Богослужебные чтения 17 июля 2024 года

Паримии на святых царственных страстотерпец: императора Николая II, императрицы Александры, царевича Алексия, великих княжен Ольги, Татьяны, Марии, Анастасии, от безбожной власти убиенных.

1. Прему́дрости Соломо́новы чте́ние.

Пра́ведных ду́ши в руце́ Бо́жией, и не прико́снется их му́ка. Непщева́ни бы́ша во очесе́х безу́мных умре́ти, и вмени́ся озлобле́ние исхо́д их. И е́же от нас ше́ствие сокруше́ние, они́ же суть в ми́ре. И́бо пред лице́м челове́ческим а́ще и му́ку прии́мут, упова́ние их безсме́ртия испо́лнено. И вма́ле нака́зани бы́вше, вели́кими благоде́тельствовани бу́дут, я́ко Бог искуси́ я́ и обре́те их досто́йны Себе́. Я́ко зла́то в горни́ле, искуси́ их и, я́ко всепло́дие же́ртвенное, прия́т я́. И во вре́мя посеще́ния их возсия́ют и, я́ко и́скры по сте́блию, потеку́т. Су́дят язы́ком и облада́ют людьми́, и воцари́тся Госпо́дь в них во ве́ки. Наде́ющиися Нань уразуме́ют и́стину, и ве́рнии в любви́ пребу́дут Ему́, я́ко благода́ть и ми́лость в преподо́бных Его́ и посеще́ние во избра́нных Его́.

Прем 3:1–9

2. Царств тре́тиих чте́ние.

Ста Соломо́н пред лице́м олтаря́ Госпо́дня, пред всем собо́ром Изра́илевым, и воздви́же ру́це свои́ на не́бо, и рече́: Го́споди, Бо́же Изра́илев, несть я́коже Ты Бог на Небеси́ горе́ и на земли́ ни́зу, храня́й заве́т и ми́лость рабу́ Твоему́, ходя́щему пред Тобо́ю всем се́рдцем свои́м, я́же сохрани́л еси́ рабу́ Твоему́ Дави́ду, отцу́ моему́, и́бо глаго́лал еси́ усты́ Твои́ми и рука́ма Твои́ма соверши́л еси́, я́коже день сей. И ны́не, Го́споди, Бо́же Изра́илев, сохрани́ рабу́ Твоему́ Дави́ду, отцу́ моему́, я́же рекл еси́ ему́, глаго́ля: не оскуде́ет муж от лица́ Моего́, седя́й на престо́ле Изра́илеве, то́кмо а́ще сохраня́т ча́да твоя́ пути́ своя́, е́же ходи́ти пре́до Мно́ю, я́коже ходи́л еси́ пре́до Мно́ю. И услы́шиши моли́тву раба́ Твоего́ и люди́й Твои́х Изра́иля, о ни́хже помо́лятся на ме́сте сем: и Ты услы́шиши на ме́сте обита́лища Твоего́ на Небеси́, и сотвори́ши, и поми́луеши. Ели́ка а́ще согреши́т ки́йждо ко и́скреннему своему́, и а́ще прии́мет на него́ кля́тву, е́же кля́ти его́, и прии́дет, и испове́сть пред лице́м олтаря́ Твоего́ в хра́ме сем. И Ты услы́шиши от Небесе́, и сотвори́ши суд лю́дем Твои́м Изра́илю, осуди́ти беззако́ннаго, да́ти путь его́ на главу́ его́, и оправди́ти пра́веднаго, да́ти ему́ по пра́вде его́, егда́ паду́т лю́дие Твои́ Изра́иль пред враги́, я́ко согреша́т Ти, и обратя́тся к Тебе́, и испове́дятся и́мени Твоему́, и помо́лятся, и возглаго́лют моли́тву к Тебе́ в хра́ме сем. И Ты услы́шиши с Небесе́, и ми́лостив бу́деши о согреше́ниих люди́й Свои́х Изра́иля, и возврати́ши я́ в зе́млю, ю́же дал еси́ отце́м их, я́ко согреша́т Ти, я́ко несть челове́к, и́же не согреши́т, и разгне́ваешися на ня́, и преда́си я́ пред враги́, и попленя́т их пленя́щии в зе́млю дале́че или́ близ, и обратя́т сердца́ своя́ в земли́, а́може пресели́шася, и обратя́тся, и помо́лятся Тебе́ в земли́ преселе́ния своего́, глаго́люще: согреши́хом, беззако́нновахом, непра́вдовахом. И обратя́тся к Тебе́ всем се́рдцем свои́м и все́ю душе́ю свое́ю в земли́ враг свои́х, а́може преве́л еси́ их, и помо́лятся к Тебе́ по пути́ земли́ своея́, ю́же дал еси́ отце́м их, и ко гра́ду, его́же избра́л еси́, и ко хра́му, его́же созда́х и́мени Твоему́. И услы́шиши от Небесе́, от гото́ваго жили́ща Твоего́, моли́тву их и моле́ние их, и сотвори́ши оправда́ние им, да бу́дет Госпо́дь Бог наш с на́ми, я́коже бе со отцы́ на́шими, да не оста́вит нас, ниже́ да отврати́т нас, преклони́ти сердца́ на́ша к Нему́, е́же ходи́ти во всех путе́х Его́ и храни́ти вся за́поведи Его́, и повеле́ния Его́, и оправда́ния Его́, я́же запове́да отце́м на́шим. И рече́ к нему́ Госпо́дь: услы́шах глас моли́твы твоея́ и моле́ния твоего́ и́мже моли́лся еси́ пре́до Мно́ю; сотвори́х ти по всей моли́тве твое́й, и освяти́х храм сей, его́же созда́л еси́, е́же положи́ти и́мя Мое́ та́мо во ве́ки, и бу́дут о́чи Мои́ ту́ и се́рдце Мое́ во вся дни. И ты, а́ще по́йдеши пре́до Мно́ю, я́коже ходи́ Дави́д, оте́ц твой, в преподо́бии се́рдца и в правоте́, и е́же твори́ти по всем, я́же запове́дах ему́, и повеле́ния Моя́ и за́поведи Моя́ сохрани́ши, и возста́влю престо́л ца́рствия твоего́ во Изра́или во ве́ки, я́коже глаго́лах к Дави́ду, отцу́ твоему́, глаго́ля: не оскуде́ет ти муж властели́н во Изра́или.

3 Цар 8:22–25, 30–34, 46–49, 57–58; 9:3–5

3. Проро́чества Иса́иина чте́ние.

Дух Госпо́день на мне, Его́же ра́ди пома́за мя, благовести́ти ни́щим посла́ мя, исцели́ти сокруше́нныя се́рдцем, пропове́дати пле́нником отпуще́ние и слепы́м прозре́ние, нарещи́ ле́то Госпо́дне прия́тно и день воздая́ния, уте́шити вся пла́чущия, да́ти пла́чущим Сио́на сла́ву вме́сто пе́пела, пома́зание весе́лия пла́чущим, украше́ние сла́вы вме́сто ду́ха уны́ния, и нареку́тся ро́дове пра́вды, насажде́ние Госпо́дне во сла́ву. Да возра́дуется душа́ моя́ о Го́споде, облече́ бо мя в ри́зу спасе́ния и оде́ждею весе́лия оде́я мя, я́ко на жениха́, возложи́ на мя вене́ц и, я́ко неве́сту, украси́ мя красото́ю. И я́ко земля́, растя́щая цвет свой, и я́ко вертогра́д се́мена своя́ прозяба́ет, та́ко возрасти́т Госпо́дь пра́вду и весе́лие пред все́ми язы́ки. Сио́на ра́ди не умолчу́ и Иерусали́ма ра́ди не попущу́, до́ндеже изы́дет, я́ко свет, пра́вда моя́ и спасе́ние мое́, я́ко свети́ло, разжже́тся. И у́зрят язы́цы пра́вду Твою́, и ца́рие сла́ву Твою́, и прозову́т Тя и́менем но́вым, и́мже Госпо́дь наимену́ет е́. И бу́деши вене́ц добро́ты в руце́ Госпо́дни и диади́ма ца́рствия в руце́ Бо́га твоего́. И не прозове́шися ктому́ оста́влен, и земля́ твоя́ ктому́ не нарече́тся пуста́, тебе́ бо прозове́тся во́ля моя́, и земля́ твоя́ вселе́нная, я́ко благоволи́ Госпо́дь в тебе́, и земля́ твоя́ вку́пе насели́тся. И я́коже живя́й ю́ноша с де́вою, та́ко поживу́т сы́нове твои́ с тобо́ю, и бу́дет я́коже ра́дуется жени́х о неве́сте, та́ко возра́дуется Госпо́дь о тебе́.

Ис 61:1–3, 10–11; 62:1–5

Утр. – Страстотерпцев: Мф., 36 зач., X, 16–22 . Лит. – Рим., 105 зач., XI, 2–12. Мф., 42 зач., XI, 20–26. Страстотерпцев: Рим., 99 зач., VIII, 28–39. Ин., 52 зач., XV, 17 – XVI, 2. Свт.: Евр., 318 зач. (от полу'), VIII, 3–6. Мф., 21 зач., VII, 12–21 .

Евангелие от Матфеа, зачало 36

Рече́ Госпо́дь Свои́м ученико́м: се Аз посыла́ю вас я́ко о́вцы посреде́ волко́в, бу́дите у́бо му́дри я́ко змия́, и це́ли я́ко го́лубие. Внемли́те же от челове́к, предадя́т бо вы на со́нмы, и на собо́рищах их бию́т вас. И пред влады́ки же и цари́ веде́ни бу́дете Мене́ ра́ди, во свиде́тельство им и язы́ком. Егда́ же предаю́т вы, не пецы́теся, ка́ко или́ что возглаго́лете: даст бо ся вам в той час, что возглаго́лете. Не вы бо бу́дете глаго́лющии, но Дух Отца́ ва́шего глаго́ляй в вас. Преда́ст же брат бра́та на смерть и оте́ц ча́до, и воста́нут ча́да на роди́тели и убию́т их. И бу́дете ненави́дими все́ми и́мени Моего́ ра́ди. Претерпе́вый же до конца́, той спасе́н бу́дет.

Послание к римляном, зачало 105

Бра́тие, не ве́сте ли о Илии́, что глаго́лет Писа́ние, я́ко припове́дует Бо́гови на Изра́иля, глаго́ля: Го́споди, проро́ки Твоя́ изби́ша и олтари́ Твоя́ раскопа́ша, и аз оста́х еди́н, и и́щут ду́шу мою́ изъя́ти. Но что глаго́лет ему́ Боже́ственный отве́т? Оста́вих Себе́ седмь ты́сящ муже́й, и́же не преклони́ша коле́на пред Ваа́лом. Та́ко у́бо и в ны́нешнее вре́мя оста́нок по избра́нию благода́ти бысть. А́ще ли по благода́ти, то не от дел, зане́ благода́ть уже́ не быва́ет благода́ть. А́ще ли от дел, ктому́ несть благода́ть, зане́ бо де́ло уже́ несть де́ло. Что у́бо? Его́же иска́ше Изра́иль, сего́ не получи́, а избра́ние получи́. Про́чии же ослепи́шася, я́коже есть пи́сано: даде́ им Бог дух умиле́ния, о́чи не ви́дети и у́ши не слы́шати, да́же до дне́шняго дне. И Дави́д глаго́лет: да бу́дет трапе́за их в сеть и в лов, и в собла́зн и в воздая́ние им. Да помрача́тся о́чи их е́же не ви́дети, и хребе́т их вы́ну сляца́й. Глаго́лю у́бо: еда́ согреши́ша, да отпаду́т? Да не бу́дет. Но тех паде́нием спасе́ние язы́ком, во е́же раздражи́ти их. А́ще ли же прегреше́ние их бога́тство ми́ру, и отпаде́ние их бога́тство язы́ком, кольми́ па́че исполне́ние их?

Евангелие от Матфеа, зачало 42

Во вре́мя о́но, нача́т Иису́с поноша́ти градово́м, в ни́хже бы́ша мно́жайшыя си́лы Его́, зане́ не пока́яшася: го́ре тебе́, Хорази́не, го́ре тебе́, Вифсаи́до, я́ко а́ще в Ти́ре и Сидо́не бы́ша си́лы бы́ли бы́вшыя в вас, дре́вле у́бо во вре́тищи и пе́пеле пока́ялися бы́ша. Оба́че глаго́лю вам Ти́ру и Сидо́ну отра́днее бу́дет в день су́дный, не́же вам. И ты, Капернау́ме, и́же до небе́с вознесы́йся, до а́да сни́деши, зане́ а́ще в Содо́мех бы́ша си́лы бы́ли бы́вшыя в тебе́, пребы́ли у́бо бы́ша до дне́шняго дне. Оба́че глаго́лю вам, я́ко земли́ Содо́мстей отра́днее бу́дет в день су́дный, не́же тебе́. В то вре́мя отвеща́в Иису́с рече́: испове́даю Ти ся, О́тче, Го́споди небесе́ и земли́, я́ко утаи́л еси́ сия́ от прему́дрых и разу́мных и откры́л еси́ та младе́нцем. Ей, О́тче, я́ко та́ко бысть благоволе́ние пред Тобо́ю.

Послание к римляном, зачало 99

Бра́тие, ве́мы я́ко лю́бящым Бо́га вся поспешеству́ют во благо́е, су́щым по предуве́дению зва́нным. И́хже бо предуве́де, тех и предуста́ви сообра́зным бы́ти о́бразу Сы́на Своего́, я́ко бы́ти Ему́ перворо́дну во мно́гих бра́тиях. А и́хже предуста́ви, тех и призва́, а и́хже призва́, сих и оправда́, а и́хже оправда́, сих и просла́ви. Что у́бо рече́м к сим, а́ще Бог по нас, кто на ны? И́же у́бо Своего́ Сы́на не пощаде́, но за ны вся пре́дал есть Его́, ка́ко у́бо не и с Ним вся нам да́рствует? Кто пое́млет на избра́нныя Бо́жия? Бог оправда́яй. Кто осужда́яй? Христо́с Иису́с уме́рый, па́че же и воскресы́й, И́же и есть одесну́ю Бо́га, И́же и хода́тайствует о нас. Кто ны разлучи́т от любве́ Бо́жия? Скорбь ли, или́ теснота́, или́ гоне́ние, или́ глад, или́ нагота́, или́ беда́, или́ мечь? Я́коже есть пи́сано: я́ко Тебе́ ра́ди умерщвля́еми есмы́ весь день, вмени́хомся я́коже о́вцы заколе́ния. Но о сих всех препобежда́ем за Возлю́бльшаго ны. Извести́хся бо, я́ко ни смерть, ни живо́т, ни А́нгели, ни Нача́ла, ниже́ Си́лы, ни настоя́щая, ни гряду́щая, ни высота́, ни глубина́, ни и́на тварь ка́я возмо́жет нас разлучи́ти от любве́ Бо́жия, я́же о Христе́ Иису́се Го́споде на́шем.

Евангелие от Иоанна, зачало 52

Рече́ Госпо́дь Свои́м ученико́м: си запове́даю вам, да лю́бите друг дру́га. А́ще мир вас ненави́дит, ве́дите, я́ко Мене́ пре́жде вас возненави́де. А́ще от ми́ра бы́сте бы́ли, мир у́бо свое́ люби́л бы, я́коже от ми́ра не́сте, но Аз избра́х вы от ми́ра, сего́ ра́ди ненави́дит вас мир. Помина́йте сло́во, е́же Аз рех вам: несть раб бо́лий го́спода своего́. А́ще Мене́ изгна́ша, и вас изжену́т, а́ще сло́во Мое́ соблюдо́ша, и ва́ше соблюду́т. Но сия́ вся творя́т вам за и́мя Мое́, я́ко не ве́дят Посла́вшаго Мя. А́ще не бых прише́л и глаго́лал им, греха́ не бы́ша име́ли, ны́не же вины́ не и́мут о гресе́ свое́м. Ненави́дяй Мене́, и Отца́ Моего́ ненави́дит. А́ще дел не бых сотвори́л в них, и́хже ин никто́же сотвори́, греха́ не бы́ша име́ли, ны́не же и ви́деша, и возненави́деша Мене́ и Отца́ Моего́. Но да сбу́дется сло́во, пи́санное в зако́не их, я́ко возненави́деша Мя ту́не. Егда́ же прии́дет Уте́шитель, Его́же Аз послю́ вам от Отца́, Дух и́стины, И́же от Отца́ исхо́дит, Той свиде́тельствует о Мне. И вы же свиде́тельствуете, я́ко искони́ со Мно́ю есте́. Сия́ глаго́лах вам, да не соблазните́ся. От со́нмищ иждену́т вы, но прии́дет час, да всяк, и́же убие́т вы, мни́тся слу́жбу приноси́ти Бо́гу.

Послание ко евреем, зачало 318А

Бра́тие, тако́в нам подоба́ше Архиере́й, преподо́бен, незло́бив, безскве́рнен, отлуче́н от гре́шник и вы́шше Небе́с быв. И́же не и́мать по вся дни ну́жды, я́коже первосвяще́нницы, пре́жде о свои́х гресе́х же́ртвы приноси́ти, пото́м же о людски́х: сие́ бо сотвори́ еди́ною, Себе́ прине́с. Зако́н бо челове́ки поставля́ет первосвяще́нники, иму́щыя не́мощь, сло́во же кля́твенное, е́же по зако́не, Сы́на во ве́ки соверше́нна. Глава́ же о глаго́лемых, такова́ и́мамы Первосвяще́нника, и́же се́де одесну́ю Престо́ла Вели́чествия на Небесе́х, святы́м служи́тель и ски́нии и́стинней, ю́же водрузи́ Госпо́дь, а не челове́к.

Евангелие от Матфеа, зачало 21

Рече́ Госпо́дь: вся ели́ка а́ще хо́щете, да творя́т вам челове́цы, та́ко и вы твори́те им, се бо есть зако́н и проро́цы. Вни́дите у́зкими враты́, я́ко простра́нная врата́ и широ́кий путь вводя́й в па́губу, и мно́зи суть входя́щии им. Что у́зкая врата́, и те́сный путь вводя́й в живо́т, и ма́ло их есть, и́же обрета́ют его́. Внемли́те же от лжи́вых проро́к, и́же прихо́дят к вам во оде́ждах о́вчих, внутрь же суть во́лцы хи́щницы. От плод их позна́ете их. Еда́ объе́млют от те́рния гро́зды, или́ от ре́пия смо́квы? Та́ко вся́ко дре́во до́брое плоды́ добры́ твори́т, а зло́е дре́во плоды́ злы твори́т. Не мо́жет дре́во добро́ плоды́ злы твори́ти, ни дре́во зло плоды́ добры́ твори́ти. Вся́ко у́бо дре́во, е́же не твори́т плода́ добра́, посека́ют е́ и во огнь вмета́ют. Те́мже у́бо от плод их позна́ете их. Не всяк глаго́ляй Ми: Го́споди, Го́споди, вни́дет в Ца́рствие Небе́сное, но творя́й во́лю Отца́ Моего́, И́же есть на небесе́х.