Последование Всеношного бдения в день памяти великомученика и целителя Пантелеимона. Для домашнего (келейного) совершения

ВСЕНО́ЩНОЕ БДЕ́НИЕ

ВЕЛИ́КАЯ ВЕЧЕ́РНЯ

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас. Ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Трижды.)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, (трижды). Сла́ва, и ны́не:

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Таже, Го́споди, поми́луй, (12), Сла́ва, и ны́не:

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 103:

Поется часть псалма:

Благослови́, душе́ моя́, Го́спода. / Благослове́н еси́, Го́споди. / Го́споди, Бо́же мой, возвели́чился еси́ зело́. / Благослове́н еси́, Го́споди. / Во испове́дание и в велеле́поту обле́клся еси́. / Благослове́н еси́, Го́споди. / Посреде́ гор про́йдут во́ды. / Ди́вна дела́ Твоя́, Го́споди. / Вся прему́дростию сотвори́л еси́. / Сла́ва Ти, Го́споди, сотвори́вшему вся.

Или читается псалом полностью:

Благослови́, душе́ моя́, Го́спода. Го́споди, Бо́же мой, возвели́чился еси́ зело́. Во испове́дание и в велеле́поту обле́клся еси́. Одея́йся све́том, я́ко ри́зою, простира́яй не́бо, я́ко ко́жу. Покрыва́яй вода́ми превы́спренняя Своя́, полага́яй о́блаки на восхожде́ние Свое́, ходя́й на крилу́ ве́треню. Творя́й А́нгелы Своя́ ду́хи и слуги́ Своя́ пла́мень о́гненный. Основа́яй зе́млю на тве́рди ея́, не преклони́тся в век ве́ка. Бе́здна, я́ко ри́за, одея́ние ея́, на гора́х ста́нут во́ды, от запреще́ния Твоего́ побе́гнут, от гла́са гро́ма Твоего́ убоя́тся. Восхо́дят го́ры и нисхо́дят поля́ в ме́сто, е́же основа́л еси́ им. Преде́л положи́л еси́, eго́же не пре́йдут, ниже́ обратя́тся покры́ти зе́млю. Посыла́яй исто́чники в де́брех, посреде́ гор про́йдут во́ды. Напая́ют вся зве́ри се́льныя, ждут она́гри в жа́жду свою́. На ты́х пти́цы небе́сныя привита́ют, от среды́ ка́мения дадя́т глас. Напая́яй го́ры от превы́спренних Свои́х, от плода́ дел Твои́х насы́тится земля́. Прозяба́яй траву́ ското́м, и злак на слу́жбу челове́ком, извести́ хлеб от земли́. И вино́ весели́т се́рдце челове́ка, ума́стити лице́ еле́ем, и хлеб се́рдце челове́ка укрепи́т. Насы́тятся древа́ польска́я, ке́дри Лива́нстии, и́хже еси́ насади́л. Та́мо пти́цы вогнездя́тся, ероди́ево жили́ще предводи́тельствует и́ми. Го́ры высо́кия еле́нем, ка́мень прибе́жище за́яцем. Сотвори́л есть луну́ во времена́, со́лнце позна́ за́пад свой. Положи́л еси́ тму, и бысть нощь, в не́йже про́йдут вси зве́рие дубра́внии. Ски́мни рыка́ющии, восхи́тити и взыска́ти от Бо́га пи́щу себе́. Возсия́ со́лнце и собра́шася и в ло́жах свои́х ля́гут. Изы́дет челове́к на де́ло свое́ и на де́лание свое́ до ве́чера. Я́ко возвели́чишася дела́ Твоя́, Го́споди, вся прему́дростию сотвори́л еси́, испо́лнися земля́ тва́ри Твоея́. Сие́ мо́ре вели́кое и простра́нное, та́мо га́ди, и́мже несть числа́, живо́тная ма́лая с вели́кими, та́мо корабли́ препла́вают, змий сей, eго́же созда́л еси руга́тися eму́. Вся к Тебе́ ча́ют, да́ти пи́щу им во бла́го вре́мя. Да́вшу Тебе́ им соберу́т, отве́рзшу Тебе́ ру́ку вся́ческая испо́лнятся бла́гости, отвра́щшу же Тебе́ лице́, возмяту́тся, отъи́меши дух их, и исче́знут, и в персть свою́ возвратя́тся. По́слеши Ду́ха Твоего́, и сози́ждутся, и обнови́ши лице́ земли́. Бу́ди сла́ва Госпо́дня во ве́ки, возвесели́тся Госпо́дь о де́лех Свои́х, призира́яй на зе́млю, и творя́й ю́ трясти́ся, прикаса́яйся гора́м, и дымя́тся. Воспою́ Го́сподеви в животе́ мое́м, пою́ Бо́гу моему́, до́ндеже есмь, да услади́тся Ему́ бесе́да моя́, аз же возвеселю́ся о Го́споде. Да исче́знут гре́шницы от земли́, и беззако́нницы, я́коже не бы́ти им. Благослови́, душе́ моя́, Го́спода.

Со́лнце позна́ за́пад свой. Положи́л еси́ тму, и бысть нощь. Я́ко возвели́чишася дела́ Твоя́, Го́споди, вся прему́дростию сотвори́л еси́.

Сла́ва, и ны́не: Аллилу́иа, аллилу́иа, аллилу́иа, сла́ва Тебе́ Бо́же. Трижды.

Блаже́н муж:

Блаже́н муж, и́же не и́де на сове́т нечести́вых.

Аллилу́иа, аллилу́иа, аллилу́иа.

Я́ко весть Госпо́дь путь пра́ведных, и путь нечести́вых поги́бнет.

Аллилу́иа, аллилу́иа, аллилу́иа.

Рабо́тайте Го́сподеви со стра́хом и ра́дуйтеся Ему́ с тре́петом.

Аллилу́иа, аллилу́иа, аллилу́иа.

Блаже́ни вси наде́ющиися Нань.

Аллилу́иа, аллилу́иа, аллилу́иа.

Воскресни́, Го́споди, спаси́ мя, Бо́же мой.

Аллилу́иа, аллилу́иа, аллилу́иа.

Госпо́дне есть спасе́ние, и на лю́дех Твои́х благослове́ние Твое́.

Аллилу́иа, аллилу́иа, аллилу́иа.

Сла́ва Отцу́ и Сы́ну и Свято́му Духу.

Аллилу́иа, аллилу́иа, аллилу́иа.

И ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Го́споди, воззва́х, глас 4:

Го́споди, воззва́х к Тебе́, услы́ши мя./ Услы́ши мя, Го́споди./ Го́споди, воззва́х к Тебе́, услы́ши мя:/ вонми́ гла́су моле́ния моего́,/ внегда́ воззва́ти ми к Тебе́.// Услы́ши мя, Го́споди.

Да испра́вится моли́тва моя́,/ я́ко кади́ло пред Тобо́ю,/ воздея́ние руку́ мое́ю/ – же́ртва вече́рняя.// Услы́ши мя, Го́споди.

Стихи́ры пра́здника, глас 4:

Стих: Из глубины́ воззва́х к Тебе́, Го́споди,// Го́споди, услы́ши глас мой.

И́же по достоя́нию / зван быв Пантелеи́мон, / егда́ человеколю́бное всем просте́рл еси́ душ попече́ние, / и теле́с исцеле́ние показу́я, / тогда́ тезоиме́нным зва́нием обогати́лся еси́, / доброде́тели воздая́ние / и благоче́стия возме́здие, му́чениче, обре́т, / венцено́сец и непобеди́м во́ин я́влься / Христа́ Бо́га на́шего. / Его́же моли́ спасти́ и просвети́ти ду́ши на́ша.

Стих: А́ще беззако́ния на́зриши, Го́споди, Го́споди, кто постои́т?// Я́ко у Тебе́ очище́ние е́сть.

И́же от невеще́ственных исто́чник Спаси́теля / Боже́ственных исцеле́ний при́сно благода́ть почерпа́я, / и бога́тно излива́я, / и подава́я приступа́ющим к тебе́, всеблаже́нне, / всех сла́вное твое́ и всесвяще́нное / и светоно́сное торжество́ ве́рно соверша́ющих, / благода́тию Боже́ственною сих озари́. / Богоподо́бным пома́зан именова́нием, / я́ве и бла́гостию, / е́йже моли́ всем дарова́тися, пою́щим тя.

Стих: От стра́жи у́тренния до но́щи, от стра́жи у́тренния,// да уповае́т Изра́иль на Го́спода.

Му́ками мно́гими искуси́ся / твоя́ ны́не огнепа́льная любо́вь / ко е́же су́щему жела́нию, / мо́рем и огне́м зави́стно бори́м. / Те́мже, злонача́льнаго испрове́рг, / живоно́сное де́йство Уте́шителя / я́ве прия́т богатода́тельное. / Е́юже и жи́ва пресла́вно уме́ршаго, / Богому́дре, показа́л еси́, / и разли́чная исцеле́ния соде́лал еси́, преблаже́нне.

Стих: Хвали́те Го́спода вси язы́цы, похвали́те Его́ вси лю́дие.

Глас 2:Безме́здно благода́ть дае́ши челове́ком, / Пантелеи́моне му́чениче сла́вне, / и ду́хи отго́ниши призыва́нием Христо́вым, / и слепы́м ви́дети да́руеши, / я́ко Того́ уго́дник и́скренний; / но моли́, врачу́ всеблаже́нне, / дарова́ти ми́ру мир тверд / и тя лю́бящим ве́лию ми́лость.

Глас 6: Сла́ва Отцу́ и Сы́ну и Свято́му Ду́ху.

Возсия́ днесь честна́я па́мять безсре́бреника, / ве́рныя созыва́ющи на трапе́зу та́йную, / и к торжеству́ пра́зднственному водя́щи празднолю́бных составле́ния, / наста́ бо ны́не нам чудоде́йственный врач, / неду́ги всем исцеля́яй, / Пантелеи́мон, тве́рдый страда́лец, / и мо́лится приле́жно Го́сподеви / спасти́ся душа́м на́шим.

Глас 6: И ны́не и при́сно и во ве́ки веко́в. Ами́нь.

Кто Тебе́ не ублажи́т, Пресвята́я Де́во; / кто ли не воспое́т Твоего́ Пречи́стаго Рождества́; / безле́тно бо от Отца́ возсия́вый Сын Единоро́дный, / То́йже от Тебе́, Чи́стыя, про́йде, / неизрече́нно вопло́щься, / естество́м Бог Сый, / и естество́м быв Челове́к нас ра́ди; / не во двою́ лицу́ разделя́емый, / но во двою́ естеству́ / несли́тно познава́емый. / Того́ моли́, Чи́стая Всеблаже́нная, / поми́ловатися душа́м на́шим.

Све́те Тихи́й:

Све́те Ти́хий святы́я сла́вы Безсме́ртнаго Отца́ Небе́снаго, Свята́го, Блаже́ннаго, Иису́се Христе́! Прише́дше на за́пад со́лнца, ви́девше свет вече́рний, пое́м Отца́, Сы́на и Свята́го Ду́ха, Бо́га. Досто́ин еси́ во вся времена́ пет бы́ти гла́сы преподо́бными, Сы́не Бо́жий, живо́т дая́й; те́мже мир Тя сла́вит.

Пареми́и:

Проро́чества Иса́иина чте́ние.

Та́ко глаго́лет Госпо́дь: вси язы́цы собра́шася вку́пе, и соберу́тся кня́зи от них. Кто возвести́т сия́ в них? Или́, я́же от нача́ла, кто слы́шана сотвори́т вам? Да приведу́т свиде́тели своя́, и оправдя́тся, и да услы́шат, и да реку́т и́стину. Бу́дите Ми свиде́тели, и Аз Свиде́тель, глаго́лет Госпо́дь Бог, и о́трок его́же избра́х. Да позна́ете, и ве́руете Ми, и разуме́ете, я́ко Аз есмь, пре́жде Мене́ не бысть ин бог, и по Мне не бу́дет. Аз есмь Бог, и несть ра́зве Мене́ спаса́яй. Аз возвести́х и спасо́х, уничижи́х и не бе в вас чу́ждий. Вы Мне свиде́тели, и Аз Госпо́дь Бог, и еще́ от нача́ла Аз есмь, и несть от рук Мои́х избавля́яй. Сотворю́, и кто отврати́т то? Си́це глаго́лет Госпо́дь Бог, избавля́яй вас Святы́й Изра́илев.

Прему́дрости Соломо́новы чте́ние.

Пра́ведных ду́ши в руце́ Бо́жией, и не прико́снется их му́ка. Непщева́ни бы́ша во очесе́х безу́мных умре́ти, и вмени́ся озлобле́ние исхо́д их. И е́же от нас ше́ствие сокруше́ние, они́ же суть в ми́ре. И́бо пред лице́м челове́ческим, а́ще и му́ку прии́мут, упова́ние их безсме́ртия испо́лнено. И в ма́ле нака́зани бы́вше, вели́кими благоде́тельствовани бу́дут, я́ко Бог искуси́ я́ и обре́те их досто́йны Себе́. Я́ко зла́то в горни́ле искуси́ их и, я́ко всепло́дие же́ртвенное, прия́т я́. И во вре́мя посеще́ния их возсия́ют и, я́ко и́скры по сте́блию, потеку́т. Су́дят язы́ком и облада́ют людьми́, и воцари́тся Госпо́дь в них во ве́ки. Наде́ющиися Нань разуме́ют и́стину, и ве́рнии в любви́ пребу́дут Ему́; я́ко благода́ть и ми́лость в преподо́бных Его́, и посеще́ние во избра́нных Его́.

Прему́дрости Соломо́новы чте́ние.

Пра́ведницы во ве́ки живу́т, и в Го́споде мзда их, попече́ние их у Вы́шняго. Сего́ ра́ди прии́мут Ца́рствие благоле́пия, и вене́ц добро́ты от руки́ Госпо́дни, зане́ десни́цею покры́ет я́ и мы́шцею защити́т их. Прии́мет всеору́жие рве́ние Свое́, и вооружи́т тварь в месть враго́м. Облече́тся в броня́ пра́вды, и возложи́т шлем, суд нелицеме́рен. Прии́мет щит непобеди́мый преподо́бие, поостри́т же напра́сный гнев во ору́жие, спобо́рет же с ним мир на безу́мныя. По́йдут праволу́чныя стре́лы мо́лниины и, я́ко от благокру́гла лу́ка облако́в, на наме́рение полетя́т. И от каменоме́тныя я́рости испо́лнь паду́т гра́ды, вознегоду́ет на них вода́ морска́я, ре́ки же потопя́т я́ на́гло. Сопроти́в ста́нет им дух си́лы и, я́ко ви́хор, разве́ет их, и опустоши́т всю зе́млю беззако́ние, и злоде́йство преврати́т престо́лы си́льных. Слы́шите у́бо, ца́рие, и разуме́йте, навы́кните судии́ конце́в земли́, внуши́те держа́щии мно́жества и гордя́щиися о наро́дех язы́к, я́ко дана́ есть от Го́спода держа́ва вам и си́ла от Вы́шняго.

Го́споди, поми́луй. (Три́жды,)

Сподо́би, Го́споди:

Сподо́би, Го́споди, в ве́чер сей без греха́ сохрани́тися нам. Благослове́н еси́, Го́споди, Бо́же оте́ц на́ших, и хва́льно и просла́влено и́мя Твое́ во ве́ки. Ами́нь.

Бу́ди, Го́споди, ми́лость Твоя́ на нас, я́коже упова́хом на Тя. Благослове́н еси́, Го́споди, научи́ мя оправда́нием Твои́м. Благослове́н еси́, Влады́ко, вразуми́ мя оправда́нием Твои́м. Благослове́н еси́, Святы́й, просвети́ мя оправда́нии Твои́ми.

Го́споди, ми́лость Твоя́ во век, дел руку́ Твое́ю не пре́зри. Тебе́ подоба́ет хвала́, Тебе́ подоба́ет пе́ние, Тебе́ сла́ва подоба́ет. Отцу́ и Сы́ну и Свято́му Ду́ху, ны́не и при́сно и во ве́ки веко́в. Ами́нь.

Лития́:

Стихи́ры:

Глас 1: По́двигом до́брым подвиза́лся еси́ / и тече́ние сконча́л еси́ муче́ния твоего́, / му́чениче Пантелеи́моне, / те́мже в Вы́шних со А́нгелы лику́еши, / досто́йно боле́зней твои́х прие́м Вы́шнее Ца́рство, / моли́ у́бо, врачу́ всеблаже́нне, / дарова́ти нам ве́лию ми́лость.

Глас 2: Ки́ими пе́сненными добро́тами / тебе́, Пантелеи́моне, почти́м? / Теле́сною красото́ю и душе́вною добро́тою све́тло просиява́юща, / у́мным раче́нием просвеще́нна / и ра́зума хи́тростию укра́шенна, / ю́на во́зрастом, / ве́дца же смы́слом, / возра́сшаго Боже́ственными уче́нии / и стяжа́вшаго Христа́ усе́рдною любо́вию.

Ки́ими пе́сньми тебе́, Пантелеи́моне, возвели́чим? / Его́же па́че естества́ словесы́ и де́лы просла́ви Госпо́дь / и мно́жеством возвы́си чуде́с, / его́же заре́ю мно́гих даро́в просвети́ / и сла́вою венце́в Боже́ственных украси́, / его́же в беда́х предста́теля тре́бующим / дарова́ Христо́с Бог наш, / име́яй ве́лию ми́лость.

Ки́ими похва́льными пе́сньми / тебе́, Пантелеи́моне, возвели́чим? / Христоподо́бною благосты́нею озаре́нна / и подаю́ща всем прося́щим ве́лию ми́лость, / Боже́ственным тезоимени́тством укра́шенна / и де́лы Всеми́лостиваго показа́нна, / я́ко приснотеку́щая река́ воды́ живы́я, / исцеле́ния пролива́юща притека́ющим к тебе́ с ве́рою.

Слава, глас 5: Прииди́те, мучениколю́бцы, / единому́дренно вси восхва́лим страстоте́рпца Христо́ва, / по благоче́стии до́бре подви́гшася / и по́честию побе́дною оде́явшася, / свети́льника вселе́нныя и присносия́ющую звезду́ Це́ркве. / Те́мже и к нему́, вопию́ще, рцем: / Пантелеи́моне, му́чениче сла́вне, / бу́ди нам душа́м же и те́лом спасе́ние / и покро́в недви́жим, / моля́ся ко Го́споду о нас непреста́нно, / во е́же спасти́ нас.

И ныне, глас 5:

Блажи́м Тя, Богоро́дице Де́во, / и сла́вим Тя, ве́рнии, по до́лгу, / град непоколеби́мый, сте́ну необори́мую, / тве́рдую Предста́тельницу / и прибе́жище душ на́ших.

Го́споди, поми́луй. (40 раз)

Стихи́ры на стихо́вне:

Стихи́ры: Глас 1:

До́бляго страда́льца Пантелеи́мона / по благоче́стии подвиза́вшася, / прииди́те, лю́дие, воспои́м, глаго́люще: / ра́дуйся, тве́рдый ве́ры побо́рниче по проро́цех и апо́столех; / ра́дуйся, Христа́ в себе́ име́вый, подо́бяся де́лы Па́влу; / ра́дуйся, пла́вающим небу́рное приста́нище; / ра́дуйся, на́ша похвало́ и Це́ркве ве́рных ра́дование.

Стих: Пра́ведник, я́ко фи́нике, процвете́т / и, я́ко кедр, и́же в Лива́не, умно́жится.

От младе́нчества до́брую стезю́ обре́т, / ми́лостию Христо́вою пома́зав се́рдце, / боле́зни цели́ши прося́щим усе́рдно, / отню́дуже и уме́ршаго воздви́гл еси́ моли́твами твои́ми / и восприя́л еси́ Небе́сное Ца́рствие, / Пантелеи́моне всеблаже́нне.

Стих: Насажде́ни в дому́ Госпо́дни, / во дво́рех Бо́га на́шего процвету́т.

Страстоте́рпца Христо́ва похва́лим, / му́драго Пантелеи́мона, / и́же зми́я уби́ си́лою кре́стною, / и моли́твами Ермола́евыми о́трока воскреси́, / и несвяще́нныя посрами́ му́дрости словеса́, / и́же и мо́лится непреста́нно / всем пода́ти согреше́ний проще́ние.

Слава, глас 8: Ма́тернее возлюби́в благоче́стие, / о́тчим же безбо́жием возгнуша́вся, / Врачу́ душ во́ин быв, / враче́бне себе́ наказа́л еси́ / и, Боже́ственною благода́тию во обои́х благоиску́сен, / страсте́й всегуби́тель и душ врач показа́лся еси́, / но, я́коже во страда́ниих тве́рдое / и в моли́твах при́снопребыва́тельное стяжа́в, / Пантелеи́моне, му́чениче Христо́в, / приле́жно моли́ спасти́ся душа́м на́шим.

И ныне, глас 8:

Безневе́стная Де́во, / я́же Бо́га неизрече́нно заче́нши пло́тию, / Ма́ти Бо́га Вы́шняго, / Твои́х рабо́в мольбы́ приими́, Всенепоро́чная, / всем подаю́щи очище́ние прегреше́ний, / ны́не на́ша моле́ния прие́млющи, / моли́ спасти́ся всем нам.

Моли́тва свята́го Симео́на Богоприи́мца:

Ны́не отпуща́еши раба́ Твоего́, Влады́ко,/ по глаго́лу Твоему́, с ми́ром;/ я́ко ви́деста о́чи мои́ спасе́ние Твое́,/ е́же еси́ угото́вал пред лице́м всех люде́й,/ свет во открове́ние язы́ков,// и сла́ву люде́й Твои́х Изра́иля.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Тропа́рь, глас 3:

Страстоте́рпче святы́й и целе́бниче Пантелеи́моне, / моли́ Ми́лостиваго Бо́га, / да прегреше́ний оставле́ние / пода́ст душа́м на́шим. (Дважды)

Тропа́рь, глас 3:

Богоро́дице Де́во, ра́дуйся, / Благода́тная Мари́е, Госпо́дь с Тобо́ю; / благослове́на Ты в жена́х / и благослове́н Плод чре́ва Твоего́, / я́ко Спа́са родила́ еси́ душ на́ших.

Бу́ди И́мя Госпо́дне благослове́но от ны́не и до ве́ка. (Три́жды)

Псало́м 33:

Благословлю́ Го́спода на вся́кое вре́мя,/ вы́ну хвала́ Его́ во усте́х мои́х./ О Го́споде похва́лится душа́ моя́,/ да услы́шат кро́тцыи, и возвеселя́тся./ Возвели́чите Го́спода со мно́ю,/ и вознесе́м И́мя Его́ вку́пе./ Взыска́х Го́спода, и услы́ша мя,/ и от все́х скорбе́й мои́х изба́ви мя./ Приступи́те к Нему́, и просвети́теся,/ и ли́ца ва́ша не постыдя́тся./ Сей ни́щий воззва́, и Госпо́дь услы́ша и́,/ и от все́х скорбе́й его́ спасе́ и́./ Ополчи́тся а́нгел Госпо́день о́крест боя́щихся Его́,/ и изба́вит их./ Вкуси́те и ви́дите, я́ко благ Госпо́дь:/ блаже́н муж, и́же упова́ет Нань./ Бо́йтеся Го́спода, вси́ святи́и Его́,/ я́ко несть лише́ния боя́щимся Его́./ Бога́тии обнища́ша и взалка́ша:/ взыска́ющии же Го́спода// не лиша́тся вся́каго бла́га.

У́ТРЕНЯ.

Шестопса́лмие:

Сла́ва в вы́шних Бо́гу, и на земли́ мир, в челове́цех благоволе́ние. (Три́жды)

Го́споди, устне́ мои́ отве́рзеши, и уста́ моя́ возвестя́т хвалу́ Твою́. (Два́жды)

Псалом 3:

Го́споди, что ся умно́жиша стужа́ющии ми́? Мно́зи востаю́т на мя, мно́зи глаго́лют души́ мое́й: несть спасе́ния eму́ в Бо́зе eго́. Ты же, Го́споди, Засту́пник мой еси́, сла́ва моя́ и вознося́й главу́ мою́. Гла́сом мои́м ко Го́споду воззва́х, и услы́ша мя от горы́ святы́я Своея́. Аз усну́х, и спах, воста́х, я́ко Госпо́дь засту́пит мя. Не убою́ся от тем люде́й, о́крест напа́дающих на мя. Воскресни́, Го́споди, спаси́ мя, Бо́же мой, я́ко Ты порази́л еси́ вся вражду́ющыя ми всу́е: зу́бы гре́шников сокруши́л еси́. Госпо́дне есть спасе́ние, и на лю́дех Твои́х благослове́ние Твое́.

Аз усну́х, и спах, воста́х, я́ко Госпо́дь засту́пит мя.

Псалом 37:

Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́. Я́ко стре́лы Твоя́ унзо́ша во мне, и утверди́л еси́ на мне ру́ку Твою́. Несть исцеле́ния в пло́ти мое́й от лица́ гне́ва Твоего́, несть ми́ра в косте́х мои́х от лица́ грех мои́х. Я́ко беззако́ния моя́ превзыдо́ша главу́ мою́, я́ко бре́мя тя́жкое отяготе́ша на мне. Возсмерде́ша и согни́ша ра́ны моя́ от лица́ безу́мия моего́. Пострада́х и сляко́хся до конца́, весь день се́туя хожда́х. Я́ко ля́двия моя́ напо́лнишася поруга́ний, и несть исцеле́ния в пло́ти мое́й. Озло́блен бых и смири́хся до зела́, рыка́х от воздыха́ния се́рдца моего́. Го́споди, пред Тобо́ю все жела́ние мое́ и воздыха́ние мое́ от Тебе́ не утаи́ся. Се́рдце мое́ смяте́ся, оста́ви мя си́ла моя́, и свет о́чию мое́ю, и той несть со мно́ю. Дру́зи мои́ и и́скреннии мои́ пря́мо мне прибли́жишася и ста́ша, и бли́жнии мои́ отдале́че мене́ ста́ша и нужда́хуся и́щущии ду́шу мою́, и и́щущии зла́я мне глаго́лаху су́етная и льсти́вным весь день поуча́хуся. Аз же я́ко глух не слы́шах и я́ко нем не отверза́яй уст свои́х. И бых я́ко челове́к не слы́шай и не имы́й во усте́х свои́х обличе́ния. Я́ко на Тя, Го́споди, упова́х, Ты услы́шиши, Го́споди Бо́же мой. Я́ко рех: да не когда́ пора́дуют ми ся врази́ мои́: и внегда́ подвижа́тися нога́м мои́м, на мя велере́чеваша. Я́ко аз на ра́ны гото́в, и боле́знь моя́ предо мно́ю есть вы́ну. Я́ко беззако́ние мое́ аз возвещу́ и попеку́ся о гресе́ мое́м. Врази́ же мои́ живу́т и укрепи́шася па́че мене́, и умно́жишася ненави́дящии мя без пра́вды. Воздаю́щии ми зла́я возблага́я оболга́ху мя, зане́ гоня́х благосты́ню. Не оста́ви мене́, Го́споди Бо́же мой, не отступи́ от Мене́. Вонми́ в по́мощь мою́, Го́споди спасе́ния моего́.

Не оста́ви мене́, Го́споди Бо́же мой, не отступи́ от Мене́. Вонми́ в по́мощь мою́, Го́споди спасе́ния моего́.

Псалом 62:

Бо́же, Бо́же мой, к Тебе́ у́тренюю, возжада́ Тебе́ душа́ моя́, коль мно́жицею Тебе́ плоть моя́, в земли́ пу́сте и непрохо́дне, и безво́дне. Та́ко во святе́м яви́хся Тебе́, ви́дети си́лу Твою́ и сла́ву Твою́. Я́ко лу́чши ми́лость Твоя́ па́че живо́т, устне́ мои́ похвали́те Тя. Та́ко благословлю́ Тя в животе́ мое́м, о и́мени Твое́м воздежу́ ру́це мои́. Я́ко от ту́ка и ма́сти да испо́лнится душа́ моя́, и устна́ма ра́дости восхва́лят Тя уста́ моя́. А́ще помина́х Тя на посте́ли мое́й, на у́тренних поуча́хся в Тя. Я́ко был еси́ Помо́щник мой, и в кро́ве крилу́ Твое́ю возра́дуюся. Прильпе́ душа́ моя́ по Тебе́, мене́ же прия́т десни́ца Твоя́. Ти́и же всу́е иска́ша ду́шу мою́, вни́дут в преиспо́дняя земли́, предадя́тся в ру́ки ору́жия, ча́сти ли́совом бу́дут. Царь же возвесели́тся о Бо́зе, похва́лится всяк клены́йся Им, я́ко загради́шася уста́ глаго́лющих непра́ведная.

На у́тренних поуча́хся в Тя. Я́ко был еси́ Помо́щник мой, и в кро́ве крилу́ Твое́ю возра́дуюся. Прильпе́ душа́ моя́ по Тебе́, мене́ же прия́т десни́ца Твоя́.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Го́споди поми́луй. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Псалом 87:

Го́споди Бо́же спасе́ния моего́, во дни воззва́х, и в нощи́ пред Тобо́ю. Да вни́дет пред Тя моли́тва моя́: приклони́ у́хо Твое́ к моле́нию моему́, я́ко испо́лнися зол душа́ моя́, и живо́т мой аду прибли́жися. Привмене́н бых с низходя́щими в ров, бых я́ко челове́к без по́мощи, в ме́ртвых свобо́дь, я́ко я́звеннии спя́щии во гро́бе, и́хже не помяну́л еси́ ктому́, и ти́и от руки́ Твоея́ отринове́ни бы́ша. Положи́ша мя в ро́ве преиспо́днем, в те́мных и се́ни сме́ртней. На мне утверди́ся я́рость Твоя́, и вся во́лны Твоя́ наве́л еси́ на мя. Уда́лил еси́ зна́емых мои́х от Мене́, положи́ша мя ме́рзость себе́: пре́дан бых и не исхожда́х. О́чи мои́ изнемого́сте от нищеты́, воззва́х к Тебе́, Го́споди, весь день, возде́х к Тебе́ ру́це мои́. Еда́ ме́ртвыми твори́ши чудеса́? Или́ вра́чеве воскреся́т, и испове́дятся Тебе́? Еда́ пове́сть кто во гро́бе ми́лость Твою́, и и́стину Твою́ в поги́бели? Еда́ позна́на бу́дут во тьме чудеса́ Твоя́, и пра́вда Твоя́ в земли́ забве́нней? И аз к Тебе́, Го́споди, воззва́х и у́тро моли́тва моя́ предвари́т Тя. Вску́ю, Го́споди, отре́еши ду́шу мою́, отвраща́еши лице́ Твое́ от Мене́? Нищ есмь аз, и в труде́х от ю́ности моея́; возне́с же ся, смири́хся, и изнемого́х. На мне преидо́ша гне́ви Твои́, устраше́ния Твоя́ возмути́ша мя, обыдо́ша мя я́ко вода́, весь день одержа́ша мя вку́пе. Уда́лил еси́ от Мене́ дру́га и и́скренняго, и зна́емых мои́х от страсте́й.

Го́споди Бо́же спасе́ния моего́, во дни воззва́х, и в нощи́ пред Тобо́ю. Да вни́дет пред Тя моли́тва моя́: приклони́ у́хо Твое́ к моле́нию моему́.

Псалом 102:

Благослови́, душе́ моя́, Го́спода, и вся вну́тренняя моя́ и́мя свя́тое Его́. Благослови́, душе́ моя́, Го́спода, и не забыва́й всех воздая́ний Его́, очища́ющаго вся беззако́ния твоя́, исцеля́ющаго вся неду́ги твоя́, избавля́ющаго от истле́ния живо́т твой, венча́ющаго тя ми́лостию и щедро́тами, исполня́ющаго во благи́х жела́ние твое́: обнови́тся я́ко о́рля ю́ность твоя́. Творя́й ми́лостыни Госпо́дь, и судьбу́ всем оби́димым. Сказа́ пути́ Своя́ Моисе́ови, сыново́м Изра́илевым хоте́ния Своя́: Щедр и Ми́лостив Госпо́дь, Долготерпели́в и Многоми́лостив. Не до конца́ прогне́вается, ниже́ во век вражду́ет, не по беззако́нием на́шым сотвори́л есть нам, ниже́ по грехо́м на́шым возда́л есть нам. Я́ко по высоте́ небе́сней от земли́, утверди́л есть Госпо́дь ми́лость Свою́ на боя́щихся Его́. Ели́ко отстоя́т восто́цы от за́пад, уда́лил есть от нас беззако́ния на́ша. Я́коже ще́дрит оте́ц сы́ны, уще́дри Госпо́дь боя́щихся Его́. Я́ко Той позна́ созда́ние на́ше, помяну́, я́ко персть есмы́. Челове́к, я́ко трава́ дни́е eго́, я́ко цвет се́льный, та́ко оцвете́т, я́ко дух про́йде в нем, и не бу́дет, и не позна́ет ктому́ ме́ста своего́. Ми́лость же Госпо́дня от ве́ка и до ве́ка на боя́щихся Его́, и пра́вда Его́ на сыне́х сыно́в, храня́щих заве́т Его́, и по́мнящих за́поведи Его́ твори́ти я́. Госпо́дь на Небеси́ угото́ва Престо́л Свой, и Ца́рство Его́ все́ми облада́ет. Благослови́те Го́спода вси А́нгели Его́, си́льнии кре́постию, творя́щии сло́во Его́, услы́шати глас слове́с Его́. Благослови́те Го́спода вся Си́лы Его́, слуги́ Его́, творя́щии во́лю Его́. Благослови́те Го́спода вся дела́ Его́, на вся́ком ме́сте влады́чества Его́, благослови́, душе́ моя́, Го́спода.

На вся́ком ме́сте влады́чества Его́, благослови́, душе́ моя́, Го́спода.

Псалом 142:

Го́споди, услы́ши моли́тву мою́, внуши́ моле́ние мое́ во и́стине Твое́й, услы́ши мя в пра́вде Твое́й и не вни́ди в суд с рабо́м Твои́м, я́ко не оправди́тся пред Тобо́ю всяк живы́й. Я́ко погна́ враг ду́шу мою́, смири́л есть в зе́млю живо́т мой, посади́л мя есть в те́мных, я́ко ме́ртвыя ве́ка. И уны́ во мне дух мой, во мне смяте́ся се́рдце мое́. Помяну́х дни дре́вния, поучи́хся во всех де́лех Твои́х, в творе́ниих руку́ Твое́ю поуча́хся. Возде́х к Тебе́ ру́це мои́, душа́ моя́, я́ко земля́ безво́дная Тебе́. Ско́ро услы́ши мя, Го́споди, исчезе́ дух мой, не отврати́ лица́ Твоего́ от Мене́, и уподо́блюся низходя́щым в ров. Слы́шану сотвори́ мне зау́тра ми́лость Твою́, я́ко на Тя упова́х. Скажи́ мне, Го́споди, путь во́ньже пойду́, я́ко к Тебе́ взях ду́шу мою́. Изми́ мя от враг мои́х, Го́споди, к Тебе́ прибего́х. Научи́ мя твори́ти во́лю Твою́, я́ко Ты еси́ Бог мой. Дух Твой Благи́й наста́вит мя на зе́млю пра́ву. И́мене Твоего́ ра́ди, Го́споди, живи́ши мя, пра́вдою Твое́ю изведе́ши от печа́ли ду́шу мою́. И ми́лостию Твое́ю потреби́ши враги́ моя́ и погуби́ши вся стужа́ющыя души́ мое́й, я́ко аз раб Твой есмь.

Услы́ши мя, Го́споди, в пра́вде Твое́й и не вни́ди в суд с рабо́м Твои́м.

Услы́ши мя, Го́споди, в пра́вде Твое́й и не вни́ди в суд с рабо́м Твои́м.

Дух Твой Благи́й наста́вит мя на зе́млю пра́ву.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Тропа́рь глас 3:

Страстоте́рпче святы́й и целе́бниче Пантелеи́моне, / моли́ Ми́лостиваго Бо́га, / да прегреше́ний оставле́ние / пода́ст душа́м на́шим. (Дважды)

Сла́ва Отцу́ и Сы́ну и Свято́му Ду́ху. И ны́не и при́сно и во ве́ки веко́в. Ами́нь.

Тя, хода́тайствовавшую спасе́ние ро́да на́шего, / воспева́ем, Богоро́дице Де́во: / пло́тию бо, от Тебе́ восприя́тою, Сын Твой и Бог наш, / Кресто́м восприи́м страсть, / изба́ви нас от тли я́ко Человеколю́бец.

Здесь читается кафизма, положенная по дню, или сразу седальны:

Го́споди, поми́луй. (Три́жды)

Седален, глас 1:

Ма́тернее благоче́стие соблю́л еси́, блаже́нне, / о́тчее же нече́стие благоче́стно испра́вил еси́, / сего́ ра́ди и благода́ть прия́л еси́ от Бо́га Вседержи́теля, / врачева́ти немощству́ющих боле́зни, му́чениче сла́вне Пантелеи́моне, / всех с ве́рою и любо́вию к тебе́ прибега́ющих.

Глас 4: Я́ко во́ина Христо́ва непобеди́маго и борца́ му́жественнейшаго, / тя вси, ве́рнии, восхваля́ем, му́чеников добро́то, / ве́рою пра́зднующе святу́ю па́мять твою́, му́чениче всехва́льне. / Честны́я же по́двиги согла́сно славосло́вим, му́дре, / и Спаси́теля Христа́ велича́ем.

Сла́ва Отцу́ и Сы́ну и Свято́му Ду́ху. И ны́не и при́сно и во ве́ки веко́в. Ами́нь.

Родила́ еси́ неизрече́нно Бо́га, пре́жде век от Отца́ возсия́вшаго / и в после́дняя времена́ от чре́ва Твоего́, Богоро́дице, я́вльшагося, / Свет во открове́ние язы́ков и спасе́ние всего́ ми́ра, / в просвеще́ние во тьме седя́щим и утеше́ние ве́рою пою́щим Тя. / Сего́ у́бо моли́ просвети́ти мя, Влады́чице, све́том ра́зума / и пода́ти се́рдцу моему́ умиле́ние, да омы́ю слеза́ми грехи́ моя́.

Полиеле́й:

Хвали́те И́мя Госпо́дне, хвали́те, раби́ Го́спода.

Аллилу́иа, аллилу́иа, аллилу́иа.

Благослове́н Госпо́дь от Сио́на, живы́й во Иерусали́ме.

Аллилу́иа, аллилу́иа, аллилу́иа.

Испове́дайтеся Го́сподеви, я́ко Благ, я́ко в век ми́лость Его́.

Аллилу́иа, аллилу́иа, аллилу́иа.

Испове́дайтеся Бо́гу Небе́сному, я́ко в век ми́лость Его́.

Аллилу́иа, аллилу́иа, аллилу́иа.

Велича́ние:

Велича́ем тя, / страстоте́рпче святы́й, великому́чениче и целе́бниче Пантелеи́моне, / и чтим честна́я страда́ния твоя́, / я́же за Христа́ / претерпе́л еси́.

Псало́м избра́нный:

Бог нам Прибе́жище и Си́ла. Помо́щник в ско́рбех обре́тших ны зело́. Сего́ ра́ди не убои́мся, внегда́ смуща́ется земля́. Бо́же, кто уподо́бится Тебе́; да не премолчи́ши, ниже́ укроти́ши, Бо́же. Я́ко се врази́ Твои́ возшуме́ша, и ненави́дящии Тя воздвиго́ша главу́. На лю́ди Твоя́ лука́вноваша во́лею, и совеща́ша на святы́я Твоя́. Положи́ша тру́пия рабо́в Твои́х, бра́шна пти́цам небе́сным. Пло́ти преподо́бных Твои́х звере́м земны́м. Пролия́ша кровь их я́ко во́ду. Я́ко Тебе́ ра́ди умерщвля́еми есмы́ весь день. Вмени́хомся я́ко о́вцы заколе́ния. Положи́л еси́ нас в при́тчу во язы́цех. И бых я́звен весь день. Разже́гл еси́ ны, я́коже разжиза́ется сребро́. Проидо́хом сквозе́ огнь и во́ду, и изве́л еси́ нас в поко́й. Весели́теся о Го́споде, и ра́дуйтеся пра́веднии. Я́ко Госпо́дь в ро́де пра́ведных. И насле́дие их в век бу́дет. Воззва́ша пра́веднии и Госпо́дь услы́ша их. Свет возсия́ пра́веднику и пра́вым се́рдцем весе́лие. В па́мять ве́чную бу́дет пра́ведник. Святы́м, и́же суть на земли́ Его́, удиви́ Госпо́дь вся хоте́ния Своя́ в них. Ди́вен Бог во святы́х Свои́х. Пра́ведник я́ко фи́никс процвете́т, я́ко кедр, и́же в Лива́не, умно́жится. Возвесели́тся пра́ведник о Го́споде и упова́ет на Него́. И похва́лятся вси пра́вии се́рдцем.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа,// сла́ва Тебе́, Бо́же. (Трижды)

Велича́ем тя, / страстоте́рпче святы́й, великому́чениче и целе́бниче Пантелеи́моне, / и чтим честна́я страда́ния твоя́, / я́же за Христа́ / претерпе́л еси́.

Седа́льны:

Глас 4:

Торжеству́ют днесь собо́ри ве́рных / честны́я по́двиги твоя́, Пантелеи́моне страстоте́рпче, / прославля́юще Животода́вца, яви́вшаго тебе́ кре́пкаго нам предста́теля.

Глас 4: Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Ма́терь Бо́жию Тя све́мы вси, Де́ву вои́стинну и по рождестве́ я́вльшуюся, / любо́вию притека́ющии к Твое́й бла́гости: / Тебе́ бо и́мамы, гре́шнии, Предста́тельницу, / Тебе́ стяжа́хом в напа́стех спасе́ние, Еди́ну Всенепоро́чную.

Степе́нна, глас 4:

От ю́ности моея́/ мно́зи бо́рют мя стра́сти,/ но Сам мя заступи́// и спаси́, Спа́се мой.

Ненави́дящии Сио́на,/ посрами́теся от Го́спода,/ я́ко трава́ бо огне́м// бу́дете изсо́хше.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Святы́м Ду́хом/ вся́ка душа́ живи́тся,/ и чистото́ю возвыша́ется,// светле́ется Тро́йческим еди́нством, священнота́йне.

Го́споди, поми́луй. (Три́жды)

От Луки Свята́го Ева́нгелия чте́ние

Сла́ва, Тебе́, Го́споди, сла́ва Тебе́.

Рече́ Госпо́дь Свои́м ученико́м: внемли́те от челове́к, возложа́т на вы ру́ки своя́ и иждену́т, предаю́ще на со́нмища и темни́цы, ведо́мы к царе́м и влады́кам, и́мене Моего́ ра́ди, прилучи́тся же вам во свиде́тельство. Положи́те у́бо на сердца́х ва́ших, не пре́жде поуча́тися отвещава́ти. Аз бо дам вам уста́ и прему́дрость, е́йже не возмо́гут проти́витися или́ отвеща́ти вси противля́ющиися вам. Пре́дани же бу́дете и роди́тели, и бра́тиею, и ро́дом, и дру́ги, и умертвя́т от вас. И бу́дете ненави́дими от всех и́мене Моего́ ра́ди. И влас главы́ ва́шея не поги́бнет. В терпе́нии ва́шем стяжи́те ду́шы ва́ша.

Сла́ва, Тебе́, Го́споди, сла́ва Тебе́.

Псало́м 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя. Я́ко беззако́ние мое́ аз зна́ю и грех мой предо мно́ю есть вы́ну. Тебе́ Еди́ному согреши́х, и лука́вое пред Тобо́ю сотвори́х, я́ко да оправди́шися во словесе́х Твои́х и победи́ши, внегда́ суди́ти Ти. Се бо в беззако́ниих зача́т есмь, и во гресе́х роди́ мя ма́ти моя́. Се бо и́стину возлюби́л еси́, безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся, омы́еши мя, и па́че сне́га убелю́ся. Слу́ху моему́ да́си ра́дость и весе́лие, возра́дуются ко́сти смире́нныя. Отврати́ лице́ Твое́ от грех мои́х, и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́, и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́, и Ду́хом Влады́чним утверди́ мя. Научу́ беззако́нныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́, возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо, всесожже́ния не благоволи́ши. Же́ртва Бо́гу дух сокруше́н, се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския, тогда́ благоволи́ши же́ртву пра́вды, возноше́ние и всесожега́емая: тогда́ возложа́т на олта́рь Твой тельцы́.

Глас 6:

Сла́ва Отцу́ и Сы́ну и Свято́му Ду́ху./ Моли́твами свята́го великому́ченика Пантелеи́мона, / Ми́лостиве, очи́сти / мно́жества согреше́ний на́ших.

И ны́не и при́сно и во ве́ки веко́в. Ами́нь./ Моли́твами Богоро́дицы, / Ми́лостиве, очи́сти / мно́жества согреше́ний на́ших.

Поми́луй мя, Бо́же,/ по вели́цей ми́лости Твое́й,/ и по мно́жеству щедро́т Твои́х// очи́сти беззако́ние мое́.

Стихи́ра, глас 3

Возсия́ днесь сла́вная па́мять твоя́, / Пантелеи́моне многострада́льне, / созыва́ющи нас, празднолю́бцев, / на хвалу́ и сла́ву Христу́ Бо́гу на́шему, / в тебе́ исто́чник чуде́с нам я́вльшему, / тем, притека́юще к ра́це моще́й твои́х, / исцеле́ний дарова́ния прие́млем, / венча́вшаго тебе́ Спа́са Христа́ воспева́юще во ве́ки, / непреста́нно сла́вяще.

Го́споди, поми́луй. (12 раз)

Кано́н, глас 2:

Пе́снь 1.

Ирмо́с: Во глубине́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный гре́х потреби́ло е́сть, препросла́вленный Госпо́дь, сла́вно бо просла́вися.

Припев: Святы́й великому́чениче и целе́бниче Пантелеи́моне, моли́ Бо́га о нас.

Присту́пль усе́рдно ко Христу́, пре́жде сконча́ния е́же о Христе́, мертвеца́ пе́рвее воздви́гл еси́. Ны́не же мя́, пребога́те, умерщвле́на грехо́вным угрызе́нием, твои́ми моли́твами, о Пантелеи́моне, оживотвори́.

Возсия́, я́коже звезда́, нося́ во ю́ности ста́ростный и богому́дрый ра́зум, добро́тою же те́ла благоле́пие души́ стяжа́в, Препросла́вленному Сло́ву яви́лся еси́ прекра́сен.

Умертви́вся ми́ру, и во Христа́, блаже́нне, оде́явся ба́нею креще́ния, бы́л еси́ богоно́сен орга́н, и прия́телище де́йства Ду́ху, все́м угожда́я, все́х уврачу́я неду́ги.

Прему́дрость сестру́ себе́ притвори́в, и прича́стник жи́зни ведо́мь, от нея́ почти́лся еси́ и венце́м дарова́ний украси́лся еси́, Боже́ственныя зари́, блаже́нне, облиста́я све́тлостию.

Богоро́дичен: Благослове́нми, Пресвята́я Чи́стая, естество́, уда́лено преслуша́нием бы́вшее от Зижди́теля, Христа́ ро́ждши, венча́ла еси́, и тле́ния свободи́ла еси́. Те́мже, ра́дующеся, вси́ ве́рнии Тя́ ублажа́ем.

Пе́снь 3.

Ирмо́с: Процвела́ е́сть пусты́ня, я́ко кри́н, Го́споди, язы́ческая неплодя́щая це́рковь, прише́ствием Твои́м, в не́йже утверди́ся мое́ се́рдце.

Словеса́ Ду́ха услы́шав, бы́л еси́ я́ко земля́ до́брая и благопло́дная, прие́мый се́мя многоце́нно, и роди́вый, треблаже́нне, спасе́ние душа́м.

Умертви́л еси́ мудрова́ние змии́на угрызе́ния, и ду́шу оживи́л еси́, богодухнове́нно возроди́вся и Царю́ все́х предстоя́.

Посрами́л еси́ безбо́жное мучи́телей повеле́ние, и ко Христу́ прите́кл еси́, вме́сто все́х Сего́ стяжа́в, и бы́л еси́, богому́дре, вели́кий купе́ц.

Ма́тере твоея́ благоче́стие возлю́бль, сла́вне, о́тчее же возненави́дел еси́ безбо́жие многомяте́жное, я́ко име́я ра́зум, лу́чшее избра́л еси́.

Богоро́дичен: Нося́й Боже́ственным манове́нием всю́ тва́рь Госпо́дь, на руку́ но́сится Твое́ю, Де́во. Его́же ны́не моли́, изба́вити от бе́д пою́щия Тя́.

Седа́лен, гла́с 4. Подо́бен: Удиви́ся Ио́сиф.

До́бляго страда́льца благоче́стия Христо́ва восхва́лим све́тло Пантелеи́мона, ве́рнии, псалмы́ и пе́нми и пе́сньми духо́вными, и́мже мучи́тельство неви́димаго врага́ си́лою Боже́ственною попра́ся, и неду́гов исцеле́ние бога́тно от Го́спода дарова́ся, творя́щим ве́рно Боже́ственный и честны́й пра́здник его́.

Пострада́л еси́ му́жественне за Христа́, и, ве́ру пропове́дав отцу́ твоему́, извле́кл еси́ того́, всехва́льне, из ро́ва нече́стия, и, мучи́телей не убоя́вся безбо́жнаго умышле́ния, де́монов посрами́л еси́ безси́льную де́рзость. Сего́ ра́ди благода́ть от Христа́ стяжа́л еси́, врачева́ти боле́зни и изгони́ти ду́хи вра́жия. Пантелеи́моне всехва́льне, моли́ся Христу́ Бо́гу прегреше́ний оставле́ние дарова́ти пра́зднующим любо́вию святу́ю па́мять твою́.

Сла́ва: Ермола́я му́драго, му́чениче, слове́с послу́шал еси́ и оста́вил еси́ а́бие худо́жество земно́е, я́ко ме́рзко, я́ко не кре́пко, я́ко губи́телно, име́я Христо́вы стра́сти, уче́ния жи́зни в се́рдце твое́м, неисце́льно стра́ждущим здра́вие, Пантелеи́моне, да́руя. Те́мже моли́ся о творя́щих любо́вию па́мять твою́.

И ны́не, Богоро́дичен: Треволне́нии страстны́ми, безсо́вестный а́з обурева́емь, Чи́стая, призва́ю Тя́ те́пле: да не пре́зриши мене́, окая́ннаго, поги́бнути, бе́здну милосе́рдия ро́ждши, ра́зве бо Тебе́ наде́жды не и́мам, да не враго́м у́бо обра́дование и сме́х, наде́явся на Тя́, явлю́ся, и́бо мо́жеши, ели́ко хо́щеши, я́ко Ма́ти су́щи все́х Бо́га.

Пе́снь 4.

Ирмо́с: Прише́л еси́ от Де́вы, не хода́тай, ни Ангел, но Са́м, Го́споди, вопло́щся, и спа́сл еси́ всего́ мя челове́ка. Те́м зову́ Ти́: сла́ва си́ле Твое́й, Го́споди.

После́дуя Влады́це любо́вию, расточи́л еси́ бога́тство ни́щим, себе́ обнажа́я к страда́нию, е́же и проше́л еси́, ве́чныя наде́жды прови́дев.

Хвале́ния Бо́гу же́ртву прине́сл еси́, я́ве возгнуша́вся и́дольских тре́б, все́ же шата́ние нечести́вых, страстоте́рпче, попра́л еси́.

Снеда́емым за́вистию, и гне́вом борю́щим, непобори́мую си́лу си́м предста́вил еси́, му́чениче, и победи́л еси́ злочести́вое томле́ние вооружи́вся.

Иже ста́рца Симео́на рука́ми Держи́мый, ста́рца тя́ глаго́лы, Пантелеи́моне, улови́ к Боже́ственному разуме́нию, и ко мно́гих спасе́нию и избавле́нию.

Богоро́дичен: Юныя и де́вы во сле́д Тебе́ потеко́ша, Де́ву и Отрокови́цу Тя́ и Ма́терь зря́ще. Еди́на бо обоя́ во еди́но собрала́ еси́, несказа́нно Богоневе́сто.

Пе́снь 5

Ирмо́с: Просвеще́ние во тме́ лежа́щих, спасе́ние отча́янных, Христе́ Спа́се мо́й, к Тебе́ у́тренюю, Царю́ ми́ра, просвети́ мя сия́нием Твои́м, ино́го бо ра́зве Тебе́ Бо́га не зна́ю.

Ра́достно по́двиги подъя́л еси́ муче́ния, огражде́н си́лою Боже́ственною и терпе́нием, тве́рдо муче́ния подъе́мля, ра́дуяся вопия́л еси́: ино́го бо ра́зве Тебе́ Бо́га не зна́ем.

На по́двиг борьбы́ вступи́в, блаже́нне, Боже́ственною си́лою превозмо́гл еси́ безбо́жных нечести́вое тира́нство и неи́стовство идолослуже́ния, обле́кшись во Христа́, Судию́ и Венча́теля по́двигов.

Юношеско ты́ противле́ние име́я, и тве́рдостию души́ возставле́ние стяжа́в, вся́ку я́зву до́блественне претерпе́л еси́, и му́жеским, блаже́нне, умо́м, благода́тию Боже́ственнаго Креста́ укрепля́емь.

Несогла́сное отри́ну веща́ние заблу́ждших, небе́сным уче́нием, страда́лец и мно́гим спасе́нию пресла́вну бы́сть вино́вник, Твои́м де́йством, Христе́ укрепля́емь.

Богоро́дичен: Рече́ния прему́дрых и гада́ния вся́, Препросла́вленая, и проро́к прорече́ния, Тя́ прообража́ху, проявле́нно напосле́док бы́ти Бо́жию Роди́телницу, ины́я бо ра́зве Тебе́ чи́стыя не зна́ем.

Пе́снь 6.

Ирмо́с: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же, мя́ возведи́.

Идолы ле́стныя оплева́л еси́, и возноси́мую пре́лесть упраздни́л еси́, чудоде́йствуя ди́вная, и творя́ исцеле́ния, богому́дре.

Вене́чник показа́лся еси́, всеизря́дне, сквозе́ бо о́гнь ты́ проше́л еси́ и во́ду, и на колеси́ протяза́емь, пресла́вно погуби́л еси́ безу́мныя.

Мучи́телей суровство́ низложи́в, неудо́бь носи́мая бие́ния теле́сная душе́вною кре́постию, пострада́л еси́, богому́дре, благода́тию.

Богоро́дичен: Содержа́й концы́ земли́ я́ко Бо́г, Твои́ми рука́ми, Чи́стая, держи́тся, описа́нием те́ла, Иже Боже́ственным зра́ком неопи́санный.

Конда́к, гла́с 5:

Подража́тель сы́й Ми́лостиваго, и исцеле́ний благода́ть от Него́ прие́м, страстоте́рпче и му́чениче Христа́ Бо́га, моли́твами Твои́ми душе́вныя на́ша неду́ги исцели́, отгоня́ при́сно борца́ собла́зны от вопию́щих ве́рно: спаси́ ны, Го́споди.

Икос:

Безсре́бренника па́мять, до́бляго страда́льца, ве́рнаго целе́бника, благоче́стно воспое́м, христолю́бцы, да прии́мем ми́лость, па́че же оскве́рншии, я́коже и а́з, своя́ хра́мы: душа́м бо и те́лом, возлю́бленнии, исцеле́ния подава́ет. Потщи́мся у́бо, ве́рная бра́тия, в сердца́х на́ших име́ти его́ кре́пость, избавля́юща от ле́сти вопию́щия: спаси́ ны, Го́споди.

Пе́снь 7.

Ирмо́с: Те́лу злато́му прему́дрыя де́ти не послужи́ша, и в пла́мень са́ми поидо́ша, и бо́ги и́х обруга́ша, среди́ пла́мене возопи́ша и ороси́ я́ Ангел: услы́шася уже́ у́ст ва́ших моли́тва.

Зако́нно стражда́, и победи́в врага́, приста́нище благоути́шно су́щим в мо́ри, сла́вне, обурева́емым бы́л еси́, све́т же су́щим во тме́ жития́, и пе́ти научи́л еси́: благослове́н Бо́г оте́ц на́ших.

Блаже́н еси́ и добро́ тебе́ е́сть ны́не, преблаже́нне, восприи́мшему пребога́тную и блаже́нную наде́жду твою́, угото́ванную ве́рою Го́сподеви зову́щим: благослове́н Бо́г оте́ц на́ших.

Святы́х ду́шы, и пра́ведных ли́цы, и безпло́тных чи́ни Ангельстии прия́ша, слико́вника тя́, блаже́нне, мече́м бо усе́чен бы́в во главу́, пое́ши ра́дуяся: благослове́н Бо́г оте́ц на́ших.

Богоро́дичен: Ору́жие е́же пре́жде дре́ва живо́тнаго, на́с отлучи́вшее, ны́не обраща́емо прие́млет, зна́менавшияся Кро́вию, из ре́бр Сы́на Твоего́ изше́дшею, Пренепоро́чная. Благослове́на еси́, Бо́га пло́тию ро́ждшая.

Пе́снь 8.

Ирмо́с: В пе́щь о́гненную ко отроко́м евре́йским снизше́дшаго и пла́мень в ро́су прело́жшаго Бо́га, по́йте дела́, я́ко Го́спода, и превозноси́те во вся́ ве́ки.

Благоприя́тное твоея́ хи́трости, душе́вное ослепле́ние о́тчее исцеля́ет, подаю́щее све́т ве́рою, преблаже́нне, притека́ющим, и ко Спа́су Христу́ наставля́ющи.

За Христа́ закла́н бы́в, к ве́чней жи́зни премину́л еси́, и богозва́нен яви́лся еси́, именова́нием Бо́жиим, богому́дре. Те́м почита́ем тя́, и превозно́сим Христа́ во ве́ки.

Вити́йское отложи́в лю́тое му́дрых глумле́ние, Христо́вым призыва́нием, боле́зненых страсте́й коре́ния посека́еши, исцеля́я превознося́щия Христа́ во ве́ки.

Богоро́дичен: Безсме́ртия зарю́ ве́мы исто́чника Тя́, Богоро́дице, я́ко ро́ждшую Сло́ва безсме́ртнаго Отца́, все́х сме́рти избавля́ющаго, превознося́щих Его́ во ве́ки.

На 9-й песни поем песнь Пресвятыя Богородицы:

Вели́чит душа́ Моя́ Го́спода и возра́довася дух Мой о Бо́зе Спа́се Мое́м.

К коемуждо стиху припеваем: Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Я́ко призре́ на смире́ние рабы́ Своея́, се бо, от ны́не ублажа́т Мя вси ро́ди.

Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Я́ко сотвори́ Мне вели́чие Си́льный, и свя́то и́мя Его́, и ми́лость Его́ в ро́ды родо́в боя́щимся Его́.

Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Сотвори́ держа́ву мы́шцею Свое́ю, расточи́ го́рдыя мы́слию се́рдца их.

Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Низложи́ си́льныя со престо́л, и вознесе́ смире́нныя, а́лчущия испо́лни благ, и богатя́щияся отпусти́ тщи.

Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Восприя́т Изра́иля о́трока Своего́, помяну́ти ми́лости, я́коже глаго́ла ко отце́м на́шим, Авраа́му и се́мени его́ да́же до ве́ка.

Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Пе́снь 9.

Ирмо́с: Безнача́льна Роди́теля Сы́н, Бо́г и Госпо́дь, вопло́щся от Де́вы, на́м яви́ся, омраче́нная просвети́ти, собра́ти расточе́нная. Те́м Всепе́тую Богоро́дицу велича́ем.

Преста́вился еси́, ра́дуяся, к жела́нию коне́чному, иде́же всели́вся, преблаже́нне, блаже́нный коне́ц прия́ти вои́стинну сподо́бился еси́, сы́й со Влады́кою твои́м во ве́ки безконе́чныя.

Жела́ние получи́л еси́, и любве́ твоея́ исполне́ние, ка́плющей еще́ те́плей кро́ви, за Христа́ излия́вшейся, от Него́же, ра́дуяся, прия́л еси́ венцы́ по́двигов твои́х.

Льво́в уста́, и звере́й зия́ния, я́коже Дании́л дре́вле, ты́ обузда́л еси́, ве́сть бо стыде́тися, му́чениче, доброде́тели и безслове́сное естество́. Те́мже тя́, пресла́вне, соше́дшеся ублажа́ем.

Бога́тную бла́гость тебе́ Христо́с да́рует, сокро́вище исцеле́ний на́м да́руя, и всеми́лостива изволе́нием тя́ пода́в вся́кому скорбя́щему, и приста́нище ти́хое, и предста́теля, и защи́тителя.

Богоро́дичен: Яко руно́, Всенепоро́чная, до́ждь небе́сный во утро́бе заче́нши, на́м родила́ еси́, тишину́ даю́щаго, я́ко Бо́га Того́ пою́щим и Тя́, Всепе́тую Богоро́дицу пропове́дающим.

Свети́лен. Подо́бен: Ученико́м.

Ми́лостивую твою́ ду́шу прови́де Бо́г, Пантелеи́мона тя́ пропове́да, безсре́брено бо тре́бующим исцеле́ние источа́еши, свя́те, мучи́телей свире́пство терпе́нием твои́м победи́вый.

[Сла́ва, и ны́не:]

Пантелеи́моне всему́дре, честны́х безсре́бренников свяще́нная красото́, и боже́ственных му́чеников великопобе́дная сла́во, свы́ше побе́ды испроси́ Импера́тору и ми́ру ми́р, и ве́рно сла́вящим тя́, свя́те, спасе́ние, с Богоро́дицею о все́х моля́ся.

Хвали́тны псалмы́, глас 8:

Вся́кое дыха́ние да хва́лит Го́спода./ Хвали́те Го́спода с небе́с,/ хвали́те Его́ в вы́шних.// Тебе́ подоба́ет песнь Бо́гу.

Хвали́те Его́ вси а́нгели Его́,/ хвали́те Его́ вся си́лы Его́.// Тебе́ подоба́ет песнь Бо́гу.

Сти́хиры, глас 8:

Стих: Сотвори́ти в них суд напи́сан/ сла́ва сия́ бу́дет всем преподо́бным Его́.

Де́ло промышле́ния Вы́шняго, / е́же на тебе́ бы́вшее, / све́тло показа́ся, / теле́сныя бо стра́сти цели́ти я́вственно, / Пантелеи́моне, науча́емь, / душ обре́лся еси́ врач изря́ден, / сло́вом благода́ти уврачу́я вся / и мра́чныя ле́сти избавля́я к тебе́ притека́ющия.

Стих: Хвали́те Его́ на си́лах Его́,/ хвали́те Его́ по мно́жеству вели́чествия Его́.

Ми́лости Бо́жии подо́бяся, / Пантелеи́мон я́ве именова́ся, / сугу́бо прие́м и́мя и подо́бное ве́щи. / Я́ко сострада́телен бо, ми́луеши всех, / сугу́бо подая́ сим исцеле́ние, / пита́я и целя́, / и к ра́зуму, сла́вне, наставля́я Боже́ственному / и пресве́тлому Христо́ву, пребога́те.

Стих: Хвали́те Его́ в тимпа́не и ли́це,/ хвали́те Его́ во стру́нах и орга́не.

Добро́тою, Богому́дре, теле́сною / душе́вную добро́ту благоду́шно премени́л еси́ / и у́мное благоле́пие плотско́ю красото́ю / и зря́щия, му́чениче, удиви́л еси́, / зна́меньми сия́я и чудесы́, / цве́том ю́ности, / состаре́вшихся ра́зум прие́м, / ве́рою же и благода́тию просвеща́емь.

Стих: Хвали́те Его́ в кимва́лех доброгла́сных, хвали́те Его́ в кимва́лех восклица́ния: / вся́кое дыха́ние да хва́лит Го́спода.

Глас 5: Всесве́тлая му́ченика па́мять сия́ет, я́ко со́лнце, конце́м / и непреста́нно подава́ет ве́рным исцеле́ния, / неду́ги отгоня́ющи и стра́сти исцеля́ющи, / мо́лится бо при́сно Пантелеи́мон Христу́ / дарова́ти душа́м на́шим ве́лию ми́лость.

Глас 4: Сла́ва Отцу́ и Сы́ну и Свято́му Ду́ху

Днесь просия́ страстоно́сца па́мять, / прииди́те, ве́рнии, духо́вно возвесели́мся / и пе́сньми сего́ венча́ем, / и́бо неви́димаго врага́ си́лою кре́стною му́жески победи́л есть, / и мучи́телей безме́рных мук не убоя́вся, / зако́нно по́честь прия́т Вы́шняго зва́ния, / и ны́не со А́нгелы ве́чно почива́ет. / Но, о му́чениче Христо́в Пантелеи́моне, / врачу́ неду́гующих и приста́нище обурева́емых, / не преста́й моля́ся Ми́лостивому Бо́гу / спасти́ся душа́м на́шим.

Глас 4: И ны́не и при́сно и во ве́ки веко́в. Ами́нь.

Богоро́дицу пе́сньми немо́лчными благоче́стно пое́м, вопию́ще: / ра́дуйся, горо́ свята́я, / ра́дуйся, престо́ле огнено́сный всех Царя́, / ра́дуйся, похвало́ А́нгелов и святы́х сла́во.

Славосло́вие вели́кое:

Сла́ва в вы́шних Бо́гу, и на земли́ мир, в челове́цех благоволе́ние. Хва́лим Тя, благослови́м Тя, кла́няем Ти ся, славосло́вим Тя, благодари́м Тя, вели́кия ра́ди сла́вы Твоея́. Го́споди Царю́ Небе́сный, Бо́же О́тче Вседержи́телю, Го́споди, Сы́не Единоро́дный, Иису́се Христе́, и Святы́й Ду́ше. Го́споди Бо́же, А́гнче Бо́жий, Сы́не Оте́чь, взе́мляй грех ми́ра, поми́луй нас; взе́мляй грехи́ ми́ра, приими́ моли́тву на́шу; седя́й одесну́ю Отца́, поми́луй нас. Я́ко Ты еси́ еди́н Свят, Ты еси́ еди́н Госпо́дь, Иису́с Христо́с, в сла́ву Бо́га Отца́. Ами́нь.

На всяк день благословлю́ Тя, и восхвалю́ И́мя Твое́ во ве́ки, и в век ве́ка.

Сподо́би, Го́споди, в день сей без греха́ сохрани́тися нам. Благослове́н еси́, Го́споди, Бо́же оте́ц на́ших, и хва́льно и просла́влено И́мя Твое́ во ве́ки. Ами́нь.

Бу́ди, Го́споди, ми́лость Твоя́ на нас, я́коже упова́хом на Тя.

Благослове́н еси́, Го́споди, научи́ мя оправда́нием Твои́м. (Три́жды)

Го́споди, прибе́жище был еси́ нам в род и род. Аз рех: Го́споди, поми́луй мя, исцели́ ду́шу мою́, я́ко согреши́х Тебе́. Го́споди, к Тебе́ прибего́х, научи́ мя твори́ти во́лю Твою́, я́ко Ты еси́ Бог мой: я́ко у Тебе́ исто́чник живота́, во све́те Твое́м у́зрим свет. Проба́ви ми́лость Твою́ ве́дущим Тя.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Три́жды)

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Святы́й Безсме́ртный, поми́луй нас.

Святы́й Бо́же, Святы́й Кре́пкий, Святы́й Безсме́ртный, поми́луй нас.

Тропа́рь, глас 3:

Страстоте́рпче святы́й и целе́бниче Пантелеи́моне, / моли́ Ми́лостиваго Бо́га, / да прегреше́ний оставле́ние / пода́ст душа́м на́шим.

Утверди́, Бо́же, святу́ю правосла́вную ве́ру, правосла́вных христиа́н во век ве́ка.

Честне́йшую Херуви́м и Сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу, Тя велича́ем.

Сла́ва, и ны́не. Го́споди, поми́луй. (Три́жды) Благослови́.

Господи Иисусе Христе, Сыне Божий, моли́твами Пречи́стыя Своея́ Ма́тере, великомученика и целителя Пантелеимона, преподобных и богоносных отец наших и всех святы́х, поми́луй и спаси нас я́ко Благ и Челове́колюбец.

Многоле́тие:

Вели́каго Господи́на и Отца́ на́шего Кири́лла,/ Святе́йшаго Патри́арха Моско́вского и всея́ Руси́,/ и Господи́на на́шего (Высоко-) Преосвяще́ннейшаго (имярек),/ (архи-)епи́скопа (митрополита (титул)),/ богохрани́мую страну́ на́шу Росси́йскую,/  и вся правосла́вныя христи́аны,// Го́споди, сохрани́ их на мно́гая ле́та.