сти́х: Блаже́н му́ж, боя́йся Го́спода, / в за́поведех Его́ восхо́щет зело́.

Отче святи́телю Арсе́ние, / ты́ мона́хом наказа́тель / и Росси́йстей земли́ звезда́ пресве́тлая, / осиява́я чудесы́ всю́ сию́ страну́, / тя́ бо избра́ Бо́г от ю́ности, о́тче, / па́стыря овца́м слове́сным и учи́теля. / Те́м моли́ся о на́с / с ли́ки святи́телей / и проси́ ста́ду твоему́ грехо́в оставле́ния.

Сла́ва, гла́с 6:

Яко всечестны́й коне́ц успе́ния твоего́ и е́же отше́ствие твое́ ко Го́споду уве́девше благочести́вии кня́зи, и священномона́си, и вси́ лю́дие, взе́мше честно́е те́ло твое́, принесо́ша тобо́ю в богозда́нную це́рковь Пречи́стыя Бо́жия Ма́тере. Сия́ ви́девше, мона́си твоея́ оби́тели, люби́мая тобо́ю ча́да, прите́кше и узре́вше тебе́ ме́ртва на одре́, пла́чущеся го́рько и, о́др слеза́ми облива́юще, велегла́сно тебе́ вопия́ху: увы́ на́м, па́стырю на́ш до́брый! к кому́ уже́ прибе́гнем? кто́ на́с посети́т? кто́ на́шу нищету́ удовли́т? кто́ бо тако́в бы́сть, я́коже ты́, любе́зен мона́хом? кому́ на́с оставля́еши, люби́мый на́ш о́тче Арсе́ние? Аще и те́лом отше́л еси́ от на́с, но ду́хом пребыва́й с на́ми, посеща́я на́с, и моли́ся за ны́ ко Го́споду и Пречи́стей Его́ Ма́тери, ве́рою и любо́вию па́мять твою́ почита́ющия.

И ны́не, Богоро́дичен:

Богоро́дице, Ты́ еси́ лоза́ и́стинная, возрасти́вшая на́м Пло́д живота́, Тебе́ мо́лимся: моли́ся, Влады́чице, со святы́ми апо́столы поми́ловати ду́ши на́ша.

Моли́тва свята́го Симео́на Богоприи́мца:

Ны́не отпуща́еши раба́ Твоего́, Влады́ко,/ по глаго́лу Твоему́, с ми́ром;/ я́ко ви́деста о́чи мои́ спасе́ние Твое́,/ е́же еси́ угото́вал пред лице́м всех люде́й,/ свет во открове́ние язы́ков,// и сла́ву люде́й Твои́х Изра́иля.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Го́споди, поми́луй. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Тропа́рь, глас 8:

Благоче́стно пожи́в во святи́тельстве, лю́ди просвети́л еси́ уче́нием твои́м, и о хра́ме Пречи́стыя вельми́ подвиза́вся, и люби́тель мона́хов бы́в, сего́ ра́ди от Христа́ па́ствы твоея́ вене́ц прия́л еси́. Те́мже, я́ко апо́стольскаго престо́ла наме́стника и святи́теля вели́каго чту́ще тя́, мо́лим, ча́да твоя́, блаже́нне: от все́х бе́д изба́ви на́с я́же ко Христу́ моли́твами твои́ми, святи́телю Христо́в Арсе́ние, о́тче на́ш. (Дважды)

Песнь Пресвятей Богородице:

Богоро́дице Де́во, ра́дуйся, / Благода́тная Мари́е, Госпо́дь с Тобо́ю; / благослове́на Ты в жена́х / и благослове́н Плод чре́ва Твоего́, / я́ко Спа́са родила́ еси́ душ на́ших. (Единожды)

Бу́ди И́мя Госпо́дне благослове́но от ны́не и до ве́ка. (Три́жды)

Псало́м 33:

Благословлю́ Го́спода на вся́кое вре́мя,/ вы́ну хвала́ Его́ во усте́х мои́х./ О Го́споде похва́лится душа́ моя́,/ да услы́шат кро́тцыи, и возвеселя́тся./ Возвели́чите Го́спода со мно́ю,/ и вознесе́м И́мя Его́ вку́пе./ Взыска́х Го́спода, и услы́ша мя,/ и от все́х скорбе́й мои́х изба́ви мя./ Приступи́те к Нему́, и просвети́теся,/ и ли́ца ва́ша не постыдя́тся./ Сей ни́щий воззва́, и Госпо́дь услы́ша и́,/ и от все́х скорбе́й его́ спасе́ и́./ Ополчи́тся а́нгел Госпо́день о́крест боя́щихся Его́,/ и изба́вит их./ Вкуси́те и ви́дите, я́ко благ Госпо́дь:/ блаже́н муж, и́же упова́ет Нань./ Бо́йтеся Го́спода, вси́ святи́и Его́,/ я́ко несть лише́ния боя́щимся Его́./ Бога́тии обнища́ша и взалка́ша:/ взыска́ющии же Го́спода// не лиша́тся вся́каго бла́га.

У́ТРЕНЯ.

Шестопса́лмие:

Сла́ва в вы́шних Бо́гу, и на земли́ мир, в челове́цех благоволе́ние. (Три́жды)

Го́споди, устне́ мои́ отве́рзеши, и уста́ моя́ возвестя́т хвалу́ Твою́. (Два́жды)

Псалом 3:

Го́споди, что ся умно́жиша стужа́ющии ми́? Мно́зи востаю́т на мя, мно́зи глаго́лют души́ мое́й: несть спасе́ния eму́ в Бо́зе eго́. Ты же, Го́споди, Засту́пник мой еси́, сла́ва моя́ и вознося́й главу́ мою́. Гла́сом мои́м ко Го́споду воззва́х, и услы́ша мя от горы́ святы́я Своея́. Аз усну́х, и спах, воста́х, я́ко Госпо́дь засту́пит мя. Не убою́ся от тем люде́й, о́крест напа́дающих на мя. Воскресни́, Го́споди, спаси́ мя, Бо́же мой, я́ко Ты порази́л еси́ вся вражду́ющыя ми всу́е: зу́бы гре́шников сокруши́л еси́. Госпо́дне есть спасе́ние, и на лю́дех Твои́х благослове́ние Твое́.

Аз усну́х, и спах, воста́х, я́ко Госпо́дь засту́пит мя.

Псалом 37:

Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́. Я́ко стре́лы Твоя́ унзо́ша во мне, и утверди́л еси́ на мне ру́ку Твою́. Несть исцеле́ния в пло́ти мое́й от лица́ гне́ва Твоего́, несть ми́ра в косте́х мои́х от лица́ грех мои́х. Я́ко беззако́ния моя́ превзыдо́ша главу́ мою́, я́ко бре́мя тя́жкое отяготе́ша на мне. Возсмерде́ша и согни́ша ра́ны моя́ от лица́ безу́мия моего́. Пострада́х и сляко́хся до конца́, весь день се́туя хожда́х. Я́ко ля́двия моя́ напо́лнишася поруга́ний, и несть исцеле́ния в пло́ти мое́й. Озло́блен бых и смири́хся до зела́, рыка́х от воздыха́ния се́рдца моего́. Го́споди, пред Тобо́ю все жела́ние мое́ и воздыха́ние мое́ от Тебе́ не утаи́ся. Се́рдце мое́ смяте́ся, оста́ви мя си́ла моя́, и свет о́чию мое́ю, и той несть со мно́ю. Дру́зи мои́ и и́скреннии мои́ пря́мо мне прибли́жишася и ста́ша, и бли́жнии мои́ отдале́че мене́ ста́ша и нужда́хуся и́щущии ду́шу мою́, и и́щущии зла́я мне глаго́лаху су́етная и льсти́вным весь день поуча́хуся. Аз же я́ко глух не слы́шах и я́ко нем не отверза́яй уст свои́х. И бых я́ко челове́к не слы́шай и не имы́й во усте́х свои́х обличе́ния. Я́ко на Тя, Го́споди, упова́х, Ты услы́шиши, Го́споди Бо́же мой. Я́ко рех: да не когда́ пора́дуют ми ся врази́ мои́: и внегда́ подвижа́тися нога́м мои́м, на мя велере́чеваша. Я́ко аз на ра́ны гото́в, и боле́знь моя́ предо мно́ю есть вы́ну. Я́ко беззако́ние мое́ аз возвещу́ и попеку́ся о гресе́ мое́м. Врази́ же мои́ живу́т и укрепи́шася па́че мене́, и умно́жишася ненави́дящии мя без пра́вды. Воздаю́щии ми зла́я возблага́я оболга́ху мя, зане́ гоня́х благосты́ню. Не оста́ви мене́, Го́споди Бо́же мой, не отступи́ от Мене́. Вонми́ в по́мощь мою́, Го́споди спасе́ния моего́.

Не оста́ви мене́, Го́споди Бо́же мой, не отступи́ от Мене́. Вонми́ в по́мощь мою́, Го́споди спасе́ния моего́.

Псалом 62:

Бо́же, Бо́же мой, к Тебе́ у́тренюю, возжада́ Тебе́ душа́ моя́, коль мно́жицею Тебе́ плоть моя́, в земли́ пу́сте и непрохо́дне, и безво́дне. Та́ко во святе́м яви́хся Тебе́, ви́дети си́лу Твою́ и сла́ву Твою́. Я́ко лу́чши ми́лость Твоя́ па́че живо́т, устне́ мои́ похвали́те Тя. Та́ко благословлю́ Тя в животе́ мое́м, о и́мени Твое́м воздежу́ ру́це мои́. Я́ко от ту́ка и ма́сти да испо́лнится душа́ моя́, и устна́ма ра́дости восхва́лят Тя уста́ моя́. А́ще помина́х Тя на посте́ли мое́й, на у́тренних поуча́хся в Тя. Я́ко был еси́ Помо́щник мой, и в кро́ве крилу́ Твое́ю возра́дуюся. Прильпе́ душа́ моя́ по Тебе́, мене́ же прия́т десни́ца Твоя́. Ти́и же всу́е иска́ша ду́шу мою́, вни́дут в преиспо́дняя земли́, предадя́тся в ру́ки ору́жия, ча́сти ли́совом бу́дут. Царь же возвесели́тся о Бо́зе, похва́лится всяк клены́йся Им, я́ко загради́шася уста́ глаго́лющих непра́ведная.

На у́тренних поуча́хся в Тя. Я́ко был еси́ Помо́щник мой, и в кро́ве крилу́ Твое́ю возра́дуюся. Прильпе́ душа́ моя́ по Тебе́, мене́ же прия́т десни́ца Твоя́.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Го́споди поми́луй. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Псалом 87:

Го́споди Бо́же спасе́ния моего́, во дни воззва́х, и в нощи́ пред Тобо́ю. Да вни́дет пред Тя моли́тва моя́: приклони́ у́хо Твое́ к моле́нию моему́, я́ко испо́лнися зол душа́ моя́, и живо́т мой аду прибли́жися. Привмене́н бых с низходя́щими в ров, бых я́ко челове́к без по́мощи, в ме́ртвых свобо́дь, я́ко я́звеннии спя́щии во гро́бе, и́хже не помяну́л еси́ ктому́, и ти́и от руки́ Твоея́ отринове́ни бы́ша. Положи́ша мя в ро́ве преиспо́днем, в те́мных и се́ни сме́ртней. На мне утверди́ся я́рость Твоя́, и вся во́лны Твоя́ наве́л еси́ на мя. Уда́лил еси́ зна́емых мои́х от Мене́, положи́ша мя ме́рзость себе́: пре́дан бых и не исхожда́х. О́чи мои́ изнемого́сте от нищеты́, воззва́х к Тебе́, Го́споди, весь день, возде́х к Тебе́ ру́це мои́. Еда́ ме́ртвыми твори́ши чудеса́? Или́ вра́чеве воскреся́т, и испове́дятся Тебе́? Еда́ пове́сть кто во гро́бе ми́лость Твою́, и и́стину Твою́ в поги́бели? Еда́ позна́на бу́дут во тьме чудеса́ Твоя́, и пра́вда Твоя́ в земли́ забве́нней? И аз к Тебе́, Го́споди, воззва́х и у́тро моли́тва моя́ предвари́т Тя. Вску́ю, Го́споди, отре́еши ду́шу мою́, отвраща́еши лице́ Твое́ от Мене́? Нищ есмь аз, и в труде́х от ю́ности моея́; возне́с же ся, смири́хся, и изнемого́х. На мне преидо́ша гне́ви Твои́, устраше́ния Твоя́ возмути́ша мя, обыдо́ша мя я́ко вода́, весь день одержа́ша мя вку́пе. Уда́лил еси́ от Мене́ дру́га и и́скренняго, и зна́емых мои́х от страсте́й.

Го́споди Бо́же спасе́ния моего́, во дни воззва́х, и в нощи́ пред Тобо́ю. Да вни́дет пред Тя моли́тва моя́: приклони́ у́хо Твое́ к моле́нию моему́.

Псалом 102:

Благослови́, душе́ моя́, Го́спода, и вся вну́тренняя моя́ и́мя свя́тое Его́. Благослови́, душе́ моя́, Го́спода, и не забыва́й всех воздая́ний Его́, очища́ющаго вся беззако́ния твоя́, исцеля́ющаго вся неду́ги твоя́, избавля́ющаго от истле́ния живо́т твой, венча́ющаго тя ми́лостию и щедро́тами, исполня́ющаго во благи́х жела́ние твое́: обнови́тся я́ко о́рля ю́ность твоя́. Творя́й ми́лостыни Госпо́дь, и судьбу́ всем оби́димым. Сказа́ пути́ Своя́ Моисе́ови, сыново́м Изра́илевым хоте́ния Своя́: Щедр и Ми́лостив Госпо́дь, Долготерпели́в и Многоми́лостив. Не до конца́ прогне́вается, ниже́ во век вражду́ет, не по беззако́нием на́шым сотвори́л есть нам, ниже́ по грехо́м на́шым возда́л есть нам. Я́ко по высоте́ небе́сней от земли́, утверди́л есть Госпо́дь ми́лость Свою́ на боя́щихся Его́. Ели́ко отстоя́т восто́цы от за́пад, уда́лил есть от нас беззако́ния на́ша. Я́коже ще́дрит оте́ц сы́ны, уще́дри Госпо́дь боя́щихся Его́. Я́ко Той позна́ созда́ние на́ше, помяну́, я́ко персть есмы́. Челове́к, я́ко трава́ дни́е eго́, я́ко цвет се́льный, та́ко оцвете́т, я́ко дух про́йде в нем, и не бу́дет, и не позна́ет ктому́ ме́ста своего́. Ми́лость же Госпо́дня от ве́ка и до ве́ка на боя́щихся Его́, и пра́вда Его́ на сыне́х сыно́в, храня́щих заве́т Его́, и по́мнящих за́поведи Его́ твори́ти я́. Госпо́дь на Небеси́ угото́ва Престо́л Свой, и Ца́рство Его́ все́ми облада́ет. Благослови́те Го́спода вси А́нгели Его́, си́льнии кре́постию, творя́щии сло́во Его́, услы́шати глас слове́с Его́. Благослови́те Го́спода вся Си́лы Его́, слуги́ Его́, творя́щии во́лю Его́. Благослови́те Го́спода вся дела́ Его́, на вся́ком ме́сте влады́чества Его́, благослови́, душе́ моя́, Го́спода.

На вся́ком ме́сте влады́чества Его́, благослови́, душе́ моя́, Го́спода.

Псалом 142:

Го́споди, услы́ши моли́тву мою́, внуши́ моле́ние мое́ во и́стине Твое́й, услы́ши мя в пра́вде Твое́й и не вни́ди в суд с рабо́м Твои́м, я́ко не оправди́тся пред Тобо́ю всяк живы́й. Я́ко погна́ враг ду́шу мою́, смири́л есть в зе́млю живо́т мой, посади́л мя есть в те́мных, я́ко ме́ртвыя ве́ка. И уны́ во мне дух мой, во мне смяте́ся се́рдце мое́. Помяну́х дни дре́вния, поучи́хся во всех де́лех Твои́х, в творе́ниих руку́ Твое́ю поуча́хся. Возде́х к Тебе́ ру́це мои́, душа́ моя́, я́ко земля́ безво́дная Тебе́. Ско́ро услы́ши мя, Го́споди, исчезе́ дух мой, не отврати́ лица́ Твоего́ от Мене́, и уподо́блюся низходя́щым в ров. Слы́шану сотвори́ мне зау́тра ми́лость Твою́, я́ко на Тя упова́х. Скажи́ мне, Го́споди, путь во́ньже пойду́, я́ко к Тебе́ взях ду́шу мою́. Изми́ мя от враг мои́х, Го́споди, к Тебе́ прибего́х. Научи́ мя твори́ти во́лю Твою́, я́ко Ты еси́ Бог мой. Дух Твой Благи́й наста́вит мя на зе́млю пра́ву. И́мене Твоего́ ра́ди, Го́споди, живи́ши мя, пра́вдою Твое́ю изведе́ши от печа́ли ду́шу мою́. И ми́лостию Твое́ю потреби́ши враги́ моя́ и погуби́ши вся стужа́ющыя души́ мое́й, я́ко аз раб Твой есмь.

Услы́ши мя, Го́споди, в пра́вде Твое́й и не вни́ди в суд с рабо́м Твои́м.

Дух Твой Благи́й наста́вит мя на зе́млю пра́ву.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Тропа́рь глас 8:

Сла́ва Отцу́ и Сы́ну и Свято́му Ду́ху. И ны́не и при́сно и во ве́ки веко́в. Ами́нь.

Глас 8: И́же нас ра́ди рожде́йся от Де́вы / и, распя́тие претерпе́в, Благи́й, / испрове́ргий сме́ртию смерть / и Воскресе́ние явле́й я́ко Бог, / не пре́зри, я́же созда́л еси́ руко́ю Твое́ю; / яви́ человеколю́бие Твое́, Ми́лостиве. / Приими́ ро́ждшую Тя, Богоро́дицу, моля́щуюся за ны, / и спаси́, Спа́се наш, лю́ди отча́янныя.

Здесь читается кафизма, положенная по дню, или сразу седальны:

Го́споди, поми́луй. (Три́жды)

Седален, глас 8:

Ле́сть ми́ра, и бога́тства све́тлость, и высо́кую любо́вь роди́телей преоби́дев, смире́нием же к нищете́ уча́щему Влады́це Христу́ после́довал еси́, от Него́же поще́нием и моли́твами и́стинное бога́тство, и су́щую све́тлость, и Ца́рство недви́жимо, святи́телю Арсе́ние, насле́довал еси́. К Нему́же ны́не моли́ся грехо́в оставле́ние пода́ти чту́щим любо́вию святу́ю па́мять твою́.

Сла́ва Отцу́ и Сы́ну и Свято́му Ду́ху. И ны́не и при́сно и во ве́ки веко́в. Ами́нь.

Глас 8: Да Сво́й па́ки сози́ждеши о́браз, Спа́се, истле́вший страстьми́, небе́сных утаи́вся суще́ств, воплоти́лся еси́ от Де́вы, Ейже со стра́хом вопие́м: ра́дуйся, Обра́дованная, Госпо́дь с Тобо́ю.

Седален, глас 3:

Доброде́телей де́ланием це́ркви возсия́л еси́ вели́кое со́лнце и уче́нием слове́с твои́х просвети́ лю́ди твоя́. Те́мже и по успе́нии несконча́ему благода́ть прия́л еси́, святи́телю Арсе́ние, моли́ Христа́ Бо́га дарова́ти на́м ве́лию ми́лость.

Сла́ва Отцу́ и Сы́ну и Свято́му Ду́ху. И ны́не и при́сно и во ве́ки веко́в. Ами́нь.

Глас 3: Яко невозде́ланная, Де́во, лоза́, красне́йший Гро́зд прозябла́ еси́, источа́ющ на́м вино́ спасе́ния, все́х веселя́щее ду́ши же и телеса́. Те́мже, я́ко вину́ Тя́ до́брых блажа́ще при́сно, со Ангелом вопие́м Ти́: ра́дуйся, Благода́тная!

Полиеле́й:

Хвали́те И́мя Госпо́дне, хвали́те, раби́ Го́спода.

Аллилу́иа, аллилу́иа, аллилу́иа.

Благослове́н Госпо́дь от Сио́на, живы́й во Иерусали́ме.

Аллилу́иа, аллилу́иа, аллилу́иа.

Испове́дайтеся Го́сподеви, я́ко Благ, я́ко в век ми́лость Его́.

Аллилу́иа, аллилу́иа, аллилу́иа.

Испове́дайтеся Бо́гу Небе́сному, я́ко в век ми́лость Его́.

Аллилу́иа, аллилу́иа, аллилу́иа.

Велича́ние:

Велича́ем тя́, святи́телю о́тче Арсе́ние, и чте́м святу́ю па́мять твою́, ты́ бо мо́лиши за на́с Христа́ Бо́га на́шего.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа,// сла́ва Тебе́, Бо́же. (Трижды)

Седа́льны:

Глас 8:

Ми́лостивому Христо́ву уго́днику, незло́бивому и кро́ткому, вси́ тебе́ приле́жно мо́лимся и любо́вию зове́м: ра́дуйся, святи́телю Арсе́ние, украси́вый хра́м Бо́жия Ма́тере и уго́дников Ея́ Анто́ния и Феодо́сия. С ни́миже моли́ Христа́ Бо́га грехо́в оставле́ние дарова́ти чту́щим любо́вию святу́ю па́мять твою́.

Глас 8: Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Егда́ прии́дет суди́ти все́й земли́ все́х Влады́ка и Творе́ц, овца́м мя́ причти́ десны́м, осужде́ннаго, и кроме́шния тмы́ и вся́каго муче́ния, Твоего́ непотре́бнаго раба́ исхити́, молю́ся, да благода́рно велича́ю бога́тство Твоея́ бла́гости, Богоро́дице Всенепоро́чная, и вопию́ Ти, ра́дуяся: моли́ся Христу́ Бо́гу прегреше́ний оставле́ние да́ти мне́, Тебе́ бо и́мам наде́жду, ра́б Тво́й.

Степе́нна, глас 4:

От ю́ности моея́/ мно́зи бо́рют мя стра́сти,/ но Сам мя заступи́// и спаси́, Спа́се мой.

Ненави́дящии Сио́на,/ посрами́теся от Го́спода,/ я́ко трава́ бо огне́м// бу́дете изсо́хше.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Святы́м Ду́хом/ вся́ка душа́ живи́тся,/ и чистото́ю возвыша́ется,// светле́ется Тро́йческим еди́нством, священнота́йне.

Го́споди, поми́луй. (Три́жды)

От Иоа́нна Свята́го Ева́нгелия чте́ние

Сла́ва, Тебе́, Го́споди, сла́ва Тебе́.

Рече́ Госпо́дь ко прише́дшым к Нему́ иуде́ем: Аз есмь дверь, Мно́ю а́ще кто вни́дет, спасе́тся, и вни́дет, и изы́дет, и па́жить обря́щет. Тать не прихо́дит, ра́зве да укра́дет, и убие́т, и погуби́т, Аз приидо́х, да живо́т и́мут и ли́шше и́мут. Аз есмь па́стырь до́брый, па́стырь до́брый ду́шу свою́ полага́ет за о́вцы. А нае́мник, и́же несть па́стырь, ему́же не суть о́вцы своя́, ви́дит во́лка гряду́ща и оставля́ет о́вцы, и бе́гает, и волк расхи́тит их, и распу́дит о́вцы. А нае́мник бежи́т, я́ко нае́мник есть и неради́т о овца́х. Аз есмь па́стырь до́брый, и зна́ю Моя́, и зна́ют Мя Моя́. Я́коже зна́ет Мя Оте́ц, и Аз зна́ю Отца́, и ду́шу Мою́ полага́ю за о́вцы. И и́ны о́вцы и́мам, я́же не суть от двора́ сего́, и ты́я Ми подоба́ет привести́, и глас Мой услы́шат, и бу́дет еди́но ста́до, и еди́н Па́стырь.

Сла́ва, Тебе́, Го́споди, сла́ва Тебе́.

Псало́м 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя. Я́ко беззако́ние мое́ аз зна́ю и грех мой предо мно́ю есть вы́ну. Тебе́ Еди́ному согреши́х, и лука́вое пред Тобо́ю сотвори́х, я́ко да оправди́шися во словесе́х Твои́х и победи́ши, внегда́ суди́ти Ти. Се бо в беззако́ниих зача́т есмь, и во гресе́х роди́ мя ма́ти моя́. Се бо и́стину возлюби́л еси́, безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся, омы́еши мя, и па́че сне́га убелю́ся. Слу́ху моему́ да́си ра́дость и весе́лие, возра́дуются ко́сти смире́нныя. Отврати́ лице́ Твое́ от грех мои́х, и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́, и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́, и Ду́хом Влады́чним утверди́ мя. Научу́ беззако́нныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́, возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо, всесожже́ния не благоволи́ши. Же́ртва Бо́гу дух сокруше́н, се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския, тогда́ благоволи́ши же́ртву пра́вды, возноше́ние и всесожега́емая: тогда́ возложа́т на олта́рь Твой тельцы́.

Глас 6:

Сла́ва Отцу́ и Сы́ну и Свято́му Ду́ху./ Моли́твами святителя Арсения, / Ми́лостиве, очи́сти / мно́жества согреше́ний на́ших.

И ны́не и при́сно и во ве́ки веко́в. Ами́нь./ Моли́твами Богоро́дицы, / Ми́лостиве, очи́сти / мно́жества согреше́ний на́ших.

Поми́луй мя, Бо́же,/ по вели́цей ми́лости Твое́й,/ и по мно́жеству щедро́т Твои́х// очи́сти беззако́ние мое́.

Стихи́ра, глас 6

Ду́ха Свята́го благода́ть в твои́х устна́х излия́ся, о́тче, и бы́л еси́ па́стырь Христо́вы Це́ркве, уча́ слове́сныя о́вцы ве́ровати в Тро́ицу Единосу́щную, во Еди́но Божество́.

Го́споди, поми́луй. (12 раз)

Кано́н святи́теля Арсе́ния. Гла́с 2.

Пе́снь 1.

Ирмос: Гряди́те, лю́дие, пои́м пе́снь Христу́ Бо́гу, разде́льшему мо́ре и наста́вльшему лю́ди, я́же изведе́ из рабо́ты еги́петския, я́ко просла́вися.

Припев: Святителю отче Арсение, моли Бога о нас.

Све́те от Све́та, Христе́ Бо́же, от Отца́ пре́жде ве́к рожде́йся и искони́ Сы́й со Отце́м и Ду́хом, мра́к души́ моея́ отгна́в, озари́ у́м мо́й, молю́ся, я́ко да возмогу́ пе́ти Твоего́ уго́дника, Арсе́ния свяще́ннаго.

Аще и челове́к еси́ естество́м, о́тче, но Ангельски на земли́ пожи́л еси́, десна́го пути́ от ю́ности е́мься, целому́дрия рачи́тель бы́в, Ду́ха Свята́го честно́е оби́телище, Арсе́ние свяще́нне, яви́лся еси́.

Му́дрости глави́зну, стра́х Бо́жий возлюби́в и за́поведем Его́ при́сно поуча́яся, дре́во насади́ся при исхо́дищах во́д духо́вных, от ни́хже, о́тче, напоя́емь, пло́д Христу́, Арсе́ние, прине́слся еси́.

Богородичен: Услы́ша Ева прама́ти, Чи́стая: в печа́лех роди́ши ча́да. Ты́ же, Де́во, услы́шала еси́: Госпо́дь с Тобо́ю, ра́дуйся! И ра́дованным гла́сом, Богоневе́сто, печа́ль прама́тере потре́бльши.

Пе́снь 3.

Ирмос: На ка́мени мя́ ве́ры утверди́в, разшири́л еси́ уста́ моя́ на враги́ моя́, возвесели́бося ду́х мо́й, внегда́ пе́ти: не́сть свя́т, я́коже Бо́г на́ш, и не́сть пра́веден, па́че Тебе́, Го́споди.

Презре́в ни́жняя, я́ко попира́ема, и любо́вь роди́телей преоби́дев, Христа́ взыска́л еси́, Его́же любо́вию ду́шу твою́ уязви́л еси́, Того́ любя́ и Того́ ища́ красоты́.

Свети́льник сы́й, твою́ ду́шу украша́я слеза́ми, ра́но ко Христу́ у́тренюя, ру́ку же просте́ртием в моли́твах, Амали́ка — те́ло умертви́л еси́ и на го́ру безстра́стия возше́л еси́.

Благоро́дием высо́к и благоду́шием изя́щен, ра́зума му́дростию удивле́н бы́л еси́, цве́т я́ко прекра́сный, чистото́ю сия́я, и све́тлым смире́нием, Арсе́ние о́тче, украси́лся еси́.

Богородичен: Ма́ти Бо́жия, Пречи́стая, Благослове́нная и Пренепоро́чная, души́ моея́ стру́пы исцели́ и стра́сти плотски́я умертви́, умири́ у́м мо́й, от вся́каго вре́да и вра́жия напа́сти изми́ мя́, Влады́чице.

Седа́лен, гла́с 4:

Вели́кий Христо́в святи́тель да воспое́тся, сто́лп све́тлый, просвеща́яй на́с чуде́с светлостьми́, богоно́сный о́тче на́ш Арсе́ние, па́стырю и учи́телю земли́ на́шея, Христа́ моли́ о ста́де твое́м и о все́х, ве́рою и любо́вию чту́щих святу́ю па́мять твою́.

Сла́ва, и ны́не, Богородичен:

Пое́м Тя́, Богоневе́сто, Ма́ти Христа́ Бо́га, сла́вяще рождество́ Твое́ непостижи́мое, и́мже изба́вихомся от ле́сти диа́воли и вся́кия беды́, Богоро́дице Влады́чице, и ве́рно вопие́м: поми́луй ста́до Твое́, еди́на Всепе́тая.

Пе́снь 4.

Ирмос: Пою́ Тя, слу́хом бо, Го́споди, услы́шах и ужасо́хся: до мене́ бо и́деши, мене́ ища́, заблу́ждшаго. Те́м мно́гое Твое́ снизхожде́ние, е́же на мя́, прославля́ю, Многоми́лостиве.

Вельми́ украси́л еси́ престо́л тво́й, святи́телю Арсе́ние, велики́ми бо чудесы́ преспе́л еси́ и житие́м све́тлым, сего́ ра́ди превели́кий Бо́г на́ш вельми́ тя́ просла́ви.

Ми́лости Пода́теля Го́спода ве́дый, блаже́нне, те́пле Его́ умоли́л еси́ на исцеле́ние и спасе́ние мно́гим, с ве́рою к тебе́ притека́ющим и в по́мощь тя́ призыва́ющим.

Врача́ изря́дна разли́чно неду́гующим и наставле́ние все́м, прельще́ным злы́м сове́том, Христо́с тя́ дарова́, чудотво́рца земли́ на́шей, святи́теля Арсе́ния, те́мже тя́ ублажа́ем.

Богородичен: Исцели́ла еси́ сокруше́ние, Всенепоро́чная, дре́вняго окая́нства землены́х, поро́ждшая Го́спода и Царя́ Христа́, поне́сшаго неду́ги на́ша за благосе́рдие неизглаго́ланное, Де́во Ма́ти.

Пе́снь 5

Ирмос: Просвеще́ние во тме́ лежа́щих, спасе́ние отча́янных, Христе́ Спа́се мо́й, к Тебе́ у́тренюю, Царю́ ми́ра, просвети́ мя сия́нием Твои́м, ино́го бо ра́зве Тебе́ Бо́га не зна́ю.

Сла́вный па́стырь, неистощи́мый исто́чник исцеле́ния, церко́вный сто́лп, ве́рных утвержде́ние, вели́кий свети́льник многосве́тлый, святи́телю Арсе́ние.

Яко светоза́рно житие́, я́ко зело́ чу́дно, я́ко красни́ тру́дове твои́, я́ко вели́ка благода́ть свы́ше дана́ ти, му́дре, сего́ ра́ди ве́рою почита́ем тя́, святи́телю Арсе́ние.

Пресве́тлая твоя́ па́мять простира́ется в ми́ре и просвеща́ет челове́ческия ду́ши све́том благода́ти; ю́же соверша́ющих любо́вию, от бе́д на́с изба́ви, мо́лимся, святи́телю Арсе́ние.

Богородичен: Се́ о́др Соломо́нов, его́же обстоя́т си́льнии, Богодухнове́нных писа́ний ны́не прорица́ния, на не́мже Христо́с Бо́г воплоще́нием почи́л е́сть, Благослове́нная и Обра́дованная.

Пе́снь 6.

Ирмос: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же, мя́ возведи́.

Свети́льника тя́ су́щии во тме́ пре́лести, неле́стно наставля́юща, обре́тше, к путе́м живота́, богоблаже́нне Арсе́ние. И ны́не по сме́рти вра́чь яви́лся еси́ боля́щим Ду́ха Боже́ственною благода́тию.

Зако́ном повину́яся Влады́чним, заблу́ждшия взыска́л еси́ и во огра́ду покая́ния приве́л еси́, я́ко па́стырь и́стинен показа́вся ста́ду твоему́, о́тче святи́телю Арсе́ние.

Свяще́ния хра́м, о́тче, Боже́ственнаго Ду́ха ве́рою бы́в, созда́л еси́ хра́м Пречи́стыя Ма́тере Бо́жия и Ея́ уго́дников, Анто́ния и Феодо́сия, и оби́тель пречу́дну сотвори́л и украси́л еси́, в не́йже те́ло твое́ положено́ бы́сть.

Богородичен: Зако́ни о Тебе́ пресла́вно, Де́во, обновля́ются: ражда́еши бо без се́мене Бо́га Спа́са и пребыва́еши, де́вствующи па́ки, — стра́нно чу́до! — те́м Тя́, Ма́терь Емману́илеву, благоче́стно испове́дуем.

Конда́к, гла́с 8:

Восприе́мши ра́достно честны́я твоя́ мо́щи пречи́стая це́рковь, в ню́же че́стно вноси́мы мно́жеством священномона́хов и кня́зи благове́рными, и я́же прие́мши, я́ко сокро́вище многоце́нное. Те́мже и мы́ ны́не, твоея́ огра́ды слове́сныя о́вцы, о́крест ра́ки твоея́ предстоя́ще, любе́зно вопие́м ти́: не забу́ди ча́д твои́х, о́тче, и́хже му́дре собра́л и возлюби́л еси́, я́ко да зове́м ти́: ра́дуйся, святи́телю Арсе́ние, па́стырю и учи́телю на́ш.

Икос:

От скве́рных усте́н, от нечи́ста се́рдца, ка́ко ти́ принесу́ хвале́ния, окая́нный? Ужаса́юся и трепе́щу, но, наде́яся на тво́й благосе́рдный нра́в, о́тче, хвалу́ ти прино́сим, глаго́люще: ра́дуйся, па́стырю на́ш до́брый, святи́телю Арсе́ние, упасы́й ста́до Христо́во; ра́дуйся, ди́вный чудотво́рче, притека́ющим к тебе́ с ве́рою неоску́дно исцеле́ние подава́я; ра́дуйся, це́рквам воздви́жение и и́ноков люби́телю, си́рым и ни́щим пода́телю; ра́дуйся и ты́, богохрани́мый гра́де Тфе́рь, я́ко такова́ име́ в себе́ пожи́вша святи́теля; ра́дуйся и весели́ся, Бо́жия Ма́тере це́рковь, я́ко люби́мый Тобо́ю в тебе́ почи́л е́сть богому́дрый Арсе́ний. Но, о богоблаже́нне о́тче! Аще и те́лом преше́л еси́ от на́с, но ду́хом пребыва́я с на́ми, и моли́ся за ны́ Христу́ и Пречи́стей Его́ Ма́тери с Ея́ уго́дники, Анто́нием и Феодо́сием, и спаса́й пою́щих тя́, да зове́м ти́: ра́дуйся, святи́телю Арсе́ние, па́стырю и учи́телю на́ш.

Пе́снь 7.

Ирмос: Богопроти́вное веле́ние беззако́ннующаго мучи́теля высо́к пла́мень вознесло́ е́сть: Христо́с же простре́ Богочести́вым отроко́м ро́су духо́вную, Сы́й Благослове́н и Препросла́влен.

Вы́шний Царю́ и Вседержи́телю, моли́твами Твоего́ уго́дника жи́знь умири́ все́м, Сло́ве, христиа́ном, посо́бствуя на ва́рвары, да Тебе́, Христе́, зове́м: благослове́н Бо́г оте́ц на́ших.

Престо́лу предстоя́ Бо́жию, святи́телю Христо́в Арсе́ние, моли́ти приле́жно не преста́й о на́с, твои́х рабе́х, да огня́ ве́чнаго изба́вимся и вся́каго озлобле́ния, от вра́г находя́щаго, твои́ми моли́твами.

Исцеле́ния подава́еши всю́ду ве́рою к тебе́ притека́ющим, святи́телю Арсе́ние. Те́мже мо́лим тя́, твои́ раби́: печа́ль на́шу в ра́дость преложи́ и от вся́кия изба́ви ско́рби твои́ми моли́твами.

Богородичен: Стра́сти моего́ се́рдца исцели́ ми́лостию Твое́ю, Всепе́тая, у́м мо́й умири́, и ду́шу мою́ просвети́, и ходи́ти мя́ напра́ви на стезю́ спаси́тельную, я́ко да пою́ Тя́, Препе́тая.

Пе́снь 8.

Ирмос: В пе́щь о́гненную ко отроко́м евре́йским снизше́дшаго и пла́мень в ро́су прело́жшаго Бо́га, по́йте дела́, я́ко Го́спода, и превозноси́те во вся́ ве́ки.

Устро́ив твою́ жи́знь боголе́пно, святи́телю Арсе́ние, строи́тель изря́ден показа́лся еси́ твое́й оби́тели и све́тло прия́телище Бо́жие.

Чуде́с глубина́ и исцеле́ний река́, исто́чник непреста́нен, струя́, ника́коже оскудева́ема, твоя́ ра́ка показа́ся, о́тче.

Иже к Бо́гу моли́твами твои́ми те́плыми очи́сти на́с от вся́кия скве́рны, и скорбе́й, и боле́зней и вся́кия ну́жды, святи́телю Арсе́ние, изба́ви.

Богородичен: Пресвята́я Де́во, Ты́ мя спаси́ и не́мощи мое́й бу́ди по́мощь, скорбе́й мно́гих и лю́тых мя́ изба́ви, да Тя́ сла́влю, еди́ну Богоро́дицу.

На 9-й песни поем песнь Пресвятыя Богородицы:

Вели́чит душа́ Моя́ Го́спода и возра́довася дух Мой о Бо́зе Спа́се Мое́м.

К коемуждо стиху припеваем: Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Я́ко призре́ на смире́ние рабы́ Своея́, се бо, от ны́не ублажа́т Мя вси ро́ди.

Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Я́ко сотвори́ Мне вели́чие Си́льный, и свя́то и́мя Его́, и ми́лость Его́ в ро́ды родо́в боя́щимся Его́.

Сотвори́ держа́ву мы́шцею Свое́ю, расточи́ го́рдыя мы́слию се́рдца их.

Низложи́ си́льныя со престо́л, и вознесе́ смире́нныя, а́лчущия испо́лни благ, и богатя́щияся отпусти́ тщи.

Восприя́т Изра́иля о́трока Своего́, помяну́ти ми́лости, я́коже глаго́ла ко отце́м на́шим, Авраа́му и се́мени его́ да́же до ве́ка.

Пе́снь 9.

Ирмос: Безнача́льна Роди́теля Сы́н, Бо́г и Госпо́дь, вопло́щься от Де́вы, на́м яви́ся, омраче́нная просвети́ти, собра́ти расточе́нная, те́м Всепе́тую Богоро́дицу, велича́ем.

Чудеса́ бо твоя́ мно́га и исцеле́ния безчи́сленна незави́стно подава́еши с те́плою ве́рою приходя́щим, Арсе́ние святи́телю, похвала́ земли́ на́шей.

Поста́ви тебе́ Христо́с Ма́тере Своея́ це́ркве столпа́ кре́пка и неподви́жима, соблюда́юща и назира́юща гра́д тво́й неподви́жимь и святу́ю оби́тель Свою́.

Святи́тели у́бо и кня́зи благочести́вии, свяще́нницы и и́ноцы и вси́ лю́дие, му́жи и жены́, и ста́рцы со младе́нцы, и вся́к во́зраст, и вся́ко состоя́ние, святи́телю на́шему Арсе́нию све́тло пра́зднуем.

Богородичен: Моли́ Твоего́ Сы́на, Госпоже́ Пречи́стая Богоро́дице, изба́вити мя́ в де́нь стра́шнаго осужде́ния, да, ра́дуяся, пе́сньми велича́ю Тя́.

Свети́лен:

Восхва́лим дне́сь пе́сньми вели́каго па́стыря и учи́теля, Арсе́ния богому́драго: се́й бо измла́да возлюби́ Христа́ и Пречи́стую Его́ Ма́терь, с Не́юже ны́не мо́лит Христа́ Бо́га поми́ловати ду́ши на́ша.

Сла́ва, и ны́не, Богородичен:

Иже от Бо́га ми́ру по́даным благи́м Ты́ вина́ была́ еси́, Богоро́дице, но и ны́не ми́лостива сотвори́ о о́бщем спасе́нии благопреме́ннаго Бо́га.

Хвали́тны псалмы́, глас 2:

Вся́кое дыха́ние да хва́лит Го́спода./ Хвали́те Го́спода с небе́с,/ хвали́те Его́ в вы́шних.// Тебе́ подоба́ет песнь Бо́гу.

Хвали́те Его́ вси а́нгели Его́,/ хвали́те Его́ вся си́лы Его́.// Тебе́ подоба́ет песнь Бо́гу.

Сти́хиры, глас 2:

Стих: Сотвори́ти в них суд напи́сан/ сла́ва сия́ бу́дет всем преподо́бным Его́.

Ки́ими похва́льными венцы́ / увязе́м святи́теля? / Благоче́стия управле́ние, / целому́дрия рачи́теля, / све́тлое Це́ркве украше́ние, / исто́чника Боже́ственных исцеле́ний, / проли́тие дарова́ний духо́вных, / реку́ мно́гих чуде́с, / зе́млю на́шу веселя́щу, / ди́внаго чудотво́рца Арсе́ния, / предста́теля на́шего и храни́теля.

Стих: Хвали́те Его́ на си́лах Его́,/ хвали́те Его́ по мно́жеству вели́чествия Его́.

Стих: Хвали́те Его́ в тимпа́не и ли́це,/ хвали́те Его́ во стру́нах и орга́не.

Ки́ими духо́вными пе́сньми / похва́лим Арсе́ния свяще́ннаго? / Ди́внаго в чудесе́х / и безпло́тным сожи́теля, / освяще́ннаго от пеле́н, / столпа́ Це́ркви неподви́жима, / весе́лие земли́ на́шей, / и́ноком люби́теля, / я́ко вои́стинну отца́ чадолюби́ва / и больны́м врача́ безме́здна.

Стих: Хвали́те Его́ в кимва́лех доброгла́сных, хвали́те Его́ в кимва́лех восклица́ния. / Вся́кое дыха́ние да хва́лит Го́спода.

Ки́ими пе́сненными добро́тами / ублажи́м Арсе́ния досточу́днаго? / Печа́льным утеше́ние, / отча́янным засту́пника, / и́ноком утвержде́ние, / похвалу́ земли́ на́шей, / святи́телем украше́ние, / реку́ ми́лости вои́стинну, / Боже́ственнаго Христо́ва смире́ния ревни́теля, / подаю́щаго ми́рови ве́лию ми́лость.

Глас 8: Сла́ва Отцу́ и Сы́ну и Свято́му Ду́ху

Прииди́те, стеце́мся вси́ к боже́ственней па́мяти отца́ на́шего, изря́днаго чудотво́рца Арсе́ния, се́й бо, от ю́ности жела́ние боже́ственное в се́рдцы свое́м прии́м и возлюби́в Христа́ и Пречи́стую Его́ Ма́терь, Ейже и оби́тель сотвори́, и вельми́ украси́, и мно́жество мона́хов собра́. Те́м бы́в христолюби́вым князе́м учи́тель пра́выя ве́ры, вельмо́жам тве́рдое защище́ние, си́рым я́ко оте́ц милосе́рд, вдови́цам те́плое заступле́ние, скорбя́щим утеше́ние, боля́щим исцеле́ние. Ра́дуйся и весели́ся, Бо́жия Ма́тере це́рковь, я́ко люби́мый тобо́ю в тебе́ почи́л е́сть, богому́дрый Арсе́ний. Но, о богоблаже́нный о́тче! не преста́й моля́ся о ста́де твое́м и о все́х, ве́рою чту́щих всечестно́е успе́ние твое́.

Глас 8: И ны́не и при́сно и во ве́ки веко́в. Ами́нь.

Влады́чице, приими́ моли́тву ра́б Твои́х и изба́ви на́с от вся́кия ну́жды и печа́ли.

Славосло́вие вели́кое:

Сла́ва в вы́шних Бо́гу, и на земли́ мир, в челове́цех благоволе́ние. Хва́лим Тя, благослови́м Тя, кла́няем Ти ся, славосло́вим Тя, благодари́м Тя, вели́кия ра́ди сла́вы Твоея́. Го́споди Царю́ Небе́сный, Бо́же О́тче Вседержи́телю, Го́споди, Сы́не Единоро́дный, Иису́се Христе́, и Святы́й Ду́ше. Го́споди Бо́же, А́гнче Бо́жий, Сы́не Оте́чь, взе́мляй грех ми́ра, поми́луй нас; взе́мляй грехи́ ми́ра, приими́ моли́тву на́шу; седя́й одесну́ю Отца́, поми́луй нас. Я́ко Ты еси́ еди́н Свят, Ты еси́ еди́н Госпо́дь, Иису́с Христо́с, в сла́ву Бо́га Отца́. Ами́нь.

На всяк день благословлю́ Тя, и восхвалю́ И́мя Твое́ во ве́ки, и в век ве́ка.

Сподо́би, Го́споди, в день сей без греха́ сохрани́тися нам. Благослове́н еси́, Го́споди, Бо́же оте́ц на́ших, и хва́льно и просла́влено И́мя Твое́ во ве́ки. Ами́нь.

Бу́ди, Го́споди, ми́лость Твоя́ на нас, я́коже упова́хом на Тя.

Благослове́н еси́, Го́споди, научи́ мя оправда́нием Твои́м. (Три́жды)

Го́споди, прибе́жище был еси́ нам в род и род. Аз рех: Го́споди, поми́луй мя, исцели́ ду́шу мою́, я́ко согреши́х Тебе́. Го́споди, к Тебе́ прибего́х, научи́ мя твори́ти во́лю Твою́, я́ко Ты еси́ Бог мой: я́ко у Тебе́ исто́чник живота́, во све́те Твое́м у́зрим свет. Проба́ви ми́лость Твою́ ве́дущим Тя.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Три́жды)

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Святы́й Безсме́ртный, поми́луй нас.

Святы́й Бо́же, Святы́й Кре́пкий, Святы́й Безсме́ртный, поми́луй нас.

Тропа́рь, глас 8:

Утверди́, Бо́же, святу́ю правосла́вную ве́ру, правосла́вных христиа́н во век ве́ка.

Честне́йшую Херуви́м и Сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу, Тя велича́ем.

Сла́ва, и ны́не. Го́споди, поми́луй. (Три́жды) Благослови́.

Господи Иисусе Христе, Сыне Божий, моли́твами Пречи́стыя Своея́ Ма́тере, святителя Арсения, епископа Тверского, преподобных и богоносных отец наших и всех святы́х, поми́луй и спаси нас я́ко Благ и Челове́колюбец.

Многоле́тие:

Вели́каго Господи́на и Отца́ на́шего Кири́лла,/ Святе́йшаго Патри́арха Моско́вского и всея́ Руси́,/ и Господи́на на́шего (Высоко-) Преосвяще́ннейшаго (имярек),/ (архи-)епи́скопа (митрополита (титул)),/ богохрани́мую страну́ на́шу Росси́йскую,/ и вся правосла́вныя христи́аны,// Го́споди, сохрани́ их на мно́гая ле́та.