Последование Всеношного бдения в день памяти Архистратига Божия Михаила и прочих небесных сил Безплотных. Для домашнего (келейного) совершения

ВСЕНО́ЩНОЕ БДЕ́НИЕ

ВЕЛИ́КАЯ ВЕЧЕ́РНЯ

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас. Ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Трижды.)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, (трижды). Сла́ва, и ны́не:

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Таже, Го́споди, поми́луй, (12), Сла́ва, и ны́не:

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 103:

Поется часть псалма:

Благослови́, душе́ моя́, Го́спода. / Благослове́н еси́, Го́споди. / Го́споди, Бо́же мой, возвели́чился еси́ зело́. / Благослове́н еси́, Го́споди. / Во испове́дание и в велеле́поту обле́клся еси́. / Благослове́н еси́, Го́споди. / Посреде́ гор про́йдут во́ды. / Ди́вна дела́ Твоя́, Го́споди. / Вся прему́дростию сотвори́л еси́. / Сла́ва Ти, Го́споди, сотвори́вшему вся.

Или читается псалом полностью:

Благослови́, душе́ моя́, Го́спода. Го́споди, Бо́же мой, возвели́чился еси́ зело́. Во испове́дание и в велеле́поту обле́клся еси́. Одея́йся све́том, я́ко ри́зою, простира́яй не́бо, я́ко ко́жу. Покрыва́яй вода́ми превы́спренняя Своя́, полага́яй о́блаки на восхожде́ние Свое́, ходя́й на крилу́ ве́треню. Творя́й А́нгелы Своя́ ду́хи и слуги́ Своя́ пла́мень о́гненный. Основа́яй зе́млю на тве́рди ея́, не преклони́тся в век ве́ка. Бе́здна, я́ко ри́за, одея́ние ея́, на гора́х ста́нут во́ды, от запреще́ния Твоего́ побе́гнут, от гла́са гро́ма Твоего́ убоя́тся. Восхо́дят го́ры и нисхо́дят поля́ в ме́сто, е́же основа́л еси́ им. Преде́л положи́л еси́, eго́же не пре́йдут, ниже́ обратя́тся покры́ти зе́млю. Посыла́яй исто́чники в де́брех, посреде́ гор про́йдут во́ды. Напая́ют вся зве́ри се́льныя, ждут она́гри в жа́жду свою́. На ты́х пти́цы небе́сныя привита́ют, от среды́ ка́мения дадя́т глас. Напая́яй го́ры от превы́спренних Свои́х, от плода́ дел Твои́х насы́тится земля́. Прозяба́яй траву́ ското́м, и злак на слу́жбу челове́ком, извести́ хлеб от земли́. И вино́ весели́т се́рдце челове́ка, ума́стити лице́ еле́ем, и хлеб се́рдце челове́ка укрепи́т. Насы́тятся древа́ польска́я, ке́дри Лива́нстии, и́хже еси́ насади́л. Та́мо пти́цы вогнездя́тся, ероди́ево жили́ще предводи́тельствует и́ми. Го́ры высо́кия еле́нем, ка́мень прибе́жище за́яцем. Сотвори́л есть луну́ во времена́, со́лнце позна́ за́пад свой. Положи́л еси́ тму, и бысть нощь, в не́йже про́йдут вси зве́рие дубра́внии. Ски́мни рыка́ющии, восхи́тити и взыска́ти от Бо́га пи́щу себе́. Возсия́ со́лнце и собра́шася и в ло́жах свои́х ля́гут. Изы́дет челове́к на де́ло свое́ и на де́лание свое́ до ве́чера. Я́ко возвели́чишася дела́ Твоя́, Го́споди, вся прему́дростию сотвори́л еси́, испо́лнися земля́ тва́ри Твоея́. Сие́ мо́ре вели́кое и простра́нное, та́мо га́ди, и́мже несть числа́, живо́тная ма́лая с вели́кими, та́мо корабли́ препла́вают, змий сей, eго́же созда́л еси руга́тися eму́. Вся к Тебе́ ча́ют, да́ти пи́щу им во бла́го вре́мя. Да́вшу Тебе́ им соберу́т, отве́рзшу Тебе́ ру́ку вся́ческая испо́лнятся бла́гости, отвра́щшу же Тебе́ лице́, возмяту́тся, отъи́меши дух их, и исче́знут, и в персть свою́ возвратя́тся. По́слеши Ду́ха Твоего́, и сози́ждутся, и обнови́ши лице́ земли́. Бу́ди сла́ва Госпо́дня во ве́ки, возвесели́тся Госпо́дь о де́лех Свои́х, призира́яй на зе́млю, и творя́й ю́ трясти́ся, прикаса́яйся гора́м, и дымя́тся. Воспою́ Го́сподеви в животе́ мое́м, пою́ Бо́гу моему́, до́ндеже есмь, да услади́тся Ему́ бесе́да моя́, аз же возвеселю́ся о Го́споде. Да исче́знут гре́шницы от земли́, и беззако́нницы, я́коже не бы́ти им. Благослови́, душе́ моя́, Го́спода.

Со́лнце позна́ за́пад свой. Положи́л еси́ тму, и бысть нощь. Я́ко возвели́чишася дела́ Твоя́, Го́споди, вся прему́дростию сотвори́л еси́.

Сла́ва, и ны́не: Аллилу́иа, аллилу́иа, аллилу́иа, сла́ва Тебе́ Бо́же. Трижды.

Блаже́н муж:

Блаже́н муж, и́же не и́де на сове́т нечести́вых.

Аллилу́иа, аллилу́иа, аллилу́иа.

Я́ко весть Госпо́дь путь пра́ведных, и путь нечести́вых поги́бнет.

Аллилу́иа, аллилу́иа, аллилу́иа.

Рабо́тайте Го́сподеви со стра́хом и ра́дуйтеся Ему́ с тре́петом.

Аллилу́иа, аллилу́иа, аллилу́иа.

Блаже́ни вси наде́ющиися Нань.

Аллилу́иа, аллилу́иа, аллилу́иа.

Воскресни́, Го́споди, спаси́ мя, Бо́же мой.

Аллилу́иа, аллилу́иа, аллилу́иа.

Госпо́дне есть спасе́ние, и на лю́дех Твои́х благослове́ние Твое́.

Аллилу́иа, аллилу́иа, аллилу́иа.

Сла́ва Отцу́ и Сы́ну и Свято́му Духу.

Аллилу́иа, аллилу́иа, аллилу́иа.

И ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Го́споди, воззва́х, глас 4:

Го́споди, воззва́х к Тебе́, услы́ши мя./ Услы́ши мя, Го́споди./ Го́споди, воззва́х к Тебе́, услы́ши мя:/ вонми́ гла́су моле́ния моего́,/ внегда́ воззва́ти ми к Тебе́.// Услы́ши мя, Го́споди.

Да испра́вится моли́тва моя́,/ я́ко кади́ло пред Тобо́ю,/ воздея́ние руку́ мое́ю/ – же́ртва вече́рняя.// Услы́ши мя, Го́споди.

Стихи́ры, глас 4:

Стих: Из глубины́ воззва́х к Тебе́, Го́споди, Го́споди, услы́ши глас мой.

Трисо́лнечнаго Божества́ предста́тель светле́йший / Михаи́ле, явля́яся, Архистрати́же, / с Го́рними си́лами зове́ши, ра́дуяся: / Свят еси́, О́тче, / Свят еси́, собезнача́льное Сло́во, / Свят еси́ и Святы́й Ду́ше, / еди́на сла́ва, еди́но ца́рство и естество́, / еди́но Божество́ и си́ла.

Стих: Да бу́дут у́ши Твои́ вне́млюще гла́су моле́ния моего́.

И вид твой о́гнен, и добро́та чу́дна, / Михаи́ле первоа́нгеле, / невеще́ственным бо естество́м прехо́диши концы́, / исполня́я повеле́ния всех Творца́, / си́лен в кре́пости твое́й познава́емь, / и исто́чник исцеле́ний храм твой соде́ловая, / зва́нием твои́м святы́м почита́емый.

Стих: А́ще беззако́ния на́зриши, Го́споди, Го́споди, кто постои́т? Я́ко у Тебе́ очище́ние есть.

Творя́й А́нгелы Твоя́, я́коже писа́ся, ду́хи / и служа́щия Тебе́ пла́мень о́гненный, / посреде́ чино́в пе́рвенствующа показа́л еси́, Го́споди, Твои́х Арха́нгельских / Михаи́ла Архистрати́га, / Твои́м манове́нием повину́ющася, Сло́ве, / и песнь трисвяту́ю / со стра́хом возглаша́юща сла́ве Твое́й.

Стих: От стра́жи у́тренния до но́щи, от стра́жи у́тренния да упова́ет Изра́иль на Го́спода.

Ум Предве́чный, свет соста́ви вторы́й, / Гаврии́ла, Тебе́ прича́стии Боже́ственными просвеща́ющаго всю вселе́нную / и ю́же от ве́ка открыва́ющаго нам / Боже́ственную и вели́кую и́стинно та́йну: / во утро́бе Воплоща́емаго де́вственней, / су́ща Безтеле́снаго и бы́вша Челове́ка, / во е́же спасти́ челове́ка.

Стих: Я́ко у Го́спода ми́лость, и мно́гое у Него́ избавле́ние, и Той изба́вит Изра́иля от всех беззако́ний eго́.

Престо́лу предстоя́ трисо́лнечнаго Божества́ / и бога́тно осия́емь Боже́ственными светлостьми́, / испуща́емыми непреста́нно отту́ду, / су́щия на земли́, ра́достно лику́ющия и благохва́лящия тя, / страсте́й мглы изба́ви и просвеще́нием уясни́, / Гаврии́ле Архистрати́же, / моли́твенниче о душа́х на́ших.

Стих: Хвали́те Го́спода вси язы́цы, похвали́те Его́ вси лю́дие.

Сокруши́ свере́пства Ага́рянская, / на ста́до твое́ ча́сто находя́щая, / уста́ви раздо́ры Церкве́й, / укроти́ бу́рю безме́рных искуше́ний, / изба́ви бед и обстоя́ний любо́вию чту́щия тя / и под кров твой прибега́ющия, / Гаврии́ле Архистрати́же, / моли́твенниче о душа́х на́ших.

Глас 6: Сла́ва Отцу́ и Сы́ну и Свято́му Ду́ху.

Сра́дуйтеся нам, вся А́нгельская чинонача́лия, / первостоя́тель бо ваш и наш предста́тель, / вели́кий Архистрати́г, / в дне́шний день в честне́м его́ хра́ме / пресла́вно явля́яся, освяща́ет. / Те́мже, по до́лгу воспева́юще, тому́ возопии́м: / покры́й нас кро́вом крил твои́х, / велича́йший Михаи́ле Арха́нгеле.

Глас 6: И ны́не и при́сно и во ве́ки веко́в. Ами́нь.

Сра́дуйтеся нам, вся де́вственных ликостоя́ния, / Предста́тельница бо на́ша, и Хода́таица, / и Покро́в, и вели́кое Прибе́жище / в дне́шний день в честне́м Ея́ и Боже́ственнем хра́ме / скорбя́щия утеша́ет. / Те́мже, по до́лгу воспева́юще Сию́, возопии́м: / покры́й ны Боже́ственным предста́тельством Твои́м, / Пречи́стая Богоро́дице Влады́чице.

Све́те Тихи́й:

Све́те Ти́хий святы́я сла́вы Безсме́ртнаго Отца́ Небе́снаго, Свята́го, Блаже́ннаго, Иису́се Христе́! Прише́дше на за́пад со́лнца, ви́девше свет вече́рний, пое́м Отца́, Сы́на и Свята́го Ду́ха, Бо́га. Досто́ин еси́ во вся времена́ пет бы́ти гла́сы преподо́бными, Сы́не Бо́жий, живо́т дая́й; те́мже мир Тя сла́вит.

Пареми́и:

Иису́са Нави́на чте́ние.

Бысть, егда́ бя́ше Иису́с от Иерихо́на, и воззре́в очи́ма свои́ма, ви́де челове́ка стоя́ща пред ним, и меч его́ обнаже́н в руце́ его́. И прише́д Иису́с рече́ ему́: наш ли еси́ или́ от сопроти́вных на́ших? Он же рече́ ему́: аз Архистрати́г си́лы Госпо́дни, ны́не приидо́х се́мо. И Иису́с паде́ лице́м свои́м на зе́млю и рече́ ему́: влады́ко, что повелева́еши твоему́ рабу́? И рече́ Архистрати́г Госпо́день ко Иису́су: разреши́ сапо́г твой от ног твои́х, ме́сто бо, на не́мже ты стои́ши, свя́то есть. И сотвори́ Иису́с та́ко.

Суде́й Изра́илевых чте́ние.

Бысть во дни о́ны, укрепи́ся Мадиа́м на сы́ны Изра́илевы, и ти́и возопи́ша ко Го́споду Бо́гу; и се А́нгел Госпо́день прии́де и се́де под ду́бом, и́же во Евфра́фе, в земли́ Иоа́са, отца́ Езри́мова, и Гедео́н, сын его́, млатя́ше пшени́цу на гумне́, е́же бежа́ти с не́ю от лица́ Мадиа́мля. И яви́ся ему́ А́нгел Госпо́день и рече́ к нему́: Госпо́дь с тобо́ю, си́льный кре́постию. И рече́ к нему́ Гедео́н: во мне, Го́споди мой, и а́ще есть Госпо́дь с на́ми, и чесо́ ра́ди обрето́ша ны вся зла́я сия́? И где суть вся чудеса́ Его́, ели́ка пове́даша нам отцы́ на́ши, глаго́люще: не из Еги́пта ли изведе́ нас Госпо́дь? И ны́не отве́рже ны Госпо́дь и предаде́ ны в ру́ку Мадиа́млю. И воззре́ на него́ А́нгел Госпо́день и рече́ ему́: иди́ в кре́пости твое́й сей и спасе́ши Изра́иля от руки́ Мадиа́мли, и се посла́х тя. И рече́ к Нему́ Гедео́н: во мне, Го́споди, в чесо́м спасу́ Изра́иля? Се ты́сяща моя́ ху́ждша в Манасси́и, и аз есмь мний в дому́ отца́ моего́. И рече́ к нему́ Госпо́дь: поне́же Аз бу́ду с тобо́ю, и избие́ши Мадиа́ма, я́ко му́жа еди́наго. И рече́ к Нему́ Гедео́н: и а́ще обрето́х благода́ть пред очи́ма Твои́ма, и да сотвори́ши мне днесь зна́мение, я́ко Ты глаго́леши со мно́ю. Не отыди́ отсю́ду, до́ндеже приити́ мне к Тебе́, и принесу́ же́ртву мою́, и пожру́ пред Тобо́ю. И рече́ к нему́ А́нгел Госпо́день: Аз есмь, и преме́длю, до́ндеже обрати́шися ты. Гедео́н же вни́де и сотвори́ ко́злище от коз и че́тверть муки́ опресно́ков, и вложи́ с мя́сом в ко́шницу, и юху́ влия́ в горне́ц, и изнесе́ к Нему́ под дуб, и поклони́ся. И рече́ к нему́ А́нгел Госпо́день: возми́ мяса́ и хле́бы пре́сныя, и положи́ у ка́мене о́наго и юху́ изли́й. И сотвори́ та́ко. И простре́ А́нгел Госпо́день коне́ц жезла́, су́щаго в руце́ Его́, и косне́ся мясо́м и хле́бом пре́сным, и возгоре́ся огнь из ка́мене, и пояде́ мяса́ и опресно́ки, и А́нгел Госпо́день оты́де от оче́й его́. И ви́де Гедео́н, я́ко А́нгел есть Госпо́день, и рече́ Гедео́н: увы мне, Го́споди, Го́споди, я́ко ви́дех А́нгела Госпо́дня лице́м к лицу́. И рече́ ему́ Госпо́дь: мир тебе́, не бо́йся, не у́мреши. И созда́ та́мо Гедео́н же́ртвенник Го́споду и назва́ его́ мир Госпо́день, да́же до дне сего́.

Проро́чества Иса́иина чте́ние.

Та́ко глаго́лет Госпо́дь: вся земля́ да вопие́т с весе́лием. И древа́ Лива́нова да возвеселя́тся о тебе́, и ке́дри Лива́новы реку́т: отне́леже ты усну́л еси́, не взы́де секи́й нас. Ад до́ле огорчи́ся, сре́тив тебе́, гряду́щу ти, воздви́же на тя исполи́ны вся, нача́льствовавшия земле́ю. А́ще воста́ли бы́ша от престо́л свои́х вси ца́рие язы́честии, вси отвеща́ют и реку́т тебе́: и ты плене́н еси́ я́коже и мы, с на́ми же причта́лся еси́. Сни́де во ад сла́ва твоя́ и мно́гое твое́ весе́лие, под тобо́ю посте́лют гни́лость, и покро́в твой – че́рви. Ка́ко спаде́ с Небесе́ денни́ца, зау́тра возсиява́ющая, сокруши́ся на зе́млю, посыла́я ко всем язы́ком. Ты бо рекл еси́ в помышле́нии твое́м: на Не́бо взы́ду, верху́ звезд небе́сных поста́влю престо́л мой и ся́ду на горе́ высо́цей, на гора́х высо́ких, су́щих к се́веру. И взы́ду вы́шше облако́в, и бу́ду подо́бен Вы́шнему. Ны́не же во ад сни́деши, во основа́ния земли́. И ви́девшии тя почудя́тся, и реку́т о тебе́: сей челове́к, смуща́яй зе́млю, потряса́яй цари́, положи́вый вселе́нную всю пу́сту, и гра́ды ея́ низложи́, и плене́нных не разреши́ в до́мы их. Вси ца́рие язы́честии успо́ша в чести́, челове́к в дому́ свое́м, ты же отве́ржен бу́деши в гора́х, я́ко мертве́ц возгнуше́н со мно́гими мертвецы́, избоде́ными мече́м, низходя́щими во ад. И́мже о́бразом ри́за, кро́вию намоче́на, не бу́дет чиста́, си́це ниже́ ты бу́деши чист, зане́ зе́млю мою́ погуби́л еси́, и лю́ди моя́ порази́л еси́, и не пребу́деши в ве́чное вре́мя.

Го́споди, поми́луй. (Три́жды,)

Сподо́би, Го́споди:

Сподо́би, Го́споди, в ве́чер сей без греха́ сохрани́тися нам. Благослове́н еси́, Го́споди, Бо́же оте́ц на́ших, и хва́льно и просла́влено и́мя Твое́ во ве́ки. Ами́нь.

Бу́ди, Го́споди, ми́лость Твоя́ на нас, я́коже упова́хом на Тя. Благослове́н еси́, Го́споди, научи́ мя оправда́нием Твои́м. Благослове́н еси́, Влады́ко, вразуми́ мя оправда́нием Твои́м. Благослове́н еси́, Святы́й, просвети́ мя оправда́нии Твои́ми.

Го́споди, ми́лость Твоя́ во век, дел руку́ Твое́ю не пре́зри. Тебе́ подоба́ет хвала́, Тебе́ подоба́ет пе́ние, Тебе́ сла́ва подоба́ет. Отцу́ и Сы́ну и Свято́му Ду́ху, ны́не и при́сно и во ве́ки веко́в. Ами́нь.

Лития́:

Стихи́ры:

Глас 1: У́мных сил Архистрати́зи, / предстоя́ще непреста́нно Влады́чню Престо́лу, / моли́теся ко Го́споду / мир ми́ру дарова́ти / и душа́м на́шим ве́лию ми́лость.

Чинонача́льник вы́шних сил, / Михаи́л, первостоя́тель Боже́ственных чино́в, / днесь нас к торжеству́ созва́, / и́же всегда́ с на́ми ходя́й / и сохраня́й вся от вся́каго диа́воля обстоя́ния. / Прииди́те у́бо, празднолю́бцы и христолю́бцы, / цве́ты доброде́телей взе́мше, / чи́стыми по́мыслы и со́вестию благостоя́нною / Арха́нгелов собо́р почти́м: / той бо, непреста́нно Бо́гу предстоя́ / и трисвяту́ю песнь воспева́я, / мо́лит спасти́ся душа́м на́шим.

Глас 2: Невеще́ственное существо́, / У́мных Сил предста́тельствующе / и трисо́лнечныя сла́вы блиста́ньми / светодаю́ще вселе́нней, Архистрати́зи, / непреста́нным гла́сом трисвяту́ю песнь воспева́ете. / Те́мже моли́теся спасти́ся душа́м на́шим.

Невеще́ственный Престо́л окружа́юще, / у́мная существа́, Боже́ственнии, безтеле́снии, / трисвяту́ю песнь прави́телю Бо́гу / пла́менными устна́ми поете́: / Святы́й Бо́же, О́тче безнача́льный, / Святы́й Кре́пкий, Сы́не собезнача́льный, / Святы́й Безсме́ртный, Единосу́щный Ду́ше, / Отцу́ и Сы́ну спрославля́емый.

Безтеле́сными устна́ми и у́мными усты́ / А́нгельстии чи́ни непреста́нное пе́ние / прино́сят Твоему́ непристу́пному Божеству́, Го́споди, / и У́ми чи́стии и служи́телие Твоея́ сла́вы / хва́лят Тя, Го́споди. / С ни́миже Михаи́л безтеле́сный, / и Гаврии́л зело́ благоле́пнейший, / и первостоя́телие Го́рних сил, / Архистрати́зи А́нгельстии, / учреди́телие на́ши днесь бы́ша, / пе́сни пе́сней повелева́юще нам пе́ти / непристу́пней сла́ве Твое́й, Человеколю́бче, / Е́йже мо́лятся непреста́нно за ду́ши на́ша.

Слава, глас 4: О́гненными устна́ми / пою́т Тя Херуви́ми, Христе́ Бо́же, / безтеле́сными же усты́ немо́лчно славосло́вит Тя Арха́нгельский лик, / Михаи́л же, Архистрати́г Вы́шних сил, / побе́дную песнь непреста́нно прино́сит сла́ве Твое́й. / Той бо нас днесь озари́ к торжеству́ све́тлому / возбряца́ти досто́йне псало́мски хвалу́ трисвяту́ю бре́нными устна́ми, / я́ко вся́ческая Твоего́ хвале́ния испо́лнишася, / и подае́ши ми́ру тем ве́лию ми́лость.

И ныне, Богородичен, глас тойже: Днесь Боговмести́мый храм – Богоро́дица, / в храм Госпо́день приво́дится / и Заха́рия Сию́ подъе́млет. / Днесь свята́я святы́х ра́дуются, / и лик А́нгельский та́инственно торжеству́ет. / С ни́миже и мы, пра́зднующе, днесь с Гаврии́лом возопии́м: / ра́дуйся, Благода́тная, Госпо́дь с Тобо́ю, / име́яй ве́лию ми́лость.

Го́споди, поми́луй. (40 раз)

Стихи́ры на стихо́вне:

Стихи́ры: Глас 1:

А́нгельски в ми́ре торжеству́юще, / су́щему на Престо́ле сла́вы Бо́гу седя́щему возопии́м песнь: / Свят еси́, О́тче Небе́сный, / Свят еси́, соприсносу́щное Сло́во, / Свят еси́ и Ду́ше всесвяты́й.

Стих: Творя́й А́нгелы Своя́ ду́хи, / и слуги́ Своя́ пла́мень о́гненный.

Небе́сным пе́рвствуя в дерзнове́нии мно́зем / и предстоя́ Престо́лу стра́шному в сла́ве, / самови́дче неизрече́нных, / спаси́ ны, Михаи́ле Архистрати́же, / су́щия в ну́ждах бед и напа́стей / моли́твами твои́ми, мо́лимся.

Стих: Хвали́те Его́ вси А́нгели Его́, / хвали́те Его́ вся си́лы Его́.

Безпло́тных А́нгелов пе́рвый еси́ / и служи́тель Боже́ственнаго светозаре́ния о́наго, / самови́дец же и таи́нник, / спаси́ ны, Михаи́ле Архистрати́же, / ле́тно чту́щия тя благоче́стно / и пою́щия Тро́ицу ве́рно.

Слава, И ныне, глас 8:

Я́ко чинонача́льник и побо́рник, / и А́нгелов началово́ждь, Архистрати́же, / вся́кия ну́жды и ско́рби, / неду́гов и лю́тых грехо́в свободи́ / ве́рно воспева́ющия и моля́щия тя, сла́вне, / я́ве, я́ко невеще́ствен, Невеще́ственнаго зря, / и непристу́пным Све́том Влады́чния сла́вы осия́емь: / Той бо человеколю́бно плоть нас ра́ди от Де́вы прия́т, / спасти́ восхоте́в челове́чество.

Моли́тва свята́го Симео́на Богоприи́мца:

Ны́не отпуща́еши раба́ Твоего́, Влады́ко,/ по глаго́лу Твоему́, с ми́ром;/ я́ко ви́деста о́чи мои́ спасе́ние Твое́,/ е́же еси́ угото́вал пред лице́м всех люде́й,/ свет во открове́ние язы́ков,// и сла́ву люде́й Твои́х Изра́иля.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Тропа́рь, глас 4:

Небе́сных во́инств Архистрати́зи, / мо́лим вас при́сно мы, недосто́йнии, / да ва́шими моли́твами оградите́ нас / кро́вом крил невеще́ственныя ва́шея сла́вы, / сохраня́юще ны, припа́дающия приле́жно и вопию́щия: / от бед изба́вите ны, / я́ко чинонача́льницы Вы́шних сил. (Дважды)

Тропа́рь, глас 4:

Богоро́дице Де́во, ра́дуйся, / Благода́тная Мари́е, Госпо́дь с Тобо́ю: / Благослове́на Ты в жена́х, и Благослове́н Плод чре́ва Твоего́, / я́ко Спа́са родила́ еси́ душ на́ших.

Бу́ди И́мя Госпо́дне благослове́но от ны́не и до ве́ка. (Три́жды)

Псало́м 33:

Благословлю́ Го́спода на вся́кое вре́мя,/ вы́ну хвала́ Его́ во усте́х мои́х./ О Го́споде похва́лится душа́ моя́,/ да услы́шат кро́тцыи, и возвеселя́тся./ Возвели́чите Го́спода со мно́ю,/ и вознесе́м И́мя Его́ вку́пе./ Взыска́х Го́спода, и услы́ша мя,/ и от все́х скорбе́й мои́х изба́ви мя./ Приступи́те к Нему́, и просвети́теся,/ и ли́ца ва́ша не постыдя́тся./ Сей ни́щий воззва́, и Госпо́дь услы́ша и́,/ и от все́х скорбе́й его́ спасе́ и́./ Ополчи́тся а́нгел Госпо́день о́крест боя́щихся Его́,/ и изба́вит их./ Вкуси́те и ви́дите, я́ко благ Госпо́дь:/ блаже́н муж, и́же упова́ет Нань./ Бо́йтеся Го́спода, вси́ святи́и Его́,/ я́ко несть лише́ния боя́щимся Его́./ Бога́тии обнища́ша и взалка́ша:/ взыска́ющии же Го́спода// не лиша́тся вся́каго бла́га.

У́ТРЕНЯ.

Шестопса́лмие:

Сла́ва в вы́шних Бо́гу, и на земли́ мир, в челове́цех благоволе́ние. (Три́жды)

Го́споди, устне́ мои́ отве́рзеши, и уста́ моя́ возвестя́т хвалу́ Твою́. (Два́жды)

Псалом 3:

Го́споди, что ся умно́жиша стужа́ющии ми́? Мно́зи востаю́т на мя, мно́зи глаго́лют души́ мое́й: несть спасе́ния eму́ в Бо́зе eго́. Ты же, Го́споди, Засту́пник мой еси́, сла́ва моя́ и вознося́й главу́ мою́. Гла́сом мои́м ко Го́споду воззва́х, и услы́ша мя от горы́ святы́я Своея́. Аз усну́х, и спах, воста́х, я́ко Госпо́дь засту́пит мя. Не убою́ся от тем люде́й, о́крест напа́дающих на мя. Воскресни́, Го́споди, спаси́ мя, Бо́же мой, я́ко Ты порази́л еси́ вся вражду́ющыя ми всу́е: зу́бы гре́шников сокруши́л еси́. Госпо́дне есть спасе́ние, и на лю́дех Твои́х благослове́ние Твое́.

Аз усну́х, и спах, воста́х, я́ко Госпо́дь засту́пит мя.

Псалом 37:

Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́. Я́ко стре́лы Твоя́ унзо́ша во мне, и утверди́л еси́ на мне ру́ку Твою́. Несть исцеле́ния в пло́ти мое́й от лица́ гне́ва Твоего́, несть ми́ра в косте́х мои́х от лица́ грех мои́х. Я́ко беззако́ния моя́ превзыдо́ша главу́ мою́, я́ко бре́мя тя́жкое отяготе́ша на мне. Возсмерде́ша и согни́ша ра́ны моя́ от лица́ безу́мия моего́. Пострада́х и сляко́хся до конца́, весь день се́туя хожда́х. Я́ко ля́двия моя́ напо́лнишася поруга́ний, и несть исцеле́ния в пло́ти мое́й. Озло́блен бых и смири́хся до зела́, рыка́х от воздыха́ния се́рдца моего́. Го́споди, пред Тобо́ю все жела́ние мое́ и воздыха́ние мое́ от Тебе́ не утаи́ся. Се́рдце мое́ смяте́ся, оста́ви мя си́ла моя́, и свет о́чию мое́ю, и той несть со мно́ю. Дру́зи мои́ и и́скреннии мои́ пря́мо мне прибли́жишася и ста́ша, и бли́жнии мои́ отдале́че мене́ ста́ша и нужда́хуся и́щущии ду́шу мою́, и и́щущии зла́я мне глаго́лаху су́етная и льсти́вным весь день поуча́хуся. Аз же я́ко глух не слы́шах и я́ко нем не отверза́яй уст свои́х. И бых я́ко челове́к не слы́шай и не имы́й во усте́х свои́х обличе́ния. Я́ко на Тя, Го́споди, упова́х, Ты услы́шиши, Го́споди Бо́же мой. Я́ко рех: да не когда́ пора́дуют ми ся врази́ мои́: и внегда́ подвижа́тися нога́м мои́м, на мя велере́чеваша. Я́ко аз на ра́ны гото́в, и боле́знь моя́ предо мно́ю есть вы́ну. Я́ко беззако́ние мое́ аз возвещу́ и попеку́ся о гресе́ мое́м. Врази́ же мои́ живу́т и укрепи́шася па́че мене́, и умно́жишася ненави́дящии мя без пра́вды. Воздаю́щии ми зла́я возблага́я оболга́ху мя, зане́ гоня́х благосты́ню. Не оста́ви мене́, Го́споди Бо́же мой, не отступи́ от Мене́. Вонми́ в по́мощь мою́, Го́споди спасе́ния моего́.

Не оста́ви мене́, Го́споди Бо́же мой, не отступи́ от Мене́. Вонми́ в по́мощь мою́, Го́споди спасе́ния моего́.

Псалом 62:

Бо́же, Бо́же мой, к Тебе́ у́тренюю, возжада́ Тебе́ душа́ моя́, коль мно́жицею Тебе́ плоть моя́, в земли́ пу́сте и непрохо́дне, и безво́дне. Та́ко во святе́м яви́хся Тебе́, ви́дети си́лу Твою́ и сла́ву Твою́. Я́ко лу́чши ми́лость Твоя́ па́че живо́т, устне́ мои́ похвали́те Тя. Та́ко благословлю́ Тя в животе́ мое́м, о и́мени Твое́м воздежу́ ру́це мои́. Я́ко от ту́ка и ма́сти да испо́лнится душа́ моя́, и устна́ма ра́дости восхва́лят Тя уста́ моя́. А́ще помина́х Тя на посте́ли мое́й, на у́тренних поуча́хся в Тя. Я́ко был еси́ Помо́щник мой, и в кро́ве крилу́ Твое́ю возра́дуюся. Прильпе́ душа́ моя́ по Тебе́, мене́ же прия́т десни́ца Твоя́. Ти́и же всу́е иска́ша ду́шу мою́, вни́дут в преиспо́дняя земли́, предадя́тся в ру́ки ору́жия, ча́сти ли́совом бу́дут. Царь же возвесели́тся о Бо́зе, похва́лится всяк клены́йся Им, я́ко загради́шася уста́ глаго́лющих непра́ведная.

На у́тренних поуча́хся в Тя. Я́ко был еси́ Помо́щник мой, и в кро́ве крилу́ Твое́ю возра́дуюся. Прильпе́ душа́ моя́ по Тебе́, мене́ же прия́т десни́ца Твоя́.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Го́споди поми́луй. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Псалом 87:

Го́споди Бо́же спасе́ния моего́, во дни воззва́х, и в нощи́ пред Тобо́ю. Да вни́дет пред Тя моли́тва моя́: приклони́ у́хо Твое́ к моле́нию моему́, я́ко испо́лнися зол душа́ моя́, и живо́т мой аду прибли́жися. Привмене́н бых с низходя́щими в ров, бых я́ко челове́к без по́мощи, в ме́ртвых свобо́дь, я́ко я́звеннии спя́щии во гро́бе, и́хже не помяну́л еси́ ктому́, и ти́и от руки́ Твоея́ отринове́ни бы́ша. Положи́ша мя в ро́ве преиспо́днем, в те́мных и се́ни сме́ртней. На мне утверди́ся я́рость Твоя́, и вся во́лны Твоя́ наве́л еси́ на мя. Уда́лил еси́ зна́емых мои́х от Мене́, положи́ша мя ме́рзость себе́: пре́дан бых и не исхожда́х. О́чи мои́ изнемого́сте от нищеты́, воззва́х к Тебе́, Го́споди, весь день, возде́х к Тебе́ ру́це мои́. Еда́ ме́ртвыми твори́ши чудеса́? Или́ вра́чеве воскреся́т, и испове́дятся Тебе́? Еда́ пове́сть кто во гро́бе ми́лость Твою́, и и́стину Твою́ в поги́бели? Еда́ позна́на бу́дут во тьме чудеса́ Твоя́, и пра́вда Твоя́ в земли́ забве́нней? И аз к Тебе́, Го́споди, воззва́х и у́тро моли́тва моя́ предвари́т Тя. Вску́ю, Го́споди, отре́еши ду́шу мою́, отвраща́еши лице́ Твое́ от Мене́? Нищ есмь аз, и в труде́х от ю́ности моея́; возне́с же ся, смири́хся, и изнемого́х. На мне преидо́ша гне́ви Твои́, устраше́ния Твоя́ возмути́ша мя, обыдо́ша мя я́ко вода́, весь день одержа́ша мя вку́пе. Уда́лил еси́ от Мене́ дру́га и и́скренняго, и зна́емых мои́х от страсте́й.

Го́споди Бо́же спасе́ния моего́, во дни воззва́х, и в нощи́ пред Тобо́ю. Да вни́дет пред Тя моли́тва моя́: приклони́ у́хо Твое́ к моле́нию моему́.

Псалом 102:

Благослови́, душе́ моя́, Го́спода, и вся вну́тренняя моя́ и́мя свя́тое Его́. Благослови́, душе́ моя́, Го́спода, и не забыва́й всех воздая́ний Его́, очища́ющаго вся беззако́ния твоя́, исцеля́ющаго вся неду́ги твоя́, избавля́ющаго от истле́ния живо́т твой, венча́ющаго тя ми́лостию и щедро́тами, исполня́ющаго во благи́х жела́ние твое́: обнови́тся я́ко о́рля ю́ность твоя́. Творя́й ми́лостыни Госпо́дь, и судьбу́ всем оби́димым. Сказа́ пути́ Своя́ Моисе́ови, сыново́м Изра́илевым хоте́ния Своя́: Щедр и Ми́лостив Госпо́дь, Долготерпели́в и Многоми́лостив. Не до конца́ прогне́вается, ниже́ во век вражду́ет, не по беззако́нием на́шым сотвори́л есть нам, ниже́ по грехо́м на́шым возда́л есть нам. Я́ко по высоте́ небе́сней от земли́, утверди́л есть Госпо́дь ми́лость Свою́ на боя́щихся Его́. Ели́ко отстоя́т восто́цы от за́пад, уда́лил есть от нас беззако́ния на́ша. Я́коже ще́дрит оте́ц сы́ны, уще́дри Госпо́дь боя́щихся Его́. Я́ко Той позна́ созда́ние на́ше, помяну́, я́ко персть есмы́. Челове́к, я́ко трава́ дни́е eго́, я́ко цвет се́льный, та́ко оцвете́т, я́ко дух про́йде в нем, и не бу́дет, и не позна́ет ктому́ ме́ста своего́. Ми́лость же Госпо́дня от ве́ка и до ве́ка на боя́щихся Его́, и пра́вда Его́ на сыне́х сыно́в, храня́щих заве́т Его́, и по́мнящих за́поведи Его́ твори́ти я́. Госпо́дь на Небеси́ угото́ва Престо́л Свой, и Ца́рство Его́ все́ми облада́ет. Благослови́те Го́спода вси А́нгели Его́, си́льнии кре́постию, творя́щии сло́во Его́, услы́шати глас слове́с Его́. Благослови́те Го́спода вся Си́лы Его́, слуги́ Его́, творя́щии во́лю Его́. Благослови́те Го́спода вся дела́ Его́, на вся́ком ме́сте влады́чества Его́, благослови́, душе́ моя́, Го́спода.

На вся́ком ме́сте влады́чества Его́, благослови́, душе́ моя́, Го́спода.

Псалом 142:

Го́споди, услы́ши моли́тву мою́, внуши́ моле́ние мое́ во и́стине Твое́й, услы́ши мя в пра́вде Твое́й и не вни́ди в суд с рабо́м Твои́м, я́ко не оправди́тся пред Тобо́ю всяк живы́й. Я́ко погна́ враг ду́шу мою́, смири́л есть в зе́млю живо́т мой, посади́л мя есть в те́мных, я́ко ме́ртвыя ве́ка. И уны́ во мне дух мой, во мне смяте́ся се́рдце мое́. Помяну́х дни дре́вния, поучи́хся во всех де́лех Твои́х, в творе́ниих руку́ Твое́ю поуча́хся. Возде́х к Тебе́ ру́це мои́, душа́ моя́, я́ко земля́ безво́дная Тебе́. Ско́ро услы́ши мя, Го́споди, исчезе́ дух мой, не отврати́ лица́ Твоего́ от Мене́, и уподо́блюся низходя́щым в ров. Слы́шану сотвори́ мне зау́тра ми́лость Твою́, я́ко на Тя упова́х. Скажи́ мне, Го́споди, путь во́ньже пойду́, я́ко к Тебе́ взях ду́шу мою́. Изми́ мя от враг мои́х, Го́споди, к Тебе́ прибего́х. Научи́ мя твори́ти во́лю Твою́, я́ко Ты еси́ Бог мой. Дух Твой Благи́й наста́вит мя на зе́млю пра́ву. И́мене Твоего́ ра́ди, Го́споди, живи́ши мя, пра́вдою Твое́ю изведе́ши от печа́ли ду́шу мою́. И ми́лостию Твое́ю потреби́ши враги́ моя́ и погуби́ши вся стужа́ющыя души́ мое́й, я́ко аз раб Твой есмь.

Услы́ши мя, Го́споди, в пра́вде Твое́й и не вни́ди в суд с рабо́м Твои́м.

Услы́ши мя, Го́споди, в пра́вде Твое́й и не вни́ди в суд с рабо́м Твои́м.

Дух Твой Благи́й наста́вит мя на зе́млю пра́ву.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Тропа́рь глас 4:

Небе́сных во́инств Архистрати́зи, / мо́лим вас при́сно мы, недосто́йнии, / да ва́шими моли́твами оградите́ нас / кро́вом крил невеще́ственныя ва́шея сла́вы, / сохраня́юще ны, припа́дающия приле́жно и вопию́щия: / от бед изба́вите ны, / я́ко чинонача́льницы Вы́шних сил. (Дважды)

Сла́ва Отцу́ и Сы́ну и Свято́му Ду́ху. И ны́не и при́сно и во ве́ки веко́в. Ами́нь.

Глас 4: Е́же от ве́ка утае́ное / и А́нгелом несве́домое та́инство, / Тобо́ю, Богоро́дице, су́щим на земли́ яви́ся Бог, / в несли́тном соедине́нии воплоща́емь, / и Крест во́лею нас ра́ди восприи́м, / и́мже воскреси́в первозда́ннаго, / спасе́ от сме́рти ду́ши на́ша.

Здесь читается кафизма, положенная по дню, или сразу седальны:

Го́споди, поми́луй. (Три́жды)

Седален, глас 1:

Престо́лу стра́шному предстоя́ще при́сно / и све́тлыми заря́ми трисо́лнечнаго Божества́ осия́еми, / просвети́те ны, грехо́вный мрак отгоня́юще, / ваш собо́р пра́зднующия све́тло, / и приле́жно моли́те изба́витися нам от бед, пресве́тлии моли́твенницы.

Лик А́нгельский, Архистрати́га име́я, Боже́ственнаго Михаи́ла, / с ним Святе́й Тро́ице приноша́ет пе́ние, / от не су́щих бо Соде́тель вся́ческих во́инства огнезра́чных чино́в сло́вом приведе́.

Сла́ва Отцу́ и Сы́ну и Свято́му Ду́ху. И ны́не и при́сно и во ве́ки веко́в. Ами́нь.

Упова́ние христиа́н, Пресвята́я Де́во, / Его́же родила́ еси́, Бо́га, па́че ума́ и сло́ва, / непреста́нно моли́ с Го́рними си́лами пода́ти оставле́ние грехо́в на́ших всех / и исправле́ние жития́ ве́рою и любо́вию при́сно сла́вящим Тя.

Полиеле́й:

Хвали́те И́мя Госпо́дне, хвали́те, раби́ Го́спода.

Аллилу́иа, аллилу́иа, аллилу́иа.

Благослове́н Госпо́дь от Сио́на, живы́й во Иерусали́ме.

Аллилу́иа, аллилу́иа, аллилу́иа.

Испове́дайтеся Го́сподеви, я́ко Благ, я́ко в век ми́лость Его́.

Аллилу́иа, аллилу́иа, аллилу́иа.

Испове́дайтеся Бо́гу Небе́сному, я́ко в век ми́лость Его́.

Аллилу́иа, аллилу́иа, аллилу́иа.

Велича́ние:

Велича́ем вас, / Арха́нгели, и А́нгели, и вся Во́инства, / Херуви́ми и Серафи́ми, / сла́вящии Го́спода.

Псало́м избра́нный:

Испове́мся Тебе́, Го́споди, всем се́рдцем мои́м. И пред А́нгелы воспою́ Тебе́. Творя́й А́нгелы Своя́ ду́хи и слуги́ Своя́ пла́мень о́гненный. Благослови́те Го́спода вси А́нгели Его́. Благослови́те Го́спода вся си́лы Его́. Поклони́теся Ему́ вси А́нгели Его́. Седя́й на Херуви́мех, яви́ся. Ополчи́тся А́нгел Госпо́день о́крест боя́щихся Его́. Сло́вом Госпо́дним небеса́ утверди́шася. И ду́хом уст Его́ вся си́ла их. И се́де на Херуви́мы, и лете́. Сла́вою и че́стью венча́л еси́ его́. Хвали́те Го́спода с небе́с, хвали́те Его́ в вы́шних. Хвали́те Его́, вси А́нгели Его́. Хвали́те Его́, вся Си́лы Его́. Вся́кое дыха́ние да хва́лит Го́спода.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа,// сла́ва Тебе́, Бо́же. (Трижды)

Велича́ем вас, / Арха́нгели, и А́нгели, и вся Во́инства, / Херуви́ми и Серафи́ми, / сла́вящии Го́спода.

Седа́льны:

Глас 8:

Небе́сных чино́в наста́вник, / служи́тель же сла́вы Боже́ственныя досто́йно быв повеле́нием Зижди́теля твоего́, / христиа́ном еси́ хода́тай спасе́нный, / невеще́ственною твое́ю сла́вою земны́я назира́я. / Те́мже по до́лгу восхваля́ем тя вси, / Боже́ственное твое́ днесь воспева́юще торжество́, Михаи́ле Архистрати́же, / моли́ Христа́ Бо́га грехо́в оставле́ние дарова́ти / пра́зднующим любо́вию свято́е твое́ торжество́.

Глас 4: Сла́ва Отцу́ и Сы́ну и Свято́му Ду́ху

А́нгельстии чи́ни со стра́хом предстоя́т Престо́лу Твоему́, Влады́ко Христе́ Бо́же, / и и́же отту́ду заря́ми при́сно просвеща́еми, песнь Ти немо́лчно побе́дную воспева́ют, / и́хже свяще́нными моли́твами мир ми́ру да́руй / и душа́м на́шим ве́лию ми́лость.

Глас 4: И ны́не и при́сно и во ве́ки веко́в. Ами́нь.

Чи́стая, и Всенепоро́чная, и Неискусому́жная Де́во Ма́ти, / Я́же еди́на безле́тнаго Сы́на и Сло́ва Бо́жия в ле́то поро́ждши, / Сего́ со Безпло́тными честны́ми Небе́сными си́лами моли́ / дарова́ти нам очище́ние грехо́в и ве́лию ми́лость.

Степе́нна, глас 4:

От ю́ности моея́/ мно́зи бо́рют мя стра́сти,/ но Сам мя заступи́// и спаси́, Спа́се мой.

Ненави́дящии Сио́на,/ посрами́теся от Го́спода,/ я́ко трава́ бо огне́м// бу́дете изсо́хше.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Святы́м Ду́хом/ вся́ка душа́ живи́тся,/ и чистото́ю возвыша́ется,// светле́ется Тро́йческим еди́нством, священнота́йне.

Го́споди, поми́луй. (Три́жды)

От Матфея Свята́го Ева́нгелия чте́ние

Сла́ва, Тебе́, Го́споди, сла́ва Тебе́.

Рече́ Госпо́дь при́тчу сию́: уподо́бися Ца́рствие Небе́сное челове́ку, се́явшу до́брое се́мя на селе́ свое́м. Спя́щим же челове́ком, прии́де враг его́, и все́я пле́велы посреде́ пшени́цы, и оты́де. Егда́ же прозябе́ трава́ и плод сотвори́, тогда́ яви́шася и пле́велие. Прише́дше же раби́ господи́на, ре́ша ему́: го́споди, не до́брое ли се́мя се́ял еси́ на селе́ твое́м? Отку́ду у́бо и́мать пле́велы? Oн же рече́ им: враг челове́к сие́ сотвори́. Раби́ же ре́ша ему́: хо́щеши ли у́бо, да ше́дше исплеве́м я́? Oн же рече́ им: ни, да не когда́ восторга́юще пле́велы, восто́ргнете ку́пно с ни́ми пшени́цу. Оста́вите расти́ oбое́ ку́пно до жа́твы, и во вре́мя жа́твы реку́ жа́телем: собери́те пе́рвее пле́велы и свяжи́те их в снопы́, я́ко сожещи́ я́, а пшени́цу собери́те в жи́тницу мою́. И приступи́ша к Нему́ ученицы́ Его́, глаго́люще: скажи́ нам при́тчу пле́вел се́льных. Oн же отвеща́в, рече́ им: се́явый до́брое се́мя есть Сын Челове́ческий, а село́ есть мир. До́брое же се́мя, си́и суть сы́нове Ца́рствия, а пле́велие суть сы́нове неприя́зненнии, а враг все́явый их есть диа́вол, а жа́тва – кончи́на ве́ка есть, а жа́тели – А́нгели суть. Я́коже у́бо собира́ют пле́велы и oгне́м сожига́ют, та́ко бу́дет в сконча́ние ве́ка сего́. По́слет Сын Челове́ческий А́нгелы Своя́, и соберу́т от Ца́рствия Его́ вся собла́зны и творя́щия беззако́ние, и вве́ргут их в пещь óгненну. Ту бу́дет плач и скре́жет зубо́м. Тогда́ пра́ведницы просветя́тся, я́ко со́лнце, в Ца́рствии Oтца́ их. Име́яй у́ши слы́шати да слы́шит.

Сла́ва, Тебе́, Го́споди, сла́ва Тебе́.

Псало́м 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя. Я́ко беззако́ние мое́ аз зна́ю и грех мой предо мно́ю есть вы́ну. Тебе́ Еди́ному согреши́х, и лука́вое пред Тобо́ю сотвори́х, я́ко да оправди́шися во словесе́х Твои́х и победи́ши, внегда́ суди́ти Ти. Се бо в беззако́ниих зача́т есмь, и во гресе́х роди́ мя ма́ти моя́. Се бо и́стину возлюби́л еси́, безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся, омы́еши мя, и па́че сне́га убелю́ся. Слу́ху моему́ да́си ра́дость и весе́лие, возра́дуются ко́сти смире́нныя. Отврати́ лице́ Твое́ от грех мои́х, и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́, и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́, и Ду́хом Влады́чним утверди́ мя. Научу́ беззако́нныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́, возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо, всесожже́ния не благоволи́ши. Же́ртва Бо́гу дух сокруше́н, се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския, тогда́ благоволи́ши же́ртву пра́вды, возноше́ние и всесожега́емая: тогда́ возложа́т на олта́рь Твой тельцы́.

Глас 6:

Сла́ва Отцу́ и Сы́ну и Свято́му Ду́ху./ Моли́твами Арха́нгелов, / Ми́лостиве, очи́сти / мно́жества согреше́ний на́ших.

И ны́не и при́сно и во ве́ки веко́в. Ами́нь./ Моли́твами Богоро́дицы, / Ми́лостиве, очи́сти / мно́жества согреше́ний на́ших.

Поми́луй мя, Бо́же,/ по вели́цей ми́лости Твое́й,/ и по мно́жеству щедро́т Твои́х// очи́сти беззако́ние мое́.

Стихи́ра, глас 6

А́нгели Твои́, Христе́, / Престо́лу вели́чества во стра́се предстоя́ще / и Твои́м светоли́тием при́сно осиява́еми, / в вы́шних песнопе́вцы Твои́ / и сове́та Твоего́ служи́телие, / от Тебе́ низпосыла́еми, / даю́т просвеще́ния душа́м на́шим.

Го́споди, поми́луй. (12 раз)

Кано́н, глас 8:

Пе́снь 1.

Ирмос: Пе́снь возсле́м, лю́дие, чу́дному Бо́гу на́шему, свободи́вшему Изра́иля от рабо́ты, пе́снь побе́дную пою́ще и вопию́ще: пои́м Тебе́, Еди́ному Влады́це.

Вси́ воспои́м, ве́рнии, вся́ управля́ющую невеще́ственныя го́рних лико́в чинонача́лия, Тро́ицу несозда́нную: Свя́т, Свя́т, Свя́т еси́, вопию́ще, Бо́же Вседержи́телю.

Положи́л еси́ тва́рей нача́ло, существо́ безпло́тное, Тво́рче Ангелов, пречи́стый Тво́й престо́л окружа́ющее, зва́ти Тебе́: Свя́т, Свя́т, Свя́т еси́, Бо́же Вседержи́телю.

Ра́дуйся, Гаврии́ле, тайнови́дче Бо́жия воплоще́ния, Михаи́ле же, чино́в невеще́ственных первостоя́телю, непреста́нно зову́ще: Свя́т, Свя́т, Свя́т еси́, Бо́же Вседержи́телю.

Богородичен: Трепе́щу та́инства, Христе́, Твоего́ снизхожде́ния, я́ко, Иже естество́м Бо́г, прия́л еси́ от Де́вы роди́тися я́ко Челове́к, да спасе́ши ми́р от рабо́ты проти́внаго.

Умныя безпло́тных чино́в ли́ки пе́сньми, я́ко служи́тели Боже́ственныя, прииди́те, восхва́лим, ли́к совоку́пльше, о на́шем спасе́нии непреста́нно моля́щияся и о покая́нии на́шем сра́дующияся.

Иже Ангелов началовожди́, и предъизбра́ннии, и чинонача́льницы све́тлии, безпло́тныя умы́ дне́сь воздви́жут к наверше́нию пра́здника све́тлыя и́х па́мяти, с ни́миже ку́пно ра́дуются челове́цы, пе́ние Тро́ице принося́ще.

Да возвесели́мся со Ангелы дне́сь, челове́цы, духо́вне в ра́дости: Гаврии́л бо па́ки ны́не благовеству́ет Це́рквей соедине́ние и низложе́ние вся́кия проти́вныя е́реси в па́мяти архистрати́гов.

Богородичен: Ражда́еши су́щее па́че естества́, Пречи́стая, в Тебе́ все́льшееся Отчее Сло́во Ду́хом Святы́м, во дву́ у́бо естества́х и хоте́ниих су́ща, во Ипоста́си же непрело́жно еди́ней, Ея́же и зра́к целу́ем.

Пе́снь 3.

Ирмос: Стра́х Тво́й, Го́споди, всади́ в сердца́ ра́б Твои́х, и бу́ди на́м утвержде́ние, Тя́ во и́стине призыва́ющим.

Кре́постию поста́вил еси́, Безсме́ртне, си́льныя, соверша́ющия всесвяту́ю Твою́ во́лю, Тебе́ в вы́шних всегда́ предстоя́щия.

Таи́нники Твоего́ вочелове́чения и честна́го воста́ния, Ангельския чинонача́льники, Христе́, за ны́ приими́ моля́щияся.

Ангелы приста́вил еси́ храни́тели челове́ком, я́ко Благоутро́бен, служи́тели же показа́л еси́, Христе́, спасе́ния Твои́х уго́дников.

Богородичен: Неизрече́нно зачала́ еси́ Го́спода и Спа́са, Богоневе́сто, избавля́ющаго ны́ от лю́тых, Тя́ вои́стинне призыва́ющия.

Ангелов пе́рвейший и Тро́ицы све́т вторы́й яви́лся еси́ на́м, Михаи́ле нача́льниче, ве́рно благохва́лящим тя́.

Заре́ю Боже́ственныя благода́ти Гаврии́л ве́рно испо́лни всю́ зе́млю, Бо́жие пропове́дав во пло́ти прише́ствие.

Сопру́г приснопева́емый и светоза́рная дво́ице невеще́ственная, све́ты Бо́жия, ве́рно соверша́ющия ва́шу па́мять покажи́те.

Богородичен: Воспе́ Иса́ия Твое́, е́же па́че ума́, Чи́стая, рождество́, пою́ и а́з, да о́наго получу́ очище́ния.

Седа́лен, гла́с 8.

Небе́сных нача́льницы и первостоя́телие высокопресто́льных и стра́шных, Боже́ственныя сла́вы, Михаи́ле и Гаврии́ле архистрати́зи, Ангелов чинонача́льницы, со все́ми безпло́тными, о служи́телие Влады́чни! О ми́ре непреста́нно моля́щеся, испроси́те оставле́ние прегреше́нных на́ми, и ми́лость, и благода́ть обрести́ в де́нь су́дный.

Сла́ва, и ны́не, Богородичен:

Богоблагода́тная, Чи́стая, Благослове́нная, благоутро́бия ра́ди щедро́т из Тебе́ Ро́ждшагося, с вы́шними си́лами, и арха́нгелы, и все́ми безпло́тными моли́ непреста́нно пода́ти на́м пре́жде конца́ ми́лостивно проще́ние грехо́в и жития́ исправле́ние, я́ко да обря́щем ми́лость.

Пе́снь 4.

Ирмос: Все́л еси́ на ко́ни, апо́столы Твоя́, Го́споди, и прия́л еси́ рука́ма Твои́ма узды́ и́х, и спасе́ние бы́сть ежде́ние Твое́ ве́рно пою́щим: сла́ва си́ле Твое́й, Го́споди.

Все́л еси́ на Ангелы, я́коже на ко́ни, Человеколю́бче, и прия́л еси́ руко́ю Твое́ю брозды́ и́х, и спасе́ние бы́сть ежде́ние Твое́ непреста́нно вопию́щим: сла́ва си́ле Твое́й, Го́споди.

Покрыва́ет Ангелы доброде́тель Твоя́, Человеколю́бче, и земли́ исполня́ет концы́ Твоего́ сла́внаго, Безнача́льне, Боже́ственнаго хвале́ния, с ни́ми Тебе́ вопию́щи: сла́ва си́ле Твое́й, Го́споди.

Изше́л еси́, Ще́дре, на спасе́ние люде́й Твои́х, Христе́, созыва́еши же дру́ги — си́лы Твоя́, и весе́лие бы́сть прише́ствие Твое́ ве́рно Тебе́ вопию́щим: сла́ва си́ле Твое́й, Го́споди.

Богородичен: Де́ва и Ма́ти преесте́ственно яви́лася еси́, Всечи́стая, я́ко Бо́га, Того́жде и Челове́ка Христа́, ро́ждшая. Ему́же со стра́хом вопию́т Ангельския чи́ни: сла́ва си́ле Твое́й, Го́споди.

Во Иерихо́не яви́ся си́лы Госпо́дни Архистрати́г вою́ющему дре́вле Иису́су Нави́ну, победотворя́ и побо́рствуя, Михаи́л вели́кий, безпло́тных нача́льник сы́й, от него́же прие́м си́лу, слуга́ Госпо́день, копие́м плени́в, я́т сопоста́ты.

Нача́льник не́когда безпло́тных си́л яви́ся, нося́ ча́да благове́щения, Заха́рии иере́ю Гаврии́л вели́кий и боже́ственный и́стинно арха́нгел, те́мже гла́с Словесе́ роди́выйся Иоа́нн, отцу́ своему́ гла́с проглаго́лания отдае́т.

Ра́дуются ра́достию вси́ концы́ земни́и дне́сь, честну́ю па́мять пра́зднующе арха́нгелов Твои́х, Бо́же, Михаи́ла боже́ственнаго и Гаврии́ла богому́драго; сра́дуется же ку́пно и ве́сь Ангельский чи́н, я́ко сохраня́ется ми́р покро́вом и́х.

Богородичен: Еди́на Чи́стая пребыла́ еси́ и по рождестве́, еди́на то́кмо яви́лася еси́ Безму́жная, млеко́м пита́ющая Сло́во Отчее и́стинное, Ду́хом Святы́м прие́мшее ра́бий зра́к по на́м, Де́во Богоро́дице, Его́же, Боже́ственное чту́ще зра́ка подо́бие, почита́ем.

Пе́снь 5

Ирмос: От но́щи неве́дения по душелови́тельному пути́ при́сно блудя́щаго, све́том ра́зума Твоего́, Го́споди, преднаставля́я мя́, на стезю́ за́поведей Твои́х напра́ви.

Невозвра́тным жела́нием при́сно к высоте́, к Тебе́, Христе́, носи́ми, кра́йнейшему все́х жела́ний, Ангельския си́лы непреста́нно Тя́ сла́вят.

Ты́ у́мныя по существу́, нетле́нныя благода́тию Твое́ю, Христе́, устро́ил еси́ песнопе́вцы Твоего́ вели́чества, Ангелы Твоя́ по о́бразу соде́лав, Непостижи́ме.

Ты́ непрекло́нны на го́ршее к Тебе́ приближе́нием, Христе́, сохрани́л еси́ Твоя́ слуги́, исто́чник бо бла́гости Ты́ еси́, благотвори́ши досто́йно Тебе́ служа́щия.

Богородичен: Умерщвле́нную мою́ ду́шу страстьми́ ме́рзкими, Всенепоро́чная, оживи́, жи́зни Храни́теля ро́ждшая, и к стези́ ве́чней, и блаже́нней жи́зни упра́ви.

Непокаря́ющуся дре́вле Бо́жиим неизрече́нным и Боже́ственным чудесе́м Валаа́му волхву́, на распу́тии Ангел, ослу́ яви́вся, стра́шно обличи́ и, слове́сно живо́тное показа́в, естества́ премени́ позна́ние.

Яту бы́вшу Петру́ и в темни́це пребыва́ющу, Ангел яви́ся Бо́жий, от ру́к Иродовых, и у́з, и сме́рти избавля́я. Те́мже, прииди́те вси́, я́ко ду́ш храни́тели Боже́ственныя, му́дрыя арха́нгелы да почти́м.

Бра́ней крамолы́, Ангели, арха́нгели, боже́ственныя си́лы Бо́жия, и церко́вныя е́реси, и вся́ собла́зны ва́шими разреши́те к Бо́гу при́сными мольба́ми и на́с в ми́ре соблюди́те.

Богородичен: Во дву́ существа́х Еди́наго Тя́ ве́мы, Бо́га тва́ри, де́йствы обе́ма и хоте́нии су́ща несли́тна, Сы́на Бо́жия, от жены́ пло́ть прии́мша, Ея́же о́браз почита́ем на дщи́цах.

Пе́снь 6.

Ирмос: Ио́ну в ки́те, Го́споди, еди́наго всели́л еси́, мене́ же, свя́заннаго мре́жами вра́жиими, я́ко от тли́ о́наго, спаси́.

Благоле́пне от не су́щих, Го́споди, сло́вом Твои́м приве́л еси́ существа́ небе́сных безсме́ртных во́инств, светови́дны ты́я соде́ловая.

Таи́нницы честни́и Бо́жия хвале́ния бы́сте, безпло́тнии, гра́ждане небе́сныя и Боже́ственныя и́стинно ски́нии, Творцу́ досто́йно служа́ще.

Безпло́тных чи́ни у́мнии Тя́, Сы́не Бо́жий пребезнача́льный, хва́лят непреста́нно и славосло́вят, я́ко Творца́ и Созда́теля вся́ческих.

Богородичен: Со Отце́м в вы́шних, Пречи́стая, безнача́льне седя́щаго, на объя́тиих Твои́х восклони́ти сподо́билася еси́: Его́же на́м пода́ждь, Чи́стая, рабо́м Твои́м, Ми́лостива.

Яко о́гнь, и пла́мень, и све́т, безпло́тныя су́щия, от веще́ственныя тли́ умо́м восперя́еми, бре́нными устна́ми невеще́ственныя со стра́хом пе́сньми да почти́м.

Умертви́те страсте́й бу́ри, арха́нгели, и утиши́те с ни́ми возмуще́ния вся́ на ве́ру, святи́и Тро́ицы су́ще огнезра́чнии архистрати́зи.

Арха́нгели Бо́жии, безпло́тных нача́льницы, предста́тельством ва́шим от вся́кия е́реси на́с сохрани́те, Михаи́ле нача́льниче и Гаврии́ле, архистрати́зи.

Богородичен: Из утро́бы яви́лся еси́ во́лею, от Неискусому́жныя воплоща́емь, безпло́тен сы́й, я́ко Бо́г, Христе́, плотоно́сец же, я́ко Челове́к, бы́л еси́. Его́же подо́бия, ве́рнии, ви́д почита́ем.

Конда́к, гла́с 2:

Архистрати́зи Бо́жии, служи́телие Боже́ственныя сла́вы, Ангелов нача́льницы и челове́ков наста́вницы, поле́зное на́м проси́те, и ве́лию ми́лость, я́ко безпло́тных архистрати́зи.

Икос:

Ре́кл еси́, Человеколю́бче, в Писа́ниих Твои́х: мно́жеству ра́доватися Ангелов на небеси́ о челове́це еди́ном ка́ющемся, Безсме́ртне. Те́мже мы́, и́же в беззако́ниих, Безгре́шне еди́не Сердцеве́дче, Тя́ моли́ти всегда́ дерза́ем, я́ко Благоутро́бнаго, уще́дрити и низпосла́ти недосто́йным умиле́ние, Влады́ко, подая́й на́м проще́ние, о все́х бо на́с мо́лятся Тебе́ безпло́тных архистрати́зи.

Пе́снь 7.

Ирмос: Отроцы евре́йстии в пещи́ попра́ша пла́мень дерзнове́нно и на ро́су о́гнь преложи́ша, вопию́ще: благослове́н еси́, Го́споди Бо́же, во ве́ки.

Све́ты яви́л еси́, Ще́дре, Ангелов Твои́х невеще́ственное существо́, неизрече́ннаго све́та исполня́еми непреста́нно, — благослове́н еси́, — зову́щия, — Бо́же, во ве́ки.

Ему́же предстоя́т непреста́нно, служа́ще, тмы́ Ангелов, Лица́ же зре́ти не терпя́т зре́ния, — благослове́н еси́, — зову́ще, — Го́споди Бо́же, во ве́ки.

Сло́вом Твои́м Ипоста́сным Ангельское естество́ соде́лал еси́, освяти́в же Боже́ственным Ду́хом, Тро́ицу богосло́вити научи́л еси́, Бо́же, во ве́ки.

Тро́ичен: Три́ у́бо, у́мствующе, Ипоста́си, неопи́санное сла́вим Существо́, Отца́, Сло́ва со Ду́хом, вопию́ще: благослове́н еси́, Го́споди Бо́же, во ве́ки.

С ли́ки безпло́тных и челове́ческий ро́д, прииди́те, поклони́мся в благознамени́тый де́нь се́й, па́мять соверша́юще му́дрых арха́нгелов Христо́вых, — Свя́т, Свя́т, Свя́т, — пою́ще, — Бо́же оте́ц на́ших.

Яко страннолюби́вии дре́вле, Авраа́м богови́дец и Ло́т сла́вный, учреди́ша Ангелы и обрето́ша обще́ние со Ангелы, зову́ще: Свя́т, Свя́т, Свя́т еси́, Бо́же оте́ц на́ших.

Мано́ю до́блественному и Тови́ту прему́дрому яви́шася Ангели, воздаю́ще натрижне́ния жития́ по досто́инству; и отроко́в Ангел угаси́ пла́мень иногда́, в пещи́ о́гненней су́щих.

Богородичен: Все́ на́ше по существу́ от Де́вы поне́сл еси́, кроме́ измене́ния, Иису́се, естествы́ сугу́ба, но еди́наго Ипоста́сию, оте́чески Тя́ пропове́дуем, Его́же и ви́д ве́рно почита́ем, изобразу́юще.

Пе́снь 8.

Ирмос: На горе́ святе́й просла́вльшася, и в купине́ огне́м Присноде́вы Моисе́ови та́йну я́вльшаго, Го́спода по́йте и превозноси́те во вся́ ве́ки.

Ангельскому поревну́им житию́, и мы́сли впери́м к высоте́, и с ни́ми невеще́ственно воспои́м Го́спода, пою́ще и превознося́ще во вся́ ве́ки.

Лико́вственницы ликова́ния небе́снии, престо́л обстоя́ще сла́вы, о́крест Бо́га же всегда́ обраща́ющеся, Ангели пою́т и превозно́сят Его́ во вся́ ве́ки.

Невеще́ственнаго огня́ творя́щей пла́мень, на высоте́ непреста́нно служа́щия, и Ангелы ду́хи явля́ющей, Тро́ице покланя́емся и славосло́вим во вся́ ве́ки.

Богородичен: Ему́же на небеси́ предстоя́т с тре́петом тмы́ Ангел и арха́нгел, Того́ на объя́тиих носи́ти сподо́билася еси́, Богоро́дице, моли́ спасти́ся славосло́вящим Его́ во вся́ ве́ки.

Нача́льник Ангелов бы́сть Михаи́л арха́нгел, но сла́вится с ни́м светле́е таи́нник благода́ти и Де́вы обручи́тель честны́й, воево́да безпло́тных, досто́йно ра́дость предвозвеща́я, Гаврии́л, вопию́щим: лю́дие, превозноси́те Христа́ во вся́ ве́ки.

Ангельския чи́ны в разли́чном зра́це уви́дев, Иезеки́иль, предсказу́я, пропове́даше: в ни́хже шестокри́льнии серафи́ми предстоя́ху, и херуви́ми многоочи́тии окружа́ху, с ни́миже арха́нгелы пресве́тлыя зря́ще, Христа́ славосло́вящия во вся́ ве́ки.

Яко стра́шно прише́ствие втора́го седа́лища Твоего́ явленнотворя́, Дании́л предглаго́лаше: я́ко престо́ли поста́вишася, и Ве́тхий седя́ше, и тмы́ Ангелов ввожда́ше, со стра́хом предстоя́щия и гла́сы немо́лчными вопию́щия Тро́ице во вся́ ве́ки.

Богородичен: Отцу́ и Ду́ху Единосу́щное Сло́во, во́лею яви́ся, и на́м, из Де́вы, сообра́зен, не смеси́в в дру́г дру́га, я́же стра́шнаго соедине́ния: Еди́н бо и То́йжде во обои́х показу́ется, во дву́ существа́х и еди́ной Ипоста́си. Его́же ны́не подо́бия о́бразу покланя́емся.

На 9-й песни поем песнь Пресвятыя Богородицы:

Вели́чит душа́ Моя́ Го́спода и возра́довася дух Мой о Бо́зе Спа́се Мое́м.

К коемуждо стиху припеваем: Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Я́ко призре́ на смире́ние рабы́ Своея́, се бо, от ны́не ублажа́т Мя вси ро́ди.

Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Я́ко сотвори́ Мне вели́чие Си́льный, и свя́то и́мя Его́, и ми́лость Его́ в ро́ды родо́в боя́щимся Его́.

Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Сотвори́ держа́ву мы́шцею Свое́ю, расточи́ го́рдыя мы́слию се́рдца их.

Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Низложи́ си́льныя со престо́л, и вознесе́ смире́нныя, а́лчущия испо́лни благ, и богатя́щияся отпусти́ тщи.

Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Восприя́т Изра́иля о́трока Своего́, помяну́ти ми́лости, я́коже глаго́ла ко отце́м на́шим, Авраа́му и се́мени его́ да́же до ве́ка.

Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Пе́снь 9.

Ирмос: Уста́вы прешла́ еси́ естества́, Соде́теля заче́нши и Го́спода, и две́рь спасе́ния ми́рови была́ еси́, те́м Тя́, Богоро́дице, непреста́нно велича́ем.

Тя́, неизрече́нно соедини́вшаго небе́сным, Христе́, земна́я и еди́ну Це́рковь соверши́вша Ангелов и челове́ков, непреста́нно велича́ем.

Ангели же и арха́нгели, престо́ли, вла́сти и госпо́дства, нача́ла же и си́лы, херуви́ми и серафи́ми, с Богоро́дицею о ми́ре моли́теся.

Все́х предста́телие показу́ющиися, Михаи́л с Гаврии́лом, посети́те от любве́ чту́щия всепра́зднственную па́мять ва́шу и ве́рно воспева́ющия: спаса́йте от вся́каго обстоя́ния.

Богородичен: Ра́дуйся, свята́я Богоневе́сто! Ра́дуйся, Све́т ми́ру ро́ждшая ве́рным! Ра́дуйся, стено́ и покро́ве все́х на́с: Бо́га, я́ко Благоде́теля, за ны́ непреста́нно моли́.

Неду́гующих, и пла́вающих, и су́щих в ну́ждах ко спасе́нию побо́рницы яви́стеся, безпло́тных пе́рвии, Михаи́ле и Гаврии́ле.

Си́л и престо́лов Боже́ственных слико́вственник, я́ко воево́да Ангельский и таи́нник Бо́жий, о на́с Спа́су, Гаврии́ле, моли́ся.

Яко храни́телие ми́ра и Це́ркве и чинонача́льницы вы́шних си́л, о на́с Спа́са умоли́те.

Богородичен: Согла́сно, Богоро́дице, Тя́ славосло́вим, я́ко от страсте́й и бе́д спаса́еши ны́ и на́ша моле́ния во благи́х исполня́еши.

Свети́лен.

Огненных, Архистрати́же, слу́г предста́тельство от Отца́ прия́л еси́, Михаи́ле, све́тов, те́м и сия́ние Того́ сла́вы сия́ющее и́маши, окру́г пречи́стаго престо́ла ты́ предстоя́, я́ко пе́рвый невеще́ственных чино́в.

Сла́ва.

Невеще́ственных си́л, арха́нгел и Ангел, госпо́дьств, и престо́л, и нача́л предста́тель пред Бо́гом постоя́нный, Архистрати́же боже́ственне, Михаи́ле пресла́вне, нестерпи́мому бо престо́лу предстоя́й, покры́й, соблюди́, сохрани́ и спаси́ вся́, ве́рою тя́ почита́ющия, мирска́го предста́теля.

И ны́не, Богородичен:

Честне́йшая еси́ херуви́м сла́вных и серафи́м, Всепе́тая, стра́шных без сравне́ния сла́внейшая и все́х святы́х Ангел святе́йшая, Пречи́стая: Зижди́теля бо все́х пло́тски неизрече́нно родила́ еси́, Богоро́дице. Его́же моли́ рабо́м Твои́м разреше́ние дарова́ти прегреше́ний.

Хвали́тны псалмы́, глас 1:

Вся́кое дыха́ние да хва́лит Го́спода./ Хвали́те Го́спода с небе́с,/ хвали́те Его́ в вы́шних.// Тебе́ подоба́ет песнь Бо́гу.

Хвали́те Его́ вси а́нгели Его́,/ хвали́те Его́ вся си́лы Его́.// Тебе́ подоба́ет песнь Бо́гу.

Стихи́ры гла́с 1.

Стих: Сотвори́ти в них суд напи́сан. / Сла́ва сия́ бу́дет всем преподо́бным Его́.

Небе́сных чино́в я́ко преднача́льника / и су́щих на земли́ челове́ков кре́пкаго тя предста́теля, / храни́теля же и изба́вителя / воспева́ем ве́рно, Михаи́ле Архистрати́же, / моля́щеся вся́кия тлетво́рныя боле́зни нас изба́вити.

Стих: Хвали́те Бо́га во святы́х Его́, / хвали́те Его́ во утверже́нии си́лы Его́.

Чинонача́льник сый го́рних Боже́ственных сил / днесь созыва́ет челове́ческия ли́ки / еди́н со А́нгелы све́тлый пра́здник соста́вити / собо́ра их Боже́ственнаго / и ку́пно песнь Бо́гу воспе́ти трисвяту́ю.

Стих: Хвали́те Его́ на си́лах Его́, / хвали́те Его́ по мно́жеству вели́чествия Его́.

Под кров Боже́ственных ны крил твои́х прибега́ющия ве́рою, / Михаи́ле, Боже́ственный у́ме, / соблюда́й и покрыва́й чрез все житие́. / И в час, Арха́нгеле, сме́ртный, стра́шный / ты предста́ни помо́щник всем нам благоприе́мнейший.

Стих: Хвали́те Его́ во гла́се тру́бнем, / хвали́те Его́ во псалти́ри и гу́слех.

Глас 4.: Трисо́лнечныя лучи́, / Боже́ственным Све́том осиява́еми, Архистрати́зи, / невеще́ственных озаря́ете чинонача́лия, / я́коже свет, белообра́зне показу́ющеся в вы́шних, / огнь облиста́ете в ми́ре непристу́пнаго Божества́. / Тем и трисвяту́ю песнь пла́менными устна́ми непреста́нно пое́те: / Свят, Свят, Свят еси́, Бо́же наш, сла́ва Тебе́.

Сла́ва, гла́с 5.

Иде́же осеня́ет благода́ть твоя́, Арха́нгеле, / отту́ду диа́воля прого́нится си́ла, / не терпи́т бо све́та твоего́ ви́дети спады́й денни́ца. / Тем мо́лим тя, / огнено́сныя его́ стре́лы, я́же на ны дви́жимыя, / угаси́ хода́тайством твои́м, / избавля́я нас от собла́знов его́, / достохва́льный Михаи́ле Архистрати́же.

И ны́не, богоро́дичен, гла́с то́йже:

Блажи́м Тя, Богоро́дице Де́во, / и сла́вим Тя, ве́рнии, по до́лгу, / град непоколеби́мый, сте́ну необори́мую, / тве́рдую предста́тельницу / и прибе́жище душ на́ших.

Славосло́вие вели́кое:

Сла́ва в вы́шних Бо́гу, и на земли́ мир, в челове́цех благоволе́ние. Хва́лим Тя, благослови́м Тя, кла́няем Ти ся, славосло́вим Тя, благодари́м Тя, вели́кия ра́ди сла́вы Твоея́. Го́споди Царю́ Небе́сный, Бо́же О́тче Вседержи́телю, Го́споди, Сы́не Единоро́дный, Иису́се Христе́, и Святы́й Ду́ше. Го́споди Бо́же, А́гнче Бо́жий, Сы́не Оте́чь, взе́мляй грех ми́ра, поми́луй нас; взе́мляй грехи́ ми́ра, приими́ моли́тву на́шу; седя́й одесну́ю Отца́, поми́луй нас. Я́ко Ты еси́ еди́н Свят, Ты еси́ еди́н Госпо́дь, Иису́с Христо́с, в сла́ву Бо́га Отца́. Ами́нь.

На всяк день благословлю́ Тя, и восхвалю́ И́мя Твое́ во ве́ки, и в век ве́ка.

Сподо́би, Го́споди, в день сей без греха́ сохрани́тися нам. Благослове́н еси́, Го́споди, Бо́же оте́ц на́ших, и хва́льно и просла́влено И́мя Твое́ во ве́ки. Ами́нь.

Бу́ди, Го́споди, ми́лость Твоя́ на нас, я́коже упова́хом на Тя.

Благослове́н еси́, Го́споди, научи́ мя оправда́нием Твои́м. (Три́жды)

Го́споди, прибе́жище был еси́ нам в род и род. Аз рех: Го́споди, поми́луй мя, исцели́ ду́шу мою́, я́ко согреши́х Тебе́. Го́споди, к Тебе́ прибего́х, научи́ мя твори́ти во́лю Твою́, я́ко Ты еси́ Бог мой: я́ко у Тебе́ исто́чник живота́, во све́те Твое́м у́зрим свет. Проба́ви ми́лость Твою́ ве́дущим Тя.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Три́жды)

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Святы́й Безсме́ртный, поми́луй нас.

Святы́й Бо́же, Святы́й Кре́пкий, Святы́й Безсме́ртный, поми́луй нас.

Тропа́рь, глас 4:

Небе́сных во́инств Архистрати́зи, / мо́лим вас при́сно мы, недосто́йнии, / да ва́шими моли́твами оградите́ нас / кро́вом крил невеще́ственныя ва́шея сла́вы, / сохраня́юще ны, припа́дающия приле́жно и вопию́щия: / от бед изба́вите ны, / я́ко чинонача́льницы Вы́шних сил.

Честне́йшую Херуви́м и Сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу, Тя велича́ем.

Сла́ва, и ны́не. Го́споди, поми́луй. (Три́жды) Благослови́.

Господи Иисусе Христе, Сыне Божий, моли́твами Пречи́стыя Своея́ Ма́тере, святого Архистратига Божия Михаила и прочих небесных сил Безплотных, преподобных и богоносных отец наших и всех святы́х, поми́луй и спаси нас я́ко Благ и Челове́колюбец. Аминь.

Многоле́тие:

Вели́каго Господи́на и Отца́ на́шего Кири́лла,/ Святе́йшаго Патри́арха Моско́вского и всея́ Руси́,/ и Господи́на на́шего (Высоко-) Преосвяще́ннейшаго (имярек),/ (архи-)епи́скопа (митрополита (титул)),/ богохрани́мую страну́ на́шу Росси́йскую,/  и вся правосла́вныя христи́аны,// Го́споди, сохрани́ их на мно́гая ле́та.