Шрифт

▲

Богослужебные тексты для домашнего употребления

Службы иконам Пресвятой Богородицы

Последование Всеношного бдения в день памяти иконы Божией Матери Почаевская. Для домашнего (келейного) совершения

Оглавление

ВСЕНО́ЩНОЕ БДЕ́НИЕ

ВЕЛИ́КАЯ ВЕЧЕ́РНЯ

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас. Ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Трижды.)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, (трижды). Сла́ва, и ны́не:

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Таже, Го́споди, поми́луй, (12), Сла́ва, и ны́не:

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 103:

Поется часть псалма:

Благослови́, душе́ моя́, Го́спода. / Благослове́н еси́, Го́споди. / Го́споди, Бо́же мой, возвели́чился еси́ зело́. / Благослове́н еси́, Го́споди. / Во испове́дание и в велеле́поту обле́клся еси́. / Благослове́н еси́, Го́споди. / Посреде́ гор про́йдут во́ды. / Ди́вна дела́ Твоя́, Го́споди. / Вся прему́дростию сотвори́л еси́. / Сла́ва Ти, Го́споди, сотвори́вшему вся.

Или читается псалом полностью:

Благослови́, душе́ моя́, Го́спода. Го́споди, Бо́же мой, возвели́чился еси́ зело́. Во испове́дание и в велеле́поту обле́клся еси́. Одея́йся све́том, я́ко ри́зою, простира́яй не́бо, я́ко ко́жу. Покрыва́яй вода́ми превы́спренняя Своя́, полага́яй о́блаки на восхожде́ние Свое́, ходя́й на крилу́ ве́треню. Творя́й А́нгелы Своя́ ду́хи и слуги́ Своя́ пла́мень о́гненный. Основа́яй зе́млю на тве́рди ея́, не преклони́тся в век ве́ка. Бе́здна, я́ко ри́за, одея́ние ея́, на гора́х ста́нут во́ды, от запреще́ния Твоего́ побе́гнут, от гла́са гро́ма Твоего́ убоя́тся. Восхо́дят го́ры и нисхо́дят поля́ в ме́сто, е́же основа́л еси́ им. Преде́л положи́л еси́, eго́же не пре́йдут, ниже́ обратя́тся покры́ти зе́млю. Посыла́яй исто́чники в де́брех, посреде́ гор про́йдут во́ды. Напая́ют вся зве́ри се́льныя, ждут она́гри в жа́жду свою́. На ты́х пти́цы небе́сныя привита́ют, от среды́ ка́мения дадя́т глас. Напая́яй го́ры от превы́спренних Свои́х, от плода́ дел Твои́х насы́тится земля́. Прозяба́яй траву́ ското́м, и злак на слу́жбу челове́ком, извести́ хлеб от земли́. И вино́ весели́т се́рдце челове́ка, ума́стити лице́ еле́ем, и хлеб се́рдце челове́ка укрепи́т. Насы́тятся древа́ польска́я, ке́дри Лива́нстии, и́хже еси́ насади́л. Та́мо пти́цы вогнездя́тся, ероди́ево жили́ще предводи́тельствует и́ми. Го́ры высо́кия еле́нем, ка́мень прибе́жище за́яцем. Сотвори́л есть луну́ во времена́, со́лнце позна́ за́пад свой. Положи́л еси́ тму, и бысть нощь, в не́йже про́йдут вси зве́рие дубра́внии. Ски́мни рыка́ющии, восхи́тити и взыска́ти от Бо́га пи́щу себе́. Возсия́ со́лнце и собра́шася и в ло́жах свои́х ля́гут. Изы́дет челове́к на де́ло свое́ и на де́лание свое́ до ве́чера. Я́ко возвели́чишася дела́ Твоя́, Го́споди, вся прему́дростию сотвори́л еси́, испо́лнися земля́ тва́ри Твоея́. Сие́ мо́ре вели́кое и простра́нное, та́мо га́ди, и́мже несть числа́, живо́тная ма́лая с вели́кими, та́мо корабли́ препла́вают, змий сей, eго́же созда́л еси руга́тися eму́. Вся к Тебе́ ча́ют, да́ти пи́щу им во бла́го вре́мя. Да́вшу Тебе́ им соберу́т, отве́рзшу Тебе́ ру́ку вся́ческая испо́лнятся бла́гости, отвра́щшу же Тебе́ лице́, возмяту́тся, отъи́меши дух их, и исче́знут, и в персть свою́ возвратя́тся. По́слеши Ду́ха Твоего́, и сози́ждутся, и обнови́ши лице́ земли́. Бу́ди сла́ва Госпо́дня во ве́ки, возвесели́тся Госпо́дь о де́лех Свои́х, призира́яй на зе́млю, и творя́й ю́ трясти́ся, прикаса́яйся гора́м, и дымя́тся. Воспою́ Го́сподеви в животе́ мое́м, пою́ Бо́гу моему́, до́ндеже есмь, да услади́тся Ему́ бесе́да моя́, аз же возвеселю́ся о Го́споде. Да исче́знут гре́шницы от земли́, и беззако́нницы, я́коже не бы́ти им. Благослови́, душе́ моя́, Го́спода.

Со́лнце позна́ за́пад свой. Положи́л еси́ тму, и бысть нощь. Я́ко возвели́чишася дела́ Твоя́, Го́споди, вся прему́дростию сотвори́л еси́.

Сла́ва, и ны́не: Аллилу́иа, аллилу́иа, аллилу́иа, сла́ва Тебе́ Бо́же. Трижды.

Блаже́н муж:

Блаже́н муж, и́же не и́де на сове́т нечести́вых.

Аллилу́иа, аллилу́иа, аллилу́иа.

Я́ко весть Госпо́дь путь пра́ведных, и путь нечести́вых поги́бнет.

Аллилу́иа, аллилу́иа, аллилу́иа.

Рабо́тайте Го́сподеви со стра́хом и ра́дуйтеся Ему́ с тре́петом.

Аллилу́иа, аллилу́иа, аллилу́иа.

Блаже́ни вси наде́ющиися Нань.

Аллилу́иа, аллилу́иа, аллилу́иа.

Воскресни́, Го́споди, спаси́ мя, Бо́же мой.

Аллилу́иа, аллилу́иа, аллилу́иа.

Госпо́дне есть спасе́ние, и на лю́дех Твои́х благослове́ние Твое́.

Аллилу́иа, аллилу́иа, аллилу́иа.

Сла́ва Отцу́ и Сы́ну и Свято́му Духу.

Аллилу́иа, аллилу́иа, аллилу́иа.

И ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Го́споди, воззва́х, глас 5:

Го́споди, воззва́х к Тебе́, услы́ши мя./ Услы́ши мя, Го́споди./ Го́споди, воззва́х к Тебе́, услы́ши мя:/ вонми́ гла́су моле́ния моего́,/ внегда́ воззва́ти ми к Тебе́.// Услы́ши мя, Го́споди.

Да испра́вится моли́тва моя́,/ я́ко кади́ло пред Тобо́ю,/ воздея́ние руку́ мое́ю/ – же́ртва вече́рняя.// Услы́ши мя, Го́споди.

Стихи́ры, глас 5:

Стих: Изведи́ из темни́цы ду́шу мою́, / испове́датися И́мене Твоему́.

Прииди́те, росси́йстии собо́ри, и от все́х язы́к, ве́рнии, собери́теся, на го́ру Поча́евскую взы́дем и в до́м Ма́тере Бо́жия, и у́зрим ме́сто стопы́ Ея́, иде́же во о́гненнем столпе́ дре́вле яви́ся, и от исто́чника, отту́ду исте́кшаго, ве́рою окропле́ние прии́мем, и чудотво́рней ико́не Ея́ поклони́мся, проще́ния прегреше́ний на́ших прося́ще, и душа́м на́шим ве́лия ми́лости.

Стих: Мене́ ждут пра́ведницы, / до́ндеже возда́си мне.

Ко Твоему́ заступле́нию притека́ем, Пречи́стая, и чудеса́, во оби́тели Поча́евстей от Тебе́ бы́вшая, воспева́ем: исцеле́ния бо зде́ слепи́и и хро́мии ра́достно приима́ху, бесни́и свобожда́хуся, и ме́ртвии воскресо́ша, и не́сть такова́го жесто́каго се́рдца, е́же зре́нием святы́ни Твоея́ не умили́тся. Но утверди́, Всепе́тая, благо́е изволе́ние моля́щихся Тебе́ и пода́ждь душа́м на́шим ве́лию ми́лость.

Стих: Из глубины́ воззва́х к Тебе́, Го́споди, / Го́споди, услы́ши глас мой.

Ра́дуйся, Благода́тная Богоро́дице, Твое́ ста́до от небе́с назира́ющи, от Ангел у́бо пе́ние прие́млющи, от на́с же излива́емыя умиле́нныя сле́зы ви́дящи и моли́твенная воздыха́ния ду́ш на́ших слы́шащи: сия́ бо па́че вити́йства слове́снаго на милосе́рдие Тебе́ преклоня́ют, во е́же пода́ти душа́м на́шим ве́лию ми́лость.

Глас 2: Стих: Да бу́дут у́ши Твои́ / вне́млюще гла́су моле́ния моего́.

Твою́ ико́ну целу́юще, Влады́чице, и сле́ду стопы́ Твоея́ покланя́ющеся, и заступле́ния Твоя́ мно́гая помина́юще, досто́йных слове́с о прославле́нии Тебе́ не обрета́ем, но, благогове́йныя сле́зы Тебе́ в молча́нии принося́ще, а́ки на небеси́, себе́ мни́м, Твое́й сла́ве предстоя́щия; спаси́ Тебе́ велича́ющия.

Стих: А́ще беззако́ния на́зриши, Го́споди, Го́споди, кто постои́т; / я́ко у Тебе́ очище́ние есть.

На горе́ Фаво́рстей Пе́тр со дру́ги Госпо́дне Преображе́ние ви́дев и ле́потою сла́вы Его́ услажда́яся, та́ко вопия́ше Ему́: Го́споди, добро́ е́сть на́м зде́ бы́ти. Сицевы́й же глаго́л рце́м, бра́тие, на го́ру явле́ния Ма́тере Бо́жия собра́вшеся, и преображе́ние сла́вы Ея́, зде́ бы́вшее, помышля́юще, и во умиле́нии вопию́ще к Не́й: спаси́ Тебе́ велича́ющия.

Стих: И́мене ра́ди Твоего́ потерпе́х Тя, Го́споди, потерпе́ душа́ моя́ в сло́во Твое́, / упова́ душа́ моя́ на Го́спода.

На скале́ пусты́нней пе́рвее яви́лася еси́, Влады́чице, све́том огня́ просвеще́ние ве́рных зде́ прообразу́ющи и купину́ неопали́мую на па́мять лю́дем приводя́щи; пото́мже с небе́с виде́ние Твоего́ заступле́ния и́ноком поча́евским яви́ла еси́, я́ко покро́в Тво́й, Андре́ем дре́вле ви́денный. На́с же, моля́щихся, све́том озари́ духо́вным и спаси́ Тебе́ велича́ющия.

Глас 2: Сла́ва Отцу́ и Сы́ну и Свято́му Ду́ху. И ны́не и при́сно и во ве́ки веко́в. Ами́нь.

Непроходи́мая врата́, та́йно запеча́тствованная, благослове́нная Богоро́дице Де́во, приими́ моле́ния на́ша и принеси́ Твоему́ Сы́ну и Бо́гу, да спасе́т Тобо́ю ду́ши на́ша.

Све́те Тихи́й:

Све́те Ти́хий святы́я сла́вы Безсме́ртнаго Отца́ Небе́снаго, Свята́го, Блаже́ннаго, Иису́се Христе́! Прише́дше на за́пад со́лнца, ви́девше свет вече́рний, пое́м Отца́, Сы́на и Свята́го Ду́ха, Бо́га. Досто́ин еси́ во вся времена́ пет бы́ти гла́сы преподо́бными, Сы́не Бо́жий, живо́т дая́й; те́мже мир Тя сла́вит.

Пареми́и:

Бытия́ чте́ние

Изы́де Иа́ков от студенца́ кля́твеннаго и и́де в Харра́нь./ И обре́те ме́сто, и спа та́мо,/ за́йде бо со́лнце,/ и взят от ка́мения ме́ста того́,и положи́ возгла́вие себе́,/ и спа на ме́сте о́ном, и сон ви́де:/ и се ле́ствица утвержде́на на земли́,/ ея́же глава́ досяза́ше до Небе́с,/ и А́нгели Бо́жии восхожда́ху и нисхожда́ху по ней,/ Госпо́дь же утвержда́шеся на ней и рече́:/ Аз Бог Авраа́мов, отца́ твоего́, и Бог Исаа́ков, не бо́йся:/ земля́, иде́же ты спи́ши на ней,/ тебе́ дам ю и се́мени твоему́./ И бу́дет се́мя твое́, я́ко песо́к земны́й,/ и распространи́тся на мо́ре, и ли́ву, и се́вер, и на восто́ки,/ и возблагословя́тся о тебе́ вся коле́на земна́я и о се́мени твое́м./ И се Аз с тобо́ю, сохраня́яй тя на вся́ком пути́, а́може а́ще пои́деши,/ и возвращу́ тя в зе́млю сию́,/ я́ко не и́мам тебе́ оста́вити,/ до́ндеже сотвори́ти Ми вся, ели́ка глаго́лах тебе́./ И воста́ Иа́ков от сна своего́ и рече́:/ я́ко есть Госпо́дь на ме́сте сем, аз же не ве́дех./ И убоя́ся, и рече́:/ я́ко стра́шно ме́сто сие́,/ несть сие́, но дом Бо́жий, и сия́ врата́ Небе́сная.

Исхо́да чте́ние

Вни́де Моисе́й в го́ру Бо́жию Хори́в. Яви́ же ся ему́ Ангел Госпо́день в пла́мени о́гненне из купины́. И ви́де, я́ко купина́ горя́ше огне́м, и купина́ не сгара́ше. Рече́ же Моисе́й: преше́д, узрю́ виде́ние вели́кое сие́, что́ я́ко не сгара́ет купина́? Якоже ви́де Госпо́дь, я́ко приступа́ет ви́дети, призва́ его́ Госпо́дь из купины́, глаго́ля: Моисе́е, Моисе́е. Он же рече́: что́ е́сть? И рече́: не прибли́жися се́мо; изу́й сапо́г от ногу́ твое́ю: ме́сто бо, на не́мже ты́ стои́ши, земля́ свята́ е́сть. И рече́ ему́: Аз е́смь Бо́г отца́ твоего́, Бо́г Авраа́мов, и Бо́г Исаа́ков, и Бо́г Иа́ковль. Отврати́ же Моисе́й лице́ свое́: стыдя́ше бо ся зре́ти пред Бо́гом. Рече́ же Госпо́дь к Моисе́ю: ви́дя, ви́дех озлобле́ние люде́й Мои́х, и́же во Еги́пте, и во́пль и́х услы́шах от наси́льствующих в де́лех, ве́м бо боле́знь и́х, и снидо́х, е́же изъя́ты и́х от руки́ еги́птян, и извести́ и́х от земли́ о́ныя, и ввести́ и́х в зе́млю бла́гу и мно́гу, в зе́млю, точа́щу ме́д и млеко́.

Прoро́чества Иезеки́илева чте́ние

Та́ко глаго́лет Госпо́дь: бу́дет от дне́ осма́го и про́чее, сотворя́т иере́и на олтари́ всесожже́ния ва́шего и я́же спасе́ния ва́шего, и прииму́ вы́, глаго́лет Адонаи́ Госпо́дь. И обрати́ мя́ на пу́ть вра́т святы́х вне́шних, зря́щих на восто́ки, и сия́ бя́ху затворе́на. И рече́ Госпо́дь ко мне́: врата́ сия́ затворе́на бу́дут, и не отве́рзутся, и никто́же про́йдет сквозе́ и́х, я́ко Госпо́дь Бо́г Изра́илев про́йдет и́ми, и бу́дут затворе́на. Яко игу́мен ся́дет в ни́х сне́сти хле́б: по пути́ ела́мских вра́т вни́дет, и по пути́ его́ изы́дет. И введе́ мя́ по пути́ вра́т святы́х, су́щих к се́веру, пря́мо хра́му, и ви́дех, и се́ испо́лнь сла́вы хра́м Госпо́день.

Го́споди, поми́луй. (Три́жды,)

Сподо́би, Го́споди:

Сподо́би, Го́споди, в ве́чер сей без греха́ сохрани́тися нам. Благослове́н еси́, Го́споди, Бо́же оте́ц на́ших, и хва́льно и просла́влено и́мя Твое́ во ве́ки. Ами́нь.

Бу́ди, Го́споди, ми́лость Твоя́ на нас, я́коже упова́хом на Тя. Благослове́н еси́, Го́споди, научи́ мя оправда́нием Твои́м. Благослове́н еси́, Влады́ко, вразуми́ мя оправда́нием Твои́м. Благослове́н еси́, Святы́й, просвети́ мя оправда́нии Твои́ми.

Го́споди, ми́лость Твоя́ во век, дел руку́ Твое́ю не пре́зри. Тебе́ подоба́ет хвала́, Тебе́ подоба́ет пе́ние, Тебе́ сла́ва подоба́ет. Отцу́ и Сы́ну и Свято́му Ду́ху, ны́не и при́сно и во ве́ки веко́в. Ами́нь.

Лития́:

Стихи́ры:

Глас 6: Струи́ исцеле́ний всегда́ источа́еши, Де́во, ве́рным, притека́ющим к цельбоно́сней стопе́ Твое́й, Богоневе́сто! Ту́не бо излива́еши от нея́ оби́льно и бога́тно неду́гующим исцеле́ния: слепы́я явля́еши ви́дяща я́сно, притека́ющия к Тебе́ хромы́я мно́гия испра́вила еси́ и разсла́бленныя стягну́ла еси́, подаю́щи все́м, я́же ко спасе́нию, проше́ния и душа́м на́шим ве́лию ми́лость.

Прииди́те, празднолю́бцы, чу́дное явле́ние ико́ны Бо́жия Ма́тере, е́же на горе́ Поча́евстей, просла́вим: пресла́вно бо и боголе́пно во оби́тели Поча́евстей возсия́, неистощи́мую чуде́с благода́ть все́м излива́ющи. Те́м усты́ и се́рдцы, и пе́сньми, и пе́нии духо́вными се́й святы́й де́нь со все́ми, на го́ру Поча́евскую притека́ющими, пра́зднуем све́тло.

Сла́ва, и ны́не, глас 6:

Воспо́йте, росси́йстии наро́ди, Цари́це Бо́жией Ма́тери пе́снь но́ву, соде́явшей чу́до, нове́йшее все́х дре́вних чуде́с, на горе́ Поча́евстей: си́льныя бо сокруши́, стре́лы ага́рянския, на ню́ от тата́р направля́емыя, на главу́ и́х вспя́ть обраща́ющи, немощны́я же препоя́са си́лою свы́ше, и вознесе́ смире́нныя. То́й победи́тельная возсыла́ем и, припа́дающе, вопие́м: Засту́пнице на́ша усе́рдная, Ма́ти Го́спода Вы́шняго, сла́ва Тебе́!

Го́споди, поми́луй. (40 раз)

Стихи́ры на стихо́вне:

Стихи́ры: Глас 3:

Кто́ возглаго́лет си́лы Твоя́, Богоро́дице, цельбоно́сный Поча́евский исто́чниче? Неистощи́мыми бо дарова́нии изоби́лующи, мно́гая и па́че естества́ содева́еши исцеле́ния, не то́кмо теле́сныя боле́зни врачу́юши, но и душе́вныя стра́сти на́ша измыва́ющи, и все́м подае́ши ве́лию ми́лость.

Стих: Слы́ши, Дщи́, и ви́ждь, и приклони́ у́хо Твое́.

Твои́ми чудесы́, Богоро́дице, неве́рнии умили́вшеся, Правосла́вную ве́ру испове́даху, и еретицы́ от е́реси отреко́шася и ко ста́ду церко́вному сопричто́шася, бесни́и от мучи́тельства де́монов свобожда́хуся, и жесто́кая сердца́ смири́шася. Убо и ду́ши на́ша покая́нием просвети́, подаю́щи на́м ве́лию ми́лость.

Стих: Лицу́ Твоему́ помо́лятся бога́тии лю́дстии.

По избавле́нии от неве́рных Твоея́ ла́вры, Влады́чице, ико́ну Твою́ правосла́внии лю́дие ра́достно прия́ша, я́коже дре́вле Животворя́щий Кре́ст Сы́на Твоего́ от плене́ния пе́рсскаго; те́мже исцеле́ния, от нея́ быва́емая, та́кожде умно́жишася, и́хже не лиши́ и на́с, моля́щих Ти ся, подаю́щи душа́м на́шим ми́р и ве́лию ми́лость.

Слава, И ныне, глас 8:

Седя́й на херуви́мех и Пева́емый от серафи́м из утро́бы Де́вы благоволи́ роди́тися, и Сию́, я́ко Ма́терь Бо́жию, в моли́тву призыва́ти на́с научи́, пе́рвее в Ка́не Галиле́йстей Тоя́ моле́ния о лю́дех прие́мый и доны́не моли́тв Ея́ ра́ди проше́ния на́ша исполня́яй. Прииди́те у́бо, христоимени́тии лю́дие, на ме́сто чуде́с Пресвяты́я Богоро́дицы и, моле́ния ва́ша пред ико́ною Ея́ излива́юще, несомне́нною ве́рою утверди́теся, е́же прия́ти на́м от Нея́ ве́лию ми́лость.

Моли́тва свята́го Симео́на Богоприи́мца:

Ны́не отпуща́еши раба́ Твоего́, Влады́ко,/ по глаго́лу Твоему́, с ми́ром;/ я́ко ви́деста о́чи мои́ спасе́ние Твое́,/ е́же еси́ угото́вал пред лице́м всех люде́й,/ свет во открове́ние язы́ков,// и сла́ву люде́й Твои́х Изра́иля.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Го́споди, поми́луй. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Тропа́рь, глас 5:

Пред свято́ю Твое́ю ико́ною, Влады́чице, моля́щиися исцеле́ний сподобля́ются, ве́ры и́стинныя позна́ние прие́млют и ага́рянская наше́ствия отража́ют. Те́мже и на́м, к Тебе́ припа́дающим, грехо́в оставле́ние испроси́, по́мыслы благоче́стия сердца́ на́ша просвети́ и к Сы́ну Твоему́ моли́тву вознеси́ о спасе́нии ду́ш на́ших. (Три́жды)

Бу́ди И́мя Госпо́дне благослове́но от ны́не и до ве́ка. (Три́жды)

Псало́м 33:

Благословлю́ Го́спода на вся́кое вре́мя,/ вы́ну хвала́ Его́ во усте́х мои́х./ О Го́споде похва́лится душа́ моя́,/ да услы́шат кро́тцыи, и возвеселя́тся./ Возвели́чите Го́спода со мно́ю,/ и вознесе́м И́мя Его́ вку́пе./ Взыска́х Го́спода, и услы́ша мя,/ и от все́х скорбе́й мои́х изба́ви мя./ Приступи́те к Нему́, и просвети́теся,/ и ли́ца ва́ша не постыдя́тся./ Сей ни́щий воззва́, и Госпо́дь услы́ша и́,/ и от все́х скорбе́й его́ спасе́ и́./ Ополчи́тся а́нгел Госпо́день о́крест боя́щихся Его́,/ и изба́вит их./ Вкуси́те и ви́дите, я́ко благ Госпо́дь:/ блаже́н муж, и́же упова́ет Нань./ Бо́йтеся Го́спода, вси́ святи́и Его́,/ я́ко несть лише́ния боя́щимся Его́./ Бога́тии обнища́ша и взалка́ша:/ взыска́ющии же Го́спода// не лиша́тся вся́каго бла́га.

У́ТРЕНЯ.

Шестопса́лмие:

Сла́ва в вы́шних Бо́гу, и на земли́ мир, в челове́цех благоволе́ние. (Три́жды)

Го́споди, устне́ мои́ отве́рзеши, и уста́ моя́ возвестя́т хвалу́ Твою́. (Два́жды)

Псалом 3:

Го́споди, что ся умно́жиша стужа́ющии ми́? Мно́зи востаю́т на мя, мно́зи глаго́лют души́ мое́й: несть спасе́ния eму́ в Бо́зе eго́. Ты же, Го́споди, Засту́пник мой еси́, сла́ва моя́ и вознося́й главу́ мою́. Гла́сом мои́м ко Го́споду воззва́х, и услы́ша мя от горы́ святы́я Своея́. Аз усну́х, и спах, воста́х, я́ко Госпо́дь засту́пит мя. Не убою́ся от тем люде́й, о́крест напа́дающих на мя. Воскресни́, Го́споди, спаси́ мя, Бо́же мой, я́ко Ты порази́л еси́ вся вражду́ющыя ми всу́е: зу́бы гре́шников сокруши́л еси́. Госпо́дне есть спасе́ние, и на лю́дех Твои́х благослове́ние Твое́.

Аз усну́х, и спах, воста́х, я́ко Госпо́дь засту́пит мя.

Псалом 37:

Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́. Я́ко стре́лы Твоя́ унзо́ша во мне, и утверди́л еси́ на мне ру́ку Твою́. Несть исцеле́ния в пло́ти мое́й от лица́ гне́ва Твоего́, несть ми́ра в косте́х мои́х от лица́ грех мои́х. Я́ко беззако́ния моя́ превзыдо́ша главу́ мою́, я́ко бре́мя тя́жкое отяготе́ша на мне. Возсмерде́ша и согни́ша ра́ны моя́ от лица́ безу́мия моего́. Пострада́х и сляко́хся до конца́, весь день се́туя хожда́х. Я́ко ля́двия моя́ напо́лнишася поруга́ний, и несть исцеле́ния в пло́ти мое́й. Озло́блен бых и смири́хся до зела́, рыка́х от воздыха́ния се́рдца моего́. Го́споди, пред Тобо́ю все жела́ние мое́ и воздыха́ние мое́ от Тебе́ не утаи́ся. Се́рдце мое́ смяте́ся, оста́ви мя си́ла моя́, и свет о́чию мое́ю, и той несть со мно́ю. Дру́зи мои́ и и́скреннии мои́ пря́мо мне прибли́жишася и ста́ша, и бли́жнии мои́ отдале́че мене́ ста́ша и нужда́хуся и́щущии ду́шу мою́, и и́щущии зла́я мне глаго́лаху су́етная и льсти́вным весь день поуча́хуся. Аз же я́ко глух не слы́шах и я́ко нем не отверза́яй уст свои́х. И бых я́ко челове́к не слы́шай и не имы́й во усте́х свои́х обличе́ния. Я́ко на Тя, Го́споди, упова́х, Ты услы́шиши, Го́споди Бо́же мой. Я́ко рех: да не когда́ пора́дуют ми ся врази́ мои́: и внегда́ подвижа́тися нога́м мои́м, на мя велере́чеваша. Я́ко аз на ра́ны гото́в, и боле́знь моя́ предо мно́ю есть вы́ну. Я́ко беззако́ние мое́ аз возвещу́ и попеку́ся о гресе́ мое́м. Врази́ же мои́ живу́т и укрепи́шася па́че мене́, и умно́жишася ненави́дящии мя без пра́вды. Воздаю́щии ми зла́я возблага́я оболга́ху мя, зане́ гоня́х благосты́ню. Не оста́ви мене́, Го́споди Бо́же мой, не отступи́ от Мене́. Вонми́ в по́мощь мою́, Го́споди спасе́ния моего́.

Не оста́ви мене́, Го́споди Бо́же мой, не отступи́ от Мене́. Вонми́ в по́мощь мою́, Го́споди спасе́ния моего́.

Псалом 62:

Бо́же, Бо́же мой, к Тебе́ у́тренюю, возжада́ Тебе́ душа́ моя́, коль мно́жицею Тебе́ плоть моя́, в земли́ пу́сте и непрохо́дне, и безво́дне. Та́ко во святе́м яви́хся Тебе́, ви́дети си́лу Твою́ и сла́ву Твою́. Я́ко лу́чши ми́лость Твоя́ па́че живо́т, устне́ мои́ похвали́те Тя. Та́ко благословлю́ Тя в животе́ мое́м, о и́мени Твое́м воздежу́ ру́це мои́. Я́ко от ту́ка и ма́сти да испо́лнится душа́ моя́, и устна́ма ра́дости восхва́лят Тя уста́ моя́. А́ще помина́х Тя на посте́ли мое́й, на у́тренних поуча́хся в Тя. Я́ко был еси́ Помо́щник мой, и в кро́ве крилу́ Твое́ю возра́дуюся. Прильпе́ душа́ моя́ по Тебе́, мене́ же прия́т десни́ца Твоя́. Ти́и же всу́е иска́ша ду́шу мою́, вни́дут в преиспо́дняя земли́, предадя́тся в ру́ки ору́жия, ча́сти ли́совом бу́дут. Царь же возвесели́тся о Бо́зе, похва́лится всяк клены́йся Им, я́ко загради́шася уста́ глаго́лющих непра́ведная.

На у́тренних поуча́хся в Тя. Я́ко был еси́ Помо́щник мой, и в кро́ве крилу́ Твое́ю возра́дуюся. Прильпе́ душа́ моя́ по Тебе́, мене́ же прия́т десни́ца Твоя́.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Го́споди поми́луй. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Псалом 87:

Го́споди Бо́же спасе́ния моего́, во дни воззва́х, и в нощи́ пред Тобо́ю. Да вни́дет пред Тя моли́тва моя́: приклони́ у́хо Твое́ к моле́нию моему́, я́ко испо́лнися зол душа́ моя́, и живо́т мой аду прибли́жися. Привмене́н бых с низходя́щими в ров, бых я́ко челове́к без по́мощи, в ме́ртвых свобо́дь, я́ко я́звеннии спя́щии во гро́бе, и́хже не помяну́л еси́ ктому́, и ти́и от руки́ Твоея́ отринове́ни бы́ша. Положи́ша мя в ро́ве преиспо́днем, в те́мных и се́ни сме́ртней. На мне утверди́ся я́рость Твоя́, и вся во́лны Твоя́ наве́л еси́ на мя. Уда́лил еси́ зна́емых мои́х от Мене́, положи́ша мя ме́рзость себе́: пре́дан бых и не исхожда́х. О́чи мои́ изнемого́сте от нищеты́, воззва́х к Тебе́, Го́споди, весь день, возде́х к Тебе́ ру́це мои́. Еда́ ме́ртвыми твори́ши чудеса́? Или́ вра́чеве воскреся́т, и испове́дятся Тебе́? Еда́ пове́сть кто во гро́бе ми́лость Твою́, и и́стину Твою́ в поги́бели? Еда́ позна́на бу́дут во тьме чудеса́ Твоя́, и пра́вда Твоя́ в земли́ забве́нней? И аз к Тебе́, Го́споди, воззва́х и у́тро моли́тва моя́ предвари́т Тя. Вску́ю, Го́споди, отре́еши ду́шу мою́, отвраща́еши лице́ Твое́ от Мене́? Нищ есмь аз, и в труде́х от ю́ности моея́; возне́с же ся, смири́хся, и изнемого́х. На мне преидо́ша гне́ви Твои́, устраше́ния Твоя́ возмути́ша мя, обыдо́ша мя я́ко вода́, весь день одержа́ша мя вку́пе. Уда́лил еси́ от Мене́ дру́га и и́скренняго, и зна́емых мои́х от страсте́й.

Го́споди Бо́же спасе́ния моего́, во дни воззва́х, и в нощи́ пред Тобо́ю. Да вни́дет пред Тя моли́тва моя́: приклони́ у́хо Твое́ к моле́нию моему́.

Псалом 102:

Благослови́, душе́ моя́, Го́спода, и вся вну́тренняя моя́ и́мя свя́тое Его́. Благослови́, душе́ моя́, Го́спода, и не забыва́й всех воздая́ний Его́, очища́ющаго вся беззако́ния твоя́, исцеля́ющаго вся неду́ги твоя́, избавля́ющаго от истле́ния живо́т твой, венча́ющаго тя ми́лостию и щедро́тами, исполня́ющаго во благи́х жела́ние твое́: обнови́тся я́ко о́рля ю́ность твоя́. Творя́й ми́лостыни Госпо́дь, и судьбу́ всем оби́димым. Сказа́ пути́ Своя́ Моисе́ови, сыново́м Изра́илевым хоте́ния Своя́: Щедр и Ми́лостив Госпо́дь, Долготерпели́в и Многоми́лостив. Не до конца́ прогне́вается, ниже́ во век вражду́ет, не по беззако́нием на́шым сотвори́л есть нам, ниже́ по грехо́м на́шым возда́л есть нам. Я́ко по высоте́ небе́сней от земли́, утверди́л есть Госпо́дь ми́лость Свою́ на боя́щихся Его́. Ели́ко отстоя́т восто́цы от за́пад, уда́лил есть от нас беззако́ния на́ша. Я́коже ще́дрит оте́ц сы́ны, уще́дри Госпо́дь боя́щихся Его́. Я́ко Той позна́ созда́ние на́ше, помяну́, я́ко персть есмы́. Челове́к, я́ко трава́ дни́е eго́, я́ко цвет се́льный, та́ко оцвете́т, я́ко дух про́йде в нем, и не бу́дет, и не позна́ет ктому́ ме́ста своего́. Ми́лость же Госпо́дня от ве́ка и до ве́ка на боя́щихся Его́, и пра́вда Его́ на сыне́х сыно́в, храня́щих заве́т Его́, и по́мнящих за́поведи Его́ твори́ти я́. Госпо́дь на Небеси́ угото́ва Престо́л Свой, и Ца́рство Его́ все́ми облада́ет. Благослови́те Го́спода вси А́нгели Его́, си́льнии кре́постию, творя́щии сло́во Его́, услы́шати глас слове́с Его́. Благослови́те Го́спода вся Си́лы Его́, слуги́ Его́, творя́щии во́лю Его́. Благослови́те Го́спода вся дела́ Его́, на вся́ком ме́сте влады́чества Его́, благослови́, душе́ моя́, Го́спода.

На вся́ком ме́сте влады́чества Его́, благослови́, душе́ моя́, Го́спода.

Псалом 142:

Го́споди, услы́ши моли́тву мою́, внуши́ моле́ние мое́ во и́стине Твое́й, услы́ши мя в пра́вде Твое́й и не вни́ди в суд с рабо́м Твои́м, я́ко не оправди́тся пред Тобо́ю всяк живы́й. Я́ко погна́ враг ду́шу мою́, смири́л есть в зе́млю живо́т мой, посади́л мя есть в те́мных, я́ко ме́ртвыя ве́ка. И уны́ во мне дух мой, во мне смяте́ся се́рдце мое́. Помяну́х дни дре́вния, поучи́хся во всех де́лех Твои́х, в творе́ниих руку́ Твое́ю поуча́хся. Возде́х к Тебе́ ру́це мои́, душа́ моя́, я́ко земля́ безво́дная Тебе́. Ско́ро услы́ши мя, Го́споди, исчезе́ дух мой, не отврати́ лица́ Твоего́ от Мене́, и уподо́блюся низходя́щым в ров. Слы́шану сотвори́ мне зау́тра ми́лость Твою́, я́ко на Тя упова́х. Скажи́ мне, Го́споди, путь во́ньже пойду́, я́ко к Тебе́ взях ду́шу мою́. Изми́ мя от враг мои́х, Го́споди, к Тебе́ прибего́х. Научи́ мя твори́ти во́лю Твою́, я́ко Ты еси́ Бог мой. Дух Твой Благи́й наста́вит мя на зе́млю пра́ву. И́мене Твоего́ ра́ди, Го́споди, живи́ши мя, пра́вдою Твое́ю изведе́ши от печа́ли ду́шу мою́. И ми́лостию Твое́ю потреби́ши враги́ моя́ и погуби́ши вся стужа́ющыя души́ мое́й, я́ко аз раб Твой есмь.

Услы́ши мя, Го́споди, в пра́вде Твое́й и не вни́ди в суд с рабо́м Твои́м.

Дух Твой Благи́й наста́вит мя на зе́млю пра́ву.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Тропа́рь глас 5:

Сла́ва Отцу́ и Сы́ну и Свято́му Ду́ху. И ны́не и при́сно и во ве́ки веко́в. Ами́нь.

Здесь читается кафизма, положенная по дню, или сразу седальны:

Го́споди, поми́луй. (Три́жды)

Седален, глас 4:

Богоро́дица христиа́ном всегда́ бы́сть ми́лостивая Услы́шательница, от коне́ц земли́ к Не́й вознося́щим моли́твенныя гла́сы, Поча́евскую же го́ру я́ко ме́сто явле́ний Свои́х избра́, и сего́ ра́ди зде́ бы́ти поспеша́ют христиа́не, и́хже моле́ния не отврати́, Влады́чице, но и пра́ведным, и гре́шным бу́ди Хода́таица.

Глас 7: Сла́ва Отцу́ и Сы́ну и Свято́му Ду́ху. И ны́не и при́сно и во ве́ки веко́в. Ами́нь.

Отве́рзи врата́ твоя́, свята́я ла́вро Поча́евская, и приими́ приходя́щия безчи́сленныя наро́ды, святу́ю ико́ну Влады́чицы облобыза́ти умиле́нно тща́щияся и вку́пе со бра́тиею мона́шествующих усе́рдная моле́ния вознося́щия ко Христу́ Бо́гу, да моли́твами Присноде́вы, Ма́тере Своея́, ми́лостив бу́дет рабо́м Свои́м.

Полиеле́й:

Хвали́те И́мя Госпо́дне, хвали́те, раби́ Го́спода.

Аллилу́иа, аллилу́иа, аллилу́иа.

Благослове́н Госпо́дь от Сио́на, живы́й во Иерусали́ме.

Аллилу́иа, аллилу́иа, аллилу́иа.

Испове́дайтеся Го́сподеви, я́ко Благ, я́ко в век ми́лость Его́.

Аллилу́иа, аллилу́иа, аллилу́иа.

Испове́дайтеся Бо́гу Небе́сному, я́ко в век ми́лость Его́.

Аллилу́иа, аллилу́иа, аллилу́иа.

Велича́ние:

Велича́ем Тя́, Пресвята́я Де́во, и почита́ем честну́ю ико́ну Твою́, ю́же от ле́т дре́вних на горе́ Поча́евстей просла́вила еси́.

Псало́м избра́нный:

Помяни́, Го́споди, Дави́да и всю кро́тость его́. Я́ко кля́тся Го́сподеви, обеща́ся Бо́гу Иа́ковлю. Се, слы́шахом я́ во Евфра́фе, обрето́хом я́ в поля́х дубра́вы. Пресла́вная глаго́лашася о тебе́, гра́де Бо́жий. Бог посреде́ его́, и не подви́жится. Кля́тся Госпо́дь Дави́ду и́стиною, и не отве́ржется ея́. От плода́ чре́ва твоего́ посажду́ на престо́ле твое́м. Я́ко избра́ Госпо́дь Сио́на, изво́ли его́ в жили́ще себе́. Освяти́л есть селе́ние Свое́ Вы́шний. Святы́ня и велеле́пота во святи́ле его́. Свят храм твой, ди́вен в пра́вде. До́му Твоему́ подоба́ет святы́ня, Го́споди, в долготу́ дний. Помяну́ и́мя Твое́ во вся́ком ро́де и ро́де. Благослове́н Госпо́дь во век, и в век ве́ка.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа,// сла́ва Тебе́, Бо́же. (Трижды)

Седа́льны:

Глас 6:

Дне́сь о все́х чудесе́х Твои́х, Влады́чице, на горе́ Поча́евстей бы́вших, благодаре́ния Ти́ Це́рковь прино́сит. Те́мже соше́дшияся лю́ди Твоя́ от небе́с благослови́, ра́зум на́ш уцелому́дри, и житие́ на́ше испра́вити помози́, и о спасе́нии ду́ш на́ших моле́ние к Бо́гу вознеси́, мо́лим Ти ся.

Степе́нна, глас 4:

От ю́ности моея́/ мно́зи бо́рют мя стра́сти,/ но Сам мя заступи́// и спаси́, Спа́се мой.

Ненави́дящии Сио́на,/ посрами́теся от Го́спода,/ я́ко трава́ бо огне́м// бу́дете изсо́хше.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Святы́м Ду́хом/ вся́ка душа́ живи́тся,/ и чистото́ю возвыша́ется,// светле́ется Тро́йческим еди́нством, священнота́йне.

Го́споди, поми́луй. (Три́жды)

От Луки Свята́го Ева́нгелия чте́ние

Сла́ва, Тебе́, Го́споди, сла́ва Тебе́.

Во дни о́ны, воста́вши, Мариа́м, и́де в го́рняя со тща́нием, во град Иу́дов. И вни́де в дом Заха́риин, и целова́ Елисаве́т. И бысть я́ко услы́ша Елисаве́т целова́ние Мари́ино, взыгра́ся младе́нец во чре́ве ея́: и испо́лнися Ду́ха Свя́та Елисаве́т. И возопи́ гла́сом ве́лиим, и рече́: благослове́на Ты в жена́х, и благослове́н плод чре́ва Твоего́. И отку́ду мне сие́, да прии́де Ма́ти Го́спода моего́ ко мне? Се бо, я́ко бысть глас целова́ния Твоего́ во у́шию мое́ю, взыгра́ся младе́нец ра́дощами во чре́ве мое́м. И блаже́нна Ве́ровавшая, я́ко бу́дет соверше́ние глаго́ланным Ей от Го́спода. И рече́ Мариа́м: вели́чит душа́ Моя́ Го́спода, и возра́довася дух Мой о Бо́зе Спа́се Мое́м. Я́ко призре́ на смире́ние Рабы́ Своея́: се бо, отны́не ублажа́т Мя вси ро́ди. Я́ко сотвори́ Мне вели́чие Си́льный, и свя́то и́мя Его́. Пребы́сть же Мариа́м с не́ю я́ко три ме́сяцы, и возврати́ся в дом Свой.

Сла́ва, Тебе́, Го́споди, сла́ва Тебе́.

Псало́м 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя. Я́ко беззако́ние мое́ аз зна́ю и грех мой предо мно́ю есть вы́ну. Тебе́ Еди́ному согреши́х, и лука́вое пред Тобо́ю сотвори́х, я́ко да оправди́шися во словесе́х Твои́х и победи́ши, внегда́ суди́ти Ти. Се бо в беззако́ниих зача́т есмь, и во гресе́х роди́ мя ма́ти моя́. Се бо и́стину возлюби́л еси́, безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся, омы́еши мя, и па́че сне́га убелю́ся. Слу́ху моему́ да́си ра́дость и весе́лие, возра́дуются ко́сти смире́нныя. Отврати́ лице́ Твое́ от грех мои́х, и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́, и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́, и Ду́хом Влады́чним утверди́ мя. Научу́ беззако́нныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́, возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо, всесожже́ния не благоволи́ши. Же́ртва Бо́гу дух сокруше́н, се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския, тогда́ благоволи́ши же́ртву пра́вды, возноше́ние и всесожега́емая: тогда́ возложа́т на олта́рь Твой тельцы́.

Глас 6:

Сла́ва Отцу́ и Сы́ну и Свято́му Ду́ху./ Моли́твами Богоро́дицы, / Ми́лостиве, очи́сти / мно́жества согреше́ний на́ших.

И ны́не и при́сно и во ве́ки веко́в. Ами́нь./ Моли́твами Богоро́дицы, / Ми́лостиве, очи́сти / мно́жества согреше́ний на́ших.

Поми́луй мя, Бо́же,/ по вели́цей ми́лости Твое́й,/ и по мно́жеству щедро́т Твои́х// очи́сти беззако́ние мое́.

Стихи́ра, глас 5:

Прииди́те, росси́йстии собо́ри, и от все́х язы́к, ве́рнии, собери́теся, на го́ру Поча́евскую взы́дем и в до́м Ма́тере Бо́жия, и у́зрим ме́сто стопы́ Ея́, иде́же во о́гненнем столпе́ дре́вле яви́ся, и от исто́чника, отту́ду исте́кшего, ве́рою окропле́ние прии́мем, и чудотво́рней ико́не Ея́ поклони́мся, проще́ния прегреше́ний на́ших прося́ще и душа́м на́шим ве́лия ми́лости.

Го́споди, поми́луй. (12 раз)

Кано́н, [его́же краегране́сие: Богоро́дице Поча́евская, спаси́ и сохрани́ правосла́вную Ру́сь,] гла́с 8.

Пе́снь 1.

Ирмо́с: Пои́м Го́сподеви, прове́дшему лю́ди Своя́ сквозе́ Чермно́е мо́ре, я́ко Еди́н сла́вно просла́вися.

Припев: Пресвятая Богородица, спаси нас.

Бо́жию Ма́терь воспои́м, ве́рнии, моле́ния к Не́й принося́ще и чудотво́рному Ея́ о́бразу покланя́ющеся ве́рою и любо́вию.

О, Влады́чице, убо́гия хвалы́ на́шея не отве́ржи и грехо́вныя нищеты́ не возгнуша́йся, но припа́дающия лю́ди приими́, я́ко Блага́я, Блага́го же Роди́тельница.

Гора́ Поча́евская, пре́жде те́мная и безве́стная, явле́нием Твои́м, Влады́чице, Сина́ю уподо́бися: та́мо бо о́гнь, купину́ не паля́й, Тебе́ прообразова́ше, зде́ же Сама́, во огни́ зри́мая, христиа́ном яви́лася еси́.

Очи ва́ши блаже́ни, о па́стырие о́вчии, Влады́чицу на горе́ Поча́евстей узре́вшии и те́м ча́сти вифлее́мских па́стырей сподо́бльшиися. Те́мже у́бо блаже́ни су́ть христиа́не, сего́ не ви́девшии, но ве́рою ме́сту тому́ покланя́ющиися.

Ро́ди росси́йстии и от вся́каго язы́ка ве́рнии, соше́дшеся к ме́сту явле́ния Влады́чицы, чудотво́рному Ея́ о́бразу поклони́мся и о свои́х согреше́ниих воспла́чем, о милосе́рдии же Госпо́дни возра́дуемся.

Огненный сто́лп, Влады́чице, Тебе́ и́ноком и па́стырем явля́ше, на́м же о́гнь ре́вности вложи́ в ду́шу, е́же ве́ру и́стинную храни́ти, от вся́каго же глаго́ла ерети́ческаго отвраща́тися и грехо́вную отрева́ти пре́лесть от серде́ц на́ших.

Пе́снь 3.

Ирмо́с: Ты́ еси́ утвержде́ние притека́ющих к Тебе́, Го́споди, Ты́ еси́ Све́т омраче́нных, и пое́т Тя́ ду́х мо́й.

Да́р свяще́нный, странноприи́мства мзду́, прия́т христолюби́вая Анна ико́ну Твою́, Влады́чице, руко́ю святи́теля, от нея́же исцеле́ние бра́ту своему́ сле́пу рожде́ну ви́девши, сию́ во оби́тель Поча́евскую на о́бщую по́льзу да́рствует.

Ико́ну Поча́евскую Пречи́стыя Богоро́дицы лобыза́им, ве́рнии, и, покая́ние о гресе́х на́ших прине́сше, здра́вия, и от ну́жд избавле́ния, и во все́х благи́х начина́ниих по́мощи от Влады́чицы воспро́сим.

Цве́т прекра́сный на дре́ве благосенноли́ственнем яви́ся чудотво́рная ико́на Богоро́дицы на святе́й горе́ Поча́евстей: проси́те, ве́рнии, и да́стся ва́м, по глаго́лу Христо́ву, милосе́рдия да́р, житию́ ва́шему потре́бный.

Еже вре́менному житию́ потре́бно быва́ет, о бра́тие, вма́ле поле́зно е́сть, и сия́ да́рствует на́м Госпо́дь, по моли́тве Ма́тере Своея́. Оба́че терпя́щия па́че си́х блажи́т и ве́чною ра́достию на небеси́ награжда́ет, ю́же на́м дарова́ти, Влады́чице, помоли́ся.

Поча́евская це́рковь, чудотво́рный сле́д стопы́ Твоея́, Богоро́дице, покрыва́ющая и ико́ну Твою́ храня́щая, а́ки небе́сный вхо́д ве́рным явля́ется, в не́йже моля́щимся помози́, о Влады́чице, земна́я попече́ния отложи́ти, и еди́наго, е́же на потре́бу, жела́ти, и в моли́тве те́пле проси́ти.

Оле безу́мия иконобо́рцев, и́же ико́ну Твою́, Влады́чице, от Поча́евския оби́тели плени́ша и, поруга́нию предаю́ще, ка́ру Бо́жию а́бие на ся́ наведо́ша, беснова́нием же обличе́не бы́вшей жене́, у́жасом мно́гим содержа́хуся.

Седа́лен, гла́с 6:

Река́, оби́льно теку́щая, поко́ю не навы́че, ниже́ преста́ти от тече́ния водна́го возмо́жет, та́ко и моле́ния Твоя́, Влады́чице, о лю́дех при́сно возноси́мая, не преста́ют, но пра́ведныя от паде́ний храня́т, па́дшия же на покая́ние возставля́ют. На́м же, Твоему́ о́бразу покланя́ющимся, сугу́бую умиле́ния благода́ть да́руют и вопи́ти Тебе́ со арха́нгелом и Елисаве́тою воздвиза́ют: благослове́на Ты́ еси́ в жена́х, и Твоего́ чре́ва Пло́д благослове́н е́сть.

Пе́снь 4.

Ирмо́с: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.

Часу́ и дни́ прише́дшу возвраще́ния ико́ны Твоея́ во оби́тель Поча́евскую от иконобо́рцев, сию́ плени́вших, возра́довася преподо́бный Иов со бра́тиею, ту́ю лобыза́юще; ны́не же на вся́к де́нь и ча́с приходя́щии во оби́тель Твою́ христиа́не ту́юже ра́дость и ве́ру пред не́ю свиде́тельствуют.

Аз, гре́шный, ле́ностию порабоще́н, о Влады́чице, блага́го Бо́га при́сно грехи́ свои́ми прогневля́ю, ниже́ о́чи свои́ возвести́ к Нему́ дерза́ю, но ко Твоему́ припа́даю чудотво́рному о́бразу, пред ни́мже ка́ющиися проще́ние от Тебе́ прия́ша, и вопию́: Го́спода, Сы́на Твоего́, уми́лостиви и мне́ предста́тельством Твои́м.

Еда́ обря́щется толи́ко окамене́нный се́рдцем и безу́мен му́ж, и́же не умили́тся, в це́ркви Поча́евстей предстоя́й и святы́ням Твои́м, Влады́чице, покланя́яйся, чудеса́ же, от ни́х бы́вшая, помышля́яй и ве́рою моля́щияся ви́дяй наро́ды?

Ви́дени бы́ша мно́зи, исцеле́ннии пред ико́ною Твое́ю, Влады́чице, слепи́и и хро́мии, слы́шани бы́ша глуси́и и неми́и, возглаго́лавшии: та́мо бесни́и, воды́ от стопы́ Твоея́ пию́ще, от бесо́в свобожда́хуся. Те́мже и мою́ приими́ моли́тву, е́же от бесо́вских страсте́й свободи́тися и све́т спасе́ния Христо́ва вы́ну созерца́ти.

Сы́й во узи́лищи земли́ ту́рския плене́н, и́нок Твое́ю си́лою, Влады́чице, на возду́се в го́ру Поча́евскую принесе́ся, у́бо и мене́, во у́зах страсте́й су́ща, ны́не, в де́нь сла́вы Твоея́, от те́х свободи́ и ли́ку ве́рою и любо́вию пою́щих Тя́ сопричти́.

Ко Твоему́ чудотво́рному о́бразу прите́к, Влады́чице, и водо́ю от сле́да стопы́ Твоея́ омы́вся, сляче́нный неду́гом ю́ноша а́бие исцеле́, слепа́я же отрокови́ца, зде́ принесе́нная, прозре́, и предъуме́рый младе́нец воскре́се, у́бо и мене́, припа́дающа, от смертоно́снаго уны́ния воздви́гни и душе́вныя мои́ отве́рзи о́чи.

Пе́снь 5

Ирмо́с: Утренююще, вопие́м Ти́: Го́споди, спаси́ ны, Ты́ бо еси́ Бо́г на́ш, ра́зве Тебе́, ино́го не ве́мы.

Аще́ и все́х гре́шнейший е́смь от те́м люде́й, ко Твое́й, Влады́чице, ико́не припа́дающих, а́ще и вси́ ве́рою свое́ю мя́ превзыдо́ша, оба́че и мене́, окая́ннаго, не отри́ни от Твоего́ заступле́ния, ми́лостей бе́здну лю́дем во оби́тели Твое́й яви́вшая.

Якоже ко все́м призыва́ющим Тя́ ми́лостива явля́ешися, издале́ча ико́не Твое́й мы́сленно покланя́ющияся слы́шиши, и та́ко о́трочища не́коего, по моли́тве праба́бы его́, воскреси́ла еси́, и ны́не, о Влады́чице, ко все́м, от коне́ц земли́ Тебе́ моля́щимся, благоуве́тлива бу́ди.

Се́, Влады́чице, люде́й мно́гая мно́жества, на святу́ю го́ру Твою́ притека́юще, ми́лости Твоея́ получи́ти и́щут, ве́рнии вку́пе с малове́рными, пра́веднии и гре́шнии, с ни́миже и Це́ркви святе́й чужди́и примета́ются, все́х у́бо поми́луй, все́м све́т и́стинныя ве́ры яви́ во спасе́ние.

Почто́ а́з, гре́шный, Пречи́стей Богома́тери покланя́яся и испра́вити житие́ свое́ обещава́я, па́ки на пре́жняя прегреше́ния обраща́юся? Увы́ мне́! еда́ зле́йший е́смь неве́рных ага́рян, и́же на горе́ Поча́евстей покая́ние прине́сше, до́брии христиа́не соде́яшася?

Аще и лю́ти бы́ша ага́ряне ту́рстии, святу́ю оби́тель Твою́, Влады́чице, осажда́юще, а́ще и стре́лы в Тя́, на небеси́ я́вльшуюся, пуща́ти дерзну́ша, но си́м на главы́ и́х возвраща́ющимся, се́рдцем сокруше́нным пока́яшася и си́лу Твою́ испове́даша.

Со Иовом преподо́бным на небесе́х Тебе́ зря́ще, Влады́чице, ага́ряном смяте́нным и бежа́щим, и́ноцы Поча́евстии пе́снь воспе́ша Ти́ досто́йную, со уго́дником Тебе́ благодаря́ще те́пле.

Пе́снь 6.

Ирмо́с: Ри́зу мне́ пода́ждь све́тлу, одея́йся све́том, я́ко ри́зою, Многоми́лостиве Христе́ Бо́же на́ш.

Иже от ага́рян Тя́, Влады́чице, на небесе́х узре́ша, дру́г дру́га вопроша́ху: что́ е́сть виде́ние сие́ ужа́сное? И о́ви, смяте́ни бы́вше, дру́г дру́га убива́ху, о́ви же, ве́ру в се́рдце свое́ прие́мше, креще́ния тре́боваху, по си́х же и́ноцы бы́ша чрез все́ житие́, си́лу Твою́ воспева́юще.

Иноки и мирски́я лю́ди, Твоему́ заступле́нию ве́рующия, Влады́чице, обогати́ духо́вными дарова́ньми, малове́рныя же просвети́ и озари́, я́коже тогда́ неве́девшия Христа́ ага́ряны в позна́ние Его́ привела́ еси́.

Сохрани́ша па́мять Твоего́ заступле́ния, Влады́чице, ага́ряне, в зе́млю ту́рскую возвра́щшеся, и ча́дом свои́м о явле́нии Твое́м па́мять преда́ша. Кольми́ па́че на́м, христиа́ном, чудеса́ Твоя́, на горе́ Поча́евстей бы́вшая, па́мятовати подоба́ет?

Образу Твоему́ мы́сленно припа́дая, во глубо́кий кла́дязь впады́й му́ж от несумне́нныя сме́рти спасе́ся и, невреди́мь из глубины́ подъя́т бы́в, Твое́ пропове́даше милосе́рдие.

Xоте́л бы́х и а́з, Влады́чице, ве́ре спасе́нных Тобо́ю люде́й подража́ти, хоте́л бы́х и а́з Твое́ заступле́ние в житии́ мое́м улучи́ти, но за мно́жество прегреше́ний мои́х оскудева́ет моя́ ве́ра. Сию́ у́бо укрепи́ во мне́, Влады́чице, вопию́щем: ве́рую, помози́ моему́ неве́рию.

Ро́в прельще́ний лати́нских чрез сто́ и де́сять ле́т поглоти́ оби́тель Поча́евскую, но Твои́м, Богоро́дице, заступле́нием па́ки та́я к высоте́ Правосла́вия изъе́млется и ла́вра имену́ется. Сию́ у́бо в Правосла́вней ве́ре непоколеби́му соблюди́ да́же до часа́ втора́го прише́ствия Сы́на Твоего́ и Бо́га.

Конда́к, гла́с 1:

Исто́чник исцеле́ний и ве́ры Правосла́вныя утвержде́ние Поча́евская Твоя́ ико́на, Богоро́дице, яви́ся, те́мже и на́с, к не́й притека́ющих, от бе́д и искуше́ний свободи́, ла́вру Твою́ невреди́му сохрани́, Правосла́вие во о́крест стоя́щих страна́х утверди́ и грехи́ разреши́ моли́твенник Твои́х: ели́ка бо хо́щеши, мо́жеши.

Икос:

Воста́ните от гро́б ва́ших, и́ноцы Поча́евстии, и рцы́те на́м: коли́ких чуде́с Пресвяты́я Богоро́дицы бы́сте зри́тели и свиде́тели, ка́ко ме́ртвии пред Тоя́ ико́ною воскреса́ху, ка́ко де́мони от му́чимых люде́й отбега́ху, ка́ко неду́жнии та́мо исцеля́хуся, ка́ко неве́рнии ве́роваху, ка́ко хули́тели та́мо ка́яхуся? Сия́ бо ди́вна быва́ху челове́ком и Ангелом. Мы́ же, вся́ сия́ бы́вшая и додне́сь быва́емая воспомина́юще, со стра́хом и умиле́нием ко святе́й ико́не Пречи́стыя Богома́тере моли́твенно припа́даем и глаго́лем си́це: О, ми́лостей бе́здно и благодея́ний сокро́вище, грехи́ разреши́ моли́твенник Твои́х: ели́ка бо хо́щеши, мо́жеши.

Пе́снь 7.

Ирмо́с: От Иуде́и доше́дше о́троцы, в Вавило́не иногда́ ве́рою Тро́ическою пла́мень пе́щный попра́ша, пою́ще: отце́в Бо́же, благослове́н еси́.

Ака́фистово пе́ние возноша́ху пред ико́ною Твое́ю, Пречи́стая, правосла́внии лю́дие, егда́ оби́тель Поча́евская повеле́нием царе́вым Це́ркви возвращена́ бы́сть, те́м у́бо оставле́ние грехо́в испроси́, на́м же, моля́щим Ти ся, на враги́ посо́бствуй.

Никола́я Пе́рваго, Самоде́ржца, ду́шу упоко́ити моли́ся, Влады́чице, вку́пе же и все́х, о возвраще́нии ла́вры Твоея́ из ерети́ческаго пле́на потруди́вшихся, на́м же, к Тебе́ прибега́ющим, пода́ждь единомы́слие и ми́р.

И ны́не держа́вствующему царю́ на́шемуми́лостива бу́ди, Влады́чице, и о Це́ркви ми́рная глаго́ли се́рдцу его́, покаря́ющи под но́зе его́противобо́рствующыя враги́ и супоста́ты.

Пред Твое́ю ико́ною, Богоро́дице, правосла́вным христиа́ном возвраще́нною, па́ки исцеле́ния приима́ти ве́рнии навыко́ша: не у́ исте́кшу бо еди́ному ле́ту от того́ дне́, уже́ четы́рми чудесы́ Це́рковь Христо́ву просла́вила еси́ во утеше́ние лю́дем.

Рая́ небе́снаго сподо́би ны́, Влады́чице, святу́ю ла́вру Твою́ а́ки земны́й ра́й почита́ющия и Твоя́ ми́лости те́плою ве́рою воспева́ющия.

Авраа́м Госпо́день де́нь издале́ча ви́де, и ра́довася, и ча́янием того́ дне́ живя́ше; узре́вши же издале́ча Твою́ Поча́евскую це́рковь не́кая хрома́я жена́ и упова́нием Твоея́ по́мощи испо́лнившися, а́бие исцеле́ и, а́ки еле́нь, воспряну́вши, ко оби́тели Твое́й поспеша́ше.

Пе́снь 8.

Ирмо́с: Царя́ Небе́снаго, Его́же пою́т во́и Ангельстии, хвали́те и превозноси́те во вся́ ве́ки.

Во гра́д Ки́ев от преде́л Ура́льских прише́дшей жене́ бе́сней яви́ся Богоро́дица со преподо́бным Иовом, и на го́ру Поча́евскую ту́ю призыва́ше, иде́же здра́вие е́й пода́вши, сла́вити научи́ Свое́ заступле́ние.

Омы́в очеса́ своя́ в купе́ли Силоа́мстей, прие́млет слепорожде́нный зре́ние Христо́вым веле́нием; омы́вшися же от воды́ стопны́я в це́ркви Поча́евстей, исцеле́ слепа́я отрокови́ца. Убо и на́ше стра́стное ослепле́ние исцели́, Влады́чице, водо́ю от сле́да стопы́ Твоея́ с ве́рою кропя́щихся.

Сию́ отрокови́цу исцеле́ну узре́вши, праба́ба ея́ а́бие прельще́ния уни́тскаго отрица́ется и Правосла́вную испове́дует ве́ру, в не́йже утверди́ и ны́, рабы́ Твоя́, о Влады́чице.

Лю́дие Бо́жии, на го́ру Твою́, Влады́чице, притека́ющии, обе́ты по́двиг благочести́вых та́мо прино́сят, я́же де́лы испо́лнити помози́ и́м, Богоро́дице.

Ангели на небеси́ Твою́ сла́ву непреста́нно воспева́ют, Богоро́дице, на земли́ же челове́цы ко Твоему́ заступле́нию притека́ти не престаю́т, и́хже воздыха́ния не отри́ни, я́ко Блага́я, па́че же на ме́сте явле́ния Твоего́ те́х моле́ния услы́ши.

Ве́лия Твоего́ заступле́ния си́ла, о Влады́чице, его́же ра́ди Сы́н Тво́й и Бо́г на́ш гре́шным проще́ние да́рует, подвиза́ющимся же кре́пость и уныва́ющим утеше́ние.

На 9-й песни поем песнь Пресвятыя Богородицы:

Вели́чит душа́ Моя́ Го́спода и возра́довася дух Мой о Бо́зе Спа́се Мое́м.

К коемуждо стиху припеваем: Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Я́ко призре́ на смире́ние рабы́ Своея́, се бо, от ны́не ублажа́т Мя вси ро́ди.

Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Я́ко сотвори́ Мне вели́чие Си́льный, и свя́то и́мя Его́, и ми́лость Его́ в ро́ды родо́в боя́щимся Его́.

Сотвори́ держа́ву мы́шцею Свое́ю, расточи́ го́рдыя мы́слию се́рдца их.

Низложи́ си́льныя со престо́л, и вознесе́ смире́нныя, а́лчущия испо́лни благ, и богатя́щияся отпусти́ тщи.

Восприя́т Изра́иля о́трока Своего́, помяну́ти ми́лости, я́коже глаго́ла ко отце́м на́шим, Авраа́му и се́мени его́ да́же до ве́ка.

Песнь 9

Ирмо́с: Вои́стинну Богоро́дицу, Тя́ испове́дуем, спасе́ннии Тобо́ю, Де́во Чи́стая, с безпло́тными ли́ки Тя́ велича́юще.

Не то́чию еди́н по еди́ному подвиза́ются христиа́не на го́ру Поча́евскую, но и от сугу́бо свяще́ннаго гра́да Ки́ева совоку́пльшеся ве́рнии, по́мощь от сея́ чудотво́рныя ико́ны в годи́ну бы́вшего губи́тельства испове́даша и, подо́бие ея́ написа́вше, во святу́ю ла́вру сие́ принесо́ша.

Убо и во гряду́щая ле́та спаса́й на́с, Влады́чице, от губи́тельства и междоусо́бныя бра́ни, от гла́да же и о́гненнаго запале́ния, зане́ оскуде́вшей кре́пости ду́ш на́ших, уны́ния исполня́емся в беда́х, неразу́мливи су́ще.

Южский преде́л земли́ росси́йския Поча́евскую ико́ну Влады́чицы и святу́ю ла́вру Ея́, я́ко диади́му ца́рствия храни́т, и си́ми хва́лится; оба́че же и се́верский, во гра́де Тобо́льстем, чудотво́рное подо́бие тоя́жде Поча́евския ико́ны моли́твою и́ноков себе́ испроси́.

Ру́сскую зе́млю, о Влады́чице, я́ко безпреде́льное горы́ Твоея́ подно́жие, от бе́д и искуше́ний свободи́ и во благоче́стии ту́ю сохрани́ до сконча́ния ве́ка.

Уже́ несты́дно подня́вшимся ху́льным гласо́м посреде́ христиа́нскаго жи́тельства, не оста́ви, Богоро́дице, ра́б Твои́х в те́х прельще́ния впа́сти, но ве́ру несумне́нну возгрева́й в сердца́х на́ших вы́ну.

Се́ вре́мя заступле́ния Пресвяты́я Богоро́дицы прии́де, умно́жившимся собла́зном, се́ вре́мя на́ших к Не́й воздыха́ний. О, бра́тие! Рце́м у́бо от всего́ се́рдца на́шего: Влады́чице, Влады́чице! помози́ лю́дем Твои́м.

Свети́лен.

Виде́ние ди́вное: во огни́ Пресвята́я Де́ва, чудеса́ же неисчи́слимая от ико́ны Поча́евския на́м извести́шася. Воспря́нем у́бо, о лю́дие, от грехо́внаго сна́, исправле́ния житию́ на́шему со слеза́ми да про́сим, и Ма́тери Бо́жией с ве́рою дне́сь поклони́мся.

Хвали́тны псалмы́, глас 4:

Вся́кое дыха́ние да хва́лит Го́спода./ Хвали́те Го́спода с небе́с,/ хвали́те Его́ в вы́шних.// Тебе́ подоба́ет песнь Бо́гу.

Хвали́те Его́ вси а́нгели Его́,/ хвали́те Его́ вся си́лы Его́.// Тебе́ подоба́ет песнь Бо́гу.

Сти́хиры, глас 4:

Стих: Сотвори́ти в них суд напи́сан/ сла́ва сия́ бу́дет всем преподо́бным Его́.

Воспои́м, лю́дие, Пресвяту́ю Де́ву Чи́стую, на горе́ Поча́евстей дре́вле па́стырем я́вльшуюся, ны́не же всю́ страну́ на́шу отту́ду благоде́ющую: ве́сть бо Влады́чица проше́ния на́ша во благо́е исполня́ти, и сердца́ на́ша умиле́нием растворя́ти, и рабы́ Своя́ от бе́д и зо́л сохраня́ти.

Стих: Хвали́те Его́ на си́лах Его́,/ хвали́те Его́ по мно́жеству вели́чествия Его́.

Стих: Хвали́те Его́ в тимпа́не и ли́це,/ хвали́те Его́ во стру́нах и орга́не.

Не возгнуша́йся на́с, гре́шных, Милосе́рдая Ма́ти, малове́рия ра́ди на́шего от на́с не отврати́ся, но па́че ве́ру на́шу благода́тною по́мощию Твое́ю умно́жи и же́ртву хвалы́ приноси́ти Тебе́ рабы́ Твоя́ научи́.

Стих: Хвали́те Его́ в кимва́лех доброгла́сных, хвали́те Его́ в кимва́лех восклица́ния. / Вся́кое дыха́ние да хва́лит Го́спода.

Слепы́я, и хромы́я, и сличе́нныя, ко Твое́й святе́й ико́не припа́дающия, всемо́щным де́йством Твоего́ предста́тельства исцели́ла еси́, Богоро́дице: бе́сы, люде́й му́чащия, отгна́ла еси́, Правосла́вную ве́ру ага́ряном и еретико́м откры́ла еси́. Убо и на́ших моле́ний не отри́ни, Пренепоро́чная, но я́же ко спасе́нию проше́ния на́ша испо́лни.

Глас 8: Сла́ва Отцу́ и Сы́ну и Свято́му Ду́ху И ны́не и при́сно и во ве́ки веко́в. Ами́нь.

О Твои́х зна́мениих, Богоро́дице Влады́чице, сла́вится гора́ Поча́евская, и вся́к язы́к христиа́нский си́лу Твою́ испове́дует, и́хже ра́ди неве́рнии правове́рни соде́яшася, гре́шнии в покая́ние приидо́ша, лени́вии к духо́вному де́ланию устреми́шася. Имже и на́с подража́ти, Блага́я, научи́, Тебе́ те́пле благодари́ти устро́й на́с и воздви́гни вы́ну воспева́ти сла́ву Сы́на Твоего́, Еди́наго от Святы́я Тро́ицы сла́вимаго Бо́га на́шего.

Славосло́вие вели́кое:

Сла́ва в вы́шних Бо́гу, и на земли́ мир, в челове́цех благоволе́ние. Хва́лим Тя, благослови́м Тя, кла́няем Ти ся, славосло́вим Тя, благодари́м Тя, вели́кия ра́ди сла́вы Твоея́. Го́споди Царю́ Небе́сный, Бо́же О́тче Вседержи́телю, Го́споди, Сы́не Единоро́дный, Иису́се Христе́, и Святы́й Ду́ше. Го́споди Бо́же, А́гнче Бо́жий, Сы́не Оте́чь, взе́мляй грех ми́ра, поми́луй нас; взе́мляй грехи́ ми́ра, приими́ моли́тву на́шу; седя́й одесну́ю Отца́, поми́луй нас. Я́ко Ты еси́ еди́н Свят, Ты еси́ еди́н Госпо́дь, Иису́с Христо́с, в сла́ву Бо́га Отца́. Ами́нь.

На всяк день благословлю́ Тя, и восхвалю́ И́мя Твое́ во ве́ки, и в век ве́ка.

Сподо́би, Го́споди, в день сей без греха́ сохрани́тися нам. Благослове́н еси́, Го́споди, Бо́же оте́ц на́ших, и хва́льно и просла́влено И́мя Твое́ во ве́ки. Ами́нь.

Бу́ди, Го́споди, ми́лость Твоя́ на нас, я́коже упова́хом на Тя.

Благослове́н еси́, Го́споди, научи́ мя оправда́нием Твои́м. (Три́жды)

Го́споди, прибе́жище был еси́ нам в род и род. Аз рех: Го́споди, поми́луй мя, исцели́ ду́шу мою́, я́ко согреши́х Тебе́. Го́споди, к Тебе́ прибего́х, научи́ мя твори́ти во́лю Твою́, я́ко Ты еси́ Бог мой: я́ко у Тебе́ исто́чник живота́, во све́те Твое́м у́зрим свет. Проба́ви ми́лость Твою́ ве́дущим Тя.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Три́жды)

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Святы́й Безсме́ртный, поми́луй нас.

Святы́й Бо́же, Святы́й Кре́пкий, Святы́й Безсме́ртный, поми́луй нас.

Тропа́рь, глас 5:

Утверди́, Бо́же, святу́ю правосла́вную ве́ру, правосла́вных христиа́н во век ве́ка.

Честне́йшую Херуви́м и Сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу, Тя велича́ем.

Сла́ва, и ны́не. Го́споди, поми́луй. (Три́жды) Благослови́.

Господи Иисусе Христе, Сыне Божий, моли́твами Пречи́стыя Своея́ Ма́тере, преподобных и богоносных отец наших и всех святы́х, поми́луй и спаси нас я́ко Благ и Челове́колюбец.

Многоле́тие:

Вели́каго Господи́на и Отца́ на́шего Кири́лла,/ Святе́йшаго Патри́арха Моско́вского и всея́ Руси́,/ и Господи́на на́шего (Высоко-) Преосвяще́ннейшаго (имярек),/ (архи-)епи́скопа (митрополита (титул)),/ богохрани́мую страну́ на́шу Росси́йскую,/ и вся правосла́вныя христи́аны,// Го́споди, сохрани́ их на мно́гая ле́та.