Богослужебные чтения 31 июля 2025 года

1 Кор., 147 зач., X, 28 – XI, 7. Мф., 69 зач., XVI, 24–28, и за пятницу: 1 Кор., 148 зач., XI, 8–22. Мф., 71 зач., XVII, 10–18.

Послание к коринфяном первое, зачало 147

Бра́тие, а́ще кто вам рече́т: сие́ идоложе́ртвенно есть, не яди́те за о́ного пове́давшаго и со́весть, Госпо́дня бо земля́ и исполне́ние ея́. Со́весть же глаго́лю не свою́, но друга́го, вску́ю бо свобо́да моя́ су́дится от ины́я со́вести? А́ще аз благода́тию причаща́юся, почто́ хулу́ прие́млю, о не́мже аз благодарю́? А́ще у́бо я́сте, а́ще ли пиете́, а́ще ли и́но что творите́, вся в сла́ву Бо́жию твори́те. Безпреткнове́ни быва́йте иуде́ем и е́ллином, и це́ркви Бо́жией, я́коже и аз во всем всем угожда́ю, не иски́й своея́ по́льзы, но мно́гих, да спасу́тся. Подража́тели мне быва́йте, я́коже и аз Христу́. Хвалю́ же вы, бра́тие, я́ко вся моя́ по́мните, и я́коже преда́х вам, преда́ния держите́. Хощу́ же вас ве́дети, я́ко вся́кому му́жу глава́ Христо́с есть, глава́ же жене́ муж, глава́ же Христу́ Бог. Всяк муж, моли́тву де́яй или́ проро́чествуяй покры́тою главо́ю, срамля́ет главу́ свою́. И вся́ка жена́, моли́тву де́ющая или́ проро́чествующая открове́нною главо́ю, срамля́ет главу́ свою́: еди́но бо есть и то́жде остри́женней. А́ще у́бо не покрыва́ется жена́, да стриже́тся, а́ще ли же срам жене́ стри́щися или́ бри́тися, да покрыва́ется. Муж бо не до́лжен есть покрыва́ти главу́, о́браз и сла́ва Бо́жия сый, жена́ же сла́ва му́жу есть.

Евангелие от Матфеа, зачало 69

Рече́ Госпо́дь Свои́м ученико́м: а́ще кто хо́щет по Мне ити́, да отве́ржется себе́ и во́змет крест свой и по Мне гряде́т. И́же бо а́ще хо́щет ду́шу свою́ спасти́, погуби́т ю́, и и́же а́ще погуби́т ду́шу свою́ Мене́ ра́ди, обря́щет ю́. Ка́я бо по́льза челове́ку, а́ще мир весь приобря́щет, ду́шу же свою́ отщети́т? Или́ что даст челове́к изме́ну за ду́шу свою́? Приити́ бо и́мать Сын Челове́ческий во сла́ве Отца́ Своего́ со А́нгелы Свои́ми, и тогда́ возда́ст кому́ждо по дея́нием его́. Ами́нь глаго́лю вам, я́ко суть не́цыи от зде стоя́щих, и́же не и́мут вкуси́ти сме́рти, до́ндеже ви́дят Сы́на Челове́ческаго гряду́ща во Ца́рствии Свое́м.

Послание к коринфяном первое, зачало 148

Бра́тие, несть муж от жены́, но жена́ от му́жа, и́бо не со́здан бысть муж жены́ ра́ди, но жена́ му́жа ра́ди. Сего́ ра́ди должна́ есть жена́ власть име́ти на главе́ А́нгел ра́ди. Оба́че ни муж без жены́, ни жена́ без му́жа, о Го́споде. Я́коже бо жена́ от му́жа, си́це и муж жено́ю, вся же от Бо́га. В вас саме́х суди́те, ле́по ли есть жене́ открове́нне Бо́гу моли́тися? Или́ и не са́мое естество́ учи́т вы, я́ко муж у́бо а́ще власы́ расти́т, безче́стие ему́ есть, жена́ же а́ще власы́ расти́т, сла́ва ей есть? Зане́ расте́ние власо́в вме́сто одея́ния дано́ бысть ей. А́ще ли кто мни́тся спо́рлив бы́ти, мы такова́го обы́чая не и́мамы, ниже́ це́ркви Бо́жия. Сие́ же завещава́я не хвалю́, я́ко не на лу́чшее, но на ху́дшее сбира́етеся. Пе́рвое у́бо, сходя́щымся вам в це́рковь, слы́шу в вас ра́спри су́щя, и часть не́кую сих ве́рую. Подоба́ет бо и ересе́м в вас бы́ти, да иску́снии явле́ни быва́ют в вас. Сходя́щымся у́бо вам вку́пе, несть Госпо́дскую ве́черю я́сти, ко́ждо бо свою́ ве́черю предваря́ет в снеде́ние, и ов у́бо а́лчет, ов же упива́ется. Еда́ бо домо́в не и́мате, во е́же я́сти и пи́ти? Или́ о це́ркви Бо́жией нерадите́ и срамля́ете не иму́щыя? Что вам реку́? Похвалю́ ли вы о сем? Не похвалю́.

Евангелие от Матфеа, зачало 71

Во вре́мя о́но, вопроси́ша Иису́са ученицы́ Его́, глаго́люще: что у́бо кни́жницы глаго́лют, я́ко Илии́ подоба́ет приити́ пре́жде? Иису́с же отвеща́в рече́ им: Илиа́ у́бо прии́дет пре́жде и устро́ит вся. Глаго́лю же вам, я́ко Илиа́ уже́ прии́де, и не позна́ша его́, но сотвори́ша о нем, ели́ка восхоте́ша, та́ко и Сын Челове́ческий и́мать пострада́ти от них. Тогда́ разуме́ша ученицы́, я́ко о Иоа́нне Крести́тели рече́ им. И прише́дшым им к наро́ду, приступи́ к Нему́ челове́к, кла́няяся Ему́ и глаго́ля: Го́споди, поми́луй сы́на моего́, я́ко на но́вы ме́сяцы бесну́ется и зле стра́ждет, мно́жицею бо па́дает во огнь и мно́жицею в во́ду. И приведо́х его́ ко ученико́м Твои́м, и не возмого́ша его́ исцели́ти. Отвеща́в же Иису́с рече́: о, ро́де неве́рный и развраще́нный, доко́ле бу́ду с ва́ми? Доко́ле терплю́ вас? Приведи́те Ми его́ се́мо. И запрети́ ему́ Иису́с, и изы́де из него́ бес, и изцеле́ о́трок от часа́ того́.