Богослужебные чтения 11 декабря 2026 года

Послание к Титу, зачало 301

Ча́до Ти́те, вся чи́ста чи́стым, оскверне́ным же и неве́рным ничто́же чи́сто, но оскверни́ся их и ум и со́весть. Бо́га испове́дуют ве́дети, а де́лы отме́щутся Его́, ме́рзцы су́ще и непокори́ви, и на вся́кое де́ло благо́е неиску́сни. Ты же глаго́ли, я́же подоба́ет здра́вому уче́нию: ста́рцем тре́звенным бы́ти, че́стным, целому́дренным, здра́вствующым ве́рою, любо́вию, терпе́нием. Ста́рицам та́кожде во украше́нии святоле́пным, не клевети́вым, не вину́ мно́гу порабоще́нным, доброучи́тельным, я́ко да уцелому́дрят ю́ныя, мужелю́бицам бы́ти, чадолю́бицам, целому́дренным, чи́стым, до́мы до́бре пра́вящым, благи́м, покаря́ющымся свои́м муже́м, да не сло́во Бо́жие ху́лится. Ю́ношы та́кожде моли́ целому́дрствовати. О всем же сам себе́ подава́я о́браз до́брых дел, во уче́нии незави́стное, че́стность, нетле́ние, сло́во здра́вое, незазо́рное. Да проти́вный посрами́тся, ничто́же име́я глаго́лати о нас уко́рно. Рабы́, свои́м господе́м повинова́тися, во всем благоуго́дным бы́ти, не прекосло́вным, не кра́дущым, но ве́ру вся́ку явля́ющым бла́гу, да уче́ние Спаси́теля на́шего Бо́га украша́ют во всем.

Евангелие от Луки, зачало 95

Рече́ Госпо́дь при́тчу сию́: челове́к не́кий добра́ ро́да и́де на страну́ дале́че прия́ти себе́ ца́рство и возврати́тися. Призва́в же де́сять раб свои́х, даде́ им де́сять мнас и рече́ к ним: ку́плю де́йте, до́ндеже прииду́. И гра́ждане его́ ненави́дяху его́ и посла́ша моли́тву в след его́, глаго́люще: не хо́щем сему́, да ца́рствует над на́ми. И бысть егда́ возврати́ся прии́м ца́рство, рече́ пригласи́ти рабы́ ти́и, и́мже даде́ сребро́, да уве́сть, какову́ ку́плю суть сотвори́ли. Прии́де же пе́рвый, глаго́ля: го́споди, мнас твоя́ приде́ла де́сять мнас. И рече́ ему́: благи́й ра́бе до́брый, я́ко о ма́ле ве́рен был еси́, бу́ди о́бласть име́я над десятию́ градо́в. И прии́де вторы́й, глаго́ля: го́споди, мнас твоя́ сотвори́ пять мнас. Рече́ же и тому́: и ты бу́ди над пятию́ градо́в. И други́й прии́де, глаго́ля: го́споди, се мнас твоя́, ю́же име́х положе́ну во убру́се. Боя́хся бо тебе́, я́ко челове́к яр еси́, взе́млеши, его́же не положи́, и жне́ши, его́же не се́яв. Глаго́ла же ему́: от уст твои́х сужду́ ти, лука́вый ра́бе, ве́дяше, я́ко аз челове́к яр есмь, вземлю́, его́же не положи́в, и жну, его́же не се́яв, и почто́ не вдал еси́ моего́ сребра́ купце́м, и аз прише́д с ли́хвою истяза́л бых е́? И предстоя́щым рече́: возьми́те от него́ мнас и дади́те иму́щему де́сять мнас. И ре́ша ему́: го́споди, и́мать де́сять мнас. Глаго́лю бо вам, я́ко вся́кому иму́щему да́стся, а от неиму́щаго, и е́же и́мать, оти́мется от него́. Оба́че враги́ моя́ о́ны, и́же не восхо́теша мне, да царь бых был над ни́ми, приведи́те се́мо и изсецы́те пре́до мно́ю. И сия́ рек, идя́ше преди́, восходя́ во Иерусали́м.

Послание к Тимофею второе, зачало 291

Ча́до Тимофе́е, не постыди́ся стра́стию Го́спода на́шего Иису́са Христа́, ни мно́ю ю́зником Его́, но спостражди́ благовествова́нию Христо́ву по си́ле Бо́га, спа́сшаго нас и призва́вшаго зва́нием святы́м, не по дело́м на́шым, но по Своему́ благоволе́нию и благода́ти да́нней нам о Христе́ Иису́се пре́жде лет ве́чных, я́вльшися же ны́не просвеще́нием Спаси́теля на́шего Иису́са Христа́, разруши́вшаго у́бо смерть и возсия́вшаго жизнь и нетле́ние благовествова́нием, в не́же поста́влен бых аз пропове́дник и Апо́стол и учи́тель язы́ков. Ея́же ра́ди вины́ и сия́ стражду́, но не стыжду́ся. Вем бо, Ему́же ве́ровах, и извести́хся, я́ко си́лен есть преда́ние мое́ сохрани́ти в день он. О́браз име́й здра́вых слове́с, и́хже от мене́ слы́шал еси́ в ве́ре и любви́, я́же о Христе́ Иису́се. До́брое завеща́ние соблюди́ Ду́хом Святы́м живу́щим в нас. Ве́си ли сие́, я́ко отврати́шася от мене́ вси, и́же от Аси́и, от ни́хже есть Фиге́лл и Ермоге́н. Да даст же ми́лость Госпо́дь Ониси́форову дому́, я́ко мно́гажды мя упоко́и и вери́г мои́х не постыде́ся, но прише́д в Рим, то́щнее взыска́ мя и обре́те. Да даст ему́ Госпо́дь обрести́ ми́лость от Го́спода в день он, и ели́ко во Ефе́се послужи́ ми, до́брее ты ве́си.

Евангелие от Матфеа, зачало 37

Рече́ Госпо́дь Свои́м ученико́м: егда́ го́нят вы во гра́де сем, бе́гайте в други́й. Ами́нь бо, глаго́лю вам, не и́мате сконча́ти гра́ды Изра́илевы, до́ндеже прии́дет Сын Челове́ческий. Несть учени́к над учи́телем свои́м, ниже́ раб над господи́ном свои́м. Довле́ет ученику́, да бу́дет я́ко учи́тель его́, и раб я́ко госпо́дь его́. А́ще господи́на до́му веельзеву́ла нареко́ша, кольми́ па́че дома́шния его́? Не убо́йтеся у́бо их, ничто́же бо есть покрове́но, е́же не откры́ется, и та́йно, е́же не уве́дено бу́дет. Е́же глаго́лю вам во тме, рцы́те во све́те: и е́же во у́шы слы́шите, пропове́дите на кро́вех. И не убо́йтеся от убива́ющих те́ло, ду́шу же не могу́щих уби́ти, убо́йтеся же па́че могу́щаго и ду́шу и те́ло погуби́ти в гее́нне. Не две ли пти́це цени́теся еди́ному асса́рию? И ни еди́на от нею́ паде́т на земли́ без Отца́ ва́шего. Вам же и вла́си главни́и вси изочте́ни суть. Не убо́йтеся у́бо, мно́зех птиц лу́чши есте́ вы.