Шрифт

▲

Богослужебные тексты для домашнего употребления

Дни памяти святых

Последование Всеношного бдения в день памяти трех святителей: Василия Великого, Григория Богослова и Иоанна Златоустого. Для домашнего (келейного) совершения

Оглавление

ВСЕНО́ЩНОЕ БДЕ́НИЕ

ВЕЛИ́КАЯ ВЕЧЕ́РНЯ

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас. Ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Трижды.)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, (трижды). Сла́ва, и ны́не:

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Таже, Го́споди, поми́луй, (12), Сла́ва, и ны́не:

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 103:

Поется часть псалма:

Благослови́, душе́ моя́, Го́спода. / Благослове́н еси́, Го́споди. / Го́споди, Бо́же мой, возвели́чился еси́ зело́. / Благослове́н еси́, Го́споди. / Во испове́дание и в велеле́поту обле́клся еси́. / Благослове́н еси́, Го́споди. / Посреде́ гор про́йдут во́ды. / Ди́вна дела́ Твоя́, Го́споди. / Вся прему́дростию сотвори́л еси́. / Сла́ва Ти, Го́споди, сотвори́вшему вся.

Или читается псалом полностью:

Благослови́, душе́ моя́, Го́спода. Го́споди, Бо́же мой, возвели́чился еси́ зело́. Во испове́дание и в велеле́поту обле́клся еси́. Одея́йся све́том, я́ко ри́зою, простира́яй не́бо, я́ко ко́жу. Покрыва́яй вода́ми превы́спренняя Своя́, полага́яй о́блаки на восхожде́ние Свое́, ходя́й на крилу́ ве́треню. Творя́й А́нгелы Своя́ ду́хи и слуги́ Своя́ пла́мень о́гненный. Основа́яй зе́млю на тве́рди ея́, не преклони́тся в век ве́ка. Бе́здна, я́ко ри́за, одея́ние ея́, на гора́х ста́нут во́ды, от запреще́ния Твоего́ побе́гнут, от гла́са гро́ма Твоего́ убоя́тся. Восхо́дят го́ры и нисхо́дят поля́ в ме́сто, е́же основа́л еси́ им. Преде́л положи́л еси́, eго́же не пре́йдут, ниже́ обратя́тся покры́ти зе́млю. Посыла́яй исто́чники в де́брех, посреде́ гор про́йдут во́ды. Напая́ют вся зве́ри се́льныя, ждут она́гри в жа́жду свою́. На ты́х пти́цы небе́сныя привита́ют, от среды́ ка́мения дадя́т глас. Напая́яй го́ры от превы́спренних Свои́х, от плода́ дел Твои́х насы́тится земля́. Прозяба́яй траву́ ското́м, и злак на слу́жбу челове́ком, извести́ хлеб от земли́. И вино́ весели́т се́рдце челове́ка, ума́стити лице́ еле́ем, и хлеб се́рдце челове́ка укрепи́т. Насы́тятся древа́ польска́я, ке́дри Лива́нстии, и́хже еси́ насади́л. Та́мо пти́цы вогнездя́тся, ероди́ево жили́ще предводи́тельствует и́ми. Го́ры высо́кия еле́нем, ка́мень прибе́жище за́яцем. Сотвори́л есть луну́ во времена́, со́лнце позна́ за́пад свой. Положи́л еси́ тму, и бысть нощь, в не́йже про́йдут вси зве́рие дубра́внии. Ски́мни рыка́ющии, восхи́тити и взыска́ти от Бо́га пи́щу себе́. Возсия́ со́лнце и собра́шася и в ло́жах свои́х ля́гут. Изы́дет челове́к на де́ло свое́ и на де́лание свое́ до ве́чера. Я́ко возвели́чишася дела́ Твоя́, Го́споди, вся прему́дростию сотвори́л еси́, испо́лнися земля́ тва́ри Твоея́. Сие́ мо́ре вели́кое и простра́нное, та́мо га́ди, и́мже несть числа́, живо́тная ма́лая с вели́кими, та́мо корабли́ препла́вают, змий сей, eго́же созда́л еси руга́тися eму́. Вся к Тебе́ ча́ют, да́ти пи́щу им во бла́го вре́мя. Да́вшу Тебе́ им соберу́т, отве́рзшу Тебе́ ру́ку вся́ческая испо́лнятся бла́гости, отвра́щшу же Тебе́ лице́, возмяту́тся, отъи́меши дух их, и исче́знут, и в персть свою́ возвратя́тся. По́слеши Ду́ха Твоего́, и сози́ждутся, и обнови́ши лице́ земли́. Бу́ди сла́ва Госпо́дня во ве́ки, возвесели́тся Госпо́дь о де́лех Свои́х, призира́яй на зе́млю, и творя́й ю́ трясти́ся, прикаса́яйся гора́м, и дымя́тся. Воспою́ Го́сподеви в животе́ мое́м, пою́ Бо́гу моему́, до́ндеже есмь, да услади́тся Ему́ бесе́да моя́, аз же возвеселю́ся о Го́споде. Да исче́знут гре́шницы от земли́, и беззако́нницы, я́коже не бы́ти им. Благослови́, душе́ моя́, Го́спода.

Со́лнце позна́ за́пад свой. Положи́л еси́ тму, и бысть нощь. Я́ко возвели́чишася дела́ Твоя́, Го́споди, вся прему́дростию сотвори́л еси́.

Сла́ва, и ны́не: Аллилу́иа, аллилу́иа, аллилу́иа, сла́ва Тебе́ Бо́же. Трижды.

Блаже́н муж:

Блаже́н муж, и́же не и́де на сове́т нечести́вых.

Аллилу́иа, аллилу́иа, аллилу́иа.

Я́ко весть Госпо́дь путь пра́ведных, и путь нечести́вых поги́бнет.

Аллилу́иа, аллилу́иа, аллилу́иа.

Рабо́тайте Го́сподеви со стра́хом и ра́дуйтеся Ему́ с тре́петом.

Аллилу́иа, аллилу́иа, аллилу́иа.

Блаже́ни вси наде́ющиися Нань.

Аллилу́иа, аллилу́иа, аллилу́иа.

Воскресни́, Го́споди, спаси́ мя, Бо́же мой.

Аллилу́иа, аллилу́иа, аллилу́иа.

Госпо́дне есть спасе́ние, и на лю́дех Твои́х благослове́ние Твое́.

Аллилу́иа, аллилу́иа, аллилу́иа.

Сла́ва Отцу́ и Сы́ну и Свято́му Духу.

Аллилу́иа, аллилу́иа, аллилу́иа.

И ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Го́споди, воззва́х, глас 4:

Го́споди, воззва́х к Тебе́, услы́ши мя./ Услы́ши мя, Го́споди./ Го́споди, воззва́х к Тебе́, услы́ши мя:/ вонми́ гла́су моле́ния моего́,/ внегда́ воззва́ти ми к Тебе́.// Услы́ши мя, Го́споди.

Да испра́вится моли́тва моя́,/ я́ко кади́ло пред Тобо́ю,/ воздея́ние руку́ мое́ю/ – же́ртва вече́рняя.// Услы́ши мя, Го́споди.

Стихи́ры пра́здника, глас 4:

Стих: А́ще беззако́ния на́зриши, Го́споди, Го́споди, кто постои́т? Я́ко у Тебе́ очище́ние есть.

Благода́ти орга́ны, / гу́сли Ду́ха, / благознамени́тыя трубы́ пропове́дания, / стра́шныя и достослы́шанныя, / с высоты́ шумя́щия гро́мы / и сла́ву Бо́жию сказу́ющия конце́м / три́ пропове́дники Вели́кия Тро́ицы, / Иоа́нна и Васи́лия / досто́йно с Григо́рием просла́вим.

Стих: И́мене ра́ди Твоего́ потерпе́х Тя, Го́споди, потерпе́ душа́ моя́ в сло́во Твое́, упова́ душа́ моя́ на Го́спода.

Тро́ицы побо́рницы, / благоче́стия забра́ла, / и́же по двана́десятих трие́ апо́столи, / из Еде́ма точа́щия во́ду живу́щую ре́ки / и лице́ земли́ живото́чными напая́ющия / Боже́ственными струя́ми, / вели́кия стихи́и, / ве́ру, я́коже тва́рь, соста́вльшия, / достодо́лжно да почту́тся.

Стих: От стра́жи у́тренния до но́щи, от стра́жи у́тренния да упова́ет Изра́иль на Го́спода.

Не су́ть ре́чи, — глаго́лет, — / ниже́ словеса́ глаго́лема, / и́хже не слы́шатся гла́си и́х, — / во всю́ зе́млю бо и мо́ре / веща́ние протече́ / боже́ственных и му́дрых учи́телей тва́ри. / Отону́дуже изря́днейшия / те́х боже́ственными зако́ны содержа́тся и собира́ются / во еди́но Правосла́вие концы́.

Стих: Я́ко у Го́спода ми́лость, и мно́гое у Него́ избавле́ние, и Той изба́вит Изра́иля от всех беззако́ний eго́.

Глас 2: Ки́ими похва́льными венцы́ венча́ем учи́тели? Разделе́нныя телесы́ и совоку́пленныя ду́хом, богоно́сныя предста́тели Тро́ицы Единочи́сленныя и служи́тели, свети́ла, вселе́нную просвеща́ющая, церко́вныя столпы́, я́же венцы́ сла́вы, я́ко победи́вшия, венча́ет Христо́с Бо́г на́ш, име́яй ве́лию ми́лость.

Стих: Хвали́те Го́спода вси язы́цы, похвали́те Его́ вси лю́дие.

Ки́ими пе́сненными добро́тами венча́ем богоно́сныя небе́сныя таи́нники и пропове́дники? Правосла́вия су́щия зело́ изря́днейшия богосло́вы: Вели́каго священноявле́ннаго Васи́лия, боже́ственнаго богоглаго́ливаго Григо́рия и Иоа́нна, зело́ злата́го язы́ком, я́же просла́ви Тро́ица досто́йно, Госпо́дь, име́яй ве́лию ми́лость.

Стих: Я́ко утверди́ся ми́лость Его́ на нас, и и́стина Госпо́дня пребыва́ет во век.

Ки́ими похва́льными глаго́лы похва́лим святи́тели, равноапо́стольныя благода́тию и единоче́стныя дарова́ньми? Нече́стия разори́тели, спаси́тели и наста́вники сло́вом и де́лом, па́стыри христоподо́бныя ве́рою, земны́я Ангелы, небе́сныя челове́ки, я́же почествова́ Христо́с сла́вы Госпо́дь, име́яй ве́лию ми́лость.

Глас 6: Сла́ва Отцу́ и Сы́ну и Свято́му Ду́ху.

Та́йныя дне́сь Ду́ха трубы́, богоно́сныя отцы́ да восхва́лим, воспе́вшия посреде́ Це́ркве пе́снь сли́чную богосло́вия, Тро́ицу Еди́ну непреме́нную, Существо́ же и Божество́, низложи́тели Ариевы и правосла́вных побо́рники, моля́щияся всегда́ Го́споду поми́ловатися душа́м на́шим.

Глас 6: И ны́не и при́сно и во ве́ки веко́в. Ами́нь.

Кто́ Тебе́ не ублажи́т, Пресвята́я Де́во? Кто́ ли не воспое́т Твоего́ Пречи́стаго Рождества́? Безле́тно бо от Отца́ возсия́вый Сы́н Единоро́дный, То́йже от Тебе́, Чи́стыя, про́йде, неизрече́нно вопло́щся: естество́м Бо́г Сы́й и естество́м бы́в Челове́к на́с ра́ди; не во двою́ лицу́ разделя́емый, но во двою́ естеству́ несли́тно познава́емый. Того́ моли́, Чи́стая Всеблаже́нная, поми́ловатися душа́м на́шим.

Све́те Тихи́й:

Све́те Ти́хий святы́я сла́вы Безсме́ртнаго Отца́ Небе́снаго, Свята́го, Блаже́ннаго, Иису́се Христе́! Прише́дше на за́пад со́лнца, ви́девше свет вече́рний, пое́м Отца́, Сы́на и Свята́го Ду́ха, Бо́га. Досто́ин еси́ во вся времена́ пет бы́ти гла́сы преподо́бными, Сы́не Бо́жий, живо́т дая́й; те́мже мир Тя сла́вит.

Пареми́и:

1. Втора́го зако́на чте́ние.

Во дне́х о́нех, рече́ Моисе́й к сыно́м Изра́илевым: ви́дите, преда́х пред лице́м ва́шим зе́млю, вше́дше, насле́дуйте ю́, ю́же кля́тся Госпо́дь отце́м ва́шим — Авраа́му, и Исаа́ку, и Иа́кову — да́ти и́м и се́мени и́х по ни́х. И реко́х к ва́м во вре́мя о́но, глаго́ля: не возмогу́ еди́н води́ти ва́с. Госпо́дь Бо́г на́ш умно́жил вы́ е́сть, и се́, есте́ дне́сь, я́ко зве́зды небе́сныя, мно́жеством. Госпо́дь Бо́г оте́ц на́ших да приложи́т ва́м, я́ко да бу́дете ты́сящами сугу́бо, и да благослови́т ва́с, я́коже глаго́ла ва́м. И взя́х от ва́с му́жы му́дры, и све́домы, и смы́сленны и поста́вих и́х владе́ти над ва́ми: тысященача́льники, и стонача́льники, и пятдесятонача́льники, и десятонача́льники, и письмоводи́тели судия́м ва́шим. И запове́дах судия́м ва́шим во вре́мя о́но, глаго́ля: разслу́шайте посреде́ бра́тий ва́ших и суди́те пра́ведно посреде́ му́жа, и посреде́ бра́та его́, и посреде́ прише́льца его́. Да не позна́ете лица́ в суде́, ма́лому и вели́кому су́диши, и не устыди́шися лица́ челове́ческа, я́ко су́д Бо́жий е́сть.

2. Втора́го зако́на чте́ние

Во дне́х о́нех, рече́ Моисе́й к сыно́м Изра́илевым: се́ Го́спода Бо́га твоего́ не́бо, и не́бо небесе́, земля́ и вся́, ели́ка су́ть на не́й. Оба́че отцы́ ва́ша произво́ли Госпо́дь люби́ти и́х, и избра́ се́мя и́х по ни́х, ва́с, па́че все́х язы́к, в де́нь се́й. И обре́жите жестосе́рдие ва́ше и вы́я ва́ша не ожесточи́те ктому́. Ибо Госпо́дь Бо́г на́ш, Се́й Бо́г бого́в и Госпо́дь господе́й; Бо́г Вели́кий, и Кре́пкий, и Стра́шный, Иже не диви́тся лицу́, ниже́ взе́млет да́р. Творя́й су́д прише́льцу, и си́ру, и вдови́це, и лю́бит прише́льца, да́ти ему́ хле́б и ри́зу. И возлюби́те прише́льца, прише́льцы бо бе́сте в земли́ Еги́петстей. Го́спода Бо́га твоего́ да убои́шися, и Тому́ еди́ному послу́жиши, и к Нему́ прилепи́шися, и и́менем Его́ клене́шися. То́й хвала́ твоя́, и То́й Бо́г тво́й, Иже сотвори́л ти́ е́сть вели́кая и сла́вная сия́, я́же ви́десте о́чи твои́.

3. Прему́дрости Соломо́ни чте́ние.

Пра́ведных ду́ши в руце́ Бо́жией, и не прико́снется и́х му́ка. Непщева́ни бы́ша во очесе́х безу́мных умре́ти, и вмени́ся озлобле́ние исхо́д и́х, и е́же от на́с ше́ствие — сокруше́ние, они́ же су́ть в ми́ре. Ибо пред лице́м челове́ческим, а́ще и му́ку прии́мут, упова́ние и́х безсме́ртия испо́лнено. И вма́ле нака́зани бы́вше, вели́кими благоде́тельствовани бу́дут, я́ко Бо́г искуси́ я́ и обре́те и́х досто́йны Себе́. Я́ко зла́то в горни́ле, искуси́ и́х и, я́ко всепло́дие же́ртвенное, прия́т я́. И во вре́мя посеще́ния и́х, возсия́ют, и я́ко и́скры по сте́блию, потеку́т. Су́дят язы́ком и облада́ют людьми́, и воцари́тся Госпо́дь в ни́х во ве́ки. Наде́ющиися На́нь разуме́ют и́стину и ве́рнии в любви́ пребу́дут Ему́, я́ко благода́ть и ми́лость в преподо́бных Его́ и посеще́ние во избра́нных Его́.

Го́споди, поми́луй. (Три́жды,)

Сподо́би, Го́споди:

Сподо́би, Го́споди, в ве́чер сей без греха́ сохрани́тися нам. Благослове́н еси́, Го́споди, Бо́же оте́ц на́ших, и хва́льно и просла́влено и́мя Твое́ во ве́ки. Ами́нь.

Бу́ди, Го́споди, ми́лость Твоя́ на нас, я́коже упова́хом на Тя. Благослове́н еси́, Го́споди, научи́ мя оправда́нием Твои́м. Благослове́н еси́, Влады́ко, вразуми́ мя оправда́нием Твои́м. Благослове́н еси́, Святы́й, просвети́ мя оправда́нии Твои́ми.

Го́споди, ми́лость Твоя́ во век, дел руку́ Твое́ю не пре́зри. Тебе́ подоба́ет хвала́, Тебе́ подоба́ет пе́ние, Тебе́ сла́ва подоба́ет. Отцу́ и Сы́ну и Свято́му Ду́ху, ны́не и при́сно и во ве́ки веко́в. Ами́нь.

На лити́и стихи́ры, гла́с 2:

Прииди́те, небе́сныя Тро́ицы служи́телие, земну́ю тро́ицу святы́х иера́рхов да восхва́лим: Васи́лия, ца́рствия тезоиме́ннаго, Григо́рия, богосло́вии наимено́внаго, и Иоа́нна, вои́стинну благодатноимено́внаго, глубины́ му́дрости Ду́ха испыта́вших, струи́ океа́новы, исто́чники приснотеку́щия, во́ду жи́ву ска́чущую, проза́рныя би́серы, земна́я свети́ла, Церко́вная корми́ла, светлоплодови́тая древеса́, строи́тели благода́ти, Христа́ моего́ уста́ и Тро́ицы побо́рницы, от Нея́ несре́дственно осиява́емыя и моля́щияся непреста́нно о душа́х на́ших.

Возжже́нная у́глия от Нестерпи́маго Огня́, и́же те́ми просвети́вшеся, ве́рно да восхва́лим: ти́и бо, е́же к Нему́ соедине́нием разже́гшеся, свети́льницы ми́ра бы́ша, живо́тная ни́щим показа́вшеся си́ла, Отца́, и Сы́на, и Свята́го Ду́ха благоче́стно я́ве пропове́даша. Имже и мы́ да прирце́м: ра́дуйся, Тро́ицы тро́ице богому́драя.

Гла́с 6: Тро́ице Свята́я и покланя́емая, сла́ва му́дрому промышле́нию Твоему́, я́ко три́ вели́кия свети́льники челове́ком от челове́к дарова́ла еси́, све́том просвеща́ющия Твоего́ позна́ния и заре́ю осиява́ющия спаси́тельных Твои́х и честны́х хоте́ний, и́миже вселе́нная, све́том ра́зума обогаща́ющися, Твое́ю сла́вою осиява́ема е́сть и к блаже́нному Твоему́ Ца́рствию тщи́тся. Те́х на́с Боже́ственных послу́шати увеща́ющи уче́ний, и Сама́, Тро́ице Свята́я, моли́тв те́х, я́же о на́с, услы́ши, я́ко Бо́г Всеще́дрый, и ду́ши на́ша спаси́, Человеколю́бче.

Сла́ва, гла́с 6: Святи́тели Христо́вы и отце́в сла́ву, столпы́ ве́ры и ве́рных учи́тели и храни́тели, соше́дшеся, о празднолю́бцы, пе́сненными похвала́ми воспои́м, глаго́люще: ра́дуйся, церко́вное свети́ло, Васи́лие прему́дре, и сто́лпе непревра́тный; ра́дуйся, у́ме небе́сный, архиере́ю превелича́йший, богосло́ве Григо́рие; ра́дуйся, о Златосло́ве, всезлаты́й Иоа́нне, покая́ния я́сный пропове́дниче. Но, о о́тцы пребога́тии! Не преста́йте при́сно моли́тися Христу́ о ве́рою и любо́вию соверша́ющих ва́ше всесвяще́нное и боже́ственное торжество́.

И ны́не, богоро́дичен, гла́с то́йже: Де́вственную добро́ту, и у́мное весе́лие, еди́ну Богоро́дицу, и ве́рных тве́рдую огра́ду, соше́дшеся, о празднолю́бцы, пе́сненными похвала́ми воспои́м, глаго́люще: ра́дуйся, Ма́ти Де́во Чи́стая, свети́льниче светоза́рный и две́рь небе́сная; ра́дуйся, ски́ние свяще́ния, Бо́га вме́щшая во утро́бе Твое́й, Всечи́стая; ра́дуйся, все́х небе́сных чино́в превы́шшая без разсужде́ния. Те́мже, Ма́ти безму́жная, Влады́чице, не преста́й храня́щи рабы́ Твоя́, ве́рою и любо́вию воспева́ющия Тя́ при́сно и Рождеству́ Твоему́ покланя́ющияся безсе́менному.

Го́споди, поми́луй. (40 раз)

Стихи́ры на стихо́вне:

Стихи́ры: Глас 1:

Таи́нники духо́вныя вку́пе, / слове́сныя трубы́ Бо́жия, / боже́ственная зерца́ла / восхва́лим дне́сь досто́йно, / вели́каго Васи́лия, / боже́ственнаго и огнедохнове́ннаго Григо́рия, / точа́щаго златостру́йная уче́ния на́м / Иоа́нна, и́стинно Златоу́стаго.

Стих: Восхва́лятся преподо́бнии во сла́ве / и возра́дуются на ло́жах свои́х.

Степе́нь ве́ры, / у́м боже́ственный и бо́дрый, / река́ златостру́йная, / всесве́тлейшии и честни́и свети́льницы, / Тро́ицы побо́рницы, / прия́телища благода́тей Ду́ха, / столпи́ непоколе́бленнии, / Це́ркве утвержде́ния / досто́йно пе́сньми да восхва́лим.

Стих: Свяще́нницы Твои́ облеку́тся в пра́вду, / и преподо́бнии Твои́ возра́дуются.

Ду́ха орга́ны, / гро́ма Боже́ственнаго трубы́, / мо́лнии пропове́дания, / све́щницы всесве́тлии, / злати́и и светоно́снии о Бо́зе, / треблаже́нне Васи́лие, / Григо́рие всему́дре, / всезла́те и всече́стне Иоа́нне, / честву́ющия ва́с спасти́ Христа́ моли́те.

Слава, глас 2: Дне́сь ду́ши земноро́дных возно́сятся от земны́х, дне́сь небе́сныя быва́ют в па́мяти святы́х, и́бо врата́ небе́сная взе́млются, и на́м Влады́чняя сказу́ема быва́ют, Сло́ва словеса́ пропове́дуют, и язы́ки чудеса́ пою́т. Мы́ же ко Спа́су возопие́м: сла́ва Тебе́, Христе́ Бо́же, ве́рным бо ми́р те́ми бы́сть.

И ныне, глас 2:

Дне́сь Христо́с во святи́лище прино́сится я́ко Младе́нец, дне́сь под зако́ном быва́ет, Иже Моисе́ю зако́н да́вый. Ангельская удиви́шася во́инства на руку́ ста́рческу Держи́му, Иже вся́ческая Содержа́щаго зря́ще. Симео́н гове́ния испо́лнен бы́в и ра́достне вопия́ше: ны́не отпусти́ мя, Спа́се, от привре́меннаго живота́ к нестаре́ющемуся поко́ю: ви́дех бо Тя́ и возвесели́хся.

Моли́тва свята́го Симео́на Богоприи́мца:

Ны́не отпуща́еши раба́ Твоего́, Влады́ко,/ по глаго́лу Твоему́, с ми́ром;/ я́ко ви́деста о́чи мои́ спасе́ние Твое́,/ е́же еси́ угото́вал пред лице́м всех люде́й,/ свет во открове́ние язы́ков,// и сла́ву люде́й Твои́х Изра́иля.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Го́споди, поми́луй. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Тропа́рь, глас 4:

Яко апо́столов единонра́внии и вселе́нныя учи́телие, Влады́ку все́х моли́те ми́р вселе́нней дарова́ти и душа́м на́шим ве́лию ми́лость. (Дважды)

Песнь Пресвятей Богородице:

Богоро́дице Де́во, ра́дуйся, / Благода́тная Мари́е, Госпо́дь с Тобо́ю; / благослове́на Ты в жена́х / и благослове́н Плод чре́ва Твоего́, / я́ко Спа́са родила́ еси́ душ на́ших. (Единожды)

Бу́ди И́мя Госпо́дне благослове́но от ны́не и до ве́ка. (Три́жды)

Псало́м 33:

Благословлю́ Го́спода на вся́кое вре́мя,/ вы́ну хвала́ Его́ во усте́х мои́х./ О Го́споде похва́лится душа́ моя́,/ да услы́шат кро́тцыи, и возвеселя́тся./ Возвели́чите Го́спода со мно́ю,/ и вознесе́м И́мя Его́ вку́пе./ Взыска́х Го́спода, и услы́ша мя,/ и от все́х скорбе́й мои́х изба́ви мя./ Приступи́те к Нему́, и просвети́теся,/ и ли́ца ва́ша не постыдя́тся./ Сей ни́щий воззва́, и Госпо́дь услы́ша и́,/ и от все́х скорбе́й его́ спасе́ и́./ Ополчи́тся а́нгел Госпо́день о́крест боя́щихся Его́,/ и изба́вит их./ Вкуси́те и ви́дите, я́ко благ Госпо́дь:/ блаже́н муж, и́же упова́ет Нань./ Бо́йтеся Го́спода, вси́ святи́и Его́,/ я́ко несть лише́ния боя́щимся Его́./ Бога́тии обнища́ша и взалка́ша:/ взыска́ющии же Го́спода// не лиша́тся вся́каго бла́га.

У́ТРЕНЯ.

Шестопса́лмие:

Сла́ва в вы́шних Бо́гу, и на земли́ мир, в челове́цех благоволе́ние. (Три́жды)

Го́споди, устне́ мои́ отве́рзеши, и уста́ моя́ возвестя́т хвалу́ Твою́. (Два́жды)

Псалом 3:

Го́споди, что ся умно́жиша стужа́ющии ми́? Мно́зи востаю́т на мя, мно́зи глаго́лют души́ мое́й: несть спасе́ния eму́ в Бо́зе eго́. Ты же, Го́споди, Засту́пник мой еси́, сла́ва моя́ и вознося́й главу́ мою́. Гла́сом мои́м ко Го́споду воззва́х, и услы́ша мя от горы́ святы́я Своея́. Аз усну́х, и спах, воста́х, я́ко Госпо́дь засту́пит мя. Не убою́ся от тем люде́й, о́крест напа́дающих на мя. Воскресни́, Го́споди, спаси́ мя, Бо́же мой, я́ко Ты порази́л еси́ вся вражду́ющыя ми всу́е: зу́бы гре́шников сокруши́л еси́. Госпо́дне есть спасе́ние, и на лю́дех Твои́х благослове́ние Твое́.

Аз усну́х, и спах, воста́х, я́ко Госпо́дь засту́пит мя.

Псалом 37:

Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́. Я́ко стре́лы Твоя́ унзо́ша во мне, и утверди́л еси́ на мне ру́ку Твою́. Несть исцеле́ния в пло́ти мое́й от лица́ гне́ва Твоего́, несть ми́ра в косте́х мои́х от лица́ грех мои́х. Я́ко беззако́ния моя́ превзыдо́ша главу́ мою́, я́ко бре́мя тя́жкое отяготе́ша на мне. Возсмерде́ша и согни́ша ра́ны моя́ от лица́ безу́мия моего́. Пострада́х и сляко́хся до конца́, весь день се́туя хожда́х. Я́ко ля́двия моя́ напо́лнишася поруга́ний, и несть исцеле́ния в пло́ти мое́й. Озло́блен бых и смири́хся до зела́, рыка́х от воздыха́ния се́рдца моего́. Го́споди, пред Тобо́ю все жела́ние мое́ и воздыха́ние мое́ от Тебе́ не утаи́ся. Се́рдце мое́ смяте́ся, оста́ви мя си́ла моя́, и свет о́чию мое́ю, и той несть со мно́ю. Дру́зи мои́ и и́скреннии мои́ пря́мо мне прибли́жишася и ста́ша, и бли́жнии мои́ отдале́че мене́ ста́ша и нужда́хуся и́щущии ду́шу мою́, и и́щущии зла́я мне глаго́лаху су́етная и льсти́вным весь день поуча́хуся. Аз же я́ко глух не слы́шах и я́ко нем не отверза́яй уст свои́х. И бых я́ко челове́к не слы́шай и не имы́й во усте́х свои́х обличе́ния. Я́ко на Тя, Го́споди, упова́х, Ты услы́шиши, Го́споди Бо́же мой. Я́ко рех: да не когда́ пора́дуют ми ся врази́ мои́: и внегда́ подвижа́тися нога́м мои́м, на мя велере́чеваша. Я́ко аз на ра́ны гото́в, и боле́знь моя́ предо мно́ю есть вы́ну. Я́ко беззако́ние мое́ аз возвещу́ и попеку́ся о гресе́ мое́м. Врази́ же мои́ живу́т и укрепи́шася па́че мене́, и умно́жишася ненави́дящии мя без пра́вды. Воздаю́щии ми зла́я возблага́я оболга́ху мя, зане́ гоня́х благосты́ню. Не оста́ви мене́, Го́споди Бо́же мой, не отступи́ от Мене́. Вонми́ в по́мощь мою́, Го́споди спасе́ния моего́.

Не оста́ви мене́, Го́споди Бо́же мой, не отступи́ от Мене́. Вонми́ в по́мощь мою́, Го́споди спасе́ния моего́.

Псалом 62:

Бо́же, Бо́же мой, к Тебе́ у́тренюю, возжада́ Тебе́ душа́ моя́, коль мно́жицею Тебе́ плоть моя́, в земли́ пу́сте и непрохо́дне, и безво́дне. Та́ко во святе́м яви́хся Тебе́, ви́дети си́лу Твою́ и сла́ву Твою́. Я́ко лу́чши ми́лость Твоя́ па́че живо́т, устне́ мои́ похвали́те Тя. Та́ко благословлю́ Тя в животе́ мое́м, о и́мени Твое́м воздежу́ ру́це мои́. Я́ко от ту́ка и ма́сти да испо́лнится душа́ моя́, и устна́ма ра́дости восхва́лят Тя уста́ моя́. А́ще помина́х Тя на посте́ли мое́й, на у́тренних поуча́хся в Тя. Я́ко был еси́ Помо́щник мой, и в кро́ве крилу́ Твое́ю возра́дуюся. Прильпе́ душа́ моя́ по Тебе́, мене́ же прия́т десни́ца Твоя́. Ти́и же всу́е иска́ша ду́шу мою́, вни́дут в преиспо́дняя земли́, предадя́тся в ру́ки ору́жия, ча́сти ли́совом бу́дут. Царь же возвесели́тся о Бо́зе, похва́лится всяк клены́йся Им, я́ко загради́шася уста́ глаго́лющих непра́ведная.

На у́тренних поуча́хся в Тя. Я́ко был еси́ Помо́щник мой, и в кро́ве крилу́ Твое́ю возра́дуюся. Прильпе́ душа́ моя́ по Тебе́, мене́ же прия́т десни́ца Твоя́.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Го́споди поми́луй. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Псалом 87:

Го́споди Бо́же спасе́ния моего́, во дни воззва́х, и в нощи́ пред Тобо́ю. Да вни́дет пред Тя моли́тва моя́: приклони́ у́хо Твое́ к моле́нию моему́, я́ко испо́лнися зол душа́ моя́, и живо́т мой аду прибли́жися. Привмене́н бых с низходя́щими в ров, бых я́ко челове́к без по́мощи, в ме́ртвых свобо́дь, я́ко я́звеннии спя́щии во гро́бе, и́хже не помяну́л еси́ ктому́, и ти́и от руки́ Твоея́ отринове́ни бы́ша. Положи́ша мя в ро́ве преиспо́днем, в те́мных и се́ни сме́ртней. На мне утверди́ся я́рость Твоя́, и вся во́лны Твоя́ наве́л еси́ на мя. Уда́лил еси́ зна́емых мои́х от Мене́, положи́ша мя ме́рзость себе́: пре́дан бых и не исхожда́х. О́чи мои́ изнемого́сте от нищеты́, воззва́х к Тебе́, Го́споди, весь день, возде́х к Тебе́ ру́це мои́. Еда́ ме́ртвыми твори́ши чудеса́? Или́ вра́чеве воскреся́т, и испове́дятся Тебе́? Еда́ пове́сть кто во гро́бе ми́лость Твою́, и и́стину Твою́ в поги́бели? Еда́ позна́на бу́дут во тьме чудеса́ Твоя́, и пра́вда Твоя́ в земли́ забве́нней? И аз к Тебе́, Го́споди, воззва́х и у́тро моли́тва моя́ предвари́т Тя. Вску́ю, Го́споди, отре́еши ду́шу мою́, отвраща́еши лице́ Твое́ от Мене́? Нищ есмь аз, и в труде́х от ю́ности моея́; возне́с же ся, смири́хся, и изнемого́х. На мне преидо́ша гне́ви Твои́, устраше́ния Твоя́ возмути́ша мя, обыдо́ша мя я́ко вода́, весь день одержа́ша мя вку́пе. Уда́лил еси́ от Мене́ дру́га и и́скренняго, и зна́емых мои́х от страсте́й.

Го́споди Бо́же спасе́ния моего́, во дни воззва́х, и в нощи́ пред Тобо́ю. Да вни́дет пред Тя моли́тва моя́: приклони́ у́хо Твое́ к моле́нию моему́.

Псалом 102:

Благослови́, душе́ моя́, Го́спода, и вся вну́тренняя моя́ и́мя свя́тое Его́. Благослови́, душе́ моя́, Го́спода, и не забыва́й всех воздая́ний Его́, очища́ющаго вся беззако́ния твоя́, исцеля́ющаго вся неду́ги твоя́, избавля́ющаго от истле́ния живо́т твой, венча́ющаго тя ми́лостию и щедро́тами, исполня́ющаго во благи́х жела́ние твое́: обнови́тся я́ко о́рля ю́ность твоя́. Творя́й ми́лостыни Госпо́дь, и судьбу́ всем оби́димым. Сказа́ пути́ Своя́ Моисе́ови, сыново́м Изра́илевым хоте́ния Своя́: Щедр и Ми́лостив Госпо́дь, Долготерпели́в и Многоми́лостив. Не до конца́ прогне́вается, ниже́ во век вражду́ет, не по беззако́нием на́шым сотвори́л есть нам, ниже́ по грехо́м на́шым возда́л есть нам. Я́ко по высоте́ небе́сней от земли́, утверди́л есть Госпо́дь ми́лость Свою́ на боя́щихся Его́. Ели́ко отстоя́т восто́цы от за́пад, уда́лил есть от нас беззако́ния на́ша. Я́коже ще́дрит оте́ц сы́ны, уще́дри Госпо́дь боя́щихся Его́. Я́ко Той позна́ созда́ние на́ше, помяну́, я́ко персть есмы́. Челове́к, я́ко трава́ дни́е eго́, я́ко цвет се́льный, та́ко оцвете́т, я́ко дух про́йде в нем, и не бу́дет, и не позна́ет ктому́ ме́ста своего́. Ми́лость же Госпо́дня от ве́ка и до ве́ка на боя́щихся Его́, и пра́вда Его́ на сыне́х сыно́в, храня́щих заве́т Его́, и по́мнящих за́поведи Его́ твори́ти я́. Госпо́дь на Небеси́ угото́ва Престо́л Свой, и Ца́рство Его́ все́ми облада́ет. Благослови́те Го́спода вси А́нгели Его́, си́льнии кре́постию, творя́щии сло́во Его́, услы́шати глас слове́с Его́. Благослови́те Го́спода вся Си́лы Его́, слуги́ Его́, творя́щии во́лю Его́. Благослови́те Го́спода вся дела́ Его́, на вся́ком ме́сте влады́чества Его́, благослови́, душе́ моя́, Го́спода.

На вся́ком ме́сте влады́чества Его́, благослови́, душе́ моя́, Го́спода.

Псалом 142:

Го́споди, услы́ши моли́тву мою́, внуши́ моле́ние мое́ во и́стине Твое́й, услы́ши мя в пра́вде Твое́й и не вни́ди в суд с рабо́м Твои́м, я́ко не оправди́тся пред Тобо́ю всяк живы́й. Я́ко погна́ враг ду́шу мою́, смири́л есть в зе́млю живо́т мой, посади́л мя есть в те́мных, я́ко ме́ртвыя ве́ка. И уны́ во мне дух мой, во мне смяте́ся се́рдце мое́. Помяну́х дни дре́вния, поучи́хся во всех де́лех Твои́х, в творе́ниих руку́ Твое́ю поуча́хся. Возде́х к Тебе́ ру́це мои́, душа́ моя́, я́ко земля́ безво́дная Тебе́. Ско́ро услы́ши мя, Го́споди, исчезе́ дух мой, не отврати́ лица́ Твоего́ от Мене́, и уподо́блюся низходя́щым в ров. Слы́шану сотвори́ мне зау́тра ми́лость Твою́, я́ко на Тя упова́х. Скажи́ мне, Го́споди, путь во́ньже пойду́, я́ко к Тебе́ взях ду́шу мою́. Изми́ мя от враг мои́х, Го́споди, к Тебе́ прибего́х. Научи́ мя твори́ти во́лю Твою́, я́ко Ты еси́ Бог мой. Дух Твой Благи́й наста́вит мя на зе́млю пра́ву. И́мене Твоего́ ра́ди, Го́споди, живи́ши мя, пра́вдою Твое́ю изведе́ши от печа́ли ду́шу мою́. И ми́лостию Твое́ю потреби́ши враги́ моя́ и погуби́ши вся стужа́ющыя души́ мое́й, я́ко аз раб Твой есмь.

Услы́ши мя, Го́споди, в пра́вде Твое́й и не вни́ди в суд с рабо́м Твои́м.

Дух Твой Благи́й наста́вит мя на зе́млю пра́ву.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Тропа́рь глас 4:

Сла́ва Отцу́ и Сы́ну и Свято́му Ду́ху. И ны́не и при́сно и во ве́ки веко́в. Ами́нь.

Глас 4: Еже от ве́ка утае́нное, и Ангелом несве́домое та́инство: Тобо́ю, Богоро́дице, су́щим на земли́ яви́ся, Бо́г в несли́тном соедине́нии воплоща́емь, и кре́ст во́лею на́с ра́ди восприи́м, и́мже воскреси́в первозда́ннаго, спасе́ от сме́рти ду́ши на́ша.

Здесь читается кафизма, положенная по дню, или сразу седальны:

Го́споди, поми́луй. (Три́жды)

Седален, глас 5:

Яко ца́рское украше́ние Це́ркве, Васи́лия вси́ восхва́лим, догма́тов сокро́вище неоскуде́емо, си́ми бо са́м наказа́ на́с Тро́ицу чествова́ти Святу́ю, соедине́ну у́бо Существо́м, разделе́ну же Ипоста́сьми.

Сла́ва Отцу́ и Сы́ну и Свято́му Ду́ху.

Глас 4: Свети́льницы пресве́тлии Це́ркве Христо́вы, ми́р просвети́сте уче́ньми ва́шими, отцы́ богому́дрии, изсуши́вше е́реси все́х злосла́вных и угаси́вше пламенови́дная ху́льных смуще́ния. Те́мже, я́ко святи́телие Христо́вы, моли́теся спасти́ся на́м.

И ны́не и при́сно и во ве́ки веко́в. Ами́нь.

Глас 4: Де́во Всепе́тая, Ма́ти Христа́ Бо́га, Мари́е Богоневе́сто и Неискусобра́чная, ве́рных предста́тельство, изба́ви от вся́кия беды́ и вся́кия ну́жды, Влады́чице Богоро́дице, ве́рою и любо́вию покро́ву Твоему́ прибега́ющия, Еди́на Богоневе́стная.

Седален, глас 3:

Сто́лп бы́л еси́ Це́ркве, бога́тство некра́домое благоче́стия яви́лся еси́, богосло́ве Григо́рие, в безстра́стии осия́л еси́ житие́ твое́ и Тро́ическия изъясни́л еси́ догма́ты, о́тче преподо́бне, Христа́ Бо́га моли́ о спасе́нии ду́ш на́ших.

Сла́ва Отцу́ и Сы́ну и Свято́му Ду́ху.

Глас 4: Во цве́тнице писа́ний, я́коже пче́лы му́дрыя, прилета́юще, вы́ объя́сте до́бре, и от цвето́в изря́днейшая, и ме́д все́м ве́рным уче́ний ва́ших предста́висте вку́пе во всенаслажде́ние и́х, и сего́ ра́ди вся́к наслажда́яйся с весе́лием зове́т: предста́ните па́ки и по сме́рти и́же ва́с восхваля́ющим, блаже́ннии.

И ны́не и при́сно и во ве́ки веко́в. Ами́нь.

Глас 4: Треволне́нии страсте́й безсо́вестный а́з обурева́емь, Пречи́стая, призыва́ю Тя́ те́пле, да не пре́зриши мя́, окая́ннаго, поги́бнути, бе́здну ми́лости ро́ждшая: ра́зве бо Тебе́, ины́я наде́жды не и́мам. Да не у́бо враго́м обра́дование и сме́х, наде́явся на Тя́, явлю́ся, и́бо мо́жеши, ели́ка и хо́щеши, я́ко Ма́ти су́щи все́х Бо́га.

Полиеле́й:

Хвали́те И́мя Госпо́дне, хвали́те, раби́ Го́спода.

Аллилу́иа, аллилу́иа, аллилу́иа.

Благослове́н Госпо́дь от Сио́на, живы́й во Иерусали́ме.

Аллилу́иа, аллилу́иа, аллилу́иа.

Испове́дайтеся Го́сподеви, я́ко Благ, я́ко в век ми́лость Его́.

Аллилу́иа, аллилу́иа, аллилу́иа.

Испове́дайтеся Бо́гу Небе́сному, я́ко в век ми́лость Его́.

Аллилу́иа, аллилу́иа, аллилу́иа.

Велича́ние:

Велича́ем вас, / святи́телие Христовы Велицыи, / и чтим святу́ю па́мять ва́шу, / вы бо мо́лите за нас // Христа́ Бо́га на́шего.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа,// сла́ва Тебе́, Бо́же. (Трижды)

Велича́ем вас, / святи́телие Христовы Василие, Григорие и Иоанне, / и чтим святу́ю па́мять ва́шу, / вы бо мо́лите за нас // Христа́ Бо́га на́шего.

Седа́льны:

Глас 4:

Прему́дрии учи́телие вселе́нныя, и́же Бо́га просла́вльшии де́лы и словесы́ на земли́, да возвели́чатся дне́сь, я́ко спасе́ния на́м су́ще хода́таи.

Сла́ва Отцу́ и Сы́ну и Свято́му Ду́ху

Пра́зднует дне́сь Це́рковь честно́е торжество́ учи́телей трие́х, и́бо ти́и утверди́ша Це́рковь боже́ственными свои́ми догма́ты.

и ны́не и при́сно и во ве́ки веко́в. Ами́нь.

Предста́тельнице необори́мая оскорбля́емых и те́плое заступле́ние упова́ющих на Тя́, от бе́д мя́ изба́ви: Ты́ бо еси́ все́х помо́щница.

Степе́нна, глас 4:

От ю́ности моея́/ мно́зи бо́рют мя стра́сти,/ но Сам мя заступи́// и спаси́, Спа́се мой.

Ненави́дящии Сио́на,/ посрами́теся от Го́спода,/ я́ко трава́ бо огне́м// бу́дете изсо́хше.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Святы́м Ду́хом/ вся́ка душа́ живи́тся,/ и чистото́ю возвыша́ется,// светле́ется Тро́йческим еди́нством, священнота́йне.

Го́споди, поми́луй. (Три́жды)

От Иоа́нна Свята́го Ева́нгелия чте́ние

Сла́ва, Тебе́, Го́споди, сла́ва Тебе́.

Рече́ Госпо́дь ко прише́дшым к Нему́ иуде́ем: Аз есмь дверь, Мно́ю а́ще кто вни́дет, спасе́тся, и вни́дет, и изы́дет, и па́жить обря́щет. Тать не прихо́дит, ра́зве да укра́дет, и убие́т, и погуби́т, Аз приидо́х, да живо́т и́мут и ли́шше и́мут. Аз есмь па́стырь до́брый, па́стырь до́брый ду́шу свою́ полага́ет за о́вцы. А нае́мник, и́же несть па́стырь, ему́же не суть о́вцы своя́, ви́дит во́лка гряду́ща и оставля́ет о́вцы, и бе́гает, и волк расхи́тит их, и распу́дит о́вцы. А нае́мник бежи́т, я́ко нае́мник есть и неради́т о овца́х. Аз есмь па́стырь до́брый, и зна́ю Моя́, и зна́ют Мя Моя́. Я́коже зна́ет Мя Оте́ц, и Аз зна́ю Отца́, и ду́шу Мою́ полага́ю за о́вцы. И и́ны о́вцы и́мам, я́же не суть от двора́ сего́, и ты́я Ми подоба́ет привести́, и глас Мой услы́шат, и бу́дет еди́но ста́до, и еди́н Па́стырь.

Сла́ва, Тебе́, Го́споди, сла́ва Тебе́.

Псало́м 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя. Я́ко беззако́ние мое́ аз зна́ю и грех мой предо мно́ю есть вы́ну. Тебе́ Еди́ному согреши́х, и лука́вое пред Тобо́ю сотвори́х, я́ко да оправди́шися во словесе́х Твои́х и победи́ши, внегда́ суди́ти Ти. Се бо в беззако́ниих зача́т есмь, и во гресе́х роди́ мя ма́ти моя́. Се бо и́стину возлюби́л еси́, безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся, омы́еши мя, и па́че сне́га убелю́ся. Слу́ху моему́ да́си ра́дость и весе́лие, возра́дуются ко́сти смире́нныя. Отврати́ лице́ Твое́ от грех мои́х, и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́, и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́, и Ду́хом Влады́чним утверди́ мя. Научу́ беззако́нныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́, возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо, всесожже́ния не благоволи́ши. Же́ртва Бо́гу дух сокруше́н, се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския, тогда́ благоволи́ши же́ртву пра́вды, возноше́ние и всесожега́емая: тогда́ возложа́т на олта́рь Твой тельцы́.

Глас 6:

Сла́ва Отцу́ и Сы́ну и Свято́му Ду́ху./ Моли́твами святителей Великих, / Ми́лостиве, очи́сти / мно́жества согреше́ний на́ших.

И ны́не и при́сно и во ве́ки веко́в. Ами́нь./ Моли́твами Богоро́дицы, / Ми́лостиве, очи́сти / мно́жества согреше́ний на́ших.

Поми́луй мя, Бо́же,/ по вели́цей ми́лости Твое́й,/ и по мно́жеству щедро́т Твои́х// очи́сти беззако́ние мое́.

Стихи́ра, глас 6

Излия́ся благода́ть во устна́х ва́ших, преподо́бнии отцы́, и бы́сте па́стырие Христо́вы Це́ркве, уча́ще слове́сныя о́вцы ве́ровати в Тро́ицу Единосу́щную во Еди́ном Божестве́.

Го́споди, поми́луй. (12 раз)

Кано́ны святых, два.

Кано́н святы́х. Гла́с 2.

Пе́снь 1.

Ирмос: Гряди́те, лю́дие, пои́м пе́снь Христу́ Бо́гу, разде́льшему мо́ре и наста́вльшему лю́ди, я́же изведе́ из рабо́ты еги́петския, я́ко просла́вися.

Припев: Святители Василие, Григорие и Иоанне, молите Бога о нас.

Ко́е благодаре́ние, ко́е противовоздая́ние, подоба́ющее на́шим, челове́цы, принесе́тся от на́с благоде́телем, и́миже ко е́же до́бре бы́ти наставля́емся?

Вити́йстии язы́цы, и хи́трости, и кова́рства, и вся́ слове́с си́ла ны́не в вину́ да сподви́гнутся еди́ну и, честву́юще взаи́м, да почту́т.

Сво́йственнаго у́бо и́м не терпя́ху, дабы́ что́ стяжа́ти на земли́, небому́дреннии, храни́телие же яви́шася о́бщества и предста́телие, о́бщих у́бо и похва́л да сподо́бятся.

Богородичен: Тя́, о́бщее любоче́стие, Всенепоро́чная, на́шего естества́, вси́ сла́вим, уста́ еди́ны бы́вше и еди́но согла́сие соверши́вше.

Други́й кано́н святы́х, гла́с 8.

Пе́снь 1.

Ирмос: Колесницегони́теля фарао́ня погрузи́ чудотворя́й иногда́ Моисе́йский же́зл, крестообра́зно порази́в и раздели́в мо́ре, Изра́иля же беглеца́, пешехо́дца спасе́, пе́снь Бо́гови воспева́юща.

Припев: Святители Василие, Григорие и Иоанне, молите Бога о нас.

Не челове́ческаго тща́ния исправле́ние сие́ начина́ние, но Твоему́ престо́лу приседя́щая, Человеколю́бче, Прему́дрость да споспешеству́ет ми́, сло́ва благода́ть даю́щи, е́юже просла́вити возмогу́, и́хже сама́ до́бре предпросла́ви.

Якоже ча́ша, преисполня́ется, Влады́ко, благода́ть Твоя́, и мно́гое бога́тство человеколю́бия Твоего́ излия́ется и потече́, я́коже и и́ны Ангелы в соста́ве пло́ти показа́ти, ны́не предлежа́щия в похвалу́.

С небесе́ небе́сным подоба́ше бы́ти и похвала́м, Ангельское пе́ние, боже́ственным прили́чное: бо́зи бо прича́стием, и́же естество́м и Еди́наго и́стиннаго Бо́га иму́ще в себе́, живу́ща и веща́юща.

Богородичен: Па́мять преподо́бных богому́дрое сосло́вие с похвала́ми соверша́ет, с ни́миже и Бо́жия Ма́терь, я́ко те́х глава́, в ле́поту спрославля́ется, коне́чный, и пе́рвый, и сре́дний чи́н содержа́щи и благохвале́ния причаща́ющися.

Пе́снь 3.

Ирмос: На ка́мени мя́ ве́ры утверди́в, разшири́л еси́ уста́ моя́ на враги́ моя́, возвесели́бося ду́х мо́й, внегда́ пе́ти: не́сть свя́т, я́коже Бо́г на́ш, и не́сть пра́веден, па́че Тебе́, Го́споди.

Труба́ вели́кая Це́ркве, свети́льник, просвеща́яй вселе́нную, пропове́дник, веща́нием объе́мляй вся́ концы́, великоимени́тый Васи́лий сподвиза́ет собра́ние сие́.

Све́тел от жития́ и веще́й, све́тел от слове́с и уче́ний, во все́х пресиява́я па́че все́х, я́коже друго́е па́че зве́зд со́лнце, многопе́тый Богосло́в дне́сь блажи́тся.

Се́ све́т ми́ра ми́ру све́тит, се́ земли́ со́ль зе́млю услажда́ет, се́ дре́во жи́зни безсме́ртия плоды́ предлага́ет, Златоу́стый святы́й. Иже умре́ти не хотя́щии, прииди́те, наслажда́йтеся.

Богородичен: Вся́ от небытия́ в бытие́ Сотвори́вый и естество́ Да́вый коему́ждо бы́вших, То́йже и да́нная естества́ прелага́ти ве́сть, я́коже хо́щет. Отону́дуже и слы́шимо е́сть, я́ко и Де́ва ро́ждши, — кто́ не удиви́тся?

Пе́снь 3.

Ирмос: Утвержде́й в нача́ле небеса́ ра́зумом и зе́млю на вода́х основа́вый, на ка́мени мя́, Христе́, за́поведей Твои́х утверди́, я́ко не́сть свя́т, па́че Тебе́, Еди́не Человеколю́бче.

Иже нра́вов испра́вителие и ду́ш строи́телие, спаси́телие о́бщии все́х, и́же и дея́ний на́м и слове́с о́бразы показа́вше, наказа́телие жития́ све́тлии, све́тле да восхва́лятся.

Ду́х Бо́жий испо́лни Васи́лия худо́жества; о́гненных же имя́ше язы́ков еди́н Григо́рий и огне́м высокоре́чия дхне́; Христо́ва же уста́ во Иоа́нне глаго́лаху.

Ны́нешняго ве́ка му́дрость бу́йство про́поведи я́ве упражня́емую и́мать, повину́ющуюся ему́ и ра́бски служа́щую: пропове́дники бо благода́ть му́дрыя предлага́ет ри́торы.

Богородичен: Во утро́бе Чи́стыя Де́вы Всели́выйся, ду́ши богоно́сных святы́х жили́ще твори́т и о́ных устна́ми е́же о Ма́тери сказу́ет та́инство.

Седа́лен, гла́с 8.

Вели́кия свети́льники светоза́рныя, Це́ркве столпы́ неразори́мыя согла́сно да восхва́лим, и́же до́брых наслажда́ющиися и слове́с те́х, ку́пно и благода́ти: прему́драго Златоглаго́лива и Вели́каго Васи́лия с Григо́рием све́тлым Богосло́вом. К ни́мже и возопии́м, от се́рдца зову́ще: святи́телие тревелич́айшии, моли́теся Христу́ Бо́гу прегреше́ний оставле́ние дарова́ти пра́зднующим любо́вию святу́ю па́мять ва́шу.

Сла́ва:

Прему́дрость прие́мше от Бо́га, я́ко апо́столы ини́и трие́ Христо́вы, сло́вом ра́зума составля́ете догма́ты, я́же пре́жде словесы́ просты́ми низлага́ху, ры́барие в ра́зуме си́лою Ду́ха, подоба́ше бо та́ко про́стей на́шей ве́ре составле́ние стяжа́ти. Отню́дуже вси́ вопие́м ва́м: моли́теся Христу́ Бо́гу прегреше́ний оставле́ние дарова́ти пра́зднующим любо́вию святу́ю па́мять ва́шу.

И ны́не, Богородичен:

Ду́шу мою́, Де́во, смире́нную, бу́рею жития́ искуше́ний ны́не я́ко кроме́ управле́ния бы́вшую, потопля́емую волна́ми, грехо́в бре́менем я́вльшуся преиспо́лнену и во дно́ а́дово приити́ бе́дствующу, предвари́, Богоро́дице, моли́тв Твои́х ми́лостию, тишину́ подаю́щи и бе́д изыма́ющи. Приста́нище бо Ты́ еси́ небу́рное, моля́щися Сы́ну Твоему́ и Бо́гу прегреше́ний оставле́ние дарова́ти ми́: Тя́ бо и́мам наде́жду, недосто́йный ра́б Тво́й.

Пе́снь 4.

Ирмос: Прише́л еси́ от Де́вы не хода́тай, ни Ангел, но Са́м Го́споди вопло́щся, и спа́сл еси́ всего́ мя челове́ка; те́м зову́ ти́: сла́ва си́ле Твое́й, Го́споди.

Разу́мливы от ни́жния му́дрости бы́вше, правле́ние, пресла́внии, от Боже́ственныя стяжа́сте, те́мже, я́ко рабы́ню, сию́ о́ной всему́дре покори́сте.

Любому́дрии, му́дрыя а́ще лю́бите, умудри́теся и глаго́лати научи́теся вси́, и́же словесе́м чудя́щиися, дея́ния опа́сству и виде́ния отту́ду обуча́ющеся.

Богородичен: Яко по́зден до́ждь, напоследи́ бы́вый, у́тренний, во́д и веко́в Соде́тель, во чре́во Твое́ ука́нув, Всенепоро́чная, во вре́мя прохлажда́яй оскудева́ющия.

Пе́снь 4.

Ирмос: Ты́ моя́ кре́пость, Го́споди, Ты́ моя́ и си́ла, Ты́ мо́й Бо́г, Ты́ мое́ ра́дование, не оста́вль не́дра Отча и на́шу нищету́ посети́в. Те́м с проро́ком Авваку́мом зову́ Ти́: си́ле Твое́й сла́ва, Человеколю́бче.

Сто́лп о́гнен, лю́дем ве́рным предваря́ющий и опаля́ющий враги́ ве́ры, племена́ же спаса́яй, изве́стно после́дующия, вели́кий яви́ся Васи́лий, да дерза́ет и побежда́ет Христо́ва Це́рковь, толи́ким обогати́вшися побо́рником.

Язы́ка сла́дость и слу́ха вся́каго услажде́ние, твое́ сло́во бы́сть, Григо́рие, ма́нна жи́зни, роса́ сла́дкости, ме́д, и́же из ка́мене, Ангельский хле́б небе́сный, несы́тно насыща́тися услажде́ния его́ увещева́я и исполня́яй сла́дости причаща́ющияся.

Река́ дарова́ний духо́вных напо́лнися да́же и до разли́тия, и до́брое лице́ земли́, я́ко сла́достный пото́к, от златы́х напая́ет у́ст, веселя́щи и утучня́ющи Христо́в вся́кий гра́д Боже́ственных во́лн струя́ми.

Богородичен: Естество́, про́сто стерпе́вшее сложе́нию и я́вльшееся вы́шше сли́тия в Твое́м, Влады́чице, Сы́не, трие́ богоно́снии учи́телие испове́даша, от двою́ во́лю и сугу́баго де́йства, сугу́ба по естеству́ пропове́давше.

Пе́снь 5

Ирмос: Просвеще́ние во тме́ лежа́щих, спасе́ние отча́янных, Христе́ Спа́се мо́й, к Тебе́ у́тренюю, Царю́ ми́ра, просвети́ мя сия́нием Твои́м, ино́го бо ра́зве Тебе́ Бо́га не зна́ю.

Ты́ исто́чник Твои́х дарова́ний испи́ти весьма́, Человеколю́бче, да́л еси́ святы́м, ума́лен ника́коже истоще́нием, ми́р же ве́сь упои́в и́же от чре́ва и́х боже́ственными пото́ки.

Что́ ми зла́то? Что́ ми бога́тство, и сла́ва, и могу́тство? Ды́мове, расходя́щиися по возду́ху: вся́ да изче́знут, вся́ да прено́сит ве́тр. Мне́ бога́тство еди́но многорачи́тельно — учи́телей тро́ица вити́йствующая.

То́чит река́ нетле́нную пи́щу и Боже́ственное питие́, то́чит а́лчущим безсме́ртное бра́шно и жа́ждущим нетле́нное питие́, вода́ жива́ во ве́ки и содержа́щая жи́вы пию́щия: вси́ многотеку́щия жи́зни насы́титеся.

Богородичен: Име́яше кре́пость на ны́ зло́ба, но не в коне́ц: изнемо́же бо по Де́ве, в кре́пости Си́льнаго ро́ждшей, подъе́мшаго плотску́ю не́мощь и си́льнаго в зло́бе умертви́вша.

Пе́снь 5

Ирмос: Вску́ю мя́ отри́нул еси́ от лица́ Твоего́, Све́те незаходи́мый, и покры́ла мя́ е́сть чужда́я тма́, окая́ннаго, но обрати́ мя и к све́ту за́поведей Твои́х пути́ моя́ напра́ви, молю́ся.

Иже Боже́ственных веще́й и челове́ческих му́дрыя хитрецы́, и́же су́щих естества́ любои́стинне я́ве на́м извести́вшия и Зижди́теля те́х все́м сказа́вшия я́ко ле́по, благода́рными гла́сы восхва́лим.

Го́рькое и те́рпкое я́же ко спасе́нию лече́б услади́ша му́дрыми слове́с уче́ньми же, и хитростьми́, и благода́тьми, ду́ш боже́ственнии лечи́телие: наслажда́йтеся, вси́ благочести́вии, и, красу́еми, спаса́йтеся.

Молчи́т вся́ко сло́во, богопропове́дником глаго́лющим Боже́ственная, и удержава́ет над Ве́тхим заве́том Но́вый, предлага́ющий честны́я скрижа́ли, и́же в не́м законополага́ющих, к ни́мже причита́ется все́ ве́рных сосло́вие.

Богородичен: Безсме́ртное естество́ сме́ртное претече́ во святы́ню, и Де́ва Отрокови́ца безпло́тныя Ангелы превзы́де, я́ко Бо́га ро́ждшая, Царя́ Ангельскаго, на Него́же зре́ти о́нем невозмо́жно.

Пе́снь 6.

Ирмос: Бе́здна мя́ мно́га грехо́вная окружа́ет, и вопию́ Ти, проро́ка подража́яй: от тли́ мя́, Го́споди, возведи́.

Сво́йства в Тро́ице три́ сбогосло́вите: нерожде́ние Отца́, Сло́ва же рожде́ние и Ду́ха исхожде́ние Сама́го.

Дне́сь до́му сему́ светоявле́нное спасе́ние: два́ бо и три́ со́бранныя Христо́с, во и́мя Свое́ почеству́яй, посреде́ прису́тствует си́х.

Неиспы́танна земна́я глубина́ к небе́сной высоте́, но от земли́ святы́я вознесе́ вы́шше небе́с небе́сное жела́ние.

Богородичен: Но́в Тя́ исто́чник, Де́во, и вину́ та́ин иму́ще, трие́ богоглаго́льницы но́выми предложе́ньми новоле́пное прили́чествуют нарече́ние.

Пе́снь 6.

Ирмос: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся, к Тебе́ бо возопи́х, и услы́ши мя́, Бо́же спасе́ния моего́.

Тро́ицу еди́нственную богосло́вити научи́хомся, Еди́ницу Тро́ичную пе́ти прия́хом, покланя́тися навыко́хом от отце́в Еди́ному Естеству́ Триипоста́сному.

Сло́во бе́ в нача́ле, ко Отцу́ Собезнача́льное, и Ду́х Бо́жий Бо́г бе́ Пребезнача́льный, про́сто, единосу́щно, соесте́ственно Божество́, я́ко боже́ственнии глаго́лют пропове́дницы.

Совокупля́ю, и разделя́ю, я́же совокупле́нне разделя́емая, Еди́но Неразде́льно помышля́ю и Три́ мню́: учи́тели прие́млю три́ богоно́сныя, та́ко увещава́ющия мя́ ве́ровати.

Богородичен: Безма́терний пре́жде пло́ти, безо́тчий же по воплоще́нии, Сы́н Отчий и Ма́терний, и́же сия́ нарица́яй па́че ума́ обоя́: Бо́гу бо подоба́ют чуде́с пресла́вная.

Конда́к, гла́с 2.

Свяще́нныя и боговеща́нныя пропове́дники, ве́рх учи́телей, Го́споди, прия́л еси́ в наслажде́ние благи́х Твои́х и упокое́ние: труды́ бо о́нех и сме́рть прия́л еси́ па́че вся́каго всепло́дия, Еди́не, прославля́яй святы́я Твоя́.

Икос:

Кто́ дово́лен своя́ устне́ разве́рзти и подви́гнути язы́к к ды́шущим огне́м си́лою Сло́ва и Ду́ха? Оба́че толи́ко реши́ дерзну́: я́ко все́ преидо́ша челове́ческое естество́ си́и трие́ мно́гими и вели́кими дарова́ньми, дея́нием же и виде́нием, по обоему́ све́тлы превозше́дше. Те́мже зело́ вели́ких даро́в ты́я сподо́бил еси́, я́ко ве́рныя Твоя́ служи́тели, Еди́не, прославля́яй святы́я Твоя́.

Пе́снь 7.

Ирмос: Богопроти́вное веле́ние беззако́ннующаго мучи́теля высо́к пла́мень вознесло́ е́сть: Христо́с же простре́ Богочести́вым отроко́м ро́су духо́вную, Сы́й Благослове́н и Препросла́влен.

Побежда́ется, блаже́ннии, и отбега́ет я́же пре́жде непостоя́нная де́рзость ересе́й: во́ск же, растаява́емый от лица́ огня́, любоде́ичное же вся́кое уче́ние показу́ется, ва́шим приража́ющееся огнедохнове́нным веща́нием.

Лжи́вых у́бо уклони́шася е́ллинских буесло́вий, увеще́ние же томи́тельство, е́же в челове́цех, еди́но избра́ша, под ни́мже и́стину си́и трие́ утверди́вше, си́це ве́сь со́нм ве́рных побежда́ют словесы́ и увещева́ют.

Богородичен: В Тебе́ вся́ко прорече́ние воспочи́ и коне́ц прия́ше удивляю́щее глаго́лющия: из Тебе́ же светле́е и прорече́ний чудеса́ то́чат, Чи́стая, му́дрыя явля́юща сказа́тели.

Пе́снь 7.

Ирмос: Бо́жия снизхожде́ния о́гнь устыде́ся в Вавило́не иногда́, сего́ ра́ди о́троцы в пещи́, ра́дованною ного́ю, я́ко во цве́тнице лику́юще, поя́ху: благослове́н еси́ Бо́же, оте́ц на́ших.

Молча́щии и зову́щии, ви́димии же и слы́шимии, доброде́тели и му́дрости, богоглаго́ливии, столпы́ бы́ша, де́лом и сло́вом вопи́ти повелева́юще: благослове́н Бо́г оте́ц на́ших.

Бо́жия гла́сы, свы́ше возгреме́вшия на́м пречу́дно, мо́лнии же лучи́, и́же ва́ша веща́ния прие́млюще, всему́дрии, ку́пно у́бо пое́м с ва́ми: благослове́н Бо́г оте́ц на́ших.

Испуще́ни бу́дут гра́ди от каменопра́щных язы́ков, сокруша́ющии гнила́я уче́ний, а́ще кто́ посреде́ де́рзнет суесло́вников, пра́вая не веща́я: благослове́н Бо́г оте́ц на́ших.

Богородичен: В Тя́, Де́во, всели́ся и по рождестве́ Де́ву оста́ви Иже устроя́яй стихи́и и претворя́яй естества́, я́коже хо́щет, Богороди́тельннце Мари́е. К Нему́же вопие́м с Тобо́ю, Всенепоро́чная: благослове́н Бо́г оте́ц на́ших.

Пе́снь 8.

Ирмос: В пе́щь о́гненную ко отроко́м евре́йским снизше́дшаго и пла́мень в ро́су прело́жшаго Бо́га, по́йте дела́ я́ко Го́спода, и превозноси́те во вся́ ве́ки.

Разумева́ем благоче́стно и прославля́ем единоче́стно Еди́но Естество́, безмерномо́щную Еди́ницу же и Тро́ицу, вся́ сия́ словесы́ пра́вящую лу́чшими. Та́ко бо сла́вити трие́ богоно́снии преда́ша, с ни́миже покланя́емся Ей во ве́ки.

Соедини́шася трие́ богопропове́дницы, соедини́вши Тро́ицу и Неразде́льное во все́х соблю́дшии, Боже́ственным естество́м: еди́ну от Тоя́ восприя́ша неразде́льную сла́ву, в похвале́ние еди́но созыва́ющую превознося́щия Ю во ве́ки.

Богородичен: Прие́м, е́же по на́м, возда́в же Свое́ Благоде́тель, соде́я то́кмо, не пострада́ же, Де́во: твори́т бо, но не в тле́ние устроя́ет, па́че же и стражда́ во́лею, стра́стию стра́сти реши́т, я́коже трие́ отцы́ на́с тайноуча́т.

Пе́снь 8.

Ирмос: Седмери́цею пе́щь халде́йский мучи́тель, Богочести́вым неи́стовно разжже́; си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Яже Бо́г соедини́в во единоче́стнем едине́нии, похвали́тель да не разлуча́ет челове́к, но ра́вны непщу́я в те́хже дарова́ниих, ра́вных и пе́ний песнопоя́й да сподо́бит: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Си́льнии и непобори́мии Божества́ спобо́рницы и и́стины нелжи́вии споспе́шницы, глубины́ Ду́ха до́бре испыта́вше, боголе́пная о Бо́зе разуме́ния отту́ду составля́ют и уча́т пе́ти: лю́дие, превозноси́те Христа́ во вся́ ве́ки.

С небесе́ у́бо велича́йшая два́ свети́ла просвеща́ют по прее́мству дру́г дру́га подсо́лнечную; от земли́ же светле́е всю́ вселе́нную озаря́ют три́ по тому́жде превели́кая свети́ла, светя́ще с дру́г дру́гом и пою́ще ку́пно: лю́дие, превозноси́те Христа́ во ве́ки.

Богородичен: На́с ра́ди воплоще́ние и стра́сти честны́я, на́с ра́ди Бо́г с ме́ртвыми бы́сть, сме́рти у́бо невку́сен, я́ко страсте́й свобо́ден, к пло́ти же сме́ртней обще́нием глаго́лемый, и стра́сти причасти́ся, и сме́рти, с не́юже превозно́сим Христа́ во ве́ки.

На 9-й песни поем песнь Пресвятыя Богородицы:

Вели́чит душа́ Моя́ Го́спода и возра́довася дух Мой о Бо́зе Спа́се Мое́м.

К коемуждо стиху припеваем: Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Я́ко призре́ на смире́ние рабы́ Своея́, се бо, от ны́не ублажа́т Мя вси ро́ди.

Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Я́ко сотвори́ Мне вели́чие Си́льный, и свя́то и́мя Его́, и ми́лость Его́ в ро́ды родо́в боя́щимся Его́.

Сотвори́ держа́ву мы́шцею Свое́ю, расточи́ го́рдыя мы́слию се́рдца их.

Низложи́ си́льныя со престо́л, и вознесе́ смире́нныя, а́лчущия испо́лни благ, и богатя́щияся отпусти́ тщи.

Восприя́т Изра́иля о́трока Своего́, помяну́ти ми́лости, я́коже глаго́ла ко отце́м на́шим, Авраа́му и се́мени его́ да́же до ве́ка.

Пе́снь 9.

Ирмос: Безнача́льна Роди́теля Сы́н, Бо́г и Госпо́дь, вопло́щься от Де́вы, на́м яви́ся, омраче́нная просвети́ти, собра́ти расточе́нная, те́м Всепе́тую Богоро́дицу, велича́ем.

Се́ ва́ше де́лание и па́ства, за ю́же велича́йшия боле́зни претерпе́сте, во еди́но соше́дшеся, ку́пно же три́ вы́ соприе́мше, о́бщую и́мать похвалу́ ва́ше сладча́йшее соедине́ние.

Не обоюдоо́стрый ме́чь благода́ть, но трео́стрый на ра́тников тоя́ предлага́ет: еди́н небокова́нен ме́чь, треми́ крепостьми́ изощре́н, при́сно побо́рствуяй по Трисия́нном Еди́ном Божестве́.

Ва́ше жи́тельство на небесе́х бя́ше, пресла́внии, и пло́ть нося́щих во ве́ки нескве́рну, в ни́хже всесоверше́нне ны́не живу́ще, су́щим на земли́ на́м пребыва́ющим вы́шняя моли́те и мы́слити, и де́яти.

Богородичен: Тесни́т мя́ широта́ Твои́х вели́чий, Влады́чице, подавля́ющи сло́во от ча́стости, и пресла́вно ми́ случа́ется е́же недоумева́тися от благомо́щества, те́мже толи́ко Тя́ Возвели́чившаго сла́вим.

Пе́снь 9.

Ирмос: Ужасе́ся о се́м не́бо, и земли́ удиви́шася концы́, я́ко Бо́г яви́ся челове́ком пло́тски и чре́во Твое́ бы́сть простра́ннейшее небе́с. Те́м Тя́, Богоро́дицу, Ангелов и челове́к чинонача́лия велича́ют.

Возвы́сися Тро́ичная доброде́тель и вся́ческая сла́вы испо́лни, ину́ю лучу́ на́м возсия́вши трисве́тлу, я́ко свое́ осия́ние, небе́сныя тайноводи́тели, и́миже на Боже́ственное о́ныя виде́ние, благоче́ствующе, наставля́емся.

Не е́сть вто́рство в трие́х си́х, старе́йшинства бо ки́йждо и́х но́сит, пе́рвый не сы́й, и единочестны́я превышша́я: присвоя́ют же па́че дру́г дру́га побе́ду прера́достно, не вмеща́ется бо зде́ за́висти де́рзость, растлева́ющия единомы́слие.

Отце́в благоче́стие, своя́ перворо́дныя сы́ны показа́вшее, ча́да возражда́ет све́ту при́сная и непоро́чная те́ми, соверша́емая Ду́хом, жи́знь глаго́лавшим в ни́х, и це́л соблюда́ти испроша́ет до конца́ ми́р, его́же от ни́х насле́дствова.

Сы́на Бо́га жива́го му́дрых учи́телей ве́рх пропове́да, Твоего́ Сы́на, от открове́ния Отча, не от пло́ти и кро́ве сие́ тайноуве́дав, Ма́ти Бо́жия. Те́мже Тя́ и Де́ву просла́вив, Ма́терь и Богоро́дицу возвели́чи.

Свети́лен.

Три́ светоза́рныя свети́льники, па́че со́лнечных лу́чь от Светонача́льныя Тро́ицы и Трисо́лнечныя Еди́ницы, преесте́ственно сме́шены, богоно́сныя восхва́лим отцы́.

Сла́ва.

Све́та прия́телища, светолу́чныя мо́лнии, Васи́лия ны́не Вели́каго, Григо́рия Богосло́ва, Златоу́стаго Иоа́нна, да восхва́лим вси́.

И ны́не, Богородичен:

Еди́нственное Божество́, Отче, Сы́не и Ду́ше, мольба́ми Васи́лия, Григо́рия и Иоа́нна и Пречи́стыя Богоро́дицы да не отлучу́ся Твоея́ сла́вы.

Хвали́тны псалмы́, глас 5:

Вся́кое дыха́ние да хва́лит Го́спода./ Хвали́те Го́спода с небе́с,/ хвали́те Его́ в вы́шних.// Тебе́ подоба́ет песнь Бо́гу.

Хвали́те Его́ вси а́нгели Его́,/ хвали́те Его́ вся си́лы Его́.// Тебе́ подоба́ет песнь Бо́гу.

Сти́хиры, глас 5:

Стих: Сотвори́ти в них суд напи́сан/ сла́ва сия́ бу́дет всем преподо́бным Его́.

Ра́дуйся, святи́телей тро́ица, Це́ркве вели́кая забра́ла, столпи́ благоче́стия, ве́рных утвержде́ние, ерети́чествующих низпаде́ние, Христо́вы упа́сшии лю́ди Боже́ственными уче́нии и разли́чными доброде́тельми воспита́вшии, благода́ти я́снии пропове́дницы, зако́ны произложи́вшии Христо́ву исполне́нию, вожди́ к вы́шним, ра́йстии вхо́ды, Христа́ умоли́те низпосла́ти душа́м на́шим ве́лию ми́лость.

Стих: Хвали́те Его́ на си́лах Его́,/ хвали́те Его́ по мно́жеству вели́чествия Его́.

Ра́дуйся, святи́телей тро́ица, небоше́ственнии земни́и Ангели, ми́ра спасе́ние, челове́ков ра́дость и вселе́нныя учи́телие, Сло́ва побо́рницы, вра́чеве прему́дрии неду́гов душе́вных и теле́сных, приснотеку́щия ре́ки духо́вныя, словесы́ напая́ющии земно́е все́ лице́, богосло́внии степе́ни, златосло́ви боже́ственнии, Христа́ умоли́те низпосла́ти душа́м на́шим ве́лию ми́лость.

Стих: Хвали́те Его́ в тимпа́не и ли́це,/ хвали́те Его́ во стру́нах и орга́не.

Ра́дуйся, святи́телей тро́ица, земны́я тве́рди со́лнца, лучи́ и свети́ла от Трисо́лнечнаго озаре́ния, помраче́нных прозре́ние, цве́ти благово́ннии рая́ красне́йшии, Богосло́ве, му́дрый же Васи́лие, Златоу́сте, дщи́цы Ду́ха, скрижа́ли богоначерта́нныя, сосцы́, источа́ющии спасе́ния млеко́, му́дрости украше́ние, Христа́ умоли́те душа́м на́шим дарова́ти ве́лию ми́лость.

Стих: Хвали́те Его́ в кимва́лех доброгла́сных, хвали́те Его́ в кимва́лех восклица́ния. / Вся́кое дыха́ние да хва́лит Го́спода.

Глас 5: Сла́ва Отцу́ и Сы́ну и Свято́му Ду́ху

Востру́бим трубо́ю пе́сней, да ликовству́им пра́зднственная и взыгра́ем, ра́дующеся, в пречестно́е торжество́ учи́телей на́ших. Ца́рие и кня́зи да стеку́тся и святи́телие да воспле́щут в пе́снех, я́ко уче́ний источи́вшия ре́ки превели́кия три́, доброто́чныя присноживо́тныя Ду́ха, па́стырие и учи́телие, Пречестны́я Тро́ицы трегу́быя священнотаи́нники, соше́дшеся, да восхва́лим, филосо́фы — му́дрыя, иере́и — па́стыри, гре́шницы — предста́тели, ни́щии — обогати́тели, су́щии в ско́рбех — уте́шители, пу́тницы — спутеше́ственники, и́же в мо́ри — ко́рмчии и вси́, и́же везде́ те́пле предваря́ющия, боже́ственныя архиера́рхи похваля́юще, та́ко рце́м: пресвяти́и учи́телие, потщи́теся изъя́ти ве́рныя от жите́йских собла́знов и изба́вити ве́чных му́к моли́твами ва́шими.

Глас 5: И ны́не и при́сно и во ве́ки веко́в. Ами́нь.

Востру́бим трубо́ю пе́сней, прекло́ншися бо свы́ше, Всецари́ца Ма́ти Де́ва благослове́ньми венчава́ет воспева́ющия Ю. Ца́ри и кня́зи да стеку́тся и Цари́цу да воспле́щут в пе́снех, Царя́ ро́ждшую, сме́ртию одержи́мыя пе́рвее разреши́ти человеколю́бно благоизво́лившаго. Па́стырие и учи́телие, до́браго Па́стыря Пречи́стую Ма́терь, соше́дшеся, да восхва́лим, све́щник златоза́рный, светоно́сный о́блак, небе́с простра́ннейшу, одушевле́нный же киво́т, огнезра́чный Влады́чень престо́л, манноприе́мную злату́ю ста́мну, заключе́нную Сло́ва две́рь, все́х христиа́н прибе́жище, пе́сньми богоглаго́ливыми похваля́юще, си́це рце́м: пала́то Сло́ва, сподо́би смире́нных на́с небе́снаго Ца́рствия, ничто́же бо невозмо́жно хода́тайству Твоему́.

Славосло́вие вели́кое:

Сла́ва в вы́шних Бо́гу, и на земли́ мир, в челове́цех благоволе́ние. Хва́лим Тя, благослови́м Тя, кла́няем Ти ся, славосло́вим Тя, благодари́м Тя, вели́кия ра́ди сла́вы Твоея́. Го́споди Царю́ Небе́сный, Бо́же О́тче Вседержи́телю, Го́споди, Сы́не Единоро́дный, Иису́се Христе́, и Святы́й Ду́ше. Го́споди Бо́же, А́гнче Бо́жий, Сы́не Оте́чь, взе́мляй грех ми́ра, поми́луй нас; взе́мляй грехи́ ми́ра, приими́ моли́тву на́шу; седя́й одесну́ю Отца́, поми́луй нас. Я́ко Ты еси́ еди́н Свят, Ты еси́ еди́н Госпо́дь, Иису́с Христо́с, в сла́ву Бо́га Отца́. Ами́нь.

На всяк день благословлю́ Тя, и восхвалю́ И́мя Твое́ во ве́ки, и в век ве́ка.

Сподо́би, Го́споди, в день сей без греха́ сохрани́тися нам. Благослове́н еси́, Го́споди, Бо́же оте́ц на́ших, и хва́льно и просла́влено И́мя Твое́ во ве́ки. Ами́нь.

Бу́ди, Го́споди, ми́лость Твоя́ на нас, я́коже упова́хом на Тя.

Благослове́н еси́, Го́споди, научи́ мя оправда́нием Твои́м. (Три́жды)

Го́споди, прибе́жище был еси́ нам в род и род. Аз рех: Го́споди, поми́луй мя, исцели́ ду́шу мою́, я́ко согреши́х Тебе́. Го́споди, к Тебе́ прибего́х, научи́ мя твори́ти во́лю Твою́, я́ко Ты еси́ Бог мой: я́ко у Тебе́ исто́чник живота́, во све́те Твое́м у́зрим свет. Проба́ви ми́лость Твою́ ве́дущим Тя.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Три́жды)

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Святы́й Безсме́ртный, поми́луй нас.

Святы́й Бо́же, Святы́й Кре́пкий, Святы́й Безсме́ртный, поми́луй нас.

Тропа́рь, глас 4:

Яко апо́столов единонра́внии и вселе́нныя учи́телие, Влады́ку все́х моли́те ми́р вселе́нней дарова́ти и душа́м на́шим ве́лию ми́лость.

Утверди́, Бо́же, святу́ю правосла́вную ве́ру, правосла́вных христиа́н во век ве́ка.

Честне́йшую Херуви́м и Сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу, Тя велича́ем.

Сла́ва, и ны́не. Го́споди, поми́луй. (Три́жды) Благослови́.

Господи Иисусе Христе, Сыне Божий, моли́твами Пречи́стыя Своея́ Ма́тере, иже во святых отец наших Василия Великого, Григория Богослова и Иоанна Златоустого, преподобных и богоносных отец наших и всех святы́х, поми́луй и спаси нас я́ко Благ и Челове́колюбец.

Многоле́тие:

Вели́каго Господи́на и Отца́ на́шего Кири́лла,/ Святе́йшаго Патри́арха Моско́вского и всея́ Руси́,/ и Господи́на на́шего (Высоко-) Преосвяще́ннейшаго (имярек),/ (архи-)епи́скопа (митрополита (титул)),/ богохрани́мую страну́ на́шу Росси́йскую,/ и вся правосла́вныя христи́аны,// Го́споди, сохрани́ их на мно́гая ле́та.