Последование Всеношного бдения в день памяти равноапостольной Нины, просветительницы Грузии. Для домашнего (келейного) совершения

ВСЕНО́ЩНОЕ БДЕ́НИЕ

ВЕЛИ́КАЯ ВЕЧЕ́РНЯ

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас. Ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Трижды.)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, (трижды). Сла́ва, и ны́не:

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Таже, Го́споди, поми́луй, (12), Сла́ва, и ны́не:

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 103:

Поется часть псалма:

Благослови́, душе́ моя́, Го́спода. / Благослове́н еси́, Го́споди. / Го́споди, Бо́же мой, возвели́чился еси́ зело́. / Благослове́н еси́, Го́споди. / Во испове́дание и в велеле́поту обле́клся еси́. / Благослове́н еси́, Го́споди. / Посреде́ гор про́йдут во́ды. / Ди́вна дела́ Твоя́, Го́споди. / Вся прему́дростию сотвори́л еси́. / Сла́ва Ти, Го́споди, сотвори́вшему вся.

Или читается псалом полностью:

Благослови́, душе́ моя́, Го́спода. Го́споди, Бо́же мой, возвели́чился еси́ зело́. Во испове́дание и в велеле́поту обле́клся еси́. Одея́йся све́том, я́ко ри́зою, простира́яй не́бо, я́ко ко́жу. Покрыва́яй вода́ми превы́спренняя Своя́, полага́яй о́блаки на восхожде́ние Свое́, ходя́й на крилу́ ве́треню. Творя́й А́нгелы Своя́ ду́хи и слуги́ Своя́ пла́мень о́гненный. Основа́яй зе́млю на тве́рди ея́, не преклони́тся в век ве́ка. Бе́здна, я́ко ри́за, одея́ние ея́, на гора́х ста́нут во́ды, от запреще́ния Твоего́ побе́гнут, от гла́са гро́ма Твоего́ убоя́тся. Восхо́дят го́ры и нисхо́дят поля́ в ме́сто, е́же основа́л еси́ им. Преде́л положи́л еси́, eго́же не пре́йдут, ниже́ обратя́тся покры́ти зе́млю. Посыла́яй исто́чники в де́брех, посреде́ гор про́йдут во́ды. Напая́ют вся зве́ри се́льныя, ждут она́гри в жа́жду свою́. На ты́х пти́цы небе́сныя привита́ют, от среды́ ка́мения дадя́т глас. Напая́яй го́ры от превы́спренних Свои́х, от плода́ дел Твои́х насы́тится земля́. Прозяба́яй траву́ ското́м, и злак на слу́жбу челове́ком, извести́ хлеб от земли́. И вино́ весели́т се́рдце челове́ка, ума́стити лице́ еле́ем, и хлеб се́рдце челове́ка укрепи́т. Насы́тятся древа́ польска́я, ке́дри Лива́нстии, и́хже еси́ насади́л. Та́мо пти́цы вогнездя́тся, ероди́ево жили́ще предводи́тельствует и́ми. Го́ры высо́кия еле́нем, ка́мень прибе́жище за́яцем. Сотвори́л есть луну́ во времена́, со́лнце позна́ за́пад свой. Положи́л еси́ тму, и бысть нощь, в не́йже про́йдут вси зве́рие дубра́внии. Ски́мни рыка́ющии, восхи́тити и взыска́ти от Бо́га пи́щу себе́. Возсия́ со́лнце и собра́шася и в ло́жах свои́х ля́гут. Изы́дет челове́к на де́ло свое́ и на де́лание свое́ до ве́чера. Я́ко возвели́чишася дела́ Твоя́, Го́споди, вся прему́дростию сотвори́л еси́, испо́лнися земля́ тва́ри Твоея́. Сие́ мо́ре вели́кое и простра́нное, та́мо га́ди, и́мже несть числа́, живо́тная ма́лая с вели́кими, та́мо корабли́ препла́вают, змий сей, eго́же созда́л еси руга́тися eму́. Вся к Тебе́ ча́ют, да́ти пи́щу им во бла́го вре́мя. Да́вшу Тебе́ им соберу́т, отве́рзшу Тебе́ ру́ку вся́ческая испо́лнятся бла́гости, отвра́щшу же Тебе́ лице́, возмяту́тся, отъи́меши дух их, и исче́знут, и в персть свою́ возвратя́тся. По́слеши Ду́ха Твоего́, и сози́ждутся, и обнови́ши лице́ земли́. Бу́ди сла́ва Госпо́дня во ве́ки, возвесели́тся Госпо́дь о де́лех Свои́х, призира́яй на зе́млю, и творя́й ю́ трясти́ся, прикаса́яйся гора́м, и дымя́тся. Воспою́ Го́сподеви в животе́ мое́м, пою́ Бо́гу моему́, до́ндеже есмь, да услади́тся Ему́ бесе́да моя́, аз же возвеселю́ся о Го́споде. Да исче́знут гре́шницы от земли́, и беззако́нницы, я́коже не бы́ти им. Благослови́, душе́ моя́, Го́спода.

Со́лнце позна́ за́пад свой. Положи́л еси́ тму, и бысть нощь. Я́ко возвели́чишася дела́ Твоя́, Го́споди, вся прему́дростию сотвори́л еси́.

Сла́ва, и ны́не: Аллилу́иа, аллилу́иа, аллилу́иа, сла́ва Тебе́ Бо́же. Трижды.

Блаже́н муж:

Блаже́н муж, и́же не и́де на сове́т нечести́вых.

Аллилу́иа, аллилу́иа, аллилу́иа.

Я́ко весть Госпо́дь путь пра́ведных, и путь нечести́вых поги́бнет.

Аллилу́иа, аллилу́иа, аллилу́иа.

Рабо́тайте Го́сподеви со стра́хом и ра́дуйтеся Ему́ с тре́петом.

Аллилу́иа, аллилу́иа, аллилу́иа.

Блаже́ни вси наде́ющиися Нань.

Аллилу́иа, аллилу́иа, аллилу́иа.

Воскресни́, Го́споди, спаси́ мя, Бо́же мой.

Аллилу́иа, аллилу́иа, аллилу́иа.

Госпо́дне есть спасе́ние, и на лю́дех Твои́х благослове́ние Твое́.

Аллилу́иа, аллилу́иа, аллилу́иа.

Сла́ва Отцу́ и Сы́ну и Свято́му Духу.

Аллилу́иа, аллилу́иа, аллилу́иа.

И ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Го́споди, воззва́х, глас 4:

Го́споди, воззва́х к Тебе́, услы́ши мя./ Услы́ши мя, Го́споди./ Го́споди, воззва́х к Тебе́, услы́ши мя:/ вонми́ гла́су моле́ния моего́,/ внегда́ воззва́ти ми к Тебе́.// Услы́ши мя, Го́споди.

Да испра́вится моли́тва моя́,/ я́ко кади́ло пред Тобо́ю,/ воздея́ние руку́ мое́ю/ – же́ртва вече́рняя.// Услы́ши мя, Го́споди.

Стихи́ры пра́здника, глас 4:

Стих: А́ще беззако́ния на́зриши, Го́споди, Го́споди, кто постои́т? Я́ко у Тебе́ очище́ние есть.

Непоро́чно возра́стшая, / в ве́ре кре́пкая наста́внице Иве́рии, / блаже́нная Ни́но, рабо́ все́х Искупи́теля Христа́ Бо́га, / с весе́лием восле́д Того́ текла́ еси́, / и лю́дем пропове́дала еси́ и́стиннаго Бо́га, / и научи́ла еси́ я́ отрещи́ся от и́дол безду́шных, / показу́ющи пу́ть и́стины.

Стих: И́мене ра́ди Твоего́ потерпе́х Тя, Го́споди, потерпе́ душа́ моя́ в сло́во Твое́, упова́ душа́ моя́ на Го́спода.

В руце́ держа́щи чуде́с зна́мение — / из ло́з виногра́дных Кре́ст честны́й, / блаже́нная свята́я Ни́на / си́лою его́ во гра́де Мцхе́те сотвори́ мно́га чудеса́. / Те́мже ели́цы про́поведь ея́ прия́ша, / исцели́шася от не́мощи / и Бо́га просла́виша.

Стих: От стра́жи у́тренния до но́щи, от стра́жи у́тренния да упова́ет Изра́иль на Го́спода.

От за́пада к восто́ку прише́дшую, / и лю́ди, во тме́ седя́щия, / уче́нием Христо́вым просвети́вшую, / и вся́ Иверская племена́ ко Христу́ Бо́гу приве́дшую, / цари́ же и кня́зи, истука́ном порабоще́нныя, / изба́вльшую си́лою Бо́жиею, / сла́вим святу́ю равноапо́стольную Ни́ну, / я́ко свободи́ я́ от ле́сти и́дольския.

Стих: Я́ко у Го́спода ми́лость, и мно́гое у Него́ избавле́ние, и Той изба́вит Изра́иля от всех беззако́ний eго́.

Глас 8: Прииди́те дне́сь, вси́ ве́рнии, / согла́сно ублажи́м сосу́д благода́ти, Ни́ну святу́ю, / я́ко апо́столом уподо́бися, / и прии́де во страны́ Иверския, / и облиста́ся благода́тию Бо́жиею. / О, блаже́нная, в по́двизех твои́х, / за ны́ тобо́ю соде́янных, / бу́ди на́м засту́пница пред Го́сподем.

Стих: Хвали́те Го́спода вси язы́цы, похвали́те Его́ вси лю́дие.

О, чудесе́ ди́внаго, / я́ко сто́лп животво́рный и сла́вный / моли́твами жены́ воздвиза́ется. / Дне́сь Христа́ Бо́га славосло́вят лю́дие Иверстии, / си́лы же Арма́за и За́дена / вспя́ть устремля́ются. / О, Христе́, толи́кую ми́лость дарова́л еси́ на́м / рабо́ю Твое́ю Ни́ною / и то́ю спа́сл еси́ ду́ши на́ша, я́ко Многоми́лостив.

Стих: Я́ко утверди́ся ми́лость Его́ на нас, и и́стина Госпо́дня пребыва́ет во век.

О, чудесе́ чуде́с, / я́ко немощно́е естество́ жены́ / от Христа́ Го́спода боже́ственне укрепля́ется, / и се́ю страна́ Иверская просвеща́ется: / ве́ра бо разсе́я мра́к и́дольский / и яви́ на́м Со́лнце пра́вды — Христа́ Бо́га.

Глас 2: Сла́ва Отцу́ и Сы́ну и Свято́му Ду́ху.

Прииди́те, вси́ ве́рнии, восхва́лим цевни́цу Ду́ха Свята́го, ублажи́м наста́вницу благоче́стия, врачева́ние ду́ш и теле́с на́ших, цве́ты слове́с увязе́м равноапо́стольную пропове́дницу и благове́стницу, светоза́рное свети́ло Иве́рии, трубу́ богогла́сную, Ни́ну богому́друю, Пречи́стыя Богома́тере прехва́льную учени́цу, и та́ко е́й возопии́м: ра́дуйся, голуби́це непоро́чная и го́рлице чи́стая; ра́дуйся, наста́внице богове́дения; ра́дуйся, сподви́жнице святы́х апо́стол Па́вла и Андре́я; ра́дуйся, иве́рийцев просвеще́ние и сла́во всего́ ми́ра.

Глас 2: И ны́не и при́сно и во ве́ки веко́в. Ами́нь.

Непроходи́мая врата́, та́йно запеча́тствованная, / Благослове́нная Богоро́дице Де́во, / приими́ моле́ния на́ша / и принеси́ Твоему́ Сы́ну и Бо́гу, / да спасе́т Тобо́ю ду́ши на́ша.

Све́те Тихи́й:

Све́те Ти́хий святы́я сла́вы Безсме́ртнаго Отца́ Небе́снаго, Свята́го, Блаже́ннаго, Иису́се Христе́! Прише́дше на за́пад со́лнца, ви́девше свет вече́рний, пое́м Отца́, Сы́на и Свята́го Ду́ха, Бо́га. Досто́ин еси́ во вся времена́ пет бы́ти гла́сы преподо́бными, Сы́не Бо́жий, живо́т дая́й; те́мже мир Тя сла́вит.

Пареми́и:

1. Собо́рнаго посла́ния Иоа́ннова чте́ние.

Возлю́бленнии, а́ще се́рдце на́ше не за́зрит на́м, дерзнове́ние и́мамы к Бо́гу. И его́же, а́ще про́сим, прие́млем от Него́, я́ко за́поведи Его́ соблюда́ем и уго́дная пред Ни́м твори́м. И сия́ е́сть за́поведь Его́, да ве́руем во и́мя Сы́на Его́ Иису́са Христа́ и лю́бим дру́г дру́га, я́коже да́л е́сть за́поведь на́м. И соблюда́яй за́поведи Его́, в Не́м пребыва́ет, и То́й в не́м, и о се́м разуме́ем, я́ко пребыва́ет в на́с, от Ду́ха, Его́же да́л е́сть на́м. Возлю́бленнии, не вся́кому ду́ху ве́руйте, но искуша́йте ду́хи, а́ще от Бо́га су́ть, я́ко мно́зи лжепроро́цы изыдо́ша в ми́р. О се́м познава́йте Ду́ха Бо́жия и ду́ха ле́стча: вся́к ду́х, и́же испове́дует Иису́са Христа́, во пло́ти прише́дша, от Бо́га е́сть. И вся́к ду́х, и́же не испове́дует Иису́са Христа́, во пло́ти прише́дша, от Бо́га не́сть, и се́й е́сть анти́христов, его́же слы́шасте, я́ко гряде́т, и ны́не в ми́ре е́сть уже́. Вы́ от Бо́га есте́, ча́дца, и победи́сте те́х, я́ко бо́лий е́сть Иже в ва́с, не́жели и́же в ми́ре. Они́ от ми́ра су́ть, сего́ ра́ди от ми́ра глаго́лют, и ми́р те́х послу́шает. Мы́ от Бо́га есмы́: и́же зна́ет Бо́га, послу́шает на́с, и и́же не́сть от Бо́га, не послу́шает на́с.

2. Собо́рнаго посла́ния Иоа́ннова чте́ние

Возлю́бленнии, а́ще си́це возлюби́л е́сть на́с Бо́г, и мы́ до́лжни есмы́ дру́г дру́га люби́ти. Бо́га никто́же нигде́же ви́де. Аще дру́г дру́га лю́бим, Бо́г в на́с пребыва́ет, и любы́ Его́ соверше́нна е́сть в на́с. О се́м разуме́ем, я́ко в Не́м пребыва́ем, и То́й в на́с, я́ко от Ду́ха Своего́ да́л е́сть на́м. И мы́ ви́дехом и свиде́тельствуем, я́ко Оте́ц посла́ Сы́на Спаси́теля ми́ру. Иже а́ще испове́сть, я́ко Иису́с е́сть Сы́н Бо́жий, Бо́г в не́м пребыва́ет, и то́й в Бо́зе. И мы́ позна́хом, и ве́ровахом, любо́вь ю́же и́мать Бо́г в на́с. Бо́г Любы́ е́сть, и пребыва́яй в любви́ в Бо́зе пребыва́ет, и Бо́г в не́м пребыва́ет.

3. Собо́рнаго посла́ния Иоа́ннова чте́ние.

Возлю́бленнии, а́ще кто́ рече́т, я́ко люблю́ Бо́га, а бра́та своего́ ненави́дит, ло́ж е́сть, и́бо не любя́й бра́та своего́, его́же ви́де, Бо́га, Его́же не ви́де, ка́ко мо́жет люби́ти? И сию́ за́поведь и́мамы от Него́, да любя́й Бо́га лю́бит и бра́та своего́. Вся́к ве́руяй, я́ко Иису́с е́сть Христо́с, от Бо́га рожде́н е́сть; и вся́к любя́й Ро́ждшаго лю́бит и Рожде́ннаго из Него́. О се́м ве́мы, я́ко лю́бим ча́да Бо́жия, егда́ Бо́га лю́бим и за́поведи Его́ соблюда́ем. Сия́ бо е́сть любы́ Бо́жия, да за́поведи Его́ соблюда́ем, и за́поведи Его́ тя́жки не су́ть. Яко вся́к рожде́нный от Бо́га побежда́ет ми́р, и сия́ е́сть побе́да, побе́ждшая ми́р, ве́ра на́ша. Кто́ е́сть побежда́яй ми́р? То́кмо ве́руяй, я́ко Иису́с е́сть Сы́н Бо́жий.

Го́споди, поми́луй. (Три́жды,)

Сподо́би, Го́споди:

Сподо́би, Го́споди, в ве́чер сей без греха́ сохрани́тися нам. Благослове́н еси́, Го́споди, Бо́же оте́ц на́ших, и хва́льно и просла́влено и́мя Твое́ во ве́ки. Ами́нь.

Бу́ди, Го́споди, ми́лость Твоя́ на нас, я́коже упова́хом на Тя. Благослове́н еси́, Го́споди, научи́ мя оправда́нием Твои́м. Благослове́н еси́, Влады́ко, вразуми́ мя оправда́нием Твои́м. Благослове́н еси́, Святы́й, просвети́ мя оправда́нии Твои́ми.

Го́споди, ми́лость Твоя́ во век, дел руку́ Твое́ю не пре́зри. Тебе́ подоба́ет хвала́, Тебе́ подоба́ет пе́ние, Тебе́ сла́ва подоба́ет. Отцу́ и Сы́ну и Свято́му Ду́ху, ны́не и при́сно и во ве́ки веко́в. Ами́нь.

Го́споди, поми́луй. (40 раз)

Стихи́ры на стихо́вне:

Стихи́ры: Глас 1:

Рожде́ннаго от Де́вы Христа́ Бо́га блаже́нная де́ва Ни́на возлюби́, да ве́лиим гла́сом возвести́т племено́м Иверским свято́е и́мя Его́. Сего́ бо ра́ди небе́сный Жени́х, Христо́с Госпо́дь, даде́ е́й дарова́ния Свята́го Ду́ха, и соде́ла ю́ равноапо́стольну, я́ко сосу́д благода́ти духо́вныя, и е́ю дарова́ на́м спасе́ние, я́ко Человеколю́бец.

Стих: Во всю́ зе́млю изы́де веща́ние и́х и в концы́ вселе́нныя глаго́лы и́х

Иде́же благоуха́ша стопы́ Твоя́, Христе́, Женише́ све́тлый, та́мо ше́ствова свята́я целому́дренная неве́ста Твоя́, блаже́нная Ни́на, голуби́ца чи́стая, го́рлица благоле́пная, ла́стовица сладкогла́сная, и, воню́ мѵ́ра Твоего́ обоня́вши, гла́сом ве́лиим свято́е Твое́ и́мя возвести́, и си́лою кре́пкою вся́ Иверския и Картали́нския лю́ди ве́ровати в Божество́ Твое́ научи́.

Стих: Небеса́ пове́дают сла́ву Бо́жию, творе́ние же руку́ Его́ возвеща́ет тве́рдь

Устраше́нная си́ла тмы́ се́тует: диа́вол побежде́н бы́сть. Арма́за порази́ гро́м, За́дена пости́же гне́в небе́сный. Кре́ст воздви́жеся, и свята́я купе́ль благода́тнаго креще́ния откры́ся на́м у столпа́ животво́рнаго. Те́мже и мы́, ча́да Бо́жия, восприи́мше креще́ние твое́ю о Христе́ про́поведию, Ни́но всехва́льная, духо́вне весели́мся и Христа́ Бо́га воспева́ем, обновле́ннии.

Слава, глас 8: Ча́шу благода́ти излия́ньми Ду́ха Свята́го, блаже́нная Ни́но, в це́ркви бога́тно раствори́ла еси́, сего́ ра́ди пресла́вное торжество́ твое́ на ве́черю призыва́ет вся́ ве́рныя, я́же благода́ть Ду́ха Бо́жия возроди́ в купе́ли свята́го креще́ния. Те́мже вси́, во Христа́ обле́кшиися, да восхва́лят Бо́га пе́сньми и, пра́зднующе дне́сь, да велича́ют Богосве́тлую Тро́ицу, си́це глаго́люще: Бо́же Чудотво́рче Вседержи́телю, сохрани́ на́с, испове́дающих Тя́.

И ныне, глас 8:

Аз, Де́во Свята́я Богоро́дице, / к покро́ву Твоему́ прибега́ю, / вем, я́ко обря́щу Тобо́ю спасе́ние, / мо́жеши бо, Чи́стая, помощи́ мне.

Моли́тва свята́го Симео́на Богоприи́мца:

Ны́не отпуща́еши раба́ Твоего́, Влады́ко,/ по глаго́лу Твоему́, с ми́ром;/ я́ко ви́деста о́чи мои́ спасе́ние Твое́,/ е́же еси́ угото́вал пред лице́м всех люде́й,/ свет во открове́ние язы́ков,// и сла́ву люде́й Твои́х Изра́иля.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Тропа́рь, глас 4:

Сло́ва Бо́жия служи́тельнице, во апо́стольстей про́поведи первозва́нному Андре́ю и про́чим апо́столом подража́вшая, просвети́тельнице Иве́рии, и Ду́ха Свята́го цевни́це, свята́я равноапо́стольная Ни́но, моли́ Христа́ Бо́га спасти́ся душа́м на́шим.

Бу́ди И́мя Госпо́дне благослове́но от ны́не и до ве́ка. (Три́жды)

Псало́м 33:

Благословлю́ Го́спода на вся́кое вре́мя,/ вы́ну хвала́ Его́ во усте́х мои́х./ О Го́споде похва́лится душа́ моя́,/ да услы́шат кро́тцыи, и возвеселя́тся./ Возвели́чите Го́спода со мно́ю,/ и вознесе́м И́мя Его́ вку́пе./ Взыска́х Го́спода, и услы́ша мя,/ и от все́х скорбе́й мои́х изба́ви мя./ Приступи́те к Нему́, и просвети́теся,/ и ли́ца ва́ша не постыдя́тся./ Сей ни́щий воззва́, и Госпо́дь услы́ша и́,/ и от все́х скорбе́й его́ спасе́ и́./ Ополчи́тся а́нгел Госпо́день о́крест боя́щихся Его́,/ и изба́вит их./ Вкуси́те и ви́дите, я́ко благ Госпо́дь:/ блаже́н муж, и́же упова́ет Нань./ Бо́йтеся Го́спода, вси́ святи́и Его́,/ я́ко несть лише́ния боя́щимся Его́./ Бога́тии обнища́ша и взалка́ша:/ взыска́ющии же Го́спода// не лиша́тся вся́каго бла́га.

У́ТРЕНЯ.

Шестопса́лмие:

Сла́ва в вы́шних Бо́гу, и на земли́ мир, в челове́цех благоволе́ние. (Три́жды)

Го́споди, устне́ мои́ отве́рзеши, и уста́ моя́ возвестя́т хвалу́ Твою́. (Два́жды)

Псалом 3:

Го́споди, что ся умно́жиша стужа́ющии ми́? Мно́зи востаю́т на мя, мно́зи глаго́лют души́ мое́й: несть спасе́ния eму́ в Бо́зе eго́. Ты же, Го́споди, Засту́пник мой еси́, сла́ва моя́ и вознося́й главу́ мою́. Гла́сом мои́м ко Го́споду воззва́х, и услы́ша мя от горы́ святы́я Своея́. Аз усну́х, и спах, воста́х, я́ко Госпо́дь засту́пит мя. Не убою́ся от тем люде́й, о́крест напа́дающих на мя. Воскресни́, Го́споди, спаси́ мя, Бо́же мой, я́ко Ты порази́л еси́ вся вражду́ющыя ми всу́е: зу́бы гре́шников сокруши́л еси́. Госпо́дне есть спасе́ние, и на лю́дех Твои́х благослове́ние Твое́.

Аз усну́х, и спах, воста́х, я́ко Госпо́дь засту́пит мя.

Псалом 37:

Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́. Я́ко стре́лы Твоя́ унзо́ша во мне, и утверди́л еси́ на мне ру́ку Твою́. Несть исцеле́ния в пло́ти мое́й от лица́ гне́ва Твоего́, несть ми́ра в косте́х мои́х от лица́ грех мои́х. Я́ко беззако́ния моя́ превзыдо́ша главу́ мою́, я́ко бре́мя тя́жкое отяготе́ша на мне. Возсмерде́ша и согни́ша ра́ны моя́ от лица́ безу́мия моего́. Пострада́х и сляко́хся до конца́, весь день се́туя хожда́х. Я́ко ля́двия моя́ напо́лнишася поруга́ний, и несть исцеле́ния в пло́ти мое́й. Озло́блен бых и смири́хся до зела́, рыка́х от воздыха́ния се́рдца моего́. Го́споди, пред Тобо́ю все жела́ние мое́ и воздыха́ние мое́ от Тебе́ не утаи́ся. Се́рдце мое́ смяте́ся, оста́ви мя си́ла моя́, и свет о́чию мое́ю, и той несть со мно́ю. Дру́зи мои́ и и́скреннии мои́ пря́мо мне прибли́жишася и ста́ша, и бли́жнии мои́ отдале́че мене́ ста́ша и нужда́хуся и́щущии ду́шу мою́, и и́щущии зла́я мне глаго́лаху су́етная и льсти́вным весь день поуча́хуся. Аз же я́ко глух не слы́шах и я́ко нем не отверза́яй уст свои́х. И бых я́ко челове́к не слы́шай и не имы́й во усте́х свои́х обличе́ния. Я́ко на Тя, Го́споди, упова́х, Ты услы́шиши, Го́споди Бо́же мой. Я́ко рех: да не когда́ пора́дуют ми ся врази́ мои́: и внегда́ подвижа́тися нога́м мои́м, на мя велере́чеваша. Я́ко аз на ра́ны гото́в, и боле́знь моя́ предо мно́ю есть вы́ну. Я́ко беззако́ние мое́ аз возвещу́ и попеку́ся о гресе́ мое́м. Врази́ же мои́ живу́т и укрепи́шася па́че мене́, и умно́жишася ненави́дящии мя без пра́вды. Воздаю́щии ми зла́я возблага́я оболга́ху мя, зане́ гоня́х благосты́ню. Не оста́ви мене́, Го́споди Бо́же мой, не отступи́ от Мене́. Вонми́ в по́мощь мою́, Го́споди спасе́ния моего́.

Не оста́ви мене́, Го́споди Бо́же мой, не отступи́ от Мене́. Вонми́ в по́мощь мою́, Го́споди спасе́ния моего́.

Псалом 62:

Бо́же, Бо́же мой, к Тебе́ у́тренюю, возжада́ Тебе́ душа́ моя́, коль мно́жицею Тебе́ плоть моя́, в земли́ пу́сте и непрохо́дне, и безво́дне. Та́ко во святе́м яви́хся Тебе́, ви́дети си́лу Твою́ и сла́ву Твою́. Я́ко лу́чши ми́лость Твоя́ па́че живо́т, устне́ мои́ похвали́те Тя. Та́ко благословлю́ Тя в животе́ мое́м, о и́мени Твое́м воздежу́ ру́це мои́. Я́ко от ту́ка и ма́сти да испо́лнится душа́ моя́, и устна́ма ра́дости восхва́лят Тя уста́ моя́. А́ще помина́х Тя на посте́ли мое́й, на у́тренних поуча́хся в Тя. Я́ко был еси́ Помо́щник мой, и в кро́ве крилу́ Твое́ю возра́дуюся. Прильпе́ душа́ моя́ по Тебе́, мене́ же прия́т десни́ца Твоя́. Ти́и же всу́е иска́ша ду́шу мою́, вни́дут в преиспо́дняя земли́, предадя́тся в ру́ки ору́жия, ча́сти ли́совом бу́дут. Царь же возвесели́тся о Бо́зе, похва́лится всяк клены́йся Им, я́ко загради́шася уста́ глаго́лющих непра́ведная.

На у́тренних поуча́хся в Тя. Я́ко был еси́ Помо́щник мой, и в кро́ве крилу́ Твое́ю возра́дуюся. Прильпе́ душа́ моя́ по Тебе́, мене́ же прия́т десни́ца Твоя́.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Го́споди поми́луй. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Псалом 87:

Го́споди Бо́же спасе́ния моего́, во дни воззва́х, и в нощи́ пред Тобо́ю. Да вни́дет пред Тя моли́тва моя́: приклони́ у́хо Твое́ к моле́нию моему́, я́ко испо́лнися зол душа́ моя́, и живо́т мой аду прибли́жися. Привмене́н бых с низходя́щими в ров, бых я́ко челове́к без по́мощи, в ме́ртвых свобо́дь, я́ко я́звеннии спя́щии во гро́бе, и́хже не помяну́л еси́ ктому́, и ти́и от руки́ Твоея́ отринове́ни бы́ша. Положи́ша мя в ро́ве преиспо́днем, в те́мных и се́ни сме́ртней. На мне утверди́ся я́рость Твоя́, и вся во́лны Твоя́ наве́л еси́ на мя. Уда́лил еси́ зна́емых мои́х от Мене́, положи́ша мя ме́рзость себе́: пре́дан бых и не исхожда́х. О́чи мои́ изнемого́сте от нищеты́, воззва́х к Тебе́, Го́споди, весь день, возде́х к Тебе́ ру́це мои́. Еда́ ме́ртвыми твори́ши чудеса́? Или́ вра́чеве воскреся́т, и испове́дятся Тебе́? Еда́ пове́сть кто во гро́бе ми́лость Твою́, и и́стину Твою́ в поги́бели? Еда́ позна́на бу́дут во тьме чудеса́ Твоя́, и пра́вда Твоя́ в земли́ забве́нней? И аз к Тебе́, Го́споди, воззва́х и у́тро моли́тва моя́ предвари́т Тя. Вску́ю, Го́споди, отре́еши ду́шу мою́, отвраща́еши лице́ Твое́ от Мене́? Нищ есмь аз, и в труде́х от ю́ности моея́; возне́с же ся, смири́хся, и изнемого́х. На мне преидо́ша гне́ви Твои́, устраше́ния Твоя́ возмути́ша мя, обыдо́ша мя я́ко вода́, весь день одержа́ша мя вку́пе. Уда́лил еси́ от Мене́ дру́га и и́скренняго, и зна́емых мои́х от страсте́й.

Го́споди Бо́же спасе́ния моего́, во дни воззва́х, и в нощи́ пред Тобо́ю. Да вни́дет пред Тя моли́тва моя́: приклони́ у́хо Твое́ к моле́нию моему́.

Псалом 102:

Благослови́, душе́ моя́, Го́спода, и вся вну́тренняя моя́ и́мя свя́тое Его́. Благослови́, душе́ моя́, Го́спода, и не забыва́й всех воздая́ний Его́, очища́ющаго вся беззако́ния твоя́, исцеля́ющаго вся неду́ги твоя́, избавля́ющаго от истле́ния живо́т твой, венча́ющаго тя ми́лостию и щедро́тами, исполня́ющаго во благи́х жела́ние твое́: обнови́тся я́ко о́рля ю́ность твоя́. Творя́й ми́лостыни Госпо́дь, и судьбу́ всем оби́димым. Сказа́ пути́ Своя́ Моисе́ови, сыново́м Изра́илевым хоте́ния Своя́: Щедр и Ми́лостив Госпо́дь, Долготерпели́в и Многоми́лостив. Не до конца́ прогне́вается, ниже́ во век вражду́ет, не по беззако́нием на́шым сотвори́л есть нам, ниже́ по грехо́м на́шым возда́л есть нам. Я́ко по высоте́ небе́сней от земли́, утверди́л есть Госпо́дь ми́лость Свою́ на боя́щихся Его́. Ели́ко отстоя́т восто́цы от за́пад, уда́лил есть от нас беззако́ния на́ша. Я́коже ще́дрит оте́ц сы́ны, уще́дри Госпо́дь боя́щихся Его́. Я́ко Той позна́ созда́ние на́ше, помяну́, я́ко персть есмы́. Челове́к, я́ко трава́ дни́е eго́, я́ко цвет се́льный, та́ко оцвете́т, я́ко дух про́йде в нем, и не бу́дет, и не позна́ет ктому́ ме́ста своего́. Ми́лость же Госпо́дня от ве́ка и до ве́ка на боя́щихся Его́, и пра́вда Его́ на сыне́х сыно́в, храня́щих заве́т Его́, и по́мнящих за́поведи Его́ твори́ти я́. Госпо́дь на Небеси́ угото́ва Престо́л Свой, и Ца́рство Его́ все́ми облада́ет. Благослови́те Го́спода вси А́нгели Его́, си́льнии кре́постию, творя́щии сло́во Его́, услы́шати глас слове́с Его́. Благослови́те Го́спода вся Си́лы Его́, слуги́ Его́, творя́щии во́лю Его́. Благослови́те Го́спода вся дела́ Его́, на вся́ком ме́сте влады́чества Его́, благослови́, душе́ моя́, Го́спода.

На вся́ком ме́сте влады́чества Его́, благослови́, душе́ моя́, Го́спода.

Псалом 142:

Го́споди, услы́ши моли́тву мою́, внуши́ моле́ние мое́ во и́стине Твое́й, услы́ши мя в пра́вде Твое́й и не вни́ди в суд с рабо́м Твои́м, я́ко не оправди́тся пред Тобо́ю всяк живы́й. Я́ко погна́ враг ду́шу мою́, смири́л есть в зе́млю живо́т мой, посади́л мя есть в те́мных, я́ко ме́ртвыя ве́ка. И уны́ во мне дух мой, во мне смяте́ся се́рдце мое́. Помяну́х дни дре́вния, поучи́хся во всех де́лех Твои́х, в творе́ниих руку́ Твое́ю поуча́хся. Возде́х к Тебе́ ру́це мои́, душа́ моя́, я́ко земля́ безво́дная Тебе́. Ско́ро услы́ши мя, Го́споди, исчезе́ дух мой, не отврати́ лица́ Твоего́ от Мене́, и уподо́блюся низходя́щым в ров. Слы́шану сотвори́ мне зау́тра ми́лость Твою́, я́ко на Тя упова́х. Скажи́ мне, Го́споди, путь во́ньже пойду́, я́ко к Тебе́ взях ду́шу мою́. Изми́ мя от враг мои́х, Го́споди, к Тебе́ прибего́х. Научи́ мя твори́ти во́лю Твою́, я́ко Ты еси́ Бог мой. Дух Твой Благи́й наста́вит мя на зе́млю пра́ву. И́мене Твоего́ ра́ди, Го́споди, живи́ши мя, пра́вдою Твое́ю изведе́ши от печа́ли ду́шу мою́. И ми́лостию Твое́ю потреби́ши враги́ моя́ и погуби́ши вся стужа́ющыя души́ мое́й, я́ко аз раб Твой есмь.

Услы́ши мя, Го́споди, в пра́вде Твое́й и не вни́ди в суд с рабо́м Твои́м.

Услы́ши мя, Го́споди, в пра́вде Твое́й и не вни́ди в суд с рабо́м Твои́м.

Дух Твой Благи́й наста́вит мя на зе́млю пра́ву.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Тропа́рь глас 4:

Сло́ва Бо́жия служи́тельнице, во апо́стольстей про́поведи первозва́нному Андре́ю и про́чим апо́столом подража́вшая, просвети́тельнице Иве́рии, и Ду́ха Свята́го цевни́це, свята́я равноапо́стольная Ни́но, моли́ Христа́ Бо́га спасти́ся душа́м на́шим. (Дважды)

Сла́ва Отцу́ и Сы́ну и Свято́му Ду́ху. И ны́не и при́сно и во ве́ки веко́в. Ами́нь.

Глас 4: Еди́на Чи́стая и Пречи́стая Де́во, / Я́же Бо́га безсе́менно ро́ждшая, / моли́ спасти́ся душа́м на́шим.

Здесь читается кафизма, положенная по дню, или сразу седальны:

Го́споди, поми́луй. (Три́жды)

Седален, глас 3:

Всю́ страну́ на́шу сло́вом духо́вным, равноапо́стольная Ни́но, ороси́ла еси́ и та́ко плодоно́сну сию́ сотвори́ла еси́, во е́же произрасти́ти се́мя ве́ры, концы́ вселе́нныя просвети́ла еси́ и неве́рия пле́велы исто́ргла еси́, крести́вши Иверския язы́ки во и́мя Тро́ицы Безнача́льныя.

Сла́ва Отцу́ и Сы́ну и Свято́му Ду́ху. И ны́не и при́сно и во ве́ки веко́в. Ами́нь.

Глас 8: Прииди́те вси́, воспои́м равноапо́стольную Ни́ну, богому́друю просвети́тельницу Иве́рии: та́ бо ле́сть и́дольскую отгна́, от тмы́ ко све́ту на́с приве́дши, и Тро́ицу Единосу́щную сла́вити научи́. Те́мже, вси́ ве́рнии, пра́зднуим честну́ю па́мять ея́ с ве́рою и просла́вим Спа́са на́шего.

Седален, глас 8:

Митропо́лие свята́я, Це́ркве красото́, весели́ся и ра́дуйся, я́ко све́тлое пра́зднество основа́вшия тя́ пропове́дницы Ева́нгелия соверша́ется, ма́тере на́шея Ни́ны равноапо́стольныя, и с на́ми возопи́й: Христе́ Бо́же, тоя́ моли́твами утверди́ ве́ру Твою́.

Сла́ва Отцу́ и Сы́ну и Свято́му Ду́ху. И ны́не и при́сно и во ве́ки веко́в. Ами́нь.

Глас 8: Митропо́лие свята́я, Це́ркве красото́, весели́ся и ра́дуйся, я́ко све́тлое пра́зднество основа́вшия тя́ пропове́дницы Ева́нгелия соверша́ется, ма́тере на́шея Ни́ны равноапо́стольныя, и с на́ми возопи́й: Христе́ Бо́же, тоя́ моли́твами утверди́ ве́ру Твою́.

Полиеле́й:

Хвали́те И́мя Госпо́дне, хвали́те, раби́ Го́спода.

Аллилу́иа, аллилу́иа, аллилу́иа.

Благослове́н Госпо́дь от Сио́на, живы́й во Иерусали́ме.

Аллилу́иа, аллилу́иа, аллилу́иа.

Испове́дайтеся Го́сподеви, я́ко Благ, я́ко в век ми́лость Его́.

Аллилу́иа, аллилу́иа, аллилу́иа.

Испове́дайтеся Бо́гу Небе́сному, я́ко в век ми́лость Его́.

Аллилу́иа, аллилу́иа, аллилу́иа.

Велича́ние:

Велича́ем тя́, свята́я равноапо́стольная Ни́но, всю́ страну́ Иверскую све́том Ева́нгелия просвети́вшую и ко Христу́ приве́дшую.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа,// сла́ва Тебе́, Бо́же. (Трижды)

Велича́ем тя́, свята́я равноапо́стольная Ни́но, всю́ страну́ Иверскую све́том Ева́нгелия просвети́вшую и ко Христу́ приве́дшую.

Седа́льны:

Глас 8:

Предызбра́нная от Бо́га ма́ти, апо́столов чи́н взе́мши, све́том Ева́нгелия страну́ Иверскую просвети́ла еси́, со Ангелы песносло́вящи Изба́вителя и моля́щися непреста́нно о на́с, я́ко да благода́ть и ми́лость Христо́с на́м да́рует.

Глас 8: Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Предызбра́нная от Бо́га ма́ти, апо́столов чи́н взе́мши, све́том Ева́нгелия страну́ Иверскую просвети́ла еси́, со Ангелы песносло́вящи Изба́вителя и моля́щися непреста́нно о на́с, я́ко да благода́ть и ми́лость Христо́с на́м да́рует.

Степе́нна, глас 4:

От ю́ности моея́/ мно́зи бо́рют мя стра́сти,/ но Сам мя заступи́// и спаси́, Спа́се мой.

Ненави́дящии Сио́на,/ посрами́теся от Го́спода,/ я́ко трава́ бо огне́м// бу́дете изсо́хше.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Святы́м Ду́хом/ вся́ка душа́ живи́тся,/ и чистото́ю возвыша́ется,// светле́ется Тро́йческим еди́нством, священнота́йне.

Го́споди, поми́луй. (Три́жды)

От Матфе́я Свята́го Ева́нгелия чте́ние

Сла́ва, Тебе́, Го́споди, сла́ва Тебе́.

Во вре́мя о́но, призва́ Иису́с обана́десять ученики́ Своя́, даде́ им власть на дусе́х нечи́стых, я́ко да изго́нят их, и цели́ти всяк неду́г и вся́ку боле́знь. Сия́ обана́десять посла́ Иису́с, запове́да им, глаго́ля: на путь язы́к не иди́те и во град Самаря́нский не вни́дите. Иди́те же па́че ко овца́м поги́бшым до́му Изра́илева. Ходя́ще же пропове́дуйте, глаго́люще, я́ко прибли́жися Ца́рствие Небе́сное. Боля́щыя изцеля́йте, прокаже́нныя очища́йте, ме́ртвыя воскреша́йте, бе́сы изгоня́йте, ту́не прия́сте, ту́не дади́те.

Сла́ва, Тебе́, Го́споди, сла́ва Тебе́.

Псало́м 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя. Я́ко беззако́ние мое́ аз зна́ю и грех мой предо мно́ю есть вы́ну. Тебе́ Еди́ному согреши́х, и лука́вое пред Тобо́ю сотвори́х, я́ко да оправди́шися во словесе́х Твои́х и победи́ши, внегда́ суди́ти Ти. Се бо в беззако́ниих зача́т есмь, и во гресе́х роди́ мя ма́ти моя́. Се бо и́стину возлюби́л еси́, безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся, омы́еши мя, и па́че сне́га убелю́ся. Слу́ху моему́ да́си ра́дость и весе́лие, возра́дуются ко́сти смире́нныя. Отврати́ лице́ Твое́ от грех мои́х, и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́, и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́, и Ду́хом Влады́чним утверди́ мя. Научу́ беззако́нныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́, возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо, всесожже́ния не благоволи́ши. Же́ртва Бо́гу дух сокруше́н, се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския, тогда́ благоволи́ши же́ртву пра́вды, возноше́ние и всесожега́емая: тогда́ возложа́т на олта́рь Твой тельцы́.

Глас 6:

Сла́ва Отцу́ и Сы́ну и Свято́му Ду́ху./ Моли́твами равноапостолныя Нины, / Ми́лостиве, очи́сти / мно́жества согреше́ний на́ших.

И ны́не и при́сно и во ве́ки веко́в. Ами́нь./ Моли́твами Богоро́дицы, / Ми́лостиве, очи́сти / мно́жества согреше́ний на́ших.

Поми́луй мя, Бо́же,/ по вели́цей ми́лости Твое́й,/ и по мно́жеству щедро́т Твои́х// очи́сти беззако́ние мое́.

Стихи́ра, глас 6

Прииди́те вси́, воспои́м равноапо́стольную Ни́ну, богому́друю просвети́тельницу Иве́рии: та́ бо ле́сть и́дольскую отгна́, от тмы́ ко све́ту на́с приве́дши, и Тро́ицу Единосу́щную сла́вити научи́. Те́мже, вси́ ве́рнии, пра́зднуим честну́ю па́мять ея́ с ве́рою и просла́вим Спа́са на́шего.

Го́споди, поми́луй. (12 раз)

Канон святе́й Ни́не, гла́с 1.

Пе́снь 1.

Ирмос: Спасе́ лю́ди чудоде́йствуяй Влады́ка, мо́крую мо́ря во́лну оземлени́в дре́вле; во́лею же ро́ждься от Де́вы, стезю́ прохо́дну небесе́ полага́ет на́м. Его́же, по Существу́ ра́вна же Отцу́ и челове́ком, сла́вим.

Припев: Равноапостольная мати Нино, моли Бога о нас.

Отве́рзи устне́ мои́, Христе́ Бо́же, да восхвалю́ де́ву равноапо́стольную и пропове́дницу Ни́ну воспою́, и просвети́ у́м мо́й, да досто́йную цве́ты слове́с укра́шу по достоя́нию.

Ре́чи чужды́х ти́ племе́н уразуме́ла еси́, прехва́льная Ни́но, и, от Ду́ха Свя́та умудре́на бы́вши, в виде́нии Сама́го Го́спода узре́ла еси́. Те́мже в земли́ непло́дней, богому́драя де́во, лю́ди Иверския ко Христу́ привела́ еси́.

Жестосе́рдыя ва́рвары, куми́ром служа́щия, я́ко голуби́ца, от за́пада воспари́вшая, любо́вию твое́ю обрати́ла еси́ ко Творцу́ и, благода́тию обновле́нныя, неве́сто Христо́ва непоро́чная, Жениху́ твоему́ обручи́ла еси́.

Богородичен: Сосу́д благосты́ни Твоея́, Пречи́стая Де́во Богоро́дице, бы́сть свята́я де́ва, и страну́, жре́бием Тебе́ свиде́тельствовану, просвети́. Сего́ ра́ди мо́лим Тя́: сию́ приими́ с Тобо́ю в моли́тву о вопию́щих Тебе́: поми́луй жре́бий Тво́й.

Пе́снь 3.

Ирмос: При́зри на пе́ния рабо́в, Благоде́телю, врага́ смиря́я вознесе́нную горды́ню, нося́й же, Всеви́дче, греха́ превы́ше, непоколе́блемо утвержде́ныя, Бла́же, певцы́ основа́нием ве́ры.

Милосе́рдия ра́ди Своего́ ми́лостивно помяну́в на́с, усе́рдну благове́стницу соде́ла тя́ Бо́г, жену́ су́щу, му́жеским смы́слом укра́шену, и испо́лнену Ду́ха Свя́та яви́ на́м, и твое́ю про́поведию о Христе́, чрез ве́ру в Него́, на́с усынови́л е́сть.

Покрыва́ло от серде́ц на́ших безчу́вственных отпаде́, отягче́нный слу́х на́ш от гла́са про́поведи твоея́ откры́ся, омраче́ние ума́ на́шего разсе́яся све́том уче́ния Христо́ва, тобо́ю возвеще́ннаго, о свята́я равноапо́стольная Ни́но, до́блественная учени́це Христо́ва.

Покланя́вшиися иногда́ куми́ром и пребыва́вшии во тме́ нече́стия от ле́сти и́дольския твои́м прише́ствием, блаже́нная Ни́но, свободи́шася, Арма́з же вострепета́, егда́ гро́м возгреме́, и неи́стовства За́дена преста́ша.

Богородичен: Тобо́ю, Богоро́дице Де́во, от ро́ва нече́стия подъя́ти бы́хом, егда́ Ти́ уго́дно бы́сть просвеще́ние на́ше жено́ю сотвори́ти, повнегда́ же изы́ти на́м от купе́ли святы́я, позна́хом Сы́на Твоего́ и Бо́га на́шего блаже́нною Ни́ною.

Седа́лен, гла́с 2:

Якоже со́лнце незаходи́мое, Со́лнца пра́вды — Христа́ Бо́га пропове́дница, светоза́рная звезда́, све́тлый вселе́нныя свети́льник, неоцене́нное сокро́вище Иверския страны́, дне́сь Ни́на в земли́ на́шей сия́ет и благоуха́ет, наста́вница на́ша, равноапо́стольная раба́ Христо́ва.

Пе́снь 4.

Ирмос: Ро́да челове́ча обновле́ние дре́вле, поя́, проро́к Авваку́м предвозвеща́ет, ви́дети неизрече́нно сподо́бився о́браз: млады́й Младе́нец бо из горы́ — Де́вы изы́де, люде́й во обновле́ние, Сло́во.

Якоже ле́в, безстра́шна пребы́вши, кре́пце Христа́ Бо́га пропове́дала еси́: па́рфян си́лою чуде́с улови́ла еси́, Гаиани́ю же и Рипсими́ю по́двигом до́блественнаго и́х му́ченичества в да́р Христу́ принесла́ еси́. То́й же сохрани́ тебе́ саму́ю, во е́же просвети́ти тобо́ю Иверскую страну́.

Якоже оре́л, во о́чию твое́ю возобрази́ла еси́ Иверскую страну́ на́шу, пресла́вная Ни́но, и, свято́ю ре́вностию по Бо́зе разже́гшися, святы́м Ева́нгелием сию́ просвети́ла еси́.

Вла́сть иму́щи разгна́ти мглу́, му́драго царя́ просвети́ла еси́, равноапо́стольному царю́ Константи́ну уподо́бльшися, наста́внице на́ша и врачу́ смы́сленный. Сего́ ра́ди ублажа́ем и́мя твое́, де́во, пропове́днице Христа́, вели́кая равноапо́стольная Ни́но.

Богородичен: От ле́сти и́дольския Тобо́ю, Богоро́дице, изба́влени бы́вше лю́дие Иверстии, и́хже Тебе́ жре́бий показа́, и, благове́стием преподо́бныя ма́тере на́шея Ни́ны озаре́ни бы́вше, взыва́ют к Тебе́: избавле́ние на́ше, спаси́ ны, Ма́ти Христа́ Бо́га.

Пе́снь 5

Ирмос: Из но́щи де́л омраче́нныя пре́лести очище́ние на́м, Христе́, бо́дренно ны́не соверша́ющим пе́снь, я́ко Благоде́телю, прииди́, подава́яй удо́бну стезю́, по не́йже востека́юще, обря́щем сла́ву.

Падо́ша и́доли во стране́ Иверстей и созда́шася хра́мы Госпо́дни тобо́ю, ма́ти на́ша. Мы́ же, ча́да Сио́на, тобо́ю просвеще́ни бы́вше, дне́сь прославля́ем Триипоста́сное Божество́, сла́вим Честны́й Кре́ст Христа́ и честву́ем цельбоно́сный хито́н Его́.

Сы́нове те́х, и́же от дне́й столпотворе́ния Вавило́нска злоче́стием плене́ни бы́ша и пе́снь Госпо́дню воспева́ти не разуме́ша, ны́не изше́дше от святы́я купе́ли, глаго́лют: во Христа́ облеко́хомся, во Христа́ крести́вшеся.

Егда́ ца́рствова фарао́н над еги́птяны, ти́и, во тме́ еги́петстей седя́ще, и́стинному Бо́гу служи́ти не мого́ша; дне́сь же мы́, ча́да Сио́на, Ни́ною изба́влены бы́вше, ра́достно пои́м Го́сподеви.

Богородичен: Егда́ приспе́ ко мне́ вра́чь, Пресвята́я Богоро́дице, тогда́ воста́х от одра́ моего́, немощству́яй, и преподо́бною Ни́ною изба́вихся от ле́сти и́дол нечи́стых, — сия́ ро́д Иверский взыва́ет, глаго́ля, — воспева́ю Тя́, упова́ние мое́, Ма́ти Бо́жия.

Пе́снь 6.

Ирмос: Обита́я Ио́на в преиспо́дних морски́х, приити́ моля́шеся и бу́рю утоли́ти; унзе́н же а́з муча́щаго стрело́ю, Христу́ воспева́ю, зо́л губи́телю, ско́ро приити́ Тебе́ к мое́й ле́ности.

Возсия́вшу све́ту от за́пада, преста́ни, се́вере, и пове́й, ю́же, со́лнце бо восхо́дит разгна́ти мглу́, и бли́з е́сть дхнове́ние теплоты́, во е́же та́яти ле́ду: се́ гряде́т пропове́дница Христа́, Ни́на свята́я.

От тмы́ и́дольския изба́влени бы́вше тобо́ю, равноапо́стольная Ни́но, вси́ лю́дие Картали́нстии воспева́ют тя́ и умиле́нно взыва́ют: отжени́ от на́с зло́бу, диа́вола же и супоста́ты на́ша порази́.

Угото́ванная тобо́ю при столпе́ животво́рнем и ме́сте хране́ния хито́на Госпо́дня купе́ль свята́я не мертви́т младе́нцы, но сия́ возражда́ет, еле́ем святы́м умаща́ющи. Те́мже вопие́м ти́: ра́дуйся, де́во, равноапо́стольная Ни́но.

Богородичен: Наде́ждо непосты́дная наде́ющихся на Тя́, еди́на, ро́ждшая па́че естества́ пло́тию Христа́ Бо́га на́шего, Того́ со блаже́нною Ни́ною моли́ пода́ти Иверстей стране́ утвержде́ние и преспе́яние в ве́ре и все́м на́м пре́жде конца́ жития́ исправле́ние.

Конда́к, гла́с 2:

Прииди́те дне́сь вси́, воспои́м избра́нную от Христа́ равноапо́стольную пропове́дницу Бо́жия сло́ва, му́друю благове́стницу, лю́ди Картали́нии приве́дшу на пу́ть живота́ и и́стины, Богома́тере учени́цу, усе́рдную засту́пницу и неусыпа́ющую храни́тельницу на́шу, Ни́ну прехва́льную.

Икос:

В гу́слех духо́вных да восхва́лится му́драя пропове́дница, Иве́рии просвети́тельница, в купе́ли креще́ния избра́нными па́стырьми освяти́вшая лю́ди, жре́бием свиде́тельствованныя, равноапо́стольная, возлю́бленная раба́ Христо́ва, я́же де́сять за́поведей Бо́жиих прия́т, я́коже Моисе́й Богови́дец. Прииди́те у́бо, дне́сь ублажи́м пе́сньми усе́рдную засту́пницу и неусыпа́ющую храни́тельницу на́шу, Ни́ну прехва́льную.

Пе́снь 7.

Ирмос: Всецаря́ любо́вию уловле́ннии, о́троцы укори́ша безчи́сленно яря́щася мучи́теля злобо́жное языковре́дие. Имже повину́ся о́гнь мно́гий, Влады́це глаго́лющим: во ве́ки благослове́н еси́.

Черто́зи царя́ и цари́цы я́ко пле́нницу и стра́нницу тя́ призре́ша, оба́че и сия́ от пле́на преиспо́дняго благода́тию Христо́вою привела́ еси́ ко Христу́ Бо́гу, Ни́но равноапо́стольная, благове́стнице спасе́ния.

Внегда́ воздви́гнути тебе́ сто́лп святы́й и возде́яти ру́це твои́, устраши́шася си́лы диа́вола и со тре́петом бежа́ща, возрыда́ша го́рько. Мы́ же вопие́м: благослове́н еси́, Христе́ Бо́же, во ве́ки.

Возвеща́емым словесе́м твои́м, падо́ша ни́ц лю́дие, я́ко от гла́са тру́б царе́вых, и ца́рства и ца́рие вострепета́ша, глаго́люще: О, пле́ннице и пле́нных свобожде́ние! Бу́ди благослове́но прише́ствие твое́.

Богородичен: Яве предрече́нная проро́ки, Ма́ти Бо́жия, Пренепоро́чная Де́во Мари́е, пребыва́нием Твои́м во Еги́пте с Богомладе́нцем Иису́с Христо́м, истука́ны еги́петския сокруши́ла еси́ до основа́ний, и Ни́ною потреби́ла еси́ куми́ры Картали́нии, бу́ди благослове́на, Присноде́во.

Пе́снь 8.

Ирмос: Утро́бу неопа́льно образу́ют Отрокови́цы и́же в ве́тсем опаля́емии ю́ноши, преесте́ственно ражда́ющую запечатле́нну; обоя́ же содева́ющи чудоде́йство еди́но, лю́ди к пе́нию возставля́ет благода́ть.

Па́мяти святы́я Ни́ны подоба́ет пра́зднество. Прииди́те у́бо, ве́рнии, Христу́, просла́вим и возблагодари́м ми́лостиваго Бо́га. Ро́ди же, и племена́, и ча́да Сио́на, в духо́вней ра́дости торжеству́йте ку́пно с на́ми, глаго́люще: сла́ва пропове́днице Христа́ и Бо́га на́шего.

Ра́дуйся, страно́ Картали́нская, от Ни́ны венце́м Христо́вым венча́нная, свети́ся и благоукраша́йся: призыва́ет бо ны́ равноапо́стольная свята́я Ни́на, све́том Госпо́дним вся́ озаря́ющи.

Ты́ запове́дала еси́ на́м, равноапо́стольная, ве́ру свя́то блюсти́, е́йже новообраще́нныя лю́ди научи́ла еси́. Сего́ ра́ди вертогра́ды, я́же насади́ла еси́ в духо́вней па́стве твое́й, посети́ и утверди́.

Богородичен: О, Ма́ти Христа́ Бо́га, Творца́ су́щих, сподо́бльшийся Тобо́ю жи́зни ве́чныя ро́д Картали́нский храни́ моли́твами Ни́ны блаже́нныя.

На 9-й песни поем :

Велича́й, душе́ моя́,// Честне́йшую Го́рних во́инств, Де́ву Пречи́стую, Богоро́дицу.

Пе́снь 9.

Ирмос: Люби́ти у́бо на́м я́ко безбе́дное стра́хом удо́бее молча́ние; любо́вию же, Де́во, пе́сни тка́ти, спротяже́нно сложе́нныя, неудо́бно е́сть. Но и, Ма́ти, си́лу, ели́ко е́сть произволе́ние, да́ждь.

Вожделе́нна на́м па́мять твоя́, ди́вно чудоде́йство твое́, свя́то житие́ твое́ — вся́ на́м быва́ют во бла́го тобо́ю, Ни́но целому́дренная.

Прия́телище моще́й твои́х, благода́ть источа́ющих, утвержде́ние е́сть стране́ Ивери́йстей. Сего́ ра́ди и взыва́ет к тебе́: блаже́нная Ни́но, охраня́й на́с твои́м заступле́нием.

Пропове́днице и просвети́тельнице, при́зри на пе́ние на́ше умиле́нное и уми́лостиви к на́м Го́спода, не попусти́ на́м, хвалы́ твоея́ ревни́телем, во гресе́х поги́бнути и, предстоя́щи престо́лу Бо́жию, моли́ Христа́ Бо́га спасти́ся душа́м на́шим.

Богородичен: Услы́ши моле́ния на́ша, Ма́ти Бо́жия, и преподо́бныя Ни́ны заступле́нием отжени́ от на́с вся́ искуше́ния, да́руй на́м ми́лость Твою́ и побе́ду на враги́.

Свети́лен

Равноапо́стольная пропове́днице и благове́стнице Христо́ва, от наве́т вра́жиих избавля́ющая ны́! Аще и в не́дрех земли́ сокрове́на еси́ от о́чию на́шею, оба́че жива́ пребыва́еши у престо́ла Христа́ Бо́га на́шего. Бу́ди у́бо засту́пница усе́рдно чту́щим тя́.

Хвали́тны псалмы́, глас 1:

Вся́кое дыха́ние да хва́лит Го́спода./ Хвали́те Го́спода с небе́с,/ хвали́те Его́ в вы́шних.// Тебе́ подоба́ет песнь Бо́гу.

Хвали́те Его́ вси а́нгели Его́,/ хвали́те Его́ вся си́лы Его́.// Тебе́ подоба́ет песнь Бо́гу.

Сти́хиры, глас 1:

Стих: Сотвори́ти в них суд напи́сан/ сла́ва сия́ бу́дет всем преподо́бным Его́.

Ра́дуйся, Це́рковь Бо́жия со ча́ды твои́ми, блаже́нныя Ни́ны собо́ру сла́вному, ра́дуйся и соста́ви духо́вное торжество́, во е́же пе́ти пропове́дницу на́шу, Ца́рствия небе́снаго равноапо́стольную благове́стницу.

Стих: Хвали́те Его́ на си́лах Его́,/ хвали́те Его́ по мно́жеству вели́чествия Его́.

Ра́дуйся, Це́рковь Бо́жия со ча́ды твои́ми, блаже́нныя Ни́ны собо́ру сла́вному, ра́дуйся и соста́ви духо́вное торжество́, во е́же пе́ти пропове́дницу на́шу, Ца́рствия небе́снаго равноапо́стольную благове́стницу.

Стих: Хвали́те Его́ в тимпа́не и ли́це,/ хвали́те Его́ во стру́нах и орга́не.

Ра́дуйся, Це́рковь Бо́жия со ча́ды твои́ми, блаже́нныя Ни́ны собо́ру сла́вному, ра́дуйся и соста́ви духо́вное торжество́, во е́же пе́ти пропове́дницу на́шу, Ца́рствия небе́снаго равноапо́стольную благове́стницу.

Стих: Хвали́те Его́ в кимва́лех доброгла́сных, хвали́те Его́ в кимва́лех восклица́ния. / Вся́кое дыха́ние да хва́лит Го́спода.

Ра́дуйся, Це́рковь Бо́жия со ча́ды твои́ми, блаже́нныя Ни́ны собо́ру сла́вному, ра́дуйся и соста́ви духо́вное торжество́, во е́же пе́ти пропове́дницу на́шу, Ца́рствия небе́снаго равноапо́стольную благове́стницу.

Глас 2: Сла́ва Отцу́ и Сы́ну и Свято́му Ду́ху

Дне́сь си́лы небе́сныя с земны́ми ра́дуются, дне́сь страна́ Картали́нская, кресто́м огражде́нная, облека́ется си́лою и ро́г Це́ркве возно́сится, дне́сь хра́м Пресвяты́я Богоро́дицы па́мятию святы́я Ни́ны благоле́пно украша́ется. Мы́ же, ве́рнии, воспои́м Христа́, Бо́га же и Челове́ка, и возопии́м: сла́ва в вы́шних Бо́гу.

Глас 6: И ны́не и при́сно и во ве́ки веко́в. Ами́нь.

О, па́че ума́ Боже́ственнаго смотре́ния! Ка́ко Творе́ц тва́ри предста́ и преклоня́ет сему́ главу́? Указа́нием бо на́м о́браз смире́ния вво́дит, и́же о Не́м просвеще́нным, Ему́же пое́м: благослове́н, явле́йся Бо́же на́ш, сла́ва Тебе́.

Славосло́вие вели́кое:

Сла́ва в вы́шних Бо́гу, и на земли́ мир, в челове́цех благоволе́ние. Хва́лим Тя, благослови́м Тя, кла́няем Ти ся, славосло́вим Тя, благодари́м Тя, вели́кия ра́ди сла́вы Твоея́. Го́споди Царю́ Небе́сный, Бо́же О́тче Вседержи́телю, Го́споди, Сы́не Единоро́дный, Иису́се Христе́, и Святы́й Ду́ше. Го́споди Бо́же, А́гнче Бо́жий, Сы́не Оте́чь, взе́мляй грех ми́ра, поми́луй нас; взе́мляй грехи́ ми́ра, приими́ моли́тву на́шу; седя́й одесну́ю Отца́, поми́луй нас. Я́ко Ты еси́ еди́н Свят, Ты еси́ еди́н Госпо́дь, Иису́с Христо́с, в сла́ву Бо́га Отца́. Ами́нь.

На всяк день благословлю́ Тя, и восхвалю́ И́мя Твое́ во ве́ки, и в век ве́ка.

Сподо́би, Го́споди, в день сей без греха́ сохрани́тися нам. Благослове́н еси́, Го́споди, Бо́же оте́ц на́ших, и хва́льно и просла́влено И́мя Твое́ во ве́ки. Ами́нь.

Бу́ди, Го́споди, ми́лость Твоя́ на нас, я́коже упова́хом на Тя.

Благослове́н еси́, Го́споди, научи́ мя оправда́нием Твои́м. (Три́жды)

Го́споди, прибе́жище был еси́ нам в род и род. Аз рех: Го́споди, поми́луй мя, исцели́ ду́шу мою́, я́ко согреши́х Тебе́. Го́споди, к Тебе́ прибего́х, научи́ мя твори́ти во́лю Твою́, я́ко Ты еси́ Бог мой: я́ко у Тебе́ исто́чник живота́, во све́те Твое́м у́зрим свет. Проба́ви ми́лость Твою́ ве́дущим Тя.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Три́жды)

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Святы́й Безсме́ртный, поми́луй нас.

Святы́й Бо́же, Святы́й Кре́пкий, Святы́й Безсме́ртный, поми́луй нас.

Тропа́рь, глас 4:

Сло́ва Бо́жия служи́тельнице, во апо́стольстей про́поведи первозва́нному Андре́ю и про́чим апо́столом подража́вшая, просвети́тельнице Иве́рии, и Ду́ха Свята́го цевни́це, свята́я равноапо́стольная Ни́но, моли́ Христа́ Бо́га спасти́ся душа́м на́шим.

Утверди́, Бо́же, святу́ю правосла́вную ве́ру, правосла́вных христиа́н во век ве́ка.

Честне́йшую Херуви́м и Сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу, Тя велича́ем.

Сла́ва, и ны́не. Го́споди, поми́луй. (Три́жды) Благослови́.

И́же во Иорда́не крести́тися изво́ливый от Иоа́нна на́шего ра́ди спасе́ния Господи Иисусе Христе, Сыне Божий, моли́твами Пречи́стыя Своея́ Ма́тере, святой равноапостольной Нины, просветительницы Грузии, преподобных и богоносных отец наших и всех святы́х, поми́луй и спаси нас я́ко Благ и Челове́колюбец.

Многоле́тие:

Вели́каго Господи́на и Отца́ на́шего Кири́лла,/ Святе́йшаго Патри́арха Моско́вского и всея́ Руси́,/ и Господи́на на́шего (Высоко-) Преосвяще́ннейшаго (имярек),/ (архи-)епи́скопа (митрополита (титул)),/ богохрани́мую страну́ на́шу Росси́йскую,/  и вся правосла́вныя христи́аны,// Го́споди, сохрани́ их на мно́гая ле́та.