Последование Всеношного бдения в день памяти святой блаженной Ксении Петербургской. Для домашнего (келейного) совершения

ВСЕНО́ЩНОЕ БДЕ́НИЕ

ВЕЛИ́КАЯ ВЕЧЕ́РНЯ

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас. Ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Трижды.)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, (трижды). Сла́ва, и ны́не:

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Таже, Го́споди, поми́луй, (12), Сла́ва, и ны́не:

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 103:

Поется часть псалма:

Благослови́, душе́ моя́, Го́спода. / Благослове́н еси́, Го́споди. / Го́споди, Бо́же мой, возвели́чился еси́ зело́. / Благослове́н еси́, Го́споди. / Во испове́дание и в велеле́поту обле́клся еси́. / Благослове́н еси́, Го́споди. / Посреде́ гор про́йдут во́ды. / Ди́вна дела́ Твоя́, Го́споди. / Вся прему́дростию сотвори́л еси́. / Сла́ва Ти, Го́споди, сотвори́вшему вся.

Или читается псалом полностью:

Благослови́, душе́ моя́, Го́спода. Го́споди, Бо́же мой, возвели́чился еси́ зело́. Во испове́дание и в велеле́поту обле́клся еси́. Одея́йся све́том, я́ко ри́зою, простира́яй не́бо, я́ко ко́жу. Покрыва́яй вода́ми превы́спренняя Своя́, полага́яй о́блаки на восхожде́ние Свое́, ходя́й на крилу́ ве́треню. Творя́й А́нгелы Своя́ ду́хи и слуги́ Своя́ пла́мень о́гненный. Основа́яй зе́млю на тве́рди ея́, не преклони́тся в век ве́ка. Бе́здна, я́ко ри́за, одея́ние ея́, на гора́х ста́нут во́ды, от запреще́ния Твоего́ побе́гнут, от гла́са гро́ма Твоего́ убоя́тся. Восхо́дят го́ры и нисхо́дят поля́ в ме́сто, е́же основа́л еси́ им. Преде́л положи́л еси́, eго́же не пре́йдут, ниже́ обратя́тся покры́ти зе́млю. Посыла́яй исто́чники в де́брех, посреде́ гор про́йдут во́ды. Напая́ют вся зве́ри се́льныя, ждут она́гри в жа́жду свою́. На ты́х пти́цы небе́сныя привита́ют, от среды́ ка́мения дадя́т глас. Напая́яй го́ры от превы́спренних Свои́х, от плода́ дел Твои́х насы́тится земля́. Прозяба́яй траву́ ското́м, и злак на слу́жбу челове́ком, извести́ хлеб от земли́. И вино́ весели́т се́рдце челове́ка, ума́стити лице́ еле́ем, и хлеб се́рдце челове́ка укрепи́т. Насы́тятся древа́ польска́я, ке́дри Лива́нстии, и́хже еси́ насади́л. Та́мо пти́цы вогнездя́тся, ероди́ево жили́ще предводи́тельствует и́ми. Го́ры высо́кия еле́нем, ка́мень прибе́жище за́яцем. Сотвори́л есть луну́ во времена́, со́лнце позна́ за́пад свой. Положи́л еси́ тму, и бысть нощь, в не́йже про́йдут вси зве́рие дубра́внии. Ски́мни рыка́ющии, восхи́тити и взыска́ти от Бо́га пи́щу себе́. Возсия́ со́лнце и собра́шася и в ло́жах свои́х ля́гут. Изы́дет челове́к на де́ло свое́ и на де́лание свое́ до ве́чера. Я́ко возвели́чишася дела́ Твоя́, Го́споди, вся прему́дростию сотвори́л еси́, испо́лнися земля́ тва́ри Твоея́. Сие́ мо́ре вели́кое и простра́нное, та́мо га́ди, и́мже несть числа́, живо́тная ма́лая с вели́кими, та́мо корабли́ препла́вают, змий сей, eго́же созда́л еси руга́тися eму́. Вся к Тебе́ ча́ют, да́ти пи́щу им во бла́го вре́мя. Да́вшу Тебе́ им соберу́т, отве́рзшу Тебе́ ру́ку вся́ческая испо́лнятся бла́гости, отвра́щшу же Тебе́ лице́, возмяту́тся, отъи́меши дух их, и исче́знут, и в персть свою́ возвратя́тся. По́слеши Ду́ха Твоего́, и сози́ждутся, и обнови́ши лице́ земли́. Бу́ди сла́ва Госпо́дня во ве́ки, возвесели́тся Госпо́дь о де́лех Свои́х, призира́яй на зе́млю, и творя́й ю́ трясти́ся, прикаса́яйся гора́м, и дымя́тся. Воспою́ Го́сподеви в животе́ мое́м, пою́ Бо́гу моему́, до́ндеже есмь, да услади́тся Ему́ бесе́да моя́, аз же возвеселю́ся о Го́споде. Да исче́знут гре́шницы от земли́, и беззако́нницы, я́коже не бы́ти им. Благослови́, душе́ моя́, Го́спода.

Со́лнце позна́ за́пад свой. Положи́л еси́ тму, и бысть нощь. Я́ко возвели́чишася дела́ Твоя́, Го́споди, вся прему́дростию сотвори́л еси́.

Сла́ва, и ны́не: Аллилу́иа, аллилу́иа, аллилу́иа, сла́ва Тебе́ Бо́же. Трижды.

Блаже́н муж:

Блаже́н муж, и́же не и́де на сове́т нечести́вых.

Аллилу́иа, аллилу́иа, аллилу́иа.

Я́ко весть Госпо́дь путь пра́ведных, и путь нечести́вых поги́бнет.

Аллилу́иа, аллилу́иа, аллилу́иа.

Рабо́тайте Го́сподеви со стра́хом и ра́дуйтеся Ему́ с тре́петом.

Аллилу́иа, аллилу́иа, аллилу́иа.

Блаже́ни вси наде́ющиися Нань.

Аллилу́иа, аллилу́иа, аллилу́иа.

Воскресни́, Го́споди, спаси́ мя, Бо́же мой.

Аллилу́иа, аллилу́иа, аллилу́иа.

Госпо́дне есть спасе́ние, и на лю́дех Твои́х благослове́ние Твое́.

Аллилу́иа, аллилу́иа, аллилу́иа.

Сла́ва Отцу́ и Сы́ну и Свято́му Духу.

Аллилу́иа, аллилу́иа, аллилу́иа.

И ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Го́споди, воззва́х, глас 8:

Го́споди, воззва́х к Тебе́, услы́ши мя./ Услы́ши мя, Го́споди./ Го́споди, воззва́х к Тебе́, услы́ши мя:/ вонми́ гла́су моле́ния моего́,/ внегда́ воззва́ти ми к Тебе́.// Услы́ши мя, Го́споди.

Да испра́вится моли́тва моя́,/ я́ко кади́ло пред Тобо́ю,/ воздея́ние руку́ мое́ю/ – же́ртва вече́рняя.// Услы́ши мя, Го́споди.

Стихи́ры пра́здника, глас 8:

Стих: А́ще беззако́ния на́зриши, Го́споди, Го́споди, кто постои́т? Я́ко у Тебе́ очище́ние есть.

О, Ксе́ние блаже́нная, / небе́сное Оте́чествие возлюби́вши / на земли́ вои́стинну стра́нна пребыла́ еси́, / я́ко на стране́ чужде́й преходя́щи. / Ны́не у́бо в дому́ Отца́ Небе́снаго водворя́ющися / и стра́нствия Влады́чня в черто́зех го́рних наслажда́ющися, / не забу́ди на́с, па́мять твою́ ве́рно творя́щих, / и от бе́д многоразли́чных на́с избавля́й, / пред престо́лом Го́спода Сла́вы на́с помина́ющи.

Стих: И́мене ра́ди Твоего́ потерпе́х Тя, Го́споди, потерпе́ душа́ моя́ в сло́во Твое́, упова́ душа́ моя́ на Го́спода.

О, Ксе́ние сла́вная, / я́ко му́драя де́ва / в полу́нощи жития́ твоего́ Жениху́ Христу́ в сре́тение изшла́ еси́, / свети́льник пламене́ющий любве́ Бо́жия нося́щи, / юро́да от ми́ра нарица́ющися, / преми́рныя же му́дрости исполня́ющися. / Те́мже от ми́лости еле́я, его́же бога́тно стяжа́ла еси́, / пода́ждь на́м, па́мять твою́ ве́рно творя́щим, / ка́пли того́ точа́щи на я́звы на́ша.

Стих: От стра́жи у́тренния до но́щи, от стра́жи у́тренния да упова́ет Изра́иль на Го́спода.

О, Ксе́ние мужему́дренная, / кре́пость души́ твоея́ кто́ испове́сть? / Яко на бра́нь со кня́зем тмы́ и ми́ра сего́ исходя́щи, / Андре́ем нарекла́ся еси́, / ничто́же бо устраши́ тя или́ стужи́ ти: / гла́д же и хла́д и наготу́ терпя́щи, — / вся́ могу́ о Христе́, мене́ укрепля́ющем, — / со апо́столом взыва́ла еси́. / Те́мже и венча́ тя Христо́с подвигополо́жник.

Стих: Я́ко у Го́спода ми́лость, и мно́гое у Него́ избавле́ние, и Той изба́вит Изра́иля от всех беззако́ний eго́.

Глас 2: Андре́ю, Христа́ ра́ди юро́дивому, поревнова́ла еси́, / нищету́ во́льную избра́вши, / и вся́ блага́я ми́ра сего́ презре́ла еси́, блаже́нная, / преми́рная же блага́я обре́тши, / раздае́ши да́ры ту́не си́х тре́бующим / и твоего́ заступле́ния прося́щим.

Стих: Хвали́те Го́спода вси язы́цы, похвали́те Его́ вси лю́дие.

Проро́ков еси́ соприча́стница, о Ксе́ние, / я́ко граду́щая ду́хом прозрева́ла еси́, / преподо́бным же сожи́тельница явля́ешися, / жесто́кому житию́ те́х после́довавши, / и безме́здным враче́м ревну́еши, / исцеле́ния неду́жным доны́не ту́не подаю́щи.

Стих: Я́ко утверди́ся ми́лость Его́ на нас, и и́стина Госпо́дня пребыва́ет во век.

Что́ тя нарече́м, о Ксе́ние блаже́нная? / Ки́я ти́ пе́сни принесе́м? / Яко в житии́ земне́м че́сти мирски́я бе́гавши, / небе́сную сла́ву насле́дила еси́, / те́мже ны́не от все́х прославля́ема, / не пре́зри и на́ша хвале́ния усе́рдная.

Глас 3: Сла́ва Отцу́ и Сы́ну и Свято́му Ду́ху.

Се́ ны́не Ксе́ния блаже́нная / на пра́здник сво́й на́с собира́ет, / церко́вным гла́сом зову́щи: / о ча́да и дру́зи, вску́ю лю́бите суету́ и и́щете лжи́? / Что́ всу́е мяте́теся? / Ви́дите мя́, вся́ я́ко уме́ты вмени́вшую / и свобо́ду от вся́кия тщеты́ улучи́вшую; / после́дуйте у́бо мне́, я́коже и а́з Христу́, / и к бога́тству, а́ще тече́т, не прилага́йте се́рдца, / я́ко да вре́мени прише́дшу со мно́ю водворите́ся / в черто́зех ра́дости несконча́емыя.

Глас 3: И ны́не и при́сно и во ве́ки веко́в. Ами́нь.

Ка́ко не диви́мся Богому́жному Рождеству́ Твоему́, Пречестна́я? Искуше́ния бо му́жескаго не прие́мши, Всенепоро́чная, родила́ еси́ без отца́ Сы́на пло́тию, пре́жде ве́к от Отца́ рожде́ннаго без ма́тере, ника́коже претерпе́вшаго измене́ния, или́ смеше́ния, или́ разделе́ния, но обою́ существу́ сво́йство це́ло сохра́ншаго. Те́мже, Ма́ти Де́во Влады́чице, Того́ моли́ спасти́ся душа́м, правосла́вно Богоро́дицу испове́дающих Тя́.

Све́те Тихи́й:

Све́те Ти́хий святы́я сла́вы Безсме́ртнаго Отца́ Небе́снаго, Свята́го, Блаже́ннаго, Иису́се Христе́! Прише́дше на за́пад со́лнца, ви́девше свет вече́рний, пое́м Отца́, Сы́на и Свята́го Ду́ха, Бо́га. Досто́ин еси́ во вся времена́ пет бы́ти гла́сы преподо́бными, Сы́не Бо́жий, живо́т дая́й; те́мже мир Тя сла́вит.

Пареми́и:

1. Прему́дрости Соломо́ни чте́ние.

Пра́ведных ду́ши в руце́ Бо́жией, и не прико́снется и́х му́ка. Непщева́ни бы́ша во очесе́х безу́мных умре́ти, и вмени́ся озлобле́ние исхо́д и́х, и е́же от на́с ше́ствие — сокруше́ние, они́ же су́ть в ми́ре. Ибо пред лице́м челове́ческим, а́ще и му́ку прии́мут, упова́ние и́х безсме́ртия испо́лнено. И вма́ле нака́зани бы́вше, вели́кими благоде́тельствовани бу́дут, я́ко Бо́г искуси́ я́ и обре́те и́х досто́йны Себе́. Я́ко зла́то в горни́ле, искуси́ и́х и, я́ко всепло́дие же́ртвенное, прия́т я́. И во вре́мя посеще́ния и́х, возсия́ют, и я́ко и́скры по сте́блию, потеку́т. Су́дят язы́ком и облада́ют людьми́, и воцари́тся Госпо́дь в ни́х во ве́ки. Наде́ющиися На́нь разуме́ют и́стину и ве́рнии в любви́ пребу́дут Ему́, я́ко благода́ть и ми́лость в преподо́бных Его́ и посеще́ние во избра́нных Его́.

2. Прему́дрости Соломо́ни чте́ние

Пра́ведницы во ве́ки живу́т, и в Го́споде мзда́ и́х, и попече́ние и́х у Вы́шняго. Сего́ ра́ди прии́мут ца́рствие благоле́пия и вене́ц добро́ты от руки́ Госпо́дни, зане́ десни́цею покры́ет я́ и мы́шцею защити́т и́х. Прии́мет всеору́жие — рве́ние свое́ и вооружи́т тва́рь в ме́сть враго́м. Облече́тся в броня́ пра́вды и возложи́т шле́м — су́д нелицеме́рен. Прии́мет щи́т непобеди́мый — преподо́бие, поостри́т же напра́сный гне́в — во ору́жие, спобо́рет же с ни́м ми́р на безу́мныя. По́йдут праволу́чныя стре́лы мо́лниины и, я́ко от благокру́гла лу́ка облако́в, на наме́рение полетя́т, и от каменоме́тныя я́рости испо́лнь паду́т гра́ды. Вознегоду́ет на ни́х вода́ морска́я, ре́ки же потопя́т я́ на́гло. Сопроти́в ста́нет и́м ду́х си́лы и, я́ко ви́хор, разве́ет и́х, и опустоши́т всю́ зе́млю беззако́ние, и злоде́йство преврати́т престо́лы си́льных. Слы́шите у́бо, ца́рие, и разуме́йте, навы́кните, судии́ конце́в земли́. Внуши́те держа́щии мно́жества и гордя́щиися о наро́дех язы́ков, я́ко дана́ е́сть от Го́спода держа́ва ва́м и си́ла от Вы́шняго.

3. Прему́дрости Соломо́ни чте́ние.

Пра́ведник а́ще пости́гнет сконча́тися, в поко́и бу́дет. Ста́рость бо честна́ не многоле́тна, ниже́ в числе́ ле́т исчита́ется. Седи́на же е́сть му́дрость челове́ком, и во́зраст ста́рости — житие́ нескве́рное. Благоуго́ден Бо́гови бы́в, возлю́блен бы́сть и живы́й посреде́ гре́шник преста́влен бы́сть. Восхище́н бы́сть, да не зло́ба измени́т ра́зума его́ или́ ле́сть прельсти́т ду́шу его́. Раче́ние бо зло́бы помрача́ет до́брая, и паре́ние по́хоти пременя́ет у́м незло́бив. Сконча́вся вма́ле, испо́лни ле́та до́лга, уго́дна бо бе́ Го́сподеви душа́ его́, сего́ ра́ди потща́ся от среды́ лука́вствия. Лю́дие же ви́девше, и не разуме́вше, ниже́ поло́жше в помышле́нии таково́е, я́ко благода́ть и ми́лость в преподо́бных Его́ и посеще́ние во избра́нных Его́.

Го́споди, поми́луй. (Три́жды,)

Сподо́би, Го́споди:

Сподо́би, Го́споди, в ве́чер сей без греха́ сохрани́тися нам. Благослове́н еси́, Го́споди, Бо́же оте́ц на́ших, и хва́льно и просла́влено и́мя Твое́ во ве́ки. Ами́нь.

Бу́ди, Го́споди, ми́лость Твоя́ на нас, я́коже упова́хом на Тя. Благослове́н еси́, Го́споди, научи́ мя оправда́нием Твои́м. Благослове́н еси́, Влады́ко, вразуми́ мя оправда́нием Твои́м. Благослове́н еси́, Святы́й, просвети́ мя оправда́нии Твои́ми.

Го́споди, ми́лость Твоя́ во век, дел руку́ Твое́ю не пре́зри. Тебе́ подоба́ет хвала́, Тебе́ подоба́ет пе́ние, Тебе́ сла́ва подоба́ет. Отцу́ и Сы́ну и Свято́му Ду́ху, ны́не и при́сно и во ве́ки веко́в. Ами́нь.

На лити́и стихиры, гла́с 8:

Стра́ннице блаже́нная, / вся́ су́етная я́ко уме́ты вмени́вшая, / да би́сер — Христа́ приобря́щеши, / зри́м тя́, сто́гны гра́да Петро́ва преходя́щую / боле́зненными стопа́ми о́ныя освяти́вшую, / мра́за не страша́щуюся, но́щию вне́ гра́да тая́щуюся. / Та́мо коле́на души́ и те́ла прекло́ньши, / о, ко́ль те́плы мольбы́ Бо́гу ты́ сказа́ла еси́, / па́ки же ра́достно поноше́ний сама́ поиска́ла еси́, / в злострада́ниих Христа́ ра́ди юро́дствовавшая, / прозре́ния же да́ра та́йно сподо́бльшаяся, / благоде́тельнице лю́дем чудоде́тельная, / Ксе́ние свята́я, / бу́ди моле́бница при́сно за ны́.

Сла́ва, гла́с 4:

По и́мени твоему́, Ксе́ние, и житие́ твое́: / была́ бо еси́ ми́ру сему́ я́ко стра́нная, / ве́ку сему́ я́ко чужда́я, / Це́ркви же святе́й я́ко при́сная. / На земли́ пребыла́ еси́ я́ко го́стия привре́менная, / на небеси́ же пребыва́еши я́ко жи́тельница ве́чная. / Та́мо еси́ я́ко Бо́жия избра́нница, / мы́ же на земли́ ублажа́ем тя́ я́ко на́шу моли́твенницу.

И ны́не, гла́с то́йже:

Богоро́дице, гре́шных Спору́чнице, / не оста́ви на́с погиба́ющих, / но ри́зою заступле́ния Твоего́ покры́й на́с, / я́ко да ри́зы тоя́ кра́й ве́рою удержа́вше, / из глубины́ паде́ний изведе́ни бу́дем, / милосе́рдие Твое́ прославля́юще.

Го́споди, поми́луй. (40 раз)

Стихи́ры на стихо́вне:

Стихи́ры: Глас 1:

Поспеша́й на по́мощь на́шу, о Ксе́ние пра́ведная! / Яко вси́ есмы́ в беда́х, / ве́ры несумне́нныя не стяжа́вше, / дерзнове́ния же в моли́твах не иму́ще. / Те́мже к тебе́, блаже́нная, прибега́ем: / ты́ у́бо не́мощь на́шу воспо́лни, / Христа́ Бо́га о на́с умоля́ющи.

Стих: Госпо́дь храни́т прише́льцы, / си́ра и вдову́ прии́мет.

Прорече́ния твоя́, блаже́нная, / и́стину сокрове́нную провещава́ху, / те́мже веле́нием твои́м ве́рою после́дующии, / ра́дость и от бе́д избавле́ние улуча́ху. / Оба́че те́м противля́ющиися, / го́рькия печа́ли прича́стницы быва́ху, / ничто́же по́льзующеся.

Стих: Госпо́дь возво́дит низве́рженныя, / Госпо́дь лю́бит пра́ведники.

Вои́стину, Ксе́ние, / по и́мени твоему́ и житие́ твое́ бы́сть, / на небеси́ бо ду́хом живу́щи, / на земли́ стра́нна яви́лася еси́, / гра́да, зде́ пребыва́ющаго, не иму́щи, / но гряду́щаго взыску́ющи, / в не́мже ны́не водворя́ешися.

Слава, глас 7: Но́вый Андре́й, юро́дства по́двиг во́лею на себе́ взе́мший, явля́ешися, / о Ксе́ние, Андре́ем наре́кшаяся: / те́мже и виде́ния преми́рных, я́ко то́й сподобля́ющися, / отверза́еши о́чи суето́ю омраче́нным / и предста́тельствуеши о все́х, тебе́ ра́ди ми́лости у Христа́ Спа́са прося́щих, / Его́же моли́, блаже́нная, / спасти́ся душа́м на́шим.

И ныне, глас 7:

Под кро́в Тво́й, Влады́чице, вси́ земноро́днии, прибега́юще, вопие́м Ти́: Богоро́дице, упова́ние на́ше, изба́ви ны́ от безме́рных прегреше́ний и спаси́ ду́ши на́ша.

Моли́тва свята́го Симео́на Богоприи́мца:

Ны́не отпуща́еши раба́ Твоего́, Влады́ко,/ по глаго́лу Твоему́, с ми́ром;/ я́ко ви́деста о́чи мои́ спасе́ние Твое́,/ е́же еси́ угото́вал пред лице́м всех люде́й,/ свет во открове́ние язы́ков,// и сла́ву люде́й Твои́х Изра́иля.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Тропа́рь, глас 4:

Суеты́ земна́го ми́ра отве́ргшися, / кре́ст жития́ бездо́мнаго во стра́нничестве прия́ла еси́, / скорбе́й, лише́ний, людска́го осмея́ния не убоя́лася еси́, / любо́вь же Христо́ву позна́ла еси́, / е́юже ны́не на небеси́ услажда́ешися, / Ксе́ние блаже́нная, богому́драя, / моли́ся о спасе́нии ду́ш на́ших. (Дважды)

Песнь Пресвятей Богородице:

Богоро́дице Де́во, ра́дуйся, / Благода́тная Мари́е, Госпо́дь с Тобо́ю; / благослове́на Ты в жена́х / и благослове́н Плод чре́ва Твоего́, / я́ко Спа́са родила́ еси́ душ на́ших. (Единожды)

Бу́ди И́мя Госпо́дне благослове́но от ны́не и до ве́ка. (Три́жды)

Псало́м 33:

Благословлю́ Го́спода на вся́кое вре́мя,/ вы́ну хвала́ Его́ во усте́х мои́х./ О Го́споде похва́лится душа́ моя́,/ да услы́шат кро́тцыи, и возвеселя́тся./ Возвели́чите Го́спода со мно́ю,/ и вознесе́м И́мя Его́ вку́пе./ Взыска́х Го́спода, и услы́ша мя,/ и от все́х скорбе́й мои́х изба́ви мя./ Приступи́те к Нему́, и просвети́теся,/ и ли́ца ва́ша не постыдя́тся./ Сей ни́щий воззва́, и Госпо́дь услы́ша и́,/ и от все́х скорбе́й его́ спасе́ и́./ Ополчи́тся а́нгел Госпо́день о́крест боя́щихся Его́,/ и изба́вит их./ Вкуси́те и ви́дите, я́ко благ Госпо́дь:/ блаже́н муж, и́же упова́ет Нань./ Бо́йтеся Го́спода, вси́ святи́и Его́,/ я́ко несть лише́ния боя́щимся Его́./ Бога́тии обнища́ша и взалка́ша:/ взыска́ющии же Го́спода// не лиша́тся вся́каго бла́га.

У́ТРЕНЯ.

Шестопса́лмие:

Сла́ва в вы́шних Бо́гу, и на земли́ мир, в челове́цех благоволе́ние. (Три́жды)

Го́споди, устне́ мои́ отве́рзеши, и уста́ моя́ возвестя́т хвалу́ Твою́. (Два́жды)

Псалом 3:

Го́споди, что ся умно́жиша стужа́ющии ми́? Мно́зи востаю́т на мя, мно́зи глаго́лют души́ мое́й: несть спасе́ния eму́ в Бо́зе eго́. Ты же, Го́споди, Засту́пник мой еси́, сла́ва моя́ и вознося́й главу́ мою́. Гла́сом мои́м ко Го́споду воззва́х, и услы́ша мя от горы́ святы́я Своея́. Аз усну́х, и спах, воста́х, я́ко Госпо́дь засту́пит мя. Не убою́ся от тем люде́й, о́крест напа́дающих на мя. Воскресни́, Го́споди, спаси́ мя, Бо́же мой, я́ко Ты порази́л еси́ вся вражду́ющыя ми всу́е: зу́бы гре́шников сокруши́л еси́. Госпо́дне есть спасе́ние, и на лю́дех Твои́х благослове́ние Твое́.

Аз усну́х, и спах, воста́х, я́ко Госпо́дь засту́пит мя.

Псалом 37:

Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́. Я́ко стре́лы Твоя́ унзо́ша во мне, и утверди́л еси́ на мне ру́ку Твою́. Несть исцеле́ния в пло́ти мое́й от лица́ гне́ва Твоего́, несть ми́ра в косте́х мои́х от лица́ грех мои́х. Я́ко беззако́ния моя́ превзыдо́ша главу́ мою́, я́ко бре́мя тя́жкое отяготе́ша на мне. Возсмерде́ша и согни́ша ра́ны моя́ от лица́ безу́мия моего́. Пострада́х и сляко́хся до конца́, весь день се́туя хожда́х. Я́ко ля́двия моя́ напо́лнишася поруга́ний, и несть исцеле́ния в пло́ти мое́й. Озло́блен бых и смири́хся до зела́, рыка́х от воздыха́ния се́рдца моего́. Го́споди, пред Тобо́ю все жела́ние мое́ и воздыха́ние мое́ от Тебе́ не утаи́ся. Се́рдце мое́ смяте́ся, оста́ви мя си́ла моя́, и свет о́чию мое́ю, и той несть со мно́ю. Дру́зи мои́ и и́скреннии мои́ пря́мо мне прибли́жишася и ста́ша, и бли́жнии мои́ отдале́че мене́ ста́ша и нужда́хуся и́щущии ду́шу мою́, и и́щущии зла́я мне глаго́лаху су́етная и льсти́вным весь день поуча́хуся. Аз же я́ко глух не слы́шах и я́ко нем не отверза́яй уст свои́х. И бых я́ко челове́к не слы́шай и не имы́й во усте́х свои́х обличе́ния. Я́ко на Тя, Го́споди, упова́х, Ты услы́шиши, Го́споди Бо́же мой. Я́ко рех: да не когда́ пора́дуют ми ся врази́ мои́: и внегда́ подвижа́тися нога́м мои́м, на мя велере́чеваша. Я́ко аз на ра́ны гото́в, и боле́знь моя́ предо мно́ю есть вы́ну. Я́ко беззако́ние мое́ аз возвещу́ и попеку́ся о гресе́ мое́м. Врази́ же мои́ живу́т и укрепи́шася па́че мене́, и умно́жишася ненави́дящии мя без пра́вды. Воздаю́щии ми зла́я возблага́я оболга́ху мя, зане́ гоня́х благосты́ню. Не оста́ви мене́, Го́споди Бо́же мой, не отступи́ от Мене́. Вонми́ в по́мощь мою́, Го́споди спасе́ния моего́.

Не оста́ви мене́, Го́споди Бо́же мой, не отступи́ от Мене́. Вонми́ в по́мощь мою́, Го́споди спасе́ния моего́.

Псалом 62:

Бо́же, Бо́же мой, к Тебе́ у́тренюю, возжада́ Тебе́ душа́ моя́, коль мно́жицею Тебе́ плоть моя́, в земли́ пу́сте и непрохо́дне, и безво́дне. Та́ко во святе́м яви́хся Тебе́, ви́дети си́лу Твою́ и сла́ву Твою́. Я́ко лу́чши ми́лость Твоя́ па́че живо́т, устне́ мои́ похвали́те Тя. Та́ко благословлю́ Тя в животе́ мое́м, о и́мени Твое́м воздежу́ ру́це мои́. Я́ко от ту́ка и ма́сти да испо́лнится душа́ моя́, и устна́ма ра́дости восхва́лят Тя уста́ моя́. А́ще помина́х Тя на посте́ли мое́й, на у́тренних поуча́хся в Тя. Я́ко был еси́ Помо́щник мой, и в кро́ве крилу́ Твое́ю возра́дуюся. Прильпе́ душа́ моя́ по Тебе́, мене́ же прия́т десни́ца Твоя́. Ти́и же всу́е иска́ша ду́шу мою́, вни́дут в преиспо́дняя земли́, предадя́тся в ру́ки ору́жия, ча́сти ли́совом бу́дут. Царь же возвесели́тся о Бо́зе, похва́лится всяк клены́йся Им, я́ко загради́шася уста́ глаго́лющих непра́ведная.

На у́тренних поуча́хся в Тя. Я́ко был еси́ Помо́щник мой, и в кро́ве крилу́ Твое́ю возра́дуюся. Прильпе́ душа́ моя́ по Тебе́, мене́ же прия́т десни́ца Твоя́.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Го́споди поми́луй. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Псалом 87:

Го́споди Бо́же спасе́ния моего́, во дни воззва́х, и в нощи́ пред Тобо́ю. Да вни́дет пред Тя моли́тва моя́: приклони́ у́хо Твое́ к моле́нию моему́, я́ко испо́лнися зол душа́ моя́, и живо́т мой аду прибли́жися. Привмене́н бых с низходя́щими в ров, бых я́ко челове́к без по́мощи, в ме́ртвых свобо́дь, я́ко я́звеннии спя́щии во гро́бе, и́хже не помяну́л еси́ ктому́, и ти́и от руки́ Твоея́ отринове́ни бы́ша. Положи́ша мя в ро́ве преиспо́днем, в те́мных и се́ни сме́ртней. На мне утверди́ся я́рость Твоя́, и вся во́лны Твоя́ наве́л еси́ на мя. Уда́лил еси́ зна́емых мои́х от Мене́, положи́ша мя ме́рзость себе́: пре́дан бых и не исхожда́х. О́чи мои́ изнемого́сте от нищеты́, воззва́х к Тебе́, Го́споди, весь день, возде́х к Тебе́ ру́це мои́. Еда́ ме́ртвыми твори́ши чудеса́? Или́ вра́чеве воскреся́т, и испове́дятся Тебе́? Еда́ пове́сть кто во гро́бе ми́лость Твою́, и и́стину Твою́ в поги́бели? Еда́ позна́на бу́дут во тьме чудеса́ Твоя́, и пра́вда Твоя́ в земли́ забве́нней? И аз к Тебе́, Го́споди, воззва́х и у́тро моли́тва моя́ предвари́т Тя. Вску́ю, Го́споди, отре́еши ду́шу мою́, отвраща́еши лице́ Твое́ от Мене́? Нищ есмь аз, и в труде́х от ю́ности моея́; возне́с же ся, смири́хся, и изнемого́х. На мне преидо́ша гне́ви Твои́, устраше́ния Твоя́ возмути́ша мя, обыдо́ша мя я́ко вода́, весь день одержа́ша мя вку́пе. Уда́лил еси́ от Мене́ дру́га и и́скренняго, и зна́емых мои́х от страсте́й.

Го́споди Бо́же спасе́ния моего́, во дни воззва́х, и в нощи́ пред Тобо́ю. Да вни́дет пред Тя моли́тва моя́: приклони́ у́хо Твое́ к моле́нию моему́.

Псалом 102:

Благослови́, душе́ моя́, Го́спода, и вся вну́тренняя моя́ и́мя свя́тое Его́. Благослови́, душе́ моя́, Го́спода, и не забыва́й всех воздая́ний Его́, очища́ющаго вся беззако́ния твоя́, исцеля́ющаго вся неду́ги твоя́, избавля́ющаго от истле́ния живо́т твой, венча́ющаго тя ми́лостию и щедро́тами, исполня́ющаго во благи́х жела́ние твое́: обнови́тся я́ко о́рля ю́ность твоя́. Творя́й ми́лостыни Госпо́дь, и судьбу́ всем оби́димым. Сказа́ пути́ Своя́ Моисе́ови, сыново́м Изра́илевым хоте́ния Своя́: Щедр и Ми́лостив Госпо́дь, Долготерпели́в и Многоми́лостив. Не до конца́ прогне́вается, ниже́ во век вражду́ет, не по беззако́нием на́шым сотвори́л есть нам, ниже́ по грехо́м на́шым возда́л есть нам. Я́ко по высоте́ небе́сней от земли́, утверди́л есть Госпо́дь ми́лость Свою́ на боя́щихся Его́. Ели́ко отстоя́т восто́цы от за́пад, уда́лил есть от нас беззако́ния на́ша. Я́коже ще́дрит оте́ц сы́ны, уще́дри Госпо́дь боя́щихся Его́. Я́ко Той позна́ созда́ние на́ше, помяну́, я́ко персть есмы́. Челове́к, я́ко трава́ дни́е eго́, я́ко цвет се́льный, та́ко оцвете́т, я́ко дух про́йде в нем, и не бу́дет, и не позна́ет ктому́ ме́ста своего́. Ми́лость же Госпо́дня от ве́ка и до ве́ка на боя́щихся Его́, и пра́вда Его́ на сыне́х сыно́в, храня́щих заве́т Его́, и по́мнящих за́поведи Его́ твори́ти я́. Госпо́дь на Небеси́ угото́ва Престо́л Свой, и Ца́рство Его́ все́ми облада́ет. Благослови́те Го́спода вси А́нгели Его́, си́льнии кре́постию, творя́щии сло́во Его́, услы́шати глас слове́с Его́. Благослови́те Го́спода вся Си́лы Его́, слуги́ Его́, творя́щии во́лю Его́. Благослови́те Го́спода вся дела́ Его́, на вся́ком ме́сте влады́чества Его́, благослови́, душе́ моя́, Го́спода.

На вся́ком ме́сте влады́чества Его́, благослови́, душе́ моя́, Го́спода.

Псалом 142:

Го́споди, услы́ши моли́тву мою́, внуши́ моле́ние мое́ во и́стине Твое́й, услы́ши мя в пра́вде Твое́й и не вни́ди в суд с рабо́м Твои́м, я́ко не оправди́тся пред Тобо́ю всяк живы́й. Я́ко погна́ враг ду́шу мою́, смири́л есть в зе́млю живо́т мой, посади́л мя есть в те́мных, я́ко ме́ртвыя ве́ка. И уны́ во мне дух мой, во мне смяте́ся се́рдце мое́. Помяну́х дни дре́вния, поучи́хся во всех де́лех Твои́х, в творе́ниих руку́ Твое́ю поуча́хся. Возде́х к Тебе́ ру́це мои́, душа́ моя́, я́ко земля́ безво́дная Тебе́. Ско́ро услы́ши мя, Го́споди, исчезе́ дух мой, не отврати́ лица́ Твоего́ от Мене́, и уподо́блюся низходя́щым в ров. Слы́шану сотвори́ мне зау́тра ми́лость Твою́, я́ко на Тя упова́х. Скажи́ мне, Го́споди, путь во́ньже пойду́, я́ко к Тебе́ взях ду́шу мою́. Изми́ мя от враг мои́х, Го́споди, к Тебе́ прибего́х. Научи́ мя твори́ти во́лю Твою́, я́ко Ты еси́ Бог мой. Дух Твой Благи́й наста́вит мя на зе́млю пра́ву. И́мене Твоего́ ра́ди, Го́споди, живи́ши мя, пра́вдою Твое́ю изведе́ши от печа́ли ду́шу мою́. И ми́лостию Твое́ю потреби́ши враги́ моя́ и погуби́ши вся стужа́ющыя души́ мое́й, я́ко аз раб Твой есмь.

Услы́ши мя, Го́споди, в пра́вде Твое́й и не вни́ди в суд с рабо́м Твои́м.

Услы́ши мя, Го́споди, в пра́вде Твое́й и не вни́ди в суд с рабо́м Твои́м.

Дух Твой Благи́й наста́вит мя на зе́млю пра́ву.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Тропа́рь глас 4:

Суеты́ земна́го ми́ра отве́ргшися, / кре́ст жития́ бездо́мнаго во стра́нничестве прия́ла еси́, / скорбе́й, лише́ний, людска́го осмея́ния не убоя́лася еси́, / любо́вь же Христо́ву позна́ла еси́, / е́юже ны́не на небеси́ услажда́ешися, / Ксе́ние блаже́нная, богому́драя, / моли́ся о спасе́нии ду́ш на́ших. (Дважды)

Сла́ва Отцу́ и Сы́ну и Свято́му Ду́ху.

Тропа́рь глас 8:

Тебе́, о стра́ннице, яви́ Христо́с Госпо́дь моли́твенницу те́плую за ро́д на́ш, / в житии́ бо твое́м страда́ния и ско́рби восприя́вши, / Бо́гу же и челове́ком любо́вию послужи́вши, / дерзнове́ние ве́лие стяжа́ла еси́. / Те́мже к тебе́ в напа́стех и ско́рбех усе́рдно прибега́ем, / из глубины́ серде́ц на́ших взыва́юще: / упова́ния на́шего не посрами́, Ксе́ние блаже́нная.

И ны́не и при́сно и во ве́ки веко́в. Ами́нь.

Глас 8: И́же нас ра́ди рожде́йся от Де́вы / и, распя́тие претерпе́в, Благи́й, / испрове́ргий сме́ртию смерть / и Воскресе́ние явле́й я́ко Бог, / не пре́зри, я́же созда́л еси́ руко́ю Твое́ю; / яви́ человеколю́бие Твое́, Ми́лостиве. / Приими́ ро́ждшую Тя, Богоро́дицу, моля́щуюся за ны, / и спаси́, Спа́се наш, лю́ди отча́янныя.

Здесь читается кафизма, положенная по дню, или сразу седальны:

Го́споди, поми́луй. (Три́жды)

Седален, глас 1:

Не ктому́ озлобле́ния и ско́рби претерпева́еши, блаже́нная, на земли́ чужде́й стра́нствующи, но во Оте́чествии небе́снем водворя́ешися и та́мо с ли́ки пра́ведных утеша́ешися. Те́мже и на́с, непреста́нно тебе́ призыва́ющих, от бе́д и напа́стей многообра́зных при́сно избавля́й.

Сла́ва Отцу́ и Сы́ну и Свято́му Ду́ху. И ны́не и при́сно и во ве́ки веко́в. Ами́нь.

Глас 1: Богоро́дице Де́во, ра́дуйся, ра́дость от Ангела прия́вшая и ра́дость ми́ру прине́сшая, ра́дуйся, ро́ждшая Зижди́теля Твоего́ и Го́спода. Ра́дуйся, сподо́бльшаяся бы́ти Ма́ти Бо́жия.

Седален, глас 8:

Тебе́, блаже́нная, от Бо́га даде́ся благода́ть пещи́ся о лю́дех, неду́жныя цели́ти и ско́рбныя утеша́ти, обурева́емыя напа́стьми ко приста́нищу благоути́шному направля́ти, заблу́дшия и отча́янныя на пу́ть спасе́ния направля́ти. Те́мже мы́ ны́не, па́мять твою́ соверша́юще, те́пле зове́м: не забу́ди на́с, блаже́нная, в твои́х дерзнове́нных моли́твах.

Сла́ва Отцу́ и Сы́ну и Свято́му Ду́ху. И ны́не и при́сно и во ве́ки веко́в. Ами́нь.

Глас 8: Тебе́, блаже́нная, от Бо́га даде́ся благода́ть пещи́ся о лю́дех, неду́жныя цели́ти и ско́рбныя утеша́ти, обурева́емыя напа́стьми ко приста́нищу благоути́шному направля́ти, заблу́дшия и отча́янныя на пу́ть спасе́ния направля́ти. Те́мже мы́ ны́не, па́мять твою́ соверша́юще, те́пле зове́м: не забу́ди на́с, блаже́нная, в твои́х дерзнове́нных моли́твах.

Полиеле́й:

Хвали́те И́мя Госпо́дне, хвали́те, раби́ Го́спода.

Аллилу́иа, аллилу́иа, аллилу́иа.

Благослове́н Госпо́дь от Сио́на, живы́й во Иерусали́ме.

Аллилу́иа, аллилу́иа, аллилу́иа.

Испове́дайтеся Го́сподеви, я́ко Благ, я́ко в век ми́лость Его́.

Аллилу́иа, аллилу́иа, аллилу́иа.

Испове́дайтеся Бо́гу Небе́сному, я́ко в век ми́лость Его́.

Аллилу́иа, аллилу́иа, аллилу́иа.

Велича́ние:

Ублажа́ем тя́, свята́я блаже́нная Ксе́ние, и чте́м святу́ю па́мять твою́, ты́ бо мо́лиши за на́с Христа́ Бо́га на́шего.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа,// сла́ва Тебе́, Бо́же. (Трижды)

Ублажа́ем тя́, свята́я блаже́нная Ксе́ние, и чте́м святу́ю па́мять твою́, ты́ бо мо́лиши за на́с Христа́ Бо́га на́шего.

Седа́льны:

Глас 5:

Отве́рзи уста́ на́ша, Спа́се, да́ждь сло́во ра́зума рабо́м неключи́мым, воспе́ти досто́йно Ксе́нию блаже́нную, тоя́ бо по́двизи мирски́й ра́зум превосхо́дят, и тоя́ смире́ние, я́ко покро́вом, житие́ ея́ сокрыва́ет. Оба́че чудесы́ и предста́тельством тоя́ просвеща́еми, от любве́ серде́чныя непреста́нно зове́м: не оста́ви на́с заступле́нием твои́м, Ксе́ние прему́драя.

Глас 5: Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Не му́дростию и си́лою, не бога́тством хва́лимся, но Тобо́ю, пренепоро́чная, Ты́ бо ро́д челове́чь на высоту́ Ангел превосходя́щую вознесла́ еси́, Сло́во предве́чное ро́ждши, и ма́тернее дерзнове́ние к Сы́ну Твоему́ и Бо́гу стяжа́вши. Те́мже Ти́ припа́дающе, мо́лимся: на забу́ди на́с си́рых, о всепе́тая Ма́ти и Де́во.

Степе́нна, глас 4:

От ю́ности моея́/ мно́зи бо́рют мя стра́сти,/ но Сам мя заступи́// и спаси́, Спа́се мой.

Ненави́дящии Сио́на,/ посрами́теся от Го́спода,/ я́ко трава́ бо огне́м// бу́дете изсо́хше.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Святы́м Ду́хом/ вся́ка душа́ живи́тся,/ и чистото́ю возвыша́ется,// светле́ется Тро́йческим еди́нством, священнота́йне.

Го́споди, поми́луй. (Три́жды)

От Луки́ Свята́го Ева́нгелия чте́ние

Сла́ва, Тебе́, Го́споди, сла́ва Тебе́.

Во вре́мя о́но, бя́ху приближа́ющеся Иису́су вси мытари́е и гре́шницы, послу́шати Его́. И ропта́ху фарисе́е и кни́жницы, глаго́люще, я́ко Сей гре́шники прие́млет и с ни́ми яст. Рече́ же к ним при́тчу сию́, глаго́ля: кий челове́к от вас имы́й сто ове́ц, и погу́бль еди́ну от них, не оста́вит ли девяти́десят и девяти́ в пусты́ни и и́дет вслед поги́бшия, до́ндеже обря́щет ю́? И обре́т возлага́ет на ра́ме свои́ ра́дуяся. И прише́д в дом, созыва́ет дру́ги и сосе́ды, глаго́ля им: ра́дуйтеся со мно́ю, я́ко обрето́х овцу́ мою́ поги́бшую. Глаго́лю вам, я́ко та́ко ра́дость бу́дет на небеси́ о еди́нем гре́шнице ка́ющемся, не́жели о девяти́десятих и девяти́ пра́ведник, и́же не тре́буют покая́ния. Или́ ка́я жена́ иму́щи де́сять драхм, а́ще погуби́т дра́хму еди́ну, не вжига́ет ли свети́льника, и помете́т хра́мину, и и́щет приле́жно, до́ндеже обря́щет? И обре́тши созыва́ет други́ни и сосе́ды, глаго́лющи: ра́дуйтеся со мно́ю, я́ко обрето́х дра́хму поги́бшую. Та́ко, глаго́лю вам, ра́дость быва́ет пред А́нгелы Бо́жиими о еди́ном гре́шнице ка́ющемся.

Сла́ва, Тебе́, Го́споди, сла́ва Тебе́.

Псало́м 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя. Я́ко беззако́ние мое́ аз зна́ю и грех мой предо мно́ю есть вы́ну. Тебе́ Еди́ному согреши́х, и лука́вое пред Тобо́ю сотвори́х, я́ко да оправди́шися во словесе́х Твои́х и победи́ши, внегда́ суди́ти Ти. Се бо в беззако́ниих зача́т есмь, и во гресе́х роди́ мя ма́ти моя́. Се бо и́стину возлюби́л еси́, безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся, омы́еши мя, и па́че сне́га убелю́ся. Слу́ху моему́ да́си ра́дость и весе́лие, возра́дуются ко́сти смире́нныя. Отврати́ лице́ Твое́ от грех мои́х, и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́, и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́, и Ду́хом Влады́чним утверди́ мя. Научу́ беззако́нныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́, возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо, всесожже́ния не благоволи́ши. Же́ртва Бо́гу дух сокруше́н, се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския, тогда́ благоволи́ши же́ртву пра́вды, возноше́ние и всесожега́емая: тогда́ возложа́т на олта́рь Твой тельцы́.

Глас 6:

Сла́ва Отцу́ и Сы́ну и Свято́му Ду́ху./ Моли́твами блаженныя Ксении, / Ми́лостиве, очи́сти / мно́жества согреше́ний на́ших.

И ны́не и при́сно и во ве́ки веко́в. Ами́нь./ Моли́твами Богоро́дицы, / Ми́лостиве, очи́сти / мно́жества согреше́ний на́ших.

Поми́луй мя, Бо́же,/ по вели́цей ми́лости Твое́й,/ и по мно́жеству щедро́т Твои́х// очи́сти беззако́ние мое́.

Стихи́ра, глас 6

Жесто́кое житие́ во́лею избра́ла еси́, и озлобле́ния вся́ческая претерпе́ла еси́, юро́дство ми́ра сего́ обличи́вши, прему́дрость же Бо́жию яви́вши. И ны́не на небеси́ утеша́ешися, мы́ же, на земли́ стра́нствующе, тебе́ непреста́нно зове́м: не забу́ди на́с, блаже́нная, Христа́ Бо́га о на́с умоля́ющи.

Го́споди, поми́луй. (12 раз)

Кано́н блаже́нней Ксе́нии, гла́с 4-й.

Пе́снь 1.

Ирмос: Триста́ты кре́пкия, Рожде́йся от Де́вы, безстра́стия во глубине́, души́ трича́стное потопи́, молю́ся, да Тебе́, я́ко в тимпа́не, во умерщвле́нии телесе́ побе́дное воспою́ пе́ние.

Припев: Святая блаженная мати Ксение, моли Бога о нас.

Ксе́ние блаже́нная, вои́стинну по и́мени твоему́ и житие́ твое́ бы́сть: на земли́ бо, я́ко во стране́ чужде́й, преходя́щи и во Оте́чествие небе́сное преста́витися ча́ющи, вся́ земна́я, я́ко се́нь и со́ние, презре́ла еси́.

Суету́ вся́ческую, я́ко пра́х от ногу́ твое́ю отря́сши, жесто́ким путе́м в зе́млю обетова́ния ше́ствовати изво́лила еси́, Ксе́ние мужему́дренная, человекоуби́йцу врага́, я́ко Амали́ка, побежда́ющи и Го́сподеви побе́дное пе́ние принося́щи.

Еги́петския котлы́ благоде́нствия презре́вши и миру кичли́вому посмея́вшися, Ксе́ние му́драя, мо́ря жите́йскаго дно́ прешла́ еси́ неврежде́нно, Бо́гу тя́ веду́щу руко́ю кре́пкою, Ему́же воспе́ла еси́ побе́дное пе́ние.

Богородичен: Ненаде́ющихся наде́ждо и бори́мых по́моще, Пречи́стая, в мо́ри су́щих звездо́ боготе́чная, и в пусты́ни заблу́ждших исто́чниче живоно́сный, отра́ду душа́м на́шим, Де́во Благослове́нная, да́ждь.

Пе́снь 3.

Ирмос: Не му́дростию, и си́лою, и бога́тством хва́лимся, но Тобо́ю, Отчею ипоста́сною Му́дростию, Христе́: не́сть бо свя́т, па́че Тебе́, Человеколю́бче.

Иоа́нна, возлю́бленнаго ученика́ Спа́сова, слы́шавши глаго́люща: и́же лю́бит ми́р, в не́м любви́ Отчей не́сть; мир грехолюби́вый возненави́девши, в до́м Отчий поспеша́ла еси́, блаже́нная.

Юро́ду себе́ Христа́ ра́ди сотво́рши, му́дрости же преми́рныя исполня́ющися, о́ком чи́стым бу́дущая, я́ко настоя́щая, прозрева́ющи, проро́ком Бо́жиим поревнова́ла еси́, Ксе́ние богому́драя.

Моли́тва усе́рдная — пи́ща тебе́ бы́сть, пра́веднице, руга́ния же и осмея́ния — питие́ сла́дкое, смиренному́дрие — оде́жда украше́ния, и вене́ц — Ду́ха осия́ние.

Богородичен: Уста́ двиза́ти на моли́тву, я́коже ма́ти Самуи́лова ника́коже облени́мся, ве́рнии, небесе́ и земли́ Цари́цу призыва́ющи.

Седа́лен, гла́с 5:

Егда́ но́щию моли́твы твоя́ тайноле́пно творя́щи, на сне́г коле́на твоя́ преклоня́ла еси́, блаже́нная, душа́ твоя́ па́че сне́га убеля́шеся, сле́зы же, от теплоты́ серде́чныя пролива́емыя, зе́млю согрева́ху, гра́д тво́й спя́щий бде́нием твои́м спаса́шеся, и гне́в Бо́жий от того́ отвраща́шеся. Ны́не у́бо тебе́ от мира сего́ отше́дшей, бе́дствуем лю́те, но́щь несве́тла наста́ на́м, огусте́ тма́ грехо́вная, со́н ле́ности и нераде́ния зе́ницы на́ша смежи́, гра́д тво́й в ру́це безбо́жник предаде́ся, и оте́чествие твое́ врагу́ порабо́тися, потщи́ся у́бо на моли́тву и на по́мощь на́м поспеша́й, Ксе́ние, дерзнове́нием ве́лия.

Слава, и ныне, богородичен, глас тойже:

Предста́тельнице и ско́рая Засту́пнице ро́да христиа́нского, бездо́мных и оте́чествия лише́нных Покрови́тельнице, моли́ при́сно Сы́на Твоего́ и Бо́га с блаже́нною Ксе́ниею за ру́сския лю́ди во оте́чествии и в разсе́янии су́щия, да Оте́чествия неотъе́млемаго, небе́снаго дости́гнем.

Пе́снь 4.

Ирмос: Услы́шах сла́вное смотре́ние Твое́, Христе́ Бо́же, я́ко роди́лся еси́ от Де́вы, да от ле́сти изба́виши зову́щия: сла́ва си́ле Твое́й, Го́споди.

Же́нскую не́мощь отлага́ющи, Андре́ем нарекла́ся еси́, мужеу́мная, проти́ву духо́в зло́бы подвиза́ющися, — сла́ва си́ле Твое́й, — к Подаю́щему ти́ си́лу взыва́ющи.

Евино высокоу́мие, ра́й затвори́вшее, отве́ргши всеконе́чно, богому́драя, юро́да нарещи́ся изволя́еши, зми́я льсти́ваго посрами́вши.

Ум Христо́в внутрьу́ду тая́щи, прему́драя, ми́ра му́дрость попира́еши, вразумля́еши же лю́ди, судьбы́ Бо́жия предвозвеща́ющи, и стопы́ на́ша на пу́ть пра́вый направля́ющи.

Богородичен: Милосе́рдие Твое́ к на́м преклони́ти тщи́мся, Богоро́дице, моли́твенницу Тебе́ предлага́ющи Ксе́нию блаже́нную, ея́же предста́тельство стяжа́ти упова́ем, па́мять ея́ те́пле воспева́юще.

Пе́снь 5

Ирмос: Стяжа́вый ны́, избра́нныя лю́ди, кро́вию Твое́ю, Го́споди, Тво́й ми́р да́ждь на́м, во единомы́слии сохраня́я ста́до Твое́.

Наготу́ и хла́д терпя́щи, ри́зы же ни́щим раздаю́щи, — довле́ет ми́ ри́за креще́ния, — в себе́ взыва́ла еси́, блаже́нная.

Уврачу́й на́ша ра́ны, услы́ши моли́твы, умири́ на́шу жи́знь и на по́мощь на́м поспеша́й, Ксе́ние благолюби́вая.

Юныя вразуми́ и на пу́ть и́стины наста́ви, ста́рыя умудри́ и боже́ственная разуме́ти научи́, вся́ко на дела́ блага́я и́х подвиза́ющи, о Ксе́ние, му́дрость небе́сную стяжа́вшая.

Богородичен: Печа́ли отло́жше, восклони́мся и горе́ воззри́м, бра́тие, и у́зрим в небесе́х Цари́цу Богоро́дицу, покро́вом Свои́м светоно́сным на́с покрыва́ющую.

Пе́снь 6.

Ирмос: Внегда́ скорбе́ти ми́, возопи́х ко Го́споду, и услы́ша мя́ Бо́г спасе́ния моего́.

Окорми́ на́с, в мо́ри жите́йском бе́дствующих, блаже́нная, ко приста́нищу благооти́шному на́с провожда́ющи, моля́щися ко Еди́ному, Иже на́с спасти́ могу́щему.

Хотя́ще блага́я твори́ти, зла́я содева́ем. За́поведи Бо́жия ве́дуще, о те́х небреже́м и согреша́ем: помози́ на́м немощны́м, Ксе́ние благосе́рдая.

Возопи́ о на́с ко Го́споду, Ему́же послужи́ла еси́, о Ксе́ние, гла́сом кре́пким, я́коже Моисе́й в пусты́ни, и услы́шит тя́ Бо́г, спасти́ хотя́й челове́ки.

Богородичен: Аще не ты́ на́м ру́це про́стреши, о Богома́ти, не и́мамы избы́ти поги́бельнаго ро́ва, сего́ ра́ди Ти́ зове́м: Влады́чице, спаси́ ны.

Конда́к, гла́с 3:

На земли́ я́ко стра́нна пребы́вши, / о небе́снем же Оте́чествии воздыха́ющи, / юро́да от бу́иих и неве́рных, / прему́дра же и свя́та от ве́рных познава́ешися, / и от Бо́га сла́вою и че́стию венча́ешися, / Ксе́ние мужеу́мная и богоу́мная, / сего́ ра́ди зове́м ти́: / ра́дуйся, я́ко по стра́нствии земне́м / в дому́ Отчем водворя́ешися.

Икос:

Кто́ сия́, во врата́ Ца́рствия небе́снаго толку́щая, ея́же ри́зы белы́, лице́ же сия́ет па́че со́лнца? Отку́ду прихо́дит и яковы́х тре́бует? — Сия́ е́сть дщи́ Отца́ Небе́снаго, Сы́на Бо́жия раба́ ве́рная и Ду́ха Свята́го сосу́д избра́нный, на земли́ я́ко стра́нница прише́льствовавшая. Ны́не во Оте́чествие небе́сное преставля́ется, со тща́нием у́бо се́й две́ри отве́рзите и срета́йте ю́, с весе́лием зову́ще: ра́дуйся, Ксе́ние, я́ко по стра́нствии земне́м в дому́ Отчем водворя́ешися.

Пе́снь 7.

Ирмос: Юноши три́ в Вавило́не, веле́ние мучи́телево на бу́йство прело́жше, посреде́ пла́мене вопия́ху: благослове́н еси́, Го́споди, Бо́же оте́ц на́ших.

Ле́гкое бре́мя Христо́во на ра́мо твое́ взе́мши, вся́ тя́жкая земна́я ни во что́же вменя́ющи, блаже́нная, неудобоноси́мое ка́мение на ве́рх церко́вный преноси́ла еси́, усе́рдно трудя́щися и зову́щи: благослове́н еси́ Го́споди, Бо́же оте́ц на́ших.

Алчем и жа́ждем и наготу́ем духо́вно: пи́щу сла́дкую, твое́ наставле́ние, да́ждь у́бо на́м, блаже́нная, прохлади́ горта́ни на́ша росо́ю моли́тв твои́х о на́с, убо́гих, я́ко да Го́сподеви благода́рне зове́м: благослове́н еси́, Бо́же оте́ц на́ших.

Мытаре́во грехолю́бное житие́ подража́юще, смиренному́дрия того́ не стяжа́хом, па́че же и фарисе́евой го́рдости преда́хомся, доброде́телей же не иму́ще, что́ у́бо сотвори́м немощни́и, а́ще не к тебе́, Ксе́ние, прибе́гнем и возопии́м: умоли́ о на́с Бо́га оте́ц на́ших.

Богородичен: Ины́я не́сть во вселе́нней, я́коже Ты́, Богоро́дице, я́же ма́тернее дерзнове́ние ко Спа́су иму́щая, и Ангелы пресла́вною чистото́ю превозше́дшая: те́мже Ти́ припа́даем, Влады́чице, моли́ о на́с при́сно Бо́га оте́ц на́ших.

Пе́снь 8.

Ирмос: Вся́ческая, Влады́ко, прему́дростию Твое́ю соста́вил еси́, земли́ же па́ки утверди́л еси́, я́коже ве́си, дно́, основа́нием водрузи́вый на вода́х безме́рных. Те́м вси́ вопие́м, воспева́юще: благослови́те, дела́ Госпо́дня, непреста́нно Го́спода.

Помо́щница на́м бу́ди, блаже́нная, изыма́ющи на́с от скорбе́й и боле́зней, от собла́знов же, нестрое́ний и бе́д, и жела́ния серде́ц на́ших во бла́го испо́лни, я́ко да о тебе́ Бо́га благодаря́ще, вопие́м: благослови́те дела́ Госпо́дня непреста́нно Го́спода.

Огне́вицу держа́вствующему уста́вила еси́, цари́це же в виде́нии со́ннем предста́вши, прорекла́ еси́ то́й рожде́ние ча́да, те́мже благода́рственне вопия́ше: благослови́те дела́ Госпо́дня непреста́нно Го́спода.

Ча́да твоя́ есмы́, о Ксе́ние блаже́нная, не оста́ви на́с си́рых, но на по́мощь к на́м прииди́. Не забу́ди о сла́ве твое́й пеку́щихся, но ра́дованием и́м возда́ждь, да вси́ согла́сно пое́м: благослови́те дела́ Госпо́дня непреста́нно Го́спода.

Богородичен: Имя Твое́ пресла́дкое и мироуха́нное да не отхо́дит от у́ст на́ших, Богоро́дице, сердца́ же на́ша любо́вию боже́ственною горя́ща, всю́ тва́рь да приглаша́ют вопи́ти: благослови́те дела́ Госпо́дня непреста́нно Ма́терь Бо́жию.

На 9-й песни поем песнь Пресвятыя Богородицы:

Вели́чит душа́ Моя́ Го́спода и возра́довася дух Мой о Бо́зе Спа́се Мое́м.

К коемуждо стиху припеваем: Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Я́ко призре́ на смире́ние рабы́ Своея́, се бо, от ны́не ублажа́т Мя вси ро́ди.

Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Я́ко сотвори́ Мне вели́чие Си́льный, и свя́то и́мя Его́, и ми́лость Его́ в ро́ды родо́в боя́щимся Его́.

Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Сотвори́ держа́ву мы́шцею Свое́ю, расточи́ го́рдыя мы́слию се́рдца их.

Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Низложи́ си́льныя со престо́л, и вознесе́ смире́нныя, а́лчущия испо́лни благ, и богатя́щияся отпусти́ тщи.

Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Восприя́т Изра́иля о́трока Своего́, помяну́ти ми́лости, я́коже глаго́ла ко отце́м на́шим, Авраа́му и се́мени его́ да́же до ве́ка.

Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Пе́снь 9.

Ирмос: Тя́, пресла́вную Неве́сту и Всесвяту́ю Богоро́дицу, Зижди́теля ро́ждшую неви́димых же и все́х ви́димых, пе́сньми велича́ем.

Тайноле́пная жития́ твоего́ и по́двизи твои́ сокрове́ннии, ны́не ми́ру яви́шася, Ксе́ние блаже́нная, те́мже о тебе́ всеселя́щеся, Христа́ Бо́га, тебе́ просла́вльшаго, немо́лчно велича́ем.

Аще и преста́вилася еси́ от земны́х, оба́че ве́дуще тя́ и по сме́рти на́м спребыва́ющую и моли́твами твои́ми при́сно на́с от бе́д покрыва́ющу, благода́рне тя́, блаже́нная, велича́ем.

Еже о на́с, немощны́х и убо́гих, попече́ние твое́ воспомина́юще, с любо́вию к тебе́ припа́даем, моли́твеннице на́ша кре́пкая: не оста́ви у́бо на́с, си́рых, но при́сно на́м помога́й, я́ко да о тебе́ Бо́га и Отца́ Небе́снаго при́сно велича́ем.

Богородичен: Моли́твы Ксе́нии блаже́нныя к Тебе́, Влады́чице, о на́с приноси́мыя, к Сы́ну твоему́ и Бо́гу, Де́во, принеси́, Твои́м ма́терним хода́тайством ты́я подкрепля́ющи, и спаса́й, Пречи́стая, Тя́ велича́ющия.

Свети́лен:

До́ме Отчий, отве́рзи ми́ две́ри, от земли́ чужде́й преста́вльшейся, — вопие́т Ксе́ния блаже́нная, во врата́ Ца́рствия небе́снаго толку́щи.

Сла́ва, и ны́не, Богородичен:

Две́ре небе́сная, пала́то Царе́ва, христиа́н неруши́мая стено́, богоприе́мнеи Твои́ ру́це на́м простира́ющи, введи́ на́с, Влады́чице, в ве́чныя кро́вы.

Хвали́тны псалмы́, глас 8:

Вся́кое дыха́ние да хва́лит Го́спода./ Хвали́те Го́спода с небе́с,/ хвали́те Его́ в вы́шних.// Тебе́ подоба́ет песнь Бо́гу.

Хвали́те Его́ вси а́нгели Его́,/ хвали́те Его́ вся си́лы Его́.// Тебе́ подоба́ет песнь Бо́гу.

Сти́хиры, глас 8:

Стих: Сотвори́ти в них суд напи́сан/ сла́ва сия́ бу́дет всем преподо́бным Его́.

Со́лнца пра́вды — Христа́ безу́мно уклони́хомся, и зима́ на́м е́сть лю́тая жестокосе́рдия. Но ты́, блаже́нная, теплото́ю моли́тв твои́х оледене́вшая сердца́ н́ша согрева́й, я́ко да от сна́ нечу́вствия восклони́мся, весну́ духо́вную возвеща́ющи.

Стих: Хвали́те Его́ на си́лах Его́,/ хвали́те Его́ по мно́жеству вели́чествия Его́.

В нощи́ грехо́вней заблуди́хомся, огусте́ тма́ духо́вная: ка́ко избе́гнем паде́ний и поги́бельнаго ро́ва? Ка́ко обрете́м пу́ть ко спасе́нию? Ты́, блаже́нная, свети́льник милосе́рдия твоего́ возже́гши, изы́ди в сре́тение на́с погиба́ющих и, просте́рши на́м ру́це твои́, на стези́ пра́выя изведи́ ны.

Стих: Хвали́те Его́ в тимпа́не и ли́це,/ хвали́те Его́ во стру́нах и орга́не.

Где́ прему́др, где́ кни́жник, где́ совопро́сник ве́ка сего́? Не обуи́ ли Бо́г прему́дрость мирску́ю? Те́мже и ты́, Ксе́ние, ми́ру юро́да явля́ешися, Христа́, Бо́жию Прему́дрость, пропове́дающи, и Того́ благода́тию просвеща́ема, все́х науча́еши суеты́ мирски́я отгреба́тися.

Стих: Хвали́те Его́ в кимва́лех доброгла́сных, хвали́те Его́ в кимва́лех восклица́ния. / Вся́кое дыха́ние да хва́лит Го́спода.

Нищету́ соверше́нную стяжа́вши, прему́драя, мирска́я мудрова́ния отве́ргши, Бо́гу же я́ко вдови́чу ле́пту в же́ртву ра́зум прине́сши, юро́да челове́ком явля́ешися, оба́че тя́ ве́мы мудре́йшую прему́дрых, те́мже от тебе́ науче́ния про́сим: просвети́ на́ш у́м твое́ю све́тлостию, мра́к неве́дения отгоня́ющи.

Глас 6: Сла́ва Отцу́ и Сы́ну и Свято́му Ду́ху

Все отложи́вши мирско́е попече́ние, ри́зою юро́дства прему́дрость сокрыва́ющи, Бо́гу же и челове́ком тайноле́пно послужи́вши, стяжа́ла еси́ Свята́го Ду́ха благода́ть, о Ксе́ние блаже́нная, те́мже я́ко дерзнове́ние ко Спа́су иму́щая, не преста́й моли́ти Того́ спасти́ся душа́м на́шим.

Глас 6: И ны́не и при́сно и во ве́ки веко́в. Ами́нь.

Вся́ превозше́дши непоро́чнаго де́вства добро́тою, Бо́га родила́ еси́ неизрече́нно, Пресвята́я Де́во Ма́ти, те́мже ро́д челове́чь о Тебе́ ра́дуется, и Тобо́ю, и́стинною Богоро́дицею, дерзнове́нно хва́лится, на Тя́ упова́ние возлага́я, Ты́ бо еси́ Предста́тельница и Спасе́ние ми́ру.

Славосло́вие вели́кое:

Сла́ва в вы́шних Бо́гу, и на земли́ мир, в челове́цех благоволе́ние. Хва́лим Тя, благослови́м Тя, кла́няем Ти ся, славосло́вим Тя, благодари́м Тя, вели́кия ра́ди сла́вы Твоея́. Го́споди Царю́ Небе́сный, Бо́же О́тче Вседержи́телю, Го́споди, Сы́не Единоро́дный, Иису́се Христе́, и Святы́й Ду́ше. Го́споди Бо́же, А́гнче Бо́жий, Сы́не Оте́чь, взе́мляй грех ми́ра, поми́луй нас; взе́мляй грехи́ ми́ра, приими́ моли́тву на́шу; седя́й одесну́ю Отца́, поми́луй нас. Я́ко Ты еси́ еди́н Свят, Ты еси́ еди́н Госпо́дь, Иису́с Христо́с, в сла́ву Бо́га Отца́. Ами́нь.

На всяк день благословлю́ Тя, и восхвалю́ И́мя Твое́ во ве́ки, и в век ве́ка.

Сподо́би, Го́споди, в день сей без греха́ сохрани́тися нам. Благослове́н еси́, Го́споди, Бо́же оте́ц на́ших, и хва́льно и просла́влено И́мя Твое́ во ве́ки. Ами́нь.

Бу́ди, Го́споди, ми́лость Твоя́ на нас, я́коже упова́хом на Тя.

Благослове́н еси́, Го́споди, научи́ мя оправда́нием Твои́м. (Три́жды)

Го́споди, прибе́жище был еси́ нам в род и род. Аз рех: Го́споди, поми́луй мя, исцели́ ду́шу мою́, я́ко согреши́х Тебе́. Го́споди, к Тебе́ прибего́х, научи́ мя твори́ти во́лю Твою́, я́ко Ты еси́ Бог мой: я́ко у Тебе́ исто́чник живота́, во све́те Твое́м у́зрим свет. Проба́ви ми́лость Твою́ ве́дущим Тя.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Три́жды)

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Святы́й Безсме́ртный, поми́луй нас.

Святы́й Бо́же, Святы́й Кре́пкий, Святы́й Безсме́ртный, поми́луй нас.

Тропа́рь, глас 4:

Суеты́ земна́го ми́ра отве́ргшися, / кре́ст жития́ бездо́мнаго во стра́нничестве прия́ла еси́, / скорбе́й, лише́ний, людска́го осмея́ния не убоя́лася еси́, / любо́вь же Христо́ву позна́ла еси́, / е́юже ны́не на небеси́ услажда́ешися, / Ксе́ние блаже́нная, богому́драя, / моли́ся о спасе́нии ду́ш на́ших.

Утверди́, Бо́же, святу́ю правосла́вную ве́ру, правосла́вных христиа́н во век ве́ка.

Честне́йшую Херуви́м и Сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу, Тя велича́ем.

Сла́ва, и ны́не. Го́споди, поми́луй. (Три́жды) Благослови́.

Господи Иисусе Христе, Сыне Божий, моли́твами Пречи́стыя Своея́ Ма́тере, святой блаженной Ксении Петербургской, преподобных и богоносных отец наших и всех святы́х, поми́луй и спаси нас я́ко Благ и Челове́колюбец.

Многоле́тие:

Вели́каго Господи́на и Отца́ на́шего Кири́лла,/ Святе́йшаго Патри́арха Моско́вского и всея́ Руси́,/ и Господи́на на́шего (Высоко-) Преосвяще́ннейшаго (имярек),/ (архи-)епи́скопа (митрополита (титул)),/ богохрани́мую страну́ на́шу Росси́йскую,/  и вся правосла́вныя христи́аны,// Го́споди, сохрани́ их на мно́гая ле́та.