Шрифт

▲

Богослужебные тексты для домашнего употребления

Службы иконам Пресвятой Богородицы

Последование Всеношного бдения в день памяти иконы Божией Матери Тихвинская. Для домашнего (келейного) совершения

Оглавление

ВСЕНО́ЩНОЕ БДЕ́НИЕ

ВЕЛИ́КАЯ ВЕЧЕ́РНЯ

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас. Ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Трижды.)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, (трижды). Сла́ва, и ны́не:

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Таже, Го́споди, поми́луй, (12), Сла́ва, и ны́не:

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 103:

Поется часть псалма:

Благослови́, душе́ моя́, Го́спода. / Благослове́н еси́, Го́споди. / Го́споди, Бо́же мой, возвели́чился еси́ зело́. / Благослове́н еси́, Го́споди. / Во испове́дание и в велеле́поту обле́клся еси́. / Благослове́н еси́, Го́споди. / Посреде́ гор про́йдут во́ды. / Ди́вна дела́ Твоя́, Го́споди. / Вся прему́дростию сотвори́л еси́. / Сла́ва Ти, Го́споди, сотвори́вшему вся.

Или читается псалом полностью:

Благослови́, душе́ моя́, Го́спода. Го́споди, Бо́же мой, возвели́чился еси́ зело́. Во испове́дание и в велеле́поту обле́клся еси́. Одея́йся све́том, я́ко ри́зою, простира́яй не́бо, я́ко ко́жу. Покрыва́яй вода́ми превы́спренняя Своя́, полага́яй о́блаки на восхожде́ние Свое́, ходя́й на крилу́ ве́треню. Творя́й А́нгелы Своя́ ду́хи и слуги́ Своя́ пла́мень о́гненный. Основа́яй зе́млю на тве́рди ея́, не преклони́тся в век ве́ка. Бе́здна, я́ко ри́за, одея́ние ея́, на гора́х ста́нут во́ды, от запреще́ния Твоего́ побе́гнут, от гла́са гро́ма Твоего́ убоя́тся. Восхо́дят го́ры и нисхо́дят поля́ в ме́сто, е́же основа́л еси́ им. Преде́л положи́л еси́, eго́же не пре́йдут, ниже́ обратя́тся покры́ти зе́млю. Посыла́яй исто́чники в де́брех, посреде́ гор про́йдут во́ды. Напая́ют вся зве́ри се́льныя, ждут она́гри в жа́жду свою́. На ты́х пти́цы небе́сныя привита́ют, от среды́ ка́мения дадя́т глас. Напая́яй го́ры от превы́спренних Свои́х, от плода́ дел Твои́х насы́тится земля́. Прозяба́яй траву́ ското́м, и злак на слу́жбу челове́ком, извести́ хлеб от земли́. И вино́ весели́т се́рдце челове́ка, ума́стити лице́ еле́ем, и хлеб се́рдце челове́ка укрепи́т. Насы́тятся древа́ польска́я, ке́дри Лива́нстии, и́хже еси́ насади́л. Та́мо пти́цы вогнездя́тся, ероди́ево жили́ще предводи́тельствует и́ми. Го́ры высо́кия еле́нем, ка́мень прибе́жище за́яцем. Сотвори́л есть луну́ во времена́, со́лнце позна́ за́пад свой. Положи́л еси́ тму, и бысть нощь, в не́йже про́йдут вси зве́рие дубра́внии. Ски́мни рыка́ющии, восхи́тити и взыска́ти от Бо́га пи́щу себе́. Возсия́ со́лнце и собра́шася и в ло́жах свои́х ля́гут. Изы́дет челове́к на де́ло свое́ и на де́лание свое́ до ве́чера. Я́ко возвели́чишася дела́ Твоя́, Го́споди, вся прему́дростию сотвори́л еси́, испо́лнися земля́ тва́ри Твоея́. Сие́ мо́ре вели́кое и простра́нное, та́мо га́ди, и́мже несть числа́, живо́тная ма́лая с вели́кими, та́мо корабли́ препла́вают, змий сей, eго́же созда́л еси руга́тися eму́. Вся к Тебе́ ча́ют, да́ти пи́щу им во бла́го вре́мя. Да́вшу Тебе́ им соберу́т, отве́рзшу Тебе́ ру́ку вся́ческая испо́лнятся бла́гости, отвра́щшу же Тебе́ лице́, возмяту́тся, отъи́меши дух их, и исче́знут, и в персть свою́ возвратя́тся. По́слеши Ду́ха Твоего́, и сози́ждутся, и обнови́ши лице́ земли́. Бу́ди сла́ва Госпо́дня во ве́ки, возвесели́тся Госпо́дь о де́лех Свои́х, призира́яй на зе́млю, и творя́й ю́ трясти́ся, прикаса́яйся гора́м, и дымя́тся. Воспою́ Го́сподеви в животе́ мое́м, пою́ Бо́гу моему́, до́ндеже есмь, да услади́тся Ему́ бесе́да моя́, аз же возвеселю́ся о Го́споде. Да исче́знут гре́шницы от земли́, и беззако́нницы, я́коже не бы́ти им. Благослови́, душе́ моя́, Го́спода.

Со́лнце позна́ за́пад свой. Положи́л еси́ тму, и бысть нощь. Я́ко возвели́чишася дела́ Твоя́, Го́споди, вся прему́дростию сотвори́л еси́.

Сла́ва, и ны́не: Аллилу́иа, аллилу́иа, аллилу́иа, сла́ва Тебе́ Бо́же. Трижды.

Блаже́н муж:

Блаже́н муж, и́же не и́де на сове́т нечести́вых.

Аллилу́иа, аллилу́иа, аллилу́иа.

Я́ко весть Госпо́дь путь пра́ведных, и путь нечести́вых поги́бнет.

Аллилу́иа, аллилу́иа, аллилу́иа.

Рабо́тайте Го́сподеви со стра́хом и ра́дуйтеся Ему́ с тре́петом.

Аллилу́иа, аллилу́иа, аллилу́иа.

Блаже́ни вси наде́ющиися Нань.

Аллилу́иа, аллилу́иа, аллилу́иа.

Воскресни́, Го́споди, спаси́ мя, Бо́же мой.

Аллилу́иа, аллилу́иа, аллилу́иа.

Госпо́дне есть спасе́ние, и на лю́дех Твои́х благослове́ние Твое́.

Аллилу́иа, аллилу́иа, аллилу́иа.

Сла́ва Отцу́ и Сы́ну и Свято́му Духу.

Аллилу́иа, аллилу́иа, аллилу́иа.

И ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Го́споди, воззва́х, глас 2:

Го́споди, воззва́х к Тебе́, услы́ши мя./ Услы́ши мя, Го́споди./ Го́споди, воззва́х к Тебе́, услы́ши мя:/ вонми́ гла́су моле́ния моего́,/ внегда́ воззва́ти ми к Тебе́.// Услы́ши мя, Го́споди.

Да испра́вится моли́тва моя́,/ я́ко кади́ло пред Тобо́ю,/ воздея́ние руку́ мое́ю/ – же́ртва вече́рняя.// Услы́ши мя, Го́споди.

Стихи́ры пра́здника, глас 2:

Стих: Из глубины́ воззва́х к Тебе́, Го́споди,// Го́споди, услы́ши глас мой.

Ки́ими чи́стыми устна́ми ублажи́м Богоро́дицу?/ Честне́йшую Херуви́мов/ и Святе́йшую су́щу Серафимов,/ А́нгелов же и всех святы́х Сла́внейшую,/ престо́л Царе́в непоколеби́мый,/ дом, в не́мже всели́ся Вы́шний,/ спасе́ние ми́ра, Бо́жие освяще́ние,/ подаю́щую ве́рным в Боже́ственнем торжестве́ Ея́/ бога́тно ве́лию ми́лость.

Стих: А́ще беззако́ния на́зриши, Го́споди, Го́споди, кто постои́т?// Я́ко у Тебе́ очище́ние е́сть.

Ки́я духо́вныя пе́сни ны́не принесе́м Ти, Всечи́стая?/ Ибо пречестны́я Твоея́ ико́ны/ пречу́дным ше́ствием подсо́лнечную освяти́ла еси́,/ и ди́вным ея́ явле́нием всю Росси́йскую страну́ удиви́ла еси́,/ и светоза́рным ея́ прише́ствием/ пусто́е ме́сто и непроходи́мое просвети́ла еси́,/ иде́же и ны́не водворя́ешися Боже́ственною ико́ною Твое́ю,/ всеси́льным Твои́м предста́тельством/ ми́ру непреста́нно подаю́щи ве́лию ми́лость.

Стих: И́мене ра́ди Твоего́ потерпе́х Тя, Го́споди, потерпе́ душа́ моя́ в сло́во Твое́, / упова́ душа́ моя́ на Го́спода.

Ки́я умиле́нныя гла́сы принесо́ша Ти тогда́, Богоро́дице,/ зря́щии светоно́сную ико́ну Твою́,/ чу́дно на возду́се стоя́щую/ и светоза́рными луча́ми сия́ющую,/ благочести́вии лю́дие?/ То́чию с рыда́нием моля́хуся,/ с пла́чем взыва́юще:/ прииди́ к нам, Цари́це, сни́ди, Влады́чице,/ низпосли́ щедро́ты Твоего́ человеколю́бия,/ посети́ ны свы́ше,/ просвети́ омраче́нныя Твои́м светоза́рным прише́ствием,/ и неотсту́пна бу́ди во ве́ки,/ ми́рови бога́тно подаю́щи ве́лию ми́лостъ.

Стих: От стра́жи у́тренния до но́щи, от стра́жи у́тренния,// да уповае́т Изра́иль на Го́спода.

Что́ Ти принесе́м, Пресвята́я Де́во,/ за мно́гую Твою́ благосты́ню и человеколю́бие?/ Я́ко пресла́вно по возду́ху низпосла́ла еси́/ земли́ Росси́йстей Боже́ственное Твое́ дарова́ние,/ многочуде́сную Твою́ ико́ну, Богоотрокови́це Чи́стая,/ от нея́же Бо́жиего благода́тию чудесы́ происходя́щими бед избавля́емся,/ и изоби́льно прие́млем душа́м же и те́лом/ от вся́ких боле́зней исцеле́ние,/ и непреста́нно почерпа́ем ве́лию ми́лостъ.

Глас 6: Сла́ва Отцу́ и Сы́ну и Свято́му Ду́ху. И ны́не и при́сно и во ве́ки веко́в. Ами́нь.

Днесь ра́дуется ве́рных мно́жество,/ яви́ бо ся Боже́ственная ико́на Твоя́, Влады́чице, на возду́се,/ я́ко многосве́тлое со́лнце,/ све́том ве́лиим сия́ющи/ и лучи́ ми́лости повсю́ду испуща́ющи,/ вся ве́рныя просвеща́ет./ Днесь ликовству́юще а́нгели Тебе́ слу́жат/ и, почита́юще Тя, от ме́ста на ме́сто/ неви́димо ико́ну Твою́ преноси́ша, Богома́ти,/ доне́сше же богоизбра́ннаго ме́ста,/ благогове́йно поста́виша с досто́йными славословле́нии./ Мы же что́ Ти принесе́м, бре́ннии?/ И ко́е благохвале́ние прише́ствию Твоему́ сотвори́м?/ Недоумева́ем, то́чию удивля́емся,/ велича́юще Твое́ милосе́рдие,/ е́же на нас показа́ла еси́./ Но, о Пресвята́я,/ моли́ся приле́жно Сы́ну Твоему́ и Бо́гу на́шему/ дарова́ти оте́честву на́шему на враги́ побе́ды,/ и ми́ру умире́ние,/ и душа́м на́шим ве́лию ми́лость.

Све́те Тихи́й:

Све́те Ти́хий святы́я сла́вы Безсме́ртнаго Отца́ Небе́снаго, Свята́го, Блаже́ннаго, Иису́се Христе́! Прише́дше на за́пад со́лнца, ви́девше свет вече́рний, пое́м Отца́, Сы́на и Свята́го Ду́ха, Бо́га. Досто́ин еси́ во вся времена́ пет бы́ти гла́сы преподо́бными, Сы́не Бо́жий, живо́т дая́й; те́мже мир Тя сла́вит.

Пареми́и:

Бытия́ чте́ние

Изы́де Иа́ков от студенца́ кля́твеннаго и и́де в Харра́нь./ И обре́те ме́сто, и спа та́мо,/ за́йде бо со́лнце,/ и взят от ка́мения ме́ста того́,и положи́ возгла́вие себе́,/ и спа на ме́сте о́ном, и сон ви́де:/ и се ле́ствица утвержде́на на земли́,/ ея́же глава́ досяза́ше до Небе́с,/ и А́нгели Бо́жии восхожда́ху и нисхожда́ху по ней,/ Госпо́дь же утвержда́шеся на ней и рече́:/ Аз Бог Авраа́мов, отца́ твоего́, и Бог Исаа́ков, не бо́йся:/ земля́, иде́же ты спи́ши на ней,/ тебе́ дам ю и се́мени твоему́./ И бу́дет се́мя твое́, я́ко песо́к земны́й,/ и распространи́тся на мо́ре, и ли́ву, и се́вер, и на восто́ки,/ и возблагословя́тся о тебе́ вся коле́на земна́я и о се́мени твое́м./ И се Аз с тобо́ю, сохраня́яй тя на вся́ком пути́, а́може а́ще пои́деши,/ и возвращу́ тя в зе́млю сию́,/ я́ко не и́мам тебе́ оста́вити,/ до́ндеже сотвори́ти Ми вся, ели́ка глаго́лах тебе́./ И воста́ Иа́ков от сна своего́ и рече́:/ я́ко есть Госпо́дь на ме́сте сем, аз же не ве́дех./ И убоя́ся, и рече́:/ я́ко стра́шно ме́сто сие́,/ несть сие́, но дом Бо́жий, и сия́ врата́ Небе́сная.

Проро́чества Иезекии́лева чте́ние

Та́ко глаго́лет Госпо́дь:/ бу́дет от дне осма́го и про́чее,/ сотворя́т иере́и на олтари́ всесожже́ния ва́шего/ и я́же спасе́ния ва́шего,/ и прииму́ вы, глаго́лет Адонаи́ Госпо́дь./ И обрати́ мя на путь врат святы́х вне́шних,/ зря́щих на восто́ки, и сия́ бя́ху затворе́на./ И рече́ Госпо́дь ко мне:/ врата́ сия́ затворе́на бу́дут и не отве́рзутся,/ и никто́же про́йдет сквозе́ их:/ я́ко Госпо́дь Бог Изра́илев про́йдет и́ми, и бу́дут затворе́на./ Я́ко игу́мен ся́дет в них сне́сти хлеб,/ по пути́ Ела́мских врат вни́дет и по пути́ его́ изы́дет./ И введе́ мя по пути́ врат святы́х, су́щих к се́веру, пря́мо хра́му, и ви́дех,/ и се испо́лнь сла́вы храм Госпо́день.

При́тчей чте́ние

Прему́дрость созда́ Себе́ дом/ и утверди́ столпо́в седмь./ Закла́ Своя́ же́ртвенная, и раствори́ в ча́ши Свое́й вино́, и угото́ва Свою́ трапе́зу./ Посла́ Своя́ рабы́, созыва́ющи с высо́ким пропове́данием на ча́шу, глаго́лющи:/ и́же есть безу́мен, да уклони́тся ко Мне./ И тре́бующим ума́ рече́:/ прииди́те, яди́те Мой хлеб и пи́йте вино́, е́же раствори́х вам./ Оста́вите безу́мие, и жи́ви бу́дете,/ и взыщи́те ра́зума, да поживете́,/ и испра́вите ра́зум в ве́дении./ Наказу́яй злы́я, прии́мет себе́ безче́стие:/ облича́яй же нечести́ваго, опоро́чит себе́,/ обличе́ния бо нечести́вому – ра́ны ему́./ Не облича́й злых, да не возненави́дят тебе́,/ облича́й прему́дра и возлю́бит тя./ Даждь прему́дрому вину́, и прему́дрший бу́дет;/ сказу́й пра́ведному, и приложи́т приима́ти./ Нача́ло прему́дрости – страх Госпо́день, и сове́т святы́х – ра́зум:/ разуме́ти бо зако́н – по́мысла есть блага́го./ Сим о́бразом мно́гое поживе́ши вре́мя,/ и приложа́тся тебе́ ле́та живота́.

Го́споди, поми́луй. (Три́жды,)

Сподо́би, Го́споди:

Сподо́би, Го́споди, в ве́чер сей без греха́ сохрани́тися нам. Благослове́н еси́, Го́споди, Бо́же оте́ц на́ших, и хва́льно и просла́влено и́мя Твое́ во ве́ки. Ами́нь.

Бу́ди, Го́споди, ми́лость Твоя́ на нас, я́коже упова́хом на Тя. Благослове́н еси́, Го́споди, научи́ мя оправда́нием Твои́м. Благослове́н еси́, Влады́ко, вразуми́ мя оправда́нием Твои́м. Благослове́н еси́, Святы́й, просвети́ мя оправда́нии Твои́ми.

Го́споди, ми́лость Твоя́ во век, дел руку́ Твое́ю не пре́зри. Тебе́ подоба́ет хвала́, Тебе́ подоба́ет пе́ние, Тебе́ сла́ва подоба́ет. Отцу́ и Сы́ну и Свято́му Ду́ху, ны́не и при́сно и во ве́ки веко́в. Ами́нь.

Лития́:

Стихи́ры:

Глас 3: Прииди́те, вси празднолю́бцы,/ чу́дное явле́ние ико́ны Бо́жия Ма́тере ублажи́м,/ пресла́вно бо и боголе́пно возсия́,/ ея́же святы́м явле́нием мир просвеще́н бысть./ Тем усты́ и сердцы́ и пе́сньми и пе́нии духо́вными/ сей святы́й день со все́ми притека́ющими/ пра́зднуем све́тло.

Глас 8: Пе́рвее написа́вшейся Твое́й ико́не/ Ева́нгельских та́ин благове́стником/ и к Тебе́, Ца́рице, принесе́нней,/ да усво́иши ту/ и си́льну соде́лаеши спасти́ честву́ющия Тя./ И пора́довалася еси́, я́ко су́щи ми́лостива спасе́ния на́шего Соде́тельница,/ я́ко уста́ и глас ико́не бы́вши,/ я́коже и Бо́га внегда́ зачина́ющи во чре́ве, песнь воспе́ла еси́:/ се отны́не ублажа́т Мя вси ро́ди./ И, на ту зря́щи, глаго́лала еси́ со вла́стию:/ с сим о́бразом благода́ть Моя́ и си́ла./ И мы и́стинно ве́руем,/ я́ко се рекла́ еси́, Госпоже́:/ сим о́бразом с на́ми еси́./ Тем, благогове́йно предстоя́ще, покланя́емся Тебе́, раби́ Твои́,/ посети́ ны Твои́ми Ма́терними щедро́тами.

Кто досто́йно возмо́жет испове́дати чуде́с Твои́х, Чи́стая,/ глубину́ превели́кую?/ Твои́м бо милосе́рдным присеще́нием/ пусты́ня свы́ше прия́т ико́ну Твою́ чу́дную;/ тогда́ же Тя, Влады́чице, со святи́телем Никола́ем/ светоза́рно в пусты́ни бесе́дующу, узре́ муж благогове́йный,/ и́же, зре́ти не терпя́ неизрече́ннаго Твоего́ сия́ния,/ на зе́млю ниц пад, ника́коже зре́ти можа́ше,/ до́ндеже возста́ви его́ святи́тель он чу́дный,/ от стра́ха человеколю́бне укрепля́я его́./ Ты же, Чи́стая, све́том ми́лости Твоея́ сего́ просве́щши,/ кре́стнаго утвержде́ния благоволе́ние Твое́ соверши́ти повеле́ла еси́/ в по́льзу ве́рных спасе́ния.

Глас 4: Да ка́плют сла́дость о́блацы,/ и вся земля́ да возра́дуется ра́достно/ о неизрече́нней ми́лости Твое́й, Пречи́стая./ Чу́до бо зри́мо есть, Влады́чице, ди́вное,/ я́ко пре́жде пусты́ня, вся́каго обнаже́на благоле́пия/ и ники́мже проходи́ма и зна́ема,/ ны́не же Твои́м, Богома́ти, присеще́нием/ ме́сто пресла́вно, и оби́тель, я́ко град прекра́сен, явля́ется,/ и храм присносве́тел,/ в не́мже Боже́ственное сокро́вище,/ чу́дная ико́на Твоя́, Богоро́дице, показу́ется./ Ея́же мы зря́ще благоле́пие/ и усе́рдно покланя́ющеся,/ ра́достию и стра́хом целу́ем ю́:/ стра́хом – греха́ ра́ди, я́ко недосто́йни су́ще,/ ра́достию же – ми́лости ра́ди, ю́же подае́ши нам,/ рабо́м Твои́м, я́ко Милосе́рда.

Влады́чице Блага́я,/ ми́ру держа́вная Помо́щнице,/ укрепи́ сла́вящее Тя оте́чество на враги́,/ я́коже иногда́ кроткаго Дави́да на проти́вныя./ И я́коже дре́вле спасла́ еси́ Ца́рский град от иноплеме́нных нахожде́ния,/ та́ко и ны́не спаси́ страну́ Росси́йскую от проти́вных наше́ствия/ и соблюди́ от всех наве́т вра́жиих,/ Ты бо, Богоневе́стная, всех ве́рных с Бо́гом покро́в и спасе́ние.

Сла́ва, и ны́не, глас 5:

Росси́йская страна́ днесь весели́тся с Вы́шними силами,/ свы́ше обогати́вшися ико́ною Богома́тере,/ и христолюби́вое ста́до вопие́т, созыва́ющи:/ прииди́те, ве́рнии,/ просвети́теся в све́тлом торжестве́ Богоро́дицы./ Прииди́те, празднолю́бцы,/ возвесели́теся в чуде́снем пра́зднице о́бщия всех Влады́чицы./ Прииди́те и ви́дите Боже́ственное сокро́вище,/ всем чуде́с да́ры оби́льно подаю́щее./ Что́ у́бо воздади́м Го́сподеви,/ сицево́е человеколю́бие нам яви́вшему,/ пречи́стый Свой и Его́ ро́ждшия о́браз/ я́ко Небе́сный дар нам низпосла́вшему/ и ве́рных просвети́вшему?/ Те́мже, наслажда́ющеся ве́лия Того́ милосе́рдия,/ ра́достно Тому́ возсыла́ем гла́сы благода́рныя,/ ро́ждшей Того́ ве́село воспева́юще:/ сла́ва, Влады́чице, вопло́щшемуся из Тебе́ Христу́ Бо́гу на́шему,/ таковы́я благода́ти нас сподо́бльшему.

Го́споди, поми́луй. (40 раз)

Стихи́ры на стихо́вне:

Стихи́ры: Глас 2:

Егда́ ви́де Моисе́й купину́ горя́щую и не опаля́ему,/ прообразу́ющу в Твою́ пречи́стую, Де́во, утро́бу/ Боже́ственнаго огня́ вселе́ние,/ тогда́ стра́хом одержа́шеся, та́инству удивля́яся,/ си́це и ныне лю́дие Твои́, Влады́чице,/ зря́ще пречи́стый Твой о́браз,/ воплоти́вшагося от Тебе́ благоволе́нием,/ от веще́ственнаго огня́ невеще́ственною Боже́ственною си́лою,/ неопали́м, и благода́тию па́че со́лнца сия́ющ,/ и ве́рных сердца́ просвеща́ющ,/ ра́достно Сы́ну Твоему́ вопия́ху, глаго́люще:/ сла́ва, Человеколю́бче, Твоему́ милосе́рдию.

Стих: Помяну́ и́мя Твое́/ во вся́ком ро́де и ро́де.

Егда́ ужа́сно, Влады́чице, и тре́петно/ покры́ ка́мение Твоего́ хра́ма зда́тели,/ тогда́ лю́дие ско́рбию уязви́шася,/ ча́юще, я́ко ти́и ме́ртви суть,/ но, о, чудесе́ пресла́внаго!/ я́коже бо дре́вле Сло́во Бо́жие и Бог всех,/ из Тебе́ изво́ливый воплоти́тися, Всепе́тая,/ тридне́вно Ио́ну соблюде́ неврежде́нна во чре́ве ки́тове,/ си́це и ны́не Твои́м предста́тельством чудоде́йствова,/ по тридне́вном тех каменозавале́нии/ жи́вы и невре́дны сохрани́ их/ и ра́достию вся пе́ти научи́:/ сла́ва Его́ человеколю́бному щедро́т мно́жеству,/ прославля́ющему Тебе́, без Се́мене ро́ждшую.

Стих: Слы́ши, Дщи, и виждь,/ и приклони́ у́хо Твое́.

Егда́ по мно́зей ско́рби, Благода́тная,/ лю́дие хоте́ша пе́рсти преда́ти о́ныя зда́тели,/ пребы́вшия под ка́мением тридне́вное вре́мя,/ тогда́ Сы́ну и Бо́гу Твоему́ изво́лившу/ па́че просла́вити Твое́ во святе́й оби́тели предста́тельство,/ жи́вы и безвре́дны обрето́ша я Твои́м хране́нием,/ Сего́ ра́ди весе́лия испо́лншеся,/ сла́вяху Тя с ни́ми, милосе́рдую Влады́чицу,/ и ро́ждшемуся от Тебе́ с ра́достию вопия́ху:/ сла́ва, Человеколю́бче, Твоему́ благоутро́бию.

Слава, И ныне, глас 8:

Прииди́те, вси ве́рнии,/ притеце́м в це́рковь Богома́тере:/ се бо сия́ет в ней всечестна́я Ея́ ико́на,/ я́ко свети́ло благоче́стия,/ всех празднолю́бных собо́ры,/ благода́тию Бо́жиею просвеща́ющи/ и грехо́внаго помраче́ния тьму отгоня́ющи,/ чудеса́ же та́мо притека́ющим пресла́вная содева́ет/ и ду́хи лука́вствия прогоня́ет./ Во́инству у́бо благочести́вому на сопроти́вныя кре́пость подава́ет,/ стена́ и забра́ло всея́ земли́ быва́ющи/ и оби́тель Свою́ заступле́нием си́льным утвержда́ющи,/ пресла́вными на враги́ побе́дами прославля́ется,/ и вся ве́рныя торжествова́ти созыва́ет,/ и ра́достно к Богома́тери зва́ти науча́ет:/ кре́пость на́ша и утвержде́ние,/ упова́ние и спасе́ние с Бо́гом/ Ты еси́, Богоро́дице./ И Тебе́ мо́лимся:/ моли́ Сы́на Твоего́ и Бо́га на́шего,/ да изба́вит нас в День су́дный муче́ния/ и сподо́бит Ца́рствия Своего́ Небе́снаго.

Моли́тва свята́го Симео́на Богоприи́мца:

Ны́не отпуща́еши раба́ Твоего́, Влады́ко,/ по глаго́лу Твоему́, с ми́ром;/ я́ко ви́деста о́чи мои́ спасе́ние Твое́,/ е́же еси́ угото́вал пред лице́м всех люде́й,/ свет во открове́ние язы́ков,// и сла́ву люде́й Твои́х Изра́иля.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Го́споди, поми́луй. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Тропа́рь, глас 4:

Днесь, я́ко со́лнце пресве́тлое,/ возсия́ нам на возду́се всечестна́я ико́на Твоя́, Влады́чице,/ луча́ми ми́лости мир просвеща́ющи,/ ю́же вели́кая Росси́я,/ я́ко не́кий дар Боже́ственный свы́ше благогове́йне восприе́мши,/ прославля́ет Тя, Богома́ти, всех Влады́чицу,/ и от Тебе́ ро́ждшагося Христа́ Бо́га на́шего велича́ет ра́достно./ Ему́же моли́ся, о Госпоже́ Цари́це Богоро́дице,/ да сохрани́т вся гра́ды и страны́ христиа́нския/ невреди́мы от всех наве́т вра́жиих/ и спасе́т ве́рою покланя́ющихся Его́ Боже́ственному/ и Твоему́ пречи́стому о́бразу,/ Де́во Неискусобра́чная. (Трижды)

Бу́ди И́мя Госпо́дне благослове́но от ны́не и до ве́ка. (Три́жды)

Псало́м 33:

Благословлю́ Го́спода на вся́кое вре́мя,/ вы́ну хвала́ Его́ во усте́х мои́х./ О Го́споде похва́лится душа́ моя́,/ да услы́шат кро́тцыи, и возвеселя́тся./ Возвели́чите Го́спода со мно́ю,/ и вознесе́м И́мя Его́ вку́пе./ Взыска́х Го́спода, и услы́ша мя,/ и от все́х скорбе́й мои́х изба́ви мя./ Приступи́те к Нему́, и просвети́теся,/ и ли́ца ва́ша не постыдя́тся./ Сей ни́щий воззва́, и Госпо́дь услы́ша и́,/ и от все́х скорбе́й его́ спасе́ и́./ Ополчи́тся а́нгел Госпо́день о́крест боя́щихся Его́,/ и изба́вит их./ Вкуси́те и ви́дите, я́ко благ Госпо́дь:/ блаже́н муж, и́же упова́ет Нань./ Бо́йтеся Го́спода, вси́ святи́и Его́,/ я́ко несть лише́ния боя́щимся Его́./ Бога́тии обнища́ша и взалка́ша:/ взыска́ющии же Го́спода// не лиша́тся вся́каго бла́га.

У́ТРЕНЯ.

Шестопса́лмие:

Сла́ва в вы́шних Бо́гу, и на земли́ мир, в челове́цех благоволе́ние. (Три́жды)

Го́споди, устне́ мои́ отве́рзеши, и уста́ моя́ возвестя́т хвалу́ Твою́. (Два́жды)

Псалом 3:

Го́споди, что ся умно́жиша стужа́ющии ми́? Мно́зи востаю́т на мя, мно́зи глаго́лют души́ мое́й: несть спасе́ния eму́ в Бо́зе eго́. Ты же, Го́споди, Засту́пник мой еси́, сла́ва моя́ и вознося́й главу́ мою́. Гла́сом мои́м ко Го́споду воззва́х, и услы́ша мя от горы́ святы́я Своея́. Аз усну́х, и спах, воста́х, я́ко Госпо́дь засту́пит мя. Не убою́ся от тем люде́й, о́крест напа́дающих на мя. Воскресни́, Го́споди, спаси́ мя, Бо́же мой, я́ко Ты порази́л еси́ вся вражду́ющыя ми всу́е: зу́бы гре́шников сокруши́л еси́. Госпо́дне есть спасе́ние, и на лю́дех Твои́х благослове́ние Твое́.

Аз усну́х, и спах, воста́х, я́ко Госпо́дь засту́пит мя.

Псалом 37:

Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́. Я́ко стре́лы Твоя́ унзо́ша во мне, и утверди́л еси́ на мне ру́ку Твою́. Несть исцеле́ния в пло́ти мое́й от лица́ гне́ва Твоего́, несть ми́ра в косте́х мои́х от лица́ грех мои́х. Я́ко беззако́ния моя́ превзыдо́ша главу́ мою́, я́ко бре́мя тя́жкое отяготе́ша на мне. Возсмерде́ша и согни́ша ра́ны моя́ от лица́ безу́мия моего́. Пострада́х и сляко́хся до конца́, весь день се́туя хожда́х. Я́ко ля́двия моя́ напо́лнишася поруга́ний, и несть исцеле́ния в пло́ти мое́й. Озло́блен бых и смири́хся до зела́, рыка́х от воздыха́ния се́рдца моего́. Го́споди, пред Тобо́ю все жела́ние мое́ и воздыха́ние мое́ от Тебе́ не утаи́ся. Се́рдце мое́ смяте́ся, оста́ви мя си́ла моя́, и свет о́чию мое́ю, и той несть со мно́ю. Дру́зи мои́ и и́скреннии мои́ пря́мо мне прибли́жишася и ста́ша, и бли́жнии мои́ отдале́че мене́ ста́ша и нужда́хуся и́щущии ду́шу мою́, и и́щущии зла́я мне глаго́лаху су́етная и льсти́вным весь день поуча́хуся. Аз же я́ко глух не слы́шах и я́ко нем не отверза́яй уст свои́х. И бых я́ко челове́к не слы́шай и не имы́й во усте́х свои́х обличе́ния. Я́ко на Тя, Го́споди, упова́х, Ты услы́шиши, Го́споди Бо́же мой. Я́ко рех: да не когда́ пора́дуют ми ся врази́ мои́: и внегда́ подвижа́тися нога́м мои́м, на мя велере́чеваша. Я́ко аз на ра́ны гото́в, и боле́знь моя́ предо мно́ю есть вы́ну. Я́ко беззако́ние мое́ аз возвещу́ и попеку́ся о гресе́ мое́м. Врази́ же мои́ живу́т и укрепи́шася па́че мене́, и умно́жишася ненави́дящии мя без пра́вды. Воздаю́щии ми зла́я возблага́я оболга́ху мя, зане́ гоня́х благосты́ню. Не оста́ви мене́, Го́споди Бо́же мой, не отступи́ от Мене́. Вонми́ в по́мощь мою́, Го́споди спасе́ния моего́.

Не оста́ви мене́, Го́споди Бо́же мой, не отступи́ от Мене́. Вонми́ в по́мощь мою́, Го́споди спасе́ния моего́.

Псалом 62:

Бо́же, Бо́же мой, к Тебе́ у́тренюю, возжада́ Тебе́ душа́ моя́, коль мно́жицею Тебе́ плоть моя́, в земли́ пу́сте и непрохо́дне, и безво́дне. Та́ко во святе́м яви́хся Тебе́, ви́дети си́лу Твою́ и сла́ву Твою́. Я́ко лу́чши ми́лость Твоя́ па́че живо́т, устне́ мои́ похвали́те Тя. Та́ко благословлю́ Тя в животе́ мое́м, о и́мени Твое́м воздежу́ ру́це мои́. Я́ко от ту́ка и ма́сти да испо́лнится душа́ моя́, и устна́ма ра́дости восхва́лят Тя уста́ моя́. А́ще помина́х Тя на посте́ли мое́й, на у́тренних поуча́хся в Тя. Я́ко был еси́ Помо́щник мой, и в кро́ве крилу́ Твое́ю возра́дуюся. Прильпе́ душа́ моя́ по Тебе́, мене́ же прия́т десни́ца Твоя́. Ти́и же всу́е иска́ша ду́шу мою́, вни́дут в преиспо́дняя земли́, предадя́тся в ру́ки ору́жия, ча́сти ли́совом бу́дут. Царь же возвесели́тся о Бо́зе, похва́лится всяк клены́йся Им, я́ко загради́шася уста́ глаго́лющих непра́ведная.

На у́тренних поуча́хся в Тя. Я́ко был еси́ Помо́щник мой, и в кро́ве крилу́ Твое́ю возра́дуюся. Прильпе́ душа́ моя́ по Тебе́, мене́ же прия́т десни́ца Твоя́.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Го́споди поми́луй. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Псалом 87:

Го́споди Бо́же спасе́ния моего́, во дни воззва́х, и в нощи́ пред Тобо́ю. Да вни́дет пред Тя моли́тва моя́: приклони́ у́хо Твое́ к моле́нию моему́, я́ко испо́лнися зол душа́ моя́, и живо́т мой аду прибли́жися. Привмене́н бых с низходя́щими в ров, бых я́ко челове́к без по́мощи, в ме́ртвых свобо́дь, я́ко я́звеннии спя́щии во гро́бе, и́хже не помяну́л еси́ ктому́, и ти́и от руки́ Твоея́ отринове́ни бы́ша. Положи́ша мя в ро́ве преиспо́днем, в те́мных и се́ни сме́ртней. На мне утверди́ся я́рость Твоя́, и вся во́лны Твоя́ наве́л еси́ на мя. Уда́лил еси́ зна́емых мои́х от Мене́, положи́ша мя ме́рзость себе́: пре́дан бых и не исхожда́х. О́чи мои́ изнемого́сте от нищеты́, воззва́х к Тебе́, Го́споди, весь день, возде́х к Тебе́ ру́це мои́. Еда́ ме́ртвыми твори́ши чудеса́? Или́ вра́чеве воскреся́т, и испове́дятся Тебе́? Еда́ пове́сть кто во гро́бе ми́лость Твою́, и и́стину Твою́ в поги́бели? Еда́ позна́на бу́дут во тьме чудеса́ Твоя́, и пра́вда Твоя́ в земли́ забве́нней? И аз к Тебе́, Го́споди, воззва́х и у́тро моли́тва моя́ предвари́т Тя. Вску́ю, Го́споди, отре́еши ду́шу мою́, отвраща́еши лице́ Твое́ от Мене́? Нищ есмь аз, и в труде́х от ю́ности моея́; возне́с же ся, смири́хся, и изнемого́х. На мне преидо́ша гне́ви Твои́, устраше́ния Твоя́ возмути́ша мя, обыдо́ша мя я́ко вода́, весь день одержа́ша мя вку́пе. Уда́лил еси́ от Мене́ дру́га и и́скренняго, и зна́емых мои́х от страсте́й.

Го́споди Бо́же спасе́ния моего́, во дни воззва́х, и в нощи́ пред Тобо́ю. Да вни́дет пред Тя моли́тва моя́: приклони́ у́хо Твое́ к моле́нию моему́.

Псалом 102:

Благослови́, душе́ моя́, Го́спода, и вся вну́тренняя моя́ и́мя свя́тое Его́. Благослови́, душе́ моя́, Го́спода, и не забыва́й всех воздая́ний Его́, очища́ющаго вся беззако́ния твоя́, исцеля́ющаго вся неду́ги твоя́, избавля́ющаго от истле́ния живо́т твой, венча́ющаго тя ми́лостию и щедро́тами, исполня́ющаго во благи́х жела́ние твое́: обнови́тся я́ко о́рля ю́ность твоя́. Творя́й ми́лостыни Госпо́дь, и судьбу́ всем оби́димым. Сказа́ пути́ Своя́ Моисе́ови, сыново́м Изра́илевым хоте́ния Своя́: Щедр и Ми́лостив Госпо́дь, Долготерпели́в и Многоми́лостив. Не до конца́ прогне́вается, ниже́ во век вражду́ет, не по беззако́нием на́шым сотвори́л есть нам, ниже́ по грехо́м на́шым возда́л есть нам. Я́ко по высоте́ небе́сней от земли́, утверди́л есть Госпо́дь ми́лость Свою́ на боя́щихся Его́. Ели́ко отстоя́т восто́цы от за́пад, уда́лил есть от нас беззако́ния на́ша. Я́коже ще́дрит оте́ц сы́ны, уще́дри Госпо́дь боя́щихся Его́. Я́ко Той позна́ созда́ние на́ше, помяну́, я́ко персть есмы́. Челове́к, я́ко трава́ дни́е eго́, я́ко цвет се́льный, та́ко оцвете́т, я́ко дух про́йде в нем, и не бу́дет, и не позна́ет ктому́ ме́ста своего́. Ми́лость же Госпо́дня от ве́ка и до ве́ка на боя́щихся Его́, и пра́вда Его́ на сыне́х сыно́в, храня́щих заве́т Его́, и по́мнящих за́поведи Его́ твори́ти я́. Госпо́дь на Небеси́ угото́ва Престо́л Свой, и Ца́рство Его́ все́ми облада́ет. Благослови́те Го́спода вси А́нгели Его́, си́льнии кре́постию, творя́щии сло́во Его́, услы́шати глас слове́с Его́. Благослови́те Го́спода вся Си́лы Его́, слуги́ Его́, творя́щии во́лю Его́. Благослови́те Го́спода вся дела́ Его́, на вся́ком ме́сте влады́чества Его́, благослови́, душе́ моя́, Го́спода.

На вся́ком ме́сте влады́чества Его́, благослови́, душе́ моя́, Го́спода.

Псалом 142:

Го́споди, услы́ши моли́тву мою́, внуши́ моле́ние мое́ во и́стине Твое́й, услы́ши мя в пра́вде Твое́й и не вни́ди в суд с рабо́м Твои́м, я́ко не оправди́тся пред Тобо́ю всяк живы́й. Я́ко погна́ враг ду́шу мою́, смири́л есть в зе́млю живо́т мой, посади́л мя есть в те́мных, я́ко ме́ртвыя ве́ка. И уны́ во мне дух мой, во мне смяте́ся се́рдце мое́. Помяну́х дни дре́вния, поучи́хся во всех де́лех Твои́х, в творе́ниих руку́ Твое́ю поуча́хся. Возде́х к Тебе́ ру́це мои́, душа́ моя́, я́ко земля́ безво́дная Тебе́. Ско́ро услы́ши мя, Го́споди, исчезе́ дух мой, не отврати́ лица́ Твоего́ от Мене́, и уподо́блюся низходя́щым в ров. Слы́шану сотвори́ мне зау́тра ми́лость Твою́, я́ко на Тя упова́х. Скажи́ мне, Го́споди, путь во́ньже пойду́, я́ко к Тебе́ взях ду́шу мою́. Изми́ мя от враг мои́х, Го́споди, к Тебе́ прибего́х. Научи́ мя твори́ти во́лю Твою́, я́ко Ты еси́ Бог мой. Дух Твой Благи́й наста́вит мя на зе́млю пра́ву. И́мене Твоего́ ра́ди, Го́споди, живи́ши мя, пра́вдою Твое́ю изведе́ши от печа́ли ду́шу мою́. И ми́лостию Твое́ю потреби́ши враги́ моя́ и погуби́ши вся стужа́ющыя души́ мое́й, я́ко аз раб Твой есмь.

Услы́ши мя, Го́споди, в пра́вде Твое́й и не вни́ди в суд с рабо́м Твои́м.

Дух Твой Благи́й наста́вит мя на зе́млю пра́ву.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Тропа́рь глас 4:

Сла́ва Отцу́ и Сы́ну и Свято́му Ду́ху. И ны́не и при́сно и во ве́ки веко́в. Ами́нь.

Здесь читается кафизма, положенная по дню, или сразу седальны:

Го́споди, поми́луй. (Три́жды)

Седален, глас 4:

Боже́ственными заря́ми просвети́ пою́щия Тя/ и умы́ утверди́, Де́во Всенепоро́чная, кре́пкая всего́ ми́ра Засту́пнице,/ да торжеству́ем вси, любо́вию хва́ляще Тя/ и пресла́вное прише́ствие Твоего́ о́браза сла́вяще, и мо́лим:/ не преста́й, Де́во, моли́твами Твои́ми спаса́ти рабы́ Твоя́ от вся́кия беды́,/ Еди́на Благослове́нная.

Глас 3: Сла́ва Отцу́ и Сы́ну и Свято́му Ду́ху. И ны́не и при́сно и во ве́ки веко́в. Ами́нь.

Яко звезда́ многосве́тлая, взы́де и пресла́вно от восто́ка к за́паду прии́де/ Твой о́браз, Богоневе́стная, Сы́на Твоего́ и Бо́га всемо́щною си́лою,/ озаря́я тьмо́ю скорбе́й одержи́мыя, и преще́ния враг избавля́я,/ и тех се́ти разруша́я, предста́тельство кре́пкое,/ ору́жие непобеди́мое на враги́ ми́ру всему́ явля́яся:/ из Тебе́ бо всех Влады́ка плоть прии́м,/ я́ко Сын Ма́терь Тя Свою́ и Твой пречи́стый о́браз прославля́ет.

Полиеле́й:

Хвали́те И́мя Госпо́дне, хвали́те, раби́ Го́спода.

Аллилу́иа, аллилу́иа, аллилу́иа.

Благослове́н Госпо́дь от Сио́на, живы́й во Иерусали́ме.

Аллилу́иа, аллилу́иа, аллилу́иа.

Испове́дайтеся Го́сподеви, я́ко Благ, я́ко в век ми́лость Его́.

Аллилу́иа, аллилу́иа, аллилу́иа.

Испове́дайтеся Бо́гу Небе́сному, я́ко в век ми́лость Его́.

Аллилу́иа, аллилу́иа, аллилу́иа.

Велича́ние:

Досто́йно е́сть/ велича́ти Тя,/ Богоро́дице,/ Честне́йшую Херуви́м/ и Сла́внейшую/ без сравне́ния Серафи́м.

Псало́м избра́нный:

Помяни́, Го́споди, Дави́да и всю кро́тость его́. Я́ко кля́тся Го́сподеви, обеща́ся Бо́гу Иа́ковлю. Се, слы́шахом я́ во Евфра́фе, обрето́хом я́ в поля́х дубра́вы. Пресла́вная глаго́лашася о тебе́, гра́де Бо́жий. Бог посреде́ его́, и не подви́жится. Кля́тся Госпо́дь Дави́ду и́стиною, и не отве́ржется ея́. От плода́ чре́ва твоего́ посажду́ на престо́ле твое́м. Я́ко избра́ Госпо́дь Сио́на, изво́ли его́ в жили́ще себе́. Освяти́л есть селе́ние Свое́ Вы́шний. Святы́ня и велеле́пота во святи́ле его́. Свят храм твой, ди́вен в пра́вде. До́му Твоему́ подоба́ет святы́ня, Го́споди, в долготу́ дний. Помяну́ и́мя Твое́ во вся́ком ро́де и ро́де. Благослове́н Госпо́дь во век, и в век ве́ка.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа,// сла́ва Тебе́, Бо́же. (Трижды)

Велича́ем Тя, Пресвята́я Де́во, / и чтим о́браз Твой святы́й, / имже точиши исцеления / всем, с ве́рою притека́ющим к нему́.

Седа́льны:

Глас 6:

Безпомо́щным по́мощь Ты вои́стинну, Пречи́стая Богома́ти,/ отсю́ду, смире́ннии, Тобо́ю возвыша́емся, о Тебе́, Высо́цей, держи́мся:/ всем Ты еси́ Прибе́жище и к Богу всеми́лостивая Хода́таица.

Степе́нна, глас 4:

От ю́ности моея́/ мно́зи бо́рют мя стра́сти,/ но Сам мя заступи́// и спаси́, Спа́се мой.

Ненави́дящии Сио́на,/ посрами́теся от Го́спода,/ я́ко трава́ бо огне́м// бу́дете изсо́хше.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Святы́м Ду́хом/ вся́ка душа́ живи́тся,/ и чистото́ю возвыша́ется,// светле́ется Тро́йческим еди́нством, священнота́йне.

Го́споди, поми́луй. (Три́жды)

От Луки Свята́го Ева́нгелия чте́ние

Сла́ва, Тебе́, Го́споди, сла́ва Тебе́.

Во дни о́ны, воста́вши, Мариа́м, и́де в го́рняя со тща́нием, во град Иу́дов. И вни́де в дом Заха́риин, и целова́ Елисаве́т. И бысть я́ко услы́ша Елисаве́т целова́ние Мари́ино, взыгра́ся младе́нец во чре́ве ея́: и испо́лнися Ду́ха Свя́та Елисаве́т. И возопи́ гла́сом ве́лиим, и рече́: благослове́на Ты в жена́х, и благослове́н плод чре́ва Твоего́. И отку́ду мне сие́, да прии́де Ма́ти Го́спода моего́ ко мне? Се бо, я́ко бысть глас целова́ния Твоего́ во у́шию мое́ю, взыгра́ся младе́нец ра́дощами во чре́ве мое́м. И блаже́нна Ве́ровавшая, я́ко бу́дет соверше́ние глаго́ланным Ей от Го́спода. И рече́ Мариа́м: вели́чит душа́ Моя́ Го́спода, и возра́довася дух Мой о Бо́зе Спа́се Мое́м. Я́ко призре́ на смире́ние Рабы́ Своея́: се бо, отны́не ублажа́т Мя вси ро́ди. Я́ко сотвори́ Мне вели́чие Си́льный, и свя́то и́мя Его́. Пребы́сть же Мариа́м с не́ю я́ко три ме́сяцы, и возврати́ся в дом Свой.

Сла́ва, Тебе́, Го́споди, сла́ва Тебе́.

Псало́м 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя. Я́ко беззако́ние мое́ аз зна́ю и грех мой предо мно́ю есть вы́ну. Тебе́ Еди́ному согреши́х, и лука́вое пред Тобо́ю сотвори́х, я́ко да оправди́шися во словесе́х Твои́х и победи́ши, внегда́ суди́ти Ти. Се бо в беззако́ниих зача́т есмь, и во гресе́х роди́ мя ма́ти моя́. Се бо и́стину возлюби́л еси́, безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся, омы́еши мя, и па́че сне́га убелю́ся. Слу́ху моему́ да́си ра́дость и весе́лие, возра́дуются ко́сти смире́нныя. Отврати́ лице́ Твое́ от грех мои́х, и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́, и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́, и Ду́хом Влады́чним утверди́ мя. Научу́ беззако́нныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́, возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо, всесожже́ния не благоволи́ши. Же́ртва Бо́гу дух сокруше́н, се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския, тогда́ благоволи́ши же́ртву пра́вды, возноше́ние и всесожега́емая: тогда́ возложа́т на олта́рь Твой тельцы́.

Глас 6:

Сла́ва Отцу́ и Сы́ну и Свято́му Ду́ху./ Моли́твами Богоро́дицы, / Ми́лостиве, очи́сти / мно́жества согреше́ний на́ших.

И ны́не и при́сно и во ве́ки веко́в. Ами́нь./ Моли́твами Богоро́дицы, / Ми́лостиве, очи́сти / мно́жества согреше́ний на́ших.

Поми́луй мя, Бо́же,/ по вели́цей ми́лости Твое́й,/ и по мно́жеству щедро́т Твои́х// очи́сти беззако́ние мое́.

Стихи́ра, глас 6

Не и́мамы ины́я по́мощи,/ не и́мамы ины́я наде́жды,/ ра́зве Тебе́, Пречи́стая Де́во,/ Ты нам помози́,/ на Тебе́ наде́емся/ и Тобо́ю хва́лимся,/ Твои́ бо есмы́ раби́,/ да не постыди́мся.

Го́споди, поми́луй. (12 раз)

Кано́н Богома́тери. Гла́с 8.

Пе́снь 1.

Ирмос: Во́ду проше́д, я́ко су́шу, и еги́петскаго зла́ избежа́в, изра́ильтянин вопия́ше: Изба́вителю и Бо́гу на́шему пои́м.

О, Тро́ице Вседержи́тельная и Еди́нице Трисо́лнечная! Ду́шу мою́, и се́рдце, и у́м, молю́, просвети́вши и благода́тию освяти́вши, к Боже́ственней Твое́й любви́, Преблага́я, возведи́ и наста́ви благоче́стно пе́ти благосе́рдие Присноде́вы Благослове́нныя.

Блага́го Царя́ Блага́я Ма́ти, Яже все́м благопослу́шная в проше́ниих и всеси́льная в благодея́ниих, благода́ть све́та Твоего́ и на́м возсия́й и облагодати́ дне́сь, о Богоблагода́тная, пе́снь Тебе́ пе́ти начина́ющия.

Лико́м Ангельским вино́вно е́сть ра́дости Твоего́, Влады́чице, настоя́щаго торжества́ славосло́вие: си́и бо дне́сь дви́жутся к похвале́нию; мы́ же, бре́ннии, что́ Ти принесе́м? то́чию усе́рдная благода́рствия.

Арха́нгельский гла́с пое́м Ти́: ра́дуйся, Чи́стая! а́ще и недосто́йни есмы́. За бла́гость у́бо се́й приими́, Влады́чице, све́том ми́лости Твоея́ на́с просвеща́ющи и благода́ть все́м подаю́щи.

Да́ждь ми́, Светода́вче Христе́, в наро́читый де́нь пресла́внаго явле́ния ико́ны, Ро́ждшия Тя́, све́тло торжествова́ти и ве́село во стра́се и ра́дости воспева́ти при́сно Тоя́ чудеса́.

Сло́во Бо́жие Светода́тельное и Прему́дрость Отчую пло́тию, Де́во, ро́ждшая, просвети́ глубо́кую тму́ моего́ неразу́мия и сло́во ми́ пода́ждь воспе́ти Твоя́ чудеса́.

Дне́сь ве́рных собо́ри просвеща́ются, ерети́ческая же ополче́ния посрамля́ются, ви́дяще ико́ну Твою́, Влады́чице, я́ко со́лнце, по возду́ху ше́ствующу, нече́стия мглу́ потребля́ющу и ве́рныя просвеща́ющу.

Еди́на еси́ Ты́ вели́чие на́ше и похвала́ с Бо́гом, Богоневе́стная, Тобо́ю бо от бе́д спаса́емся, и к Тебе́ прибега́ем, и приле́жно мо́лимся: изба́ви, Влады́чице, рабы́ Твоя́ ве́чнаго муче́ния, воспева́ющия Твоя́ чудеса́.

Пе́снь 3.

Ирмос: Утвержде́й в нача́ле небеса́ ра́зумом и зе́млю на вода́х основа́вый, на ка́мени мя́, Христе́, за́поведей Твои́х утверди́, я́ко не́сть свя́т, па́че Тебе́, Еди́не Человеколю́бче.

Гряди́те, ве́рнии, на пресла́вное виде́ние, зри́те на высоте́ благоле́пно сия́ющу пречи́стым Свои́м о́бразом Де́ву Пречи́стую, на́с благода́тно посеща́ющу, благове́рно пою́щих: не́сть пречи́сты, па́че Тебе́, Влады́чице.

Освяща́ется, Богоро́дице, Твое́ю благода́тию вся́к у́м ве́рных и возвыша́ется чу́дным ико́ны Твоея́ прише́ствием, ю́же благоче́стно почита́ющих и Тебе́ ве́рно сла́вящих, сподо́би, Влады́чице, на́с, рабо́в Твои́х, вы́шняго прича́стия.

Да́ждь на́м ненаве́тно небе́сную ше́ствовати стезю́, Богоневе́стная, на боже́ственная дея́ния на́с укрепля́ющи, я́ко да Твои́м, Де́во, заступле́нием злоко́зненнаго путе́й укло́ньшеся, присносу́щныя сла́вы бу́дем о́бщницы.

Ангелов Творца́, и́стиннаго Све́та Христа́, неизрече́нно из Тебе́, Богома́ти, возсия́вшаго луча́ми, омраче́нныя на́ша ду́ши и сердца́ просвети́ и благода́тию Твое́ю, о Благода́тная, освяти́, к го́рняго све́та раче́нию наставля́ющи.

Христе́ Иису́се, Преве́чный Царю́ и Многоми́лостиве, пречестна́го Твоего́ о́браза и ро́ждшия Тя́ Присноде́вы просвети́ на́с явле́нием и пода́ждь на́м согреше́ний оставле́ние и от бе́д избавле́ние.

Егда Ангелами неви́димо носи́му пречестну́ю Твою́ ико́ну, Влады́чице, и светоза́рно стоя́щу на возду́се лю́дие ви́деша, тогда́, просвети́вшеся све́том Твоея́ ми́лости, ра́дости неизглаго́ланныя испо́лнишася.

О, боголюби́вии святи́телие и свяще́нницы, ца́рие и кня́зи и наро́ди вси́, све́тло ликовству́йте дне́сь, я́ко возсия́ на высоте́ Заря́ светоно́сная, держа́щи и́стиннаго Све́та, изображе́на пло́тию, с Ни́мже сни́де к на́м, подаю́щи всему́ ми́ру просвеще́ние.

Твое́ю, Де́во, всечестно́ю ико́ною дре́вле Творе́ц все́х чудоде́йствова, спасе́ Ца́рский гра́д от иноплеме́нных нахожде́ния; си́це и Росси́йстей стране́ бу́ди, Госпоже́ Цари́це, покро́в и заступле́ние, спаса́ющи ю́ от все́х наве́т вра́жиих.

Седа́лен, гла́с 4:

Яко дре́вняго вои́стинну киво́та честне́йши Тво́й пречи́стый о́браз, Влады́чице! Па́че бо иле́ктра блиста́яся, повсю́ду неоску́дно лучи́ ми́лости Твоея́ все́м, явля́я, простира́ет и ми́лостивно чту́щия пресла́вное прише́ствие его́ благода́тию Бо́жиею соблюда́ет. О не́мже, Влады́чице, мы́, ра́дующеся, усе́рдно пра́зднуем и ма́тернее Твое́ к на́м милосе́рдие прославля́ем.

Пе́снь 4.

Ирмос: Ты́ моя́ кре́пость, Го́споди, Ты́ моя́ и си́ла, Ты́ мо́й Бо́г, Ты́ мое́ ра́дование, не оста́вль не́дра Отча, и на́шу нищету́ посети́в. Те́м с проро́ком Авваку́мом зову́ Ти: си́ле Твое́й сла́ва, Человеколю́бче.

Творе́ц все́х и Созда́тель, вседержи́тельною си́лою нося́й вся́ческая, о́бразом Свои́м боже́ственным и Твои́м, Де́во, дне́сь чудоно́сным пресла́вно прии́де, на руку́ Твое́ю, Чи́стая, носи́мь, на спасе́ние челове́ком и исцеле́ние.

Неизрече́нному Бо́жию дарова́нию, ико́не Све́та Христа́ и Пречи́стыя Де́вы, прииди́те, ве́рнии, поклони́мся и с любо́вию припаде́м, вопию́ще: низпосли́, о Благода́телю, ро́ждшия Тя́ ра́ди Присноде́вы Благосе́рдыя, благода́ть и ми́лость на́м, рабо́м Твои́м.

Ангелов Цари́це, мы́сленный киво́те, зако́ннаго па́че киво́та пречи́стый Тво́й о́браз неизрече́нными чудесы́ и благода́тьми Бо́г украси́ и просла́ви и Ангелом почита́ти того́ повеле́: с ни́миже о на́с Ему́, о Всепе́тая, моли́ся, сла́вящих спаси́тельное Его́ смотре́ние, и Твое́ е́же бы на́м спасе́ние улучи́ти.

Яже по благода́ти дарова́нная от Бо́га Помо́щнице на́м все́м, христиа́ном, Того́ моли́, Всеблага́я и Всенепоро́чная, я́ко да пре́зрит на́ша безчи́сленная согреше́ния и изба́вит пла́меннаго томле́ния, и тмы́ кроме́шния, и му́ки вся́кия.

Земля́ у́бо вся́ дне́сь да возвесели́тся, вку́пе же и возду́х, и мо́ре да кропи́т ра́дование, я́ко всечестна́го о́браза Богома́тере чуде́сным ше́ствием Росси́йская страна́ пресла́вно озари́ся.

Раболе́пно слу́жат и Ангельстии чи́нове Тебе́, все́х Цари́це, и благогове́йно почита́ют всечестну́ю Твою́ ико́ну, воспева́юще Тя́, Пресвяту́ю Де́ву, мы́ же, смире́ннии, ка́ко Тебе́, Всечи́стую, досто́йно пе́ти возмо́жем?

Арха́нгельскую пе́снь, — е́же ра́дуйся, — Тебе́ зове́м, Богоневе́сто, — Госпо́дь с Тобо́ю, ра́дуйся, ра́досте Ангелов и все́х челове́ков, сла́вящих Тя́, вои́стинну весе́лие, спаси́ ду́ши пою́щих Тя́, Богоро́дице Чи́стая.

О, Богороди́тельнице, ра́дости Пода́тельнице, ве́рою сла́вящия Тя́ и от души́ пою́щия ра́дости неизрече́нныя испо́лни и Све́та невече́рняго сподо́би, Де́во Благода́тная, Влады́чице.

Пе́снь 5.

Ирмос: Утренюет ду́х мо́й к Тебе́, Бо́же, от Отца́ рожде́нному неизрече́нно и воздви́гнувшему ро́г спасе́ния на́м.

Ты́, о Благода́тная, в ми́лостивом Твое́м дне́сь благоволе́нии боголе́пным явле́нием страну́ на́шу благода́тно просвети́ла еси́ и та́инственное све́та Твоего́ просвеще́ние ми́ру низпосла́ла еси́, к све́ту вы́шния сла́вы, Богоро́дице, ве́рныя возводя́щи.

Омрачи́хомся по́мыслы, отягчи́хомся грехи́, недоуме́ем светоно́сныя благода́ти и ми́лости Твоея́ испове́дати, Влады́чице, но, о Пресвята́я Де́во, просвети́ на́с и обогати́ та́инственными Твои́ми дарова́нии боже́ственных жела́ний, к све́ту пра́ваго пути́ направля́ющи.

Благоче́стно отвсю́ду, о Богома́ти, к пречестне́й Твое́й ико́не притека́ющия, и усе́рдно покланя́ющияся, и ве́рно везде́ Тя призыва́ющия предвари́, от бе́д вся́ких спаса́ющи, и лю́тых неду́г избавля́ющи, и ду́хи лука́выя прогоня́ющи, тишину́ и здра́вие подаю́щи все́м, Влады́чице.

Лю́тыми помышле́нии и скве́рными воспомина́нии от лука́вых враго́в стужа́емых зе́льне, не оста́ви на́с, ниже́ пре́зри, Богороди́тельнице, но осени́ Твое́ю благода́тию, покрыва́ющи от си́х, и заступа́ющи, и спаса́ющи от все́х и́х наве́т, о Богоблаже́нная!

В пусты́ни явле́нно Тебе́, Богома́ти, со святи́телем благогове́йный узре́ти му́ж сподо́бися и благоволе́ния Твоего́ глаго́лы от Тебе́, Цари́це, восприя́т, на бо́льшее утвержде́ние и в по́льзу ми́ру спасе́ния.

Окая́нен у́бо а́з, Всечи́стая, и недосто́ин таковы́я ны́не благода́ти, е́же Тя́ ви́дети, но поне́ в бу́дущем сподо́би мя́ узре́ти Тя́, и Сы́на Твоего́ усре́сти, гряду́ща во сла́ве, и гла́с Боже́ственный услы́шати, зову́щь во Ца́рство небе́сное.

Прибега́ем к Твое́й, Де́во, бла́гости, и о́чи серде́ц на́ших воспуща́ем к Тебе́, Чи́стая, и, с пла́чем коле́на преклоня́юще, мо́лим Тя́: не пре́зри на́шего воздыха́ния и бу́ди на́м покро́в и помо́щница в де́нь Су́дный.

Еди́на еси́ все́х предста́тельница христиа́н, Богома́ти Пречи́стая, услы́ши на́ше моле́ние, воззри́ на ны́, Всепе́тая, спаси́ гра́д и оби́тель Твою́ и озари́ ста́до Твое́ заре́ю благода́ти Твоего́ заступле́ния.

Пе́снь 6.

Ирмос: Моли́тву пролию́ ко Го́споду и Тому́ возвещу́ печа́ли моя́, я́ко зо́л душа́ моя́ испо́лнися и живо́т мо́й а́ду прибли́жися, и молю́ся, я́ко Ио́на: от тли́, Бо́же, возведи́ мя.

Ае́р простра́нный и земля́ на́ша, Цари́це, в пресла́вном Твоея́ ико́ны прише́ствии чуде́с и Боже́ственных даро́в благода́тию Твое́ю испо́лнися, во утвержде́ние благоче́стия и все́х ве́рных, Всепе́тая, е́юже дне́сь и супоста́ты низлага́ются и сла́вящии Тя́ кре́пце утвержда́ются.

Гра́де Бо́жий, селе́ние Свято́е, Де́во Богоневе́стная, сохрани́ от сопроти́вных нахожде́ния и от все́х наве́т вра́жиих святы́й до́м Тво́й и вся́ гра́ды и страны́ христиа́нския, любо́вию пою́щия Тя́ и ве́рно почита́ющия пречи́стый о́браз Тво́й.

Освяще́ние, здра́вие и спасе́ние всегда́ подава́й душа́м же и телесе́м на́шим, о Ма́ти Бо́жия, благоче́стно покланя́ющимся ико́не Твое́й боже́ственней, и усты́ и се́рдцем благогове́йно ю́ со стра́хом целу́ющим, и ве́рою от души́ Тя́ песносло́вящим.

Держа́вный покро́в и сте́ну необори́му стяжа́вше Тя́, Присноде́во Богоро́дице, упова́ние на Тя́ с Бо́гом возлага́ем, ве́рнии, и приле́жно мо́лим: си́лою Твое́ю стре́лы вра́жия и ко́зни вся́ бесо́вския не́мощны, я́ко младе́нчески, покажи́ и неде́йственны, кре́пкая на́ша Помо́щнице.

Конда́к, гла́с 8:

Притеце́м, лю́дие, к Де́вей Богоро́дице Цари́це, благодаря́ще Христа́ Бо́га, и, к Тоя́ чудотво́рней ико́не, уми́льно взира́ющи, припаде́м и возопие́м Ей: о Влады́чице Мари́е, присети́вши страну́ сию́ Твоего́ честна́го о́браза явле́нием чуде́сно, спаса́й в ми́ре и благовре́менстве вся́ христиа́ны, насле́дники показу́ющи небе́сныя жи́зни, Тебе́ бо ве́рно зове́м: ра́дуйся, Де́во, ми́ра спасе́ние.

О, преди́внаго Твоего́ чудесе́, Влады́чице! Яко за преслуша́ние Твоего́ повеле́ния ужа́сно челове́к с главы́ церко́вныя восхище́н бы́в, на земли́ невреди́мь обре́теся, ми́лостию Твое́ю, Всеми́лостивая.

Никто́же та́ко преслу́ша Боже́ственная повеле́ния, я́коже а́з, окая́нный. Те́м, Ти́ припа́дая, молю́ся, Влады́чице: пре́жде да́же до конца́ не поги́бну, настави́ мя́ на и́стинный пу́ть и спаси́ мя, Чи́стая.

Ты́, о Богома́ти, ро́ждшая Претерпе́вшаго на́с ра́ди на дре́ве кре́стнем распя́тие, умоли́ при́сно на́м, страда́ние Его́ свято́е по́мнящим, во́лю Его́ боже́ственную твори́ти и ве́чных бла́г насле́дниками бы́ти.

Влады́чице, Де́во Чи́стая, изба́ви на́с лю́тых все́х, умоля́ющи Пригвозди́вшаго на Кресте́ грехи́ на́ша, и сподо́би на́с досто́йно одесну́ю Его́ ста́ти, егда́ прии́дет во сла́ве Свое́й.

Икос:

Пречу́дное явле́ние Богома́тере ви́дяще, на высоту́ доброде́телей взы́дем и у́м на не́бо возведе́м. Сего́ бо ра́ди небоше́ственне прии́де, да привлече́т к высоте́ вопию́щия Ей си́це: ра́дуйся, благослове́нная Де́во, от все́х родо́в Бо́гом избра́нная; ра́дуйся, Небе́сная Цари́це, Го́спода Бо́га Ма́ти и Творца́ вся́ческих. Ра́дуйся, всера́достное Ангелом пе́ние; ра́дуйся, всежела́тельное всего́ ми́ра зре́ние. Ра́дуйся, неподви́жимое ве́ры благоче́стия основа́ние; ра́дуйся, всесве́тлое благода́ти позна́ние. Ра́дуйся, Бо́жие к земны́м благоволе́ние; ра́дуйся, земны́х к Бо́гу возведе́ние. Ра́дуйся, озло́бленным душа́м утеше́ние; ра́дуйся, все́м ве́рным ско́рое поможе́ние. Ра́дуйся, дарова́нная от Бо́га Предста́тельнице ро́ду христиа́нскому, его́же и соблюда́й приле́жно от вся́ких бе́д и зо́л, да зове́м Ти́: ра́дуйся, Де́во, ве́рным спасе́ние.

Пе́снь 7.

Ирмос: Бо́жия снизхожде́ния о́гонь устыде́ся в Вавило́не иногда́, сего́ ра́ди о́троцы в пещи́, ра́дованною ного́ю, я́ко во цве́тнице, лику́юще поя́ху: благослове́н еси́, Бо́же оте́ц на́ших.

Ангелом гове́йный о́браз Тво́й, Влады́чице, неизрече́нною при́сно благода́тию сия́ет и си́лою: дне́сь бо того́ дарова́нии земны́я просвеща́еши, и к небе́сным наставля́еши, и к ве́чному животу́ устроя́еши за неизглаго́ланную Твою́ бла́гость, Богоблагода́тная.

Твоего́ боголе́пнаго явле́ния, и пресла́внаго ико́ны прише́ствия, и чуде́с пучи́ны, Чи́стая, вити́йствующих уста́ ника́коже возмога́ют испове́дати; мы́ же, гру́бии, что́ возглаго́лем? то́чию: поми́луй и спаси́ на́с, о Всеми́лостивая Влады́чице!

Изве́стная ве́рных Помо́щнице и все́х благи́х Пода́тельнице, приими́ на́с, ве́рно припа́дающих и любо́вию вопию́щих Ти́: поми́луй на́с, Госпоже́, поми́луй на́с, я́коже дне́сь, та́ко и во о́ный ве́к, бу́ди на́м Помо́щница и Засту́пница.

Ма́ти Бо́жия Милосе́рдая, ми́лости Твоея́ две́ри дне́сь отве́рзи на́м и от у́ст мы́сленных волко́в исхити́, хотя́щих на́с поглоти́ти и до конца́ погуби́ти; поми́луй, мо́лим Тя́, о Влады́чице, поми́луй, не отврати́ посра́мленных ра́б Твои́х.

Единоча́дый Тво́й Сы́н и Бо́г все́х, Богома́ти, пречи́стый Тво́й о́браз невреди́мь сохрани́ во пла́мени, о, чудесе́! Благода́тию па́че со́лнца обре́теся сия́ющь, и ве́рныя просвеща́ющь, ве́рою пою́щия: Бо́же, благослове́н еси́.

Небе́снии чи́нове веселя́тся с земноро́дными, Богоро́дице, в све́тлом торжестве́ Твое́м, е́же соверша́ющия ны́ и со стра́хом предстоя́щия пред пречи́стым Твои́м о́бразом просвети́ све́том сия́ния Твоего́, Пречи́стая, и вся́ спаси́.

Еди́наго от Тро́ицы Бо́га Сло́ва, Царя́ Небе́снаго, пло́тию, Цари́це, родила́ еси́, Того́ моли́, Влады́чице, пода́ти одоле́ние на проти́вныя и все́м ве́рным по́мощь, грехо́в оставле́ние и душа́м спасе́ние.

Рабы́ Твоя́, Чи́стая, пою́щия Тя́ и ве́рою несумне́нною моля́щияся Тебе́, светода́тельною Твое́ю и Боже́ственною осени́ благода́тию, я́ко Благоде́теля все́х ро́ждшая, и покры́й и сохрани́ от все́х наве́т вра́жиих.

Пе́снь 8.

Ирмос: Покрыва́яй вода́ми превы́спренняя Своя́, полага́яй мо́рю преде́л песо́к, и содержа́й вся́, Тя́ пое́т со́лнце, Тя́ сла́вит луна́, Тебе́ прино́сит пе́снь вся́ тва́рь, я́ко Соде́телю все́х во ве́ки.

Изря́днии чи́нове небе́снии благоче́стно благогове́ют пречи́стому Твоему́ о́бразу, Всечи́стая, и пречу́дному Его́ прише́ствию, под со́лнцем пресла́вну показа́вшуся и ро́д правове́рный воздви́гшу пе́ти и сла́вити Сы́на Твоего́, я́ко Соде́теля все́х во ве́ки.

Пресла́вная дне́сь пою́ще, любе́зно Ангелом гове́йной Твое́й ико́не покланя́емся, благогове́юще, о Госпоже́ Цари́це! Боже́ственною Твое́ю благода́тию осени́, и на враги́ укрепи́, и ми́рны нас соблюди́.

Ра́дости вина́ Всеблагослове́нная, ра́дуйся, Всенепоро́чная, ра́дуйся, Благода́тная, держа́ва на́ша и огражде́ние и спаси́тельное прибе́жище, спаси́ ны, рабы́ Твоя́, не иму́щия па́че Тебе́ к Бо́гу по́мощи, на Тя́ бо наде́емся и Тебе́ пое́м во ве́ки.

Еди́ну Тя́ жи́зни на́шея стяжа́хом с Бо́гом Храни́тельницу и кре́пку наде́жду спасе́ния: мо́лим Тя́, о Благосе́рдая, и по кончи́не хода́тайствовати о на́с, я́ко да бу́дущих стяза́ний изба́вимся и ми́лостива обря́щем Сы́на Твоего́ и Бо́га в де́нь Су́дный.

О, пресла́вных чуде́с Твои́х, Чи́стая! Яко зда́тели святы́я це́ркве Твоея́, под ка́мением тридне́вно бы́вшии, обрето́шася жи́ви и безвре́дни, покро́вом Твои́м соблюде́ни, Тебе́, все́х Цари́це, возсыла́юще гла́сы похва́льныя.

Жи́знь вме́сто сме́рти дарова́ла еси́, Богоро́дице, ме́ртвенному существу́. Те́мже и на́с, умерщвле́нных грехи́ мно́гими, Богоневе́сто, неврежде́нны от вра́г соблюди́ и к жи́зни лу́чшей возведи́, спаса́ющи ду́ши на́ша.

Дне́сь испо́лнишася ра́дости и весе́лия вси́ ве́рнии о ико́не Твое́й, Богоро́дице, я́ко в че́люстех сме́рти бы́вшим яви́лася еси́ жи́зни Вино́вница и исто́чник приснотеку́щий, целе́бныя да́ры все́м точа́щий и спасе́ние подаю́щий.

Изря́дно воспе́ти пречи́стаго Твоего́ о́браза и ро́ждшагося из Тебе́ Младе́нца, и́стинна же Бо́га, чу́дныя ико́ны пресла́вное прише́ствие совоку́пльшихся люде́й отвсю́ду, Всепе́тая, моле́ние приими́ и проше́ния испо́лни.

На 9-й песни поем песнь Пресвятыя Богородицы:

Вели́чит душа́ Моя́ Го́спода и возра́довася дух Мой о Бо́зе Спа́се Мое́м.

К коемуждо стиху припеваем: Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Я́ко призре́ на смире́ние рабы́ Своея́, се бо, от ны́не ублажа́т Мя вси ро́ди.

Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Я́ко сотвори́ Мне вели́чие Си́льный, и свя́то и́мя Его́, и ми́лость Его́ в ро́ды родо́в боя́щимся Его́.

Сотвори́ держа́ву мы́шцею Свое́ю, расточи́ го́рдыя мы́слию се́рдца их.

Низложи́ си́льныя со престо́л, и вознесе́ смире́нныя, а́лчущия испо́лни благ, и богатя́щияся отпусти́ тщи.

Восприя́т Изра́иля о́трока Своего́, помяну́ти ми́лости, я́коже глаго́ла ко отце́м на́шим, Авраа́му и се́мени его́ да́же до ве́ка.

Пе́снь 9.

Ирмос: Ужасе́ся о се́м не́бо, и земли́ удиви́шася концы́, я́ко Бо́г яви́ся челове́ком пло́тски и чре́во Твое́ бы́сть простра́ннейшее небе́с. Те́м Тя́, Богоро́дицу, Ангелов и челове́к чинонача́лия велича́ют.

Про́ста пути́ по ае́ру светоприя́тному ико́на Твоя́, Влады́чице, стезю́ проходя́щи, богодви́жимо и светоле́пно неизсле́димы стези́ творя́щи, ве́рныя в поднебе́сней благода́тию озари́, ве́рою вопию́щия: вои́стинну честне́йши все́х еси́, Де́во Чи́стая.

Сло́ва вити́йством превысо́ких Твои́х, Чи́стая, чуде́с ника́коже по достоя́нию украси́ти удо́бни есмы́, то́чию усе́рдне мо́лим Тя́, Цари́це: да мо́лиши Сы́на Твоего́, Влады́ку и Царя́ все́х, дарова́вшаго на́м Тебе́, пресла́вную Помо́щницу, сподо́бити на́с небе́снаго Своего́ Ца́рствия.

Пе́снь благода́рственно пе́ния за неизрече́нное Твое́ милосе́рдие, о Богоблагода́тная, от на́с приими́, проше́ния на́ша в по́льзу исполня́ющи, и к высоте́ го́рней все́х возведи́, ве́рно бо Ти́ зове́м: вои́стинну вы́шши все́х еси́, Де́во Всенепоро́чная.

Ро́ди вси́, ра́достно блажи́м Тя́, Богоро́дице, я́ко ра́дости вся́ ны́ испо́лнила еси́ пресла́вным прише́ствием ико́ны Твоея́, Пречи́стая. Ейже дне́сь покланя́ющеся, уми́льно мо́лим Тя́: не забу́ди, Влады́чице, Твои́х рабо́в сподо́бити в бу́дущем ве́це избра́нных ра́дости.

Явле́нию, Влады́чице, всечестны́я Твоея́ ико́ны кто́ не удиви́тся или́ кто́ не почуди́тся? По возду́ху бо сию́, я́ко не́кий да́р светоно́сный, низпосла́ла еси́ земли́ Росси́йстей, ра́достно пою́щей Тя́ и ве́рно велича́ющей.

Ра́дость ми́ру, Де́во, неизглаго́ланную дарова́вши явле́нием пречи́стыя Твоея́ ико́ны, изба́ви, Влады́чице, от вся́кия печа́ли ве́рою покланя́ющияся е́й и со стра́хом целу́ющия ю́: о Пресвята́я! вся́ спаси́ и поми́луй и Ца́рствия небе́снаго сподо́би.

Ро́ждшая, Влады́чице, Человеколю́бца Бо́га, за человеколю́бие посети́ла еси́ на́с боже́ственною Твое́ю ико́ною, к не́йже всегда́ притека́юще и благоле́пие ея́ зря́ще, Тебе́ уми́льно вопие́м: спаса́й при́сно, Богоро́дице, достоя́ние Твое́.

Устна́ми смире́нными принесо́х Ти́ препро́стое сие́, Всепе́тая, пе́ние: поне́же гру́б е́смь, многогре́шный, и недосто́ин по достоя́нию воспе́ти Тя́, но от усе́рдия на Твоя́ щедро́ты наде́яся, я́ко Спаси́теля всего́ ми́ра родила́ еси́, не возгнуша́йся, Цари́це, приими́ сие́ и спаси́ мя.

Свети́лен.

Пречи́стый о́браз Тво́й, и́мже присети́ла еси́ на́с, Богоотрокови́це Де́во, чту́ще, пра́зднуем сего́ ны́не прише́ствие, от него́ благода́тию Сы́на Твоего́ и Твое́ю прие́млюще скорбе́й, и бе́д, и напа́стей избавле́ние, Ма́ти Бо́га Вы́шняго.

Хвали́тны псалмы́, глас 8:

Вся́кое дыха́ние да хва́лит Го́спода./ Хвали́те Го́спода с небе́с,/ хвали́те Его́ в вы́шних.// Тебе́ подоба́ет песнь Бо́гу.

Хвали́те Его́ вси а́нгели Его́,/ хвали́те Его́ вся си́лы Его́.// Тебе́ подоба́ет песнь Бо́гу.

Сти́хиры, глас 8:

Стих: Сотвори́ти в них суд напи́сан/ сла́ва сия́ бу́дет всем преподо́бным Его́.

О, пресла́внаго чудесе́!/ Всеми́рная ра́дость свы́ше просия́ нам –/ ико́на Богома́тере,/ подаю́щи всему́ ми́ру просвеще́ние,/ и благоче́стию утвержде́ние,/ и ве́рным спасе́ние,/ Бо́жие сие́ дарова́ние земны́м дарова́ся./ О не́мже ра́дующеся, Тебе́, Христе́, мо́лим:/ спаси́ ду́ши на́ша, я́ко Милосе́рд.

Стих: Хвали́те Его́ на си́лах Его́,/ хвали́те Его́ по мно́жеству вели́чествия Его́.

О, пресла́внаго чудесе́!/ Превы́ше всех стран Росси́йская земля́/ почте́ся от Вы́шняго промышле́ния,/ и́бо та, а не и́на/ Его́ благода́тию сподо́бися/ сию́ прия́ти ико́ну Богома́тере,/ я́ко Небе́сный дар светолу́чный,/ пресла́вно Бо́гом свы́ше по́сланный./ О не́мже ра́дующися,/ к Тебе́, Христе́, уми́льно вопие́т:/ спаси́, Бла́же, ду́ши на́ша, я́ко Милосе́рд.

Стих: Хвали́те Его́ в тимпа́не и ли́це,/ хвали́те Его́ во стру́нах и орга́не.

Пресла́вно, Богоро́дице, во всех страна́х/ Тобо́ю хва́лится оби́тель Твоя́, Богоневе́сто,/ я́ко име́ет в себе́ чудотво́рную Твою́ ико́ну,/ чу́дно по возду́ху и пресла́вно А́нгелы принесе́нную,/ от нея́же неизрече́нныя цельбы́ прие́млюще,/ благода́рственная вопие́м Тебе́,/ уми́льно моля́ще Тя:/ Пресвята́я Де́во,/ спаси́ ду́ши на́ша, я́ко Милосе́рдая.

Глас 2: Сла́ва Отцу́ и Сы́ну и Свято́му Ду́ху И ны́не и при́сно и во ве́ки веко́в. Ами́нь.

Я́коже иногда́ Ца́рский град,/ име́я ико́ну Твою́, Де́во Пречи́стая,/ Бо́жиим и Твои́м посо́бием побежда́я проти́вныя, ра́довашеся,/ та́ко и ны́не Росси́йская страна́,/ ди́вно стяжа́вши о́браз Твой, Госпоже́,/ во свое́ заступле́ние,/ утвержда́ющися, торжеству́ет ве́село./ Вельми́ же красу́ется и пречестна́я оби́тель Твоя́,/ име́ющи Тя с Бо́гом покро́в и тве́рдое огражде́ние/ от всех нахожде́ний вра́жиих,/ це́рковь же Твоя́, Богоро́дице,/ я́коже иногда́ Влахе́рнская,/ пречи́стым Твои́м о́бразом све́тится,/ и пресла́вными чудесы́ просвеща́ется,/ и, ра́дующися, духо́вно лику́ет, Влады́чице,/ со все́ми ве́рными зову́щи днесь:/ ра́дуйся, Пресвята́я Де́во,/ мое́ благоле́пие, и похвало́, и ве́чное весе́лие./ Ты мя преди́вными чудесы́ обогаща́еши/ и Боже́ственными дарова́нии./ Ты еси́, Влады́чице, исцеле́ний исто́чник неисчерпа́емый,/ и су́щим в беда́х утеше́ние,/ и всем ве́рным покро́в и спасе́ние.

Славосло́вие вели́кое:

Сла́ва в вы́шних Бо́гу, и на земли́ мир, в челове́цех благоволе́ние. Хва́лим Тя, благослови́м Тя, кла́няем Ти ся, славосло́вим Тя, благодари́м Тя, вели́кия ра́ди сла́вы Твоея́. Го́споди Царю́ Небе́сный, Бо́же О́тче Вседержи́телю, Го́споди, Сы́не Единоро́дный, Иису́се Христе́, и Святы́й Ду́ше. Го́споди Бо́же, А́гнче Бо́жий, Сы́не Оте́чь, взе́мляй грех ми́ра, поми́луй нас; взе́мляй грехи́ ми́ра, приими́ моли́тву на́шу; седя́й одесну́ю Отца́, поми́луй нас. Я́ко Ты еси́ еди́н Свят, Ты еси́ еди́н Госпо́дь, Иису́с Христо́с, в сла́ву Бо́га Отца́. Ами́нь.

На всяк день благословлю́ Тя, и восхвалю́ И́мя Твое́ во ве́ки, и в век ве́ка.

Сподо́би, Го́споди, в день сей без греха́ сохрани́тися нам. Благослове́н еси́, Го́споди, Бо́же оте́ц на́ших, и хва́льно и просла́влено И́мя Твое́ во ве́ки. Ами́нь.

Бу́ди, Го́споди, ми́лость Твоя́ на нас, я́коже упова́хом на Тя.

Благослове́н еси́, Го́споди, научи́ мя оправда́нием Твои́м. (Три́жды)

Го́споди, прибе́жище был еси́ нам в род и род. Аз рех: Го́споди, поми́луй мя, исцели́ ду́шу мою́, я́ко согреши́х Тебе́. Го́споди, к Тебе́ прибего́х, научи́ мя твори́ти во́лю Твою́, я́ко Ты еси́ Бог мой: я́ко у Тебе́ исто́чник живота́, во све́те Твое́м у́зрим свет. Проба́ви ми́лость Твою́ ве́дущим Тя.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Три́жды)

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Святы́й Безсме́ртный, поми́луй нас.

Святы́й Бо́же, Святы́й Кре́пкий, Святы́й Безсме́ртный, поми́луй нас.

Тропа́рь, глас 4:

Утверди́, Бо́же, святу́ю правосла́вную ве́ру, правосла́вных христиа́н во век ве́ка.

Честне́йшую Херуви́м и Сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу, Тя велича́ем.

Сла́ва, и ны́не. Го́споди, поми́луй. (Три́жды) Благослови́.

Господи Иисусе Христе, Сыне Божий, моли́твами Пречи́стыя Своея́ Ма́тере, преподобных и богоносных отец наших и всех святы́х, поми́луй и спаси нас я́ко Благ и Челове́колюбец.

Многоле́тие:

Вели́каго Господи́на и Отца́ на́шего Кири́лла,/ Святе́йшаго Патри́арха Моско́вского и всея́ Руси́,/ и Господи́на на́шего (Высоко-) Преосвяще́ннейшаго (имярек),/ (архи-)епи́скопа (митрополита (титул)),/ богохрани́мую страну́ на́шу Росси́йскую,/ и вся правосла́вныя христи́аны,// Го́споди, сохрани́ их на мно́гая ле́та.