Шрифт

▲

Богослужебные тексты для домашнего употребления

Службы иконам Пресвятой Богородицы

Последование Всеношного бдения в день памяти иконы Божией Матери Державная. Для домашнего (келейного) совершения

Оглавление

ВСЕНО́ЩНОЕ БДЕ́НИЕ

ВЕЛИ́КАЯ ВЕЧЕ́РНЯ

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас. Ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Трижды.)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, (трижды). Сла́ва, и ны́не:

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Таже, Го́споди, поми́луй, (12), Сла́ва, и ны́не:

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 103:

Поется часть псалма:

Благослови́, душе́ моя́, Го́спода. / Благослове́н еси́, Го́споди. / Го́споди, Бо́же мой, возвели́чился еси́ зело́. / Благослове́н еси́, Го́споди. / Во испове́дание и в велеле́поту обле́клся еси́. / Благослове́н еси́, Го́споди. / Посреде́ гор про́йдут во́ды. / Ди́вна дела́ Твоя́, Го́споди. / Вся прему́дростию сотвори́л еси́. / Сла́ва Ти, Го́споди, сотвори́вшему вся.

Или читается псалом полностью:

Благослови́, душе́ моя́, Го́спода. Го́споди, Бо́же мой, возвели́чился еси́ зело́. Во испове́дание и в велеле́поту обле́клся еси́. Одея́йся све́том, я́ко ри́зою, простира́яй не́бо, я́ко ко́жу. Покрыва́яй вода́ми превы́спренняя Своя́, полага́яй о́блаки на восхожде́ние Свое́, ходя́й на крилу́ ве́треню. Творя́й А́нгелы Своя́ ду́хи и слуги́ Своя́ пла́мень о́гненный. Основа́яй зе́млю на тве́рди ея́, не преклони́тся в век ве́ка. Бе́здна, я́ко ри́за, одея́ние ея́, на гора́х ста́нут во́ды, от запреще́ния Твоего́ побе́гнут, от гла́са гро́ма Твоего́ убоя́тся. Восхо́дят го́ры и нисхо́дят поля́ в ме́сто, е́же основа́л еси́ им. Преде́л положи́л еси́, eго́же не пре́йдут, ниже́ обратя́тся покры́ти зе́млю. Посыла́яй исто́чники в де́брех, посреде́ гор про́йдут во́ды. Напая́ют вся зве́ри се́льныя, ждут она́гри в жа́жду свою́. На ты́х пти́цы небе́сныя привита́ют, от среды́ ка́мения дадя́т глас. Напая́яй го́ры от превы́спренних Свои́х, от плода́ дел Твои́х насы́тится земля́. Прозяба́яй траву́ ското́м, и злак на слу́жбу челове́ком, извести́ хлеб от земли́. И вино́ весели́т се́рдце челове́ка, ума́стити лице́ еле́ем, и хлеб се́рдце челове́ка укрепи́т. Насы́тятся древа́ польска́я, ке́дри Лива́нстии, и́хже еси́ насади́л. Та́мо пти́цы вогнездя́тся, ероди́ево жили́ще предводи́тельствует и́ми. Го́ры высо́кия еле́нем, ка́мень прибе́жище за́яцем. Сотвори́л есть луну́ во времена́, со́лнце позна́ за́пад свой. Положи́л еси́ тму, и бысть нощь, в не́йже про́йдут вси зве́рие дубра́внии. Ски́мни рыка́ющии, восхи́тити и взыска́ти от Бо́га пи́щу себе́. Возсия́ со́лнце и собра́шася и в ло́жах свои́х ля́гут. Изы́дет челове́к на де́ло свое́ и на де́лание свое́ до ве́чера. Я́ко возвели́чишася дела́ Твоя́, Го́споди, вся прему́дростию сотвори́л еси́, испо́лнися земля́ тва́ри Твоея́. Сие́ мо́ре вели́кое и простра́нное, та́мо га́ди, и́мже несть числа́, живо́тная ма́лая с вели́кими, та́мо корабли́ препла́вают, змий сей, eго́же созда́л еси руга́тися eму́. Вся к Тебе́ ча́ют, да́ти пи́щу им во бла́го вре́мя. Да́вшу Тебе́ им соберу́т, отве́рзшу Тебе́ ру́ку вся́ческая испо́лнятся бла́гости, отвра́щшу же Тебе́ лице́, возмяту́тся, отъи́меши дух их, и исче́знут, и в персть свою́ возвратя́тся. По́слеши Ду́ха Твоего́, и сози́ждутся, и обнови́ши лице́ земли́. Бу́ди сла́ва Госпо́дня во ве́ки, возвесели́тся Госпо́дь о де́лех Свои́х, призира́яй на зе́млю, и творя́й ю́ трясти́ся, прикаса́яйся гора́м, и дымя́тся. Воспою́ Го́сподеви в животе́ мое́м, пою́ Бо́гу моему́, до́ндеже есмь, да услади́тся Ему́ бесе́да моя́, аз же возвеселю́ся о Го́споде. Да исче́знут гре́шницы от земли́, и беззако́нницы, я́коже не бы́ти им. Благослови́, душе́ моя́, Го́спода.

Со́лнце позна́ за́пад свой. Положи́л еси́ тму, и бысть нощь. Я́ко возвели́чишася дела́ Твоя́, Го́споди, вся прему́дростию сотвори́л еси́.

Сла́ва, и ны́не: Аллилу́иа, аллилу́иа, аллилу́иа, сла́ва Тебе́ Бо́же. Трижды.

Блаже́н муж:

Блаже́н муж, и́же не и́де на сове́т нечести́вых.

Аллилу́иа, аллилу́иа, аллилу́иа.

Я́ко весть Госпо́дь путь пра́ведных, и путь нечести́вых поги́бнет.

Аллилу́иа, аллилу́иа, аллилу́иа.

Рабо́тайте Го́сподеви со стра́хом и ра́дуйтеся Ему́ с тре́петом.

Аллилу́иа, аллилу́иа, аллилу́иа.

Блаже́ни вси наде́ющиися Нань.

Аллилу́иа, аллилу́иа, аллилу́иа.

Воскресни́, Го́споди, спаси́ мя, Бо́же мой.

Аллилу́иа, аллилу́иа, аллилу́иа.

Госпо́дне есть спасе́ние, и на лю́дех Твои́х благослове́ние Твое́.

Аллилу́иа, аллилу́иа, аллилу́иа.

Сла́ва Отцу́ и Сы́ну и Свято́му Духу.

Аллилу́иа, аллилу́иа, аллилу́иа.

И ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Го́споди, воззва́х, глас 4:

Го́споди, воззва́х к Тебе́, услы́ши мя./ Услы́ши мя, Го́споди./ Го́споди, воззва́х к Тебе́, услы́ши мя:/ вонми́ гла́су моле́ния моего́,/ внегда́ воззва́ти ми к Тебе́.// Услы́ши мя, Го́споди.

Да испра́вится моли́тва моя́,/ я́ко кади́ло пред Тобо́ю,/ воздея́ние руку́ мое́ю/ – же́ртва вече́рняя.// Услы́ши мя, Го́споди.

Стихи́ры, глас 4:

Стих: Из глубины́ воззва́х к Тебе́, Го́споди,// Го́споди, услы́ши глас мой.

И рыда́х, и взыва́х к Тебе́, Влады́чице,/ но не возмо́гл е́сть глас мой,/ и заглуши́ся во́пль мой от пото́ка грех мои́х,/ и ка́ко умолю́ Тя?/ Са́ма у́бо да́ждь ми моли́тву и сохрани́ раба́ Твоего́./ И́зсше се́рдце мое́ и стру́пием 4 испещри́ся глава́ моя́,/ изнемого́сте от мра́ка о́чи мои́,/ и уя́звен е́смь в глежню́ 5 мою́,/ но Ты, я́ко Держа́вная,/ спаси́ мя и пода́ждь ми ве́лию ми́лость.

Стих: А́ще беззако́ния на́зриши, Го́споди, Го́споди, кто постои́т?// Я́ко у Тебе́ очище́ние е́сть.

Непра́вда, я́ко мо́ре, скры зе́млю Твою́,/ и ны́не лю́те потопля́еми есмы́,/ но Ты простри́ десни́цу Твою́,/ и, я́ко Всехва́льная, поста́ви ны на ка́мене ве́ры,/ и спаси́ ны, Влады́чице, спаси́ ны,/ и утверди́ посреде́ нас держа́ву Твою́.

Стих: От стра́жи у́тренния до но́щи, от стра́жи у́тренния,// да уповае́т Изра́иль на Го́спода.

Змиенра́вно дне́сь показу́ется ста́до Твое́,/ я́ко ве́тром, обурева́еми есмы́/ и не мо́жем терпе́ти,/ но Ты, я́ко Блага́я, ути́ши во́ды пререка́ния/ и не отве́ржи раб Свои́х,/ сохраня́я нам и при́сно ми́лость Твою́./ А́ще не Ты, Богороди́тельнице, па́че всех превознесе́нная,/ а́ще не Ты, о Стено́ неруши́мая и ми́рове Ра́досте,/ кто у́бо умо́лит за ны Сы́на Твоего́, Христа́ Бо́га на́шего,/ да поми́лует сокруше́нных се́рдцем и ско́рбных люде́й Свои́х./ Пред Тем же и бу́ди Хода́таица неусы́пная и спаси́ нас.

Стих: Я́ко у Го́спода ми́лость, и мно́гое у Него́ избавле́ние,// и Той изба́вит Изра́иля от всех беззако́ний eго́.

Прииди́те, вси ве́рнии,/ и, ку́пно собо́ры сотво́рше,/ возопии́м Держа́вней Влады́чице/ и та́ко к Ней возглаго́лем:/ вси неключи́ми есмы́,/ и того́ ра́ди припа́даем к Ти,/ и мо́лим Тя со дерзнове́нием и ве́рою, зову́ще:/ не пре́зри нас, окая́нных,/ потщи́ся на умоле́ние и спаси́ вся правосла́вныя.

Глас 4: Сла́ва Отцу́ и Сы́ну и Свято́му Ду́ху. И ны́не и при́сно и во ве́ки веко́в. Ами́нь.

Не наде́йтеся на кня́зи преходя́щия:/ ничесо́ бо возмо́гут и, сы́ны челове́честии су́ть,/ изы́дут, я́ко бы́лие, и никто́же их помя́нет,/ но моли́теся, бра́тие, моли́теся,/ и прии́мет вы под кров Свой Ма́терь Бо́га на́шего,/ и упоко́имся, лю́дие, под ри́зой Тоя́.

Све́те Тихи́й:

Све́те Ти́хий святы́я сла́вы Безсме́ртнаго Отца́ Небе́снаго, Свята́го, Блаже́ннаго, Иису́се Христе́! Прише́дше на за́пад со́лнца, ви́девше свет вече́рний, пое́м Отца́, Сы́на и Свята́го Ду́ха, Бо́га. Досто́ин еси́ во вся времена́ пет бы́ти гла́сы преподо́бными, Сы́не Бо́жий, живо́т дая́й; те́мже мир Тя сла́вит.

Пареми́и:

Бытия́ чте́ние

Изы́де Иа́ков от студенца́ кля́твеннаго и и́де в Харра́нь./ И обре́те ме́сто, и спа та́мо,/ за́йде бо со́лнце,/ и взят от ка́мения ме́ста того́,и положи́ возгла́вие себе́,/ и спа на ме́сте о́ном, и сон ви́де:/ и се ле́ствица утвержде́на на земли́,/ ея́же глава́ досяза́ше до Небе́с,/ и А́нгели Бо́жии восхожда́ху и нисхожда́ху по ней,/ Госпо́дь же утвержда́шеся на ней и рече́:/ Аз Бог Авраа́мов, отца́ твоего́, и Бог Исаа́ков, не бо́йся:/ земля́, иде́же ты спи́ши на ней,/ тебе́ дам ю и се́мени твоему́./ И бу́дет се́мя твое́, я́ко песо́к земны́й,/ и распространи́тся на мо́ре, и ли́ву, и се́вер, и на восто́ки,/ и возблагословя́тся о тебе́ вся коле́на земна́я и о се́мени твое́м./ И се Аз с тобо́ю, сохраня́яй тя на вся́ком пути́, а́може а́ще пои́деши,/ и возвращу́ тя в зе́млю сию́,/ я́ко не и́мам тебе́ оста́вити,/ до́ндеже сотвори́ти Ми вся, ели́ка глаго́лах тебе́./ И воста́ Иа́ков от сна своего́ и рече́:/ я́ко есть Госпо́дь на ме́сте сем, аз же не ве́дех./ И убоя́ся, и рече́:/ я́ко стра́шно ме́сто сие́,/ несть сие́, но дом Бо́жий, и сия́ врата́ Небе́сная.

Проро́чества Иезекии́лева чте́ние

Та́ко глаго́лет Госпо́дь:/ бу́дет от дне осма́го и про́чее,/ сотворя́т иере́и на олтари́ всесожже́ния ва́шего/ и я́же спасе́ния ва́шего,/ и прииму́ вы, глаго́лет Адонаи́ Госпо́дь./ И обрати́ мя на путь врат святы́х вне́шних,/ зря́щих на восто́ки, и сия́ бя́ху затворе́на./ И рече́ Госпо́дь ко мне:/ врата́ сия́ затворе́на бу́дут и не отве́рзутся,/ и никто́же про́йдет сквозе́ их:/ я́ко Госпо́дь Бог Изра́илев про́йдет и́ми, и бу́дут затворе́на./ Я́ко игу́мен ся́дет в них сне́сти хлеб,/ по пути́ Ела́мских врат вни́дет и по пути́ его́ изы́дет./ И введе́ мя по пути́ врат святы́х, су́щих к се́веру, пря́мо хра́му, и ви́дех,/ и се испо́лнь сла́вы храм Госпо́день.

При́тчей чте́ние

Прему́дрость созда́ Себе́ дом/ и утверди́ столпо́в седмь./ Закла́ Своя́ же́ртвенная, и раствори́ в ча́ши Свое́й вино́, и угото́ва Свою́ трапе́зу./ Посла́ Своя́ рабы́, созыва́ющи с высо́ким пропове́данием на ча́шу, глаго́лющи:/ и́же есть безу́мен, да уклони́тся ко Мне./ И тре́бующим ума́ рече́:/ прииди́те, яди́те Мой хлеб и пи́йте вино́, е́же раствори́х вам./ Оста́вите безу́мие, и жи́ви бу́дете,/ и взыщи́те ра́зума, да поживете́,/ и испра́вите ра́зум в ве́дении./ Наказу́яй злы́я, прии́мет себе́ безче́стие:/ облича́яй же нечести́ваго, опоро́чит себе́,/ обличе́ния бо нечести́вому – ра́ны ему́./ Не облича́й злых, да не возненави́дят тебе́,/ облича́й прему́дра и возлю́бит тя./ Даждь прему́дрому вину́, и прему́дрший бу́дет;/ сказу́й пра́ведному, и приложи́т приима́ти./ Нача́ло прему́дрости – страх Госпо́день, и сове́т святы́х – ра́зум:/ разуме́ти бо зако́н – по́мысла есть блага́го./ Сим о́бразом мно́гое поживе́ши вре́мя,/ и приложа́тся тебе́ ле́та живота́.

Го́споди, поми́луй. (Три́жды,)

Сподо́би, Го́споди:

Сподо́би, Го́споди, в ве́чер сей без греха́ сохрани́тися нам. Благослове́н еси́, Го́споди, Бо́же оте́ц на́ших, и хва́льно и просла́влено и́мя Твое́ во ве́ки. Ами́нь.

Бу́ди, Го́споди, ми́лость Твоя́ на нас, я́коже упова́хом на Тя. Благослове́н еси́, Го́споди, научи́ мя оправда́нием Твои́м. Благослове́н еси́, Влады́ко, вразуми́ мя оправда́нием Твои́м. Благослове́н еси́, Святы́й, просвети́ мя оправда́нии Твои́ми.

Го́споди, ми́лость Твоя́ во век, дел руку́ Твое́ю не пре́зри. Тебе́ подоба́ет хвала́, Тебе́ подоба́ет пе́ние, Тебе́ сла́ва подоба́ет. Отцу́ и Сы́ну и Свято́му Ду́ху, ны́не и при́сно и во ве́ки веко́в. Ами́нь.

На литии стихиры, глас 1:

Стра́шен е́сть гнев Госпо́день,/ на вся сме́ртныя належа́щ,/ но того́ ра́ди показу́ется дне́сь и заступле́ние ве́рным:/ се бо прии́де Благода́тная во спасе́ние лю́дем Свои́м,/ и не́сть возмоги́й сокруши́ти ста́до Тоя́,/ зане́ всему́ ми́рови Влады́чица е́сть.

Слава, и ныне, глас 5:

Пра́вды Вы́шния ча́юще,/ не о сем рыда́йте, я́ко истязу́еми есте́,/ и воскли́кните та́ко:/ ве́мы, я́ко окая́нни есмы́,/ но не до конца́ прогне́вайся на ны,/ моли́твами же Богоро́дицы спаси́ и вся правосла́вныя.

Го́споди, поми́луй. (40 раз)

Стихи́ры на стихо́вне:

Стихи́ры: Глас 6:

Де́ва была́ еси́ Отрокови́ца смире́нна,/ дне́сь же показу́ешися нам я́ко Цари́ца и Ма́терь вся́ческих,/ и, тому́ дивя́щеся, восклица́ем Ти:/ ка́ко стра́шна е́сть та́йна сия́,/ и ка́ко досто́йно восхва́лим Тя, Преблагу́ю,/ но, я́ко Небеса́ к земле́ прикло́ньшая/ и зе́млю да́же до Небе́с возве́дшая,/ спаси́, Богоро́дице, лю́ди Твоя́/ и Сама́ сохрани́ ста́до Твое́.

Стих: Пресла́вная глаго́лашася о Тебе́,/ Гра́де Бо́жий.

Испо́лнися, Благода́тная, ми́лости/ и услы́ши ны, моля́щияся Ти/ и та́ко Ти глаго́лющия:/ возра́дуйся, Христа́ Бо́га ро́ждшая,/ зане́ ублажа́т Тя вси ро́ди/ и восхва́лят Тя вся́ческая,/ вои́стинну бо несокруши́ма е́сть Держа́ва Твоя́.

Стих: Я́ко избра́ Госпо́дь Сио́на изво́ли и в жили́ще Себе́.

Свят еси́, Го́споди,/ и Ма́терь Твоя́, я́ко овча́, бы́сть смире́нна/ и того́ ра́ди красно́ дне́сь преукраси́ся,/ па́че всех Безпло́тных е́сть сла́ва Твоя́,/ не подви́жится у́бо и сохрани́т ны,/ я́ко Всеси́льна.

Слава, И ныне, глас 6:

Ка́ко воспое́м Тя, Влады́чицу Де́ву,/ и ка́ко нарече́м Тя, Ма́терь Све́та неизрече́нна и непристу́пна,/ но вои́стинну Богоро́дица Ты еси́,/ и хва́льно и просла́влено и́мя Твое́/ и ны́не, и во век веко́в,/ и по сконча́нии ве́ка.

Моли́тва свята́го Симео́на Богоприи́мца:

Ны́не отпуща́еши раба́ Твоего́, Влады́ко,/ по глаго́лу Твоему́, с ми́ром;/ я́ко ви́деста о́чи мои́ спасе́ние Твое́,/ е́же еси́ угото́вал пред лице́м всех люде́й,/ свет во открове́ние язы́ков,// и сла́ву люде́й Твои́х Изра́иля.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Го́споди, поми́луй. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Тропа́рь, глас 4:

Гра́да Сио́нска взыску́юще,/ под Твой покро́в, Де́во Чи́стая, дне́сь притека́ем,/ и никто́же возмо́жет на ны,/ я́ко не́сть град си́лен, а́ще не Су́щаго Бо́га,/ и не́сть и́на кре́пость, а́ще не ми́лость Влады́чицы Де́вы. (Три́жды)

Бу́ди И́мя Госпо́дне благослове́но от ны́не и до ве́ка. (Три́жды)

Псало́м 33:

Благословлю́ Го́спода на вся́кое вре́мя,/ вы́ну хвала́ Его́ во усте́х мои́х./ О Го́споде похва́лится душа́ моя́,/ да услы́шат кро́тцыи, и возвеселя́тся./ Возвели́чите Го́спода со мно́ю,/ и вознесе́м И́мя Его́ вку́пе./ Взыска́х Го́спода, и услы́ша мя,/ и от все́х скорбе́й мои́х изба́ви мя./ Приступи́те к Нему́, и просвети́теся,/ и ли́ца ва́ша не постыдя́тся./ Сей ни́щий воззва́, и Госпо́дь услы́ша и́,/ и от все́х скорбе́й его́ спасе́ и́./ Ополчи́тся а́нгел Госпо́день о́крест боя́щихся Его́,/ и изба́вит их./ Вкуси́те и ви́дите, я́ко благ Госпо́дь:/ блаже́н муж, и́же упова́ет Нань./ Бо́йтеся Го́спода, вси́ святи́и Его́,/ я́ко несть лише́ния боя́щимся Его́./ Бога́тии обнища́ша и взалка́ша:/ взыска́ющии же Го́спода// не лиша́тся вся́каго бла́га.

У́ТРЕНЯ.

Шестопса́лмие:

Сла́ва в вы́шних Бо́гу, и на земли́ мир, в челове́цех благоволе́ние. (Три́жды)

Го́споди, устне́ мои́ отве́рзеши, и уста́ моя́ возвестя́т хвалу́ Твою́. (Два́жды)

Псалом 3:

Го́споди, что ся умно́жиша стужа́ющии ми́? Мно́зи востаю́т на мя, мно́зи глаго́лют души́ мое́й: несть спасе́ния eму́ в Бо́зе eго́. Ты же, Го́споди, Засту́пник мой еси́, сла́ва моя́ и вознося́й главу́ мою́. Гла́сом мои́м ко Го́споду воззва́х, и услы́ша мя от горы́ святы́я Своея́. Аз усну́х, и спах, воста́х, я́ко Госпо́дь засту́пит мя. Не убою́ся от тем люде́й, о́крест напа́дающих на мя. Воскресни́, Го́споди, спаси́ мя, Бо́же мой, я́ко Ты порази́л еси́ вся вражду́ющыя ми всу́е: зу́бы гре́шников сокруши́л еси́. Госпо́дне есть спасе́ние, и на лю́дех Твои́х благослове́ние Твое́.

Аз усну́х, и спах, воста́х, я́ко Госпо́дь засту́пит мя.

Псалом 37:

Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́. Я́ко стре́лы Твоя́ унзо́ша во мне, и утверди́л еси́ на мне ру́ку Твою́. Несть исцеле́ния в пло́ти мое́й от лица́ гне́ва Твоего́, несть ми́ра в косте́х мои́х от лица́ грех мои́х. Я́ко беззако́ния моя́ превзыдо́ша главу́ мою́, я́ко бре́мя тя́жкое отяготе́ша на мне. Возсмерде́ша и согни́ша ра́ны моя́ от лица́ безу́мия моего́. Пострада́х и сляко́хся до конца́, весь день се́туя хожда́х. Я́ко ля́двия моя́ напо́лнишася поруга́ний, и несть исцеле́ния в пло́ти мое́й. Озло́блен бых и смири́хся до зела́, рыка́х от воздыха́ния се́рдца моего́. Го́споди, пред Тобо́ю все жела́ние мое́ и воздыха́ние мое́ от Тебе́ не утаи́ся. Се́рдце мое́ смяте́ся, оста́ви мя си́ла моя́, и свет о́чию мое́ю, и той несть со мно́ю. Дру́зи мои́ и и́скреннии мои́ пря́мо мне прибли́жишася и ста́ша, и бли́жнии мои́ отдале́че мене́ ста́ша и нужда́хуся и́щущии ду́шу мою́, и и́щущии зла́я мне глаго́лаху су́етная и льсти́вным весь день поуча́хуся. Аз же я́ко глух не слы́шах и я́ко нем не отверза́яй уст свои́х. И бых я́ко челове́к не слы́шай и не имы́й во усте́х свои́х обличе́ния. Я́ко на Тя, Го́споди, упова́х, Ты услы́шиши, Го́споди Бо́же мой. Я́ко рех: да не когда́ пора́дуют ми ся врази́ мои́: и внегда́ подвижа́тися нога́м мои́м, на мя велере́чеваша. Я́ко аз на ра́ны гото́в, и боле́знь моя́ предо мно́ю есть вы́ну. Я́ко беззако́ние мое́ аз возвещу́ и попеку́ся о гресе́ мое́м. Врази́ же мои́ живу́т и укрепи́шася па́че мене́, и умно́жишася ненави́дящии мя без пра́вды. Воздаю́щии ми зла́я возблага́я оболга́ху мя, зане́ гоня́х благосты́ню. Не оста́ви мене́, Го́споди Бо́же мой, не отступи́ от Мене́. Вонми́ в по́мощь мою́, Го́споди спасе́ния моего́.

Не оста́ви мене́, Го́споди Бо́же мой, не отступи́ от Мене́. Вонми́ в по́мощь мою́, Го́споди спасе́ния моего́.

Псалом 62:

Бо́же, Бо́же мой, к Тебе́ у́тренюю, возжада́ Тебе́ душа́ моя́, коль мно́жицею Тебе́ плоть моя́, в земли́ пу́сте и непрохо́дне, и безво́дне. Та́ко во святе́м яви́хся Тебе́, ви́дети си́лу Твою́ и сла́ву Твою́. Я́ко лу́чши ми́лость Твоя́ па́че живо́т, устне́ мои́ похвали́те Тя. Та́ко благословлю́ Тя в животе́ мое́м, о и́мени Твое́м воздежу́ ру́це мои́. Я́ко от ту́ка и ма́сти да испо́лнится душа́ моя́, и устна́ма ра́дости восхва́лят Тя уста́ моя́. А́ще помина́х Тя на посте́ли мое́й, на у́тренних поуча́хся в Тя. Я́ко был еси́ Помо́щник мой, и в кро́ве крилу́ Твое́ю возра́дуюся. Прильпе́ душа́ моя́ по Тебе́, мене́ же прия́т десни́ца Твоя́. Ти́и же всу́е иска́ша ду́шу мою́, вни́дут в преиспо́дняя земли́, предадя́тся в ру́ки ору́жия, ча́сти ли́совом бу́дут. Царь же возвесели́тся о Бо́зе, похва́лится всяк клены́йся Им, я́ко загради́шася уста́ глаго́лющих непра́ведная.

На у́тренних поуча́хся в Тя. Я́ко был еси́ Помо́щник мой, и в кро́ве крилу́ Твое́ю возра́дуюся. Прильпе́ душа́ моя́ по Тебе́, мене́ же прия́т десни́ца Твоя́.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Го́споди поми́луй. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Псалом 87:

Го́споди Бо́же спасе́ния моего́, во дни воззва́х, и в нощи́ пред Тобо́ю. Да вни́дет пред Тя моли́тва моя́: приклони́ у́хо Твое́ к моле́нию моему́, я́ко испо́лнися зол душа́ моя́, и живо́т мой аду прибли́жися. Привмене́н бых с низходя́щими в ров, бых я́ко челове́к без по́мощи, в ме́ртвых свобо́дь, я́ко я́звеннии спя́щии во гро́бе, и́хже не помяну́л еси́ ктому́, и ти́и от руки́ Твоея́ отринове́ни бы́ша. Положи́ша мя в ро́ве преиспо́днем, в те́мных и се́ни сме́ртней. На мне утверди́ся я́рость Твоя́, и вся во́лны Твоя́ наве́л еси́ на мя. Уда́лил еси́ зна́емых мои́х от Мене́, положи́ша мя ме́рзость себе́: пре́дан бых и не исхожда́х. О́чи мои́ изнемого́сте от нищеты́, воззва́х к Тебе́, Го́споди, весь день, возде́х к Тебе́ ру́це мои́. Еда́ ме́ртвыми твори́ши чудеса́? Или́ вра́чеве воскреся́т, и испове́дятся Тебе́? Еда́ пове́сть кто во гро́бе ми́лость Твою́, и и́стину Твою́ в поги́бели? Еда́ позна́на бу́дут во тьме чудеса́ Твоя́, и пра́вда Твоя́ в земли́ забве́нней? И аз к Тебе́, Го́споди, воззва́х и у́тро моли́тва моя́ предвари́т Тя. Вску́ю, Го́споди, отре́еши ду́шу мою́, отвраща́еши лице́ Твое́ от Мене́? Нищ есмь аз, и в труде́х от ю́ности моея́; возне́с же ся, смири́хся, и изнемого́х. На мне преидо́ша гне́ви Твои́, устраше́ния Твоя́ возмути́ша мя, обыдо́ша мя я́ко вода́, весь день одержа́ша мя вку́пе. Уда́лил еси́ от Мене́ дру́га и и́скренняго, и зна́емых мои́х от страсте́й.

Го́споди Бо́же спасе́ния моего́, во дни воззва́х, и в нощи́ пред Тобо́ю. Да вни́дет пред Тя моли́тва моя́: приклони́ у́хо Твое́ к моле́нию моему́.

Псалом 102:

Благослови́, душе́ моя́, Го́спода, и вся вну́тренняя моя́ и́мя свя́тое Его́. Благослови́, душе́ моя́, Го́спода, и не забыва́й всех воздая́ний Его́, очища́ющаго вся беззако́ния твоя́, исцеля́ющаго вся неду́ги твоя́, избавля́ющаго от истле́ния живо́т твой, венча́ющаго тя ми́лостию и щедро́тами, исполня́ющаго во благи́х жела́ние твое́: обнови́тся я́ко о́рля ю́ность твоя́. Творя́й ми́лостыни Госпо́дь, и судьбу́ всем оби́димым. Сказа́ пути́ Своя́ Моисе́ови, сыново́м Изра́илевым хоте́ния Своя́: Щедр и Ми́лостив Госпо́дь, Долготерпели́в и Многоми́лостив. Не до конца́ прогне́вается, ниже́ во век вражду́ет, не по беззако́нием на́шым сотвори́л есть нам, ниже́ по грехо́м на́шым возда́л есть нам. Я́ко по высоте́ небе́сней от земли́, утверди́л есть Госпо́дь ми́лость Свою́ на боя́щихся Его́. Ели́ко отстоя́т восто́цы от за́пад, уда́лил есть от нас беззако́ния на́ша. Я́коже ще́дрит оте́ц сы́ны, уще́дри Госпо́дь боя́щихся Его́. Я́ко Той позна́ созда́ние на́ше, помяну́, я́ко персть есмы́. Челове́к, я́ко трава́ дни́е eго́, я́ко цвет се́льный, та́ко оцвете́т, я́ко дух про́йде в нем, и не бу́дет, и не позна́ет ктому́ ме́ста своего́. Ми́лость же Госпо́дня от ве́ка и до ве́ка на боя́щихся Его́, и пра́вда Его́ на сыне́х сыно́в, храня́щих заве́т Его́, и по́мнящих за́поведи Его́ твори́ти я́. Госпо́дь на Небеси́ угото́ва Престо́л Свой, и Ца́рство Его́ все́ми облада́ет. Благослови́те Го́спода вси А́нгели Его́, си́льнии кре́постию, творя́щии сло́во Его́, услы́шати глас слове́с Его́. Благослови́те Го́спода вся Си́лы Его́, слуги́ Его́, творя́щии во́лю Его́. Благослови́те Го́спода вся дела́ Его́, на вся́ком ме́сте влады́чества Его́, благослови́, душе́ моя́, Го́спода.

На вся́ком ме́сте влады́чества Его́, благослови́, душе́ моя́, Го́спода.

Псалом 142:

Го́споди, услы́ши моли́тву мою́, внуши́ моле́ние мое́ во и́стине Твое́й, услы́ши мя в пра́вде Твое́й и не вни́ди в суд с рабо́м Твои́м, я́ко не оправди́тся пред Тобо́ю всяк живы́й. Я́ко погна́ враг ду́шу мою́, смири́л есть в зе́млю живо́т мой, посади́л мя есть в те́мных, я́ко ме́ртвыя ве́ка. И уны́ во мне дух мой, во мне смяте́ся се́рдце мое́. Помяну́х дни дре́вния, поучи́хся во всех де́лех Твои́х, в творе́ниих руку́ Твое́ю поуча́хся. Возде́х к Тебе́ ру́це мои́, душа́ моя́, я́ко земля́ безво́дная Тебе́. Ско́ро услы́ши мя, Го́споди, исчезе́ дух мой, не отврати́ лица́ Твоего́ от Мене́, и уподо́блюся низходя́щым в ров. Слы́шану сотвори́ мне зау́тра ми́лость Твою́, я́ко на Тя упова́х. Скажи́ мне, Го́споди, путь во́ньже пойду́, я́ко к Тебе́ взях ду́шу мою́. Изми́ мя от враг мои́х, Го́споди, к Тебе́ прибего́х. Научи́ мя твори́ти во́лю Твою́, я́ко Ты еси́ Бог мой. Дух Твой Благи́й наста́вит мя на зе́млю пра́ву. И́мене Твоего́ ра́ди, Го́споди, живи́ши мя, пра́вдою Твое́ю изведе́ши от печа́ли ду́шу мою́. И ми́лостию Твое́ю потреби́ши враги́ моя́ и погуби́ши вся стужа́ющыя души́ мое́й, я́ко аз раб Твой есмь.

Услы́ши мя, Го́споди, в пра́вде Твое́й и не вни́ди в суд с рабо́м Твои́м.

Дух Твой Благи́й наста́вит мя на зе́млю пра́ву.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Тропа́рь глас 4:

Сла́ва Отцу́ и Сы́ну и Свято́му Ду́ху. И ны́не и при́сно и во ве́ки веко́в. Ами́нь.

Глас 4: Гра́да Сио́нска взыску́юще,/ под Твой покро́в, Де́во Чи́стая, дне́сь притека́ем,/ и никто́же возмо́жет на ны,/ я́ко не́сть град си́лен, а́ще не Су́щаго Бо́га,/ и не́сть и́на кре́пость, а́ще не ми́лость Влады́чицы Де́вы.

Здесь читается кафизма, положенная по дню, или сразу седальны:

Го́споди, поми́луй. (Три́жды)

Седален, глас 2:

Глас пла́ча слы́шен е́сть на Сио́не,/ и рыда́ние ве́лие воздвиза́емо е́сть во сто́гнах святы́х./ О Влады́чице Де́во, услы́ши я, Твои́ми бо лю́ди излива́емы су́ть,/ и спаси́ град опустоше́нный.

Глас 7: Воста́ни, Влады́чице, воста́ни,/ и облече́тся Сио́н в кре́пость свою́,/ и вода́ же́лчная бу́дет нам, я́ко мед,/ напита́емся, лю́дие, тесно́тами, и́же от Зижди́теля су́ть,/ и восхва́лим, пою́ще, Держа́ву Твою́,/ я́ко несконча́ема е́сть.

Глас 7: Сла́ва Отцу́ и Сы́ну и Свято́му Ду́ху. И ны́не и при́сно и во ве́ки веко́в. Ами́нь.

Стра́шно е́сть прираже́ние зми́я,/ клеветни́к бо и уби́йца е́сть искони́,/ и того́ ра́ди Тя, о Цари́це и Де́во, мо́лим и не преста́нем моля́щи,/ зане́ ве́мы о Тебе́, я́ко о се́мени Твое́м того́ глава́ блюде́тся/ и Держа́ва Твоя́ несконча́ема е́сть.

Полиеле́й:

Хвали́те И́мя Госпо́дне, хвали́те, раби́ Го́спода.

Аллилу́иа, аллилу́иа, аллилу́иа.

Благослове́н Госпо́дь от Сио́на, живы́й во Иерусали́ме.

Аллилу́иа, аллилу́иа, аллилу́иа.

Испове́дайтеся Го́сподеви, я́ко Благ, я́ко в век ми́лость Его́.

Аллилу́иа, аллилу́иа, аллилу́иа.

Испове́дайтеся Бо́гу Небе́сному, я́ко в век ми́лость Его́.

Аллилу́иа, аллилу́иа, аллилу́иа.

Велича́ние:

Велича́ем Тя,/ Пресвята́я Де́во,/ Богоизбра́нная Отрокови́це,/ и чтим Держа́вный о́браз святы́ни Твоея́,/ и́мже подае́ши ве́лию ми́лость/ всем, с ве́рою к нему́ притека́ющим.

Псало́м избра́нный:

Помяни́, Го́споди, Дави́да и всю кро́тость его́. Я́ко кля́тся Го́сподеви, обеща́ся Бо́гу Иа́ковлю. Се, слы́шахом я́ во Евфра́фе, обрето́хом я́ в поля́х дубра́вы. Пресла́вная глаго́лашася о тебе́, гра́де Бо́жий. Бог посреде́ его́, и не подви́жится. Кля́тся Госпо́дь Дави́ду и́стиною, и не отве́ржется ея́. От плода́ чре́ва твоего́ посажду́ на престо́ле твое́м. Я́ко избра́ Госпо́дь Сио́на, изво́ли его́ в жили́ще себе́. Освяти́л есть селе́ние Свое́ Вы́шний. Святы́ня и велеле́пота во святи́ле его́. Свят храм твой, ди́вен в пра́вде. До́му Твоему́ подоба́ет святы́ня, Го́споди, в долготу́ дний. Помяну́ и́мя Твое́ во вся́ком ро́де и ро́де. Благослове́н Госпо́дь во век, и в век ве́ка.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа,// сла́ва Тебе́, Бо́же. (Трижды)

Седа́льны:

Глас 4:

А́ще и еди́ну ка́плю ми́лости Твоея́ одожди́ши ми, Всечи́стая,/ не возмо́жет язы́к мой досто́йно Тя возвели́чити,/ но па́че ме́ры и неизрече́нна е́сть бла́гость Твоя́,/ и пою́ сла́ву Твою́,/ я́ко вои́стинну Ма́ти Бо́жия Ты еси́.

Степе́нна, глас 4:

От ю́ности моея́/ мно́зи бо́рют мя стра́сти,/ но Сам мя заступи́// и спаси́, Спа́се мой.

Ненави́дящии Сио́на,/ посрами́теся от Го́спода,/ я́ко трава́ бо огне́м// бу́дете изсо́хше.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Святы́м Ду́хом/ вся́ка душа́ живи́тся,/ и чистото́ю возвыша́ется,// светле́ется Тро́йческим еди́нством, священнота́йне.

Го́споди, поми́луй. (Три́жды)

От Луки Свята́го Ева́нгелия чте́ние

Сла́ва, Тебе́, Го́споди, сла́ва Тебе́.

Во дни о́ны, воста́вши, Мариа́м, и́де в го́рняя со тща́нием, во град Иу́дов. И вни́де в дом Заха́риин, и целова́ Елисаве́т. И бысть я́ко услы́ша Елисаве́т целова́ние Мари́ино, взыгра́ся младе́нец во чре́ве ея́: и испо́лнися Ду́ха Свя́та Елисаве́т. И возопи́ гла́сом ве́лиим, и рече́: благослове́на Ты в жена́х, и благослове́н плод чре́ва Твоего́. И отку́ду мне сие́, да прии́де Ма́ти Го́спода моего́ ко мне? Се бо, я́ко бысть глас целова́ния Твоего́ во у́шию мое́ю, взыгра́ся младе́нец ра́дощами во чре́ве мое́м. И блаже́нна Ве́ровавшая, я́ко бу́дет соверше́ние глаго́ланным Ей от Го́спода. И рече́ Мариа́м: вели́чит душа́ Моя́ Го́спода, и возра́довася дух Мой о Бо́зе Спа́се Мое́м. Я́ко призре́ на смире́ние Рабы́ Своея́: се бо, отны́не ублажа́т Мя вси ро́ди. Я́ко сотвори́ Мне вели́чие Си́льный, и свя́то и́мя Его́. Пребы́сть же Мариа́м с не́ю я́ко три ме́сяцы, и возврати́ся в дом Свой.

Сла́ва, Тебе́, Го́споди, сла́ва Тебе́.

Псало́м 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя. Я́ко беззако́ние мое́ аз зна́ю и грех мой предо мно́ю есть вы́ну. Тебе́ Еди́ному согреши́х, и лука́вое пред Тобо́ю сотвори́х, я́ко да оправди́шися во словесе́х Твои́х и победи́ши, внегда́ суди́ти Ти. Се бо в беззако́ниих зача́т есмь, и во гресе́х роди́ мя ма́ти моя́. Се бо и́стину возлюби́л еси́, безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся, омы́еши мя, и па́че сне́га убелю́ся. Слу́ху моему́ да́си ра́дость и весе́лие, возра́дуются ко́сти смире́нныя. Отврати́ лице́ Твое́ от грех мои́х, и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́, и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́, и Ду́хом Влады́чним утверди́ мя. Научу́ беззако́нныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́, возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо, всесожже́ния не благоволи́ши. Же́ртва Бо́гу дух сокруше́н, се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския, тогда́ благоволи́ши же́ртву пра́вды, возноше́ние и всесожега́емая: тогда́ возложа́т на олта́рь Твой тельцы́.

Глас 6:

Сла́ва Отцу́ и Сы́ну и Свято́му Ду́ху./ Моли́твами Богоро́дицы, / Ми́лостиве, очи́сти / мно́жества согреше́ний на́ших.

И ны́не и при́сно и во ве́ки веко́в. Ами́нь./ Моли́твами Богоро́дицы, / Ми́лостиве, очи́сти / мно́жества согреше́ний на́ших.

Поми́луй мя, Бо́же,/ по вели́цей ми́лости Твое́й,/ и по мно́жеству щедро́т Твои́х// очи́сти беззако́ние мое́.

Стихи́ра, глас 6

Не и́мамы ины́я по́мощи,/ не и́мамы ины́я наде́жды,/ ра́зве Тебе́, Влады́чице,/ Ты нам помози́,/ на Тебе́ наде́емся/ и Тобо́ю хва́лимся,/ Твои́ бо есмы́ рабы́, да не постыди́мся.

Го́споди, поми́луй. (12 раз)

Канон, глас 4.

Пе́снь 1.

Ирмос: Отве́рзу уста́ моя́, и напо́лнятся Ду́ха, и сло́во отры́гну Цари́це Ма́тери, и явлю́ся, све́тло торжеству́я, и воспою́, ра́дуяся, Тоя́ чудеса́.

Самоизмышле́нная па́губа покры́ла е́сть всю́ зе́млю Твою́, и мра́к ве́лий воцари́ся дне́сь в вертогра́де Твое́м. Тя́жко ми́ е́сть, и рыда́ю Тебе́, Ма́ти Пречи́стая, и, а́ще услы́шиши, ничесо́же устрашу́ся, и воспою́ и́мя Твое́, сла́вно бо просла́вися.

Покая́нию научи́ мя́, Влады́чице, да де́нь и но́щь излию́ сле́зы моя́ и да смире́н от вра́г мои́х воскли́кну Тебе́: никто́же чи́ст, ра́зве Тебе́, Отрокови́це Чи́стая, и сохрани́т мя́ Держа́ва Твоя́, сла́вно бо просла́вися.

А́з из глубины́ зо́л мои́х вопию́ Ти́, и не премолчи́т сто́н мо́й пред Тобо́ю: ви́ждь, о, ви́ждь, Влады́чице Де́во, и не отве́ржи мене́, услы́ши у́бо во́пль гла́са моего́ и покры́й мя́ ри́зою смиренному́дрия Твоего́, сла́вно бо просла́вися.

Су́д гне́вен прии́де на ны́, и разсы́пася ра́дость люде́й Твои́х, вси́ бо пла́чем и рыда́ем и та́ко глаго́лем: о мечу́ Бо́жий, доко́ле не упоко́ишися? Преста́ни у́бо, пощади́ ны́, и воспое́м Держа́ву Влады́чицы на́шея, сла́вно бо просла́вися.

Из но́щи де́л пре́лести погуби́ша ны́, па́л е́сть Сио́н, и заключе́ни есмы́; Иерусали́ме, Иерусали́ме, почто́ та́ко омрачи́лся еси́? Того́ же ра́ди и возопии́м Влады́чице си́це: то́кмо Твоя́ Держа́ва сохрани́т ны́, сла́вно бо просла́вися.

Пе́снь 3.

Ирмос: Твоя́ песносло́вцы, Богоро́дице, живы́й и незави́стный Исто́чниче, ли́к себе́ совоку́пльшия, духо́вно утверди́, в Боже́ственней Твое́й сла́ве венце́в сла́вы сподо́би.

Обольсти́ мя́ зми́й, клеветни́к бо е́сть, и, душевре́дное в себе́ насажда́я, смути́лось се́рдце мое́. Я́ко ме́ртв, пребыва́ю и ки́ими словесы́ о себе́ возрыда́ю? Но Тя́ молю́, Влады́чице, молю́ и глаго́лю: облада́й над ни́м и от греха́ моего́ очи́сти мя́.

Го́рьким пла́чем мои́м, я́ко во́ду, излию́ се́рдце мое́, сокруше́ние мое́ я́ко же́ртва Тебе́, и молю́ Тя́, Пречи́стая: е́й, не отврати́ мене́, раба́ Твоего́, сохрани́ у́бо и до после́дняго дне́.

О́чи мои́ поме́ркнусте от я́звы моея́, и утруди́ мя́ бре́мя мое́. Иде́же е́сть сла́ва моя́? И заключи́ мене́ неду́г и вра́г, а́з же, я́ко ми́лость, прие́млю у́зы моя́ и пою́, веселя́ся: никто́ у́бо, я́ко Бо́г, вознесе́т Сы́й Христа́ Своего́ и Ма́терь Его́, Влады́чицу на́шу.

Руковожде́ние пода́ждь ми́, Нищепита́тельнице, и озари́ мя́ све́том, е́же от Тебе́ во истоща́нии просия́вшим. О Богоро́дице и Ма́ти Бо́га моего́, бу́ди же и мне́ заступле́нием ве́рным.

Душетле́нными по́мыслы лю́те стужа́емь е́смь, и тя́жко ми́ е́сть. Не ли пре́зриши раба́ Твоего́? Молю́ у́бо Тя́, Пречи́стая: изведи́ мя́ от гно́ища моего́, исцели́ ра́ны моя́ и спаси́ мя́. Влады́чице, спаси́ мя́.

Седа́лен, гла́с 3:

О Ле́ствице неизрече́нна и преизря́дна, я́ко же и ле́ствица, ю́же ви́де пра́отец, с Небеси́ низходя́щу, та́ко и Ты́, Богоневе́сто, Не́бо и зе́млю сочета́вшая, Восхожде́ние Ты́ еси́, и́мже и упасе́мся от бе́д.

Слава и ныне: Христа́ Бо́га и Сы́на Твоего́, между́ двою́ разбо́йнику на Кресте́ ви́сима, зря́ще, го́рько рыда́ла еси́, Ма́ти, и жа́ло вни́де в се́рдце Твое́. О Влады́чице Де́во, боле́знующи у́бо Сама́, спаси́ дне́сь вся́ удруче́нныя, истязу́емыя лю́ди Твоя́.

Пе́снь 4.

Ирмос: Седя́й в сла́ве на Престо́ле Божества́, во о́блаце ле́гце прии́де Иису́с Пребоже́ственный Нетле́нною Дла́нию и спасе́ зову́щия: сла́ва, Христе́, си́ле Твое́й.

Истоща́ние прии́де на рабы́ Твоя́, и до́м на́ш оста́вися пра́зден и пу́ст. Хожду́ и взыва́ю, но не́сть ми́ спаса́юща, еди́на у́бо сме́рть отвещава́ет на гла́с мо́й, и, рыда́я, молю́ Тя́ и глаго́лю: не отве́ржи мене́ и Ты́, Де́во Чи́стая, да спасе́н бу́ду.

Цветоно́сную простри́, Влады́чице, ру́ку Твою́, и оживе́т вертогра́д Тво́й, и ни́щии обря́щут хле́бы своя́, и убо́зии ри́зы своя́, вси́ восхва́лят и́мя Твое́, я́ко вои́стинну неизрече́нна е́сть ми́лость Твоя́.

Егда́ восхо́щеши, никто́же сокруши́т ны́, я́ко вели́кое дерзнове́ние обрела́ еси́ у Христа́ Бо́га, Сы́на Твоего́, и, сие́ зря́ще, вопие́м Ти́, Влады́чице, да сохрани́ши и ны́ под кро́вом Твои́м.

Правосла́внии Христиа́ны, под Твою́ ми́лость дне́сь притека́ем и, явле́ние честны́я ико́ны Твоея́ све́тло пра́зднующе, си́це глаго́лем Тебе́: простира́еши и на́м, Благода́тная, необори́мую ри́зу Свою́.

Разуме́йте, непокори́вии язы́цы, и не хвали́теся о мы́шце свое́й, зане́ еди́н е́сть гра́д несокруши́м, и сия́ Твоя́, Присноде́во Влады́чице, Держа́ва и Ца́рство, е́же и стои́т до сконча́ния ве́ка.

А́з, егда́ и во у́зех, но Тобо́ю, Отрокови́це Чи́стая, вы́ну свобо́дь е́смь, и не в стра́х ми́ умале́ние мое́ е́сть, но я́ко зла́ту — горни́ло и о́гнь, сие́ бо разуме́я, сла́влю у́зы моя́ и велича́ю Тя́, Непоро́чную Де́ву.

Пе́снь 5.

Ирмос: Ужасо́шася вся́ческая о Боже́ственней сла́ве Твое́й: Ты́ бо, Неискусобра́чная Де́во, име́ла еси́ во утро́бе над все́ми Бо́га и родила́ еси́ Безле́тнаго Сы́на, все́м воспева́ющим Тя́ ми́р подава́ющая.

Водворя́ет ны́ зми́й во юдо́ль пла́ча и ча́яний злы́х. Не мо́жем у́бо терпе́ти ско́рби своя́, но Ты́, Богороди́тельнице, простира́еши на́м покро́в Сво́й, и спасе́ни бу́дем от зо́л.

Отрокови́це Де́во, спасла́ еси́ на́с от рабо́ты вра́жия, и те́м красно́ написа́ся и́мя Твое́: Цари́ца ми́рови Ты́ еси́, и Держа́ва Твоя́ да́же до после́дняго дне́.

Све́та непристу́пна Ма́ти Ты́ еси́, и всу́е дне́сь подви́жися тьма́ супроти́вная, никто́же возмо́жет на ны́, я́ко с на́ми Влады́чица на́ша, и сла́ва Твоя́ несконча́ема е́сть.

Лю́дие Бо́жии, дру́зи моя́, уве́руйте во Христа́, Бо́га на́шего, и в преди́вно Его́ Ро́ждшую, храня́ще у́бо за́поведи Бо́га Вы́шняго и обря́щете душа́м ва́шим ми́р и ве́лию ми́лость.

А́нгели, и ти́и просла́виша Тя́, Влады́чицу вся́ческих и па́че Не́ба Превознесе́нную, пою́т бо Христу́, Сы́ну Твоему́: искупи́л еси́ лю́ди Твоя́, и в челове́цех благоволе́ние.

Вели́чие Твое́ кто́ испове́сть, Богоро́дице, я́ко па́че смы́сла родила́ еси́ Бо́га Сло́ва, и не мо́жет язы́к челове́чь досто́йно Тя́ пе́ти, но приими́ ми́лостивно моли́тву мою́ и сохрани́ раба́ Твоего́.

Пе́снь 6.

Ирмос: Боже́ственное сие́ и всечестно́е соверша́юще пра́зднество, Богому́дрии, Богома́тере, прииди́те, рука́ми воспле́щем, от Нея́ ро́ждшагося Бо́га сла́вим.

Но́щь, и мра́к, и во́ды пререка́ния лю́те истязу́ют зе́млю Твою́, се́ у́бо преще́ние Бо́жие и гне́в Того́ е́сть, но молю́ Тя́, Пречи́стая, молю́ и глаго́лю: а́ще хо́щеши — мо́жеши, и ве́м, я́ко умоли́т Отрокови́ца за Держа́ву Свою́.

Уязви́хомся от зми́я, лю́ди Твоя́, и, я́ко из а́дова чре́ва, вопие́м Ти́, Благода́тная Де́во: не на́м, но ра́ди от Тебе́ избра́нных и а́нгельское житие́ возлюби́вших, спаси́, Богоро́дице, и вся́ правосла́вныя.

Ю́зники окова́нныя, что́, о Цари́це, без Тебе́ возмо́жем и ка́ко от гре́х свои́х упасе́мся? Но Ты́, я́ко Блага́я, утверди́ в на́с святы́ню Свою́ и не отве́ржи моля́щихся Ти́.

Затми́ся со́лнце мое́ и ду́х мо́й изы́де в непотре́бие земли́, но те́мже и вознепщева́х о све́те Со́лнца Пра́вды и смири́х горды́ню мою́, Тебе́ взыва́ю, Де́во Чи́стая, да спасе́ши раба́ Твоего́.

Единому́дренни да пребу́дем, лю́дие, и да возра́дуемся о ра́нах, и́же от Сотво́ршаго су́ть, я́ко, наказу́я, наказа́ ны́ Госпо́дь, не сме́рти у́бо предаде́ и научи́ разуме́ти во́лю Свою́.

Ме́ртвии возста́нут, и изве́ржет земля́ ко́сти своя́, зане́ все́х совоскреси́т на́с истоща́ние Претерпе́вый, и Се́й е́сть Ца́рь ми́рови, и Ма́терь Его́ — Влады́чица на́ша.

Конда́к, гла́с 8:

Взбра́нной Воево́де победи́тельныя пе́сни прино́сим, я́ко дарова́ся на́м Держа́ва Твоя́, и ничесо́же устраши́мся, не от ми́ра бо спасе́ние на́ше, но Превознесе́нныя Влады́чицы милосе́рдием огражда́емся и тому́ дне́сь ра́дуемся, я́ко прии́де Засту́пница на стра́жу земли́ Своея́.

И́кос:

Зря́ще ико́ну Твою́: во о́блацех — Бо́га и Отца́ и на ру́цех Твои́х — Христа́ Бо́га, Сы́на Твоего́ и Спа́са ми́рови, покланя́емся ко хра́му Твоему́ и, лобыза́я честны́я но́зи Твоя́, взыва́ем Ти́ си́це: вои́стинну дарова́ся на́м спасе́ние ве́лие и наде́жда на́ша вы́ну пред на́ми, я́ко прии́де Влады́чица на стра́жу земли́ Своея́.

Пе́снь 7.

Ирмос: Не послужи́ша тва́ри Богому́дрии па́че Созда́вшаго, но, о́гненное преще́ние му́жески попра́вше, ра́довахуся, пою́ще: препе́тый отце́в Госпо́дь и Бо́г, благослове́н еси́.

Ликовству́йте, ве́рних собо́ри, и по́йте Царе́ви, И́же на Го́рних седя́щу, я́ко благослове́н и ди́вен е́сть Бо́г на́ш, Ве́лий Ревни́тель, и стра́шен Го́рний Сио́н и просла́влен во ве́ки.

Юдо́лию пла́ча земля́ показа́ся Твоя́, о́гнь паля́щ прии́де и объя́т ю́, но не рыда́йте, бра́тие, и́бо, я́ко купина́ неопали́ма, хра́м от Сио́на и просла́влен во ве́ки.

И́мамы Тя́, Росода́тельницу, и николи́же устраши́мся ве́тров, от пусты́нь воздвиза́емых, Тя́, бо, Пречи́стую, мо́лим и та́ко зове́м Ти́: оживи́ вертогра́д Тво́й, и бу́дет просла́влен во ве́ки.

Сло́во ле́стче положи́ша на мне́ врази́ моя́, и сокруша́ет мя́ ро́г непокори́вых. Дру́зи мои́, и ти́и оста́виша мя́; но не оста́ви мене́ и Ты́, Влады́чице, и спаси́ мя́, я́ко Ма́ти Бо́га моего́ Ты́ еси́, и хра́м Тво́й просла́влен во ве́ки.

Обручи́ мя́, о Присноде́во, святы́не Свое́й, и не убою́ся от те́м вра́г мои́х, лю́те напа́дших на мя́, и та́ко возопию́ Ти́: Иерусали́ме, Иерусали́ме, святы́й еси́ гра́д и просла́влен во ве́ки.

Херуви́ми, и Серафи́ми, и вся́ Небе́сныя во́и пою́т Тя́, Преблагослове́нную, и, вопию́ще, глаго́лют: не́сть хра́м ины́й, ра́зве Тебе́, и се́й препросла́влен во ве́ки.

Пе́снь 8.

Ирмос: О́троки благочести́выя в пещи́ Рождество́ Богоро́дичо спасло́ е́сть; тогда́ у́бо образу́емое, ны́не же де́йствуемое, вселе́нную всю́ воздвиза́ет пе́ти Тебе́: Го́спода по́йте, дела́, и превозноси́те Его́ во вся́ ве́ки.

Рыда́ние мое́ приими́, Влады́чице моя́, и угаси́ о́гнь, е́же от супоста́т разжже́н е́сть, да позна́ю Бо́га моего́ и со тща́нием воскли́кну Ему́: по́йте и превозноси́те Его́ во ве́ки.

А́лчущ е́смь, и взыва́ю Ти́, Влады́чице, и молю́ Тя́, да не истле́ние бу́дет ми́ в че́сть, но ми́лость Твоя́, та́ко о не́й возглаго́лю: благослови́те, вся́ дела́ Госпо́дня, Го́спода, по́йте и превозноси́те во ве́ки.

Непрестаю́щу горды́ню отжени́ от мене́, Благода́тная, и угаси́ о́гнь я́звы моея́, и, не я́ко ды́м, но я́ко благоуха́ние Го́сподеви, воспою́ бра́тием мои́м: о́троцы, благослови́те, свяще́нницы, по́йте, лю́дие, превозноси́те Го́спода во ве́ки.

Из пещи́ разжже́ния моего́, я́ко из а́дова пла́мени, вопию́ Ти́: о Влады́чице Де́во, окропи́ мя́ росо́ю сле́з Твои́х, у Креста́ Сы́на Твоего́ излия́нных, и воскли́кну, взыва́я: благослови́те Ма́терь Бо́га Вы́шняго, Го́спода по́йте и превозноси́те во ве́ки.

Любомра́чное о́ко мое́ просвети́ све́том смиренному́дрия Твоего́, и позна́ю во́лю Сотвори́вшаго мя́, и не от мудрова́ния моего́, но се́рдцем мои́м воскли́кну о Не́м: Его́ по́йте и превозноси́те во ве́ки.

Ю́дуже гре́х, та́мо и скре́жет зубо́м, но не премолчи́, Де́во Чи́стая, и да́ждь ми́ глаго́л разуме́ния, да потерплю́ бре́мя мое́ и воскли́кну о Бо́зе, Спа́се мое́м: благослови́те, вся́ дела́ Госпо́дня, Го́спода, по́йте и превозноси́те во ве́ки.

На 9-й песни поем песнь Пресвятыя Богородицы:

Вели́чит душа́ Моя́ Го́спода и возра́довася дух Мой о Бо́зе Спа́се Мое́м.

К коемуждо стиху припеваем: Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Я́ко призре́ на смире́ние рабы́ Своея́, се бо, от ны́не ублажа́т Мя вси ро́ди.

Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Я́ко сотвори́ Мне вели́чие Си́льный, и свя́то и́мя Его́, и ми́лость Его́ в ро́ды родо́в боя́щимся Его́.

Сотвори́ держа́ву мы́шцею Свое́ю, расточи́ го́рдыя мы́слию се́рдца их.

Низложи́ си́льныя со престо́л, и вознесе́ смире́нныя, а́лчущия испо́лни благ, и богатя́щияся отпусти́ тщи.

Восприя́т Изра́иля о́трока Своего́, помяну́ти ми́лости, я́коже глаго́ла ко отце́м на́шим, Авраа́му и се́мени его́ да́же до ве́ка.

Пе́снь 9.

Ирмос: Вся́к земноро́дный да взыгра́ется, Ду́хом просвеща́емь, да торжеству́ет же Безпло́тных умо́в естество́, почита́ющее свяще́нное торжество́ Богома́тере, и да вопие́т: ра́дуйся, Всеблаже́нная Богоро́дице, Чи́стая Присноде́во.

Дыха́ние бу́рное не сокруши́т и еди́наго от забра́л стены́ Твоея́. Хра́м Тво́й утвержде́н е́сть и не подви́жится вы́ну, и, тому́ ра́дующеся, пое́м Ти́: сла́ва Держа́ве Твое́й.

Та́йная вся́ обнаже́нии показу́ются дне́сь. Свя́т е́сть су́д Тво́й, о Го́споди, и свя́то И́мя Твое́; но ви́ждь, Бо́же, я́ко среди́ бра́тий мои́х Ма́терь Твоя́, и преложи́ гне́в Тво́й.

Всеору́жием ве́ры опоя́ши мене́, Благода́тная, и смиренному́дрием укрепи́ десни́цу мою́, да, я́ко стра́ж, пребу́ду, воспева́я и́мя Твое́, и, а́ще помо́жеши ми́, не подви́жуся да́же до сме́рти.

Огнезра́чный же́зл Тво́й, я́ко пла́мень чи́ст, и си́м ве́деши, Путеводи́тельнице, лю́ди Твоя́, да соблюду́тся от бе́д Христиа́ны.

Я́рость а́дова и та́ не возмо́жет на ны́, зане́ свя́т е́сть хра́м Тво́й и о се́мени Твое́м кля́тся Дави́д, непрестаю́ща хвала́ Твоя́ и Держа́ва Твоя́ до сконча́ния ве́ка.

Свети́лен:

Ублажа́т Тя́, Богороди́тельнице, вси́ ро́ди, я́ко смире́ние Твое́ па́че все́х предукраси́ся, и увенча́ся и́мя Твое́, и просла́ви Тя́ Бо́г, я́ко Ма́терь Свою́.

Хвали́тны псалмы́, глас 5:

Вся́кое дыха́ние да хва́лит Го́спода./ Хвали́те Го́спода с небе́с,/ хвали́те Его́ в вы́шних.// Тебе́ подоба́ет песнь Бо́гу.

Хвали́те Его́ вси а́нгели Его́,/ хвали́те Его́ вся си́лы Его́.// Тебе́ подоба́ет песнь Бо́гу.

Сти́хиры, глас 5:

Стих: Сотвори́ти в них суд напи́сан/ сла́ва сия́ бу́дет всем преподо́бным Его́.

Седя́щаго на Херуви́мех носи́ла еси́/ ма́терними объя́тии,/ и Той сотвори́ Держа́ву Твою́,/ и, сему́ ра́дующеся, пое́м Ти:/ оса́нна, Ма́ти Христа́.

Стих: Хвали́те Его́ на си́лах Его́,/ хвали́те Его́ по мно́жеству вели́чествия Его́.

Присноде́вство Твое́, я́ко столп недви́жим,/ и глава́ его́ превы́ше небе́с,/ и сотвори́ Ти вели́чие Си́льный,/ дне́сь ми́рови Влады́чица Ты еси́, и пое́м Ти:/ оса́нна, Ма́ти Христа́.

Глас 5: Сла́ва Отцу́ и Сы́ну и Свято́му Ду́ху И ны́не и при́сно и во ве́ки веко́в. Ами́нь.

Вои́стинну Богоро́дица Ты еси́,/ неизрече́нна е́сть сла́ва Твоя́,/ и того́ ра́ди велича́ем Тя,/ со Херуви́мы и Серафи́мы зову́ще:/ оса́нна, Ма́ти Христа́.

Славосло́вие вели́кое:

Сла́ва в вы́шних Бо́гу, и на земли́ мир, в челове́цех благоволе́ние. Хва́лим Тя, благослови́м Тя, кла́няем Ти ся, славосло́вим Тя, благодари́м Тя, вели́кия ра́ди сла́вы Твоея́. Го́споди Царю́ Небе́сный, Бо́же О́тче Вседержи́телю, Го́споди, Сы́не Единоро́дный, Иису́се Христе́, и Святы́й Ду́ше. Го́споди Бо́же, А́гнче Бо́жий, Сы́не Оте́чь, взе́мляй грех ми́ра, поми́луй нас; взе́мляй грехи́ ми́ра, приими́ моли́тву на́шу; седя́й одесну́ю Отца́, поми́луй нас. Я́ко Ты еси́ еди́н Свят, Ты еси́ еди́н Госпо́дь, Иису́с Христо́с, в сла́ву Бо́га Отца́. Ами́нь.

На всяк день благословлю́ Тя, и восхвалю́ И́мя Твое́ во ве́ки, и в век ве́ка.

Сподо́би, Го́споди, в день сей без греха́ сохрани́тися нам. Благослове́н еси́, Го́споди, Бо́же оте́ц на́ших, и хва́льно и просла́влено И́мя Твое́ во ве́ки. Ами́нь.

Бу́ди, Го́споди, ми́лость Твоя́ на нас, я́коже упова́хом на Тя.

Благослове́н еси́, Го́споди, научи́ мя оправда́нием Твои́м. (Три́жды)

Го́споди, прибе́жище был еси́ нам в род и род. Аз рех: Го́споди, поми́луй мя, исцели́ ду́шу мою́, я́ко согреши́х Тебе́. Го́споди, к Тебе́ прибего́х, научи́ мя твори́ти во́лю Твою́, я́ко Ты еси́ Бог мой: я́ко у Тебе́ исто́чник живота́, во све́те Твое́м у́зрим свет. Проба́ви ми́лость Твою́ ве́дущим Тя.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Три́жды)

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Святы́й Безсме́ртный, поми́луй нас.

Святы́й Бо́же, Святы́й Кре́пкий, Святы́й Безсме́ртный, поми́луй нас.

Тропа́рь, глас 4:

Утверди́, Бо́же, святу́ю правосла́вную ве́ру, правосла́вных христиа́н во век ве́ка.

Честне́йшую Херуви́м и Сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу, Тя велича́ем.

Сла́ва, и ны́не. Го́споди, поми́луй. (Три́жды) Благослови́.

Господи Иисусе Христе, Сыне Божий, моли́твами Пречи́стыя Своея́ Ма́тере, преподобных и богоносных отец наших и всех святы́х, поми́луй и спаси нас я́ко Благ и Челове́колюбец.

Многоле́тие:

Вели́каго Господи́на и Отца́ на́шего Кири́лла,/ Святе́йшаго Патри́арха Моско́вского и всея́ Руси́,/ и Господи́на на́шего (Высоко-) Преосвяще́ннейшаго (имярек),/ (архи-)епи́скопа (митрополита (титул)),/ богохрани́мую страну́ на́шу Росси́йскую,/ и вся правосла́вныя христи́аны,// Го́споди, сохрани́ их на мно́гая ле́та.