Шрифт

▲

Богослужебные тексты для домашнего употребления

Дни памяти святых

Последование Всеношного бдения в день памяти святителя Иоанна Златоустаго (перенесение мощей). Для домашнего (келейного) совершения

Оглавление

ВСЕНО́ЩНОЕ БДЕ́НИЕ

ВЕЛИ́КАЯ ВЕЧЕ́РНЯ

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас. Ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Трижды.)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, (трижды). Сла́ва, и ны́не:

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Таже, Го́споди, поми́луй, (12), Сла́ва, и ны́не:

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 103:

Поется часть псалма:

Благослови́, душе́ моя́, Го́спода. / Благослове́н еси́, Го́споди. / Го́споди, Бо́же мой, возвели́чился еси́ зело́. / Благослове́н еси́, Го́споди. / Во испове́дание и в велеле́поту обле́клся еси́. / Благослове́н еси́, Го́споди. / Посреде́ гор про́йдут во́ды. / Ди́вна дела́ Твоя́, Го́споди. / Вся прему́дростию сотвори́л еси́. / Сла́ва Ти, Го́споди, сотвори́вшему вся.

Или читается псалом полностью:

Благослови́, душе́ моя́, Го́спода. Го́споди, Бо́же мой, возвели́чился еси́ зело́. Во испове́дание и в велеле́поту обле́клся еси́. Одея́йся све́том, я́ко ри́зою, простира́яй не́бо, я́ко ко́жу. Покрыва́яй вода́ми превы́спренняя Своя́, полага́яй о́блаки на восхожде́ние Свое́, ходя́й на крилу́ ве́треню. Творя́й А́нгелы Своя́ ду́хи и слуги́ Своя́ пла́мень о́гненный. Основа́яй зе́млю на тве́рди ея́, не преклони́тся в век ве́ка. Бе́здна, я́ко ри́за, одея́ние ея́, на гора́х ста́нут во́ды, от запреще́ния Твоего́ побе́гнут, от гла́са гро́ма Твоего́ убоя́тся. Восхо́дят го́ры и нисхо́дят поля́ в ме́сто, е́же основа́л еси́ им. Преде́л положи́л еси́, eго́же не пре́йдут, ниже́ обратя́тся покры́ти зе́млю. Посыла́яй исто́чники в де́брех, посреде́ гор про́йдут во́ды. Напая́ют вся зве́ри се́льныя, ждут она́гри в жа́жду свою́. На ты́х пти́цы небе́сныя привита́ют, от среды́ ка́мения дадя́т глас. Напая́яй го́ры от превы́спренних Свои́х, от плода́ дел Твои́х насы́тится земля́. Прозяба́яй траву́ ското́м, и злак на слу́жбу челове́ком, извести́ хлеб от земли́. И вино́ весели́т се́рдце челове́ка, ума́стити лице́ еле́ем, и хлеб се́рдце челове́ка укрепи́т. Насы́тятся древа́ польска́я, ке́дри Лива́нстии, и́хже еси́ насади́л. Та́мо пти́цы вогнездя́тся, ероди́ево жили́ще предводи́тельствует и́ми. Го́ры высо́кия еле́нем, ка́мень прибе́жище за́яцем. Сотвори́л есть луну́ во времена́, со́лнце позна́ за́пад свой. Положи́л еси́ тму, и бысть нощь, в не́йже про́йдут вси зве́рие дубра́внии. Ски́мни рыка́ющии, восхи́тити и взыска́ти от Бо́га пи́щу себе́. Возсия́ со́лнце и собра́шася и в ло́жах свои́х ля́гут. Изы́дет челове́к на де́ло свое́ и на де́лание свое́ до ве́чера. Я́ко возвели́чишася дела́ Твоя́, Го́споди, вся прему́дростию сотвори́л еси́, испо́лнися земля́ тва́ри Твоея́. Сие́ мо́ре вели́кое и простра́нное, та́мо га́ди, и́мже несть числа́, живо́тная ма́лая с вели́кими, та́мо корабли́ препла́вают, змий сей, eго́же созда́л еси руга́тися eму́. Вся к Тебе́ ча́ют, да́ти пи́щу им во бла́го вре́мя. Да́вшу Тебе́ им соберу́т, отве́рзшу Тебе́ ру́ку вся́ческая испо́лнятся бла́гости, отвра́щшу же Тебе́ лице́, возмяту́тся, отъи́меши дух их, и исче́знут, и в персть свою́ возвратя́тся. По́слеши Ду́ха Твоего́, и сози́ждутся, и обнови́ши лице́ земли́. Бу́ди сла́ва Госпо́дня во ве́ки, возвесели́тся Госпо́дь о де́лех Свои́х, призира́яй на зе́млю, и творя́й ю́ трясти́ся, прикаса́яйся гора́м, и дымя́тся. Воспою́ Го́сподеви в животе́ мое́м, пою́ Бо́гу моему́, до́ндеже есмь, да услади́тся Ему́ бесе́да моя́, аз же возвеселю́ся о Го́споде. Да исче́знут гре́шницы от земли́, и беззако́нницы, я́коже не бы́ти им. Благослови́, душе́ моя́, Го́спода.

Со́лнце позна́ за́пад свой. Положи́л еси́ тму, и бысть нощь. Я́ко возвели́чишася дела́ Твоя́, Го́споди, вся прему́дростию сотвори́л еси́.

Сла́ва, и ны́не: Аллилу́иа, аллилу́иа, аллилу́иа, сла́ва Тебе́ Бо́же. Трижды.

Блаже́н муж:

Блаже́н муж, и́же не и́де на сове́т нечести́вых.

Аллилу́иа, аллилу́иа, аллилу́иа.

Я́ко весть Госпо́дь путь пра́ведных, и путь нечести́вых поги́бнет.

Аллилу́иа, аллилу́иа, аллилу́иа.

Рабо́тайте Го́сподеви со стра́хом и ра́дуйтеся Ему́ с тре́петом.

Аллилу́иа, аллилу́иа, аллилу́иа.

Блаже́ни вси наде́ющиися Нань.

Аллилу́иа, аллилу́иа, аллилу́иа.

Воскресни́, Го́споди, спаси́ мя, Бо́же мой.

Аллилу́иа, аллилу́иа, аллилу́иа.

Госпо́дне есть спасе́ние, и на лю́дех Твои́х благослове́ние Твое́.

Аллилу́иа, аллилу́иа, аллилу́иа.

Сла́ва Отцу́ и Сы́ну и Свято́му Духу.

Аллилу́иа, аллилу́иа, аллилу́иа.

И ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Го́споди, воззва́х, глас 4:

Го́споди, воззва́х к Тебе́, услы́ши мя./ Услы́ши мя, Го́споди./ Го́споди, воззва́х к Тебе́, услы́ши мя:/ вонми́ гла́су моле́ния моего́,/ внегда́ воззва́ти ми к Тебе́.// Услы́ши мя, Го́споди.

Да испра́вится моли́тва моя́,/ я́ко кади́ло пред Тобо́ю,/ воздея́ние руку́ мое́ю/ – же́ртва вече́рняя.// Услы́ши мя, Го́споди.

Стихи́ры пра́здника, глас 4:

Стих: А́ще беззако́ния на́зриши, Го́споди, Го́споди, кто постои́т? Я́ко у Тебе́ очище́ние есть.

Златокова́нную трубу́, / богодохнове́нный орга́н, / догма́тов пучи́ну неизчерпа́емую, / церко́вное утвержде́ние, / у́м небе́сный, / прему́дрости глубину́, / ча́шу всезлату́ю, / излива́ющую ре́ки уче́ний медото́чных / и напая́ющую тва́рь, / пе́сненно воспои́м.

Стих: И́мене ра́ди Твоего́ потерпе́х Тя, Го́споди, потерпе́ душа́ моя́ в сло́во Твое́, упова́ душа́ моя́ на Го́спода.

Звезду́ незаходи́мую, / заря́ми просвеща́ющу уче́ний / всю́ подсо́лнечную, / покая́ния пропове́дателя, / гу́бу всезлату́ю, / мокроту́ лю́таго отча́яния изъе́млющую / и ороша́ющую сердца́, иста́явшая грехи́, / Иоа́нна досто́йно / златослове́снаго почестви́м.

Стих: От стра́жи у́тренния до но́щи, от стра́жи у́тренния да упова́ет Изра́иль на Го́спода.

Земны́й Ангел и небе́сный челове́к, / ла́стовица благоглаго́лива и многогла́сна, / доброде́телей сокро́вище, / ка́мень неразсе́дный, / ве́рных воображе́ние, му́чеником подо́бен, / равностоя́тель святы́х Ангелов, / апо́столов единонра́вный, / в пе́снех да возвели́чится Златоу́ст.

Стих: Я́ко у Го́спода ми́лость, и мно́гое у Него́ избавле́ние, и Той изба́вит Изра́иля от всех беззако́ний eго́.

Свяще́ннейшее соста́вим ликова́ние: / вене́ц бо златозра́чный Це́ркве Христо́вы / на сла́ву ца́рску дне́сь / от Кома́н ко гра́ду прихо́дит Ца́рствующему, / све́тит, сия́я свы́ше / в возвраще́нии свое́м, / к Ца́рствию невеще́ственному ве́рных вво́дит / и все́х присвоя́ет Царю́. / Те́мже вопие́м: / златоиме́нне о́тче, / боже́ственный Златоу́сте всезлаты́й, / умоли́ спасти́ и просвети́ти ду́ши на́ша.

Стих: Хвали́те Го́спода вси язы́цы, похвали́те Его́ вси лю́дие.

Яко не́бо све́тлое церко́вное, / за́пад, о Златоу́сте! / заточе́ние подъя́л еси́ суро́вейшее, / возсиява́еши ны́не, ра́дуяся, / тва́ри незаходи́мое, гре́еши, / украша́емь чуде́с звезда́ми, му́дре, / но́сиши Христа́, пресветле́юща со́лнца о́бразом, / просвеща́ющаго ны́не твое́ возвраще́ние. / Те́мже вопие́м: / светоза́рнейший светосло́ве, Златоу́сте всему́дре, / моли́ спасти́ и просвети́ти ду́ши на́ша.

Стих: Я́ко утверди́ся ми́лость Его́ на нас, и и́стина Госпо́дня пребыва́ет во век.

Ны́не не́бо со Ангелы лику́ет, / с тва́рию веселя́тся челове́честии собо́ри, / и́же бо на земли́, небомы́сленныя показу́я вся́ / ле́ствицею боже́ственною честны́х глаго́л свои́х, / се́й к горе́ возше́ствием / богоше́ственных степе́ней, / я́ко Иа́ков но́вый, / показу́ет Ангелов боже́ственных, / ра́дующихся о преложе́нии его́. / Те́м вопие́м: / всеблаже́нне, невеще́ственных Ангелов собесе́дниче Златосло́ве, / моли́ спасти́ся душа́м на́шим.

Глас 4: Сла́ва Отцу́ и Сы́ну и Свято́му Ду́ху.

Не подоба́ше тебе́, Златоу́сте, Ца́рский гра́д оста́вившу, жи́ти в Кома́нех, отону́дуже Бо́гом приведе́нное ца́рское всечрежде́ние па́ки тя́ возврати́ в Ца́рский гра́д. Возвесели́ся же и Це́рковь, ви́девши тя́, испове́дающися и глаго́лющи: вели́чит сла́ва моя́ Го́спода, отда́вшаго ми́ невестовожда́ и утвержде́ние ве́ры, прия́тие досто́инств мои́х и воспоко́й мои́х скра́ний, высоту́ смиренному́дрия, и глубину́ ми́лостыни, и широту́ моея́ нищеты́, и долготу́ покая́ния. Те́мже мо́лим тя́, преподо́бне о́тче, ми́р испроси́ и ве́лию ми́лость душа́м на́шим.

Глас 4: И ны́не и при́сно и во ве́ки веко́в. Ами́нь.

Иже Тебе́ ра́ди богооте́ц проро́к Дави́д пе́сненно о Тебе́ провозгласи́, вели́чия тебе́ Сотво́ршему: предста́ Цари́ца одесну́ю Тебе́. Тя́ бо Ма́терь, Хода́таицу живота́ показа́, без отца́ из Тебе́ вочелове́читися благоволи́вый Бо́г, да Сво́й па́ки обнови́т о́браз, истле́вший страстьми́, и заблу́ждшее горохи́щное обре́т овча́, на ра́мо восприи́м, к Отцу́ принесе́т, и Своему́ хоте́нию, с небе́сными соедини́т си́лами, и спасе́т, Богоро́дице, мíр, Христо́с име́яй ве́лию и бога́тую ми́лость.

Све́те Тихи́й:

Све́те Ти́хий святы́я сла́вы Безсме́ртнаго Отца́ Небе́снаго, Свята́го, Блаже́ннаго, Иису́се Христе́! Прише́дше на за́пад со́лнца, ви́девше свет вече́рний, пое́м Отца́, Сы́на и Свята́го Ду́ха, Бо́га. Досто́ин еси́ во вся времена́ пет бы́ти гла́сы преподо́бными, Сы́не Бо́жий, живо́т дая́й; те́мже мир Тя сла́вит.

Пареми́и:

1. При́тчей чте́ние.

Па́мять пра́веднаго с похвала́ми, и благослове́ние Госпо́дне на главе́ его́. Блаже́н челове́к, и́же обре́те прему́дрость, и сме́ртен, и́же уве́де ра́зум. Лу́чше бо сию́ купова́ти, не́жели зла́та и сребра́ сокро́вища. Честне́йшая же е́сть ка́мений многоце́нных, все́ же честно́е недосто́йно ея́ е́сть. Долгота́ бо дне́й и ле́та живота́ в десни́це ея́, в шу́йце же ея́ бога́тство и сла́ва. От у́ст ея́ исхо́дит пра́вда, зако́н же и ми́лость на язы́це но́сит. Послу́шайте у́бо мене́, о ча́да, честна́я бо реку́, и блаже́н челове́к, и́же пути́ моя́ сохрани́т: исхо́ди бо мои́ — исхо́ди живота́, и уготовля́ется хоте́ние от Го́спода. Сего́ ра́ди молю́ ва́с и предлага́ю мо́й гла́с сыново́м челове́ческим. Я́ко а́з, прему́дрость, устро́их сове́т, и ра́зум и смы́сл аз призва́х. Мо́й сове́т и утвержде́ние, мо́й ра́зум, моя́ же кре́пость. Аз мене́ лю́бящия люблю́, и́щущии же мене́ обря́щут благода́ть. Разуме́йте у́бо, незло́бивии, кова́рство, ненака́зании же, прилага́йте сердца́. Послу́шайте мене́ и па́ки, честна́я бо реку́, и отве́рзу от усте́н пра́вая, я́ко и́стине поучи́тся горта́нь мой, ме́рзки же пре́до мно́ю устны́ лжи́выя. С пра́вдою вси́ глаго́лы у́ст мои́х, ничто́же в ни́х стро́потно, ниже́ развраще́нно. Вся́ пра́ва су́ть разумева́ющим и про́ста обрета́ющим ра́зум. Науча́ю бо ва́с и́стине, да бу́дет о Го́споде наде́жда ва́ша, и испо́лнитеся Ду́ха.

2. Прему́дрости Соломо́новы чте́ние

Уста́ пра́веднаго ка́плют прему́дрость, устне́ же муже́й му́дрых ве́дят благода́ть. Уста́ му́дрых поуча́тся прему́дрости, пра́вда же избавля́ет и́х от сме́рти. Сконча́вшуся му́жу пра́ведну, не поги́бнет наде́жда. Сы́н бо пра́веден ражда́ется в живо́т и во благи́х свои́х пло́д пра́вды объи́мет. Све́т пра́ведным всегда́, и от Го́спода обря́щут благода́ть и сла́ву. Язы́к му́дрых до́брая све́сть, и в се́рдце и́х почи́ет му́дрость. Лю́бит Госпо́дь преподо́бная сердца́, прия́тни же Ему́ вси́ непоро́чнии в пути́. Му́дрость Госпо́дня просвеща́ет лице́ разу́мнаго: постига́ет бо жела́ющия ю́, пре́жде да́же разуме́ти ю́, и удо́бь у́зрится от лю́бящих ю́. Утреневавый к не́й не утруди́тся, и бдя́й ея́ ра́ди вско́ре без печа́ли бу́дет. Яко досто́йных ея́ сама́ обхо́дит, и́щущи, и во стезя́х ея́ явля́ется и́м благоприе́мне. Му́дрости никогда́же одоле́ет зло́ба. Си́х ра́ди и рачи́тель бы́х добро́ты ея́, и возлюби́х ю́, и поиска́х от ю́ности моея́. И взыска́х неве́сту привести́ себе́, я́ко все́х Влады́ка возлюби́ ю́. Таи́бница бо е́сть Бо́жия хи́трости и обрета́тельница де́л Его́. Труды́ ея́ су́ть доброде́тели: целому́дрию же и ра́зуму та́ учи́т, пра́вде и му́жеству, и́хже потре́бнее ничто́же е́сть в житии́ челове́ком. Аще же и мно́гаго иску́сства жела́ет кто́, ве́сть дре́вняя, и бы́ти хотя́щая разсмо́трит. Све́сть изви́тия слове́с и разреше́ния гада́ний, зна́мения и чудеса́ проразуме́ет, и сбытия́ време́н и ле́т, и все́м сове́тник е́сть бла́г. Яко безсме́ртие е́сть в не́й и благосла́вие во обще́нии слове́с ея́. Сего́ ра́ди бесе́довах ко Го́споду, и помоли́хся Ему́, и ре́х от всего́ се́рдца моего́: Бо́же отце́в и Го́споди ми́лости, сотвори́вый вся́ сло́вом Твои́м и му́дростию Твое́ю устро́ивый челове́ка, да владе́ет бы́вшими от Тебе́ тварьми́ и да управля́ет ми́р в преподо́бии и пра́вде. Да́ждь ми́ Твои́х Престо́лов приседя́щую прему́дрость и не отлучи́ мене́ от о́трок Твои́х, я́ко а́з ра́б Тво́й и сы́н рабы́ни Твоея́. Посли́ ю́ с Небе́с от свята́го жили́ща Твоего́ и от Престо́ла сла́вы Твоея́, да, су́щи со мно́ю, научи́т мя́, что́ благоуго́дно е́сть пред Тобо́ю, и наста́вит мя́ в ра́зум, и сохрани́т мя́ в сла́ве свое́й. Помышле́ния бо сме́ртных вся́ боязли́ва и погреши́тельна умышле́ния и́х.

3. Прему́дрости Соломо́новы чте́ние.

Похваля́ему пра́веднику, возвеселя́тся лю́дие: безсме́ртие бо е́сть па́мять его́, я́ко от Го́спода познава́ется и от челове́к, и уго́дна Го́сподеви душа́ его́. Возлюби́те у́бо, о му́жие, му́дрость и поживете́: восхощи́те ея́ и нака́зани бу́дете. Нача́ло бо ея́ любы́ и соблюде́ние зако́на. Почти́те прему́дрость, да во ве́ки ца́рствуете. Возвещу́ ва́м и не скры́ю от ва́с та́ин Бо́жиих, я́ко То́й му́дрости наста́вник е́сть, и му́дрых испра́витель, и вся́кому смы́слу и де́лу хитре́ц. И все́м смы́слом научи́т му́дрость, е́сть бо в не́й Ду́х разу́мен и свя́т, и сия́ние све́та присносу́щнаго, и о́браз бла́гости Бо́жия. Та́я дру́ги Бо́жия и проро́ки устроя́ет, благоле́пнейши же е́сть со́лнца и па́че вся́каго сотворе́ния зве́зд, све́ту сосужда́ема, обрета́ется пе́рвейши. Та́я угожда́ющих е́й от боле́зни изба́ви и наста́ви на стези́ пра́выя. Даде́ и́м ра́зум име́ти свя́т, и сохрани́ я́ от ловя́щих, и по́двиг кре́пок подаде́ и́м. Да разуме́ют вси́, я́ко си́льнейши всего́ е́сть благоче́стие, и никогда́же премо́жет зло́ба му́дрости, ниже́ пре́йдет злы́я облича́ющи су́д. Реко́ша же в себе́, помы́сливше непра́ведно: наси́льствуем пра́ведному, и не пощади́м преподо́бства его́, ни усрами́мся седи́н ста́рости многоле́тны. Бу́дет бо на́м кре́пость — зако́н и улови́м пра́веднаго, я́ко неуго́ден на́м е́сть, и проти́вится дело́м на́шим, и поно́сит на́м отпаде́ние зако́на, и облича́ет на́м согреше́ния наказа́ния на́шего. Возвеща́ет на́м ра́зум име́ти Бо́жий, и о́трока Госпо́дня себе́ имену́ет. Бы́сть на́м на обличе́ние помышле́ний на́ших и тя́жек на́м е́сть и ви́димь, я́ко неподо́бно ины́м житие́ его́, и измене́ны стези́ его́. В поруга́ние вмени́хомся ему́, и удаля́ется от путе́й на́ших, я́ко от нечисто́т, и блажи́т после́дняя пра́ведных. Уви́дим у́бо, а́ще словеса́ его́ и́стинна су́ть, иску́сим, я́же сбыва́ются ему́. Руга́нием и му́кою истя́жем его́, да разуме́ем кро́тость его́ и иску́сим беззло́бство его́, сме́ртию безобра́зною осу́дим его́, бу́дет бо посеще́ние от слове́с его́. Сия́ помы́слиша и прельсти́шася, ослепи́ бо я́ зло́ба и́х, и не разуме́ша та́ин Бо́жиих и не разсуди́ша, я́ко Ты́ еси́ Бо́г еди́н, живота́ име́яй и сме́рти вла́сть, и спаса́яй во вре́мя ско́рби, и избавля́яй от вся́каго зла́. Ще́др и Ми́лостив, и дая́й преподо́бным Свои́м благода́ть, и Свое́ю мы́шцею го́рдым противля́яйся.

Го́споди, поми́луй. (Три́жды,)

Сподо́би, Го́споди:

Сподо́би, Го́споди, в ве́чер сей без греха́ сохрани́тися нам. Благослове́н еси́, Го́споди, Бо́же оте́ц на́ших, и хва́льно и просла́влено и́мя Твое́ во ве́ки. Ами́нь.

Бу́ди, Го́споди, ми́лость Твоя́ на нас, я́коже упова́хом на Тя. Благослове́н еси́, Го́споди, научи́ мя оправда́нием Твои́м. Благослове́н еси́, Влады́ко, вразуми́ мя оправда́нием Твои́м. Благослове́н еси́, Святы́й, просвети́ мя оправда́нии Твои́ми.

Го́споди, ми́лость Твоя́ во век, дел руку́ Твое́ю не пре́зри. Тебе́ подоба́ет хвала́, Тебе́ подоба́ет пе́ние, Тебе́ сла́ва подоба́ет. Отцу́ и Сы́ну и Свято́му Ду́ху, ны́не и при́сно и во ве́ки веко́в. Ами́нь.

Го́споди, поми́луй. (40 раз)

Стихи́ры на стихо́вне:

Стихи́ры: Глас 5:

Ра́дуется Це́рковь Христо́ва, на све́щник свяще́нный взира́ющи, тя́, свети́льника светоно́снаго, его́же низложи́вше врази́, под спу́дом молча́ния скры́ша, почита́ет на горе́ тя́ доброде́телей, о́тче преподо́бне, я́ко Боже́ственное сия́ние, вселе́нныя концы́ па́че со́лнца облиста́юща чудесы́. Дне́сь недароприя́тный Бо́жий су́д показу́ет пра́вду с высоты́ твою́, я́ко полу́дне пресве́тлое, и подава́ет су́щим в ми́ре ми́р и ве́лию ми́лость.

Стих: Уста́ моя́ возглаго́лют прему́дрость, и поуче́ние се́рдца моего́ ра́зум.

Ми́ра пшеницоме́ритель, ве́рнии, и́же сла́достию небе́сною Ду́ха сердца́ напита́я все́х, не из Еги́пта прихо́дит: Ио́сиф же но́вый проявля́яся, в честны́х моще́х от Кома́н прихо́дит, лю́тых бу́рю и пучи́ну дне́сь печа́лей отсека́я моли́твами. Сего́ у́бо ублажи́м и ве́рою возопии́м: прииди́, блаже́нне, посреди́ соверша́ющих па́мять твою́, те́м спасе́ние подава́я бога́тно и ве́лию ми́лость.

Стих: Уста́ пра́веднаго поуча́тся прему́дрости, и язы́к его́ возглаго́лет су́д.

То́чит, я́ко мирополо́жница кра́сная, чуде́с Боже́ственнаго ми́ра, Златоу́сте, ра́ка твоя́ ми́ру, и врачева́ний струя́ми ду́ши благоуха́ет честву́ющих тя́, Христо́выми благода́тьми, я́ко невеще́ственными арома́ты, обогати́л еси́, благово́ние же да́руеши присноживу́щее ве́рою притека́ющим. Те́мже, наслажда́ющеся благода́тей твои́х, прему́дре, и пречи́стых и боже́ственных напита́вшеся моще́й твои́х, ве́рно про́сим душа́м на́шим да́ти ве́лию ми́лость.

Слава, глас 6: Преподо́бне треблаже́нне, святе́йший о́тче, па́стырю до́брый и Началопа́стыря Христа́ учениче́, положи́вый ду́шу за о́вцы: ты́ и ны́не, всехва́льне Иоа́нне Златоу́сте, проси́ моли́твами твои́ми дарова́ти на́м ве́лию ми́лость.

И ныне, глас 6:

Богоро́дице, Ты́ еси́ лоза́ и́стинная, возрасти́вшая на́м Пло́д живота́, Тебе́ мо́лимся: моли́ся, Влады́чице, со святы́ми апо́столы поми́ловати ду́ши на́ша.

Моли́тва свята́го Симео́на Богоприи́мца:

Ны́не отпуща́еши раба́ Твоего́, Влады́ко,/ по глаго́лу Твоему́, с ми́ром;/ я́ко ви́деста о́чи мои́ спасе́ние Твое́,/ е́же еси́ угото́вал пред лице́м всех люде́й,/ свет во открове́ние язы́ков,// и сла́ву люде́й Твои́х Изра́иля.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Го́споди, поми́луй. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Тропа́рь, глас 8:

Уст твои́х, я́коже све́тлость огня́ возсия́вши, благода́ть вселе́нную просвети́: не сребролю́бия ми́рови сокро́вища сниска́, высоту́ на́м смиренному́дрия показа́, но, твои́ми словесы́ наказу́я, о́тче Иоа́нне Златоу́сте, моли́ Сло́ва, Христа́ Бо́га, спасти́ся душа́м на́шим. (Дважды)

Песнь Пресвятей Богородице:

Богоро́дице Де́во, ра́дуйся, / Благода́тная Мари́е, Госпо́дь с Тобо́ю; / благослове́на Ты в жена́х / и благослове́н Плод чре́ва Твоего́, / я́ко Спа́са родила́ еси́ душ на́ших. (Единожды)

Бу́ди И́мя Госпо́дне благослове́но от ны́не и до ве́ка. (Три́жды)

Псало́м 33:

Благословлю́ Го́спода на вся́кое вре́мя,/ вы́ну хвала́ Его́ во усте́х мои́х./ О Го́споде похва́лится душа́ моя́,/ да услы́шат кро́тцыи, и возвеселя́тся./ Возвели́чите Го́спода со мно́ю,/ и вознесе́м И́мя Его́ вку́пе./ Взыска́х Го́спода, и услы́ша мя,/ и от все́х скорбе́й мои́х изба́ви мя./ Приступи́те к Нему́, и просвети́теся,/ и ли́ца ва́ша не постыдя́тся./ Сей ни́щий воззва́, и Госпо́дь услы́ша и́,/ и от все́х скорбе́й его́ спасе́ и́./ Ополчи́тся а́нгел Госпо́день о́крест боя́щихся Его́,/ и изба́вит их./ Вкуси́те и ви́дите, я́ко благ Госпо́дь:/ блаже́н муж, и́же упова́ет Нань./ Бо́йтеся Го́спода, вси́ святи́и Его́,/ я́ко несть лише́ния боя́щимся Его́./ Бога́тии обнища́ша и взалка́ша:/ взыска́ющии же Го́спода// не лиша́тся вся́каго бла́га.

У́ТРЕНЯ.

Шестопса́лмие:

Сла́ва в вы́шних Бо́гу, и на земли́ мир, в челове́цех благоволе́ние. (Три́жды)

Го́споди, устне́ мои́ отве́рзеши, и уста́ моя́ возвестя́т хвалу́ Твою́. (Два́жды)

Псалом 3:

Го́споди, что ся умно́жиша стужа́ющии ми́? Мно́зи востаю́т на мя, мно́зи глаго́лют души́ мое́й: несть спасе́ния eму́ в Бо́зе eго́. Ты же, Го́споди, Засту́пник мой еси́, сла́ва моя́ и вознося́й главу́ мою́. Гла́сом мои́м ко Го́споду воззва́х, и услы́ша мя от горы́ святы́я Своея́. Аз усну́х, и спах, воста́х, я́ко Госпо́дь засту́пит мя. Не убою́ся от тем люде́й, о́крест напа́дающих на мя. Воскресни́, Го́споди, спаси́ мя, Бо́же мой, я́ко Ты порази́л еси́ вся вражду́ющыя ми всу́е: зу́бы гре́шников сокруши́л еси́. Госпо́дне есть спасе́ние, и на лю́дех Твои́х благослове́ние Твое́.

Аз усну́х, и спах, воста́х, я́ко Госпо́дь засту́пит мя.

Псалом 37:

Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́. Я́ко стре́лы Твоя́ унзо́ша во мне, и утверди́л еси́ на мне ру́ку Твою́. Несть исцеле́ния в пло́ти мое́й от лица́ гне́ва Твоего́, несть ми́ра в косте́х мои́х от лица́ грех мои́х. Я́ко беззако́ния моя́ превзыдо́ша главу́ мою́, я́ко бре́мя тя́жкое отяготе́ша на мне. Возсмерде́ша и согни́ша ра́ны моя́ от лица́ безу́мия моего́. Пострада́х и сляко́хся до конца́, весь день се́туя хожда́х. Я́ко ля́двия моя́ напо́лнишася поруга́ний, и несть исцеле́ния в пло́ти мое́й. Озло́блен бых и смири́хся до зела́, рыка́х от воздыха́ния се́рдца моего́. Го́споди, пред Тобо́ю все жела́ние мое́ и воздыха́ние мое́ от Тебе́ не утаи́ся. Се́рдце мое́ смяте́ся, оста́ви мя си́ла моя́, и свет о́чию мое́ю, и той несть со мно́ю. Дру́зи мои́ и и́скреннии мои́ пря́мо мне прибли́жишася и ста́ша, и бли́жнии мои́ отдале́че мене́ ста́ша и нужда́хуся и́щущии ду́шу мою́, и и́щущии зла́я мне глаго́лаху су́етная и льсти́вным весь день поуча́хуся. Аз же я́ко глух не слы́шах и я́ко нем не отверза́яй уст свои́х. И бых я́ко челове́к не слы́шай и не имы́й во усте́х свои́х обличе́ния. Я́ко на Тя, Го́споди, упова́х, Ты услы́шиши, Го́споди Бо́же мой. Я́ко рех: да не когда́ пора́дуют ми ся врази́ мои́: и внегда́ подвижа́тися нога́м мои́м, на мя велере́чеваша. Я́ко аз на ра́ны гото́в, и боле́знь моя́ предо мно́ю есть вы́ну. Я́ко беззако́ние мое́ аз возвещу́ и попеку́ся о гресе́ мое́м. Врази́ же мои́ живу́т и укрепи́шася па́че мене́, и умно́жишася ненави́дящии мя без пра́вды. Воздаю́щии ми зла́я возблага́я оболга́ху мя, зане́ гоня́х благосты́ню. Не оста́ви мене́, Го́споди Бо́же мой, не отступи́ от Мене́. Вонми́ в по́мощь мою́, Го́споди спасе́ния моего́.

Не оста́ви мене́, Го́споди Бо́же мой, не отступи́ от Мене́. Вонми́ в по́мощь мою́, Го́споди спасе́ния моего́.

Псалом 62:

Бо́же, Бо́же мой, к Тебе́ у́тренюю, возжада́ Тебе́ душа́ моя́, коль мно́жицею Тебе́ плоть моя́, в земли́ пу́сте и непрохо́дне, и безво́дне. Та́ко во святе́м яви́хся Тебе́, ви́дети си́лу Твою́ и сла́ву Твою́. Я́ко лу́чши ми́лость Твоя́ па́че живо́т, устне́ мои́ похвали́те Тя. Та́ко благословлю́ Тя в животе́ мое́м, о и́мени Твое́м воздежу́ ру́це мои́. Я́ко от ту́ка и ма́сти да испо́лнится душа́ моя́, и устна́ма ра́дости восхва́лят Тя уста́ моя́. А́ще помина́х Тя на посте́ли мое́й, на у́тренних поуча́хся в Тя. Я́ко был еси́ Помо́щник мой, и в кро́ве крилу́ Твое́ю возра́дуюся. Прильпе́ душа́ моя́ по Тебе́, мене́ же прия́т десни́ца Твоя́. Ти́и же всу́е иска́ша ду́шу мою́, вни́дут в преиспо́дняя земли́, предадя́тся в ру́ки ору́жия, ча́сти ли́совом бу́дут. Царь же возвесели́тся о Бо́зе, похва́лится всяк клены́йся Им, я́ко загради́шася уста́ глаго́лющих непра́ведная.

На у́тренних поуча́хся в Тя. Я́ко был еси́ Помо́щник мой, и в кро́ве крилу́ Твое́ю возра́дуюся. Прильпе́ душа́ моя́ по Тебе́, мене́ же прия́т десни́ца Твоя́.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Го́споди поми́луй. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Псалом 87:

Го́споди Бо́же спасе́ния моего́, во дни воззва́х, и в нощи́ пред Тобо́ю. Да вни́дет пред Тя моли́тва моя́: приклони́ у́хо Твое́ к моле́нию моему́, я́ко испо́лнися зол душа́ моя́, и живо́т мой аду прибли́жися. Привмене́н бых с низходя́щими в ров, бых я́ко челове́к без по́мощи, в ме́ртвых свобо́дь, я́ко я́звеннии спя́щии во гро́бе, и́хже не помяну́л еси́ ктому́, и ти́и от руки́ Твоея́ отринове́ни бы́ша. Положи́ша мя в ро́ве преиспо́днем, в те́мных и се́ни сме́ртней. На мне утверди́ся я́рость Твоя́, и вся во́лны Твоя́ наве́л еси́ на мя. Уда́лил еси́ зна́емых мои́х от Мене́, положи́ша мя ме́рзость себе́: пре́дан бых и не исхожда́х. О́чи мои́ изнемого́сте от нищеты́, воззва́х к Тебе́, Го́споди, весь день, возде́х к Тебе́ ру́це мои́. Еда́ ме́ртвыми твори́ши чудеса́? Или́ вра́чеве воскреся́т, и испове́дятся Тебе́? Еда́ пове́сть кто во гро́бе ми́лость Твою́, и и́стину Твою́ в поги́бели? Еда́ позна́на бу́дут во тьме чудеса́ Твоя́, и пра́вда Твоя́ в земли́ забве́нней? И аз к Тебе́, Го́споди, воззва́х и у́тро моли́тва моя́ предвари́т Тя. Вску́ю, Го́споди, отре́еши ду́шу мою́, отвраща́еши лице́ Твое́ от Мене́? Нищ есмь аз, и в труде́х от ю́ности моея́; возне́с же ся, смири́хся, и изнемого́х. На мне преидо́ша гне́ви Твои́, устраше́ния Твоя́ возмути́ша мя, обыдо́ша мя я́ко вода́, весь день одержа́ша мя вку́пе. Уда́лил еси́ от Мене́ дру́га и и́скренняго, и зна́емых мои́х от страсте́й.

Го́споди Бо́же спасе́ния моего́, во дни воззва́х, и в нощи́ пред Тобо́ю. Да вни́дет пред Тя моли́тва моя́: приклони́ у́хо Твое́ к моле́нию моему́.

Псалом 102:

Благослови́, душе́ моя́, Го́спода, и вся вну́тренняя моя́ и́мя свя́тое Его́. Благослови́, душе́ моя́, Го́спода, и не забыва́й всех воздая́ний Его́, очища́ющаго вся беззако́ния твоя́, исцеля́ющаго вся неду́ги твоя́, избавля́ющаго от истле́ния живо́т твой, венча́ющаго тя ми́лостию и щедро́тами, исполня́ющаго во благи́х жела́ние твое́: обнови́тся я́ко о́рля ю́ность твоя́. Творя́й ми́лостыни Госпо́дь, и судьбу́ всем оби́димым. Сказа́ пути́ Своя́ Моисе́ови, сыново́м Изра́илевым хоте́ния Своя́: Щедр и Ми́лостив Госпо́дь, Долготерпели́в и Многоми́лостив. Не до конца́ прогне́вается, ниже́ во век вражду́ет, не по беззако́нием на́шым сотвори́л есть нам, ниже́ по грехо́м на́шым возда́л есть нам. Я́ко по высоте́ небе́сней от земли́, утверди́л есть Госпо́дь ми́лость Свою́ на боя́щихся Его́. Ели́ко отстоя́т восто́цы от за́пад, уда́лил есть от нас беззако́ния на́ша. Я́коже ще́дрит оте́ц сы́ны, уще́дри Госпо́дь боя́щихся Его́. Я́ко Той позна́ созда́ние на́ше, помяну́, я́ко персть есмы́. Челове́к, я́ко трава́ дни́е eго́, я́ко цвет се́льный, та́ко оцвете́т, я́ко дух про́йде в нем, и не бу́дет, и не позна́ет ктому́ ме́ста своего́. Ми́лость же Госпо́дня от ве́ка и до ве́ка на боя́щихся Его́, и пра́вда Его́ на сыне́х сыно́в, храня́щих заве́т Его́, и по́мнящих за́поведи Его́ твори́ти я́. Госпо́дь на Небеси́ угото́ва Престо́л Свой, и Ца́рство Его́ все́ми облада́ет. Благослови́те Го́спода вси А́нгели Его́, си́льнии кре́постию, творя́щии сло́во Его́, услы́шати глас слове́с Его́. Благослови́те Го́спода вся Си́лы Его́, слуги́ Его́, творя́щии во́лю Его́. Благослови́те Го́спода вся дела́ Его́, на вся́ком ме́сте влады́чества Его́, благослови́, душе́ моя́, Го́спода.

На вся́ком ме́сте влады́чества Его́, благослови́, душе́ моя́, Го́спода.

Псалом 142:

Го́споди, услы́ши моли́тву мою́, внуши́ моле́ние мое́ во и́стине Твое́й, услы́ши мя в пра́вде Твое́й и не вни́ди в суд с рабо́м Твои́м, я́ко не оправди́тся пред Тобо́ю всяк живы́й. Я́ко погна́ враг ду́шу мою́, смири́л есть в зе́млю живо́т мой, посади́л мя есть в те́мных, я́ко ме́ртвыя ве́ка. И уны́ во мне дух мой, во мне смяте́ся се́рдце мое́. Помяну́х дни дре́вния, поучи́хся во всех де́лех Твои́х, в творе́ниих руку́ Твое́ю поуча́хся. Возде́х к Тебе́ ру́це мои́, душа́ моя́, я́ко земля́ безво́дная Тебе́. Ско́ро услы́ши мя, Го́споди, исчезе́ дух мой, не отврати́ лица́ Твоего́ от Мене́, и уподо́блюся низходя́щым в ров. Слы́шану сотвори́ мне зау́тра ми́лость Твою́, я́ко на Тя упова́х. Скажи́ мне, Го́споди, путь во́ньже пойду́, я́ко к Тебе́ взях ду́шу мою́. Изми́ мя от враг мои́х, Го́споди, к Тебе́ прибего́х. Научи́ мя твори́ти во́лю Твою́, я́ко Ты еси́ Бог мой. Дух Твой Благи́й наста́вит мя на зе́млю пра́ву. И́мене Твоего́ ра́ди, Го́споди, живи́ши мя, пра́вдою Твое́ю изведе́ши от печа́ли ду́шу мою́. И ми́лостию Твое́ю потреби́ши враги́ моя́ и погуби́ши вся стужа́ющыя души́ мое́й, я́ко аз раб Твой есмь.

Услы́ши мя, Го́споди, в пра́вде Твое́й и не вни́ди в суд с рабо́м Твои́м.

Дух Твой Благи́й наста́вит мя на зе́млю пра́ву.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Тропа́рь глас 8:

Сла́ва Отцу́ и Сы́ну и Свято́му Ду́ху. И ны́не и при́сно и во ве́ки веко́в. Ами́нь.

Глас 8: Иже на́с ра́ди рожде́йся от Де́вы, и распя́тие претерпе́в, Благи́й, испрове́ргий сме́ртию сме́рть и Воскресе́ние явле́й я́ко Бо́г, не пре́зри, я́же созда́л еси́ руко́ю Твое́ю, яви́ человеколю́бие Твое́, Ми́лостиве. Приими́ ро́ждшую Тя́, Богоро́дицу, моля́щуюся за ны́, и спаси́, Спа́се на́ш, лю́ди отча́янныя.

Здесь читается кафизма, положенная по дню, или сразу седальны:

Го́споди, поми́луй. (Три́жды)

Седален, глас 4:

Яко златоза́рен же и красе́н златоглаго́лив орга́н, боже́ственно поя́ Це́ркви, от Бо́га, Златоу́сте, дарова́лся еси́, ла́стовица благоглаго́лива, златозаря́ющи у́м, блаже́нне, златооде́жден, цевни́це покая́ния, тебе́ честву́ющия спаса́й от искуше́ний твои́ми моли́твами, па́стырю досточу́дне.

Сла́ва Отцу́ и Сы́ну и Свято́му Ду́ху. И ны́не и при́сно и во ве́ки веко́в. Ами́нь.

Глас 4: По Бо́зе во Тво́й, Богоро́дице, прибе́г смире́нный покро́в боже́ственный, припа́дая, молю́ся: поми́луй, Пречи́стая, я́ко превзыдо́ша главу́ мою́ греси́, и бою́ся, Влады́чице, му́к и трепе́щу. Моле́ние сотвори́, Чи́стая, к Сы́ну Твоему́ от си́х изба́вити мя́.

Седален, глас 4:

Боже́ственным судо́м Христо́вы па́ствы досто́ин бы́в, досточу́дне па́стырю, я́коже во́лки, от нея́ пра́щею слове́с твои́х отгна́л еси́, облича́я неща́дно пребеззако́ннующия, му́дре. От ни́хже и отгна́вся за́вистию, Златоу́сте, да́льный пу́ть ше́ствовал еси́ твердоу́мне по Не́м, в Не́мже и у́мерл еси́, но возврати́лся еси́ с вели́кою сла́вою, подая́ Боже́ственная дарова́ния.

Сла́ва Отцу́ и Сы́ну и Свято́му Ду́ху. И ны́не и при́сно и во ве́ки веко́в. Ами́нь.

Глас 4: Удиви́ся Ио́сиф, е́же па́че естества́ зря́ и внима́ше мы́слию, и́же на руно́ до́ждь, в безсе́меннем зача́тии Твое́м, Богоро́дице, купину́, огне́м неопа́льную, же́зл Ааро́нов прозя́бший, и, свиде́тельствуя, обру́чник Тво́й и храни́тель свяще́нником взыва́ше: Де́ва ражда́ет и по Рождестве́ па́ки пребыва́ет Де́ва.

Полиеле́й:

Хвали́те И́мя Госпо́дне, хвали́те, раби́ Го́спода.

Аллилу́иа, аллилу́иа, аллилу́иа.

Благослове́н Госпо́дь от Сио́на, живы́й во Иерусали́ме.

Аллилу́иа, аллилу́иа, аллилу́иа.

Испове́дайтеся Го́сподеви, я́ко Благ, я́ко в век ми́лость Его́.

Аллилу́иа, аллилу́иа, аллилу́иа.

Испове́дайтеся Бо́гу Небе́сному, я́ко в век ми́лость Его́.

Аллилу́иа, аллилу́иа, аллилу́иа.

Велича́ние:

Велича́ем тя́, святи́телю о́тче Иоа́нне Златоу́сте, и чте́м святу́ю па́мять твою́, ты́ бо мо́лиши за на́с Христа́ Бо́га на́шего.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа,// сла́ва Тебе́, Бо́же. (Трижды)

Седа́льны:

Глас 8:

Священнонача́льством и́стинным житие́ уясни́л еси́, Госпо́дне благоче́стно сло́во все́ял еси́ челове́ком, Златоу́сте, Ду́ха заре́ю излива́я уче́ний ту́чи земли́, прему́дре, насади́в обы́чаи бла́ги. Те́мже, ве́рою прие́мше ра́зума плоды́, вкуси́вше, позна́хом Боже́ственныя сла́вы наслажде́ние.

Глас 8: Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Благодари́м Тя́ при́сно, Богоро́дице, и велича́ем, Пречи́стая, и покланя́емся, воспева́юще Рождество́ Твое́, Благода́тная, вопию́ще непреста́нно: спаси́ ны́, Де́во Всеми́лостивая, я́ко Блага́я, и де́монов исхи́ти словоположе́ния стра́шнаго в ча́с испыта́ния, да не посрами́мся, раби́ Твои́.

Степе́нна, глас 4:

От ю́ности моея́/ мно́зи бо́рют мя стра́сти,/ но Сам мя заступи́// и спаси́, Спа́се мой.

Ненави́дящии Сио́на,/ посрами́теся от Го́спода,/ я́ко трава́ бо огне́м// бу́дете изсо́хше.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Святы́м Ду́хом/ вся́ка душа́ живи́тся,/ и чистото́ю возвыша́ется,// светле́ется Тро́йческим еди́нством, священнота́йне.

Го́споди, поми́луй. (Три́жды)

От Иоа́нна Свята́го Ева́нгелия чте́ние

Сла́ва, Тебе́, Го́споди, сла́ва Тебе́.

Рече́ Госпо́дь ко прише́дшым к Нему́ иуде́ем: ами́нь, ами́нь глаго́лю вам, не входя́й две́рьми во двор о́вчий, но прела́зя и́нуде, той тать есть и разбо́йник. А входя́й две́рьми па́стырь есть овца́м. Сему́ две́рник отверза́ет, и о́вцы глас его́ слы́шат, и своя́ о́вцы глаша́ет по и́мени, и изго́нит их. И егда́ своя́ о́вцы иждене́т, пред ни́ми хо́дит, и о́вцы по нем и́дут, я́ко ве́дят глас его́. По чужде́м же не и́дут, но бежа́т от него́, я́ко не зна́ют чужда́го гла́са. Сию́ при́тчу рече́ им Иису́с, они́ же не разуме́ша, что бя́ше, я́же глаго́лаше им. Рече́ же па́ки им Иису́с: ами́нь, ами́нь глаго́лю вам, я́ко Аз есмь дверь овца́м. Вси, ели́ко их прии́де пре́жде Мене́, та́тие суть и разбо́йницы, но не послу́шаша их о́вцы. Аз есмь дверь, Мно́ю а́ще кто вни́дет, спасе́тся, и вни́дет и изы́дет, и па́жить обря́щет.

Сла́ва, Тебе́, Го́споди, сла́ва Тебе́.

Псало́м 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя. Я́ко беззако́ние мое́ аз зна́ю и грех мой предо мно́ю есть вы́ну. Тебе́ Еди́ному согреши́х, и лука́вое пред Тобо́ю сотвори́х, я́ко да оправди́шися во словесе́х Твои́х и победи́ши, внегда́ суди́ти Ти. Се бо в беззако́ниих зача́т есмь, и во гресе́х роди́ мя ма́ти моя́. Се бо и́стину возлюби́л еси́, безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся, омы́еши мя, и па́че сне́га убелю́ся. Слу́ху моему́ да́си ра́дость и весе́лие, возра́дуются ко́сти смире́нныя. Отврати́ лице́ Твое́ от грех мои́х, и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́, и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́, и Ду́хом Влады́чним утверди́ мя. Научу́ беззако́нныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́, возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо, всесожже́ния не благоволи́ши. Же́ртва Бо́гу дух сокруше́н, се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския, тогда́ благоволи́ши же́ртву пра́вды, возноше́ние и всесожега́емая: тогда́ возложа́т на олта́рь Твой тельцы́.

Глас 6:

Сла́ва Отцу́ и Сы́ну и Свято́му Ду́ху./ Моли́твами святителя Иоанна, / Ми́лостиве, очи́сти / мно́жества согреше́ний на́ших.

И ны́не и при́сно и во ве́ки веко́в. Ами́нь./ Моли́твами Богоро́дицы, / Ми́лостиве, очи́сти / мно́жества согреше́ний на́ших.

Поми́луй мя, Бо́же,/ по вели́цей ми́лости Твое́й,/ и по мно́жеству щедро́т Твои́х// очи́сти беззако́ние мое́.

Стихи́ра, глас 6

Труба́ златогла́сная показа́лся еси́, златоглаго́ливе Златоу́сте, златоде́йствуя сердца́ ве́рных златотру́дными твои́ми уче́нии: проро́чески бо изы́де веща́ние исправле́ний твои́х, преподо́бне о́тче, и ми́ра всего́ концы́ просвети́л еси́.

Го́споди, поми́луй. (12 раз)

Каноны святого два

Кано́н свята́го. Гла́с 6.

Пе́снь 1.

Ирмос: Сече́ное сече́тся мо́ре Чермно́е, волнопита́емая же изсуша́ется глубина́, та́яжде ку́пно безору́жным бы́вши проходи́ма, и всеору́жным гро́б. Пе́снь же богокра́сная воспева́шеся: сла́вно просла́вися Христо́с, Бо́г на́ш.

Припев: Святителю отче Иоанне, моли Бога о нас.

Невече́рния, преподо́бне, зари́ исполня́емь, и престо́лу Боже́ственному предстоя́ при́сно со все́ми избра́нными, на́м, ве́рно чту́щим тя́ и боже́ственное твое́ соверша́ющим возвраще́ние, дарова́ти моли́ ми́р и ве́лию ми́лость.

Земля́ лику́ет, и не́бо с челове́ки ра́дуется, с на́ми боголе́пно в твое́м, му́дре, святе́м пра́зднице, в не́мже свяще́нное твое́ те́ло возврати́ся к твоему́ ста́ду, сла́вне Златоу́сте, Ду́ха че́стное жили́ще.

Ума́ твоего́ боже́ственная, блаже́нне, блиста́ния многоко́зненный не терпя́, искуше́ния воздвиза́ет на тя́, я́коже дре́вле на Иова, но у́бо омрачи́ся мно́жае: се́ бо по заточе́нии светле́йший в па́ству твою́ вше́л еси́.

Всезлаты́ми словесы́ твои́ми помышле́ния, Златосло́ве, позлати́л еси́ ве́рных и, заточе́н бы́в от ста́да зави́стно, Бо́жиим же манове́нием па́ки к сему́ по погребе́нии возврати́лся еси́, све́тло восхваля́емь, всеблаже́нне Златоу́сте.

Богородичен: Святе́йши яви́лася еси́ херуви́мов, Пресвята́го ро́ждши Бо́га: Его́же моли́, я́ко все́х Творца́, Чи́стая, освяти́ти вся́, святы́ми Тя́ гла́сы ублажа́ющия, отце́в похвало́, челове́ков по́моще.

Други́й кано́н свята́го. Гла́с 3.

Пе́снь 1.

Ирмос: Во́ды дре́вле, ма́нием Боже́ственным, во еди́но со́нмище совокупи́вый, и раздели́вый мо́ре Изра́ильтеским лю́дем, Се́й Бо́г на́ш, препросла́влен е́сть, Тому́ Еди́ному пои́м, я́ко просла́вися.

Припев: Святителю отче Иоанне, моли Бога о нас.

Боговеща́нная уста́, златогла́сный орга́не, све́тлостию слове́с мо́й просвети́ мольба́ми твои́ми у́м, я́ко да воспою́ возвраще́ния твоего́ па́мять, Иоа́нне, благода́ти Боже́ственныя тезоиме́нне.

Яко звезда́ светоно́сна, я́ко просвеща́ющее челове́ки со́лнце, я́ко свети́ло благоче́стия, под зе́млю заше́д, преподо́бне, зако́ны есте́ственными, па́ки возсия́л еси́ на́м, ча́дом твои́м, посыла́я чуде́с оби́льная озаре́ния.

Златоглаго́ливым твои́м язы́ком уче́ний испо́лнил еси́ всю́ подсо́лнечную и златы́ми у́ды исцеле́ний зари́ все́м облиста́л еси́, страда́ний тме́ изче́знути творя́, преподо́бне, возвраще́нием твои́м.

Богородичен: Вити́йствуя Боже́ственная, еди́нственную Ипоста́сь сказа́л еси́, Сло́во, а́ще и сугу́б бе́, из Пречи́стыя проше́дый, пло́ть прие́м, Юже благослови́м непреста́нно и ве́рно сла́вим, боже́ственный Златоу́сте.

Пе́снь 3.

Ирмос: Госпо́дь, Сы́й, все́х и Зижди́тель Бо́г, созда́нное, Безстра́стный, обнища́в, Себе́ соедини́, и Па́сха, за я́же хотя́ше умре́ти, Са́м Сы́й Себе́ предпожре́, — яди́те, — вопия́, — Те́ло Мое́ и ве́рою утверди́теся.

Бы́л еси́ прия́телище Бо́жие чи́стое и догма́тов испыта́л еси́ глубину́, блаже́нне Златоу́сте, зломы́слящих потопля́я умы́, ве́рных же напая́я сердца́, те́мже честно́е твое́ дне́сь пра́зднуем возвраще́ние.

Златы́й орга́н, возглаша́ющий на́м неизрече́нная, бы́л еси́ ты́, блаже́нне Златоу́сте, сего́ ра́ди пое́м тя́ ве́рно в возвраще́ние твои́х моще́й, Ангеле Бо́жий земны́й и челове́че небе́сный.

Глаго́лы жи́зни отры́гнул еси́ ве́рным и, непра́ведно зави́ден бы́в, всеблаже́нне, в да́льная заточе́н бы́сть изгна́ния и в ско́рби мно́ги, но вседе́тельным манове́нием па́ки по кончи́не, преподо́бне, твоему́ ста́ду подава́ешися.

Богородичен: Высоту́ неизрече́ннаго и глубину́ Твоего́ Рождества́ кто́ сказа́ти и́мать, Отрокови́це? Бо́га бо родила́ еси́ па́че сло́ва и ума́ всего́, изба́вльшаго от тли́ челове́ки. Те́мже по до́лгу, вси́ ве́рнии, Тя́ блажи́м.

Пе́снь 3.

Ирмос: Иже от не су́щих вся́ приведы́й, Сло́вом созида́емая, соверша́емая Ду́хом, Вседержи́телю Вы́шний, в любви́ Твое́й утверди́ мене́.

В заточе́ния тя́ сокры́ верте́пех, свети́льника всесве́тлаго, цари́ца осле́пшая; Христо́с же на высоча́йшем тя́ све́щнице, и па́ки возвра́щь, поставля́ет.

Иска́пая струи́ чуде́с и ре́ки пролива́я врачева́ний, возврати́лся еси́, Златоу́сте, ве́рно честву́ющим возвраще́ния твоего́ па́мять, Иоа́нне.

Златоте́чный Ни́л наводня́яй в словесе́х же и чудесе́х возврати́ся; да стеце́мся и ве́рно почерпе́м оби́льно вси́, во все́х да насы́тимся.

Богородичен: Земно́е естество́ не мо́жет Тя́ воспе́ти, Юже Ангели пою́т, я́ко Бо́га пло́тию роди́вшую: оба́че ве́рно, раби́ Твои́, дерза́ем пе́ти Тя́ и сла́вити.

Седа́лен, гла́с 8.

Юже с высоты́ му́дрость уве́дев и благода́ть слове́с от Бо́га, все́м просия́л еси́, я́ко зла́то в горни́ле, и Святу́ю Тро́ицу во Еди́нстве пропове́дал еси́, сребролю́бную ле́сть устрели́в словесы́ твои́ми. Те́мже и ре́вностию цари́цу обличи́в, Ариево посрами́л еси́ иноплеме́нное мудрова́ние. Иоа́нне Златоу́сте, моли́ Христа́ Бо́га прегреше́ний оставле́ние дарова́ти пра́зднующим любо́вию святу́ю па́мять твою́.

Сла́ва, и ны́не, Богородичен:

От Тро́ицы Еди́наго преесте́ственно заче́нши, Де́во, и чу́дно Сего́ породила́ еси́ па́че сло́ва и мы́сли, и о́бщно Боже́ственнаго естества́ устро́ила еси́ челове́ческое естество́, дре́вле изгна́нное. Те́мже, соше́дшеся, Рождество́м Твои́м вси́ спа́сшиися, Всенепоро́чная, Твои́м словесе́м после́дующе, до́лжно Тя́ ублажа́ем, моля́ще Христа́ Бо́га прегреше́ний оставле́ние дарова́ти ве́рою Тя́ сла́вящим, Ма́терь Его́.

Пе́снь 4.

Ирмос: Прови́дев проро́к та́йну Твою́ неизрече́нную, Христе́, провозгласи́: положи́л еси́ тве́рдую любо́вь кре́пости, Отче Ще́дрый, Единоро́днаго бо Сы́на, Благи́й, очище́ние в ми́р посла́л еси́.

Уста́ огнедохнове́нная и язы́к стяжа́в, о́тче преподо́бне, писа́ния я́сность разшири́л еси́ я́ве и у́мерл еси́ в непра́веднем заточе́нии. Дне́сь на́м блаже́нное подаде́ся, я́ко да́р, те́ло твое́.

Сказа́тель неизглаго́ланных да возвели́чится ны́не Златоу́стый: се́ бо по вре́менней сме́рти до́бре Бо́жиим манове́нием па́ки прихо́дит к Ца́рскому гра́ду, свяще́нно пе́сньми Боже́ственными честву́емь.

Ум, облиста́емь заре́ю Всесвята́го Ду́ха, име́я, просвеща́еши подсо́лнечную Боже́ственными уче́нии и тму́ отго́ниши нече́стия, о́тче свяще́нне Златоу́сте, святы́х Ангелов собесе́дниче.

Блаже́н яви́лся еси́ пра́вды ра́ди, преподо́бне, от па́ствы отгна́н за́вистию лука́вою, и ны́не же возвраща́яся, и от все́х пе́сньми свяще́нными почита́емь му́дре, святи́телю Госпо́день Златоу́сте.

Богородичен: Из Тебе́, Де́во, спасе́ние ми́ру прии́де и яви́ся, из Тебе́ избавле́ние возсия́, Христо́с: те́м Тя́ по до́лгу песносло́вим, все́х свяще́нных похвало́, Чи́стая, и ве́рных свяще́нное очисти́лище.

Пе́снь 4.

Ирмос: Положи́л еси́ к на́м тве́рдую любо́вь, Го́споди: Единоро́днаго бо Твоего́ Сы́на за ны́ на сме́рть да́л еси́. Те́мже Ти́ зове́м, благодаря́ще: сла́ва си́ле Твое́й, Го́споди.

Слове́с рачи́телие, слове́с вели́каго украси́теля словесы́ свяще́нными, ра́достне па́ки возвраща́ющася, прииди́те, да почита́ем, словеса́ суему́дренная прему́дростию слове́с буесло́вившей обличи́вшаго.

Обогати́вый на́с уче́ний бога́тством, Златоу́сте, ру́ку же востяга́еши, тя́жестно лихоима́ния бога́тством отягча́вшую, облича́яй явле́ннейше и со еди́нем то́кмо бога́тством Боже́ственныя благода́ти.

Лу́к си́льных лю́тости мучи́тельския сокруши́ся, ты́ же, в не́мощи пло́ти Ангельски пожи́в, превозмо́гл еси́, моле́бники, Златоу́сте, су́щия пре́жде гони́тели, име́яй, свяще́ннейше.

Богородичен: Чи́ни у́мнии песнопе́нии Тя́ хва́лят, Отрокови́це: Его́же бо не мо́гут зре́ти, из чи́стыя утро́бы Твоея́ породила́ еси́, пло́ть восприе́мша неизме́нно, Всечи́стая Богоневе́сто.

Пе́снь 5

Ирмос: Сою́зом любве́ связу́еми, апо́столи, влады́чествующему все́ми себе́ Христу́ возло́жше, кра́сны но́ги очища́ху, благовеству́юще все́м ми́р.

Свети́льник яви́лся еси́ все́м, сия́я в нощи́ жития́ су́щим, облиста́я лучи́ Боже́ственных слове́с, о́тче Златоу́сте, и озаря́я помышле́ния на́ша. Те́мже по до́лгу тя́ песносло́вим.

Бога́тство слове́с разда́л еси́, обогати́в смы́слы, преподо́бне, а́лчущия, Златоглаго́ливе, и, непра́ведно заточе́н, судо́м пра́ведным па́ки возврати́лся еси́ к твоему́ ста́ду, ра́дующуся твои́ми вели́чии.

Якоже розга́ многопло́дня, умиле́ния вино́ прине́сл еси́ и, цари́цу облича́я, виногра́д вдови́цы восхи́тившую, заточе́н бы́л еси́, о́тче Златоу́сте. Те́мже возвраще́ние твое́ честву́ем.

Богородичен: Во́инства безпло́тных Его́же не мо́гут ви́дети, Влады́чице, во объя́тиих Твои́х я́ко Младе́нца вмести́вшася, в Тебе́ носи́ла еси́ за благоутро́бие пло́тию обнища́вша, я́ко да обнища́вший ми́р обогати́т.

Пе́снь 5

Ирмос: К Тебе́ у́тренюю, все́х Творцу́, преиму́щему вся́к у́м ми́рови: зане́ све́т повеле́ния Твоя́, в ни́хже наста́ви мя́.

Якоже весна́, яви́лся еси́, благоуха́я та́инственне цве́ты благода́тей ве́рных мно́жества, разреша́я злы́х зи́му, о́тче, в возвраще́нии твое́м.

Боже́ственная струя́, исто́чник дарова́ний возврати́ся: жа́ждущии, прии́дите, во́ду жи́зни почерпи́те ве́рою, боже́ственне веселя́щеся.

Заше́д, сокры́лся еси́, увы́ мне́! добро́та моя́, но возврати́лся еси́ мне́, вожделе́нне, во вре́мя свое́, — Христо́ва Це́рковь вопие́т ти́ возврати́вшемуся.

Богородичен: Ми́лостива мне́ сотвори́ проше́дшаго из Твоея́ утро́бы, Всенепоро́чная, Плотоно́сца Сло́ва, Его́же в хра́ме Симео́н на руку́ держа́, я́ко Созда́теля велича́ше.

Пе́снь 6.

Ирмос: Бе́здна после́дняя грехо́в обы́де мя́, и, волне́ния не ктому́ терпя́, я́ко Ио́на Влады́це, вопию́ Ти: от тли́ мя возведи́.

Источи́ язы́к тво́й, всеблаже́нне Златоу́сте, струи́ всезлаты́я Це́ркви и а́лчущая сердца́ обогаща́ет, свяще́нно сла́вящая тя́.

Честна́, всеблаже́нне, сме́рть твоя́ пред Бо́гом яви́ся на́шим, в не́йже сла́вится па́ки прише́ствием твои́м, о́тче, ко престо́лу твоему́, Златоу́сте.

Блаже́н гро́б, и́же честно́е твое́ содержи́т те́ло, я́ко обогаща́я чудоде́йствии притека́ющия ве́рою, всеблаже́нне, святи́телю Златоу́сте.

Богородичен: Высоча́йшаго ро́ждши, Пресвята́я Богоневе́сто, до́ле лежа́щее естество́ на́ше к небеси́ возво́диши, те́мже тя́ по до́лгу сла́вим.

Пе́снь 6.

Ирмос: Бе́здна после́дняя грехо́в обы́де мя́, и исчеза́ет ду́х мо́й, но простры́й, Влады́ко, высо́кую Твою́ мы́шцу, я́ко Петра́, мя, Упра́вителю, спаси́.

Отсека́ет тя́ от Це́ркве Христо́вы безу́мная цари́ца, свере́но облича́ющая, но а́бие сама́ отсека́ется, ты́ же облича́еши ю́ и по сме́рти, чуде́сное пресече́ние соде́лавый.

Орга́н показа́лся еси́ Вседе́тельнаго, Златоу́сте, Ду́ха, зело́ благосли́чнейше глася́щий; глуха́ же быва́ет мучи́тельница, я́коже а́спида проте́к обава́нием, и зело́ окая́нною возмеря́ется е́й сме́ртию.

Ме́ртвости, а́ще и у́мре, не пострада́ти ему́ я́ве научи́ цари́ Златоу́стый. Те́х бо повеле́нием не повину́вся пре́жде, на моле́ния же те́х возврати́ся пото́м.

Богородичен: Еди́наго Тя́, су́щаго от Де́вы, помышля́я, а́ще и пло́ть прия́л еси́, и сугу́б бы́л еси́, дале́че отрази́ и сече́ние, и сли́тие Златоу́стый Иоа́нн, Богочелове́че Иису́се.

Конда́к, гла́с 1.

Возвесели́ся та́инственно честна́я Це́рковь возвраще́нием честны́х твои́х моще́й, и, сия́ сокры́вши, я́ко зла́то многоце́нное, пою́щим тя́ неоску́дно подава́ет моли́твами твои́ми исцеле́ний благода́ть, Иоа́нне Златоу́сте.

Икос:

Свеща́ де́л мои́х дряхла́ бы́сть, Иоа́нне Златоу́сте, и ужаса́юся к сре́тению свяще́нных твои́х моще́й, но ты́ са́м наста́ви мя́ и стези́ моя́ испра́ви, покая́ния подая́ ми́ вре́мя, всесвя́те, я́ко Того́ еси́ пропове́дник Боже́ственный, и страсте́й мои́х многови́дных ути́ши бу́рю и, от се́тей велиа́ровых исхи́тив мя́, в коне́ц спаси́ мя́, я́ко да пою́ твое́ досто́йне сла́вное возвраще́ние, я́ко пре́жде и успе́ние дерзну́в просла́вих, Иоа́нне Златоу́сте.

Пе́снь 7.

Ирмос: Отроцы в Вавило́не пе́щнаго пла́мене не убоя́шася, но, посреде́ пла́мене вве́ржени, ороша́еми, поя́ху: благослове́н еси́, Го́споди, Бо́же оте́ц на́ших.

Чудоде́йствии сия́я, богосло́вием украша́яся златоза́рным, му́дре, заточе́нием лю́тым преда́лся еси́; от ни́хже возвраща́яся, от все́х просла́вился еси́.

Изсека́еши коре́ния зло́бы секи́рою Боже́ственных уче́ний твои́х и насажда́еши душа́м Боже́ственное зна́ние, святи́телю Златоу́сте. Те́м твои́х возвраще́ние моще́й прославля́ем.

Преподо́бне, возврати́вся, разстоя́щаяся умири́л еси́ и положи́лся еси́ в хра́ме прему́дрых апо́столов, Златоу́сте, и́хже честно́ю обогати́лся еси́ вла́стию, всехва́льне.

Богородичен: Пресу́щественныя Тро́ицы Еди́наго родила́ еси́, Всечи́стая, Иису́са Христа́, Его́же моли́ премно́гая моя́ прегреше́ния за милосе́рдие неизрече́нное прости́ти, Всенепоро́чная.

Пе́снь 7.

Ирмос: Якоже дре́вле благочести́выя три́ о́троки ороси́л еси́ в пла́мени халде́йстем, све́тлым Божества́ огне́м и на́с озари́, — благослове́н еси́, — взыва́ющия, — Бо́же оте́ц на́ших.

Чу́жду сотвори́ти вдови́цу, прему́дре, непроще́нну бы́ти пове́дающа от свои́х е́й, чу́жда тя́ твори́т от ца́рствующаго гра́да вседе́рзая жена́, чу́жда быва́ет и сама́ Боже́ственныя благода́ти, отчужди́вшая себе́ от прему́дрых уче́ний твои́х.

Но возврати́лся еси́ сла́достен, я́коже со́лнце, о́блаки покры́то бы́вшее, зело́ велича́йший свети́льниче, светоно́сных та́йным светозаре́нием златы́х уче́ний твои́х просвети́вшимся все́м, Иоа́нне Златоу́сте.

Простира́ю ти́ дла́ни моя́, Златоу́сте, вну́трь огра́д мои́х тя́ прия́ти, невестово́дца, возвраща́ющася све́тле, зело́ любе́зна, я́ко ле́ты закосне́вшаго, — Це́рковь вопие́т ти́, пра́зднующи дне́сь.

Богородичен: Яко та́йная клеща́ не́кая, Угль нося́щая мы́сленный, гряде́ши ко хра́му, Его́же, Симео́н просвети́ся, на ру́це, Пречи́стая, прие́м, и о зна́мениих стра́сти Его́ проро́чествовати и́мать зело́ ясне́йше.

Пе́снь 8.

Ирмос: За зако́ны оте́ческия блаже́ннии в Вавило́не ю́ноши, предбе́дствующе, царю́ющаго оплева́ша повеле́ние безу́мное и, совоку́плени, и́мже не свари́шася огне́м, Держа́вствующему досто́йную воспева́ху пе́снь: Го́спода по́йте, дела́, и превозноси́те во вся́ ве́ки.

Реши́ти же и вяза́ти, преподо́бне, име́я вла́сть, вся́ разреши́ прегреше́ния Боже́ственное твое́ возвраще́ние све́тло пра́зднующих и Ца́рствия сподо́битися небе́снаго умоли́ пою́щим во умиле́нии се́рдца: Го́спода по́йте, дела́, и превозноси́те во вся́ ве́ки.

В заточе́нии претерпе́л еси́, о́тче богому́дре, боле́зни, в не́мже прие́мь блаже́нную, Златоу́сте, и сла́вную кончи́ну, хоте́нием Боже́ственным па́ки возвраща́ешися к твоему́ Боже́ственному престо́лу, честву́емь от пою́щих: Го́спода по́йте, дела́, и превозноси́те во вся́ ве́ки.

Глаго́лов стре́лы терпе́ти, преподо́бне, твои́х не моги́й, зми́й льсти́вый испроша́ет искуси́ти тя́, я́коже Иова до́бляго, но побежде́н бы́сть твои́м Христа́ ра́ди терпе́нием, вели́к я́влься сме́х тебе́, ве́рою песнопою́щу: Го́спода по́йте, дела́, и превозноси́те во вся́ ве́ки.

Тро́ичен: Безнача́льне Отче, и Собезнача́льне Сы́не, и Боже́ственный Ду́ше, Тро́ице Неразде́льная, еди́но естество́, еди́на си́ла и еди́на вла́сть, Тя́ пою́щия испо́лни вся́ких бла́г и муче́ния изба́ви непреста́нно пою́щия: Го́спода по́йте, дела́, и превозноси́те во вся́ ве́ки.

Богородичен: Разуме́ти не мо́жет у́м челове́ческий е́же па́че ума́ и сло́ва, Отрокови́це, та́инство неизрече́ннаго Твоего́ рождества́: Бо́г бо Плотоно́сец из Тебе́ яви́ся, спаса́я па́дшия во тлю́ и на пе́рвое досто́инство возводя́ пою́щия: Го́спода по́йте, дела́, и превозноси́те во вся́ ве́ки.

Пе́снь 8.

Ирмос: Нестерпи́мому огню́ соедини́вшеся, богоче́стия предстоя́ще, ю́ноши, пла́менем же неврежде́ни, Боже́ственную пе́снь поя́ху: благослови́те, вся́ дела́ Госпо́дня Го́спода, и превозноси́те во вся́ ве́ки.

Сосца́ми благоче́стия, о́тче преподо́бне, воспита́вшую тя́ пита́еши Це́рковь, отдая́ седмокра́тным хле́бом Боже́ственныя благода́ти, твою́, пита́телю, сла́дость пролива́я, я́ко питие́ же врачева́ний, всеблаже́нне Златоу́сте.

Во всю́ зе́млю произы́де, о́тче, веща́ние твои́х догма́тов, безу́мная же цари́ца тя́ изгна́ти ме́стне повеле́, но солга́ся: ты́ бо, я́ко исполи́н высокоте́чен, везде́ осиява́еши слове́с твои́х луча́ми.

Да просвети́тся дне́сь сосло́вие ве́рных, с весе́лием срета́юще преизря́днейшаго учи́телей: прии́де бо и теле́сне настои́т, раздая́ все́м благода́ть оби́льную, ея́же да наслади́мся, ра́дующеся бога́тно.

Богородичен: Зрю́ Тя́ на рука́х Ма́терских, ве́м же Тя́ непристу́пна Божества́ естество́м. Ка́ко у́бо, Сло́ве, рука́ми держи́мь еси́, Иже в руце́ всю́ тва́рь и́маши? — рече́ Симео́н, Богочелове́че, неизрече́нную Твою́ сла́вя си́лу.

На 9-й песни поем песнь Пресвятыя Богородицы:

Вели́чит душа́ Моя́ Го́спода и возра́довася дух Мой о Бо́зе Спа́се Мое́м.

К коемуждо стиху припеваем: Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Я́ко призре́ на смире́ние рабы́ Своея́, се бо, от ны́не ублажа́т Мя вси ро́ди.

Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Я́ко сотвори́ Мне вели́чие Си́льный, и свя́то и́мя Его́, и ми́лость Его́ в ро́ды родо́в боя́щимся Его́.

Сотвори́ держа́ву мы́шцею Свое́ю, расточи́ го́рдыя мы́слию се́рдца их.

Низложи́ си́льныя со престо́л, и вознесе́ смире́нныя, а́лчущия испо́лни благ, и богатя́щияся отпусти́ тщи.

Восприя́т Изра́иля о́трока Своего́, помяну́ти ми́лости, я́коже глаго́ла ко отце́м на́шим, Авраа́му и се́мени его́ да́же до ве́ка.

Пе́снь 9.

Ирмос: Недоуме́ет вся́к язы́к благохвали́ти по достоя́нию, изумева́ет же у́м и преми́рный пе́ти Тя́, Богоро́дице: оба́че Блага́я су́щи, ве́ру приими́, и́бо любо́вь ве́си Боже́ственную на́шу, Ты́ бо христиа́н еси́ Предста́тельница, Тя́ велича́ем.

Свяще́нства бы́л еси́ пра́вило, богоглаго́ливе, оде́ян пра́вдою, я́коже боже́ственною оде́ждею, и обогати́в словесы́ твои́ми Це́рковь, и писа́ния обнажи́в у́м духо́вно. Те́мже твое́ возвраще́ние, о́тче, торжеству́ем.

Красе́н, я́коже слави́й, о́тче, яви́лся еси́, боже́ственную ве́сну покая́ния сказу́я зиме́ грехо́вней рабо́тающим; заточе́н же бы́в наве́том льсти́ваго, му́дре, па́ки притека́еши, ра́дуяся, к жела́ющему тя́ ста́ду, блаже́нне Златоу́сте.

Игра́ют дне́сь все́х сердца́, зря́ще чи́стаго тя́, преподо́бне, жениха́, твое́й неве́сте Це́ркви подае́ма благода́тию, и Да́теля благи́х пою́т непреста́нными гла́сы, тебе́ же восхваля́ют досто́йно и ублажа́ют.

Прии́де свети́льник на све́щнице положи́тися от Кома́н, приспе́ украше́ние Бо́жия Це́ркве, воспо́йте Го́споду, по́йте с весе́лием, и, сре́тение творя́ще ему́ духо́вное, вси́ возопии́м: о́тче, моли́твами твои́ми спаси́ на́с.

Богородичен: Светле́йшими, Отрокови́це, блиста́нии Ро́ждшагося из Тебе́ неизрече́нно просвети́, Свята́я Богоро́дице, ду́шу мою́, вся́цеми преступле́ньми, Всечи́стая, омраче́нную и не хотя́щую сотвори́ти до́брое, я́ко да непреста́нно возвеща́ю вели́чия Твоя́.

Пе́снь 9.

Ирмос: Но́вое чу́до и боголе́пное! Деви́ческую бо две́рь затворе́нную я́ве прохо́дит Госпо́дь, на́г во вхо́де, и Плотоно́сец яви́ся во исхо́де Бо́г, и пребыва́ет две́рь затворе́на. Сию́ неизрече́нно я́ко Богома́терь велича́ем.

Во́инство Ангелов, собо́р проро́ков, апо́столов же и му́чеников боже́ственный ли́к с на́ми веселя́тся све́тло, сообща́ющеся пра́зднику, всеблаже́нне, и пе́ний твои́х свою́ непщу́юще благода́ть: все́х бо име́л еси́ в себе́, житие́ изобража́я.

Се́ ми́ра возсия́ све́т, превысо́кая яви́ся в не́м Боже́ственная свеща́, сладкотво́рная пучи́на Боже́ственных даро́в. Да напита́емся, прииди́те, све́та, бра́тие, да согре́емся, да почерпе́м, от се́рдца пе́сньми вси́ златоглаго́ливаго велича́юще.

Яко две́ ца́те, тебе́ пе́ние сие́ от недосто́йныя и окая́нныя души́ моея́, от вся́ких у́бо благи́х окая́нне вдо́вствующия, от усе́рдия же Боже́ственнаго бога́тства принося́щия сие́, бла́гости подража́нием Боже́ственныя приими́, благода́ть проти́ву воздая́ ми́ богатода́рную.

Богородичен: Ступа́я, трясу́ся, — рече́ Симео́н, — колеба́тися же Творя́щаго свы́ше призира́нием то́кмо все́й земли́, держа́ на руку́, укрепля́емь е́смь, Твое́ рожде́ние, Де́во, от трясу́щияся уже́ пло́ти отпуща́емь, извеще́нию хотя́щих ми́ бы́ти уже́ сбыва́ющуся, ра́дуяся, ношу́, и су́щим во а́де избавле́ние благовеству́я.

Свети́лен.

Ра́дуйся, гра́де градо́в все́х Ца́рствующий, я́ко до́браго твоего́ па́стыря и пастыренача́льника те́ло восприе́мый дне́сь, тя́ и ми́р ве́сь пра́вяща и спаса́юща медото́чными Златоу́стаго, и восплеща́й пе́сньми.

Сла́ва, и ны́не, Богородичен:

Ра́дуйся, Бо́жия пала́то, ра́дуйся, горо́ присе́нная; ра́дуйся, неопали́мая купино́, ра́дуйся, престо́ле сла́вы; ра́дуйся, Боже́ственная трапе́зо, ра́дуйся, ста́мно всезлата́я; ра́дуйся, свети́льниче всесве́тлый, ра́дуйся, ле́гкий о́блаче, Де́во Ма́ти Мари́е.

Хвали́тны псалмы́, глас 4:

Вся́кое дыха́ние да хва́лит Го́спода./ Хвали́те Го́спода с небе́с,/ хвали́те Его́ в вы́шних.// Тебе́ подоба́ет песнь Бо́гу.

Хвали́те Его́ вси а́нгели Его́,/ хвали́те Его́ вся си́лы Его́.// Тебе́ подоба́ет песнь Бо́гу.

Сти́хиры, глас 4:

Стих: Сотвори́ти в них суд напи́сан/ сла́ва сия́ бу́дет всем преподо́бным Его́.

Зла́та светле́е / свяще́нная твоя́ уче́ния, / пролива́ема, прему́дре, / обогаща́ет, Златоу́сте, а́лчущия ра́зумы / и отго́нит страсте́й мглу́ / и сребролю́бия го́рькую зи́му. / Те́мже тя́ ублажа́ем по до́лгу / и возвраще́ние твои́х моще́й почита́ем, / я́ко исто́чник свяще́ния.

Стих: Хвали́те Его́ на си́лах Его́,/ хвали́те Его́ по мно́жеству вели́чествия Его́.

Непра́ведно от па́ствы твоея́ / отгна́н бы́в, о́тче преподо́бне, / претерпе́л еси́ в ско́рбех и го́рьких заточе́ниих, / в ни́хже сподо́бился еси́ блаже́нныя кончи́ны, / я́ко до́бр страда́лец, / попра́вый многоко́зненнаго. / Те́мже возвраще́нием твои́м Це́рковь ра́дуется, / ю́же, я́ко зла́том, украси́л еси́ / прему́дрыми уче́нии твои́ми.

Стих: Хвали́те Его́ в тимпа́не и ли́це,/ хвали́те Его́ во стру́нах и орга́не.

Сто́лп о́гненный, / река́, я́же вода́ми уче́ний теку́щи, / у́м небе́сный, / богосло́вия всезлата́я уста́, / гре́шников пору́чник, / покая́ния пропове́дник боже́ственный, / свети́льник пресветле́йший, / небе́сный челове́к, / блаже́нный дне́сь да воспое́тся Златоу́стый.

Стих: Хвали́те Его́ в кимва́лех доброгла́сных, хвали́те Его́ в кимва́лех восклица́ния. / Вся́кое дыха́ние да хва́лит Го́спода.

Яко украше́ние ца́рское, / Ца́рский гра́д, твоя́ мо́щи прие́м, Златоу́сте, / си́ми украша́ется / и, хваля́ся о словесе́х твои́х, / вселе́нную созыва́ет на весе́лие / и боже́ственное прича́стие оби́льных дарова́ний твои́х, / велегла́сно зовы́й: / Иису́се Преблаги́й, / Ты́ еси́ сла́ва рабо́в Твои́х.

Глас 4: Сла́ва Отцу́ и Сы́ну и Свято́му Ду́ху

Отче Златоу́сте, я́ко река́ богото́чная, из Еде́ма та́инственно исходя́щи, в нача́ла четы́ри, претека́я твои́ми словесы́ земны́я концы́, вся́каго ве́рнаго напои́л еси́ всезлаты́м уче́нием твои́м. Те́м, возвраще́ние твои́х боже́ственных моще́й на́м я́ве гра́дски написа́в, ны́не моли́ спасти́ся душа́м на́шим, Иоа́нне, воспева́ющих тя́.

Глас 4: И ны́не и при́сно и во ве́ки веко́в. Ами́нь.

От все́х бе́д рабы́ Твоя́ сохраня́й, Благослове́нная Богоро́дице, да Тя́ сла́вим, наде́жду ду́ш на́ших.

Славосло́вие вели́кое:

Сла́ва в вы́шних Бо́гу, и на земли́ мир, в челове́цех благоволе́ние. Хва́лим Тя, благослови́м Тя, кла́няем Ти ся, славосло́вим Тя, благодари́м Тя, вели́кия ра́ди сла́вы Твоея́. Го́споди Царю́ Небе́сный, Бо́же О́тче Вседержи́телю, Го́споди, Сы́не Единоро́дный, Иису́се Христе́, и Святы́й Ду́ше. Го́споди Бо́же, А́гнче Бо́жий, Сы́не Оте́чь, взе́мляй грех ми́ра, поми́луй нас; взе́мляй грехи́ ми́ра, приими́ моли́тву на́шу; седя́й одесну́ю Отца́, поми́луй нас. Я́ко Ты еси́ еди́н Свят, Ты еси́ еди́н Госпо́дь, Иису́с Христо́с, в сла́ву Бо́га Отца́. Ами́нь.

На всяк день благословлю́ Тя, и восхвалю́ И́мя Твое́ во ве́ки, и в век ве́ка.

Сподо́би, Го́споди, в день сей без греха́ сохрани́тися нам. Благослове́н еси́, Го́споди, Бо́же оте́ц на́ших, и хва́льно и просла́влено И́мя Твое́ во ве́ки. Ами́нь.

Бу́ди, Го́споди, ми́лость Твоя́ на нас, я́коже упова́хом на Тя.

Благослове́н еси́, Го́споди, научи́ мя оправда́нием Твои́м. (Три́жды)

Го́споди, прибе́жище был еси́ нам в род и род. Аз рех: Го́споди, поми́луй мя, исцели́ ду́шу мою́, я́ко согреши́х Тебе́. Го́споди, к Тебе́ прибего́х, научи́ мя твори́ти во́лю Твою́, я́ко Ты еси́ Бог мой: я́ко у Тебе́ исто́чник живота́, во све́те Твое́м у́зрим свет. Проба́ви ми́лость Твою́ ве́дущим Тя.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Три́жды)

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Святы́й Безсме́ртный, поми́луй нас.

Святы́й Бо́же, Святы́й Кре́пкий, Святы́й Безсме́ртный, поми́луй нас.

Тропа́рь, глас 8:

Утверди́, Бо́же, святу́ю правосла́вную ве́ру, правосла́вных христиа́н во век ве́ка.

Честне́йшую Херуви́м и Сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу, Тя велича́ем.

Сла́ва, и ны́не. Го́споди, поми́луй. (Три́жды) Благослови́.

Господи Иисусе Христе, Сыне Божий, моли́твами Пречи́стыя Своея́ Ма́тере, святителя Иоанна Златоустаго, преподобных и богоносных отец наших и всех святы́х, поми́луй и спаси нас я́ко Благ и Челове́колюбец.

Многоле́тие:

Вели́каго Господи́на и Отца́ на́шего Кири́лла,/ Святе́йшаго Патри́арха Моско́вского и всея́ Руси́,/ и Господи́на на́шего (Высоко-) Преосвяще́ннейшаго (имярек),/ (архи-)епи́скопа (митрополита (титул)),/ богохрани́мую страну́ на́шу Росси́йскую,/ и вся правосла́вныя христи́аны,// Го́споди, сохрани́ их на мно́гая ле́та.