Шрифт

▲

Богослужебные тексты для домашнего употребления

Дни памяти святых

Последование Всеношного бдения в день памяти преподобного Антония Дымского. Для домашнего (келейного) совершения

Оглавление

ВСЕНО́ЩНОЕ БДЕ́НИЕ

ВЕЛИ́КАЯ ВЕЧЕ́РНЯ

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас. Ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Трижды.)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, (трижды). Сла́ва, и ны́не:

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Таже, Го́споди, поми́луй, (12), Сла́ва, и ны́не:

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 103:

Поется часть псалма:

Благослови́, душе́ моя́, Го́спода. / Благослове́н еси́, Го́споди. / Го́споди, Бо́же мой, возвели́чился еси́ зело́. / Благослове́н еси́, Го́споди. / Во испове́дание и в велеле́поту обле́клся еси́. / Благослове́н еси́, Го́споди. / Посреде́ гор про́йдут во́ды. / Ди́вна дела́ Твоя́, Го́споди. / Вся прему́дростию сотвори́л еси́. / Сла́ва Ти, Го́споди, сотвори́вшему вся.

Или читается псалом полностью:

Благослови́, душе́ моя́, Го́спода. Го́споди, Бо́же мой, возвели́чился еси́ зело́. Во испове́дание и в велеле́поту обле́клся еси́. Одея́йся све́том, я́ко ри́зою, простира́яй не́бо, я́ко ко́жу. Покрыва́яй вода́ми превы́спренняя Своя́, полага́яй о́блаки на восхожде́ние Свое́, ходя́й на крилу́ ве́треню. Творя́й А́нгелы Своя́ ду́хи и слуги́ Своя́ пла́мень о́гненный. Основа́яй зе́млю на тве́рди ея́, не преклони́тся в век ве́ка. Бе́здна, я́ко ри́за, одея́ние ея́, на гора́х ста́нут во́ды, от запреще́ния Твоего́ побе́гнут, от гла́са гро́ма Твоего́ убоя́тся. Восхо́дят го́ры и нисхо́дят поля́ в ме́сто, е́же основа́л еси́ им. Преде́л положи́л еси́, eго́же не пре́йдут, ниже́ обратя́тся покры́ти зе́млю. Посыла́яй исто́чники в де́брех, посреде́ гор про́йдут во́ды. Напая́ют вся зве́ри се́льныя, ждут она́гри в жа́жду свою́. На ты́х пти́цы небе́сныя привита́ют, от среды́ ка́мения дадя́т глас. Напая́яй го́ры от превы́спренних Свои́х, от плода́ дел Твои́х насы́тится земля́. Прозяба́яй траву́ ското́м, и злак на слу́жбу челове́ком, извести́ хлеб от земли́. И вино́ весели́т се́рдце челове́ка, ума́стити лице́ еле́ем, и хлеб се́рдце челове́ка укрепи́т. Насы́тятся древа́ польска́я, ке́дри Лива́нстии, и́хже еси́ насади́л. Та́мо пти́цы вогнездя́тся, ероди́ево жили́ще предводи́тельствует и́ми. Го́ры высо́кия еле́нем, ка́мень прибе́жище за́яцем. Сотвори́л есть луну́ во времена́, со́лнце позна́ за́пад свой. Положи́л еси́ тму, и бысть нощь, в не́йже про́йдут вси зве́рие дубра́внии. Ски́мни рыка́ющии, восхи́тити и взыска́ти от Бо́га пи́щу себе́. Возсия́ со́лнце и собра́шася и в ло́жах свои́х ля́гут. Изы́дет челове́к на де́ло свое́ и на де́лание свое́ до ве́чера. Я́ко возвели́чишася дела́ Твоя́, Го́споди, вся прему́дростию сотвори́л еси́, испо́лнися земля́ тва́ри Твоея́. Сие́ мо́ре вели́кое и простра́нное, та́мо га́ди, и́мже несть числа́, живо́тная ма́лая с вели́кими, та́мо корабли́ препла́вают, змий сей, eго́же созда́л еси руга́тися eму́. Вся к Тебе́ ча́ют, да́ти пи́щу им во бла́го вре́мя. Да́вшу Тебе́ им соберу́т, отве́рзшу Тебе́ ру́ку вся́ческая испо́лнятся бла́гости, отвра́щшу же Тебе́ лице́, возмяту́тся, отъи́меши дух их, и исче́знут, и в персть свою́ возвратя́тся. По́слеши Ду́ха Твоего́, и сози́ждутся, и обнови́ши лице́ земли́. Бу́ди сла́ва Госпо́дня во ве́ки, возвесели́тся Госпо́дь о де́лех Свои́х, призира́яй на зе́млю, и творя́й ю́ трясти́ся, прикаса́яйся гора́м, и дымя́тся. Воспою́ Го́сподеви в животе́ мое́м, пою́ Бо́гу моему́, до́ндеже есмь, да услади́тся Ему́ бесе́да моя́, аз же возвеселю́ся о Го́споде. Да исче́знут гре́шницы от земли́, и беззако́нницы, я́коже не бы́ти им. Благослови́, душе́ моя́, Го́спода.

Со́лнце позна́ за́пад свой. Положи́л еси́ тму, и бысть нощь. Я́ко возвели́чишася дела́ Твоя́, Го́споди, вся прему́дростию сотвори́л еси́.

Сла́ва, и ны́не: Аллилу́иа, аллилу́иа, аллилу́иа, сла́ва Тебе́ Бо́же. Трижды.

Блаже́н муж:

Блаже́н муж, и́же не и́де на сове́т нечести́вых.

Аллилу́иа, аллилу́иа, аллилу́иа.

Я́ко весть Госпо́дь путь пра́ведных, и путь нечести́вых поги́бнет.

Аллилу́иа, аллилу́иа, аллилу́иа.

Рабо́тайте Го́сподеви со стра́хом и ра́дуйтеся Ему́ с тре́петом.

Аллилу́иа, аллилу́иа, аллилу́иа.

Блаже́ни вси наде́ющиися Нань.

Аллилу́иа, аллилу́иа, аллилу́иа.

Воскресни́, Го́споди, спаси́ мя, Бо́же мой.

Аллилу́иа, аллилу́иа, аллилу́иа.

Госпо́дне есть спасе́ние, и на лю́дех Твои́х благослове́ние Твое́.

Аллилу́иа, аллилу́иа, аллилу́иа.

Сла́ва Отцу́ и Сы́ну и Свято́му Духу.

Аллилу́иа, аллилу́иа, аллилу́иа.

И ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Го́споди, воззва́х, глас 5:

Го́споди, воззва́х к Тебе́, услы́ши мя./ Услы́ши мя, Го́споди./ Го́споди, воззва́х к Тебе́, услы́ши мя:/ вонми́ гла́су моле́ния моего́,/ внегда́ воззва́ти ми к Тебе́.// Услы́ши мя, Го́споди.

Да испра́вится моли́тва моя́,/ я́ко кади́ло пред Тобо́ю,/ воздея́ние руку́ мое́ю/ – же́ртва вече́рняя.// Услы́ши мя, Го́споди.

Стихи́ры пра́здника, глас 5:

Стих: А́ще беззако́ния на́зриши, Го́споди, Го́споди, кто постои́т? Я́ко у Тебе́ очище́ние есть.

Мирска́го мяте́жа удали́лся еси́, преподо́бне, и, взе́м кре́ст сво́й, после́довал еси́ Христу́, неосла́бно же ше́ствуя во сле́д Его́, душе́вныя и теле́сныя стра́сти победи́л еси́, те́мже и прия́л еси́ от Всеси́льнаго Бо́га благода́ть цели́ти неду́ги, Ангельский дру́же и преподо́бных сожи́телю, моли́ся ко Го́споду дарова́ти душа́м на́шим ми́р и ве́лию ми́лость.

Стих: И́мене ра́ди Твоего́ потерпе́х Тя, Го́споди, потерпе́ душа́ моя́ в сло́во Твое́, упова́ душа́ моя́ на Го́спода.

Кто́ испове́сть, преподо́бне о́тче, труды́ твоя́ и по́двиги? или́ ки́й язы́к изочте́т бде́ния и посты́ твоя́? Чистоту́ бо душе́вную и теле́сную возлюби́л еси́, смире́ние же нелицеме́рное ко все́м стяжа́л еси́, ча́с сме́ртный всегда́ помышля́я, Анто́ние преподо́бне, моли́ Христа́ Бо́га спасти́ся душа́м на́шим.

Стих: От стра́жи у́тренния до но́щи, от стра́жи у́тренния да упова́ет Изра́иль на Го́спода.

Преподо́бне о́тче Анто́ние, ты́ вра́чь душа́м и телесе́м яви́лся еси́, источа́я оби́льно неду́жным исцеле́ния, и все́м, притека́ющим к тебе́ с ве́рою, защи́тник и покро́в от искуше́ний вра́жиих ско́рый еси́, и ны́не о на́с моли́ся, преподо́бне, да спасе́т Госпо́дь ду́ши на́ша, я́ко Благоутро́бен.

Стих: Я́ко у Го́спода ми́лость, и мно́гое у Него́ избавле́ние, и Той изба́вит Изра́иля от всех беззако́ний eго́.

Терпе́л еси́ му́жественно ско́рби, о́тче преподо́бне, услажда́яся бу́дущим воздая́нием, вопия́ с Па́влом и глаго́ля: недосто́йны стра́сти ны́нешняго вре́мене к хотя́щей сла́ве яви́тися; лю́ты ско́рби, но сла́док ра́й; боле́зненны труды́, но ве́чно упокое́ние; ма́ло претерпи́м, да мно́гая и неги́бнущая прии́мем от Христа́ Го́спода и Спа́са ду́ш на́ших.

Стих: Хвали́те Го́спода вси язы́цы, похвали́те Его́ вси лю́дие.

Удали́лся еси́, преподо́бне, от оби́тели преподо́бнаго Варлаа́ма, и прише́л еси́ в сию́ непроходи́мую и нике́м же населя́емую пусты́ню, и водвори́лся еси́ зде́, ча́я Бо́га, спаса́ющаго тя́ от востаю́щих на тя́ враго́в, вооружи́вся же посто́м и бде́нием, победи́л еси́ вся́ ко́зни и́х, и ны́не моли́ся ко Го́споду о соверша́ющих, преподо́бне о́тче, па́мять твою́.

Стих: Я́ко утверди́ся ми́лость Его́ на нас, и и́стина Госпо́дня пребыва́ет во век.

За пла́чь и воздыха́ние вре́менное восприя́л еси́, о́тче преподо́бне, ны́не весе́лие и ра́дость ве́чную, за вся́ боле́зни и труды́ твоя́ жесто́кия упокоева́ешися в не́дрех Отца́ Небе́снаго, за оставле́ние ми́ра и все́х, я́же в не́м су́ть су́етна, вкуша́еши сла́дость неизглаго́ланную и за уедине́нное житие́ свое́ всели́лся еси́ в селе́ние пра́ведных и наслажда́ешися лицезре́ния Бо́жия, поя́ и хваля́ Го́спода со все́ми святы́ми пе́сньми ра́достными.

Глас 8: Сла́ва Отцу́ и Сы́ну и Свято́му Ду́ху.

Прииди́те, и́стиннии после́дователи Христо́вы, прииди́те, отве́ргшиися пре́лестей ми́ра: се́ бо возсия́ на́м, я́ко со́лнце све́тлое, па́мять преподо́бнаго Анто́ния, и, соше́дшеся в це́рковь, иде́же лежи́т многотру́дное его́ те́ло, воскли́кните с на́ми единоду́шно хвалу́ Бо́гу на́шему, да́вшему стране́ на́шей такова́го подви́жника, и возопии́м, глаго́люще: ра́дуйся, преподо́бне о́тче Анто́ние, я́ко после́дователь ве́рен бы́л еси́ Христу́ Влады́це; ра́дуйся, я́ко насле́довал еси́ Ца́рство небе́сное; ра́дуйся, я́ко ра́дуешися ра́достию ве́чною и ра́дости твоея́ никто́же во́змет от тебе́; ра́дуйся, я́ко соца́рствовати Христу́ Го́споду и́маши ве́чно, Его́же моли́, преподо́бне, ниспосла́ти Це́ркви единомы́слие, на враги́ победи́тельная и душа́м на́шим ве́лию ми́лость.

Глас 8: И ны́не и при́сно и во ве́ки веко́в. Ами́нь.

Ца́рь Небе́сный за человеколю́бие на земли́ яви́ся и с челове́ки поживе́, от Де́вы бо Чи́стыя пло́ть прие́мый и из Нея́ проше́дый с восприя́тием, еди́н е́сть Сы́н, сугу́б естество́м, но не ипоста́сию. Те́мже, соверше́нна Того́ Бо́га и соверше́нна Челове́ка вои́стинну пропове́дающе, испове́дуем Христа́ Бо́га на́шего: Его́же моли́, Ма́ти Безневе́стная, поми́ловатися душа́м на́шим.

Све́те Тихи́й:

Све́те Ти́хий святы́я сла́вы Безсме́ртнаго Отца́ Небе́снаго, Свята́го, Блаже́ннаго, Иису́се Христе́! Прише́дше на за́пад со́лнца, ви́девше свет вече́рний, пое́м Отца́, Сы́на и Свята́го Ду́ха, Бо́га. Досто́ин еси́ во вся времена́ пет бы́ти гла́сы преподо́бными, Сы́не Бо́жий, живо́т дая́й; те́мже мир Тя сла́вит.

Пареми́и:

1. Прему́дрости Соломо́ни чте́ние.

Пра́ведных ду́ши в руце́ Бо́жией, и не прико́снется и́х му́ка. Непщева́ни бы́ша во очесе́х безу́мных умре́ти, и вмени́ся озлобле́ние исхо́д и́х, и е́же от на́с ше́ствие — сокруше́ние, они́ же су́ть в ми́ре. Ибо пред лице́м челове́ческим, а́ще и му́ку прии́мут, упова́ние и́х безсме́ртия испо́лнено. И вма́ле нака́зани бы́вше, вели́кими благоде́тельствовани бу́дут, я́ко Бо́г искуси́ я́ и обре́те и́х досто́йны Себе́. Я́ко зла́то в горни́ле, искуси́ и́х и, я́ко всепло́дие же́ртвенное, прия́т я́. И во вре́мя посеще́ния и́х, возсия́ют, и я́ко и́скры по сте́блию, потеку́т. Су́дят язы́ком и облада́ют людьми́, и воцари́тся Госпо́дь в ни́х во ве́ки. Наде́ющиися На́нь разуме́ют и́стину и ве́рнии в любви́ пребу́дут Ему́, я́ко благода́ть и ми́лость в преподо́бных Его́ и посеще́ние во избра́нных Его́.

2. Прему́дрости Соломо́ни чте́ние

Пра́ведницы во ве́ки живу́т, и в Го́споде мзда́ и́х, и попече́ние и́х у Вы́шняго. Сего́ ра́ди прии́мут ца́рствие благоле́пия и вене́ц добро́ты от руки́ Госпо́дни, зане́ десни́цею покры́ет я́ и мы́шцею защити́т и́х. Прии́мет всеору́жие — рве́ние свое́ и вооружи́т тва́рь в ме́сть враго́м. Облече́тся в броня́ пра́вды и возложи́т шле́м — су́д нелицеме́рен. Прии́мет щи́т непобеди́мый — преподо́бие, поостри́т же напра́сный гне́в — во ору́жие, спобо́рет же с ни́м ми́р на безу́мныя. По́йдут праволу́чныя стре́лы мо́лниины и, я́ко от благокру́гла лу́ка облако́в, на наме́рение полетя́т, и от каменоме́тныя я́рости испо́лнь паду́т гра́ды. Вознегоду́ет на ни́х вода́ морска́я, ре́ки же потопя́т я́ на́гло. Сопроти́в ста́нет и́м ду́х си́лы и, я́ко ви́хор, разве́ет и́х, и опустоши́т всю́ зе́млю беззако́ние, и злоде́йство преврати́т престо́лы си́льных. Слы́шите у́бо, ца́рие, и разуме́йте, навы́кните, судии́ конце́в земли́. Внуши́те держа́щии мно́жества и гордя́щиися о наро́дех язы́ков, я́ко дана́ е́сть от Го́спода держа́ва ва́м и си́ла от Вы́шняго.

3. Прему́дрости Соломо́ни чте́ние

Пра́ведник, а́ще пости́гнет сконча́тися, в поко́и бу́дет. Ста́рость бо честна́ не многоле́тна, ниже́ в числе́ ле́т исчита́ется. Седи́на же е́сть му́дрость челове́ком, и во́зраст ста́рости — житие́ нескве́рное. Благоуго́ден Бо́гови бы́в, возлю́блен бы́сть, и живы́й посреде́ гре́шник, преста́влен бы́сть. Восхище́н бы́сть, да не зло́ба измени́т ра́зума его́ или́ ле́сть прельсти́т ду́шу его́. Раче́ние бо зло́бы помрача́ет до́брая и паре́ние по́хоти, пременя́ет у́м незло́бив. Сконча́вся вма́ле, испо́лни ле́та до́лга, уго́дна бо бе́ Го́сподеви душа́ его́, сего́ ра́ди потща́ся от среды́ лука́вствия. Лю́дие же ви́девше и не разуме́вше, ниже́ поло́жше в помышле́нии таково́е, я́ко благода́ть и ми́лость в преподо́бных Его́ и посеще́ние во избра́нных Его́.

Го́споди, поми́луй. (Три́жды,)

Сподо́би, Го́споди:

Сподо́би, Го́споди, в ве́чер сей без греха́ сохрани́тися нам. Благослове́н еси́, Го́споди, Бо́же оте́ц на́ших, и хва́льно и просла́влено и́мя Твое́ во ве́ки. Ами́нь.

Бу́ди, Го́споди, ми́лость Твоя́ на нас, я́коже упова́хом на Тя. Благослове́н еси́, Го́споди, научи́ мя оправда́нием Твои́м. Благослове́н еси́, Влады́ко, вразуми́ мя оправда́нием Твои́м. Благослове́н еси́, Святы́й, просвети́ мя оправда́нии Твои́ми.

Го́споди, ми́лость Твоя́ во век, дел руку́ Твое́ю не пре́зри. Тебе́ подоба́ет хвала́, Тебе́ подоба́ет пе́ние, Тебе́ сла́ва подоба́ет. Отцу́ и Сы́ну и Свято́му Ду́ху, ны́не и при́сно и во ве́ки веко́в. Ами́нь.

На лити́и стихи́ры, гла́с 3:

Ве́ра твоя́, преподо́бне о́тче, яви́ся от де́л твои́х, и правосла́вие твое́ утвержда́ют чудеса́ твоя́, я́же источа́ет многоцеле́бная ра́ка моще́й твои́х, те́мже вопие́м ти́: испроси́, преподо́бне, от Христа́ Спа́са грехо́в на́ших оставле́ние и душа́м на́шим ве́лию ми́лость.

Наде́жда твоя́ на Го́спода Бо́га бы́сть, о́тче, несомне́нна и упова́ние непоколеби́мо, сего́ ра́ди Ве́чный тя́ просла́ви чуде́с да́ром, и то́чиши исцеле́ния приходя́щим ко гро́бу твоему́, и ны́не мо́лишися о душа́х на́ших.

Любо́вь име́л еси́ ве́лию ко Го́споду, и соблю́л еси́ сло́во за́поведей Его́, о́тче, и соедини́лся еси́ ве́чно ду́хом с Ни́м, вопия́ апо́стольски: ничто́же мя́ разлучи́т от любве́ Твоея́, Иису́се Человеколю́бче.

Сла́ва, гла́с 6:

Челове́че небе́сный и земны́й Ангеле, преподо́бне о́тче Анто́ние, возше́л еси́ на ле́ствицу доброде́телей, и по не́й дости́гл еси́ вы́шняго гра́да, го́рняго Иерусали́ма, и та́мо ны́не наслажда́ешися лицезре́ния жела́емаго Христа́ Бо́га, Его́же ра́ди и пло́ть свою́ изнури́л еси́ и жи́знь сме́ртную на безсме́ртную премени́л еси́, Ему́же о на́с моли́тися не преста́й, да изба́вимся от искуше́ний и да ми́лостива Его́ Судию́ обря́щем в де́нь Су́дный моли́твами твои́ми, преподо́бне.

И ны́не, богоро́дичен:

Богоро́дице Де́во Чи́стая, моли́ся ко Го́споду, я́ко да Твои́ми моли́твами пода́ст душа́м на́шим грехо́в оставле́ние, ми́р и ве́лию ми́лость.

Го́споди, поми́луй. (40 раз)

Стихи́ры на стихо́вне:

Стихи́ры: Глас 2:

Све́тлая и свяще́нная па́мять преподо́бнаго Анто́ния приспе́ дне́сь, о духо́внии празднолю́бцы! в ню́же соше́дшеся, просла́вим Христа́ Бо́га, и Его́ уго́днику Анто́нию воспое́м пе́снь, лико́вственно глаго́люще: Ангелов собесе́дниче, по́стников наста́вниче, о́тче на́ш Анто́ние, моли́твами твои́ми да испро́сиши, мо́лимся, от Христа́ Бо́га земли́ плодоно́сие, возду́ха благорастворе́ние, и грехо́в оставле́ние, и ве́лию ми́лость.

Стих: Честна́ пред Го́сподем сме́рть преподо́бных Его́.

Сме́рть твоя́, преподо́бне, вои́стинну успе́ние бы́сть, те́ло бо твое́ не ви́де нетле́ния; а́ще бо и преста́вился еси́ от на́с, па́стырю до́брый, но ду́хом с на́ми пребыва́еши неразлу́чно и мо́лишися о душа́х на́ших.

Стих: Блаже́н му́ж, боя́йся Го́спода, в за́поведех Его́ восхо́щет зело́.

Блаже́нне Анто́ние, основа́ние положи́в доброде́телей, ве́тхаго челове́ка совле́клся еси́ до конца́, и обле́клся еси́ в но́ваго в преподо́бии и пра́вде, и победи́л еси́ вра́жия ополче́ния, наста́вник мона́хов бы́в, и ны́не моли́ спасти́ся душа́м на́шим.

Слава, глас 6: Блаже́нное житие́ твое́, о́тче на́ш Анто́ние, блаже́нную кончи́ну плодопринесе́ тебе́, и сме́ртию твое́ю преше́л еси́ в жи́знь неконча́емую, и водворя́ешися в небе́сном Ца́рствии, иде́же о на́с моли́тися не преста́й, ве́рно зову́щих ти́: ра́дуйся, благи́й и ве́рный ра́бе Христо́в, вше́дый в ра́дость Го́спода твоего́.

И ныне, глас 6:

Богоро́дице, Ты́ еси́ лоза́ и́стинная, возрасти́вшая на́м Пло́д живота́, Тебе́ мо́лимся: моли́ся, Влады́чице, со святы́ми апо́столы поми́ловати ду́ши на́ша.

Моли́тва свята́го Симео́на Богоприи́мца:

Ны́не отпуща́еши раба́ Твоего́, Влады́ко,/ по глаго́лу Твоему́, с ми́ром;/ я́ко ви́деста о́чи мои́ спасе́ние Твое́,/ е́же еси́ угото́вал пред лице́м всех люде́й,/ свет во открове́ние язы́ков,// и сла́ву люде́й Твои́х Изра́иля.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Го́споди, поми́луй. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Тропа́рь, глас 4:

Доброде́телей ревни́телю, пусты́нный жи́тель, подви́жник ве́ры Христа́ Бо́га на́шего, ноше́нием и труды́ умертви́вый плотска́я вожделе́ния, тезоимени́те вели́кому Анто́нию, его́же житию́ поревнова́л еси́ и во его́же и́мя Боже́ственный хра́м воздви́гл еси́, ку́пно с ни́м, преподо́бне Анто́ние, моли́ Спаси́теля все́х, да и на́с сотвори́т победи́тели плотски́х по́хотей и хра́мы Ду́ха Свята́го, по вели́цей Его́ ми́лости.

Слава, и ныне, богоро́дичен, по гласу:

Еже от ве́ка утае́нное, и Ангелом несве́домое та́инство: Тобо́ю, Богоро́дице, су́щим на земли́ яви́ся, Бо́г в несли́тном соедине́нии воплоща́емь, и кре́ст во́лею на́с ра́ди восприи́м, и́мже воскреси́в первозда́ннаго, спасе́ от сме́рти ду́ши на́ша.

Бу́ди И́мя Госпо́дне благослове́но от ны́не и до ве́ка. (Три́жды)

Псало́м 33:

Благословлю́ Го́спода на вся́кое вре́мя,/ вы́ну хвала́ Его́ во усте́х мои́х./ О Го́споде похва́лится душа́ моя́,/ да услы́шат кро́тцыи, и возвеселя́тся./ Возвели́чите Го́спода со мно́ю,/ и вознесе́м И́мя Его́ вку́пе./ Взыска́х Го́спода, и услы́ша мя,/ и от все́х скорбе́й мои́х изба́ви мя./ Приступи́те к Нему́, и просвети́теся,/ и ли́ца ва́ша не постыдя́тся./ Сей ни́щий воззва́, и Госпо́дь услы́ша и́,/ и от все́х скорбе́й его́ спасе́ и́./ Ополчи́тся а́нгел Госпо́день о́крест боя́щихся Его́,/ и изба́вит их./ Вкуси́те и ви́дите, я́ко благ Госпо́дь:/ блаже́н муж, и́же упова́ет Нань./ Бо́йтеся Го́спода, вси́ святи́и Его́,/ я́ко несть лише́ния боя́щимся Его́./ Бога́тии обнища́ша и взалка́ша:/ взыска́ющии же Го́спода// не лиша́тся вся́каго бла́га.

У́ТРЕНЯ.

Шестопса́лмие:

Сла́ва в вы́шних Бо́гу, и на земли́ мир, в челове́цех благоволе́ние. (Три́жды)

Го́споди, устне́ мои́ отве́рзеши, и уста́ моя́ возвестя́т хвалу́ Твою́. (Два́жды)

Псалом 3:

Го́споди, что ся умно́жиша стужа́ющии ми́? Мно́зи востаю́т на мя, мно́зи глаго́лют души́ мое́й: несть спасе́ния eму́ в Бо́зе eго́. Ты же, Го́споди, Засту́пник мой еси́, сла́ва моя́ и вознося́й главу́ мою́. Гла́сом мои́м ко Го́споду воззва́х, и услы́ша мя от горы́ святы́я Своея́. Аз усну́х, и спах, воста́х, я́ко Госпо́дь засту́пит мя. Не убою́ся от тем люде́й, о́крест напа́дающих на мя. Воскресни́, Го́споди, спаси́ мя, Бо́же мой, я́ко Ты порази́л еси́ вся вражду́ющыя ми всу́е: зу́бы гре́шников сокруши́л еси́. Госпо́дне есть спасе́ние, и на лю́дех Твои́х благослове́ние Твое́.

Аз усну́х, и спах, воста́х, я́ко Госпо́дь засту́пит мя.

Псалом 37:

Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́. Я́ко стре́лы Твоя́ унзо́ша во мне, и утверди́л еси́ на мне ру́ку Твою́. Несть исцеле́ния в пло́ти мое́й от лица́ гне́ва Твоего́, несть ми́ра в косте́х мои́х от лица́ грех мои́х. Я́ко беззако́ния моя́ превзыдо́ша главу́ мою́, я́ко бре́мя тя́жкое отяготе́ша на мне. Возсмерде́ша и согни́ша ра́ны моя́ от лица́ безу́мия моего́. Пострада́х и сляко́хся до конца́, весь день се́туя хожда́х. Я́ко ля́двия моя́ напо́лнишася поруга́ний, и несть исцеле́ния в пло́ти мое́й. Озло́блен бых и смири́хся до зела́, рыка́х от воздыха́ния се́рдца моего́. Го́споди, пред Тобо́ю все жела́ние мое́ и воздыха́ние мое́ от Тебе́ не утаи́ся. Се́рдце мое́ смяте́ся, оста́ви мя си́ла моя́, и свет о́чию мое́ю, и той несть со мно́ю. Дру́зи мои́ и и́скреннии мои́ пря́мо мне прибли́жишася и ста́ша, и бли́жнии мои́ отдале́че мене́ ста́ша и нужда́хуся и́щущии ду́шу мою́, и и́щущии зла́я мне глаго́лаху су́етная и льсти́вным весь день поуча́хуся. Аз же я́ко глух не слы́шах и я́ко нем не отверза́яй уст свои́х. И бых я́ко челове́к не слы́шай и не имы́й во усте́х свои́х обличе́ния. Я́ко на Тя, Го́споди, упова́х, Ты услы́шиши, Го́споди Бо́же мой. Я́ко рех: да не когда́ пора́дуют ми ся врази́ мои́: и внегда́ подвижа́тися нога́м мои́м, на мя велере́чеваша. Я́ко аз на ра́ны гото́в, и боле́знь моя́ предо мно́ю есть вы́ну. Я́ко беззако́ние мое́ аз возвещу́ и попеку́ся о гресе́ мое́м. Врази́ же мои́ живу́т и укрепи́шася па́че мене́, и умно́жишася ненави́дящии мя без пра́вды. Воздаю́щии ми зла́я возблага́я оболга́ху мя, зане́ гоня́х благосты́ню. Не оста́ви мене́, Го́споди Бо́же мой, не отступи́ от Мене́. Вонми́ в по́мощь мою́, Го́споди спасе́ния моего́.

Не оста́ви мене́, Го́споди Бо́же мой, не отступи́ от Мене́. Вонми́ в по́мощь мою́, Го́споди спасе́ния моего́.

Псалом 62:

Бо́же, Бо́же мой, к Тебе́ у́тренюю, возжада́ Тебе́ душа́ моя́, коль мно́жицею Тебе́ плоть моя́, в земли́ пу́сте и непрохо́дне, и безво́дне. Та́ко во святе́м яви́хся Тебе́, ви́дети си́лу Твою́ и сла́ву Твою́. Я́ко лу́чши ми́лость Твоя́ па́че живо́т, устне́ мои́ похвали́те Тя. Та́ко благословлю́ Тя в животе́ мое́м, о и́мени Твое́м воздежу́ ру́це мои́. Я́ко от ту́ка и ма́сти да испо́лнится душа́ моя́, и устна́ма ра́дости восхва́лят Тя уста́ моя́. А́ще помина́х Тя на посте́ли мое́й, на у́тренних поуча́хся в Тя. Я́ко был еси́ Помо́щник мой, и в кро́ве крилу́ Твое́ю возра́дуюся. Прильпе́ душа́ моя́ по Тебе́, мене́ же прия́т десни́ца Твоя́. Ти́и же всу́е иска́ша ду́шу мою́, вни́дут в преиспо́дняя земли́, предадя́тся в ру́ки ору́жия, ча́сти ли́совом бу́дут. Царь же возвесели́тся о Бо́зе, похва́лится всяк клены́йся Им, я́ко загради́шася уста́ глаго́лющих непра́ведная.

На у́тренних поуча́хся в Тя. Я́ко был еси́ Помо́щник мой, и в кро́ве крилу́ Твое́ю возра́дуюся. Прильпе́ душа́ моя́ по Тебе́, мене́ же прия́т десни́ца Твоя́.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Го́споди поми́луй. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Псалом 87:

Го́споди Бо́же спасе́ния моего́, во дни воззва́х, и в нощи́ пред Тобо́ю. Да вни́дет пред Тя моли́тва моя́: приклони́ у́хо Твое́ к моле́нию моему́, я́ко испо́лнися зол душа́ моя́, и живо́т мой аду прибли́жися. Привмене́н бых с низходя́щими в ров, бых я́ко челове́к без по́мощи, в ме́ртвых свобо́дь, я́ко я́звеннии спя́щии во гро́бе, и́хже не помяну́л еси́ ктому́, и ти́и от руки́ Твоея́ отринове́ни бы́ша. Положи́ша мя в ро́ве преиспо́днем, в те́мных и се́ни сме́ртней. На мне утверди́ся я́рость Твоя́, и вся во́лны Твоя́ наве́л еси́ на мя. Уда́лил еси́ зна́емых мои́х от Мене́, положи́ша мя ме́рзость себе́: пре́дан бых и не исхожда́х. О́чи мои́ изнемого́сте от нищеты́, воззва́х к Тебе́, Го́споди, весь день, возде́х к Тебе́ ру́це мои́. Еда́ ме́ртвыми твори́ши чудеса́? Или́ вра́чеве воскреся́т, и испове́дятся Тебе́? Еда́ пове́сть кто во гро́бе ми́лость Твою́, и и́стину Твою́ в поги́бели? Еда́ позна́на бу́дут во тьме чудеса́ Твоя́, и пра́вда Твоя́ в земли́ забве́нней? И аз к Тебе́, Го́споди, воззва́х и у́тро моли́тва моя́ предвари́т Тя. Вску́ю, Го́споди, отре́еши ду́шу мою́, отвраща́еши лице́ Твое́ от Мене́? Нищ есмь аз, и в труде́х от ю́ности моея́; возне́с же ся, смири́хся, и изнемого́х. На мне преидо́ша гне́ви Твои́, устраше́ния Твоя́ возмути́ша мя, обыдо́ша мя я́ко вода́, весь день одержа́ша мя вку́пе. Уда́лил еси́ от Мене́ дру́га и и́скренняго, и зна́емых мои́х от страсте́й.

Го́споди Бо́же спасе́ния моего́, во дни воззва́х, и в нощи́ пред Тобо́ю. Да вни́дет пред Тя моли́тва моя́: приклони́ у́хо Твое́ к моле́нию моему́.

Псалом 102:

Благослови́, душе́ моя́, Го́спода, и вся вну́тренняя моя́ и́мя свя́тое Его́. Благослови́, душе́ моя́, Го́спода, и не забыва́й всех воздая́ний Его́, очища́ющаго вся беззако́ния твоя́, исцеля́ющаго вся неду́ги твоя́, избавля́ющаго от истле́ния живо́т твой, венча́ющаго тя ми́лостию и щедро́тами, исполня́ющаго во благи́х жела́ние твое́: обнови́тся я́ко о́рля ю́ность твоя́. Творя́й ми́лостыни Госпо́дь, и судьбу́ всем оби́димым. Сказа́ пути́ Своя́ Моисе́ови, сыново́м Изра́илевым хоте́ния Своя́: Щедр и Ми́лостив Госпо́дь, Долготерпели́в и Многоми́лостив. Не до конца́ прогне́вается, ниже́ во век вражду́ет, не по беззако́нием на́шым сотвори́л есть нам, ниже́ по грехо́м на́шым возда́л есть нам. Я́ко по высоте́ небе́сней от земли́, утверди́л есть Госпо́дь ми́лость Свою́ на боя́щихся Его́. Ели́ко отстоя́т восто́цы от за́пад, уда́лил есть от нас беззако́ния на́ша. Я́коже ще́дрит оте́ц сы́ны, уще́дри Госпо́дь боя́щихся Его́. Я́ко Той позна́ созда́ние на́ше, помяну́, я́ко персть есмы́. Челове́к, я́ко трава́ дни́е eго́, я́ко цвет се́льный, та́ко оцвете́т, я́ко дух про́йде в нем, и не бу́дет, и не позна́ет ктому́ ме́ста своего́. Ми́лость же Госпо́дня от ве́ка и до ве́ка на боя́щихся Его́, и пра́вда Его́ на сыне́х сыно́в, храня́щих заве́т Его́, и по́мнящих за́поведи Его́ твори́ти я́. Госпо́дь на Небеси́ угото́ва Престо́л Свой, и Ца́рство Его́ все́ми облада́ет. Благослови́те Го́спода вси А́нгели Его́, си́льнии кре́постию, творя́щии сло́во Его́, услы́шати глас слове́с Его́. Благослови́те Го́спода вся Си́лы Его́, слуги́ Его́, творя́щии во́лю Его́. Благослови́те Го́спода вся дела́ Его́, на вся́ком ме́сте влады́чества Его́, благослови́, душе́ моя́, Го́спода.

На вся́ком ме́сте влады́чества Его́, благослови́, душе́ моя́, Го́спода.

Псалом 142:

Го́споди, услы́ши моли́тву мою́, внуши́ моле́ние мое́ во и́стине Твое́й, услы́ши мя в пра́вде Твое́й и не вни́ди в суд с рабо́м Твои́м, я́ко не оправди́тся пред Тобо́ю всяк живы́й. Я́ко погна́ враг ду́шу мою́, смири́л есть в зе́млю живо́т мой, посади́л мя есть в те́мных, я́ко ме́ртвыя ве́ка. И уны́ во мне дух мой, во мне смяте́ся се́рдце мое́. Помяну́х дни дре́вния, поучи́хся во всех де́лех Твои́х, в творе́ниих руку́ Твое́ю поуча́хся. Возде́х к Тебе́ ру́це мои́, душа́ моя́, я́ко земля́ безво́дная Тебе́. Ско́ро услы́ши мя, Го́споди, исчезе́ дух мой, не отврати́ лица́ Твоего́ от Мене́, и уподо́блюся низходя́щым в ров. Слы́шану сотвори́ мне зау́тра ми́лость Твою́, я́ко на Тя упова́х. Скажи́ мне, Го́споди, путь во́ньже пойду́, я́ко к Тебе́ взях ду́шу мою́. Изми́ мя от враг мои́х, Го́споди, к Тебе́ прибего́х. Научи́ мя твори́ти во́лю Твою́, я́ко Ты еси́ Бог мой. Дух Твой Благи́й наста́вит мя на зе́млю пра́ву. И́мене Твоего́ ра́ди, Го́споди, живи́ши мя, пра́вдою Твое́ю изведе́ши от печа́ли ду́шу мою́. И ми́лостию Твое́ю потреби́ши враги́ моя́ и погуби́ши вся стужа́ющыя души́ мое́й, я́ко аз раб Твой есмь.

Услы́ши мя, Го́споди, в пра́вде Твое́й и не вни́ди в суд с рабо́м Твои́м.

Дух Твой Благи́й наста́вит мя на зе́млю пра́ву.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Тропа́рь глас 4:

Сла́ва Отцу́ и Сы́ну и Свято́му Ду́ху. И ны́не и при́сно и во ве́ки веко́в. Ами́нь.

Глас 4: Еже от ве́ка утае́нное, и Ангелом несве́домое та́инство: Тобо́ю, Богоро́дице, су́щим на земли́ яви́ся, Бо́г в несли́тном соедине́нии воплоща́емь, и кре́ст во́лею на́с ра́ди восприи́м, и́мже воскреси́в первозда́ннаго, спасе́ от сме́рти ду́ши на́ша.

Здесь читается кафизма, положенная по дню, или сразу седальны:

Го́споди, поми́луй. (Три́жды)

Седален, глас 4:

Зва́нию Го́спода твоего́ после́довал еси́, ми́р отве́рг и вся́, я́же в ми́ре, кра́сная, всеблаже́нне Анто́ние, претерпе́л еси́ пусты́нное озлобле́ние му́дренно, полки́ же отрази́л еси́ де́монов му́жественне, те́мже па́мять твою́ при́сно пе́сньми восхваля́ем ве́рно.

Сла́ва Отцу́ и Сы́ну и Свято́му Ду́ху. И ны́не и при́сно и во ве́ки веко́в. Ами́нь.

Глас 4: Обнови́ла еси́, Чи́стая, боже́ственным Рождество́м Твои́м истле́вшее страстьми́ земноро́дных ме́ртвенное существо́ и воздви́гла еси́ вся́ от сме́рти к жи́зни нетле́ния. Те́мже Тя́ по до́лгу блажи́м вси́, Де́во Препросла́вленная, я́коже прорекла́ еси́.

Седален, глас 5:

По́стника Госпо́дня пе́сньми почти́м, я́ко умертви́вша прило́ги страсте́й воздержа́нием и тве́рдым вои́стинну терпе́нием, и посрами́вша зело́ противобо́рца врага́ и всю́ сего́ горды́ню, и ны́не моля́щася Го́сподеви поми́ловатися душа́м на́шим.

Сла́ва Отцу́ и Сы́ну и Свято́му Ду́ху. И ны́не и при́сно и во ве́ки веко́в. Ами́нь.

Глас 5: Стра́нное чу́до зача́тия и несказа́нен о́браз рождества́, позна́вшаяся в Тебе́, Присноде́во Чи́стая, ужаса́ют у́м и удивля́ют помышле́ние, без се́мене бо зачала́ еси́ и Бо́га во пло́ти родила́ еси́, Богоро́дице, во спасе́ние ду́ш на́ших.

Полиеле́й:

Хвали́те И́мя Госпо́дне, хвали́те, раби́ Го́спода.

Аллилу́иа, аллилу́иа, аллилу́иа.

Благослове́н Госпо́дь от Сио́на, живы́й во Иерусали́ме.

Аллилу́иа, аллилу́иа, аллилу́иа.

Испове́дайтеся Го́сподеви, я́ко Благ, я́ко в век ми́лость Его́.

Аллилу́иа, аллилу́иа, аллилу́иа.

Испове́дайтеся Бо́гу Небе́сному, я́ко в век ми́лость Его́.

Аллилу́иа, аллилу́иа, аллилу́иа.

Велича́ние:

Ублажа́ем тя, / преподо́бне о́тче Анто́ние, / и чтим святу́ю па́мять твою́, / наста́вниче мона́хов // и собесе́дниче А́нгелов.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа,// сла́ва Тебе́, Бо́же. (Трижды)

Седа́льны:

Глас 1:

Победи́л еси́ страсте́й воста́ния умерщвле́нием пло́ти, свяще́нный о́тче, жи́знь безконе́чную по сме́рти прия́л еси́, те́мже дне́сь Христо́ва Це́рковь пра́зднует твою́ досточу́дную па́мять, преподо́бных украше́ние.

Глас 1: Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Наста́ви ны́ на пу́ть покая́ния, уклоня́ющияся к злы́м распу́тиям и Преблага́го прогневля́ющия Го́спода, Неискусобра́чная Благослове́нная Мари́е, прибе́жище отча́янных челове́ков, Бо́жие обита́лище.

Степе́нна, глас 4:

От ю́ности моея́/ мно́зи бо́рют мя стра́сти,/ но Сам мя заступи́// и спаси́, Спа́се мой.

Ненави́дящии Сио́на,/ посрами́теся от Го́спода,/ я́ко трава́ бо огне́м// бу́дете изсо́хше.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Святы́м Ду́хом/ вся́ка душа́ живи́тся,/ и чистото́ю возвыша́ется,// светле́ется Тро́йческим еди́нством, священнота́йне.

Го́споди, поми́луй. (Три́жды)

От Матфе́я Свята́го Ева́нгелия чте́ние

Сла́ва, Тебе́, Го́споди, сла́ва Тебе́.

Рече́ Госпо́дь Свои́м ученико́м: вся Мне предана́ суть Oтце́м Мои́м, и никто́же зна́ет Сы́на, то́кмо Oте́ц, ни Oтца́ кто зна́ет, то́кмо Сын, и ему́же а́ще во́лит Сын откры́ти. Прииди́те ко Мне вси тружда́ющиися и обремене́ннии, и Аз упоко́ю вы. Возми́те и́го Мое́ на себе́, и научи́теся от Мене́, я́ко кро́ток есмь и смире́н се́рдцем, и обря́щете поко́й душа́м ва́шим. И́го бо Мое́ бла́го, и бре́мя Мое́ легко́ есть.

Сла́ва, Тебе́, Го́споди, сла́ва Тебе́.

Псало́м 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя. Я́ко беззако́ние мое́ аз зна́ю и грех мой предо мно́ю есть вы́ну. Тебе́ Еди́ному согреши́х, и лука́вое пред Тобо́ю сотвори́х, я́ко да оправди́шися во словесе́х Твои́х и победи́ши, внегда́ суди́ти Ти. Се бо в беззако́ниих зача́т есмь, и во гресе́х роди́ мя ма́ти моя́. Се бо и́стину возлюби́л еси́, безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся, омы́еши мя, и па́че сне́га убелю́ся. Слу́ху моему́ да́си ра́дость и весе́лие, возра́дуются ко́сти смире́нныя. Отврати́ лице́ Твое́ от грех мои́х, и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́, и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́, и Ду́хом Влады́чним утверди́ мя. Научу́ беззако́нныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́, возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо, всесожже́ния не благоволи́ши. Же́ртва Бо́гу дух сокруше́н, се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския, тогда́ благоволи́ши же́ртву пра́вды, возноше́ние и всесожега́емая: тогда́ возложа́т на олта́рь Твой тельцы́.

Глас 6:

Сла́ва Отцу́ и Сы́ну и Свято́му Ду́ху./ Моли́твами преподобного Антония, / Ми́лостиве, очи́сти / мно́жества согреше́ний на́ших.

И ны́не и при́сно и во ве́ки веко́в. Ами́нь./ Моли́твами Богоро́дицы, / Ми́лостиве, очи́сти / мно́жества согреше́ний на́ших.

Поми́луй мя, Бо́же,/ по вели́цей ми́лости Твое́й,/ и по мно́жеству щедро́т Твои́х// очи́сти беззако́ние мое́.

Стихи́ра, глас 6

Преподо́бне о́тче, во всю́ зе́млю изы́де веща́ние исправле́ний твои́х, те́мже на небесе́х обре́л еси́ мзду́ трудо́в твои́х, де́монския разори́л еси́ полки́ и Ангельския дости́гл еси́ чи́ны, и́хже житию́ непоро́чно поревнова́л еси́, с ни́ми же дерзнове́ние име́я ко Христу́ Бо́гу, ми́р испроси́ душа́м на́шим.

Го́споди, поми́луй. (12 раз)

Кано́н преподо́бнаго. Гла́с 2.

Пе́снь 1.

Ирмос: Гряди́те, лю́дие, пои́м пе́снь Христу́ Бо́гу, разде́льшему мо́ре и наста́вльшему лю́ди, я́же изведе́ из рабо́ты еги́петския, я́ко просла́вися.

Припев: Преподобне отче Антоние, моли Бога о нас.

Зело́ че́стни на́м дру́зи Твои́, Ди́вне во святы́х Го́споди, те́мже Тебе́ воспева́юще и пою́ще в сердца́х свои́х, и и́х в пе́снех моле́бных восхваля́ем, Тя́ сла́вяще, просла́вляющаго святы́х Свои́х.

Пе́ние моле́бное усе́рдно приношу́ тебе́, о́тче богому́дре Анто́ние, моли́твами твои́ми помози́ ми досто́йно воспе́ти твоя́ по́двиги.

Всегда́шним к Бо́гу раче́нием и отверже́нием пло́ти и ми́ра, о́тче Анто́ние, Го́споду ве́рно послужи́л еси́, те́мже и досто́ин яви́лся еси́ услы́шати возжеле́нный гла́с Его́: благи́й ра́бе и ве́рный, вни́ди в ра́дость Го́спода твоего́.

Богородичен: Мои́х прегреше́ний, Влады́чице, плени́цы разто́ргни и томя́щий мя́ гре́х, Присноде́во, низложи́, я́ко да воспева́ю Тя́ всегда́, Всенепоро́чная, Тобо́ю спаса́емь.

Пе́снь 3.

Ирмос: На ка́мени мя́ ве́ры утверди́в, разшири́л еси́ уста́ моя́ на враги́ моя́, возвесели́бося ду́х мо́й, внегда́ пе́ти: не́сть свя́т, я́коже Бо́г на́ш, и не́сть пра́веден, па́че Тебе́, Го́споди.

Просвети́ся све́т тво́й, преблаже́нне, пред челове́ки, те́мже, почита́юще до́брое житие́ твое́, сла́вим Отца́ на́шего, Иже на небесе́х, и тя́ по до́лгу велича́ем.

Плотска́го жела́ния, преподо́бне, отве́ргся и земны́я сла́вы и вражде́бныя Бо́гу дру́жбы с ми́ром оша́явся, и все́х во́лею отщети́лся еси́, и Христа́, Еди́наго все́х Спаси́теля, приобре́л еси́.

Прозре́в бу́дущая воздая́ния, зде́ маловре́менная, я́ко су́етная, о́тче, оста́вил еси́, сего́ ра́ди сугу́бая воздая́ния восприя́л еси́ во дво́рех небе́сных.

Богородичен: Благоутро́бием Твои́м, Богороди́тельнице, вся́каго мя́ изми́ осужде́ния, к Тебе́ прибега́ющаго, и Тебе́ припа́дающа, и призыва́юща Твою́ по́мощь.

Седа́лен, гла́с 4:

Гряду́щаго гра́да взыску́я, ми́ра красоту́ и я́же в не́м тле́нная ни во что́же вмени́л еси́, блаже́нне, в пусты́ню безмо́лвия всели́вся, те́мже ны́не гра́да небе́снаго показа́лся еси́ граждани́н, в не́мже помяни́ и на́с, недосто́йных, ве́рно почита́ющих тя́.

Сла́ва, и ны́не, Богородичен:

Мно́жества скве́рных помышле́ний, смуща́ющих у́м мо́й, и вожделе́ний стра́стных, вою́ющих на мою́ ду́шу, кто́ исчи́слити мо́жет, Пренепоро́чная? возста́ния же и озлобле́ния неви́димых враго́в мои́х кто́ испове́сть? Но Твои́ми моли́твами, Блага́я, от все́х си́х заступи́ мя и избавле́ние да́руй.

Пе́снь 4.

Ирмос: Пою́ Тя, слу́хом бо, Го́споди, услы́шах и ужасо́хся: до мене́ бо и́деши, мене́ ища́, заблу́ждшаго. Те́м мно́гое Твое́ снизхожде́ние, е́же на мя́, прославля́ю, Многоми́лостиве.

Ты́ с чудотво́рцем Варлаа́мом, ны́не предстоя́ престо́лу Бо́жию, умоля́еши Бо́га о святе́й оби́тели, утвержде́нной рука́ми твои́ми, не отступа́я от на́с ду́хом свои́м, но при́сно огражда́я на́с моли́твами твои́ми.

Благо́е послуша́ние яви́л еси́ блаже́нному Варлаа́му, наста́внику твоему́, на́м оста́вль о́браз и́стиннаго мона́шескаго жития́, в не́мже утвержда́й на́с моли́твами твои́ми.

Зи́му и ва́р терпе́нием твои́м победи́л еси́, блаже́нне, и теплоту́ бо ве́ры и любве́ стяжа́л еси́, ея́же и на́м испроси́ у Го́спода моли́твами твои́ми.

Богородичен: Поми́луй, еди́на Богома́ти, поми́луй и сохрани́ ду́шу мою́ окая́нную, потопля́емую от бесо́в лука́выми де́лы и страстьми́, и пре́жде исхо́да моего́ сию́ очи́стити помози́.

Пе́снь 5

Ирмос: Хода́тай Бо́гу и челове́ком бы́л еси́, Христе́ Бо́же: Тобо́ю бо, Влады́ко, к Светонача́льнику, Отцу́ Твоему́, от но́щи неве́дения приведе́ние и́мамы.

Не устраши́ тебе́, преподо́бне, долгота́ жесто́каго пути́, в о́нь же поше́л еси́, посыла́емь от преподо́бнаго Варлаа́ма, ниже́ уклони́лся еси́ от те́снаго пути́, вводя́ща в живо́т, в о́нь же вступи́л еси́, призыва́емь от Бо́га, те́мже досто́йно вше́л еси́ во дворы́ Госпо́дни послуша́нием и терпе́нием.

Кра́йнею не́навистию возненави́дел еси́, о́тче, тщесла́вия и мирски́я молвы́, пу́ть пра́вый позна́в, его́же вожделе́л еси́ уедине́ния ра́ди и безмо́лвия, и дости́гл еси́ духо́вныя ра́дости и ве́чнаго весе́лия.

Упова́нием бу́дущих бла́г, блаже́нне, укрепля́емь, плотско́е стремле́ние обузда́л еси́, своея́ пло́ти, о́тче, вра́г неми́лостив бы́л еси́, нетле́ние е́й хода́тайствуя.

Богородичен: Упова́ние мое́ Ты́ еси́, Пречи́стая, спасе́ние и похвала́, те́мже прибега́ю к покро́ву Твоему́, не гнуша́йся мене́, грехи́ мно́гими и скорбьми́ ны́не поглоще́ннаго, но, предвари́в, спаси́ мя́.

Пе́снь 6.

Ирмос: Гла́с глаго́л моле́бных от боле́зненныя, Влады́ко, души́ услы́шав, от лю́тых мя́ изба́ви: еди́н бо еси́ на́шего спасе́ния вино́вен.

Но́щию, я́ко дне́м, бде́л еси́ и в житии́ свое́м не да́л еси́ сна́ очи́ма твои́ма, ни ве́ждома дрема́ния, до́ндеже сподо́бился еси́ ви́дети пра́ведных селе́ния, я́же угото́ва Бо́г лю́бящим Его́.

От младе́нчества возлюби́в Бо́га, младе́нческое незло́бие и чистоту́ стяжа́л еси́, и сего́ ра́ди позна́л еси́ та́йны Бо́жия, открыва́емыя младе́нцем, и угото́ванное и́м Ца́рство небе́сное насле́довал еси́.

Ра́ди безмо́лвия удали́лся еси́, преподо́бне, в пусты́ню, ча́я Бо́га, спаса́ющаго тя́ от малоду́шия и от бу́ри, и отту́ду ко гра́ду небе́сному преше́л еси́, иде́же е́сть благоугоди́вших Бо́гу жили́ще.

Богородичен: Красоту́ мя ви́дети сподо́би сла́вы Твоея́, егда́ от пло́ти моея́ и́мам разлучи́тися, я́ко утвержде́ние мое́ еси́, Влады́чице, сла́ва и весе́лие.

Конда́к, гла́с 6:

Све́рстник и подра́жатель преподо́бному Варлаа́му, послуша́ние к нему́ и́стинное стяжа́в, досто́ин яви́лся ему́ прее́мник, упа́сши до вре́мене ста́до его́, доброде́телем же его́ поревнова́в, в ту́южде ме́ру во́зраста дости́гл еси́, безмо́лвие пусты́нное возлюби́в, и уго́ден Го́сподеви показа́лся еси́, первонача́льник бы́в пусты́ни при е́зере Ды́мском, те́м ти́ вопие́м: с преподо́бным Варлаа́мом, о́тче Анто́ние, моли́ о на́с Бо́га, да да́ст на́м та́кожде угоди́ти Ему́, я́коже и ты́, о́бразе послуша́ния и безмо́лвия ти́хий рачи́телю.

Икос:

Ева́нгельскому словеси́ ра́достною душе́ю вня́л еси́, преподо́бне, душе́вный ра́зум впери́в к Истинному Све́ту, душетле́нныя стра́сти до конца́ потреби́л еси́, смире́нным и безмо́лвным житие́м преди́вен бы́вый; сего́ ра́ди и пусты́ни первонача́льник яви́лся еси́, о́тче, к высоте́ го́рней сию́ управля́я, и те́пл хода́тай к Бо́гу о на́с показа́лся еси́, Его́же моли́ дарова́ти все́м на́м досто́йно послужи́ти Ему́, подо́бно тебе́, о́бразе послуша́ния и безмо́лвия ти́хий рачи́телю.

Пе́снь 7.

Ирмос: Те́лу злато́му прему́дрыя де́ти не послужи́ша, и в пла́мень са́ми поидо́ша, и бо́ги и́х обруга́ша, среди́ пла́мене возопи́ша и ороси́ я́ Ангел: услы́шася уже́ у́ст ва́ших моли́тва.

Ни́щь ду́хом, по словеси́ Госпо́дню, бога́тство доброде́телей стяжа́л еси́, и́миже угоди́л еси́ Го́сподеви и Ца́рство небе́сное унасле́довал еси́.

Блаже́нства небе́снаго сподо́бился еси́, Анто́ние богому́дре, ти́х и пра́веден бы́в, кро́тости же ра́ди и сле́з неоску́днаго то́ка насле́дил еси́ зе́млю кро́тких и та́мо вкуша́еши ве́чнаго утеше́ния.

Анто́ния Вели́каго предста́тельству себе́ и ста́до свое́ вручи́л еси́, созда́в хра́м во и́мя его́, и Ангельскому житию́ его́ поревнова́л еси́, те́мже и ча́сть его́ насле́довал еси́, ра́дуяся с ни́м в Ца́рствии небе́сном.

Богородичен: Яко разбо́йник, взыва́ю Ти́: помяни́ мя, Человеколю́бче; пла́чу, я́ко блудни́ца, и вопию́: ка́ющагося приими́ мя, отча́яннаго, Богоро́дицы ра́ди, Многоми́лостиве.

Пе́снь 8.

Ирмос: О подо́бии зла́те небре́гше, треблаже́ннии ю́ноши, неизме́нный и живы́й Бо́жий о́браз ви́девше, среди́ огня́ воспева́ху: осуществова́нная да пое́т Го́спода вся́ тва́рь и превозно́сит во вся́ ве́ки.

В безмо́лвии и кро́тости препроводи́л еси́ жи́знь свою́, о́тче, земна́я ра́ди небе́сных отве́ргнув, нетле́нная тле́нными искупи́в, те́м ны́не со все́ми, благоугоди́вшими Бо́гу, пое́ши и превозно́сиши Го́спода во вся́ ве́ки.

От страсте́й тиме́ния чи́ста тя́ обре́т, Всесвяты́й Ду́х всели́ся в тя́, те́мже и чуде́с дарова́ния тебе́ да́рует, Еди́н Сы́й ди́вный во святы́х Свои́х Бо́г на́ш, сла́вимый во ве́ки.

Не иски́й сла́вы челове́ческия, в пусты́ни скры́л еси́ до́блести твоя́, но не утаи́ся све́т доброде́телей твои́х, прославля́ющ Бо́га и ве́рных возбужда́ющ хвали́ти и превозноси́ти Его́, Хва́льнаго и Препросла́вленнаго, во вся́ ве́ки.

Богородичен: Наляцы́ и ца́рствуй, Иису́се, Царю́ ца́рствующих, Сы́не Бо́жий, правосла́вным царе́м на́шим спобо́рствуя и все́х окормля́я к Ца́рству безконе́чныя Твоея́ сла́вы моли́твами Ро́ждшия Тя́ неизрече́нно.

На 9-й песни поем песнь Пресвятыя Богородицы:

Вели́чит душа́ Моя́ Го́спода и возра́довася дух Мой о Бо́зе Спа́се Мое́м.

К коемуждо стиху припеваем: Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Я́ко призре́ на смире́ние рабы́ Своея́, се бо, от ны́не ублажа́т Мя вси ро́ди.

Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Я́ко сотвори́ Мне вели́чие Си́льный, и свя́то и́мя Его́, и ми́лость Его́ в ро́ды родо́в боя́щимся Его́.

Сотвори́ держа́ву мы́шцею Свое́ю, расточи́ го́рдыя мы́слию се́рдца их.

Низложи́ си́льныя со престо́л, и вознесе́ смире́нныя, а́лчущия испо́лни благ, и богатя́щияся отпусти́ тщи.

Восприя́т Изра́иля о́трока Своего́, помяну́ти ми́лости, я́коже глаго́ла ко отце́м на́шим, Авраа́му и се́мени его́ да́же до ве́ка.

Пе́снь 9.

Ирмос: От Бо́га Бо́га Сло́ва, неизрече́нною му́дростию прише́дшаго обнови́ти Ада́ма, я́дию в тле́ние па́дшаго лю́те, от Святы́я Де́вы неизрече́нно воплоти́вшагося на́с ра́ди, ве́рнии, единому́дренно пе́сньми велича́ем.

Оби́тель Пресвята́го Ду́ха, о Анто́ние, бы́л еси́, укра́шен разли́чными доброде́тельми, те́мже ны́не источа́еши ве́рным исцеле́ния, я́ко сосу́д благода́ти Бо́жия избра́нный.

Све́тлостию подвиго́в богоприя́тных просия́л еси́, о́тче, и восприя́л еси́ благода́ть моли́тися о на́с, вспомоществу́я ве́рным в по́двиге спасе́ния, я́ко сосу́д благода́ти Бо́жия избра́нный.

О на́с моле́ние ко Влады́це Христу́, о́тче Анто́ние, не преста́й простира́ти, я́ко оте́ц чадолюби́вый, и помога́я на́м, прибега́ющим к тебе́ и чту́щим тя́, я́ко сосу́д благода́ти Бо́жия избра́нный.

Богородичен: Пощади́ мя́, Го́споди, пощади́, егда́ прии́деши суди́ти ми́ру, и не осуди́ мене́ по дело́м мои́м, но ми́лостию Твое́ю спаси́ мя моли́твами Пречи́стыя Богоро́дицы и все́х святы́х, от ве́ка Тебе́ благоугоди́вших.

Свети́лен.

Процве́л еси́, я́ко фи́никс Дави́дски, о́тче, и оби́тель яви́лся еси́ Ду́ха Пресвята́го, Иже сла́вна тя́ ве́рным показа́, Ему́же о на́с непреста́нно моли́ся, почита́ющих ве́рою пречестну́ю па́мять твою́, преподо́бне Анто́ние.

Сла́ва, и ны́не, Богородичен:

Тя́ пе́сньми немо́лчными ублажа́ем, Де́во, преподо́бных сла́во и утвержде́ние и все́х ве́рных упова́ние и похвало́.

Хвали́тны псалмы́, глас 8:

Вся́кое дыха́ние да хва́лит Го́спода./ Хвали́те Го́спода с небе́с,/ хвали́те Его́ в вы́шних.// Тебе́ подоба́ет песнь Бо́гу.

Хвали́те Его́ вси а́нгели Его́,/ хвали́те Его́ вся си́лы Его́.// Тебе́ подоба́ет песнь Бо́гу.

Сти́хиры, глас 8:

Стих: Сотвори́ти в них суд напи́сан/ сла́ва сия́ бу́дет всем преподо́бным Его́.

Богоно́сне преблаже́нне Анто́ние, все́ плотско́е мудрова́ние ду́ху повину́л еси́, поще́ния страда́ньми утверди́вся, я́ко зла́то, в горни́ле искуше́но, сия́я, яви́лся еси́, ору́дие богоизбра́нно благода́ти Ду́ха Пресвята́го бы́вый, те́мже и на́с помина́й, чту́щих па́мять твою́ ве́рно, и моли́ спасти́ся душа́м на́шим.

Стих: Хвали́те Его́ на си́лах Его́,/ хвали́те Его́ по мно́жеству вели́чествия Его́.

Стих: Хвали́те Его́ в тимпа́не и ли́це,/ хвали́те Его́ во стру́нах и орга́не.

Возсия́ дне́сь пресве́тлая и всепра́зднственная па́мять твоя́, пресла́вне Анто́ние, созыва́ющи многочи́сленное по́стников сосло́вие и преподо́бных ликостоя́ния, те́мже притека́ем к свяще́нней ра́це моще́й твои́х, прося́ще исцеле́ния душа́м и телесе́м на́шим и венча́вшаго тебе́ Христа́ прославля́юще, Спа́са ду́ш на́ших.

Стих: Хвали́те Его́ в кимва́лех доброгла́сных, хвали́те Его́ в кимва́лех восклица́ния. / Вся́кое дыха́ние да хва́лит Го́спода.

Богоно́сне, преблаже́нне о́тче Анто́ние, ты́ моле́бными слеза́ми очи́стил еси́ себе́ и бде́нием неле́ностным благоугоди́л еси́ Бо́гу, я́ко и́стинный ревни́тель благоче́стия, труды́ подъе́мля Христа́ ра́ди, Его́же возлюби́л еси́ от де́тства, и о́браз собо́ю все́м на́м подава́я во спасе́ние ду́ш на́ших. Те́мже тя́ ублажа́ем, велича́юще тебе́ просла́вльшаго Го́спода.

Глас 2: Сла́ва Отцу́ и Сы́ну и Свято́му Ду́ху

Преподо́бне о́тче, из младе́нства доброде́тели приле́жно обучи́вся, орга́н бы́л еси́ Свята́го Ду́ха, во спасе́ние вве́реннаго тебе́ ста́да твоего́, и ны́не явля́ешися ору́дие избра́нно благода́ти Бо́жия, прие́м чуде́с де́йство от прославля́ющаго тя́ Го́спода, к Нему́же и на́с приведи́, моли́твами твои́ми спобора́я на́м.

Глас 6: И ны́не и при́сно и во ве́ки веко́в. Ами́нь.

Богоро́дице Де́во, не пре́зри мене́, гре́шнаго, тре́бующаго Твоея́ по́мощи и Твоего́ заступле́ния, на Тя́ бо упова́ душа́ моя́, и поми́луй мя́.

Славосло́вие вели́кое:

Сла́ва в вы́шних Бо́гу, и на земли́ мир, в челове́цех благоволе́ние. Хва́лим Тя, благослови́м Тя, кла́няем Ти ся, славосло́вим Тя, благодари́м Тя, вели́кия ра́ди сла́вы Твоея́. Го́споди Царю́ Небе́сный, Бо́же О́тче Вседержи́телю, Го́споди, Сы́не Единоро́дный, Иису́се Христе́, и Святы́й Ду́ше. Го́споди Бо́же, А́гнче Бо́жий, Сы́не Оте́чь, взе́мляй грех ми́ра, поми́луй нас; взе́мляй грехи́ ми́ра, приими́ моли́тву на́шу; седя́й одесну́ю Отца́, поми́луй нас. Я́ко Ты еси́ еди́н Свят, Ты еси́ еди́н Госпо́дь, Иису́с Христо́с, в сла́ву Бо́га Отца́. Ами́нь.

На всяк день благословлю́ Тя, и восхвалю́ И́мя Твое́ во ве́ки, и в век ве́ка.

Сподо́би, Го́споди, в день сей без греха́ сохрани́тися нам. Благослове́н еси́, Го́споди, Бо́же оте́ц на́ших, и хва́льно и просла́влено И́мя Твое́ во ве́ки. Ами́нь.

Бу́ди, Го́споди, ми́лость Твоя́ на нас, я́коже упова́хом на Тя.

Благослове́н еси́, Го́споди, научи́ мя оправда́нием Твои́м. (Три́жды)

Го́споди, прибе́жище был еси́ нам в род и род. Аз рех: Го́споди, поми́луй мя, исцели́ ду́шу мою́, я́ко согреши́х Тебе́. Го́споди, к Тебе́ прибего́х, научи́ мя твори́ти во́лю Твою́, я́ко Ты еси́ Бог мой: я́ко у Тебе́ исто́чник живота́, во све́те Твое́м у́зрим свет. Проба́ви ми́лость Твою́ ве́дущим Тя.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Три́жды)

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Святы́й Безсме́ртный, поми́луй нас.

Святы́й Бо́же, Святы́й Кре́пкий, Святы́й Безсме́ртный, поми́луй нас.

Тропа́рь, глас 4:

Утверди́, Бо́же, святу́ю правосла́вную ве́ру, правосла́вных христиа́н во век ве́ка.

Честне́йшую Херуви́м и Сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу, Тя велича́ем.

Сла́ва, и ны́не. Го́споди, поми́луй. (Три́жды) Благослови́.

Господи Иисусе Христе, Сыне Божий, моли́твами Пречи́стыя Своея́ Ма́тере, святаго преподобного Антония Дымского, преподобных и богоносных отец наших и всех святы́х, поми́луй и спаси нас я́ко Благ и Челове́колюбец.

Многоле́тие:

Вели́каго Господи́на и Отца́ на́шего Кири́лла,/ Святе́йшаго Патри́арха Моско́вского и всея́ Руси́,/ и Господи́на на́шего (Высоко-) Преосвяще́ннейшаго (имярек),/ (архи-)епи́скопа (митрополита (титул)),/ богохрани́мую страну́ на́шу Росси́йскую,/ и вся правосла́вныя христи́аны,// Го́споди, сохрани́ их на мно́гая ле́та.