Паримии на память равноапостольныя великия княгини Ольги

1. Суде́й Изра́илевых чте́ние.

И приложи́ша сы́нове изра́илевы сотвори́ти зло́е пред Го́сподем, и Ао́д у́мре. И отдаде́ их Госпо́дь в ру́ку Иави́на, царя́ Ханаа́нска, и́же ца́рствова во Асо́ре. И воево́да си́лы его́ Сиса́ра, и той живя́ше во Арисо́фе язы́ков. И возопи́ша сы́нове изра́илевы ко Го́споду, я́ко де́вять сот колесни́ц желе́зных бя́ше ему́ и той озло́би Изра́иля зело́ лет два́десять. И Девво́ра, жена́ проро́чица, жена́ Лафидо́фова, сия́ судя́ше Изра́илю в то вре́мя и сия́ живя́ше под фи́ником Девво́ра между́ Ра́мою и между́ Вефи́лем, в горе́ Ефре́мли, и восхожда́ху сы́нове изра́илевы к ней та́мо на суд. И посла́ Девво́ра, и призва́ Вара́ка, сы́на Авинее́мля, из Кеде́са Неффали́мова и рече́ к нему́: не запове́да ли тебе́ Госпо́дь, Бог Изра́илев, и по́йдеши в го́ру Фаво́р, и по́ймеши с собо́ю де́сять ты́сящ муже́й от сыно́в Неффали́млих и от сыно́в Завуло́них, и приведу́ к тебе́ в водоте́чь Кисо́нь Сиса́ру, воево́ду си́лы Иави́ни, и колесни́цы его́, и мно́жество вой его́, и преда́м его́ в ру́ки твоя́. И рече́ к ней Вара́к: а́ще по́йдеши со мно́ю, пойду́, и а́ще не по́йдеши со мно́ю, не пойду́, я́ко не вем дне, в о́ньже благоустро́ит Госпо́дь А́нгела со мно́ю. И рече́ Девво́ра к нему́: иду́щи пойду́ с тобо́ю, оба́че веждь, я́ко не бу́дет тебе́ сла́ва на пути́, в о́ньже ты и́деши, поне́же в руку́ же́нску преда́ст Госпо́дь Сиса́ру. И воста́ Девво́ра и по́йде с Вара́ком до Ка́диса. И воззва́ Вара́к Завуло́на и Неффали́ма до Ка́диса, и поидо́ша вслед его́ де́сять ты́сящ муже́й, и и́де с ним Девво́ра. И Хаве́р Кине́й отлучи́ся от Ке́ны и от сыно́в Иова́ва, у́жика Моисе́ова, и потче́ ку́щу свою́ под ду́бом почива́ющих, и́же есть при Кеде́се. И возвести́ша Сиса́ре, я́ко взы́де Вара́к, сын Авинее́мль, на го́ру Фаво́р. И созва́ Сиса́ра вся колесни́цы своя́, де́вять сот колесни́ц желе́зных, и вся лю́ди, и́же с ним, от Арисо́фа язы́ков в водоте́чь Кисо́нь. И рече́ Девво́ра к Вара́ку: воста́ни, я́ко сей день, в о́ньже предаде́ Госпо́дь Сиса́ру в ру́ку твою́, зане́ Госпо́дь изы́дет пред тобо́ю. И сни́де Вара́к с горы́ Фаво́р и де́сять ты́сящ муже́й вслед его́. И сотре́ Госпо́дь Сиса́ру и вся колесни́цы его́ и весь полк его́ острие́м меча́ пред Вара́ком. И сни́де Сиса́ра с колесни́цы своея́ и побеже́ нога́ми свои́ми. И Вара́к гоня́й вслед колесни́ц его́ и вслед полка́, да́же до дубра́вы язы́ков. И паде́ весь полк Сиса́рин острие́м меча́, не оста́ся ни еди́н. И Сиса́ра убеже́ нога́ми свои́ми в ку́щу Иаи́ли, жены́ Хаве́ра Кине́ева, я́ко мир бя́ше между́ Иави́ном, царе́м Асо́рским, и между́ до́мом Хаве́ра Кине́ева. И изы́де Иаи́ль во сре́тение Сиса́ре и рече́ к нему́: уклони́ся, господи́не мой, уклони́ся ко мне, не бо́йся. И уклони́ся к ней в ку́щу, и покры́ его́ оде́ждею свое́ю. И рече́ Сиса́ра к ней: напо́й мя ма́ло воды́, я́ко возжажда́х. И отреши́ мех мле́чный, и напои́ его́, и покры́ его́. И рече́ к ней Сиса́ра: ста́ни во две́рех ку́щи, и бу́дет, а́ще кто прии́дет к тебе́, и вопро́сит тя, и рече́т: есть ли зде муж? И рече́ши: несть. И взя Иаи́ль, жена́ Хаве́рова, кол ку́щный, и взя млат в ру́ку свою́, и вни́де к нему́ ти́хо, и водрузи́ кол во скра́нии его́, и пронзе́ до земли́, и сей, утру́ждся, спа́ше, и и́здше. И се Вара́к, гоня́й Сиса́ру. И изы́де Иаи́ль во сре́тение ему́ и рече́ ему́: прииди́, и покажу́ тебе́ му́жа, его́же ты и́щеши. И вни́де к ней, и се Сиса́ра лежа́ше мертв, и кол во скра́нии его́. И покори́ Госпо́дь Бог в той день Иави́на, царя́ Ханаа́ня пред сы́ны изра́илевыми, и хожда́ше рука́ сыно́в изра́илевых, ходя́щи, и ожесточи́ся на Иави́на, царя́ Ханаа́нска, до́ндеже истреби́ша его́. И воспе́ Девво́ра и Вара́к, сын Авинее́мов, в той день и рече́: внегда́ нача́ти вождо́м во Изра́или, в произволе́нии люди́й, благослови́те Го́спода. Услы́шите, ца́рие, и внуши́те, кня́зи: аз Го́сподеви воспою́ и пою́ Бо́гу Изра́илеву: Го́споди, во исхо́де Твое́м от Сии́ра, внегда́ воздвиза́тися Тебе́ от села́ Едо́мова, земля́ потрясе́ся, и не́бо возмути́ся, и о́блацы иска́паша во́ду. Го́ры подвиго́шася от лица́ Го́спода Елои́, та́я Сина́ от лица́ Го́спода Бо́га Изра́илева. Во дни Самега́ра, сы́на Ана́фова, во дни Иаи́ли, оскуде́ша путие́, и идо́ша в пути́ кри́вы, и идо́ша в пути́ развраще́нны. Оскуде́ша жнву́щии во Изра́или, оскуде́ша, до́ндеже воста́ Девво́ра, до́ндеже воста́ ма́ти во Изра́или, избра́ша бо́ги но́вы, я́ко хлеб я́чен, тогда́ воева́ша гра́ды князе́й, щит не яви́ся, ниже́ копие́ в четы́редесяти ты́сящах во Изра́или. Се́рдце мое́ на учине́нная во Изра́или, си́льнии люди́й, благослови́те Го́спода. Е́здящии на осля́тех бе́лых в полу́дне, и седя́щии на суди́щи, и ходя́щии на пути́ со́нмов, провеща́йте. Глас пле́щущих посреде́ веселя́щихся: та́мо дадя́т пра́вду. Го́споди, пра́вды укрепи́ во Изра́или: тогда́ разыдо́шася во гра́ды своя́ лю́дие Госпо́дни. Воста́ни, воста́ни, Девво́ра; воста́ни, воста́ни, глаго́ли с пе́снию; воста́ни, Вара́че, и плени́ плен твой, сы́не Авинее́мль.

Суд 4; 5:1–12

2. Иуди́фи чте́ние.

Оста́ся же Иуди́ф еди́на в шатре́ и Олофе́рн пове́ржен на ло́жи свое́м, бя́ше бо преиспо́лнен вино́м. И рече́ Иуди́ф рабе́ свое́й, да стои́т вне ло́жницы ея́ и да смо́трит исхо́да ея́, я́коже по всяк день, рече́ бо, я́ко изы́ти и́мать на моли́тву свою́ и Ваго́ю глаго́ла по словесе́м сим. И отыдо́ша вси от лица́ ея́, и ни еди́н оста́ся в ло́жнице от ма́ла да́же до вели́ка. И ста́вши Иуди́ф при одре его́, рече́ в се́рдцы свое́м: Го́споди Бо́же всея́ си́лы, при́зри в час сей на дела́ рук мои́х ко возвыше́нию Иерусали́ма, я́ко ны́не вре́мя помоществова́ти насле́дию Твоему́ и соверши́ти начина́ние мое́ ко сокруше́нию враго́в, и́же воста́ша на нас. И приступи́вши к сто́лпнику одра́, и́же бя́ше у главы́ Олофе́рновы, снят меч его́ с него́, и прибли́жившися ко одру́, взя в горсть власы́ главы́ его́, и рече́: укрепи́ мя, Го́споди Бо́же Изра́илев, в день сей. И уда́ри в вы́ю его́ два́жды си́лою свое́ю, и отъя́ главу́ его́ от него́, и отвали́ те́ло его́ от посте́ли, и отъя́ заве́су от столпо́в, и по ма́ле изы́де и предаде́ рабы́ни свое́й главу́ Олофе́рнову. И вложи́ ю́ в меше́ц сне́дей свои́х, и изыдо́сте о́бе ку́пно по обы́чаю своему́ на моли́тву, и проше́дше полк, обыдо́сте дебрь о́ную, и взыдо́сте на го́ру Ветилу́и, и приидо́сте ко врато́м ея́. И рече́ Иуди́ф издале́ча стерегу́щим на врате́х: отве́рзите ны́не, отве́рзите врата́, с на́ми Бог, Бог наш, сотвори́ти еще́ кре́пость во Изра́или и си́лу на враги́, я́коже и днесь сотвори́. И бысть, я́ко услы́шаша му́жие гра́да того́ глас ея́, потща́шася сни́ти ко врато́м гра́да своего́ и созва́ша ста́рцев гра́да. И стеко́шася вси от ма́ла да́же до вели́ка, я́ко па́че ча́яния бе им, е́же приити́ ей, и отверзо́ша врата́ и восприя́ша их, и вже́гше огнь во свеще́ние, окружи́ша их. Она́ же рече́ к ним гла́сом вели́ким: хвали́те Бо́га, хвали́те, хвали́те Бо́га, И́же не отста́ви ми́лости Своея́ от до́му Изра́илева, но сокруши́ враги́ на́ша руко́ю мое́ю в нощь сию́. И изъе́мши главу́ из мешца́, показа́ и рече́ им: се глава́ Олофе́рна, вождонача́льника си́лы Ассу́рския, и се заве́са, за не́юже лежа́ше во пия́нствах свои́х, и порази́ его́ Госпо́дь руко́ю же́нскою. И жив есть Госпо́дь, и́же сохрани́ мя в пути́ мое́м, и́мже ходи́х, я́ко прельсти́ его́ лице́ мое́ в па́губу его́, и не сотвори́ греха́ со мно́ю во оскверне́ние и срамоту́. И ужасо́шася вси лю́дие зело́, и па́дше, поклони́шася Бо́гу, и ре́ша единоду́шно: благослове́н еси́, Бо́же наш, уничто́живый в день сей враги́ люди́й Твои́х. И рече́ ей Ози́я: благослове́на ты еси́, дщи, Бо́гом Вы́шним па́че всех жен, я́же на земли́, и благослове́н Госпо́дь Бог, И́же созда́ небеса́ и зе́млю, И́же упра́ви тя на сокруше́ние главы́ кня́зя враго́в на́ших. Я́ко не оста́нет наде́жда твоя́ от се́рдца челове́к, помина́ющих кре́пость Бо́жию, да́же до ве́ка, и да сотвори́т тебе́ сия́ Бог в возноше́ние ве́чное, е́же посеща́ти тя во благи́х, за е́же не пощаде́ла еси́ души́ твоея́ смире́ния ра́ди ро́да на́шего, но посо́бствовала еси́ паде́нию на́шему, в правоте́ ходи́вши пред Бо́гом на́шим. И ре́ша вси лю́дие: бу́ди, бу́ди.

Иф 13:2–20

3. При́тчей чте́ние.

Жену́ до́блю кто обря́щет, дража́йши есть ка́мения многоце́ннаго такова́я. Дерза́ет на ню се́рдце му́жа ея́, такова́я до́брых коры́стей не лиши́тся, де́лает бо му́жу своему́ блага́я во все житие́, обре́тши во́лну и лен, сотвори́ благопотре́бное рука́ма свои́ма.

Притч 31:10–13

Рим., 117 зач., XV, 7–16. Мф., 48 зач., XII, 38–45. Свв.: 2 Кор., 181 зач., VI, 1–10. Лк., 33 зач., VII, 36–50 .

Послание к римляном, зачало 117

Бра́тие, прие́млите друг дру́га, я́коже и Христо́с прия́т вас во сла́ву Бо́жию. Глаго́лю же Христа́ Иису́са служи́теля бы́вша обре́зания по и́стине Бо́жией, во е́же утверди́ти обетова́ния отце́в. А язы́ком по ми́лости, просла́вити Бо́га, я́коже есть пи́сано: сего́ ра́ди испове́мся Тебе́ во язы́цех, Го́споди, и и́мени Твоему́ пою́. И па́ки глаго́лет: возвесели́теся, язы́цы, с людьми́ Его́. И па́ки: хвали́те Го́спода, вси язы́цы, и похвали́те Его́, вси лю́дие. И па́ки Иса́иа глаго́лет: бу́дет ко́рень Иессе́ов, и востая́й владе́ти над язы́ки, на Того́ язы́цы упова́ют. Бог же упова́ния да испо́лнит вас вся́кия ра́дости и ми́ра в ве́ре, избы́точествовати вам во упова́нии, си́лою Ду́ха Свята́го. Извеще́н же есмь, бра́тие моя́, и сам аз о вас, я́ко и са́ми вы по́лни есте́ бла́гости, испо́лнени вся́каго ра́зума, могу́ще и ины́я научи́ти. Де́рзее же писа́х вам, бра́тие моя́, от ча́сти, я́ко воспомина́я вам, за благода́ть да́нную ми от Бо́га, во е́же бы́ти ми служи́телю Иису́с Христо́ву во язы́цех, священноде́йствующу благовествова́ние Бо́жие, да бу́дет приноше́ние е́же от язы́к благоприя́тно и освяще́нно Ду́хом Святы́м.

Евангелие от Матфеа, зачало 48

Во вре́мя о́но, приступи́ша ко Иису́су не́цыи от кни́жник и фарисе́й, глаго́люще: Учи́телю, хо́щем от Тебе́ зна́мение ви́дети. Он же отвеща́в рече́ им: род лука́в и прелюбоде́й зна́мения и́щет, и зна́мение не да́стся ему́, то́кмо зна́мение Ио́ны проро́ка. Я́коже бо бе Ио́на во чре́ве ки́тове три дни и три но́щи, та́ко бу́дет и Сын Челове́ческий в се́рдцы земли́ три дни и три но́щи. Му́жие Ниневи́тстии воста́нут на суд с ро́дом сим и осу́дят его́, я́ко пока́яшася про́поведию Ио́ниною, и се бо́ле Ио́ны зде. Цари́ца ю́жская воста́нет на суд с ро́дом сим и осу́дит и я́ко прии́де от коне́ц земли́ слы́шати прему́дрость Соломо́нову, и се бо́ле Соломо́на зде. Егда́ же нечи́стый дух изы́дет от челове́ка, прехо́дит сквозе́ безво́дная ме́ста, ищя́ поко́я, и не обрета́ет. Тогда́ рече́т: возвращу́ся в дом мой, отню́дуже изыдо́х. И прише́д обря́щет пра́зден, помете́н и укра́шен. Тогда́ и́дет и по́ймет с собо́ю седмь ины́х духо́в люте́йших себе́, и вше́дше живу́т ту, и бу́дут после́дняя челове́ку тому́ го́рша пе́рвых. Та́ко бу́дет и ро́ду сему́ лука́вому.

Послание к коринфяном второе, зачало 181

Бра́тие, поспе́шствующе мо́лим, не вотще́ благода́ть Бо́жию прия́ти вам. Глаго́лет бо: во вре́мя прия́тно послу́шах тебе́, и в день спасе́ния помого́х ти. Се ны́не вре́мя благоприя́тно, се ны́не день спасе́ния. Ни еди́но ни в че́мже даю́ще претыка́ние, да служе́ние безпоро́чно бу́дет, но во всем представля́юще себе́ я́коже Бо́жия слуги́, в терпе́нии мно́зе, в ско́рбех, в беда́х, в теснота́х, в ра́нах, в темни́цах, в нестрое́ниих, в труде́х, во бде́ниих, в поще́ниих, во очище́нии, в ра́зуме, в долготерпе́нии, в бла́гости, в Ду́се Свя́те, в любви́ нелицеме́рне, в словеси́ и́стины, в си́ле Бо́жией, ору́жии пра́вды десны́ми и шу́ими, сла́вою и безче́стием, гажде́нием и благохвале́нием, я́ко лестцы́, и и́стинни, я́ко незна́еми, и познава́еми, я́ко умира́юще, и се жи́ви есмы́, я́ко наказу́еми, а не умерщвля́еми, я́ко скорбя́ще, при́сно же ра́дующеся, я́ко ни́щи, а мно́гих богатя́ще, я́ко ничто́же иму́ще, а вся содержа́ще.

Евангелие от Луки, зачало 33

Во вре́мя о́но, моля́ше Иису́са не́кий от фарисе́й, да бы ял с ним, и вшед в дом фарисе́ов, возлеже́. И се жена́ во гра́де, я́же бе гре́шница, и уве́девши, я́ко возлежи́т во хра́мине фарисе́ове, прине́сши алава́стр ми́ра, и ста́вши при ногу́ Его́ созади́, пла́чущися, нача́т умыва́ти но́зе Его́ слеза́ми, и власы́ главы́ своея́ отира́ше, и облобыза́ше но́зе Его́, и ма́заше ми́ром. Ви́дев же фарисе́й возва́вый Его́, рече́ в себе́, глаго́ля: Сей а́ще бы был проро́к, ве́дел бы, кто и какова́ жена́ прикаса́ется Ему́, я́ко гре́шница есть. И отвеща́в Иису́с рече́ к нему́: Си́моне, и́мам ти не́что рещи́. Он же рече́: Учи́телю, рцы. Иису́с же рече́: два должника́ бе́ста заимода́вцу не́коему, еди́н бе до́лжен пятию́сот дина́рий, други́й же пятию́десят. Не иму́щема же и́ма возда́ти, обе́ма отда́. Кото́рый у́бо ею́, рцы, па́че возлю́бит его́? Отвеща́в же Си́мон рече́: мню, я́ко ему́же вя́щше отда́. Он же рече́ ему́: пра́во суди́л еси́. И обра́щься к жене́, Си́монови рече́: ви́диши ли сию́ жену́? Внидо́х в дом твой, воды́ на но́зе Мои́ не даде́, сия́ же слеза́ми облия́ Ми но́зе и власы́ главы́ своея́ отре́. Лобза́ния Ми не даде́, сия́ же, отне́лиже внидо́х, не преста́ облобыза́ющи Ми но́зе. Ма́слом главы́ Моея́ не пома́за, сия́ же ми́ром пома́за Ми но́зе. Его́же ра́ди, глаго́лю ти, отпуща́ются греси́ ея́ мно́зи, я́ко возлюби́ мно́го, а ему́же ма́ло оставля́ется, ме́ньше лю́бит. Рече́ же ей: отпуща́ются тебе́ греси́. И нача́ша возлежа́щии с Ним глаго́лати в себе́: кто Сей есть, и́же и грехи́ отпуща́ет? Рече́ же к жене́: ве́ра твоя́ спасе́ тя, иди́ в ми́ре.