Шрифт

▲

Богослужебные тексты для домашнего употребления

Дни памяти святых

Последование Всеношного бдения в день памяти святого праведного Иоанна Кронштадтского. Для домашнего (келейного) совершения

Оглавление

ВСЕНО́ЩНОЕ БДЕ́НИЕ

ВЕЛИ́КАЯ ВЕЧЕ́РНЯ

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас. Ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Трижды.)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, (трижды). Сла́ва, и ны́не:

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Таже, Го́споди, поми́луй, (12), Сла́ва, и ны́не:

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 103:

Поется часть псалма:

Благослови́, душе́ моя́, Го́спода. / Благослове́н еси́, Го́споди. / Го́споди, Бо́же мой, возвели́чился еси́ зело́. / Благослове́н еси́, Го́споди. / Во испове́дание и в велеле́поту обле́клся еси́. / Благослове́н еси́, Го́споди. / Посреде́ гор про́йдут во́ды. / Ди́вна дела́ Твоя́, Го́споди. / Вся прему́дростию сотвори́л еси́. / Сла́ва Ти, Го́споди, сотвори́вшему вся.

Или читается псалом полностью:

Благослови́, душе́ моя́, Го́спода. Го́споди, Бо́же мой, возвели́чился еси́ зело́. Во испове́дание и в велеле́поту обле́клся еси́. Одея́йся све́том, я́ко ри́зою, простира́яй не́бо, я́ко ко́жу. Покрыва́яй вода́ми превы́спренняя Своя́, полага́яй о́блаки на восхожде́ние Свое́, ходя́й на крилу́ ве́треню. Творя́й А́нгелы Своя́ ду́хи и слуги́ Своя́ пла́мень о́гненный. Основа́яй зе́млю на тве́рди ея́, не преклони́тся в век ве́ка. Бе́здна, я́ко ри́за, одея́ние ея́, на гора́х ста́нут во́ды, от запреще́ния Твоего́ побе́гнут, от гла́са гро́ма Твоего́ убоя́тся. Восхо́дят го́ры и нисхо́дят поля́ в ме́сто, е́же основа́л еси́ им. Преде́л положи́л еси́, eго́же не пре́йдут, ниже́ обратя́тся покры́ти зе́млю. Посыла́яй исто́чники в де́брех, посреде́ гор про́йдут во́ды. Напая́ют вся зве́ри се́льныя, ждут она́гри в жа́жду свою́. На ты́х пти́цы небе́сныя привита́ют, от среды́ ка́мения дадя́т глас. Напая́яй го́ры от превы́спренних Свои́х, от плода́ дел Твои́х насы́тится земля́. Прозяба́яй траву́ ското́м, и злак на слу́жбу челове́ком, извести́ хлеб от земли́. И вино́ весели́т се́рдце челове́ка, ума́стити лице́ еле́ем, и хлеб се́рдце челове́ка укрепи́т. Насы́тятся древа́ польска́я, ке́дри Лива́нстии, и́хже еси́ насади́л. Та́мо пти́цы вогнездя́тся, ероди́ево жили́ще предводи́тельствует и́ми. Го́ры высо́кия еле́нем, ка́мень прибе́жище за́яцем. Сотвори́л есть луну́ во времена́, со́лнце позна́ за́пад свой. Положи́л еси́ тму, и бысть нощь, в не́йже про́йдут вси зве́рие дубра́внии. Ски́мни рыка́ющии, восхи́тити и взыска́ти от Бо́га пи́щу себе́. Возсия́ со́лнце и собра́шася и в ло́жах свои́х ля́гут. Изы́дет челове́к на де́ло свое́ и на де́лание свое́ до ве́чера. Я́ко возвели́чишася дела́ Твоя́, Го́споди, вся прему́дростию сотвори́л еси́, испо́лнися земля́ тва́ри Твоея́. Сие́ мо́ре вели́кое и простра́нное, та́мо га́ди, и́мже несть числа́, живо́тная ма́лая с вели́кими, та́мо корабли́ препла́вают, змий сей, eго́же созда́л еси руга́тися eму́. Вся к Тебе́ ча́ют, да́ти пи́щу им во бла́го вре́мя. Да́вшу Тебе́ им соберу́т, отве́рзшу Тебе́ ру́ку вся́ческая испо́лнятся бла́гости, отвра́щшу же Тебе́ лице́, возмяту́тся, отъи́меши дух их, и исче́знут, и в персть свою́ возвратя́тся. По́слеши Ду́ха Твоего́, и сози́ждутся, и обнови́ши лице́ земли́. Бу́ди сла́ва Госпо́дня во ве́ки, возвесели́тся Госпо́дь о де́лех Свои́х, призира́яй на зе́млю, и творя́й ю́ трясти́ся, прикаса́яйся гора́м, и дымя́тся. Воспою́ Го́сподеви в животе́ мое́м, пою́ Бо́гу моему́, до́ндеже есмь, да услади́тся Ему́ бесе́да моя́, аз же возвеселю́ся о Го́споде. Да исче́знут гре́шницы от земли́, и беззако́нницы, я́коже не бы́ти им. Благослови́, душе́ моя́, Го́спода.

Со́лнце позна́ за́пад свой. Положи́л еси́ тму, и бысть нощь. Я́ко возвели́чишася дела́ Твоя́, Го́споди, вся прему́дростию сотвори́л еси́.

Сла́ва, и ны́не: Аллилу́иа, аллилу́иа, аллилу́иа, сла́ва Тебе́ Бо́же. Трижды.

Блаже́н муж:

Блаже́н муж, и́же не и́де на сове́т нечести́вых.

Аллилу́иа, аллилу́иа, аллилу́иа.

Я́ко весть Госпо́дь путь пра́ведных, и путь нечести́вых поги́бнет.

Аллилу́иа, аллилу́иа, аллилу́иа.

Рабо́тайте Го́сподеви со стра́хом и ра́дуйтеся Ему́ с тре́петом.

Аллилу́иа, аллилу́иа, аллилу́иа.

Блаже́ни вси наде́ющиися Нань.

Аллилу́иа, аллилу́иа, аллилу́иа.

Воскресни́, Го́споди, спаси́ мя, Бо́же мой.

Аллилу́иа, аллилу́иа, аллилу́иа.

Госпо́дне есть спасе́ние, и на лю́дех Твои́х благослове́ние Твое́.

Аллилу́иа, аллилу́иа, аллилу́иа.

Сла́ва Отцу́ и Сы́ну и Свято́му Духу.

Аллилу́иа, аллилу́иа, аллилу́иа.

И ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Го́споди, воззва́х, глас 6:

Го́споди, воззва́х к Тебе́, услы́ши мя./ Услы́ши мя, Го́споди./ Го́споди, воззва́х к Тебе́, услы́ши мя:/ вонми́ гла́су моле́ния моего́,/ внегда́ воззва́ти ми к Тебе́.// Услы́ши мя, Го́споди.

Да испра́вится моли́тва моя́,/ я́ко кади́ло пред Тобо́ю,/ воздея́ние руку́ мое́ю/ – же́ртва вече́рняя.// Услы́ши мя, Го́споди.

Стихи́ры пра́здника, глас 6:

Стих: А́ще беззако́ния на́зриши, Го́споди, Го́споди, кто постои́т? Я́ко у Тебе́ очище́ние есть.

Вся́ жите́йская отло́жше, / еди́неми усты́ восхва́лим / чу́днаго свети́льника земли́ Росси́йския и всея́ вселе́нныя, / па́стыря до́бляго, пресви́тера Иоа́нна, / све́тлый о́браз жи́зни во Христе́ на́м я́вльшаго, / ду́хом моли́твы на земли́ пламене́вшаго, / да́р исцеле́ний сугу́б от Го́спода прия́вшаго; / его́же моли́твами / Христо́с во благоче́стии на́с да утверди́т / и ча́да непоколе́блема Це́ркве на́с яви́т, / во спасе́ние ду́ш на́ших.

Стих: И́мене ра́ди Твоего́ потерпе́х Тя, Го́споди, потерпе́ душа́ моя́ в сло́во Твое́, упова́ душа́ моя́ на Го́спода.

Все́м се́рдцем и умо́м, блаже́нне Иоа́нне, / житие́ во Христе́ возлюби́л еси́, / вся́ богоугожде́нию и му́дрствуя и де́я, / труды́ твоя́ бога́тно свяще́нства благода́тию уплодоноси́л еси́, / на ве́чери Госпо́дней, я́ко на небеси́, / восхище́нным ду́хом со умиле́нными слеза́ми / олтарю́ Госпо́дню де́нь от дне́ предстоя́л еси́; / и ны́не, в вы́шних предстоя́й Святе́й Тро́ице, / моли́твы вознеси́, / да ми́р умири́т и спасе́т ду́ши на́ша.

Стих: От стра́жи у́тренния до но́щи, от стра́жи у́тренния да упова́ет Изра́иль на Го́спода.

Путе́м трезве́ния духо́внаго, благогове́ния, / та́ин Бо́жиих созерца́ния, / исправле́ния душе́внаго и поко́я в Бо́зе / черто́га небе́снаго дости́гл еси́; / дея́ньми милосе́рдия и чуде́с твои́х Це́рковь украша́ется, / чистото́ю жития́ твоего́ нече́стие посрамля́ется, / словесы́ твои́х писа́ний ве́ра утвержда́ется; / те́мже мо́лим тя́, всече́стне Иоа́нне: / путево́ждь на́м бу́ди в на́ших обстоя́ниих, / да тобо́ю наставля́еми и заступа́еми, / Ца́рствия небе́снаго сподо́бимся.

Стих: Я́ко у Го́спода ми́лость, и мно́гое у Него́ избавле́ние, и Той изба́вит Изра́иля от всех беззако́ний eго́.

Все́м се́рдцем боле́знуя о тьме́ язы́ков, / мы́слил еси́ пе́рвее ити́ в восто́чныя страны́, / зря́ же па́че ги́блемь бли́з сы́й Кроншта́дт, / повину́лся еси́ свы́ше зо́ву, / виде́нием хра́ма не́когда во сне́, / Иоа́нне пра́ведне. / — Зна́ю, ре́кл еси́, свяще́нства высоту́, / упова́ю же на Бо́га, / ве́м бо я́ко То́й е́сть кре́пость моя́. / — О, любве́ Боже́ственная си́ла, / ко Христу́ влеку́щая и утвержда́ющая!

Стих: Хвали́те Го́спода вси язы́цы, похвали́те Его́ вси лю́дие.

Все́х вмести́вый в се́рдце па́стырском, / обязу́я стру́пы нищеты́, / зва́л еси́ усты́ твои́ми и писа́ньми / к созида́нию жили́ща трудолю́бия, / да прибе́жище обря́щут в не́м убо́зии. / О, учи́телю благи́х от ве́ры де́л! / О, пита́телю ду́ш и теле́с убо́гих, / Иоа́нне, ра́досте отча́явшихся пре́жде! / Попече́ние о си́х зде́ на земли́, / о́браз бы́сть твоего́ заступле́ния, / е́же ны́не на небеси́.

Стих: Я́ко утверди́ся ми́лость Его́ на нас, и и́стина Госпо́дня пребыва́ет во век.

Все́м отве́рстым се́рдцем и состра́стия испо́лненным, / дерзнове́нную стяжа́в моли́тву, / и по сме́рти не престае́ши сию́ сверша́я, / и любо́вию во ве́ки богате́я, / источа́еши цельбы́ и утеше́ния всегда́, / Иоа́нне ра́достный и ско́рый помо́щниче: / возложе́нием руки́ цели́вый, / пре́жде сло́ва ве́дый ну́жды тя́ проси́вших, / ны́не на́м неви́димо предста́ни, / во Христе́ жива́го тя́ пою́щим, / ча́ющим твоея́ по́мощи и заступле́ния.

Глас 8: Сла́ва Отцу́ и Сы́ну и Свято́му Ду́ху.

Се́рдцем ве́ровал еси́ в пра́вду, свяще́нниче Бо́жий, усты́ же глаго́лал еси́ во спасе́ние: Госпо́дь бытие́ мое́, Госпо́дь избавле́ние от ве́чныя сме́рти, Госпо́дь ве́чный живо́т мо́й, Госпо́дь очище́ние, избавле́ние и освяще́ние мое́, Госпо́дь си́ла в не́мощи, простра́нство в тесноте́ мое́й, све́т во тьме́, ми́р в смяте́нии мое́м. Сла́ва Тебе́, Спаси́телю мо́й, си́ло всемогу́щая; сла́ва Тебе́, Спаси́телю, си́ло вездесу́щая; сла́ва Тебе́, утро́бо преблагосе́рдая; сла́ва Тебе́, си́ло присноотверза́ющаяся к моли́твам мои́м; сла́ва Тебе́, о́ко светле́йшее, вы́ну на мя́ зря́щее и вся́ сокрове́нная моя́ ви́дящее. — Те́мже свя́те Иоа́нне, во сле́д тебе́ и мы́ ко Го́споду возопии́м: сла́ва Тебе́, Бо́же на́ш, ди́вен еси́ во святы́х Твои́х, ди́вен еси́ в науче́ниих и́х, сла́ва Тебе́!

Глас 8: И ны́не и при́сно и во ве́ки веко́в. Ами́нь.

Ца́рь Небе́сный за человеколю́бие на земли́ яви́ся и с челове́ки поживе́, от Де́вы бо Чи́стыя пло́ть прие́мый и из Нея́ проше́дый с восприя́тием, еди́н е́сть Сы́н, сугу́б естество́м, но не ипоста́сию. Те́мже, соверше́нна Того́ Бо́га и соверше́нна Челове́ка вои́стинну пропове́дающе, испове́дуем Христа́ Бо́га на́шего: Его́же моли́, Ма́ти Безневе́стная, поми́ловатися душа́м на́шим.

Све́те Тихи́й:

Све́те Ти́хий святы́я сла́вы Безсме́ртнаго Отца́ Небе́снаго, Свята́го, Блаже́ннаго, Иису́се Христе́! Прише́дше на за́пад со́лнца, ви́девше свет вече́рний, пое́м Отца́, Сы́на и Свята́го Ду́ха, Бо́га. Досто́ин еси́ во вся времена́ пет бы́ти гла́сы преподо́бными, Сы́не Бо́жий, живо́т дая́й; те́мже мир Тя сла́вит.

Пареми́и:

1. Проро́чества Ио́илева чте́ние.

Та́ко глаго́лет Госпо́дь: обрати́теся ко Мне́ все́м се́рдцем ва́шим в посте́ и в пла́чи, и в рыда́нии, и расто́ргните сердца́ ва́ша, а не ри́зы ва́ша, и обрати́теся ко Го́споду Бо́гу ва́шему, я́ко ми́лостив и ще́др е́сть, долготерпели́в и многоми́лостив, и раскаява́яйся о зло́бах. Кто́ ве́сть, обрати́тся ли, и раска́ется, и оста́вит за собо́ю благослове́ние, и же́ртву, и возлия́ние Го́споду Бо́гу ва́шему? Воструби́те трубо́ю в Сио́не, освяти́те по́ст, пропове́дите цельбу́; собери́те лю́ди, освяти́те це́рковь, избери́те старе́йшины, совокупи́те младе́нцы ссу́щия сосцы́: да изы́дет жени́х от ло́жа своего́ и неве́ста от черто́га своего́. Между́ степе́ньми же́ртвенника воспла́чутся жерцы́ служа́щии Го́споду, и реку́т: пощади́, Го́споди, лю́ди Твоя́, и не да́ждь достоя́ния Твоего́ на укори́зну, да не облада́ют и́ми язы́цы, да не реку́т во язы́цех: где́ е́сть Бо́г и́х? И возревнова́ Госпо́дь о земли́ Свое́й, и пощаде́ лю́ди Своя́. И отвеща́ Госпо́дь лю́дем Свои́м, и рече́: се́, А́з ва́м послю́ пшени́цу, и вино́, и ма́сло древя́ное, и насы́титеся и́х, и не да́м ва́с к сему́ на поруга́ние во язы́цех, и су́щаго от се́вера отжену́ от ва́с, и отри́ну его́ на зе́млю безво́дную, и погублю́ лице́ его́ в мо́ри пе́рвем, и за́дняя его́ в мо́ри после́днем: и взы́дет гни́лость его́, и взы́дет смра́д его́, я́ко возвели́чи дела́ своя́. Дерза́й, земле́, ра́дуйся и весели́ся, я́ко возвели́чи Госпо́дь, е́же сотвори́ти. Дерза́йте ско́ти польсти́и, я́ко прозя́бнуша поля́ пусты́ни, я́ко дре́во принесе́ пло́д сво́й, виногра́д и смо́кви да́ша си́лу свою́. И ча́да Сио́ня ра́дуйтеся, и весели́теся о Го́споде Бо́зе ва́шем, я́ко даде́ ва́м пи́щу в пра́вду, и одожди́т ва́м до́ждь ра́нний и по́здный, я́коже и пре́жде. И напо́лнятся гу́мна ва́ша пшени́цы, и преизлию́тся точи́ла вино́м и еле́ем. И возда́м ва́м вме́сто ле́т, в ня́же поядо́ша пру́зи и мши́ца, и си́плеве, и гу́сеницы, си́ла Моя́ вели́кая, ю́же посла́х на вы́. И сне́сте яду́ще и насы́титеся, и похвали́те и́мя Го́спода Бо́га ва́шего, я́же сотвори́ с ва́ми чудеса́: и не посра́мятся лю́дие Мои́ во ве́к.

2. Проро́чества Ио́илева чте́ние

Та́ко глаго́лет Госпо́дь: уве́дите, я́ко посреде́ Изра́иля А́з е́смь, и А́з Госпо́дь Бо́г ва́ш, и не́сть ино́го, ра́зве Мене́, и не посра́мятся ктому́ лю́дие Мои́ во ве́к. И бу́дет по си́х, излию́ от Ду́ха Моего́ на вся́ку пло́ть, и прореку́т сы́нове ва́ши и дще́ри ва́ша, и ста́рцы ва́ши со́ния у́зрят, и ю́ноты ва́ши виде́ния уви́дят: и́бо на рабы́ Моя́ и на рабы́ни Моя́ во дни́ о́ны излию́ от Ду́ха Моего́ и да́м чудеса́ на небеси́ и на земли́: кро́вь и о́гнь и куре́ние ды́ма; со́лнце обрати́тся во тьму́ и луна́ в кро́вь, пре́жде не́же приити́ дню́ Госпо́дню вели́кому и просвеще́нному. И бу́дет, вся́к, и́же призове́т и́мя Госпо́дне, спасе́тся.

3. Собо́рнаго посла́ния Иоа́ннова чте́ние

Возлю́бленнии, а́ще кто́ рече́т, я́ко люблю́ Бо́га, а бра́та своего́ ненави́дит, ло́жь е́сть, и́бо не любя́й бра́та своего́, его́же ви́де, Бо́га, Его́же не ви́де, ка́ко мо́жет люби́ти? И сию́ за́поведь и́мамы от Него́, да любя́й Бо́га лю́бит и бра́та своего́. Вся́к ве́руяй, я́ко Иису́с е́сть Христо́с, от Бо́га рожде́н е́сть; и вся́к любя́й Ро́ждшаго лю́бит и Рожде́ннаго от Него́. О се́м ве́мы, я́ко лю́бим ча́да Бо́жия, егда́ Бо́га лю́бим и за́поведи Его́ соблюда́ем. Сия́ бо е́сть любы́ Бо́жия, да за́поведи Его́ соблюда́ем, и за́поведи Его́ тя́жки не су́ть. Я́ко вся́к рожде́нный от Бо́га побежда́ет ми́р, и сия́ е́сть побе́да, победи́вшая ми́р, ве́ра на́ша. Кто́ е́сть побежда́яй ми́р? то́кмо ве́руяй, я́ко Иису́с е́сть Сы́н Бо́жий.

Го́споди, поми́луй. (Три́жды,)

Сподо́би, Го́споди:

Сподо́би, Го́споди, в ве́чер сей без греха́ сохрани́тися нам. Благослове́н еси́, Го́споди, Бо́же оте́ц на́ших, и хва́льно и просла́влено и́мя Твое́ во ве́ки. Ами́нь.

Бу́ди, Го́споди, ми́лость Твоя́ на нас, я́коже упова́хом на Тя. Благослове́н еси́, Го́споди, научи́ мя оправда́нием Твои́м. Благослове́н еси́, Влады́ко, вразуми́ мя оправда́нием Твои́м. Благослове́н еси́, Святы́й, просвети́ мя оправда́нии Твои́ми.

Го́споди, ми́лость Твоя́ во век, дел руку́ Твое́ю не пре́зри. Тебе́ подоба́ет хвала́, Тебе́ подоба́ет пе́ние, Тебе́ сла́ва подоба́ет. Отцу́ и Сы́ну и Свято́му Ду́ху, ны́не и при́сно и во ве́ки веко́в. Ами́нь.

На лити́и стихи́ры, гла́с 2:

О, Кре́посте моя́, Иису́се, Сы́не Бо́жий! О, Све́те ума́ моего́, и Ми́ре и Ра́досте се́рдца моего́, сла́ва Тебе́! Сла́ва Тебе́, Изба́вителю, от неви́димых вра́г мои́х! — си́це взыва́л еси́. Та́ко и на́с вразуми́ воспе́ти все́м се́рдцем, Го́сподеви, Иоа́нне пра́ведне, служи́телю Христо́в.

Христо́с вочелове́чився, призва́ к покая́нию разбо́йники и блудни́цы, и ты́, па́стырю милосе́рдный, за́поведь Пастыренача́льника исполня́я, с мытари́ ядя́ше и со гре́шники бесе́доваше, вся́ к покая́нию призыва́я и вся́ науча́я моли́тися: Бо́же, ми́лостив бу́ди мне́, гре́шному, Бо́же Ми́лостиве, сла́ва Тебе́!

Образ Бо́жий есте́ вы́, сего́ ра́ди храни́те вели́кий о́браз се́й, о́браз красоты́ Бо́жия, о́браз безме́рныя любве́ Его́, да бу́дете ча́да Отца́ на́шего, Иже на небесе́х, да бу́дете свя́ти, я́коже и Оте́ц ва́ш Свя́т е́сть! — та́ко, па́стырю богому́дрый, па́ству твою́ учи́л еси́, та́ко и са́м свя́то пожи́л еси́.

Сла́ва, гла́с 1:

Моля́щеся, Ду́хом Святы́м мо́лимся, сего́ ра́ди вся́ моли́твы церко́вныя дыха́ние Ду́ха Свята́го су́ть и вси́ христиа́не рожде́ние Его́ есмы́. Прииди́ у́бо и всели́ся в ны́, Ду́ше Святы́й, поми́луй и сози́жди вся́ ны́, да бу́дем еди́но те́ло Христо́во. — Такова́ бы́сть непреста́нная моли́тва твоя́, преди́вный Иоа́нне, о́тче на́ш, и послу́ша тя́ Бо́г и пома́за тя́ еле́ем ра́дости ве́чныя.

И ны́не, богоро́дичен:

Утро светоза́рное, Све́та невече́рняго, зри́м Тя́, Де́во. Из Тебе́ бо произы́де, Иже тьму́ грехо́вную разгна́, Ду́ха теплото́ю сердца́ оживи́в. Того́ приле́жно моля́щи не преста́й о на́с, Тебе́ мо́лимся, и́же и́стинную Богоро́дицу испове́дающии Тя́.

Го́споди, поми́луй. (40 раз)

Стихи́ры на стихо́вне:

Стихи́ры: Глас 6:

Отче Иоа́нне преблаже́нне, все́х святы́х подража́тель бы́в, святу́ю ве́ру патриа́рхов стяжа́л еси́, проро́ков и апо́столов ре́вность, святи́телей же преподо́бие и богомы́слие, испове́дников дерзнове́ние, безсре́бренников безме́здную по́мощь, преподо́бных подви́жников непреста́нную моли́тву, сего́ ра́ди святу́ю твою́ па́мять све́тло пра́зднуем.

Стих: Расточи́, даде́ убо́гим, пра́вда его́ пребыва́ет во ве́к.

Отче на́ш Иоа́нне богому́дре, стра́хом наче́н Бо́жиим, высоты́ прему́дрости разуме́л еси́: любо́вию же Христу́ сраспя́вся и сво́йственнейший Ему́ бы́в, последи́ стра́х любо́вию изгна́л еси́, и́мать бо му́ку стра́х, я́коже апо́стол любве́ научи́л е́сть на́с; те́мже, о́тче, ве́рных украша́л еси́ ра́зумы и Бо́га люби́ти ста́до твое́ научи́л еси́. О, Иоа́нне, Христа́ Бо́га моли́ дарова́ти и на́м благода́ть сию́ и ве́лию ми́лость.

Стих: Гото́во се́рдце его́ упова́ти на Го́спода.

Госпо́дь си́ла се́рдца моего́, Госпо́дь све́т ума́ моего́, Госпо́дь поко́й мо́й и ра́дость моя́, моя́ ве́ра, наде́жда и любы́; Се́й е́сть пи́ща моя́ и питие́ мое́, оде́жда моя́ и покро́в. — Вразуми́ у́бо и на́с, о́тче святы́й, сия́ словеса́ твоя́ разуме́ти и в Го́споде полага́ти спасе́ние на́ше, пода́ждь на́м от благосты́ни твоея́, я́коже Илия́ Елиссе́еви, да бу́дет в Го́споде вся́ на́ша наде́жда и утвержде́ние.

Слава, глас 8: Не отцы́ на́ши возвести́ша на́м, ниже́ ста́рцы пове́даша на́м, са́ми бо ви́дехом тобо́ю быва́емая чудеса́, са́ми испыта́хом благода́ть от тебе́ излива́емую: бли́жнии на́ши исцеля́хуся, при кончи́не су́щии здра́ви от одра́ возстава́ху, вся́кая проше́ния на́ша моли́твою твое́ю исполня́хуся; те́мже почита́ем тя́, я́ко уго́дника Бо́жия и предста́теля за на́с пред Го́сподем.

И ныне, глас 8:

Па́че все́х тва́рей возвы́силася еси́, Богоро́дице Де́во, зане́ избра́ Тя́ в жили́ще Себе́, Иже в Вы́шних Живы́й, да возведе́т па́дшее естество́ на́ше; те́м Ти́ припа́даем, я́ко к Ма́тери Спа́са на́шего: Ты́ еси́ на́ша наде́жда, Ты́ еси́ на́ше упова́ние, не отри́ни на́с, и́щущих Твоея́ по́мощи.

Моли́тва свята́го Симео́на Богоприи́мца:

Ны́не отпуща́еши раба́ Твоего́, Влады́ко,/ по глаго́лу Твоему́, с ми́ром;/ я́ко ви́деста о́чи мои́ спасе́ние Твое́,/ е́же еси́ угото́вал пред лице́м всех люде́й,/ свет во открове́ние язы́ков,// и сла́ву люде́й Твои́х Изра́иля.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Го́споди, поми́луй. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Тропа́рь, глас 4:

Со апо́столы изы́де веща́ние твое́ в концы́ вселе́нныя, с испове́дники страда́ния за Христа́ претерпе́л еси́, святи́телем уподо́бился еси́ сло́ва пропове́данием, с преподо́бными во благода́ти Бо́жией просия́л еси́. Сего́ ра́ди вознесе́ Госпо́дь бе́здну смире́ния твоего́ превы́ше небе́с, и дарова́ на́м и́мя твое́ во исто́чник преди́вных чуде́с. Те́мже во Христе́ во ве́ки живы́й, чудотво́рче, любо́вию ми́луяй су́щия в беда́х, слы́ши ча́да твоя́, ве́рою тя призыва́ющия, Иоа́нне пра́ведне, возлю́бленный па́стырю на́ш. (Дважды)

Богородице:

Богоро́дице Де́во, ра́дуйся, / Благода́тная Мари́е, Госпо́дь с Тобо́ю; / благослове́на Ты в жена́х / и благослове́н Плод чре́ва Твоего́, / я́ко Спа́са родила́ еси́ душ на́ших. (Единожды)

Бу́ди И́мя Госпо́дне благослове́но от ны́не и до ве́ка. (Три́жды)

Псало́м 33:

Благословлю́ Го́спода на вся́кое вре́мя,/ вы́ну хвала́ Его́ во усте́х мои́х./ О Го́споде похва́лится душа́ моя́,/ да услы́шат кро́тцыи, и возвеселя́тся./ Возвели́чите Го́спода со мно́ю,/ и вознесе́м И́мя Его́ вку́пе./ Взыска́х Го́спода, и услы́ша мя,/ и от все́х скорбе́й мои́х изба́ви мя./ Приступи́те к Нему́, и просвети́теся,/ и ли́ца ва́ша не постыдя́тся./ Сей ни́щий воззва́, и Госпо́дь услы́ша и́,/ и от все́х скорбе́й его́ спасе́ и́./ Ополчи́тся а́нгел Госпо́день о́крест боя́щихся Его́,/ и изба́вит их./ Вкуси́те и ви́дите, я́ко благ Госпо́дь:/ блаже́н муж, и́же упова́ет Нань./ Бо́йтеся Го́спода, вси́ святи́и Его́,/ я́ко несть лише́ния боя́щимся Его́./ Бога́тии обнища́ша и взалка́ша:/ взыска́ющии же Го́спода// не лиша́тся вся́каго бла́га.

У́ТРЕНЯ.

Шестопса́лмие:

Сла́ва в вы́шних Бо́гу, и на земли́ мир, в челове́цех благоволе́ние. (Три́жды)

Го́споди, устне́ мои́ отве́рзеши, и уста́ моя́ возвестя́т хвалу́ Твою́. (Два́жды)

Псалом 3:

Го́споди, что ся умно́жиша стужа́ющии ми́? Мно́зи востаю́т на мя, мно́зи глаго́лют души́ мое́й: несть спасе́ния eму́ в Бо́зе eго́. Ты же, Го́споди, Засту́пник мой еси́, сла́ва моя́ и вознося́й главу́ мою́. Гла́сом мои́м ко Го́споду воззва́х, и услы́ша мя от горы́ святы́я Своея́. Аз усну́х, и спах, воста́х, я́ко Госпо́дь засту́пит мя. Не убою́ся от тем люде́й, о́крест напа́дающих на мя. Воскресни́, Го́споди, спаси́ мя, Бо́же мой, я́ко Ты порази́л еси́ вся вражду́ющыя ми всу́е: зу́бы гре́шников сокруши́л еси́. Госпо́дне есть спасе́ние, и на лю́дех Твои́х благослове́ние Твое́.

Аз усну́х, и спах, воста́х, я́ко Госпо́дь засту́пит мя.

Псалом 37:

Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́. Я́ко стре́лы Твоя́ унзо́ша во мне, и утверди́л еси́ на мне ру́ку Твою́. Несть исцеле́ния в пло́ти мое́й от лица́ гне́ва Твоего́, несть ми́ра в косте́х мои́х от лица́ грех мои́х. Я́ко беззако́ния моя́ превзыдо́ша главу́ мою́, я́ко бре́мя тя́жкое отяготе́ша на мне. Возсмерде́ша и согни́ша ра́ны моя́ от лица́ безу́мия моего́. Пострада́х и сляко́хся до конца́, весь день се́туя хожда́х. Я́ко ля́двия моя́ напо́лнишася поруга́ний, и несть исцеле́ния в пло́ти мое́й. Озло́блен бых и смири́хся до зела́, рыка́х от воздыха́ния се́рдца моего́. Го́споди, пред Тобо́ю все жела́ние мое́ и воздыха́ние мое́ от Тебе́ не утаи́ся. Се́рдце мое́ смяте́ся, оста́ви мя си́ла моя́, и свет о́чию мое́ю, и той несть со мно́ю. Дру́зи мои́ и и́скреннии мои́ пря́мо мне прибли́жишася и ста́ша, и бли́жнии мои́ отдале́че мене́ ста́ша и нужда́хуся и́щущии ду́шу мою́, и и́щущии зла́я мне глаго́лаху су́етная и льсти́вным весь день поуча́хуся. Аз же я́ко глух не слы́шах и я́ко нем не отверза́яй уст свои́х. И бых я́ко челове́к не слы́шай и не имы́й во усте́х свои́х обличе́ния. Я́ко на Тя, Го́споди, упова́х, Ты услы́шиши, Го́споди Бо́же мой. Я́ко рех: да не когда́ пора́дуют ми ся врази́ мои́: и внегда́ подвижа́тися нога́м мои́м, на мя велере́чеваша. Я́ко аз на ра́ны гото́в, и боле́знь моя́ предо мно́ю есть вы́ну. Я́ко беззако́ние мое́ аз возвещу́ и попеку́ся о гресе́ мое́м. Врази́ же мои́ живу́т и укрепи́шася па́че мене́, и умно́жишася ненави́дящии мя без пра́вды. Воздаю́щии ми зла́я возблага́я оболга́ху мя, зане́ гоня́х благосты́ню. Не оста́ви мене́, Го́споди Бо́же мой, не отступи́ от Мене́. Вонми́ в по́мощь мою́, Го́споди спасе́ния моего́.

Не оста́ви мене́, Го́споди Бо́же мой, не отступи́ от Мене́. Вонми́ в по́мощь мою́, Го́споди спасе́ния моего́.

Псалом 62:

Бо́же, Бо́же мой, к Тебе́ у́тренюю, возжада́ Тебе́ душа́ моя́, коль мно́жицею Тебе́ плоть моя́, в земли́ пу́сте и непрохо́дне, и безво́дне. Та́ко во святе́м яви́хся Тебе́, ви́дети си́лу Твою́ и сла́ву Твою́. Я́ко лу́чши ми́лость Твоя́ па́че живо́т, устне́ мои́ похвали́те Тя. Та́ко благословлю́ Тя в животе́ мое́м, о и́мени Твое́м воздежу́ ру́це мои́. Я́ко от ту́ка и ма́сти да испо́лнится душа́ моя́, и устна́ма ра́дости восхва́лят Тя уста́ моя́. А́ще помина́х Тя на посте́ли мое́й, на у́тренних поуча́хся в Тя. Я́ко был еси́ Помо́щник мой, и в кро́ве крилу́ Твое́ю возра́дуюся. Прильпе́ душа́ моя́ по Тебе́, мене́ же прия́т десни́ца Твоя́. Ти́и же всу́е иска́ша ду́шу мою́, вни́дут в преиспо́дняя земли́, предадя́тся в ру́ки ору́жия, ча́сти ли́совом бу́дут. Царь же возвесели́тся о Бо́зе, похва́лится всяк клены́йся Им, я́ко загради́шася уста́ глаго́лющих непра́ведная.

На у́тренних поуча́хся в Тя. Я́ко был еси́ Помо́щник мой, и в кро́ве крилу́ Твое́ю возра́дуюся. Прильпе́ душа́ моя́ по Тебе́, мене́ же прия́т десни́ца Твоя́.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Го́споди поми́луй. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Псалом 87:

Го́споди Бо́же спасе́ния моего́, во дни воззва́х, и в нощи́ пред Тобо́ю. Да вни́дет пред Тя моли́тва моя́: приклони́ у́хо Твое́ к моле́нию моему́, я́ко испо́лнися зол душа́ моя́, и живо́т мой аду прибли́жися. Привмене́н бых с низходя́щими в ров, бых я́ко челове́к без по́мощи, в ме́ртвых свобо́дь, я́ко я́звеннии спя́щии во гро́бе, и́хже не помяну́л еси́ ктому́, и ти́и от руки́ Твоея́ отринове́ни бы́ша. Положи́ша мя в ро́ве преиспо́днем, в те́мных и се́ни сме́ртней. На мне утверди́ся я́рость Твоя́, и вся во́лны Твоя́ наве́л еси́ на мя. Уда́лил еси́ зна́емых мои́х от Мене́, положи́ша мя ме́рзость себе́: пре́дан бых и не исхожда́х. О́чи мои́ изнемого́сте от нищеты́, воззва́х к Тебе́, Го́споди, весь день, возде́х к Тебе́ ру́це мои́. Еда́ ме́ртвыми твори́ши чудеса́? Или́ вра́чеве воскреся́т, и испове́дятся Тебе́? Еда́ пове́сть кто во гро́бе ми́лость Твою́, и и́стину Твою́ в поги́бели? Еда́ позна́на бу́дут во тьме чудеса́ Твоя́, и пра́вда Твоя́ в земли́ забве́нней? И аз к Тебе́, Го́споди, воззва́х и у́тро моли́тва моя́ предвари́т Тя. Вску́ю, Го́споди, отре́еши ду́шу мою́, отвраща́еши лице́ Твое́ от Мене́? Нищ есмь аз, и в труде́х от ю́ности моея́; возне́с же ся, смири́хся, и изнемого́х. На мне преидо́ша гне́ви Твои́, устраше́ния Твоя́ возмути́ша мя, обыдо́ша мя я́ко вода́, весь день одержа́ша мя вку́пе. Уда́лил еси́ от Мене́ дру́га и и́скренняго, и зна́емых мои́х от страсте́й.

Го́споди Бо́же спасе́ния моего́, во дни воззва́х, и в нощи́ пред Тобо́ю. Да вни́дет пред Тя моли́тва моя́: приклони́ у́хо Твое́ к моле́нию моему́.

Псалом 102:

Благослови́, душе́ моя́, Го́спода, и вся вну́тренняя моя́ и́мя свя́тое Его́. Благослови́, душе́ моя́, Го́спода, и не забыва́й всех воздая́ний Его́, очища́ющаго вся беззако́ния твоя́, исцеля́ющаго вся неду́ги твоя́, избавля́ющаго от истле́ния живо́т твой, венча́ющаго тя ми́лостию и щедро́тами, исполня́ющаго во благи́х жела́ние твое́: обнови́тся я́ко о́рля ю́ность твоя́. Творя́й ми́лостыни Госпо́дь, и судьбу́ всем оби́димым. Сказа́ пути́ Своя́ Моисе́ови, сыново́м Изра́илевым хоте́ния Своя́: Щедр и Ми́лостив Госпо́дь, Долготерпели́в и Многоми́лостив. Не до конца́ прогне́вается, ниже́ во век вражду́ет, не по беззако́нием на́шым сотвори́л есть нам, ниже́ по грехо́м на́шым возда́л есть нам. Я́ко по высоте́ небе́сней от земли́, утверди́л есть Госпо́дь ми́лость Свою́ на боя́щихся Его́. Ели́ко отстоя́т восто́цы от за́пад, уда́лил есть от нас беззако́ния на́ша. Я́коже ще́дрит оте́ц сы́ны, уще́дри Госпо́дь боя́щихся Его́. Я́ко Той позна́ созда́ние на́ше, помяну́, я́ко персть есмы́. Челове́к, я́ко трава́ дни́е eго́, я́ко цвет се́льный, та́ко оцвете́т, я́ко дух про́йде в нем, и не бу́дет, и не позна́ет ктому́ ме́ста своего́. Ми́лость же Госпо́дня от ве́ка и до ве́ка на боя́щихся Его́, и пра́вда Его́ на сыне́х сыно́в, храня́щих заве́т Его́, и по́мнящих за́поведи Его́ твори́ти я́. Госпо́дь на Небеси́ угото́ва Престо́л Свой, и Ца́рство Его́ все́ми облада́ет. Благослови́те Го́спода вси А́нгели Его́, си́льнии кре́постию, творя́щии сло́во Его́, услы́шати глас слове́с Его́. Благослови́те Го́спода вся Си́лы Его́, слуги́ Его́, творя́щии во́лю Его́. Благослови́те Го́спода вся дела́ Его́, на вся́ком ме́сте влады́чества Его́, благослови́, душе́ моя́, Го́спода.

На вся́ком ме́сте влады́чества Его́, благослови́, душе́ моя́, Го́спода.

Псалом 142:

Го́споди, услы́ши моли́тву мою́, внуши́ моле́ние мое́ во и́стине Твое́й, услы́ши мя в пра́вде Твое́й и не вни́ди в суд с рабо́м Твои́м, я́ко не оправди́тся пред Тобо́ю всяк живы́й. Я́ко погна́ враг ду́шу мою́, смири́л есть в зе́млю живо́т мой, посади́л мя есть в те́мных, я́ко ме́ртвыя ве́ка. И уны́ во мне дух мой, во мне смяте́ся се́рдце мое́. Помяну́х дни дре́вния, поучи́хся во всех де́лех Твои́х, в творе́ниих руку́ Твое́ю поуча́хся. Возде́х к Тебе́ ру́це мои́, душа́ моя́, я́ко земля́ безво́дная Тебе́. Ско́ро услы́ши мя, Го́споди, исчезе́ дух мой, не отврати́ лица́ Твоего́ от Мене́, и уподо́блюся низходя́щым в ров. Слы́шану сотвори́ мне зау́тра ми́лость Твою́, я́ко на Тя упова́х. Скажи́ мне, Го́споди, путь во́ньже пойду́, я́ко к Тебе́ взях ду́шу мою́. Изми́ мя от враг мои́х, Го́споди, к Тебе́ прибего́х. Научи́ мя твори́ти во́лю Твою́, я́ко Ты еси́ Бог мой. Дух Твой Благи́й наста́вит мя на зе́млю пра́ву. И́мене Твоего́ ра́ди, Го́споди, живи́ши мя, пра́вдою Твое́ю изведе́ши от печа́ли ду́шу мою́. И ми́лостию Твое́ю потреби́ши враги́ моя́ и погуби́ши вся стужа́ющыя души́ мое́й, я́ко аз раб Твой есмь.

Услы́ши мя, Го́споди, в пра́вде Твое́й и не вни́ди в суд с рабо́м Твои́м.

Дух Твой Благи́й наста́вит мя на зе́млю пра́ву.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Тропа́рь глас 4:

Сла́ва Отцу́ и Сы́ну и Свято́му Ду́ху. И ны́не и при́сно и во ве́ки веко́в. Ами́нь.

Глас 4: Еже от ве́ка утае́нное, и Ангелом несве́домое та́инство: Тобо́ю, Богоро́дице, су́щим на земли́ яви́ся, Бо́г в несли́тном соедине́нии воплоща́емь, и кре́ст во́лею на́с ра́ди восприи́м, и́мже воскреси́в первозда́ннаго, спасе́ от сме́рти ду́ши на́ша.

Здесь читается кафизма, положенная по дню, или сразу седальны:

Го́споди, поми́луй. (Три́жды)

Седален, глас 4:

Не презре́л еси́, о́тче Иоа́нне, ни стра́нна, ни прише́льца, но все́м бы́л еси́ бла́г и ми́лостив и ще́др, сиро́т оте́ц и вдова́м защи́та, наги́х одея́ние и а́лчущих пи́ща. Помяни́ и на́с, убо́гих ча́д твои́х, и не отри́ни от благода́тныя любве́ твоея́.

Сла́ва Отцу́ и Сы́ну и Свято́му Ду́ху. И ны́не и при́сно и во ве́ки веко́в. Ами́нь.

Удиви́ся Ио́сиф, е́же па́че естества́ зря́, и внима́ше мы́слию и́же на руно́ до́ждь, в безсе́меннем зача́тии Твое́м Богоро́дице, купину́ огне́м неопали́мую, же́зл Ааро́нов прозя́бший, и свиде́тельствуя обру́чник Тво́й и храни́тель, свяще́нником взыва́ше: Де́ва ражда́ет, и по рождестве́ па́ки Де́ва пребыва́ет.

Седален, глас 5:

Боже́ственною си́лою укрепля́емь, победи́л еси́ неви́димых враго́в искуше́ния и к све́ту невече́рнему преста́вился еси́. Уврачу́й и ду́ш на́ших стра́сти и сове́том твои́м наста́ви ны́, ты́ бо вра́ч и уте́шитель все́м от Бо́га да́н бы́л еси́, Иоа́нне о́тче на́ш.

Сла́ва Отцу́ и Сы́ну и Свято́му Ду́ху. И ны́не и при́сно и во ве́ки веко́в. Ами́нь.

Неискусобра́чная Неве́сто, Богороди́тельнице, я́же Евину печа́ль радостотвори́вшая, воспева́ем Тя́ ве́рнии, и покланя́емся Тебе́, я́ко изба́вила еси́ на́с от дре́вния кля́твы; и ны́не моли́ся за ны́ непреста́нно, всепе́тая, во е́же спасти́ся на́м.

Полиеле́й:

Хвали́те И́мя Госпо́дне, хвали́те, раби́ Го́спода.

Аллилу́иа, аллилу́иа, аллилу́иа.

Благослове́н Госпо́дь от Сио́на, живы́й во Иерусали́ме.

Аллилу́иа, аллилу́иа, аллилу́иа.

Испове́дайтеся Го́сподеви, я́ко Благ, я́ко в век ми́лость Его́.

Аллилу́иа, аллилу́иа, аллилу́иа.

Испове́дайтеся Бо́гу Небе́сному, я́ко в век ми́лость Его́.

Аллилу́иа, аллилу́иа, аллилу́иа.

Велича́ние:

Велича́ем тя́, святы́й пра́ведный о́тче Иоа́нне, и чте́м святу́ю па́мять твою́, ты́ бо мо́лиши за на́с Христа́ Бо́га на́шего.

Блаже́н му́ж боя́йся Го́спода, в за́поведех Его́ восхо́щет зело́ / Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа,// сла́ва Тебе́, Бо́же. (Трижды)

Седа́льны:

Глас 8:

Сло́ва Бо́жия пла́менный служи́тель, Иоа́нне богодухнове́нне, и вмести́лище ве́ры Христо́вой ты́ бы́л еси́, сего́ ра́ди Госпо́дь, я́коже но́ваго Авраа́ма, отца́ мно́гих поста́ви тя́. Моли́ у́бо, о́тче святы́й, е́же все́м на́м, ча́дом Бо́жиим бы́ти и душа́м на́шим спасти́ся.

Глас 8: Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Небе́сную две́рь и киво́т, всесвяту́ю го́ру, светоза́рный о́блак нарица́ем Тя́, Де́во, и небе́сную ле́ствицу, слове́сный ра́й, Евино избавле́ние, вселе́нныя всея́ вели́кое сокро́вище, я́ко спасе́ние в Тебе́ соде́лася ми́рови и оставле́ние дре́вних согреше́ний. Сего́ ра́ди вопие́м Ти́: моли́ Сы́на Твоего́ и Бо́га прегреше́ний оставле́ние дарова́ти, благоче́стно покланя́ющимся пресвято́му Рождеству́ Твоему́.

Степе́нна, глас 4:

От ю́ности моея́/ мно́зи бо́рют мя стра́сти,/ но Сам мя заступи́// и спаси́, Спа́се мой.

Ненави́дящии Сио́на,/ посрами́теся от Го́спода,/ я́ко трава́ бо огне́м// бу́дете изсо́хше.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Святы́м Ду́хом/ вся́ка душа́ живи́тся,/ и чистото́ю возвыша́ется,// светле́ется Тро́йческим еди́нством, священнота́йне.

Го́споди, поми́луй. (Три́жды)

От Луки́ Свята́го Ева́нгелия чте́ние

Сла́ва, Тебе́, Го́споди, сла́ва Тебе́.

Во вре́мя о́но, ста́ Иису́с на ме́сте ра́вне: и наро́д учени́к Его́, и мно́жество мно́го люде́й от всея́ Иуде́и и Иерусали́ма и помо́рия Ти́рска и Сидо́нска, и́же приидо́ша послу́шати Его́ и исцели́тися от неду́г свои́х, и стра́ждущии от ду́х нечи́стых: и исцеля́хуся. И ве́сь наро́д иска́ше прикаса́тися Ему́: я́ко си́ла от Него́ исхожда́ше и исцеля́ше вся́. И То́й возве́д о́чи Свои́ на ученики́ Своя́, глаго́лаше: Блаже́ни ни́щии ду́хом, я́ко ва́ше е́сть Ца́рствие Бо́жие. Блаже́ни а́лчущии ны́не, я́ко насы́титеся. Блаже́ни пла́чущии ны́не, я́ко возсмее́теся. Блаже́ни бу́дете, егда́ возненави́дят ва́с челове́цы, и егда́ разлуча́т вы́, и поно́сят, и пронесу́т и́мя ва́ше я́ко зло́, Сы́на Челове́ческаго ра́ди. Возра́дуйтеся в то́й де́нь и взыгра́йте: се́ бо мзда́ ва́ша мно́га на небеси́.

Сла́ва, Тебе́, Го́споди, сла́ва Тебе́.

Псало́м 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя. Я́ко беззако́ние мое́ аз зна́ю и грех мой предо мно́ю есть вы́ну. Тебе́ Еди́ному согреши́х, и лука́вое пред Тобо́ю сотвори́х, я́ко да оправди́шися во словесе́х Твои́х и победи́ши, внегда́ суди́ти Ти. Се бо в беззако́ниих зача́т есмь, и во гресе́х роди́ мя ма́ти моя́. Се бо и́стину возлюби́л еси́, безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся, омы́еши мя, и па́че сне́га убелю́ся. Слу́ху моему́ да́си ра́дость и весе́лие, возра́дуются ко́сти смире́нныя. Отврати́ лице́ Твое́ от грех мои́х, и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́, и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́, и Ду́хом Влады́чним утверди́ мя. Научу́ беззако́нныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́, возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо, всесожже́ния не благоволи́ши. Же́ртва Бо́гу дух сокруше́н, се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския, тогда́ благоволи́ши же́ртву пра́вды, возноше́ние и всесожега́емая: тогда́ возложа́т на олта́рь Твой тельцы́.

Глас 6:

Сла́ва Отцу́ и Сы́ну и Свято́му Ду́ху./ Моли́твами праведного Иоанна, / Ми́лостиве, очи́сти / мно́жества согреше́ний на́ших.

И ны́не и при́сно и во ве́ки веко́в. Ами́нь./ Моли́твами Богоро́дицы, / Ми́лостиве, очи́сти / мно́жества согреше́ний на́ших.

Поми́луй мя, Бо́же,/ по вели́цей ми́лости Твое́й,/ и по мно́жеству щедро́т Твои́х// очи́сти беззако́ние мое́.

Стихи́ра, глас 6

Ангеле земны́й, дру́же челове́ков, орга́не Уте́шителя Ду́ха, носи́телю любве́ Христо́вы, печа́льниче о все́м ми́ре и уста́ все́х ве́рных, утеше́ние печа́льных и скорбя́щих, засту́пниче гони́мых, врачу́ ду́ш и теле́с, о́тче и моли́твенниче, святы́й пра́ведный Иоа́нне, прииди́ и ста́ни с на́ми, да вознесе́м вку́пе с тобо́ю хвалу́ и благодаре́ние Спаси́телю Бо́гу, сла́вное соверша́я сие́ торжество́.

Го́споди, поми́луй. (12 раз)

Кано́н свята́го. Глас 4.

Пе́снь 1.

Ирмос: Мо́ря чермну́ю пучи́ну невла́жными стопа́ми дре́вний пешеше́ствовав Изра́иль, крестообра́зныма Моисе́овыма рука́ма Амали́кову си́лу в пусты́ни победи́л е́сть.

Припев: Святый праведный отче Иоанне, моли Бога о нас.

Моя́ чу́вства и у́м утверди́, Спаси́телю мо́й, да возмогу́ досто́йне воспе́ти моли́твы и по́двиги возлю́бльшаго Тя́ и Тобо́ю возлю́бленнаго служи́теля Твоего́, отца́ на́шего Иоа́нна.

От ю́ности Первозва́нному Апо́столу во святе́м хра́ме его́ пе́ти предъизбра́нный, све́тлостию Креста́ озаря́емь, грехо́вныя мглы́ избе́гл еси́, Спаси́телю Бо́гу моли́твы и пе́ние вознося́ непреста́нно, блаже́нне.

Я́коже Илия́ колесни́цею о́гненною, та́ко и ты́ колесни́цею доброде́телей на не́бо возше́л еси́, отону́дуже низпосла́ти и на́м жития́ исправле́ние Го́спода умоли́.

Богородичен: Жи́знь ве́чную Тобо́ю, Богоро́дице Де́во, прия́хом, и́же жи́зни ра́йския не́когда лиши́вшиися, зане́ родила́ еси́ еди́наго Безнача́льнаго и вся́ Оживотворя́ющаго.

Пе́снь 3.

Ирмос: Весели́тся о Тебе́ Це́рковь Твоя́, Христе́, зову́щи: Ты́ моя́ кре́пость, Го́споди, и прибе́жище и утвержде́ние.

И нра́вом прича́стник и житие́м подража́тель апо́столом бы́в, богодухнове́нне, сло́во и́стины до конца́ испра́вил еси́.

Зри́тельно Ца́рствия небе́снаго бе́ душе́вное о́ко твое́, поне́же чи́сто бы́сть, сего́ ра́ди житие́ све́тле упра́вил еси́, е́же чту́ще о Бо́зе, тя́ прославля́ем.

Не трудя́йся да не я́ст, — словеса́ апо́стола бра́тии твое́й веща́л еси́, те́мже и до́м трудолю́бия убо́гих ра́ди воздви́гл еси́, в не́мже ни́щии и немощни́и возмо́гут удовле́ни бы́ти, пита́ющеся от де́л ру́к свои́х.

Богородичен: Вся́ све́т еси́, Влады́чице, вся́ святы́ня, вся́ бла́гость, вся́ прему́дрость, вся́ мо́жеши, я́ко Ма́ти Всемогу́щаго, еди́на и та́ же всесоверше́нна, я́ко Ма́ти всесоверше́ннаго Царя́ сла́вы.

Седа́лен, гла́с 8.

Пла́чь мно́зех о гресе́х к Престо́лу вы́шнему вознося́, Небе́с приклоне́ние во святе́й Литурги́и ду́хом созерца́я, дея́ние и пропове́дание наразры́вны имы́й, твои́ми де́лы и чудесы́ вели́ких отце́в насле́дник досто́йный яви́лся еси́, Иоа́нне блаже́нне, ми́ру Кро́нштадтский свети́льниче, моли́ся о душа́х на́ших.

Сла́ва, и ны́не, богоро́дичен, гла́с то́йже.

Недви́жимое утвержде́ние ве́ры и Боже́ственное дарова́ние душа́м на́шим — Ты́ еси́, Пречи́стая, те́м к Тебе́ припа́дающе, ку́пно с арха́нгелом вопие́м Ти́: ра́дуйся, роди́вшая Спа́са на́шего, ра́дуйся Засту́пнице и Хода́таице ро́да христиа́нскаго.

Пе́снь 4.

Ирмос: Вознесе́на Тя́ ви́девши Це́рковь на Кресте́, Со́лнце Пра́ведное, ста́ в чи́не свое́м, досто́йно взыва́юще: сла́ва си́ле Твое́й, Го́споди.

Основа́ние тве́рдо — Христа́ име́я, во страннолю́бии Авраа́му дре́внему уподо́бился еси́, от все́х стра́н к тебе́ приходя́щия прие́мля, и ко Го́споду те́х приводя́, и та́ко уго́дная Бо́гу твори́л еси́.

Хра́м Бо́гу се́рдце твое́ хотя́ устро́ити, в дому́ Бо́жием непреста́нно служи́ти возжеле́л еси́, украша́я ду́шу твою́ небе́сными добро́тами.

Росо́ю по́двигов твои́х вся́ стра́сти теле́сныя угаси́в, возже́гл еси́ просвеще́ние безстра́стия, те́мже и сы́н ве́чнаго дне́ яви́лся еси́, о́тче блаже́нне.

Богородичен: Иезеки́иль боже́ственный, Пречи́стая, Врата́ заключе́нна пронарече́ Тя́, и́миже про́йде нерастворе́нно, еди́ный Преве́чный, ми́р Сво́й да́в на́м.

Пе́снь 5

Ирмос: Ты́ Го́споди мо́й, Све́т, в ми́р прише́л еси́, Све́т Святы́й, обраща́яй из мра́чна неве́дения ве́рою воспева́ющия Тя́.

Сподо́бился еси́ вы́шних дарова́ний, о́тче, Го́споду твоему́ непреста́нно служа́ и апо́стольския труды́ при́сно подража́я.

Тле́нныя твоея́ пло́ти сладостра́стие умертви́в, ду́шу нетле́нную благоче́стием оживи́л eси́, и сию́ до́м Ду́ха Боже́ственнаго сотвори́л еси́.

Ева́нгелие Христо́во все́м усе́рдно пропове́дуя, трапе́зы Госпо́дней прича́стник повседне́вный бы́л еси́, са́м себе́ и па́ству твою́, я́ко же́ртву жи́ву, и свя́ту Бо́гови устроя́я.

Богородичен: Еди́наго от Тро́ицы родила́ еси́, Пречи́стая, милосе́рдия ра́ди на земли́ Явльшагося во двою́ естеству́, Его́же непреста́нно моли́ спасти́ ду́ши на́ша.

Пе́снь 6.

Ирмос: Пожру́ Ти́ со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею Кро́вию.

Ма́слина плодови́та в дому́ Го́спода твоего́ бы́л еси́, Иоа́нне богоявле́нне, зане́ ве́дение Боже́ственное Госпо́дь дарова́ ти и в де́лании апо́стольстем укрепи́ тя.

Уди те́ла Христо́ва есте́ вы́, — та́ко со апо́столом пропове́дал еси́ и Христа́ еди́наго люби́ти учи́л еси́, да вси́ еди́но бу́дут.

Житие́ твое́ свя́то, сло́во твое́, богому́дре, благода́ти Бо́жия испо́лнено, се́рдце твое́ моли́твы благода́тныя сосу́д бы́сть, сего́ ра́ди ве́рою и любо́вию тя́ почита́ем.

Богородичен: Естество́ Ангельское удиви́ся е́же в Тебе́ чу́ду неизрече́нному, Пресвята́я Де́во, ка́ко у́бо пло́ть восприя́т от Тебе́, Иже безпло́тен Сы́й и вся́ Содержа́й.

Конда́к, гла́с 4:

От младе́нства Бо́гом избра́нный, и во о́трочестве да́р уче́ния чуде́сно от Него́ прие́мый, и к пресви́терству в со́нном виде́нии пресла́вно призва́н бы́в, па́стырь ди́вный Це́ркве Христо́вы яви́лся еси́, о́тче Иоа́нне, благода́ти тезоимени́те; моли́ Христа́ Бо́га все́м на́м с тобо́ю в Ца́рствии Бо́жием бы́ти.

Икос.

Ду́х Святы́й во проро́цех глаго́лавый и апо́столы всю́ вселе́нную просвети́вый, му́чеником кре́пость дарова́вый и чре́з святи́тели ве́ру правосла́вную уясни́вый, благода́ть Свою́ излия́ оби́льно на тя́, о́тче Иоа́нне, ве́ру бо Христо́ву сло́вом, де́лы и все́м житие́м твои́м возвеща́л еси́. Те́мже в селе́ния Своя́ призва́ тя Госпо́дь, и ны́не у Престо́ла сла́вы Его́ предстоя́, моли́ся, все́м чту́щим тя́ с тобо́ю в Ца́рствии Бо́жием бы́ти.

Пе́снь 7.

Ирмос: В пещи́ авраа́мстии о́троцы перси́дстей, любо́вию благоче́стия па́че, не́жели пла́менем, опаля́еми взыва́ху: благослове́н еси́ в хра́ме сла́вы Твоея́, Го́споди.

Про́мыслом Бо́жиим све́т благоче́стия среди́ тя́жкия тьмы́ безбо́жия и неве́рия ты́ яви́лся еси́, о́тче, вся́ призыва́я зва́ти: благослове́н еси́ в це́ркви сла́вы Твоея́, Го́споди.

Образ Бо́жий челове́к е́сть, ты́ же, о́тче Иоа́нне, зерца́ло любве́ Бо́жией пресве́тло бы́л еси́ и до́м Святы́я Тро́ицы, Юже и мы́ гре́шнии прославля́ем.

Юже от Го́спода благода́ть прия́л еси́, во е́же неду́ги и стра́сти исцеля́ти челове́ком, то́ю и на́с при́сно посеща́й, да вси́ с тобо́ю единому́дренно пое́м: благослове́н еси́, Го́споди Бо́же, во ве́ки.

Богородичен: Влады́чице, спаси́ ро́д Тво́й, спаси́ единокро́вныя Твоя́. Спаси́ ны, Ма́ти Живота́ и всего́ ро́да челове́ча, а́ще и недосто́йни есмы́ Тя́ Ма́терь себе́ нарещи́, освяти́, утверди́ и спаси́ на́с моли́твами Твои́ми.

Пе́снь 8.

Ирмос: Ру́це распросте́р Дании́л, льво́в зия́ния в ро́ве затче́; о́гненную же си́лу угаси́ша, доброде́телию препоя́савшеся, благоче́стия рачи́тели, о́троци, взыва́юще: благослови́те, вся́ дела́ Госпо́дня, Го́спода.

Очи́сти сердца́ и мы́сли на́ша моли́твами твои́ми, и я́ко зе́млю плодоно́сну, покажи́ ны́, да доброде́телию препоя́савшеся, зове́м: благослови́те вся́ дела́ Госпо́дня Го́спода.

Венце́м благода́тных даро́в венча́лся еси́, прему́дрость вы́сшую созерца́я и при́сно зовы́й: благослови́те вся́ дела́ Госпо́дня Го́спода.

Тро́ичен: Сла́ва Тебе́, Всесвяты́й животворя́щий Ду́ше, от Отца́ исходя́й и в Сы́не при́сно почива́яй; сла́ва Тебе́, Сы́не Бо́жий, Святы́м Ду́хом освяща́яй, укрепля́яй и умудря́яй на́с; сла́ва Тебе́, О́тче, благоволя́й о на́с при́сно Ду́хом Святы́м: неразде́льная Тро́ице Еди́нице, поми́луй на́с.

Богородичен: Я́же ми́ру ро́ждшая спасе́ние, ра́дуйся, Тобо́ю бо от земли́ на высоту́ взя́ти бы́хом; ра́дуйся, Благослове́нная, покро́ве и держа́во, стено́ и утвержде́ние, пою́щим: Го́спода воспева́йте дела́ и превозноси́те Его́ во ве́ки.

На 9-й песни поем песнь Пресвятыя Богородицы:

Вели́чит душа́ Моя́ Го́спода и возра́довася дух Мой о Бо́зе Спа́се Мое́м.

К коемуждо стиху припеваем: Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Я́ко призре́ на смире́ние рабы́ Своея́, се бо, от ны́не ублажа́т Мя вси ро́ди.

Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Я́ко сотвори́ Мне вели́чие Си́льный, и свя́то и́мя Его́, и ми́лость Его́ в ро́ды родо́в боя́щимся Его́.

Сотвори́ держа́ву мы́шцею Свое́ю, расточи́ го́рдыя мы́слию се́рдца их.

Низложи́ си́льныя со престо́л, и вознесе́ смире́нныя, а́лчущия испо́лни благ, и богатя́щияся отпусти́ тщи.

Восприя́т Изра́иля о́трока Своего́, помяну́ти ми́лости, я́коже глаго́ла ко отце́м на́шим, Авраа́му и се́мени его́ да́же до ве́ка.

Пе́снь 9.

Ирмос: Ка́мень нерукосе́чный от несеко́мыя горы́, Тебе́, Де́во, краеуго́льный отсече́ся — Христо́с, совокупи́вый разстоя́щаяся естества́. Те́м, веселя́щеся, Тя́, Богоро́дице, велича́ем.

Вои́стину све́т ми́ру бы́л еси́, о́тче святы́й, Боже́ственными бо де́тельми ду́шу удобри́в, па́стырь изря́ден правосла́вныя Це́ркве яви́лся еси́, все́м ве́рным о́браз бы́в сло́вом и житие́м, сего́ ра́ди тя́ ублажа́ем.

Еди́наго Соде́теля, Имже и о Не́мже вся́ческая во все́х, вы́ну предзря́ пред умо́м свои́м. Тому́ чи́стым се́рдцем и небла́зненною душе́ю все́м житие́м твои́м порабо́тал еси́, я́ко Го́споду своему́, рабо́тою маммо́не ника́коже прирази́вся.

Кня́зи восхвали́ша и наро́д мно́г просла́ви тя́, ты́ же сла́ву земну́ю презре́в, в ве́чных оби́телех Бо́жиих возжела́л еси́ бы́ти и та́мо прославля́ти Го́спода во ве́ки.

Богородичен: Иже Преве́чен Сы́й сни́де во утро́бу Твою́, Пресвята́я Де́во, и неизрече́нно, па́че ума́ и сло́ва, роди́ся от Тебе́, да обнови́т дре́вняго Ада́ма, те́м Тя́, я́ко Вино́вницу на́шего обновле́ния, при́сно велича́ем.

Свети́лен:

В хра́ме Первозва́ннаго ученика́ Христо́ва священноде́йствуя, и того́ апо́стольское служе́ние ве́ры ре́вностно подража́я, де́латель до́брый са́да Христо́ва бы́л еси́, и я́ко пло́д мно́г ве́рныя ко Го́споду твоему́ приве́л еси́, чрез все́ житие́ вы́ну веща́я: моя́ жи́знь во Христе́ е́сть.

Сла́ва, и ны́не, Богородичен:

Иже от Тебе́ рожде́йся, Пресвята́я Де́во, и от Ду́ха Своего́ излия́вый на вся́ку пло́ть, освяти́, просла́ви и прия́т в селе́ния Своя́ ве́рнаго служи́теля Своего́, моли́твенника, пропове́дника, еще́ же и проро́ка, с ни́мже не преста́й моля́щи за чту́щия Тя́.

Хвали́тны псалмы́, глас 8:

Вся́кое дыха́ние да хва́лит Го́спода./ Хвали́те Го́спода с небе́с,/ хвали́те Его́ в вы́шних.// Тебе́ подоба́ет песнь Бо́гу.

Хвали́те Его́ вси а́нгели Его́,/ хвали́те Его́ вся си́лы Его́.// Тебе́ подоба́ет песнь Бо́гу.

Сти́хиры, глас 8:

Стих: Сотвори́ти в них суд напи́сан/ сла́ва сия́ бу́дет всем преподо́бным Его́.

О, прера́достныя по́вести: / Бо́га мо́лит о́трок Иоа́нн, / Бо́жия про́сит ми́лости, / е́же просвети́ти ему́ смы́сл, / ни́ц просте́рся пред ико́ною, / ско́рбь души́ пред Бо́гом испове́дуя. / И се́ пелена́ от о́чию ума́ о́троча снима́ется, / и све́том Христо́вым о́трок озаря́ется, / да ве́лия сотвори́т и мно́ги научи́т.

Стих: Хвали́те Его́ на си́лах Его́,/ хвали́те Его́ по мно́жеству вели́чествия Его́.

Стих: Хвали́те Его́ в тимпа́не и ли́це,/ хвали́те Его́ во стру́нах и орга́не.

О, чуде́с преизоби́лие! / О, любве́ живо́е облиста́ние! / Кто́ не подиви́тся твоему́ благотворе́нию / и е́же к убо́гим милосе́рдию? / Сла́вному Лики́йских Мѵ́р святи́телю / неисче́тностию чуде́с подо́бился еси́. / Те́мже гра́ды и ве́си земли́ Ру́сския, / Иоа́нне пра́ведне, / ви́деша тобо́ю све́т Христо́в.

Стих: Хвали́те Его́ в кимва́лех доброгла́сных, хвали́те Его́ в кимва́лех восклица́ния. / Вся́кое дыха́ние да хва́лит Го́спода.

Якоже све́т и теплота́ / со́лнцу неразлу́чни, / та́ко и тебе́ свя́тость и учи́тельство, / любы́ и милосе́рдие прису́щи бы́ша, / Иоа́нне свяще́ннейший, / лю́дем богодарова́нне. / Те́мже, о па́стырю, / бу́ди согрева́я и просвеща́я на́с, / бу́ди, я́коже со́лнце, душа́м на́шим.

Глас 7: Сла́ва Отцу́ и Сы́ну и Свято́му Ду́ху

Покланя́яся святы́м ико́нам, сла́влю Христа́ Бо́га воплоще́нна, Образ сла́вы Отчия; испове́дую Отца́, безнача́льно Сы́на роди́вшаго; прославля́ю богоподо́бие челове́ков, и́же хра́мы Свята́го Ду́ха су́ть; зря́ же креста́ о́браз, в чу́встве и́мам си́лу Креста́ Животворя́щаго, — се́ е́сть богосло́вие твое́, о́тче святы́й, и́мже вели́ким учи́телем Це́ркве уподо́бился еси́, о́бразы иконопи́снии во сла́ву первообра́зных почита́я.

Глас 7: И ны́не и при́сно и во ве́ки веко́в. Ами́нь.

Роди́лся еси́ от Де́вы несказа́нно, Христе́, и просвети́л еси́ су́щия во тьме́, вопию́щия: Го́споди, сла́ва Тебе́.

Славосло́вие вели́кое:

Сла́ва в вы́шних Бо́гу, и на земли́ мир, в челове́цех благоволе́ние. Хва́лим Тя, благослови́м Тя, кла́няем Ти ся, славосло́вим Тя, благодари́м Тя, вели́кия ра́ди сла́вы Твоея́. Го́споди Царю́ Небе́сный, Бо́же О́тче Вседержи́телю, Го́споди, Сы́не Единоро́дный, Иису́се Христе́, и Святы́й Ду́ше. Го́споди Бо́же, А́гнче Бо́жий, Сы́не Оте́чь, взе́мляй грех ми́ра, поми́луй нас; взе́мляй грехи́ ми́ра, приими́ моли́тву на́шу; седя́й одесну́ю Отца́, поми́луй нас. Я́ко Ты еси́ еди́н Свят, Ты еси́ еди́н Госпо́дь, Иису́с Христо́с, в сла́ву Бо́га Отца́. Ами́нь.

На всяк день благословлю́ Тя, и восхвалю́ И́мя Твое́ во ве́ки, и в век ве́ка.

Сподо́би, Го́споди, в день сей без греха́ сохрани́тися нам. Благослове́н еси́, Го́споди, Бо́же оте́ц на́ших, и хва́льно и просла́влено И́мя Твое́ во ве́ки. Ами́нь.

Бу́ди, Го́споди, ми́лость Твоя́ на нас, я́коже упова́хом на Тя.

Благослове́н еси́, Го́споди, научи́ мя оправда́нием Твои́м. (Три́жды)

Го́споди, прибе́жище был еси́ нам в род и род. Аз рех: Го́споди, поми́луй мя, исцели́ ду́шу мою́, я́ко согреши́х Тебе́. Го́споди, к Тебе́ прибего́х, научи́ мя твори́ти во́лю Твою́, я́ко Ты еси́ Бог мой: я́ко у Тебе́ исто́чник живота́, во све́те Твое́м у́зрим свет. Проба́ви ми́лость Твою́ ве́дущим Тя.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Три́жды)

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Святы́й Безсме́ртный, поми́луй нас.

Святы́й Бо́же, Святы́й Кре́пкий, Святы́й Безсме́ртный, поми́луй нас.

Тропа́рь, глас 4:

Утверди́, Бо́же, святу́ю правосла́вную ве́ру, правосла́вных христиа́н во век ве́ка.

Честне́йшую Херуви́м и Сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу, Тя велича́ем.

Сла́ва, и ны́не. Го́споди, поми́луй. (Три́жды) Благослови́.

Господи Иисусе Христе, Сыне Божий, моли́твами Пречи́стыя Своея́ Ма́тере, святаго праведного Иоанна Кронштадтского, преподобных и богоносных отец наших и всех святы́х, поми́луй и спаси нас я́ко Благ и Челове́колюбец.

Многоле́тие:

Вели́каго Господи́на и Отца́ на́шего Кири́лла,/ Святе́йшаго Патри́арха Моско́вского и всея́ Руси́,/ и Господи́на на́шего (Высоко-) Преосвяще́ннейшаго (имярек),/ (архи-)епи́скопа (митрополита (титул)),/ богохрани́мую страну́ на́шу Росси́йскую,/ и вся правосла́вныя христи́аны,// Го́споди, сохрани́ их на мно́гая ле́та.