Шрифт

▲

Богослужебные тексты для домашнего употребления

Службы иконам Пресвятой Богородицы

Последование Всеношного бдения в день памяти иконы Божией Матери Зографская-Предвозвестительница. Для домашнего (келейного) совершения

Оглавление

ВСЕНО́ЩНОЕ БДЕ́НИЕ

ВЕЛИ́КАЯ ВЕЧЕ́РНЯ

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас. Ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Трижды.)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, (трижды). Сла́ва, и ны́не:

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Таже, Го́споди, поми́луй, (12), Сла́ва, и ны́не:

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 103:

Поется часть псалма:

Благослови́, душе́ моя́, Го́спода. / Благослове́н еси́, Го́споди. / Го́споди, Бо́же мой, возвели́чился еси́ зело́. / Благослове́н еси́, Го́споди. / Во испове́дание и в велеле́поту обле́клся еси́. / Благослове́н еси́, Го́споди. / Посреде́ гор про́йдут во́ды. / Ди́вна дела́ Твоя́, Го́споди. / Вся прему́дростию сотвори́л еси́. / Сла́ва Ти, Го́споди, сотвори́вшему вся.

Или читается псалом полностью:

Благослови́, душе́ моя́, Го́спода. Го́споди, Бо́же мой, возвели́чился еси́ зело́. Во испове́дание и в велеле́поту обле́клся еси́. Одея́йся све́том, я́ко ри́зою, простира́яй не́бо, я́ко ко́жу. Покрыва́яй вода́ми превы́спренняя Своя́, полага́яй о́блаки на восхожде́ние Свое́, ходя́й на крилу́ ве́треню. Творя́й А́нгелы Своя́ ду́хи и слуги́ Своя́ пла́мень о́гненный. Основа́яй зе́млю на тве́рди ея́, не преклони́тся в век ве́ка. Бе́здна, я́ко ри́за, одея́ние ея́, на гора́х ста́нут во́ды, от запреще́ния Твоего́ побе́гнут, от гла́са гро́ма Твоего́ убоя́тся. Восхо́дят го́ры и нисхо́дят поля́ в ме́сто, е́же основа́л еси́ им. Преде́л положи́л еси́, eго́же не пре́йдут, ниже́ обратя́тся покры́ти зе́млю. Посыла́яй исто́чники в де́брех, посреде́ гор про́йдут во́ды. Напая́ют вся зве́ри се́льныя, ждут она́гри в жа́жду свою́. На ты́х пти́цы небе́сныя привита́ют, от среды́ ка́мения дадя́т глас. Напая́яй го́ры от превы́спренних Свои́х, от плода́ дел Твои́х насы́тится земля́. Прозяба́яй траву́ ското́м, и злак на слу́жбу челове́ком, извести́ хлеб от земли́. И вино́ весели́т се́рдце челове́ка, ума́стити лице́ еле́ем, и хлеб се́рдце челове́ка укрепи́т. Насы́тятся древа́ польска́я, ке́дри Лива́нстии, и́хже еси́ насади́л. Та́мо пти́цы вогнездя́тся, ероди́ево жили́ще предводи́тельствует и́ми. Го́ры высо́кия еле́нем, ка́мень прибе́жище за́яцем. Сотвори́л есть луну́ во времена́, со́лнце позна́ за́пад свой. Положи́л еси́ тму, и бысть нощь, в не́йже про́йдут вси зве́рие дубра́внии. Ски́мни рыка́ющии, восхи́тити и взыска́ти от Бо́га пи́щу себе́. Возсия́ со́лнце и собра́шася и в ло́жах свои́х ля́гут. Изы́дет челове́к на де́ло свое́ и на де́лание свое́ до ве́чера. Я́ко возвели́чишася дела́ Твоя́, Го́споди, вся прему́дростию сотвори́л еси́, испо́лнися земля́ тва́ри Твоея́. Сие́ мо́ре вели́кое и простра́нное, та́мо га́ди, и́мже несть числа́, живо́тная ма́лая с вели́кими, та́мо корабли́ препла́вают, змий сей, eго́же созда́л еси руга́тися eму́. Вся к Тебе́ ча́ют, да́ти пи́щу им во бла́го вре́мя. Да́вшу Тебе́ им соберу́т, отве́рзшу Тебе́ ру́ку вся́ческая испо́лнятся бла́гости, отвра́щшу же Тебе́ лице́, возмяту́тся, отъи́меши дух их, и исче́знут, и в персть свою́ возвратя́тся. По́слеши Ду́ха Твоего́, и сози́ждутся, и обнови́ши лице́ земли́. Бу́ди сла́ва Госпо́дня во ве́ки, возвесели́тся Госпо́дь о де́лех Свои́х, призира́яй на зе́млю, и творя́й ю́ трясти́ся, прикаса́яйся гора́м, и дымя́тся. Воспою́ Го́сподеви в животе́ мое́м, пою́ Бо́гу моему́, до́ндеже есмь, да услади́тся Ему́ бесе́да моя́, аз же возвеселю́ся о Го́споде. Да исче́знут гре́шницы от земли́, и беззако́нницы, я́коже не бы́ти им. Благослови́, душе́ моя́, Го́спода.

Со́лнце позна́ за́пад свой. Положи́л еси́ тму, и бысть нощь. Я́ко возвели́чишася дела́ Твоя́, Го́споди, вся прему́дростию сотвори́л еси́.

Сла́ва, и ны́не: Аллилу́иа, аллилу́иа, аллилу́иа, сла́ва Тебе́ Бо́же. Трижды.

Блаже́н муж:

Блаже́н муж, и́же не и́де на сове́т нечести́вых.

Аллилу́иа, аллилу́иа, аллилу́иа.

Я́ко весть Госпо́дь путь пра́ведных, и путь нечести́вых поги́бнет.

Аллилу́иа, аллилу́иа, аллилу́иа.

Рабо́тайте Го́сподеви со стра́хом и ра́дуйтеся Ему́ с тре́петом.

Аллилу́иа, аллилу́иа, аллилу́иа.

Блаже́ни вси наде́ющиися Нань.

Аллилу́иа, аллилу́иа, аллилу́иа.

Воскресни́, Го́споди, спаси́ мя, Бо́же мой.

Аллилу́иа, аллилу́иа, аллилу́иа.

Госпо́дне есть спасе́ние, и на лю́дех Твои́х благослове́ние Твое́.

Аллилу́иа, аллилу́иа, аллилу́иа.

Сла́ва Отцу́ и Сы́ну и Свято́му Духу.

Аллилу́иа, аллилу́иа, аллилу́иа.

И ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Го́споди, воззва́х, глас 2:

Го́споди, воззва́х к Тебе́, услы́ши мя./ Услы́ши мя, Го́споди./ Го́споди, воззва́х к Тебе́, услы́ши мя:/ вонми́ гла́су моле́ния моего́,/ внегда́ воззва́ти ми к Тебе́.// Услы́ши мя, Го́споди.

Да испра́вится моли́тва моя́,/ я́ко кади́ло пред Тобо́ю,/ воздея́ние руку́ мое́ю/ – же́ртва вече́рняя.// Услы́ши мя, Го́споди.

Стихи́ры, глас 2:

Стих: Изведи́ из темни́цы ду́шу мою́, / испове́датися И́мене Твоему́.

Дне́сь де́нь ра́достен возсия́ на́м, пресве́тлый пра́здник ико́ны Влады́чицы на́шея Богоро́дицы, в па́мять избавле́ния Ею оби́тели сея́ от внеза́пнаго сожже́ния о́гненнаго, я́же воспомина́юще, благода́рно Ей вопие́м: ра́дуйся, Влады́чице, Помо́щнице на́ша и Изба́вительнице, от бе́д и напа́стей на́с спаса́ющая.

Стих: Мене́ ждут пра́ведницы, / до́ндеже возда́си мне.

Дне́сь Влады́чица чудотво́рным Свои́м о́бразом на́с благода́тно утеша́ет, о́блак печа́лей на́ших разгоня́ет, и вся́ блага́я и поле́зная на́м да́рует, я́ко Ма́ти су́щи блага́го Влады́ки, сего́ ра́ди благода́рно Ей возопие́м: ра́дуйся, Влады́чице, ми́ра засту́пнице и на́м, гре́шным, спасе́ние и от все́х зо́л избавле́ние.

Стих: Из глубины́ воззва́х к Тебе́, Го́споди, / Го́споди, услы́ши глас мой.

Те́рния грехо́в на́ших пла́мень мще́ния Бо́жия возжига́ют, и ка́ру Его́ на главы́ на́ша призыва́ют, но росо́ю моли́тв Твои́х, Влады́чице, се́й угаса́еши, и гне́в Бо́жий на ми́лость к на́м прелага́еши, дая́ на́м вре́мя покая́ния, сего́ ра́ди хвале́бно Ти́ вопие́м: ра́дуйся, Наде́ждо на́ша и Засту́пнице.

Глас 8: Стих: Да бу́дут у́ши Твои́ / вне́млюще гла́су моле́ния моего́.

О, пресла́вное чу́до яви́ла еси́, Влады́чице! Егда́ ико́ну Твою́ Предвозвести́тельницу в пла́мени невреди́му соблюла́ еси́, и преподобностра́дальцы на́ша на по́двиг благоче́стия укрепи́ла еси́. И ны́не, Госпоже́, не преста́й моли́ти Сы́на Твоего́ о на́с, недосто́йных рабе́х Твои́х, да проба́вит на́м ми́лость Свою́ и спасе́т ду́ши на́ша, я́ко Милосе́рд.

Стих: А́ще беззако́ния на́зриши, Го́споди, Го́споди, кто постои́т; / я́ко у Тебе́ очище́ние есть.

О, пресла́внаго чудесе́! Якоже бо Моисе́ю в Сина́и купина́ яви́ся иногда́ огне́м, си́це и Всенепоро́чныя Богороди́тельницы о́браз огне́м одева́ется, но неопали́м пребыва́ет, просвеща́я и на́с, су́щих во мра́це, и невреди́мы сохраня́я в пещи́ искуше́ний и бе́д.

Стих: И́мене ра́ди Твоего́ потерпе́х Тя, Го́споди, потерпе́ душа́ моя́ в сло́во Твое́, / упова́ душа́ моя́ на Го́спода.

Изве́стная ве́рных Помо́щнице и все́х благи́х оби́тели на́шей Пода́тельнице, приими́ на́с, ве́рно припа́дающих честно́му о́бразу Твоему́, и любо́вию вопию́щих Ти́: поми́луй на́с, Госпоже́ Пресвята́я, поми́луй на́м, я́коже дне́сь, та́ко и во о́ный ве́к, бу́ди на́м Помо́щница и Засту́пница, да Тя́ непреста́нно в пе́снех велича́ем.

Глас 8: Сла́ва Отцу́ и Сы́ну и Свято́му Ду́ху. И ны́не и при́сно и во ве́ки веко́в. Ами́нь.

Ино́го прибе́жища и по́мощи не и́мамы, ра́зве Тебе́, Влады́чице, Ты́ бо ико́ною Твое́ю свято́ю оби́тель сию́, в не́йже жи́тельствуем, от внеза́пнаго возгоре́ния невреди́му спасла́ еси́, и росо́ю моли́тв Твои́х умно́женный уже́ пла́мень угаси́ла еси́, те́мже мы́, раби́ Твои́, благода́рно вопие́м Ти́: сла́ва Тебе́, Госпоже́ Пречи́стая, за вся́ вели́кая и неизрече́нная на́м и всему́ ро́ду христиа́нскому благодея́ния.

Све́те Тихи́й:

Све́те Ти́хий святы́я сла́вы Безсме́ртнаго Отца́ Небе́снаго, Свята́го, Блаже́ннаго, Иису́се Христе́! Прише́дше на за́пад со́лнца, ви́девше свет вече́рний, пое́м Отца́, Сы́на и Свята́го Ду́ха, Бо́га. Досто́ин еси́ во вся времена́ пет бы́ти гла́сы преподо́бными, Сы́не Бо́жий, живо́т дая́й; те́мже мир Тя сла́вит.

Пареми́и:

Бытия́ чте́ние

Изы́де Иа́ков от студенца́ кля́твеннаго и и́де в Харра́нь./ И обре́те ме́сто, и спа та́мо,/ за́йде бо со́лнце,/ и взят от ка́мения ме́ста того́,и положи́ возгла́вие себе́,/ и спа на ме́сте о́ном, и сон ви́де:/ и се ле́ствица утвержде́на на земли́,/ ея́же глава́ досяза́ше до Небе́с,/ и А́нгели Бо́жии восхожда́ху и нисхожда́ху по ней,/ Госпо́дь же утвержда́шеся на ней и рече́:/ Аз Бог Авраа́мов, отца́ твоего́, и Бог Исаа́ков, не бо́йся:/ земля́, иде́же ты спи́ши на ней,/ тебе́ дам ю и се́мени твоему́./ И бу́дет се́мя твое́, я́ко песо́к земны́й,/ и распространи́тся на мо́ре, и ли́ву, и се́вер, и на восто́ки,/ и возблагословя́тся о тебе́ вся коле́на земна́я и о се́мени твое́м./ И се Аз с тобо́ю, сохраня́яй тя на вся́ком пути́, а́може а́ще пои́деши,/ и возвращу́ тя в зе́млю сию́,/ я́ко не и́мам тебе́ оста́вити,/ до́ндеже сотвори́ти Ми вся, ели́ка глаго́лах тебе́./ И воста́ Иа́ков от сна своего́ и рече́:/ я́ко есть Госпо́дь на ме́сте сем, аз же не ве́дех./ И убоя́ся, и рече́:/ я́ко стра́шно ме́сто сие́,/ несть сие́, но дом Бо́жий, и сия́ врата́ Небе́сная.

Прoро́чества Иезеки́илева чте́ние

Та́ко глаго́лет Госпо́дь: бу́дет от дне́ осма́го и про́чее, сотворя́т иере́и на олтари́ всесожже́ния ва́шего и я́же спасе́ния ва́шего, и прииму́ вы́, глаго́лет Адонаи́ Госпо́дь. И обрати́ мя́ на пу́ть вра́т святы́х вне́шних, зря́щих на восто́ки, и сия́ бя́ху затворе́на. И рече́ Госпо́дь ко мне́: врата́ сия́ затворе́на бу́дут, и не отве́рзутся, и никто́же про́йдет сквозе́ и́х, я́ко Госпо́дь Бо́г Изра́илев про́йдет и́ми, и бу́дут затворе́на. Яко игу́мен ся́дет в ни́х сне́сти хле́б: по пути́ ела́мских вра́т вни́дет, и по пути́ его́ изы́дет. И введе́ мя́ по пути́ вра́т святы́х, су́щих к се́веру, пря́мо хра́му, и ви́дех, и се́ испо́лнь сла́вы хра́м Госпо́день.

При́тчей чте́ние

Прему́дрость созда́ себе́ до́м и утверди́ столпо́в се́дмь. Закла́ своя́ же́ртвенная, и раствори́ в ча́ши свое́й вино́, и угото́ва свою́ трапе́зу. Посла́ своя́ рабы́, созыва́ющи с высо́ким пропове́данием на ча́шу, глаго́лющи: и́же е́сть безу́мен, да уклони́тся ко мне́. И тре́бующим ума́ рече́: прииди́те, яди́те мо́й хле́б и пи́йте вино́, е́же раствори́х ва́м. Оста́вите безу́мие, и жи́ви бу́дите, и взыщи́те ра́зума, да поживете́, и испра́вите ра́зум в ве́дении. Наказу́яй злы́я, прии́мет себе́ безче́стие, облича́яй же нечести́ваго опоро́чит себе́. Обличе́ния бо нечести́вому — ра́ны ему́. Не облича́й злы́х, да не возненави́дят тебе́, облича́й прему́дра, и возлю́бит тя́. Да́ждь прему́дрому вину́, и прему́дрший бу́дет, сказу́й пра́ведному, и приложи́т приима́ти. Нача́ло прему́дрости — стра́х Госпо́день, и сове́т святы́х — ра́зум. Разуме́ти бо зако́н по́мысла е́сть блага́го: си́м бо о́бразом мно́гое поживе́ши вре́мя, и приложа́тся тебе́ ле́та живота́.

Го́споди, поми́луй. (Три́жды,)

Сподо́би, Го́споди:

Сподо́би, Го́споди, в ве́чер сей без греха́ сохрани́тися нам. Благослове́н еси́, Го́споди, Бо́же оте́ц на́ших, и хва́льно и просла́влено и́мя Твое́ во ве́ки. Ами́нь.

Бу́ди, Го́споди, ми́лость Твоя́ на нас, я́коже упова́хом на Тя. Благослове́н еси́, Го́споди, научи́ мя оправда́нием Твои́м. Благослове́н еси́, Влады́ко, вразуми́ мя оправда́нием Твои́м. Благослове́н еси́, Святы́й, просвети́ мя оправда́нии Твои́ми.

Го́споди, ми́лость Твоя́ во век, дел руку́ Твое́ю не пре́зри. Тебе́ подоба́ет хвала́, Тебе́ подоба́ет пе́ние, Тебе́ сла́ва подоба́ет. Отцу́ и Сы́ну и Свято́му Ду́ху, ны́не и при́сно и во ве́ки веко́в. Ами́нь.

Лития́:

Стихи́ры:

Глас 8: Якоже дре́вле преобразова́вшая Тя́ купина́, огне́м объя́та бы́вши, не сгара́ше, си́це и свята́я ико́на Твоя́ Предвозвести́тельница, со святы́ми страстоте́рпцы Зогра́фскими, в пла́мени бы́вше, не сгоре́, но цела́ обре́теся, и до ны́не неврежде́нна пребыва́ет, и благода́тию Твое́ю, Пречи́стая, си́лу о́гненную угаша́ет и неоску́дныя благодея́ния источа́ет, с ве́рою пред не́ю Тебе́, Богома́ти, покланя́ющимся и усе́рдно моля́щимся.

Гла́с 7: Гора́ еси́ вели́кая и пресла́вная, па́че горы́ Сина́йския, Богоро́дице: она́ бо не терпя́щи сни́тия сла́вы Бо́жия во о́бразех и се́нех, огне́м возгара́шеся, и гро́ми и мо́лнии та́мо бы́ша. Ты́ же, ве́сь Боже́ственный Огнь су́щь, Бо́жие Сло́во во чре́ве Твое́м неопа́льно носи́ла еси́, и от сосе́ц Твои́х млеко́м пита́ла еси́, ма́нием Нося́щаго вся́. И [ны́не], ма́тернее дерзнове́ние к Нему́ иму́щи, помози́, Влады́чице, ве́рно почита́ющим Тво́й честны́й о́браз, и не забу́ди, ми́лостивно посеща́ющи: прия́ла бо еси́ от Бо́га да́р стро́ити и покрыва́ти христоимени́тое ста́до, рабы́ Твоя́.

Гла́с 4: Яко порфи́рою ца́рскою и ви́ссом, ико́ною Твое́ю и Твоего́ Сы́на, Богоро́дице, Це́рковь Бо́жия просвети́вшися, красу́ется чудесы́. Дне́сь явле́нием вся́ созыва́ет пра́здновати, па́че сия́ния со́лнечнаго благода́тию Свята́го Ду́ха блиста́ющися, на боля́щих и неду́жных исцеле́ния исто́чники источа́ющи и все́м да́рующи бога́тую ми́лость.

Сла́ва, и ны́не, глас 5:

Воспое́м, лю́дие, све́тло Дави́дскую пе́снь Отрокови́це, Неве́сте Бо́жии и Ма́тери Царя́ Христа́: предста́ Цари́ца одесну́ю Тебе́, Влады́ко, ря́сны златы́ми оде́яна и преукра́шена Боже́ственными благоле́потами. Сию́ у́бо я́ко избра́нную и до́брую в жена́х, па́че всего́ ми́ра удобри́в, благоволи́л еси́ роди́тися из Нея́ вели́кия ра́ди ми́лости, и Сию́ Помо́щницу лю́дем Твои́м дарова́л еси́ спаса́ти и покрыва́ти от бе́д всемогу́щею Твое́ю и Боже́ственною си́лою, Ея́же моли́твами, Христе́ Бо́же, поми́луй на́с.

Го́споди, поми́луй. (40 раз)

Стихи́ры на стихо́вне:

Стихи́ры: Глас 4:

О, пресла́вных чуде́с Твои́х, Пречи́стая! Яко моле́нием оте́ц на́ших, пред свято́ю ико́ною Твое́ю, внеза́пное возжже́ние оби́тели сея́ угаси́ла еси́ и ско́рбныя сердца́ и́х возвесели́ла еси́, сего́ ра́ди и мы́, пра́зднующе па́мять сего́ чудесе́, благода́рно вопие́м Ти́: ра́дуйся, Де́во препросла́вленная и Богоро́дице су́щая, я́ко спаса́еши ны́ от вся́кия ну́жды и ско́рби, и Сы́на Твоего́ мо́лиши о спасе́нии ду́ш на́ших.

Стих: Помяну́ и́мя Твое́ во вся́ком ро́де и ро́де.

О, Всеми́лостивая христиа́ном Помо́щнице! Не мо́жет Тя́ воспе́ти досто́йно у́м челове́ческий и Ангельский, я́ко всея́ тва́ри честне́йшую, и небе́сных и земны́х сла́внейшую: Творца́ бо все́х и Бо́га родила́ еси́. Но, о Влады́чице! приими́ ми́лостивно ю́же Тебе́ от се́рдца возложи́хом пе́снь, о вели́ких Твои́х к на́м благодея́ниих, спаса́й же на́с и всегда́, на Тя́ бо наде́емся.

Стих: Слы́ши, Дщи́, и ви́ждь, и приклони́ у́хо Твое́.

Па́че ски́нии Моисе́евы, по о́бразу небе́сному сотворе́нныя, всю́ Тя Бо́г освяти́, и па́че Ааро́ня киво́та, благода́ти Своея́ испо́лни, ея́же и ико́на Твоего́ подо́бия прича́стна показа́ся: источа́ет бо освяще́ние и цельбу́ душа́м и телесе́м и уставля́ет си́лу о́гненную прису́тствием Свои́м. Ейже с любо́вию покланя́ющеся, про́сим, Всеблага́я, и вопие́м: огня́ вре́меннаго и ве́чнаго изба́ви на́с, благослове́нная Помо́щнице.

Слава, И ныне, глас 2:

Пода́ждь Твою́ держа́вную по́мощь на́м, Богоро́дице, егда́ гре́х ра́ди на́ших, о́гненнаго запале́ния наказа́ние на на́с прии́дет внеза́пу, или́ гро́мы и мо́лнии с небесе́ на́с устраша́ют. Тогда́ ико́ною Твое́ю свято́ю на́с защити́ и изба́ви, и яви́ся утоли́тельница гне́ва Бо́жия, на на́с пра́ведно подви́женнаго, мно́го бо мо́жет Ма́терняя моли́тва ко Творцу́, и всеси́льно хода́тайство Твое́ пред лице́м Всевы́шняго. Его́же умоля́ти не преста́й за ро́д христиа́нский, и́же в пе́снех немо́лчных ублажа́ет Тя́, Ро́ждшую Спа́са и Изба́вителя ду́ш на́ших.

Моли́тва свята́го Симео́на Богоприи́мца:

Ны́не отпуща́еши раба́ Твоего́, Влады́ко,/ по глаго́лу Твоему́, с ми́ром;/ я́ко ви́деста о́чи мои́ спасе́ние Твое́,/ е́же еси́ угото́вал пред лице́м всех люде́й,/ свет во открове́ние язы́ков,// и сла́ву люде́й Твои́х Изра́иля.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Го́споди, поми́луй. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Тропа́рь, глас 2:

Яко до́ждь на руно́, Сло́во Бо́жие в пречи́стую утро́бу Твою́ сни́де, и Ма́терь Тя́ Своего́ неизрече́ннаго воплоще́ния показа́, те́мже и о́бразу Твоему́ свято́му подаде́ благода́ть чудоде́йствий. Сего́ ра́ди вопие́м Ти́: избавля́й на́с, Влады́чице, от все́х бе́д, и спаси́ ду́ши на́ша, я́ко Милосе́рда. (Три́жды)

Бу́ди И́мя Госпо́дне благослове́но от ны́не и до ве́ка. (Три́жды)

Псало́м 33:

Благословлю́ Го́спода на вся́кое вре́мя,/ вы́ну хвала́ Его́ во усте́х мои́х./ О Го́споде похва́лится душа́ моя́,/ да услы́шат кро́тцыи, и возвеселя́тся./ Возвели́чите Го́спода со мно́ю,/ и вознесе́м И́мя Его́ вку́пе./ Взыска́х Го́спода, и услы́ша мя,/ и от все́х скорбе́й мои́х изба́ви мя./ Приступи́те к Нему́, и просвети́теся,/ и ли́ца ва́ша не постыдя́тся./ Сей ни́щий воззва́, и Госпо́дь услы́ша и́,/ и от все́х скорбе́й его́ спасе́ и́./ Ополчи́тся а́нгел Госпо́день о́крест боя́щихся Его́,/ и изба́вит их./ Вкуси́те и ви́дите, я́ко благ Госпо́дь:/ блаже́н муж, и́же упова́ет Нань./ Бо́йтеся Го́спода, вси́ святи́и Его́,/ я́ко несть лише́ния боя́щимся Его́./ Бога́тии обнища́ша и взалка́ша:/ взыска́ющии же Го́спода// не лиша́тся вся́каго бла́га.

У́ТРЕНЯ.

Шестопса́лмие:

Сла́ва в вы́шних Бо́гу, и на земли́ мир, в челове́цех благоволе́ние. (Три́жды)

Го́споди, устне́ мои́ отве́рзеши, и уста́ моя́ возвестя́т хвалу́ Твою́. (Два́жды)

Псалом 3:

Го́споди, что ся умно́жиша стужа́ющии ми́? Мно́зи востаю́т на мя, мно́зи глаго́лют души́ мое́й: несть спасе́ния eму́ в Бо́зе eго́. Ты же, Го́споди, Засту́пник мой еси́, сла́ва моя́ и вознося́й главу́ мою́. Гла́сом мои́м ко Го́споду воззва́х, и услы́ша мя от горы́ святы́я Своея́. Аз усну́х, и спах, воста́х, я́ко Госпо́дь засту́пит мя. Не убою́ся от тем люде́й, о́крест напа́дающих на мя. Воскресни́, Го́споди, спаси́ мя, Бо́же мой, я́ко Ты порази́л еси́ вся вражду́ющыя ми всу́е: зу́бы гре́шников сокруши́л еси́. Госпо́дне есть спасе́ние, и на лю́дех Твои́х благослове́ние Твое́.

Аз усну́х, и спах, воста́х, я́ко Госпо́дь засту́пит мя.

Псалом 37:

Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́. Я́ко стре́лы Твоя́ унзо́ша во мне, и утверди́л еси́ на мне ру́ку Твою́. Несть исцеле́ния в пло́ти мое́й от лица́ гне́ва Твоего́, несть ми́ра в косте́х мои́х от лица́ грех мои́х. Я́ко беззако́ния моя́ превзыдо́ша главу́ мою́, я́ко бре́мя тя́жкое отяготе́ша на мне. Возсмерде́ша и согни́ша ра́ны моя́ от лица́ безу́мия моего́. Пострада́х и сляко́хся до конца́, весь день се́туя хожда́х. Я́ко ля́двия моя́ напо́лнишася поруга́ний, и несть исцеле́ния в пло́ти мое́й. Озло́блен бых и смири́хся до зела́, рыка́х от воздыха́ния се́рдца моего́. Го́споди, пред Тобо́ю все жела́ние мое́ и воздыха́ние мое́ от Тебе́ не утаи́ся. Се́рдце мое́ смяте́ся, оста́ви мя си́ла моя́, и свет о́чию мое́ю, и той несть со мно́ю. Дру́зи мои́ и и́скреннии мои́ пря́мо мне прибли́жишася и ста́ша, и бли́жнии мои́ отдале́че мене́ ста́ша и нужда́хуся и́щущии ду́шу мою́, и и́щущии зла́я мне глаго́лаху су́етная и льсти́вным весь день поуча́хуся. Аз же я́ко глух не слы́шах и я́ко нем не отверза́яй уст свои́х. И бых я́ко челове́к не слы́шай и не имы́й во усте́х свои́х обличе́ния. Я́ко на Тя, Го́споди, упова́х, Ты услы́шиши, Го́споди Бо́же мой. Я́ко рех: да не когда́ пора́дуют ми ся врази́ мои́: и внегда́ подвижа́тися нога́м мои́м, на мя велере́чеваша. Я́ко аз на ра́ны гото́в, и боле́знь моя́ предо мно́ю есть вы́ну. Я́ко беззако́ние мое́ аз возвещу́ и попеку́ся о гресе́ мое́м. Врази́ же мои́ живу́т и укрепи́шася па́че мене́, и умно́жишася ненави́дящии мя без пра́вды. Воздаю́щии ми зла́я возблага́я оболга́ху мя, зане́ гоня́х благосты́ню. Не оста́ви мене́, Го́споди Бо́же мой, не отступи́ от Мене́. Вонми́ в по́мощь мою́, Го́споди спасе́ния моего́.

Не оста́ви мене́, Го́споди Бо́же мой, не отступи́ от Мене́. Вонми́ в по́мощь мою́, Го́споди спасе́ния моего́.

Псалом 62:

Бо́же, Бо́же мой, к Тебе́ у́тренюю, возжада́ Тебе́ душа́ моя́, коль мно́жицею Тебе́ плоть моя́, в земли́ пу́сте и непрохо́дне, и безво́дне. Та́ко во святе́м яви́хся Тебе́, ви́дети си́лу Твою́ и сла́ву Твою́. Я́ко лу́чши ми́лость Твоя́ па́че живо́т, устне́ мои́ похвали́те Тя. Та́ко благословлю́ Тя в животе́ мое́м, о и́мени Твое́м воздежу́ ру́це мои́. Я́ко от ту́ка и ма́сти да испо́лнится душа́ моя́, и устна́ма ра́дости восхва́лят Тя уста́ моя́. А́ще помина́х Тя на посте́ли мое́й, на у́тренних поуча́хся в Тя. Я́ко был еси́ Помо́щник мой, и в кро́ве крилу́ Твое́ю возра́дуюся. Прильпе́ душа́ моя́ по Тебе́, мене́ же прия́т десни́ца Твоя́. Ти́и же всу́е иска́ша ду́шу мою́, вни́дут в преиспо́дняя земли́, предадя́тся в ру́ки ору́жия, ча́сти ли́совом бу́дут. Царь же возвесели́тся о Бо́зе, похва́лится всяк клены́йся Им, я́ко загради́шася уста́ глаго́лющих непра́ведная.

На у́тренних поуча́хся в Тя. Я́ко был еси́ Помо́щник мой, и в кро́ве крилу́ Твое́ю возра́дуюся. Прильпе́ душа́ моя́ по Тебе́, мене́ же прия́т десни́ца Твоя́.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Го́споди поми́луй. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Псалом 87:

Го́споди Бо́же спасе́ния моего́, во дни воззва́х, и в нощи́ пред Тобо́ю. Да вни́дет пред Тя моли́тва моя́: приклони́ у́хо Твое́ к моле́нию моему́, я́ко испо́лнися зол душа́ моя́, и живо́т мой аду прибли́жися. Привмене́н бых с низходя́щими в ров, бых я́ко челове́к без по́мощи, в ме́ртвых свобо́дь, я́ко я́звеннии спя́щии во гро́бе, и́хже не помяну́л еси́ ктому́, и ти́и от руки́ Твоея́ отринове́ни бы́ша. Положи́ша мя в ро́ве преиспо́днем, в те́мных и се́ни сме́ртней. На мне утверди́ся я́рость Твоя́, и вся во́лны Твоя́ наве́л еси́ на мя. Уда́лил еси́ зна́емых мои́х от Мене́, положи́ша мя ме́рзость себе́: пре́дан бых и не исхожда́х. О́чи мои́ изнемого́сте от нищеты́, воззва́х к Тебе́, Го́споди, весь день, возде́х к Тебе́ ру́це мои́. Еда́ ме́ртвыми твори́ши чудеса́? Или́ вра́чеве воскреся́т, и испове́дятся Тебе́? Еда́ пове́сть кто во гро́бе ми́лость Твою́, и и́стину Твою́ в поги́бели? Еда́ позна́на бу́дут во тьме чудеса́ Твоя́, и пра́вда Твоя́ в земли́ забве́нней? И аз к Тебе́, Го́споди, воззва́х и у́тро моли́тва моя́ предвари́т Тя. Вску́ю, Го́споди, отре́еши ду́шу мою́, отвраща́еши лице́ Твое́ от Мене́? Нищ есмь аз, и в труде́х от ю́ности моея́; возне́с же ся, смири́хся, и изнемого́х. На мне преидо́ша гне́ви Твои́, устраше́ния Твоя́ возмути́ша мя, обыдо́ша мя я́ко вода́, весь день одержа́ша мя вку́пе. Уда́лил еси́ от Мене́ дру́га и и́скренняго, и зна́емых мои́х от страсте́й.

Го́споди Бо́же спасе́ния моего́, во дни воззва́х, и в нощи́ пред Тобо́ю. Да вни́дет пред Тя моли́тва моя́: приклони́ у́хо Твое́ к моле́нию моему́.

Псалом 102:

Благослови́, душе́ моя́, Го́спода, и вся вну́тренняя моя́ и́мя свя́тое Его́. Благослови́, душе́ моя́, Го́спода, и не забыва́й всех воздая́ний Его́, очища́ющаго вся беззако́ния твоя́, исцеля́ющаго вся неду́ги твоя́, избавля́ющаго от истле́ния живо́т твой, венча́ющаго тя ми́лостию и щедро́тами, исполня́ющаго во благи́х жела́ние твое́: обнови́тся я́ко о́рля ю́ность твоя́. Творя́й ми́лостыни Госпо́дь, и судьбу́ всем оби́димым. Сказа́ пути́ Своя́ Моисе́ови, сыново́м Изра́илевым хоте́ния Своя́: Щедр и Ми́лостив Госпо́дь, Долготерпели́в и Многоми́лостив. Не до конца́ прогне́вается, ниже́ во век вражду́ет, не по беззако́нием на́шым сотвори́л есть нам, ниже́ по грехо́м на́шым возда́л есть нам. Я́ко по высоте́ небе́сней от земли́, утверди́л есть Госпо́дь ми́лость Свою́ на боя́щихся Его́. Ели́ко отстоя́т восто́цы от за́пад, уда́лил есть от нас беззако́ния на́ша. Я́коже ще́дрит оте́ц сы́ны, уще́дри Госпо́дь боя́щихся Его́. Я́ко Той позна́ созда́ние на́ше, помяну́, я́ко персть есмы́. Челове́к, я́ко трава́ дни́е eго́, я́ко цвет се́льный, та́ко оцвете́т, я́ко дух про́йде в нем, и не бу́дет, и не позна́ет ктому́ ме́ста своего́. Ми́лость же Госпо́дня от ве́ка и до ве́ка на боя́щихся Его́, и пра́вда Его́ на сыне́х сыно́в, храня́щих заве́т Его́, и по́мнящих за́поведи Его́ твори́ти я́. Госпо́дь на Небеси́ угото́ва Престо́л Свой, и Ца́рство Его́ все́ми облада́ет. Благослови́те Го́спода вси А́нгели Его́, си́льнии кре́постию, творя́щии сло́во Его́, услы́шати глас слове́с Его́. Благослови́те Го́спода вся Си́лы Его́, слуги́ Его́, творя́щии во́лю Его́. Благослови́те Го́спода вся дела́ Его́, на вся́ком ме́сте влады́чества Его́, благослови́, душе́ моя́, Го́спода.

На вся́ком ме́сте влады́чества Его́, благослови́, душе́ моя́, Го́спода.

Псалом 142:

Го́споди, услы́ши моли́тву мою́, внуши́ моле́ние мое́ во и́стине Твое́й, услы́ши мя в пра́вде Твое́й и не вни́ди в суд с рабо́м Твои́м, я́ко не оправди́тся пред Тобо́ю всяк живы́й. Я́ко погна́ враг ду́шу мою́, смири́л есть в зе́млю живо́т мой, посади́л мя есть в те́мных, я́ко ме́ртвыя ве́ка. И уны́ во мне дух мой, во мне смяте́ся се́рдце мое́. Помяну́х дни дре́вния, поучи́хся во всех де́лех Твои́х, в творе́ниих руку́ Твое́ю поуча́хся. Возде́х к Тебе́ ру́це мои́, душа́ моя́, я́ко земля́ безво́дная Тебе́. Ско́ро услы́ши мя, Го́споди, исчезе́ дух мой, не отврати́ лица́ Твоего́ от Мене́, и уподо́блюся низходя́щым в ров. Слы́шану сотвори́ мне зау́тра ми́лость Твою́, я́ко на Тя упова́х. Скажи́ мне, Го́споди, путь во́ньже пойду́, я́ко к Тебе́ взях ду́шу мою́. Изми́ мя от враг мои́х, Го́споди, к Тебе́ прибего́х. Научи́ мя твори́ти во́лю Твою́, я́ко Ты еси́ Бог мой. Дух Твой Благи́й наста́вит мя на зе́млю пра́ву. И́мене Твоего́ ра́ди, Го́споди, живи́ши мя, пра́вдою Твое́ю изведе́ши от печа́ли ду́шу мою́. И ми́лостию Твое́ю потреби́ши враги́ моя́ и погуби́ши вся стужа́ющыя души́ мое́й, я́ко аз раб Твой есмь.

Услы́ши мя, Го́споди, в пра́вде Твое́й и не вни́ди в суд с рабо́м Твои́м.

Дух Твой Благи́й наста́вит мя на зе́млю пра́ву.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Тропа́рь глас 2:

Сла́ва Отцу́ и Сы́ну и Свято́му Ду́ху. И ны́не и при́сно и во ве́ки веко́в. Ами́нь.

Здесь читается кафизма, положенная по дню, или сразу седальны:

Го́споди, поми́луй. (Три́жды)

Седален, глас 4:

Глубины́ та́йны Рождества́ Твоего́, о Пречи́стая Де́во, у́м Ангельский ужаса́ет, и пречи́стая ико́на Твоя́ де́моны прогоня́ет, и ли́ца нечести́вых омрача́ет, и в сту́д порева́ет: не терпя́т бо взира́ти на си́лу ея́, бе́гают же и исчеза́ют. Мы́ же любе́зно покланя́емся и лобыза́ем, и Тя́, Богоро́дицу, велича́ем.

Глас 4: Сла́ва Отцу́ и Сы́ну и Свято́му Ду́ху. И ны́не и при́сно и во ве́ки веко́в. Ами́нь.

Ра́дуйся, Влады́чице, небе́сная Цари́це, Бо́га пло́тию на́м ро́ждшая, еди́наго Агнца, за на́с во́лею поже́ршагося. Того́ моли́, Всенепоро́чная, да Твои́ми моли́твами от все́х бе́д на́с изба́вит, и спасе́т ду́ши на́ша.

Полиеле́й:

Хвали́те И́мя Госпо́дне, хвали́те, раби́ Го́спода.

Аллилу́иа, аллилу́иа, аллилу́иа.

Благослове́н Госпо́дь от Сио́на, живы́й во Иерусали́ме.

Аллилу́иа, аллилу́иа, аллилу́иа.

Испове́дайтеся Го́сподеви, я́ко Благ, я́ко в век ми́лость Его́.

Аллилу́иа, аллилу́иа, аллилу́иа.

Испове́дайтеся Бо́гу Небе́сному, я́ко в век ми́лость Его́.

Аллилу́иа, аллилу́иа, аллилу́иа.

Велича́ние:

Велича́ем Тя́, Пресвята́я Де́во, и чте́м всесла́вное Твое́ заступле́ние, аллилу́ия.

Псало́м избра́нный:

Помяни́, Го́споди, Дави́да и всю кро́тость его́. Я́ко кля́тся Го́сподеви, обеща́ся Бо́гу Иа́ковлю. Се, слы́шахом я́ во Евфра́фе, обрето́хом я́ в поля́х дубра́вы. Пресла́вная глаго́лашася о тебе́, гра́де Бо́жий. Бог посреде́ его́, и не подви́жится. Кля́тся Госпо́дь Дави́ду и́стиною, и не отве́ржется ея́. От плода́ чре́ва твоего́ посажду́ на престо́ле твое́м. Я́ко избра́ Госпо́дь Сио́на, изво́ли его́ в жили́ще себе́. Освяти́л есть селе́ние Свое́ Вы́шний. Святы́ня и велеле́пота во святи́ле его́. Свят храм твой, ди́вен в пра́вде. До́му Твоему́ подоба́ет святы́ня, Го́споди, в долготу́ дний. Помяну́ и́мя Твое́ во вся́ком ро́де и ро́де. Благослове́н Госпо́дь во век, и в век ве́ка.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа,// сла́ва Тебе́, Бо́же. (Трижды)

Велича́ем Тя́, Пресвята́я Де́во, и чте́м всесла́вное Твое́ заступле́ние, аллилу́ия.

Седа́льны:

Глас 6:

Мно́гая Твоя́ на́м благодея́ния кто́ испове́сть, Богоро́дице? Или́ ки́й язы́к просла́вит неисчерпа́емое мо́ре милосе́рдия Твоего́? Яко не то́кмо всегда́ мо́лиши о на́с Сы́на Твоего́ и Бо́га на́шего, и все́м на́м твори́ши спасти́ся, но и вре́менных бе́д наи́тия воспреща́еши, и ико́ною Твое́ю святу́ю оби́тель на́шу от огня́ спаса́еши, сего́ ра́ди Тя́, Всепе́тая, прославля́ем и ублажа́ем.

Сла́ва, и ны́не, гла́с 2:

Моли́твы Твои́х ра́б приими́, Богоро́дице, Засту́пнице на́ша и Прибе́жище, к кому́ бо прибе́гнем, ра́зве Тебе́, Влады́чице. Ты́ бо еси́ Покро́в на́м и Заступле́ние, и ны́не не оста́ви на́с безпомо́щных, я́ко на Тя́ по Бо́зе упова́ние возложи́хом, Присноде́во.

Степе́нна, глас 4:

От ю́ности моея́/ мно́зи бо́рют мя стра́сти,/ но Сам мя заступи́// и спаси́, Спа́се мой.

Ненави́дящии Сио́на,/ посрами́теся от Го́спода,/ я́ко трава́ бо огне́м// бу́дете изсо́хше.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Святы́м Ду́хом/ вся́ка душа́ живи́тся,/ и чистото́ю возвыша́ется,// светле́ется Тро́йческим еди́нством, священнота́йне.

Го́споди, поми́луй. (Три́жды)

От Луки Свята́го Ева́нгелия чте́ние

Сла́ва, Тебе́, Го́споди, сла́ва Тебе́.

Во дни о́ны, воста́вши, Мариа́м, и́де в го́рняя со тща́нием, во град Иу́дов. И вни́де в дом Заха́риин, и целова́ Елисаве́т. И бысть я́ко услы́ша Елисаве́т целова́ние Мари́ино, взыгра́ся младе́нец во чре́ве ея́: и испо́лнися Ду́ха Свя́та Елисаве́т. И возопи́ гла́сом ве́лиим, и рече́: благослове́на Ты в жена́х, и благослове́н плод чре́ва Твоего́. И отку́ду мне сие́, да прии́де Ма́ти Го́спода моего́ ко мне? Се бо, я́ко бысть глас целова́ния Твоего́ во у́шию мое́ю, взыгра́ся младе́нец ра́дощами во чре́ве мое́м. И блаже́нна Ве́ровавшая, я́ко бу́дет соверше́ние глаго́ланным Ей от Го́спода. И рече́ Мариа́м: вели́чит душа́ Моя́ Го́спода, и возра́довася дух Мой о Бо́зе Спа́се Мое́м. Я́ко призре́ на смире́ние Рабы́ Своея́: се бо, отны́не ублажа́т Мя вси ро́ди. Я́ко сотвори́ Мне вели́чие Си́льный, и свя́то и́мя Его́. Пребы́сть же Мариа́м с не́ю я́ко три ме́сяцы, и возврати́ся в дом Свой.

Сла́ва, Тебе́, Го́споди, сла́ва Тебе́.

Псало́м 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя. Я́ко беззако́ние мое́ аз зна́ю и грех мой предо мно́ю есть вы́ну. Тебе́ Еди́ному согреши́х, и лука́вое пред Тобо́ю сотвори́х, я́ко да оправди́шися во словесе́х Твои́х и победи́ши, внегда́ суди́ти Ти. Се бо в беззако́ниих зача́т есмь, и во гресе́х роди́ мя ма́ти моя́. Се бо и́стину возлюби́л еси́, безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся, омы́еши мя, и па́че сне́га убелю́ся. Слу́ху моему́ да́си ра́дость и весе́лие, возра́дуются ко́сти смире́нныя. Отврати́ лице́ Твое́ от грех мои́х, и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́, и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́, и Ду́хом Влады́чним утверди́ мя. Научу́ беззако́нныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́, возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо, всесожже́ния не благоволи́ши. Же́ртва Бо́гу дух сокруше́н, се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския, тогда́ благоволи́ши же́ртву пра́вды, возноше́ние и всесожега́емая: тогда́ возложа́т на олта́рь Твой тельцы́.

Глас 6:

Сла́ва Отцу́ и Сы́ну и Свято́му Ду́ху./ Моли́твами Богоро́дицы, / Ми́лостиве, очи́сти / мно́жества согреше́ний на́ших.

И ны́не и при́сно и во ве́ки веко́в. Ами́нь./ Моли́твами Богоро́дицы, / Ми́лостиве, очи́сти / мно́жества согреше́ний на́ших.

Поми́луй мя, Бо́же,/ по вели́цей ми́лости Твое́й,/ и по мно́жеству щедро́т Твои́х// очи́сти беззако́ние мое́.

Стихи́ра, глас 6:

Весели́ся дне́сь, оби́тель Зогра́фская, и ра́достно пра́зднуй пречестны́я ико́ны Богома́тере све́тлое торжество́, в па́мять чуде́снаго избавле́ния своего́ от внеза́пнаго о́гненнаго возгоре́ния, я́ко да и впре́дь, моли́твами Присноде́вы, сохрани́шися от огня́ и гро́ма, и все́х бе́д внеза́пу находя́щих.

Го́споди, поми́луй. (12 раз)

Кано́н Богоро́дицы, гла́с 4.

Пе́снь 1.

Ирмос: Отве́рзу уста́ моя́, и напо́лнятся Ду́ха, и сло́во отры́гну Цари́це Ма́тери, и явлю́ся, све́тло торжеству́я, и воспою́, ра́дуяся, Тоя́ чудеса́.

Припев: Пресвятая Богородице, спаси нас.

Отве́рзи, Влады́чице, уста́ моя́, и ду́х прему́дрости и стра́ха Бо́жия пода́ждь ми́, да во гла́се хвале́ния воспою́ вели́чия и ми́лости Твоя́, я́же на́м, Богома́ти, яви́ла еси́.

Отку́ду начну́, и о чесо́м пе́рвее просла́влю Тя́, Богома́ти? О о́ном ли, я́ко Рождество́м Твои́м естество́ на́ше от а́да и сме́рти ве́чныя изба́вила еси́, или́ я́ко и ны́не избавля́еши ны́ от все́х зо́л и лю́тых обстоя́ний?

Во глубину́ пре́лести диа́воли па́дшее челове́чество, на го́ру и́стиннаго богопозна́ния возвела́ еси́, Влады́чице. Ны́не же в заблужде́ния ерети́ческая впа́сти на́с непопусти́ла еси́.

Всеблаже́нная Отрокови́це, Чи́стая Голуби́це, житие́ чи́стое проводи́ти укрепи́ на́с, и блаже́нства ве́чнаго сподо́би моли́твами Твои́ми, да всегда́ прославля́ем Тя́, вино́вницу спасе́ния на́шего.

Пе́снь 3.

Ирмос: Твоя́ песносло́вцы, Богоро́дице, живы́й и незави́стный Исто́чниче, ли́к Себе́ совоку́пльшия, духо́вно утверди́, в боже́ственней Твое́й сла́ве, венце́в сла́вы сподо́би.

Твоя́ песносло́вцы, и́стинную Богоро́дицу Тя́ зна́ющия и Сы́на Твоего́ Главу́ Це́ркве нарица́ющия, Ма́терняго Твоего́ благоволе́ния не лиши́, проти́вно же сему́ ве́рующия вразуми́, и единомы́сленны с на́ми сотвори́, Влады́чице.

Истинный Жени́х Це́ркве — Сы́н Тво́й, Богоро́дице, мы́ же то́кмо по́званнии на пи́р ве́ры. Сего́ ра́ди, Влады́чице, ненави́диши латиному́дрия папослужи́тели, жениха́ми Це́ркве себе́ нарица́ющия, и си́м Христа́ посрамля́ющия.

Истинный Жени́х, Христо́с, и ученицы́, дру́зи Его́, не стрижа́ху власы́ главы́ своея́; ло́жнии же лати́нстии жениси́ законоположи́ша себе́ стрищи́ власы́, и си́м, Влады́чице, проти́вни Сы́ну Твоему́ сотвори́шася.

Сы́н Тво́й, Богоро́дице, еди́ножды принесе́ себе́ в же́ртву Бо́гу Отцу́; безу́мнии же лати́ны, неразуме́юще сего́, на еди́ном же́ртвеннице во еди́н де́нь не́колико кра́тно же́ртву сию́ прино́сят, и я́ко бы втори́чно Христа́ распина́ют, и та́йну искупле́ния неде́йственну сотворя́ют.

Седа́лен святы́х, гла́с 8.

Солнцезра́чная колесни́це Дави́дова, порфиропо́сланный о́др Соломо́нов, сви́ток богоначерта́нный Иса́иин, и одушевле́нная ски́ния Моисе́ева, и стена́ адама́нтская Аммо́сова, Ты́ была́ еси́, свети́льник златокова́нный Заха́риев, Дании́лова же гора́, дщи́ца желтобе́лая Авваку́мова, и превосхо́дное проро́ков оглаше́ние. Моли́ся Сы́ну Твоему́ и Бо́гу прегреше́ний оставле́ние дарова́ти, благогове́йно покланя́ющимся боже́ственному о́бразу Твоему́.

Пе́снь 4.

Ирмос: Седя́й в сла́ве на Престо́ле Божества́ во о́блаце ле́гце, при́иде Иису́с Пребоже́ственный, Нетле́нною Дла́нию и спасе́ зову́щия: сла́ва, Христе́, си́ле Твое́й.

Злы́й сове́т лати́нов на жре́бий Тво́й, наше́дших иногда́, разруши́ла еси́, Богоро́дице, и со студо́м во своя́ си возврати́тся и́м сотвори́ла еси́, благоче́стия же ра́ди пострада́вшия от ни́х рабы́ Твоя́, венце́в сла́вы сподо́била еси́.

Оби́тель Зогра́фская дне́сь све́тло торжеству́ет, и пра́зднество сотворя́ет честне́й ико́не Твое́й, е́юже, Богома́ти, заблужде́ние лати́н изобличи́ла еси́, и наше́ствие и́х предвозвести́ла еси́.

Не то́кмо оби́тель Зогра́фская, но и вся́ гора́ Афо́нская прославля́ет Тя́, Богома́ти, я́ко не попусти́ла еси́ латиному́дрствующим вознести́ на ню́ ро́г сво́й, и Правосла́вие в не́й до ны́не неврежде́нно сохрани́ла еси́.

Якоже корабле́ц в пучи́не, та́ко и Це́рковь Сы́на Твоего́, Влады́чице, коле́блема е́сть бу́рею разли́чных ересе́й, но в ти́хое приста́нище ве́чнаго спасе́ния упра́ви ю́, многомо́щными Твои́ми к Бо́гу моли́твами.

Пе́снь 5.

Ирмос: Ужасо́шася вся́ческая о Боже́ственней сла́ве Твое́й: Ты́ бо, неискусобра́чная Де́во, име́ла еси́ во утро́бе над все́ми Бо́га, и родила́ еси́ Безле́тнаго Сы́на, все́м, воспева́ющим Тя́, ми́р подава́ющая.

Ужасо́шася папослужи́телие, егда́ услы́шаша гла́с с небесе́, укрепля́ющь страстоте́рпцы Зогра́фския, и мзду́ на небеси́ и́м обещава́ющь, оба́че не пока́яшася, но а́ки а́спиды глуси́и, неиспра́влены пребы́ша в заблужде́нии свое́м.

Не ве́сте ко́его ду́ха есте́ вы́, лати́не! Аще бо Ева́нгелие Христо́во пропове́дуете, то почто́ неслу́шающия ва́с, слуги́ Богома́тере, убива́ете и огне́м сожига́ете? Христо́с бо не повеле́ ученико́м Свои́м та́ко твори́ти.

Слы́шите, лати́не, и устыди́теся! Аще бы́ уче́ние ва́ше было́ пра́во, и ре́вность ва́ша по ве́ре Христо́ве Бо́гу уго́дна, не бы́ Цари́ца Небе́сная, чрез ико́ну Свою́, врага́ми Сы́на Своего́ нарекла́ ва́с.

Припа́дающе ко святе́й ико́не Твое́й, Де́во, вопие́м Ти́ от се́рдца сокруше́нна: не попусти́ на́м впа́сти в се́ти ерети́ческия, Госпоже́ Всеми́лостивая, но в Правосла́вии до кончи́ны живота́ на́шего пребы́ти укрепи́ на́с.

Пе́снь 6.

Ирмос: Боже́ственное сие́ и всечестно́е соверша́юще пра́зднество, богому́дрии, Богома́тере, прииди́те, рука́ми воспле́щим, от Нея́ ро́ждшагося Бо́га сла́вим.

Арха́нгел Гаврии́л возвести́ Тебе́ та́йну, от ве́ка сокрове́нную: ны́не же Ты́, Богома́ти, прия́ла еси́ от Бо́га да́р, враго́в наше́ствие предвозвеща́ти, и от лю́тости те́х ве́рныя рабы́ Твоя́ защища́ти.

Смире́нно молю́ся Тебе́, Всеблаго́й Предвозвести́тельнице: возвеща́й ми́ при́сно неизбе́жный ча́с сме́ртный и стра́шный су́д Сы́на Твоего́, да поне́ та́ко удержу́ся от де́л грехо́вных, и́хже обы́чаем всегда́ прельще́н е́смь.

Ра́дуйся, Преблагослове́нная Де́во, жре́бий Сво́й земны́й в жили́ще и́ноком дарова́вшая; ра́дуйся, любо́вь Свою́ к ме́сту сему́, я́сно возвести́вшая; ра́дуйся, защища́ти подвиза́ющихся в Горе́ се́й обеща́вшая; ра́дуйся, от обеща́ния Своего́ никогда́ же отступа́ющая.

Ра́дуйся, вся́ких даро́в рабо́м Твои́м всеще́драя пода́тельнице; ра́дуйся, во бране́х, в боле́знех и труде́х и́х премилосе́рдая уте́шительнице; ра́дуйся, благоде́нственное житие́ зде́, и всеблаже́нное та́мо в ве́чности и́м устроя́ющая.

Конда́к ико́не Богоро́дицы, гла́с 8.

Оби́тель Зогра́фская и вся́ гора́ Афо́нская, от наше́ствия ерети́чествующих и кровожа́дных лати́н изба́вльшеся, благода́рно вопию́т Ти́, Богоро́дице: ра́дуйся, покро́ве, ши́рший о́блака, от зно́я гне́ва Бо́жия на́с защища́ющий и от все́х бе́д избавля́ющий.

Икос:

Ви́девше и́ноцы Зогра́фстии ико́ну Богома́тере, чу́дно к ни́м прише́дшую, и во огни́ не сгоре́вшую, с любо́вию облобыза́юща ю́, и во хра́ме Успе́ния наме́стною поста́виша, ра́достно вопию́ще: ра́дуйся, Влады́чице, оби́тели на́шея покро́ве и огражде́ние, от огня́ же и все́х бе́д избавля́ющи.

Пе́снь 7.

Ирмос: Не послужи́ша тва́ри богому́дрии, па́че Созда́вшаго, но, о́гненное преще́ние му́жески попра́вше, ра́довахуся, пою́ще: препе́тый отце́в Госпо́дь и Бо́г, благослове́н еси́.

В пещи́ искуше́ний и бе́д опаля́емых ороси́, о, Богома́ти, струя́ми Твои́х щедро́т, да посра́мятся врази́ на́ши, и да разуме́ют, я́ко мы́ — рабы́ Твои́ есмы́, и ве́ра на́ша — чиста́ и непоро́чна е́сть.

Якоже гора́ Афо́нская и вся́ Це́рковь Восто́чная, от ле́сти и наси́лия папослужи́телей, Тобо́ю, Богома́ти изба́вльшеся, благода́рно Тебе́ вопию́т: Благослове́нна Ты́ в жена́х, еди́на Всенепоро́чная Влады́чице.

Правосла́внии, собери́теся лю́дие, дне́сь, и торжество́ соста́вите Пречи́тей Богома́тери, прославля́юще святу́ю Ея́ ико́ну, е́юже нахожде́ние вра́жие предвозвеща́ет, и от все́х зо́л избавля́ет вопию́щия: Благослове́н Бо́г оте́ц на́ших.

Тво́рче и Спаси́телю на́ш, Христе́ Бо́же, приими́ Пречи́стыя Твоея́ ма́тере моли́тву, ю́же Тебе́ за ны́, гре́шныя, прино́сит, и изба́ви на́с от все́х бе́д и наве́тов вра́жиих, да Тебе́ ра́достно зове́м: Благослове́н Бо́г оте́ц на́ших.

Пе́снь 8.

Ирмос: Отроки благочести́выя в пещи́ Рождество́ Богоро́дичо спасло́ е́сть, тогда́ у́бо образу́емое, ны́не же де́йствуемое, вселе́нную всю́ воздвиза́ет пе́ти Тебе́: Го́спода по́йте, дела́, и превозноси́те Его́ во вся́ ве́ки.

По́йте, и́ноцы Афо́нстии, благословля́й, оби́тель Зогра́фская, Благу́ю Влады́чицу, Засту́пницу Всеми́лостивую, покро́вом Свои́м правосла́вныя лю́ди покрыва́ющую, ерети́ческих же вся́ за́мыслы разруша́ющую.

Хотя́ху иногда́ папослужи́телие всю́ го́ру Афо́нскую мече́м плени́ти, и вся́ и́ноки во свою́ па́губную е́ресь обрати́ти, но заступле́нием Твои́м, Влады́чице, Госпо́дь сотре́ горды́ню и́х, те́мже превозно́сим Тя́ во ве́ки.

Вседержи́тель Госпо́дь, всели́выйся во утро́бу Твою́, сто́лп утвержде́ния ве́рным Тя́ показа́, к нему́же прибега́юще, напа́стей свобожда́емся, искуше́ний ересе́й, и все́х бе́д избавля́емся, те́мже согла́сно пое́м, и превозно́сим Тя́, Чи́стая, во ве́ки.

Страстоте́рпцы Зогра́фския оби́тели, пострада́ти за благоче́стие укрепи́ла еси́, Влады́чице, с ни́ми у́бо моли́ Христа́ Бо́га о спасе́нии ду́ш на́ших, да благослови́м и превозно́сим Тя́ во вся́ ве́ки.

На 9-й песни поем песнь Пресвятыя Богородицы:

Вели́чит душа́ Моя́ Го́спода и возра́довася дух Мой о Бо́зе Спа́се Мое́м.

К коемуждо стиху припеваем: Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Я́ко призре́ на смире́ние рабы́ Своея́, се бо, от ны́не ублажа́т Мя вси ро́ди.

Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Я́ко сотвори́ Мне вели́чие Си́льный, и свя́то и́мя Его́, и ми́лость Его́ в ро́ды родо́в боя́щимся Его́.

Сотвори́ держа́ву мы́шцею Свое́ю, расточи́ го́рдыя мы́слию се́рдца их.

Низложи́ си́льныя со престо́л, и вознесе́ смире́нныя, а́лчущия испо́лни благ, и богатя́щияся отпусти́ тщи.

Восприя́т Изра́иля о́трока Своего́, помяну́ти ми́лости, я́коже глаго́ла ко отце́м на́шим, Авраа́му и се́мени его́ да́же до ве́ка.

Песнь 9.

Ирмос: Вся́к земноро́дный да взыгра́ется, Ду́хом просвеща́емь, да торжеству́ет же безпло́тных умо́в естество́, почита́ющее свяще́нное торжество́ Богома́тере, и да вопие́т: ра́дуйся, Всеблаже́нная Богоро́дице, Чи́стая Присноде́во.

Прииди́те, Правосла́вия пито́мцы, духо́вно возвесели́мся, дне́сь бо наста́ све́тлый пра́здник чу́дныя, Пречи́стыя Богома́тере ико́ны, е́юже Правосла́вие утвержда́ется, заблужде́ние же латиному́дрствующих я́ве изоблича́ется.

Сове́т зо́л совеща́ша на ны́ богобо́рцы лати́ны, я́коже Ахитофе́л на Дави́да, но моли́твами Твои́ми, Богоро́дице, се́й разори́ла еси́, и кре́пость и́х низложи́ла еси́.

Отча́явшихся ве́лие прибе́жище, обурева́емых ти́хое приста́нище — Ты́ еси́, Богоро́дице, те́мже заступи́ и на́с от все́х зо́л и лю́тых обстоя́ний, да покланя́ющеся святе́й ико́не Твое́й, усе́рдно Тя́ велича́ем.

Приими́, Отрокови́це Пречи́стая, приноси́мую Тебе́ пе́снь сию́, воздаю́щи благода́ть на Тя́ наде́ющимся, испроси́ у Сы́на Твоего́ ми́р це́рквам, правосла́вным христиа́ном пода́ждь побе́ду на богопроти́вныя, да Тя́ вся́к язы́к правосла́вно велича́ет.

Свети́лен.

Горды́ню низложи́, Влады́чице, латиному́дрствующих, да посра́мятся и уразуме́ют, я́ко не́сть во уче́нии и́х и́стины, но пре́лесть го́рдаго сатаны́, и́же хотя́ на небеси́ поста́вити престо́л сво́й, и бы́ти подо́бен Вы́шнему, до а́да низве́ржеся и в преиспо́днюю всели́ся.

Хвали́тны псалмы́, глас 8:

Вся́кое дыха́ние да хва́лит Го́спода./ Хвали́те Го́спода с небе́с,/ хвали́те Его́ в вы́шних.// Тебе́ подоба́ет песнь Бо́гу.

Хвали́те Его́ вси а́нгели Его́,/ хвали́те Его́ вся си́лы Его́.// Тебе́ подоба́ет песнь Бо́гу.

Сти́хиры, глас 8:

Стих: Сотвори́ти в них суд напи́сан/ сла́ва сия́ бу́дет всем преподо́бным Его́.

О, вели́кия бла́гости и несказа́ннаго милосе́рдия Твоего́, Влады́чице! Яко ико́ну Твою́ святу́ю в зало́г благоволе́ния Своего́ оби́тели на́шей дарова́ла еси́, и е́ю си́лу естества́ о́гненнаго мно́гажды укроти́ла еси́. Те́мже, благода́рственная Тебе́ принося́ще, вопие́м: о, Пречи́стая, не лиши́ и на́с Твоего́ Ма́терняго попече́ния, да Тя́ достодо́лжно пе́сньми почита́ем и ублажа́ем.

Стих: Хвали́те Его́ на си́лах Его́,/ хвали́те Его́ по мно́жеству вели́чествия Его́.

О, ко́ль вели́кая и неисче́тная благодея́ния Твоя́ ро́ду челове́ческому, Влады́чице! Ты́ бо, а́ки ле́ствица Иа́ковля, доброде́тельми небесе́ дося́жуща, Бо́га воплоще́нна во утро́бе Твое́й прия́ла еси́ и соесте́ственна на́м Того́ по челове́честву показа́ла еси́. Тобо́ю па́дшее естество́ на́ше на пе́рвое досто́инство взы́де; Тебе́ ра́ди мы́, ча́да гне́ва бы́вше, ча́да Бо́жия сотвори́хомся. То́юже насыща́еми, к жи́зни ве́чней и нетле́нней уготовля́емся. Сего́ ра́ди достодо́лжно почита́ем о́браз Тво́й святы́й, от него́ благовре́менну по́мощь прие́млюще.

Стих: Хвали́те Его́ в тимпа́не и ли́це,/ хвали́те Его́ во стру́нах и орга́не.

Стих: Хвали́те Его́ в кимва́лех доброгла́сных, хвали́те Его́ в кимва́лех восклица́ния. / Вся́кое дыха́ние да хва́лит Го́спода.

Благодари́м Тя́ при́сно, Богоро́дице Де́во, о вели́ких Твои́х на́м благодея́ниих, и́хже ве́мы и и́хже не ве́мы. Ты́ бо моли́твами Твои́ми умилостивля́еши на́м Влады́ку Христа́ и наше́дшия попуще́нием Его́ беды́ отвраща́еши и, я́ко ма́лыя ча́да, на́с при́сно назира́еши, и от все́х зо́л спаса́еши.

Глас 8: Сла́ва Отцу́ и Сы́ну и Свято́му Ду́ху И ны́не и при́сно и во ве́ки веко́в. Ами́нь.

Прииди́те, возра́дуемся держа́вней Засту́пнице на́шей Богоро́дице, прииди́те к Ея́ чудотво́рному о́бразу поклони́мся, от него́ бо неоску́дную благода́ть источа́ющи, и тмы́ избавля́ющи на́с от искуше́ний и бе́д, и вся́каго греха́, благоче́стно прославля́ющих, и чту́щих чу́дную Богома́тере святу́ю ико́ну. Те́м, воспева́юще, воззове́м: ра́дуйся, любе́зная ми́ру по́моще, во спасе́ние ду́ш на́ших.

Славосло́вие вели́кое:

Сла́ва в вы́шних Бо́гу, и на земли́ мир, в челове́цех благоволе́ние. Хва́лим Тя, благослови́м Тя, кла́няем Ти ся, славосло́вим Тя, благодари́м Тя, вели́кия ра́ди сла́вы Твоея́. Го́споди Царю́ Небе́сный, Бо́же О́тче Вседержи́телю, Го́споди, Сы́не Единоро́дный, Иису́се Христе́, и Святы́й Ду́ше. Го́споди Бо́же, А́гнче Бо́жий, Сы́не Оте́чь, взе́мляй грех ми́ра, поми́луй нас; взе́мляй грехи́ ми́ра, приими́ моли́тву на́шу; седя́й одесну́ю Отца́, поми́луй нас. Я́ко Ты еси́ еди́н Свят, Ты еси́ еди́н Госпо́дь, Иису́с Христо́с, в сла́ву Бо́га Отца́. Ами́нь.

На всяк день благословлю́ Тя, и восхвалю́ И́мя Твое́ во ве́ки, и в век ве́ка.

Сподо́би, Го́споди, в день сей без греха́ сохрани́тися нам. Благослове́н еси́, Го́споди, Бо́же оте́ц на́ших, и хва́льно и просла́влено И́мя Твое́ во ве́ки. Ами́нь.

Бу́ди, Го́споди, ми́лость Твоя́ на нас, я́коже упова́хом на Тя.

Благослове́н еси́, Го́споди, научи́ мя оправда́нием Твои́м. (Три́жды)

Го́споди, прибе́жище был еси́ нам в род и род. Аз рех: Го́споди, поми́луй мя, исцели́ ду́шу мою́, я́ко согреши́х Тебе́. Го́споди, к Тебе́ прибего́х, научи́ мя твори́ти во́лю Твою́, я́ко Ты еси́ Бог мой: я́ко у Тебе́ исто́чник живота́, во све́те Твое́м у́зрим свет. Проба́ви ми́лость Твою́ ве́дущим Тя.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Три́жды)

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Святы́й Безсме́ртный, поми́луй нас.

Святы́й Бо́же, Святы́й Кре́пкий, Святы́й Безсме́ртный, поми́луй нас.

Тропа́рь, глас 2:

Утверди́, Бо́же, святу́ю правосла́вную ве́ру, правосла́вных христиа́н во век ве́ка.

Честне́йшую Херуви́м и Сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу, Тя велича́ем.

Сла́ва, и ны́не. Го́споди, поми́луй. (Три́жды) Благослови́.

Господи Иисусе Христе, Сыне Божий, моли́твами Пречи́стыя Своея́ Ма́тере, преподобных и богоносных отец наших и всех святы́х, поми́луй и спаси нас я́ко Благ и Челове́колюбец.

Многоле́тие:

Вели́каго Господи́на и Отца́ на́шего Кири́лла,/ Святе́йшаго Патри́арха Моско́вского и всея́ Руси́,/ и Господи́на на́шего (Высоко-) Преосвяще́ннейшаго (имярек),/ (архи-)епи́скопа (митрополита (титул)),/ богохрани́мую страну́ на́шу Росси́йскую,/ и вся правосла́вныя христи́аны,// Го́споди, сохрани́ их на мно́гая ле́та.