Шрифт

▲

Богослужебные тексты для домашнего употребления

Дни памяти святых

Последование Всеношного бдения в день памяти святителя Макария, митрополита Московского. Для домашнего (келейного) совершения

Оглавление

ВСЕНО́ЩНОЕ БДЕ́НИЕ

ВЕЛИ́КАЯ ВЕЧЕ́РНЯ

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас. Ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Трижды.)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, (трижды). Сла́ва, и ны́не:

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Таже, Го́споди, поми́луй, (12), Сла́ва, и ны́не:

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 103:

Поется часть псалма:

Благослови́, душе́ моя́, Го́спода. / Благослове́н еси́, Го́споди. / Го́споди, Бо́же мой, возвели́чился еси́ зело́. / Благослове́н еси́, Го́споди. / Во испове́дание и в велеле́поту обле́клся еси́. / Благослове́н еси́, Го́споди. / Посреде́ гор про́йдут во́ды. / Ди́вна дела́ Твоя́, Го́споди. / Вся прему́дростию сотвори́л еси́. / Сла́ва Ти, Го́споди, сотвори́вшему вся.

Или читается псалом полностью:

Благослови́, душе́ моя́, Го́спода. Го́споди, Бо́же мой, возвели́чился еси́ зело́. Во испове́дание и в велеле́поту обле́клся еси́. Одея́йся све́том, я́ко ри́зою, простира́яй не́бо, я́ко ко́жу. Покрыва́яй вода́ми превы́спренняя Своя́, полага́яй о́блаки на восхожде́ние Свое́, ходя́й на крилу́ ве́треню. Творя́й А́нгелы Своя́ ду́хи и слуги́ Своя́ пла́мень о́гненный. Основа́яй зе́млю на тве́рди ея́, не преклони́тся в век ве́ка. Бе́здна, я́ко ри́за, одея́ние ея́, на гора́х ста́нут во́ды, от запреще́ния Твоего́ побе́гнут, от гла́са гро́ма Твоего́ убоя́тся. Восхо́дят го́ры и нисхо́дят поля́ в ме́сто, е́же основа́л еси́ им. Преде́л положи́л еси́, eго́же не пре́йдут, ниже́ обратя́тся покры́ти зе́млю. Посыла́яй исто́чники в де́брех, посреде́ гор про́йдут во́ды. Напая́ют вся зве́ри се́льныя, ждут она́гри в жа́жду свою́. На ты́х пти́цы небе́сныя привита́ют, от среды́ ка́мения дадя́т глас. Напая́яй го́ры от превы́спренних Свои́х, от плода́ дел Твои́х насы́тится земля́. Прозяба́яй траву́ ското́м, и злак на слу́жбу челове́ком, извести́ хлеб от земли́. И вино́ весели́т се́рдце челове́ка, ума́стити лице́ еле́ем, и хлеб се́рдце челове́ка укрепи́т. Насы́тятся древа́ польска́я, ке́дри Лива́нстии, и́хже еси́ насади́л. Та́мо пти́цы вогнездя́тся, ероди́ево жили́ще предводи́тельствует и́ми. Го́ры высо́кия еле́нем, ка́мень прибе́жище за́яцем. Сотвори́л есть луну́ во времена́, со́лнце позна́ за́пад свой. Положи́л еси́ тму, и бысть нощь, в не́йже про́йдут вси зве́рие дубра́внии. Ски́мни рыка́ющии, восхи́тити и взыска́ти от Бо́га пи́щу себе́. Возсия́ со́лнце и собра́шася и в ло́жах свои́х ля́гут. Изы́дет челове́к на де́ло свое́ и на де́лание свое́ до ве́чера. Я́ко возвели́чишася дела́ Твоя́, Го́споди, вся прему́дростию сотвори́л еси́, испо́лнися земля́ тва́ри Твоея́. Сие́ мо́ре вели́кое и простра́нное, та́мо га́ди, и́мже несть числа́, живо́тная ма́лая с вели́кими, та́мо корабли́ препла́вают, змий сей, eго́же созда́л еси руга́тися eму́. Вся к Тебе́ ча́ют, да́ти пи́щу им во бла́го вре́мя. Да́вшу Тебе́ им соберу́т, отве́рзшу Тебе́ ру́ку вся́ческая испо́лнятся бла́гости, отвра́щшу же Тебе́ лице́, возмяту́тся, отъи́меши дух их, и исче́знут, и в персть свою́ возвратя́тся. По́слеши Ду́ха Твоего́, и сози́ждутся, и обнови́ши лице́ земли́. Бу́ди сла́ва Госпо́дня во ве́ки, возвесели́тся Госпо́дь о де́лех Свои́х, призира́яй на зе́млю, и творя́й ю́ трясти́ся, прикаса́яйся гора́м, и дымя́тся. Воспою́ Го́сподеви в животе́ мое́м, пою́ Бо́гу моему́, до́ндеже есмь, да услади́тся Ему́ бесе́да моя́, аз же возвеселю́ся о Го́споде. Да исче́знут гре́шницы от земли́, и беззако́нницы, я́коже не бы́ти им. Благослови́, душе́ моя́, Го́спода.

Со́лнце позна́ за́пад свой. Положи́л еси́ тму, и бысть нощь. Я́ко возвели́чишася дела́ Твоя́, Го́споди, вся прему́дростию сотвори́л еси́.

Сла́ва, и ны́не: Аллилу́иа, аллилу́иа, аллилу́иа, сла́ва Тебе́ Бо́же. Трижды.

Блаже́н муж:

Блаже́н муж, и́же не и́де на сове́т нечести́вых.

Аллилу́иа, аллилу́иа, аллилу́иа.

Я́ко весть Госпо́дь путь пра́ведных, и путь нечести́вых поги́бнет.

Аллилу́иа, аллилу́иа, аллилу́иа.

Рабо́тайте Го́сподеви со стра́хом и ра́дуйтеся Ему́ с тре́петом.

Аллилу́иа, аллилу́иа, аллилу́иа.

Блаже́ни вси наде́ющиися Нань.

Аллилу́иа, аллилу́иа, аллилу́иа.

Воскресни́, Го́споди, спаси́ мя, Бо́же мой.

Аллилу́иа, аллилу́иа, аллилу́иа.

Госпо́дне есть спасе́ние, и на лю́дех Твои́х благослове́ние Твое́.

Аллилу́иа, аллилу́иа, аллилу́иа.

Сла́ва Отцу́ и Сы́ну и Свято́му Духу.

Аллилу́иа, аллилу́иа, аллилу́иа.

И ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Го́споди, воззва́х, глас 1:

Го́споди, воззва́х к Тебе́, услы́ши мя./ Услы́ши мя, Го́споди./ Го́споди, воззва́х к Тебе́, услы́ши мя:/ вонми́ гла́су моле́ния моего́,/ внегда́ воззва́ти ми к Тебе́.// Услы́ши мя, Го́споди.

Да испра́вится моли́тва моя́,/ я́ко кади́ло пред Тобо́ю,/ воздея́ние руку́ мое́ю/ – же́ртва вече́рняя.// Услы́ши мя, Го́споди.

Стихи́ры пра́здника, глас 1:

Стих: А́ще беззако́ния на́зриши, Го́споди, Го́споди, кто постои́т? Я́ко у Тебе́ очище́ние есть.

Блаже́нства вои́стинну святы́х, / и́хже просла́вил еси́, / о́тче святи́телю Мака́рие, / дости́гл еси́ во Ца́рствии небе́снем, / иде́же ны́не ра́дуяся, / моли́ся о спасе́нии ду́ш на́ших.

Стих: И́мене ра́ди Твоего́ потерпе́х Тя, Го́споди, потерпе́ душа́ моя́ в сло́во Твое́, упова́ душа́ моя́ на Го́спода.

Стих: От стра́жи у́тренния до но́щи, от стра́жи у́тренния да упова́ет Изра́иль на Го́спода.

Блаже́нства и ча́сти пра́ведных, / с ни́миже сочета́лся еси́, / о́тче святи́телю Мака́рие, / вкуси́л еси́ во Ца́рствии небе́снем, / иде́же ны́не насыща́яся, / моли́ся о спасе́нии ду́ш на́ших.

Стих: Я́ко у Го́спода ми́лость, и мно́гое у Него́ избавле́ние, и Той изба́вит Изра́иля от всех беззако́ний eго́.

Стих: Хвали́те Го́спода вси язы́цы, похвали́те Его́ вси лю́дие.

Блаже́нства ева́нгельская, / и́хже на земли́ пропове́дал еси́, / о́тче святи́телю Мака́рие, / обре́л еси́ вои́стинну на небеси́, / иде́же ны́не мздо́ю веселя́ся, / моли́ся о спасе́нии ду́ш на́ших.

Стих: Я́ко утверди́ся ми́лость Его́ на нас, и и́стина Госпо́дня пребыва́ет во век.

Блаже́нство тезоимени́тое, / его́же в житии́ возжеле́л еси́, / о́тче святи́телю Мака́рие, / стяжа́л еси́ в жи́зни ве́чней, / иде́же ны́не поко́яся, / моли́ся о спасе́нии ду́ш на́ших.

Глас 8: Сла́ва Отцу́ и Сы́ну и Свято́му Ду́ху.

Блаже́нный миротво́рец в стране́ Росси́йстей бы́л еси́, о́тче святи́телю Мака́рие, сего́ ра́ди сы́н Бо́жий досто́ин еси́ нарещи́ся на небеси́, иде́же ны́не во сла́ве пребыва́еши, моли́ся при́сно о спасе́нии ду́ш на́ших.

Глас 1: И ны́не и при́сно и во ве́ки веко́в. Ами́нь.

Сла́ва в вы́шних Бо́гу, в Вифлее́ме слы́шу от безпло́тных дне́сь, на земли́ ми́р благоволи́вшему бы́ти. Ны́не Де́ва небе́с ши́рши: возсия́ бо све́т омраче́нным и смире́нныя возвы́си, Ангельски пою́щия: сла́ва в вы́шних Бо́гу.

Све́те Тихи́й:

Све́те Ти́хий святы́я сла́вы Безсме́ртнаго Отца́ Небе́снаго, Свята́го, Блаже́ннаго, Иису́се Христе́! Прише́дше на за́пад со́лнца, ви́девше свет вече́рний, пое́м Отца́, Сы́на и Свята́го Ду́ха, Бо́га. Досто́ин еси́ во вся времена́ пет бы́ти гла́сы преподо́бными, Сы́не Бо́жий, живо́т дая́й; те́мже мир Тя сла́вит.

Пареми́и:

1. При́тчей чте́ние.

Па́мять пра́веднаго с похвала́ми, и благослове́ние Госпо́дне на главе́ его́. Блаже́н челове́к, и́же обре́те прему́дрость, и сме́ртен, и́же уве́де ра́зум. Лу́чше бо сию́ купова́ти, не́жели зла́та и сребра́ сокро́вища. Честне́йшая же е́сть ка́мений многоце́нных, все́ же честно́е недосто́йно ея́ е́сть. Долгота́ бо дне́й и ле́та живота́ в десни́це ея́, в шу́йце же ея́ бога́тство и сла́ва. От у́ст ея́ исхо́дит пра́вда, зако́н же и ми́лость на язы́це но́сит. Послу́шайте у́бо мене́, о ча́да, честна́я бо реку́, и блаже́н челове́к, и́же пути́ моя́ сохрани́т: исхо́ди бо мои́ — исхо́ди живота́, и уготовля́ется хоте́ние от Го́спода. Сего́ ра́ди молю́ ва́с и предлага́ю мо́й гла́с сыново́м челове́ческим. Я́ко а́з, прему́дрость, устро́их сове́т, и ра́зум и смы́сл аз призва́х. Мо́й сове́т и утвержде́ние, мо́й ра́зум, моя́ же кре́пость. Аз мене́ лю́бящия люблю́, и́щущии же мене́ обря́щут благода́ть. Разуме́йте у́бо, незло́бивии, кова́рство, ненака́зании же, прилага́йте сердца́. Послу́шайте мене́ и па́ки, честна́я бо реку́, и отве́рзу от усте́н пра́вая, я́ко и́стине поучи́тся горта́нь мой, ме́рзки же пре́до мно́ю устны́ лжи́выя. С пра́вдою вси́ глаго́лы у́ст мои́х, ничто́же в ни́х стро́потно, ниже́ развраще́нно. Вся́ пра́ва су́ть разумева́ющим и про́ста обрета́ющим ра́зум. Науча́ю бо ва́с и́стине, да бу́дет о Го́споде наде́жда ва́ша, и испо́лнитеся Ду́ха.

2. Прему́дрости Соломо́ни чте́ние

Уста́ пра́веднаго ка́плют прему́дрость, устне́ же муже́й му́дрых ве́дят благода́ть. Уста́ му́дрых поуча́тся прему́дрости, пра́вда же избавля́ет и́х от сме́рти. Сконча́вшуся му́жу пра́ведну, не поги́бнет наде́жда. Сы́н бо пра́веден ражда́ется в живо́т и во благи́х свои́х пло́д пра́вды объи́мет. Све́т пра́ведным всегда́, и от Го́спода обря́щут благода́ть и сла́ву. Язы́к му́дрых до́брая све́сть, и в се́рдце и́х почи́ет му́дрость. Лю́бит Госпо́дь преподо́бная сердца́, прия́тни же Ему́ вси́ непоро́чнии в пути́. Му́дрость Госпо́дня просвеща́ет лице́ разу́мнаго: постига́ет бо жела́ющия ю́, пре́жде да́же разуме́ти ю́, и удо́бь у́зрится от лю́бящих ю́. Утреневавый к не́й не утруди́тся, и бдя́й ея́ ра́ди вско́ре без печа́ли бу́дет. Яко досто́йных ея́ сама́ обхо́дит, и́щущи, и во стезя́х ея́ явля́ется и́м благоприе́мне. Му́дрости никогда́же одоле́ет зло́ба. Си́х ра́ди и рачи́тель бы́х добро́ты ея́, и возлюби́х ю́, и поиска́х от ю́ности моея́. И взыска́х неве́сту привести́ себе́, я́ко все́х Влады́ка возлюби́ ю́. Таи́бница бо е́сть Бо́жия хи́трости и обрета́тельница де́л Его́. Труды́ ея́ су́ть доброде́тели: целому́дрию же и ра́зуму та́ учи́т, пра́вде и му́жеству, и́хже потре́бнее ничто́же е́сть в житии́ челове́ком. Аще же и мно́гаго иску́сства жела́ет кто́, ве́сть дре́вняя, и бы́ти хотя́щая разсмо́трит. Све́сть изви́тия слове́с и разреше́ния гада́ний, зна́мения и чудеса́ проразуме́ет, и сбытия́ време́н и ле́т, и все́м сове́тник е́сть бла́г. Яко безсме́ртие е́сть в не́й и благосла́вие во обще́нии слове́с ея́. Сего́ ра́ди бесе́довах ко Го́споду, и помоли́хся Ему́, и ре́х от всего́ се́рдца моего́: Бо́же отце́в и Го́споди ми́лости, сотвори́вый вся́ сло́вом Твои́м и му́дростию Твое́ю устро́ивый челове́ка, да владе́ет бы́вшими от Тебе́ тварьми́ и да управля́ет ми́р в преподо́бии и пра́вде. Да́ждь ми́ Твои́х Престо́лов приседя́щую прему́дрость и не отлучи́ мене́ от о́трок Твои́х, я́ко а́з ра́б Тво́й и сы́н рабы́ни Твоея́. Посли́ ю́ с Небе́с от свята́го жили́ща Твоего́ и от Престо́ла сла́вы Твоея́, да, су́щи со мно́ю, научи́т мя́, что́ благоуго́дно е́сть пред Тобо́ю, и наста́вит мя́ в ра́зум, и сохрани́т мя́ в сла́ве свое́й. Помышле́ния бо сме́ртных вся́ боязли́ва и погреши́тельна умышле́ния и́х.

3. Прему́дрости Соломо́ни чте́ние

Похваля́ему пра́веднику, возвеселя́тся лю́дие: безсме́ртие бо е́сть па́мять его́, я́ко от Го́спода познава́ется и от челове́к, и уго́дна Го́сподеви душа́ его́. Возлюби́те у́бо, о му́жие, му́дрость и поживете́: восхощи́те ея́ и нака́зани бу́дете. Нача́ло бо ея́ любы́ и соблюде́ние зако́на. Почти́те прему́дрость, да во ве́ки ца́рствуете. Возвещу́ ва́м и не скры́ю от ва́с та́ин Бо́жиих, я́ко То́й му́дрости наста́вник е́сть, и му́дрых испра́витель, и вся́кому смы́слу и де́лу хитре́ц. И все́м смы́слом научи́т му́дрость, е́сть бо в не́й Ду́х разу́мен и свя́т, и сия́ние све́та присносу́щнаго, и о́браз бла́гости Бо́жия. Та́я дру́ги Бо́жия и проро́ки устроя́ет, благоле́пнейши же е́сть со́лнца и па́че вся́каго сотворе́ния зве́зд, све́ту сосужда́ема, обрета́ется пе́рвейши. Та́я угожда́ющих е́й от боле́зни изба́ви и наста́ви на стези́ пра́выя. Даде́ и́м ра́зум име́ти свя́т, и сохрани́ я́ от ловя́щих, и по́двиг кре́пок подаде́ и́м. Да разуме́ют вси́, я́ко си́льнейши всего́ е́сть благоче́стие, и никогда́же премо́жет зло́ба му́дрости, ниже́ пре́йдет злы́я облича́ющи су́д. Реко́ша же в себе́, помы́сливше непра́ведно: наси́льствуем пра́ведному, и не пощади́м преподо́бства его́, ни усрами́мся седи́н ста́рости многоле́тны. Бу́дет бо на́м кре́пость — зако́н и улови́м пра́веднаго, я́ко неуго́ден на́м е́сть, и проти́вится дело́м на́шим, и поно́сит на́м отпаде́ние зако́на, и облича́ет на́м согреше́ния наказа́ния на́шего. Возвеща́ет на́м ра́зум име́ти Бо́жий, и о́трока Госпо́дня себе́ имену́ет. Бы́сть на́м на обличе́ние помышле́ний на́ших и тя́жек на́м е́сть и ви́димь, я́ко неподо́бно ины́м житие́ его́, и измене́ны стези́ его́. В поруга́ние вмени́хомся ему́, и удаля́ется от путе́й на́ших, я́ко от нечисто́т, и блажи́т после́дняя пра́ведных. Уви́дим у́бо, а́ще словеса́ его́ и́стинна су́ть, иску́сим, я́же сбыва́ются ему́. Руга́нием и му́кою истя́жем его́, да разуме́ем кро́тость его́ и иску́сим беззло́бство его́, сме́ртию безобра́зною осу́дим его́, бу́дет бо посеще́ние от слове́с его́. Сия́ помы́слиша и прельсти́шася, ослепи́ бо я́ зло́ба и́х, и не разуме́ша та́ин Бо́жиих и не разсуди́ша, я́ко Ты́ еси́ Бо́г еди́н, живота́ име́яй и сме́рти вла́сть, и спаса́яй во вре́мя ско́рби, и избавля́яй от вся́каго зла́. Ще́др и Ми́лостив, и дая́й преподо́бным Свои́м благода́ть, и Свое́ю мы́шцею го́рдым противля́яйся.

Го́споди, поми́луй. (Три́жды,)

Сподо́би, Го́споди:

Сподо́би, Го́споди, в ве́чер сей без греха́ сохрани́тися нам. Благослове́н еси́, Го́споди, Бо́же оте́ц на́ших, и хва́льно и просла́влено и́мя Твое́ во ве́ки. Ами́нь.

Бу́ди, Го́споди, ми́лость Твоя́ на нас, я́коже упова́хом на Тя. Благослове́н еси́, Го́споди, научи́ мя оправда́нием Твои́м. Благослове́н еси́, Влады́ко, вразуми́ мя оправда́нием Твои́м. Благослове́н еси́, Святы́й, просвети́ мя оправда́нии Твои́ми.

Го́споди, ми́лость Твоя́ во век, дел руку́ Твое́ю не пре́зри. Тебе́ подоба́ет хвала́, Тебе́ подоба́ет пе́ние, Тебе́ сла́ва подоба́ет. Отцу́ и Сы́ну и Свято́му Ду́ху, ны́не и при́сно и во ве́ки веко́в. Ами́нь.

Го́споди, поми́луй. (40 раз)

Стихи́ры на стихо́вне:

Стихи́ры: Глас 2:

До́ме Ду́ха Свята́го / и Ца́рствия насле́дниче, / блаже́нства дости́гл еси́, / свя́те Мака́рие, / моли́ся о при́сно сла́вящих тя́.

Стих: Блаже́н му́ж, боя́йся Го́спода, / в за́поведех Его́ восхо́щет зело́.

Блаже́нне и чу́дне, / му́жу жела́ний Госпо́дних / и за́поведей Его́ ревни́телю, / свя́те Мака́рие, / моли́ся о при́сно воспева́ющих тя́.

Стих: Препоясу́яся ору́жием твои́м, и наляцы́, и успева́й, и ца́рствуй / и́стины ра́ди, кро́тости и пра́вды.

Же́зле милосе́рдия, / па́лице благода́ти, / уго́дниче Христо́в, / па́стырю и́стинен, / моли́ся о при́сно блажа́щих тя́.

Слава, глас 2: Собо́р святы́х ру́сских, / и́же тща́нием твои́м, святи́телю, ди́вно просла́влен бы́сть, / с весе́лием вопие́т ти́: / ра́дуйся, Мака́рие, / блаже́нству тезоимени́тый.

И ныне, глас 1:

По о́бразу и по подо́бию, истле́вша преступле́нием, ви́дев Иису́с, приклони́в небеса́, сни́де и всели́ся во утро́бу де́вственную неизме́нно, да в не́й истле́вшаго Ада́ма обнови́т, зову́ща: сла́ва явле́нию Твоему́, Изба́вителю мо́й и Бо́же.

Моли́тва свята́го Симео́на Богоприи́мца:

Ны́не отпуща́еши раба́ Твоего́, Влады́ко,/ по глаго́лу Твоему́, с ми́ром;/ я́ко ви́деста о́чи мои́ спасе́ние Твое́,/ е́же еси́ угото́вал пред лице́м всех люде́й,/ свет во открове́ние язы́ков,// и сла́ву люде́й Твои́х Изра́иля.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Го́споди, поми́луй. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Тропа́рь свята́го, гла́с 4:

Яко вели́ким па́стырем единонра́вна и учи́телем вселе́нныя единомы́сленна, Бо́жия Прему́дрости служи́теля изря́дна, и́же блаже́нству тезоимени́ту, дне́сь, ве́рнии, вси́ воспои́м: Христа́ Бо́га моли́, святи́телю Мака́рие, умири́ти ми́р и спасти́ ду́ши на́ша.

Сла́ва, и ны́не, пра́здника, гла́с то́йже:

Рождество́ Твое́, Христе́ Бо́же наш, возсия́ ми́рови све́т ра́зума, в не́м бо звезда́м служа́щии звездо́ю уча́хуся Тебе́ кла́нятися, Со́лнцу Пра́вды, и Тебе́ ве́дети с высоты́ Восто́ка. Го́споди, сла́ва Тебе́.

Бу́ди И́мя Госпо́дне благослове́но от ны́не и до ве́ка. (Три́жды)

Псало́м 33:

Благословлю́ Го́спода на вся́кое вре́мя,/ вы́ну хвала́ Его́ во усте́х мои́х./ О Го́споде похва́лится душа́ моя́,/ да услы́шат кро́тцыи, и возвеселя́тся./ Возвели́чите Го́спода со мно́ю,/ и вознесе́м И́мя Его́ вку́пе./ Взыска́х Го́спода, и услы́ша мя,/ и от все́х скорбе́й мои́х изба́ви мя./ Приступи́те к Нему́, и просвети́теся,/ и ли́ца ва́ша не постыдя́тся./ Сей ни́щий воззва́, и Госпо́дь услы́ша и́,/ и от все́х скорбе́й его́ спасе́ и́./ Ополчи́тся а́нгел Госпо́день о́крест боя́щихся Его́,/ и изба́вит их./ Вкуси́те и ви́дите, я́ко благ Госпо́дь:/ блаже́н муж, и́же упова́ет Нань./ Бо́йтеся Го́спода, вси́ святи́и Его́,/ я́ко несть лише́ния боя́щимся Его́./ Бога́тии обнища́ша и взалка́ша:/ взыска́ющии же Го́спода// не лиша́тся вся́каго бла́га.

У́ТРЕНЯ.

Шестопса́лмие:

Сла́ва в вы́шних Бо́гу, и на земли́ мир, в челове́цех благоволе́ние. (Три́жды)

Го́споди, устне́ мои́ отве́рзеши, и уста́ моя́ возвестя́т хвалу́ Твою́. (Два́жды)

Псалом 3:

Го́споди, что ся умно́жиша стужа́ющии ми́? Мно́зи востаю́т на мя, мно́зи глаго́лют души́ мое́й: несть спасе́ния eму́ в Бо́зе eго́. Ты же, Го́споди, Засту́пник мой еси́, сла́ва моя́ и вознося́й главу́ мою́. Гла́сом мои́м ко Го́споду воззва́х, и услы́ша мя от горы́ святы́я Своея́. Аз усну́х, и спах, воста́х, я́ко Госпо́дь засту́пит мя. Не убою́ся от тем люде́й, о́крест напа́дающих на мя. Воскресни́, Го́споди, спаси́ мя, Бо́же мой, я́ко Ты порази́л еси́ вся вражду́ющыя ми всу́е: зу́бы гре́шников сокруши́л еси́. Госпо́дне есть спасе́ние, и на лю́дех Твои́х благослове́ние Твое́.

Аз усну́х, и спах, воста́х, я́ко Госпо́дь засту́пит мя.

Псалом 37:

Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́. Я́ко стре́лы Твоя́ унзо́ша во мне, и утверди́л еси́ на мне ру́ку Твою́. Несть исцеле́ния в пло́ти мое́й от лица́ гне́ва Твоего́, несть ми́ра в косте́х мои́х от лица́ грех мои́х. Я́ко беззако́ния моя́ превзыдо́ша главу́ мою́, я́ко бре́мя тя́жкое отяготе́ша на мне. Возсмерде́ша и согни́ша ра́ны моя́ от лица́ безу́мия моего́. Пострада́х и сляко́хся до конца́, весь день се́туя хожда́х. Я́ко ля́двия моя́ напо́лнишася поруга́ний, и несть исцеле́ния в пло́ти мое́й. Озло́блен бых и смири́хся до зела́, рыка́х от воздыха́ния се́рдца моего́. Го́споди, пред Тобо́ю все жела́ние мое́ и воздыха́ние мое́ от Тебе́ не утаи́ся. Се́рдце мое́ смяте́ся, оста́ви мя си́ла моя́, и свет о́чию мое́ю, и той несть со мно́ю. Дру́зи мои́ и и́скреннии мои́ пря́мо мне прибли́жишася и ста́ша, и бли́жнии мои́ отдале́че мене́ ста́ша и нужда́хуся и́щущии ду́шу мою́, и и́щущии зла́я мне глаго́лаху су́етная и льсти́вным весь день поуча́хуся. Аз же я́ко глух не слы́шах и я́ко нем не отверза́яй уст свои́х. И бых я́ко челове́к не слы́шай и не имы́й во усте́х свои́х обличе́ния. Я́ко на Тя, Го́споди, упова́х, Ты услы́шиши, Го́споди Бо́же мой. Я́ко рех: да не когда́ пора́дуют ми ся врази́ мои́: и внегда́ подвижа́тися нога́м мои́м, на мя велере́чеваша. Я́ко аз на ра́ны гото́в, и боле́знь моя́ предо мно́ю есть вы́ну. Я́ко беззако́ние мое́ аз возвещу́ и попеку́ся о гресе́ мое́м. Врази́ же мои́ живу́т и укрепи́шася па́че мене́, и умно́жишася ненави́дящии мя без пра́вды. Воздаю́щии ми зла́я возблага́я оболга́ху мя, зане́ гоня́х благосты́ню. Не оста́ви мене́, Го́споди Бо́же мой, не отступи́ от Мене́. Вонми́ в по́мощь мою́, Го́споди спасе́ния моего́.

Не оста́ви мене́, Го́споди Бо́же мой, не отступи́ от Мене́. Вонми́ в по́мощь мою́, Го́споди спасе́ния моего́.

Псалом 62:

Бо́же, Бо́же мой, к Тебе́ у́тренюю, возжада́ Тебе́ душа́ моя́, коль мно́жицею Тебе́ плоть моя́, в земли́ пу́сте и непрохо́дне, и безво́дне. Та́ко во святе́м яви́хся Тебе́, ви́дети си́лу Твою́ и сла́ву Твою́. Я́ко лу́чши ми́лость Твоя́ па́че живо́т, устне́ мои́ похвали́те Тя. Та́ко благословлю́ Тя в животе́ мое́м, о и́мени Твое́м воздежу́ ру́це мои́. Я́ко от ту́ка и ма́сти да испо́лнится душа́ моя́, и устна́ма ра́дости восхва́лят Тя уста́ моя́. А́ще помина́х Тя на посте́ли мое́й, на у́тренних поуча́хся в Тя. Я́ко был еси́ Помо́щник мой, и в кро́ве крилу́ Твое́ю возра́дуюся. Прильпе́ душа́ моя́ по Тебе́, мене́ же прия́т десни́ца Твоя́. Ти́и же всу́е иска́ша ду́шу мою́, вни́дут в преиспо́дняя земли́, предадя́тся в ру́ки ору́жия, ча́сти ли́совом бу́дут. Царь же возвесели́тся о Бо́зе, похва́лится всяк клены́йся Им, я́ко загради́шася уста́ глаго́лющих непра́ведная.

На у́тренних поуча́хся в Тя. Я́ко был еси́ Помо́щник мой, и в кро́ве крилу́ Твое́ю возра́дуюся. Прильпе́ душа́ моя́ по Тебе́, мене́ же прия́т десни́ца Твоя́.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Го́споди поми́луй. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Псалом 87:

Го́споди Бо́же спасе́ния моего́, во дни воззва́х, и в нощи́ пред Тобо́ю. Да вни́дет пред Тя моли́тва моя́: приклони́ у́хо Твое́ к моле́нию моему́, я́ко испо́лнися зол душа́ моя́, и живо́т мой аду прибли́жися. Привмене́н бых с низходя́щими в ров, бых я́ко челове́к без по́мощи, в ме́ртвых свобо́дь, я́ко я́звеннии спя́щии во гро́бе, и́хже не помяну́л еси́ ктому́, и ти́и от руки́ Твоея́ отринове́ни бы́ша. Положи́ша мя в ро́ве преиспо́днем, в те́мных и се́ни сме́ртней. На мне утверди́ся я́рость Твоя́, и вся во́лны Твоя́ наве́л еси́ на мя. Уда́лил еси́ зна́емых мои́х от Мене́, положи́ша мя ме́рзость себе́: пре́дан бых и не исхожда́х. О́чи мои́ изнемого́сте от нищеты́, воззва́х к Тебе́, Го́споди, весь день, возде́х к Тебе́ ру́це мои́. Еда́ ме́ртвыми твори́ши чудеса́? Или́ вра́чеве воскреся́т, и испове́дятся Тебе́? Еда́ пове́сть кто во гро́бе ми́лость Твою́, и и́стину Твою́ в поги́бели? Еда́ позна́на бу́дут во тьме чудеса́ Твоя́, и пра́вда Твоя́ в земли́ забве́нней? И аз к Тебе́, Го́споди, воззва́х и у́тро моли́тва моя́ предвари́т Тя. Вску́ю, Го́споди, отре́еши ду́шу мою́, отвраща́еши лице́ Твое́ от Мене́? Нищ есмь аз, и в труде́х от ю́ности моея́; возне́с же ся, смири́хся, и изнемого́х. На мне преидо́ша гне́ви Твои́, устраше́ния Твоя́ возмути́ша мя, обыдо́ша мя я́ко вода́, весь день одержа́ша мя вку́пе. Уда́лил еси́ от Мене́ дру́га и и́скренняго, и зна́емых мои́х от страсте́й.

Го́споди Бо́же спасе́ния моего́, во дни воззва́х, и в нощи́ пред Тобо́ю. Да вни́дет пред Тя моли́тва моя́: приклони́ у́хо Твое́ к моле́нию моему́.

Псалом 102:

Благослови́, душе́ моя́, Го́спода, и вся вну́тренняя моя́ и́мя свя́тое Его́. Благослови́, душе́ моя́, Го́спода, и не забыва́й всех воздая́ний Его́, очища́ющаго вся беззако́ния твоя́, исцеля́ющаго вся неду́ги твоя́, избавля́ющаго от истле́ния живо́т твой, венча́ющаго тя ми́лостию и щедро́тами, исполня́ющаго во благи́х жела́ние твое́: обнови́тся я́ко о́рля ю́ность твоя́. Творя́й ми́лостыни Госпо́дь, и судьбу́ всем оби́димым. Сказа́ пути́ Своя́ Моисе́ови, сыново́м Изра́илевым хоте́ния Своя́: Щедр и Ми́лостив Госпо́дь, Долготерпели́в и Многоми́лостив. Не до конца́ прогне́вается, ниже́ во век вражду́ет, не по беззако́нием на́шым сотвори́л есть нам, ниже́ по грехо́м на́шым возда́л есть нам. Я́ко по высоте́ небе́сней от земли́, утверди́л есть Госпо́дь ми́лость Свою́ на боя́щихся Его́. Ели́ко отстоя́т восто́цы от за́пад, уда́лил есть от нас беззако́ния на́ша. Я́коже ще́дрит оте́ц сы́ны, уще́дри Госпо́дь боя́щихся Его́. Я́ко Той позна́ созда́ние на́ше, помяну́, я́ко персть есмы́. Челове́к, я́ко трава́ дни́е eго́, я́ко цвет се́льный, та́ко оцвете́т, я́ко дух про́йде в нем, и не бу́дет, и не позна́ет ктому́ ме́ста своего́. Ми́лость же Госпо́дня от ве́ка и до ве́ка на боя́щихся Его́, и пра́вда Его́ на сыне́х сыно́в, храня́щих заве́т Его́, и по́мнящих за́поведи Его́ твори́ти я́. Госпо́дь на Небеси́ угото́ва Престо́л Свой, и Ца́рство Его́ все́ми облада́ет. Благослови́те Го́спода вси А́нгели Его́, си́льнии кре́постию, творя́щии сло́во Его́, услы́шати глас слове́с Его́. Благослови́те Го́спода вся Си́лы Его́, слуги́ Его́, творя́щии во́лю Его́. Благослови́те Го́спода вся дела́ Его́, на вся́ком ме́сте влады́чества Его́, благослови́, душе́ моя́, Го́спода.

На вся́ком ме́сте влады́чества Его́, благослови́, душе́ моя́, Го́спода.

Псалом 142:

Го́споди, услы́ши моли́тву мою́, внуши́ моле́ние мое́ во и́стине Твое́й, услы́ши мя в пра́вде Твое́й и не вни́ди в суд с рабо́м Твои́м, я́ко не оправди́тся пред Тобо́ю всяк живы́й. Я́ко погна́ враг ду́шу мою́, смири́л есть в зе́млю живо́т мой, посади́л мя есть в те́мных, я́ко ме́ртвыя ве́ка. И уны́ во мне дух мой, во мне смяте́ся се́рдце мое́. Помяну́х дни дре́вния, поучи́хся во всех де́лех Твои́х, в творе́ниих руку́ Твое́ю поуча́хся. Возде́х к Тебе́ ру́це мои́, душа́ моя́, я́ко земля́ безво́дная Тебе́. Ско́ро услы́ши мя, Го́споди, исчезе́ дух мой, не отврати́ лица́ Твоего́ от Мене́, и уподо́блюся низходя́щым в ров. Слы́шану сотвори́ мне зау́тра ми́лость Твою́, я́ко на Тя упова́х. Скажи́ мне, Го́споди, путь во́ньже пойду́, я́ко к Тебе́ взях ду́шу мою́. Изми́ мя от враг мои́х, Го́споди, к Тебе́ прибего́х. Научи́ мя твори́ти во́лю Твою́, я́ко Ты еси́ Бог мой. Дух Твой Благи́й наста́вит мя на зе́млю пра́ву. И́мене Твоего́ ра́ди, Го́споди, живи́ши мя, пра́вдою Твое́ю изведе́ши от печа́ли ду́шу мою́. И ми́лостию Твое́ю потреби́ши враги́ моя́ и погуби́ши вся стужа́ющыя души́ мое́й, я́ко аз раб Твой есмь.

Услы́ши мя, Го́споди, в пра́вде Твое́й и не вни́ди в суд с рабо́м Твои́м.

Дух Твой Благи́й наста́вит мя на зе́млю пра́ву.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Тропа́рь глас 4:

Сла́ва Отцу́ и Сы́ну и Свято́му Ду́ху.

И ны́не и при́сно и во ве́ки веко́в. Ами́нь.

Глас 4: Рождество́ Твое́, Христе́ Бо́же наш, возсия́ ми́рови све́т ра́зума, в не́м бо звезда́м служа́щии звездо́ю уча́хуся Тебе́ кла́нятися, Со́лнцу Пра́вды, и Тебе́ ве́дети с высоты́ Восто́ка. Го́споди, сла́ва Тебе́.

Здесь читается кафизма, положенная по дню, или сразу седальны:

Го́споди, поми́луй. (Три́жды)

Седален, глас 4:

Дне́сь святи́теля Христо́ва Мака́рия пречестна́я па́мять све́тло возсия́ на́м. Сия́нием кни́жных списа́ний просвети́л е́сть ве́рных собо́ры, и ны́не мо́лит Христа́ Бо́га дарова́ти на́м и́стинное ве́дение Его́ Боже́ственных за́поведей.

Сла́ва Отцу́ и Сы́ну и Свято́му Ду́ху. И ны́не и при́сно и во ве́ки веко́в. Ами́нь.

Глас 1: Прему́дрость и ра́зум пре́жде веко́в Сы́й, Сы́н, Единосу́щный Отцу́ и Ду́ху, восхоте́ в после́дняя времена́ роди́тися от Де́вы на́с ра́ди, да спасе́т ми́р от мучи́тельства вра́жия и чужда́го; сла́ва Рожде́нному пло́тию, сла́ва Благоизво́лившему, сла́ва Изба́вльшему на́с Рождество́м Свои́м.

Седален, глас 8:

Да ра́дуется не́бо, земля́ да весели́тся, я́ко роди́ся на земли́ Агнец Бо́жий, подая́й ми́ру избавле́ние: Сло́во, Иже в не́дрех Сы́й Отца́, про́йде из Де́вы без се́мене. Его́же волсви́ дивля́хуся, зря́ще Бо́га во пло́ти, па́стырие же взыва́ху: сла́ва вои́стинну еди́ному Бо́гу.

Сла́ва Отцу́ и Сы́ну и Свято́му Ду́ху. И ны́не и при́сно и во ве́ки веко́в. Ами́нь.

Глас 8: Нетле́нная сла́ва и Боже́ственная, из ложе́сн проше́л еси́ де́вственных и це́лу соблю́л еси́ и Де́ву ро́ждшую, и я́ко престо́л я́сли, в ни́хже роди́вся, почи́л еси́ и красну́ пала́ту верте́п показа́л еси́; поя́ху Тя́ па́стырие я́ко Царя́ все́х, звезда́ же спутеше́ствова Боже́ственный Све́т показа́ти волхво́м. Те́мже вси́ вопие́м Ти́: Влады́ко Христе́ Бо́же, прегреше́ний оставле́ние низпосли́ пра́зднующим ве́рою Твое́ Боже́ственное Рождество́.

Полиеле́й:

Хвали́те И́мя Госпо́дне, хвали́те, раби́ Го́спода.

Аллилу́иа, аллилу́иа, аллилу́иа.

Благослове́н Госпо́дь от Сио́на, живы́й во Иерусали́ме.

Аллилу́иа, аллилу́иа, аллилу́иа.

Испове́дайтеся Го́сподеви, я́ко Благ, я́ко в век ми́лость Его́.

Аллилу́иа, аллилу́иа, аллилу́иа.

Испове́дайтеся Бо́гу Небе́сному, я́ко в век ми́лость Его́.

Аллилу́иа, аллилу́иа, аллилу́иа.

Велича́ние:

Велича́ем тя, / святи́телю о́тче Макарие, / и чтим святу́ю па́мять твою́, / ты бо мо́лиши о нас // Христа́ Бо́га на́шего.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа,// сла́ва Тебе́, Бо́же. (Трижды)

Седа́льны:

Глас 8:

Яко со́лнце пресве́тлое, возсия́л еси́ Ру́сстей земли́ доброде́тельми твои́ми и непоро́чным житие́м, отгоня́я страсте́й омраче́ния, о́тче святи́телю Христо́в. Сего́ ра́ди вопие́м ти́: ра́дуйся, блаже́нне Мака́рие, похвало́ Це́ркве Христо́вы и вели́кий чудотво́рче.

Глас 8: Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Ты́ еси́ Бо́же́ственная се́нь Сло́ва, еди́на Пречи́стая Богома́ти, чистото́ю Ангелы превозше́дшая, очи́сти на́с от грехо́в и вся́кия скве́рны, Богоневе́стная.

Степе́нна, глас 4:

От ю́ности моея́/ мно́зи бо́рют мя стра́сти,/ но Сам мя заступи́// и спаси́, Спа́се мой.

Ненави́дящии Сио́на,/ посрами́теся от Го́спода,/ я́ко трава́ бо огне́м// бу́дете изсо́хше.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Святы́м Ду́хом/ вся́ка душа́ живи́тся,/ и чистото́ю возвыша́ется,// светле́ется Тро́йческим еди́нством, священнота́йне.

Го́споди, поми́луй. (Три́жды)

От Иоа́нна Свята́го Ева́нгелия чте́ние

Сла́ва, Тебе́, Го́споди, сла́ва Тебе́.

Рече́ Госпо́дь ко прише́дшым к Нему́ иуде́ем: ами́нь, ами́нь глаго́лю вам, не входя́й две́рьми во двор о́вчий, но прела́зя и́нуде, той тать есть и разбо́йник. А входя́й две́рьми па́стырь есть овца́м. Сему́ две́рник отверза́ет, и о́вцы глас его́ слы́шат, и своя́ о́вцы глаша́ет по и́мени, и изго́нит их. И егда́ своя́ о́вцы иждене́т, пред ни́ми хо́дит, и о́вцы по нем и́дут, я́ко ве́дят глас его́. По чужде́м же не и́дут, но бежа́т от него́, я́ко не зна́ют чужда́го гла́са. Сию́ при́тчу рече́ им Иису́с, они́ же не разуме́ша, что бя́ше, я́же глаго́лаше им. Рече́ же па́ки им Иису́с: ами́нь, ами́нь глаго́лю вам, я́ко Аз есмь дверь овца́м. Вси, ели́ко их прии́де пре́жде Мене́, та́тие суть и разбо́йницы, но не послу́шаша их о́вцы. Аз есмь дверь, Мно́ю а́ще кто вни́дет, спасе́тся, и вни́дет и изы́дет, и па́жить обря́щет.

Сла́ва, Тебе́, Го́споди, сла́ва Тебе́.

Псало́м 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя. Я́ко беззако́ние мое́ аз зна́ю и грех мой предо мно́ю есть вы́ну. Тебе́ Еди́ному согреши́х, и лука́вое пред Тобо́ю сотвори́х, я́ко да оправди́шися во словесе́х Твои́х и победи́ши, внегда́ суди́ти Ти. Се бо в беззако́ниих зача́т есмь, и во гресе́х роди́ мя ма́ти моя́. Се бо и́стину возлюби́л еси́, безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся, омы́еши мя, и па́че сне́га убелю́ся. Слу́ху моему́ да́си ра́дость и весе́лие, возра́дуются ко́сти смире́нныя. Отврати́ лице́ Твое́ от грех мои́х, и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́, и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́, и Ду́хом Влады́чним утверди́ мя. Научу́ беззако́нныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́, возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо, всесожже́ния не благоволи́ши. Же́ртва Бо́гу дух сокруше́н, се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския, тогда́ благоволи́ши же́ртву пра́вды, возноше́ние и всесожега́емая: тогда́ возложа́т на олта́рь Твой тельцы́.

Глас 6:

Сла́ва Отцу́ и Сы́ну и Свято́му Ду́ху./ Моли́твами первомученика Стефана, / Ми́лостиве, очи́сти / мно́жества согреше́ний на́ших.

И ны́не и при́сно и во ве́ки веко́в. Ами́нь./ Моли́твами Богоро́дицы, / Ми́лостиве, очи́сти / мно́жества согреше́ний на́ших.

Поми́луй мя, Бо́же,/ по вели́цей ми́лости Твое́й,/ и по мно́жеству щедро́т Твои́х// очи́сти беззако́ние мое́.

Стихи́ра, глас 6

Егда́ в нощи́ моля́шеся пречу́дный Мака́рий, тогда́ со тре́петом зря́ше виде́ние стра́шное, и у́жасом одержи́мь, сле́зы источа́я, вопия́ше: о Го́споди, ка́ко мне́ ви́дети сие́? гряде́т нече́стие, кро́ве проли́тие и разделе́ние земли́ Ру́сския; но, о Иису́се, молю́ся приле́жно, пощади́ и, а́ще не поми́луеши, не да́ждь мне́ ви́дети сие́.

Го́споди, поми́луй. (12 раз)

И кано́н святи́теля, гла́с 4.

Пе́снь 1.

Ирмос: Мо́ря чермну́ю пучи́ну невла́жными стопа́ми дре́вний пешеше́ствовав Изра́иль, крестообра́зными Моисе́овыма рука́ма Амали́кову си́лу в пусты́ни победи́л е́сть.

Припев: Святителю отче Макарие, моли Бога о нас.

Вели́кий Царю́, Соде́телю все́х, очи́сти благоутро́бием ду́шу мою́ и отжени́ страсте́й омраче́ния, да возвели́чу, Спа́се, уго́дника Твоего́, святи́теля Мака́рия.

Пра́вды Бо́жия взыску́я, измла́да Христу́ после́дуя, оби́тели преподо́бнаго Пафну́тия дости́гл еси́, свя́те Мака́рие, иде́же мно́гая ле́та во уста́ве пребы́в, житие́ жесто́кое и благо́е вкуси́л еси́.

Ле́ствицею доброде́телей на небеса́ возше́л еси́, те́м и Христо́с тя́, святи́телю, еще́ на земли́ су́ща, в ме́ру во́зраста приведе́ и оби́тели Можа́йския наста́вника поста́ви.

Богородичен:Ни́во духо́вная, я́коже из бразды́ кла́с, изнесла́ еси́ всю́ тва́рь Пита́ющаго вся́чески, Присноде́во.

Пе́снь 3.

Ирмос: Весели́тся о Тебе́ Це́рковь Твоя́, Христе́, зову́щи: Ты́ моя́ кре́пость, Го́споди, и прибе́жище, и утвержде́ние.

Еди́ным по́мыслом к Бо́гу устреми́вся, во оби́телех преподо́бных Пафну́тия и Ферапо́нта пребы́л еси́ во вся́цем воздержа́нии, отону́дуже ко святи́тельству Бо́гом призва́н бы́в, Мака́рие досточу́дне.

Святы́я Це́ркве Нова́града па́стырь и учи́тель бы́л еси́, хра́мы украша́я и духо́вною добро́тою лю́ди исполня́я, преде́лы Нова́града све́том Христо́вы ве́ры просвеща́я, блаже́нне о́тче Мака́рие.

Писания оте́ческая возлюби́л еси́, блаже́нне святи́телю, и це́рковь Прему́дрости Бо́жия свяще́нными ле́потами преукраси́л еси́, возвели́чив ю́ уче́нием богогла́сным.

Богородичен:Ме́ртвости и тли́ изба́вися ро́д челове́чь, естество́м бо Жизнода́вца безсе́менно родила́ еси́, Де́во Всенепоро́чная, во спасе́ние восхваля́ющих Тя́ ве́рно.

Седа́лен, гла́с 1:

Наста́вника и́ночествующих, Пафну́тия преподо́бнаго, блажи́т гра́д Бо́ровск, сла́вит Можа́йск Ферапо́нта блаже́ннаго, Но́вград восхваля́ет Алекса́ндра Сви́рскаго со Ио́ною святи́телем, славосло́вит сла́внейший гра́д Москва́ первопресто́льника Ио́ну со ины́ми чудотво́рцы, ты́ же от все́х си́х вку́пе славосло́вие прие́млеши, Мака́рие чу́дне.

Сла́ва, и ны́не:

Патриа́рх Иа́ков, я́сно прови́дев, Спа́се, вели́чия строе́ния Твоего́, вопия́ше ду́хом ко Иу́де, глаго́ля та́йно: от ле́торасли возше́л еси́, сы́не мо́й, возвеща́я Тя́ от Де́вы Бо́га.

Пе́снь 4.

Ирмос: Любве́ ра́ди, Ще́дре, Твоего́ о́браза на Кресте́ Твое́м ста́л еси́, и раста́яшася язы́цы, Ты́ бо еси́, Человеколю́бче, кре́пость моя́ и хвале́ние.

Тро́ицу — Отца́, Сы́на и Свята́го Ду́ха, апостольски пропове́дати повеле́л еси́, непросвеще́нную ло́пь и ины́я се́верныя язы́ки ко Христу́ приве́л еси́, низверга́я бесо́вская тре́бища, и на́с просвети́, святи́телю, све́том и́стиннаго позна́ния.

Имя твое́, вели́кия доброде́тели ра́ди, всю́ду пропове́дано бы́сть, я́ко из са́мыя Святы́я Земли́, иде́же Госпо́дь на́ш пло́тию ра́спят бы́сть, свя́ще́нныя да́ры прия́ти сподо́бился еси́, на́м же моли́, о́тче Мака́рие, Небе́снаго Иерусали́ма дости́гнути.

Архипа́стырски труди́вся, Бо́жиим про́мыслом прее́мник и насле́дник Моско́вских святи́телей бы́ти сподо́бился еси́, иде́же чу́дными доброде́тельми украси́лся еси́.

Богородичен:Ада́м свободи́ся, и Ева лику́ет, и вопию́т ду́хом к Тебе́, Богоро́дице: Тобо́ю изба́вихомся перворо́дныя кля́твы, я́вльшуся Христу́.

Пе́снь 5

Ирмос: Ты́, Го́споди, мо́й Све́т, в ми́р прише́л еси́, Све́т Святы́й, обраща́яй из мра́чна неве́дения ве́рою воспева́ющия Тя́.

Моско́вскаго престо́ла украше́ние ди́вное бы́л еси́, святи́телю, те́мже и лю́дие вси́ чу́дна нареко́ша тя́, с ни́миже и мы́ ны́не пра́зднующе па́мять твою́, согла́сно тя́ велича́ем.

Иже добро́те церко́вней поревнова́в, вели́кия и ди́вныя собо́ры созва́л еси́, и́миже но́вым чудотво́рцем земли́ Росси́йския пра́зднование утверди́ся, и та́ко Це́рковь Ру́сская просия́ по́двиги ча́д свои́х, я́коже пе́рлы драгоце́нными.

Всея́ земли́ Ру́сския благоче́стие пости́гл еси́, о́тче Мака́рие, мучениколю́бче преизря́дне, я́ко пчела́, отовсю́ду духо́вное сокро́вище собра́в, и я́ко же́ртву благоприя́тную на све́щнице церко́вней возже́гл еси́.

Богородичен:Руно́ ороше́нное, Де́во, пла́мень грехо́в мои́х угаси́, Купино́ неопали́мая, страсте́й мои́х те́рние попали́, подаю́щи ми́ на воде́ упокое́ния жи́ти, и гее́нскаго мя́ огня́ свободи́.

Пе́снь 6.

Ирмос: Пожру́ Ти со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею кро́вию.

Си́м же о́бразом, я́ко святи́и ди́вно просла́влени бы́ша, си́це ре́вностно потща́лся еси́, святи́телю, собесе́дник благочести́вых муже́й бы́ти, о́вых у́бо оби́тели стро́ити благослови́вый, о́вым потре́бная подава́я, ины́х же Христа́ пропове́дати посыла́я, блаже́ннаго же Васи́лия Моско́вскаго свои́ма рука́ма погребсти́ сподо́бивыйся, с ни́миже моли́ спа́сти́ся душа́м на́шим.

Всем о́браз ве́ры и воздержа́ния яви́лся еси́, о ста́де Христо́ве попече́ние неле́ностное име́я, Моско́вскаго первопресто́льнаго гра́да и всея́ Росси́йския земли́ утвержде́ние, Мака́рие боголюби́ве, моли́ спа́сти́ся душа́м на́шим.

Тро́ицкия оби́тели настоя́теля высо́ким са́ном почти́л еси́, поста́вив ю́ превы́ше все́х, те́мже любо́вь к Се́ргию преподо́бному показу́я и гряду́щая святы́я оби́тели предначертава́я. Мы́ же, святи́телю, дивя́щеся твое́й прему́дрости, взыва́ем: моли́ спа́сти́ся душа́м на́шим.

Богородичен:Ле́ствице небе́сная и Голуби́це неземна́я, вси́ ро́ди ве́рных согла́сно Тя́ ублажа́ют, я́ко Богоневе́стную Ма́терь Христа́ Бо́га на́шего.

Конда́к, гла́с 3:

Богому́дрым уче́нием и кни́жным списа́нием потща́лся еси́, святи́телю Мака́рие, лю́ди росси́йския просвети́ти и святы́х земли́ на́шея просла́вити. Сего́ ра́ди чу́ден пронарече́ся, прее́мниче первопресто́льников росси́йских, моли́ сохрани́тися на́м в ве́ре и благоче́стии невреди́мо.

Икос:

Па́влову словеси́ поревнова́в, святи́телю Мака́рие, пе́сньми почти́л еси́ росси́йских па́стырей, учи́телей и наста́вников, приснобдя́щих пред престо́лом Небе́снаго Ца́ря́ о на́шем оте́честве, с ни́миже ра́дуяся ны́не, моли́ Христа́ Бо́га сохрани́тися на́м в ве́ре и благоче́стии невреди́мо.

Пе́снь 7.

Ирмос: В пещи́ авраа́мстии о́троцы перси́дстей, любо́вию благоче́стия па́че, не́жели пла́менем, опаля́еми, взыва́ху: благослове́н еси́ в хра́ме сла́вы Твоея́, Го́споди.

Вре́дная и пагубная ерети́ческих шата́ний собо́рне осуди́л еси́, святи́телю Христо́в, все́х же правосла́вных в ве́ре в Тро́ицу Единосу́щную укрепи́л еси́, пред святы́ми ико́нами воспева́ющих: бла́гослове́н еси́ в хра́ме сла́вы Твоея́, Го́споди.

Изнесе́ тя, святи́телю, земля́ Ру́сская побо́рника ве́ры и благоче́стия, ревни́теля оте́ческих преда́ний и утвержде́ний, да научи́ши на́с взыва́ти: бла́гослове́н еси́ в хра́ме сла́вы Твоея́, Го́споди.

Смире́н, кро́ток и ми́лостив бы́л еси́, святи́телю, отроча́ нра́вом обрета́яся и соверше́н бы́в ра́зумом. Мы́ же, дивя́щеся твои́м доброде́телем и по́двигом, взыва́ем: бла́гослове́н еси́ в хра́ме сла́вы Твоея́, Го́споди.

Богородичен:Яко еди́ну преесте́ственно па́че челове́ка благода́ть во Твою́ утро́бу прие́мшую, без истле́ния нетле́нно ро́ждшую Христа́ Бо́га на́шего, при́сно Тя́ сла́вим.

Пе́снь 8.

Ирмос: Ру́це распросте́р, Дании́л, льво́в зия́ния в ро́ве затче́; о́гненную же си́лу угаси́ша, доброде́телию препоя́савшеся, благоче́стия рачи́тели, о́троцы, взыва́юще: благослови́те, вся́ дела́ Госпо́дня, Го́спода.

Пе́ние сие́ на́ше ску́дное и похвале́ние недосто́йное приими́, чу́дне Мака́рие, да не вотще́ взыва́ем к престо́лу Всевы́шняго: бла́гослови́те, вся дела́ Госпо́дня, Го́спода.

Вели́кая дея́ния твоя́ о прославле́нии святы́х и просвеще́нии наро́да ру́сскаго подвиза́ют, досточу́дне Мака́рие, на́с немо́лчно пе́ти Бо́гу: бла́гослови́те, вся дела́ Госпо́дня, Го́спода.

Похвалу́ вели́кую Бо́гу возда́л еси́, всеблаже́нне, о просвеще́нии неве́рнаго гра́да Каза́ни, ему́же святи́теля Гу́рия поста́вил еси́, те́мже ру́сстии лю́дие о такове́й Бо́жией ми́лости ра́достию возопи́ша: бла́гослови́те, вся дела́ Госпо́дня, Го́спода.

Богородичен:Чу́дному благове́щению удиви́ся Пречи́стая Де́ва, неискусому́жному рождеству́ Ея́ возра́довахуся па́стырие, собо́ри ве́рных дивя́тся успе́нию Ея́ сла́вному, вопию́ще: бла́гослови́те, вся дела́ Госпо́дня, Го́спода.

На 9-й песни поем песнь Пресвятыя Богородицы:

Вели́чит душа́ Моя́ Го́спода и возра́довася дух Мой о Бо́зе Спа́се Мое́м.

К коемуждо стиху припеваем: Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Я́ко призре́ на смире́ние рабы́ Своея́, се бо, от ны́не ублажа́т Мя вси ро́ди.

Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Я́ко сотвори́ Мне вели́чие Си́льный, и свя́то и́мя Его́, и ми́лость Его́ в ро́ды родо́в боя́щимся Его́.

Сотвори́ держа́ву мы́шцею Свое́ю, расточи́ го́рдыя мы́слию се́рдца их.

Низложи́ си́льныя со престо́л, и вознесе́ смире́нныя, а́лчущия испо́лни благ, и богатя́щияся отпусти́ тщи.

Восприя́т Изра́иля о́трока Своего́, помяну́ти ми́лости, я́коже глаго́ла ко отце́м на́шим, Авраа́му и се́мени его́ да́же до ве́ка.

Пе́снь 9.

Ирмос: Ка́мень нерукосе́чный от несеко́мыя горы́, Тебе́, Де́во, краеуго́льный отсече́ся — Христо́с, совокупи́вый разстоя́щаяся естества́. Те́м, веселя́щеся, Тя́, Богоро́дице, велича́ем.

Мака́рия Вели́каго и́мя носи́л еси́, его́ житию́ после́дуя в посте́ и по́двизех, воздержа́нии и кро́тости, те́м тя́, святи́телю, велича́ем.

Ри́зами погреба́льными оде́яну и на сме́ртнем одре́ ти лежа́щу, собо́р наро́да мно́жества, ви́девше тя́ не я́ко ме́ртва, но спя́ща, ли́к же тво́й, я́ко све́том, сия́ющь, удиви́шася и сла́ву возда́ша Всеси́льному Бо́гу, прославля́ющему уго́дники Своя.

Богородичен:Юже иногда́ Иа́ков ви́де, чу́дную ле́ствицу, от земли́ просте́рту к небе́сней высоте́, испове́даем Тя́, Пречи́стая Богоро́дице: Тобо́ю бо земна́я и небе́сная о́бщницы яви́шася.

Свети́лен:

Све́том благода́ти просвеще́н бы́л еси́, святи́телю Мака́рие, росси́йских уго́дников и моли́твенников на́ших пе́сньми све́тло просла́вил еси́, с ни́миже во све́тлостех святы́х веселя́ся ны́не, моли́ Христа́ Бо́га спасти́ся душа́м на́шим.

Хвали́тны псалмы́, глас 6:

Вся́кое дыха́ние да хва́лит Го́спода./ Хвали́те Го́спода с небе́с,/ хвали́те Его́ в вы́шних.// Тебе́ подоба́ет песнь Бо́гу.

Хвали́те Его́ вси а́нгели Его́,/ хвали́те Его́ вся си́лы Его́.// Тебе́ подоба́ет песнь Бо́гу.

Сти́хиры, глас 6:

Стих: Сотвори́ти в них суд напи́сан/ сла́ва сия́ бу́дет всем преподо́бным Его́.

Блаже́н и ми́лостив / архиере́й яви́лся еси́, / о́тче святи́телю Мака́рие, / предста́л еси́ поми́лован престо́лу Бо́жию, / иде́же со все́ми святы́ми / Бо́га в Тро́ице восхваля́еши.

Стих: Хвали́те Его́ на си́лах Его́,/ хвали́те Его́ по мно́жеству вели́чествия Его́.

Блаже́н и кро́ток / па́стырь ове́ц духо́вных бы́л еси́, / о́тче святи́телю Мака́рие, / насле́довал еси́ па́жити вечныя, / иде́же со святы́ми земли́ на́шея / Го́спода си́л прославля́еши.

Стих: Хвали́те Его́ в тимпа́не и ли́це,/ хвали́те Его́ во стру́нах и орга́не.

Блаже́н и чи́ст се́рдцем, / и́мже Бо́га узре́л еси́, / о́тче святи́телю Мака́рие, / сподо́бился еси́ красоты́ ра́йския, / иде́же с ли́ки Ангельскими / Отца́ све́тов сла́виши.

Стих: Хвали́те Его́ в кимва́лех доброгла́сных, хвали́те Его́ в кимва́лех восклица́ния. / Вся́кое дыха́ние да хва́лит Го́спода.

Блаже́нства зре́лый кла́с, / его́же нището́ю ду́ха возрасти́л еси́, / о́тче святи́телю Мака́рие, / пожа́л еси́ во Ца́рствии небе́снем, / к сему́ же бога́тству нетле́нному / и на́с, земноро́дных, призыва́еши.

Глас 2: Сла́ва Отцу́ и Сы́ну и Свято́му Ду́ху

Па́стырю до́брый, святи́телю Христо́в Мака́рие чу́дный, бла́гоче́стия сто́лп бы́л еси́, мно́гими доброде́тельми украси́вся: собесе́дниче святы́х муже́й, кни́жниче прему́дрый, иконопи́сче наро́читый, просвети́телю изря́дный, ересе́й искорени́телю, моли́твенниче неле́ностный, моли́ спа́сти́ся душа́м на́шим.

Глас 6: И ны́не и при́сно и во ве́ки веко́в. Ами́нь.

Со́лнце, Сы́не, ка́ко Тя́ скры́ю пелена́ми? Ка́ко Тя́ млеко́м воздою́, всего́ естества́ Пита́теля? Ка́ко Тя́ рука́ми держу́, держа́щаго вся́ческая? Ка́ко на Тебе́ без стра́ха воззрю́, на Него́же не сме́ют зре́ти многоочи́тии? — Неискусобра́чная, Христа́ держа́щи, веща́ше.

Славосло́вие вели́кое:

Сла́ва в вы́шних Бо́гу, и на земли́ мир, в челове́цех благоволе́ние. Хва́лим Тя, благослови́м Тя, кла́няем Ти ся, славосло́вим Тя, благодари́м Тя, вели́кия ра́ди сла́вы Твоея́. Го́споди Царю́ Небе́сный, Бо́же О́тче Вседержи́телю, Го́споди, Сы́не Единоро́дный, Иису́се Христе́, и Святы́й Ду́ше. Го́споди Бо́же, А́гнче Бо́жий, Сы́не Оте́чь, взе́мляй грех ми́ра, поми́луй нас; взе́мляй грехи́ ми́ра, приими́ моли́тву на́шу; седя́й одесну́ю Отца́, поми́луй нас. Я́ко Ты еси́ еди́н Свят, Ты еси́ еди́н Госпо́дь, Иису́с Христо́с, в сла́ву Бо́га Отца́. Ами́нь.

На всяк день благословлю́ Тя, и восхвалю́ И́мя Твое́ во ве́ки, и в век ве́ка.

Сподо́би, Го́споди, в день сей без греха́ сохрани́тися нам. Благослове́н еси́, Го́споди, Бо́же оте́ц на́ших, и хва́льно и просла́влено И́мя Твое́ во ве́ки. Ами́нь.

Бу́ди, Го́споди, ми́лость Твоя́ на нас, я́коже упова́хом на Тя.

Благослове́н еси́, Го́споди, научи́ мя оправда́нием Твои́м. (Три́жды)

Го́споди, прибе́жище был еси́ нам в род и род. Аз рех: Го́споди, поми́луй мя, исцели́ ду́шу мою́, я́ко согреши́х Тебе́. Го́споди, к Тебе́ прибего́х, научи́ мя твори́ти во́лю Твою́, я́ко Ты еси́ Бог мой: я́ко у Тебе́ исто́чник живота́, во све́те Твое́м у́зрим свет. Проба́ви ми́лость Твою́ ве́дущим Тя.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Три́жды)

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Святы́й Безсме́ртный, поми́луй нас.

Святы́й Бо́же, Святы́й Кре́пкий, Святы́й Безсме́ртный, поми́луй нас.

Тропа́рь свята́го, гла́с 4:

Утверди́, Бо́же, святу́ю правосла́вную ве́ру, правосла́вных христиа́н во век ве́ка.

Честне́йшую Херуви́м и Сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу, Тя велича́ем.

Сла́ва, и ны́не. Го́споди, поми́луй. (Три́жды) Благослови́.

Господи Иисусе Христе, Сыне Божий, моли́твами Пречи́стыя Своея́ Ма́тере, святителя Макария, митрополита Московского, преподобных и богоносных отец наших и всех святы́х, поми́луй и спаси нас я́ко Благ и Челове́колюбец.

Многоле́тие:

Вели́каго Господи́на и Отца́ на́шего Кири́лла,/ Святе́йшаго Патри́арха Моско́вского и всея́ Руси́,/ и Господи́на на́шего (Высоко-) Преосвяще́ннейшаго (имярек),/ (архи-)епи́скопа (митрополита (титул)),/ богохрани́мую страну́ на́шу Росси́йскую,/ и вся правосла́вныя христи́аны,// Го́споди, сохрани́ их на мно́гая ле́та.