Последование Всеношного бдения в день памяти собора Предтечи и Крестителя Господня Иоанна. Для домашнего (келейного) совершения

ВСЕНО́ЩНОЕ БДЕ́НИЕ

ВЕЛИ́КАЯ ВЕЧЕ́РНЯ

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас. Ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Трижды.)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, (трижды). Сла́ва, и ны́не:

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Таже, Го́споди, поми́луй, (12), Сла́ва, и ны́не:

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 103:

Поется часть псалма:

Благослови́, душе́ моя́, Го́спода. / Благослове́н еси́, Го́споди. / Го́споди, Бо́же мой, возвели́чился еси́ зело́. / Благослове́н еси́, Го́споди. / Во испове́дание и в велеле́поту обле́клся еси́. / Благослове́н еси́, Го́споди. / Посреде́ гор про́йдут во́ды. / Ди́вна дела́ Твоя́, Го́споди. / Вся прему́дростию сотвори́л еси́. / Сла́ва Ти, Го́споди, сотвори́вшему вся.

Или читается псалом полностью:

Благослови́, душе́ моя́, Го́спода. Го́споди, Бо́же мой, возвели́чился еси́ зело́. Во испове́дание и в велеле́поту обле́клся еси́. Одея́йся све́том, я́ко ри́зою, простира́яй не́бо, я́ко ко́жу. Покрыва́яй вода́ми превы́спренняя Своя́, полага́яй о́блаки на восхожде́ние Свое́, ходя́й на крилу́ ве́треню. Творя́й А́нгелы Своя́ ду́хи и слуги́ Своя́ пла́мень о́гненный. Основа́яй зе́млю на тве́рди ея́, не преклони́тся в век ве́ка. Бе́здна, я́ко ри́за, одея́ние ея́, на гора́х ста́нут во́ды, от запреще́ния Твоего́ побе́гнут, от гла́са гро́ма Твоего́ убоя́тся. Восхо́дят го́ры и нисхо́дят поля́ в ме́сто, е́же основа́л еси́ им. Преде́л положи́л еси́, eго́же не пре́йдут, ниже́ обратя́тся покры́ти зе́млю. Посыла́яй исто́чники в де́брех, посреде́ гор про́йдут во́ды. Напая́ют вся зве́ри се́льныя, ждут она́гри в жа́жду свою́. На ты́х пти́цы небе́сныя привита́ют, от среды́ ка́мения дадя́т глас. Напая́яй го́ры от превы́спренних Свои́х, от плода́ дел Твои́х насы́тится земля́. Прозяба́яй траву́ ското́м, и злак на слу́жбу челове́ком, извести́ хлеб от земли́. И вино́ весели́т се́рдце челове́ка, ума́стити лице́ еле́ем, и хлеб се́рдце челове́ка укрепи́т. Насы́тятся древа́ польска́я, ке́дри Лива́нстии, и́хже еси́ насади́л. Та́мо пти́цы вогнездя́тся, ероди́ево жили́ще предводи́тельствует и́ми. Го́ры высо́кия еле́нем, ка́мень прибе́жище за́яцем. Сотвори́л есть луну́ во времена́, со́лнце позна́ за́пад свой. Положи́л еси́ тму, и бысть нощь, в не́йже про́йдут вси зве́рие дубра́внии. Ски́мни рыка́ющии, восхи́тити и взыска́ти от Бо́га пи́щу себе́. Возсия́ со́лнце и собра́шася и в ло́жах свои́х ля́гут. Изы́дет челове́к на де́ло свое́ и на де́лание свое́ до ве́чера. Я́ко возвели́чишася дела́ Твоя́, Го́споди, вся прему́дростию сотвори́л еси́, испо́лнися земля́ тва́ри Твоея́. Сие́ мо́ре вели́кое и простра́нное, та́мо га́ди, и́мже несть числа́, живо́тная ма́лая с вели́кими, та́мо корабли́ препла́вают, змий сей, eго́же созда́л еси руга́тися eму́. Вся к Тебе́ ча́ют, да́ти пи́щу им во бла́го вре́мя. Да́вшу Тебе́ им соберу́т, отве́рзшу Тебе́ ру́ку вся́ческая испо́лнятся бла́гости, отвра́щшу же Тебе́ лице́, возмяту́тся, отъи́меши дух их, и исче́знут, и в персть свою́ возвратя́тся. По́слеши Ду́ха Твоего́, и сози́ждутся, и обнови́ши лице́ земли́. Бу́ди сла́ва Госпо́дня во ве́ки, возвесели́тся Госпо́дь о де́лех Свои́х, призира́яй на зе́млю, и творя́й ю́ трясти́ся, прикаса́яйся гора́м, и дымя́тся. Воспою́ Го́сподеви в животе́ мое́м, пою́ Бо́гу моему́, до́ндеже есмь, да услади́тся Ему́ бесе́да моя́, аз же возвеселю́ся о Го́споде. Да исче́знут гре́шницы от земли́, и беззако́нницы, я́коже не бы́ти им. Благослови́, душе́ моя́, Го́спода.

Со́лнце позна́ за́пад свой. Положи́л еси́ тму, и бысть нощь. Я́ко возвели́чишася дела́ Твоя́, Го́споди, вся прему́дростию сотвори́л еси́.

Сла́ва, и ны́не: Аллилу́иа, аллилу́иа, аллилу́иа, сла́ва Тебе́ Бо́же. Трижды.

Блаже́н муж:

Блаже́н муж, и́же не и́де на сове́т нечести́вых.

Аллилу́иа, аллилу́иа, аллилу́иа.

Я́ко весть Госпо́дь путь пра́ведных, и путь нечести́вых поги́бнет.

Аллилу́иа, аллилу́иа, аллилу́иа.

Рабо́тайте Го́сподеви со стра́хом и ра́дуйтеся Ему́ с тре́петом.

Аллилу́иа, аллилу́иа, аллилу́иа.

Блаже́ни вси наде́ющиися Нань.

Аллилу́иа, аллилу́иа, аллилу́иа.

Воскресни́, Го́споди, спаси́ мя, Бо́же мой.

Аллилу́иа, аллилу́иа, аллилу́иа.

Госпо́дне есть спасе́ние, и на лю́дех Твои́х благослове́ние Твое́.

Аллилу́иа, аллилу́иа, аллилу́иа.

Сла́ва Отцу́ и Сы́ну и Свято́му Духу.

Аллилу́иа, аллилу́иа, аллилу́иа.

И ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Го́споди, воззва́х, глас 2:

Го́споди, воззва́х к Тебе́, услы́ши мя./ Услы́ши мя, Го́споди./ Го́споди, воззва́х к Тебе́, услы́ши мя:/ вонми́ гла́су моле́ния моего́,/ внегда́ воззва́ти ми к Тебе́.// Услы́ши мя, Го́споди.

Да испра́вится моли́тва моя́,/ я́ко кади́ло пред Тобо́ю,/ воздея́ние руку́ мое́ю/ – же́ртва вече́рняя.// Услы́ши мя, Го́споди.

Стихи́ры пра́здника, глас 2:

Стих: А́ще беззако́ния на́зриши, Го́споди, Го́споди, кто постои́т? Я́ко у Тебе́ очище́ние есть.

Просвети́теля на́шего, просвеща́ющаго вся́каго челове́ка, ви́дев Предте́ча, крести́тися прише́дша, ра́дуется душе́ю и трепе́щет, руко́ю показу́ет Его́, и глаго́лет лю́дем: Се́й, избавля́яй Изра́иля, свобожда́яй на́с от истле́ния. О, безгре́шный Христе́ Бо́же на́ш, сла́ва Тебе́!

Стих: И́мене ра́ди Твоего́ потерпе́х Тя, Го́споди, потерпе́ душа́ моя́ в сло́во Твое́, упова́ душа́ моя́ на Го́спода.

Изба́вителю на́шему, от раба́ креща́ему и Ду́ха прише́ствием свиде́тельствуему, ужасо́шася, зря́ще, Ангельская во́инства. Гла́с же с небесе́ принесе́ся от Отца́: Се́й, Его́же Предте́ча руко́ю креща́ет, Сы́н Мо́й е́сть возлю́бленный, о Не́мже благоволи́х. Христе́ Бо́же на́ш, сла́ва Тебе́!

Стих: От стра́жи у́тренния до но́щи, от стра́жи у́тренния да упова́ет Изра́иль на Го́спода.

Иорда́нския струи́ Тебе́, Исто́чника, прия́ша, и Уте́шитель в ви́де голуби́не схожда́ше: приклоня́ет ве́рх Приклони́вый небеса́. Зове́т и вопие́т бре́ние Зижди́телю: что́ ми повелева́еши, я́же вы́ше мене́? Аз тре́бую Твоего́ креще́ния. О, безгре́шный Христе́ Бо́же на́ш, сла́ва Тебе́!

Стих: Я́ко у Го́спода ми́лость, и мно́гое у Него́ избавле́ние, и Той изба́вит Изра́иля от всех беззако́ний eго́.

Гла́с 1 Ви́дев Тя́ гряду́ща, Христе́, к себе́ Предте́ча / и креще́ния прося́ща, / с тре́петом возопи́: / что́ ми повелева́еши, / я́же па́че си́лы соверши́ти? / О, Всеси́льне Го́споди, / ка́ко руко́ю косну́ся Тебе́, / руко́ю вся́ содержа́щаго? / Ты́ мя па́че крести́, раба́ Твоего́.

Стих: Хвали́те Го́спода вси язы́цы, похвали́те Его́ вси лю́дие.

Яви́хся ве́сь Челове́к ны́не, / присту́пен тебе́ бы́х, / Естество́м Непристу́пный, / во́лею обнища́х, Бога́т сы́й, / я́ко да обнища́вшее обогащу́ / нетле́нием и избавле́нием. / Приступи́, крести́ / тле́нию неподлежа́щаго / и ми́р от тли́ изыма́ющаго.

Стих: Я́ко утверди́ся ми́лость Его́ на нас, и и́стина Госпо́дня пребыва́ет во век.

Содержи́мь е́смь отвсю́ду / и, ка́мо бежа́ти, недоуме́юся, — / рече́ Зижди́телю Предте́ча, — / пото́к сы́й пи́щный, Ще́дре, / ка́ко у́бо Тя́ / ре́чныя вше́дшаго прии́мут струи́, / излива́юща спасе́ние / почита́ющим Твое́ / свято́е, Сло́ве, явле́ние?

Глас 6: Сла́ва Отцу́ и Сы́ну и Свято́му Ду́ху.

Во пло́ти свети́льниче, Предте́че Спа́сов, прозябе́ние непло́дныя, дру́же Су́щаго от Де́вы, Ему́же взыгра́ньми во утро́бе поклони́лся еси́ и крести́л еси́ в вода́х Иорда́нских. Сего́ моли́, мо́лимся, проро́че, бу́дущих избежа́ти треволне́ний.

Глас 6: И ны́не и при́сно и во ве́ки веко́в. Ами́нь.

Бо́г Сло́во яви́ся пло́тию ро́ду челове́ческому, стоя́ше крести́тися во Иорда́не, и глаго́лаше к Нему́ Предте́ча: ка́ко простру́ ру́ку и прикосну́ся верху́ Держа́щаго вся́ческая? Аще и от Мари́и еси́ Младе́нец, но ве́м Тя́, Бо́га Преве́чнаго, по земли́ хо́диши, пева́емый от серафи́м, и ра́б Влады́ку креща́ти не научи́хся. Непостижи́ме Го́споди, сла́ва Тебе́!

Све́те Тихи́й:

Све́те Ти́хий святы́я сла́вы Безсме́ртнаго Отца́ Небе́снаго, Свята́го, Блаже́ннаго, Иису́се Христе́! Прише́дше на за́пад со́лнца, ви́девше свет вече́рний, пое́м Отца́, Сы́на и Свята́го Ду́ха, Бо́га. Досто́ин еси́ во вся времена́ пет бы́ти гла́сы преподо́бными, Сы́не Бо́жий, живо́т дая́й; те́мже мир Тя сла́вит.

Сподо́би, Го́споди:

Сподо́би, Го́споди, в ве́чер сей без греха́ сохрани́тися нам. Благослове́н еси́, Го́споди, Бо́же оте́ц на́ших, и хва́льно и просла́влено и́мя Твое́ во ве́ки. Ами́нь.

Бу́ди, Го́споди, ми́лость Твоя́ на нас, я́коже упова́хом на Тя. Благослове́н еси́, Го́споди, научи́ мя оправда́нием Твои́м. Благослове́н еси́, Влады́ко, вразуми́ мя оправда́нием Твои́м. Благослове́н еси́, Святы́й, просвети́ мя оправда́нии Твои́ми.

Го́споди, ми́лость Твоя́ во век, дел руку́ Твое́ю не пре́зри. Тебе́ подоба́ет хвала́, Тебе́ подоба́ет пе́ние, Тебе́ сла́ва подоба́ет. Отцу́ и Сы́ну и Свято́му Ду́ху, ны́не и при́сно и во ве́ки веко́в. Ами́нь.

Го́споди, поми́луй. (40 раз)

Стихи́ры на стихо́вне:

Стихи́ры: Глас 4:

Яко ви́де Тя́, Влады́ко, Иоа́нн Предте́ча, / к нему́ иду́ща, / ужа́сен бы́в, / я́ко благонра́вен ра́б со стра́хом вопия́ше: / ко́е смире́ние, Спа́се? / ка́я нищета́, в ню́же оде́ялся еси́? / Бога́тством бла́гости смири́вшагося челове́ка возне́с, / я́ко Благоутро́бен, / я́ко в него́ оде́явыйся.

Стих: Мо́ре ви́де и побеже́, / Иорда́н возврати́ся вспя́ть.

Гряди́ ко Мне́, — / та́инство соверша́ющему спаси́тельное / Предте́чи противовеща́л еси́, — / со стра́хом послужи́ / Спа́су вся́ческих и не ужаса́йся. / Сокруше́ннаго бо Ада́ма грехо́м обновля́я, / креща́юся, я́ко Челове́к, / естество́м Нескве́рный, / Иорда́нскими вода́ми, / в ни́хже ви́диши прише́дша Мя́.

Стих: Что́ ти е́сть, мо́ре, я́ко побе́гло еси́? / И тебе́, Иорда́не, я́ко возврати́лся еси́ вспя́ть?

Со́лнце очища́емо / кто́ от земноро́дных ви́де, — / Иоа́нн проти́во рече́, — / и Одева́ющаго не́бо о́блаки обнажа́ема всего́, / и исто́чники, и ре́ки Содева́ющаго в во́ды входя́ща? / Дивлю́ся несказа́нному смотре́нию Твоему́, Влады́ко, / не отягчи́ раба́ Твоего́ / стра́шными повеле́нии.

Слава, глас 4: Яко Ду́ха рачи́тель и благода́ти боговеща́нная ла́стовица, я́сно смотре́ние Царе́во, челове́ческому ро́ду из Чи́стыя све́тло возсия́вшаго челове́ков на обновле́ние просвети́л еси́, Предте́че, се́тующих обы́чай отъе́мля в коне́ц и жи́зни присносу́щныя прия́ти направля́я сердца́ в покая́нии креща́емых, блаже́нне богоприя́тне.

И ныне, глас 4:

Прииди́те, подража́им му́дрыя де́вы, прииди́те, сря́щим я́вльшагося Влады́ку, я́ко прии́де, я́ко Жени́х, ко Иоа́нну. Иорда́н, ви́дев Тя́, убоя́ся и пожда́. Иоа́нн вопия́ше: не сме́ю держа́ти верха́ Безсме́ртнаго. Ду́х схожда́ше в ви́де голуби́не освяти́ти во́ды, и гла́с с небесе́: Се́й е́сть Сы́н Мо́й, прише́дый в ми́р спасти́ ро́д челове́ческий. Го́споди, сла́ва Тебе́!

Моли́тва свята́го Симео́на Богоприи́мца:

Ны́не отпуща́еши раба́ Твоего́, Влады́ко,/ по глаго́лу Твоему́, с ми́ром;/ я́ко ви́деста о́чи мои́ спасе́ние Твое́,/ е́же еси́ угото́вал пред лице́м всех люде́й,/ свет во открове́ние язы́ков,// и сла́ву люде́й Твои́х Изра́иля.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Тропа́рь, глас 2:

Па́мять пра́веднаго с похвала́ми, тебе́ же довле́ет свиде́тельство Госпо́дне, Предте́че: показа́л бо ся еси́ вои́стинну и проро́ков честне́йший, я́ко и в струя́х крести́ти сподо́бился еси́ Пропове́даннаго. Те́мже за и́стину пострада́в, ра́дуяся, благовести́л еси́ и су́щим во а́де Бо́га, я́вльшагося пло́тию, взе́млющаго гре́х ми́ра и подаю́щаго на́м ве́лию ми́лость.

Сла́ва, и ны́не, предпра́зднства глас 1:

Во Иорда́не креща́ющуся Тебе́, Го́споди, Тро́ическое яви́ся поклоне́ние: Роди́телев бо гла́с свиде́тельствоваше Тебе́, возлю́бленнаго Тя́ Сы́на имену́я, и Ду́х в ви́де голуби́не изве́ствоваше словесе́ утвержде́ние. Явле́йся Христе́ Бо́же и ми́р просвеще́й, сла́ва Тебе́.

Бу́ди И́мя Госпо́дне благослове́но от ны́не и до ве́ка. (Три́жды)

Псало́м 33:

Благословлю́ Го́спода на вся́кое вре́мя,/ вы́ну хвала́ Его́ во усте́х мои́х./ О Го́споде похва́лится душа́ моя́,/ да услы́шат кро́тцыи, и возвеселя́тся./ Возвели́чите Го́спода со мно́ю,/ и вознесе́м И́мя Его́ вку́пе./ Взыска́х Го́спода, и услы́ша мя,/ и от все́х скорбе́й мои́х изба́ви мя./ Приступи́те к Нему́, и просвети́теся,/ и ли́ца ва́ша не постыдя́тся./ Сей ни́щий воззва́, и Госпо́дь услы́ша и́,/ и от все́х скорбе́й его́ спасе́ и́./ Ополчи́тся а́нгел Госпо́день о́крест боя́щихся Его́,/ и изба́вит их./ Вкуси́те и ви́дите, я́ко благ Госпо́дь:/ блаже́н муж, и́же упова́ет Нань./ Бо́йтеся Го́спода, вси́ святи́и Его́,/ я́ко несть лише́ния боя́щимся Его́./ Бога́тии обнища́ша и взалка́ша:/ взыска́ющии же Го́спода// не лиша́тся вся́каго бла́га.

У́ТРЕНЯ.

Шестопса́лмие:

Сла́ва в вы́шних Бо́гу, и на земли́ мир, в челове́цех благоволе́ние. (Три́жды)

Го́споди, устне́ мои́ отве́рзеши, и уста́ моя́ возвестя́т хвалу́ Твою́. (Два́жды)

Псалом 3:

Го́споди, что ся умно́жиша стужа́ющии ми́? Мно́зи востаю́т на мя, мно́зи глаго́лют души́ мое́й: несть спасе́ния eму́ в Бо́зе eго́. Ты же, Го́споди, Засту́пник мой еси́, сла́ва моя́ и вознося́й главу́ мою́. Гла́сом мои́м ко Го́споду воззва́х, и услы́ша мя от горы́ святы́я Своея́. Аз усну́х, и спах, воста́х, я́ко Госпо́дь засту́пит мя. Не убою́ся от тем люде́й, о́крест напа́дающих на мя. Воскресни́, Го́споди, спаси́ мя, Бо́же мой, я́ко Ты порази́л еси́ вся вражду́ющыя ми всу́е: зу́бы гре́шников сокруши́л еси́. Госпо́дне есть спасе́ние, и на лю́дех Твои́х благослове́ние Твое́.

Аз усну́х, и спах, воста́х, я́ко Госпо́дь засту́пит мя.

Псалом 37:

Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́. Я́ко стре́лы Твоя́ унзо́ша во мне, и утверди́л еси́ на мне ру́ку Твою́. Несть исцеле́ния в пло́ти мое́й от лица́ гне́ва Твоего́, несть ми́ра в косте́х мои́х от лица́ грех мои́х. Я́ко беззако́ния моя́ превзыдо́ша главу́ мою́, я́ко бре́мя тя́жкое отяготе́ша на мне. Возсмерде́ша и согни́ша ра́ны моя́ от лица́ безу́мия моего́. Пострада́х и сляко́хся до конца́, весь день се́туя хожда́х. Я́ко ля́двия моя́ напо́лнишася поруга́ний, и несть исцеле́ния в пло́ти мое́й. Озло́блен бых и смири́хся до зела́, рыка́х от воздыха́ния се́рдца моего́. Го́споди, пред Тобо́ю все жела́ние мое́ и воздыха́ние мое́ от Тебе́ не утаи́ся. Се́рдце мое́ смяте́ся, оста́ви мя си́ла моя́, и свет о́чию мое́ю, и той несть со мно́ю. Дру́зи мои́ и и́скреннии мои́ пря́мо мне прибли́жишася и ста́ша, и бли́жнии мои́ отдале́че мене́ ста́ша и нужда́хуся и́щущии ду́шу мою́, и и́щущии зла́я мне глаго́лаху су́етная и льсти́вным весь день поуча́хуся. Аз же я́ко глух не слы́шах и я́ко нем не отверза́яй уст свои́х. И бых я́ко челове́к не слы́шай и не имы́й во усте́х свои́х обличе́ния. Я́ко на Тя, Го́споди, упова́х, Ты услы́шиши, Го́споди Бо́же мой. Я́ко рех: да не когда́ пора́дуют ми ся врази́ мои́: и внегда́ подвижа́тися нога́м мои́м, на мя велере́чеваша. Я́ко аз на ра́ны гото́в, и боле́знь моя́ предо мно́ю есть вы́ну. Я́ко беззако́ние мое́ аз возвещу́ и попеку́ся о гресе́ мое́м. Врази́ же мои́ живу́т и укрепи́шася па́че мене́, и умно́жишася ненави́дящии мя без пра́вды. Воздаю́щии ми зла́я возблага́я оболга́ху мя, зане́ гоня́х благосты́ню. Не оста́ви мене́, Го́споди Бо́же мой, не отступи́ от Мене́. Вонми́ в по́мощь мою́, Го́споди спасе́ния моего́.

Не оста́ви мене́, Го́споди Бо́же мой, не отступи́ от Мене́. Вонми́ в по́мощь мою́, Го́споди спасе́ния моего́.

Псалом 62:

Бо́же, Бо́же мой, к Тебе́ у́тренюю, возжада́ Тебе́ душа́ моя́, коль мно́жицею Тебе́ плоть моя́, в земли́ пу́сте и непрохо́дне, и безво́дне. Та́ко во святе́м яви́хся Тебе́, ви́дети си́лу Твою́ и сла́ву Твою́. Я́ко лу́чши ми́лость Твоя́ па́че живо́т, устне́ мои́ похвали́те Тя. Та́ко благословлю́ Тя в животе́ мое́м, о и́мени Твое́м воздежу́ ру́це мои́. Я́ко от ту́ка и ма́сти да испо́лнится душа́ моя́, и устна́ма ра́дости восхва́лят Тя уста́ моя́. А́ще помина́х Тя на посте́ли мое́й, на у́тренних поуча́хся в Тя. Я́ко был еси́ Помо́щник мой, и в кро́ве крилу́ Твое́ю возра́дуюся. Прильпе́ душа́ моя́ по Тебе́, мене́ же прия́т десни́ца Твоя́. Ти́и же всу́е иска́ша ду́шу мою́, вни́дут в преиспо́дняя земли́, предадя́тся в ру́ки ору́жия, ча́сти ли́совом бу́дут. Царь же возвесели́тся о Бо́зе, похва́лится всяк клены́йся Им, я́ко загради́шася уста́ глаго́лющих непра́ведная.

На у́тренних поуча́хся в Тя. Я́ко был еси́ Помо́щник мой, и в кро́ве крилу́ Твое́ю возра́дуюся. Прильпе́ душа́ моя́ по Тебе́, мене́ же прия́т десни́ца Твоя́.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Го́споди поми́луй. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Псалом 87:

Го́споди Бо́же спасе́ния моего́, во дни воззва́х, и в нощи́ пред Тобо́ю. Да вни́дет пред Тя моли́тва моя́: приклони́ у́хо Твое́ к моле́нию моему́, я́ко испо́лнися зол душа́ моя́, и живо́т мой аду прибли́жися. Привмене́н бых с низходя́щими в ров, бых я́ко челове́к без по́мощи, в ме́ртвых свобо́дь, я́ко я́звеннии спя́щии во гро́бе, и́хже не помяну́л еси́ ктому́, и ти́и от руки́ Твоея́ отринове́ни бы́ша. Положи́ша мя в ро́ве преиспо́днем, в те́мных и се́ни сме́ртней. На мне утверди́ся я́рость Твоя́, и вся во́лны Твоя́ наве́л еси́ на мя. Уда́лил еси́ зна́емых мои́х от Мене́, положи́ша мя ме́рзость себе́: пре́дан бых и не исхожда́х. О́чи мои́ изнемого́сте от нищеты́, воззва́х к Тебе́, Го́споди, весь день, возде́х к Тебе́ ру́це мои́. Еда́ ме́ртвыми твори́ши чудеса́? Или́ вра́чеве воскреся́т, и испове́дятся Тебе́? Еда́ пове́сть кто во гро́бе ми́лость Твою́, и и́стину Твою́ в поги́бели? Еда́ позна́на бу́дут во тьме чудеса́ Твоя́, и пра́вда Твоя́ в земли́ забве́нней? И аз к Тебе́, Го́споди, воззва́х и у́тро моли́тва моя́ предвари́т Тя. Вску́ю, Го́споди, отре́еши ду́шу мою́, отвраща́еши лице́ Твое́ от Мене́? Нищ есмь аз, и в труде́х от ю́ности моея́; возне́с же ся, смири́хся, и изнемого́х. На мне преидо́ша гне́ви Твои́, устраше́ния Твоя́ возмути́ша мя, обыдо́ша мя я́ко вода́, весь день одержа́ша мя вку́пе. Уда́лил еси́ от Мене́ дру́га и и́скренняго, и зна́емых мои́х от страсте́й.

Го́споди Бо́же спасе́ния моего́, во дни воззва́х, и в нощи́ пред Тобо́ю. Да вни́дет пред Тя моли́тва моя́: приклони́ у́хо Твое́ к моле́нию моему́.

Псалом 102:

Благослови́, душе́ моя́, Го́спода, и вся вну́тренняя моя́ и́мя свя́тое Его́. Благослови́, душе́ моя́, Го́спода, и не забыва́й всех воздая́ний Его́, очища́ющаго вся беззако́ния твоя́, исцеля́ющаго вся неду́ги твоя́, избавля́ющаго от истле́ния живо́т твой, венча́ющаго тя ми́лостию и щедро́тами, исполня́ющаго во благи́х жела́ние твое́: обнови́тся я́ко о́рля ю́ность твоя́. Творя́й ми́лостыни Госпо́дь, и судьбу́ всем оби́димым. Сказа́ пути́ Своя́ Моисе́ови, сыново́м Изра́илевым хоте́ния Своя́: Щедр и Ми́лостив Госпо́дь, Долготерпели́в и Многоми́лостив. Не до конца́ прогне́вается, ниже́ во век вражду́ет, не по беззако́нием на́шым сотвори́л есть нам, ниже́ по грехо́м на́шым возда́л есть нам. Я́ко по высоте́ небе́сней от земли́, утверди́л есть Госпо́дь ми́лость Свою́ на боя́щихся Его́. Ели́ко отстоя́т восто́цы от за́пад, уда́лил есть от нас беззако́ния на́ша. Я́коже ще́дрит оте́ц сы́ны, уще́дри Госпо́дь боя́щихся Его́. Я́ко Той позна́ созда́ние на́ше, помяну́, я́ко персть есмы́. Челове́к, я́ко трава́ дни́е eго́, я́ко цвет се́льный, та́ко оцвете́т, я́ко дух про́йде в нем, и не бу́дет, и не позна́ет ктому́ ме́ста своего́. Ми́лость же Госпо́дня от ве́ка и до ве́ка на боя́щихся Его́, и пра́вда Его́ на сыне́х сыно́в, храня́щих заве́т Его́, и по́мнящих за́поведи Его́ твори́ти я́. Госпо́дь на Небеси́ угото́ва Престо́л Свой, и Ца́рство Его́ все́ми облада́ет. Благослови́те Го́спода вси А́нгели Его́, си́льнии кре́постию, творя́щии сло́во Его́, услы́шати глас слове́с Его́. Благослови́те Го́спода вся Си́лы Его́, слуги́ Его́, творя́щии во́лю Его́. Благослови́те Го́спода вся дела́ Его́, на вся́ком ме́сте влады́чества Его́, благослови́, душе́ моя́, Го́спода.

На вся́ком ме́сте влады́чества Его́, благослови́, душе́ моя́, Го́спода.

Псалом 142:

Го́споди, услы́ши моли́тву мою́, внуши́ моле́ние мое́ во и́стине Твое́й, услы́ши мя в пра́вде Твое́й и не вни́ди в суд с рабо́м Твои́м, я́ко не оправди́тся пред Тобо́ю всяк живы́й. Я́ко погна́ враг ду́шу мою́, смири́л есть в зе́млю живо́т мой, посади́л мя есть в те́мных, я́ко ме́ртвыя ве́ка. И уны́ во мне дух мой, во мне смяте́ся се́рдце мое́. Помяну́х дни дре́вния, поучи́хся во всех де́лех Твои́х, в творе́ниих руку́ Твое́ю поуча́хся. Возде́х к Тебе́ ру́це мои́, душа́ моя́, я́ко земля́ безво́дная Тебе́. Ско́ро услы́ши мя, Го́споди, исчезе́ дух мой, не отврати́ лица́ Твоего́ от Мене́, и уподо́блюся низходя́щым в ров. Слы́шану сотвори́ мне зау́тра ми́лость Твою́, я́ко на Тя упова́х. Скажи́ мне, Го́споди, путь во́ньже пойду́, я́ко к Тебе́ взях ду́шу мою́. Изми́ мя от враг мои́х, Го́споди, к Тебе́ прибего́х. Научи́ мя твори́ти во́лю Твою́, я́ко Ты еси́ Бог мой. Дух Твой Благи́й наста́вит мя на зе́млю пра́ву. И́мене Твоего́ ра́ди, Го́споди, живи́ши мя, пра́вдою Твое́ю изведе́ши от печа́ли ду́шу мою́. И ми́лостию Твое́ю потреби́ши враги́ моя́ и погуби́ши вся стужа́ющыя души́ мое́й, я́ко аз раб Твой есмь.

Услы́ши мя, Го́споди, в пра́вде Твое́й и не вни́ди в суд с рабо́м Твои́м.

Услы́ши мя, Го́споди, в пра́вде Твое́й и не вни́ди в суд с рабо́м Твои́м.

Дух Твой Благи́й наста́вит мя на зе́млю пра́ву.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Тропа́рь глас 2:

Па́мять пра́веднаго с похвала́ми, тебе́ же довле́ет свиде́тельство Госпо́дне, Предте́че: показа́л бо ся еси́ вои́стинну и проро́ков честне́йший, я́ко и в струя́х крести́ти сподо́бился еси́ Пропове́даннаго. Те́мже за и́стину пострада́в, ра́дуяся, благовести́л еси́ и су́щим во а́де Бо́га, я́вльшагося пло́тию, взе́млющаго гре́х ми́ра и подаю́щаго на́м ве́лию ми́лость. (Дважды)

Сла́ва Отцу́ и Сы́ну и Свято́му Ду́ху. И ны́не и при́сно и во ве́ки веко́в. Ами́нь.

Глас 1: Во Иорда́не креща́ющуся Тебе́, Го́споди, Тро́ическое яви́ся поклоне́ние: Роди́телев бо гла́с свиде́тельствоваше Тебе́, возлю́бленнаго Тя́ Сы́на имену́я, и Ду́х в ви́де голуби́не изве́ствоваше словесе́ утвержде́ние. Явле́йся Христе́ Бо́же и ми́р просвеще́й, сла́ва Тебе́.

Здесь читается кафизма, положенная по дню, или сразу седальны:

Го́споди, поми́луй. (Три́жды)

Седален, глас 1:

Иису́су ро́ждшуся от Де́вы Мари́и и во Иорда́не кре́щшуся от Иоа́нна, Ду́х сни́де на Него́, зри́мый в ви́де голуби́не. Сего́ ра́ди проро́к со Ангелы глаго́лаше, зовы́й: сла́ва прише́ствию Твоему́, Христе́, сла́ва Ца́рствию Твоему́, сла́ва смотре́нию Твоему́, Еди́не Человеколю́бче.

Сла́ва Отцу́ и Сы́ну и Свято́му Ду́ху. И ны́не и при́сно и во ве́ки веко́в. Ами́нь.

Иису́су ро́ждшуся от Де́вы Мари́и и во Иорда́не кре́щшуся от Иоа́нна, Ду́х сни́де на Него́, зри́мый в ви́де голуби́не. Сего́ ра́ди проро́к со Ангелы глаго́лаше, зовы́й: сла́ва прише́ствию Твоему́, Христе́, сла́ва Ца́рствию Твоему́, сла́ва смотре́нию Твоему́, Еди́не Человеколю́бче.

Седален, глас 4:

Во струя́х ви́дев Тя́ Иорда́нских, крести́тися хотя́ща, вели́кий Предте́ча, Христе́, с весе́лием взыва́ше: прише́л еси́ и яви́лся еси́, Све́т Непристу́пный.

Сла́ва Отцу́ и Сы́ну и Свято́му Ду́ху. И ны́не и при́сно и во ве́ки веко́в. Ами́нь.

Во струя́х ви́дев Тя́ Иорда́нских, крести́тися хотя́ща, вели́кий Предте́ча, Христе́, с весе́лием взыва́ше: прише́л еси́ и яви́лся еси́, Све́т Непристу́пный.

Полиеле́й:

Хвали́те И́мя Госпо́дне, хвали́те, раби́ Го́спода.

Аллилу́иа, аллилу́иа, аллилу́иа.

Благослове́н Госпо́дь от Сио́на, живы́й во Иерусали́ме.

Аллилу́иа, аллилу́иа, аллилу́иа.

Испове́дайтеся Го́сподеви, я́ко Благ, я́ко в век ми́лость Его́.

Аллилу́иа, аллилу́иа, аллилу́иа.

Испове́дайтеся Бо́гу Небе́сному, я́ко в век ми́лость Его́.

Аллилу́иа, аллилу́иа, аллилу́иа.

Го́споди, поми́луй. (Три́жды)

Псало́м 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя. Я́ко беззако́ние мое́ аз зна́ю и грех мой предо мно́ю есть вы́ну. Тебе́ Еди́ному согреши́х, и лука́вое пред Тобо́ю сотвори́х, я́ко да оправди́шися во словесе́х Твои́х и победи́ши, внегда́ суди́ти Ти. Се бо в беззако́ниих зача́т есмь, и во гресе́х роди́ мя ма́ти моя́. Се бо и́стину возлюби́л еси́, безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся, омы́еши мя, и па́че сне́га убелю́ся. Слу́ху моему́ да́си ра́дость и весе́лие, возра́дуются ко́сти смире́нныя. Отврати́ лице́ Твое́ от грех мои́х, и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́, и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́, и Ду́хом Влады́чним утверди́ мя. Научу́ беззако́нныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́, возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо, всесожже́ния не благоволи́ши. Же́ртва Бо́гу дух сокруше́н, се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския, тогда́ благоволи́ши же́ртву пра́вды, возноше́ние и всесожега́емая: тогда́ возложа́т на олта́рь Твой тельцы́.

Го́споди, поми́луй. (12 раз)

Кано́н Предте́чи. Гла́с 2.

Пе́снь 1.

Ирмос: Непроходи́мое волня́щееся мо́ре Бо́жиим Свои́м веле́нием изсуши́вшему и пешеше́ствовати сквозе́ е́ изра́ильтеския лю́ди наста́вльшему, Го́сподеви пои́м: сла́вно бо просла́вися.

Припев: Крестителю Спасов Иоанне, моли Бога о нас.

Погружа́ема мя́ страсте́й бу́рею, Предте́че, моли́твами твои́ми предвари́в, спаси́: безстра́стия бо са́м бы́л еси́ прия́телище честно́е и чисте́йшее, Го́споду свы́ше от младе́нства возложе́н.

Ра́дуяся, Бо́гу предстоя́й Ангел равноа́нгельнаго благовести́ Заха́рии честно́му, твоему́ свяще́нствующу отцу́, тя́, всеблаже́нне, Госпо́дня Предте́чу и дру́га бы́вша.

Испо́лнен бы́л еси́ Всесвята́го Ду́ха, еще́ во чре́ве твоея́ ма́тере вну́трь носи́мь, и взыгра́нием кра́сным Де́вственный Пло́д, ра́дуяся, возвести́л еси́, и поклони́лся еси́, проро́че всече́стне.

Непрохо́дный все́м челове́ком пе́рвее стра́нный пу́ть жития́ просе́кшаго и крести́вшаго Христа́ во Иорда́нских струя́х, восхва́лим Госпо́дня Предте́чу, боже́ственнаго и богому́драго.

Богородичен: Всеосвяще́нный Де́вства хра́м, во чре́ве Бо́га Сло́ва чревоноси́вшая, притека́ющия к Тебе́ и призыва́ющия, Чи́стая, спаси́ моли́твами Твои́ми, бе́д разруша́ющи нахожде́ние, Всенепоро́чная.

Пе́снь 3.

Ирмос: На ка́мени мя́ ве́ры утверди́в, разшири́л еси́ уста́ моя́ на враги́ моя́, возвесели́бося ду́х мо́й, внегда́ пе́ти: не́сть свя́т, я́коже Бо́г на́ш, и не́сть пра́веден, па́че Тебе́, Го́споди.

Непло́дствия поноше́ние разреши́л еси́, позна́в Де́вы Боже́ственное Рождество́, взыгра́л еси́, ра́дуяся во чре́ве ма́терни, всехва́льне, Ангелов сожи́телю, Госпо́день Предте́че блаже́ннейший.

Стези́ предугото́вив Госпо́дни, ше́ствовал еси́ пред лице́м Его́, проро́че, я́ко свети́льник бо, все́м явля́яй сла́вы Отчее сия́ние, я́вльшееся пло́тию на́с ра́ди, показа́лся еси́ все́х изя́щнейший.

Возсия́л еси́, я́ко у́тро, пра́вды Со́лнце возвеща́я су́щим во тме́: все́х бо спасе́ния ты́ бы́л еси́ пропове́дник и Предте́ча и все́м глаго́лал еси́: ко Христу́ приступи́те ве́рою и спасе́теся.

Богородичен: Ра́дость неизглаго́ланную прие́мши, зачала́ еси́ безсе́менно Твоего́ Влады́ку, всю́, Богома́ти, вселе́нную призва́вшаго. Ему́ же и взыва́ем: я́ко не́сть свя́т, па́че Тебе́, Го́споди.

Седа́лен, гла́с 8.

Иорда́н струя́ми слу́жит, и Иоа́нн простира́ет ру́ку тле́нную я́вльшуся Тебе́, Неви́диме, пло́тию ко креще́нию. Но о́в у́бо возвраща́шеся вспя́ть со стра́хом, о́в же а́бие держа́ще с тре́петом Тя́, Нетле́ннаго. Вои́стинну Агнец Бо́жий, Исто́чник присноживо́тный, исто́чники же, и моря́, и челове́ки освяти́в, Тро́ица бо просия́ свы́ше, Сы́на Тя́ имену́ет Роди́тель, и Святы́й Ду́х схо́дит.

Пе́снь 4.

Ирмос: Пою́ Тя, слу́хом бо, Го́споди, услы́шах и ужасо́хся: до мене́ бо и́деши, мене́ ища́, заблу́ждшаго. Те́м мно́гое Твое́ снизхожде́ние, е́же на мя́, прославля́ю, Многоми́лостиве.

Оскверне́нныя омы́ти водо́ю посла́лся еси́, от Влады́ки уготовля́я прия́ти взе́млющаго гре́х Христа́ и ле́сть отгоня́ща богоразу́мия заре́ю, всече́стне.

Яда мя́ змии́на угрызе́ния исцели́ти, блаже́нне, моли́, и́же Христа́ вода́ми крести́в Иорда́нскими, в ни́хже змие́в вогнезди́вшуюся зло́бу Спа́с сокруши́.

Му́дростию Бо́жиею укра́шен, прише́л еси́ христопропове́дник: Вопию́щаго бо бы́л еси́ зову́щий, — пока́йтеся! — гла́с, я́ко проро́к, провозгласи́, Су́щаго па́че все́х челове́к Тя́ показу́я на́м.

Стра́нное и челове́ки нетре́нное живы́й житие́, предста́л еси́ вода́м, всеизря́днейше, Иорда́нским, гла́с Отчий слы́шав и прише́ствие Ду́ха узре́в.

Богородичен: Иже вся́ созда́вый Госпо́дь, по на́м Са́м зи́ждется, всели́вся, Всечи́стая, во утро́бу Твою́ всесвяту́ю, во о́браз челове́чь оде́яся и Сво́й о́браз спасе́.

Пе́снь 5

Ирмос: Просвеще́ние во тме́ лежа́щих, спасе́ние отча́янных, Христе́ Спа́се мо́й, к Тебе́ у́тренюю, Царю́ ми́ра, просвети́ мя сия́нием Твои́м, ино́го бо ра́зве Тебе́ Бо́га не зна́ю.

Преесте́ственныя доброде́тели светлостьми́ озаре́н, я́ко от небе́снаго тайновожде́ния вода́м предста́л еси́ Иорда́нским, креща́я и очища́я водо́ю, Предте́че, ве́рою душе́вною приступа́ющия тебе́.

Чи́стый и Нетле́нный Све́т хотя́ крести́ти, сосу́д чисте́йший показа́лся еси́, Иоа́нне: бо́лий бо все́х от Него́ предъизбра́лся еси́, проро́ков же честне́йший, Проро́чествованнаго бо сподо́бился еси́ ви́дети.

По́слан бы́в пред лице́м Госпо́дним, всего́ все́м стези́ челове́ком показу́я, прикаса́ется, трепе́ща, верху́ Влады́чню и креща́ет, глаго́ля, Предте́ча: ино́го, ра́зве Тебе́, Бо́га не ве́м.

Кто́ ви́де, или́ кто́ слы́ша, когда́ Безскве́рнаго созда́нию ве́рх преклоня́юща, руко́ю вся́ Содержа́щаго? Те́м тре́петно Крести́тель вопия́ше: ино́го, па́че Тебе́, Бо́га не ве́м.

Богородичен: Сы́н Бо́жий, Сы́н Тво́й, Де́во, я́ве показа́ся, дела́ я́ко Бо́г соверша́я во́лею еди́ною. Те́мже Тя́ вси́, и́стинно Богоро́дицу, и госпо́дьственно имену́ем: ины́я бо Ма́тере Бо́жия не ве́мы.

Пе́снь 6.

Ирмос: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же мя́ возведи́.

Ты́ Сло́ва гла́с предше́ствовал еси́ и, я́ко светоно́сная звезда́, возсия́л еси́, провозвеща́я, Предте́че, ты́ пра́вды Со́лнца.

Земны́х попече́ний не уве́дел еси́ и небе́сными наде́ждами обогати́лся еси́: на земли́, я́ко Ангел, жи́знь соверши́л еси́, всеблаже́нне.

Проро́ков тя́ печа́ть зна́ем, я́ко ве́тхаго и но́ваго хода́тая, и Крести́теля, и Предте́чу Спа́са Христа́ предвозвеща́ем.

Богородичен: Несказа́нно вои́стинну зача́тие, неизрече́нно Рождество́ Твое́ и непостижи́мо все́м ве́рным познава́ется и ве́руется, Еди́на Богоневе́сто.

Конда́к, гла́с 6:

Плотска́го Твоего́ прише́ствия убоя́вся, Иорда́н стра́хом возвраща́шеся; проро́ческое же служе́ние исполня́я, Иоа́нн тре́петом спря́ташеся; Ангельския чи́ни ужаса́хуся, зря́ще Тя́, во струя́х пло́тию креща́ема; и вси́, су́щии во тме́, озаря́хуся, воспева́юще Тя́, я́вльшагося и просвети́вшаго вся́.

Икос:

Осле́пшу Ада́му во Еде́ме, яви́ся Со́лнце из Вифлее́ма и отве́рзе ему́ зе́ницы, омы́в сия́ Иорда́нскими вода́ми. Очерне́вшему и омраче́нному Све́т возсия́ неугаси́мый. Уже́ ему́ не́сть но́щь, но всегда́ де́нь, е́же ко у́тру у́тро, его́ ра́ди роди́ся; к ве́черу бо сокры́ся, я́коже пи́шет, обре́те зарю́, возставля́ющую того́. Иже к ве́черу пады́й измени́ся мра́ка и дости́же ко у́тру Явльшагося и Просвети́вшаго вся́.

Пе́снь 7.

Ирмос: Купина́ в горе́ огненеопа́льная и росоно́сная пе́щь халде́йская, я́ве предписа́ Тя, Богоневе́сто, Боже́ственный бо невеще́ственный в веще́ственнем чре́ве, Огнь неопа́льно прия́ла еси́. Те́мже из Тебе́ Ро́ждшемуся пое́м: благослове́н еси́, Бо́же оте́ц на́ших.

Священноде́йствовав креще́ние и соверши́в, Предте́че, я́же от Бо́га я́ве да́нныя тебе́ та́йны, я́ко а́гнец незло́бив священноде́йствуемый, прине́слся еси́ же́ртва. Те́мже с тобо́ю согла́сно пое́м: благослове́н Бо́г оте́ц на́ших.

Но́вый Илия́ ты́ бы́л еси́, со дерзнове́нием, Предте́че, и царя́ облича́я беззако́нновавша, и житие́ невеще́ственно показу́я на́м, я́коже о́н, треблаже́нне. Те́мже с тобо́ю, проро́че, пое́м: благослове́н Бо́г оте́ц на́ших.

Иже проро́ков бо́льший и апо́столов, Предте́че, Христо́вых боже́ственную че́сть насле́довав, ты́ зако́на исполне́ние и нача́ло я́ве но́выя благода́ти яви́лся еси́. Те́мже с тобо́ю, треблаже́нне, пое́м: благослове́н Бо́г оте́ц на́ших.

Богородичен: Песнослове́ньми Всечи́стую и Богоприя́тную Влады́чицу, благочести́вии, досто́йно вси́ воспои́м, я́ко Бо́га ро́ждшую Единоро́днаго, на́м челове́ком я́вльшася. К Нему́же, ве́рнии, согла́сно пое́м: благослове́н Бо́г оте́ц на́ших.

Пе́снь 8.

Ирмос: Пе́щь иногда́ о́гненная в Вавило́не де́йства разделя́ше, Бо́жиим веле́нием халде́и опаля́ющая, ве́рныя же ороша́ющая, пою́щия: благослови́те вся́ дела́ Госпо́дня Го́спода.

Тя́, и́же на земли́ равноа́нгельна я́вльшася премене́нным житие́м и все́х вы́шша, Иоа́нне всеблаже́нне, ра́достно почита́ем, зову́ще: благослови́те, вся́ дела́ Госпо́дня, Го́спода.

Еди́но в Тре́х Божества́ Существо́ Единосу́щными Ипоста́сьми, проро́че, научи́л еси́: гла́сом бо Роди́теля и прише́ствием Ду́ха позна́л еси́ Креща́емаго, Сло́ва Бо́жия Присносу́щнаго.

Утро мы́сленное, Со́лнце возвеща́я, е́же из Де́вы возсия́вшее, из непло́дныя предте́кл еси́, Иоа́нне всече́стне, и Агнца пропове́дал еси́, ми́ра гре́х человеколю́бием взе́млющаго.

Свы́ше на́с ны́не назира́я, блаже́нне, твои́ми моли́твами сохрани́, боже́ственному пропове́данию после́дующия твоему́, всеблаже́нне, и во уче́ниих пребыва́юще, Предте́че, боже́ственных и спаси́тельных твои́х догма́тов.

Богородичен: Сла́вы Отчия зачала́ еси́ несказа́нно Преве́чное Осия́ние и Сло́во Безнача́льное, в нача́ле су́щее разумева́емое, и ны́не из Тебе́ перворожде́нна, Всечи́стая, бы́вша неизме́нно тва́ри.

Велича́й, душе́ моя́,// Честне́йшую Го́рних во́инств, Де́ву Пречи́стую, Богоро́дицу.

Пе́снь 9.

Ирмос: Яже пре́жде со́лнца Свети́льника Бо́га возсия́вшаго, пло́тски к на́м прише́дшаго, из боку́ Деви́чу неизрече́нно воплоти́вшая, Благослове́нная Всечи́стая, Тя́, Богоро́дице, велича́ем.

Велича́й, душе́ моя́,/ (и́же) во проро́цех вели́каго Предте́чу.

Из пусты́ни Предте́ча гла́с Сло́во показу́ет, пло́тски к на́м прише́дшее, и прису́щее прера́достно крести́ти гото́вится, ду́ши очища́ющее от греха́ ве́ры ра́ди.

Велича́й, душе́ моя́,/ (и́же) во проро́цех вели́каго Предте́чу.

Благода́ть же и зако́н хода́тая тя́ че́стна я́ве предлага́ют: о́в у́бо запеча́тствующаго, о́вая же начина́ющаго, все́х проро́ков Сло́вом предпочте́ннаго, па́че ви́димых пожи́вша, всече́стне.

Велича́й, душе́ моя́,/ (и́же) во проро́цех вели́каго Предте́чу.

Безтеле́сным подо́бное житие́ показа́в, со Ангельскими ли́ки весели́тся и, престо́лу предстоя́ Влады́чню, ра́дуется, восхваля́ющим оставле́ние и спасе́ние испроша́я.

Велича́й, душе́ моя́,/ Честне́йшую го́рних во́инств,/ Де́ву Пречи́сту Богоро́дицу.

Богородичен: За благоутро́бие все́х Изба́витель Челове́к быва́ет и плотско́е рожде́ние прие́млет, человеколю́бно па́че челове́ков сы́й Человеколю́бец, из девственнаго ложесна́ Твоего́, Богороди́тельнице Всеблаже́нная.

Свети́лен Предте́чи.

Стези́ предугото́вал еси́ чу́дно Го́сподеви: гла́с бо бы́л еси́ Того́ прише́ствия и пропове́дник и́стиннейший, проро́ков превы́шший, блаже́нне Иоа́нне: ты́ Све́т ви́дел еси́, я́ко неизглаго́ланное Его́ сконча́в смотре́ние.

Сла́ва, и ны́не, пра́здника:

Яви́ся Спа́с, благода́ть и и́стина, во струя́х Иорда́нских и су́щия во тме́ и се́ни спя́щия просвети́л е́сть, и́бо прии́де и яви́ся Све́т Непристу́пный.

Хвали́тны псалмы́, глас 1:

Вся́кое дыха́ние да хва́лит Го́спода./ Хвали́те Го́спода с небе́с,/ хвали́те Его́ в вы́шних.// Тебе́ подоба́ет песнь Бо́гу.

Хвали́те Его́ вси а́нгели Его́,/ хвали́те Его́ вся си́лы Его́.// Тебе́ подоба́ет песнь Бо́гу.

Сти́хиры, глас 1:

Стих: Сотвори́ти в них суд напи́сан/ сла́ва сия́ бу́дет всем преподо́бным Его́.

Све́т от Све́та возсия́ ми́ру, Христо́с, Спа́с на́ш, явле́йся Бо́г: Сему́, лю́дие, поклони́мся.

Стих: Хвали́те Его́ на си́лах Его́,/ хвали́те Его́ по мно́жеству вели́чествия Его́.

Ка́ко Тя́, Христе́, раби́, Влады́ку досто́йно почти́м? я́ко в вода́х все́х на́с обнови́л еси́.

Стих: Хвали́те Его́ в тимпа́не и ли́це,/ хвали́те Его́ во стру́нах и орга́не.

Ты́, во Иорда́не кре́щся, Спа́се на́ш, во́ды освяти́л еси́, дла́нию раба́ рукополага́емый и стра́сти ми́ра врачу́яй. Ве́лие та́инство явле́ния Твоего́, Человеколю́бче Го́споди, сла́ва Тебе́!

Стих: Хвали́те Его́ в кимва́лех доброгла́сных, хвали́те Его́ в кимва́лех восклица́ния. / Вся́кое дыха́ние да хва́лит Го́спода.

Истинный Све́т яви́ся и все́м просвеще́ние да́рует. Креща́ется Христо́с с на́ми, Иже вся́кия вы́шши чистоты́, влага́ет свяще́ние воде́, и душа́м сие́ очище́ние быва́ет, земно́е явля́емое и вы́шше небе́с разумева́емое. Ба́нею спасе́ние, водо́ю же Ду́х, погруже́ния ра́ди, и́же к Бо́гу, на́ш восхо́д быва́ет. Чуде́сна дела́ Твоя́, Го́споди, сла́ва Тебе́!

Глас 6: Сла́ва Отцу́ и Сы́ну и Свято́му Ду́ху

Ангел из непло́дных ложе́сн произше́л еси́, Крести́телю, от са́мых пеле́н в пусты́ню всели́лся еси́, печа́ть же все́х проро́ков показа́лся еси́: Его́же бо они́ многообра́зно ви́деша и гада́тельно пропове́даша, Сего́ крести́ти во Иорда́не сподо́бился еси́. Гла́с же услы́шал еси́ Оте́ческий с небесе́, свиде́тельствующь Его́ Сыновство́, и Ду́ха ви́дел еси́ голуби́ным ви́дом, гла́с влеку́щаго на Креща́емаго. Но, о все́х проро́ков превы́шший! Не преста́й моли́тися о на́с, ве́рно творя́щих твою́ па́мять.

Глас 2: И ны́не и при́сно и во ве́ки веко́в. Ами́нь.

Дне́сь Христо́с на Иорда́н прии́де крести́тися, дне́сь Иоа́нн каса́ется верху́ Влады́чню. Си́лы небе́сныя ужасо́шася, пресла́вное ви́дяще та́инство. Мо́ре ви́де и побеже́, Иорда́н, ви́дев, возврати́ся. Мы́ же, просве́щшеся, вопие́м: сла́ва яви́вшемуся Бо́гу, и на земли́ ви́денному, и просвети́вшему ми́р.

Славосло́вие вели́кое:

Сла́ва в вы́шних Бо́гу, и на земли́ мир, в челове́цех благоволе́ние. Хва́лим Тя, благослови́м Тя, кла́няем Ти ся, славосло́вим Тя, благодари́м Тя, вели́кия ра́ди сла́вы Твоея́. Го́споди Царю́ Небе́сный, Бо́же О́тче Вседержи́телю, Го́споди, Сы́не Единоро́дный, Иису́се Христе́, и Святы́й Ду́ше. Го́споди Бо́же, А́гнче Бо́жий, Сы́не Оте́чь, взе́мляй грех ми́ра, поми́луй нас; взе́мляй грехи́ ми́ра, приими́ моли́тву на́шу; седя́й одесну́ю Отца́, поми́луй нас. Я́ко Ты еси́ еди́н Свят, Ты еси́ еди́н Госпо́дь, Иису́с Христо́с, в сла́ву Бо́га Отца́. Ами́нь.

На всяк день благословлю́ Тя, и восхвалю́ И́мя Твое́ во ве́ки, и в век ве́ка.

Сподо́би, Го́споди, в день сей без греха́ сохрани́тися нам. Благослове́н еси́, Го́споди, Бо́же оте́ц на́ших, и хва́льно и просла́влено И́мя Твое́ во ве́ки. Ами́нь.

Бу́ди, Го́споди, ми́лость Твоя́ на нас, я́коже упова́хом на Тя.

Благослове́н еси́, Го́споди, научи́ мя оправда́нием Твои́м. (Три́жды)

Го́споди, прибе́жище был еси́ нам в род и род. Аз рех: Го́споди, поми́луй мя, исцели́ ду́шу мою́, я́ко согреши́х Тебе́. Го́споди, к Тебе́ прибего́х, научи́ мя твори́ти во́лю Твою́, я́ко Ты еси́ Бог мой: я́ко у Тебе́ исто́чник живота́, во све́те Твое́м у́зрим свет. Проба́ви ми́лость Твою́ ве́дущим Тя.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Три́жды)

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Святы́й Безсме́ртный, поми́луй нас.

Святы́й Бо́же, Святы́й Кре́пкий, Святы́й Безсме́ртный, поми́луй нас.

Тропа́рь, глас 2:

Па́мять пра́веднаго с похвала́ми, тебе́ же довле́ет свиде́тельство Госпо́дне, Предте́че: показа́л бо ся еси́ вои́стинну и проро́ков честне́йший, я́ко и в струя́х крести́ти сподо́бился еси́ Пропове́даннаго. Те́мже за и́стину пострада́в, ра́дуяся, благовести́л еси́ и су́щим во а́де Бо́га, я́вльшагося пло́тию, взе́млющаго гре́х ми́ра и подаю́щаго на́м ве́лию ми́лость.

Утверди́, Бо́же, святу́ю правосла́вную ве́ру, правосла́вных христиа́н во век ве́ка.

Честне́йшую Херуви́м и Сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу, Тя велича́ем.

Сла́ва, и ны́не. Го́споди, поми́луй. (Три́жды) Благослови́.

И́же во Иорда́не крести́тися изво́ливый от Иоа́нна на́шего ра́ди спасе́ния Господи Иисусе Христе, Сыне Божий, моли́твами Пречи́стыя Своея́ Ма́тере, Пророка, Предтечи и Крестителя Господня Иоанна, преподобных и богоносных отец наших и всех святы́х, поми́луй и спаси нас я́ко Благ и Челове́колюбец.

Многоле́тие:

Вели́каго Господи́на и Отца́ на́шего Кири́лла,/ Святе́йшаго Патри́арха Моско́вского и всея́ Руси́,/ и Господи́на на́шего (Высоко-) Преосвяще́ннейшаго (имярек),/ (архи-)епи́скопа (митрополита (титул)),/ богохрани́мую страну́ на́шу Росси́йскую,/  и вся правосла́вныя христи́аны,// Го́споди, сохрани́ их на мно́гая ле́та.